رواية بيت النجاحي الفصل الثالث 3 بقلم هند عبدالله

رواية بيت النجاحي الفصل الثالث 3 بقلم هند عبدالله

رواية بيت النجاحي البارت الثالث

رواية بيت النجاحي الجزء الثالث

رواية بيت النجاحي الحلقة الثالثة

رصت كريمة الصواني على السفرة واتجمعو الولاد وحماتها وعرفة وبدأت تغرف
الحاجة سنية خدت طبقها وزي عادتها تاخد حتة بالشوكة تشمها وتعمل قرفانة
: دي سمنة صناعي دي يا مرات إبني ؟
: ياخبر ابدا يا ماما والله مابندخلها البيت
يتدخل عرفة لتلطيف الجو
: تعرفو يا ولاد ان الكوسة اتشهرت انها واسطة بسبب حلاوة طبيخ امكم
يرد مدحت وهو بيضحك : ازاي بقى يابابا انا اعرف انها حكاية قديمة من ايام الوالي
ترد سنية الوكيل من تحت الضرس : ماهي امك توعى على فحت البحر
كريمة تعمل نفسها مش سامعة وتوزع منابات علا وسمير
وعرفة يكمل كلامه : كان في والي مزاجه صعب خالص في الأكل وكان الناس بتخاف منه خالص
لحد ما جات جارية جديدة حلوة وصوابعها حلوة بتنقط سكر
سمير : زي ماما كده
عرفة : تمام يابو سمرة
سنية مش عاجبها الكلام وبتبص بجنب عينها
عرفة بيكمل: اهو الجارية الحلوة دي يا ولاد اخترعت للوالي ده كوسة بالبشاميل زي دي تمام
والوالي كلها وانبسط وقال كوسة جوزال كوسة
ومن ساعتها بقى كل مايعوزو منه طلب يخلوها تعمله كوسة عشان ينبسط ويوافق على طول
وهنا الحاجة سنية رمت الشوكة على الطبق بصوت
وقالت : ماهو انا لما بقول ساقياه ومدوباله بتكدبوني
لا لا انا ما اكلش الاكل المتدوب فيه السحر ده ياخويا
كريمة سابت كل حاجة وجريت على اوضتها تبكي
عرفة دخل وراها يحايلها ويبوس راسها
: حقك عليا انا ياست الستات انا الغلطان
كريمة تمسح وشها وهى بتبكي بحرقة
: كل خميس كده تيجي تنقرزني بالكلام وتتعوج عليا وعلى بيتي وعيالي وكل حاجة لكن كمان تهمة زي دي قدام عيالي ده كتير كتير ياخويا هو انا ايه جبل
على السفرة كانو الولاد قاعدين متضايقين انه في خناق ومش عارفين يتمتعو بالأكلة الحلوة دي
جدتهم قالت : ماتاكلو يا ولاد بطلتو ليه
علا الصغيرة ردت عليها: لما تبطلي تبقي قرشانة يا تيتة
: اخرررسي بنت قليلة الادب ولا تلاقي امك مسلطاكي
اتفتحت علا في العياط
جوة الاوضة كانت كريمة بتمسح دموعها وتخرج مع عرفة
سمعت علا فجريت عليها: مالك يا ضنايا
علا : تيتة زعقتلي عااااااا
كريمة بصت لسنية بغيظ ورجعت قالت للبنت
:تيتة بتهزر معاكي يا عبيطة
نادت سنية على عرفة : بقولك ايه تعالى وصلني انا ماليش خلق عالقعدة هنا
عرفة : حاضر يا امي نشرب الشاي وننزل علطول احسن انعس وانا بسوق
سنية : لا ياخويا كفالله الشر
ومالت عليه تاني :ماتيجي نروح نطل عليهم
مسك عرفة ايدها بسرعة وهو بيقولها خلاص يا امي
لكن كريمة خرجت من الاوضة ماسكة شنطة هدايا ومدتها لعرفة
وقالتله خد ياخويا ما يصحش تروح للبنت بإيدك فاضية
وميلت على حماتها : اوعي تكوني فاكرة يا ماما اني هزعل ولا هتغاظ لما سي عرفة يسأل على بنته بالعكس ده واجب وان قصر فيه ازعل منه
سنية تهز رأسها: ممم وماله ياختي تعيشي وتعينيه على الواجب
كريمة : على فكرة ياماما لهو انتي ماتعرفيش ان ليلى هتتجوز الجمعادي
اتغاظت سنية لدرجة مقدرتش تخبي غيظها: تتجوز ده ايه هو في واحدة تبقى مخلفة بنت عروسة زي امينة ويجيلها نفس تتجوز برضه اما نسوان ناقصة
كريمة : الجواز مش نقص يا ماما وليلى لسة صغيرة واتظلمت ربنا يعوضها
سنية : يا كهن وايه بقى اللي ظلمها ياختي طب دي كانت واخدة عرفة النجاحي على سن ورمح
كريمة : هو وأمه
سنية : بتقولي حاجة يا مرات إبني
كريمة : بقول يا حماتي ياست الكل انك اخدتيها لسي عرفة وهى صغيرة قوي وجبرتيها تعيش معاكي في بيت العيلة عشان تبقى تحت باطك بس في نسوان عزيزة ومابتتكسرش
سنية : قصدك نسوان سايبة
عرفة شم ريحة الشياط اللي طالع من كلام امه فرفع صوته جامد : مين اللي لعب في اريال التلفزيون ده يا ولد يا سمير
: والله مانا يابابا
: يوووه خلاص هبقى اصلحه لما ارجع يلا يا أمي ننزل انا جاهز
: يلا يا اخويا واهو بالمرة نبارك لأم بتك انها هتتجوز مسم جوازة الغم إن شاءالله
وهما على باب البيت الحاجة سنية جاتلها فكرة شافت انها كويسة تنغص بيها على كريمة
فرجعت خطوتين لورا ورمت جملتها
: يكون في علمك امينة لازم تيجي هنا تعيش مع أخواتها ماهو مش هسيب بت ابني اللي بقت عروسة تعيش مع راجل غريب
ضحكت كريمة بصوت عالي وهى بترد : ده نهار المنى ياماما وانا في ديك الساعة لما تيجي متربية وكبيرة عالجاهز مسم طب دنا هقعد واتستت وهى تخدمني وتخدم أخواتها
ودورت ضهرها وهى بتلم السفرة وتغني
: كايدة العزال انا من يومي إيوة اه
سنية في غيظ : يا عرفة هتمشيني من هنا ولا وحياة السيدة مانا دخلالك بيت تاني
كريمة : متنساش هدية أمينة ياسي عرفة بالسلامة يا ماما بتنورينا الشوية دول والله

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية بيت النجاحي)