رواية النصيب الفصل الرابع عشر 14 بقلم رحاب القاضي

رواية النصيب الفصل الرابع عشر 14 بقلم رحاب القاضي

رواية النصيب البارت الرابع عشر

رواية النصيب الجزء الرابع عشر

رواية النصيب الحلقة الرابعة عشر

قال لها: علمت بأنني اعشقك عندما فقدتكِ..
فأجابته: وتناسيت انا عشقك عندما فقدتني..
_طلعت شهد صباحاً من حمام اوضتها في بيت الفيومي وهي لابسه بجامه ورديه جميله ولافه شعرها بمنشفه صغيره، واول ما طلعت من الحمام اتفجأت بوجود أسر في اوضتها وقاعد علي الكنبه قدامها وبيشرب سجارته بهدوء..
شهد بحده
انت بتعمل ايه هنا، وازاي تدخل من غير ما تخبط؟..
أسر بهدوء
عادي ما بقينااش اغراب دلوقتي..
شهد بتحذير ونبره غاضبه
بقولك ايه يا جدع انت انت اخرك معايا الاتفاق اللي بينا، غير كده تنسي خالص وتبطل تتصرف معايا بالطريقة دي والا هروح اقول لجوز اختك علي كل حاجه ومش هتفرق معايا حاجه مدام كده كده هبقي خسرانه..
وقف قدامها ورد عليها
صوتك ما بيطلعش غير معايا، لو كان عندك. ربع الشخصيه دي مع غيري ما كانش زمانك هنا..
شهد بجمود
لا بعد. كده هتبقي الشخصيه دي مع الكل..
قربت منها بخطواط بطيئه وقال
المؤخره اللي اتكتب مقوي قلبك عليا مش كده؟..
حاولت شهد الثبات وقالت
مش عايزاه اصلا ولو عايزني اتنازل عنه من دلوقتي موافقه بس تسيبني في حالي..
أسر
هو انتي ليه مش شايفه اني بساعدك، هستفيد من اللي بنعمله وهخليكي انتي كمان تستفادي..
شهد بضيق
انت الوحيد اللي خليتني اندم اني اسيب بيت اهلي حتي لو هستفاد منك بس بعد ايه…
أسر ببرود
احنا فيها ارجعك ليهم..
شهد بغيظ
اطلع بره يا أسر..
ابستم بهدوء وقال
يا أسر…. اول مره اسمعك بتقولي اسمي..
شهد بتوتر
اا ايه اللي انت بتقوله ده، وجاي عايز ايه من وش الصبح كده؟..
أسر
ماليش مزاج اروح الشغل ولا اعمل اي حاجه فقولت اتسلي بيكي شويه..
رجعت شهد كذا خطوه لورا وقالت بخوف
قصدك ايه؟..
ضحك بقوه وقال
ههههههههه فهماني غلط ديما، انا قصدي هنخرج سوا هقدملك علي المعهد بتاعك لان الدراسه قربت تبدأ وهنروح نختار فستان الفرح والبدله اللي هنحضر بيهم الفرح..
شهد
مالوش لزوم الحاجات دي انا مش عايزه فرح..
أسر
لا لازم نعمل كده، علي فكره برضو ما حدش يعرف موضوع انك مطلقه، فلازم تباني انك اول مره تفرحي..
شهد بضيق
ولو حد عرف اني مطلقه؟
أسر بجمود
لا ما حدش هيعرف، انا مش حابب كده حتي لو لمجرد التمثيل، فيلا غيري هدومك وخلينا نمشي وبطلي تستفسري علي كل حاجه انتي تقولي حاضر وبس..
شهد بنظره حزينه
حاضر ممكن تخرج عشان اغير هدومي..
أسر
اوكي مستنيكي تحت…
وجه يمشي بس وقف تاني وقالها بهدوء
انا مش قصدي اذيكي علي فكره، بس النصيب بقي هو اللي جمعنا في وقت زي ده وانا علي قد ما هقدر هساعدك ومش هخلي حد يأذيكي بس انتي اوعي تدايقيني او ما تسمعيش كلامي..
شهد بدموع
لو بتقول كلامك من غير تهديد هيبقي احلي، بس انا لازم الناس كلها تكلمني بالطريقه دي، واللي بيهددني وبيخوفني مستحيل احي معاه بأمان ولا حتي هصدقه بس زي ما بيقولو قضي اهون من قضي تاني..
أسر بجديه
هو انتي كنتي هتمشي مع الدكتور اللي جه هنا لو انا ما كنتش منعتك، كنتي هتقبلي تسبينا وتمشي؟..
اتنهدت بضيق وقالت
انا عايزه اغير هدومي ممكن. تمشي..
أسر بسخريه
عرفت ردك من غير ما تقولي…
_قال كلامه وسابها وطلع من عندها، وكان نازل بس وقفت تالا قدامه وقالت..
تالا
مدام هاله قالتلي اجي اقولك تنزل تفطر بس مش لقيتك في اوضتك، كنت عندها صح؟..
أسر
هاخد منك الاذن ولا ايه، اوعي من قدامي..
تالا بخبث
علي فكره بتحب الراجل اللي كان هنا عشان ياخدها، سمعتها قالت كده لمدام هاله حتي ممكن تسألها..
أسر بنبره غاضبه
مالكيش دعوه بشهد يا تالا ده لو عايزه تفضلي شغاله هنا…
_وسابها ونزل تحت لقي فؤاد وهاله بيفطرو، فقعد قدام هاله وقال..
أسر
فين تياام ما بيفطرش معانا ليه؟..
هاله
طالع لخاله مش راضي يصحي بدري مدام في الاجازة..
فؤاد بسخريه
الله يبشرك بالخير، شكل كده مش مكتوبلي ارتاح..
أسر
ما انا بريحك اهو ما يبقاش قلبك اسود.، وقولي صح هو الكرسي اللي انت قاعد عليه مش المفروض انا اقعد عليه مكان ابويا..
فؤاد ببرود
عايز جبنه يا حبيبتي ممكن؟..
هاله بقلق
عينيا حاضر..
وحطتله جبنه قدامه وبدا فؤاد. ياكل بهدوء وقال
الموضوع مش موضوع كرسي يا ابو نسب، الموضوع في مين اخلاقه تسمح انه يبقي مكان ابوك الله يرحمه..
أسر بخبث
امم اخلاق علي فكره الناس اللي بتدعي المثاليه يا ابن عمي بيبقو اكتر ناس توكسيك..
هاله
بس فؤاد ما بيدعيش كده، لان دي صفاته مش بيتصنع انه يبقي مثالي..
عدل فؤاد ياقة قميصه وقال بثقه
اهي مراتي حبيبتي ردت عليك، عندك كلام تاني هتحاول تنكد بيه علينا..
هاله
بس بقي يا فؤاد ليحسدنا اخويا وعرفاه…
_ابتسم أسر بهدوء علي تصرفات اخته وزوجها، ونزلت في الوقت ده شهد اللي كانت لابسه بنطلون واسع وبلوزه كمان واسعه شويه ولابسه حجابها بطريقه شيك، ووقغت جنب هاله وقالت بهدوء..
شهد
صباح الخير..
ردو عليها الصباح فؤاد وهاله وأسر سألها بهدوء
جيبتي كل اوراقك معاكي..
شهد
ايوه جيبتهم اهو في الشنطه..
فؤاد
طيب اقعدو افطري الاول يا شهد..
قعدت شهد جنب هاله، بس فؤاد قال بخبث
ما تقعدي جنب جوزك ولا مكسوفه منه..
شهد بتوتر
اا يعني مش كده كسوف بس اي مكان عادي..
هاله بحماس
لا معلش قومي اقعدي جنب جوزك يا مرات اخويا..
_بصتلها شهد بابتسامه صفراء، وراحت قعدت جنب أسر اللي ما نزلش عيونه من عليها اول ما قعدت جنبيه مال عليها بهدوء وباسها من خدها وقال..
أسر
صباح الخير يا حبيبتي..
_برقت شهد بخجل وتوتر من تصرفاته الجريئه معاها، فحين كتم فؤاد وهاله ضحكاتهم وعملو نفسهم بيتكلمو مع بعض عشان ما تتكسفش هي اكتر، وأسر ابتسم بهدوء وقالها..
أسر
بوسه بريئه علي فكره وحلال احنا متجوزين..
شهد بغيظ
ممكن تفطر وانت ساكت وبطل حركاتك دي..
أسر بهدوء
حاضر بس احنا لازم نأدي دورنا بمصدقيه..
شهد بصوت واطي
ما بلاش نتكلم عن المصدقيه بتاعتك دي هنا..
ضحك أسر بهدوء وقال
بريئه مع الكل ومعايا انا بتبقي خبيثه اووي يا شهد..
_فطرو مع بعض هما الاتنين ووقف أسر قدام الموتسيكل بتاعه وقالها….
أسر
تحبي تلبسي الخوذه ولا ولا؟..
شهد
لا انا مش هركب موتسيكل اصلا، وما انت معاك عربيه ليه قلة القيمه دي..
بصلها باستنكار وقال
قلة قيمه؟ انتي عارفه الموتسيكل ده اغلي نوع في العالم اسمه Streetfighter V4 وسعره 3 مليون ومتين الف جنيه..
شهد بلامبالاه
اسمه في الاخر موتسيكل ما بقاش شيخ موتسيكل وانا مش بحب اركب الحاجات دي..
أسر
انتي عمرك ما ركبتي موتسيكل قبل كده؟..
شهد
ركبته مره واحده وما حبتوش خالص..
أسر بفضول
ركبتيه مع مين؟..
شهد
اكرم..
أسر
مين اكرم ده اخوكي؟..
شهد
لا الولد بتاع الديلفري اللي انقذني قبل كده لما هربت من اهلي وناس حاولت تدايقني في الشارع..
أسر بجمود
اممم طيب اركبي عشان تعرفي ان في فرق كبير بيني وبين اي حد تاني..
شهد بقلق
نروح بالعربيه احسن بخاف انا منه الموتسيكل ده.
أسر بنبره واثقه
عيب يبقي معاكي أسر الفيومي النامبر وان في كل السباقات العالميه وتقولي خايفه..
_مسكت منه شهد الخوذه ولبستها بهدوء وركبت ورااه علي الموتسيكل بطريقه عاديه..
أسر
انا بسوق بسرعه فاركبي كويس زيي كده عشان ما تقعيش..
شهد بضيق
لا ما ينفعش اركب زيك وسوق علي مهلك معلش يا ننزل ونروح بالعربيه زي البني ادمين..
ابتسم بهدوء علي برائتها وقال
اول بنت اشوفها ما تكونش حابه تركب معايا الموتسيكل..
شهد بغيظ
يا عم اتنيل وخلصني..
أسر
طيب امسكي فيا كويس عشان اتنيل..
_مسكت فيه بتردد وهو مشي بهدوء شويه عشانها، وفي الوقت ده كانت واقفه هاله عند باب الفيلا وبصالهم بابتسامه واسعه وقالت برجاء..
هاله
يارب تكون سبب سعادته وتبقي هي نصيبه لاخر العمر..
ــــــــــ #بقلم_الكاتبه_رحاب_القاضي ــــــــ
_وفي المحل بتاع سعيد كان واقف مع الولد اللي شغال عنده وبيراجع معاه الحسابات وشاف نسمه معديه من قدام المحل ،فقال للولد بهدوء.
سعيد
خليك هنا يا حماصه دقيقه جاي..
حماصه
ايوه ما انت شوفت العروسه فلزمتي ايه انا بقي..
سعيد
اسكت يا حماصه مش هتبقي انت وامي..
وراح بسرعه ورا نسمه وقال
نسمه رايحه فين كده علي الصبح؟..
بصتله نسمه بضيق وقال
رايحه لواحده صاحبتي في حاجه يا سعيد؟..
سعيد
هو ايه اللي في حاجه يا سعيد، هو مش انا مديكي رقمي امبارح ما قولتليش ليه انك طالعه واعرف رايحه فين وجايه منين..
نسمه بحده
بصفتك ايه ان شاء الله اعرفك خط سيري، لما ابقي في بيتك ابقي احكم عليا براحتك..
سعيد بغضب
لا متربيه يا نسمه بس كلامي مع ابوكي، شوفي نفسك رايحه فين.
نسمه بقلق
استني يا سعيد هو احنا مش بينا اتفاق..
سعيد بحده
اتفاق ايه ده اللي يخليكي تتعاملي كده معايا..
نسمه
خلاص انا اسفه..
سعيد
رايحه فين بقي؟..
نسمه
واحده صاحبتي هتولد النهارده وهبقي معاها اليوم كله..
سعيد
طيب استني هوقفلك تاكسي علي اول الشارع..
نسمه
مالوش لزوم انا هروح لوحدي، روح انت كمل شغلك شكلك كنت مشغول..
سعيد
ايه ده يعني انتي مركزه معايا اهو..
اتوترت نسمه وقالت
خلاص تعالي وقفلي تاكسي وادفع تمنه كمان خليها جدعنه بالمره..
_ضحك بهدوء ولسه هيروح معاها قالت امه اللي كانت واقفه في البلكونه بحده…
ام محمد
سعييييد اطلع تعالي عايزااك..
بصلها سعيد بضيق واتنهدت نسمه بغيظ وقالت
انا مستعجله يا سعيد هتيجي توديني ولا امشي لوحدي…
ام محمد
ما تنجز يا واد انت هفضل مستنياااك كتير..
سعيد
طيب هوصل نسمه لاول الشارع واجيلك علي طول..
ام محمد بسخريه
وهي بسلامتها اتشلت مش هتعرف تروح لوحدها لاول الشارع..
سعيد بغيظ
ايه اللي بتقوليه ده بس يا اماا..
نسمه بعصبيه
اطلع لامك يا سعيد انا ماشيه لوحدي..
سعيد
استني يا نسمه هشوفها عايزه ايه وهنزل اوصلك لحد صاحبتك..
نسمه بحده
لا كتر خيرك انا هروح لوحدي بالناقص..
سعيد بضيق
بقولك استني يا ما تروحيش خالص.
نسمه بغضب
لا هروح واطلع انت شوف ماما ما تتأخرش عليها لتزعل يا عيون ماما…
_قالت كلامها بنبره كلها تريقه وسابته ومشيت، وهو طلع عند امه وهو متعصب جدا وقالها..
سعيد
نعم يا اما في ايه؟..
ام محمد
الحلق بتاعي وقع ورا الكنبه تعالي هاته انا ضهري وجعني وما اقدرش احرك الكنبه من مكانها..
سعيد بغيظ
ربنا ياخدني من وشك يا اما..
ام محمد
شوف الواد اللي ما كانش يقدر يرفع عينه فيا، لحقت تغيرك عليا بنت ناديه..
سعيد بنفاذ
ما حدش غيرني يا اما انا لسه زي الزفت زي ما انا، هجيبلك الحلق بتاعك وانزل اشوف اللي ورايا…
ــــــــــ #بقلم_الكاتبه_رحاب_القاضي ــــــــ
_وبعد شويه في محل موبيلات راقي جدا كان قاعد أسر وجنبيه شهداللي بتختار في موبيل جديد ليها مع العامله بتاعت المحل، وكان هو مركز معاها اوي وهو بيشرب في سجارته كعادته وابتسم بتلقائيه لابتسامتها اللي ما فارقتش وشها من لما قدملها علي مرحلتها الدراسيه الجديده وهتبقي طالبه جامعيه، وبعدين مسكت الموبيل اللي اختارته وبصتله بدموع وحزن ظهر علي ملامحها فجأه..
أسر بجمود
في ايه لو مش عاجبك الموبيل نغيره..
مسحت دموعها بسرعه وردت عليه
لا خالص بالعكس عجبني اووي، بس افتكرت نفسي من زمان وانا نفسي اجيب موبيل زي صحابي بس كان بابا علي طول يقولي ما ينفعش وعيب البنت تمسك موبيل، ولما لقاني مصممه عليه قالي ان مش معاه فلوس وان اخواتي عايزين مصاريف كتير وما رضيش، ولما بقي معايا الموبيل دلوقتي مش مبسوطه بيه اصلا ما بقيتش عايزه حاجه من اللي كنت عايزاها زمان….
أسر بهدوء
هتحتاجي لابتوب في الدراسه بتاعتك. هنجيب واحد. نفس نوع الفون اوكي..
شهد
لا مالوش لزوم انا لسه ما اعرفش اذا كنت هحتاج ولا لا..
أسر بجديه
هتحتاجي انا عارف، يلا بقي عشان نحاسب ونمشي عشان لسه قدامنا حاجات كتير هنعملها، انتي ايدك خفت صح؟..
شهد بهدوء
ايوه الحمد لله احسن من الاول بكتير..
أسر
طيب تمام يلا بينا..
ــــــــــ #بقلم_الكاتبه_رحاب_القاضي ــــــــ
_وبعد ما نسمه رجعت من عند صاحبتها، لقيت ابوها قاعد. مستنيها وشكله مدايق جداً..
نسمه
مساء الخير يا بابا، رانيا ولدت الحمد لله وجابت ولد زي القمر..
فتحي
هو مش خطيبك قالك ما تروحيش غير لما هو يوصلك ما سمعتيش كلامه ليه؟..
نسمه بضيق
واسمع كلامه ليه، ده كان عايز يلطعني في الشارع لحد ما يروح يشوف امه عايزاه في ايه؟..
فتحي
وفيها ايه يا بنتي يعني لو انتي خارجه معاه وامك قالتلك تعالي اعمليلي حاجه هتقوليلها لا..
نسمه بحزن
يا بابا انت عارف اللي فيها، سعيد بيخاف يقول لامه لا..
فتحي
مدام بعيد عنك مالكيش دعوه، لو امه ضربته بالجزمه وهو سكت امه واحنا مالناش دعوه مش. هنفرق ام عن ابنها يا نسمه، لكن لو جات ودايقتك وهو سكت وقتها لينا كلام تاني، وبعدين ما محمد جوز اختك اهو، هو وامه بيتخانقو ويشدو شعر بعض جات اختك اتدخلت بينهم في يوم..
نسمه
لا..
فتحي
يبقي تعدي المواقف الهايفه دي، وتكلمي خطيبك وتعتذري وبعد كده قبل ما تنزلي من البيت زي ما بتاخدي اذني واذن امك تكلميه وتعمليله قيمه وتبقي بنت اصول وجدعه يا نسمه ما تضحكيش حد عليكي،اديكي شايفه بنت صابر لما اهلها ما عرفوش يخلوها تعيش صح واستهونو بحقها حصلها ايه،انما احنا معاكي فقبل ما تعملي اي حاجه تيجي وتقولي يا بابا حصل كذا كذا ولو ليكي حق مدام انا عايش هجيبهولك ولا عاش ولا كان اللي يجي عليكي او علي اختك….
نسمه بابتسامه بسيطه
حاضر يا بابا، ربنا يخليك ليا وما يحرمنيش منك ابداً، كنت عايزه اغير الموبيل بتاعي بقي..
طلعت ناديه من المطبخ وقالت بحده
موبيل ايه دلوقتي خلينا نكمل باقي الجهاز بتاعك، ده انتي متجوزه وقبلك كانت في واحده يعني لازم نهتم بالجهاز ونجيب احلي من الاولي..
فتحي
جرا ايه يا وليه هو احنا داخلين سبااق، ادعي انتي بس يبقي حظ بنتك ونصيبها احسن من بنت صابر اللي ربنا اعلم بأرضيها، وانتي يا بت يا نسمه قبل فرحك هيكون معاكي الموبيل اللي عايزااه..
قامت نسمه وحضنته وقالت
ربنا يخليك ليا يا احلي بابا في الدنيا..
_وسابتهم يتكلمو علي الجهاز بتاعها ودخلت اوضتها وقفلت الباب كويس، ومسكت موبيلها وكلمت سعيد اللي رد عليها وقال..
سعيد
نعم يا نسمه..
نسمه بحده
هي الرجوله انك تكلم ابويا وتشتكي مني؟..
سعيد بغضب
احترمي نفسك يا نسمه، ومدام انا لسه ماليش كلام عليكي يبقي ابوكي ليه وهو اللي يرد علي تصرفاتك وكلامك ده..
نسمه بخوف
لا استني ما تقفلش يا سعيد ما ينفعش اللي بينا تحكيه لابويا، يعني انا توقعت انك هتجيبلي ورد او سوكلاته وتيجي تصالحني مش تكلم ابويا وتشتكيله هو احنا عيال يا سعيد؟..
سعيد
معاكي حق انا غلطان، انا يوم الخميس عازم نفسي عندكم وهجيبلك ورد وشوكلاته، وسلام دلوقتي عشان عندي شغل ومش فاضي…
قفل معاها وهي قالت بغيظ
يخربيته ده ما صدق..
وبعدين ابتسمت بهدوء وقالت
بس اهو بيجي منك يا سعيد..
ــــــــــــــــــ
_وعلي قهوه شعبيه كان قاعد محمد ومعاه سعيد، وضحك محمد بصوت عالي وقال..
محمد
اقسم بالله البت نسمه دي هتظبطك انت وامك..
سعيد
هي متدلعه شويه ولسانها طويل برضو شويتين بس غلباانه..
محمد
ده من حظك علي فكره، انت بقي تراعي ربنا فيها وبلاش تظلمها زي اللي قابلها..
سعيد
اللي فيه الخير يقدمه ربنا، هروح انا بقي اشوف اللي ورايا..
محمد
استني خدني معاك، وطلع حاسب انت المره دي مش كل مره احاسب انا خلي عندك دم..
_ضحك سعيد بهدوء وحاسب علي طلباته هو واخوه، وكل واحد فيهم راح شغله..
ــــــــــ #بقلم_الكاتبه_رحاب_القاضي ــــــــ
_وبالليل في مطعم حلو جداً وهادي، كانت قاعده شهد مع أسر بيطلبو عشا وأسر قاعد جنبيها وبيقولها…
أسر
دي بقي شوربة خضار وفراخ بخطله مكسيكيه حلوه اووي..
شهد
لا لا مش عايزه، شوف حاجه تانيه..
أسر بأهتمام
طيب انتي عايزه حاجه معينه، عامله دايت طيب اطلبلك اكل خاص..
شهد بضيق
لا خلاص مش عايزه حاجه..
أسر
اومال هتقعدي تتفرجي عليا وانا باكل وتبصي في اللقمه، وانا عريس ومحتاج اتغذي كويس…
ختم كلامه بغمزه مشاكسه وهي قالت بسخريه
اهو انت اهو بتسد نفسي قوم بقي من جنبي..
أسر
طيب ليكي في المكرونات وكده..
شهد
ايوه ممكن اكل مكرونه..
أسر
خلاص انا هطليلك حاجه كده علي ذوقي وهتعجبك اووي..
شهد
بس ما تكونش بخلطه مكسيكيه ولا فرنسيه والحاجات دي، انا عايزه اكل حاجات مصريه..
أسر بابتسامه بسيطه
اطمني هطلب اكل مصري مع اني مش متعود عليه..
شهد
امم اكمنها تالا كانت بتقول ان ما حدش بيعملك الاكل غيرها..
أسر بخبث
بتغيري ولا ايه؟..
قامت شهد من جنبيه وقعدت قدامه وقالت
انا مش هرد علي كلامك التافهه ده..
أسر
نفسي يبقي لسانك الطويل ده مع الناس كلها مش معايا انا بس، بس برضو ارجع واقول انا برضو أسر الفيومي وكل حاجه بتبقي معايا مختلفه..
شهد بسخريه
لا وحياتك انت بش اللي شكلك علي طول بيخليني عايزه اهزأك..
_ابتسم العامل اللي بيحطلهم الاكل وأسر قاله بغيظ..
أسر
عجبتك اووي دي يا خفيف..
العامل بأحترام
بعتذر يا افندم اي اوامر تانيه؟..
أسر
شكراً.. اتفضل..
_مشي العامل وشهد بدأت تاكل وهي كاتمه ضحكتها وهو قال بغيظ…
أسر
شايفك علي فكره واحمدي ربك اننا في مكان عام، قال انا شكلي بيجيب تهزئ معاكي ماشي يا شهد..
شهد بأعجاب
المكرونه دي حلوه اووي..
أسر
علي الله يطمر..
_ما ردتش عليه وكانت مهتميه بالاكل، فبدأ هو كمان ياكل وسألها بنبره خبيثه..
أسر
برضو ما كنتيش مستمتعه وانتي بتختاري فستان الفرح، افتكرتي طليقك مش كده؟..
سابت شهد الاكل واتنهدت بضيق وردت عليه
انا ما نستوش اصلا..
_بصلها بحاجب مرفوع وبدأت ملامحه تتحول للغضب الغير مبرر ليها وليه هو كمان، وتابعت هي كلامها وقالت بسخريه مؤلمه..
شهد
انسي ازاي واحد كان سبب كبير في اللي انا فيه ده، وافتكرته فعلا وانا بختار الفستان لاني لما كنت بختار فستان فرحي الاول معاه كان جايب امه معانا وكان عاجبني فستان حلو وشيك جدا بس حماتي قالت مش هيبقي حلو عليا واختارتلي واحد تاني مش حلو خالص توقعت منه في الوقت ده يتكلم بس ما اتكلمش وكان خايف من امه اووي، حتي اهلي كانو خايفين الجوازه تبوظ وغصبوني اسمع كلامها..
أسر بهدوء
بس انتي المره دي اختارتي الفستان اللي عجبك..
شهد
بالظبط اختارت الفستان اللي عجبني عشان امثل بيه دور العروسه المغصوبه علي الجواز…
أسر ببرود
حلوه فعلا المكرونه دي..
وقف قدامهم كارم صاحبه وقال
ده انا حماتي بتحبني اوووي، معقوله أسر هنا والعروسه كمان..
أسر بجمود
جاي ليه؟..
قعد كارم معاهم وقال
مش هقول صدفه لاني قاصد اجي اتعرف علي العروسه، اسمك شهد مش كده شهد صابر أسر طلب مني ادورلك علي اهلك طمني يا صاحبي انت لقيتهم؟..
بصتله شهد بلوم وحزن وهو قال لكارم بحده
كارم ايه الجو ده اللي بتعمله معايا انت نسيت انا مين…
كارم
روق كده يا حبيبي واهدي انا ما اقصدش حاجه، علي العموم الف مبروك وربنا يتمم بخير والله يا ابني انا مبسوط عشانك، انا بقالي سنين ما شوفتكش بتخرج مع حد..
وبص لشهد بخبث وقال
طبعا يا عروسه معادا بنات الليل اللي يعرفهم.. سوري كان يعرفهم…
أسر
انت عايز ايه يا كارم؟..
كارم بجمود
الفلوس اتأخرت يا حبيبي والسبااق قرب والنااس حبااه يبقي قانوني فهيبقي علي عشر ايااام والشهر الجاي..
أسر بضيق
صعب حاول تأجله..
كارم
مش بأيدي وبعدين اللي انت عايزه هيجي الشهر ده مش بعد كده لان في سبقات تانيه هو ملتزم بيها..
أسر بجمود
طيب اصبر عليا كده اسبوعين تلاته وهجيبلك الفلوس..
كارم
اسبوعين تلاته بس انا هتفق مع الناس..
وبص لشهد وقال
تعرفي يا عروسه انتي رجعتي أسر للحياه من يوم ما نتالي واحمد ماتو..
أسر بحده
كااارم كتر خيرك اووي لحد كده، واياك اشوفك تاني قريب من حد. من اهلي وفلوسك هتكون عندك زي ما اتفقنا وما فيش بينا غير كده..
كارم
تمام يا صاحبي وانا في انتظارك..
مشي كارم وشهد سالته بقلق وقالت
مين الراجل ده شبه بتوع المافيا ، ومين نتالي واحمد اللي ماتو دول؟..
أسر بجمود
قومي يا شهد هنروح.
شهد بقلق
حاضر يلا بينا..
_وقامت فعلا معاه ووصلها البيت واول ما نزلت من علي الموتسيكل ولسه هتكلمه لقيته سابها ومشي بسرعه كبيره جداً..
شهد
كنت ناقصه حوارات انا كمان يا أسر..
ــــــــــ #بقلم_الكاتبه_رحاب_القاضي ــــــــ
_في شقة ام محمد كانت قاعده ومعاها سيده صاحبة مكتب الخدمه اللي كانت بتشغل شهد في البيوت…
ام محمد
يعني البت هتتجوز بيه من البيت اللي هي فيه؟..
سيده
ايوه يا اختي انا صباح صحبتي اللي شغاله هناك اول ما روحتلها وشوقت شهد وبقولها مين دي قالتلي دي خطيبة البيه صاحب كل حاجه هناك، ولما بقولها يعرفوها منين قالت دي بنت لقيوها في الشارع وكانت عامله حادثه وصعبت عليهم فجبوها عندهم لحد. ما تخف، قامت البت اللي العقربه لعب علي صاحب البيت وهتتجوزه..
ضحكت ام محمد بشر وقالت
هههههه دي جات لحد عندي، ابوها لازم يعرف مكانها، بقولك ايه يا سيده انا عايزه اعرف كل حاجه عن البت دي ومكانها بالتفصيل..
سيده
لا يا حبيبتي انا ماليش دعوه دول ناس ايدهم طايله وانا ماشيه جنب الحيط..
ام محمد بخبث
يا وليه ده احنا بنعمل خير، ابوها هيموت ويلاقيها، احنا بس نقوله علي مكانها وهو يتصرف وانا بتعهدلك اهو اني مش هجيب سيرتك خالص..
سيده
طيب يعني انا خايفه برضو..
طلعت ام محمد فلوس من البوك بتاعها وقالت
امسكي بس دول يطمنوكي، وقوليلي بقي فين العنوان؟..
ــــــــــ #بقلم_الكاتبه_رحاب_القاضي ــــــــ
_وفي بيت رحمه علي السلم بتاع العماره كانت قاعده بتاكل بيتزاا وجنبيها أكرم اللي قالها بحده..
أكرم
ممكن افهم انتي جيباني رر علي ملي وشي ليه وكمان اخدتي الاوردر اللي معايا وطفحتيه وهشيل تمنه ووفوق كل ده مقعداني علي السلم..
رحمه وهي بتاكل
اومال عايزني ادخلك الشقه وانا وامي قاعدين لوحدنا وابويا ما فيش، وهديلك تمن اابيتزاا عادي..
اكرم
عايزه ايه يا رحمه؟..
رحمه
بعد بكره فرح البت شهد واحنا لازم نروح..
أكرم
ما اتعزمتش انا هروح اعمل ايه؟..
رحمه
قالتلي اقولك والله، بس البت فيها حاجه غريبه احلق شعر راسي ان البت دي مغصوبه علي الجوازه..
أكرم
طيب واحنا في ايدنا ايه نعمله..
رحمه
مش عارفه بس نكون جنبيها ما نسيبهاش لوحدها، والله البت دي يا أكرم اتظلمت كتير وو.. وو..
أكرم
وايه؟؟..
رحمه
وكان في كاتشب هنا راح فين؟..
أكرم بغيظ
انا قايم مااشي…
رحمه
استني اجيبلك الحساب بتاع البيتزا..
اكرم
ياريت والله عشان انا اللي هشيل تمنها..
_وراحت رحمه تجيبله الفلوس ولما رجعت لقيته مشي وسايبلها باقي البيتزا علي السلم وكاتبلها فوق العلبه..
“كنت بهزر معاكي البيتزا حسابها وصل بالهنا والشفا”..
ابتسمت بهدوء وقالت
طيب ما انت جدع وحلو اهو اومال في ايه؟..
_ودخلت شقتهم وهي مبسوطه من كلامها مع اكرم، وكذلك هو اللي بقي يستني منها اي مكالمه عشان يشوفها..
ــــــــــ #بقلم_الكاتبه_رحاب_القاضي ــــــــ
_وتاني يوم في قريه تبع الفلاحين وفي بيت بسيط جداً، كان قاعد صابر مع اخوه عزمي وابن اخوه علي اللي قال بجمود..
علي
ادينا عرفنا مكانها يا عمي خلينا نروح نجيبها..
صابر بغضب
نخلص منها خالص انا مش عايز اشوف خلقتها تاني..
فاطمه بدموع
لا يا اخويا ابوس ايدك هاتها واعمل فيها اللي عايزه وتقعد هنا في البلد ابوس ايدك، قول حاجه يا حج عزمي..
عزمي
انا مش عارف الراجل ده دماغه تعبانه ليه، مش قولنا هنرجع البت وولد عمها يتجوزها..
علي
بس نلحق نجيبها قبل ما تضيع حالها اكتر من اكده وتتجوز الراجل اللي بيقولو عليه ده والله واعلم نيته ايه..
عزمي
روح هات بتك يا صابر..
صابر
وافرض ما رضيتش ترجع معانا، اعمل ايت وقتهو؟..
عزمي
علي اتصرف وهاتوها هنا من غير ما حد يعرف من اللي هناك دول ناس شكلهم واصلين واحنا عايزين بنتنا وبس، وتيجي تتجوز ولد عمها طوالي وتتقبر في البيت وماحدش بعد اكده ليه صالح بينا..
صابر
اللي تشوفه يا اخويا..
عزمي
هتعمل ايه يا علي..
علي.
انا هروح الاول من دلوقتي اعرف النظام هناك ايه وانت تعالي ورايا يا عمي..
صابر
لااه رجلي علي رجلك، واقسم بالله ما هرجع البلد غير وهي معايا..
ــــــــــ #بقلم_الكاتبه_رحاب_القاضي ــــــــ
_وعدت الايام وأسر كان مختفي تماماً من حياة شهد غير في المقابلات العاديه، لحد ما جه يوم الفرح وكانت واقفه شهد قدام المرايا في اوضتها في الاوتيل اللي هيتعمل فيه فرحها هي وأسر وكانت لابسه فستانها الابيض وباصه لنفسها بتوتر وسعاده من شكلها اللي كان حلو اووي..
ودخلت عندها هاله وقالت
ايه الحلاوه دي كلها يا شهد زي القمر، ده أسر هيتجنن من جمالك النهارده..
بصتلها شهد بغيظ وقالت
والله انتي هتشليني هو انتي فاكره ان الموضوع بجد يعني؟..
هاله
فصلان خلاص نغير الموضوع انا هنزل اشوف التجهيزات تحت وصلت لايه وهرجع تاني عشان اوديكي لأسر عشان السيشن..
شهد بضيق
طيب…
هاله
اضحكي يا شهد وروقي كده ده فرحك، وافرحي خلي الدنيا تفرحلك..
شهد بدموع
قلبي مقبوض اووي وحاسه ان في حاجه هتحصل ومش قادره افرح..
قربت منها هاله ومسكت ايدها وقالت بحنان
ما تخافيش ما فيش حاجه هتحصل هنا خالص، واليوم هيبقي حلو اووي ومميز لو انتي فكتيها..
شهد بهدوء
حاضر..
هاله
هنزل انا بقي وابعتلك رحمه اللي خلصت علي اكل القاعه كله تحت قبل الفرح ما يبدأ..
_ابتسمت شهد علي تصرفات صاحبتها وسابتها هاله ونزلت وهي فصلت قااعده لحد. ما دخلت عندها عامله من الاوتيل وقالت..
البنت
انتي شهد صابر مش كده؟..
شهد
ايوه انا خير في ايه؟..
البنت
امك تحت ومعاها اربع بنات صغيرين وبتقولك انزلي بسرعه شوفيها لان ابوكي طردها في الشارع وحالتهم صعبه اوي وباين عليهم يعني..
شهد بدموع وخوف
ماما واخواتي تحت، تحت فين بالظبط انا هروحلهم؟.
البنت بخبث
مش هينفع يدخلو الاوتيل بمنظرهم ده فانا خليتهم يقفو بره بس من ناحية باب المطعم الخلفي اللي جنب الريسبشن تحت..
شهد بقلق
طيب انا رايحه شكرا جدا..
نزلت شهد والبنت مسكت موبيلها وقالت
ايوه يا علي البنت نازله اهي، اوعو بس حد. يجيب سيرتي في حاجه انا مش ناقصه عيشي يتقطع من هنا…
_ووصلت شهد تحت وراحت بسرعه ناحية المطعم وهي ماسكه فستانها بايديها الاتنين عشان تعرف تمشي، وكان الكل بيبصلها باعجاب لشكلها وفستانها اللي كان لايق عليها بشكل كبير، واول ما دخلت المطعم وقفها العامل وقال..
العامل
علي فين يا هانم حضرتك تطلبي ايه؟.
شهد بقلق كبير علي امها واخواتها
لا انا مش عايزه حاجه انا عايزه اخرج من الباب ده هجيب حاجه وارجع..
العامل
طيب اتفضلي ارتاحي وانا هبعت حد. يجيبلك الحاجه اللي حضرتك عايزاها..
شهد بانفعال
مالكش دعوه انا هروح اجيبها لوحدي اوعي كده عديني..
_وطلعت بره وبصت حواليها ما لقيتش حد وفجأه جات عربيه شكلها قديم شويه، ووقفت قدامها ونزل منها صابر وعلي ابن عمها ومعاهم اتنين تاني ما تعرفهمش، اتنفضت بخوف ورعب من نظرات ابوها الغاضبه ليها وجات تدخل بس هو مسكها من دراعها جامد وقال..
صابر بغضب
رايحه فين فاكره اني هسيلك يا شهد بعد ما حطيتي راسي في الطين..
شهد بخوف ودموع ونبره مهزوزه
انا مم معملتش حاجه..
علي بحده
مش وقته يا عمي يلا بينا من هنا..
صابر سحبها جامد من ايدها وقال
تعالي معايا يلاا..
شهد بخوف
لا سيبني انا مش هروح معاكم ابعدو عني..
_كانت بتحاول تسحب ايدها منهم وتمشي وجسمها كله كان بيتنفض بخوف، وفجأه طلع ابن عمها منديل وقزازه فيها ماده مخدره وفضاها كلها علي المنديل وحطه علي وش شهد وهو بيقيد. حركها لحد ما فقدت الوعي واخدوها في العربيه ومشيو…
ـــــــــــــــــــ
_وبعد شويه كان أسر واقف هو وفؤاد في انتظار شهد وقربت منهم هاله ومعاها رحمه وقالت بقلق..
هاله
فؤاد شهد مش في اوضتها..
قبل ما يرد. فؤاد قال أسر بحده
ازاي يعني مش في اوضتها راحت فين وانتي تسيبيها لوحدها ليه؟..
فؤاد
بالراحه يا أسر يعني كانت هتراقبها مثلا..
أسر بحده
وحياة امك اسكت مش ناقص فلسفه انا..واكيد الهانم هربت ما هي متعوده..
رحمه بغيظ
انت بتتكلم عليها كده ليه؟..
بصلها أسر بجمود وقال
هاتي عنوان الدكتور بتاعها..
رحمه
الدكتور بتاعها مين هي ما كانتش تعبانه…
أسر بحده
الزفت اللي كانت بتحبه..
رحمه بعصبيه
انت بتزعقلي ليه هو انا شغاله عندك،وشهد مستحيل تمشي وتروحله..
أسر بغضب
مش عايز من وش امك حاجه تلاقيها متفقه معاكي اصلا وانا هعرف اجيب عنوانه لوحدي كويس..
فؤاد بضيق
اهدي طيب لحد. ما نشوف راحت فين بلاش تظلم البت..
أسر بغضب
الموضوع دلوقتي ما يخصش حد غيري لان اللي هربت دي مراتي ورحمة ابويا وامي لو كانت عنده لاقتلهم هما الاتنين..
_قال كلامه ومشي وهاله قالت لفؤاد وهي بتعيط وخايفه جدا..
هاله
انت هتقف تتفرج روح الحقه ليعملها حاجه..
فؤاد بحده
والناس اللي جوه دي نسيبهم كده ونمشي، خليه يتصرف لحد. ما اشوف حل للفضيحه اللي بقينا فيها..
_وعند. أسر كان ناوي يروح لادهم لانه شاكك انها سابته وراحتله..
بس وقفه مدير المطعم وقاله
أسر بيه الهانم عروسة حضرتك جات المطعم من شويه وطلبت تخرج من الباب الخلفي..
أسر
خرجت مع مين؟..
المدير
لوحدها وما ىجعتش، بس لو عايزنا نشوف الكاميرلت ونشوف مشبت راحت فين او لو حد كان مستنيها ما فيش مشكله..
أسر
تمام يلا بسرعه..
_وراحو فعلا لاوضة المراقبه واول ما جابو تسجيل الكاميرات لشهد وهي طالعه من باب المطعم وشاف أسر اللي حصل، زعق فيهم وقال..
أسر
ازاي ده حصل البت اتخطفت يخرب بيتكم..
مدير المطعم
اهدي يا أسر بيه واحنا هنبلغ الشرطه حالاً..
طلع أسر موبيله وكلم هاله اللي ردت عليه وقالت
ها يا أسر لقيتها؟..
أسر
هاتي البت صاحبة شهد وانزلي بسرعه..
هاله
في ايه طيب شهد كويسه؟..
أسر
لا مش كويسه شهد اتخطفت وعايز اتأكد اللي خطفها ده ابوها ولا لا، خلي صحبتها تيجي بسرعه تحت في اوضة المراقبه لانها اكبد تعرف ابو شهد..
هاله بدموع
حاضر جاايين حالاً..
_وبعد شويه كانت رحمه واقفه جنب أسر وفؤاد ومعاهم هاله واكرم في اوضة المراقبه، ورحمه قالت بدموع وخوف…
رحمه
ايوه هو ده عم صابر ابو شهد..
أسر
عنوانه ايه بقي اكيد خدها بيتهم اللي هنا..
رحمه ببكاء
ده لو ما كانش عمل فيها حاجه، ده كان حالف انه هيقتلها..
كلامها زاد قلق الكل وأسر قالها بحده
عنوانه ايه هنا اخلصي..
رحمه
انا هروح معاك واقولك العنوان لازم اطمن عليها..
أكرم
وانا كمان..
فؤاد
انا بقةل نستني الشرطه..
أسر بنبره قلقه جداً
بتقولك ناوي يقتلها والكاميرا مش مبينه العربيه كويس يعني الشرطه حتي لو جات دلوقتي مش هتتحرك بسرعه وعلي العموم خليك معاهم وانا هدور عليها برضو.
هاله
طيب خلي بالك من نفسك وطمني عليك..
أسر بجمود
حاضر..
ــــــــــ #بقلم_الكاتبه_رحاب_القاضي ــــــــ
_وفي بيت ام محمد، دخل عندها محمد وهي كانت قاعده قدام الشباك بتشرب شاي وقالها..
محمد
كفايه بحلقه في خلق الله الناس بقيت تخاف تعدي من قدام البيت بسبب عينك..
ام محمد
ما انا كان بالي رايق ايه اللي جابك تعكننه يا منيل علي عينك..
محمد
من الاخر ياما سعيد رايح يتعشي عند خطيبته النهارده ما تروحيش معاه..
ام محمد
وانت مالك انت هو هياخدني معاه..
محمد بغيظ
هو كان حد. عزمك ولا قالوله هات امك، سيبيه يتعامل لوحده مع نسايبه..
ام محمد
ايوه عشان يغيروه عليا زي ما عملو معاك..
محمد
انا قولت اللي عندب يا اما، وبلااش تخليني العب في دماغ سعيد واخليه بتجوز بره..
ام محمد
طلع نفسك. من الموضوع ده وتعالي اقولك، مش البت شهد طلعت قاعده في بيت ناس اكابر وهتتجوز واحد مرتاح وعلي قلبه اد كده..
محمد
وانتي مين قالك الكلام ده؟..
ام محمد
الست اللي اسمها سيده بتاعت مكتب الخدمات..
محمد بغيظ
والست دي تدخل بيتنا ليه، وبعدين مالنااش دعوه يا اما بحد وطلعي بت صابر من دماغك كفتيه اللي عملتيه فيها..
_قال كلامه وسابها ونزل وقبة ما يروح الورشه بتاعته شاف عربية أسر وقفت قدام بيت صابر، فقرب منهم وقال..
محمد
خير يا باشا عايزين مين؟..
رد عليه أسر بجمود وقال
صابر اللي ساكن هنا موجود.؟..
بص محمد لرحمه لانه يعرفها لما كانت بتيجي لشهد ورد علي أسر بهدوء وقال..
محمد
لا يا بيه عم. صابر ساب البيت هنا من فتره كده وما حدش منهك رجع تاني..
أسر
طيب تمام..
محمد بفضول
هو في حاجه ولا ايه، وانتو تطلعو مين؟..
بص أسر للناس اللي حواليه وسمع واحده بتقول
تلاقي بنته اللي طفشت عملتلهم مصيبه جديده..
بصلها أسر بحده وقال
انا ابقي جوز شهد بنته وجاي اخده عشان يحضر فرحنا..
الكل اتصدم وام محمد قالت من الشباك بخبث
جاي تاخده يحضر الفرح ولا البت طفشت منك زي ما طفشت من اهلها اصلها متعوده..
بصلها محمد بغيظ وقال
ادعي عليكي بأيه وانتي امي ادخلي واقفلي ام الشبااك ده..
وبص لأسر وقال
معلش يا بيه ست كبيره ما يتاخدش عليها تلزم اي خدمه…
أسر
لا شكراً..
_وركب العربيه بتاعته ومعاه اكرم ورحمه، وفتح موبيله علي اللوكيشن بتاع عنوان اهل شهد اللي بعتهوله كارم قبل كده وقال..
أسر
هنروح بلدهم وانتو معايا..
أكرم
بلد مين؟..
رحمه بقلق
انا ما قولتش لامي وكمان اسافر مع شحطين لزحدي زيكم ليه يعني ماليش اهل..
أسر بجمود
اخرسي يا بت انتي..
رحمه بحده
خلصت المايه في زورك انت تتكلم معايا كويس..
اكرم
خلاصو يا رحمه ما تقلقيش انا معاكي..
رحمه
هو انت يعني ابن اختي مثلا اطمن انك معايا، بس اشوفك يا شهد انتي تهربي وانا اتمرمط…
أكرم بقلق لأسر
طيب احنا هنروح نعمل ايه؟..
أسر
انتو خايفين واخد رايح يجيب مراته ومعاه اخته واخوه، وهخلي فؤاد يبعتلي القسيمه بسرعه وعايز حد. منهم يتكلم معايا..
رحمه بقلق
ده اذا كانو ما عملوش فيها حاجه..
أسر بغيظ
هو انا مش قولتلك اخرسي يا بومه..
رحمه بحده
انت اللي تخرس وسوق بالراحه مش راكبين طياره احنا..
_تفتكرو بقي هيحصل ايه؟..
ــــــــــــــــــــــــــــــــــــــــــــــــــــــــ
#بقلم_الكاتبه_رحاب_القاضي

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية النصيب)