رواية موضوع عائلي 3 (بيت الهنا) الفصل الثاني عشر 12 بقلم رحاب القاضي
رواية موضوع عائلي 3 (بيت الهنا) الفصل الثاني عشر 12 بقلم رحاب القاضي
رواية موضوع عائلي 3 (بيت الهنا) البارت الثاني عشر
رواية موضوع عائلي 3 (بيت الهنا) الجزء الثاني عشر
رواية موضوع عائلي 3 (بيت الهنا) الحلقة الثانية عشر
“وما ردَدْتُ لهم تجرِيحهم أبدًا
أُلملمُ الجُرحَ في قلبي وأرتحلُ!”
_في بيت الاستاذ حسن كانت قااعده روان قدام اللابتوب بتاع رضوي وهي مندمجه فيه جدإ وريناد نايمه قدامها علي السرير هي وتيا بنتها وشكلها حزين جداً..
دخلت رضوي عندهم وقالت بغيظ
يعني اهزأ طارق ويطلع في الاخر اللابتوب معاكي انتي..
روان بحمااس
تعالي بس بسرعه جنبي ده انا ما صدقت وصلتلها..
قعدت رضوي جنبيها وقالت
هي مين دي؟..
روان
طنط بمبه عرافه مشهوره اوووي علي السوشيال ميديا، واهو بتواصل معاها دي قبل ما اكلمها خلتني احولها 2000 جنيه..
رضوي بعصبيه
يا حيوانه اللي اخدتيهم مني امبااارح عشان تجيبي حاجه مهمه عشان الفرح وفي الاخر تدفعيهم للوليه النصابه دي..
روان
طيب جربي كده والله هتلاقيها لا نصابه ولا حاجه..
ريناد بضيق
انتو بتعملو ايه، بطلو دوشه عايزه انام..
روان بغيظ
عايزه تنامي كنتي ناامي في بيتك جايه عندنا ليه؟..
ردت عليها ريناد بحزن وقالت
انا اسفه ما لقيتش مكان تاني اجي فيه غير هنا، بس سيبهالك وماشيه هروح اقعد مع روفان وروز..
روان
في ريناد انا بهزر معاكي عادي يعني..
_ما ردتش عليها ريناد واخدت تيا بنتها وخرجت من عندهم، ورضوي قالتلها بلوم…
رضوي
بطلي تبقي سخيفه اووي كده معاها شكلها مدايقه او متخانقه مع سيف…
روان
اختك اصلا بومه ونكديه وبجد لو مكان سيف اطلقها واتجوز غيرها..
رضوي بحده
اتلمي بقي دي اختك ازاي تقولي عليها كده، وهاتي اللابتوب ده انا متأخره علي شغلي..
روان
استني الاول تعالي اوريكي طنط بمبه قالتلي ايه..اقري كده..
رضوي
هتقعي في بير الاعمال ههههه ايه العبط ده؟..
روان بقلق
مش عارفه بس المشكله انها بتقولك حاجه واحده بس وبتسكت، جربي كده انتي ردي علي الاسئله بتاعتها واختاري ورقه من اللي هتبعتهم..
سمعت رضوي كلامها واختارت ورقه وقالت
ايه السؤال ده؟..
روان
ده السؤال اللي انتي عايزه تستفسري عنه..
رضوي بتوتر كتبت
هو انا هتجوز كمال؟!..
ضحكت روان وقالت
مُهزأه..
رضوي
استني ردت ايه ده بقي؟..
ضحكت روان وقالت
بتقولك هتتجوزي اللي هقابله النهارده و لابس احمر في رجله، وماسك موز في ايده وديما بيحتاجلك..
رضوي بغيظ
هتجوز قرد يعني ولا ايه؟..
ضحكت روان وقالت
تقريباً كده، بس ايه لابس احمر في رجله دي..
رضوي بسخريه
ده انا لو هتجوز مارلين مورلو مش هتقولي كده، منك لله ضيعتي فلوسي وضيعتي وقتي علي الفاضي، انا رايحه الشغل..
_قامت رضوي واخدت اللابتوب وحاجتها ومشيت وقعدت روان تقلب علي موبيلها واتفاجئت برساله من امير باعتلها فيها..
امير
“مبروك ما تنسيش تعزميني بقي”
ابتسمت بخبث وردت عليه
“والله اخااف اعزمك جوزي يشوفك يعلم عليك تاني”
_قالتله كده وعملت بسرعه بلوك لرقمه الجديد اللي بيكلمها منه، وفضلت قااعده شويه وبعدين كلمت عبدالله اللي رد عليها بسرعه وقال..
عبدالله
خير ربنا يستر.
روان
بقي كده طيب انا هقفل بقي..
عبدالله
استني بهزر والله… عامله ايه؟..
روان
تمام اا كنت عايزه اسألك بقي هو احنا هنقضي شهر العسل فين؟..
سكت عبدالله وهي قالت
انت معايا يا عبدالله..
عبدالله بهدوء
ايوه معاكي وسامعك بس ردي هيزعلك..
روان بقلق
ليه هو انا قولت حاجه غلط؟..
عبدالله
لا طبعا وده حقك بس انتي وافقتي اننا نتجوز بسرعه وانا في شغلي مش هقدر دلوقتي اخد اجازه ونسافر، انا يدوب هنعمل الفرح وتاني يوم هنرجع البلد..
روان بغيظ
هو ايه الكلام ده اومال ليه حجزت اسبوع كامل في الاوتيل،نغير الاوتيل ونسافر حتي يومين بس الاسم ابقي سافرت بعد فرحي مش جيت بلدك دي علي طول…
عبدالله بجمود
انا اصلا لغيت الحجز بتاع الاوتيل وزي ما قولتلك هعملك الفرح زي ما انتي عايزه في القاهره وهنرجع تاني يوم علي طول البلد..
روان بحده
وانا مش موافقه وتلغي ليه الحجز اصلا من غير ما تقولي.
زعق فيها عبدالله وقال بحده
هو انا كنت هاخد. منك الاذن ما انا بقولك مشغول وتعودي نفسك من دلوقتي علي ظروفي يا روان، وسلاام عشان مش فاضي..
_قال كلامه وقفل في وشها وهي رمت الفون علي السرير وقالت بعصبيه ودموع..
روان
متخلف وغبي…
_وعند عبدالله كان قاعد مع عمر تللي بيكلمه في الشغل وهو سرحان جدا ومدايق من تصرفات روان..
عمر
عبدالله يا جدع انت ركز ويايا..
عبدالله بجمود
معاك اهو بتقول ايه؟..
عمر بخبث
مدام مش بتقدر علي زعلها بتزعلها ليه يا ولد النااس؟..
عبدالله بضيق
انت مش هتفهم يا عمر، روان مش هينفع ابقي علي طول بسمع كلامها ولازم تعرف انها هي اللي هتمشي بنظامي مش انا اللي هبقي علي مزاجها….
عمر بجديه
بص يا عبدالله انا ما اعرفش بت عمك انا عارفها من كلامك عليها وانت كنت بتقول انها متمرده شويه ومش شبه بنات البلد هنا ودي المشكله، بس ما تحاولش تخليها زي بنات بلدنا لان فرق كبير بينهم وبين عروستك..
عبدالله بجمود
ليه هي منين ما هي امها وابوها من البلد هنا، انا هعرف اتعامل معاها هي متدلعه شويه وهتتعبني بس انا مش هسيبها..
عمر
لا تسيبها ايه يا عم ربنا يتمملك علي خير، ده الاستاذ حسن وعيلته كلها ناس محترمين والبلد كلها هنا بتحبه، المهم انت قولتلي هتكلمه في موضوعي انا والبشمهندسه رضوي.
بصله عبدالله بحزن وقال
كمال راجع قريب ورضوي عارفه وقالتلي انها مستنيااه..
عمر بصدمه
ايه كمال راجع كيف يعني؟..
عبدالله
يعني انسي رضوي لانها بتحب كمال ومستنيااه وانت ربنا يرزقك بالاحسن منها..
اتنهد عمر بحزن وقال
قدر الله وماشاء فعل، امسك الملفات دي راجعها زين قبل ما نبعت الطلبيه وبعدين امضي عليها، وهروح انا اظبطلك الكام ندوي اللي هتعملهم فالعشيه..
عبدالله بضيق
تمام يا عمر ولو في حاجه حصلت كلمني..
عمر
نسيت اقولك خالي خلف بعت زياره كبيره لبيتكم، بط وحمام وفاكهه وقال ايه بيعمل الواجب معاك عشان فرحك اللي قرب
عبدالله
صاحب واجب مقبولين..
عمر
انت مطمنله انا حاسس انه ناوي علي نيه وحشه..
عبدالله
خليه يعمل اللي عايزه ده لو عنده حاجه يعملها..
عمر بقلق
اللي تشوفه يا اخوي، بالاذن انا..
_مشي عمر وعبدالله مسك موبيله وكان لسه هيكلم روان بس رجع في كلامه وقال لنفسه..
عمر
لا بلاش خليني اتقل عليها شويه…
_قال كلامه وساب موبيله ومسك الملفات بتاعته وبدأ يشوف شغله بس باله برضو مشغول بيها وبحياته معاها اللي هتبدأ كمان اياام..
ـــــــــ #بقلم_الكاتبه_رحاب_القاضي ــــــــ
_وفي نفس الوقت في بيت يونس الصاوي نزل من اوضته لقي عيلته كلها قاعده بتفطر حتي سدرا كمان موجوده..
بص لشهد بجمود وقال
فين بطه امال؟..
شهد
فطرت قبلنا وراحت الجامعه قالت عندها شغل مهم..
_ما ردش عليها يونس وكان شكله متعصب جدا وشهد اخدت بالها من يارا اللي بتبصلها هي ويونس بخوف وحزن عشان متخانقين، فغمضت عيونها بحزن ومسكت فنجان الشاي وحطته قدام يونس وقالتله بهدوء..
شهد
اتفضل يا حبيبي الشاي..
اتفاجئ يونس من طريقتها وقال
مش عايز شااي روحي اعمليلي قهوه..
_فهمت انه بيستغل ضعفها قدام حزن ولادها، فردت عليه بهدوء وقالت..
شهد
حاضر يوسف انت او اخوك حد يوصل اخته للمدرسه في طريقه عشان متأخره علي شغلي النهارده..
يزن
انا هوصلها يا ماما حاضر..
قامت شهد دخلت المطبخ ويارا قالت
لا انا عايزه اروح مع يوسف..
يزن
تصدقي انا غلطان يا شبر ونص انتي..
يارا
ما انت يا يزن بتشغل حاجات غريبه في العربيه، هو في حد لسه بيسمع ورده وعبدالحليم والجو القديم ده..
ضحكو كلهم ورد عليها يزن وقال
يا سلام مش احسن من التفاهه اللي بتسمعيها انتي واخوكي بس اشبعو ببعض..
_بصت سدرا ليونس اللي كان باين عليه مدايق وقالت بخبث..
سدرا
مش هتقولي كل سنه وانتي طيبه يا عمو يونس؟
بصلها يونس بجمود وقال
هقول دلوقتي واقول تاني بالليل، هبقي بالليل اقولك وكلنا هنقولك..
سدرا بهدوء
عمتاً يعني انا اسفه جدا علي طريقتي قبل كده وبجد يا جماعه بعتذرلكم كلكم علي اي موقف وحش صدر مني ليكم، وان شاء الله السنه دي هتكون مختلفه جدا وهتشوفو سدرا جديده وكويسه..
مسك يزن ايدها وقال
انتي ديما كويسه وزي الفل يا حبيبتي..
بصلهم يوسف بسخريه وقام وقال
يلا يا يارااا..
يزن
يوسف ابقي عدي عليا في الشركه عايز اعرفك علي حد مهم وهات معاك البشمهندسه رضوي…
يوسف
حاضر..
وجه يمشي وقفه يونس لما قال بحده
استني هنا يا ولد..
وقف يوسف وقال
نعم؟…
يونس بجمود
اعتذر الاول قبل ما تمشي علي اللي عملته امبارح يلاا..
بصله يوسف بهدوء ويزن قال بقلق
خلاص يا بابا الموضوع خلص امباارح..
يونس بحده
مالكش دعوه انت، وانت يا تعتذر واللي حصل ده ما يتكررش يا تمشي وو..
جات شهد من المطبخ وقالت بهدوء
هيعتذر ومش هيزعلك تاني هو ما كانش يقصد يدايقك اصلا صح يا يوسف؟..
يوسف بضيق
امم صح انا اسف يا بابا، بعد اذنك..
_قال كلامه ومشي وراحت وراه يارا اللي كانت مدايقه جدا من باباها وتصرفاته مع اخواتها ومامتها… وقام برضو يزن هو وسدرا مشيو ويونس مسك القهوه واول ما شرب منها فضل يكح جامد وبص لشهد اللي كانت قاعده بتفطر بهدوء وقالها بغيظ..
يونس
شطه… حطالي شطه في القهوه..
ردت عليه ببرود. وقالت
ايوه ولو مش عاجبك ما تقوليش اعملك حاجه تاني، بعد اذنك اتأخرت علي شغلي..
_واخدت شنطتها ومشيت وهو اتعصب اكتر ورمي القهوه علي الارض ومشي هو كمان علي شغله
ــــــــــ #بقلم_الكاتبه_رحاب_القاضي ــــــــ
_وفي بيت محمد الصاوي، خبط علي باب اوضة عائشه بنته اللي ردت بنبره حزينه….
عائشه
لو سمحتو سيبوني لوحدي انا مش عايزه اكلم حد..
فتح محمد الباب وقال بجمود
انا يا عائشه..
قعدت بسرعه وقالت وهي بتمسح دموعها
اتفضل يا بابا..
دخل محمد وقعد جنبيها وقال بهدوء
ليه عامله في نفسك كده؟..
ما ردتش عليه وهو تابع كلامه
طيب مش بتروحي ليه شغلك؟..
عائشه بدموع
انا لا عايزه اشتغل ولا عايزه اي حاجه سيبوني لوحدي، كل حاجه بختارها غلط..
محمد
هو انتي كنتي بتختاري، لا يا عائشه انتي كنتي بتخليه هو يختارلك، حتي الحاله اللي انتي فيها دي دلوقتي هو اللي اختار يحطك فيها، فاكره بعد ما نجحتي في الثانويه وكان حلمك تدخلي كلية الطب وتبقي دكتوره، وقتها هو قالك لا ادخلي تجاره عشان كان عايزك اقل منه وتفضلي تحت طوعه جيت انا وامك وقولنالك بلاش وما تتخليش عن حلمك عملتي ايه انتي ولا سمعتي كلامنا وروحتي مشيتي ورااه زي الهبله..
نزلت دموعها بحزن وندم وهو قال بجمود
حتي الشغل انا واخواتك وامك موافقين انك تشتغلي وتعتمدي علي نفسك، بس مدام هو قال لا يبقي لا وطظ فيا انا وامك واخواتك، قللتي من نفسك ومن كرامتك ومننا عشاانه..
عائشه ببكاء
عشان حبيته بجد يا بابا وكنت فاكره ان كل الاوامر بتاعته دي عشان خايف عليا، بس طلعت غلطانه..
محمد
في ايدك الفرصه تتغيري وتعتمدي علي نفسك في كل حاجه وفي اختياراتك، اوعي تستسلمي ليه تاني وترضي تعيشي زعلانه عليه زي ما هو فاكر دلوقتي..
قرب منها ومسحلها دموعها وقال بهدوء
ما تعيطيش تاني وما تستسلميش للحزن، وافتكري ان ربنا مش بيجيب حاجه وحشه ولو كان خير ليكي ما كانش سابك ربنا مخبيلك الاحسن منه، بس الضربه دي جات عشان تفوقي لنفسك بدري اهو وتبقالك شخصيتك وحياتك اللي مش مسموح لاي حد انه يتحكم فيها ويجي عليكي، احمدي ربنا كتير كل ما تيجي تزعلي وهو قادر يعوضك عنه خير…
وابتسم بهدوء وقال
بصي انا زمان روحت واتجوزت بسرعه جوازه علي الماشي كده ما كلفتنيش حاجه برغم انها كانت بنت نااس ومحترمه وطيبه..
عائشه
تقصد طنط هاجر مش كده..
محمد بنظره حزينه
ايوه اقصدها هي، كنت بنت زي القمر الف مين يتمناها بس نصيبها ما كانش احسن حاجه حطها في طريق اتنين ما قدروش قيمتها الاولاني كان مفضل عليها احلامه وطموحه ومش مهم وجعها، والتاني.. استغليت حبها ليا وانها كانت زيك. كده لما حبتني كانت تحت امري في كل حاجه، بس طبع البني ادم لما يلاقي حد بيضحي عشانه ديما وبيحبه بيجي عليه وبيستسهل وجعه لانه بيكون عارف اخره، وده اللي عملته معاها سيبتها ووجعتها وكنت برغم اللي عملته بشوف في عينيها نظره اللي هي مستنياني اقولها يلا نرجع وكنت بطنش وما عرفتش قيمتها غير لما النظره دي والحب ده بقي لحد غيري عرفت وقتها اني خسرت وخسرت اووي كمان، وانا اقسملك بالله انه هيندم لانه ما شافش حبك ليه ولا حتي فكر في يوم يبادلك الحب والتضخيه اللي كنتي بتعمليها عشانه دي..
عائشه بحزن
ما بقاش فارق خلاص انا اللي ما بقتش عايزااه اصلا، بس عشان خاطري يا بابا سيبوني لوحدي شويه وهشتغل وهعمل كل اللي انتو عايزينه بس الفتره دي انا بجد مش عارفه اخد اي قرار..
محمد بهدوء
حاضر وفكري كويس واحنا جنبك ومش هنتخلي عنك ولا هنسيبك..
_ابتسمت بهدوء وهو سابها وطلع، ورجعت هي لحالتها من الاول، بس المره دي كان كلام محمد كله مأثر عليها..
ــــــــــ #بقلم_الكاتبه_رحاب_القاضي ــــــــ
_وفي شركة شهد كانت قااعده في مكتبها ودخل عندها حامد وقال..
حامد
جيت في معادي اهو يا طنط..
شهد بهدوء
نورت المكان كله يا حبيبي تعالي اتفضل..
قعد حامد وقالها
ده نورك والله، قولت للسكرتيره بره تجيبلنا قهوه ما فيش داعي تطلبيلي حاجه..
ابتسمت شهد وقالت
طيب كويس المهم انا بعتذرلك عن اللي يوسف عمله..
حامد
ما فيش داعي والله انا كمان اتعصبت شويه بس في الاخر ده نصيب ويوسف اخويا زي ما عائشه اختي برضو..
شهد
مانا مش بحبك من قليل يا ابن هااجر انت، المهم برضو الموضوع التاني بخصوص يارا..
اتنهد حامد بضيق وقال
انا كمان كنت عايز اكلم حضرتك في الموضوع ده، انا فاهم ان يارا لسه صغيره وفي سن مراهقه وبتغلط زي ما كلنا كنا بنغلط في سنها، بس بالنسبه ليارا ما ينفعش تغلط ولازم تبقي في وقفه معاها بجد وتبعد الولد ده عنها خاالص..
شهد بتوتر
الولد ده اصلا يبقي ابن واحده صحبتي وكمان ابن عزالدين صاحب يونس لو تعرفه..
حامد بضيق
هو ده مبرر انهم يتصاحبو او انه يوصلها بالليل ويخرجو مع بعض، لو حد. شافها هيقول ايه واحنا معروفين في مجتمعنا..
شهد
انا هتعامل معاها بس ما فيش داعي تخوفها منك بالطريقه دي..
حامد بنبره غاضبه
هي مش يارا دي المفروض خطيبتي لما اشوفها مع واحد حتت عيل المفروض اعمل ايه، انا متفق مع عمي يونس انها هتكمل 18 سنه وهتجوزها علي طول وملتزم بوعدي ليه اني لا هقرب منها ولا اتعامل معاها لحد ما تبقي كل حاجه رسمي، بس اقسم بالله لو شوفتها تاني مع الواد ده الموضوع مش هيخلص بالكلام كده..
شهد بحده
يا ابني انت بتتكلم علي بنت عندها 16 سنه، ومش وقته الكلام عن الجواز دلوقتي البنت بتخاف منك اصلا..
حامد
لسه بدري علي موضوع الجواز ده بس هو موجود في الاساس، واللي عندي قولته..
_قال كلامه وسابها ومشي وشهد بصتله بصدمه وقالت بخوف..
شهد
عيني عليكي يا يارا حظك من حظ امك، ده نسخه من ابوكي ما بيفهمش..
ــــــــــ #بقلم_الكاتبه_رحاب_القاضي ــــــــ
_وفي موقع الشغل بتاع رضوي ويوسف والتيم بتاعهم، كانت واقفه رضوي مع اسلام فوق الدور الاول وبيراجعو الشغل سوا وطلع عندهم يوسف وقال..
يوسف
نعم يا رضوي خير؟..
رضوي
انت فين مختفي من شويه؟..
يوسف
قلقتي عليا ولا ايه؟..
رضوي
وانت صغير عشان اقلق عليك هتوه مثلاً..
ضحك اسلام وقال يوسف بغيظ
لا يا اختي ما كنتش مختفي ولا حاجه كنت بحاول بس اختار هديه لمرات اخويا…
رضوي
ولقيت هديه ولا تحب نسيب شغلنا ونقعد نختار معاك..
يوسف
لا مالقيتش بصراحه انا مدايق منها، وانا مش هعرف اجببلها هديه واقولها كل سنه وانتي طيبه والجو ده انا مش منافق فقررت مش هجيبليها حاجه..
رضوي بحده
احنا مالنا لو سمحت يا يوسف ركز في الشغل وانت واسلام هتكونو مسؤلين عن المشروع هنا وانا وباقي التيم هنبدأ في الجزء التاني..
يوسف قرب منها وقال
طيب ما تخليهم هما هناك وتخليكي انتي معايا هنا..
بصتله بحده فقال بسرعه
وقبل ما تفهمي غلط انا قصدي عشان انا بحب اشتغل تحت متابعتك وبس..
رضوي بجمود
اعتمد علي نفسك واسلام هتقدر تتحمله ولا نجيبله محمود؟..
اسلام
لا بشمهندس يوسف فوق راسنا كلنا..
يوسف
متربي الواد ده تسلم يا ابو الصحاب..
اسلام
طيب تعالو ناخد سلفي قبل ما نبدأ ولما ان شاء الله نخلص الفكره بتاعتنا ناخد سلفي وهو جاهز بقي يلاا..
_وطلع اسلام موبيله ووقف قدامهم وبحركه عفويه حط يوسف ايده علي كتف رضوي اللي اتوترت وذقته جاامد وقالت..
رضوي
لم. نفسك و..
_قبل ما تكمل كلامها لقيت يوسف اختفي من قدامها ووقع من الدور الاول علي الارض لما زقته فجريت بسرعه هي واسلام لقيوه واقع علي الارض بشكل مضحك..
رضوي بخوف
يوسف انت وقعت؟..
بصلها بالم وغيظ ورد عليها
لا كنت بنط عشان اشوف المساحه، منك لله يا شيخه مش قادر احرك رجلي..
_بصتله بأسف واتلمو عليه العمال ودخلوه الاوضه بتاعت المهندسين وحط رجله علي كرسي قداامه وقاله ميلاد..
ميلاد
انا ماما دكتورة عظام هخليها تيجي حالا تشوف رجلك..
شده يوسف من هدومه وقربه منه وقال
اوعي تكلم امك انا رجلي كويسه بس ابعتلي رضوي.
ميلاد
لا انا مش كوبري يا بشمهندس..
يوسف
لا كوبري ايه دي خدمه اخويه، وزع الناس دي بقي واطلع هاتهالي والله هظبطك في موضوع العروسه بتاعتك وافتكر انك بتكلم يوسف الصاوي اللي ما فيش واحده تقف قدامي..
ميلاد بتفكير
اذا كان كده مااشي..
وبص للعمال وقالهم
طيب يلا بقي يا جماعه عشان النفس ويلاا الكل علي شغله..
_طلعو كلهم وهو مسك علبة عصير جنبه وفضل يشرب فيها ودخلت عنده رضوي وسألته بقلق وقالت..
رضوي
انت كويس يا يوسف انا اسفه والله بس انت اللي حطيت ايدك عليا وانا مش بحب التصرفات دي..
يوسف تصنع الالم وقال
ياني يارجلي انا عملتلك ايه عشان تعملي فيا كده، دي ورمت علي فكره..
رضوي
خلاص طيب اهدي وميلاد كلم مامته وجايه دلوقتي، اشرب العصير بتاعك..
يوسف
بشرب اهو جامد الموز باللبن ده بتاع البت نورا تقريبا.. اااه يا رجلي..
_بصتله رضوي بسرعه وافتكرت كلام العرافه اللي قالتلها ان اللي هتتجوزه هتقابله النهارده وماسك موز في ايده وكمان لابس احمر في رجله..
يوسف
مالك سرحتي في ايه؟.
رضوي بقلق
لا لا اكيد ده هي قالت موز مش موز باللبن وقالت احمر وانت اهو لابس اسود..
يوسف
هو ايه ده؟..
رضوي
لا ولا حاجه اقعد بس ما انت كده لحد ما اروح اقول لميلاد واقوله يسعجل مامته..
يوسف
طيب استني معلش الاول قلعيني الكوتشي رجلي وجعاني منه..
رضوي
ما تقلعه هو انت اتشليت..
يوسف مثل الحزن وقال
اخص عليكي يعني اتكسرت اهو شكلي بسببك ومش هاين عليكي تساعديني….
_اتنهدت رضوي بضيق وراحت فكت رباط الكوتشي وقلعته ليه وهنا كانت الصدمه الكبيره اووي ما لقيته لابس شرااب لونه احمر..
يوسف بقلق من نظرتها لرجله
في ايه يا حجه انتي…
رضوي بصدمه
ايه ده؟..
يوسف بقلق
هو ايه اللي ايه ده، رجلي اول مره تشوفي رجل بني ادم..
رضوي بصتله بغيظ وقالت
ليه انت هاا ليه انت يعني ليييه؟..
شال يوسف رجله من قدامها وقال بخوف
انتي مجنونه صح ولا ريحة رجلي لحست دماغك، يا ميلااااد تعالي هناا..
رضوي بحده
استني انت حركت رجلك اهو انت رجلك مش وجعاك صح؟..
يوسف بتوتر
هاا لا وجعاني بس خفت شويه انا همشي بقي عشان الحق اجيب هديه لمرات اخويا..
رضوي بحده
ايوه احسنلك تمشي عشان انا مش عايزه اشوف وشك النهارده..
يوسف بغيظ
مااشي يا رضوي الشربيني انتي..
_ولبس الكوتشي بتاعه وهي مركزه علي رجله بشكل كبير، فقام وقف قدامها وقال بخوف..
يوسف
يا بنتي في ايه مالك ومال رجلي؟..
رضوي
انت ليه لابس شراب احمر..
ضحك يوسف وقاال
ااااه قولي كده بقي، عادي يا ستي انا بحب البس الالوان دي، اومال لو شوفتي لون البوكسر..
اتكسفت رضوي جدا وقالتله بحده
انت قليل الادب اوعي من وشي..
وسابته وطلعت وهو قال لنفسه بغيظ
بوكسر ايه يا جاتني نيله، اهي قفلت مني تاني…
ــــــــــ #بقلم_الكاتبه_رحاب_القاضي ــــــــ
_وبالليل في بيت فيروز دخلت البيت هي وزين اللي كان ماسك موبيله وبيكلم يارا علي الوتساب وهو مبتسم..
فيروز
احمم بدأت اغير انا بنت الصاوي اخدتك مني..
قفل زين الفون وقال
لا وانا اقدر يا ست الكل، هي بس كانت بتطمن عليا وبتشوف عملنا ايه عند الدكتور..
فيروز
ان شاء الله يا حبيبي بكره الدكتور يقولنا لا محتاجين عمليه ولا حاجه ويكون الموضوع هيتعالج..
زين
يارب يا ماما، بصي انا تعبت اووي فمش هقدر اتعشي هدخل انام..
فيروز
انت تدخل تنام وانا هجيبلك العشا لحد عندك ونتعشي مع بعض..
زين
اذا كده تمام، وبكره هبقي اروح لبابا اديني قولتلك..
فيروز بضيق
انت تعبان ومش هتتحرك من عندي..
زين بهدوء
معلش يا ماما بس انا عايز ابقي جنبيه برضو الفتره دي محتاجله برضو..
فيروز بحزن
ماشي يا زين ادخل يلا يا حبيبي ارتاح جوه..
زين
حاضر..هو انتي هتحضري فرح روان وعبدالله؟..
فيروز
لا يا حبيبي مش هينفع وبعدين انا لو عليا مش عايزه اي مكان يجمعني بابوك لا دنيا ولا اخره بس جايه علي نفسي عشانك..
زين بضيق
انا اسف يا ماما..
فيروز
هو اللي المفروض يعتذر مش انت، يلا ادخل ارتاح عشان ما تتعبش اكتر من كده وطلع من بالك اي تفكير في الموضوع ده وركز في علاجك وصحتك وبس..
_ابتسم زين بهدوء ودخل اوضته، وهي دخلت المطبخ ونزلت دموعها غصب عنها بخوف علي ابنها وحالته اللي كل يوم بتبقي اسوء بسبب المرض اللي جاله مؤخراً..
ــــــــــ #بقلم_الكاتبه_رحاب_القاضي ــــــــ
_وفي بيت الصاوي وبالاخص في اوضة بطه دخلت عندها سدره وهي في قمة شياكتها وابتسمت بهدوء وقالت..
سدرا
هو انتي هتحضري عيد ميلادي؟..
بطه بحده
اطلعي بره يا بت انتي..
سدرا بهدوء
انا اسفه وانا غلطانه وهقول قدام الكل ان انا اللي غلطت فيكي الاول، بس سامحي بابا وارجعو لبعض واوعدك اني مش هتدخل بينكم تاني ولو جيت عندك هبقي ضيفه وبس وضيفه خفيفه كمان…
بطه بسخريه
يا سلام وايه اللي غيرك اووي كده يا ملاك هانم، لتكون امك طلعت من قبرها مثلا وعشان كده هتسامحينا..
غمضت سدرا عيونها بنفاذ صبر وقالت
لو سمحتي ما تجبيش سيرة ماما، انا بس كنت عايزه ابدأ من جديد مش اكتر وعايزه اصلح كل الغلط اللي عملته، ممكن بقي تسامحيني اعتبريني زي بنتك وعدي الغلطه دي..
بطه بجمود
هغير هدومي وانزل، ومش عشانك اووي بعني عشان يزن جه واترجاني ما اكسرش بخاطرك..
_ابتسمت سدره بأتسااع وطلعت وقفلت الباب واتحولت علي طول ملامحها للشر، وقالت لنفسها بسخريه..
سدرا
براحتك اووي وهنشوف مين اللي هيترجي مين يا مرات ابويا..
_وتحت كان نازل يوسف وبص للبيت اللي متزين بطريقه حلوه وابتسم بسخريه وفجأه اتصدم من هدير اللي دخلت البيت وهي بتبصله بخبث، فقرب منها وقال…
يوسف
انتي بتعملي ايه هنا يا بت انتي..
هدير
اخص عليك بقي اطرد. من شغلي بسببك وبسبب اني طاوعتك وما تسألش عليا ولا تساعدني، ولا انت بقي كنت قاصد تعمل كده عشان تخليها تغير عليك البشمهندسه رضوي اللي كانت شاغله بالك اووي..
يوسف بغضب
امشي اطلعي بره انا مش ناقصك..
جات سدرا من ورااه وقالت
تطلع فين يا يوسف مش عيب تطرد صاحبتي بره كده وهي الوحيده اللي جايه من بره تحضر عيد ميلادي..
قرب منهم يزن وقال
في ايه يا جماعه واقفين كده ليه؟…
سدرا
اسأل اخوك يا سيدي اللي عايز صاحبتي تمشي..
يزن
لا هو اكيد مش قصده كده ولا ايه يا يوسف؟..
يوسف بضيق
براحتكم..
_وسابهم ورااح قعد جنب يارا اللي كانت ماسكه ايدها اللي فيها الساعه اللي ادهالها زين، وقالها..
يوسف
ايه الساعه دي؟..
يارا بتوتر
اا دي جيبهالي ياسمين هديه فبسوطه بيها شويه، قولي انت جيبت ايه هديه لسدرا..
يوسف
هجيبلها كفنها ان شاء الله..
ضحكت يارا بهدوء وقالتله
حرام عليك ده كان يزن يروح فيها..
بصله يوسف بغيظ وقال
عيل مغفل..
يارا
لا هو. مش مغفل، هو بيحبها وواثق فيها وبيحبها بجد كمان وعشان كده هو شايفها بطريقه غير اللي احنا شايفينها بيها..
يوسف
انتي هتتفلسفي عليا اخرسي انتي كمان..
يارا بغيظ
هسكت يا متخلف..
سكتو شويه وبعدين يوسف ابتسم بخبث وقال
انا عرفت هجيب ايه لسدرا هديه النهارده..
يارا بفضول
هتجيبلها ايه؟..
قرب منها يوسف وقالها في ودنها وهي ضحكت وقالتله بصدمه
هههههه لا لا اوعي تعمل كده والله الكل هيزعل..
يوسف
والله لعملها انا هخليها تتشل النهارده، مش جيبتلي هدير تتحمل بقي..
يارا
هي مين هدير دي اصلا، انا اول مره اشوفها؟..
يوسف بقلق
مش عارف ومرات اخوكي نظراتها ليا ما تدلش علي الخير بالمره..
_وبعد شويه في مكتب يونس كان قاعد. يوسف ابو سدرا هناك ومعاه بطه، وقالها هو بهدوء..
يوسف
هان عليكي كل ده تسبيني..
بطه بحده
انتي عايزني اغلط فيك يعني، انت اللي طردتني يا راجل يا اهبل بعد ما مديت ايدك عليا..
يوسف
انا غلطان وغبي والله وما كانش ينفع اعمل كده بس انا كانت اعصابي بايظه وما صدقت ان سدره بقيت تتعامل معايا بطريقه كويسه، وهي جات وقالتلي انها هي اللي عصبتك الاول بس كانت خايفه تقولي كده، ومن قبل ما هي تقولي والله انا مصدقك وكنت جاي اصالحك..
بطه بحزن
انا مش عايزه ارجعلك، انا خلاص هبيع بيت ابويا في الحاره وهجيب شقه قريبه من يونس هنا و..
قاطعها بحده وقال
لا انتي هترجعي بيتك هو انا لولا دعمك ليا ووقفتك جنبي في بداية حياتنا ما كنتش هجيب الشقه دي ولا هبقي في المستوي ده، والله يا بطه ما هتتكرر تاني واللي انتي عايزااه هعمله بس بلاش تسبيني..
دخلت عندهم سدرا في الوقت ده وقالت
لسه برضو ما اتصالحتوش، طيب عشان خاطري انا اللي غلطانه المره دي وانا اللي عملت الخنااقه دي، فعشان خاطري عدوها بقي وخلو فرحتي بعيد ميلادي تكمل ولا ايه يا ماما بطه؟…
ابتسم يوسف بأتساع وبصتلها بطه بجمود وقالت
ماشي حصل خير يا يوسف..
مسك يوسف ايدها وباسها وقال
ايوه كده ده الواحد روحه ردت فيه تاني..
_حاولت سدرا تداري غضبها من تصرفات ابوها مع مراته وقالت بأبتسامه صفرااء..
سدرا
يلا يا جماعه بقي عشان نحتفل بقي..
_وطلعو كلهم وكانو مستنين التورتا تجهز، وراحت يارا وقفت مع سدره وهدير وقالت..
يارا
بقولك ايه يا سدرا ايه رئيك لو نعمل السيشن بره هيكون اجمل من هنا..
سدره بصتلها بغيظ وقالت
وانتي مالك هو كنت اخدت رئيك..
يارا بحزن
انا مش قصدي خلاص براحتك..
هدير بسخريه
ايه ده هتعيط يا سدره مالكيش حق..
سدره بصتلها من فوق لتحت وقالت
عادتها ولا هتغيرها ست الدلوعه هانم..
ـ وقف يوسف جنب يارا اللي عيونها اتملت دموع وحط ايده علي كتفها وقال ببرود..
يوسف
في حربمبؤه منك ليها مالكم بأختي؟..
سدره بغيظ
هيكون مالنا بيها يعني، هي اللي جايه تتلزق فيا وفي صحبتي..
يوسف
طيب ابلعي ريقك كده والحق عليها انها عملت لاتنين اقل منها قيمه وجات وقفت معاكم..
وبص ليارا وقال بهدوء
هو انتي مش بابا قالك ما تقفيش مع الاشكال دي ما بتسمعش الكلام ليه يا صغنن؟..
ابتسمت علي دلع يوسف ليها وقالت
خلاص بقي حصل خير..
يوسف بهدوء
هو فعلا حصل خير، بس اسمعي يا سدره لو في يوم فكرتي تدايقتي اختي تاني بأي كلمه او اي حاجه من اللي متعوده عليها وانتي فهماني والله العظيم همسح بكرامتك انتي واللي يقفلك الارض…
_واخد يارا وراحو قعدو علي الكنبه فبتلقائيه وسعاده حضنت دراعه ونامت براسها علي كتفه وقالت بأبتسامه واسعه..
يارا
انا بحبك اوووي انت احسن اخ في الدنيا، انت ويزن..
شهد
يلا يا جماعه عشان نطفي الشمع يلاا..
_واتجمعو كلهم فعلا وطفو الشمع وكان يوسف هو ويارا واقفين بعيد شويه، وبدأ الكل يديها الهدايا، وقال يوسف بصوت واطي ليارا..
يوسف
كتير عليها الساعه اللي جيباها دي..
يارا
مش انا اللي جيبتها ماما، وهي كمان اللي جابت الهديه اللي بابا ادهالها
يوسف
خساره فيها، تفتكري اخوكي جابلها ايه؟..
يارا
مش عارفه ما رضيش يقولي بس اكيد حاجه كبيره..
_وفي الوقت ده فتحت سدره الهديه بتاعت يزن وانبرهت بيها لما لقيته جايبلها عربيه غاليه جدا..
سدره
لا بجد انت جايبهالي انا؟..
يزن بهدوء
اومال هكون جايبها لمين، وانتي قبل كده قولتيلي ان كان نفسك فيها وكمان هعلمك السواقه..
حضنته جامد وقالت
ربنا يخليك ليا يا حبيبي..
يارا بخبث
مش باقي غير يوسف بقي، جيبت ايه بقي يا يوسف لسدره؟..
يوسف
جيبتلها حاجه مهمه ومفيده جداً، افتحي موبيلك كده بعتلك حاجه..
_فتحت سدره موبيلها واول ما شافت الرساله بتاعته اتعصبت جدا وقالت…
سدره
حجز عند دكتور نفساني ليه شايفني مجنونه حضرتك..
كتمت يارا ويونس ويوسف ضحكتهم ويزن قال بحده
ايه قلة الذوق دي ياللا..
يوسف ابو سدره
دي مش قلة ذووق دي قلة ادب..
يوسف
في ايه يا جماعه ده انا بهزر معاها، وما تقلقيش يا سوسو هديتك حجزتها واتأخرت شويه بكره نتكون عندك…
يارا بصوت واطي
هدية ايه دي اللي جايه بكره؟..
يوسف
هو الكلام بفلوس، بثبتهم يا ستي..
وقفت شهد جنبيهم وقالت
ينفع كده زعلت اخوك منك..
يوسف
طيب بزمتك يا شوشو هي محتاجه دكتور نفساني ولا لا؟..
شهد
لا البنت زي الفل وكفايه بقي عيب..
يوسف
تعالي يا يارا يا بنتي نقعد لوحدنا…
_وراحو قعدو كلهم مع بعض ويارا ويوسف قاعدين لوحدهم، وسدره كانت بتبصلهم بغيظ وقامت دخلت المطبخ ولما شافها يوسف قام راح وراها وقالها..
يوسف
هو انتي بتخططي لايه، جو البنت الكيوت اللي بتحب الخير للي حواليها ده مش لايق عليكي..
سدره بغضب
معاك حق انا بعمل كل الشو ده لهدف معين وهو اني افضحك واخليك تبعد عني وعن البيت ده خااالص…
يوسف
علي فكره البيت ده مش ناقص مشاكل، وانتي عايزه تعملي مشاكل ليه اصلا ما تخليكي في حالك..
سدره بخبث
تعرف انا كنت مخططه لحاجه تانيه بس مدام انت جيت ورايا هنا تبقي انت اللي جيبته لنفسك..
_قالت كلامها وسابته وطلعت بره وهو مش فاهم حاجه، وراح وراها لقاها راحت مسكت ايد يزن وبدأت تعيط وقالتله..
سدره
عشان خاطري خلينا نمشي من هنا، انا مش عايزه اقعد مع اخوك في بيت واحد..
يزن بقلق
في ايه يا سدره حصل ايه؟..
وقال ابوها برضو
ماله يوسف عملك ايه؟..
سدره ببكاء
انا تعبت بجد ومش عارفه اخلص منه ولا هو راضي يبطل يقرب مني..
يوسف بصدمه
نعممم يا اختي؟..
يزن بغضب
بيقرب منك ازاي انطقي؟….
يوسف بحده
بتكدب والله..
سدره بعصبيه
اومال انت جاي ورايا المطبخ دلوقتي ليه، وقبل كده كان بيجي فوق عندي وانت مش موجود. حتي هدير انت بعتها تتعرف عليا عشان تفتح معايا سكه مش كده يا هدير..
اتصدم الكل من كلامها وهدير قالت
بصراحه ايوه انا ويوسف علي علاقه ببعض من تلات سنين وهو قالي انه عايز يوصل لسدره بأي طريقه لانها رفضته واختارت اخوه، بس بصراحه لقيتها بنت كويسه وبالعكس خلتني ابعد عنه…
يوسف بحده
والله العظيم. كدابه انا هدير ما اعرفهاش غير لما جات اللوكيشن وماليش اي علاقه بيها..
هدير
طيب لو انا كدابه البشمهندسه رضوي مش هتكدب تقدر يا يزن تكلمها وتقولها هي ليه خلتني اسيب الشغل، وهتقولك لما شافتني مع يوسف وعرفت اللي بينا وهي ما كانتش حابه حاجه زي دي في الشغل..
يزن بغضب
يعني الكلام بجد تعمل كده في مراتي يوسف…
يوسف
والله العظيم ما عملت حاجه دي البت دي شيطاانه وعايزه تخرب البيت وتوقعنا في بعض..
_مسك يزن السكينه اللي قدامه علي الترابيزه وحطها علي رقبة يوسف وقال بغضب..
يزن
والله لاقتلك يا حيوان..
مسك يونس ايده وقاله بعصبيه
ابعد السكينه عن اخوك يلااا..
يزن بحده
طبعا ما هو انت لاوم تدفعله، بس كله الا مراتي وانا هعرف اجيبلها حقها كويس..
وقف يوسف ابو سدره جنب يزن وقال بضغب
هي دي الامانه اللي مديهالك يا يونس ابنك بيلعب ببنتي وانت بتحاميله..
اتنهد يونس بضيق وبص ليوسف ابنه وقال
اطلع بره..
يوسف بدموع
والله العظيم يا بابا انا ما عملتش كده، برغم كل الخلافات اللي بيني وبينها بس والله انا شايفها ديما مرات اخويا واختي..
ذقه يونس جامد وقال بحده
امشي غور اطلع بره وما اشوفش وشك تاني لا هنا ولا في الشركه،يلااا غور…
_بصله يوسف بحزن ومشي وجات شهد ويارا يطلعو وراااه بس يونس زعق فيهم وقال..
يونس
اوعي تتحركي منك ليها ومش عايز اسمع سيرة يوسف في البيت تاني، وانت يا يزن خد مراتك واطلع شقتك واهدي خلاص اهو مشي ومش هيجي تاني هنا..
يوسف بحده
لا انا بنتي هتيجي معايا يا يونس..
سدرا مسكت في ايد يزن وقالت
انا قاعده مع يزن مش همشي غير معاه..
يزن بجمود
ما تقلقش يا عمي انا من بكره هدور علي بيت جديد ومش هتراجع عن قراري يا بابا، يلا يا سدره..
_واخد. يزن سدره وطلعو فوق وهدير مشيت ويوسف قال لبطه بعصبيه..
يوسف
يلا بينا يا بطه..
يونس
يوسف انا طردت ابني قدامك اهو، واهدي وهنتكلم ونفهم الموضوع..
يوسف بحده
الموضوع مفهوم لوحده، ولو ابنك ما جابش بيت لبنتي بره والله ما هتقعد دقيقه واحده علي زمته، هي حصلت الصايع ابنك يبص لمرات اخوه يا زين ما ربيت..
قال كلامه واخد بطه ومشي ، وشهد قالت بغضب ليونس
انت مصدق الكلام ده؟..
يونس
لا مش مصدق ومتأكد مليون في الميه ان ابني ما يعملش حاجه زي دي..
يارا ببكاء
اومال ليه طردته يا بابا..
يونس بضيق
لازم اعمل كده عشان لولا سمعت البيه اللي زي الزفت ما كانتش قدرت النيله دي تقول عليه حاجه زي دي، ولو كنت جيت معاه كانت خطتها هتنجح وتعرف تفرقهم لاخر العمر..
شهد بحده
كل حاجه بتحصل دي بسببك انت، وبسبب افعالك وحياتك اللي كلها قرف وحرام، وعمرك ما هتلاقي الراحه يا يونس واحنا هنتاخد بذنبك طول ما عايشين معاك..
_وسابته وطلعت اوضتها وراحت يارا وراها.. وهو فضل قااعد. مدايق وقال لنفسه بغيظ..
يونس
والله ان ما كان النهارده هو اخر يوم ليكي في بيت الصاوي يا بنت دارين ما ابقاش انا يونس الصاوي..
ــــــــــ #بقلم_الكاتبه_رحاب_القاضي ــــــــ
_وفي بيت الاستاذ حسن كانت ريناد قاعده علب سرير روز وبتحاول تنيم تيا بنتها اللي رافضه خالص تنام ودخل عندها طارق وقال..
طارق
مالها بتعيط كده ليه؟..
ريناد بتعب
مش عارفه بحاول انيمها مش راضيه..
طارق
يا بنتي ما تغيرلها طيب البامبرز الاول..
ريناد
والله ما واخده بالي، انت عايز حاجه؟..
طارق
سيف علي الفون اهو عايزك بيقول بيكلمك الفون بتاعك مقفول، خدي كلميه وانا هاخد تيه اخلي رضوي تغيرلها بره..
ريناد
مااشي خدها اهي بالراحه عليها..
_واخدها فعلا طارق وخرج وسابلها الفون، وهي اتنهدت بضيق وردت عليه وقالت بهدوء..
ريناد
نعمم..
سيف
قافله موبيلك ليه، ومشيتي ليه من البيت من غير ما تقوليلي..
ريناد بدموع
معلش نسيت وروان عايزاني في حاجات مهمه معاها..
سيف
طيب انتي كويسه صوتك متغير ليه؟..
ريناد بجمود
كنت نايمه..
سيف
طيب خلي بالك. من نفسك ومن تيا..
ريناد
حاضر..
سيف
هتوحشيني..
ابتسمت بسخريه وقالت
هروح اشوف تيا باي باي..
_قفلت معاه ومسحت دموعها وطلعت بره عند اخواتها لقيت رضوي وطارق قاعدين بيغيرو لتيا وطارق بيغنيلها..
طارق
يا ابو توتا عريانه غطيها يا قمر، دي عليها دباانه غطيها واختشي دي لونها مشمشي..
ضحكت ريناد غصب عنها وقالت
ايه اللي بتغنيه للبنت ده..
رضوي
ما سكتتش غير لما غنالها، انتي بقيتي كويسه..
ريناد
ايوه كويسه وابعدو عن بنتي كده، انتو ايه اللي عاملينه فيها ده اوعو..
_بعدو هما الاتنين بسرعه عن تيا اللي فضلت تعيط علي طارق فراح وقف جنبيها، وفي الوقت ده موبيل رضوي رن برقم يوسف، فأخدت موبيلها ودخلت اوضتها..
وردت عليه وقالت
الو..
يوسف
انا عايز اشوفك بسرعه دلوقتي..
رضوي
اييه دلوقتي دي انا مش بحب اخرج بالليل..
يوسف برجاء
موضوع مهم يا رضوي ارجوكي تعالي، هبعتلك اللوكيشن اللي انا فيه وتعالي عشان خاطري.
رضوي
حاضر هجيلك..
_وقفلت معاه وغيرت هدومها ولبست ديرس بسيط وطويل لتحت الركبه وبنصف اكمام ولونه ابيض وفيه ورد لونه موڤ وربطت شعرها بشريط موڤ، وطلعت لقيت روان قااعده بتتفرج علي التلفزيون وهي مدايقه…
رضوي
روان هو عبدالله هيجي امتي عشان الفرح؟..
روان بضيق
مش عارفه يجي ما يجيش براحته..
رضوي
في ايه متخانقين ولا ايه؟..
روان
مش عايزنا نقضي شهر العسل وهنقعد هنا يوم واحد ونرجع البلد..
رضوي
امم وفيها ايه يمكن ظروفه كده..
روان
وانا مااالي ومال ظروفه انا من حقي افرح زي مانا عايزه..
رضوي
انا متأخره دلوقتي ولازم امشي لما ارجع نبقي نتكلم ونحل المشكله دي، المهم لو حد. سأل عليا قوليلهم. نزلت تجيب حاجه من زميلتها في الشغل مهمه..
. روان بحزن
طيب يا رضوي..
_ ونزلت رضوي وراحت للمكان اللي قالها عليه يوسف، ولقيته قااعد علي النيل في الشارع وعيونه كلها دموع، نزلت من العربيه وراحت وقفت قدامه وقالت..
رضوي
اديني جيت في ايه؟..
بصلها بحزن ودموعه نزلت وقام فجأه وحضنها وقال
انا محتاجلك اوووي بجد، ما فيش حد. واقف جنبي وانا ما عملتش حاجه المره دي..
_اتوترت جدا وجسمها كله اتنفض بأحرتج وكسوف من قربه وخوف من النبره اللي بيتكلم بيها، وبعدته عنها بهدوء وقالت..
رضوي
طيب اهدي كده وقولي ايه اللي حصل وايه اللي مقعدك في الشارع كده، وايه الجرح اللي في رقبتك ده؟..
_قعد. يوسف وهي قعدت جنبيه وقالها كل حاجه حصلت من اول فرح يزن لحد اللي حصل النهارده ده، وهي كانت بتحطله اللاصقه اللي جابتها من الصيداليه علي رقبته وقالتله..
رضوي
يعني انت عايزني اقول ليونس بيه ان الكلام اللي بتقوله هدير ده غلط واني خليتها تمشي من الشغل عشان سلوكها مش كويس ومش شاطره زي زمايلها..
يوسف
ده يبقي كرم كبير اووي منك..
بعدت عنه شويه وقالت
خلاص كده النذيف بتاعها وقف وهو جرح خفيف اصلا..
يوسف بحزن
انا عمري ما كنت اتخيل ان يزن يعمل كده، ده انا وهو واحد وما حدش بيفهنا زي ما انا وهو بنفهم بعض.
رضوي
بص هو معذور انا لو كنت موجوده كنت هصدق الحربايه مرات اخوك دي، حاول انت تكلم مامتك باباك وتقولهم انك مظلوم وهما بقي يساعدوك وانا حاضر من عينيا هروح ليونس بيه واقوله زي ما انت عايز..
يوسف
يعني انتي مصدقه اني مظلوم؟…
رضوي بقلق
مش عارفه بس مش عارفه ما اصدقش ومش عارفه ما اقفش جنبك..
يوسف بدموع
انا ايوه بعرف بنات وكنت بعمل علاقات كتير بس مش لدرجة ابص لمرات اخويا والله ولا عمري اصلا جات في بالي حاجه زي دي، وبعدين انا اخون يزن ازاي؟..
رضوي
خلاص بقي ما تعيطش مصدقاااك..
بصلها بطرف عينه وقال
من قلبك؟..
رضوي ضحكت وقالت
هههههه ايوه من قلبي، انت هتبات فين النهارده؟..
يوسف بحزن
مش عارف بس ما فيش غير بيت جدي القديم هروح اقعد. هناك…
رضوي
طيب انت مش معاك عربيتك تعالي اوصلك..
يوسف بتوتر
جعان..
رضوي
نعم؟!..
يوسف
بقولك جعان عايز اكل مـّم طعام l’m hungry، ومش معايا فلوس كمان..
رضوي
خلاص تعالي هنتعشي سوا بس علي مزاجي..
يوسف
اوكي هنروح فين بقي؟..
رضوي بحماس
هنروح حلابص..
يوسف
مين؟..
رضوي
حلابص احسن واحد في مدينة نصر يعمل سمِين ولحمة راس وكوارع..
يوسف بصدمه
لا لا انا ما بحبش الحاجات دي، تعالي ناكل بيتزا سوشي، ممكن اتنازل شويه ونروح ناكل كشري..
رضوي
كشري وسوشي روش انت كده، انشف كده وتعالي معايا وبعدين انا بالنسبالي اللي مش بياكل الحاجات دي مش راجل..
يوسف بسرعه قال
ما حصلش انا بحبها ده انا كل اسبوع باكل اربع رجول بتوع الجموسه كلهم كده، وماما كمان الصبح بتفطرني لحمة راس كده بتضربها في الخلاط كده وشوب عصير لحة راس علي الريق من كتر ما بحبهم..
ضحكت رضوي بهدوء وقالت
طيب تعالي بقي ووريني بتحبهم اد ايه..
_واخدت وراحو لمطعم بسيط جدا في الشارع وقعدو علي ترابيزه جوه المحل وقالتله وهي ماسكه اللحمه في ايدها وبتاكل..
رضوي
ما تاكل يا ابني، الحاجات دي ما تتاكلش غير وهي سخنه..
يوسف بصلها بقرف وقال
لا انا بحبها لما تبرد..
حطت قدامه حتة لحمه صغيره وقالت
طيب دوق دي هتعجبك اووي..
يوسف
هاا لا مش قادر بطني وجعتني فجأه ومش هقدر اكل..
رضوي بخبث
الحته دي بس عشان خاطري..
يوسف بأشمئزاز
لازم يعني حااضر…
_ومسك حتة اللحمه اللي هي حطتها قدامها واكلها بصعوبه وبعدها علي طول شرب قزازة مايه وقال..
يوسف
مش معقول لسه ريحتها في بوقي ايه ده؟..
ضحكت رضوي اووي وردت عليه
ما كانش في داعي بقي تعمل فيها شبح..
وعلت صوتها وقالت
حلااابص هات ربع كبده هنا للاستاذ بس اعمله وصاايه وهاتله حاجه ساقعه كمان وقزازة مايه كبيره..
وقالت ليوسف
اظن الكبده. بقي ما فيهاش حاجه، هو انت بتبصلي كده ليه قفلت مني صح؟..
يوسف بهدوء
المشكله ان برضو بكل التفاصيل اللي عمري ما حبيتها في اي بنت دي اا..
قبل ما يكمل كلامه قالت هي بتغير للحوار
الكبده هنا حلوه برضو انا اول مره جيت هنا مع كمال خطيبي كنت زيك كده وانيل كمان بس هو بقي حببني فيه..
يوسف بضيق
كمال خطيبك ده اللي كان اسمه علي الدبله اللي معايا؟..
رضوي
ايوه هي فين الدبله صح؟..
يوسف بجمود
ضاعت مني، هو انتي لسه مخطوبه؟..
رضوي وهي بتاكل وبوقها ملياان اكل
لا هو سابني وسافر عشان شغله، بس انا مش عارفه اعمل زيه ولسه عندي امل انه يرجع ويصالحتي ويخليني اسامحه..
يوسف
طيب مثلا يعني لو لقيتي حد احسن منه ولو هو محترم وبيحبك اووي مش ممكن تغيري وجهة نظرك دي..
رضوي
مش عارفه انا لسه ما شوفتش حد قدر يخليني احبه وي ما حبيت كمال والله واعلم النصيب مخبي ايه..
يوسف
معاكي حق..
_وجاب حلابص الكبده. ليوسف اللي بدأ ياكل فيها بنفس مفتوحه اووي، وبعد شويه وصلته رضوي لبيت حامد الصاوي وقبل ما بنزل قالها..
يوسف
شكرا جدا علي كل حاجه يا رضوي..
رضوي
ده الواجب يا يوسف..
يوسف
انتي الوحيده اللي واقفه جنبي ومصدقااني، وكمان البنت اللي كنت بحلم تركب معايا عربيتي لو مره هي اللي خلتني اركب جنبيها في عىبيتها النهارده، وكمان اتعشينا سوا، كفايه عليا الشويه دول بجد..
رضوي قرصته. من خده. وقالت بخبث
عادي يا يوسف انت برضو زي طارق اخويا الصغر..
يوسف بغيظ
اخوكي الصغير..
رضوي بهدوء
ايوه طبعاً..
يوسف بحده
ما كانوش سنتين تلاته دول اللي بينا هيخلوني اخوكي الصغير، اقولك علي حاجه انا نازل روحي روحي..
_نزل يوسف من العربيه بتاعتها وطلع بيت حامد الصاوي وهي كانت بتضحك علي تصرفاته واخدت عربيتها ومشيت، وهو اول ما دخل اتنهد بضيق وراح قعدت علي الكنبه وبص لصورة حامد الصاوي اللي علي الحيطه وقال..
يوسف
يعني هو انت كنت لازم تتجوز وتخلف ابويا يا جدي، عاجبك المرمطه اللي احنا فيها دي بسببك..
_وفي الوقت ده رن موبيله بوصول رساله فطلعه من جيبه ولقاها رساله من يونس وكاتبله فيها..
يونس
“جدع وروحت بيت جدك،خليك عندك وانا هتصرف انا مصدقك وعارف انك مظلوم وهجيلك حقك ما تخافش، بس خليك عندك اليومين دول لحد ما اجيلك”..
ابتسم بأتساع وقال
يا جدع بتخليني احبك وانا مش عايز والله..
وبص لصورة حامد تاني وقال
وانت يا جدو لحقت تقوله اني هنا اخص عليك…
فجأه الهوا حرك الشباك فاتنفض يوسف بخوف وقال
ايه يا اسطا انا بهزر افتن عليا براحتك..
ــــــــــ #بقلم_الكاتبه_رحاب_القاضي ــــــــ
_وتاني يوم الصبح في مستشفي راقي جدا، طلعت فيروز من عند الدكتور وقعدت علي الكرسي اللي جنب الباب ودموعها نزلت بحزن كبير وافتكرت كلام الدكتور اللي قالها..
“الحاله صعبه جدا ولازم نعمل عملية زرع قلب بسرعه، وعشان اكون صريح مع حضرتك نسبة النجاح هتكون اقل من 30٪، فقدامكم اسبوع وتجهزو وزين يجي المستشفي عشان نبدأ في اجراءات العمليه”..
فيروز
يااارب انا ماليش غيره ما تحرمنيش منه وتوجع قلبي عليه..
_وفضلت قاعده علي الحال ده لحد ما جه عزالدين وقعد جنبيها بسرعه وسألها بقلق..
عز
في ايه يا فيروز الدكتور قال ايه؟..
فيروز بحده
اطمن الدكتور قال ان نسبة نجاح العمليه 30٪واقل كمان وهو لازم يعملها، يعني مش هتلحق تهرب المره دي هتخلص منه بسرعه..
رد عليها بلوم وقال
لو حصل كده لقدر الله انا اللي عمري ما هسامحك علي اني اتحرمت منه وانا لسه عارف انه ابني..
فيروز بحده
انت كنت فين اصلا سيبتني ازاي عشان اكلمك واقولك اني حامل وقتها، ده انت ما هانش عليك تعملي قيمه ونطلق عادي وانت موجود مش ترميلي ورقه وتمشي..
عز بحزن
انا اسف..
فيروز
ما بقاش ليها لازمه دلوقتي، بس خليك جنب زين هو اللي محتاجلك ومحتاج لاسفك ده…
_قالت كلامها وسابته ومشيت، وفي نفس المستشفي في قسم تاني كان قاعد حسن ورضوي قدام الدكتور اللي بيقرأ في التحاليل بتاعت حسن والاشاعه، وساب الدكتور الورق من ايده وبصلهم بأسف وحزن وقال..
الدكتور
للاسف يا استاذ حسن في فشل في الكبد..
رضوي بدموع
طيب والحل يا دكتور دلوقتي؟..
الدكتور
هو احنا الحل عندنا اننا نشيل الكبد كله ونلاقي متبرع في اسرع وقت نقدر ناخد منه جزء من الكبد للاستاذ حسن بس تكون صحته كويسه ونفس فصيلة الدم بتاعت الاستاذ حسن..
رضوي
حالا يا دكتور انا واخواتي واهلي كلهم هنعمل تحاليل ونشوف مين فينا هيقدر يعمل العمليه مع بابا..
الدكتور
ياريت بسرعه عشان دلوقتي هتبدأ الاعرااض الشديده تظهر علي الاستاذ حسن ومش هيقدر يقاوم والمفروض من دلوقتي هو يفضل في المستشفي هنا..
قبل ما ترد رضوي قال حسن بسرعه
لا لا اجل كل حاجه يا دكتور لحد أخر الاسبوع..
الدكتور
ليه يا استاذ حسن حالة حضرتك حرجه جداً ولازم..
قاطعه حسن وقال
فرح بنتي وانا مش عايز اي حاجه تعطل فرحها..
رضوي
هو ده وقته يا بابا، نأجل الفرح مش مشكله..
حسن بدموع
لا مش هيتأجل عشان حتي لو حصلتلي حاجه ابقي مطمن علي اختك، فرح روان هيتم واول ما تسافر مع جوزها علي البلد هبقي اجي هنا واعملو فيا اللي انتو عايزينه..
قام وقف وقال للدكتور
اكتبلها لو سمحت يا ابني العلاج اللي همشي عليه الفتره دي وهي هتجيبه، انا عندي شغل ولازم امشي بعد اذنكم..
قال كلامه ومشي ورضوي قالت للدكتور بحزن
معلش يا دكتور بس هو اكيد الموضوع مزعله جداً…
الدكتور
متفهم يا انسه رضوي، بس ياريت برضو تكوني معاه اغلب الوقت وتتابعي حالته وياخد العلاج بأنتظام مع ان خطر جدا انه يقعد الفتره دي كلها بره المستشفي..
رضوي بقلق
ان شاء الله هقنعه يجي ياخد فترة العلاج هنا في المستشفي..
ــــــــــ #بقلم_الكاتبه_رحاب_القاضي ــــــــ
_وفي بيت الاستاذ حسن كانت قااعده علياء مع روان وطلع طارق من اوضته وبصلهم وضحك وقال..
طارق
ايوه بقي بدأنا حوارات الحما ومرات ابنها من دلوقتي..
علياء بغيظ
اسكت دي بتشتكيلي منه من دلوقتي..
طارق بسخريه
انتي لسه شوفتي حااجه يا عمتو، انا اختي دي لو عبدالله ما كانش سي السيد بالظبط معاها هتطلع عينه وعين البلد كلها..
روان بغيظ
انت مااالك انت طلع نفسك بره الموضوع ده..
علياء
عيب يا حبيبتي تكلمي اخوكي الكبير كده، وبعدين انتي لازم تقدري ظروف جوزك وهو دلوقتي داخل علي مرحلة الانتخابات ودي حاجه مش ساهله، ولو علي شهر العسل يتعوض وقت تاني..
طارق بحده
روان المشكله مش في شهر العسل انا فاهمك، انتي اللي فارق معاكي الفشخره قدام صحااابك والصور والحركات التافهه دي، وانا اول واحد واقف مع عبدالله الراجل مش مؤتر يأجل شغله عشان شوية منظره كنت هقف جنبك وابقي في صفك لو انتي عايزه تسافري عشان تنبسطي مع جوزك وبس..
قامت روان وقالت بغيظ
بقي كده مااشي يا طارق ما تتكلمش معايا تاني بقي..
ودخلت اوضتها وعلياء قالت
انا هكلم عبدالله البنت من حقها تفرح..
طارق
لو سمحتي يا عمتي خلي عبدالله يتصرف هو في الموضوع ده..
علياء
انا مش عايزه يا ابني تحصل بينهم مشاكل، هما لسه اتجوزو عشان يتخانقو..
طارق
نصيب ابنك انه يتجوز اختي، همشي انا بقي عشان عندي محاضره في الجامعه..
علياء
بقولك ايه انا عايزه اروح معاك مره كده واشوفك وانت واقف تشرح كده للطلاب ويقولولك يا دكتور..
طارق
هو انا بشرح في الشارع عشان اخدك معايا يا عمتي، هبقي اخليهم يصوروني فيديو واوريهولك يلا بااي..
وسابها ونزل ولقي عم سيد قااعد مداايق فقاله
صباح الخير يا عم سيد..
سيد
صباح النور يا ابني، هو انت رايح فين؟..
طارق
رايح الجامعه في حاجه ولا ايه؟..
سيد
معلش هتعبك بس تاخد هنا توصلها المكان اللي اسمه السنتر ده اللي هتاخد فيه الدروس بتاعتها، اصل انا خايف عليها تروح لوحدها ومصر هنا مش زي البلد..
طارق
مااشي حاضر هي فين؟..
سيد
دقيقه واحده هندهالك من جوه، اصل انا ما كنتش مخليها تروح وقلبت وشها عليا..
_ابتسم طارق بهدوء وراح سيد جوه، ونزلت في الوقت ده هند من فوق وقالت لطارق بأبتسامه واسعه..
هند
طارق انت رايح فين؟..
رد عليها وهو مركز في موبيله
الجامعه..
هند
طيب تعالي اوصلك في طريقي بعربيتي..
طارق
لا انا عايز اخد تاكسي..
طلعت هنا في الوقت ده وقالت لطارق
يلا يا طارق..
شال طارق موبيله في جيبه وقال
يلا بينا، هو السنتر بتاعك ده فين؟..
هند بغيظ
انتو رايحين فين، وانتي ازاي تقوليلو طارق كده عادي..
اتوترت هنا ورد طارق علي هند بحده وقالها
اومال تقولي ايه عبدالرحمن ولا احمد ما انا اسمي طارق يا هند بنت عتبه انتي اهدي علي نفسك شويه، يلا بينا يا هنا..
_ ومشي وهنا راحت ورااه ووقف تاكسي وركب هو من قدام وخلاها تركب لوحدها ورا ومشيو، واول ما وصلو السنتر نزلت هنا ونزل طارق معاها وقالها..
طارق
انتي هتخلصي امتي؟..
هنا
والله انا هعرف اروح لوحدي، هوقف تاكسي واقوله علي العنوان وبس ايه الصعب في كده..
طارق
طيب هاتي رقمك عشان لو حصلت حاجه لقدر الله نتواصل..
هنا
لا هات رقمك انت ولو حصلت حاجه هبقي اكلمك..
طارق
مسجلة عندك علي فكره لما جيبتلك الفون..
هنا
مسحته..
طارق بغيظ
ايه الرخامه دي، هاتي موبيلك اكتبلك الرقم..
هنا بحده
وتمسك موبيلي بتاع ايه انت مليني وانا اكتبه..
طارق
يارب صبرني اكتبي عندك 011…
_واداها رقمه ومشي راح الجامعه وكل شويه يمسك موبيله يشوف كلمته ولا لا وكان فعلا قلقان عليها…
ــــــــــ #بقلم_الكاتبه_رحاب_القاضي ــــــــ
_وفي بيت يونس الصاوي كانت سدره قاعده مدايقه جدا وطلع يزن من اوضته وقعد جنبيها وقال..
يزن
ممكن نهدي خلاص اللي حصل قبل كده مش هيتكرر تاني..
بصتله بحزن حقيقي وقالت
هو انت كنت هتموته فعلا؟..
يزن بضيق
ممكن نعتبرها صفحه واتقفلت ويوسف خلاص لا هنشوفه ولا يشوفنا تاني، وانا هجيب بيت الايام دي بعيد عن هنا ومعاكي ومش هسيبك…
اتنهدت بضيق وهو باس راسها بهدوء وقال
ما تشليش هم حاجه طول ما انا موجود انا هنزل بس عشان عندي شغل مهم وهكلمك علي طول وما تنزليش تحت مالكيش دعوه بيهم..
سدره بدموع
حااضر..
_وسابها يزن ونزل وهي فضلت قااعده بتعيط، وقامت وقفت قدام المرايا وبصت لنفسها بحزن وقالت..
سدره
انا وحشه وما استاهلش اتحب من اي حد حتي انت يا يزن انت بتحبني وانا بأذيك بس غصب عني والله..
_وقعدت علي الارض وحضنت نفسها اووي وفضلت تعيط بهستريا، وتحت اول ما نزل يزن لقي يونس مستنيه..
يزن
لو سمحت يا بابا انا مش عايز اتكلم..
يونس بحده
اول واخر مره اكلمك في الموبيل وما تردش عليا..
يزن
حاضر بعد اذنك..
يونس
استني عندك تعالي معايا هنروح مشوار مهم..
يزن بحده
لو هتخليني اروح عند الحيوان ابنك والله المره دي ما حد هيمنعني علي اللي هعمله فيه..
يونس بجمود
طيب مش هنروح لاخوك، بس هنروح مشوار تاني مهم يلاا..
_واخده يونس معاه ووقفو قدام عماره بسيطه ونزلو من العربيه وطلع يونس فوق ومعاه يزن ووقف قدام شقه هناك وخبط علي الباب جامد وفتحتله هدير اللي اول ما شافتهم بان عليها الخوف والتوتر وقالت..
هدير
نعم عايزين ايه؟…
ابتسم يونس بخبث وقال
هنكمل اللعبه يا سكر، اصل دورك عجبني امبارح وعايز اكمل فرجه
_تفتكرو بقي يونس الصاوي ناوي علي ايه؟
_وايه اللي هيحصل لحسن لعد ما رفض يتعالج الفتره دي؟
_وهل عملية زين هتنجح ولا لا؟
_وايه اللي متخبي في حكاية هنا وطارق؟
يتبع….
لقراءة الفصل التالي : اضغط هنا
لقراءة باقي حلقات الرواية اضغط على : (رواية موضوع عائلي 3 (بيت الهنا))