رواية بيت النجاحي الفصل الثاني 2 بقلم هند عبدالله

رواية بيت النجاحي الفصل الثاني 2 بقلم هند عبدالله

رواية بيت النجاحي البارت الثاني

رواية بيت النجاحي الجزء الثاني

رواية بيت النجاحي الحلقة الثانية

الساعة قربت على اتنين ميعاد رجوع الولاد من المدرسة
كريمة واقفة قدام الفرن بتحط فيه صنية الكوسة وتفتكر حاجة وتبتسم بدلال
على السلم كان سمير وعلا طالعين يتنططو ويغنو بكرة اجازة وبعده اجازة
ووراهم طالع بالراحة مدحت بيتلفت عالسلم كأنه بيدور على حاجة او هو فعلا بيدور على حاجة
ترابزين السلم الحديد المشغول المكسي بداير خشب لافف مع السلم سايب ضله على البلاط القرميد اللي أشكاله سداسية معشقة في بعض وطالع منهم ريحة فنيك مطهر
دايما عم طاهر البواب بيمسح بيه السلم يوم الخميس الضهر علشان يبقى نضيف ورجالة البيت نازلين صلاة الجمعة
طالع مدحت عالسلم وهو سرحان لحد ما لمحها ضفيرة لونها كستناء نازلة على كتف قميص لبني تحته جيبة كحلي وشراب ابيض جوا جزمة دبابة سودا بتطل منهم احلى بنت في البيت لا احلى بنت في الدنيا اميرة بنت الاستاذ نبيل اللي في الدور التالت
كل يوم من غير ترتيب اللي يرجع من المدرسة فيهم قبل التاني يتلكع عالسلم لحد ما يلمح التاني
العين تيجي في العين وابتسامة مكسوفة وكل واحد يجري على شقتهم
مدحت وصل لباب شقتهم وهو ماشي بضهره لحد ما خبط في كريمة
: بسم الله الرحمن الرحيم مالك يا واد
ارتبك وهو بيقول ولا حاجة ولا حاجة ياماما
رمت بعينها على السلم وسمعت باب شقة الاستاذ نبيل بيتقفل فغمزتله: ولا حاجة ياماما برضه مااشي
كل واحد من ولادها دخل اوضته
وهى رجعت للمطبخ تتطمن على كل حاجة
يوم الخميس يوم مهم وله احتفال في بيتهم
غير انه صابح اجازة وان الولاد بيرجعو من المدرسة بدري
عرفة كمان بيرجع بدري وهو محمل بأكياس الفاكهة واللب والسوداني واللبان لعلا وشيكولاتة لسمير وفزدق لمدحت
ويوم الخميس بتيجي والدته الحاجة سنية الوكيل تتغدى عنده
الحاجة سنية ست صعبة شوية ومبتفوتش حاجة متعلقش عليها
لما كريمة بتلمحها جاية من بعيد بترتبك
هيئتها ومشيتها
ست قصيرة مليانة شعرها الابيض باين من تحت دراعات النضارة والبونيه القطيفة اللي واخد لونه من الوردة الزرقا المنقوشة على البلوزة الحرير البيضة ودقة عكازها على الارض
بتزيد ضربات قلب كريمة
هى تقدر ترد عليها بالادب انما خاطر سي عرفة عندي بالدنيا
دايما تقول لأمها كده لما بتحكيلها عن عمايلها وامها تقولها ردي
تتنهد وتقول واكسر بخاطر سي عرفة والنبي ما يكون ابدا كفاية عليا لما بتنزل انه بيراضيني
دقت سنية الوكيل بعكازها عالباب تلت مرات وجري سمير فتحلها
: ناناه جات ياماما
تخرج كريمة ترحب بيها
: اهلا وسهلا ياماما نورتينا
ترد سنية من تحت الضرس
: منور بصحابه ياختي اه مسم امال فين عرفة
: زمانه على وصول يا حبيبتي على ما ترتاحي من السلم
: ماهو انتي ياختي اللي اختارتي سكنة العلالي كان ماله الدور الاول انما قعدتي تتدلعي عليه : عاوزة فراندا ازرع فيها ريحان ياسي عرفة وهو خيبان ومدهول مايعرفش انك عاملاها بالعنية عشان مقدرش اطلع السلم لكن بعينك قاعدة على قلبك
كل اسبوع تسمع كريمة نفس الموشح وترد بابتسامة : والنبي بتنورينا ياماما ربنا مايقطعلك عادة ابدا
: بلغني ان اخوكي رجع صحيح ؟
: اه يا حبيبتي رجع امبارح
: اه وياترى جابلك ايه معاه
: يوه ياماما هو احنا محتاجين طب ده سي عرفة مش حارمنا من حاجة ابدا
: معلوم مانتي ساقياه ومدوباله وكل طلباتك أوامر ياختي ساحباه وراكي
: الله يسامحك يا ماما عن اذنك هدخل اطلع الحاجة من الفرن
اتعودت كريمة تسمع من سنية وتفوت ودايما تقول اهو ست كبيرة والكبر عبر هو يعني كلامها هيعورنا
سنية قاعدة في الصالة على الكنبة الاستنابولي تبص لكل ركن في البيت وتطلع فيه عيب
: مسم قماش الكنب داب من الغلية والبطاس وهى تعبانة في حاجة دلوقتي يجبلها غيره الدلدول
وايه ده النجفة مطوسة كده ليه هى وراها ايه يعني
بيقطع حديثها دخول عرفة شايل ومحمل بيرمي الأكياس على السفرة ويجري عليها يبوس رأسها وايديها : منورة يا امي
تحط ايدها على كتفه وتقوله عامر بحسك يا ضنايا
يرفع عرفة صوته
يام مدحت الغدا احسن واقع
ترد كريمة من جوا : حالا يا عنيا تعالو يا ولاد ساعدوني ودو الأطباق عالسفرة
تقرب سنية من عرفة وتهمس في ودنه : ابقى اسئل على بنت ليلى دي ضناك برضه
يشرق عرفة ويرد بسرعة في محاولة للتقفيل على الموضوع احم احم كح كح حاضر يا امي

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية بيت النجاحي)