رواية مذكرات حبيبة 2 الفصل السادس 6 بقلم عادل عبدالله

رواية مذكرات حبيبة 2 الفصل السادس 6 بقلم عادل عبدالله

رواية مذكرات حبيبة 2 البارت السادس

رواية مذكرات حبيبة 2 الجزء السادس

رواية مذكرات حبيبة 2 الحلقة السادسة

: مالك يا شريف اتكلم ، انا كده قلقت اوي !! ايه اللي حصل ؟؟
: مصيبة يا حبيبة ، كارثة .
: يا ساتر يارب ، فيه ايه ؟ اتكلم يا شريف قلبي هيقف من الخوف .

: المحكمة حكمت عليا بالاعدام .
: يالهوووي !! ازاي ؟
: قضية المخدرات اللي هربت بسببها وجيت هنا ، المحكمة حكمت فيها عليا غيابي بالاعدام .
: يا نهار اسود ، لا يا شريف لا لا لا ..
وانفجرت بالبكاء مش قادرة اتكلم وبضرب خدودي ووقعت علي الارض واغمي عليا .
فوقت بعدها وشريف بيفوقني بالميه ، واول ما فتحت عينيا اخدته في حضني وانا بصرخ باعلي صوتي !!
كنت منهارة تماما وشريف بنفسه اللي كان بيحاول يهديني .
مش قادرة اتصور ان شريف يتعدم او يبعد بعيد عني !!!!!
قولتله وانا بعيط بانهيار : هنعمل ايه دلوقتي يا شريف ؟
: مش عارف ، حتي الفيزا خلصت ولازم اجددها !! و خايف اروح السفارة يتقبض عليا !!
: وبعدين يا شريف ؟؟ انا حاسة ان انا بحلم !!
: متخافيش كده يا حبيبة !! هحاول اشوف اي طريقة نفضل قاعدين هنا .
: ياريت يا شريف ، انت عارف ان اهم حاجة عندي اني اكون جنبك ، مش مهم فين المهم اكون جنبك وخلاص .
: انا جنبك اهو يا حبيبة ، متخافيش .
: انا خايفة عليك اوي ، مش عايزاك تضيع مني ، انت احلي حاجة في حياتي ، انا من غيرك اضيع .
: احنا مع بعض يا حبيبتي ، متخافيش .
كنت خايفة علي شريف وزعلانة علشانه اكتر من هو شخصيا .
كنت خايفة عليه لأني حبيته اوي لدرجة صعب كنت اتوقع اني ممكن احب حد بالشكل ده .
ده غير أني مش متخيلة هيحصل ليا ايه لو شريف غاب عن حياتي !!
ابسط شئ ممكن اتخيله اني هضيع حرفيا .
انا معرفش في الدنيا كلها حد غيره الا اهلي واهل طليقي ومستحيل افكر ارجعلهم تاني وارجع للجحيم اللي كنت عايشة فيه !!!
ده اقل حاجة ممكن يعملوها فيا انهم يقتلوني ، وكمان مش هرجع لوحدي ده انا هيبقي معايا بنتي اللي هولدها بعد ايام !!
وبعد ايام ولدت بنوته وشريف صمم يسميها حبيبة علي اسمي .
فرحت اوي وتمنيت ان تكون حبيبة وش السعد علينا وازمتنا تتحل .
لكن فوجئت بشريف بيقولي : احنا لازم نجهز نفسنا علشان نسافر .
: نسافر !!! ليه ؟
: كلمت واحد معرفة في السفارة علشان اجدد الفيزا ، رد وقالي مش هينفع نجددها لأن اسمي نزل في المطلوبين .
: وبعدين يا شريف هنعمل ايه ؟
: مفيش قدامنا الا اننا نسافر .
: هنسافر فين يا شريف ؟
: هنسافر ايطاليا .
: ايطاليا !!!
ووضح عليا الارتباك !! شريف سألني : مالك يا حبيبة ؟ شكلك اتغير كده ليه ؟
: بلاش ايطاليا يا شريف .
: ليه ؟
: انت ناسي ان جمال طليقي هناك ؟
: متخافيش ، انتي هتبقي معايا .
: لا يا شريف بلاش ايطاليا ،شوف اي بلد تانية .
: حاضر يا حبيبة .
بعد كام يوم شريف قالي : انا اتفقت مع ناس هيسفروني ماالطة لكن المشكلة اني هسافر تهريب عن طريق البحر .
: يعني ايه ؟ مش فاهمة !!
: يعني انا هسافر لوحدي لهناك لأن انتي مش هتقدري تسافري معايا بالطريقة دي ، خصوصا كمان علشان معاكي حبيبة الصغيرة !!!
: هتسيبني هنا لوحدي ؟؟
: لا يا قلبي ، انا هسافر الاول واول ما اوصل هناك هكلمك علشان تيجي .
: لا يا شريف متسبنيش لوحدي .
: يا حبيبتي مش هسيبك لوحدك ، هما يوم او يومين علي ما اوصل هناك واكلمك هتيجي علطول .
: لا يا شريف انا هسافر معاك زي ما هتسافر واللي يحصل يحصل .
: مش هتعرفي ، ممكن تغرقي بعد الشر ، ومتنسيش ان البنت معاكي !!
: انا مش عارفة ايه المصيبة دي !!!
: مفيش مصيبة ولا حاجة كل اللي هغيبه عنك يوم او يومين وبعدها هتلاقيني معاكي تاني .
: يعني مفيش حل الا كده ؟؟
: ايوه ، هو ده الحل الوحيد .
: ماشي يا شريف اللي تشوفه ، انا اي حاجة بتقولي عليها بعملها وانا مطمنة علشان عارفة ان تفكيرك ورأيك دايما بيكون صح .
: طيب بالمناسبة بقي تعالي امضي علي الاوراق دي ؟
: اوراق اي ؟
: ده عقد بالبيت ده اللي هنا في اتينا ، وده عقد بالشقة اللي اتجوزنا فيها في مصر وده دفتر بحساب في بنك هنا فيه مبلغ محترم ممكن تكملي حياتك انتي وحبيبة الصغيرة لو حصلي حاجة في اي وقت .
: انت بتقول كده ليه ؟؟ اوعي تقول كده تاني !!!
: العمر مش مضمون ، وخصوصا في الظروف اللي انا فيها دلوقتي ، ولازم أئمن مستقبلك انتي وبنتي ، وبالنسبة لسما بنتي الاولي انا كنت كاتب باسمها المحل اللي في مصر وفيه مبلغ كبير باسمها في البنك هناك .
: حرام عليك يا شريف انا مش قادرة اتحمل كلامك ده ، انا من غيرك اضيع ومش هعرف اعيش يوم واحد .
: متخافيش ، باذن الله هنكمل حياتنا مع بعض ، لكن انا بعمل كده علشان ظروفي دلوقتي لازم أئمن لكم مستقبلكم .
: لو حصلك حاجة بعد الشر انا هموت نفسي .
: انتي عبيطة !! وحبيبة الصغيرة دي مين اللي هيربيها ؟!
: انت اللي هتربيها يا شريف معايا .
: ان شاء الله ، يلا بقي خدي امضي الاوراق وخليها معاكي .
ورغم ان الاملاك اللي كتبهالي بمبلغ كبير و المبلغ اللي في البنك حوالي ٢ مليون جنية بالمصري !! يعني المفروض اكون في منتهي السعادة لكن الحقيقة اني كنت في منتهي الرعب !!
شريف لما لاحظ خوفي الشديد قالي : انا مش عايزك تبقي خايفة كده !! لاقدر الله لو حصلي حاجة في اي وقت مش هتكون لوحدك ولا هتكوني ضعيفة .
: بعد الشر عنك ، ازاي مش هكون لوحدي من غيرك يا شريف ؟
: بنتنا هتكون معاكي وفلوسك هتقوي قلبك وهتكون هي سندك وضهرك في الدنيا ومش هتحتاجي لحد ابدا .
: ابوس ايدك يا شريف كفاية ، مش عايزة اسمع منك كلام زي كده تاني .
: انا بس بفهمك كل حاجة علشان الظروف لكن بأذن الله مش هتحصل حاجة وحشة .
: يارب .
وبعد حوالي اسبوع كان كله حب ورومانسية مع شريف حدد ميعاد السفر .
وفي يوم سفره كانت اعصابي منهارة لكن شريف كان اقوي مني كتير وضحك وقالي : متخافيش يومين وهنكون مع بعض ، انا حجزتلك تذكرة الطيارة علشان هتسافري بعد بكره ونتقابل هناك .
: انت متأكد ان هناك أمان ومش هيتقبض عليك ؟
: بأذن الله ، خدي الورقة دي فيها اسم الرجل اللي هوصل عنده هناك وفيها رقم تليفونه وعنوانه ، لو مش عرفتي توصلي ليا اتصلي به هو هيدلك علي مكاني .
: انت مش هيكون معاك الموبايل بتاعك هناك ؟
: لأ ، علشان مفيش حد يقدر يوصل لي .
: خلي بالك علي نفسك يا شريف .
: اطمني ومتخافيش عليا .
شريف صمم اني مش اوصله واكتفي بتوديعي في المنزل !!
شريف مشي وقلبي انخلع معاه وهو ماشي .
بمجرد ما الباب اتقفل قلبي انقبض وكنت خايفة تكون دي اخر مرة اشوفه فيها ، فتحت الشباك ابص عليه وهو ماشي وانا عينيا مليانة بالدموع !!شريف اتلفت وبص علي الشباك ولما شافني واقفة ابتسم وشاور بايده مع السلامة !! و حاولت ابتسم انا وودعته بابتسامة .

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية مذكرات حبيبة 2)