رواية نعيمي وجحيمها الفصل الثالث والستون 63 بقلم أمل نصر

رواية نعيمي وجحيمها الفصل الثالث والستون 63 بقلم أمل نصر

رواية نعيمي وجحيمها البارت الثالث والستون

رواية نعيمي وجحيمها الجزء الثالث والستون

رواية نعيمي وجحيمها الحلقة الثالثة والستون

تبني فكرتك السيئة عن شئ خفي لا تعلمه، ويكبر بداخلك الحقد نحوه، تُحمله ذنب كل ما يحدث معك ثم تنقلب فكرتك هذه مئة وثمانون درجة مع رؤية الحقيقة الكاملة أمامك.
كانت هذه هي اكبر المفاجاَت التي لم يكن يتوقعها على الأطلاق، صراحة المرأة وهي تردف بكل أخطائها والنتائج التي وصلت إليها بعد ذلك، كان كسقوط الصاعقة فوق راسهِ، إصفر وجهه وتعرق جبينه، وعينيه اصبحت تتهرب منها غير قادرة على المواجهة، لقد كان قاسيًا في الحكم عليها، وشديد العنف في ردوده على الهاتف معها .
علمت المرأة ما برأسه، لذلك خاطبته بمشاكسة حتى تخرجه من جموده:
-إيه يا دنجوان مكسوف ماتبصيلي ولا إيه؟ دا باين اللي اتحكالي عنك كان كله كلام وخلاص.
استرعت انتباهه بكلماتها، مما جعله يسألها بفضول وهي كانت تجاوبه بصراحة:
-كانت بتحكيلك عني؟
– كتير .
– افهم من كدة انها حبتني زي ما حبتها؟
-ويمكن أكتر كمان.
عقب إجابتها الأخيرة صاح فاقدًا السيطرة:
-ولما هو كدة، عذبتني وعذبت نفسها ليه؟ مرضيتش تديني فرصة عشان اغير من نفسي وانا كنت بترجاها وهاين عليا ابوس على إيدها، عملت فيا وفي نفسها كدة ليه؟
ردت المرأة تُجيبه بغموض:
– انت لسة برضوا ما فهمتهاش ياطارق، كاميليا لما اختارت ما بينكم، مكنش بتدور ع اللي تحبه ولا يحبها، بنتي كانت اختارت على مبدأ اللي ما يكسرهاش لو اتخلى عنها!
توقفت تخرج تنهيدة طويلة ثم تابعت بأسى:
– عشان اجيبك من الاَخر، كاميليا ورثت عني كل حاجة عني في الصفات الوراثية، والدكاترة قالولها كدة بصريح العبارة، ان احتمال كبير قوي يجيلها نفس مرضي، يعني هتفقد انوثتها وجمالها حتى بالعلاج او ربنا شفى عنها.
هتف بانفعال نحوها:
-بس انا مكنتش هتخلى عنها، ولا كنت هسيبها….
قاطعته بقولها:
-خلي بالك الأختبار صعب يا طارق، وهي مرديتش تحطك في الإمتحان ده، عشان بتحبك وعشان شافت اللي حصل لوالدتها بعد ما اتخلى عنها جوزها اللي كانت بتحبه.
تسمر قليلًا امام نظرة الأنكسار بعيني نبيلة، فعلم على الفور، ان ما تخشاه كاميليا، كان اكبر من طاقتها، ولذلك لم يدع لنفسه التردد فى قوله القوي لها:
– مش صعب، مع واحدة زي كاميليا ما فيش اي شئ صعب، كاميليا تستاهل إن اضحي بعمري كله عشانها، بس كمان انا اعرف ان المرض دا ممكن يتلحق لو كان في أوله.
-ماهي بتداوم على طول بالفحوصات والتحاليل أول بأول، لكن برضوا مفيش حاجة مضمونة.
قالتها المراة، ليهتف بحماس نبع من داخله وبشدة:
– حتى لو مش مضمونة، والقدر حكم بكدا، انا برضوا متقبل وهفضل معاها في كل مرحلة تمر بيها، المهم هي فين دلوقتي انا عايز اشوفها، انا عايز كاميليا.
اشرق وجه نبيلة رغم بهتانه لتُجيبه مبتسمة:
-طب اهدى طيب وفكر شوية، اللي انا قولته مش سهل.
صمت قليلًا أمامها بتفكير ثم قال بنبرة أهدى من السابق:
– في الموضوع ده مفيش تفكير انا قررت وخلاص، لكن اللي شاغلني دلوقت بس هو مشكلة جوازها، وبصراحة عايزة اعرف هي ليه هربت اساسًا وفي يوم الفرح؟
-الكلام دا تفهمه منها هي ذات نفسها، انا المهم دلوقتي هو اني حطيتك في الصورة ولك حرية الإختيار، بنتي موضوعها مش سهل حسب اللي عرفتوا عن اللي اسمه كارم ده.
أومأ قليلًا بتفهم قبل يستدرك ليسألها بانتباه:
– افهم من كدة اني هشوفها دلوقتى، طب هي فين اندهيلها حالًا.
قاطعته بضحكتها قائلة:
-اتقل شوية يا بابا اتقل، كاميليا مش هنا، بس انا هديك عنوانها.
❈-❈-❈
بشرفة الغرفة، كان واقفًا بفنجان القهوة يرتشف منه، وهو يتطلع أمامه نحو الأشجار الخضراء والزهور المتنوعة بحديقة منزل العائلة، التي اصبحت مسكنهم منذ حملها بالطفل، لا يشعر بطعم القهوة ولا حتى يرى جمال الزهور كعادته فعقله كان يسبح بعيدًا في أفكاره،
يقلقه هذه الهيئة الغريبة منها، يصدمه فعلها والتخطيط الذي قامت به مع صديقتها دون إخباره، هذه النزعة الإنتقامية لم تكن ابدًا من سمات زهرته، هذا التحدي والتصميم على المضي في ماتفعله، يجعله متفاجئًا بشدة من هذا التغير، بالأمس أشفق ولم يطاوعه قلبه للضغط عليها ولكن اليوم فقد قرر ولن يتركها الا بمعرفة كل شئ منها، لن يتنازل عن غير ذلك، ف لينتظر الان حتى رجوعها من عند الصغير الذي سرق اهتمامها منذ الأمس، وجعلها تنشغل عنه، ولكن ف ليتريث قليلًا: -اصبر يا جاسر اصبر .
كان يغمغم بالكلمات حتى التف برأسهِ للخلف فوجدها في وسط الغرفة متسمرة محلها تنظر إليه، استدار بجسده ليخطوا نحوها مضيقًا عيناه بريبة مما يبدوا على ملامح وجهها من أشياء لم تريحه على الإطلاق.
اقترب منها يسألها بتوجس:
-إيه في إيه؟ شكلك ميطمنش، في حاجة حصلت؟
نفت بتحريك رأسها دون صوت، ازدادت حيرته ليهتف بنفاذ صبر:
-أمال في إيه بس؟ ما تنطقي يا زهرة.
بكلمته الاخيرة كان قد وصل ليقف أمامها تمامًا، فتلقفته هي وكأنها كانت بانتظاره، لترتمي فوق صدره وتتشبث بقميصه منطلقة بموجة من البكاء الحارق، شعر بوخزة بقلبه لفعلتها فلم يتمالك نفسه سوى بضمها بذراعيه بقوة، ليهتف هامسًا بصوت مهتز من فرط ارتياعه عليها:
– مالك؟ فيه إيه؟ إيه اللي وصلك لكدة؟
لم تجيبه بل زادت بنحيبها وشهقاتها العالية، لتجعله يتخلى عن فضوله في السؤال الاَن، وزاد من ضمها ليجلس بها على التخت من خلفهما، مستمرًا في التربيت على ظهرها، والمسح بكفه على شعرها، حتى هدأت قليلًا ليسألها بعد ذلك وهو يقبل أعلى رأسها:
– اظن دلوقتي تقدري تتكلمي، حتى عشان تريحي قلبي شوية بقى.
تنهدت تلتقط انفاسها جيدًا قبل ان تجيبه:
– والدتها طلعت مريضة يا جاسر.
– نعم!
هتف بها بعدم فهم ليُكمل بسؤاله:
-والدة مين يا زهرة؟ ما توضحي أكتر، انا مش فاهم حاجة.
خرجت من حضنه لتلتقي عينيها بخاصتيه، وتجيبه بأعين تترقرق فيها الدموع مرة أخرى:
-انا قصدي على كاميليا يا جاسر، طول عمرها بتمثل القوة قدامنا، وإن حياتها فل ومفيش اي حاجة تهمها، وعمرها ما اتكلمت ولا جابت سيرة والدتها اللي سابتهم وأطلقت من جوزها بقالها سنين، واحنا كنا محترمين رغبتها في عدم الكلام عن حاجة زي دي، بس النهاردة اول مرة اعرف الحقيقة اللي كانت مخبياها عن الناس كلها، حتى اقرب ما ليها…
توقفت فتولى هو البقية حسب ما توصل إليه بفطنته:
-يعني هي كانت بتراعي والدتها المريضة من غير ما تقول قدامكم انتو بس؟ ولا أهلها كمان معاكم؟
رددت بهز رأسها:
-مش عارفة، مش عارفة مين اللي عارف منهم ومين اللي ميعرفش، ميدو هو اللي حكالي عشان هي خدته عندها قريب، ودي أول مرة تحصل، هو اساسًا مكنش يعرفها، لأنها سابته على عمر سنة واللي قامت بتربيته هي كاميليا وباباها، الولد حكالي عنها يا جاسر، بعقله الصغير عرف انها بتاخد كيماوي…
قطعت لتعود لنوبة بكاءها مرة أخرى وهتف جاسر عليها بحزم نبع من خوفه عليها:
– كفاية بقى يا زهرة حتى عشان البيبي، وربنا لو ما سكتي لاندهلك ماما تسكتك.
على مزحته الاخيرة استجابت بابتسامة عفوية رغم بكاءها، ف اكمل:
– كملي عياط وانتي حرة بقى، لميا هانم هتاخدك من إيدك كدة ع الدكتورة عشان تطمن ، يالا بقى كملي لو عايزة تعب.
رفعت رأسها عن صدره تجفف دماعاتها، وقد تمكن من تشتيتها عن البكاء، لتقول بخوف مصطنع:
-لا خلاص، انا مش قد لميا هانم ولا قد تحكماتها، ربنا يجعل كلامنا خفيف عليها.
– ايوة كدة ناس تخاف ماتختشيش.
قالها متابعًا لمزاحه قبل أن يُغير فجأة بسؤاله:
– طيب ولما هي كدة والدنيا معقدة معاها أساسًا، بتعقدها ليه بزيادة؟ لا وكمان بتزيد عليها بعملة امبارح دي؟ لما دخلت نفسها في سكة انتقام.
ردت زهرة:
– مين قالك إن كاميليا كان غرضها الإنتقام؟
أردف لها جاسر بتصميم:
– فعلها يا حبيبتي، دي حاجة مش محتاجة زكاء عشان تتفهم، للأسف انتو الاتنين لعبتوا بالنار مع حد مش سهل أبدًا، كارم دا انا طول عمري عارف عنه الذكاء الحاد وسرعته الغير عادية في أنجاز المهام، لكن بعد ما شوفته امبارح؛ دا واحد تاني معرفوش ابدًا، وهي السبب.
-لأ مش هي السبب .
رددتها خلفه بإصرار لتتابع:
-هي كان كل غرضها انها تهرب منه، بعد ما عرفت حقيقته وقفل في وشها كل الأبواب، عشان ميديهاش فرصة تفكر حتى، وكاميليا عمرها ما كانت هتقبل بالهوان او انها تعيش مع واحد غصب عنها، دي أنسانة حرة.
تنهد بسأم ليهدر بها يائسًا:
-تاني برضوا مصممة ع اللي في دماغك وبتدافعي عن صاحبتك، طب سيبنا بقى من اللي راح، وخلينا في اللي جاي، دلوقتي بعد ما هربت هتعمل إيه؟ وهي أساسًا على زمته، ولا انتي ناسية؟
ردت ببساطة:
-هتنفصل؟
-نعم!
هتف بها باستغراب زادته هي بقولها:
– ما هو دا الطبيعي يا جاسر، هي أساسها عاملة المشوار دا كله عشان تنفصل عنه، ولا انت فاكرها يعني غاوية جو أكشن والحاجات دي .
عقب ساخرًا بدهشة:
-يا سلام! وكارم بقى هيقبل ويخلص الموضوع كدة بكل سهولة! دا على أساس إنه عبيط يعني؟ ولا هيسبها اساسًا لو عرف مكانها؟
رفعت كتفيها وانزلتهما لتجيب بعدم اكتراث:
-يعمل اللي عايز يعمله بقى، هي خلاص أمنت نفسها.
ختمت قولها لتفاجأ بنظرة حادة منه جعلتها تخاطبه سائلة بارتياع:
-في إيه يا جاسر بتبصلي كدة ليه؟
هدر بوجهها حازمًا يذكرها بلهجته المسيطرة:
-في انك هتقوليلي دلوقت على مكانها، لا وكمان هتحكي عن كل شئ بالتفصيل.
– بس انا معرفش كل حاجة.
قالتها بخوف قابله بصيحة قاطعة:
-هتقولي عن كل اللي تعرفيه يا زهرة، من طق طق لسلام عليكم، فاهمة ولا لأ ؟
حينما لم ترد ردد بصيحة اقوى:
– ردي عليا فاهمة ولا لأ؟
-خلاص فاهمة فاهمة .
قالتها مستسلمة لتغمغم بصوت خفيض:
-اعوذ بالله، عليه قلبة حواجب .
-إخلصي يا زهرة.
هتف بها بنزق، لتجيبه على الفور:
– حاضر اهو هتكلم
❈-❈-❈
بصدره العاري وقف خلف ستائر النافذة الحريرية البيضاء، يتطلع من الجزء المكشوف منها إلى الخارج، واضعًا كفيه بجيبي بنطاله القطني، بوجه متجهم، وانفاس متهدجة وكأن ما حدث لم يمر عليه ليلة كاملة قضاها في البحث المكثف، حتى عاد فجرًا، ف أبى أن يمر وقته دون أن ينفث عن غضبه في اقرب شئ تطاله يداه.
– خلاص انا كدة همشي بقى يا كارم؟ ولا لسة عايزني؟
هتفت بها المرأة التي من خلفه، فالتف إليها يجيب بنزق:
-هاعوزك في إيه تاني يعني؟ هو انتي لسة مزهقتيش؟
تبسمت المرأة بميوعة وهي تعدل جيدًا من وضع فستانها بعد ارتدائه:
-لا زهقت دا إيه؟ قول تعبت، إنت كنت صعب اوي النهاردة، بس اقول إيه بقى، عريس!
احتدت عينيه بنظرة مخيفة إليها سائلَا:
-تقصدي إيه؟
ارتجف قلبها فعدلت لتصحح على الفور:
-قصدي يعني انه كان هيبقى فرحك امبارح، لولا بس التعب المفاجئ اللي حل على عروستك، الا صحيح هي عاملة إيه دلوقت؟
تحرك بأقدامه كفهد يتربص بفريسته ليقترب برأسه، ونظرته المخيفة تكاد أن توقف قلبها:
-بتسألي ليه عن صحة العروسة يا جيرمين؟
تلجلجت تجيبه باضطراب:
-يعني هكون بسأل ليه بس؟ عايزة اطمن والله بعد اللي اتقال امبارح عن صحتها وخلاكم تأجلوا الفرح، إيه يا كارم، هو انت لسة معرفتش بغلاوتك عندي؟
قالت الاَخيرة واضحة كفها على عضل صدره القاسي، لتكمل بنعومة:
– اكيد عارف بمعزتك اللي خلتني اخترع حجة وهمية عشان اسيب نجيب والولاد واجيلك هوا، اول بس ما رنيت عالي وقولت عايزك، ماتتصورش الفرحة اللي حسيت بيها وقتها، انا عمري ما ارفضلك طلب أبدًا يا كارم.
حدجها بنظرة ثاقبة وكأنه يبحث عن سبب ما يجعله يود الفتك بها حتى يفرغ طاقة الغضب المشتعلة داخله، ولكنه استدرك ما ينتظره من خسائر لو اكتشف أمره مع امرأة رخيصة كهذه.
فعاد لعقله وقال ليقطع معها فلم تعد تلزمه الاَن:
-انا بقول انك تروحي دلوقتى احسن، مش عايزين جوزك يشك فيكي، إنت مش قد غضب نجيب
اومأت برأسها، لتتناول الحقيبة اليدوية خاصتها، وقبل ان تتحرك نحو الباب الخروج إلتفت برأسها إليه تخاطبه:
-هتوحشني أوي يا كارم أوي .
تفوهت بالكلمات وحين لم تجد أي رد فعل سوى هذا الوجه الجليدي، استدارت وخرجت، لتتركه لأفكاره،
فهذا ما ينقصه، ان يكون حبيبًا لامرأة كهذه، ومن ارادها بحق هربت من سطوته، كالسابقة، تنفس بعمق ليعود إلى تخته، علّه ينجح في محاولته للنوم، فيجب عليه أخذ راحة جسده الاَن حتى يستفيق للقادم، ولكن كيف سيفعل؟ وصورتها لا تغادر ذهنه، لمستها تجعله في اشتياق دائم إليها، كيف سيفعل؟
انتبه على صوت جرس المنزل مع طرق متواصل على باب الشقة، فاعتدل على الفور ليخرج سريعًا من غرفته بتحفز لصب غضبه على من يجده خلف الباب، فهذا ما يريده بالفعل، وكانت المفاجأة، أن القادم لم يكن سوى والدته توقف يردد بارتباك:
-أمي، إنتي جيتي هنا ازاي؟ وايش عرفك أني هنا؟
القت على نظرة صدره العاري لتومئ بذقنها مخاطبة له:
-طب البس حاجة الأول عشان متاخدش برد .
-أمي.
اردف بها بسأم وهو يلتف ليعود بداخل شقته ويجلس على اقرب مقعد وجده أمامه متابعًا بقوله:
-سيبك من الكلام دا بقى، وتعالي كلميني الأول، انتي عرفتي إني هنا ازاي؟
تغضن وجه المرأة لتشاركه الجلوس على المقعد المقابل، وردت بلهجة لائمة:
-إيه يا كارم؟ مستغرب ان والدتك الست البسيطة عارفة مكان الشقة اللي بتقابل فيها عشيقاتك؟
-عشيقاتي!
رددها بتعجب اثار غضب والدته لتصيح عليه:
-أمال كنت فاكرني نايمة على وداني، وعقلي المحدود مش هيجيب الصفحة اللي بتقدر بكل براعة تدرايها عن الناس، مرات نجيب كانت بتعمل عندك إيه يا كارم؟
احتدت عينيه مع سؤالها المباغت، ليشيح بوجهه عنها، ف السيدة الوالدة يبدوا أنها كانت على علم بكل شئ، والكذب الاَن لن يجدي بفائدة معها، حين لم تجد المرأة ردًا، تابعت تخاطبه بقوة:
-كان نفسي الصفحة الجميلة اللي بتبرع في رسمها قدام الناس، تكون كدة ع الحقيقة كمان، ليه يا بني تخون اقرب ما ليك، نجيب دا ابن عم والدك، حتى خد بحق العيش والملح أللي ما بينا وبينه…
هدر يقاطعها بحدة:
– انا مروحتش لحد ولا لعبت عليه، هي اللي رمت نفسها عليا، ودا عرض مظنش إن في راجل هيرفضه، اعتبريه شفقة.
مع كلمته الاَخيرة إستشاطت غيظًا لتهدر به:
-بلاش كلامك المستفز دا يا كارم، يا بني حرام عليك.
-حرام على مين؟
صرخ بها ليُتابع بهتافه الحاد كازًا على أسنانه:
– يعني انتي جايالي النهاردة وانا فيا اللي مكفيني من من اللي حصلي امبارح عشان تديلي مواعظ، فيه أيه؟.
صمتت قليلًا والدته تمتص غضبه، ثم تناولت كف يده تخاطبه بحنان:
-سامحني يا حبيبي لو كنت زودت الضغط عليك، بس انا عايزاك تعقل كل ده بذكائك شوية، إنت عارف وانا عارفة إن كاميليا كويسة، وعملة امبارح دي أكيد وراها حاجة كبيرة ما بينكم، يا أما انت ضغطت عليها كعادتك لما تعوز شئ بشدة، بس مش كل حاجة بتتاخد بالقوة يا كارم.
ضيق عينيه يسألها بريبة:
-قصدك إيه؟ وضحي أكتر يا ست الكل.
اخرجت تنهيدة كبيرة المرأة، لتجيبه بنظرة قوية:
-قصدي انت عارفه كويس يا كارم، اليوم اللي انت عزمت فيها كاميليا ع الغدا في غيابي، واحدة جارتي سألتني عن الصريخ اللي كانت سامعاه في وقتها من بيتنا، انا مسألتكش بس تقريبًا خمنت اللي حصل.
صاح يضرب بكفه على ذراع المقعد من جواره:
-خمنتي أيه يا ست ماما؟ عشان تبقى عارفة بقى، انا موصلتش للي انا عايزة على فكرة.
– بس يكفي المحاولة يا كارم، ودي لوحدها صعبة على أي ست.
قالتها المرأة ليُشيح بوجهه عنها يزفر بقوة، فمبدأ ان يكون مكشوفًا هكذا أمام أحد ما حتى لو كان والدته، مرفوض تمامًا بالنسبة إليه، لذلك عاد إليها يردف بتحدي:
-خمني زي ما انتي عايزة يا ست الكل، كاميليا هترجع ورجلها فوق رقبتها، وساعتها هخليها جارية تحت رجلي، شغلها هو متعتي وبس، ها أيه رأيك بقى يا أمي؟
تطلعت إليه المرأة قليلًا بصمت، قبل أن تجيبه بقنوط:
-هقول إيه يعني يا بني؟ ربنا يهديك.
❈-❈-❈
كطفلة مذنبة كانت تتطلع إليه بتوجس وترقب في انتظار كلمة منه، وهو يرمقها باعين مشتعلة، تسمع صرير أسنانه التي يطحنها من الغيظ، انفه ينفث دخانًا بغضب لا تعلم سببه!
-روحتي قابلتي الراجل لوحدك يا زهرة؟.
سألها بنبرة هادئة مريبة، فردت بتلقائية رغم توجسها :
– ويعني هو كان ميعاد رومانسي، دا كان في كافيه مشهور وعام.
هدر بصيحة أجفلتها:
– وكمان ليكي عين تستظرفي؟ بتقابلي راجل غريب لوحدك يا زهرة؟
هتفت تجيبه رغم ارتياعها من هيئته:
– مش كنت بساعد صحبتي، هو انت هتشك فيا ولا إيه؟
-صاحبتك صاحبتك، مراحتش تقابله هي بنفسها لييه؟
مع صرخته الاَخيرة زحفت للخلف لتلتصق بقائم السرير، بخوف تجيبه:
– ما انا قولتلك ان اللي اسمه كارم دا كان فارض عليها حظر شديد، يعني مكنتش هتقدر تقابله، جرا إيه يا جاسر؟
ردد خلفها وهو على حافة الجنون ورأسه تقترب من وجهها بشدة:
-جرا إيه يا جاسر! مش عارفة جاسر جراله إيه بعد عملتك؟ بقى تخططي مع صاحبتك وتنفذي وتقابلي رجالة غريبة من ورايا ولسة بتسألي؟
مع هلعها من هيئته، وضعت كفها على موضع طفلها، تردد إليه بتهديد لتردعه عنها:
-خلي بالك، الزعل وحش ع الست الحامل، حتى اسأل طنت لميا…..
قاطعها صارخًا:
– اخرسي مسمعش صوتك خالص، انتي فاهمة ولا لأ،
أومأت برأسها مزعنة لأمره بتخوف، فانتفص هو فجأة من جوارها، ليتناول الهاتف، فنست لتسأله بفضول:
-طب هتتصل بمين دلوقت؟
-بقولك إخرسي.
هتف بها لتلتزم الأدب وتعود لصمتها، مع ارهاف السمع جيدًا، لمحتوى المكالمة، وقد فاجئها بإسم المتحدث من الجهة الأخرى:
– ايوة يا كارم…. عامل ايه النهاردة؟ ….. تمام انا كنت عايز اقابلك طيب…… لا سيبك من الشغل انا عايزك في حاجة تانية، فاضي كدة بعد ساعة من دلوقتي؟….. تمام يبقى اتفقنا.
فور انهائه المكالمة سألته بلهفة:
– طب بتكلم كارم ليه طيب؟
ردد صارخًا مرة أخرى وهو يتجه نحو خزانة ملابسه:
-مية مرة اقولك اخرسي يا زهرة مسمعش صوتك خالص النهاردة.
نفخت بضيق فور ان استدار عنها، وفضولها القاتل جعلها تود العودة لفعل الأطفال بقرقضة ألأظافر، بعد أن اشعل حيرتها بمكالمته
❈-❈-❈
خلف زجاج نافذتها كانت تراقبه من محلها وهي جالسة على نفس وضعها على مقعدها، تتابعه من غرفتها في أعلى المبنى، وهو يعتلى سيارته ثم سار بها نحو وجهته حتى اختفت من أمامها، لتردد دعائها برجاء:
-يارب استر يارب، جيب العواقب سليمة يارب.
أما هو فقد انتبه اَخيرًا لإنارة هاتفه الصامت بالإتصال،
تناوله سريعًا ليجيب على المتصل بعجالة لتركيزه الشديد في القيادة:
– ايوة يا جاسر عايز إيه؟
هتف يجيبه الاَخر:
– مبترودش عليا ليه يا بني؟ دا انا بتصل بيك من الصبح .
رد طارق مع انشغاله برؤية الطريق:
– معلش كنت بعمل مشوار مهم كدة ونسيت التليفون، اخلص بس اللي في إيدي وابلغك على طول، بس اقفل دلوقتي عشان الطريق معلش.
-طب إنت رايح فين ؟ ولقيت كاميليا ولا لسة عشان انا….
-بعدين يا جاسر، اقفل بقى الله يخليك، ولا اقولك هقفل انا ، سلام بقى
❈-❈-❈
في النادي الرياضي خاصتهن، عادت مرة الجلسات المشتركة بينهن بعد ان انفك الحصار عن ميري، وقد اذعنت لأمر أبيها ونفذت المطلوب منها، أما ميرفت والتي تعيش الان فترة استراحة محارب، في انتظار تحين الفرصة المناسبة، فقد كانت تقلب في شاشة الهاتف حينما انتبهت لهذا الخبر لتخاطب شريكتها:
– شوفتي يا ميري الخبر الجديد؟
سألتها الأخرى وهي ترتشف من كوب العصير:
-خبر إيه بالظبط؟
ردت ميرفت بلهجة ماكرة:
-شكلك كدة ربنا بينتقملك، الولد اللي اسمه كارم مدير اعمال جاسر الريان، فرحه اتلغى مع الزفتة كاميليا، من نص الفرح تقريبًا، وقال أيه بيقولك، ان العروسة تعبت، اقطع دراعي إن ماكان الموضوع ده فيه إن .
قطبت ميري لتسألها باستفسار:
-تقصدي أيه بالظبط يا ميرفت؟ انا بصراحة مش فاهمة.
زمت شفتيها المذكورة تعصر عقلها ثم ردت بتفكير:
-اممم مش عارفة بس انا عندي شك كدة، ومش مصدقة، اصل بصراحة كدة، انا كان عندي شك من زمان في علاقة بين البت دي واللي اسمه طارق، اكيد كارم عرف، ودا اللي خلاه يفركش الفرح بعد ما اكتشف خيانتها، دي سهونة زي صاحبتها صدقينى.
زفرت ميريهان لتعقب بتأفف:
– يوه يا ميرفت، متجبليش سيرة الأشكال دي الله يخليكي مش ناقصة قرف انا .
أومأت لها المذكورة وهي تعود بجسدها على الكرسي للخلف:
– عندك حق يا روحي، احنا جاين نرفه عن نفسنا، بالجو الجميل بتاع النادي والأشكال الحلوة اللي فيه .
قالت الأخيرة بغمزة بعينيها نحو احد الرجال الرياضين، التفتت ميري نحو ما تقصده صديقتها، لتُصدر صوت صفير صغير وتردد بإعجاب:
– واو يا ميرفت، انا فعلا وحشتني الحاجات اللي تجنن دي ، الرجال اللي بجد مش العيال ال….
قطعت لتردف بتأفف وقد ازعجها شئ ما :
-يييي دا بيجي ع السيرة دا ولا إيه؟
انتبهت ميرفت نحو الجهة التي تقصدها ميري فتبسمت بخبث تخاطبها:
– فهمت انا قصدك مين بالعيال.
تجعدت ملامح ميري بسأم، معطية ظهرها بتعمد لعدم الالتفاف حتى أتى من خلفها ماروا يهتف بغضب:
-يعني برضوا خرجتي من غير ما تبلغيني يا ميري؟
جاهدت ميرفت لكبح ابتسامتها وهي تخاطبه بمهادنة:
-معلش يا مارو، هي اكيد نسيت لما انا قولتلها تعالي عايزاكي ضروري.
التف مارو نحو ميري التي أسندت وجهها على كف يدها المستندة بمرفقها على الطاولة تطالعه بصمت :
-يعني انتي صحيح نسيتي يا ميري؟
اومأت له بأهدابها دون صوت، فقالت ميرفت:
-شوفت بقى عشان تصدقني.
رمقها بنظرة تعلوها الزهو وهو يقول:
-عشان خاطرك انتي بس يا ميرفت، انا مش هزعل ولا ازعلكم ، ما انتوا اكيد وحشتكم القعدة مع بعض، على العموم انا كنت جاي اساسًا اتدرب النهاردة، عن إذنكم بقى، هسيبك دلوقتي شوية يا بيبي وراجعلك بعد شوية
قال الاَخيرة بمداعبة على أسفل ذقنها بطرف سبابته، قبل ان يتركهن ويغادر
غمغمت ميري ساخرة وابصارها ارتكزت على جسده النحيف فور ان التف بظهره وابتعد قليلًا:
-ابقى خليهم يشوفوا العضلات.
اطلقت ميرفت ضحكة قوية لتقهقه بعدم قدرة على التوقف، وعقبت ميري على حالتها:
-اضحكي يا اختي اضحكي على خيبة صاحبتك اللي كانت مدوراها شرق وغرب، يرسى بيها الحال، تبقى زوجة ده…
قطعت لتكمل بتحسر:
-بقى يا ربي بعد ما كنت زوجة جاسر الريان اللي كل الستات هتجنن عليه، يجور عليا الزمن وابقي مرات الواد العبيط ده؟
توقفت ميرفت عن الضحك مجبرة، فقد لامست ميري بكلماتها جرحها هي الأخرى
❈-❈-❈
وعودة إلى جاسر الريان الذي اجتمع مع مدير اعماله هذه المرة في مكتبه لكن على الكنبة الجانبية بالغرفة ، لفتح حديث ودي بعيدًا عن العمل ومشاكله:
– نعم يا جاسر باشا كنت عايزني في إيه؟
هتف بها كارم سائلًا، وجاء رد الاَخر بلهجة هادئة:
– عايز اطمن عليك يا كارم، اعتبرني زي صاحبك، احنا عشرة بقالنا سنين دلوقتي .
اومأ له كارم بتماسك ووجه مغلف، لا يظهر أي مشاعر، وهيئة جليدية اختلفت عن الأمس تمامًا، فهذا الجانب المتعالي من شخصيته لايقبل بالتأثر لأي شئ مهمها حدث، لذلك جاء رده:
-أكيد يا فندم، يا جاسر باشا انت في مقام اخويا اللي بتعلم منه دايمًا، ودي حاجة مفيهاش مناقشة.
رد المذكور:
-كويس قوي..
قالها وتوقف قليلًا بتفكير ثم تشجع ليردف:
– حيث كدة بقى، يبقى انا أكيد ليا معزة عندك يا كارم؟
أومأ يجيبه بتفكر:
-أكيد… لكن هو انت عايز مني حاجة يا باشا؟
ابتلع ريقه جاسر ليُجيبه بحرج يحاول بصعوبة أن يتخطاه:
– بصراحة اه، وليا عشم انك تقدرني.
تبسم كارم بجانبية، وقد بدا انه توقع الاَتي من الحديث، ليرد بشبه ابتسامة:
– خير يا جاسر باشا، قول .
❈-❈-❈
توقف طارق بسيارته امام المنزل الموصوف على العنوان المدون في الورقة التي بيده، وذلك بعد توقيفه لعدة اشخاص من اهل القرية للسؤال المتكرر عنه، حتى وصل إلى هنا امام هذا المبنى الغريب عن باقي منازل القرية من حيث البناء المعماري، فقد كان اكبر وافخم رغم قدمه، وبهتان الوانه، ولكن إن دل على شئ، فهو يظهر اصالة من قام ببنائه،
عدل من ملابسه يتلفت يمينًا ويسارًا بتردد قبل أن يحسم ويشجع نفسه، خطا ليدخل من باب السور الصغير ثم واصل تقدمه حتى باب المنزل، بحث عن جرس ولم يجد، لذلك قام بالطرق بقبضة يده على بابه الخشبي المثقل، والمزين بالنقوش المتعدد على الطريقة القديمة، سرقت انظاره في التأمل بها حتى أجفل بفتح الباب فجأة، فخرجت إليه امرأة اربعينيه بملابسها وهيئتها الريفية تساله:
– يا اهلا وسهلا، مين الباشا؟
تحمحم ليُجيبها بحرج وارتباك:
-اا انا اسف لو جيت لحضراتكم من غير ميعاد، بس انا بصراحة مقدرتش استنى…
سألته المرأة بعفويتها:
-تستنى إيه يا باشا؟ هو انت عايز إيه بالظبط؟
اضطرب ليُجيبها على تردد:
-بصراحة انا كنت جاي اسأل عن… كاميليا، تعرفي واحدة اسمها كاميليا؟
توسعت عيني المرأة بلهفة لم يفهمها لتسأله بحدة:
-طب انت مين بالظبط؟
أجابها على الفور دون انتظار:
– انا طارق، رئيسها في الشغل….
قاطعته مهللة بترحيب:
-يا اهلا يا باشا، نورت البلد يا طارق باشا، اتفضل اتفضل، دا أنت أنست ونورت.
استسلم لجذب المرأة من ذراعه وهي تدخله سريعًا بداخل المنزل، وتغلق الباب خلفها.
طالعها طارق باستغراب يسألها:
– هو انتي تعرفيني؟
واصلت بجذبه المرأة لتزيد من دهشته بقولها:
– يا سيدي بس اتفضل انت الاول، بيتك ومطرحك
-بيتي ومطرحي.
غمغم بالكلمات بعدم فهم وهو يكمل بخطواته داخل المنزل الغريب، حتى اصطدمت عينيه بها، بوجهها المشرق وابتسامتها الرائعة وكأنها واقفة لاستقباله، ليردد لها بلهفة وعدم تصديق:
-كاميليا .

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية نعيمي وجحيمها)