رواية خطة فاشلة الفصل الأول 1 بقلم روان حسن

رواية خطة فاشلة الفصل الأول 1 بقلم روان حسن

رواية خطة فاشلة البارت الأول

رواية خطة فاشلة الجزء الأول

رواية خطة فاشلة الحلقة الأولى

قاعة أوبن إير علي البحر صوت الموج عالي بس مش أعلي من المزيكا في المكان، معازيم كتير ناس أعرفها و ناس لا و هناك العروسة، البيست فريند، وهي بتنخطب لخطيبي السابق و صوت قلبي بيتكسر مش مسموع، بس مكنتش أنا لوحدي اللي موجوعة كان كمان
_زياد أنت هتعيط بجد؟
زياد=أعيط ايه أنتي هبلة مفيش رجالة بتعيط أنا عيني مدمعة بس عشان الهوا شديد
أعرفكم بنفسي أنا عائشة والقريبين مني بينادوني عيوش أو عيشة و حكايتي ابتدت من وأنا صغيرة لمه لعبتي اتكسرت و قعدت أعيط عليها لأني كنت بحبها جدا واللي كسرتهالي بقت أقرب واحدة ليا عُلا واللي بالصدفة اتنقلوا يسكنوا في نفس عمارتنا هي و قرايبها من ضمنهم زياد ابن خالتها وبقينا إحنا التلاتة أكتر من الاخوات كل دروسنا و مذاكرتنا و حتي شغلنا بعدين بقي سوا، لمه عملنا بيدچ علي السوشيال ميديا لتنظيم حفلات الزفاف و بالوقت بقينا معروفين نوعاً ما، أنا و عُلا بننظم الديكور و زياد هو الفوتوغرافر وأكتر حاجه بتميز شغلنا أننا بنلتزم بالضوابط سواء في تصوير العروسين أو غيره و ده اللي ميّزنا عن غيرنا في المجال، المهم عشان مطولش عليكم حياتنا كانت تحفة لحد اليوم اللي اتقدملي فيه أمير و وافقت بيه خصوصاً أنه كان واجهة اجتماعيه و مهتمتش لحُبي الأول و الأخير واللي أكيد خمنتوا هو مين؟ بس للأسف قلب زياد كان مِلْك ل عُلا و بس
_تعالي نسلم علي العرسان
زياد=أنا أكيد مش هعمل كده يا عيشة
_أنت عايز الناس تقول عليك ايه دي بنت خالتك
زياد=مفيش حد واقف في القاعة دي ميعرفش أنا بحب عُلا ازاي ف يقولوا اللي يقولوه مبقتش فارقة
_اللي بيحب بجد بيفرح ل حبيبه
زياد=عيشة ابعدي عني عشان والله أنا جوايا غِلّ و مش هحلّ
_هو أنت مش هتبطل جمل التكاتك دي بقي
زياد=أنا مقهور أوي يا عيشة قسماً بالله حاسس أني بتنفس من خُرم إبرة
حاولت أفك الجو_بقولك ايه، فانية
ابتسم=دي مواساة إزاي بذمتك
_ما أنت عارف مبعرفش أواسي حد
زياد=أهو أنتي كده، جاية علي الواحد بخسارة
_أخرس و تعالي معايا عشان أوريك الكيد اللي علي حق
بصتلهم بقرف_مبروك يا عرسان
أمير بإحراج*الله يبارك فيكى يا عيشة
_اسمي عائشة يا عريس أصل أنت أجنبي عني
التفت ل زياد اللي بيبص ل عُلا بنظرة كلها عتاب و لوم معرفش ازاي عرف يترجم مشاعره كده! كنت حزينة عليه أوي
زياد=مبروك يا علولة ربنا يسعد قلبك و الحُزن ميعرفلهوش طريق
عُلا بإرتباك-ا ا الله يبارك فيك يا زياد عقبالك
زياد=عقبالي آه، يلا بينا يا عيشة
بصتلها و عيني جات في عينيها وهي بتقولي
عُلا-خير مش هتباركيلي يا صاحبة عمري
بصتلها وأنا اللمعة اللي في عيني ليها راحت وبقي مكانها دموع_مبروك يا صاحبة عمري تتهني، بغض النظر عن اللي حصل بيننا هفضل أتمنالك الخير
ومشيت وأنا بمدّ و زياد جه ورايا
بكيت بصوت
زياد=هتفضحينا يخربيتك تعالي ورايا ده أنتي كيادة جداً مش ممكن
_بطل تريقة بقي وخليك چنتل و وصلني
ضِحك=تعالي أنا أصلا عايز أمشي كفاية أوي كده
ولأن قعدة السطح قعدتي المُفضلة طلعت في يوم عشان ألاقي صوت أغاني
_أنت بتسمع ايه
=مفيش ده أنا و تامر عاشور كان معانا حوار كده و بِنحِلُّه
” ولا سامع ولا راضي و أقوله هموت يقول عادي ”
زياد=قول كمان يا فنان قووول
ضحكت_أنا بجد حساك مراهق ف ثانوي حبيبته سابته عشان مراهق تاني برده بس عنده موتوسيكل صيني و بيستناها بعد المدرسة
بهزار=يعني حتي في الخيال بتساب عشان واحد تاني هي الدنيا عايزة مني ايه بجد!
_فصلت من الضحك المهم دلوقتي هنعمل ايه في الشغل أنا الصراحه مش هقدر أشتغل معاها تاني و عشان أنتوا قرايب و هتكملوا ف أنا هنسحب و….
زياد=لمه تخلصي هبد قوليلي
بصتله ببلاهة
زياد=أنا هنسحب و نينينيني
ابتسمت_أنا بتكلم بجد
زياد=وأنا ههزر معاكي ليه أنتي هتصاحبيني!
_زياااد
زياد=عيييشة، أسمعيني أنا أصلاً قررت هنكمل شغل سوا مع التيم و الإيراد اللي هيطلع هنقسمه زي زمان لو معندكيش مانع لأن أنتي عارفه عُلا متقدرش تعيش من غير شوبينچ
ابتسمت_آه طبعاً أنا أصلاً ميرضنيش أنها تتأثر ب أي حاجة في الأول و الآخر إحنا بدأنا سوا
زياد بضحك=فاكرة شِعارنا الطفولي بتاع زمان
ابتسمت_الحاجة مبتكملش إلا لمه نكون سوه، صداقتنا مربعة قسمنها علي أربعة زياد عيشة سليم عُلا
زياد=بس سليم استندل بعد الأغنية دي و هاجِر مشوفناش وشه تاني
ضحكت_أنت بتشرب ايس كوفي ولا ينسون
زياد=ينسون وأنتي
_أنا بستغربك بجد أول مرة أشوف ولد بيشرب ينسون
زياد=هي مُنكر ولا ايه ما أشرب ينسون عادي و بعدين ما أنتي السبب
_هيلزقها فيا بقي
_العريس حيوان بجد شايف العروسة متوترة و شوية وهتعيط وهو مش مهتم، أنا لو مِنِّها أفركش
زياد=فعلاً طالما مش بيحبها أخدها ليه؟ما يمكن في حد تاني يتمني ضفرها بس هنقول ايه النصيب
_هتفضل تصيح لحد امتي؟عدي أربع شهور يا عمنا
زياد=عشان أعمل موڤ أون محتاج يجي سكة العمر كله و بعدين هبقي زي الفل
_أوڤر أوي
زياد=أنتي إيش عرّفك أنتي عن الحُب من طرف واحد ده لعنه بجد لعنه
بصتله وهو بيصور و همست بصوت واطي_ومين قالك إني معرفش
التفتلي=ايه؟
_ولا حاجه كنت ببرطم علي صياحك
ابتسم=باردة
_مالك سرحان في ايه
زياد=هو في غيرها اللي ربنا يسامحها
_و بعدين يعني
زياد=بجد يا عيشة مش عارف و مش مرتاح وكل ما بشوفها قلبي بيتقبض و بتضايق أنها مبقتش ليا في الآخر
عارفة؟ أنا أحلامي كانت كبيرة بدخل جمعيات وبحط القرش علي القرش، بستخسر في نفسي الحاجه عشان أحوش و نبقي سوا كنت مخطط لكل حاجه حرفيًا بس دلوقتي حاسس أني تعبت في الفاضي
اتنهدت_هم بقالهم قد ايه مخطوبين؟
زياد=ست شهور و أربع أيام
_اممم خلاص هانت و هترجعلك
اتنفض من علي الكرسي=بالله عليكي؟ طب احلفي كده، طب أنتي ايش عرفك هي قالتلك حاجه؟
_ماسورة و ضربت؟ لا ما أنت عارف إننا مبنتكلمش أساساً
زياد=بتهبدي يعني طيب يا ستي شكراً كفايه
_أنا عاشرت أمير فترة قبل ما أسيبه و صدقني هو بني آدم ميتعاشرش، عُلا فرحانه بفلوسه بس و شوية و هتظهرلها العيوب
زياد=عادي ممكن تستحمل
_عُلا؟!!! أنت مصدق نفسك وأنت بتقول الكلام ده
زياد=عيشة بلاش تطلعيها مادية عشان هزعل منك والله
_تزعل مني ليه مش دي الحقيقة اللي مش عايز تواجه نفسك بيها؟ وأنا بتبلي عليها مثلاً؟
عليت صوتي_ مش كفاية راحت اتخطبتله من غير حتي ما تقولي و عرفت زيي زي الغُرب!
أنا يا زياد! أنا صاحبتها الوحيدة علي كلامها بقيت غريبة في يوم و ليلة وكل ده عشان خاطر واحد
زياد=طيب خلاص حصل خير
_مش هتعرف تدافع عنها و بالمناسبة مفيش حاجه بتحصل لينا مش خير، الموضوع متوقف علي نظرتنا إحنا وأنا بقولك الحمدلله علي الموقف اللي بيّنلي فيه حقيقتها
زياد بزعيق=عيشة خلاص
سبته و نزلت من السطوح علي البيت لمه لقيتها طالعة شقتها بصيتلها و الدموع في عيني
_عارفه لو كنتي جيتي قولتيلي أنك عينك منه كنت هحذرك و أقولك خلي بالك الفلوس مش كل حاجه و الأفعال بتفرق بس أنتي مجيتيش، طول عمرك فاضية من جوه و مبتعرفيش تحكمي علي الناس صح
وسيبتها و كملت نزول لشقتي
تاني يوم في الشغل
زياد=لقيت الشاورما بتقولي اشتريني لعيشة ف اشتريتهالك و معاها إكسترا تومية لعيون عيوش
بصتله بلوم و ديَّرت وشي
زياد=واضح أن الموضوع بقي أكبر من الشاورما أجيبلك كريب طيب؟
مقدرتش مضحكش علي ريأكشنه وهو بيتكلم بجد
زياد=يا ستير يارب أخيراً، لازم أصورك بالضحكة الحلوة دي
_الصورة كيوتة
زياد=عشان صَورتك يا عسسسل
_يادي التكاتك و سنينها، صحيح أنا شفت الندم ف عيون عُلا امبارح و حاسة كده أنها مفتقدانا
زياد=هه اللي باعنا براحته
_يا خسارة كنت هقولك علي خطة ترجعلها بيها
زياد=بالله عليكي؟ قولي بسرعة مستنية ايه
_بص أول خطوة هي معروفة و محر.وقة في كل الأفلام و المسلسلات القديمة و الجديده ألا وهي الغيرة
زياد=و دي أعملها ازاي يا أذكي اخواتك
_ده بقي مربط الفرس، عُلا عارفة و متأكدة انك بتحبها و مستحيل تفكر في غيرها حُبك بقي كارت محر.وق
زياد=طب ما دي الحقيقه صباح الفل
بإبتسامة شريرة_لا يا زيزو عشان أنت بقيت بتحبني أنا
زياد=اييييه يا عيشة اللي بتقوليه ده، أنا مستحيل أحطك في التمثيلية الهبلة دي و بعدين أنتي آخر واحدة في الدنيا ممكن عُلا تصدق عليها حاجه زي كده
_لا بالعكس هتصدق جدا لأنها زي ما اتخطبت لأمير وهو كان معايا أنا هتخطب للي طول عمره بيحبها كنوع من أنواع الانتقام
زياد=الكلام ده هيدخل علي عقل واحدة غريبة مش عُلا يا عيشة أنتي مُدركة احنا بنتكلم عن مين! دي حفظانا و عارفة أن احنا اخوااااط ومفيش أي حاچة بيننا
ابتسمت بُحزن_يا سيدي سيب إقناعها عليا ولو منجحتش ابقي كلمني، أنت خسران ايه؟
زياد=ماشي يا عيشة أمّا نشوف
بدأت فعلاً الخطة بتاعتي صوري أنا و زياد كنت بنزلها دايماً استوري وانا عارفة انها بتخش تشوف وهي عاملة إلغاء للسين هتسئلوني عرفت منين هقولكم عِشرة عمري ومحدش حافظها قدي وأكيد كان واحشها الشغل معانا بس التجديد بقي الكلام اللي بدأت أكتبه
اشتريت لنفسي وردة لونها أحمر و اتصورت مع زياد واحنا في الشغل وأنا بضحك وكتبت “قالي أن الورد للورد”
دخل شافها أول واحد
زياد=يلا يا كذابة
_خلاص بلاها خطة بقي وابقي قابلني لو رجعت
زياد=عيشة هو أنتي بتذليني لسمح الله
_أنا أقدر برده ياااا زيزو وبعتت ايموشن ضحك
زياد=مستغرب زيزو منك أوي بس ماشي شغال
زياد=قولت اشتريلك سلسلة فضة تنزليها استوري
زياد طول عمره بيجيب هدايا و لسه محتفظة بيها بس مش عارفة ليه الهدية دي بالذات زعّلتني يمكن عشان عارفة الغرض من وراها بس مرضتش أبيّن حاجه
ابتسمت وقلت وأنا بفتحها_تسلم إيدك يا زياد علي شكل ايه بقي
زياد=كرة أرضية
_اشمعنا
زياد=عشان أنتي My world أنتي عالمي
_بعرف انجليزي والله مش لازم تترجملي بس انت مقولتليش برده جايبها كرة أرضية ليه؟
زياد=آه ده السمع بعافية بقي ما برده السن له أحكام
_زيااااد
زياد=كده هخاف يعني ولا ايه ما تظبطي
ابتسمت_أنت غريب انهارده علي فكرة
زياد=صح؟ أنا برده حاسس بكده
كان نفسي يقولي غريب بس بحبك أحلامي كرتونية أوي
أنتي عالمي كلمة بسيطة و قالها بحسن نيّة لأني عارفة أني غالية عنده بس مش ده اللي كنت مستنياه و أول ما حسيت أني هقرب من حلمي الأول و حُبي الأولاني كان لازم عُلا تتدخل بعد ما قعدت أيام بخليها تغير عليه لمه لقيتها حددت معاد الفرح بعد أربع شهور!
اليوم اللي سمعت فيه الزغاريط و شفت الدعوة علي النت كل اللي فكرت فيه حاجه واحدة بس، زياد!
طلعت السطح وأنا بجري و زي ما توقعت لقيته مشغل أغاني بدون موسيقى زي عادته بس المرادي كان رامي جمال
” وفي بالي كلام جوايا بشيله ونفسي أحكيله نرجع زي زمان أنا عيشت ادعيله ولسه باقيله بجد في قلبي مكان معرفش ظروفه ولمه هشوفه اللهفة عليا تبان، شاهدة الأيام ”
ساكت باصص قدامه في الفراغ و اللمعه اللي مبقتش تفارق عيونه بسببها
وبكل إشفاق عليه ناديت_زياد
ابتسم=خلاص يا عيشة، خلاص خِلصت
_بص هو….
قاطعني=عقلي مش راحمني و قلبي واجعني و حاسس أن كل حاجه بتنهار، ملعون الحب اللي يعمل في الواحد كده بجد
مكنتش لاقية كلام أواسيه بيه ف سيبته يكمل
=فاكرة وإحنا صغيرين كنت ما بصدق امتي نخلص المدرسة عشان وأنا راجع أشيلّها الشنطة عشان ضهرها ميوجعهاش وأجيبلها حاجه حلوة وإحنا راجعين بمصروفي
كنت بذاكرلها و بحلّ معاها الواجب وفي الدروس أبقي معاها عشان محدش يضايقها، فكل خطوة يا عيشة، حرفيًا كل خطوة كنت موجود رغم إني أكبر منها و مواعيدنا كانت مختلفة
ربيتها علي إيدي و في الآخر جه الزفت ده خطفها مني
كنت لسه هصحح وأقول أنها اللي لاغته الأول بس سكتني لمه قال
=مش هقبل عليها كلمة وحشه يا عيشة وأنتي عارفة
_خلاص سكتت
اتنهد ودموعه بدأت تغلبه و صوت النحيب بيعلي=أنا بس نفسي أعرف قصّرت معاها ف ايه؟ يعني كان ايه ممكن يتعمل وأنا معملتهوش، ليه متختارنيش أنا؟ ليه تعشمني أننا هنبقي لبعض من غير ما توعدني بكلمة حتي، تصدقي أنها عمرها ما قالتلي أنها بتحبني! تقريباً عشان مغلطهاش لمه تقرر تبعد
ده أنا حبيت أكتر إنسانه توكسيك في حياتي و لسه مش عارف أكرهها
_مش عارفة أقولك ايه يا زياد والله أنا كنت فاكرة إن الخطة هتنجح بس هي فاجأتني
وفعلاً بعد كام يوم اللي توقعته طلع صح لمه لقيت زياد طول اليوم تايه و مش مركز وفي الآخر قالي
زياد=عيشة أنا محتاج أتكلم معاكي ضروري
_خير يابني فيه ايه قلقتني أنت من بدري مش علي بعضك
زياد=عُلا كلّمتني و عايزانا نرجع
_ايه؟!!!!!

يتبع….

لقراءة الفصل التالي : اضغط هنا

لقراءة باقي حلقات الرواية اضغط على : (رواية خطة فاشلة)