رواية نعيمي وجحيمها الفصل الخامس والستون 65 بقلم أمل نصر

رواية نعيمي وجحيمها الفصل الخامس والستون 65 بقلم أمل نصر

رواية نعيمي وجحيمها البارت الخامس والستون

رواية نعيمي وجحيمها الجزء الخامس والستون

رواية نعيمي وجحيمها الحلقة الخامسة والستون

– إيه يا كارم؟ أوعى تقول انك نسيتني ولا نسيت وشي، دا انا كنت أزعل بجد يا راجل.
قالها الرجل المهيب بلهجة ساخرة، بوجه جامد، مشتد الملامح، وهو يهبط درجات السلم بتأني رتيب مع صوت عصاه التي كانت تطرق مع كل خطوة منه، والاَخر يراقبه بأعين صقرية ضيقها بتفكير واستيعاب سريع وقبضته الحديدية اشتدت أكثر على كاميليا، فقد وضحت الاَن الصورة التي كانت مبهمة امامه منذ الأمس، هروبها المتقن يوم حفل الزفاف الذي كان ينتظره بفارغ الصبر، ثم اختفائها تمامًا بشكل غريب، أعجزه هو ورجال الأمن أقرباءه الذين تولوا مهمة البحث في سرية تامة معه، ثم اكتشافه عنوانها في هذه القرية الريفية البعيدة بعد مراقبة جيدة لهذا المدعو طارق، لتأخذه الحماسة ويأتي بالرجال المدججين بالسلاح بقصد مباغتتهم، حتى يعطي هذا المدعو طارق ومن يأويها الدرس القاسي بمعاقبتهم، قبل أن يأخذها هي عنوة ويأتي تأديبها بعد ذلك على مراحل من العذاب، وضعها في خياله بالترتيب.
-ساكت يعني ومبترودش؟
هتف بها الرجل مرة أخرى وقدمه تهبط للأرض ليواجه بلهيب عينيه المتجعدة الزويا، وميض القسوة بخاصتي الاخر وهو يزيد بتشديده على كاميليا حتى تأوهت من الألم، وتجاهل هو ليهدر من تحت أسنانه للرجل:
-أكيد طبعًا لازم المفاجأة تخليني اقف شوية واستوعب، ما انا كان لازم اعرف إن حركة وضيعة زي دي لما تعملها زوجتي العزيزة، يبقى لقت اللي يحميها ويخطط لها عشان يضربني في ضهري بخسة، ولا انتي إيه رأيك يا روح قلبي؟
قالها وشدد على قبضة شعرها لتصرخ من بين يديه كاميليا، وصرخ على أثرها من الخلف طارق:
– سيبها يا حيواان، إنت بتتشطر بس ع الستات.
إلتفت راسه إليه بحدة يحدجه بنظرة نارية خاطفة قبل ان يتغاضى ويتجاهل من أجل أن ينتبه للرجل الاَخر، بعد أن عاد إليه يتابع له بازدراء:
-مكنتش اعرف ان الزمن اتدحدر بيك لدرجادي، عشان تستخدم حيلة رخيصة أوي كدة في انتقامك مني، ويا ترى بقى انت لوحدك ولا معاك كمان…. ابنك العاجز؟
قال الأخيرة مشددًا على الأحرف، بقصد الضغط على جرح الرجل والذي تمالك رغم سريان الحمم التي تغلي بأوردته، ليرد بضربة حازمة بعصاه على الأرض:
-سيب كاميليا واخرج عن سكات ولم الحوش بتوعك.
تبسم كارم بزاوية فمه مستهزءًا بقوله:
– طب وإن مستبتهاش هتعملي إيه؟
لم يجيبه الرجل بل ظل صامتًا هادئًا حتى أومأ بذقنه للأمام، فتفاجأ كارم بفوج من الرجال تلج من الخارج أو تاتي من داخل المنزل وأسلحتهم في أيديهم اضعاف؛ ليجبروا الآخرين اتباع كارم، على إسقاط أسلحتهم عنوة، رأى ذلك المذكور فاشتعلت عينيه، ليخرج سلاحه ويرفعه بوجه الرجل يصيح بتهديد:
-أبعد رجالتك عن رجالتي وخليني اخرج بمراتي يا فوزي يا بحيري، إنت مش قد غضبي ولا عايز التاريخ يعيد نفسه من تاني، انا المرة دي مش هكتفي غير إني أحصرك على حياتك.
تبسم ساخرًا الرجل ليردف كلماته بمرارة:
-هو انت لسة هتحصرني على حياتي يا كارم؟ يا راجل دا انا كنت في عزي وكبير ناسي ونائب عن دايرة فيها الاف البشر، وقدرت انت وابوك بجبروتكم، تكسرو ابني وتكسروني معاه لما معرفتش اجيب حقه، انت لسة هتحصرني على حياتي! يا بني دا انا موت من يوميها ولا انت لسة مخدتش بالك؟
توقف فجأة فوزي وبرقت عينيه بنظرة عاصفة، ليردف بلهجة مشتدة قوية:
-كاميليا وصلت أرضي وفي حمايا يا كارم، يعني هجيبلها حقها منك واحميها ولو بموتي، سيب البنت واخرج برا يا ابن اللوا وغور من البلد على رجليك بدل ما تخرج منها على نقالة .
سمع منه كارم واشتد بالضغط على كاميليا يهزهزها مع مع فرط انفعاله المستعر:
-يعني اللي معرفتش تعملوا زمان فاكر بغباءك انك هتقدر تعملوا دلوقت؟ طب زمان انا عَرفت ابنك مقامه ع الحلبة وهو قدام الدفعة كلها وخليته يصرخ زي النسوان، انت بقى جاي دلوقتي بعد ماراحت منك النيابة وراح منك شبابك وعايز تتحداني وبمراتي كمان، دا انت باينك خرفت وراحت منك، وريني هتقدر توقفني ازاي؟
قالها وتحرك بأقدامه للخلف يحاول السير بها، ومن الخلف كان طارق يتابع بعد أن انفك الحصار عنه يحاول بتأني وينتظر اقتناص الفرصة، يقتله الخوف خشية أن يؤذي كاميليا هذا المجنون بسلاحه، أما فوزي فلم يكن يرى السلاح أو أي شئ اَخر، وقد تذكر سيل من ذكريات الألم والقهر حينما عجز بكل سلطته أن يأتي بحق ابنه الذي ظل على سريره في المشفى يتعالج بالشهور ولم تعد قدمه للسير الطبيعي رغم كل العمليات الجراحية التي أجريت لها بفضل الكسور المضاعفة التي فعلها عن قصد هذا الوحش الذي يتحداه الاَن، لذلك لم يتردد في التفكير بأن يقترب بجسده بتحدي هو الاَخر ليردد:
-زمان لما اتحديت ابني على ماتش المصارعة، مكنش كريم عامل حسابه ساعتها ع الغدر، كان بيتحمل الضربات القوية منك ويعديها مرة في مرة على أساس أنها لعبه وانت اللي سيطرت فيها، لحد اما فاجئته بالناهية لما مسكت في رجله تكسر فيها بدون رحمة، انا بقى دلوقتي بواجهك بصدري وعارف اني ممكن أضيع فيها لكن مش هاممني، سيب البنت بقولك.
قال الاَخيرة بصيحة مترافقة لدفعه السلاح الناري بالعصا التي رفعها فجأة لتحط بضربة قوية مؤلمة على رسغ كارم، فيسقط السلاح على الأرض بعيدًا عنه بحركة مباغتة، وقبل أن يستدرك جيدًا فاجئه طارق بتقيده من تحت أبطيه من الخلف، ليحاول نزع كاميليا من بين يديه، وذلك يقاوم بالسباب، فهجم فوزي ليشترك معه ليخلصها، وهذا يصيح بصوته العالي:
-بقى بتهجموا عليا انتو الاتنين يا حيوانات، اوعي سيب انتوا وهو لانفيكم من على وش الأرض.
كاميليا هي الأخرى كانت تحاول بكل قوتها، نزع نفسها
عنه رغم الألم الشديد الناتج من جذب شعرها، واصابعه التي كانت تضغط على خصرها، وهي تزيد كلما حاولت بمساعدة الرجل وطارق لها، وهو يقاوم بضراوة قوة الرجلين حتى استطاعت فك نفسها مع الرجل مضحية ببعض الخصلات الكبيرة من شعرها التي التصقت بقبضته وهو يندفع للأرض مع طارق الذي ظل متمسكًا به حتى وقع معه، لتبدأ بعدها معركة محتدمة بين الطرفين، صرخت كاميليا على الرجل الذي ابتعد بها عنهما:
– خلي الرجالة يفكوهم عن بعض يا عم فوزي، دا مفتري، وممكن يأذي طارق.
هم ليهتف على رجاله الرجل، ليفاجأ بصراخ طارق الذي اعتلي الاَخر ليضربه بقبضته على فكه بقوة:
-محدش يقرب مننا وخلوها لراجل لراجل.
استطاع كارم بخبرته القتالية السابقة، ان ليبدل الوضع ويقلب طارق على الأرض، فيهتف بابتسامة شرسة:
– كدة بقى يبقى انت اللي جيبته نفسك، وشكلي كدة هعيد الدرس مرتين، استلقي وعدك يا حبيبي.
قالها ليكيل بالضربات المركزة على وجه طارق وخصره: بقصد الأذية الواضحة، كتمت كاميليا فمها وهي تبكي بوجع وكأن الضربات تصيب جسدها هي، أما فوزي فصرخ على طارق:
-خلي بالك من رجلك يا بني، متخليهوش يلمسها، دا خاين وببستغل الفرصة عشان يضرب بخسة.
سمع كارم فالتفت رأسه نحو الرجل بحدة، ليستغل هفوته طارق فيدفعه عنه ثم يباغته بضربة قوية برأسه على جبهته اخلت بتوازنه فلحقها بواحدة أخرى اشد جعلته يسقط على الأرض مستقليًا بدوار شديد، اعطى الفرصة لطارق ليكمل بعدة ضربات أخرى، ويصير الوضع لصالحه.
وفور ان شعر بارتخاء جسده تركه لينهض عنه هاتفًا:
-قوم يا حبيبي قوم، متخلنيش ازيد عليك واخرج بالحوش بتوعك على رأي الراجل الكبارة، تطلع كارم إليه قليلًا يستعيد وعيه الذي كاد يفقده، فضربات الرأس القوية جعلت جسده ثقيل، حتى أنه تمكن من الإعتدال بجذعه عن الأرض بصعوبة، ليرى الصورة جيدًا، وقد اقتربت كاميليا من طارق لتطمئن عليه بنظرات متلهفة زادت من حريقه ليردد وهو ينهض بأقدامه:
-اطمني واشبعي منه كويس عشان بكرة هحصرك عليه، وخلي الراجل الخيخة دا ينفعك لما تبقي تحت رحمتي في شقة الزوجية يا ست الحسن والجمال.
ردت هي هاتفة بصوت قوي توقفه فور أن استدار عنها :
– كلها اسبوعين تلاتة أخدهم هنا اجازة في بيت الراجل الطيب ده، على ما المحكمة تخلصني منك، قضية الطلاق رفعتها وبكرة انت تتفاجأ بالإعلان على بيتك.
برقت عينيه بنظرة غير مفهومة أمامها بعد سماعه للكلمات قبل أن يستدير عنها، بغرض المغادرة وقد سبقه رجاله، ولكنه وقبل أن يبتعد عنهم باغت رجل من أتباع فوزي البحيري بخطف السلاح منه، والتف يوصبه نحو الطارق في أقل من اللحظة، لتخرج منها الرصاصة بلمحة سريعة انتبه بها فوزي البحيري، فدفع طارق بقوة أوقعته أرضًا مع كاميليا التي صرخت برؤيتها الرصاصة تخترق ذراع العم فوزي والذي تصرف بسرعة، واخرج سلاحه من جلبابه ليوقف كارم برصاصة على ركبته في ألاسفل، سقط على أثرها يصرخ المذكور:
-اااه، رجلي يا حيوان، وفي ركبتي كمان جايب الرصاصة، دا انا هوديك في داهية واخليك تقضي بقية عمرك في السجن نهض الرجل بمساعدة طارق وكاميليا، ليرد بتحدي:
– وهتوديني في داهية ازاي بقى يا بن اللوا، وانت اللي داخل عليا بيتي ومتعدي برجالتك وسلاحك، ولا انت ناسي انك في أرضي، بس حتى لو كان دا هيحصل، إياك تفتكر اني هخاف، دا بالعكس، انا خدت حق ابني اللي متأجل من سنين يعني العين بالعين، والسن وبالسن، والبادي أظلم .
❈-❈-❈
بعدة عدة ساعات
وبداخل المشفى دلف الأثنان يخترقون الرواق بخطوات مسرعة حتى وصلوا إلى الغرفة الموصوفة بعد عدة اتصالات مكثفة حتى علموا بما حدث:
-إيه اللي حصل؟
سأل جاسر لاهثًا بقلق فور أن ولج إليهما مع زوجته التي اقتربت من صديقتها تحتضنها باشتياق وخوف، فرد طارق المستلقي على سريره الطبي بصوت ضعيف:
-لا ولاحاجة يا حبيبى متقلقش.
هتف جاسر بغضب وهو يومئ بكفه على الجروح المتفرقة بشدة على وجه صديقه بالأضافة إلى هذا الوهن الغريب عليه، فجاء الرد من كاميليا:
– ما احنا مرضيناش نقولكم على كل الحقيقة في التليفون، كارم كان مراقب طارق بعد ما زار والدتي وعرف مكاني فطب علينا برجالة بلطجية في بيت فوزي البحيري، وحصل…..
توقفت بلهاث وتعب، لتربت زهرة بكفها على ساعدها بدعم، وصاح جاسر بهلع امتزج بغضبه:
– يعني هو اللي عمل كدة في طارق؟
-ملحقش يا جاسر ملحقش.
هتف بها طارق رغم ضعفه، لتكمل على قوله كاميليا بارتجاف:
– الموضوع كان كبير أوي يا جاسر، عم فوزي اتصاب في دراعه، وكارم نفسه اتصاب برصاصة في ركبته، وطارق زي ما انت شايف كدة كلها إصابات وكدمات شديدة ومتفرقة في الجسم كله، بس الحمد لله اللي رسيت على كدة
عقبت زهرة على قولها فزعة من مجرد التخيل:
-يا نهار اسود، دي على كدة كانت حرب.
توقفت لتطالع وجه صديقتها بتمعن قبل أن تردف لها بتساؤل:
– وانتي كمان شكلك مش طبيعي هو عملك حاجة؟
نفت بهز رأسها لكنها لم تتمالك كبت دموعها لتتلقفها ذراعي زهرة وتضمها إليها بشدة، تهدف لتهدئة روعها، فتوجه جاسر نحو المستلقي على سريره وقد تعلقت عينيه بمحبوبته التي كانت ترتجف في أحضان زهرة:
– طب هو كارم ولا فوزي البحيري فينهم دلوقت؟
أجابه على مضض:
-في الدور التاني تحت الحراسة الشديدة من الأمن، عشان التحقيقات والنيابة
هنا فاض به جاسر ليضرب كفيه ببعضها يقول:
-يعني كل ده يحصل وانا زي الأطرش في الزفة، محدش فيكم يديني خبر؟
نزعت نفسها كاميليا من حضن صديقتها لترد على قوله:
-يعني كنا هنديك خبر ازاي بس؟ دا كل اللي حصل تم بسرعة غريبة محدش فينا لحق يتصرف، لولا بس عم فوزي كان عامل حسابه، لكنا روحنا في خبر كان، كارم كان زي المجنون برد فعله العنيف معانا.
أومأ جاسر بتفهم رغم استغرابه باكتشاف الوجه الجديد لمدير أعماله السابق، واستدرك طارق ليسأل كاميليا:
-لكن انتي أيه اللي عرفك ب فوزي ده؟ وعرفتي منين حكايته مع كارم؟
تبسمت كاميليا تومئ بكفيها:
-دي حكاية طويلة قوي وعايزة رغي كتير.
أكملت على قولها زهرة وهي تجلس على أقرب المقاعد بمساعدة زوجها:
-قوي قوي، دا اسم الراجل نفسه خد مننا بحث على ما عرفناه وعرفنا طريقه وقدرنا نتواصل معاه، بس ربنا يخلي السوشيال ميديا بقى.
مال برأسه إليها جاسر يردد بغيظ:
-قولي يا حلوة قولي، وطلعي الأسرار، ما انا قولت من الأول، كنت نايم على وداني .
ضغطت شفتيها تبتعد عن سهام عينيه المتسلطة عليها، حتى كاميليا ظهر على وجهها الحرج: فتدخل طارق بقوله:
– اعذرهم يا جاسر، وكمان قدر من نفسك إن تخطيطهم السري جاب نتيجة كويسة اهي، والحمد لله انها جات على خير.
تفهم جاسر ليردد بكلمات الحمد، أما كاميليا فقد تلقت دعمها للمرة الثانية بضغطة من كف طارق على كفها مع وقفتها المجاورة لتخته الطبي، لتهديه ابتسامة امتنان بعشق، تلقفها هو بابتهاج يتوسع بصدره رويدًا رويدًا، وعقله مازال لا يستوعب حتى الاَن أن مازالت هناك فرصة معها، وهو الذي كان يظن أمله في القرب منها، ذهب بغير رجعة.
-كاميليا.
انتبه الإثنان على مصدر الصوت في مدخل الغرفة، لتجد أسرتها تلج لداخل الغرفة خلف والدها، فنزعت كفها من يده لتتحرك سريعًا وترتمي في حضن والداها الذي فتح لها ذراعيه بكل ترحيب، رغم عتبه وغضبه منها:
-كدة برضو يا كاميليا، دي عملو تعمليها فيا يا بنتي؟
شددت بذراعيها تردد باشتياق وتعب:
– سامحني يا حبيبي، انا كنت مضطرة ومكنش عندي وقت، انت هفهمك على كل حاجة بعدين، مش هخبي عنك حاجة أبدًا.
قالتها وانتبهت على هتاف شقيقها الأصغر وهو يجذبها من قماش عبائتها التي أتت بها معلقًا:
-حلوة أوي الجلبية دي يا كاميليا، إنتي اشترتيها أمتى؟
التفت إليه مرددة باشتياق شديد وهي تقبله على وجنتيه:
– دا انت اللي قمر يا قلب كاميليا، دي جلابية فلاحي جيت بيها مضطرة بسرعة عشان الظرف اللي كنت فيه. تدخلت رباب تسألها بفضول:
-ظرف إيه؟
❈-❈-❈
– البيت رجع يفضي علينا من تاني يا لميا.
قالها عامر منتهدًا بضيق وهو يشير على أرجاء المنزل الخاوية حولهما، وردت لمياء على الفور باعتراضها:
– يا ساتر يارب، ليه بتقول كدة يا عامر ما الاولاد لسة قاعدين…. ولا يكونش هما بيفكروا يسبونا يا عامر، يا نهار أبيض معقول دا قصدك؟
هتفت بالاَخيرة بارتياع جعل عامر يتأفف غيظًا لبجيبها على عجالة:
-ومين بس قال الكلام دا يا ست انتي؟ انا قصدي على ميدو اللي عمل حركة وحيوية في البيت…..
صمت برهة ليكمل متنهدًا من العمق:
-انا من زمان اوي وانا في نفسي ان البيت دا يتملي بالأولاد يا لميا، مش بس من ساعة ما اتجوز جاسر، لا دا من زمان بكتير أوي.
تأثرت زوجته، حتى ظهر على وجهها الحرج فيما تتفوه به:
-انا عارفة إني ظلمتك معايا يا عامر، لما وقفت على خلفة جاسر ومردتيش اكشف ولا اسعى عشان اجيب اولاد تاني.
رمقها بنظرة خاطفة ثم التف بوجهه عنها، حتى لاترى ما يفيض بالأعين من لوم سعى بكل الطرق لأخفاءه عير السنوات، وهي علمت بذلك، فسألته بفضول:
-ليه محاولتش ولا اتخانقت معايا؟ ليه ما اتجوزتش زي بقية الرجالة ما بتعمل؟
مط بشفتيه ليجيبها بتفكير:
-مكنش ينفع اتجوز غيرك يا لميا، الراجل اللي بيحب بجد، بيهموا بس إنه يخلف من الست اللي بيحبها، وانتي كنتي مخلفة جاسر مالي عليا الدنيا، دا غير ان الشغل كان واخد معظم وقتي، بس مكدبش عليكي، كنت بغير اوي وروحي تطير مني، في كل مرة ازور فيها اختي علية واشوف ولادها اللي مالين البيت عليها، دا غير كمان لما خلفوا وبقى زيادة بالأحفاد…
قطع ليعود لشروده وهي صمتت ترمقه بامتنان مشبع بندمها، في عدم إعطاء الفرصة لنفسها في التفكير ولو لدقائق في السعي لإسعاد هذا الرجل في تحقيق ما كان يتمناه ويروجوه منها، وهو يستحق، فكم سعى لأسعادها وكم تغاضى بخلقه الكريم عن أخطائها، لذلك وجدت نفسها تسأله برجاء:
-اعملك ايه يا عامر عشاك اعوضك؟
تطلع إليها عاقدًا حاجبيه باستفهام، فتابعت له:
– متبصليش كدة، انا بجد والله نفسي ارضيك، بس مش عارفة ازاي؟ عارفة ان الكلام دا جه بعد فوات الاَوان، بس اعمل ايه.
أومأ لها برأسه يجيبها:
-متعمليش اي حاجة يا لميا، انتي بس خليكي كويسة مع مرات ابنك، وابنك اللي بيحبها، مش بقولك الراجل لما يحب ست بيحب يخلف منها، اهو ابنك بقى نفس شخصيتي، قعد مع ميري قد ما قعد لكنه عمره ما فكر يخلف منها، العكس بقى مع زهرة، يعني احنا دلوقتي أملنا فيها يا لميا .
هزهزت رأسها بعدم استيعاب ليكمل موضحًا لها بخبث:
– افهمي يا قلبي، انا عايز البيت دا يتملي بعيالهم، يعني يتشطروا كدة ويشدوا حيلهم.
تبسمت لميا لتُجيبه بابتهاج يسري بداخلها:
– عندك حق يا عامر، انا فعلا هموت ع الأمنية دي، وبتمنى من قلبي انه يحصل… يارب
❈-❈-❈
في شرفة منزلهم وبعد أن جمعت ابويها الأثنان لتُفاتحهم بجرأة فيما انتوت عليه منذ فترة، بعد أن جسرت نفسها للقادم مع والدتها متوقعة الأسوء منها، والذي ظهر مع اول كلماتها حينما بصقت المرأة من فمها كمية من الشاي الذي كانت ترتشف منه، لتهدر بغير تصديق:
-مين يا بت؟ قولي تاني يا ختي وسمعيني.
ردت غادة وهي أيضًا ترتشف من كوبها بكل هدوء:
-ما انا قولتلك يا أمي، إسمه إمام، كام مرة يعني هقول الأسم؟
– لهو انا كنت بسأل عن إسمه يابت؟
هتفت بها إحسان وهي تضع كوبها بعنف على الطاولة الصغيرة أمامها، لتكمل بغضبها:
– انا كنت شاكة من الأول، من ساعة اما شوفت وقفتك معاه في فرح خالد، بس كنت بكدب عنيا، على أساس إن انتي لسة فيكي عقل وبتفكري بيه، في إيه يابت؟ خلاص يا ختي داقت بيكي ومعدتش في رجالة عليها القيمة عشان يتدحدر بيكي الزمن ومتلاقيش غير المحروس دا تتجوزبه؟
أردفت غادة على نفس النبرة الهادئة:
-وافرضي يعني كان فيه غيره حتى، ماله إمام بقى؟ ماهو راجل محترم عليه القيمة وفل كمان؟ إيه اللي ناقصه بقى؟
سمعت الكلمات إحسان واحتدت عينيها بلهيب الحقد لتصيح بها:
-إنت يا بت انتي عايزة تشليني؟ يعني تقعدي ترسمي وتخططي وتعشميني معاكي، انك مش هتقعي اقل من زهرة ولا كاميليا دي وش الفقر اللي سابت ابن البهوات، عشان تيجي في الاَخر انتي، وتجبيلي حارس الأمن بتاع جاسر جوز بنت خالك، وتقولي هو دا اللي عليه القيمة، طب بأمارة إيه؟ فهميني .
حاولت غادة الحفاظ على رباط جأشها، فالتفت نحو والدها الذي كان يتابع بصمت كعادته، لتوجه له الحديث:
-طب احضرنا انت يا والدي، راجل محترم ومجهز نفسه من مجماعيه، اخته ما شاء الله دكتورة، ووالدته ست حجت بيت ربنا، دا غير انه مرتبه في الشهر يقضي بيتين مش واحد بس، دا من غير مرتبي، يبقى قيمة بقى ولا مش قيمة؟
اجاب شعبان على سجيته بدون تقدير لعواقب ما ينتظره:
– مدام راجل وبيكفي بيته زي ماقولتي، يبقى قيمة طبعًا.
افتر ثغرها بنصف ابتسامة مع بعض الارتياح، قبل ان تنتفض مع أباها على الصيحة القوية لإحسان وهي تضرب بعنف على سطح الطاولة:
– يعني بتتفقي انتي وابوكي عليا، طب انا مش موافقة يا غادة على النسب اللي يفرح ده، وريني بقى مين اللي هيمشي الجوازة؟ وإن كان ابوكي يقدر من غيري، خليه يعملها
قالت الاَخيرة بتهديد صريح ل شعبان الذي ابتلع ريقه بخوف من هيئتها التي لا تفشل أبدًا في إخافته، لتنهض بعد ذلك من امامهم غير مكترثة بحال ابنتها الذي تبدل على الفور من البرود إلى الغضب الشديد، حتى نهضت لتلحق بها بتحدي، ولا برجاء زوجها وهو يردد من خلفها:
– دي كلمة طلعت مني كدة من غير قصد، ما تخديش على كلامي يا إحسان.
❈-❈-❈
وبداخل غرفة والدتها التي ولجتها كالعاصفة لتجفلها بصفق الباب خلفها بعنف، فالتفت إليها إحسان تنهرها بازدراء:
– جاية ورايا ليه يا سنيورة؟ ولا يكونش في علمك اني عندي مرارة اسمعلك، لا يا حبيبتي، زوقي عجلك ياما وهوينا، امشي يا بت.
صاحت بالاَخيرة لتواجه بصيحة اشد من غادة:
– لأ ياما مش ماشية، مش متحركة غير لما اجاوبك على السؤال اللي كذا مرة تلحي وتسأليني عليه…. مش انتي كل شوية تسأليني، صاحبتك الهانم اللي كانت عايزة تجوزك أخوها راحت فين؟
ردت إحسان بخشونة:
-ما انتي بتقولي انها سافرت مع اخوها ومعدتيش بتشوفيها تاني، ولا في حاجة انا معرفهاش.
ردت غادة بلهجة متحدية:
– اه ياما في، في إن صاحبتي إلا كنت بكلمك عليها قاعدة ومسافرتش، اللي سافر اخوها بس، عارفة ليه ياما، عشان متحملش اللي عملوا فيه إمام بعد ما اخدلي حقي منه.
انقلب وجه إحسان فجأة فانقبض جبينها باضطراب لتنهض على الفور تسألها بتوجس:
– حقك في إيه يا بت؟ هو الواد ده عمل معاكي إيه بالظبط؟
تبسمت غادة تجيبها ساخرة بمرارة، لترفع أمامها الهاتف فجأة بعد أن تلاعبت بشاشته قليلًا لتردف لها:
– بصي كدة شوفي الفيديو ده، شوفي كدة ياما بنتك كان شكلها ازاي؟…
أوقفت لترا رد فعل والدتها وهي تشاهد الفيديو عاقدة الحاجبين بعدم تصديق، فاستطردت:
– شوفي كدة شكل بنتك بعد ما صاحبتها حطت لها حبوب هلوسة في العصير……
ارتفعت عيناها فجأة إحسان لتهتف بإجفال مرتاعة وقد وصلها تفسير اَخر بشع، تخشاه أكثر من الموت، لتلقي الهاتف على الأرض ثم تناولت ذراع ابنتها بعنف صارخة:
– معناته إيه الكلام دا يا بت الكل؟…. ، وديني مايكون عملتي حاجة غلط، لدفنك مكانك، قولي يا بنت الجــ زمه واعترفي.
صمتت غادة قليلًا تطالع وجه والدتها المرتاع بشماتة، وانفاسها تتلاحق بذعر وعلى وشك الإنهيار، لتجيبها اَخيرًا:
– شوفتي اتخضيتي ازاي ياما، من مجرد بس ما جيبتلك الفكرة، تخيلي بقى إنه كان هيحصل بجد، لولا إمام الله يستره، دخل وانقذني من بين إيديهم، ولو مش مصدقاني افتكري الليلة اللي قضيتها برا البيت، وجات معايا تاني يوم الدكتورة خلود، اهي دي بقى مكانتش صاحبتي زي ما قولنالك ساعتها، لا يا أمي، دي تبقى اخت إمام اللي نيمتني في بيتها بعد اخوها ما ستر عليا..
زادت إحسان تهزهزها بعنف وتسألها بتشكك:
– الكلام صح ولا انتي بتكدبي عليا يا بنت، ولا يكونش دا تم بجد والواد ده هو اللي هيستر عليكي بجوازك منه يابنت شعبان…
– ولا عمري كنت هقبلها.
قالتها بمقاطعة حادة لتكمل لوالدتها:
– انا برضوا بتك ياما، وحكاية الشرف دي عندي بالموت، ربنا كان رحيم بيا لما انقذني، عشان انا مكنتش هرحم نفسي لو حصل، ولا برضوا كنت هقبل ان تبقي عيني مكسورة لحد تاني حتى لو كان جوزي، ربنا مايكتبها على حد ويستر على كل الولايا.
نزعت إحسان قبضتيها عن ابنتها بعنف، وارتدت لتجلس على سريرها بتعب أحل بجميع اعضاء جسدها، وقد هدأت نوعا ما عاصفتها ولكن ما خلفته الكلمات في النفس صعب عليها استيعابه، لذلك ظلت على حالها بوجه واجم وجمود يقارب التخشب، اقتربت منها غادة لتردف بقوة رغم إشفاقها على هيئتها المزرية:
– انا بعد اللي حصل معايا دا ياما فوقت، ومبقتش غادة اللي انتي تعرفيها، عشان كدة بقولك، انا موافقة على إمام حتى لو طلبني في عشة، ربنا كان بيحبني لما وقعني في واحد زيه، وانا مش هضيع فرصتي بأيدي، انا خارجة وهسيبك تريحي جتتك وتفكري كويس، عشان لما تصحي تحددي ميعاد مناسب لمجيته هو ووالدته، عن إذنك يا ست الكل.
قالتها وخرجت على الفور تاركة والدتها على حالها، وقد سقطت الكلمات فوق رأسها كصاعقة قوية، زلزلتها من جذورها بقسوة شديدة.
❈-❈-❈
عاد من عمله متأخرًا ليلًا ليرتمي على اَريكته بتعب جعله يخلع حذائه بصعوبة، استيقظت من نومها على تحركاتها حولها، فنهضت إليه على الفور لتساعده في خلع سترته، انتبه على مجيئها من خلفه، ليصدر صوت اعتراض مع قوله:
-إيه اللي صحاكي بس؟ روحي نامي يازهرة.
سحبت السترة منه بحزم قائلة:
-انام دا إيه؟ هو انت شايفني جبلة قدامك؟
ردد خلفها بعدم رضا
– جبلة ايه بس والكلام الفارغ ده؟ إيه لزوم الغلط ؟
جلست أمامه لتساعده في خلع القميص الابيض أيضًا لتعقب على كلماته:
-طبعُا اغلط واضرب نفسي بالجزمة كمان لو ما حسيتش بيك، إيه يا ابو الغالي، انا لسة برضوا عندي شوية نظر عشان اخد بالي منك، ولا انت شاكك؟
تبسم ليداعب غمازة ذقنها يستجيب لحديثها المرح رغم تعبه:
– شاكك أيه بس؟ دا انتي أحلي حاجة فيكي نظرة عنيكى وغمازة الدقن دي اللي شدتني ليكي من اول مرة شوفتك فيها .
اهدته ابتسامة رائعة وقد اسعدها غزله لتبادله الرد:
-وانا اكتر حاجة شدتني فيك رغم الخوف الكبير اللي كنت بحسه في كل مرة اشوفك فيها، هو صوتك الأجش دا، مش فاهمة ليه كان بيتردد في وداني دايمًا؟.
– يا ولد، يعني كان فيا حاجة بتعجبك اهو، حلو ده، اهو الواحد كدة ياخد كدة ثقة في نفسه.
قالها بمشاكسة استفزتها لترد إليه بغيظها:
– وتاخد ثقة في نفسك ليه يا حبيبي؟ هو انت عايز تعجب مين تاني كمان؟
لعب بحاجبيه ليزيد غيظها بتسليته ولكن غلبه الإرهاق ليمسك بكفيه على أعلى كتفيه متأوهًا، انتفضت بقلق لتلتف خلفه وتدلك بأناملها عليهما، علٌها تنزع قليلًا من تعبه، مع تساؤلها:
– هو انت لسة ملقتش حد ينفع يحل مكان كارم؟
تأوه مستجيبًا مغمض العينين ليُجيبها:
– كل المساعدين والناس اللي بختبرهم يوميًا، مفيش حد فيهم قدر يسد زيه، كان عنده قدرة غريبة انه ينجز عدة اعمال بسرعة رهيبة، انا عارف ان في زيه كتير، بس المشكلة معايا في الوقت، عايز حد يكون خبرة ويشيل على طول، ميخدتش بقى مدة في التعليم، انا تعبت.
ردت برقة مشفقة على حالته:
– طب ارجع انا شغلي عشان اساعد معاك على قد ما اقدر، اكيد يعني هخفف ولو جزء بسيط.
– يا ستي متشكرين على الزوق والإحساس العالي منك.
توقف يتناول كف يدها ليُقبلها، ثم يردف وهو يعيدها للجلوس بجواره:
-انا يكفيني بس الايدين الناعمة دي ومعاها الابتسامة الحلوة منك، مش طالب منك أكتر من كدة.
استجابت بابتسامتها إليه قبل أن تعود لنفس السؤال:
– بس برضوا احنا كدة في نفس المشكلة، انت بتقول انك عايز واحد خبرة بسرعة، طب هي كاميليا ولا طارق، حد فيهم ينفع يسد معاك دلوقتي على ما تلاقي اللي نفسك فيه ده؟
نفى بهز رأسه ليجيبها:
– الاتنين ما شاء الله عليهم، بس انا لو شيلت حد منهم ، هبقى عايز اللي يسد مكانهم، يعني نفس الدايرة، بس ع الأقل دلوقتي هما مريحني من هم المصنع، بس سيبك انتي وريحي مخك، أكيد هلاقي طلبي اديني بحاول مع رؤساء الأقسام، يمكن الاَقي حد كفء معاهم .
قالها وانتفض فجأة ليذهب نحو حمامه، وما أن استدار عنها بخطوتين حتى التف إليها يسألها بتذكر:
– هو خالد رجع من شهر العسل ولا لسة؟
-خالي خالد رجع من يومين.
قالتها بعفوية قبل أن تجفل على هذه النظرة منه لتسأله باستدارك:
– هو انت بتفكر في خالي يا جاسر؟

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية نعيمي وجحيمها)