رواية صوت من المجهول الفصل السادس عشر 16 بقلم زينب ماجد

رواية صوت من المجهول الفصل السادس عشر 16 بقلم زينب ماجد

رواية صوت من المجهول البارت السادس عشر

رواية صوت من المجهول الجزء السادس عشر

رواية صوت من المجهول الحلقة السادسة عشر

امه اتعذرت مني وباستني
وهو يباوع .. اشرلي اكوم .. كمت من مكاني وبستها : لا خالة تمونين انت مثل امي
حجت : الله يرضى عليج بنيتي
يلا يمة مسويتلكم ذيج الدولمة الطيبة التاكلون اصابيعكم وراها
يلا انزلوا اتغدوا يلا الزعل والكدر ما يفيد واحنا بيت واحد ان شاءالله يلا
سديت اللابتوب وكمت ايوب نزل كبالي وامه وراه واني نزلت وراهم ع الدرج
كلهم ملتمين بالاستقبال يم عمي وجدر الدولمة بالسفرة .. حجه ابوه : هلا بيك بويه اكعد المشاكل ما تفيد والبنية بتنا ان شاءالله
ايوب : اني ما عندي شي بويه اني كل الرايده الصار ما ينعاد والحجي للطرفين وكلمن يعرف اغلاطه الرايد يعيش على حب الله اهلا وسهلا والما رايد حب الله يكول حتى نوضع صورة حل .. والاهم من هذا كله اني من اريد اجي للبيت رايد ارتاح مو جو كله مشاكل وكتل وضرب ومرتك وامك .. عيشيتيش هاي خو من الاول ما اتزوج وافضها على روحي
حجت امه : لا لا بتي هي والصار صار وهي هم تتعلم من غلطها ان شاءالله … ديلا يلا صارلنا ساعة نريد نكلب الجد ما نكدر كتلهم ماكو غير ايوب يكلبه .. كوم على حيلك
كام على حيله اخذ لزمات الجدر وحط خبز وصينية وكلبها
وسرى تصيح ونبأ تصفك .. وعو فرحانين واجواء عائلية .. كعدت يمه وهو يسولف وياهم ويضحكون وخواته يتشاقون وياه
كاللهم: اليوم حضروا نفسكم اخذكم للكورنيش كبل لا التحق تغيرون جو شوية
حجت امه : اي والله محتاجين طلعة عائلية نلتم بيها كلنا
حجت نجلاء : نسويلنا اكل من البيت مو اطيب واحسن ما نشتري من برا ؟
حجت عمتي : اي نسوي كباب عروك وبرياني وفاكهة وناخذ لبن وخبز وطرشي
حجت سرى : لا لا مو برياني اني اسويلكم بيتزا احسن الغدا دولمة تمن والعشا برياني ثكيل خلي بيتزا نسوي
حجه ايوب : شتحتاجون كتبولي قائمة حتى اروح اجيبها الكم واجي
– ان شاءالله
كملنا اكل وكمت لميت السفرة ورحت حطيت الجاي على نار هادئة وكعدت انظف .. وهم هوستهم بعدها بالاستقبال يخططون ويضحكون وفتحوا صفحة جديدة من الزعل
اخذ قائمة هو واجا للمطبخ ، حجه : ضجتي
عكدت حاجبي : لا ليش !؟
– ما ادري شو سكتي ما حجيتي اي شي حسيتج ضجتي
– لا هو اني هيج بالجمعات واللمات انلصم ما اعرف احجي واشارك يعني طبعي بس مو ضايجة بالعكس فرحت رجعت اجواء البيت كلها محبة والفة افضل من الزعل والاجواء المتكهربة
– اي زين لعد اذا هيج محتاجة شي اجيبلجياه وياي رايح للاسوق
– اشرب جاي وروح الدولمة شيهظمها اذا ما جاي الدهن يوكف على كلبك
صبيلي لعد
صبيتله استكان اجت امه : ايوب جيبلنا وياك حب شمس وزن بالفين
– صار يمه خادم
حجيت : خالج احسبج بالجاي مو ؟
– اي اي احسبيني الله يرضى عليج يمه
سويت الجاي ورحت يمهم صبيت للبنات ولعمي .. وكعدوا يسولفون واني بنصهم بس ما اشارك طبيعتي جامدة باللمات العائلية بس ويا خواتي انطلق
رجع ايوب جايب الغراض النحتاجهم
كمت ويا البنات سوينا العجينة مال البيتزا وسوينة كيكة جاي وعجين مال كباب .. ومقبلات مال بيتنجانية ومعكرونية .. وبقينا نشتغل بيهن لحد ما العصر خلصنا ورتبناهن بسلة وحطيناهن بسيارة ايوب .. ورحنا بدلنا .. اني اول وحدة كملت .. حتى قبل ايوب
كتله : اني كملت
– شنو ولج باتمان هستوج صعدتي
– هن بنطرون و قميص وربطة البسهن وانتهت وعباتي بيدي مكياج ما احط احط بس مرطب وجه حتى لا يصحر وجهي ..
– ما تحبين المكياج لو تستحرمين
يحجي ويلبس ببنطرونه ، جاوبت : ما اعرف من فتحت عيوني ع الدنيا امي متحط مكياج ومانعتنا نحط كأنما شي حرام فاتربينا او بالاحرى تربيت على انو ما احط .. بس اشوف خواتي يحطون قليل عادي بس اني من لبست العباية ما احب التزم بيها وبالحجاب الشرعي عن قناعة .
– يعني مو اهلج لبسوج !؟
– لا خواتي شفتهم انت كله جبب ونوره اختي حتى بدون جبة تطلع بس .. ما اعرف استحي اسولف هالامور احس الناس ما راح تفتهمني
– لا احجي اني احب استمع لافكارج حيل جاي انعجب بعقلج رغم صغيرة بس عقلج اكبر من عمرج هواي لهذا كلش احب اسمعلج واسمع لفلسفتج
– اني ما اتفلسف بس هيج اني
– كل انسان بهاي الحياة اله فلسفة خاصة بيه الناس تشوفه تافه راتبي بالنفط جان فوك ال٣ مليون ..ووضعي عال العال بيوم وليلة استقاليت وكعدت للكاع الكل كالولي غبي وما يفتهم والجهاد كفائي وما ملزم تشارك وخسرت وظفيتك .. بس محد افتهم فلسفتي اللي بيني وبين نفسي ! الإنسان اول وتاليه الموت وفرق الشهيد عن الميت فرق السما عن الكاع اني اختاريت الجهاد وطريق رب العالمين والناس تشوف طريق الفلوس والراتب العالي هو الطريق الصح
– انت سامع بالطيور على اشكالها تقع !؟ اني وانت هيج .. كلش تشبهني بهالجانب وحيل احب التزامك بعقيدتك
– كبل الحشد ما جنت هيج للامانة .. بس طريق الجهاد مو بس قواني ورباني هم التزمت بصلاتي بامور ديني بسؤلياتي .. احس بهالطريق صرت الإنسان اللي الله يريده مو نفسي تريده .
ابتسمت : سالتني عن العباية وانت جاوبت سؤالي قبل لا اني اجاوبك .. وكت اللي سالت ربي بأي صورة يحب يشوفني شفت رؤية اني بهذه الهيئة اللي كبالك بالعباءة والمعاصم والجواريب .. فالتزمت بالصورة اللي يحب يشوفني بيها
ابتسم وحجه : كلبي حيل مرتاحلج و اني حيل محظوظ بيج
– الله احسن اختيارنا لبعض وحطنا بطريق بعض وان شاءلله نسند بعض بما يرضي الله .
– ان شاءلله
كمل وكال : يلا
اخذت مفاتيح الغرفة قفلتها ، حجه : ليش تقفليها احنا كم ساعة ونرجع
– احسن
حطيت المفاتيح بجنطتي ونزلت قبله وهو وراي ينزل
لكينه خواته بعدهم ممكملين كعدنا بالهول هو يسولف ويا امه ويحجيلها على شغل الشورجة ومشاكلها واني كاعدة استمع الهم .. كملنا راح شال ابوه وحطه بالسيارة وحط الكرسي ماله بالصندوك .. واني وامه وخواته الاثنين انحصرنا حصرة ورة ما صايرة .
اخذنا لكورنيش الأعظمية فرشنا هناك وسوينا سفرة وحطينا الاكل سوالف وضحك وونسة .. كامت نجلاء كالتله : ايوب راح اخذ نبوئة انزلها للالعاب العبها شوية
طلع من جيبه ٢٥ وكاللها : هاج اخذيها ابويه
– لا عندي مشكور بس ردت اكلك
– ميخالف ابويه اخذي
حجاها وكام كاله : حجي شنو رأيك افررك شوية تغير جو البيت وهم نسولف
كال ابوه : والله بويه ما كول لا
اخذه وراح يفتر وسرى لازمة غصن وتصور بيه ايده وتاخذ وضعيات بالصور وملتهية بعالمها اندارت عليه خالتي كالت : صحيح تريدون تعزلون ؟
حجيت : ايوب كال نشيل حتى تخلص المشاكل بس اني ما ردت ما حبيت
فلغى الفكرة وكعد
– ليش ما رضيتي ؟
– لان ما اشوف طلعتنا حل ابوه مريض ومحتاجله .. وانتم محتاجيله .. البنات ما دايمات هاي اني وخواتي ٤ اتزوجنا وعفنا امي براس اخوية نرضى اخوية يعوف امي ويعزل ! البنية مكانها رجلها مو بيت اهلها والبنات يجي يوم والله يوفقهم ويشوفن طريقهن تبقين انت وعمي شنو اكوله يذبكم حتى يرضيني ! خو اني هم عندي ام الما ارضاه يجرى على امي ما ارضاه يجرى عليج .
فمو هذا الحل .. الحل اتعود عليكم وتتعودون عليه لإن لا اني عندي غير ايوب ولا انتم عدكم غيره .. فسالفة نطلع ابد مو حل نتعايش احسن ما نتكاطع .. البيت اللي يملي حب الله احسن من البيت اللي يملي ابليس بوساوسه وحقده .
صفنت بيه ، كالت : بت اصول الله يرضى عليج ، اني والله ما عندي شي وياج خو انت مثل بتي وحالج من حالهن بس انقهرت من كتل اخته وصعد فوك كابلج لا هو نزل ولا انت .
– هم حقج انت ام والام من كد عاطفتها هم تغلط وتمونين خالة اني ما شايلة بكلبي عليج كل انسان يغلط محد معصوم من الغلط .
– الله يرضى عليج ان شاءالله .
احسها ارتاحت بكلامي .. بعد ما جانت متوترة وضايجة وما تبين
من بعدها كعدنا سوالف وحب وضحك ومر اليوم وكل النفوس راضية ومرتاحة .. رجعنا بالسيارة للبيت الكل تعبان وهرول لغرفته ..
اول ما وصلت البيت اجتني الاشعارات مال الانترنت نزعت الربطة والحجاب
وايوب ديحط الموبايل : منو ديدزلج هلكد رسايل
– مو رسايل اشعارات لان ما جان اكو نت
فتحت التليفون لكيت رسايل من امي كاتبة : غفيرة باجر اول ايام البيض من شهر شعبان تصومين لو لا هاي اول سنة بعيدة عني وما تصومين وتقضين الاعمال وياي
ابتسمت .. حجه : ها الاشعارات تضحك
– لا ماما دا تذكرني باجر صوم اول ايام البيض
صدك تصوم ؟
– لا والله عندي شغل اخلصه باجر وراي التحق عكب باجر
– خلي انزل لامك اشوفه اذا تصوم
– امي تمرت على هالسوالف تكيف هسه من تكليلها
لبست ثوبي ونزلت هي نازعة عبايتها وحجابها ومتمددة من التعب كتلها : خالة باجر اول ايام البيض تصومين !؟
– يا ولج صدك راح من بالي .. صدك باجر
– اي واكو اعمال صلاة وادعية تحبين نسويهن
– ديلا بتي علوا خليني اكوم اغسل وانت جيبي الاعمال واذا تكدرين كعديني ع السحور نتسحر ونصبح صايمين ان شاءالله .
– تمام خالة بس اغسلي غسل الليلة اذا تريدين تسوين الاعمال لان لازم غسل
حجيت وصعدت اخذت ملابس وحجيت : ايوب محتاج شي راح اغسل وانزل اسوي الاعمال اني وخالتي
– لا اخذي راحتج مقبولة ان شاءالله
غسلت واخذت كتاب القران ومفاتيح الجنان ونزلت .. لكيت خالتي بعدها بالحمام .. مديت سجادتي وسجادتها .. شافتني سرى : شراح تسوون ؟
– اعمال ليلة ١٣ شعبان ايام البيض
– الاعمال صعبة لو سهلة حتى اشارك وياكم
– سوي السهل وعوفي الصعب المهم تسوين عمل لله
راحت توضت واجت وعمي هم كام يستفسر .. طلعت عمتي كعدتنا بسجاداتنا نسوي اعمال الليالي البيض … وبقينا اني وياها وعمي بمكانه نقرا قران .. من شفت عمي نعس .. كتلها : خالة خلي نطفي نكمل بالسحور عود عمي نعس خطية
– اني هم تعبت وقتي التليفون مو تنسين خاطر نكعد
– ان شاءلله
اخذت المصحف مالتي ومفاتيح الجنان وصعدت لكيت ايوب نايم
عدلت غطاه وباوعتله .. دنكت بسته براسه وجوا اذنه .. حس ومط نفسه وفتح البطانية ، صحت : لااااا اتراجع اتراجع وراي سحور ما بيه حيل بعد اسبح
ضحك وكال : ما اريد شي ام راس بس تعاي يمي شوية
تمددت يمه واني اكوله : مو هاي الشوية مالتك تخوف
حضني و حط راسه بشعري .. وكام يغفي .. جريت التلفون وقته ونمت .. لحد ما صارت ب٢ دك المنبه ..
كمت سويت سحور وكعدت خالتي .. عمي هم كعد وكال يصوم اتسحر وسرى هم رادت تصوم ونجلاء ما صامت بس كعدت على صينية السحور هيج جوعانة ومن بعدها وبقينا نقرا قران لحد ما صارت صلاة الصبح صلينا وطشينا كل واحد راح لغرفته .
اللي لاحظته بيها امه بيها مجال اكسبها كل انسان بداخله خير وشر .. اكسب رضاها واجلب الخير البداخلها احسن ما اعاديها وجونا ينملي مشاكل .. بتالي اني بعدني جديدة وما تعرفني خليها تحبني افضل مما تعاديني وتكعد تحقد وتكيد .
ثاني يوم كلت لايوب لا تنسى ترجع ع الفطور لان كلنا تقريبا صايمين
كال : لعد لا تسوون فطور اني اجيبلكم فطوركم كيلو كباب
جان اليوم كله هدوء
امه كعدت الظهر صلت ونامت والبنات نايمات وايوب بالشغل واني كاعدة اقرا .. لما العصر سوينا شوربة وحلويات لحد ما اجا ايوب نصبنا سفرة وفطرنا
ثاني يوم ايوب التحق وراح
جانت هالمرة امه احسن ويايه خصوصا صايمين وملتهين باعمال الايام البيض .. بالليل راسلتني امي كالتلي : اكو حملة دار لكربلاء احياء ١٥ شعبان ليلة ميلاد الإمام المهدي تروحين ؟
– خلي اشوف ايوب يلا اكلج
خابرته ما حصلته لليل بعد الصلاة خابرني
كتله على الروحه ويا امي : كال ماكو مشكلة روحي بس بلغي امي وابويه انطيهم خبر
نزلت ما انطيتهم خبر .. نزلت كأنما اعرض على خالتي كتلها : خالة خابرتني ماما اكو حملة دار لكربلاء احياء يوم ١٥ شعبان واجواء حلوة بعيد ميلاد الإمام ما تروحين ؟ حتى اكل لماما تسجل اسمائنا.
– والله يمه اتمنى بس عمج شلون
– شوفي نجلاء تجي يم عمو هي تسهر للصبح بلكي للصبح احنا نرجع
كيفت راحت على نجلاء توصيها على ابوها .. كالتلها : روحي بس تاخذين بنأ وياج
رضت خالتي وكالت : كلي لامج تسجل اسم نبأ ويانا
رحت خابرت امي كالت : لعد باجر الظهر انتم يمنا كون راح ادزلج احمد يجيبكم بلغت خالتي وحضرنا نفسنا للظهراجا احمد اخذنا وطلعنا لكربلاء صايمين .. امي وخالتي كعدن بصف بعض توالمن بالسوالف والحجي وجابنها حجي على ايامهن وشلون عانن ويا زلمهن وخلصن الطريق سوالف .. واني ونبأ كاعدين بالكرسي الوراهن .
لما وصلنا .. امي تريد تاخذ عشى وخالتي تكللها اني اخذ .. تالي اثنينهن جابن دجاج مشوي وربع كيلو كباب وخبز ولبن .. اخذنا كلشي ورحنا حصلنا مكان بين الحرمين كعدنا بيه سوينا اعمال وفطرنا بنفس المكان .. وزرنا واجواء احتفال بعيد الإمام تجنن تشرح الكلب
ثاني يوم اتسحرنا الفجر وصلينا ورجعنا للسيارة
ب٧ الصبح احنا وصلنا لبيتنا .
مرت هاي الايام هادئة .. خالتي مرات تصيح وتغلط وتأمر بس هذا اسلوبها ويا الكل مو بس وياي حتى ويا بناتها فعادي كلت اتحملها مثل امي واذا غلطت عليه ما راح ينقص مني شي اذا بلعتها واتحملت المهم ايامنا هدوء وماكو مشاكل .
صرفت كل جهدي على دراستي ..
شكد ما الله من عليه بهدوء ايامي شكد ما جان اكو ضغط نفسي رهيب بسبب دراستي .. انوب اجا شهر رمضان اثر بشكل اكبر دراسة وصوم .. وزني نزل حيل شعري كام يتساقط بشكل مو طبيعي .
رغم بعدنا عرسان جدد بس ايوب ينزل يلتحق ما افتهم منه شي غير ادرس وهو يطلع يشتغل ويرجع يكعد ويا اهله .. ويرجع يكعدله ساعة ع الموبايل يمي وينام .. ما شكى او كال ليش هاملتني او ليش متكعدين وياي بالعكس جان اله فضل ما انساه بهاي الايام .. جان يجيبلي الحلويات ويهيئلي جو علمود ما يشتتني بدراسيتي من يكعد يحط هيتفون ما يشغل تلفزيون .. لا يحجي لا يشوش عليه حتى من يريد شغلة يكوم بنفسه يسويها ابد لا صخرني على مي ولا على اي شي علمود لا اتشتت .
بس دخل مرة .. جان اخر ايام رمضان الصوم وقلة النوم هلكوني هلاك
والامتحانات اقتربت وما احس امتحاناتي قربت لا كأنما نهايتي موتي .. مرعوبة نفسيتي صفر شصفن احس روحي ما فاهمة ولا حافظة كلشي عقلي هلكد ما قريت احس كام ميجمع .. كابلت كتبي وكعدت ابجي من كل كلبي من التعب .
تقرب مني : هاي شبيج ليش تبجين
– والله لو اموت احسنلي اني تعبت
– كولي يا الله ابويه .. ليش كل هذا البجي
– ما دا احفظ احس عقلي وكف ما كاعد يشتغل والله
دنكت راسي ع المكتب وكمت ابجي ..
– شو كومي عوفي القراية كومي ..
– ما اكدر امتحاناتي ورا العيد
– ميخالف اتركي فترة وخلي اطلعج افررج ترتاحين كومي
جريت روحي منه ونزلت دك بجي
اريد اطلع بس ضميري يعذبني لان كومة بعد عندي قراية ..
واريد اقرا بس عقلي وكف احس جسمي كله كاعد يتيبس من كثرة التعب والضغط
رجع حرني وانطاني عباتي : بدلي بسرعة يلا
لبست ربطتي واني دموعي عشرة عشرة .. نزلت وياه .. فات للاستقبال حجه ابوه : شبيكم
وامه صاحت : شبيها غفران متعاركين
– لا والله حرام هستوني طبيت لكيتها ناطة من البجي
كاعد يحجي دخلت سرى واجت وراها نجلاء ، حجت امه : لعد عليمن كاعد تبجي ؟
– تكول تعبت من القراية
سرى : اوووي والله حقها ذكرتني بروحي
حجت امه : يا عبالنا مدري شنو .. انت هم طلعتي مثل سرى لحد ما خلصت السادس ارواحنا خلصت يومية كالبتها مناحة
– احس عقلي والله مجاي يستوعب
سرى : اي اي لان تقرين هواي هاي صارت بيه بس انطي فترة لنفسج استراحة لان عقلج تعب .. اكعدي ويانا عوفي القراية شوية
حجه ايوب : خلي اطلعها شوية تغير جو .. منو تريد تطلع وياها
سرى كالت اني ونجلاء صاحت اني
ونبا ركضت كدامنا .. صعدنا بالسيارة واخذنا لمرطبات وكلنا موطة واشترالنا حلويات وفررنا شوية احس ارتاحيت شوية تغيرت نفسيتي ويا البنات ضحكة سالفة وناس هواي واخر ليالي رمضان .
نجلاء اخذت ملابس الها ولبتها
وسرى اخذت اني اشتريت بس معاصم جديدة وربطة بيضة ستن
حجه : اخذي ملابس للعيد اشتري غيري نفسيتج
– لا ما محتاجة عندي ملابس هواية
– تحسين ارتاحيتي احسن شوية
– اي شكرا
لنص الليل ب١٢ واحنا برا كلش اتونسنا رجعنا متونسين ومرتاحين
كعدنا سوالف ما نحس الا صار السحور .. اتسحرنا ونمنا
خلص شهر رمضان بخير وعافية
واهلي يخابرون علمود اجيهم .. احسه يكرهني اليكلي تعاي لو اطلعي
اتعذب اكثر ما ارتاح .. رحت الهم نص يوم وخابرت على ايوب كتله : تعال اخذني
ورجعت للبيت لكيت محد اكو خالتي والبنات ابيت خالهم وعمي يم بيت اخوه .. كرصت بكتبي وكابلتهن اقرا .. كابلني ايوب يقرا يشرحلي رياضيات ويقرين .. بقينا لحد الليل بس يقري بيه ويختبرني .. وكفته واياي وتحمله وضعي بهذه الايام ما انساها اله .
حتى يوم امتحاني رغم جان ملتحق بس عرف اني راح اموت من الخوف .. كطع التحاقه ورجع بالليل كال : رتبت كلشي واجيت علمودج ما اريدج تروحين وحدج باجر اني اخذج
من التوتر البيه بالليل ما كدرت انام .. اتكلب وافكر وصار عندي ارق
اخذني بحضنه ونومني على ايده وكام يقرا قران لحد ما سكن كلبي وارتاحيت ونمت .. وكعدت من الصلاة بعد ما نمت
بقيت اراجع اسلامية واقرا .. اني حافظة كلشي بس احس ما حافظة شي وهذا الشعور موتني .. اباوع للنملة بالكاع شايلة ذرة مال اكل وتمشي ، حط ايده على جتفي ايوب : ها شو صافنة
– صافنة ع النملة اكول هنالها ولا عدها امتحان
ضحك : لا الوضعية ما تبشر بخير
باوعتله وابتسمت : لا اني حافظة بس ان شاءالله اجاوب
– يلا يلا سباعية انت وراح تنجحين حتى اذا صدك نجحتي وطلعتي معدل زين تعيينج بهالركبة
– عليك الله !؟
– خادم اني بس شدي حيلج وبيضي وجهنا
– الله هذا الدافع الزين ياربي بس نجحني فدووووة
ضحك وطبطب على متني ونزل لابوه واني التهيت اقرا لحد ما صارت ب٧ احس نلوت بطني ولازم اكوم ابدل .
بدلت ونزلت .. لكيت ايوب مسوي بيض وطماطة لابوه وعازلي ، من شافني لزمني وحجه بصوت ناصي : ضميتلج ريوكج اكلي لا اتطلعين بدون ريوك
– ما احس مشتهية
– ميصير عقلج ينسد اذا ما تاكلين اكلي واشربي استكان جاي علمود تصير عندج طاقة .. شغل النار جوا القوري وكام يباوع ع الباب .. كتله : شكو
– ما اريد امي تشوف .. اكعدي تريكي على ما اشغل السيارة
اكلت ع السريع واني اراجع
بعدها طلعت ركبت وياه ورحت وصلني بنفسه للمدرسة وكال : راح اخذلي فرة وارجعلج يلا شدي حيلج مودعة بالله وابو الحسن
– عليك الله ادعيلي احس عقلي فرغ من كل المعلومات
– راح ادعيلج والله بس شدي حيلج لا تخافين
دخلت واني اقرا قران وادد وخايفة وبطني تلويني لوي لحد ما دخلت القاعة وانحطت ورقة الاسئلة مال الامتحان ياربي مي بارد ونزل على كلبي الاسئلة سهلة وحافظتها وراح ارفع معدلي بهالدرس .. جاوبت ركض على كل الاسئلة وبقيت اراجع مرة ومرتين وتلاثة لحد ما اتأكدت من كلشي .. طلعت من القاعة كأنما الله خالقني من جديد فرحانة طايرة طايرة من الفرح
طلعت من المدرسة لكيته واكف ليغاد ومنتظر رحتله وجهي يضحك ابتسملي: الوجه يبشر بخير
– الاسئلة كلشششششش سهلة ايوب جاوبت حيل فرحانة ياربي
– الف الحمدلله والشكر والله بالي يمج اليكول اطلك مو مرتي عدها امتحان
ضليت اضحك وكال : اصعد يلا
– لا اليوم اني اسوق السيارة معليه
واتشاقيت وياه وكعدت كدام الستيرن جان هو يصعد ويكلي : يلا عمي اليوم انت توصلينا
– لا جذب والله اخاف
– كلمة اخاف ما احب اسمعها منج لا تخافين شي بهالدنيا واني موجود .. ويلا لزمي الستيرن عدل
– يمه
عرفي يمه وتباوعين الدواسات الجوا هاي .. هاي بانزين وهاي بريك
من تريديهاتمشي اتضغطين بانزين على كيفج ومن تريدين توكفين ادوسين ع البريك على كيييف شوية شوية تضغطين لحد ما توكف السيارة
– عود صدك اكدر ؟
– اي ليش لا تكدرين
تباوعين هاي ااحرف .. هاي الـ D تحطين عليها من تريدين تمشي .. من تريدين توكفين حطها ع N
– واذا اريد ارجع
– ع الـ R
يلا شدي نفسج وشغلي السويج تعرفين
مديت ايدي وشغلت .. اشتغلت السيارة هلكد فرحت .. حسيت مسوية انجاز بحياتي .. كال ارفعي هذا وحطي ع الدي.
نفذت الكال .. كال يلا : دوسي بانزين على كيفج
دست شو السيارة مشت .. يااااااا .. كمت اضحك وفرحانة حيل
طلعنا الفرح كله وهو لازم الاستيرن وياي ويجر وياي واني فرحانة بروحي دايسة بانزين ولازمة الاستيرن ..
بقى يعلم بيه شلون ادور الاستدارة .. وبقى فد عشر مرات خلاني اعيد بالجزرة وادور الاستدارة .. ويعلم بيه بيا سايد امشي وشلون لازم اباوع وانتبه .. وبقى مخليني ورا الستيرن بالساعتين لحد ما كال : يلا وصلينا للشارع العام وانزلي
اخذته ووصلت السيارة للشارع ونزلت واني اكوله : طلعت السياقة سهلة
– سهلة للينتبه ويركز ..
يلا بعد كل ما اجيبج اسويلج درس سياقة لحد ما تضبطيها
– ماشي
رجعنا وصلني وراح وصف السيارة وخابر على بلال وبدل ملابسه العسكرية ورجع التحق .. ثاني يوم بالليل ب١٢ هم رجع نام وللصبح وصلني جان عندي امتحان عربي هم اخذني ورحت جاوبت وورا الامتحان هم خلاني اسوق وضل يعلمني اسوق
وامتحان ورا امتحان لحد ما امتحنت اخر يوم جان عندي فيزيا الحمل الثكيل لما امتحنت نص ونص جاوبته بس رغم هذا طلعت حيييييل مرتاحة ما مصدك هاهية خلاص خلصت امتحانات كملت راح انام براحتي راح ارجع اقرا كتبي الاحبها واكل براحتي واطلع براحتي واعيش براحتي … يا سلااااام واخيرا راح اشوف الحياة
طلعت وضحكتي شاركة حلكي وهو منتظر
كتله : باررررررركلييييي
– يا الله جاوبتي
– لا بس خلصصصصصت
عكد حاجبه : صدك والله ما جاوبتي
– لا يعني نص ونص بس ما اريد اخرب فرحتي خليها على الله هسه اريد بس اعيش اشوف العالم اريد اتنفسسسسس متت
– ههههه ديلا لعد عازمج
– وين !
– مالج علاقة اصعدي
– بشرط
– عزيمة وبيها شرط ما صارت !
– اني الاسوق الطريييييق كله
– وشلون راح تندلين
انداريت لكدام الاستيرن واني احجي : انت اتدليني
صعدت وسديت الباب واشرت : يلا يلا استعجل .
ابتسم واجا صعد يمي واني دستلها واسوق اشوق وهو وياي خففي انتبهي سيارة على يمينج سيارة على يسارج .. انطي مجال للتريلة تروح .. وبقى وياي روحي منا لوفي منا لحد ما وصلنا لمطعم سيارات هواي كتله : انت صف اني اخاف
كال : لا اتجرئي لتخافين
بقى رجعي اتقدمي .. لوفي ارجعي اتقدمي لحد ما صفيتها وهذا عندي فد انجاز كلش جبير تعلمت سياقة وصرت اصف السيارة
باوعت المطعم كأنما ستايل ايطالي .. كتله : اااااالله شكد حلو
كعدنا وانطاني المنيو .. اني اختاريت بيتزا تصير الحواف مالتها محشية جبن ردتها مثل هاي التطلع بالتلفزيون وهو طلب قوزي .. نزلنا واني جنت مستمتعة كلش احس مدا اشبع هلكد ما جوعانة راحة كل ما افكر بعد ماكو قراية بودي اكل بعد .
مديت ايدي ع القوزي مالته اكلت شوية
شال اللحم مالته حطه كبالي .. كمت اكل منها شوية
وبعدين رجعت للبيتزا مالتي اكل بيها .. خلصنا .. هو اخذ السيارة ورجعنا للبيت ..
اتكتني خالتي : ها خلصتي بشري
– الحمدلله افتكيت خلصت راح اعيييش
– اي الحمدلله يعني نسويلنا حملة ع البيت نغسله
باوعتلها وعيوني مفتحة حيل : شوفوا خلي نتفق اتفاق ما اعرفكم ولا تعرفوني منا لباجر ماشي .. هذا ابنكم ما متزوج ولا عنده مرة وخلي ينام يمكن باجر نكعد ونسولف .. مع السلامة
طفرت وهو كام يضحك ويهز براسه وهي صاحت : وشلون نضل خااااايسين ! غفران
حجه هو : انطيها مجال يمه خلي تنام اليوم وترتاح بعدين عود اطلبي اني رايح للشورجة محتاجين شي ؟
طلع وهو يصيح عليه اني احجي ويا سرى
حجه : طالع محتاجة شي
– لا شوكت ترجع
– بالليل نامي انت لا تفكرين برجعتي
– ماشي ركضت صليت وشمرت روحي بنومة اهل الكهف ..
وكعدت المغرب صليت المغرب ورجعت نمت .. خطية لكيته نايم يمي مطفي كلشي ما مكعدني .. جريت ايده وحشرت روحي بيه ونمت على ايده .. تحرك هو وحضني .. بسته بخده .. بوجهه .. فتح تك عين: شبعتي نوم ام راس
– لا بس انت نعمة كلش جبيرة
حشرت راسي بصدره واني اكوله : الله لا يحرمني منك
باسني براسي وحضني ونمنا
ثاني يوم عمتي ما فوتتها لكيتها مطلعة البيت غسلنا البيت اني وياها وسرى ونجلاء من فوك ليجوا .. وخالتي حمت زايد راحت جابت تلث كيلوات لحم .. ذبت تمن اصفر ع النار وسوت عجينة البورك لل١٠ بالليل يلا عتقتنا وعود رحمتنا خابرت ايوب يجيبلنا موطة كيلو جاب وياه وكامت تحطلنا بالكبوس وناكل بعد ما اتكسرنا اتكسر من الشغل
من بعد ٣ ايام
ايوب الصبح كعدني كالي : كومي بدلي والبسي اسود باسود
– وين خير
– مالج علاقة امشي وياي وبالسيارة نحجي
والله غسلت وبدلت وطلعت وياه .. كال : خابرتلج حجي فلان علمود مشروع شغل .. حابة تشتغلين !؟
– امنيتي اشتغل بس ششتغل
– ما ادري بس الشغل مو صعب وهم يعرفوني راح يتساهلون وياج
بس حاليا لا تكولين لاحد لحد ما نتأكد
وصلنا لمكان استقبلوا ايوب بالصلاوات ورحبوا بيه وكله حجي وحجي
دخلنا المكان مثل المعهد او مدرسة اهلية .. بس ايوب راح لمكان .. واني استقبلتني مراة لابسة عباية كالت : اهلا وسهلا بيج تفضلي
مشيت وياها .. كالت : العفو منج بس التليفونات ما تدخل هنا خليها
تركت تليفوني وانطوني بطاقة .. ودخلت جوا استقبلتني مرة ثانية بس كأنما مسؤلة بكل احترام .. سالتني عن دراستي عن وضعي
كالت احنا عدنا مشروع تأهيل الطفل والمرأة لعقيدة صحيح وترسيخ المفاهيم الحقيقية لأذهانهم لإن احنا اذا نريد جيل صحيح وقويم لازم نصلح المرأة وننشئ الطفل .. الاولى هي المؤسسة والثاني هو المستقبل لازم نأسس صح حتى نحضى بمستقبل افضل
حبيت الفكر اللي هم بيه
كالتلي شنو اطلاعج تفكيرج تقرأين كتب شنو تقرأين
بقيت اسولفلها فلسفتي الخاصة كالت : انت مكانج هنا اكيد انضمنتي تشتغلين ويانا براتب ٣٥٠ الف بالشهر و٣ ايام بالاسبوع بس لمدة شهر راح نخليج تحت التجربة حتى نعرف بيا مجال تكدرين تنفعين مشروعنا .. وبعد ما يخلص الشهر اذا بينتي شطارتج بمشروعنا يزيد راتبج وكل ما تتعبين تزيد اتعابج .
كتلها : تمام
كالتلي : بس اكو لستة تعليمات !
يمنع استخدام جهاز التليفون داخل المؤسسة
يمنع استخدام الاسماء الحقيقية .. يمنع الكشف عن اسمج ومكان سكنج او اي معلومة تخصج كذلك ممنوع تسألين احد عن هذه المعلومات اتجنبي التواصل مع اي شخص موجود هنا بعد العمل .. الافضل يكون التواصل فقط ضمن اطار ساعات العمل والزي هو عادي مثل اللي انت لابسته عباية والتزام كامل بالزي الشرعي والحجاب يكون ابيض او اسود حصرنا .. وراح يكون دوامج ٤ ساعات من الساعة ١ الظهر للساعة ٤ يناسبج
كلت الها : يناسبني
– اني اعرفج زوجة الحجي ابو عرب بس ممنوع احد يعرف انت زوجة منو او اسمج منو .
– تمام
: راح تبدين حاليا .. ويا الاطفال تعليمهم شكد رب العالمين لطيف ويشوفهم ويستمع الهم بكل وقت ولازم بكلشي يريدوه يدعون الله وهو راح يستجاب ومن هالامور .. تعرفين
_ اي وكلش احب
– ممتاز كومي وياي
حجيت : هي مدرسة
– تكدرين تكولين معهد تربوي
دخلت الصف .. جانوا اكو طلاب قليلين يطلعون ١٥ هيج
واشرتلي ادخل .. وكفت سلمت عليهم ما ردوا علمتهم ان اذا احد سلم علينا لازم احنا نكوم ونكول وعليكم السلام ورحمة الله وبركاته
يلا ارجع ادخل واكول السلام ..
كلت السلام وهم ردوا بصوت عالي ووضاح
تعرفت عليهم بطريقة طفولية وعفوية اخذت اساميهم
وكفت اسألهم من هو الله .. منو يعرف من هو الله
شي صاح ربنا شي كال رب العالمين .. وبقيت اشرحلهم بشرح طفولي يفهوه الاطفال عن الله .. وعن ان هو عرشه بالسماء بس هو بكل مكان يشوفنا من احنا نايمين وكاعدين وبكلشي نسوي ومن هذا الحجي
تقريبا نص ساعة وانتهى الدرس
اثنت على ادائي ويا الاطفال .. وطلبت مني التزم بمواعيد الدوام .. علمود التزم هذوله الاطفال اللي اني درستهم
طلعت مشيت بالممر اللي ياخذ للأدارة جان مكتوبة لافتة حبيتها بيها عبارة تكول ( هيئوا ابنائكم لنصرة الإمام المهدي ) جان ايوب كاعد بالادارة سلم وطلع .. وطلعنا سوية
كال : شلون جان الوضع
– حيل حيل حبيت الشغل مثل ما اني اتمنى ومثل عقيدتي والامور اللي اؤمن بيها راح اكدر اسولفها للاطفال وراح اشرحلهم عن اعتقاداتي وفلسسفتي
– لا اكو منهج شرعي راح تلتزمين بيه وياهم
– اليوم جان تجريبي .. اني كتله للحجي صغيرة بس عقلها واعي وعدها عقيدة وايمان فطري وعدها طريقة حلوة بالشرح والاقناع وراح تفيد مشروعكم وما غلطت انت هم حبيتي الشغل
– كلش
– كالتلج على راتب ؟
– اي حاليا ٣٥٠ ويزيد بالمستقبل كالت حسب شطارتج
– احسنلج مو
لزمت ايده وكتله : اني ما اعرف شلون اشكر ربي عليك .. بيوم من الايام اني طلبت من الله بس شخص يخليني اكمل دراستي بس الله انطاني اكثر من احلامي بيك .. ما ابالغ اذا كتلك جنت بحنية ابويه وخوفه عليه .. ولو شكد ما اشكر الله على شعوري وياك ما اوفي .
ابتسم وهو يكلي : ادللي ابويه قابل انت غريبة غير مرتي واللي يفيدج يفدني واليرفعج يرفعني واللي يريحج يريحني
ابتسمت واني اباوعله ..
وشكد كلبي دعاله يحفظه ويخلي اليه وما يبعدني منه
اسعد بنية بالدنيا اللي تحظى برجال حنون يسندها ويساعدها بهالدنيا ما يكسرها .. ادري كلبه مو يمي وبعده ما نسى بس الاهتمام غلب الحب .
اتعلقت بيه بشكل مو طبيعي ..
حبيته لدرجة مستعدة اتحمله بزينه وشينه لاخر عمري ولو شيسوي وياي راح ابقى احبه وراح اتحمله واسنده.
داومت اول اسبوع ٣ ايام
اهله اول بداية ما عرفوا لما راد يلتحق كاللهم : غفران اشتغلت بمعهد تربوي عقائدي
مجلاء سمعت لو تخبلت .. تكله : اني من كتلك اريد اشتغل سويتها سودة مصخمة عليه وما ترضى وهسه تخلي مرتك تشتغل
– اول شي اني جاي انطيج اكثر من اللي ينطي الشغل لغفران .. اما الشغلة الثانية فهذا المكان اعرفه واثق بيه ناس متدينين وتربويين وليش اختاريت غفران لان المكان يناسب شكل وعقل غفران .. هاي اسأليها العباية الزامية انت تلبسين عباية !؟ غير انو يردون اليشتغل عنده قاعدة دينية ومثقف بالدين وانت ما متمعنة بالدين .. ولا لبسج عباية فما يناسج
كامت تصيح وانت تكدر تشوفلي شغل وانت تخلي بس مرتك وحارمني وانت دافني بالحياة وامه زعلت عليه لان حطني اني بهاي فرصة العمل ما حط اسم نجلا .. يكلهم ما يناسبها ما يفهمن ولا يردن .
عاد سوا اسهل شي على كلبه .. عافهن وحدة تلطخ بالثانية وصعد
واني صعدت بغرفتي ..
انكلب وجوه البيت عليه
خو من التحق .. رجعت امه لخباثتها تصيح وتنتر
ونجلاء ما تحجي وياي ولا تقربني كل ما تشوفني تكوم تنفخ بودها تاكلني
بس اتجاهل واسكت اكول فترة ويتعودون ..
وايوب وصى ابن عمه ياخذني للشغل .. وبالرجعة اني ارجع وحدي
وحيل مرتاحة بالمكان الاني بيه ناس تشبهني نفس الفكر نفس العقيدة نفس الروح الايمانية .. احس من ادخل المكان ينشرح گلبي
مرة جان ما عندي دوام .. وبعدين ما مستلمة نتائج السادس
وكاعد الصبح تقريبا جانت الساعة ٩ ونص عشرة هيج شي
حاطة الدجاجة واكصص بيها علمود اطبخها للغدا .. اندكت الباب طلعت عمتي ..
دخل ابن عم ايوب وعمتي صرخت ..على صرختها فزيت والسجينة نبتت براحة ايدي .. جريتها بسرعة بس ما اهتميتلها بكد ما ركضت اريد اعرف شبيها خالتي .. ادور على حجابي مدا الكاه .. وينه
سمعت خالتي تصيح : عمت عيني يمه … ايوب وليدي يماااااا
وادك على راسها وعمي كام يصيح ويبجي
للحظة يبست بمكاني اريد اتحرك
اريد اشيل رجلية امشي من مكاني .. سرى ركضت نجلاء نبأ
جريت وصلت ما ادير شنو هي خليتها على راسي وواكفة وراهم ونجلاء تصرخ : شبيه يمه احجي وياي شبيييه ايوب
الوحدة اللي هو بيها صارلها تعرض واثنين من اصدقائه استشهدوا وهو بالمستشفى طلقتين لايحاته
اني سمعت هيج احس سواد نزل على عيوني
لزمت راسي وكعدت واني احجي ويا ربي .. دخيلك لا
ربي لا اتوسلك لا اخذت ابويه لا تاخذ ايوب .. الهي بجاهك لا ترجع تكسرني بأيوب .. ربي دخيلك
صياح عياط بجي ما ادير عنهم
امه رادت تروح وياهم ما رضوا ياخذوها كالولها بس خل نعرف حالته وونقله لبغداد هسه بس ادعوله
ابوه كام يدك على راسه واتخربط وشالوه للمستشفى ..
وخالتي فقدت وادك على راسها ..
دمعة ما نزلت من عيوني .. بس كلبي احسه يريد ينفجر
عبرة ابلعومي ذبحتني خنكتني اريد اتنفس ما اكدر .. اريد اصرخ اريد اطلع القهرة اللي بداخلي بس مدا اكدر انطي ردة فعل غير السكوت
علي اخوي عرف بموضوع ايوب وخابر على امي
امي طاير كلبها واجتني تركض وتصيح : امدا حظج يغفران يممممه كرادة حظج يمه ما اتهنيتي برجلج ييمممممه سودة بوجهي
امي حاظنتني وتبجي وتصرخ
اباوع ادية ثوبي كله دم بس ما احس بألم
طبت اختي هديل تصرخ وتحظني وتكلي : شنو هالدم غفران شبيها ايدج
ما اجاوبها ..
اراسي روحي واني اباوع لامه تصرخ وتدك على راسها والناس التمت عليها ..
باوعت على صفحة نادية طبت وهي تصرخ : كرطت راسه البوووومه ارتاحيتو من راااااح ارتحيتووووو من راح ايووووب .. كرطتي رااااااسه الله لا ينطيج
وتريد تهد عليه تكتلني لزمتها هديل اختي دفعتها واتعاركت وياها ….

يتبع….

لقراءة الفصل التالي : اضغط هنا

لقراءة باقي حلقات الرواية اضغط على : (رواية صوت من المجهول)