رواية شارع الحب الفصل الثاني 2 بقلم ميرنا ناصر

رواية شارع الحب الفصل الثاني 2 بقلم ميرنا ناصر

رواية شارع الحب البارت الثاني

رواية شارع الحب الجزء الثاني

رواية شارع الحب الحلقة الثانية

” مسك ايدي بلطف وحاول يتسخرج عرق وإتكلم بفخر ”
_ انا دكتور أمير صلاح إبراهيم دكتور شرعي.
” بصيت بصدمه وصرخت ”
_ دكتور ميتين!! أنا عايزه أمشي حالًا.. ياجدو مُحب..جدو مُحب.
= أما إنك قليلة الأدب بصحيح أنا دكتور ميتين ياجـ ـثة إنتي.
_ انت قليل الذوق.. تفهم إيه انت في الكانيولا والضغط.. وماسك إيدي بكل تكبر وفشخرة ولا كأنك دكتور مجدي يعقوب.. سيب إيدي.
= قال يعني إيد الأميرة ليونور يا أخي.
_ مين!
= اه ما حد شكلك أكيد جاهل وميعرفش مين دي.
” دخل الجد والجدة لفض الإشتباك وتدخل مسرعًا الجد وتحدث ”
= ايـه يابنتي حصل ايه لكل ده؟.. تصدقي انا معرفش لحد دلوقت إسمك إيه.
” بصيت لجدو مُحب براحة وجريت عليه وكأني بتحامى فيه وإتكلمت بصوت يعانق الخوف ”
_إسمي بتول.. بتول القاضي خريجة كلية أداب القاهرة من سنة.. مش جاهلة زي مابيقول الحانوتي ده.
“نظر ليا الجد وصوت قهقهته عالية ”
«أمير بغضب»
عجبتك أوي كلمة حانوتي يا أسطا مُحب ولا ايـه؟
« جد مُحب»
والله انت سُوقي، وماتنفع حتى تكون حانوتي علشان دي مهنة محترمة متنفعش لأمثالك.
« أميـر وهو يخرج من باب الغرفة»
عمومًا ياجدو ضغطها واطي، ومحتاجة محلول ملح.. في صيدلية أول الشارع خليها تروح يركبولها كانيولا علشان انا بتاع ميتين..بعد أذنك.
« نظرت إلي الجد وعيوني كلها أسف ثم تحدثت»
_ انا أسفة ياجدو مُحب والله هو اللي أبتدى وانا بس إتخضيت لما عرفت أنه دكتور ميتين.
= متقوليش ميتين دي، ألا هو بيعتز بالتخصص بتاعه أوي.. متقلقيش حور هتروح وراه وبعدين هو هيروح فين دي أوضته جنب أوضتك هنا.
_ هو حفيدك؟ ولا زي ماانا بقولك ياجدو كدا!
= هو زي حفيدي لكنه مش حفيدي بس انا مربيه يعني خدي بالك دا واد زي الفل ..قصته طويلة كدا، تعرفي إنكم شبه بعض كل واحد فيكم عيونه فيها قصة وحياته متلغبطة ومتخبطة.
_ وايـه قصته؟
= ااه شكلك فضولية خالص .
” إبتسمت وأومأت برأسي ثم أمسك يدي وأشار لي بالجلوس ”
= الجايات كتير، كل اللي عايزك تعرفيه حاليًا، أن الواد أمير ده دكتور شاطر وجايب لي جهاز الضغط علشان انا علطول ضغطي واطي كدا بيظبطهولي ولو محتاج أي إسعافات بيقوم بيها..بصي إحنا معتبرينه طبيب بشري عادي بيفهم في كله.. دا حتى لما بنتزنق ومنلقيش دكتور بيطري في الحته بنجيبه.
” ضحكت على كلامه وطريقته، وهو أكمل حديثه ”
= المهم تاخدي محلول الملح وانا هنادي عليه ، وبعدها شويه شاي يدفوكي كدا وأعرف قصتك إنتي ايـه.. وايـه اللي جابك شارع الحب وقعدتي فيه قعدتك اللي كلها حزن!.
_ اللي جابني شارع الحب، هو الحب.
” دخل أمير مُقاطعني وكله عصبيه ومن خلفه الجدة حور موجهًا لي حديثه ”
= والله والله والله لولا إن تيتا حور الست الشقرا القمر دي تدخلت ..والله ما كنت هعبرك علشان إنتي لا تطاقي .
« الجد مُحب»
= أمير.. كفاية كدا.. هي دي تربيتي!
” طأطأ رأسه خجلًا ثم تحدث ”
= أنا أسف ياجدو.
« الجد مُحب»
المفروض تتأسف ليها هي مش ليا أنا.. أتفضل أتأسف لأنسة بتول.
« أمير»
أهو دا اللي مش هيحصل أبدًا ياجدو دي غلطت فيا وانا مش هقدر أعمل ده علشانـ
” قاطعته في الكلام وبصيت له بإبتسامه خفيفة وإتكلمت ”
_ بس انا أقدر أعمل ده، أنا أسفة يادكتور أمير على كلمة دكتور ميتين، وحانوتي .. وإني هنت تخصصك وكمان المفروض عليك إنك تتأسفلي على كلمة جاهلة ولا تطاقي وجـ ـثة.
« أمير بتغصب»
_ ولا يهمك حصل خير ، انا اسف ليكي.
= ولا يهمك انت كمان حصل خير.
« الجد محب»
يلا يا أمير ركب ليها الكانيولا.
” بعد مرور ربع ساعة كنت حكيت كل حاجة حصلت معايا لجدو مُحب وكانت تيتا حور في الوقت ده بتحضر العشا لأمير، أما بالنسبة لأمير فبعد ما ركب الكانيولا دخل أوضته مطلعش منها”
_ عرفت ياجدو حكايتي.
= عرفت يابنتي كان الله في العون..طب وناوية على ايـه؟.
_ اديت كريم مُهلة والمفروض على قراره أنوي.
= بتحبيه؟
_ بحبه.
= ليه مش حاسس إنك بتقوليها بصدق وكأنك مهزوزة.
_ علشان انا مهزوزة فعلًا ياجدو، الموقف دا إتكرر أربع مرات، كل مايتقدم حد يقول الجملتين دول ولازم نسيب بعض ونمشي ومنكملش بس هو بيحبني.
= متأكده من حبه ليكي؟
_ أقولك ولا تضحكش عليا؟
= قولي.
انا مبقتش متأكدة من حاجة خلاص، حتى أهلي مبقتش واثقه ومتأكده من حبهم فيا.. انت عارف إني لولا رنيت عليهم..هما مكنوش هيسألوا.
= علشان واثقين إنك في البيت مثلًا.
_ لا خالص ماما عارفة إني مش في البيت، هما أصلًا يعرفوا بعلاقتي بكريم، مؤخرًا حكيت ليهم كل حاجه بس هما فاكرين إني بقول كدا علشان أرفض وإن مفيش حد.
= معقول!! ليه ميصدقوش إن في حد على الرغم من إنك حكيتي ليهم.
_ علشان انا في نظرهم عيله ساذجة بغير من أختي الكبيره طول الوقت.. في الوقت اللي قالت أختي إنها بتحب حد اللي هو _ شادي _ اللي حكيتلك عنه وإنه جاي يتقدملها.. أتشجعت انا كمان بعد خطوبتها أحكي وأكون شجاعة زيها وجريئة بس هما مصدقونيش فكروا إني بعمل كدا للفت الإنتباه
.
= علشان ايـه تلفتي إنتباهم.
” ضحكت وإتكلمت بمرارة ”
_ علشان أختي زارعة فيهم، إني بغير منها طول الوقت، وبقلدها.. ودا مش حقيقي.
= انتي ضحية بيت فاشل في التعامل النفسي.
_ انا مش ضحية ولا بحب أعيش في الدور ده ولا بحب حد يقول لي كده .. انا سوية.. انا بس حكيت معاك علشان حسيت براحة..براحة غريبة من أول ماشوفتك ومن وقت ماجيت البيت ده .
= أنا أسف لو ضايقتك حقك عليا..
” مسك إيدي وربت عليها وضحك جامد ”
_ بتضحك على ايـه ياجدو!
= مش قولتلك إنتي وأمير شبه بعض وكل واحد في عيونه حكاية.. انتوا كمان وجعكم شبه بعض.
” مهتمش المره دي أعرف ولا يكون عندي فضول أسأله عن حكايته، كل اللي كنت بفكر فيه كريم وازاي اروح من هنا ”
_ جدو، هو انا ممكن أطلب منك أخر طلب.. انا عارفة إني عذبتك معايا خالص.
= ست البنات تطلب وجدو مُحب ينفذ.
_ انا عايزة أروح، الفكره.. إني مش عارفة انا جيت إزاي كل اللي فكراه إني ركبت عربيه وبعدها نزلت أتمشيت كتير لحد ما لقيت الشارع ده هادي قعدت فيه.
= متقلقيش، أمير بيجيب عربية صاحبه وهيوصلك.
_ أمير تاني؟
= والله عيل جدع بس متجيبش في خناقه.
” دخلت تيتا حور وبصت ليا وعيونها كلها دموع ”
« الجد مُحب»
=ياحور.. ياحور كدا هتخضي البنت.. أحنا أتفقنا على ايـه.
” فجأه بلا أي مقدمات قربت مني تيتا حور وعانقتني بشدة..وأجشهشت بالبكاء ”
_ جدو هو في ايـه مالها تيتا حور!.
” مسك الجد زوجته حور وضمها إليه ثم تحدث بتوتر ”
= هي حور عاطفية شوية.
_ انا حبيتكم أوي.. اه صحيح.. أتفضلي ياتيتا حور الشال .
” نظرت لي ودموعها تسقي وجنتيها وتحدثت بصوت مبحوح ”
= ليه سبيه يدفيكي وبعدين ما انتي بتحبيه.. لسه هتسبيه ولا إنتي كل حاجه بتحبيها بتسبيها
_ بحبه!! انا مش فاهمه حاجة.
« الجد بعصبية»
=حـــــــور!!.
احم.. أمير بيرن يعني المفروض هننزل دلوقت علشان تركبي معاه ويوصلك.. دا رقمي وعنواني كتبتهم في الورقة دي علشان لو احتاجتي أي حاجة كلميني.. وتعالي لينا.
” شكرتهم على حُسن ضيافتهم ليا، ومازالت مستمرة أفكر في كلام وتصرفات تيتا حور لحد ماقطع الصمت أمير”
= أداب قسم ايـه؟
_ هاا!!
= اااه، إنتي سرحانة كنت فاكرك زعلانه علشان كدا متكلمتيش.
_ لا مش زعلانة وبعدين هتكلم معاك في ايـه.؟
= انا أسف.
_ لا مش كدا بس حقيقي.. انا هتكلم أقول إيـه.
= قولي لي انتِ أداب قسم إيه؟
_ قسم فرنش.
= انا سمعت إنه إتلغي من المدارس.
_ هو مش بالظبط كدا.. بس يعتبر اه.
= ربنا يعوضك، على فكرة اللغة حلوة عمومًا و شيء لطيف ممكن تستغليه في حاجات كتير.. وممكن تشتغلي في مجالك مش شرط تدريس.
” وقتها افتكرت كلام كريم، وهو بيقولي خلاص كدا كدا كنت عايزك تقعدي في البيت.. البنت ملهاش غير بيت جوزها في النهاية ”
_ أشتغل!!.
= أيوة طبعًا، لازم تكوني مستقلة بذاتك.. أنسي كوميكات الفيس بتاعت احلامنا ضاعت.. هي كانت ضربه قوية.. بس الشاطر اللي يستغلها ويفكر لمده سبع سنين مثلًا لقدام ومش أي حد بيفكر لقدام.
_بمعنى ايـه؟!
= بمعنى إن اللغة دي هتقل جدًا في مصر.. وبعد شويه هنبقي محتاجين ناس كتير تعلم اللغة دي لإننا بقرار ممكن ترجع محدش عارف، او لأجل ظروف كتير واللغة دي هتكون أقليه اللي محافظ عليهاومستخدمها.
” حسيت أنه ذكي ،طريقة كلامه لطيفة.. أبتسمت إبتسامه خفيفة وفضلت الصمت ..وهو كمان إلتزم الصمت لوقت وصولي البيت ”
_ بس هنا دا بيتي؟
= حمدلله على السلامه يا أنسة..
_ بتول.. بتول القاضي.. الله يسلمك..ممتنة ليك يادكتور تعبتك معايا وتعبت الجماعة أشكرهم لي بالنيابة عني للمرة التانية كلمة شكر مش هتوفي حقك.
= متقوليش كدا يا انسة بتول..مفيش شكر.. دا رقمي لو احتاجتي أي حاجة كلميني أكيد من غير اي تردد.
” أخدت الرقم، ودخلت باب العماره الساعة الواحده والنصف كنت مرعوبة لحد من الجيران يشوفني.. وقتها هيقولوا ايـه!! دخلت شقتنا بهدوء شديد لحد ما أكتشفت إنهم لسه موصلوش..شكرت ربنا وغيرت هدومي بسرعة ونمت.. كنت أول مره أنام بالراحة دي من إسبوع فات. ”
| اليوم التالي، وبألاخص الساعة السادسة مساءً|
” أول ما شوفت الساعة حسيت بغصه شديدة في قلبي، وأول ما شوفت إسم كريم بيرن زادت الغصة ومكنتش عارفة سببها، فتحت ورديت ”
= عاملة ايه يابتول؟
_ مش عارفة.. بس الأكيد إني تايهه.
= عرفتي ترجعي وحدك إمبارح.؟
_ علشان كدا انت رنيت تطمن عليا؟
= انتي اللي طلبتي مني منتعاملش كأحباب.
_ بس حتى مسج، أي حاجة..انت عارفني بغرق في شبر ميه.
= انا اصل..يعني..
_ ولايهمك.. انا عايزه أعرف قرارك.
= قراري.. هو..
” كنت حاسة في طريقته إنه قرر نبعد بس..كنت بحاول أكذب إحساسي.. كنت بقول بلاش ظلم دا بيحبك لحد ما سمعت جملة غريبة، تافهه بنقولها لما نحس إننا وصلنا أخر المطاف ”
= خلينا أصحاب يا بتول.. انا مش هكونلك الزوج اللي انتِ حباه.. ولا إنتي كمان هتكوني لي الزوجة اللي محتاجها.. أحنا من النهاردة مش مع بعض..كفاية سنتين
” ضحكت، ضحك هستيري وقفلت المكالمة وانا مش حاسة غير بمشاعري وقلبي بيتهشموا لحد مادخلت ماما الأوضة وأتكلمت ”
= بتول حبيبي عريسك جه.
_ عريسي!!.

يتبع…..

لقراءة الفصل التالي : اضغط هنا

لقراءة باقي حلقات الرواية اضغط على : (رواية شارع الحب)