رواية صوت من المجهول الفصل العشرون 20 بقلم زينب ماجد

رواية صوت من المجهول الفصل العشرون 20 بقلم زينب ماجد

رواية صوت من المجهول البارت العشرون

رواية صوت من المجهول الجزء العشرون

رواية صوت من المجهول الحلقة العشرون

اني وصلت يمها وايوب على عكازته اجا يطفر .. وامه تصيح وتصرخ
سرى تبجي وتصرخ واني كمت ابجي .. كام يصرخ ايوب على امه وسرى يساعدوه ويشيلها ..
من حلاة روحه ذب العكازات مالته ودنك عليها يريد يشيلها ..
وهو يصرخ ويكلي : علي بالسيارة بره صيحيييي روحي صيحيييي
انثولت كمت اضرب بروحي من الخبصة
ما لابسة حجاب مدري اركض اريد اجيب حجابي مدري اتراجع واطلع جريت وصلة ما ادري شنو على راسي وطلعت اركض واصيح : علي عليييي تعاااال اركض
علي اخوية بالسيارة وساد الباب شافني اصيح هيج
نزل صاح : شكو طبي جوا شنو طالعة هيج
– نجلاء انتخرت شاربة سم اركض ايوب ديشيلهااااا
ركض بسرعة وهوي كلي وينها :
طب من باب الاستقبال يركض وايوب شالها وداس على جرح عملياته ويريد يطلع بيها من باب المطبخ
رجع علي طلع من الاستقبال و ايوب كوة يشيل وينعثل بيها
اندارله علي واتلكاه وشالها وركض للسيارة وخالتي ركضت تجيب عبايتها وسرى تنطيها الحجاب
وايوب يدوس على رجله ويتجى يريد يطلع وعكازاته مو بيده
ركضت جبتله عكازاته انطيته اله كام يمشي سريع بيها وركض وراهم
عمي فرفح من الصياح وهو يريد احد يرد عليه علمود يفتهم شصار ويا اسراء … ركضتله سرى تحجي وياه .. واني كعدت بالمطبخ للكاع ابجي .. هستوني كاعدة وفزيت على هوسة احس اكو خوفة بكلبي جسمي كله دا يرجف ما مستوعب الصاير والوضع الاني بيه
كمت من مكاني صعدت فوك خابرت على بلال كتله : تجي هسه بسرعة
صاح : شكو
– لا تكول لاحد نجلاء تخربطت تعال بسرعة لهنا
– ايوب وياهم
– اي اتأذى وشالها وداس على عمليته وخايفة عليه كلش لا اتأذت عمليته
– زين زين خلي اخابر اشوفهم وينهم
اخذت التليفون ونزلت جوا سمعت صوت تليفون ايوب يدك
رحتله لكيته بلال رديت عليه : تليفون ايوب نساه خابر على علي اخوية هو الوياهم
سده مني بسرعة اسمع سرى تصرخ وتصيح : غفرااااان الحكيلي غفراااان
ركضت واشوفلك عمي صاير عصة
كلبي وكف من الخوف .. شتصرف اكعد بيه اهز بيه سرى كامت بس تصرخ .. اريده يكعد ماكو .. اريد الزم التليفون ارجع اخابر بلال ما عرفت شلون الزم التليفون وابالي لما يجي بلال يمكن عمي يموت بين ادينا .
ركضت مثل المخبلة فوك واني البس الربطة اشدها شد واجر العباية واطلع للشارع ابجي .. عرضتلي سيارة دا تفوت من الفرع وكفته وصحت : داخلة ابختك خوية رجال عمي اتخربط وما عدنا احد بالبيت
ركض وياي الرجال يطلع عمره بالاربعينات تارس
ركض من كل حيله واني ادخل واصرخ على سرى تدخل الرجال فات وشال عمي واني ادور اريد التليفون اريد اخذ فلوس انخبط راسي اخذت المحفظة مال عمي جوا راسه واخذت تليفونه وركضت ورا الرجال
حطه بالسيارة واتراكض علينا واحد من الجيران … يعرفهم
صعد وياه بسرعة من حرارة كلبه واني صعدت ويا عمي ورا .. كمت ابجي راسي انسطر ما جاي استوعب شديصير بهاليوم شنو هالصباح هذا ياربي !
اريد افتح موبايل عمي اريد اخابر ما اعرف النمط الحاطه شنو ..
اكرر اريد اجرب توقف الجهاز كمت ابجي .. بالله هسه اني طلعت ويا الرياجيل وعمي واكع وتليفوني ماكو شلون .. شسوي يربي دخيلك ساعدني
دك التليفون بيدي رديت بلال ، صاح وين انت : اني ابجي واكله : ما ادري الجيران ساعدوني وبالطريق دنودي عمو للمستشفى
يا مستشفى
انطيت التليفون للرجال جيرانه وكتله : خوية بلا زحمة عليك بس احجي ويا اخونا
اخذ منه وكام يدلي وين هم متوجهين ادك بعمي اريده يتحرك اتوسل بيه ابجي كلش ما يرد واني اباوع الطريق شوكت نوصل
.. وصلنا للمستشفى وشالوا عمي لا حس لا نفس يتراكضون بيه واني وراهم .. دخلوه للطوارى وحطوه ع السديا .. اخذوه جوه بسرعة واني والرياجسل الاثنين ظلوا واكفين يمي ..
اخذت النقاب وحطيته على وجهي وكعدت ابجي من كل كلبي المواقف هاي اكبر من طاقتي واستيعابي قوة الشدة مثل شدة وفاة ابويه هزتني هز الفرق بابوية جنت كاعدة ابيت اهلي ما اطلع بس اتفقد اخباره هنا ويا عمي وحدي وياه كلبي مات سبع موتات من الخوف
طلع الدكتور وهو يستفسر اذا الحجي متعرض لجلطة سابقا
كتله اي هو بعد ما انجرح بالساتر انضرب جلطة ما اعرف اكثر ما متأكده بس تحسن وصار يكعد ويتحرك بعدين
– الحجي تعرض لجلطة ونقلناه للعناية المشددة حالته يحتاجلها تبقى تحت الرعاية الطبية المشددة بس نحتاج نطلع على ملفه الطبي قبل لا نتخذ اي اجراء
– ما اعرف يصير ابو زوجي هسه اخابرهم يجون يتصرفون اني كلشي ما اعرف
– الافضل احد من اهل المريض
سكت واني اخذ تليفون عمي اريد اخابر واتذكر بيه رمز سري نمط ما اعرف شلون شكله الرمز .. شلون ربي ارجع للبيت لو شلون ؟
اني حافظة رقم ايوب هميت اريد اروح اطلب تليفون اخابر .. غميت روحي واتذكرت تليفون ايوب جان بالبيت!
اتذكرت حافظة رقم امي
اي اخابرها تجيني اني وحدي اخاف ما ادبرها
رحت لواحد يشتغل بالمستشفى كتله : خوية الله ينطيك ميخالف استعمل تليفونك اخابر اهلي
-اي خوية بالخدمة
طلع التليفون من جيبه وانطاني دكيت رقم امي ودك .. ردت امي : الو
– الو يمه اني غفران
صرخت : يمممه شبيه صوتت
– تعاي بسرعة اني وحدّي بالمستشفى
– شبيييج ليش بالمستشفى شصاير ويااااج
-عمي اتخربط وايوب بالمستشفى
-شصاير وياج ليش ايوب بالمستشفى بيا مستشفى انت ولج
انطيتها اسم المستشفى ودا ادليها دك التليفون بيدي بلال
سديت الخط من امي بسرعة ورديت عليه : ها بلال ؟
– وين انت
دليته دقيقة اجاني صاح : وين عمي ؟
– انضرب جلطة ونقلوه للعناية المشددة
-لا اله الا الله شصار متكليلي شصار عسى ما احد يتركم يوم لا ما يلكاكم كابين لا حول ولا قوة الا بالله العلي العظيم
كعدت ابجي وبلال يخابر ويتواصل ويا علي
حجه : ايوب متأذي عملية رجله بس لا يعيدون العملية صبرك يا علي ابن ابي طالب ما طلع يوم هاذ انتقام كلهم اتصفطوا
يروح يوجي ويدعي ويستغفر والكل تحسه بحالة هستيرية
مدري شكول عليج يا نجلاء اكو واحد يسوي هالسوايا هاي .. ربج فوكج بدال ما تدعي تستغيثين بيه تموتين نفسج وتموتين اهلج وراج
شوية ووصل احمد وامي للمكان .. كلبها رايح
تصيح : شجرالج ولج شصابج
كمتلها ملهوفة رحت لحضنها ابجي
واحمد سلم على بلال وامي تحجي : شبيه عمج رجلج وينه احجي
حجه بلال : اختنا وكعت ونقلوها للمستشفى ايوب وعلي وعمي داهل انضرب جلطة
لطمت امي هلى خدودها وصاحت : يمه ادخيلك ربي .. دخيلك ياااااعلي انولينا شنهي المصيبة هاي … زلمة ما صالة شهر من مسوي عمليتين ينجلط ابوه وتطيح اخته .. ولية انولينا يمه .. شنهاي
بقينا بالربع ساعة حجه بلال لاحمد : خوية اخذ الاهل ورجعهم للبيت .. كعدتكم هنا ما بيها فايدة
اخذنا احمد وكتله : خابرلي على علي خل افتهم شصار وياهم
خابر على علي وانطاني التليفون .. رن واني امشي
رد : الو ها احمد
– ها علي وين انتم
– ها غفران احنا بعدنا بالمستشفى ايوب تذى وجرح بطنه كام يصب دم
– دخيلك يا ربي ونجلاء ؟
– كلشي ما بيها سوولها غسل معدة وانطوها مغذي واحسن بس ايوب متأذي
– يا ربي وهسه شلونه
– باله يمكم شصار ويا عمج ؟
– انضرب جلطة
– يا علي .. لا اله الا الله وهسه شنو
– بلال ضل يمه وخابر على عمامه يجون .. وبعد ما ادري
اشرلي احمد علمود ياخذ التليفون من عندي .. وحجه : علي وين انتم الحجي شنو وضعه
ضل يحجي وياه وسده كاللها : يمه مو مال نروح للبيت خلي نطلع لابو عرب نشوفه ونوكف وياه عيب بس ماخذين بتنا وراجعين
امي : يلا جا خل نروح
مشينا للكراج صعدنا واتوجهنا للمستشفى اللي بيها ايوب
لكينا الدكتور يمه .. وهو مغمض عيونه من الالم .. حجى احمد ويا الدكتور كاله : وضع رجله اصعب من وضع بطنه لازم ما يكوم ولا يضغط عليها ابدا .. ترى تنعاد العملية من جديد وتتأذى رجله اكثر
انطانا لستة ادوية نجيبها من برا
رحت اني وامي على نجلاء خالتي لهسه ما تدري عن وضع عمي امي جفصتها وكالتلها : خيييييه شجاكم وشولاكم خييييه الزلمة انجلط والبنية طايحة والولد ماله طول
حجت عمتي : ياهو الانجلط
اندارت علي امي : خايبة بس لا دستها
حجيت : عمي اتخربط ونقلته للمستشفى
– وشصااااار بيه
– ضربته جلطة
لطمت على وجها و كامت تصيح وصاحت : انهجم بيتي يمه مصيبة وطاحت على راسي يمممممممه
وكامت من مكانها وعافت نجلاء تقربت منها : شلون صرتي ؟
هزت راسها حزنانة مجاوبت
بقيت يمها لحد ما علي اجا كال : الدكتور كال اطلعوا بعد وضع الحجي ما يحتاج مستشفى بس ندير بالنا عليه بالبيت
علي واحمد سندوا ايوب ونقلوه للمستشفى
واني وامي مشينا نجلاء .. صعدنا اني ونجلاء ويا علي وايوب ليكدام وايوب كال لاحمد : لا اتعب الحجية رجعها ابو زيد
حجه احمد : لا حجي صدك جذب وراكم نتبعكم
-رحم الله والديك خوية بس ما يحتاج والله
احمد ما رصى اندار ايوب من شاف ما بيه مجال غمز لعلي
علي نزل وشاور احمد كاله : اكو مشاكل عائلية الحجي ما يريد احد يطلع عليها اخذ امي وارجع
اني اباوع لايوب بالمرايا تعب الدنيا كلها بعيونه وعلى متونه
حجه : منو شال ابوي
-اني من اتخربط ما عرفت شسوي ركضت لبست حجابي وعباتي وطلعت للشارع وكفت رجال بسيارته وجيرانا هذا الاكرع اجا خطية هم ركض النا
صعد علي حجه ايوب : ابو ايليا رجعلنا البنات للبيت خوية وخلي نطلع للوالد
-حجي وضعك مو مال تتحرك بالعباس الدكتور كال اذا ضغطت على رجلك اكثر تنعاد العملية
-يطبها مرض علي خل اشوف الوالد وينه
حجه : موبايلج شايلته ؟
– لا بس هذا موبايل عمي ومحفظته انطيت المستمسكات لبلال ، ايوب عمامك كلهم اتوجهوا لابوك روحتك راح تأذيهم ما تشي من عدهم ارجع ارتاح وهم شيصير يبلغوك اول باول
علي : حجي كلامها صحيح الرجال بالعناية المشددة وانت يحتاجلك ترتاح اذا رحت راح تأذي نفسك بدون اي فايدة
ما حجه .. نجلاء كامت تبجي لوحدها
حس عليها ايوب حجه : تبجين خوية ؟ طفلة انت تنتحرين ما عندج عقل اذيتيني وجلطتي ابوج ليش تصرفاتج وين ودتج ووين وصلتنا مستعدة ابوي يموت بسببج ؟
ندست ايوب .. لان مهما يكن تستحي الكلام كدام علي اخوية
سكت هو ورجعنا للبيت منعنا ايوب يطلع .. ونجلاء دخلت جوا تعاركت وياها سرى وهي تكللها : لو ميتة ولا الصار بينا علمود تقلدين مسلسلاتج التركية جلطتي ابوووويه اذا مات ابوووويه اشرب من دمج والله
كمت افاكك بيناتهن
هم زين الله بهالاثناء علياء فاتت سلمت على ايوب هي ورجلها واجت تركض على صوت خواتها تفاكك وتستفسر ودمعتها بعينها على ابوها ووضع اهلها .. تهدي بسرى وتحتوي نجلاء وتواسيها .. واني كاعدة اباوعلهم حجت : غفران مي جاي لرجلي ليش كاعدة مو كاعد بالاستقبال
صفنت بيها ..
يربي كل نفر بهالبيت ينرادله كلب لوحده
ع الهبطات اللي اكلتها اليوم كله وعمي انجلط بين اديه عقل ما براسي وهي تدور جاي ومي ضيافة .. كمت من مكاني حطيت القوري ع النار وكعدت ع الطاولة دنكت راسي ابجي .. احس طاقتي خلصت كلش تعبت هبطات اليوم مكاعد اتخطاهم
سويت استكانات جاي ومي ووديتها دكيت الباب .. وحجيت : بس الجاي
فتح الباب علي مد ايده بس اخذ الجاي مني وراح
بقيت كاعدة بمكاني .. لساعة اتذكرت ايوب لا ماكل ولا شارب دواه من الصبح لحد هسه كمت طلعت كبة مفرزة من الثلاجة كليتها ورحت وديتها .. جانوا جايين اقاربهم وخواله اخذ علي وحطه على صفحة ووصيته ينطي علاجه
ورحت صعدت دخلت للحمام .. سبحت وصليت
نزلت اقاربهم وناس كومة جايين .. التهيت انضيف هذا ونكعد ويا ذيج
كمتا نمشي جثث من التعب
وهالحال استمر لحد ٥ ايام لحد ما طلعوا عمي من المستشفى بس هالمرة طلع هو والميت سوا لا ياكل لا يشرب بس صوت .. وعمتي كضت وراه خلصت على حال رجلها وظناها
ايوب كل هاي الفترة عصبي ما يتحاجى مقاطعني مقاطع سرى ونجلاء وما بوده يشوف او يحجي ويا اي واحد من عدنا حتى ويا امه مثكل بعد الموقف الصار ..
سويتله عصير برتقال طبيعي وكلت اخذه لايوب كتله تشرب
شو هذا مثكل وجهه عليه .. كتله : سويته الك
ما حجه .. كتله : اني شعليه مقاطعني ومزاعلني بيش اذيتك انت اصلا مكتلي نجلاء بيمن غلطت وليش دا تعاقبها هواية امور مبهمة براسي ودي افتهمها
– اخذي عصيرج وكومي امشي مني روحي واصلة منج لهنا
– مني اني شعليه ؟
– غفران جوزي مني وكومي
– معناها خليني اروح لاهلي ارتاح شوية خواتي ملتمات
– الناس وين وانت وين بت الاوادم طلعي مني
– اي شسوي وشبيدي حاطيني هنا روحي تعاي اني تعبت
– تعبتي مني مو تعوقت وتطحت عليييج موو
– اني كل… قاطعني
-لمي هدومج وخابري اخوج ياخذج ولا اريد اشوفج ولا تجين بعد ولا تشوفيني وجهج
– ترا ما طلعت عيشة هاي والله لو غلط لو مصايب لو روحي لاهلج ما اريدج اني والله طلعت روحي منكم كتلك اريد ارتاح يوم صالي بالشهرين مرايحة لاهلي بزعت روحي خلصت ما ضلت مصيبة وما شفتها بهالشهر هذا وشسويلكم ميصير بعيونكم
كام يصيح عفته وطلعت
كامت خالتي تصيح : ما تشوفينه رجال مريض احنا بيا حال وانت تتزعلين وتعاركين انت متستحين ؟
تركتها وصعدت
شكد دمعتي غالية وكوة تنزل بس كثر التعب الشفتة هاي الأيام جزعت روحي احس ما بقى عندي صبر اتحمل احد بيه كلشي ما رايدة بس اطلع من هالحو شوية اتنفس .
بقيت بغرفتي كاعدة ما نزلت الهم ولا خالطتهم
صاحت خالتي على خطار حتى اضيفهم سريت نفسي ما اسمع
سرى يمها ما تصخرها بحجة نفسيتها تعبانة على ابوها واني صالبتني من الصبح لليل .. كلنا تعبانين وضغطهم زاد عليه حيل
من طلعوا اسمع بخالتي تشكي لايوب تكله : سوتلها زعلة وعزلت روحها حتى تعوف الشغل على راسي هالطايحة حظ هاي احنا بيا حال وهي تتزعل
نزلت وهي تحجي وكفت كدامها ، حجت : مو اصيحلج ليش ما تنزلين طايحة الحظ تسوين روحج ما تسمعين
– خالة ما ملاحظين اسلوبكم كله غلط غلط غلط تامر مصايح مامر تكول خدم مو بشر
صاح ايوب : اكووووم افرك حلكج والله طايييييحة الحظ
دخلتله : ليش تغلط
شال العكازة وشمرها عليه : بت الاوادم من تجادلين امي اكو امسح الكاع بيج
– كل الديصير بيكم من انفسكم كرهتوني بروحي كرهت عيشتي بالدنيااااا اني لهنا وبس والله ما اتحمل ولا اكعد وعسى ما اتطلكني طلكني فلا ابقى
صعد ابجي وهو وراي يصيح ويغلط
خابرت على علي كتله : ارجعلي اريد اروح
كال : شكو ؟
– اريد اروح لاهلي وديني
-شبيج تبجين
– ما بيه شي بس تعال
لف واجاني من عرف اني متعاركة ويا ايوب عود راد يصير معدل كبالهم كام يصيح ويكلي : رجلج بيا حال وتطلعين ادب سز غصبا ما عليج وعلى راسج تتحملين رجلج وتتحملين عيالج عايفة رجلج بهالحال وتطلعين فوتي
كام يصيح عليه
اني كتله : اريد اروح لامي ارتاح
ايوب كاله : اخذها خلي تولي يم امها ترتاح اخذها
حجه علي : لا حرام والله مالها طلعة واكسر رجلها هنا بدلي واكسري الشر وطيعي رجلج لا تخليني اربيج والله صغيرة انت اريد امي ادب سز رجلج بيا حال وانت تريدين تطلعين
ايوب وعلي واكفين كتله : انت عدو مو اخو بس حتى ما تتفشل ويا الحجي مالتك ومكعدك من شغلك مكسرني ومكعدني هنا وما يهمك امري المهم مستفاد براسي
عفتهم وصعدت لغرفتي ..
روحي فرفحت من العصبية والقهر اخوي يهيني ابيت عيالي وكدام رجلي واهله يسمعون بدال ما يكلهم ميخالف عي هم تعبت وان شاءالله يوم واحد واني ارجعها بيدي يصور نفسه معدل كدامهم حتى ما يخسر شغله ويا ايوب .. ويحيني بطران يكلي ليش شجابرج تتحملين
الجابرني اخواني انذال ما تهمهم غير مصلحتهم
وما واكفين ويا ايوب لعيني ولخاطري
والله لخاطر مصلحتهم ويرتاحون براسي
كابلت سجادتي وبجيت لله بكل ضعفي واني اكوله ما عندي غيرك اشكيله البكلبي ما ردت غير بس يوم ارتاح اختنكت انهان وينغلط عليه بس لان ردت ارتاح اني تعبت ربي بس انت تفتهمني اني تعبت
سجدت ابجي بالنص ساعة لحد ما حسيت خلصت طاقتي كلش
ختمت سجدتي ونمت على صفة وبقيت نايمة على سجادتي .. ماكو اصعب من شعور الإهانة والخدلان لما تحس اهلك رمل مو حايط تنتجي عليهم وتشد ظهرك بيهم .
ثاني يوم اعتزلتهم لحد الظهر ١٢ ونص خلصت صلاتي
وكلت ما اكابلهم ولا انزل الهم .. بدلت ملابسي وعباتي ونزلت خالتي كالت : خطار جايين لا تروحين للدوام اوكفي ويا سرى خطية اتبهذلت وحدها
اتعديت كاني ما سمعت رحت للغرفة اللي بيها ايوب
باوع اني مبدلة ، حجه : وين
سحبت سويج السيارة من يم الميز البصفه حجه : شدسوين بسويج السيارة ممنوع تطلعين بيها .. احاجيج وين رايحة
– للدوام
حجيتها وسديت الباب هو كام وراي
هم زين الله السيارة واكفة بالباب ما واكفة بالكراج مال البيت صعدت شغلتها ومشيت للدوام .. وصلت بيها صفيتها ونزلت حطيت السويج والموبايل صامت بالاستعلامات .. ورحت اريد اركز بالدرس
مكدرت .. رحت للمسؤلة سولفتلها
كالتلي : خطية مدري شصار ابيت الحجي عين يا عيني وصابتكم
ارتاحي اكعدي اذا شفتي نفسج تكدرين تنطين درس كومي واذا مكدرتي .. اخذي راحتج لا اتضغطين على نفسج الحجي غالي علينا وجمايله ويانا هواية وتدللين علينا
– الله يسلمج حبيبتي
كمت منها رحت كعدت بالغرفة اللي تجتمع بيها كل البنات اليشتغلن هنا ..
جان بنفسي اكوم ارجع بس عو البيت ما ينراد ارجع وين ؟ خليني هنا اقلها المعهد بيه هدوء وراحة وطاقة روحانية تهدي نفسي
كاعدة ع القنفة واكو وحدة اسمها ( ام القاسم ) ويانا تشتغل ابتسم
وكالتلي : حيل تعبانة مبينة
كتلها : اي والله
– انطيني ايدج
لزمت ايدي من اطرافها وكامت تباوع بوجهي ..
ابتسمت كالت : احجي ؟
– شتحجين
– اذا احجي تصدكيني ؟
– مفهمت
– باعي اني ما اقرا الغيب الغيب ما يعلمه الا الله اني اني اقرا صفحتج
– صفحتي شنو
– تؤمنين بالقرين
– ما اعرف ما متمعنة بامور الجن
– لكل انسان ينولد يتوكله قرين من الجن وياه بكل لحظة من حياته يعرف كل اسراره اني اسمع منه واقرا صفحتج
– دخيلج يمعودة والله تعبانة وما بيه حيل هالسوالف ما اؤمن بيها
– ليش القران مو يذكر هالموضوع ( وقال قرينه ربنا ما اطغيته ولكنه كان في ضلال بعيد ) سورة قاف
– اعرف هاي الاية بس ما ممركزة بتفسيرها
– تعرفين الصوت اليجيج
عقدت حاجبي : اي صوت
حجت : ايوب منو
سكتت .. حجت : لتخافين والله مدا احاول اجرجرج حتى اعرف معلوماتج بس اطمنج وحتى تطمئنين اكثر راح اذكرلج اسماء بعيدة .. مثل همسة ..
– منو همسه ؟
– تعرفيها بالمدرسة تحبج
– ابتسمت
بداخلي اتذكرت مدرسة الاقتصاد ست همسة صدك تحبني
حجت : حليمة .. اسيل .. سرى تعرفين هاي الاسماء
– دوختيني
– ايوب اللي امتعبج والموقف الصار البارحة اذاج يكول شكيتيهم كلهم لرب العالمين لحد ما نمتي بين ادين رب العالمين
صفنت ..
جنت اخاف استرسل وياها خاف احد دازها ودا تريد تستدرجني وتعرف معلوماتي بس من كالتلي نمت على سجادتي بين ادين ربي انصدمت هيج معلومات محد يعرفها غيري ! شلون عرفتها
حجت وجاوبتني : كتلج قرينج هو الكاعد يحجي
– انت مخاوية جن
– لا بس اسمعهم وعندي القدرة احجي وياهم
سحبت ايدي منها : اسم الله يمعودة ترا بس الجن ناقصني بعد وتكمل ويايا
حجت : انت متعبتهم وهم متعبيج
– متعبة منو !؟
– اكو اعمال شيطانية داير مدايرج بس ما كاعد تأثر بيج اكو اية لما ابليس طلب من رب العالمين انو يسلطه على اغواء بني ادم رب العالمين استثى فئة من اغواء الشياطين ( ان عبادي ليس لك عليهم سلطان ) منو عباد الله اللي الله ما يسمح لابليس باذيتهم !
جاوبت .. الجواب بقول ابليس بالاية ( الا عبادك منهم المخلصين )
هي تحجي واني من دوختي متجية راسي ع القنفة واستمع الها
كملت : الصلاة هي اول خطوات الاخلاص لله .. لو جاء العبد يوم القيامة بمثقال المشرق والمغرب حسنات واعمال صالحة ما تقبل وهو بالنار لحد ما يأتي بصلاته واثبتها الرسول لما ذكر ( الصلاة عمود الدين ان قبلت قبل ما سواها وان ردت رد ما سواها )
– مفتهمت شدخل الصلاة بوضعي
– اللي حاميج هي صلاتج بحيث عليج كومة اعمال شيطانية لاذيتج ما كدر شيطان واحد يأذيج بسبب الصلاة .. نداء حي على الصلاة نداء الله من لبى افلح وخاب من سهى .. انت عندج الهمة على اداء صلاتج بوقتها لهذا اكو هالة او طاقة ايمانية تحيطج تمنع عنج كل شيطان ضار .. شايفة الشعور اللي تحسين بيه بعد الصلاة اللي تصليها على وقتها بالضبط
– شعور راحة وسكينة وكأنما اكتافي بلا اي حمل او هم
– هذا الشعور من الملائكة اللي حفتج بطاقتها وابتعدت منج الشياطين .. نزلت السكينة والطمئنينة عليج فحسيتي انو حمل وهم انزاح عن ظهرج .
– المطلوب مني
– الحرص على الصلاة في وقتها يمنع منج العين ويمنع منج العمل ويجلب التوفيق .. الصلاة بوقتها من اثمن العبادات عند الله لما الله ينادي عبده وعبده يكول لبيه وقتها يسهل امره وينال رضى ربه وتوفيقه .. بس تتخيلين لما اللله يدعو للصلاة ينادي حي ع الصلاة وانت مشغولة بتليفون لو بطبخة لو بحدث من مسلسل وتتجاهلين وتسهين عن نداء ربج تعرفين وقتها شيصير .. ويل للذين هم عن صلاتهم ساهون تعرفين معنى الويل ؟ يعني ربنا اشاح بوجهه عن عبده وغضب عليه وتركه عرضة للشيطاطين تغويه وتأذي كيفما شائت بالعمل والعين والحسد تعرفين شنو يعني تطلعين من رحمة الله الى ساحة ابليس واغوائه هذا بذاته هو الويل والعذاب .. لهذا سر توفيقج وهداية الجميع لتوفيقج هو التزامج بمواقيت الصلاة متى ما سهيتي وابتعدتي عن صلاتج راح تخسرين كل اللي بنيتي والله وفقج ببنائه .
رفعت حاجبي بقهر : شما ابني بيتي رمل
ابتسمت ..
حجت : انت متأذية من طاقة الجميع بالبيت بس ما راح يأثر عليج الله كافلح وساندج استمري بدربه والله ولي التوفيق
كاعد تحجي وياي دخلت المسؤلة اشرتلي
كمت على حيلي ورحتله : نعم
– الحجي ابو عرب منتظرج بالادارة خطية الضاهر ضل باله عليج اجاج وهو مريض
ابتسمت وطلعت ما تدري هو اجا حتى يكسر راسي ويرزلني
رحت للادارة هو مبتسم ويسولف ويا المسؤل وبلال يمه سلم عليه واترخصوا منه
رحت للاستعلامات اخذت تليفوني وجبت السويج
وطلعت حجه بلال : انطيني السويج
باوعت علي اخوية كاعد بالسيارة الحوثية حجه ايوب : لا انطي سويج الجمسي لعلي وانت اخذ الحوثية
واشرلي بعكازته اتوجه للسيارة
صعدت ليورا وعلي اجا حول بالسيارة الاجيت بيها وبلال اخذ الحوثية وطلع صعدوا اثنينهم كاله : حجي وين تريد
كاله : لبيت اهلك خلي تشوف الوالدة وباجر جيبها
– هاهية
حرك السيارة واتوجه لبيت اهلي صف حجه علي : يلا انزلي
درت وجهي من عدهم ما نزلت
حجه ايوب : لا تكفريني يا مرة خليني متعوذ ابليس وصابر على سوالفج
– رجعني لغرفتي
علي : باجر اوديج انزلي
ما جاوبتهم
نزل علي فتح باب السيارة وراد يجرني
جريت نفسي منه عت وكتله : وكت الكتلكم اريد اروح هنتوني وغلطتوا عليه ومقبلتوا اروح يوم ارتاح وهسه طخ ابالكم لا ما اريد
– دكومي لج وكت عنادج
كام يجر بقوة بأيدي حجه ايوب : علي مو هيج سد الباب منا الناس
سد الباب ورجع فتح الباب مالته ويحجي : لج انت ليش عنيده الواحد شيسويلج بعد وترضين انزلي
حجه ايوب : انزل صيح الوالدة خلي تاخذها
سد الباب علي
حجيت : لو مو امي لو هسه كائن من يكون يجي ما انزل
– اذا رجعتي اذيج واندمج على عنادج
– المبلل ما يخاف المطر وفر تهديداتك لغيري … حجي
– تستهزئين
طلعت امي كتله : اذا ما طلعتني من هالهوسة ومشيتني منا … قاطعني
حجه : وتهددييييين غفرااااان
فتحت امي الباب سلمت رد عليها ايوب بابتسامة وكانما ما صاير شي
رادت تنزلني حجت جرت ما نزلت ولا تحركت طك عرج الهاشمي براسي قفلت ما انزل
حجه ايوب : اصعد علي اتركوها عاندت بعد
سلم على امي وسدت الباب وتحركت السيارة وعلي يخزرني وبوده ياكلني .. وصلني لبيتهم
دخلت البيت
بالهول كاعدين كلت : السلام عليكم
وحطيت رجلي ع الدرج صعدت .. بدلت ملابسي وصليت واخذت تليفوني وصعدت للسطح .. خليت الهيتفون باذني استمع ( اتعبتني يا قلب ) بقيت استمع واحاول اهدا روحي كلش تعبت صار اكثر من شهر ما ضكت طعم الراحة وضغوطهم وافعالهم جزعتني .. ما اريد شي بس اريد ابتعد واختلي بنفسي وربي واني جوا النجوم اعد نجوم ربي نجمة نجمة حتى ابعد دماغي عن مشاكلهم .
يمكن بقيت ٤ ساعات
صعدت سرى .. كالتلي : غفران ايوب يريدج
– تمام هسه انزل
حجتها ونزلت واني صرت اردد الاستغفار ما اريد اتهور بتصرف لاخ .. يأزم الوضع بيني وبينه .. كمت سديت باب السطح ونزلت رحت لغرفتي عود اريد احط تليفوني ع الشحن وانزل لايوب .. لما دخلت الغرفة لكيت ايوب كاعد على اطراف الجرباية يريد يشيل رجليه علمود ينتجي
مشيت حطيت تليفوني ع الشحن
حجه : جيبي الكرسي وتعاي اكعدي كبالي غفران
جريته وكعدت بس ما اباوع بوجه .. كال : احجي اسمعج
باوعت بوجه: ما عندي شي احجي
– لا الحجي اليفور بداخلج صارلج يومين وتريديلج عركة عليه احجي
– مالي نفس
– شنو اللي تريدينه غفران .. تريدين تطلكين
– انت حر سوي اللي تريده
– اني دا اسالجججججج الج جاوبي مثل الاوادم
– ايوب الله يخليك كافي اختكت والإمام الحسين اختنكت
– اختنكتي منين
– منك من اهلك من اهلي من البيت من روحي منكم كلكم
نزلت دموعي بحرارة ..
مسحتها من وجهي وكمت من مكاني حجه
– ارجعي
– تعاي روحي اكعدي نامي ابقي هنا اصعدي فوك سوي جيبي هذا انتم انت معارك اهلك مقاطعني ضايج منهم اتطلع حركتك بيه اكول رجال مريض اتحمل اتحمل بس اتحمل ضيم واتحمل اهاين هواي ما اكدر .. ما طلبت منك كتلك خواتي كلهن مجتمعات اريد اروح بس يوم ارتاح هنتني وامك هانتني واخوي هاني بس لان ردت ارتاح يرم واحد مو من حقي
وكع ابني من بطني ودمي بالنازل واني اعوف فراشي واجي ليم رجليك حتى اداريك واسمع منك اسماء تنطقها وانت نايم اني ما اطيق اسمعها منك واتحملت ودست ودنكتلك وكلت مريض .. تجازيني بشنو بهاين !؟ لو بتهايم اهلك يلفقوها ويحطوها عليه وتهيني بيها ومن تعرف منو الوراه ما تحجيلي ولا تعلمني منو التهمني منو اليتصيدلي منو اللي طعني بشرفني .. مو من حقي اعرف ولا من حقي انقهر ولا من حقي ارتاح لو نطقت كلمتين ما عجبوك نهر من الرزايل تسلطه عليه
-رايدة تخلصين مني ؟
ما جاوبته ..
حجه : اذا متعبج وضعي كولي ليش تسكتين تريدين الطلاك ابويه
– سوي اللي تريده وخلصني
حجيتها وكمت من يمه .. انداريت كعدت ع الجهة الثانية مال السرير
ضل ساكت هو .. شوية وصاح : كومي ساعديني خلي اتمدد تعبتيني
باوعت جريت نفس قوي واتنهدت الله يصبرني بس
صاح : كووومي
كمت من مكاني وهو ينطيني ايده يريد يتمدد اخذتها حتى اسنده يرجع ظهره سحبني وكعدني على رجله : كافي
– عوفني رجلج تنلجم واروح ابتي
جرني : اكعد معليج فدوة الج رجلي واهلها .. كافي
حجه واني انهار ما دموع صبت .. حجه : ادري تعبتح حيل وتأذيتي بسببي هواي .. اني اعتذر منج
-ايوب كافي
اريد اكوم ميخليني : اني الكافي لو انتِ ؟ كافي بجي عمي الله لا يوفقني على هالدموع لو ميت وحق العباس اشرفلي من انزل ادموعج
كافي .. كام يمسح بوجهي ويبوس بخدي ويرجعني لجتفه يطبطب عليه
حجيت : ما ارتاح واني كاعدة على رجلك تروح تتأذى
– شرط تتمددين يمي
-ماشي
ساعدته يتمدد واني رحت انداريت وتمددت يمه رفع ايده وسحبني لصدره وحاوطني ، حجه : تتذكرين يوم الكلتيلي اني اريد اوكف وياك ع الدنيا ما اصير اني والدنيا عليك
حجيت : بعدني على وعدي بس…
-لا مو بعدج يشهد الله انت طبقتيها اني زدت بحملح عليج رغم انت صغيرة ومو كد هيج حمل بس صبرتي واستوعبتي وحملتي حتى وكت الادير وجهي عنج دواي ما تنسينه واذا اني على طولي اليوم بفضل الله وفضلج
شنو اللي تريدي مني وشنو اللي يريحج اطلبي خادم.
-ما اريد شي
-احجي
دفنت راسي بصدره ومحجيت شي باس راسي وحضني حيل
وكام يمسح على راسي لحد ما هدئت العاصفة البراسي كلها وغفيت على صدره للصبح .
فتحت عيني على صوت الاذان هو نايم
كمت لحيلي رحت صليت فرض ورجعت البطانية السبلت مشتغل الحو بارد طلعت بطانية وغطيته حسر جرها وغطه لحد ركبته اجيت اتمدد بسرعة فتحلي ايده وضمني اله !
طلعت سالفتنا البنات كلش سهلة ، عصبيتنا وعاصفتنا كلها تبرد وتروح بكلمتين يتطيب الخاطر بيهن ! ما تريد غير اهتمام واحساس من الشريك يحس بيها وبتعبها ومجرد ما يحس ويهتم كل تعبها يروح !
بليلة اهتمام وحدة مثل النقلني من الجنة للنار
محتاجة حضنه محتاجك احد يحتويني ويستوعبني صدره جان منطلق راحتي اللي نمت بيها لحد ما الشمس زال ظلها
ثاني يوم ايوب ما نزل ابد حتى من اجا خطار وامه صاحته كاللها كولي مريض ماخذ دواه ونايم وبلال يستقبل خطاره بحجة الحجي مريض
بقى يومين هو فوك حتى نفسيته ارتاحت وجعه خف واتحسن وضعه من المرض ..
بس شغلة وحدة بقى مصر عليها .. رجعة نجلاء رغم انتحرت حتى يتراجع بس ما اتراجع ولا رضى بتها نبأ تجي .. وابو نبأ بمجرد ما ايوب رفض يستلم نبأ فاتحه بموضوع رجعة امها كاله ايوب : احجي ويا اختنا واردلك جواب
كال لامه : لا عبالها نسيت ترا السوته بانتحارها زاد حقدي عليها ما شفعلها .. يا تختار بتها وترجع لرجلها يا تبقى هنا بس ممنوع تشوف بتها .
واستخدم بتها ورقة ضغط علمود يرجع نجلاء لرجلها
بس ما ردت ولا هانت بقت مصرة ما ترجع ليوسف وتطالب ببتها .
وايوب قافل وخلا هالموضوع عقابها على الشي الما ادري شنو هو لان لا حجالي ولا فتح موضوعها من اكوله ليش هيج دا تسوي بنجلاء يغشم روحه ويتجاهل السؤال .. بس اني في ما بيني وبين نفسي اعرف يخص موضوع اللابتوب لان محد يكدر غيرها .
علي اخوية زعلت منه ما احجي وياه رغم يومية يجي لبيت عيالي علمود ايوب بس ما اطلع ولا اسلم عليه .
وكمت الح على ايوب ينطيني السيارة اني اروح بيها للدوام ما اريد احد يوصلني وينتضرني .. مرة يقبل ومرة يرفض الا بلال يوصلني .
رغم اني جان بنفسي اقدم على هندسة معماري بس ايوب رادلي هندسة نفط كال : مستقبلها افضل واني اعرف ناس بحيل الله اذا تخرجتي يحطون اسمج ع النفط رواتبها زينة تكومين حتى اني ما تحتاجيني وتسندين نفسج
وصدك قدملي على كلية بيها قسم هندسة نفط بعد معاناة
وانقبلت وايوب راح وياي اول يوم وراح دفع قسم من اقساط الكلية وداومت اول يوم جامعي
جنت اباوع الجامعة بأنبهار دا احس اني دا اعانق طموحي
خطوة وخطوة كاعد احقق اللي اريده والطريق اللي ابويه رسمه اليه
داومت اول اسبوع بالتزامي بعباتي
ما شفت وحدة صاحبة عباية بجامعتنا كلهم البنات حجابات وملابس عادية واكو اللي عبالك عارضات ازياء اشكال الوان الملابس واجسادهم تجنن الصراحة حيل انعجب بيهم بس ارجع وادعي ربي ما يسلط ابليس عليه ويغويني ويزيحني عن دربه
بسوم من الايام اخذت السويج من ايوب بعد كومة تواسيل وهو يريد يخابر بلال لان بعدني ما متعودة اصف السيارة بنص ادزحام السيارات اللي بالجامعة بس اني توسلته لحد ما قبل وسلمني مفاتيح السيارة
اخذت السيارة ورحت مفتخرة بروحي .. اني كاعد احقق احلامي
اني دا ادرس واشتغل واكد على نفسي .. اني دا اصير مثل ما احب ومو مثل ما الظروف رادت تكسرني تجبرني بيه .. اني دا ارسم طريقي
مشغله بالسيارة نحن لا نهزم وماخذني شعور حيل حلو وفرحانة
وصلت للكراج مال الجامعة دا اريد الوف ادخل .. صوت يم اذني ( اتعوذي الشيطان ) بمجرد ما سمعت الصوت واني كاعد الوف صار صوت هورن كلش قوي بحيث ما ادري فزيت من الصوت اللي بأذني لو من الهورن
حطيت ايدي على صدري اعوذ بالله من الشيطان الرجيم
سلام قولا من رب رحيم .. دا اذكر بيني وبين نفسي وصوت ولد يصيح : عمييييية ما تسوفيييين
انداريت اباوع وراي .. سيارتي ما حسيتها طخت ولا دعمت احد هذا شبي !؟
نزلت واشوف واحد داعم سيارته وهو يصرخ : مو صوجن صوج الكو*** الحط بديجن سياراااااات سيارتي راحت هسه من ورا غبائج
– اخي اني شعليه قابل اني داعمتك ليش دا تغلط وتفشر عيب عليك
ساري :- دكومي اكو وحدة تلوف ما تفتح دبل اشارة
باوعت صدك ما دايسة دبل اشارة قبل لا الوف ردت اكله اعتذر وشتريد اني حاضرة جان يكول : لابسة عباية وراكبة جمسي منين جبتنها يالسريفات زلم مشوربة ما جابت سيارتج
-العفو اعرفك تعرفني وتتهمني
– دمشي امشي لج لو شريفة وام عباية صدك مو صاعدتلح سيارة مثل هاي وانت لا علم ولا فهم اشارة ما تعرفين تنطين بس مو صوجج صوج الزلم التلفي شكولج
– المصيبة لا بعباتي ولا بالسيارة اللي اني راكبتها المصيبة انت حاسب نفسك ع الزلم وتسولف بيهم
تركته ورحت ركبت سيارتي وعفت الهوسة وراي
صفيتها بالمكان وطلعت الكراج واتعديته استغفر الله ربي ابد مو وجه بشري ابد كأنما وجه شيطان ….

يتبع….

لقراءة الفصل التالي : اضغط هنا

لقراءة باقي حلقات الرواية اضغط على : (رواية صوت من المجهول)