رواية صوت من المجهول الفصل الخامس 5 بقلم زينب ماجد

رواية صوت من المجهول الفصل الخامس 5 بقلم زينب ماجد

رواية صوت من المجهول البارت الخامس

رواية صوت من المجهول الجزء الخامس

رواية صوت من المجهول الحلقة الخامسة

حجيت بسرعة : لا لا ما اريده دا اكل كباب
هز راسه : اكلي ابويه بالعافية.
يا يمة فد انحرجت من سوا هالحركة
يعني يشوف ومنتبه !! ربي شكد فشله هسه شيكول ما شايفة ما ماكلة
احتريت متت حر من الخجل . كمت افكر بعيني وامسح بكصتي
حجت امه بسالفة المهر حاطي ١٥ ب١٥
امي كالت : هاهية يمعودة هي شكليات
امه : لا مو اكو ناس تكول امن مستقبل بتي واحط المهر غالي حتى ما يطلك
– هذا اليحط المهر غالي رايد يتاجر ابناته خاطر يوم يومين اذا شاف الوضع ما يعجبه يطلكها ويصيح اطونا الغايب عمي ناس ما تخاف الله كامت تسوي كلشي في سبيل تحصل فلوس
امه : اي والله لاعب حلكج الوادم تغيرت ومعدنها زنجر
جان الرسول يكلو من ترضون دينه وخلقه زوجوه هسه لا لا مهم الدين ولا الاخلاق الزين جيبه زوجوه
– اي والله الناس
بقن يحجن سوالف عادية هو مركز بماعونه ياكل بدون كلام
حجيت اني : من رخصة ماما وخالة
باوعتلي امي .. هو حط الخاشوكة على جنب وجر اكلنكس سوا نفسه يمسح بأيده وبحلكه حجيت : اني ما اريد بالعقد مالتي ينحط رقم فلوس
امه : اخوتج خلوا ١٥ ما كالولج على سالفة المهر
-مجابوا هالطاري كدامي اول مرة اسمع بيه
هو حاط اديناته اثنينهم ع الطاوله وداير وجهه للمطعم يباوع ، كتلها : ما احب اتقيم بسعر ويحطون على عقد سعرها ١٥ ما احب هيج
امي : ما يكتبون سعرها يكتبون مهرها
– نفس المعنى باختلاف الصيغة .. اني رايدة المهر يكون قرأن كتاب الله ما يتثمن ولا الانسان يتثمن لهذا اريد المهر قرأن .
باوعت امه بوجه امي : هاي بعد بكيفكم يمكم
هو ما نطق بس جر اكلينكس يمسح بكصته
ما اعرف ليش ساكت ما ينطق ولا يباوع .. هسه عرفت عنده عيون سريه بجسمه تباوع وتشوف من غير عيونه بس يشارك ينطق … ما ادري يمكن طبعه
رفع ايده صاح الويتر اجا يمه كاله : امرني خالي
– ما يامر عليك ظالم الله لا يصغرك ان ساءالله استكان جاي اذا ما بيها زحمة
واندار : منو يشرب جاي
امه وامي رادت .. باوعلي بوجهي بس مو احسه باوع احس قشعريرة كلها سرت بجسمي فد ارتاحيت .. امي كالتله : تشرب
كملنا اكل .. بس اني وامي مأكلنا من الكباب هواية امي شيش واني نص شيش بقى منه هواي والكص لكمتين منه .. اجا الويتر ديلم حجه هو : الكباب والكص شيله سفري اذا ما تصير زحمة
تكملون غداكم بالبيت
حجت امي : يا يمه خير ونعمة طيب وشبعنا الله يزيد ويبارك برزقك
– الله يبارك بيج يمه
تنظفت الطاولة كلها وحطولنا الجاي
حجت امي : وين واصل بدراستك خالة ؟
حجت امه : مهندس نفط
حجه هو : جنت منعين بوزارة النفط وادرس ماجستير بس من السيد نطى الفتوى ذبيت استقالة وعفت الماجستير والتحقت ويا الوالد بالساتر
– يا خالة حرامات لو مكمل
– والله هو الوالد ما رضى ومنعني استقيل بس اني بدون علمه ذبيت استقاله واشتريت ملابس عسكر ولحكته كتله خوما بس انت بويه اتحصل الشهادة واني حاير بالما جستير ابواب الجنة انفتحت وحي الله من لبى .. وهاي صارلنا ٣ سنين اني وابوي وعمامي وولد عمي .. استشهدوا من ولد عنامي اثنين .. وبعدنا احنا منتظرين الشهادة
– النصر ان شاءالله الينصركم على اعداكم والموت الهم ما يوصلكم
-الله يحفظج
هو يحجي بلا شعور اباوعه وسارحه بتفاصيله
اكو شي غير ثكله وهيبته وشخصيته جذبني .. شي اني احبه من اعماقي
هو ايمانه وجهاده .. هيج كلبي اتمنى تمنيت انسان من الله يؤمن باللي اني أومن بيه .. ولكيته عايف النفط والشهادة كلها علمود يصير يجاهد ويستشهد ويتقرب من الله بصفة شهيد .. ياربي انغرمت
دنك هو ع الجاي مالته يشرب
بس انزسمت بملامحه ابتسامة خفيفة عرفت انتبه اني طولت الصفنة بيه
فزيت وانداريت كتلها : ماما يصير اروح من الحمام
– روحي
كمت ، وهو كام وياي وحجه : من رخصتكم ادفع الحساب وارجع
اريد امشي اتكتر هو واشرلي بايده ليكدام علمود افوت
مشيت وهو مشى وراي .. حجه : حمام النساء ع اليمين
خالي بلا زحمة بس الحساب الله لا يصغرك
يربي لا يحجي ويايا لا يباوعني بس اسلوبه ما ادري ليش ثولني
احس مدا اعرف طريقي ما اندل عقلي وين وراسي وين احس كل واحد بصفحة .. انضربت اباب الحمام ما شفته ولا انتبهت مسدود فتحت وفتت .. اباوع بالمرايا وجهي احمر وعركانة .. نزعت عباتي علكتها وفتحت حجابي وغسلت وجهي .. اباوع بالمرايا .. احس كلبي يدك حيل
ما اعرف خوف ارتباك خجل .. اول مرة يدك باب كلبي رجال
لا بعمري انعجبت ولا فد يومن صارت عندي عواطف اتجاه احد
الديصير ويايا كلش غريب حسيته
شعور مدا اعرف شلون اوصفه
هو فرح اي .. فرحانة بس مرتبكة حيل وخجلانة
اريد ارجع اطلعه اشوفه واكابله بس بنفس الوكت اخجل اطلع ويشوفني واخجل اكعد كباله .. مدا اعرف اتحكم بتفاصيلي .. احس عقلي كام يخربط .. شعور متضارب ما اعرف ينوصف ..
بس شعور حسسني اني املك الدنيا ..
طلعت من الحمام هو واكف يم الكاشير ومنتجي وحاط ايده على عيونه يحك وجهه والجكارة بيده يدخن .. من مشيت نزل ايده شافني
اخذ نفس طويل من الجمارة وطفاها بالنفاضة اللي يم الكاشير
اني اتعديته ومشيت
هو مشى وراي .. كعدت بمكاني
ورجع هو كعد .. حجه : عدكم بعد شي محتاجين شي ؟
حجت امي : لا خالة بعد ما نحتاج
– اليوم شنو ؟
– ثلاثاء
– زين .. احسبوا احسابكم الجمعة هاي الخطبة
حجت امه : وين نلحك نعزم وين نلحك نجهز ؟
– تلحكون إن شاءالله اذا كثفتوا الشغل والهمة تلحكون لإن الاسبوع الوراه عندي واجب بالحويجة يمكن ابقى ١٥ يوم ما انزل .. فرايد افض الخطبة هاليومين
حجت امي : على بركة الله ترجع بالسلامة .. ما عدنا شي ان شاءالله
امه : الله كريم
باوع عليهم : هاهية ؟
اني وامه : هاهية يلا
كمنا من الطاولة ، حجه : اكلكم لا تنسوه
باوعت العلاكة السفري حاطيها ع الطاولة
خجلت امد ايدي واخذها اخذتها امي ومشت
بقينا نمشي بشارع الإمام ، وكفت امي : بس اخذ العاب من ذني امهات الالف جهال حميد يتلكوني عمت عيني ما احب اطبلهم فارغة
حجه : على راحتج يمه
وكفت امه هم تشتري لجهال بتها ..
اني بقيت واكفة .. هو طلع جكارة وورث ..
وجهازة صامت ما بطل يرن وهو كل شوين من اجينا لهسه يباوع ويتجاهل
بس هسه رد .. كال : ان شاءالله جاي .. ماشي
اجي ويصير خير
قفل التليفون .. صدت عينه بيه
واندار مشى لمحل مال حلويات ..
امي وامه خلصن شراية وهو بعده
كمل واجا مشى كدامنا وصلنا للسيارة
من صعدت هو صار وراي .. حط العلاكة بحضني وكال : ديري بالج
باوعتله مستغربة : شنو هاي العلاكة
شال اطراف عبايتي من باب السيارة عدلها وسد الباب
وصعد كدام الستيرن حجت امي : شنو هاي خالة
– حلويات للاهل
– لا خالة قصرت وراك مصاريف عرس وخطبة عليمن
– سهلة ان شاءالله
حجت امه : هو الاخذ تخم ب١٥ ضلت على هاي تكورع بعد
اندارلها : شني يمه
حجت امي : خالة الذهب غالي صدك رجعه واشتري على ذوقك التكدر عليه
– لا يمه شنو السالفة ، جبت عمري اشتغل واكد لا عدي عائلة ولا احد اصرف عليه المن مجمعهن غير لهاليوم
حجت : هاهية عشتو تجمع تعب عمرك وتذبه بهاليوم بخت النسوان
– اندارلها يمه شجاج ..
داراها اذا ما اذبه على زواجي عليمن اذب تعبي ؟
حجت امي : الظاهر ام ايوب ما راضية
حجت : لا ليش ما راضية بالعكس غير يصرف على زواجه بس هواي بعد وراه عرس ومعازيم جثيرين وغرفة ونيشان وقيامة الله
حجه : كلشي يرخص للطيبين
كوة امي جرعت امه وسكتت الوكف بعينها هو ما جاي يسكت ويرد امه
وصلنا للبيت سلمت امي عليهم ونزلنا ، بعدنا بالباب : يمه يغفران يمه لو تضلين على ضيم هيفاء اخيرلج يمه .. الاماية ما تنجرع اقلها هنا اني ادافع عنج ارد .. لو رحتي يمها وانت خرسة اتحملين واتسكتين شلوووون
– بس هو خوش ولد مبية
– لا مو خوش هو فوك الخوش لزمة كلف وشهم وكريم وكلهن خاويهن بس ييمه امه ما تنجرع راح يخلص ايامه خفارة وانت تكابلين هالبومة هاي
– الدنيا ما تكمل ويا احد ماما .. لا تتوقعين تجي كلها سليمة لابد تبقى للانسان عراقيل بالحياة يحتاج الله بيها ويبقى يدعي .. الله يحب يبقى عباده بحالة احتياج دائم لرحمته .. بس الما يريده وما يحب صوته ينطي كلشي حتى ينسى ذكر ربه .. بس ما دام اكو كدامنا عراقيل وناس صعبة معناها الله يحبنا وحاطنا باختبارات نصبر لو نجزع نطغى لو نرحم .
– هم زين الله يمه قانعة والله مهديج لو انت وحدة من خواتج لا والله يمه ما انطي معناها المعارك تصير مالها والي
نحجي واحنا ننزع العباية والحجاب بالهول
اجا احمد : ها بشروا
حجتله امي كاللها : خير ان شاءالله المهم هو زين امه مو مهم
امي : لا والله يمه اخاف اكلك امه عندي اهم منه
تركت ماما ودخلت للغرفة .. ما ضل ابالي موضوع امه
كل البالي وكلبي هو .. تفاصيله شكله ثكله رزانته تصرفاته ..
همت دخت .. ضعت ما اعرف شديصير بيه .. البارحة وين جنت كارهتم واريد بس اخلص منهم واليوم اريد بس اعجبهم .. حيل حبيته .. احس كلبي اتعلق بيه ..
دخلت امي ..
خجلت منها ما اعرف ليش احس الوجوه كلها تباوع بوجهي .. وادقق شنو احساسي راضية مقتنعة لا .. استحي ابينلهم عجبني
حجت : ها ؟
– ها ماكو شي هيج كاعدة
– ما كاعد اسالج على التسوينه اريد اعرف رايج بيه
– اي زين يعني ما ادري خوش رجال
– الله يكتب اللي بيه الخير راح انام ومن تصير صلاة المغرب كعديني
– ماشي
تركت امي وصعدت فوك السطح الجو حلو كعدت اتأمل السطح البيوت وسارحة بافكار وعقلي يجيب ويودي ويتخيل … يبووو بناله قصور من الأحلام.
ابتسمت .. ما خاب ظني بربي
رادوا يكرهوني على شخص ميناسبني ولا يمي ولا ابد ورغم احمد وطغيانة جنت مؤمنة الله اقوى من الكل وراح يدبر الأمر ويدير الأمور بما يشوفه اللصلح والافضل .. واليوم من شفته جهادي وتوجهه عقائدي وعنده العقيدة والدين فوك المصالح والماديات .. انغرمت بيه اكثر .. ربي يكول وخلقنا لكم من انفسكم ازواجا .. احس صدك خالقني من طينته .
رجعت راسي للحايط واني كاعدة بالسطح اتنفست براحة
بشخصه وشخصيته هاي اطمن ماكو احد من اخوتي لو عمامي يأذوني لو يسيروني .. لا بالعكس الشفته كلهم يتلوكوله ويردون مصلحتهم .
ارتياح كلش جبير بداخلي اتجاهه
كمت اشكر ربي واحمده ..
ثاني يوم اجن خواتي اخذتني اسيل ونوره للسوك حجزن على فستان للخطبة جان لونه فضي وبيجي فاتح .. حيل حلو .. واشترن الي اشكال الوان ملابس اككسوارات مكياج عطور .. شحاطات
وسون حملة ع البيت طلعن الزوالي كلها غسلنها وصعدنها للسطح شروها حتى علي ومرته ويانا .. سوينا اكل بالليل واتعشينا سوية وكلهم فرحانين وكلوبهم مرتاحة وملتمين حتى احمد .. اليشوفنا يكول يا هنيال خوتهم على هاللمة والكعدة الحلوة والمحنة .
يوم الخميس على اساس تروح اختي تحجزلي بصالون نعرفه ..
بس الحجية امه مخابره على امي كايلتلها: لا تروح صالون .. ابو عرب ما يقبل اتفق ويا ماكيرة تجي تسويلها التسريحة والمكياج للبيت
كالتلها امي : بعد احسن ما تطلع
كالتلها : واليوم ابو عرب يمرلكم ويوصللكم فلوس الخطبة
كالتلها : لا فلوس الخطبة علينا وانتم خطارنا عود من تصير مرته تصير عليه
– هو راح يمرلكم وانت احجي وياه اني كتله الخطبة على اهل البنية بس هو ما رضى يكول ناسنا هواي
– الله يبارك بيهم
سدته من عندها والتهينا ننظف البيت كلبناه على البطانة
ما خلينا ثريات كلوبات جديدة حتى صبغ صبغنا وورق جدران حطينا .. اخوتي انشكوا شك من الشغل .. حتى ما يتفشلون ويا الحجي ابو عرب
للمغرب هو مر ..
اني صعدت للسطح اباوعله
بس مو بسيارته اللي رحنا بيها جاية بسيارة يسموها حوثية
تارسها صناديك بيبسي وكلاصات مي .. وانطا لامي مليونين كاللها : خمسمية تنطيها يمه للبنية الراح تجيكم باجر تجهز المرة
كالتله والباقي مالت شنو : كال تحضيراتكم
ما قبلوا احمد وامي رفضوا وحلفوا ما ياخذون .. عاد رجعها .. وكاله لاحمد اتوقعوا ناسنا كلش هواي الجوارين اذا عندك معرفه وياهم خل يفتحون خطارهم للناس التجي لان شياب وناس كبار ما يصير توكف بالشارع اذا ما كفى الكراج مالكم
كاله : سهلة حجي لا تشيل هم اني اشوف الجوارين وان شاءالله ما نقصر وويا خطارك .
بقيت اباوعله من فوك .. حبيت احترام اهله اله .. وحاسبيله احساب .. انداريت انزل .. لكيت هيفاء ورايه : شني شو كاتلة روحج عليه
– مكاتلتها بس ردت اباوع
– اي مبين ما كاتلتها واضح
عفتها ونزلت .. نزلت وراي طب احمد صار كبالي هي من وراي تكله : عمي زوجها بسرعة اتلاحكلها اختك مفلفلة من سمعت باسمه اجه .. طار كلبها ركضت للسطح تباوعه
حجه : اي وشني قابل صاحبها رجال باجر يصير رجلها ومن حقها تحبه وتباوعه انت ياهو مالتج لو ضايجة لان ما اطيتها لاخوج
– يا عشتو وهي وهي تطول اخوي
– اخوج قندرة ما يصير برجل الحجي ابو عرب تكلي اخوي
حجت امي : جا اذا قندرة ما يصير عليش ردت تغصبها عليه
غلس ومشا .. هزت امي ايدها
هديل كالتلها : يمه ما طول الكلوب متصافية والله هادي اسكتي عنه الراح راح ويا ايامه .. اذا نظل نحجي بيه ما نتصافى وتضل المصايب معرة .. ماطولة الله هادي علينا وفرحان ويانا .. عوفيه
– ولج لو ما الله .. والحسين الرحت نخيته وهزيت شباجه جا هسه حاط بخوانيكها خاطر تاخذ المهلس نسيبه
– يمه هسه دسكتي وعوفي هالسالفة البنية باجر راح تتزوج
سكتتها .. بقيت اشتغل ويا اهلي واكمل بقينا لحد الساعة بالوحدة سوينا البيت مرايا دخلناه غسل وتشحيم وغيرنا بديكور صار غير شكل حتى نفسيتنا ارتاحت .. طفينا كلنا ونمنا حتى نكعد من الصبح
للصبح كعدنا على ما فضينا الريوك وخطارنا اجا من غبشة عبالهم راح نسبقهم بالسبعة الصبح نعقد ومل يحكون اجو قبل ال٨
بحيث فراشاتنا بعدنا ما لاميها
وهم ركضنا نلم ونصفت على نضدت امي
اني طبيت سبحت وتنظفت ..
اجت البنية الماكيرة .. كالت : اكدر الكي عدكم غرفة فارغة بحيث ميفوتلنا احد ؟
كالتلها امي : اصعدن فوك
صعدنا بالغرفة الفوك .. صعدت امي وياها : خالة لا هواي تاخذين من حاجبها
– خالة غير تحف شلون تظل هيج ما يصير
– لا تنظيف انظيف لا حفافة
– بس المكياج ميكعد
– لا تاخذين من ثخنه خليه هيج ونظفي الهلب المنا ومنا
– ان شاءالله خالة
– وشعرها لا تنزلينه كله .. عوفي لا تنحسد ويوكع شعرها لفي
– راح ابرمه
– ما يبين طوله
– لا ويا التسريحة يصير ويا خصرها
– زين بس لا تسرحي خليها للحنة يتسرح على طوله عود حتى اذا تنحسد تكورع ابيت رجلها مالي غرض بيها
ضحكت الماكيرة ..
حجت امي : عليج العباس خالة مو تحطين هاذ النايناينر مدري شتسمنه .. لا تحطي الها
– خالة غير عروس
– لا خالة منيلها عروس هو كطعان مهر
– اسوي الها خفيف .. ولا خفيف اريد مكياج بناتي
– خالة خليها عليه
– لا خالة تخربين وجهه
– خالة والله ما اخربه بس انزلي واني من اخلص اصيحلج تشوفيها
– المكياج وردي هادى ما اوصيج
_ بعيني
نزلت امي والماكيرا طلبت من خواتي مي دافي .. حطت رجليه بيه وكامت تشتغل اديه .. رادت تحطلي اظافر اصطناعية كتلها : بس اتوضى خاف تصير صلاة الظهر وما متوضية
– يلا
رحت توضيت وحطت ادية بجفوف كلها كريم حتى تترطب اديه رجعت سوتلي جلسة تنظيف لاقدامي بالشيفرا .. وسوت بدكير لاظافر رجلية كصصتهن ونظفتهن وسوته لون وردي فاتح كانما لون الاظفر .. وحطت وياه ابيض بالاطراف .. ما كمت اعرف رجلية .
رجعت حطتلي اظافر لاديه وقلمتهن وسوتهن مناسبات لاظافر اديه .. وتقريبا نفس رجليه هم وردي وابيض بس ستولي اشكال بالوردي حيل حلو طلع ..
وحطتني وحفتلي وجهي .. وحطتلي كريمات وتركت بشرتي ترتاح .. انوب رجعت اشتغلت مكياج وجهي .. صارت الصلاة .. قطعت رحت صليت ورجعتلها كملت مكياجي هذا كله متخليني اشوف ولا تقبل امي تدخل كالت بالمنظر النهائي تحكم
سرحت شعري ورجعت رفعته شوي .. حطت ابروش مثل الاغصان حيل حلو داير مداير راسي من ورا ونزلت شعري من جوا برمته كله برم .. دهنت جسمي ..
اندكت الباب، كالتلها هديل : ترا راح يجون بالطريق
– خلصت ما عندي شي
دهنت جسمي كله ببوطرة جوليا .. ولبستني الفستان .. والحذاء .. وفردت شعري ليكدام وورا
صاحت لامي .. خواتي ونسوان اخوتي كلهن اتراكضن .. امي شافتني لو دموعها جرن وتصيح : يا واني انطيتها .. اطاني كلبي انطي كعدتي واني اضل مفردة بلياها راسي وراس الحايط .
ما احتاروا بيه كد ما احتاروا بامي نطت من البجي
ردت ابجي بس الماكيرا كالت ممنوع .. المكياج صار على وجهج كلش حلو لتخربي ويسيل الكحل
بقيت اهفي على عيوني
نزلوني جوا رحت لغرفة هيفاء باوعت لروحي بالمرايا مو اني .. كلشي كدامي بالمرايا مو اني لو اني اصادف نفسي ما اعرفني .
كاعد اباوع كالوا : اجاو
الناس كامت تترادم .. ناس تضرب بناس .. خطارنا اتراجعوا ليورا ووسعوا مكان لاهل العريس .. دخلن نسوان بكد نسوان الفاتحة بس مزوركات
خطارنا طبوا بالمطبخ وع الدرج
الزلم الجاية بفاتحة ابويه ما شايفة هيج زلم ..
سيارات حوثية طوقوا الفرع من الشارعين وسدوه .. وانترس شارعنا كله عسكر
زلمنا الجايين ما يطلع بيهم ١٠ .. بس ما كفرا طلعوا برا الظل احمد اخوي واثنين من عمامي .. وابو عرب بنفسه ما كعد .. الكاع والتخم كله انترس زلم والكراج والبيتين البصفنا استقبالهم والشارع
صاحو : ابو عرب حجي اكعد انت العريس
كاللهم : لا حرام والله شيابنه واكفة واني اكعد ما يصير .. حجي ابو مهدي انت تعرف بحال الوالد مصيوب ومبتورة رجله من معركة بيجي اليوم انت هنا بمكان الوالد السالفة يمك من رخصت عمامي
كاله الحجي : وليدي حبيبي على راسي انت والوالد
– سالم راسك
حجه احمد : حجينا والعروس ابوها شهيد استشهد بجرف الصخر والشور والكول الك
ابتسم الحجي وكال : والله يا جماعة الواحد يحير شيكول بهيج مواقف .. والد العريس جريح حرب .. ووالد العروس شهيد حرب .. هيج عوائل تخجل شتكول بحقهم وابيش تشكرهم واتجازيهم .. بيهم وبدمهم وتضحياتهم بلدنا راح ينتصر ان شاءالله ونرجع كاعنا وخيرنا من العدو بهذا الايمان ان شاءالله احنا المنتصرين بعون الله .. كبل لا نخطب خلينا نقرا الفاتحة لشهيد هذا البيت ونتشكره من هذا المقام .. الشهيد حي عند الله
كلها قرت الفاتحة وبادور وطلبني لابو عرب من عمامي وعمامي وافقوا قروا الفاتحة وصلوا على النبي بصوت عالي ..
ما نسمع غير اشتغل الدبج والهوسات برا
زلم عينك وما تشوف على فرد دبجة بالشراع وهي وهي وهي فرعنا وكف على حيله النسوان ع السطوح .. والزلم بشارع تباوع .
شوية وكالو : جيبوا العروس للاستقبال الزلم طلعت
كتلهم عباتي
كالوا : لا يا عباية هذا البركع ونزلي على وجهج
ما قبلت الا يجيبون عباتي لان اني عهدت لربي ما اطلع كدام رجال بدون عباية .. حطين البركع ولبست فوكه العباية
واجا عمي اخذني دخلني .. امه وامي الوحيدات دخلن الباقي كلهن حبسوهن جوا ممنوع وحدة توصل لو تفتح الباب
قنفة جبيرة ام ٣ مقاعد محد كعد عليها فرغوها
كالي الحجي ابو مهدي : تعاي باباتي هنا اكعدي
اكعد ابني يم عروستك
– تفضل حجي
– مالك علاقة بيه وليدي انت اكعد جيبلولنا كراسي
ركض علي اخوي جاب ٤ كراسي مال المطبخ هو وابن عمي .. كعد عليها الشيخ وابو مهدي .. وعمي .. وعمه ابو نور
واني وابو عرب ع القنفة كل واحد بينا كاعد بطرف كاله : ادنى على عروستك
ادنى بيناتنا .. هالحجي هم يرتبون بيه وامي حطت الطشت جوا رجليه .. ونزلت عليه العباية حتى لا تبين رجليه كدام الزلم وحطت مي وامه خلت القران بحضني وفتحته على سورة النور واني لبست العباية وطلعت ادية من العباية وحطيتهم ع القران وحطت الهيل بين اصابعي …
حجه وياي السيد وكال : رددي وانت وكيلي
رددت : انت وكيلي
وبقى يردد العقد وويا ابو عرب وابو عرب يجاوبه ..
لحد ما كال على سنة الله ورسولة واهل بيته الطيبين الاطهار اعقد الزواج على مهر
حجت امي – حاضرة وغايبة كتاب الله
حجه عمه : مو اتفقنا على ١٥
– البنية ما رضت الا كتاب الله يكون مهرها
كلهم مدحوا وباركوا الزواج .. وعقدلنا الشيخ
وهلهت امه وطشت جكليت والزلم باركتله وطلعوا
طبت اخته شالت العباية والبركع من عندي .. فد استحيت الفستان دلع وصدري طالع
شلت رجليه من المي وكتلها : ماما وين اسيل خل تجيبلي شال بس اشمره على جسمي استحي
راد يكوم يطلع .. امه كالتله : وين اكعد لبس الذهب كص الكيك وين شارد
– يمه اني اكعد بنص هالنسوان صدك تحجين
اني : اسيل بس شال فدوة
امه : لا تباوعلهن دنك
انحرج حيل .. واني احس كمت اذب عرك من جسمي هلكد ما خجلت مصلخة وجسمي طالع وهو كاعد .. هستوه جان غريب .. شنو هيج فجأة اطلع كدامه .. اخزر لاسيل وهي تكلي : لا تخربين كشخة الفستان عوفي هيج
– اسيل دجيبي
حجت اخته
– ددني على خطيبج بعد رجلج صار هو ادني
ادنيت .. هو حجه : شلون ورطه هاي يا الله
والله صدك ورطة احس اريد ابجي من الخجل هو كاعد وارفع بالفستان مينرفع وهن يصيحن
جبنالك وردة اشتم بيها
– ششتم انت دسكتي يمعودة
هنوب ردوده تخجل الواحد اكثر .. يشتم شنو
وهن مستمرات جبنالك وردة اشتم بيها
كاللها يمه رحمة للعباس دجيبي الذهب خل البسه واطلع ويا الزلم ششتم جلب اني
جابوا تخم الذهب ..
امي انطتني حلقة فظة البسها اله ..
وامه انطته التخم .. اخذ الحلقة وحطها بيدي وانطاني ايده حطيت الحلقة باصبعه .
بس ارجف احساس خوف على ارتباك اانخبطت عندي حتى مغص لزمني
لبسني العقد كالت امه انداري
انداريت وجريت شعري وظهري كله طلع كدامه غمضت عيوني من المستحى
شغلن ديجي ( ول ول ول ولك ها )
صاح بيهن زمخ : نجلاء طفي الاغاني
– يمعود حفلة خل نفرح
– افرحوا بغير الاغاني طفييي
خزرها طفاه .. همزين لكيت احد مثلي ما يحب صوت الاغاني .
حطوا الكيك كالوا كصص
كصصت امه وانطته بس الشوكة خلاها بحلكي واسيل انطتني الشوكة بس مدنكة واريد احطها بحلكه .. جان يكلي : باوعي زين رحمة لابيج لا تفكسيني
باوعت بعينه هو مبتسم ضحكت وحطيت بحلكه
حجت اخت : اتنحنح يا اخي اتقرب منها احضنها خل نطك صور حلوة
– شتقرب بعد بنت الاوادم اكعد بحضنها
رفع ايده خلاها ورايا واسيل تكلي اتقربي .. اتقربت صرت بحضنه .. شعور حيل حلو .. وجوده عطره .. ما اعرف احساس بشي من التكامل كأنما جزء منك لكيته واتكاملت وياه ..
همس : هدية الخطبة تلكيها عد امي
– ماكو داعي اصلا جابوا هدايا هواية
– ميخالف ابويه الهدية هاي راح تفرحين بيها
امه نصت اله .. كاللها : الهدية
اشرت لاخته .. جابت علاكة مال هدايا كارتون
اول شي طلع جهاز اسفون كال : هذا تليفون وويا سيمكارت وحطيت رقمي بيه .. بس تحتاجين شي خابرني ..
حجت امي : الله يزيد عليك وليدي ويهنيك
طلع الهدية الثانية كال : بحيل الله وانا موجود ما يضل بنفسج شي الف مبارك عليج ..
حط الهدية بيدي
اخذ راسي باسني بكصتي .. اودعناج بخير
هو كام اني عيني شاهت وراه .. اسر كلبي قليلة
ضعت تهت ذبت ما ادري احساسي شوصفه
فتحت الهدية وجان الكى سيف الإمام علي ( لا فتى الا علي ولا سيف الا ذو الفقار )

يتبع….

لقراءة الفصل التالي : اضغط هنا

لقراءة باقي حلقات الرواية اضغط على : (رواية صوت من المجهول)