رواية موضوع عائلي 3 (بيت الهنا) الفصل السابع 7 بقلم رحاب القاضي
رواية موضوع عائلي 3 (بيت الهنا) الفصل السابع 7 بقلم رحاب القاضي
رواية موضوع عائلي 3 (بيت الهنا) البارت السابع
رواية موضوع عائلي 3 (بيت الهنا) الجزء السابع
رواية موضوع عائلي 3 (بيت الهنا) الحلقة السابعة
“حزِنْتُ فلامَنِي مَن ليسَ يدري!”
ــــــــــــــــــــــــــــــــــــــــــــــــــ
_دخلت ليلي اوضة روان اللي كانت قاعده قدام المرايه بتضفر في شعرها وقالتلها..
ليلي
روان عبدالله مستنيكي بره انجزي يلا..
روان
اديني خلصت اهو يا ماما..
ليلي
خلصتي ايه يا خلصت روحك بقولك عبدالله مستنيكي بره وانتي طالعه بالمنظر ده؟..
روان
البس ايه يعني عشان عبدالله بره بدلة رقص؟..
ليلي بحده
يا قليلة الادب انا قصدي البسي حاجه شيك ده الواد اول مره في حياته يطلع معاكي وانتي لوحدكم، مش لبسالي تيشرت وبنطلون، استني التيشرت ده بتاع طارق مش كده؟..
روان
ايوه هو بتاع طارق بس لايق عليا…
ليلي بحده
هو ايه اللي لايق عليكي، انا نفسي افهم ما فيش واحده فيكم طالعالي ليه، ده انا اول مقابله بيني وبين ابوكي طلعت هدومي كلها وفرشتها علي السرير عشان انقي احلي حاجه البسها وقبلها كنت بايته تلات ليالي في الكوافير عشان ابقي حلوه ومميزه.
روان ضحكت بهدوء وقال
بس ده كان سي حسن ابو علي اللي ما فيش زيه يا ماما فكان لازم تعملي كده..
ليلي
كلي بعقلي حلاوه علي العموم انتي في كل حلاتك زي القمر والواد عبدالله واقع لوحده اصلا..
روان بضيق
ان شاء الله خير يا ماما هطلع انا بقي عشان ما اتأخرش..
ليلي
ماشي يا حبيبتي وانا هروق الاوضه بقي..
روان
خليها رضوي هتيجي تروقها.
ليلي
انا فاضيه مش ورايا حاجه هستني عمتك علياء تيجي ونبدأ تجهيز الاكل، روحي انتي بس لعريسك..
_اتنهدت روان بضيق من الالقاب اللي بتتقالها علي عبدالله وبتنسبها ليه، وطلعت لقيته قاعد مع روفان وبيتفرجو علي الموبيل بتاع ليلي وهما بيضحكو..
روان
انا جهزت…
بصلها عبدالله وكتم ضحكته بصعوبه وقال بهدوء
اوكي يلا بينا..
روان بقلق
هو في ايه انت بتضحك علي ايه؟..
ردت عليها روفان وقالت
اصل انا وريته صورتك اللي غفلتها ليكي رضوي وانتي بتنفخي شفايفك بمشابك الغسيل عشان تبقي حلوه..
ضحك عبدالله وروان بصت لاختها بغيظ وقالت
امشي ادخلي جوه يا حيوااانه بدل ما اندهلك ماما غوري يلااا..
جريت روفان وقالت
الحقووني الجموسه فكت..
ضحك عبدالله اكتر وروان زعقت فيه وقالت
انت بتضحك علي ايه انت كمان؟..
قام عبدالله وقال
لا ولا حاجه…
روان بأحراج
انت شوفت الصوره بجد؟..
اومأ عبدالله براسه ورد عليها
للاسف ايوه شوفتها بس ما تقلقيش انا كده كده اتدبست فيكي..
روان بتوتر
ايه اتدبست فيا دي احنا فيها اهو لو مش عايز براحتك..
ابتسم بهدوء وقال
هو انا لو عايز يا روان ايه اللي هيخليني اسيب كل اللي ورايا واجيلك لحد هنا..
اتوترت من كلامه وقالت
ااا طيب هتوصلني ولا ادخل انام..
عبدالله
مبادئياً كده احنا مش هنروح الجامعه احنا هنروح نقعد في كافي نستني طارق اخوكي..
روان
نستني طارق ليه…
عبدالله
تعالي بس معايا الاول لاننا قبل اي حاجه هتم لازم نتكلم..
روان
هنتكلم في ايه؟..
عبدالله
تعالي طيب نروح الكافي وهناك هقولك. كل حاجه..
طلعت ليلي وقالت
انتو لسه هنا؟..
عبدالله
ادينا ماشين اهو يا مرات خالي بعد اذنك..
ليلي
اذنك معاك يا حبيبي اتفضل…
_ واخدها عبدالله ومشي، وهي راحت لشقة عز وخبطت علي الباب وجالها صوت عز اللي قال من جوه..
عز
ادخلي يا ليلي…
دخلت ليلي وعلياء سألته
انت عرفت منين ان ليلي اللي بتخبط؟..
عز
عشان هي الوحيده اللي بنت ناس وبتخبط قبل ما تدخل بالمفتاح اللي معاها، انما جوزها وعيالها الذوق ما عداش عليهم بيفتحو ويدخلو كأنه بيت ابوهم..
قعدت ليلي معاهم وقالت
من عشمهم فيك وانت اللي معودهم علي كده. المهم فين زين؟..
علياء
البيه طرده من البيت وقاله ما يجيش هنا..
ليلي بحده
جاتك ستين نيله هو انت كنت لاقي يالاااا..
عز
في ايه يا ليلي وبعدين هو اللي مشي واختار يروح لامه ابن امه…
علياء
قولي صح هو انت لما روحت للست وهزأتها كنت مبسوط؟..
ليلي
نعمم هو كمان راح لفيروز واتخانق معاها يا بجاحتك يا عز، وليك عين توريها وشك بعد ما سيبتها وهي حامل زمان…
عزالدين
لو كانت قالتلي انها حامل ما كنتش هسيبها..
علياء
لا كدااب انت مدام ما كملتش معاها عشانها هي يبقي لو كنت حتي خلفت منها بدل العيل عشره كنت برضو هتسيبها لانك ما كنتش عايز تقيد نفسك بحد..
ليلي
اختك معاها حق، انت اللي غلطان في حقهم وبعدين واحده سيبتها فجاه كده وقولتلها كلام زي الزفت، كنت متوقع منها ايه تجري وراك وتقولك تعالي انا حامل ما طبيعي اللي عملته..
علياء
لا مش طبيعي هي كمان غلطت لان المفروض الولد كان اتسجل بأسم ابوه بس غلطها جه بعد غلط اخويا معاها فمش هقدر الومها..
عزالدين
انتو عايزين ايه دلوقتي؟..
علياء
تروح لابنك وترجعه لحضنك وتعوضه عن اللي فاته من غيرك..
ليلي
لا وكمان يا حبيبي الولد مريض وعنده القلب وبياخد كوم علاج وهيعمل عمليه قريب..
علياء
كمان وانت قاعد كده ساكت يا عديم الاحساس والرحمه..
قام عز وقال بضيق
هبقي اروحله بس مش عايز زن، وداخل انام مش عايز دوشه..
قال كلامه ودخل نام وليلي قالت
اللي فيه طبع ما بيتغيرش يا علياء يلا بينا يا اختي وايدك في ايدي نروح نخلص اكل العزومه بتاع النهارده..
علياء
طيب البنات مش هيساعدونا ولا ايه؟..
ليلي
قصدك يعطلونا هي الوحيده اللي ممكن تستعدنا رضوي بس بتقول عندها شغل مهم ومش هتتأخر وهتيجي بسرعه..
ــــــــــ #بقلم_الكاتبه_رحاب_القاضي ــــــــ
_وفي الشغل عند رضوي كانت واقفه هي ويوسف مع رئيس العمال وفي الوقت ده وقف يزن بعربيته عندهم ومعاه بنتين وتلات اولاد في سن يوسف او اصغر تقريباً…
وقف يزن قدام رضوي وقال
صباح الخير يا بشمهندسه رضوي…
رضوي
صباح النور..
يوسف
هوا انا يعني طيب قول ازيك..
يزن
ما مصطبح بخلقتك في البيت، المهم انتو طلبتو مهندسين معاكم تاني وانا اختارت ليكم احسن خمسه عندنا في الشركه..
بص يوسف للبنات وقال
لا ما هو واضح..
يزن
في ايه ياللي ما شوفت تربيه انت..
رضوي بجديه
تمام يا بشمهندس تعبناك معانا احنا هنتعرف عليهم وهنتعامل سوا..
يزن
تمام يا رضوي واللي ينقص معاكي قوليلي….
رضوي
ان شاء الله…
_ومشي يزن ورضوي بتبص جنبيها ليوسف لقيته واقف مع المهندسين الجداد وخصوصا البنات…
رضوي بسخريه
هو احنا لحقنا يخربيتك..
وراحت وقفت جنبيه وقالت
اهلا وسهلا يا شباب البشمهندس يزن بيقول انكم اشطر ناس عنده اتمني اشوف كده واحسن من كده كمان..
يوسف وهو بيبص للبنت اللي جنبيه
وانا كمان اتمني اشوف كل حاجه..
رضوي بجمود
بتقول ايه كده سمعني؟..
كتم ضحكته ورد عليها وقال
بقول يعرفونا علي اسماءهم عشان نعرف نتعامل معاهم يعني وكده..
ردت البنت اللي جنبيه وقالت
انا هدير ودي نورا واسلام ومحمود وميلاد…
رضوي
اهلا بيكم مره تانيه، احنا هنبدأ مرحلة الانشاء من دلوقتي يعني علي الاسبوع الجاي هنكون خلصنا رمي الاساس كله هنبقي هنا الساعه 9 الصبح وهنمشي الساعه سبعه المغرب تمام..
هدير
بس كده هيكون في ضغط علينا يعني حتي تركيزنا مش هيكون موجود…
رضوي بجديه
لو شايفه نفسك مش هتقدري معانا علي المشروع اتفضلي اعتذري ونشوف غيرك، حد عنده اعتراض تاني..
اسلام
لا يا بشمهندسه تمام ده شرف لينا اننا نشتغل في شركة الصاوي ومع حضرتك واحنا في البدايه كده..
رضوي
تمام يلا بقي نبدأ وهنقسم الشغل بينا المشروع كبير وكل حد فينا هيكون مسؤل عن جزء وهبقي انا والبشمهندس يوسف مشرفين عليكم اول فتره..
_سمع الكل كلامها وبدأو الشغل بتعليماتها علي عكس يوسف اللي كان مهتم بس يتكلم مع هدير حتي انه اهمل رضوي خالص علي عكس تصرفاته كل يوم معاها، وبعد شويه كانت رضوي واقفه هي ونورا واسلام ومحمود وميلاد و بتتكلم معاهم في الشغل ولفت نظرها يوسف وهو واقف مع هدير وبيتكلمو وبيضحكو…
رضوي
طيب نركز في المساحات يا شباب وتكون مظبوطه مش عايزين نقع في اقل غلطه تمام..
نورا
ان شاء الله يا بشمهندسه رضوي…
وسابتهم وقربت من يوسف وهدير وقالت بحده
ما تضحكونا معاكم لا لا احنا نبعت نجيب لب وسوداني ونتسلي كلنا مدام. مش جايين نشتغل…
هدير
حضرتك انا خلصت الشغل كله اللي طلبتيه مني..
رضوي
وريني…
مسكت هدير الورقه اللي في ايدها وفردتها قدام رضوي وقالت بثقه..
هدير
اهو يا بشمهندسه زي ما حضرتك طلبتي..
رضوي
انا ما طلبتش منك كده كل الجهات مش مظبوطه مش دي المساحات اللي قولتلك تشتغلي عليها..
يوسف
هي هتراجع عليها وهتظبطها…
رضوي بحده
انا بكلمها هي لما يبقي اسمك هدير ابقي رد، واحنا هنا يا بشمهندسه مش في مدرسه عشان نشتغل ونراجع ولا ده تدريب عشان اسيب زمايلك وافضل اصححلك، ولو انتي جايه عشان تقفي ترغي وتضحكي فبعيد عن لوكيشن الشغل والكلام ده ليكي وللي جنبك..
_قالت كلامها ومشيت ويوسف اتعصب قوي من اهانتها ليه قدام كل المهندسين والعمال، فراح وراها وهي واقفه في المكان المخصص للراحه في اللوكيشن وقفل الباب عليهم وقال…
يوسف
انتي ازاي تكلميني كده قدام النااس…
رضوي
افتح الباب ده…
يوسف بحده
اول واخر مره تعلي صوتك او لسانك يطول عليا..
رضوي ببرود
لا يا سكر في من ده كتير ولو ما احترمتش نفسك في الشغل هتلاقي اكتر من كده ولو عندك اعتراض روح دور علي بابا وقوله…
جات تمشي فوقف قدامها وقال بخبث
ما تقولي انك غيرانه عليا اسهل من الحركات دي كلها..
ابتسمت بسخريه وقالتله
انت مصدق نفسك ان انا ممكن اغير عليك انت، والحركات اللي انت بتقول عليها دي تعملها البنات الاندر ايدج اللي انت بتجري وراها انما انا يا سكر لما تكلمني تقولي يا طنط وعينك تبقي في الارض يا ولد..
ضحك بهدوء ورد عليها
يعني انتي كل مشكلتك معايا التلات اربع سنين اللي بينا، علي فكره مش مشكله بالنسبالي…
وقرب منها بشكل كبير وقال بهدوء
بالعكس. دول مدينك حتة عقل مخلياني هتجنن عليكي…
ردت عليه بجمود وقالت
انت مش محترم وتصرفاتك دي بتخليني اتأكد انك عيل ولو قلبت قرد انا عمري ما هشوفك غير كده…
_قالت كلامها بثقه كبيره وبعدت عنه وخرجت بره، وهو بصلها بغيظ وقال..
يوسف
ماشي يا رضوي هنشوف مين اللي هيجري ورا مين بعد. كده…
ــــــــــ #بقلم_الكاتبه_رحاب_القاضي ــــــــ
_وفي الشركه بتاعت شهد، كانت قاعده في مكتبها ودخلت عندها نادين وشكلها مدايق جدا وقالت..
نادين
بعد اذنك يا مدام شهد ممكن اتكلم معاكي شويه..
شهد
طبعا يا حبيبتي اتفضلي، مالك في ايه؟..
نادين
انا مش عارفه اقولك ايه بس الموضوع انا مش هعرف اخبيه عنك اكتر من كده..
شهد بقلق
اتكلمي علي طول يا نادين في ايه وموضوع ايه ده، وبخصوص ايه؟..
نادين بتوتر
بخصوص يونس الصاوي جوز حضرتك..
شهد بقلق
ماله يونس في ايه؟..
نادين بأحراج
من كام سنه انا كنت عايشه في ايطاليا مع ماما لانها مطلقه من بابا فكنا لوحدنا وهناك اتعرفت علي راجل في سن ابويا تقريباً، كنت شغاله في مطعم وهو كان بيروح هناك وبدأ يهتم بيا شويه وانا كنت صغيره ومش فاهمه حاجه غير اني كنت محتاجه اهتمام وبقينا نتقابل وقابل ماما وبقي يجيبلي هدايا كتير وبدأت اعجب بيه وخصوصا ان شكله اصغر من سنه وكده يعني، وقالي ان مراته ميته وما عندوش اولاد وبعد ما اتعلقت بيه ووعدني هنتجوز جه فجأه وقالي انه متجوز وبيحب مراته وولاده وسابني، انا بعترف اني غلطت لما فضلت احاول اكلمه واهدده انه يرجعلي والا هفضحه قدام مراته وولاده بس برضو رفضني، دخلت في حالة اكتئاب ان ابويا سابني وكمان الراجل الوحيد اللي لقيت منه اهتمام سابني، ومن سنه رجعت مصر ولقيت اعلان شغل لشركة حضرتك بس ورحمة امي ما كنت اعرف انك مراته، ولما عرفت الحقيقه كنت حابه اجي واقولك كل حاحه وتحصل بينكم مشكله كبيره وطبعا ما كنتش ناويه اقول الحقيقه..
شهد بجمود
امم يعني اتسلي بيكي شويه وسابك هو بيعمل كده علي طول، تعرفي لولا اني مخلفه منه انا وهو كنا هنطلق من زمان بس انا اختارت اكمل عشان ولادي فمهما قولتي انا هعمل نفسي ما سمعتش حاجه..
ـ بصتلها نادين بعدم فهم وشهد كملت كلامها بحزن ونبره تحمل الكثير من الالم…
شهد
تحبي اقولك يونس خاني مع كام واحده غيرك في سنك واصغر واكبر منك، بس لما بيجي يرسم عليا دور الشرف والراجل الجدع بعمل نفسي مصدقه ومش بقوله علي الستات اللي بتكلمني وبتيجي زيك كده تقولي انه خاين وقد ايه كان بيعشمهم بحاجات وما عملهاش..
نادين بحزن علي حالها
وانتي ليه ساكته علي الحال ده، انا بجد استحقرته اووي..
شهد بدموع
عشان انا اللي اختارت اتنازل واللي بتتنازل عن كرامتها مره هتتنازل باقي عمرها، انا مش بواجهه عشان ما اهزش كرامتي اكتر من كده قدام نفسي، بقالي كتير ما حدش كلمني عنه بالطريقه دي، وقولت خلاص كبر وبطل اللي بيعمله بس اللي فيه طبع ما بيتغيرش..
نادين بضيق
انا اسفه بجد ما كنتش اقصد اوجعك..
شهد بهدوء
لا يا حبيبتي الغلط مش عندك خالص بالعكس انا اللي بعتذرلك عن اللي حصل، وياما ستات زي حلاتي كده. كتير كاتمه في قلبها وساكته عشان تحافظ. علي بيتها وعيالها…
نادين بحزن
انا هقدم استقالتي وهمشي من هنا..
شهد
لا مش هتمشي والموضوع هيتقفل اول ما تطلعي من هنا، ولو هو حاول يكلمك يهددك تبعدي عني بلغيني وانا هتصرف، انتي شاطره وهتكملي شغلك وهتكبري فيه كمان وانا معاكي زي ما احنا اتفقنا..
قامت نادين وحضنتها جامد وقالت
انا بجد. مش عارفه اشكرك ازاي انتي ست عظيمه وجدعه اووي..
شهد بهدوء
انتي زي بنتي وانا في يوم كنت زيك. كده محتاجه اللي يقف جنبي، يلا روحي شوفي شغلك واللي بينا ده مش هيطلع بره..
نادين
حاضر بعد اذنك…
_طلعت نادين من عندها وشهد فضلت قاعده ساكته، وبصت للصوره اللي قدامها علي المكتب اللي بتجمعها بيونس وولادها وباينه عليهم السعاده جدا..
شهد بدموع
ولسه ياما هشوف منك يا يونس…
ــــــــــ #بقلم_الكاتبه_رحاب_القاضي ــــــــ
_وخارج محطة القطار كان واقف طارق جنب عربية عزالدين اللي بياخدها منه ديماً، ومراقب الناس اللي طالعه عشان يلاقي هنا، ولما زهق مسك موبيله وكلم عم سيد وقاله..
طارق
ايه يا عم سيد كلم بنتك قولها اني واقف بقالي نص ساعه مستنيها..
سيد
ما انا لسه قافل معاها وبتقولي انها بتدور عليك..
في الوقت ده جات هنا وهي لابسه فستان لونه وردي وواسع جدا وعليه حجاب طويل ووقفت قدام الولد اللي جنبيه وقالتله..
هنا
انت طارق؟..
الولد بابتسامه واسعه
لا بس يمشي معاكي احمد..
هنا بجمود
يمشي يا خفيف بس مع اللي في رجلي..
ضحك طارق وهي قربت منه وقالت
انت طارق ايوه انت نفس الخلقه اللي في الصوره..
طارق
خلقه؟!!… وبعدين كان عليكي ايه من الاول ما تفتحي بدل ما عديتي علي الناس بالغلط..
هنا
انت طارق ولا مش طارق؟..
طارق
ايوه انا طارق انتي بقي هنا بنت عم سيد..
هنا
ايوه وقفلنا تاكسي يلاا…
طارق بصلها من فوق لتحت وقال
انتي متأكده انك بنت عم سيد…
هنا بحده
اومال هغشك يعني..
طارق
ما توطي صوتك انا واقف جنبك ما روحتش اخر الدنيا يعني..
هنا
بس يا عم انجز انا الشمس كلت دماغي..
طارق
العربيه اهي فين الشنط بتاعتك؟..
هنا
لا هي الشنطه اللي علي كتفي دي بس اللي معايا، باقي الشنط اتسرقت..
طارق
نعم باقي الشنط مالهم؟…
هنا
اتسرقت عادي يعني، غفلت شويه والشنط اختفت من جنبي..
طارق
يخربيت دماغك اركبي عشان اوصلك..
هنا
دي عربيتك؟..
طارق
مع ان مالكيش دعوه بس لا مش عربيتي دي بتاعت عمي..
هنا
شاحتها يعني نزل مناخيرك دي بقي شويه من فوق..
طارق غيظ
لا بقي انتي مالك خليكي في حالك لو سمحتي…
هنا بحده
ما انا في حالي علي فكره بس مش هركب الزفته دي يبقي من حقي استفسر..
طارق بعصبيه
وطي صوتك فضحتيني اركبي، ده انتي لسانك غير شكلك خالص..
هنا وهي بتركب العربيه
وانت لا لسان ولا شكل..
طارق بنفاذ صبر
ايه البت العقربه دي…
_وبعد شويه كان طارق سايق العربيه وهنا جنبيه باصه من الشباك وقالها…
طارق
ها قولتي ايه هتروحي لابوكي ولا هترجعي..
هنا
ارجع لمين يا عم الحج انت، وبعدين ما انا عارفه ان ابويا بواب العماره بتاعتكم..
طارق بصدمه
ومدام انتي عارفه سيباني احكي ليه؟..
هنا
لا ما انا ما سمعتش حاجه من كلامك انا كنت باصه من الشباك..
طارق
ابه قلة الذوق دي، وبعدين تعرفي منين اصلا الموضوع ده وابوكي قالي انك ما تعرفيش وما حدش في بلدكم يعرف…
هنا
امي كانت تعرف وقالتلي وانا عشان ما ادايقش بابا عملت نفسي مش عارفه، واقولك علي التقيله انا اللي كنت بعمل مشاكل مع خالتي عشان تخليني امشي واجي اعيش مع بابا هنا..
طارق
اممم شكلك مش ساهله مع ان ابوكي بيقول عليكي غلبانه..
هنا بحده
وانت يعني كنت شوفت مني ايه عشان تقول عليا مش ساهله يا اخينا…
طارق بضيق
اسكتي وبلاش صوتك العالي ده لو سمحتي..
هنا
يبقي ما تتكلمش معايا خالص..
طارق
ياريت يكون احسن..
وتابع بصوت واطي
لو بس لسانك حلو زي شكلك..
هنا
ايه؟..
طارق
ايه؟..
هنا
قولت ايه انت؟..
طارق
قولت ايه انا؟..
هنا
انا بسألك انت قولت ايه دلوقتي؟..
ابتسم بهدوء وهو باصص قدامه وقال
ما قولتش حاجه بستغفر ربنا..
هنا بخبث
احلف انك مسلم اصل ودانك. شبه ودان نتنيا_هو ففكرتك يهو_دي..
وقف طارق العربيه وقال بغيظ
بقي انا وداني زي ودان نتنيا_هوو ممكن تنزلي بقي وخلي حد. غيري يوصلك…
هنا بقلق
لا استني انا اول مره انزل مصر..
طارق
اومال انتي كنتي فين؟..
هنا
كنت في الشرقيه في المحافظه مش قريه هناك
طارق
يعني جوه مصر اومال ايه اول مره اجي مصر دي..
هنا
معلش عندنا بنقول علي القاهره والبندر مصر..
طارق بخبث
اااه طيب ما انا عارف محسوبك عاش لسن 15 سنه في الصعيد وعارف اللي بتقوليه ده..
هنا بسخريه
اومال بتستغبي فيها ليه؟..
طارق
بستغبي انتي عندك كام سنه؟..
هنا
معايا بطاقه مش محتاجه تطلعلي واحده جديده ممكن توصلني بقي وتخليك في حالك..
طارق
ماشي عشان خاطر عم سيد بس..
هنا
شكرا لذوق اهلك..
طارق بغيظ
واهلك برضو..
_واخدها طارق ووصلها البيت، وبعدين راح لعبدالله وروان الكافي اللي كان المفروض بتاعه…
ــــــــــ #بقلم_الكاتبه_رحاب_القاضي ــــــــ
_وقبل شويه وقف عبدالله بعربيته قدام الكافي بتاع عمرو وسندس، واول ما نزلو روان قالتله بحده..
روان
انت ليه جايبني هنا في مشاكل بين طارق والزباله اللي جوه دول، اصلا لو دخلت هتخانق معاهم..
عبدالله بهدوء
تتخانقي وانا معاكي ما ينفعش طبعا وحتي لو مش معاكي ممنوع ، وبعدين انا عارف كل حاجه وقاصد اجي هنا…
روان
ازاي يعني؟…
عبدالله
ما تسيبي الموضوع ده علي جنب وتعالي نقعد ونتكلم الوقت بيعدي واحنا عايزين نتكلم…
روان بتوتر
هنتكلم في ايه؟..
عبدالله
هو انتي ليه خايفه كده هندخل جوه ونقعد ونتكلم عادي..
روان بضيق
لا مش خايفه بس مش متعوده اخرج معاك لوحدنا..
عبدالله
لا ده هيبقي العادي ان شاء الله، ندخل بقي…
_سكتت روان ودخلت معاه الكافي اول حد قابلهم هي سندس اللي كانت طالعه وقالتلهم..
سندس
روان خير بتعملي ايه هنا؟..
ما ردتش عليها روان وقالت
نقعد فين يا عبدالله؟…
عبدالله
اللي يريحك تعالي نقعد هناك في المكان الهادي ده..
روان
اوكي يلا بينا…
_ وسابو سندس واقفه مدايقه وراحو قعدو مع بعض، وسندس دخلت المكتب عند عمرو وقالتله..
سندس
عمرو روان اخت طارق بره ومعاها قريبهم الغني ده اللي من الصعيد..
عمرو
واحنا مالنا ما يجو ينورونا..
سندس
انا خايفه يا عمرو انت عارف ان طارق ليه معارف في عيلته تقيله اووي واولهم الراجل اللي بره ده…
عمرو
علي نفسهم يا حبيبتي انا ماشي قانوني وما حدش ليه حاجه عندي، تعالي نرحب بيهم كويس دول من طرف صديقنا المقرب…
_واخدها وطلعو بره وكان عبدالله وروان قاعدين ساكتين وعمرو قرب منهم وقال بأبتسامه واسعه..
عمرو
وانا اقول الكافي منور ليه، اهلا اهلا بأخت الغالي وقريبه.
اتنهدت روان بضيق وعبدالله قال بهدوء
اهلا بيك وشكرا علي ذوقك..
عمرو بأهتمام
انت اكيد عبدالله القاضي طارق قالي عنك حاجات كتير، بس مالوش حق بصراحه في اللي قاله..
_كانت روان هتتكلم بس عبدالله شاورلها تسكت وقال لعمرو بهدوء..
عبدالله
ليه هو قال ايه بالظبط؟
عمرو بخبث
يعني قال انك مغرور وشايف نفسك وهتشوف نفسك اكتر لو نجحت في الانتخابات، بس الحقيقه غير كدن انت شكلك متواضع ومحترم جداً..
عبدالله بهدوء
لا طارق معاه حق…
وتابع بصوت عالي
وحضرتك هتفضل بقي واقف راسنا كده فين الخصوصيه يا استاذ…
_الكل بصلهم بفضول واتحرج عمرو جدا، فحين ضحكت روان بهدوء وعمرو انسحب من قدامهم وهو متغاظ من عبدالله جدا…
روان بسعاده
والله انت ميه مبه كبسته وهو واقف وبقي شبه الفار المبلول…..
عبدالله
ده ولسه، المهم بقي هنتكلم ولا هنفضل ساكتين..
اتوترت روان وردت عليه
براحتك اتفضل..
عبدالله بجديه
بصي هو انا لا بتكسف ولا عندي حتت اني ابين مشاعري اوي، فانتي تحاولي تمشي الدنيا معايا لان انتي هتتكسفي وانا هتكسف ومش هيبقي لطيف خالص الوضع..
ابتسمت روان غصب عنها علي كلامه وقالت
لا عادي هو الموضوع بسيط اصلاً…
عبدالله
بالظبط هو الموضوع بسيط، قوليلي طيب انتي ليه وافقتي بيا؟…
افتكرت روان اللي حصل معاها هي وامير وباباها وادايقت جداً وهو سألها تاني بجديه وقال. .
عبدالله
موافقه من نفسك يا روان ولا حد غصبك عليا؟..
روان بضيق
لا موافقه من نفسي..
عبدالله
ليه؟..
روان بقلق
هو ايه اللي ليه، موافقه عادي يا عبدالله..
عبدالله
مش باين بصراحه او بمعني اصح مش حاسس انك موافقه..
روان بهدوء
لا موافقه بس عشان الموضوع جديد عليا فمش عارفه لسه اتعود علي الوضع..
عبدالله
طيب وموضوع الجواز اللي بسرعه خالي قالي انك موافقه وانا عندكيش مشكله..
اتنهدت بحزن وقالت
ايوه موافقه..
عبدالله بهدوء
يا روان فكري كويس انا ما عنديش اي مشكله في الوقت بالعكس انا بتمني يكون بدري اكتر من كده، بس مش عايزك تبقي معايا وانتي مضغوطه او الموضوع يجي بسرعه عليكي وما تعرفيش تفرحي فرحه كامله او تعيشي التفاصيل بتاعت الخطوبه والفرح بالطريقه اللي انتي نفسك فيها..
روان بحزن
عادي اصلا ما فيش حاجه معينه عايزاها…
مال علي الترابيزه شويه لقدام وقال بصوت واطي
يعني انتي جاهزه ان بعد شهر من دلوقتي تبقي مراتي قدام الناس كلها ومعايا في كل لحظه وفي اي مكان؟..
_اتوترت روان ووشها قلب احمر وبصت لايديها اللي ضمتهم لبعض بخجل وقالت..
روان
ااه..
قعد في الوقت ده طارق جنبيها وقال
الشارع اللي وراااه..
روان بصدمه
طارق انت كمان هنا؟..
عبدالله
مش قولتلك هنقعد نستناه اهو جه وفي وقت مش وقته خالص…
طارق
لا المهم البت مالها متوتره كده ليه عم عبدالله قولتلها ايه؟…
_لاحظ. عبدالله كسوف وتوتر روان فغير الموضوع مع طارق وقاله بجديه..
عبدالله
خلينا في الجد بقي، انت عارف احنا هنعمل ايه دلوقتي هتعرف تتحكم في اعصابك ولا تمشي وتسيبني انا اتصرف..
طارق
ما تقلقش يا عبدالله كفايه اووي اللي هيحصل دلوقتي، بس هي الشرطه هتيجي امتي؟..
روان بصدمه
ايييه الشرطه ازاي، انتو عملتو ايه بالظبط؟..
طارق
بجيب حقي يا روان وما تقلقيش ما فيش حاجه هتحصل..
عبدالله وهو بيبص في موبيله
الشرطه وصلت قوم يلا بينا يا طارق…
وبص لروان وقال بجمود
خليكي انتي هنا يا روان واحنا هنخلص الموضوع ونجيلك..
روان بقلق
ماشي…
_وبعد شويه في مكتب عمرو كان متعصى جدا علي عكس طارق وعبدالله اللي كانو هاديين جداً…
عمرو للظابط
يا باشا البلاغ ده كاذب وكيدي انا ماشي قانوني ومعايا عقد اهو انه اتنازلي عن الكافي وأدارته..
الظابط
وهو من امتي بيكون في عقد التنازل شرط جزائي، يعني لو هو متنازل بأراته يمضي ليه علي شرط جزائي بمبلغ كبير زي ده…
عمرو بغيظ
هو اللي مغفل ويستاهل..
كان هيرد عليه طارق بس عبدالله قاله بصوت واطي
اهدي وسيبه براحته احنا خلينا نتفرج..
الظابط
الكلام ده هتقولو في النيابه مش معايا، يلا هاتوه…
_واخدت الشرطه فعلا عمرو وسندس قالت لطارق بحده وعصبيه…
سندس
انت فاكر انك كده هتاخد مننا شغلنا انسي يا طارق، عمرو اذكي منك واشطر منك وهو اللي يستاهل المكان ده اكتر منك..
بصلها طارق بحزن وقال
هو اللي اقنعك بالكلام ده، هو لو كان صادق معاكي او بيحبك ما كانش هيخليكي تمثلي عليا دور الحب ويشوفك معايا ويسكت، ولو هو شاطر ويستحق المكان ده زي ما بتقولي كان دفع فلوسه هو مش اخده سرقه مني..
قام عبدالله وقال
يلا بينا يا طارق وسيب الانسه بلاش نعطلهة عشان تلحق تبلغ اهل خطيبها ويقومولو محامي كويس لان الموضوع مش ساهل خالص…
_طلعو هما الاتنين من عند سندس اللي كانت متدايقه ومتعصبه جداً، وروان قالت لطارق بحماس..
روان
انا شوفت الشرطه وهي واخده عمرو هو كده خلاص الكافي رجعلك صح؟..
طارق بضيق
لسه يا روان بس خير ان شاء الله يلا نروح..
عبدالله
انت مش معاك عربية خالي عز يلا بالسلامه وانا وروان هنيجي ورااك…
طارق
تيجي فين يا حبيبي انا هاخد اختي معايا كفايه عليك كده…
عبدالله
علي فكره احنا مالحقناش نتكلم بسببك فأتلم شويه وخلي عندك دم..
طارق
الصبر حلو بعد ما نقرا فاتحه هبقي اخليك تقعد معاها خمس دقايق…
عبدالله بغيظ
لا كتر الف خيرك والله، وانتي راضيه بكلام اخوكي ده؟..
روان بأبتسامه بسيطه
ايوه راضيه طبعاً…
_ضحك طارق بسخريه واخد روان ومشيو ووراهم عبدالله اللي اول ما ركب عربيته بص لموبيله اللي بيرن برقم أسرار بنت عمه، فرد عليها بهدوء وقال…
عبدالله
الوو…
أسرار
ازيك يا عبدالله عامل ايه؟..
عبدالله
الحمدلله يا اسرار انتو كويسين..
أسرار بدموع
انت بجد هتخطب بت خالك؟..
عبدالله بهدوء
ايوه ما فيش مبروك ولا ايه؟
أسرار
طيب وانا يا عبدالله انا قولتلك بدل المره كتير اني بحبك ومش هتجوز غيرك…
اتنهد بضيق وقال
وانا كنت بقولك انك زي اختي يا اسرار، وما كنتش برضي اوجعك واقولك اني بحب غيرك بس انا بحب روان ومش عايز اتجوز غيرها…
اسرار بنبره حزينه
بس هي مش بتحبك علي فكره وهي وافقت تتجوزك عشان انت عبدالله القاضي اللي هيبقي نائب في المجلس وبس، علي العموم الف مبروك وياريت تسعدك وما تبقاش هي سبب وجعك يا عبدالله..
عبدالله بحزن
انا اسف يا اسرار ما كنتش اقصد ادايقك..
اسرار
انا اللي دايقت نفسي مع السلامه…
_قفلت معاه اسرار وهو فضل واقف بعربيته مدايق وفكر في كلامها وبقي يقول لنفسه ليه روان دلوقتي رضيت بيه مع انها كانت رافضه الموضوع نهائياً وخصوصاً انها تقعد في البلد، اتنهد بضيق وقال لنفسه ببعض عصبيه..
عبدالله
هنشوف ايه الحكايه يا روان لسه قدامنا كتير…
ــــــــــ #بقلم_الكاتبه_رحاب_القاضي ــــــــ
_وبالليل في اوضة يوسف كان طالع من الحمام وهو بينشف شعره ولقي يارا قاعده علي طرف السرير فقالها بضيق…
يوسف
بتعملي ايه هنا با بت انتي اطلعي بره عايز اغير هدومي متأخر..
يارا بلوم
طيب اسألني الاول عايزه ايه وجيالك ليه؟..
يوسف
اكيد حوار تافهه يا دلوعة بابا انتي..
يارا بقلق
لا هو مش موضوع تافه دي حاجه مهمه وانا عايزااك تساعدني فيها…
يوسف بحده
اطلعي بره يا يارا مش فايقلك…
يارا بدموع
يوسف انا في حد ماسك صور عليا وبيهددني بيها..
بصلها يوسف بصدمه ومسكها من دراعها جامد وقال بغضب
نعم يا اختي صور ايه دي وانتي تبعتيلو صورك ليه ده انتي نهار اللي جابك اسود..
يارا بخوف ودموع
لا والله العظيم انا ما ببعتش صوري لحد ومش بنزل صوري علي النت اصلا زي ما انتو بتقلولي بس…
زعق فيها وقال بحده
انطقي يازفته انتي ايه الحوار؟..
يارا بخوف
هو صورني وانو واقفه م مع.. مع واحد زميلي وبيهددني انه يبعتها لبابا لو ما وافقتش اروح واقابله..
ضغط علي دراعها اكتر وقال بحده
زميلك مين ده اللي تقفي معاه وحد يصورك ويهددك، وكنتي واقفه معاه ازاي اصلا عشان الزفت ده يهددك بالصور..
يارا ببكاء وخوف
والله العظيم هو ك…ك كان بيسالني علي حاجه وانا رديت عليه وخلاص بس والله عمري ما وقفت مع حد ولا قابلت حد والله..
يوسف بغضب
وريني الصور دي..
_فتحت موبيلها اللي كان في ايدها وورته الصور اللي بيهددها بيها عصام اللي تبع سدرا، بص لاخته بحزن انه شك فيها لان الصور ما فيهاش حاجه غلط ده واحد واقف جنبيها وبعيد عنها بمسافه معقوله بس برائتها الزياده وقلة خبّرتها في الحياه خلتها تخاف من رد فعلهم او يمكن عشان خوفها الزياده من باباها واخواتها..
يوسف
اسمه ايه اللي بيهددك ده؟..
يارا بخوف
عصام وشغال في السنتر اللي باخد فيه دروس..
يوسف
تمام كلميه وقوليلو انك موافقه تقابليه..
يارا بقلق
ازاي يعني اقابله ده بابا ممكن يموتني لو عرف وو..
قاطعها يوسف وقال بغيظ
هو انا بقرون انا كمان عشان اسيبك تقابليه، قوليلو انك موافقه تقابليه وفي المكان اللي هو يحدده وان اهم اهم حاجه عندك انه يمسح الصور واول ما يقولك علي العنوان تقوليلي تمام..
يارا بخوف
طيب ما تكلمه انت انا مش عايزه اتواصل مع البني ادم ده خالص..
يوسف
ما تخافيش ما فيش حاجه هتوصل لبابا والولد ده مش هيقدر يعملك حاجه ولا حتي يبصلك تاني خليكي واثقه في اخوكي..
يارا بقلق
طيب خد انت الموبيل واتصرف معاه لوحدك…
يوسف بهدوء
لا انتي اللي هتكلميه وتقوليلي هيقولك ايه، ولا اقولك انا هقتد معاكي لحد ما يرد عليكي..
ابتسمت يارا وقالتله
انت تعرف انا كنت خايفه منك وكنت هقول ليزن بس خوفت سدره تعرف وتكبر الموضوع وانت عارفها..
يوسف
انا او يزن معاكي علي طول ومش هنخلي اي حد يدايقك تاني ما تخافيش بقي ولا اروح اقول لابوكي…
يارا بسرعه
لا لا لا خلاص انا مش خايفه خالص..
_وبعد شويه كانت يارا قاعده هي ويوسف قاعدين تحت في البيت ويارا قالتله..
يارا
الحق يا يوسف الحيوان بيقولي اروحله بيته..
يوسف بجمود
اشطا قوليلو جايه وخليه يبعتلك العنوان..
يارا بصدمه
يوسف انت بتقول ايه..
يوسف
اسمعي بس الكلام يلا…
يارا
لا لا انا مستحيل اروح لواحد بيته انت ازاي اقولي كده..
مسك يوسف راسها بين ايديه وقال بغيظ
انتي بتفكري ازاي يا بت انتي هو انا هخليكي تروحي لراجل بيته ليييه شيفاني ايييه، انا اللي هروحله…
يارا ببراءه
يا نهار اسود انت هتروحله ازاي ما ينفعش..
يوسف بغيظ
يارا ما تفكريش خالص اعملي زي ما بقولك يلاا..
نفذت يارا كلامه وبعد كام دقيقه قالتله
خد بص باعتلي عنوانه اهو..
دخلت شهد في الوقت ده ويوسف بص للعنوان وقال
تمام اووووي انسي بقي ان الولد هيبصلك بس تاني..
يارا بخوف
انت هتعمله ايه انا خايفه عليك يا يوسف..
يوسف بهدوء
ما تخافيش يا بت اخوكي اسد او نمر او ديب..
يارا بخبث
او كلب ما كلهم حيوانات ههههههن..
يوسف وهو بيقلد ضحكتها
هههههه دمك تقيل ما تهزريش تاني..
شهد
في ايه مالكم بقالي كتير ما بشوفكمش قاعدين سوا..
يوسف
عادي يا ماما هو انتي خارجه تاني ولا ايه؟..
شهد
ايوه هجهز الغدا عشان ابوكم علي وصول وبعدين هروح النستشفي لواحده صحبتي ابنها تعبان شويه..
يوسف
خدي يارا معاكي يا ماما..
يارا
لا انا هقعد في البيت اذاكر..
يوسف
لا روحي مع مامو وكمان اتغدو بره فكو عن البت شوبه بدل ما هي خللت في البيت..
شهد بهدوء
من عينيا اجهزي يا يارا وهنروح سوا ونتغدي في المكان اللي تشاوري عليه يا حبيبتي..
يارا بهدوء
حاضر يا ماما…
_قامت يارا وطلعت اوضتها ويوسف طلع بره البيت وقبل ما يركب عربيته رنت عليه عائشه فرد عليها وقال..
يوسف
ايه يا عائشه؟..
عائشه
انت فين انا كلمت حامد عشان نخرج سوا و…
يوسف
بعدين يا عائشه طلعلي مشوار مهم و..
زعقت فيه عائشه وقالت بعصبيه
لا والله وايه بقي المشوار ده ومع مين مع واحده من اياهم مش كده انت بتتهرب مني عشان تروح للاشكال الزباله اللي تعرفها مش كده..
يوسف بضيق
ومدام انتي عارفه كده مكمله معايا ليه ما تحلي عني وترحميني من ام الزن ده..
عائشه بدموع
انا بزن عليك يا يوسف، بس ماشي انا مش هزن عليك تاني..
_قالت كلامها وقفلت في وشه وهو ركب عربيته وراح للعنوان اللي فيه عصام اللي كان متوقع ان يارا هي اللي ريحاله، وقبل ما يوصل موبيله رن تاني فرد من غير ما ياخد باله من اللي بيرن وقال بحده..
يوسف بحده
هو مش انتي بتقفلي في وشي بتكلمي ميتين امي ليه تاني..
رضوي بحده
هو انت بتزعق لمين كده يالااا؟…
يوسف بص للفنون وقال
شربيني مش تقول ان انت معلش جات فيك..
رضوي
شربيني في عينك انا رضوي، المهم في ورق مهم نسيته في الموقع ينفع بكره تروح بدري وتاخده وتخليه معاك لحد ما اجيلك..
يوسف ابتسم وقال
اممم والمقابل؟..
رضوي بحده
مقابل ايه علي فكره ده شغلك وشغلي يعني تسمع الكلام وتقول حاضر، وبكره تروح بدري وتاخد الورق وتراجعه كمان لانك انت اللي هتعيد شركه للمهندسين الجداد..
يوسف بخبث
طيب وانتي هتتأخري ليه بكره، عشان بتوحشيني يعني و…
قفلت رضوي في وشه وهو ضحك وقال لنفسه
هههههههه هتقعي يعني هتقعي يا رضوي هتروحي مني فين؟..
_ووقف تحت بيت عصام، ونزل من العربيه وطلع العماره واول ما وقف قدام شقته هبط علي الباب بطريقه لطيفه، ففتح عصام الباب وهو لابس فنله حمالات وماسك في ايده سجاره وقال من غير ما ياخد باله من يوسف….
عصام
اتأخرتي عليا يا يويو و…انت مين؟..
يوسف بهدوء
يويو برضو بس النيخه الذكوريه يا روح امك..
_وضربه بالشلوت في بطنه فوقع عصام جوه البيت ودخل يوسف وقفى الباب وقال بحده..
يوسف
انت مين يالا عشان تهدد اختي انا وتيصلها اصلا، انت تعرف اصلا هي مين وبنت مين..
عصام بخوف
انت بتتكلم عن ايه انا ااا..
ضربه يوسف برجله في وشه وقال
انت هتستهبل يا روح امك…
عصام مسك وشه بألم وقال بخوف شديد
والله العظيم ما ليا ذنب وو ولا اعرف هي بنت مين، بب بس سدره يوسف هي اللي طلبت منى اعمل كده والله واديتني فلوس وبينا شات وهي بتتفق معايا انا ممكن اوريهولك..
يوسف بصدمه
اييه سدره لا انت تقوم كده تعملنا كوبايتين شاي وتحكيلي الموضوع بالتفصيل والا والله مش هخلي فيك حته سليمه ومش هاخد فيك يوم واحد…
ــــــــــ #بقلم_الكاتبه_رحاب_القاضي ــــــــ
__وفي بيت الاستاذ حسن، كان الكل متجمع علي السفره ومعاهم ناهد اخت ليلي اللي قاعده جنبيها ليلي وروز ورضوي وطارق وروان وهند بنت ناهد اللي في سن روان وقدامهم علي السفره قاعده لمياء وجنبيها حسن وعزالدين وعلياء وعبدالله وروفان وسيف وريناد…
لمياء
حلو اووي البط بتاعك يا ليلي ومختلف المره دي انتي عملاه ازاي؟..
قبل ما ترد ليلي قالت روفان بحماس
عملااه بالسم الهاري يا عمتوو..
حسن بحده
اخرسي يا بنت ايه اللي بتقوليه ده؟..
روفان بخوف
واللع ما انا اللي قولت ده من شويه ماما طلعت البطه من الفرن وقالت دي البطه بتاعت لمياء تطفحها بالسم الهاري..
بصو كلهم لليلي بقلق وقالت هي بسرعه
لا لا دي بتقول اي كلام هو انا هقول كده برضو يا لمياء ده انتي حبيبتي..
علياء بتغير للكلام
مش كنا عزمنا زين يا عز النهارده معانا وكملنا لمة العيله..
لمياء بحده
علياء اسكتي ما ينفعش نتكلم في خصوصيات عيلتنا قدام الناس الغريبه..
ناهد بغيظ
ومين بقي الغريب يا لمياء ما توضحي كلامك..
رد حسن بسرعه وقال
مين قال بس ان بينا غريب دي لمياء بتهزر انتي مش عرفاها يعني…
ناهد بخبث
لا طبعا اعرفها جدا واعرف برضو بزين ابن عز اللي ظهر فجأه كده..
لمياء بحده
هو انتي لسه يا اختي شايله من ناحية عز اكمنه ما رضيش يتجوزك زمان..
عز بسخريه
اهي بدأت اهي..
ناهد بحده
انا يا حبيبتي اللي مرضيتش هو انا كنت هبادل الراجل الجدع جوزي الله يرحمه ب..
قاطعتها ليلي وقالت
ما تاكلي حمام يا ناهد ده انا عملاه بالفريك عشانك..
لمياء
قصدك ايه يا مرات اخويا ما ناكلش احنا يعني عشان انتي عامله الحمام لاختك..
قرب سيف من امه
في ايه يا ماما ما تهدي شويه..
عبدالله
صلو علي النبي يا جماعه ده احنا حتي متجمعين في الخير..
وبص لروان وقال بهدوء
ولا ايه يا روان؟..
روان بتوتر
اايوه طبعاً…
_بصت لمياء لريناد اللي قاعده ساكته ومش بتاكل وقالتلها بحده.. .
لمياء
انتي بقالك اد ايه هنا يا ريناد؟..
ريناد بتوتر
بب بقالي ااا..
ليلي بهدوء
يجي اسبوعين تلاته يا لمياء اصلها تعبت شويه من الحمل و…
قاطعتها لمياء بحده وقالت
يعني ايه تعبانه فتسيب بيتها جوزها، كانت كلمتني وانا كنت روحت شيلتها في عينيا..
روفان
لا يا عمتو ما هي كانت زعلانه من سيف..
كلهم خافو من ردة فعل لمياء وسيف قال بسرعه
زعلت عشان انا اللي جيبتها هنا عشان كانت تعبانه وكده..
لمياء بحده
اممم عليا انا برضو يا سيف، بس مدام انت دافعت عنها يبقي خليني ساكته احسن….
علياء
والله العظيم لو سكتي ما حد هيقلك تتكلمي وبعدين دي قراية فاتحة ابني فلميهم شويه..
_في الوقت مال سيف علي ريناد االب جنبيه وقال بصوت واطي..
سيف
بدافع اهو وهستحمل كلام امي اللي زي السم بعد كده ياريت نعقل ونتلم..
قامت ريناد من جنبيه وقالت
انا هشوف تيا جوه صحيت ولا لا ..
لمياء
جهزيها عشان هاخدها تبات معايا النهارده وانتي ارجعي لبيتك ولجوزك يا حبيبتي…
ريناد
حاضر يا عمتو ان شاء الله نره تانيه عشان انا مش بعرف اخلي تيا تبات بعيد عني وحضرتك عارفه كده..
لمياء
ما تشوف بنتك يا حسن هو عيب يعني ان حفيدتي تبات عندي يومين تلاته..
حسن بضيق
اسمعي كلام عمتك يا ريناد..
ريناد بحزن
بس يا بابا اا…
حسن بحده
ريناد اسمعي الكلام…
_اتملت عيونها دموع ودخلت اوضتها وراحت وراها روان ورضوي وهند بنت خالتهم..
رضوي
انتي بتعيطي ليه دلوقتي هو حد. كلمك…
هند
مش مهم الكلام ده دلوقتي شوفتو سيف وهو بيدافع عنها يا بختك بيه..
بصتلها ريناد بغيظ وروان
بقولك ايه يا هند هنتعبك بس اعملي لريناد لمون عشان تهدي..
هند
اوكي من عينيا..
طلعت هند وريناد قالت بغيظ
كويس وخلتوها تطلع والا كنت هقوم واقطم في زمارة رقبتها…
رضوي
طيب نعقل بقي وتهدي وتسمعي كلام بابا..
روان
بالله عليكي يا ريناد مش ناقصه نكد كفايه اليوم اللي مش راضي يعدي ده…
رضوي
وبعدين معاكي انتي وهي ماله سيف او عبدالله عشان تبقو مش طايقينهم كده اومال لو كانت واحده فيكم مكاني كنتو هتعملو ايه؟..
ردت عليها روان بسخريه وقالت
ما يمكن لو كنتي بتعملي زينا مش راميه نفسك عليه ما كانش سابك ومشي..
رضوي بحزن
شكرا يا روان، انا طالعه اشوف ماما وانتو براحتكم اعملو اللي عايزينه..
_قالت كلامها وطلعت من عندهم وهي مدايقه وريناد زعقت في روان وقالتلها….
ريناد
انتي غبيه يا بنتي ازاي تقوليلها كده..
روان
ما كانش قصدي بس هي اصلة مستفزه جايه تعدل علينا وهي اكتر واحده مغفله وماسكه في واحد مش بيحبها، هو كمال لو كان عايز ياخدها معاه مش كان اتصرف ولقي مليون طريقه بس لااا هو ما كانش عايزها واختار يبعد عنها وهي لسن نغفله ومستنيااه..
ريناد
عشنا وشفنا ام خازوق بتدي نصايح..
روان بغيظ
انا ام خازق طيب يااارب طنط لمياء تعرف انك قاعده عندنا غضبانه، ولا ليه ادعي ما انا هروح اقولها اسهل..
طلعت روان وريناد قامت وراها بسرعه وقالت
استني هنا يا حيوانه…
ــــــــــ #بقلم_الكاتبه_رحاب_القاضي ــــــــ
_وفي نفس العماره بس في شقة عم سيد اللي كانت عباره عن اوضه وصاله صغيرين شويه ، بس هنا رتبتهم ونظمتهم بشكل كويس وهو دخل وقالها..
سيد
ايه ده كله ده انتي غيرتي البيت كله..
هنا
اقل حاجه يا بابا وكمان عملتك فراخ ورز وملوخيه، اصل انا قرأت مقوله قبل كده بتقول ان مهما كانت قوة الانسان بيضعف قدام تلات حاجات وهما الرز والملوخيه والكوكو..
ضحك سيد وقال
امم وانتي بقي عايزاني اضعف ليه؟..
هنا بهدوء
عشان ما تخلنيش امشي من هنا، انا برغم اني تعبانه من السفر بس روقتلك البيت وعملتلك اكل حلو عشان تحب وجودي وما تخلنيش ارجع تاني البلد..
اتنهد سيد بحزن ورد عليها
يا بنتي انا لو عليا تفضلي معايا لاخر عمرك، بس انا عايزك احسن واحده وتدخلي الجامعه وتبقي شغاله شغلانه كويسه، وده مش هينفع وانتي قاعده هنا معايا في اوضه وصاله تحت السلم وابوكي بواب.
هنا
انا ابويا احسن واحد في الدنيا وعمري ما هنكر وجودك ولا هتكسف من شعلك اللي لولاه ولولا كرم ربنا علينا بيه ما كناش هنقدر نعيش، وبعدين الشغل مش عيب، طيب ايه رئيك اني هشتغل معاك وهقعد معاك قدام العماره كل يوم بس انت ما تبعدنيش عنك ما تبقاش انت وماما بعيد عشان خاطري يا سيد..
ابتسم سيد وباسها علي راسها وقال
ربنا يكملك بعقلك ويفرحني بيكي يا قلب ابوكي…..
هنا بقلق
مش هتخليني امشي صح..
سيد
ابقي غبي لو سيبت بنتي القمر دي نور حياتي تبعد عني لحظه واحده تاني..
حضنته بحماس وقالت
اقسم بالله انت رجوله اووي يا ابو السيد..
وبعدت عنه وقالت
هروح بقي اجهزلك الاكل وجايه ثانيه واحده..
ــــــــــ #بقلم_الكاتبه_رحاب_القاضي ــــــــ
_وفي المستشفي اللي فيها زين كانت فيروز قاعده جنبيه وقالها زين بضيق..
زين
كبرتي الموضوع يا ماما انا والله كويس ومش تعبان اووي يعني..
فيروز
ما فيهاش حاجه يعني لو اطمنت عليك، وبعدين الفحوصات دي مهمه عشان الازمه اللي جاتلك دي ما تتكررش تاني..
زين
طيب الموبيل بتاعي فين؟..
فيروز
معايا وما حدش عبرك غير شريف صاحبك وعمك حسن كان بيكلمك كتير ولما رديت عليه قالي اخليك تكلمه ضروري وفي حد تاني كده رن اسمه..
زين بهدوء وثقه
هُيامي..
ابتسمت فيروز وقالت
بالظبط وجنب الاسم قلب احمر مين دي بقي؟..
زين بهدوء
يارا..
فيروز بحماس
يارا مين ويعني ايه هُيامي اصلاً؟…
افتكر زين يارا وقال بتنهده هادئه
يا ساكنًا في مهجتي وفؤادي
تحلو بقُربـك فرحة الأيامِ
دي يا يارا يا ماما..
فيروز
يا سلام ده انا طلع ابني شاعر ورومانسي وانا ما اعرفش…
زين بغرور مصطنع
ما بحبش اتكلم عن نفسي كتير..
فيروز
حقك والله، المهم انت قبل كده قولتلي انك ما تعرفش عنها حاجه غير اسمها، ياتارا عرفت حاجه تانيه ولا لسه؟..
زين بأبتسامه واسعه
عرفت كل حاجه اصلا حضرتك برضو تعرفيها ما هي بنت صحبتك شهد الصاوي..
فيروز بصدمه
مين يا اخويا…
_في الوقت ده دخلت شهد بعد ما خبطت علي الباب ومعاها يارا اللي اتصدمت لما شافت زين ومامته وهي كانت متوقعه انها جايه معاها لحد تاني او لام طفل صغير مثلا، وبرضو صدمتها ما كانتش اقل من فيروز اللي لسه عارفه ان الطفله دي من وجهة نظرها هي حب ابنها، اما زين فأول ما شافها زادت ابتسامته اضعاف..
شهد.
الف سلامه عليك يا زين اول ما عرفت من فيروز انك قولو لازم اجي اطمن عليك..
زين
شكرا اوي يا طنط تعبتي نفسك..
شهد
تعبك راحه يا حبيبي المهم تقوم بالسلامه عشان خاطر مامتك دي مالهاش غيرك..
زين
ان شاء الله يا طنط..
فيروز
تعالي اقعدي يا شهد..
وبصت ليارا بابتسامه واسعه وقالت
تعالي يا يارا يا حبيبتي اقعدي هنا جنب زين لحد. ما نيجي..
شهد
نيجي منين؟..
فيروز
نيجي من تحت يا ستي عايزاكي في موضوع مهم…
شهد
طيب خليكي هنا يا يارا واحنا جايين علي طول..
_ وطلعت شهد مع فيروز وسابت باب الاوضه مفنوح لنصه، ويارا قعدت علي الكرسي اللي جنب سرير زين اللي ما نزلش عينه من عليها وما قالتش ولا نص كلمه، فضحك هو بهدوء وقال..
زين
قولي سلامتك يا يارا انتي مش جيالي الملاهي انا في مستشفي وتعبان..
يارا بأندفاع
انا اصلا ما كنتش جيالك انت ولو كنت اعرف ان انت اللي هنا ما كنتش جيت..
واتنهدت بضيق وتابعت كلامها
سوري… قصدي سلامتك…
رد عليها بهدوء وقال
الله يسلمك….
سكتت وكانت متوتره جداً، فهو قالها بهدوء
مدي ايدك يا يارا..
يارا بقلق
ليه؟..
زين
اسمعي الكلام بس..
_مدت ايدها وهو خلع الساعه الجلد الصغيره اللي في ايده ولبسهالها، فأبتسمت هي بهدوء وقربت منها وقرأت الاسم المكتوب فيها “هُيامي” وقالتله..
يارا
هُيامي يعني ايه؟..
زين بدموع
لو في يوم ما كنتش معاكي وما كانش في نصيب ابقي موجود في الدنيا ابقي افتكريني بيها، وافتكري ان هُيامي دي انتي لاني مش شايفك غير كده..
يارا بسرعه
بعد الشر عليك طبعاً..
زين بمرح
الله واكبر بدأنا نطلع كلام حلو اهو من غير العشرين كلمه الدبش اللي في الاول…
ضحكت يارا بهدوء وقالتله
هديه مقبوله، بس انا هنزل عشان لازم اروح البيت…
زين
ما هي مامتك لما هتخلص كلام مع امي هتكلمك تقولك خليكي قاعده معايا شويه..
يارا بكسوف
انت بتوترني علي فكره بطريقتك دي، لا انا همشي و وابقي لما تخف كلمني وطمني عليك لان في موضوع مهم لازم اقولك عليه..
زين
تمام خلي بالك من نفسك..
يارا
حاضر وانت كمان..
_ قالت كلامها وطلعت من عنده وهو ابتسم بهدوء وفضل باصص لاثرها بنظره عاشقه بل وغارقه بالعشق فهل ستكون لك ام انك ستتركها مبكراً يا زين؟
ــــــــــ #بقلم_الكاتبه_رحاب_القاضي ــــــــ
وفي بيت الاستاذ حسن..
كانو كلهم قاعدين مع بعض وبيحتفلو بقراية فاتحة روان وعبدالله وحسن قااعد مع ريناد وسيف لوحدهم وقال..
حسن
قومي يا سيف يلا بوس علي راس مراتك..
سيف بخبث
خليها تحلف الاول انها مش هتمد ايدها لو قربت منها..
ريناد بحده
ليه عايش مع الشحات مبروك..
سيف
والله اجمد منه دي يا خالي مره زعقتلها فقامت عملت نفسها بتزعق في تيا ومسكت الحزام وهرت جسمي بيه وقال ايه مش طايله البنت..
ضحك حسن وقال
ههههههههه بقي كل ده يطلع منك انتي يا ريناد؟..
ريناد
ما هو اللي عصبني يا بابا وبيستغل اني بحبه وبيجي عليا..
قعد سيف جنبيها وقال
حقك عليا ستي انا اسف ومش هتتكرر تاني..
ريناد بهدوء
خلاص سماح المره دي عشان خاطر بابا..
حسن
بقولكم ايه انتو بعد كده لما تتخانقو بلاش تقعدو في وش بعض واحد يقعد في البيت وواحد يجي هنا لحد ما الموضوع يخلص..وبيت بابا حسن مفتوح في اي وقت يا ريناد بس مش وانتي غضباانه وزعلانه،الدنيا فيها مشاكل كتير نتحمل شويه ونثق في بعض ونخلي ايامنا حلوه قبل ما تعدي ونقول ياريت ترجع من تاني..
ريناد قامت حضنته وقالت
ربنا يخليك ليا وما يحرمنيش منك ابداً يااارب..
دخلت عندهم روفان وقالت
الحقو خالتو ناهد العقربه زي ما بتقول يا بابا وعمتو ناهد الحربايه زي ما ماما بتقول مسكو في بعض..
قامو كلهم طلعو وحسن مسك روفان من قفاها وقال
والله انا متأكد انك انتي اللي ولعتيها يا سوسه يا صغيره…
_ وبالليل بعد ما العزومه خلصت كان حسن نايم وجنبيه ليلي وهما بيضحكو وقالها..
حسن
كنا زمان من ايام الخطوبه ما فيش مره اختي واختك اتجمعو فيها الا وتحصل خنااقه..
ضحكت ليلي وقالت
ههههه والله وفكرتني بأيام الخطوبه يا حسن دي كانت احلي فتره في حياتي..
حسن. بخبث
وباقي حياتك معايا مش حلوه يا ليلي..
ليلي مسكت ايده وقالت
انا كل يوم جنبك بالنسبالي احلي يوم في حياتي، بس سيبك انت كويس وريناد وسيف اتصالحو…
حسن
هو ده وقت ريناد وسيف ما تخلينا في نفسنا شويه…
وفجاه قالت روفان اللي كانت واقفه قدام السرير
بابا انا عايزه اتجوز..
اتفزع حسن وقال
سلام قول من رب رحيم، في ايه يا بنتي انتي حد مسلطك عليا..
ليلي وهي بتضحك
ههههه تعالي يا روفان ما نمتيش ليه لحد دلوقتي؟..
روفان نامت وسطيهم وقالت
عشان عايزه اتجوز..
حسن
لسه قدامك فوق العشر سنين عشان نعرف نجوزك..
روفان
انت ليه علي طول مش بتعملي الحاجات اللي بحبها ليه متضهدني..
حسن
ليه ايه يا اختي انتي بتجيبي الكلام ده منين..
روفان
لو سمحت ما تسخرش مني، وبعدين انا بتكلم مع ماما احنا ستات ونفهم بعض..
ضحك حسن وقال
هههههه خليكي يا اختي مع امك وانا هروح اطمن مع اخواتك وارجع الاقيكي في اوضتك مع اخواتك..
ــــــــــ #بقلم_الكاتبه_رحاب_القاضي ــــــــ
_في بيت يونس الصاوي..
رجعت شهد البيت متأخر واول ما دخلت اوضتها كان يونس قااعد علي السرير وماسك اللابتوب بتاعه وبيشتغل عليه ولما شافها قال..
يونس
كلمتك كتير يا شهد مش بتردي، بس يارا ردت علية وقالتلي انك كنتو عند فيروز..
بصتله بدموع وما ردتش عليه وهو سألها بقلق
مالك يا حبيبتي في ايه؟..
شهد بجمود
ما فيش بس زعلانه علي فيروز شويه..
يونس
هبقي اكلم عز عشان يروح لابنه ما تقلقيش….
قعدت شهد جنبيه وقالت
تعرف عز ده واطي اووي بس فيروز جدعه اووي في اللي عملتو عرفت تحافظ علي كرامتها ومشاعرها بعد ما شافت عز علي حقيقته..
يونس
بس مش لدرجة انها تخبي ابنه عنه يا شهد كده افتري؟..
شهد
مش عيب انها خافت علي ابنها من واحد. اسهل حاحه عنده الخيانه وقلة للاصل، كانت هتستفاد ايه لما تربيه معاه او حتي قريب منه ويطلع ابنها نسوانجي وطايش ونسخه من اب فاسد وفاشل، هتبقي خسرت عمرها اللي ضاع مع واحد ما يستاهلش وخسرت ولادها اللي ضحت عشانهم..
يونس بجمود
ولادها بس فيروز ما عندهاش غير ولد واحد..
ضحكت بهدوء وقالتله
يا عم ما تركز ما اخدتش بالي، هروح اغير هدومي وجايه..
يونس
طيب كلميهم تحت يجيبولي قهوه..
شهد
انا هغير هدومي وانزل اعملهالك بنفسي..
_ ودخلت اوضة اللبس بتاعتها واول ما بصت في المرايا وشافت انعكاس صورتها فدموعها نزلت وغرقت وشها وفضلت كاتمه و مداريه معرفتها بخيانته زي عادتها من سنين..
ــــــــــــــــــــــــــــ
_وفي البيت تحت كان واقف يوسف في الجنينه ونزلت عنده سدره وقالت بضيق..
سدره
عايز ايه، وايه الموضوع المهم اللي انت عايزني فيه؟..
يوسف بغضب
اهلا يا مرات اخويا، قوليلي عصام صبحي سعيد ده تعرفيه منين؟..
سدره بتوتر
هاا مم ما اعرفوش انت بتتكلم عن مين؟..
يوسف بحده
وحيات امك انتي هتستعبطي طيب ايه رئيك بقي اني معايا شات ليكي معاه وانتي بتطلبي منه يوقع اختي في الغلط،بس ليه عملنا فيكي ايه عشان تعملي انتي فينا كل ده؟…
سدره ببرود
انا مش فاهمه انت بتتكلم عن ايه، وبالمناسبه انا الوتساب بتاعي اتهكر من كام يوم ومش بعيد تكون انت اللي عملت كده عشان توقعني انا ويزن في بعض، ما انت بتغير منه اكمنه ناجح وشاطر وباباك بيحبه اكتر منك..
يوسف
مش مستغربك انا من زمان وانا حاسس ان فيكم شبه من بعض انتي وهو..
سدرا بعدم فهم
هو مين؟..
يوسف بغضب
ابليس ما انتي من عشيرته..
وقرب منها وقال بنبره غاضبه اكتر
بس انا مش هقول حاجه لحد وهعتبر اني ما عرفتش حاجه عشان جوزك متخلف ومش هيصدقني لو قولتله عليكي حاجه بس انا بحذرك منه لو عرف اللي عملتيه ده، بس اقسم بالله لو ما شلتي يارا من دماغك وبطلتي نفسنه منها لهيبقي عليا وعلي اعدائي وانتي ما تعرفيش مين هو يوسف الصاوي..
سدره بحده
مين اختك دي عشان انا انفسن منها يا ابن يونس…
مسكها من دراعها جامد وقال بحده
تقولي عمي يونس وتحترمي نفسك وانتي بتتكلمي عن اهلي، واختي دي احسن منك مليون مره وانا فاهم اووي النقص اللي عندك اللي مخليكي تغلي منها ومن دلع بابا وماما واحنا ليها، بس اللي يقرب من اختي لو كان مين هدفنه وهو صاحي فاهمه يروح امك….
_وذقها جامد وهي بصتله بغل وكره وسابها ودخل البيت ولقي يونس واقف عند السلم وزعق فيه وقاله…
يونس
مالك ومال مرات اخوك؟..
يوسف بهدوء
ما فيش حاجه بنتكلم عادي..
يونس بحده
اول واخر مره تمد ايدك علي مرات اخوك، لو في مشكله بينك وبينها تقول لاخوك لامك لابوها انما قلة ادب مش عايز..
يوسف بقلق
يا بابا انا ما مديتش ايدي عليها هي بس اللي اا..
يونس
سمعت قولت ايه ولا لا، هي زي اختك ماشي بس تبقي في حدود واحترام بينكم..
يوسف
حاضر ممكن اروح انام…
يونس
روح..
مشي يوسف ناحية اوضة يارا فقاله يونس
انت غاير فين مش رايح تنام..
يوسف
هطمن علي اختي قبل ما انام فيها حاجه دي ده انت غريب اووي يا جدع..
_ما ردش عليه يونس ودخل اوضته، ويوسف دخل اوضة يارا اللي كانت نايمه وحاضنه الدبدوب بتاعها وشبه الاطفال اووي، ابتسم بهدوء علي برائتها وراح قعد جنبيها وقال…
يوسف
يارا انتي يا بت..
يارا بنوم
في ايه يا يوسف؟..
يوسف
اطمني الموضوع بتاعك اتحل خلاص..
قعدت يارا بسرعه وقالت
بجد يعني الولد ده مش هيدايقني تاني..
يوسف
ولا هتشوفيه تاني اصلا وبعد كده اللي يدايقك بنظره بس تعالي وقوليلي وانا هفرمهولك وهعمله كفته واكله لحراس ابوكي تحت هما بيحبو اللحمه ومش هيفرقو بينها وبين اللحمه التانيه..
ضحكت يارا وخضنته بهدوء وقالت
انا بحبك اوووي يا يوسف انت احسن اخ في الدنيا انت ويزن…
بعد عنها يوسف بهدوء
هو احنا لينا غيرك، ويلا بقي خلصي الثانويه عشان نجوزك الواد حامد ونفرح بيكي..
اختفت ابتسامتها وقالت
لا لا طبعا مش هتجوز حامد انا يا يوسف…
يوسف
هو انا اللي قولت ده ابوكي اللي قال وانتي عارفه ان حامد عنده حاجه تانيه ومع ان لو عايز يجوزك لاي حد. قريبنا وخلاص كان قال مازن مثلا واهو انتو قريبين في العمر من بعض بس هو اختار حامد لانه بيحبه وحامد نفسه موافق.
يارا بدموع
بس انا مش موافقه وبعدين حامد ده اتولد في اول جزء انما انا اتولت في التالت حرام كبير عليا اووي..
يوسف بمرح
ما فيش حاحه تكبر عليك يا صغنن انت، وبعدين لسه بدري ده انتي قدامك بتاع سنتين يا بنتي علي الكلام ده، يلا تصبحي علي خير…
_قال كلامه وطلع من عندها وهي رجعت نامت وهي مدايقه بسبب كلامه علي موضوع جوازها هي وحامد اللي كل علاقتها بيه انه ابن عمها ومش بتشوفه غير في المناسبات وبس، وبصت للساعه بتاعت زين وابتسمت بأتساع وقرأت الاسم اللي مكتوب فيها بهدوء..
يارا
هُيامي… معقوله انا في حد شايفني بالطريقه دي..
_فماذا يخبئ لكِ قلمي ايتها الصغيره🙈👀
ــــــــــ #بقلم_الكاتبه_رحاب_القاضي ـــــــ
_وتاني يوم الصبح وصل يوسف الموقع بتاع الشغل ودخل يجيب الورق بتاع رضوي من المكان المخصص لشغل المهندسين، واول ما دخل شاف هدير المهندسه الجديده قاعده هناك..
يوسف
انتي هنا ايه اللي جابك بدري اوي كده..
هدير قربت منه وقالت
هو مش انت قولتلي انك جاي بدري، بصراحه كده انا مش جايه اشتغل انا جايه عشانك..
يوسف بخبث
طيب ما انا عارف بس مستنيكي تقوليها، نستغل الوقت بقي قبل ما العمال يجو..
هدير بقلق
وقت لايه اا انا قصدي بس نقعد مع بعض شويه..
يوسف قرب منها جامد وقال
ما عنديش مشكله بس القعده مع يوسف الصاوي تختلف..
_وبره وصلت رضوي بعربيتها واول ما نزلت وشافت عربية يوسف ابتسمت وقالت..
رضوي
ده جه بجد يجيب الورق غريبه..
_وراحت فتحت الباب ودخلت في المكتب الكبير اللي فيه يوسف وهدير واتصدمت جدا اول ما شافته هو وهدير بوضع مش كويس خالص، واول ما شافها يوسف بعد عن هدير وقال بتوتر وخوف..
يوسف
اا انا كنت جاي اجيب الورق و..
رضوي بصتله بقرف وردت عليه وقالت
انت تخرس خالص جاتك القرف..
وبصت لهدير وقالت
وانتي اوعي اشوف وشك هنا تاني فاهمه..
_قالت كلامها وسابتهم وخرجت ويوسف بص لهدير بضيق وقال..
يوسف
انتي هتقفي تتنحيلي اطلعي بره…
هدير بغيظ
قال وانا اللي كنت فاكراك هنا الكل في الكل، طلعت واحده اللي ممشياك..
قالت كلامها وسابته وطلعت وهو طلع وراها بس دور بعيونه علي رضوي اللي كانت واقفه عند عربيتها واول ما شافها بصلها بغضب وعصبيه وقرب منها و؟….
_تفتكرو هيعمل فيها ايه؟..
يتبع….
لقراءة الفصل التالي : اضغط هنا
لقراءة باقي حلقات الرواية اضغط على : (رواية موضوع عائلي 3 (بيت الهنا))