رواية صوت من المجهول الفصل السابع والعشرون 27 بقلم زينب ماجد

رواية صوت من المجهول الفصل السابع والعشرون 27 بقلم زينب ماجد

رواية صوت من المجهول البارت السابع والعشرون

رواية صوت من المجهول الجزء السابع والعشرون

رواية صوت من المجهول الحلقة السابعة والعشرون

ايوب اشتعل نار من ضربه وبلال لازم بيه ويكله : نذل تشششششك بيه
تكاتلوا وعلي يفاكك بيناتهم جر ايوب منه ودفع بلال كاله : اطلع منا رووووح امشييي
بلال طلع وهو يلزم بحلكه ويافقد اذا اكو دم ويتحلف لايوب ويكله : سهلة
حجه علي : شسالفتك حجي شنو القصة اتشك ابلال وباختي !؟
ايوب : اختك طايحة حظ عليييي بنصاص الليالي الكاهم مستفردين وكاعدين لوحدهم ما تسأل اختك شعدها بنص الليل عايفة رجلها بفراشه وحاله بالضيم ومكابله بلال ما تستحي ؟؟؟
حجت امي : علي يمة يكمل المغذي واخذنا انا واختك لبيتنا خلوا بنيتي الما مترباية على كلبي اني اربيها
ايوب : التوكف ويا زلمة غريب بنصاص الليالي شتسميها مرباييييية
– اسمي رجلها ما بيه خير امنها عد اخيه وطعن بيها
– اني الما بيه خير خالة !؟
– جا بتي المو شريفة التشك بيها ؟
– اني كلت مو شريييفة
– جا من تطعن بيها وتكول عايفتني بالضيم ومكابله الغريب بنص الليل شيسمونها ؟ غفران منين تعرف بلال ومنين تحجي وياه لو ما انت الذاب حملها عليه مو انت التصيح بلال اخوي بلال اكرب من اهلي هسه حسبته عليها غريب !؟ من كل ما تكوم وتكول بلال اخوي وتكعد ويا اخوك وين الغلط يايوب !؟ لو كل وحدة كعدت وياه حماها مو خوش ما ضلت عيشة هاي
بس ما طول انت الذبيت حملها على بلال وهسه جاي تتهمه وياه حرام والله يايوب مالك بت عندي ولا تشوف اطراف عبايتها
ايوب : من رخصتج خالة مرتي هاي شيصير بيناتنا ممنوع لاحد يدخل .. وممنوع احد ياخذها
– ممنوعك وفروضك اطبقهن ابيتك مو علي وبتي الطعنت بيها وتهمتها مالها ردة لاحد ومالك مرة عدنا ولو ما رايدها وتكول جزعت منها اطنياها احطها على كلبي واداريها بماي عيوني احسن ما مخليتها عد يهود حامل ومحد راحمها .
– ها خووووش طلعنا احنا اليهود واحنا الما بينا خير واحنا العايلين ابتج جا خوش .. يصير
– خوشين مو واحد لا تهدد حجي عيب انا بكبر امك
– على راسي ان شاءالله يصير خير
حجاها وهو يخزرني .. كملت المغذي ..
ايوب واكف بالباب وامي كاعدة ع السديا وياي وعلي يم راسي
عدلت ارداني امي ونزلت العباية على ادية وكالتله : علي يلا يمه شولفنا تكسي نرد .. اخيتك تعبانة
ايوب : خالة مرتي ترجع وياي رحمة على والديج مو وكتها فاتحة ابوي منصوبة واجيت بسببها لا تكبريها
– ما ارجعها ولا ترد وياك والله ، الزلمة التهمها وطعن بيها لا تظن اردها الك
– ما طعنتها اني جاي استفسر اني لو اعرفها مو خوش ومو بت اوادم اخليها على ذمتي ؟
– لا تخليها على ذمتك جا هية منية لو جايزة من مخليها على ذمتك ؟ كلمن يرد لاهله ويا دار ما دخلك شر
علي : يمه هسه خل تريد لعيالها وبعد الفاتحة يصير خير مو وكت مشاكل
– ترد لبيتي ومن تخلص فاتحة ابوه يجيب عمامه ويجيني غير هيج بتي ما ترجع لبيت تاهمها
– يمه لا تكبريها
– الاغبر تكوم مني لا بالنعال وعلي جزعت منكم انوب نطلع كواو*** وساكت يالاغم بدال ما هسه لازمه ونايم بخوانيكه تخاف تخسر شغلك على حساب اختك من امداك وامدا بطني الحوتكم
ايوب : خالة لا تحاولين مرتي ترجع وياي وما اقبل تروح ويا غيري
– حلفت والله وروح عصام ذاك الزين ما ترد وياك بتي ما زايدة عدي خاطر تعمل بحالها هچي
– وشسويت قصرت وياها اني !؟
– انت حاسب الدلال بس فلوس وسيارة تحط بديها .. قصرت من ما حويت البنية وهي حامل لاعب بحالها لعب شني فصلية خالة زايدة عدنا
– لاااا صدك اليشوفها عيشتها عيشة فصلية واني مو خوش ادمي
– والله مو خوش ادمي ترضى تزعل
– والله يا خالة خلف الله عليج ما دام احنا طلعنا مو خوش اوادم .. ما توقعتها منج
– لا من تطعن بتي اتوقعها اني مو هذا الاغبر واكعد امسحلك من تتعدا حدودك وياها .. توصل بيك تشك بيها شني ماخذها من بيت حرام لو شايف بتي ما مرباية وعدها سوالف مكسرة اطيني اشفت عليها وتهمتهااااا
– سهلة
– سهلتين اذا مو تلاثة .. كومي انت يلا فضينا
راحت اخذت التحليل مال الدم مالتي .. طلع عندي فقر دم حاد واكو حمل يعني الطفل موجود رغم الدكتور كال نبض ماكو .
شوفته الورقة : هاك شوف اطيتكياها وردة ريانة وهالاخذنها منك يابسة دم ما بيها ويحجلي بدلال وفلوس ..
جرت الورقة ومشت وهي تجر بيه
علي وايوب ورانا .. صاح ايوب على علي : جيبهم للسيارة اني اوصلكم للبيت وارجع
اجا علي : يمه خل يوصلكم رحمة لوالديج لا تكبيرها هسه هي هم ما مقصرة غلطها راكبها من فوك ليجوا
– ميل عني يالاغم ميييل ، من ترد وتطب فاتحته وتوكف وياه الساني ما يطخ السانك يعليوي
– يمه لا تكبريها رجال ومرة يتعاركون وكلشي يصير بيناتهم
– امشي جلب تسمعه يتهم اختك تكلي يتعاركون وادافعله من انعل اهلك لابو عشيرتك
اخذتني وطلعت من المستشفى وكفت تكسي وبلال وعلي يردون يوكفوها ما انردت اضطر علي يصعد ويانا بالتكسي وايوب يرجع وحده بالسيارة.
رجعتني للبيت ونفضتلي فراشها وكالتلي : نامي
وانطت فلوس لعلي يجيب نفر تكة بطريقة حتى اكل .. وصاحت على نسرين كالتلها : خالة بلا امر عليج برتقالات بالثلاجة سويهن الها عصير دمها يابس
– اي هسه
راحت نسرين سوت العصير وامي تكلي : اكلي واشبعي ونامي هسه وارتاحي واحسابج بعدين لا ما الزمج واكسر ظهرج
– اني شعليه شمسوية ؟
– مو وكته الحجي بس سهلة ولج مات شهيد ومحد مس بحجاية تالي يتهمون بته من وره تصرفاتج الرعنة
– ما سويت شي شفته يبجي بالبرد كلت انطي جاي وياي من انطيته كال اكعدي كلت يمكن مقهور وبلال مو اي احد منا وبينا من شفته منقهر مكدرت اتركه بدون ما اطمنه ونصحته يدعي ويوكل امره يعني غريبة اني ويا بلال اكثر من اخواني وبنفسه ايوب هو اليخلي بلال ياخذني ويرجعني لدوامي بدل علي اللي هو اخوي من دمي ولحمي .. ونص الايام بلال مبتلي بيه خو ايام اللي اتصوب ايوب اني وبلال نسهر وياه للصبح وواكفين وحدنا ما حجه وهسه يشك !
– الحجي مو وكته انطمري وانا اعرف يمتى احجي
خابرت على احمد وعلى خواتي الاجن ينسحبون من الفاتحة
نص ساعة وما نحس الا احمد واسيل ونوره اجن وهن يكولن : ها خير شصاير
حجت امي : ماكو شي تعبانة فقر دم حاد وجبتها
– كالوا متعاركين
– لا متعاركين ولا شي اكعدن واسكتن
جابلي علي تكة لحم وحطتلي كلاص العصير وكالتلي : الجاي والكهوة ما تحطيهن بحلكج بعد وكثري لحوم وكرفس وشونذر خل يرد الدم بيج شوفي حالج چنچ گراطة حجار
– ليش ما اشرب جاي ما اعرف احط الاكل بحلكي ما اجرعه بدون جاي
– بت الاوادم ما تشوفين دمج خلصان ما يصير لا الجاي ولا الكهوة لا زين على دمج ولا على البطنج .. اكلي
حجه احمد : غير نفتهم شصاير
– سهمك الراحة انت يالكاتل روحك على خواتك ورايد تفتهم شبيهن
– هسه ما كاتل روحي بس غير نفتهم ليش انسحبنا من فاتحتهم عيب
– العيب عليهم مو علينا .. اكعد هسه
اكلت لكمتين وانسدت نفسي .. امي ما رضت كام تحجي : ام حلك الفاهي دمها خلصان وتصيح انسدت نفسي هالاكل هذا اذا ما تاكلنه كله وروح ابوج هسه ادبج ابطنج
حجت اسيل : ها يمه خير جا مو حامل
– انعل ابوه لابو اهله
احمد : يمه الزلمة توا ابوه ميت لا تسبين حرام
– هنيال ايوب الواكفيله سيف عمي مبخت بهيج نسايب غمان .. انا جاي اسب البطنها ما جاي اسب الحجي مالكم ريح افادك راح كلبك كلشي ولا حجيكم ينمس .
كل الصار والجر من اديكم يا غمان لو شايف اخوتها ينرفع الراس بيهم وما يرضون ينعال باختهم ما تجرأ ولا سوا سوايته
اسيل : غير نفتهم شمسوي
سكتت امي وكلتني الاكل كله غصبا عليه وغطتني وحطت الصوبة قريب مني وكعدت يمي وكالتلي نامي .. جريت نفس .. حسيت بشي من الأمان والراحة دخلت لكلبي وأمي يمي .. واخيراً مكان اكدر ارتاح وانم بيه براحة
نمت نومة طويلة ما كعدت غير لصلاة المغرب على صوت امي وهي جاي تصلي .. فتحت عيوني واكفة بملف الصلاة مالتها ورافعة اديها تقنت .. اخذت نفس وتحسرت .. شكد مشتاقة لهالأجواء وغرفتي ويا امي والجو الأيماني اللي اتحيطني بيه .. ما احس محتاجة لشي غير ارجع لروحي القديمة لشخصيتي القديمة الهدوئي وايماني .. احس الزواج شوهني وخلاني شخص ثاني .. بالرغم مساوئ ايوب ما اكدر اكول قصر وياي هواي دللني هواي وكفلي بس كارهة جو الزواج وعيال تريد وزوج يريد،
لو خيروني بين دلال ايوب وعيشته لو الطلاگ راح اختار الطلاك .. اقبل اكافح لنفسي وابقى احاول ويا اخوتي على الزواج ومسؤليته وقيوده .. احس الزواج طفاني غيرني تعبني .. جنت اعاني من اخوتي بس امي موجودة تشيل عني ادللني تهتم بيه شكد ما اكبر احس بروحي طفلة يمها اتدافع عني .. الزواج حيل كبرني وحط على اكتافي مسؤلية الظاهر اني ما مستعدة الها ، كاعد ادخل مطبات بحياتي مو بأرادتي ولا برغبتي بس مجبورة اتعايش واتأقلم وشكد ما احاول اكيف نفسي واقاوم نفسي واتعايش تزيد المسؤلية واتعبني اكثر .
تتردد براسي اية لا يكلف الله نفساً الا وسعها
ربي شايفني اني كد هذا الحمل وهذا الطريق المناسب اليه حتى لو اني ما رايدته .. الله رايد واختياره احكم من اختياري ما اكول غير لا حول ولا قوة الا بالله
كاعد افكر ويا روحي واحجي بداخلي خلصت امي صلاتها
وكالتلي : كومي يلا اتوضي وذكري ربج خاطر نسولف
كمت من مكاني ..
رحت توضيت وصليت .. باوعت القرأن
كلش مشتاقة ارجع لنفسي القديمة والتزم بعاداتي قراءة قرأن يومية .. واستغفرا وحوقلة وتهليل .. اخذت كتاب القرأن وكعدت اقرا .. لحد ما كملت لزمت السبحة كالت امي : سويتلج حميسة لحم طيبة كملي خاطر تتعشين
– بس ما مشتهية
– الفرخ البطنج يمه شياكل اذا ما مشتهية لا تفكرين بس بروحج
– يمه اذا الله كاتبله يعيش راح يعيش
– هذا الحجي ما يصير الله من حطه ابطنج غير خلاه مسؤليتج ما تستحين من الله من حاط امانته ابطنج وانت ميبسته من الجوع .. شتكليل لربج لو مات ؟
سكتت ..
حجت : شبيج يمة ليش هيج صايرة ايمانج وين خوفج من الله وين ليش هيج اتغيرتي ؟ وين غفران الهادئة العاقلة الصابرة الفاهمة .
بجيت : يمه صح الله منطينياه والنعم بالله بس احس الطفل راح يزيد عليه ضغوط اني لهسه ايوب واهله ما مستوعبتهم .. دا اتعب حيل والتعب نفسي اكثر مما هو جسدي ويا ايوب اني كرهت روحي وكرهت حتى اللي ابطني
– ليش تعتبرينه ابن ايوب مثل ما هو ابنه ابنچ ابن بطنج
– من وراهم .. يمه محد يكلي اكلي انت حامل تحتاجين تغذية انت حامل لتتعبين مو زين عليج كله يغلطون عليه ويرزلون بيه خاف اذي ابنهم البطني محد مهتملي بكد ما مهتمين لا يصير شي على البطني .. مدا يشوفون اني شكد جاي اتعب وروحي تلعب وبطني ومعدتي وراسي محد يكلي الله يساعدج كلها تكلي هذا ابن العزيز هذا ابن ايوب كرهته وكرهت ابوه وكرهتهم كلهم يمه اني اريد روحي ما اريد منهم شي .
– اذا تنتظرين من الناس تباوعلج وغفلوا عنج.. عين ربج حاضرتج بكل وكت واداريج وتساعدج .. الينطر من الناس يفگر حظه والينطر من الله يغنى .. وينها بتي ذيج المؤمنة التعرف الله وتعرف قرأنه .. وما كان ربك نسيا .. اذا عين ابنادم غفلت عنج واذا ما اهتموا بيج ربج حاضرج ووياج ومسهل امرج وانت من دون خواتج اشوف بيج امور تقربج من ربج .. الله الهداج يمه للعباية والله الهداج لطريقه وجابلج ايوب يتكفلج يوم الاخوتج وكفوا ضدج وبعده وياج ما ناسيج.
-ما اعرف ماما اني نفسي دا اكره نفسي واشتاق لروحي القديمة احس تشوهت مو اني لا عندي سيطرة على اعصابي ولا على ردات فعلي جنت اتحمل واستمتع بالصبر هسه صرت اجزع .. تصرفاته تكبره وانانيته عنده هو الصح والباقين كلهم غلط ما ينطي للمقابل حق لو شما كان على حق.. الحق بس اله وغيره ما اله كل حق .
-هسه معلينا بهذا الحجي .. احجيلي مشكلتكم الأساسية شنهو
-مشكلتنا نادية ما طلبت منه غير يفتح جهازه بس وتنتهي كل المشاكل رفض
-واتجاوزتي
-ما غلطت بس اصيح اتجادل ادفعه مني مرات ما يعجبني اجاوبه هو يعتبرها تجاوز .. بس ميحسب شكد يشد شعري شكد يعتب بثوبي تكول طفل ميحسب شكد يغلط ويهين شكد يشمر بالغراض عليه ويضرب بيهن .. هاي هو ميعتبرها تجاوز عادي لأن هو رجال يحقله يتجاوز .
– اتمنعينه من فراشه ؟
– ما مانعته بس ما ابادر .. بس كامت تلعب روحي منه من يتقرب مني ازوع هو يضوج
– كرهتي لو لإن حمل
-اجتمعن اثنينهن بس اكثر شي كرهي لتصرفاته
– اذا اكو شي ثاني كليلي اني كلبي يعلمني هم على جية ايوب ما يبيتله حق وما يخلي مرته تطلع من بيتها زعلانة ويطلع مشاكل بيته فاحسبي احسابج ينزلون جادرهم ويجون
– بس ما ارجع وياهم
– هسه هذا الحجي مو وكته نشوف حجيهم شنهوه .. سالفته مو هينة خاطر ارجعج يخون يغلط هاي السوالف بيناتكم بس ما يتهمج بشرفج ما ينسكت عليها
بقيت احجي ويا ماما واسولفلها الصار
للعشرة ونص بالليل ماما قفلت الباب وعلي اخوي طب وكلنا بعد ميجون
منحس الا تندك الباب وتجي نسرين تكول : خالة عمام ايوب بالاستقبال .
لبست ربطتها وحجابها امي وكالتلي .. سوي جاي وطبي ولا تحجين اي كلمة الا احد يسألج خلي الحجي عليه
– ماشي
سويت جاي ودخلت سلمت .. جاي بلال وعمه ابو نور ومرته وصلاح
قدمتلهم الجاي حجه عمه : الاصيلة بت الاصيل عزيزتي هاي
حجت امي : الله يخليك
شرب الجاي وكاللها : اي ام احمد نسمع منكم
حجت امي : لا استغفر الله خوية الحجي يمكم نريد نعرف شنهو الشافه ايوب على بتنا وتهمها هالتهيمة الجبيرة .. ترا التهمة بالشرف مو هينة يابو نور
– لا والله مو هينة بس اول شي خلينا ناخذ بعين الاعتبار الضغوط الجاي يعيشها الحجي ابو عرب ابوه ميت وفاتحة وناس .. وهو مريض .. وبتنا معدلة بس هم بيها غليطات وان شاءالله سهلات
– حجي اسألك وهذا بلال موجود .. خالة ياهو الكفلك بغفران وكالك وديها وجيبها ما اريدها تروح ويا اخوها ؟
بلال : ايوب
– شكثر روحتكم وردتكم من تاخذها وتجيبها ؟
– الطريق ويا الازدحام ساعتين ونص الى ٣ ساعات تقريبا روحه وجية
– رحم الله والديك ، جا حجي هو من وكله بيها ياخذها ويردها ووحدهم بالسيارة وكال بلال اخوي الما جابته امي وبلال اكثر واحد امن بيه .. لحد ما حسبته صدك اخو رجلها وامنتله وكامت تشكيله بحسبته اخوه واله تأثير عليه ويعرفه ويعرف شنهو سوالفه واموره .. يجي يتهمها !؟ ما اشكل على روحتهم وجيتهم ثلث ساعات وحدهم اشكل على كعدة ما طولت عشر دقايق بنص بيت متروس ناس !؟ وتهمها
– بهاي غلط احنا نكلج غلط والعباس ابو فاضل ندمان وكال اني غلطت بس شفتها تبجيلا واني انغثيت ليش مرتي تبجي يم غيري وتشكي
– جا غير اخو واقرب واحد اله !؟ لو كل وحدة حجت ويا حماها لو كعدت وياه شكتله مو زينة جا ما عمرت بيوت يا ابو نور .
بلال : مو ادافعله خو اني اتعاركت وياه بس هو مشوش ومو قصده يتهمنا لو يشك حشاها واني والله ودم الحسين مثل اخيتي ويشهد الله على صحتي وعافيتي لو الي نظرة مرت اخوي وايوب خوب يعرفونه لو اني بحرب وشفت طلقة جايته اصدها عنه واحطها بكلبي .. بس هو قصده اتضايق من التصرف راح يعبر بطريقة كأنما يتهمنا بعد هو ماكو انسان ما يغلط
حجه ابو نور : احنا صالحناه هو وبلال وباس راس بلال وكاله مستحيل اشك بيك بس ما ارضى مرتي تبجيلك وتشكيلك وبلال حجاله البنية شكد متأذية ومحد يساعدها وهو مكسور خاطرة عليها هي هم اخيته وامسحوها بشيباتي واعتبروني اني الغلطان وجاي اطلب السماح منكم
حجه علي : لا حشاك حجي انت الخير والبركة
حجت امي : الله يحفظكم احنا عدنا شي وياكم خو حتى ولدي عرفون ايوب اعز من كل رجولة بناتي وبعز ولدي بس اريد اعرف شنهو اغلاط غفران وياه حتى اخطر ازوع البكلبي مثل ما يكولون
ضحك : كل هاي وبعدج ما زايعته
ضحكوا كلهم .. حجه : ايوب يكول غفران تتجاوز وغفران تعاند .. وتجادل وغفران تكله انت مو شريف ومرة كايلتله كوا* وهو حجي وجبير واكبر منها وما يصير مهما كان المرة لازم تحترم رجلها
حجيت : مكايلتله انت مو شريف ولا كايلتله انت يعني هاي الكلمة .. طلبت منه يفتح تليفونه لان شفت رسالة من بنية ما قبل يفتحلي تليفونه بس هو سمعني احجي بالتليفون وسديته من دخل كال الا تفتحين اول مرة اتجادلت وياه كتله افتحلك جهازي وافتحلك جهازي يكلي لا تعاندين .. وما عنادت فتحتله الجهاز ودور الموبايل واللبتوب رسالة رسالة وبعدين شمره كتله ها اتأكدت اني شريفة مو مثلك .. يعني قصدي ما عندي شي مو مثله يراسل بنات بس ما كتله انت مو شريف
والكلمة الثانية من اكتشفت يحجي ويا بنية كتله طلكني وخليك لكوا..ك
علي : وانت شلون تفشرين !؟ احط السانج والله واكصه لو سمعتج مرة اللخ تفشرين طايحة الحظ
حجت امي : والله يا ابو نور البنية ما طلعت من بيتي تفشر ولا تحجي ولا تعرف تفك حلكها خذاها خرسة وعمية تليفون ما احط بيدها اخاف عليه منها ومكعدنها يمي هذا حرام هذا حلال واربي واعلم خالة اطيتها اله صغيرون اذا ما بيه حيل ياخذ صغيرة ويربيها على ايده .. عليش اتزوج صغيرة خو ياخذله وحدة بعمره مو ماخذلة بت اصغر منه ب١٨ سنة ومشبعها ضيم .
حجت عمته : ضيميش خاله هو اكو مثل دلال ايوب
– لا خية من ضيمه .. خذاها مغمضة وخرسة ما تعرف غير الله ودينه اجا حط بيدها التليفون واللابتوت مدري شسمه وحطها بشغل وحطها بجامعه وبنص ذني كلهن لا كعدها لا علمها الصح من الغلط ولا تفاهم وياها بهدوء هي هم صغيرة وتريد اليعلمها مو يكعد يحسب اغلاطها .. ابو نور ايوب من حجالك اغلاط غفران ذني المعتبرهن تجاوز .. ما كالك ياهو الحرك غفران بسبعة عرسها بتيزاب !؟ ما كالك ياهو اليدزلها رسايل تهديد ويمسحها من جهازها ويخليها تضرب اخماس بادساس !؟ ما كالك ياهو التهمها ودخل حسابها وفبرك عليها وسواها تحجي ويا زلمة وما حجالك ياهو الباك سيمكارتها من تليفونها وطعنها !؟
حجه : ما عندي علم باذني منهو الحاركها ؟
– كلهن يعرف بيهن ايوب وتسأله منو يكلها معليج اسكتي التهي بنفسج لا تدخلين .. تشوف رسالة من مرة تسأله منو يكلها معليج انت خلك مرة ويدك على راسها ويعت بشعرها وما طيب خاطرها وفتحلها جهازه وكاللها ما عندي شي
احلفج بالله وانت مرة واحنا نسوان لو وحدة جانت خطيبة رجلج وتعرفيها تدخل بيتج خاطر تغري رجلج ترضين تدخل البيت ؟
حجت عمته : لا والله يا عمي غير اسوي هو وياها وصلتين والعباس اهججه بليلة سودة
– لا هججته غفران ولا غلطت عليه جادلته وحسب جدالها عليها غلط ما حسب هي بنية وتغار عليه وتريدة الها !؟
حجه ابو نور : البنية هاي اني طردتها بنفسي
– رجعت خوية وبموافقته وشحدج غفران تحجين ولو فكيتي حلكج وجادلتي انت مو خوش .. مرة حامل خوية يبسها من القهر لا برر ولا طيب خاطرها ولا اعتذر ولكم الله اكبر كثر الدك على الحجر والحديد يفكه شلون وهي بنية وصغيرة وتريد اليسمعلها ويفهمها ويعلمها
ما اكلك هي ما تغلط اني ما مطيتكم نبي بس بنية تنكتل وتنهان من اهله وتنحرك ويسون بيها اشكال والوان وافلام ما تخطر ع البال سونه بيها ويريدها حجر ما تحجي !؟ ترا عمرها ١٩ سنة تحتاج اليعلمها ويوجهه ويكللها الصح من الغلط جا مو يكولون اخذها صغيرة ربيها رباها علمها من تغلط كعد وياها وكاللها هذا الشي ميصير وهذا ميجوز لو كله صياح واسكت يومعليج ولا تفكين حلكج .. حتى الحايط من ادك عليه يطلع صوت تريد البنية وبهالعمر نبي ما تغلط خو يعلمها مو يسكمها .
-والله يا ام احمد ما ندري عن هالسوالف .. وما اعتقد ايوب يدري ويسكت عن هاي الأمور مال التيزاب والرسايل
– لا يدري وهذا بلال شاهد
بلال : يدري
امي : يدري بس عبن الفاعل من اهل بيته الصمي يغفران سكتي يا غفران وسكتت شسوت البنية !؟
– لا اذا يدري وساكت ارجع وتعارك وياه شني وين كاعدين يسوون عليها افلام يتهمنها لو يحركنها بتيزاب شني فصلية
– رحم الله والديك
– لا ترجع وبذمتي شتحتاج خادم وان شاءالله سهلة والله هاي جيتنه من الجادر عليه العباس كملنا وكال عمي طالبك ما ارضى المرة تبات زعلانة بغير بيتي وهالاجينا
– هاي بعد يمها
حجيت : عمو اعتذر بس اذا متنحل المشكلة وياه ما ارجع
-شنهو المشكلة بعد
– مراسلته ويا خطيبته القديمة ودخلتها للبيت
-لا هاي بركبتي اكص ركبته كبل رجلها اذا طبت وتاخذيها من هالشارب
ما ردت اروح اعرف من اروح هناك يتغلس ع الموضوع بس امي وعلي كام يكلولي كومي وياهم لبست واجيت وياهم وامي وصت ابو نور عليه كالتله : سوينالها تحاليل ما طلع بالدم اذا الجنين بيه شي بس الدكتور يكول ما بيه نبض لازم تروح دكتورة
كاللها : سهلة بهالركبة
اخذنوني بالسيارة ورجعنا للبيت تقريبا الساعة ب١ الا شوية
لكيت ايوب بعده كاعد بالاستقبال ما صعد كاله عمه : ايوب اكعد عمي نحلها خاطر نفض المشاكل
عمي اهلها يكولون وحدة اثنين اتلاثة ويردون اجوبة
منو الحرك بتهم ومنو التهمها ومنو الوصل لجهازها وباك سيمكارتها وشنو وضعك ويا خطيبتك القديمة
حجه : محد اله حق يعرف اني عرفت اللي اعرفه واتصرفت وهاي اسرار بيتي ما من حق احد يعرفها
-بس هاي بتهم
-اي بتهم عايشة معززة مكرمة وما رضيت لاحد يأذيها واخذتلها حقها
-منين
-من ما يكون
كام يحجي عليه عمه
البنية صغيرة ولازم تحتويها ومن تغلط تعلمها وتربيها ما يصير حجاية والثانية تغلط وتصيح هي زوجتك طيب خاطرها وتستحق منك تبرير المرة عمي تحكم وتفرض وتقيد وتريد، انت اذا متعلم على حياة العزوبية مثل ما تريدها تتغير غير روحك بالاول واعرف شلون تحتويها مو تخليها تنفر وتعاند وتجادل تضل بنية صغيرة وتحتاج تعلوم
ومن هالكلام .. اخرها كالي : يلا عمي اعتذري من رجلج واتصالحو
كتله عمو: العفو عمو بس اني اللي اعرفه الغلطان يعتذر واني ما غلطت هو الغلط بحقي وتهمني بشرفي وغلطه مو هين واني اللي احتاج اعتذر مو اني المهانة واعتذر
كبل لا يحجي عمه
كال : لو تطلع نخلة براسج ما اسويها اني اعتذر !؟ والله لو اشوفج جنازة اصعدي فوك يلا جفيني شرج
حجيت : هذا اسلوبه عمو لا تكول تعاندين لان اذا هو يعاند رغم غلطه من حقي اعاند بحقي
صاحت عمته : يبووووه سالفتهم ما تخلص شو كومولنا هم عود يصعدون فوك بس ينامون بفراش واحد تخلص مشاكلهم امشونا
اني عفتهم وصعدت .. امي كاتبتلي من توصلين خابريني
خابرتها كالت ها .. سولفت الها موقف عمه وياه كالت خوش حجي
الاريده منج بتي لا تجادلين لا وتعاندين وادي العليج ولو صار شي لو غلط وياج لو تريدين شي تخابريني اني اخابره خلي نشوف حجته بعد شنهو ..
كاعد امي توصيني دخل هو كلت الها : بعدين نحجي امي
سد الباب عاقد حواجبه ..
حجه : اذا ابالج اعتذرلج لو اطخلج راس والله لو تصيرين بت نبي فلا اعترف بيج ولا اعتذرلج .. مو اني الاعتذر من وحدة سز مثلج طايحة الحظ
هو يحجي اني كأنما هو مو بالغرفة اسحب تليفوني واكلب بيه كأني ما اسمعه .. جر مخدة ولحاف من الجرباية وراح نام ع التخم عود ميردني وميرد يطخ راسه اليه وينام يمي غصبا ما عليه لازم اني الاجيه واعتذرله حتى يجي ينام يمي
كلت والله لو مو رجلي لو تصير نبي ما اطخلك راس ولا اعتذر ما دامني ما غلطانة غصبا ما عليه هو اليجي ويعتذرلي اذا عديتها هالمرة وما اعتذر يسويها براسي عادة هو يغلط واني اعتذر عن اغلاطة .. وكلت بيني وبين روحي .. انشوف منو اللي يطخلك راس .
كمت من مكاني رحت طلعتلي ويا الركبة مال رجلي نزعت الثوب القديفة الاسود ولبسته وفتحت شعري وجريت لحاف شمرته ع الجرباية ورحت نمت .. حجه هو : طايحة الحظ ما كلفت روحها تكلي البقية بحياتك وتريدني اعتذر قندرة احسن
مشيت طفيت الضوا ومشيت نمت تغطيت ما درتله بال
كعدت الصبح .. نزلت جوا كالتلي خالتي : شصار ؟
كتلها : شفت بلال بالليل يبجي انطيته كوب جاي وردت اعرف شبيه ثاني يوم يتهمني يكلي شعندج وياه ويتمالخ هو وبلال
– صدك يحجي يجذب شجاه شني غريبة تسولفين ويا بلال شو هو ليلة ونهاره بلال يمنا
– بعد ابنج من يدور حجه يغلط غيره بيها
– ميخالف بتي هو هم تعبان وموتت ابوه اصرت عليها هواي اتحملي .. حملج شلونه عليمن طحتي البارحة
– فقر دم حاد وكالو الطفل ما بيه نبض
– يمممه ميت
– لا بتحليل الدم يكولون ما طلع شي بس حالة الطفل احتمال متأذي
– اي غير تروحين دكتورة صخام عليش كعدي
– بلكي اليوم اروح
دزت نبأ على ايوب كالتلها كلي لخالج : غفران عدها فقر دم جيبلها لحم وكرفس وفواكه خلي تشوي النفسها تكة وتاكل ما عدها دم وخلي يحضر نفسه ياخذها طبيبة الطفل مو زين
راحت نبأ وراح دز بلال على كيلوين لحم صافي وصى امه كاللها : خلي تضمه تسوي بس لنفسها وخلي تاكل لا تعاند وتكتل الطفل والله من يموت هالمرة لا اعدمها حياتها
كالتله : وانت شاد حيلك على هالمسكينة ندري بيك تعبان بس مرة حامل خف عليها جا اذا هسه ما تتحملها بحبالتها يمتى تتحملها
ما عجبه الكلام طلع
كصصتلي كم قطعة لحم وشيشتهم
البيت بعده بيه ناس هواية .. تروح وتجي رغم ما الفاتحة خلصت بس خالتي ما تقبل اكوم لان سمعت الطفل مو زين .. شويت شيش وكعدت اكل نص الشيش وانسدت معدتي .. شمرتلي خالتي برتقالة .. كالت : كشري واكلي
اجا ايوب .. دخل الهول نسوان عمه كاعدات بالكاع .. كاللها يمه يجي عمي انريد نسولف اتنكبي واكعدي على صفحة
تنكبت عمتي وكعدت على صفحة .. اجا ايوب كعد بصفي وعمه اجا كعد مقابيلنا وكاله : عمي عندي موضوع رايد احجي بيه ما طولكم موجودين ..
حجه : اي عمي كول
– ابوي كبل لا يموت ما وصاني بأمي وخواتي كالي ما اوصيك بغيرهن شكد ما مرتاحات اني ارتاح .. والوصية عمي ثكيلة وانتم شهود .. خواتي وامي بذمتي الى ان ينگطع هالنفس بريتي بس عمي تعرف اني رجال ما اكل حرام .. والحق حق سواء رضينا او رفضنا
اني عمي كدامك ما عندي شي بهالدنيا بطرك روحي .. وبطرگ هالمرة الحلوة ما عندي بعد شي لا جواي ولا وراي ..
واشر عليه ضحكوا هم وكالولي : شتريدين بعد عمي يغازلج كبالنا
ابتسمت ابتسامة مصطنعة لان اعرف هالكلام والتمحلس يسوي حتى اطخ واحجي وياه ونبدي كأنما ماكو شي بس .. اني حلفت اذا ما اعتذر مني فلا يطخ الساني السانه .
كمل : السيارة عمي وانجانت بأسمي بس الوالد يوم النويت عليها زادني على فلوسي شدة .. تطلع ١٢ مليون تقريبا براني الذمة بوكته كالي اعتبرها سيارة البيت .. بس يضل حق
عمه : ما طوله براك الذمة معناها حقك
– يبقى عمي البيت والمحلات الاثنين مال الشورجة حق ورثة
حجت امه : تحجي بالورث يا ايوب واني بالحياة
– انت امي ما اعوفج لحد يوم الدين اكص الكرصة بيني وبينج بس يمه اذا انت باريتني الذمه يا عمي ياهو الكال خواتي بارياتني ؟ .. البيت عايشين بيه والمحلات يشتغلن وكاعد يجيبن وارد خير من الله حلال حرام اني احطه بجيبي
حجت خالتي : لا شني حرام جا انت ما مخصص مصرف لنجلاء وبتها ما تدفع اقساط جامعة سرى ما تنطيها مصرفها ما تدفع مصاريفها واكلنا وشربنا وزايدتنا وناقصتنا .. علياء بذمة رجلها وموظفة ما محتاجة المرة
– لا ماكو ما محتاجة اني وهذا عمي شاهد اريد براءة ذمة واليريد حق يكلي الحق ما يستحي منه بس اذا بريتولي الذمة مو باجر عكبة تكولون ماكل حقنا .. اني البيت هذا باقي بيه لخاطرج .. اتمنى من الله اشيل من عده واحط ابيت جديد واصمم واثث على كيفي بس ما طولة انت بهالوجود لا اطلع ولا اعوف هالبيت .. اسم الله عمرج طويل لا سامح الله في حال انت انتقلتي يم ربج ذاك الوكت ابيع واوزع .. عمي اشهد راضين بهالفعل لو عدكم اشكال وتبروني الذمة برزق المحلات لو شنهو
كلهن ببرنه الذمة وامه كالتله : البيت والمحلات يضلن جوا ايدك يوم امس ابوك من طاح لو ما انت جا المحلات من زمان انسدت وانوكلت فلوسهن بس هذا تعبك
شهدوله وبروه الذمة مد ايده على اكلي سوا لفة وكالي : تاكلينها لو اكلها !؟
سوييت نفسي ما اسمع ..
اكلها وندسني : كومي جيبيلي مي
كمت جبتله مي انطيته وصعدت بغرفتي ما نزلت يمهم كعدت اقرا لان امتحانات نصف السنة بقالها ٣ ايام كمت اقرا واراجع .. للظهر اجتني نبأ كالت : يكول خالو خل تحضر نفسها خالتي علياء تاخذج للدكتورة .
كمت غسلت ولبست ونزلت جوا ..
حجت علياء : يلا استعجلي بلال منتظرنا
من سمعت بلال وكفت كتلها : اذا بلال يروح اني ما اروح
– ليش شبي بلال ما يعجب ؟
– لا اخوي بلال شلون ما يعجبني بس كليله يعذرني ما اطلع وياه بعد واذا ماكو غيره يوصلنا نروح تكسي واذا هاي ما بلازم عادي ما اروح للدكتورة
-غفران مو وكت عنادج
-ارجوج علياء هذه قناعتي مو عناد وصلي الكلام لاخوج وبلغي واني منتظرتج بعد
راحت صاحتله كالتله : مرتك مطنكرة عيني ما يعجبها بلال يوصلها
دز صلاح لان هو ما يكدر يروح زلم تارسة الاستقبال ما فرغت
وصلنا وفحصتني الدكتورة كالت : الطفل عايش بس نبضه ضعيف ومهدد بالاسقاط عدها توسع نص اصبع راح اكتبلها مثبتات وفيتامينات وعلاج لفقر الدم اللي عدها وممنوع عليها الدرج وممنوع عليها الحركة الزايدة وتعتزل فراشها الزوجي لمدة اسبوعين والأفضل شهر
طلعنا اخذنا تكسي ورجعنا
خالتي كالتلي : نامي بغرفتي لا تصعدين لغرفتج بعد
– لا عندي امتحانات ما ارتاح اقرا بغير غرفتي
– يا امتحانات دا تكلج الدكتورة الحركة والصعدة ممنوعة
– اي اكعد بمكاني وما اتمشى بالجامعة على كد الامتحان وارجع
– بس كون اتصبرين وما يصير بيج حگلگ وتروحين هالجاهل خطية بعنادج وهوستج .
– زين خلي اروح لاهلي ابقى يم امي اداريني وهم ماكو درج واقرا براحتي
كالت : من يسمع هالحجي يتخبل تعرفين بيه مخبل ما يرضى تباتين برا
-اني على مودكم علمود لتتعذبون بوضعي
-اكعدي بغرفتج واسكتي
صعدت لغرفتي ما نزلت وسرى او نبأ يصعدولي الاكل
وكاعدة بس اقرا .. ايوب صعد بالليل عاكد حاجبه عرفت لان حجه وياي وما رديت عليه ورادني اصعد ويا بلال عود اني ما عندي شي وذاك الصار سوء فهم وهم رديته .. ما عجبه عقد حاجبه وهم اخذ لحافه ونام ع التخم واني ع الجرباية .. سالفة يغلط وبعدها يريد نحجي وكأنما ما صاير شي ما تعبر .. اليغلط يعتذر ويبرر التكبر والخشم العالي اللي جان يمشي على نادية .. ميمشي عليه لحد ما يتعلم يطخ ويعتذر من يغلط .
مر يوم يومين اتلاثة على هالمنوال اقرأ ومتجاهلته تجاهل تام
وهو عازل فراشه .. اول يوم امتحان الي جانت السبعة مال ابوه …
كعدت الصبح ابدل صاح : وين موليه
اتجاهلته واخذت جنطتي ومشيت كام من مكانه : اني مو جاهل كبالح بت الاوادم رجعي ومالج طلعة .. واذا طلعتي منا اكسر رجلج ناس راح تجينا واليوم سابع
مباوعتله ولا جاوبته درت عنه ودنكت وهو لازمني يعت بيه ويهدد
وخر وراح للحمام … صفنت السبعة ع العشا حتى مو غدا واني امتحاني ٣ ساعات وارجع واصلا سبعة مو سبعة اني لا نفع ولا دفع لإن الدكتورة مانعتني من الحركة وكله كاعدة بغرفتي وهم ينطوني اكلي .. تصرفه هذا ديخبث عليه يريدني احجي وياه واتوسله حتى اروح اسوي امتحاني .
نزلت سرى تريد تطلع : هم انت عندج امتحانات
-اي والله لازم اداوم يمعودة كلتلها لامي وكالت معليج داومي السبعة ع العشا
– تمام لعد الله يوفقج
شكرتني ومشت رحت لخالتي كتلها : خالة اليوم امتحاني عادي اروح امتحن وارجع ما اطول
– والبطنج يمه لا يصير عليه شي
-خالة اخذ تكسي وامشي على كيفي اكعد بالقاعة وما اطلع لحد ما اكمل
-دروحي يلا بس ديري بالج على نفسج
طلعت لكيت بلال جاي يغسل ..
كتله : صباح الخير
واني امشي
اندار : صباح النور يا المطنكر علينا .. وين ؟
– معليك
– اوصلج ؟
– شكراً
طلعت من البيت امشي على كيفي هستوني دا اوصل لراس الشارع .. شخطت سيارة واندك هورن بشكل عالي قريب مني حيل فزيت فزة شهكت من مكاني انداريت ايوب وراي : صعدي لا اسحلج والله بتل بتل
صعدت يمه بالصدر رجعني للبيت ما نزلت من السيارة
اندار فتح الباب : ممنوع تمتحنين كلت انزلي
ما نزلت .. صك على اسنانه وحجه : ناس جوا وعالم كاميراتها علينا لا تفضحينا نزليييي ولج
اباوع ليكدام .. جر ايدي كمت اجر بنفسي منه بدون ما احاجي
عافها وهو يباوع ع الشارع رجع صعد .. داس بالسيارة حيل ما خلا غلط فشار بكلبه ومحروك دمه لان ما احجي وياه .. هاي كله حتى ميكول كلمة اسف ! وينزل راسه لمره .. لا اعلمه المرة شنو .
طسة ارتفعت السيارة ونزلت رغم ما اتأذيت
بس لزمت بطني لإن مو زين عليه هيج طسات وكلت : ااااه
عاد خفف وسكت وساق مثل الورد ووصلني للجامعة
دخلت للجامعة كتبلي رسالة : راح انتظرج خلصي الطركاعة مالتج وتعاي بسرعة
ردت ادخل قاعة الامتحان رفضوا كالوا : الا تدفعون قسط الجامعة يلا تمتحنون .. اعترضنا احنا الطلاب .. لان ساعة امتحان ومانكدر نروح نجيب هسه سمحولنا ندخل على ان نوفي القسط ع الامتحان الجاي
امتحنت ساعة ونص وطلعت لكيته منتظر غاد من باب الجامعة
رحت ركبت وياه وصلني للبيت بدون ما ينطق اي كلمة
رجعت صعدت فوك ما نزلت غير ورا صلاة المغرب كلت عيب امة الثقلين ملتمة واني معتزلة واني فوك على كيفي انزل واكعد وياهم .. رزلتني خالتي تكلي : ما ترتاحين الا يوكع ويضل الزلمة بلا خلفة .
تمددت على جربايتها وكعدت اليكول بيه توحد ..
بس هي يمي بالغرفة .. سألتني : ما اتصالحتي انت ورجلج
– خالة اني ما عندي شي وياه منتظرة منه كلمة اسف اني غلطت بحقج وتنتهي كل المشكلة
– وموكفتها وياه على كلمة عمت عينج كون زلمة تعبان وضيم الله فوك راسه وانت مناشبته على كلمة
– كل احنا تعبانين خالة مو بس هو اذا هو مريض اني هم مريضة واذا هو عنده ضغط فاتحة اني عندي ضغط الامتحانات والاسف ما يصغر احد ولا ياخذ من وقت احد بس ابنج يتكبر
– هو جبير شني يتكبر قابل هو صغير جبير هالبيت وغصبا ما عليج يدوس فوك راسج اطلعين وتدرسين وتاكلين بجاله وواكفة وياه على كلمة
– والله خالة ما جبرته يرجعني اني ما ردت ارجع الا يعتذر وكالولي هناك يعتذر وتتصافون وما اعتذر .. وصدك وما طول جبتي طاري المصاريف كليله الجامعة طالبين الدفعة الثالثة من اقساط الجامعة اذا ما انطيت الفلوس ما امتحن الامتحان الجاي
– مبارك بس بالفلوس تعرفينه
بقيت يمها استمع لرزايلها وحجيها لحد ما خلصت السبعة .. بالليل كبل لا اصعد كالتله : ايوب .. جامعة غفران رايدين دفعة فلوس مال اقساط الجامعة لازم تنطيها والا ما يخلوها تمتحن
اندارتلي : شكد !؟
– ٥٠٠ الف
حجه : ٥٠٠ الف قندرة فوك راسها فلس احمر ما انطي خلي تتعلم الطايحة حظ شلون تحترم وما تتجاهل رايدتني كارت مال بنك ادفعلها وهي نعال ما تسوى .. فلا انطي واعلمها شلون ما تحترم
ما حجيت ولا باوعتله ولا انطيت اي ردة فعل ع الغلط مالته
صعدت بهدوء .. وخابرت ماما كتلها : ماما عندج ٥٠٠ تنطيني الجامعة رايدين دفعة من الفلوس وايوب ما عنده واذا ما انطيته ميخلوني امتحن
كالت : باجر راح ادزلج ٧٥٠ الف ٥٠٠ انطيهن للجامعة وربع خليه حدر ايدج مصيرف الج ولا تكلفين رجلج يمه حقه خطية فاتحة وناس رايحة جاية تكورع راسه لا اتطلبين من عنده من تحتاجين شي كليلي .. واتعذرلي من عمتج كليلها مريضة وما كدرت اجي .. اجيها غير يوم واوصلها
– تمام .. شكرا ماما
ثاني يوم ما داومت .. خلصتها بس قراية بغرفتي اجا علي مر دازلي الفلوس بعلاكة وصلتهن نبأ اليه وخليتهن بجنطتي
ثالث يوم بدلت ونزلت رحت للجامعة بتكسي .. دفعت اقساط جامعتي .. واديت امتحاني ورجعت .
جان كاعد مطنكر وكاعد بالهول منتظرني
اول ما طبيت حجه : امتحنتي اليوم !؟
ما جاوبته صعدت كأنما ما سمعته
كام يصيح ويغلط وخبص البيت خبص خالتي دزت عليه نزلت الها وهو واكف كالت : امتحنتي
– اي خالة امتحنت واجيت
– وفلوس الجامعة ما طلبوهن منج
– لا دفعتهن
– ومنين جبتيهن !؟
– خابرت ماما طلبت منها دزتلي ٧٥٠ الف دفعت فلوس جامعتي والباقي مصرفي
اجا ولزمني من جتف دشداشتي : شلووون شلون امج تدفع جامعتج !؟ واني هنا شنو خراعة خضرة .. وتنطيج مصرفج انت شاكيتلها اموتينج جووووع كاطعين عنج المصرف
جريت هدومي من ايده وكتلها : خالة اني صحيح اخوتي منعوني اكمل جامعتي بس مو معناها ما عدنا ولا بت فكر الحمدلله طالعة من بيت خير واهلي مشبعيني وعيني مليانة والما يتحمل مصاريفي ويهيني بيها عندي اهل يصرفون عليه.
اني حجيتها لو تخبل !
كام يغلط يدفر ما خله حجاية بكلبه ما زاعها حتى يستفزني احاجي وما رديت عليه وخالتي تكلي : انت كوية ولج طايحة الحظ زلمة راكب راسه طخي واحجي وياه هالتشوفينه جاي يخبث وياج حتى تحجين وياه احجييي هالعنادة بعد ليش خبلتي الزلمة بعنادتج
-هو ما متخبل بعنادتي هو مريض بتكبره مرايده من عنده غير كلمة اسف وتنتهي كلشي جاي يخبث ويغلط وما خله سوايه ما سواها بس حتى ميكولها !؟ شوفي منو العنيد الحقيقي لا تباوعين بس عليه
– انت مرة وهو رجال اتحطين راسج براسة ادب سز
-مرتين طعني بشرفي خالة الاولى من صدك سالفة الحساب وولد مراسلني ورغم عرف الحقيقة وما اعتذر مني ولا بررلي الموقف وسكتت ولإن سكتت رجع عادها وهم تهمني بشرفي مرة لخ .. اني من بيت معروف وابويه شهيد ويعرف اصلي وفصلي وتربيتي خلي يحط اباله مو كل مرة تسلم الجرة ولا كل مرة يغلط اسامح وارجع افتح صفحة جديدة ..
كتولي انت تتجاوزين انت تغلطين
هاي كفيت خيري وشري لا دا اتجاوز ولا احجي ولا طالبة شي ولا مثكله عليه بمصاريف كل الردته تقدير واحترام اذا يشوفهن هواية عليه لا يحلم احجي لو يطخ الساني بلسانه خلي يتعلم شلون يحترم بنات الناس ويقدرهن قبل لا يطلب الأحترام لنفسه وهو يهين بخلگ الله .
سمعني واني احجي كلامي دفر الباب
كال ما تبقى عندي : هاي اليوم ما تبقى عندي هسه تروح لبيت الخلفوها ما تضل يمي ساعة وحدة
كتلها : البيت يتعذرني هم ما اظل بيه اني مو بلية كرامة حتى ابقى ببيت انطرد منه
صعدت بدلت ونزلت واني اسحول بغراضي
وخالتي تكولي : اعتذري منه واكسري الشر ولا تصيرين صلفة
– اذا طلب الاحترام بعينج صلافة والذل هو الصحيح فافضل اكون مثل ما گلتي .
كام يصيح بهستريا ما اريدها ختولي طلعوها ما اريدها
سلمت عليها وكتلها : اذا محد يوصلني عادي اطلب تكسي واروح
اجا جرني من عباتي ويكلي : انت حاسبة روحج عليناااااا اهينج والله اليوم اخذج لبيت الخلفج وانعل عشيرته الما يطلكج
جريت عباتي منه وطلعت كدامه خبلته رسمي …

يتبع….

لقراءة الفصل التالي : اضغط هنا

لقراءة باقي حلقات الرواية اضغط على : (رواية صوت من المجهول)