رواية صدمتي في يوم زفافي الفصل الأول 1 بقلم آلاء محمد

رواية صدمتي في يوم زفافي الفصل الأول 1 بقلم آلاء محمد

رواية صدمتي في يوم زفافي البارت الأول

رواية صدمتي في يوم زفافي الجزء الأول

رواية صدمتي في يوم زفافي الحلقة الأولى

كانت واقفه بقميص نومها الابيض باصه قدامها بصدمه .. ملامحها جامدة و مش مفهومه .. أزاي ! ازاي كل حاجة تتغير مرة واحدة كده .. ازاي اليوم الجميل ده في آخره اتقلب كده و بقي أسوأ موقف ممكن يمر بيه اي حد .. يارا بنت جميلة اوي عندها ٢٢ سنه والنهارده فرحها علي حب عمرها احمد ..
….فاقت من صدمتها علي أحمد و هو بيشدها ..
احمد بزعيق / يلا اطلعي برا .. صحيح انا اتغشيت فيكي بس لازم تعرفي ان مش انا اللي يضحك عليا يا بت فاهمه .. يلا امشي لأهلك..
…..يارا فضلت تهز رأسها بعنف / لا لا مش همشي .. انا مش هعمل كده ف أهلي و ارجعلهم ليلة فرحي ..
….احمد شدها بقوة / انا بقولك امشي مش عايزك ولا طايقك ..
…..يارا مسكت ف الباب/ ابوس ايدك يا احمد بلاش فضايح .. الناس هتقول عليا ايه .. أنا مش همشي مهما حصل ..
….احمد بصلها بقرف / صحيح معندكيش كرامه .. بس برضه مش هتقعدي هنا .. أنا مليش ذنب اشوف وشك في الرايحه و الجايه .
…..احمد شدها من شعرها و فضل ينزلها السلم بكل برود وهي بتعيط و بتصرخ و بتترجاه ميفضحهاش ..
يارا / طيب اديني فرصه بس استر نفسي ..
احمد بزعيق / انتي اللي زيك ملهاش ستره .. اللي تلبس واحد في مصيبه زي دي تبقى ما تستاهلش اي حاجه ..
يارا / احمد عشان خاطري طب احط حاجه عليا بس ..
…..احمد / ابدا والله ما يحصل انا هنزلك زي ما انتي كده عشان افضحك واخلي سيرتك على كل لسان واللي ما يشتري يتفرج عليكي ..
….نزل لشقه امه اللي كانت تحت شقته و خبط علي الباب جامد .. شوية وامه فتحت و هي مفزوعه ..
…..احمد/ يا امي خدي البت دي وخليها معاكي انا مش عايزها ..
…..والده احمد ( نجيه ) / في ايه يا احمد حصل ايه يا ابني ..
احمد / البنت دي كذابه هي واهلها وخدعوني بس علي مين .. كنتوا فاكرين انكوا دبستوني صح ..
يارا كانت منهارة و بتعيط بهستريا و جسمها بيترعش .. و نجيه مكنتش فاهمه خالص بصت ل يارا وقالت .
نجيه / حصل ايه يا يارا يا حبيبتي انتوا اتخانقتوا ولا ايه هو انتوا لحقتوا .
احمد / ياريتها خناقه الهانم كانت فكراني عيل صغير هتضحك عليه بكلمتين و هيصدقها .. انا طردتها وهي معندهاش دم ولا كرامه و مصممه تقعد ف خليها عندك وانا شهر بالكتير و هطلقها ..
يارا اول ما سمعت الكلام ده انهارت اكتر وجسمها ارتعش اكتر .. نجيه صعب عليها منظرها ف خدتها ف حضنها ..
نجيه / اسكت خالص دلوقتي واتفضل اقعد عشان اشوف في ايه وإياك اسمع صوتك لحد ما اخرج من الاوضه …
نجيه اخدت يارا و دخلتها اوضتها ..
نجيه نيمتها علي السرير / نامي يا قلبي و ارتاحي ..
حضنتها وفضلت تطبطب عليها لحد ما يارا غمضت عينها وراحت في النوم شويه و غطيتها وخرجت بره الاوضه لقيت احمد قاعد بيدخن وهو متوتر وعصبي ..
نجيه / انا ممكن اعرف انت ايه اللي انت عملته ده .. في ايه لكل المشكلة دي ..
احمد حكالها اللي حصل ..
….نجية / يا يا ابني انا مش قادره افهم ولا استوعب ان كل اللي انت عامله ده بسبب الموضوع البسيط ده .. ده انا نفسي واقفه قدامها اهو وملاحظتش خالص ..
….احمد / بس انا بقى يهمني يا امي .. مش انا اللي ينضحك عليا ومن واحده زي دي ..
….نجيه بعدم تصديق / انا مش مصدقه ان انت ابني اللي كبرته وربيته .. انت امتى بقيت اناني كده امتى بقيت قاسي وقلبك حجر بالشكل ده ربنا يسامحك يا ابني على اللي عملته في البنت دي .. وبعدين عايز توديها لاهلها دلوقتي
انت مش عارف انهم ناس كبار ممكن يجرالهم حاجه اما يشوفوا بنتهم داخله عليهم ليله دخلتها ..
….احمد / ميهمنيش ما هما اكيد عارفين ومشاركينها كمان وتلاقي امها اللي قالتلها ما متقوليلوش .. طبعا هتلاقي فين واحد زيي وهما اصلا عالم شحاته مش لاقيه تاكل ..
….نجية / وطالما ده رايك فيها اتجوزتها لي مش هي دي اللي انت كنت هتموت وهتتجنن عليها في فتره الخطوبه .. مش هي دي اللي كنت بتقعد تتباهي بيها وباخلاقها وجمالها وكل خروجة تاخدها معاك .. دلوقتي كل ده راح فين ..
….. احمد / مكنتش اعرف انها هتستغفلني وتفتكرني عيل برياله عموما هي عندك خليها انا مش طايقها ومش عايزها وزي ما قلت شهر وهطلقها ..
….احمد ساب والدته مصدومه من كلامه و طلع لشقته .. مكنتش مصدقه انها ربت بني آدم سطحي و جاهل بالشكل ده بالرغم انه في منصب مهم و محترم اوي ..
اما في الاوضه كانت يارا مفتحه عينيها وسامعه الكلام ده وهي بتعيط بس كانت بتصبر نفسها ان احمد متعصب شويه عشان اتفاجيء وشوية و هيتفهم الموقف و يجي يصالحها .. افتكرت قد ايه كان حنين ولطيف معاها ايام الخطوبه ..
فلاش ..
كانت قاعده مع اهلها في شقتهم البسيطه في الصاله واحمد وامه واخواته قاعدين ..
…نجيه/ احنا طبعا جايين على سمعتكم الطيبه وطالبين بنتكم يارا لابني احمد ..
…. والده يارا بتعب / ده احنا يشرفنا يا ست ام احمد ده انتي مجيتك هنا على عيني وعلى راسي ربنا يعلم انا بحبك ازاي ..
…نجيه / وانا كمان بحبك والله وطول عمري اقول ان يارا احسن عروسه لاحمد ابني ..
ايهاب اخو يارا / وانت بقي يا احمد عندك كام سنه ..
احمد بابتسامه / انا عندي ٢٥ سنه ..
سلوي مرات إيهاب بضيق / ايه 25 سنه انت عايز تفهمني انك في المنصب الكبير ده و حالتك المادية كويسه زي ما سمعنا وعندك 25 سنه بس ..
نجيه غيرت الموضوع / انا بقول نقعد كلنا في حته تانيه ونسيب العرسان يتكلموا ..
الكل قام ويارا كانت قاعده متوتره اوي وبصه في الارض ..
احمد / ما تبصيلي خلينا نتكلم .. مالك متوترة كده انا مش هاكلك علي فكرة ..
يارا بصتله بحرج / طيب في حاجه معينه حابب تعرفها عني .
احمد ابتسم / بصراحه لا انا تقريبا عارف عنك كل حاجه و واثق انك انتي البنت اللي هكون مبسوط و مرتاح معاها .. انتي بقي عايزة تعرفي حاجه عني .
يارا / بصراحه ايوه هو انت بتصلي ..
احمد / يعني اوقات واوقات بصلي اه لكن بقطع والبركه فيكي بقى تفضلي ورايا لحد ما اواظب وابقى ملتزم ..
يارا / يعني انت حابب تبقى ملتزم ..
احمد / ايوه طبعا بس انا عايز اسالك سؤال .. هو انتي لبسك كله واسع كده ..
يارا / ايوه انا بصراحه مش بحب البس حاجه ضيقه او ملفته بحب البس لبس واسع وفضفاض وكمان عشان هو ده اللي ربنا امرنا بيه ..
احمد / اممم طيب ايه رايك لو نتخطب فتره نتعرف على بعض اكتر ولو استريحنا نكتب الكتاب ونتجوز على طول ..
يارا / هصلي استخاره وابلغك ردي مع بابا ..
خلص اليوم ويارا قامت تصلي وتدعي ربنا لو احمد فيه الخير يقربه ليها فات كذا يوم وهي لسه محتاره لحد ما في يوم اتفاجئت برساله على تليفونها برقم غريب
لما فتحتها وبصت على الصوره اتاكدت انه احمد .. مردتش عليه وسابت التليفون شوية ولقيت التليفون بيرن ردت .
يارا / الو ..
احمد بضيق / معقوله كل ده موصلتيش للقرار .
يارا / احم .. مش عارفه بس بصراحه بس انت بيهمك المظاهر اوي وانا مش بحب كده ولا بعرف اتعامل مع الناس علي اساس شكلها ..
احمد / انا بيهمني المظاهر علشان انا في مكان حساس انا بشتغل مدير في وزاره السياحه .. طبيعي طبعا اهتم بالمظهر ولبسي وشكلي
علشان انا واجهه للمكان اللي انا فيه .. انما مش معنى كده اني بقيم الناس على حسب شكلها …
يارا / بس اللي سمعته عنك كان غير كده خالص ..
احمد / مش المفروض انك تحكمي عليا بالسمع .. الناس كلامهم كتير و ٩٠ في الميه بيكون غلط .. ف بلاش تفكري كده واديني فرصه .. جربي الاول يمكن اطلع كويس ونتفاهم .
يارا بارتياح / هرد عليك بكره ..
قفلت معاه المكالمه و كلمت صحبتها نوران حكتلها اللي حصل ..
نوران / بصي هو السرعه و الالحاح ده مش مطمني .. حاسه كده انه مش مريح ..
يارا بضيق / ليه بتقولي كده ده شكله لطيف ومحترم اوي عموما انا قررت اديله فرصه ..
نوران / براحتك انا مش بهاجمه انا بس بقولك اللي حاسه عشان خايفه عليكي ..
يارا بلامبالاه / طيب طيب سلام ..
يارا طنشت كلام نوران وتحذيرها و قررت انها تديله فرصه ..
وبعد اسبوعين كانوا قاعدين في البيت بيقرأوا الفاتحه وبيلبسوا الشبكه .. احمد طلع من جيبه علبه فيها خاتم شيك اوي اوي الكل اول ما شافوه انبهروا بيه ..
يارا / بس ده شكله غالي اوي يا احمد ..
احمد / الغالي للغالي يا يارا وبعدين الشبكه برده من قيمه العريس وانا قيمتي كبيره زي ما انتي عارفه ..
يارا ابتسمت / ايوه طبعا عارفه … شكرا اوي ..
احمد / العفو يا ستي .. بقولك ايه هو البنت صحبتك دي مالها عاملة كده ..
يارا / قصدك نوران .. دي صحبتي من زمان و فرحنالي والله بس هي خايفه عليا عشان كل حاجة جت بسرعه .
احمد / خايفه عليكي ليه يعني وانا هاكلك وعموما ابعدي عنها انا حاسس انها مش كويسه وبتكرهلك الخير ..
يارا / لا خالص دي طيبه اوي والله بس ..
احمد / مبستش .. لو سمحتي ابعدي عنها واقطعي علاقتك بيها وكفايه انها جت في الخطوبه اهي .. متعزميهاش بقى في فرحنا ..
يارا بهدوء / حاضر اللي تشوفه ..
كان كل اللي موجودين فرحانين اوي الا سلوى مرات اخوها .. كانت بصلها ومضيقه اوي و بتغلي من جواها ..
سلوى / بقى انتي يا بت يجيلك واحد وسيم ومرتاح اوي كده .. أنا مش عارفه ايه الناس اللي عندها كل حاجة دي .. يعني شكلك حلو و اي حد بيشوفك بيتجنن عليكي و متعلمه كويس و كمان هتتجوزي الجوازة دي .. صحيح الدنيا حظوظ ..
جه إيهاب قعد جنبها وهو مبسوط اوي .. كان باين عليه انه بيحب اخته و فرحان ليها ..
سلوى / انا مش عارفه انتم كلكم مالكم فرحانين كده ليه ..
ايهاب بصلها باستغراب / ومنفرحش ليه اختي الوحيده وربنا رزقها براجل محترم زي ده .. انا اللي مش عارف انتي متضايقه ليه .
سلوي / لا مش مضايقه بس اختك من ساعه ما جالها خطيبها ده وهي بقيه حاطه مناخيرها فوق .. ده حتي مبقتش ترد علي اختي اسماء
ايهاب / ياريت تصفي قلبك ونيتك انتي واختك يا سلوى علشان ربنا يكرمك ويكرمها .. اختي تعبت كتير و شقيت كتير و بتخدم ابويا وامي من وهي عندها ١٦ سنه .. ف ربنا بيجازيها خير علي ده ..
ايهاب ساب مراته وقام قعد مع أهله .. مكنتش بتحب سلوي ابدا و لا بتحب تشوفها فرحانه و سعيده .. فضلت مضايقه من جواها و هتنفجر من الغيظ ..
تاني يوم كانت قاعده في البيت جنب امها ..
يارا / ها يا ماما اجبلك تاكلي كمان .
والدتها بتعب / لا يا حبيبتي انا خلاص شبعت .. ربنا يكرمك يارب و يريح قلبك ..
يارا ابتسمت / انا هروح لبابا عشان معاد الدوا بتاعه .
يارا راحت لاوضه والدها ودخلت عليه ..
يارا / بابا حبيبي يلا عشان ميعاد الدوا بتاعك جه ..
والد يارا / ماشي يا حبيبتي .. يارا هو انا ممكن اطلب منك طلب …
يارا ابتسمت / انت تؤمر مش تطلب بس قولي نفسك في ايه ..
والد يارا / انا نفسي اكل مسقعه اوي …
يارا / عينيا يا حبيبي هخش اعملهالك دلوقتي والحمد لله كل مكوناتها موجوده ..
يارا قامت راحت المطبخ و بدأت تطبخ لابوها .. شوية وامها نادت عليها ..
يارا راحتلها / ايوا يا ماما .
والدة يارا / انا حاسه اني تعبانه اوي يا بنتي مش قادره اخد نفسي ..
يارا بخضه / مالك بس يا ماما اهدي كده اهدي .. طب اعمل ايه اجيبلك الدكتور ..
والده يارا / ايوه اتصلي بالدكتور انا حاسه ان انا تعبانه ..
يارا جريت بسرعه ومسكت التليفون بدموع واتصلت بالدكتور وقالتله يجي بسرعه .. فضلت قاعده جنب امها وهي ماسكه نفسها عشان متعيطش قدام امها …
يارا / متخافيش يا ماما متخافيش يا حبيبتي انتي هتبقي كويسه ..
الدكتور جه وسط قلق يارا واخوها اللي جه بسرعه اول ما كلمته ..
ايهاب / خير يا دكتور .. امي مالها ..
الدكتور/ متقلوقش يا جماعه .. هي بس تمشي علي الادويه و هتبقي كويسه ..
الدكتور مشي واخوها نزل عشان يجيب الدوا .. يارا قعدت علي الكنبة وهي منهارة .. كانت خايفه علي امها اوي لان اهلها هما نقطه ضعفها الوحيده .. شوية و جه اخوها من برا لقاها قاعده و بتعيط قعد جنبها و طبطب عليها ..
يارا بدموع / انا خوفت على ماما اوي يا ايهاب .. هي ممكن يحصلها حاجه !
ايهاب / متخافيش يا حبيبتي ماما هتبقى كويسه انا بس عايزك تجمدي كده يا يارا … وبعدين يا بنتي انت بقالك سنين معاهم المفروض خلاص كسبتي مناعه بقى من المواقف دي .
يارا / لو كنت شوفت شكل ماما كنت فهمت قصدي دي كانت تعبانه جدا .. الحمد لله انها بقيت كويسه ..
جت مرات اخوها ..
سلوى / ايهاب انت قاعد هنا وسايب طنط مستنيه الدوا ..
يارا مسحت دموعها / هاتوا يا ايهاب انا هخش اديهولها ..
ايهاب / لا خليكي انتي يا حبيبتي انا هروح اديلها الدوا واطمن عليها ..
قام ايهاب اخذ الدوا علشان يديه لامه ..
سلوى قعدت وقالت / بس غريبه خطيبك ده من ساعه ما اتخطبته يعني ما خرجكيش ولا مره .. هو بخيل ولا ايه ..
يارا / لا خالص هو عرض عليا بس انا قولتله يستني شوية .. اكون اتعرفت عليه و كده ..
سلوي / امممم بس حاسه كده انه مش بيكلمك ولا مهتم بيكي ..
يارا لسه هترد تليفونها رن وكان احمد ..
يارا ابتسمت / شوفتي اديكي بتتكلمي وهو بيتصل بالصدفه اهو انا هخش اوضتي ارد عليه البيت بيتك يا حبيبتي ..
يارا سابتها هتموت من الغيره و دخلت اوضتها و ردت ..
احمد / ازيك يا حبيبتي ..
يارا بكسوف / الحمد لله .. في حاجة ولا ايه ..
احمد/ لا بطمن عليكي وكنت عايز اعزمك بكرا علي الغدا .. اي رأيك ؟
يارا / هستاذن بابا واقولك .. بس مش هينفع نتأخر عشان بابا وماما تعبانين زي ما انت عارف ..
احمد / من عنيا يا قلبي ..
يارا قفلت و استأذنت اهلها و وافقوا .. و تاني يوم كانت قاعده معاه في مطعم شيك اوي و فخم ..
احمد/ ايه رايك في المكان ..
يارا ابتسمت / شكله شيك وغالي اوي .
احمد / المكان ده مش اي حد يدخله الناس اللي ليهم مركز هما بس اللي مسموح ليهم يبقوا هنا ..
….يارا ابتسامت و بداوا يتكلموا سوا .. كان بيتكلم معاها بكل ذوق و لطف و بيعاملها علي انها أميرة كانت حابه اسلوبه جدا لدرجة انها محستش بالوقت غير اما لقيت واحد صاحبه ومراته جايين عليهم ..
حسام / احمد .. عامل ايه يا ابني .
احمد قام من علي الكرسي / اهلا يا حسام .. انا زي الفل ايه اخبارك يا صحبي .
حسام / ماشيه .. هي دي بقي خطيبتك .
احمد ابتسم و عرفها عليهم و قعدوا معاهم و يارا اندمجت في الكلام مع سمر مرات حسام ..
حسام قرب من احمد و همسله / يا ابن اللذينة وقعت علي القمر دي فين ..
احمد / عيب عليك اخوك مبياخدش اي حاجة يعني ..
حسام / واضح .. انت عارف انهم في الشغل دلوقتي مستنيني بعد ما امشي اكلمهم واحكيلهم ايه شكل البنت اللي انت خطبتها هيتجننوا لما يعرفوا انك عرفت تاخذ واحده قمر كده ..
احمد / لا وكمان متعلمه وشاطره وبتعرف تطبخ ومحترمه .. ومكنتش مرتبطه قبل كده كمان .. يعني من الاخر اخوك نقى على الفرازه و فاز بالتورته كلها مش ناقص فيها حته ..
حسام/ محظوظ من يومك .. المهم بقي تتمسك بيها وتعجل بالجواز بسرعه كده .. انت عارف البنات بقوا بيركزوا و ممكن تشوف اي عيب فيك و تفشكل الخطوبة ف خلص بسرعه ..
احمد / هه مش انا اللي واحده تسيبني يا ابني .. خلاص انا حطتها في دماغي ومش هسيبها غير وهي مراتي ..
يارا قالت بحرج / احمد بعد اذنك محتاجة اروح عشان بابا و ماما ..
احمد / ماشي يلا …احنا هنمشي بقي يا حسام و اشوفك بكرا ف الشغل ..
مشيوا فعلا و يارا كانت مبسوطة اوي و حاسه ان احمد هيكون سندها وكل حاجة ليها في الدنيا .. كانوا ساكتين لحد ما احمد قطع الصمت ده ..
احمد / اي رأيك ف صحبي و مراته ..
يارا / بصراحه شكلهم محترمين و ذوق .. حتي مراته عزمتني علي حفلة عيد ميلاد بنتها الشهر الجاي واخدت رقمي كمان ..
احمد / طيب كويس نبقي نروح ..
احمد وصلها و روح بيته .. أما يارا طلعت لشقتها وهي مبسوطة اوي فات كذا يوم علي اليوم ده و كان احمد بيكلمها كتير في اليوم الواحد و يفضل يهزر معاها و يكلمها عن مستقبلهم .
احمد / انتي عارفه ان انا قريب اوي هترقي .
يارا / بجد .. الف مبروك ربنا يرزقك كمان و كمان .
احمد / بعد الترقيه هسافر شهر ل اليونان .. اي رأيك نتجوز و نسافر سوا وكده كده انا هناك مش هروح الشغل غير يومين بس في الأسبوع يعني ممكن نعمله شهر عسل مثلا ..
يارا / ازاي بس احنا مبقلناش اسبوعين مخطوبين .. مش هينفع طبعا وانا كمان مش هكون جبت كل حاجتي ..
احمد / يستي انا كده كده بيتي جاهز من كله .. لو عايزة بس تغيري اوضه النوم او السفرة او المطبخ نغيرهم ..
يارا بعدم ارتياح / طيب أما تترقي نشوف ..
يارا قفلت الكلام في الموضوع لأنها حست انه مستعجل اوي وده مطمنهاش خالص .. طول عمرها ماشيه بمبدأ في التأني السلامه وبتحب تفكر في كل حاجة وكل خطوة قبل ما تعملها .. لكن برضه احمد كان بيزن عليها جدا ..
وفي يوم كان قاعد في بيته مضايق و مخنوق ..
نجيه قعدت جنبه / مالك يا احمد .. مضايق ليه .
احمد / يا ماما يارا كل ما اقولها نخرج ولا نروح في حته ترفض و تقولي احنا لسه مخطوبين ومش هينفع ندخل و نخرج كتير ..
نجيه بفرحه / طب ما ده شيء كويس يا احمد بالعكس ده يخليك تتمسك بيها اكتر ومتزعلش منها لان كده هي خايفه على سمعتها عشان محدش يتكلم ولا يقول عليها اي حاجه ..
احمد / انا مقولتش حاجه بس طب ما انا عرضت عليها نكتب الكتاب عشان نعرف ندخل ونخرج براحتنا رفضت وقالتلي لسه بدري وكانها مش واثقه فيا ..
نجيه / طيب انا عايزاك بس تهدى ايه رايك بالليل نروح لابوها وامها ونتكلم معاهم وانا هقنعهم سيبلي الموضوع ده..
احمد / ياريت يا ماما علشان يارا دماغها ناشفه اوي واللي في دماغها ف دماغها وكمان كل لبسها فساتين كده وواسعه اوي بتكبرها في السن يا ماما دي بتلبس نفس مقاسك تقريبا وهي ارفع منك بكتير ولما بقولها ليه بتقولي علشان فضفاض..
نجيه ضحكت / انا طول عمري اسمع ان الراجل هو اللي يغير على خطيبته ويفضل يتخانق معاها عشان تلبس واسع اول مره اشوف واحد عايز خطيبته تلبس لبس ضيق ..
احمد / لا انا مش عايزها تلبس ضيق انا عايزها تلبس معقول مببقاش واسع اوي ولا ضيق اوي انما هي عايشه و كأنها ست كبيره يا ماما و متنسيش ان شغلي بيحتاج مظاهر و هي هتبقي معايا في كل حته يعني لازم تلبس كويس ..
نجيه / والله يا ابني البنت كده من الاول وانت المفروض عرفتها وقبلتها على كده جاي بقى متضايق لي دلوقتي وعموما زي ما قلتلك احنا نروح لاهلها ونتكلم معاهم ونقنعهم ..
جه الليل وادهم ونجيه كانوا قاعدين في بيت يارا ..
والد يارا / بس مش شايف ان بدري اوي على الموضوع ده يا ادهم يا ابني يعني انتوا بقالكم شهرين بس مخطوبين ..
ادهم / وايه المشكله بس يا عمي طالما احنا متفقين وهي مرتاحه ليا وانا مرتاح ..
والد يارا / بس يا ابني انتوا لسه في الأول برضه .. وانا مش فاهم بصراحه انت مصر كده ليه ..
احمد / يا عمي انا مصمم عشان بخرج كتير و اروح مناسبات اكتر .. وببقي عايز يارا معايا خصوصا و كل صحابي بيسالوني عليها و عشان محدش يتكلم و انا مبقاش خايف امسك ايدها او ابصلها ..
يارا بصيتله بضيق / انا مش فاهمه انت ليه عامل كده ..
احمد / ممكن بعد اذنك يا عمي اتكلم مع يارا لوحدنا ..
والد يارا / اتفضل يا ابني تقدروا تخشوا البلكونه وتتكلموا ..
احمد ويارا دخلوا البلكونه ..
احمد / انا ممكن اعرف انتي مش موافقه ليه ..
يارا / الجواب بسيط لان لسه معرفكش كويس يا احمد ..
احمد / يا ستي ما احنا هنعرف بعض كويس قدام بس ايه المشكله لما نكتب الكتاب عشان نكون على راحتنا يارا انا فعلا عايز اكون معاكي عايزه اكمل معاكي انا بحبك بجد مش كلام وخلاص …
يارا بتوتر / ماشي بس انا لسه مش فاهمه اي حاجه خالص ولسه بحاول استوعب اني بقيت مخطوبة مش جواز بقي و مسئولية ..
احمد / طب ايه رايك نستوعب سوا وافقي يا يارا وانا اوعدك مش هتندمي .. ها موافقه تبقي مراتي و حبيبتي ؟!
يارا ابتسمت بكسوف وهزت راسها بموافقه ..
باك ..
فاقد من ذكرياتها على صوت اذان الفجر قامت اتوضت وصلت وهي بتدعي ربنا يزيح الغمه دي ويهدي احمد

يتبع….

لقراءة الفصل التالي : اضغط هنا

لقراءة باقي حلقات الرواية اضغط على : (رواية صدمتي في يوم زفافي)