رواية رحم للإيجار 3 (حب الفرسان) الفصل الخامس والخمسون 55 بقلم ريحانة الجنة
رواية رحم للإيجار 3 (حب الفرسان) الفصل الخامس والخمسون 55 بقلم ريحانة الجنة
رواية رحم للإيجار 3 (حب الفرسان) البارت الخامس والخمسون
رواية رحم للإيجار 3 (حب الفرسان) الجزء الخامس والخمسون
رواية رحم للإيجار 3 (حب الفرسان) الحلقة الخامسة والخمسون
كانت حالتها بدأت تتحسن كتيير عن الأول وخصوصا لإهتمام ديمة وسامر بيها هي وأكمل بشكل دائم ومكثف ومع الايام بدأت تسترد صحتها وتتعافي من الڤيرس …لكن اللي كان بيألمها دائما ويحزنها كان هو أكمل!!
لان اصابته بالڤيرس في الوقت الحرج اللي اوصيب فيه بعدوته منها كان صعب عليه…خصوصا لانه كان من قبلها بوقت قليل يادوب بيتعافي من عملية خطيرة وكمان في الرئة …اللي هي اكتر مكان بيتضرر من الاصابة بالڤيرس…لكن هي كالعادة عنيدة في العشق زيه وصممت انها حتي بعد ما بدأت تتعافي انها تفضل ملازمة ليه…
كانت بتقرب منه بالدواء والأكل بهدوء…وهو مبتسم ومستمتع كعادة حاله من وقت ما دخل المستشفي وقت الحادثة …كان بيتمني الوقت يطول علشان يفضل معاها وقريب منها حتي لو ده هيكون بالتعب والآلم !!
چنا : اسمع بقي تاكل بسرعة علشان تاخد الدواء انت كل ما بأكلك بتتعب قلبي وتطول عايز تاكل لقمة لقمة زي البيبهات كدة !!
أكمل ابتسم بمكر: ان جيتي للحق انا لو عليا عايزك تقعدي تأكليني اليوم كله!!
چنا عقدت حاجبها بإعتراض: نعم!! ليه بقي ايه الجوع ده كله!!؟
سحب ايديها بخفة وقعدها قريب منه علي سريره وعيونه بتتغزل فيها بحنين ..
أكمل بهمس عاشق: علشان الوقت اللي بتأكليني فيه ده بيكون اكتر وقت في اليوم كله بتكوني قريبة مني…شايف عيونك عن قرب…مستمتع برسم شفايفك وانتي بتتكلمي…وانتي بتضحكي…وانتي بتبتسمي!! بتنفس ريحتك وانفاسك وصدري يشفي ويرتاح بقربك يا چنا ..
واتنهد وكمل كلامه بحزن ووجع: عارفة اكتر حاجة حامل همها ايه يا چنا!!!؟
كانت بتتماسك من حنينها ليه وقلبها اللي بيضعف قصاد حزنه ولحظات ضعفه…
چنا بحيرة: ايه اللي انت شايل همه كدة وغير ملامحك وحزنك بالشكل ده يا أكمل!!!
أكمل ضم إيديها بين قبضته القوية بتمسك وخوف : انا خايف اخف من تعبي يا چنا حامل هم اللحظة اللي هيدخل عليا فيها سامر ويقولي تحليلك سلبي وخفيت خلاص ولازم اخرج من هنا!!!..شايل هم بعدك من تاني يا چنا!! عارفة يعني ايه اني مش عايز اخف وارتاح !! عندي افضل كدة طول عمري تعبان واتوجع والنوم يروح مني في عز الليل بس المهم اغمض عنيا عليكي و افتح عنيا عليكي !!
چنا سحبت ايديها من بين قبضته المتملكة بصعوبة وبعدت عنه بحيرة وتفكير وسكوت !!!
أكمل شاف صمتها وهروبها منه بحيرة خاف اكتر واتوجع وقام من سريره وقرب منها بقلق من فكرها وحيرتها!!! وقف قصادها وعيونه في عيونها برجاء واحتياج!!
أكمل : چنا انا محتاجلك دلوقتي اكتر من أي وقت عدي علينا زمان!! چنا انا ماليش غيرك وانتي كمان مالكيش غيري …تعالي نرجع ارجوكي ونداوي بعض…كل واحد مننا جواه جرح كبير ووجع ومافيش مخلوق في الكون ده كله يقدر يحل مكان واحد فينا في حياة التاني …لا انا هقدر احب ولا ارتاح مع غيرك ..ولا انتي ينفع تعيشي وتكوني لاي راجل غيري …لو ده حصل انا هموت يا چنا فاهمة يعني ايه هموت!!
وكمل بنبرة غيورة وغضبانة : لكن اقسم بالله قبلها هقتله واندمك مش هخليكي تتهني في حضن غيري ولا هسيب غيري يتهني بحضنك لو ما رجعتيش ليا يبقي مش هتكوني لغيري …فاهمة يا چنا !!
رفعت عيونها لعيونه بدموع وعتاب وضعف: وياتري انت متمسك بيا وشايف اني ماليش غيرك ومالكش غيري علشان اتأكدت اننا بقينا في مركب واحدة!!!
أكمل عقد حاجبه بتساؤل: يعني ايه!!
چنا بدموع ووجع: يعني الاول كنت خايف اسيبك واتجوز غيرك واخلف منه و علشان كدة رمتني فريسة لماجد وسبته يلعب بيا وبيك زي عرايس ماريونت !! ولما خلتني زيك عقيمة ومافيش مني أمل غرورك أكدلك اني مش هلاقي غيرك يقبل بيا وبظروفي وبعقمي الابدي !! علشان كدة شايف اننا مالناش الا بعض يا أكمل مش كدة!!! دلوقتي بس اطمنت وعرفت اني مافيش قصادي اختيار الا انت !!؟
أكمل حرك رأسه بنفي لتفكيرها الغريب واللي كل جوارحه بتقسم انه ما خطر ليه علي بال ولا مر بتفكيره!!!
أكمل ضغط علي ذراعها بعنف ودهشة وعتاب موجوع: انا !! انا يا چنا هفكر كدة!! انا اللي كنت ومازلت بتجنن عليكي وبموت لو اشوف راجل غيري بيبص عليكي !! قوليلي ايه اتغير فيا من زمان من واحنا عيال صغيرة!!
چنا بعتاب ووجع: أيوة يا أكمل انت بس بتكابر مش أكتر لكن انت عارف ومتأكد ان مافيش واحدة هترضي بعجزك غيري !! عارف ومتأكد ان مافيش واحدة غيري هتداوي جرحك وخصوصا دلوقتي لان زي ما انت شايف وحصل علي ايدك بقيت زيك عاجزة!! لا انا هقدر في يوم اخلف وأكون أم لاخر عمري !! ولا انت هتقدر في يوم تخلف وتكون أب لاخر يوم في عمرك!!
ليه بتكابر ومش عايز تقول الحقيقة !؟
أكمل بقهرة ووجع صرخ فيها: أي حقيقة يا غبية!! اي حقيقة اللي بتتكلمي عنها دي !!؟ حقيقة حبي ليكي من سنين من قبل حتي ما اعرف اني عقيم ومش هخلف زي ما بتقولي !! ولا حقيقة حبي وتمسكي بيكي في وقت ضعفي وعجزي علشان كنت عارف انك الوحيدة اللي هتضمي وتطبطبي عليا!!! ولا حقيقة حيرتي وغبائي وانا بتعلق بأمل كداب كنت متخيل انه هيقربني منك ويضمنلي وجودك في حياتي علشان بحبك ومحتاجلك مش علشان عاجز وماليش،غيرك !! ولا حقيقة غيرتي وناري لما فوقت من تخدير الكلب ماجد ليا ولقيتك حامل من راجل غيري !!! ولا حقيقة دموعي وكسرة رجولتي وانا بشوف بطنك وهي فيها جنين مش من صلبي وهاين عليا اشق بطنك واقتله بين ايديا!! ولا حقيقة قهرتي وحرقة قلبي عليكي لما إستأصلتي الرحم بسببي واتحرمتي من أمومتك للابد وانا واقف عاجز كالعادة قصاد تدبير وقدر ربنا ليا وليكي !!؟ ولا حقيقة كسرتي واجباري علي طلاقك وحرماني منك في عز احتياجي ليكي واحتياجك ليا!! ولا حقيقة جنوني لما شوفتك مع مرتضي وتخيلت انك ممكن تميلي ليه او تحبيه!!؟ ولا حقيقة تمني الموت لما عرفت بالعدوي بتاعتك وما اترددتش لحظة اني لو هتكون دي النهاية يبقي ننتهي سوا ومع بعض!!؟ اي حقيقة فيهم يا چنا!! ردي وقوليلي اي حقيقة فيهم!!؟
چنا كانت بتسمعه بوجع ودموع قربت منه بشفقة علي حالته واحساسها بالذنب لإندفاعها وجرحها ليه بقسوة …قربت منه وبتلمس كتفه بخفة انتفض وبعد عنها بكسرة وانهزام!!
أكمل بمرار ووجع: كفاياكي شفقة يا چنا لحد كدة وكفياكي تمثيل انتي عملتي اللي عليكي لحد كدة وقفتي جنبي في تعبي وضعفي..كفاية لحد كدة كتر خيرك انا كلها ايام وهخرج من هنا وانتي كان المفروض تخرجي من ايام بس حرجك مني خلاكي تفضلي معايا للنهاية…
چنا بدهشة : يعني ايه!!؟
أكمل بيحبس دموعه وحزنه بصعوبة وتماسك : يعني مابقتيش مضطرة تفضلي اكتر من كدة …تقدري ترجعي بيتك وحياتك وانا اوعدك مابقتش هدخل في حياتك من تاني ولا هفرض نفسي عليكي…وحتي لو في يوم اخترتي تكوني مع اي راجل سواء مرتضي او غيره انا مش هدخل ولا همنعك…انا بمجرد خروجي من هنا هسافر وهبعد …والمرة دي هبعد لا بعد مكان…مش هرجع تاني ولا هتعرفي عني اي شئ ولا هسبب ليكي اي مشكلة …تقدري تعيشي حياتك بالشكل اللي يرضيكي ومع الشخص اللي انتي تختاريه وشايفاه احق بيكي ويستحقك..
چنا بدموع ودهشة : يعني انت خلاص ما بقتش عايزني!!؟
أكمل التفت ليها بحزن وندم: انا كنت طول عمري عايزك ومتمسك بيكي ومازلت …بس انتي دايما بتشوفي حبي وتمسكي بيكي غباء وهمجية وتحكم!! انا خلاص تعبت من جري وراكي واثباتي لحبي ليكي واحساسي اتجاهك …تعبت من ظلمك ليا وتفكيرك مهما بعمل من سنين مش قادرة تفهمي وتشوفي حبك جوايا حجمه ايه…دايما بتشوفي الوحش فيا ..دايما بتشوفي اخر رد الفعل والغضب والجنون ما بتفكريش في السبب في ده و ايه اللي استفزني علشان اكون بالوحشية دي في اي موقف!! چنا انا طول عمري راضي بكل مافيكي مهما كان كل انسان وفيه عيوب ومميزات بس انا عمري ماشوفت عيوبك ولو سألتيني عنها ححتار مش هعرف ارد لاني ببساطة شايفك كاملة بدون عيوب ودي نظرة العاشق ..لكن انتي!! انتي لو اتسالتي عن عيوبي دلوقتي هتعدي ومش هتخلصي وطول عمرك ده حالك شايفني انسان كله عيوب والميزة الوحيدة اللي فيه انه حبك!!
انا كنت طول عمري بهرب من الناس والدنيا والعائلة والصحاب واجي اترمي في حضنك واطمن زي العيل الصغير اللي محتاج لحضن امه تطمنه وتهديه…لكن فجأة لقيتك بتبعديني عن حضنك تخيلي القسوة والقهرة اللي ممكن يحس بيها عيل صغير وهو بيجري موجوع.. بينزف.. خايف…حزين..علي حضن امه علشان تضمه ويلاقيها بتنفر منه وتبعده وترمي بعيد وتمشي وتسيبه وحيد في وسط الناس يشحت الامان والونس وسطهم وهي اتخلت عنه!!؟
وهنا ضرب قلبه بقوة ووجع ودمعته خانته بيأس: بس انا لازم اقتل قلبي ده علشان هو اللي مخليني واقف قصادك مكسور بالشكل ده يا چنا !! انتي مابقتيش چنا اللي حبتني زمان واللي كانت عايزة تعيش معايا عمرها كله…بقيتي زي عصفورة هربت من قفسها ورافضة ترجع تاني مهما كانت هتلاقي راحة وحب واهتمام مش هترجع…انتي فعلا خلاص اتمردتي علي حبي وقلبي اللي مابقوش كافين علشان اقدهم ليكي قربان بقيتي عايزة حد تاني وقربان تاني وانا خلاص مش همنعك ولا هقف في طريقك لا طريق نجاحك وشغلك ولا حياتك وقلبك اعتبريني برا حياتك يا چنا من الليلة!!!
وقتها كانت في متاهة مشاعر !! واقفة مش عارفة تستوعب ولا تقرر مقسومة نصين بقسوة …جزء معاه وحاسس بوجعه وناره وشايف انه معاه حق في كل كلمة ومقتنع بيها وبيلوم ويعاتب نفسه انه كان فعلا ظالم ليه وماقدرش يفهمه برغم ادعاء قلبها انه فاهمه وحافظة وحبه اكتر الا ان الجزء ده جواها بيقولها انها ذبحته بسكين بارد من غير رحمة…
وجزء تاني بيعاند ويعترض وشايف انه اداله فرص كتير ..وضحي علشانه كتيير ..وقدمله اللي مافيش واحدة ممكن تقدمهولة ..وانه هو اللي اذاها ووجعها ..هو اللي ضحي بيها قصاد انه يحقق رغبته في انه يثبت رجولته و يبقي أب …ومافكرش فيها ولا في اللي ممكن يحصلها ولا نتيجة ده هتكون ايه!! النتيجة اللي هي انكوت بيها بقسوة ومرار لما اتحرمت انها تكون أم للابد واتحكم عليها تعيش وحيدة طول عمرها….الجزء ده جواها كان عنيد وشديد وجواه جرح كبير وصوت وجعه وصريخه كان معتم علي الجزء التاني اللي كان بيسحبها ليه علشان تقربه منها تضمه لحضنها وتقوله كفاية وجع ليا وليك وكفاية الجروح اللي مزعت قلوبنا معاها..كانت بتحارب عنادها ووجعها منه وبتتمني تنهي كل حاجة…
لكن للاسف كانت نهاية الصراع والخناق والاختلاف اللي جواها ده استسلام لقراره وتسليم بالنهاية اللي وصلوا ليها واحتفظت بحيرتها جواها..
التفتت ليه بتيه وحيرة بتداريهم وكبرياء اظهرته مجبرة..
چنا بهدوء: عندك حق احنا يمكن اتوهمنا زمان بسبب قربنا واعتيادنا علي بعض اننا قادرين نكون سعداء ومرتاحين مع بعض لكن يظهر اننا كنا غلطانين والغلط ده اتصلح بطلقنا وكنا هنغلط غلطة اكبر لو كنا رجعنا من تاني…
أكمل كان بيسمعها وهو في حالة من الدهشة !! ومصدوم بمرار!! والاكتر مجروح منها معقول!! مافيش لحظة تمسك واحدة بكل اللي كان بينهم من سنين !!! وكلمتها رنت جواه بصدي مؤلم …غلطة !!؟ حب طفولة ومراهقة وشباب ووعود كتير بنهم وضحك ودموع جمعتهم وزواج كان حلمهم واقصي امانيهم وذكريات مالهاش آخر وصور جمعتهم بتحكي تاريخ حافل بينهم من وقت ماكانت سنين عمرهم من رقم واحد يادوب يتعد علي الايد الواحدة !! كل ده شافته غلطة!! غلطة وبتتبرأ منها بكل سهولة !! اول مرة يحس انه فقدها وهي كمان فقده للابد…يمكن حتي وقت ازمتهم وطلاقهم كان جواه احساس انها لسة ليه ولسة بتحبه…لسة فيه امل بينهم..لكن دلوقتي الامل مات قصاده ..هي قتلته بكلامها..
حرك رأسه بموافقة وابتلع غصة وجع وابتسم بكبرياء رجل مهان مش لاقي حتي اللي باقي ليه من عزة نفسه وكرامته واللي كان بينساها او يتنساها مقابل انه يرجعها ليه!!
أكمل : تعرفي انك لخصتي كل حاجة في كلمتين!! وهم وغلطة !! احنا فعلا غلطنا ويمكن اكتر واحد فينا غلط هو انا!!
والتفت بعيد عنها بظهره بيحاول يتماسك وينهي الحوار المؤلم ده بأي شكل: انا صدعت وعايز انام تقدري تروحي اوضتك وياريت ما تتعبيش نفسك تاني وتهتمي بأي شئ يخصني لحد ما تخرجي من هنا…
كانت اطرافها بتتمد ليه عايزة تشده بندم واحتياج وتقوله محتجالك!! عايزاك!! ضمني لحضنك وطمني انك مش هتجرحني تاني!! طمني ان اللي جاي احلي معاك ومختلف عن اللي فات وعشته وياك!!
عايزة تصرخ وتقوله سامحني وسامح غبائي وخوفي وحيرتي اللي انت السبب فيهم!!
عايزة تقوله راعي ان جوايا جرح كبير مش قادرة انساه ولا اعفره لحد دلوقتي ..يمكن انت عجزك كان قدر الاهي من غير تدخل بشر!! ايوة انا كمان عجزي قدر من ربنا لكن كنت انت سبب فيه وانا مش قادرة انسي السبب ده!!!
سحبت ايديها من تاني بضعف وخوف قبل ما تخونها وتتمسك بيكتفه بحرمان!!
كانت بتبص ليه عايزة تشبع منه ومن سمته ورسمه!! ايوة موليها ظهره وملامحه مش قصاد عنيها لكن مش فارق هي حافظة ملامحه اكتر من ملامحها حافظة كل خط في جبينه وقت هدوئه بيكون شكل جبينه ايه ووقت غضبه وتحول ملامحه بيظهر في جبينه كام خط من الغضب!! شكل شفايفه وهو بيبتسم وهو بيضحك وهو بيتكلم وهو ساكت وهو نايم!!
رسمة لحيته وانحنائات خصلاتها السوداء الناعة وقت ما بيسبها تطول بتكون شكلها ايه ووقت ما يهذبها بتزيدة وسامة وبتغير ملامحه للاجمل!!؟
كانت بتتنفس عطره وانفاسه اللي بتشاركها الاوضة وبعد لحظات خلاص هتتحرم منها ..كانت بتبص لقبضة ايده اللي ضاغط بيها بقوة علي اصابعه من غضبه وهي بتتمني تسحبها بحنان وتفك توترها وتكورها العنيف ده وتضمها لحضنها وتهديه!؟؟
جواها شئ مش هاين عليه يسيبه !! وشئ تاني محتار وبيقولها يمكن تتوجعي دلوقتي بس ترتاحي بعدين لازم تجربي وتعيشي وتتعلمي ان أكمل مش نهاية الحياة..لازم تتأكدي ان كان ده صح ولا غلط..وعمرك ما هتتأكدي وانتي معاه وشايفاه وحنينك بيغلبك ليه لازم تتأكدي وتفهمي وانتي بعيد!! ابعدي ياچنا ..ابعدي !!
قربت منه بحزن وهدوء: ااا اانا هجيلك قبل ما اسيب المستشفي واطمن عليك…
أكمل غمض عيونه بتماسك وغضب واتنفس بضيق من غير ما يلتفت ليها ولا يودع عنيها..
أكمل : لا… مافيش لزوم ياريت لما تمشي تكتفي انك تبلغي سامر وبس …
غمضت عنيها بوجع ووقتها اتأكدت ان أكمل اللي جاي مش هيكون هو أكمل اللي فات…
خرجت بسرعة من الاوضة وهو عنيه التفتت ليها تلمحها وهي بتبعد وقتها قفل الباب وراها بسرعة وغيظ وضربه بقبضة ايده بقوة وغضب..
أكمل بوجع: غبية …غبية يا چنا غبية !!!
*************************************************🌹بقلم ريحانة الجنة🌹
كانت قاعدة في الطيارة بحزن وسكوت وضامه ابنها لحضنها بدموع وصمت اكنه لسة حي والروح جواه !!
كان حزنها متقسم عليهم علي حتة منه راحت ومش راجعة وحتة تانية بتدبل وبتروح قصاده من الحزن والوجع!!!
حاوطها بإيده بعتاب : مش كنتي سمعتي الكلام وكان فضل في حضانته اللي جبناها معانا لحد ما نوصل مصر!!! ليه كل الوجع ده انتي بتتلذذي بوجعك ياماسة!!؟
ماسة ضمته لصدرها اكتر بدموع: عايزة اشبع منه يا فارس!! كلها ساعات والتراب يحضنه بدالي!! مش هشوفه تاني ..عارف نفسي كنت اعرف صوته شكله ايه! عيونه وهي مفتحة لونها ايه!! عياطه عالي ولا هادي!!؟ كان نفسي يضم ايدي بصوابعه الصغيرة دي ولو لمرة واحدة!!؟ كان نفسي اوي يعيش يا فارس كان نفسي انا موجوعة اوي!! قلبي بيوجعني اكني ماسكة حتة من قلبي بين ايديها ومفروض عليا ادفنها!؟؟
سحبها لحضنه بوجع وغمض عيونه بندم وهو بيتألم: ااااااه يا ماسة كفاية ابوس ايدك!! انا اللي قتلتكم !! قتلته هو للابد وقتلت حتة من قلبك انتي وانتي عايشة!!؟ سامحيني يا ماسة سامحيني!!
دفنت دموعها في حضنه بقهرة ونااار وبكاها زاد من غير ما تنطق !! عايزة تقولها مسامحة بس وجعها وحزنها غالبها ومش قادرة تفكر ولا تطيب جرحه لانها ببساطة مجروحة جرح اكبر والنار في قلبها لسة لهيبها مشتعل بجنون!!
*************************************************🌹بقلم ريحانة الجنة🌹
كان بيسحب كأس مشروبه بإرتياح وابتسامة شر ووعيد : المهم انها خلاص بتتهيأ كل يوم علشان تكون قد الضربة الكبيرة واللي هتخلصني من العائلة دي كلها وتشفي غليلي وقبل ده ما يحصل يكون من نصيبي كل اللي يمتلكوه وكل اللي اخدوه من غير ما يستحقوه…
فايز بتاكيد وابتسامة مكر: طبعاا يا ملك انت اللي تستحق كل ده مش هو ..
حازم رشدي بنصر: ااااااخ يا فايز امتي يجي اليوم اللي أكون فيه انا الملك ولما يتقال الملك يبقي مقصود بيه انا مش رعد الحديدي!!
فايز بخبث: خلاص هانت يا ملك وكل حاجة هتكون زي ما انت عايز !! انا عارف انك مهما مرت السنين ما نستش اللي عمله معاك رعد ولا عمرك هتنساه..
حازم رجع كأسه مكانه بضيق: ولا عمري هنسي يا فايز انا عشت سنين بحارب في اتجاهين اتجاه بجمع فيه مال ونفوذ وسلطة واتجاه بدبر واخطط وانفذ فيه حفر ومكايد لرعد وحتي النفوذ والمال كانت علشان تخدمني اني اضربه في مقتل…عارف يا فايز انا حطيت ايدي في ايد شياطين علي هيأة بشر مقابل اني اوجع رعد وازله طول عمري نفسي اشوفه مهان ومكسور …بس الغريب انه علي مر السنين مهما ادبر ليه وانفذ واشوف الكوارث بتتحقق قصادي واقول هينخ وينكسر ويركع الاقيه بيقوي ويقف ويقاوم كل يوم ولاده بيكبروا واحفاده بيزيده وانا انكتب عليا اني اخلف عيل واحد وماليش منه غير حفيدين اتنين بس حاولت كتير اخلف تاني وببقي ليا عيلة وعزوة واحفاد كتيرة بالشكل ده لكن ما قدرتش !!! كنت كل ما اتعالج اسأل ليه بعد كارم ابني مش عارف اخلف الدكاترة تحتار ومش عارفة السبب اتجوزت تاني وتالت ورابع وعاشر وكل مرة ماتحملش واطلقها واتجوز غيرها وبردوا مافيش فايدة …كل ده كان بيحصل وقصاده الاقيه هو فلوسه تكتر ونفوذه تزيد وقوته تستقوي اكتر واولاده تكتر ومن بعدهم احفاده تزيد كنت بغلي واتمني يتقطع نسله وتتحرق فلوسه زي ما قلبي محروق منه!!
فايز عقد حاجبه بخوف من حازم: انت بتكرهه اوي يا حازم بيه انت مش شايف شكلك وانت بتتكلم عنه !! يخوف!!
حازم ضغط علي اسنانه بغليل وغضب ونظرة شر لفايز: مش قولتلك ماتقوليش غير يا ملك! ثم ايوة بكرهه وكلمة كره قليلة علي اللي جوايا ليه!!!
والتفت بعيد عنه بضيق وجدية : المهم قولي هو عدي لسة ما طلقهاش!!
فايز : لا لسة بس انا هفضل اخليها تستفذه لحد ما يطلقها علشان وقتها هتكون في قمة انتقامها واي اقتراح مني هتنفذه علشان تنتقم من عدي اللي طلقها علشان عشق ومن رعد اللي كان السبب في ده!! بس المشكلة انها طالبة مني شوية حاجات بخصوص عشق وانا لو نفذتها ممكن جوازة عشق من عدي تبوظ ووقتها كل الامال دي هتروح!! قولي اعمل ايه!!؟
حازم عقد حاجبه: وهي عايزة تعمل ايه مع عشق!!
فايز قرب منه بمكر وهمس بكلمات مسموعة : ……….يعني هتنهيها من حياة عدي للابد!!
حازم ابتسم بنصر: بالعكس لو نفذنالها اللي عايزة تعمله في عشق هنضرب عصفورين بحجر واحد!!
فايز عقد حاجبه بحيرة: ازاي بقي!! وقتها هنبقي زحناها من طريق عدي وهنا مش هتبقي مستعدة تكمل في اي حرب ضد عدي ورعد هتخاف علي اللي باقي بينهم زي ما كنت طول عمرها مهما تكون كارهة رعد كانت بتخاف تضره في اي شئ!!
حازم قرب منه بشر ومكر: ماهو لما ننفذ ونزيح عشق من طريق عدي بعد ما حبها واتعلق بيها عدي هينكسر شوية ورعد هيحس انه كان ضعيف وماعرفش يحميها وكمان هينشغله في قصة عشق دي شوية ونعرف نضربهم من ناحية تانية زي ما مخططين يفوق ويشوف الضربة التانية نكون بنضرب الضربة الثلاثة وهكذا لحد ما كل ضرباتنا تنتهي وتنهيه والاهم بقي واللي هيجبر هنا تكون طوع لينا ومالهاش الا حضننا وحمايتنا لما رعد وعدي يعرفوا ان هنا ورا اللي حصل لعشق وهي اللي مدبرة ومنفذة!!
فايز ابتسم بشر: ومين اللي هيعرف رعد وعدي ان هنا وراها!!؟
حازم بسخرية : اولا هي هتكون اول واحدة الاتهام هيشاور عليها ثانيا دي مهمتنا نعرفهم ونتفرج عليهم بيتفرقوا وياكلوا في بعض!!
فايز بإعجاب: مش بقولك ملك!! طول عمرك ملك ودماغك الماظ!!
حازم قعد واتنهد بوعيد: المهم قولي همس اخدت الحقنة اياها!!؟
فايز بتأكيد : طبعااا كل ما بتروح المستشفي بتاعة رعد علشان الكشف الدوري بتاعها الممرضة بتاعتنا بتحطهالها في المحاليل من غير ماحد يحس!! وقريب مش هيبقي فيه همس تاني!!
حازم اخد نفس براحة وغمض عيونه بنصر: اااااه هي دي اللي هتخليني اشوفك مكسور يارعد خاليك مشغول بالاحفاد اللي هقهرك عليهم واحد ورا واحد .. لحد ما تشوفني بحسرك علي اللي تبيع عمرك عليها بس وقتها مش هيكون فيه وقت هتكون بتاخد عزاها!!
فايز بتساؤل: بس قولي يا ملك انت ليه ما فكرتش مثلا في القتل المباشر تخلص منهم واحد واحد من غير دليل ووراهم رعد ليه كل الحيل دي ده وقت ومجهود وتفكير كمان!!!؟
حازم ابتسم بمتعة: اللي بتقوله ده اسمه فقد اللذة!! عمرك شوفت وحش بيبلع فريسته مرة واحدة كدة!! تؤتؤ بيفضل ينهشها من كل عرق نابض ويمزعها لحد ما تموت بين انيتبه وبعدها يفترسها ويكلها !! المتعة كلها وانت بتشوف فريستك بتتألم وضعيفة ومش عارفة تخلص نفسها منك!! .وخصوصا لو الفريسة قوية ومكتبرة زي رعد !! اللي نصرك وفرحتك عمرها ماهتكون بقتله تؤتؤ هتكون بكسره فاهم ياغبي!!
فايز بإعجاب: والله عندك حق انا فعلا غبي !! انت استاذ وانا التلميذ وهفضل طول عمري وتعلم منك!!
حازم بجدية : المهم خالينا بقي حكاية عشق دي!!!
************************************************🌹بقلم ريحانة الجنة🌹
كان قاعد بهدوء وهيبة وضيق من المعلومة اللي اتاكدت ليه مع انه كان شبه متأكد منها …رفع عيونه من ملف الاوراق اللي بين ايده بضيق…
مروان حرك رأسه بتفهم: يعني هو اللي اعترف ان ماجد اللي دفعله علشان يقتل أكمل!!؟
اللواء طه: ايوة يا مروان طبعاا كل ده حصل في التحقيقات واللي المفروض انك ما تطلعش عليها بس العشرة اللي بينا ومعزتك عندي اجبرتني اني ابلغك علشان تطمن وكمان انا بعتبر أكمل زي ابني..
مروان بتفكير: الواد ده كان مسجون مع ماجد.مش كدة!!؟
طه: ايوة ما هو موجود عندك في الاعترافات اهو هما اتعرفوا علي بعض في السجن لما ماجد اتقبض عليه واتسجن..اتعرف علي الواد ده اثناء ماكان بيروح المحاكمات وضرب معاه صحبية وطلب منه يراقب أكمل ويتنهز اي فرصة ويقتله وفيه واحد صاحب ماجد كان هو اللي بيدفع ليه المقابل للقتل…
مروان بغضب: ما قلش اسم صاحبه ده يبقي مين!!؟
طه بأسف: لا للاسف قال انه كان بيحددله مكان في شارع عام ويروح يلاقي الفلوس موجودة فيه مستخبية وهو بياخدها ويمشي من غير ما يعرف مين حطها ولا يشوفه….
مروان بحيرة وقلق: كدة أكمل مش في آمان زي ما حاول يقتله مرة هيحاول يقتله تاني !! أكمل لازم يبعد في مكان بعيد عن ايد ماجد هو خلاص ضايع وماعندوش اللي يبكي عليه ولا يخاف عليه وعايز ينتقم بأي شكل من أكمل!!
طه :فكرة كويسة حاول تفهم أكمل انه لازم يسافر ويبعد ..و ربك الحامي يا مروان أكمل ربنا حماه وكمان وصلنا للواد ده بشكل غريب اللي حصل مع أكمل في المكان ده كان صعب علينا نعرف مين اللي عمل كدة ولا نتتبعه مافيش اي شهود لكن ربنا لما بيريد بيسخر عباده …فجأة بعد شهور من الحادثة يجلنا واحد عايز يقدم بلاغ ..ونلاقيه واحد سواق نقل كان موجود قرب المكان عربيته عطلت وركنها ونزل يدور علي اي عربية توصله للعمار وفجأة شاف الحادثة واحد رقم العربية وصورها كمان والصورة ظهرت الواد اينعم كانت غامقة ومهزوزة علشان الدنيا ليل بس كشفات عربية أكمل وكشفات عربية الواد نفسه كانت كفاية اننا نعرف الرقم وكمان الواد لانه مسجل …
مروان بحيرة: بس ليه استني شهور علشان يبلغ!! ليه ماجاش من يوم الحادثة!؟
طه اتنهد: كان خايف ياسيدي لانه زي معظم السواقين بيشرب حاجة كدة وحاجة كدة وبيبعد عن القسم والمدرية بعد المشوار بس ضميرة تعبه بقي لحد ما قرر انه هيبلغ وخلاص وكان خايف حد يعرفه او يعرف اسمه هو سواق غلبان كدة علي قده..
مروان اتنهد بهدوء: المهم انه بلغ الحمد لله ..طه عايز منك طلب ودي !! عايز عنوان وتلفون السواق ده انا عايز اكفأه يمكن ربنا بعته يبلغ علشان كدة يمكن هو في ضيقة ولا حاجة وانا افكها عليه زي ما ظهر حق ابني؟؟
طه ابتسم بتفهم: حاضر يا مروان هديك اسمه بالكامل وعنوانه ورقم الفون بتاعه..
مروان حرك رأسه براحة وتفكير في أكمل اللي لازم يكون سريع في حمايته الايام اللي جاية !!!
يتبع….
لقراءة الفصل التالي : اضغط هنا
لقراءة باقي حلقات الرواية اضغط على : (رواية رحم للإيجار 3 (حب الفرسان))