رواية صوت من المجهول الفصل الخمسون 50 بقلم زينب ماجد

رواية صوت من المجهول الفصل الخمسون 50 بقلم زينب ماجد

رواية صوت من المجهول البارت الخمسون

رواية صوت من المجهول الجزء الخمسون

رواية صوت من المجهول الحلقة الخمسون

شهكت خالتي : يممممه عزا العزاني كون شلوووون اطلك مرتك ايوووب
حجه ابو نور : ابني انت جاي تلعب علينا لو شنو من رخصت الشيخ بس خلي نحجي
– لا عمي من رخصتك انت اني من خابرتك اقصد زوجتي الثانية ونحجي بعدين الشيخ كاعد ما يصير الحجي زحمة نخلص ونحجي
خالتي : شنحجي وانت اتريد اتطلك المرة بلا ذنب وتهد هالعرمة هاي ؟ ولك يمه انت شجرالك
خزراها وكاللها : صلاح اخذ الوالدة جوا
وعمه يكله : لا تتسرع ابني
– ما متسرع ولا عصبي ولا ومرتاح والمرة على طهارة شيخ ردد الصيغة وخلي العم وابن العمه يشهدون الله يحفظك شيخنا
كامت خالتي تصيح وتكله : تكسر بخت بنية يتيمة حتى ترضي مرتك ما تخاف من حوبتها عد الله
ندسني ايوب واشرلي اطلع .. كمت وصلاح كام لخالتي يجرها حتى يطلعها .. نادية بالهول لازمة التليفون وحاطة رجل على رجل .. طلعت وجهه مبتسم ومتشمته .. نزلت النقاب من وجهي طلعت خالتي وصلا ما طلع جيف نادية كاعدة بس سد الباب وراها
ونادية تباوعلي بضحكة وتكلي : ها
حجت خالتي لنادية : كومي ولج راح يطلكج جايب الشيخ على طلاكج يخايبة
الضحكة راحت من وجهه وفزت : طلاكي شنو طلاكيش
– ولج طلع جايب الشيخ يطلكج ومكعد هالجلبه هاي حتى يرضيها بطلاكج ولج طبي ولحكي نفسج تعزيتي وتخزيتي يمعزاية بحظج وابختج يغفران
ركضت نادية جرت حجابها وتريد تفتح بالباب قافله صلاح ورا خالتي
كامت تدك وتبجي: ايوب افتح الباب ايوووب ..
ركضت رادت تركض من باب المطبخ كامت تصيح عليها خالتي حتى تاخذ العباية ما اتطب عليهم مفرعة اخذت العباية ، سرى واكفة لازمة علي ندستني : عود صدك راح يطلكها
باوعت لوجه سرى ضحكت مديت اديه لأبني وقرب من اذنها : مدري اخوج مسوي بينا مقلب
-يعني ما يطلكها
-والله ما ادري بس لو رايد ميطلك يجيب شيخ وعمه وصلاح
ضحكت : يعني صدك راح يطلكها
-محد يعرف براس اخوج شكو ننتظر ونشوف
ضحكت ندستها واني اضحك خالتي مفرفحة شافتنا نضحك
لزمت شحاطاتها اثنياتهم وكامت تضرب بينا صعدنا ع الدرج اثنيناتنا وكعدنا ..وصوت نادية وصياحها بالكراج وعمي ابو نور يحجي وياها
انداريت لغرفة البنات نبأ تأشرلنا
ندست سرى تباوعلها .. من ورا بيبيتها تهز جتف وركبة
ضحكت سرى وضمت وجهه بعباتي .. وكاعدات على باية الدرج
ادخلت نادية للهول مفرفحة الشيخ طلع وتكل لخالتي : شفتي ابنج خالة شسوا بيااااا شفتي شلون كسر بختي شفتي شلوووون ظلمني اليوم محد يخلصها من اديه والله ابرد كلبي بيها
التفت للدرج .. تريد تهد عليه
جريت ابني وكمت بسرعة وسرى وكفت كبالها .. وهي تجر بسرى وتصرخ وفاتحة عيونها ولو بدها تاكلني : ام الدييييين ام الطييين وين تروحين من بختي وانت الطلكتيني وكسرتي بختي اليوم اشرب من دمج والله
– لا طالبة منه يطلكج ولا سعيت بطلاكج فديوم كل مرة من اتعب منج اكله طلكني ما مرة كتله طلكها جنت اكولج اطلعي من عدنا بكرامتج انت الما طلعتي !
شجان ابالج يبدل بيته وابنه بنزوة مثلج .. يبعد ابنه ويهجم بيته ويبقيج ؟ ماكو رجال عاقل يسويها ولا اكو مرة محترمة وعدها كرامة وعزة نفس ترضى على روحها اللي انت رضيتي .. انت الجبتي لروحج ورضيتي تخلين روحج متعة ونزوة وحشرتي نفسج برجال متزوج حسبالج من رضيتي بحركاتج راح يبيع بيته ويشتريج لا يا حبيبتي يشبع منج ويشمرج ويحفظ بيته ..
تجر بسرى وتكللها (دوخري مني خلي الزمها ولج وخري) وسرى تكللها ( هسه شنو دوخري قابل هي مطلكتج )
كل ساقي سيسقى بما سقى ..
مثل ما دخلتي عليه من هالباب تضحكين وتقهريني اكلي زادج بيدج .. واطلعي منه بقهرج ..
اني بطرانة وواكفة ع الدرج اشمر حكم من فوك وخالتي مفرفحة وهي فايرة جرت سرى وصعدتلي تريد تلزمني وتصيح ( تعاي الداااايحة تعاااي) .. خليت وشردت
.. انفتحت الباب .. فتحها صلاح ركضت سرى تطب جوا وصلاح دار وجهه وصاح عليها .. عافتني ونزلت بسرعة .. اني نزلت وراها .. بس حطيت رجلي بالكاع علاوي ابني زحلك روحه مني وركض للاستقبال شاف ابوه كاعد .. نزعت عباتي حطيتها ع الدرجولحكته ورجعت كعدت بمكاني .. ايوب كاعد على طرف التخم واني كعدت وشلت رجلية من التخم ورجعت ورا ايوب .. وعلاوي بين رجليه واكف خايف من الصوت .
نادية واكفة تصيح وتبجي وتكله : شسويتلك بيش قصرت وياك كلي ليش جازيتني هيج كليييي
هو ساكت ميجاوبها بس يلزم بعلي ويريد يشيلع على رجله
دخل عمي كاللهم : كافي صياح شهرتنا اكعدوا خل نفتهم بهدوء شكو وشنو الاسباب اكعدوا
كالتله نادية : عمي ترضاها كسرني واني يتيمة ومالي بهالدنيا غيرة ارضى يحطني خدامة عنده بس لا يطلكني والله ما اريد شي بس خلي يبقيني يمه
حجه ايوب : لمي ملابسج وخلي العم ياخذج لامج
ابو نور : ما راح تطلع بدون ما نعرف الاسباب ايوب
– جان عرفت الاسباب من خابرتك وكتلك رايد اطلك رضيتلي من كتلك اريد اطلك حسبالك غفران بسبب مشكلتك وياها ما دورت مصلحتي ما نصحتي ما كتلي بيتك ابنك ردت تخلص منها بس لإن انت ما راضي عليها مو لإن بيتي يهمك فشنو فايدة الاسباب اذا مصلحتي ما تهم !؟
– ولو جانت مصلحتك ما تهمني شعندي متعني وجاي عليك وعايف شغلي ؟ شو ما تستحي انت ولك كافي تسمم عقلك هالسز هاي حتى على عمك و اهلك ايووووب
– عمي انت بمثابة والدي بس اني اعرف مصلحتي وين واني اعرف منهو المسمم عقل منو .. ماكو داعي كل يوم تجون تكلولي طلعت اجت راحت مشت حجت اني ادري بكل خطوة تخطيها مرتي واعرف شلون احكم عائلتي .. ولا الها داعي تحطولي مقارنات وهاي صايينتك وهاي عايفتك اني اعرف منو الصانت ومنو العافت .. امر بيتي الي لحد يدخل بيه وهسه قررت وقراري ما مسموح لاحد يناقشه .. لما اتزوجت نادية ما اجيتك ولا اجيت لاي احد حتى من اريد اطلكها اخذ راي احد ..
علوش ضايقه بالحجي .. ايوب يحجي وهو يتسلق ويلعب ناوشنياه وهو يكمل كلامه: مشكور وجزاك الف خير من جيتلي وشهدت وتم الطلاك بس الحد لهنا .. مو نكران ولا اتصغار حاشى انت فوك راسي بس يا عمي مثل ما اني ما اعرف اسرار بيتك بيتي هم ما تعرف اسراره ولا تعرف اللي اني اعرفه حتى اخذت هذا القرار
اني جريت عصير راني مشمور ع القنفة ما مفتوح انطيته لعلوش حتى يلتهي بيه حجت خالتي : شنهو التعرفه خاينتك طالعة عن شورك شسوت المرة
– وهي لو خاينتني اخليها تمشي بحالها لا ما اجلدها وادفنـ ها بكاعها بس اني مو غشيم واعرف الجاي يصير هي استغلت ضعفي وحالتي وحرضت عمي ودخلته بمشاكلنا وانت السبب واني من ما اكدر ارد على عمي واحترمه ملت على غفران وطلعت قهري بيها بس اني مو غشيم وادري الجاي يدور ويصير شنو من قبل لا اجيبج لهذا البيت شكتلج اني احجي !؟
ما جاوبت !؟ بس تبجي وتناشغ
حجه .. كتلج مرتي وابني ما توصليلهم ولا تنطخين بيهم كتلج هذا الحجي لو لا ؟ ومن قبل لا اجيبج من اول ما تزوجت ششرطت عليج مو غفران ما توصليها ولا تغوريها وكتيلي اختي وما اغثها ولا اذيها !؟ شسويتي !؟ صنتي عهدج حتى ابقيج اني كتلج فد يوم ما اريدها لو رايد اخلص منها لو دوم اكلج عوفيها تحاشيها اتجاهلها اتحمليها !؟
حسبالج غشيم وما ادري من تمشي وتسمعيها الا اهجج الا اطلكج !؟ تعوقت يا بت الناس بس ما انطرشت وربج كعدني حتى اسمع حجيج وتحريضج لامي وعمي عليها .. غفران ام ابني نادية تحرضيني على ام ابني شرايده تهج وابني يعيش بعيد عني واهجم بيتي حتى انت ترضين !؟
ما فد يوم غفران اجت فتنتلي عليج ما فد يوم اجتني وكالتلي هيج وهيج سوت لو هيج كالتلي لو هيج غورتني .. تضم بكلبها وما حجت لاحد عليج ولا حاولت تحرض احد كل اليطلع بيدها تمد سجادتها وتشكي امرها لربها .. انت شسويتي !؟ منو بقيتي وما حرضتي سممتي البيت كله وما ضل حجر على حجر بهذا البيت بس منو فتنتج وكلامج تحجين براس امي وامي تجور عليها ولج صاحيلج اني واسمع تحريضج حتى على اختي وبنت اختي اللي الله ذابها عدي لا اهل ولا عزوة وبنية مسكينة وانت حاطة كورج وياها وتنترين وتزمخين بيها من امي ما موجودة حسبالج اني نايم وما ادري ولج سكتتلج على كل سوالفج واكول يتيمة وما اظلم واتحمل وشلت صبر ايوب بكلبي بطلتي ؟ ناشبتي غفران الا تكابليني وتكعدين وهجت عفران وعافت الغرفة الج وكابلتيني رضيتي ؟ بطلتي منها لو الرايح والجاي تحجيلا غفران دايحة غفران ما تحترم غفران محد يردها ؟ ولج يا بنتي كافي ارحمي نفسج من نفسيتج اعدلي نفسج ربي نفسج السم البداخلج ع الناس بطلي .. اني هنا حدي ما مستعد اخسر بيتي مرة ثانية علمود زواج كتبته بالسر وغلطت غلطة عمري واعلنته وهاهية روحي
– وين اروح اني ما اكدر بدونك والله اموت من افارك ايوب روحي بيك والله اصيرلك خدامه
– ما رايد خدامة ولا ارضى احطلي مرة خدامه واظلمها وصبرت وانطيتج فرص هواي تعدلين من نفسج وما عدلتي .. شجابرج وشحاليج بعيشتي !؟
مو انت تكولي اني معوق مو بعد ما اخلف مو اني ظالم مو اني مو عادل.. يا عمي روحي شوفي حياتج ليش خالتني ظالمج روحي عمي محاللة واموهبة شوفي اللي اليناسبج وخلفي وسويلج عائلة وشتريدين سوي .. روحي.
وهاي كدام الكل ما مسموح لأي احد يكلي شنو اللازم اسوي وشنهو الصح ولا مسموح لأي بشر حتى امي تدخل وتكلي وليش ترضى لغفران وليش تروح وليش تجي اني مو صغير حتى يجي احد يكلي مرتك استهترت مرتك طغت مرتي شأني وحدي ما مسموح لأي حد يكلي مرتك .. وكت التغلط ما اقصر وياها واعرف شلون افرك حلكها بس من يجي احد يكلي مرتك ما مسموح لاخوتها اني مكاومهم وما رضيتلهم اجي لغير اهلها ارضى .. كلمن يحط روحه بعائلته ومشكورين ما محتاج نصيحة احد وهالكلام الج يمه حطي عينج ببناتج وشيلي روحج من غفران عسى ما تجين وتشوفين هدومي وهدوم ابني خايسات والدود ملتم عليهن احجي وكليلي يمه اغسل هدومة واهدوم ابنك لا تجيبين طاريها اتركوا اني وياها نتصافى اكتلها تكتلني نتذابح نتناحر سمهمكم الراحة عدنا عقول ونحلها بيناتنا .. الموضوع زاد عن حده لا تستغلون شلل رجليه وحالتي هاي وتزيدوها اكثر ما امركم اترجاكم وانتم اهلي
ابو نور : وشلنا علاقة بيك .. هاي حياتك احنا من نحجي غير يهمنا امرك وانت وليدنا ومتأذي ونحجي بس ما طول جلمتنا ثكيلة عليك حرام بالحرم فلا الي دخل بيكم بعد ولو زعلت مرتك هاي بعد كل لاهلها لاحد يخابرني ولحد يحطني حلال لمشاكلكم ما طول عدكم عقول تحلون امركم بيها هاهية
– الله يحفظك عمي واني اسف اذا تحسست لو تصايقت انت عمي وتاح راسي وبمكان ابوي
– لا وليدي انت مشاكل النسوان ما ناخذ بيها بس هو بعد كالوها اليحط روحه بين المرة والرجال ما يطلع غير يسواد الوجه مالي غرض بيك بويه شتريد تسوي سوي .. المطلوب مني شنهو اخذ نادية اوديها لامها بالخدمة كومي بوية اوديج لاهلج
-ما اروح ما اطلع من بيتي ولا اهد بيتي والله ما اروح وشيريد يسوي خل يسوي
دار وجهه عنه ما رد عليها وعلوش كاتل روحه يريد يفتح العصير
باوعله ايوب وجر العصير من ايده يفتحه علوش تزحلك ووكفله كام ايوب يشرب بيه .
وحجه ويا صلاح : بلا امر عليك خوية ساعدني اكعد على الكرسي
كامله صلاح وابو نور يحجي ويا خالتي ويكللها : قنعيها وجيبيها اني راح انتظر برا .
انطاني ايوب العصير والقبق وتلزم بصلاح حتى يكعد ع الكراسي
شاله واني كمت اخذت علوش واني امشي باوعت لخالتي تحجي وتقنع بيها وهي عيونها دم مترضى تكوم .. فزت تكللها : باعي باعي شلون تباوعلي خالة تتشمت بيه
كامت خالتي تصيح : الله لا ينطيج كون ام سلعوم الله يطلع حوبة هالمسكينة بيج حسبالج ربحتي وربج ما تربحين ما طولج ظالمة
عفتهم وطلعت من الغرفة علوش زحلك روحه من عندي ونزل
رحت للغرفة صلاح ديكعد ايوب ع الجرباية سلم عليه وطلع كعدت على طرف الجرباية زمخ : شعندج كاعدة
-شكو
-مو تريدين تروحين لاهلج مو صالج ساعة تصيحين طلكني
يحجيها بننتره وعو عصبي بس يخفي صحكته
كتله : يا حرام ياهو الجايب سيرة الطلاك ابغض الحلال واني عندي طفل اصلا حامل ميصير شنو هالحجي مو عيب
حجيتها والضحكة بوجهي اريد اوخرها بس مدا اسيطر على براغي وجهي كتله : يتهيئلك
-اني يتهيألي !؟
-طبعا يمكن حتى اذنك ضربت كمت متسمع زين
-من اكولج صايرة بربو* ما ترضين
ابتسمت وكمت من مكاني سديت الباب وقفلته ونزعت حجابي .. لزم هدومة : اسمعي لج لا عبالج معوق وما ادافع عن نفسي اهم شي شرفي الا الشرف
فرعت حواجبي بضحكة وتقربت من عنده
ومددت نفسي على طوله وحطيت راسي على صدره حاوطني بأديه وحجه : انت ما عندج كرامة ؟
-شلونها هاي الكرامة !؟ شخص لو مجس لو شنو مشايفتها انت شايفها
-وياج ؟ لا والله ما شايفها
اطردين بيه وتصيحين طلكني واني مچلب بيج يا كرامة بطيخ انعل ابوها
ضحكت وحشرت وجهي بركبته .. اشتم بيه وايدي تتلمسه .. بودي انمزج وياه .. بعد وجهي من ركبته وباوعلي : راضية
– وانت تحجي وياهم واني وعلوش كاعدين وراك محسيتك رجال بكد ما حسيتك سور داير مدايري محاوطني اني وابني ومحافظ علينا .. حسيتك جبل واني وراك ما اخاف من احد ابد ..
-واني شساند ظهري ومقويني لو ما انت وراي ؟ مو وراء كل رجل عظيم امرأة .. عظيمة بعفتها وقوتها وصبرها تواسي وتسنده وتشيل عنه وتحفظ بيته .. من ما ابعدج مو خبث ولا بنيتي اذيج واخليج تتحملين بس اني بدونكم ينكسر ظهري محد بقالي بهالدنيا غيركم
وامي ..
امي راح تتأذى بطلاكي لنادية راح تأذيج
صح مو امج امي ولا واجبج تباريها بس …. قاطعته
– لتخاف مثل ما جنت متحملتها اتحملها مو لخاطرها ولا حتى ارضيك بس الدنيا صغيرة والدنيا تريد والأخرة تريد مثل ما عدها ولد عندي ولد ويمكن الله يذبني وما يبقالي غير ابني ساعتها اصير بمكان امك واحتاج احد يتحملني نبينا يكول (احب لغيرك ما تحب لنفسك واكره له ما تكره لها) راح اعاملها باللي ارضاه لنفسي وراح اباريها لوجه الله تعالى هو اللي يستحق نرضي اذا ارضيها لخاطرك راح امثل كدامك ووراك انهرها بس الله حاضر بكل وقت وراح اتحملها حتى انال رضاه
سحب وجهي باسني بشفايفي وحضني حيل
اندكت الباب … صوت نادية كال : افتحيلها الباب
كمت من مكاني فتحت الباب بعدتني ودخلت وكفت كدامه كالتله : ايوب اكدر احجي وياك لوحدنا
– الطلاك وقع نادية والخلوة الشرعية صارت حرام والكلام بعد ما يفيد البيناتنا انطوى .. من اخذتج ما اتفقنا على مهر وحطيت مليون كرقم بس راح اخليهن مليونين تاخذيهن بيدج هسه .. وغرفتج توصلج لحد بيت امج وتتنصب .. وذهبج الج .. والله يوفقج بحياتج
– ايوب اني ما اريد ذني كلهن
كامت تناشغ .. خليني خدامة صغيرة الك ولاهلك ما احجي والله
مشيت وكعدت مقابيله على طرف الجرباية هو يباوعلي ساكت .. وهي مستمرة تبجي وتشهك بالبجي كاللها : اذا خلصتي خلي العم يوصلج لا تخلي ينتظر اكثر عيب
– ليش جاي تسوي وياي هيج اني شسويت
– ما عشتي على حب الله .. كلت يمكن بطلت الحيلة وتابت وخلي انطيها فرصة بس دخلتي هالبيت حتى تهدمين ما تبنين واني ما رايد اهدم بيتي مو لغفران نادية سرى ونبأ بيش مأذياتج ؟ ليش يكرهنج ؟ سألتي نفسج ليش يكرهنج ؟
ضرب على رجلي كال :صيحي نبأ
كمت صحت نبأ وسرى وخالتي واكفة وحاطة ايدها على خدها وحيل مقهورة كاللها : خالو ليش ما تحبين نادية ؟
كامت تباوع كاللها : احجي خالو اني وياج لتخافين
– خالو دائما تصيح عليه من محد ماكو وكله تحرض بيبي عليه
حجت سرى : والله اني نفس الشي وصلت مرحلة كمت اكره امي هلكد ما شتكول نادية امي تمشي وراها وتصيح علينا .
حجه : نكول غفران ضرتج هالبنات بيش مأذياتج نادية ؟ تجين تكليلي سرى حطت حمرة وطلعت تتخشخش حتى ما تشوفها وخالتي تكللها اطلعي كبلي حتى لا يشوفج ايوب امي ما تريدني اشوف تجين تكليلي ليش !؟ امي جاي تكو* لخواتي لو رايدتني اتعارك ويا امي لو اكتل اختي لو شتريدين !؟
اصبر اكول تتغير تنعدل تصلح نفسها بس مال توصل بيج لأبني ! تعرفين كل هالعالم بجفه وابني علي بجفه وكتلج لا تتجرئين عليه امه ما ارضالها تصيح بيه لو تكمزه تجين انت تضربين علي ! بيش مأذيج شسوالج !؟ الحقد الشايلته على اهل بيتي شنو سببه !؟
– والله اعدلهن والله ما اتقرب من احد بعد وما عليه باحد ..
كامت تناشغ
كتلها : ترا طولتيها وعرضتيها رجال ميريدج كافي .. كومي ولي واطلعي منا شلزكتي
باوعت لأيوب ساكتلي .. كمت من مكاني وكتلها : مو اتطلكتي مو اتحرمتي على رجلي بعد واكفة كباله شتريدين يلا يلا
دفعتني : معليج انت اني رايده احجي وياه
– لا ما تحجين رجلي تعبان ويريد ينام يلا
كمت ادفع بيها وهي تبجي بقوة .. لزمت بخالتي تتوسلها
خالتي كالتلها : جا من تفتنين عليه وعلى بتي يم ابني ما كتي خالتي .. انت وياه مالي غرض بيكم
عافتها ومشت ..
كمت اتعارك وياها .. ابو نور رايح لإن جرجرتها وما رضت تروح
خابر ايوب على امها تجي تاخذها .. طبت امها تعلعل بصوتها بنص البيت وتصيح : يا ايوب رايدتها بصحتك وبعافيتك كون هالنومة نومة وما تكوم ولا تشوف العافية بعمرك
خالتي سمعت دعاويها على ايوب وهي طلعت مفرعة تركض عليها تكللها : دعاويج على ابني من انعل اهلجن لابو عشيرتجن
وتلازمت ويا امها واني وسرى نجر بخالتي .. شو عافت خالتي وهدت عليه تكلي : ولج ام الطين اطلكت بتي من وراج ولج ام السحورة اطلكييييين بتي
خلتي هدت عليها لزمتها من راسها تجر بيها واني ملختها ودفعتها من عندي واغلط عليها واطرد بيه وهي تفشر فشار مينلبس عليه ثوب عليه وعلى نجلاء خالتي لزمت الجزامة وتولتها بالقنادر طلعتها ودفعت نادية وراها .. وسدينا الباب .. ما سكتت .. كامت بالشارع اصيح وتفشر .. خالتي لبست عبايتها وطلعت .. رجال جيرانه واكف كالتله : خالة ابني زلمة مريض ويعايرنه بمرضه وما يريدها طلكاها ..
كام الرجال يصيح على ام نادية الترست الفرع فشار وصياح بالعرض .. احنا واكفين ورا الباب مفرفحين والزم بعلي ابني يريد يطلع .. لزمته ودخلت جوا ايوب يصيح كتله : طردناها راحت
بس هي ما راحت تعمدت توكف بنص الفرع وتفرش عليه بالأسم وعلى نجلاء وسرى .. طلعت حجية جيران ايوب لزمتهن وكالتلهن : عمت عين الدنيا التخلي حجي ابو عرب وهالبيت الطيب تدخله هيج نسوان خالة استحي اخجلي تفشرين هيج فشار بالمنطقة مو عيب منا زلم ما يصير
خالتي تكللها : فكر حظه خية كال يتيمة واكسب بيها اجر بس بذرة الحرام ما يغزر وياها الحلال ..
كامت امها تصيح ونادية تكللها : اني بزرة الحرام شوفي بناتج اشون واحجي عليه مو زين مني جنت حاملتكم وحاملة خيستكم وخيسة بناتج
كامت خالتي تغلط عليها وتطردهن من الباب وامها تفشر
كالتلهن الحجية : جا هسه الزلمة طلك بتج وكفتج هنا شنهي بعد مو عيب اخذي البنية وروحن من تصيحن هيج وتفشرن شنهو راح نكول هو المو زين لو الله يساعده شلون تحملجن .. امشن منا عيب
الرجال وكفلهن تكسي وصعدهن التكسي غصب وطردهن من المنطقة ..
خالتي جابت الحجية ودخلتها للاستقبال .. تسولفلها دكايك نادية بايوب وشلون هجمت بيته وخلته يطلك مرته وفرقته عن ابنه وكوه رجع مرته وابنه وهسه لازمة ابنه وكاتلته .. اباوع لخالتي من تسولف ولا جنها هي الجانت تكتلني ويا نادية كبل شوية .. عفية بشر يتلون بلحظة
سويت جاي وجبته للحجية
كالتلها خالتي : هاي مرته الاولى
كالتلها : يا ياهو الما يعرف ام علي .. مرت الحجي نشوفها من تروح وتجي شلون مرة شلون اخلاق عبايتها على راسها وعينها بالكاع هم سمعنا حسها فد يوم .. هي موظفة لو طالبة ؟
كالتلها خالتي : موظفة وطالبة هندسة نفط
– يا ايوب مو جان بالنفط كبل
– اي جا هو الخلاها تصير مهندسة نفط يريدها مثله تصير
– الله فكج منها خالة .. خلصتي الله يعينج
خالتي تكللها : بلوة ابتلينا يخية طركاعة ما ينحملن
تركت الحجية ودخلت لايوب ضايج حيل بسبب الصار وعمايل ام نادية ..
انطيته علاجه وكتله : جان من الاول تحسب حساب لهذا اليوم لو اختلفت ويا نادية وامها بهالوضع شراح تسوي غير تفشر على عرضك بالشارع .. ناقص الشرف دائما تكون عنده عقدة الشرف يطعن الناس بيها وغلطتك ناسبت الناقص شرف .. الما يغلط ما يتعلم بهالدنيا نبقى للشيب نوكع ونتعلم مو نهاية الدنيا المهم .. هالموضوع ما بيه رجعه ومينعاد
ثاني يوم ..
خابر على ابن عمه وصاه يجيب ابو اخشاب
وطلب من سرى ونبأ يلمن غراضها كلهن ويطلعنها
جبنا لفة مال علاليك مال زبالة وسرى ونبأ لمن كل ملابسها وغراضها متقربت ولا دخلت خفت اشوف شي يغثني من سوالفها وملاعيبها .. للعصر اجا صلاح جايب ابو اخشاب فتح الغرفة وحملها هي وغراضها وايوب انطاه مليونين يسلمهن النادية .
السيارة كاعد تحمل دخلت نجلاء للبيت كالت : خايبات تعالن شنو هالاخبار الجديدة صدك طلكها ؟
سرى تهوس : هاي فرحتنا الحبيرة فرحت كل العشيرة
هلا هلا هلا
كمنا نضحك .. ونجلاء كعدت ويا امها وسرى تستفسر على الصار وهن يسولفن .. شالوا غراضها كلها .. صعدنا غسلنا الغرفة الفوك كلها وغسلنا الحمام والفوك كله نظفناه .. ونزلنا الجوا شلنا الفراشات ودرنا القنفات وفرشنا غير زوالي وسرى تحجي : والأن اخذت الأشجار والحشائش تنمو ثانية واخذت الاسماك تملئ مياه البحر لقد انتعشت الأرض وأمتلئت بالحياة من جديد
كام يضحك ايوب ونجلاء تكله : صدك ايوب عليك الله شعجب سويتها انت بذيج العركة وعملتها ما طلكت شعجب هسه طلكت
– بعد شفت هيج لازم اتصرف
سرى : مو كعد بالبيت وكابلنا وشاف معاناتنا جان ما كاعدلها .. بس انت لو تشوفين من راد يطلك وخابر عمي و صلاح والشيخ وعلى اساس راح يطلك غفران واني ارجف وخايفة وادعي الله يهدي الوضع تالي سواها علينا فرة خالد ابن الوليد وطلك نادية
كمنا نضحك حجه : جا من اكول راح اطلك نادية شيخلصني غير تموع اذاني ابجيها وامي تحجي وعمي يصف وياهن كلت تعال احجي واصرف حجي حتى تقنعهم عليمن اختصرتها على روحي وكلت على غفران سهلة خليها عاد بس هي تكمز باذاني تاليها ترضى .
كمت اباوعله صفح .. ابتسم وكاللها : صدك يمه ما طول كاعدين انت والبنات خلي ابالج الطابق الفوك راح ابني واعزل بيه عن البيت
فزت خالتي : تعزل المممممن ؟ تكصم بيتي تطي نصه لمرتك
– انطي نصه لمرتي شنو !؟ مسجله باسمها غير اني اكعد بيه
– والبيت كله الك تكصم بيتي على يا مال حتى غفران ترضى
– لا حتى ارتاح انت تكرهين غفران وما تريديها شسويلج بعد هم طاخ وطيخ ..
– لا والله لا تحجيها ما اطي ترضى تعيش بغرفتها ترضى ما ترضى الله وياها ومحمد وعلي
كاللها : اذا الله وياها زين اجرلها بيت قريب وانتقل اني وعائلتي واخذي بيتج
ثغبت : وتعوووووفني علمود مرة يأيوب ؟ تهد امك علمود مرررررتك
– يمه تراها مو سالفة هاي حرنا وياج اقسم البيت ما ترضين اطلع منج ما ترضين شتريدين بعد مالها غير اثنين لو اقسم البيت لو اقسم روحي واكص بالطول نص الج ونص الغفران .. ما صايرة .. ما ترضين اطلع وما ترضين اعزل وما تريدين مرتي على اعصابي متحمل المشاكل .. سالفة مرتك طلعت مرتك كالت مرتك اشتغلت اني جزعت ..
– وياهي التضل النا !؟ خواتك ما يكعدن هن والظهر وذرة الساني يطيح يلا يلمن غرفتهن ياهو اليضل النا لخطارنا ..
– جا يمه انت ما تردينها وما تحبينها اتريدينها للخدمة احجي حك الله !؟ بناتج انت علمتيهن على النوم باجر عكبة من يتزوجن هم هذا حالهن لو هم يرجعلي مطلكات ! هم حسي بيا اني هم تعبت عندي ولد وجاي الثاني بالطريق ورايد استقر وارتاح اريد مرتي تلبس اخذ راحتي ويا عائلتي
– وما تاخذ راحتك الا تعزل !؟ ياهو العدنا ما تلبس منو اللازمها .. بس
– لا بس ولا هم يحزنون الحل يمج لو اعزل الفوك .. لو اطلع بيت وحدي وعود امرلكم يومية وبعد بكيفج
خلا ومشى عربانته وطلع ..
اندارتلي : وزيتي بأذنه حتى يكصملج البيت
– ابنج رايد مصلحته شعندي اكعد ابيتج واني عندي بيت !؟ خو بيتي مأثث وكامل بس حجه هالحجي هذا حتى خاف تصير مشكلة ما اكله اريد ارجع اعيش بالبيت الاشتريته وحالي حالج سمعت الكاله لا حاجيلي بيه ولا مفاتحني ولا ادري
– يا كلابهم اي والله عدي بيت يامن تعب يامن شكى يامن على الحاضر لكى .. اني اربي واتعب وتاليتج تجيني يم حلك الملزك عدي بيت … وتريد تاخذ ابني وياها
– هذا الأتمناه للأمانة لإن اني بين وظيفتي وجامعتي واثنين اطفال ما راح اكدر اشيل مسؤلية عيال .. بس هم ما ارضى ايوب يتركج انت امه لهذا اني ساكتة وراضية باللي هو يقرره ..
نجلاء : جامعتج شبقالها سنة وتتخرجين
– وليش اوكف على بكلوريوس؟ اني طموحي دكتوراه وناوية اخلص جامعة اقدم ماستر .. وله على شنو كاعد ادرس وكاتلة روحي شو تعيين ومتعينة اني رايدة طموحي وطموحي دكتوراه بالهندسة .
– اي منو لازمج ادرسي بس ما عدنا شي وتعزلين شو هو البيت بطرك امي وسرى وبيتي بيش مضايقاتج
– محد مضايق احد القصة قصة واجبات ومسؤلية .. تعال اذا يوم عندي امتحان ومنظفت البيت شوفي خالتي شتسوي وشتحجي .. اتريد ايوب ايوب ابنها ويفكر بيها كبل ليفكر بينا بس الوضع ما يرهم يرجع كما كان لازم يتغير، خصوصا بعد الصار الإمام علي يكول الوفاء لأهل الغدر غدر عند الله .. وخالتي ما انصفتني يوم اللي ايوب اتزوج عليه .. لحد البارحة هي ونادية تكابلن عليه وكتلني رغم كتلها كتلت علوش .. صفت ويا نادية حقدا بيه .. شمسويتلها وهلكد حاقدة
حجت : ما تنحبين كل وكتج ميبسة خشمج وما راضية وما عاجبج واليحجي وياج ما تجاوبي
– ما طالبة منج اتحبيني بس الاحترام واجب .. الفراغ مو مثل المليان نادية فارغتلج وما عدها شي … اني بين ضغوط امتحاناتي وجامعتي لضغوط شغلي لايوب وعصبيته ومزاجيته لابنه وحركته والفرة الواحد مو انسان الي .. واني هذا طبعي من اضوج ما يعجبني احجي ويا احد لو اجاوب احد مثل ما كل بشر عنده عيوب اني هذا عيبي بعد ما تحبيني ما جابرتج بس ما اقبل احد يقلل احترامه ويايا كائن من يكون كلنا من طين مثل ما انت بشر وتطلبين الاحترام اني هم بشر
ما رضن بكلامي وسالفة ايوب يعزل البيت ..
تركتهن وكمت للمطبخ .. افتريت ورجعت لايوب لازم تليفونه يباوع بيه شال راسه : ها هم ما عاجبج !؟
ابتسمت : شنو الما عاجبني ؟
– عزال فوك
– لا انسب شي بس عندك فلوس تعزل
-شكد جوا ايدج !؟
– طرك راتب هالشهر
– ليش وين صرفتيهن !؟
– جانن عندي ٥ ملايين صرفتهن بالمستشفى ونقصت حطيت ذهبي عد خالي وانطاني ١٤ الف دولار .. كلهن خلصن بالمستشفى .. وراتبي مال الشهر الفات صرفت منه علاج وكملت قسط الجامعة مال امتحانات .. وبقالي بس راتب هالشهر
– يعني شكد مجموع الصرفتي بالمستشفى ؟
– المهم انت بخير الباقي يتعوض .. عندي باقيلي من ذهبي عقد و ملاوي .. يجيبن ٥ ملايين
– اتركيهن اني ادبرها .. ابيع الجمسي .. واعزل الفوك ونضل على السبورتج لحد ما الله يوفقنا واشتريلي سيارة.
– فرغني سايق عندك هم سيارتي وهم اني
باوعلي ضحكت .. كمت بست خده وكتله : ما طولك تشم الهوى الفلوس والسيارة واهلها كلها جوا رجلك .
-الله يحفظج ابويه شدة ان شاءلله وتكضي .
من بعدها وكل صلاح صلح السيارة وباعها .. وراح تنخى الولد جماعته اللي وياه بالولده كاللهم : يولد رايدلي خلفة زين كون يشتغل شغل عدل عندي الطابق الفوك رايد ابني ومحتاج همتكم وياي .. الكرسي قعدني والحيل مو بالايد .. همتكم وياي شباب
كالوله : حجينا الذهب غير تأمر ..
واحد كاله اخوي يشتغل خلفة هو يطلعلك ..
والشباب كلهم طلعوله عمال بلا ما قبلوا يجيب عامل واحد .. فرغنا البيت الجو وانحبسنا بالاستقبال .. وهو كاعد بالهول وهم مسوين المطبخ معبر يصعدون وينزلون من عنده ..
طلع غرفتنا القديمة انطاها لواحد من الولد غرفته تعبانة ..
صبغوا غرفتنا وسوولها ديكور ورق حائط والغرفة اللي جانت بيها نادية اسس عليها وسواها مطبخ وطبكوها .. والصالة مال الدرج اسسوها وسووها سانويش وعزلوها عن البيت الجوا ونزلة الدرج صار باب ينفتح وينزل من عنده للبيت .. وغرفة صغيرة على اساس غرفة البنات اهله قافليها مسويها مخزن سابقا بوقت ابوه جان تاركها للاسلحة لما صار الحشد واستلموا الاسلحة وبعده الحشد ما جانت اله مقرات وقواعد فوزعوا بالبيوت عتاد وذخيرة فابو ايوب جان قافلها مسويها مخزن .. فارغة ففتحوها وصبغوها وغيروا ديكور الحمام كله نكروا السيراميك القديم وسووها سيراميك جديد سادة واسسو مكان الغسالة والحمام الغربي والجاكوزي والشاور .. كلبوا الحمام ع البطانة .. وطلعوا شباب جماعته نظفوا الطابق وغسلوه غسلة تمام
من قبلها اني مختارة شكل الكاونتر سواه ايوب تفصال فكمل البيت والكاونتر بعده مكامل .. بس كمل غرفتي انطاني مجموعة غرف هم المحل يصير لابن عم واحد وياه .. كالي اختاري اختاريت غرفة تركية عجبتني .. وانطاهم فلوس راحوا جابوله الغرفة ..
واحنا ملتهين بهوسة البيت
الجو ملتهي بأخبار بفايروس اسمه ( كورونا ) انتشر سابقا بالصين واكتشفوا حالات ببقية الدول ومنظمة الصحة العالمية كاعد تحذر من فايروس خطير يهدد العالم اجمع .. بس بعدها الناس مماخذة الموضوع بشكل جدي وومهتمين ذاك الأهتمام القوي .
نصبوا الغرفة مال النوم مالتي .. كالي اصعدي شوفيها ..
صعدت غرفتي صارت ما تنعرف شهكت عيوني بجمالها : ما شاءالله اللهم صل على محمد وآل محمد
افتر بيت متكامل غرفة نوم الي وغرفة صغيرة مال كعدة وصالة جبيرة ومطبخ وحمام .. اكو راحة نفسية كلش عميقة حسيتها من داخلي واني اباوع زوايا بيتي .. صح فوك عيال وطابق ثاني بس حسيت نفسي ملكة وصارتلي مملكة خاصة وراح استقر .. هنا غرفتي اجيبلي مرجوحة نفر هاي اللي تنحط بالغرفة واحط فروة وكوشة واسويلي مكتبة هنا واحط كل الكتب اسويها زاوية للقراءة بغرفتي .. وهنا غرفة علوش اعلمه عليها واترسها العاب .. واحطله بلازما يباوع بيها .. هنا مطبخي .. هنا طاولتي راح اشتري غسالة صحون حتى اخلص من المواعين .. وهنا احط بردة بس بردة سحب ولونها اريده فاتح حتى ينطي بياض وراحة نفسية .. هذا بيتي وهنا اني راح وهنا ابني يلعب وايوب ياكل ونسولف ونعيش مع بعض
صعدت فراشي الجوا فوك
وفرشت فرشتي مال العرس .. وفرشت زولية وحطيت بردات جديدة .. وصعدت كل هدومنا ورتبتها فوك اني وسرى ونبا .. ورتبنا الشامبو والغسول بالخاوليات بالحمام .. وكملته
لليل علي اخوية جان يم ايوب ساعده وصعده بالصالة فوك .. وسلم علينا وراح .. كمت افر ايوب بيها كال : عجبج ؟
– انت شتكول
– اني شكول البيت بييتي لو بيتج ؟
– ما دامك ويايا كل مكان انت بيه جنة بالنسبة اليه ولأبني
أبتسم : صايرة تغازلين يحلوة
ضحكت : ما ادري مو غزل بس شعور
– الله ينطيني حيل واسعدج دوم ان شاءلله
الكونتر كال فد يومين ويجهز .. بس الصالة باردة هاي علوش اذا يلعب بيها يبرد
– السبلت مشغلته تدفئة بالغرفة وحطيت الهيتر كوم خلي ندخل
– اكوم !
ضحكت : قصدي نمشي ندخل بس راح تكوم وراح توكف على حيلك بحيل الله
– الله يسمع منج كلش تعبتني هالكعدة والله
مشى بالكرسي وفتحتله الباب كال : ما شاءالله
علوش انطلق صعد ع الجرباية سبرنك وكام يكمز يكمز فوكاها
بس يندارلي ايوب يحجي وياي هو يصرخ : بابااااااا
عود باوعلي .. يندار يرجع يصرخ .. باااااابا
عاد كطعنا سوالفنا بالغرفة وانتبهله ايوب يهوسله :
الكالو عنا شروكية احنا الحررنا الغربية
وها ها ها الطك خل يجبل .. حجة نريد اعليه .. الطك خل يجبل
وعلاوي كام يدبج ويهوس ويقلد ابوه وايوب ي
كمت اضحك وايوب مستمر يهوسله وذاك يدبج كتله : دباعه اشون يدبج ابو راس المصلبخ اتكول شروكي اصلي هالفتر ونص
-تروحيله فدوة تربات ابوه ايبعد ابوه وكلبه
ضحكت واني واكفة اباوعلهم ولمنظرهم .. ماكو احلى من هيج منظر من اشوف ابني ويا ابوه فرحان وكاعد يتربى بين اديه ومتصافين .
حجيت وهو مندمج ويا ابنه : شصار لو الطلاك ما باطل واحنا ما راجعين !؟ واني وابني بصوب وانت ونادية بصوب جان شصار؟
باوعلي : الطلاك وان جنت ما راغبه ورايده بس صارلي وصارلج درس علمني وعلمج وغيرنا اثنينا وخلانا نعرف قيمة عائلتنا وان كل الداير مدايرنا من اشخاص ومشاكل مو اهم من هالعائلة .. يمكن الله كتب النا الابتعاد درس نتعلم من عنده اثنينا احجي عن نفسي يوم اللي عرفت الطلاك باطل اقسمت راح ارجعكم وبرغبتج والحمدلله الله كتبلنا فرصة نغير بيها من نفسنا ونصلح الباقي من حياتنا ووفقنا وما طول وليدنا كدام عيونا وسكف فوك راسنا وملتمين نعمة جبيرة نحمد الله ونشكرة عليها
– الحمدلله
تقدمتله واخذت ايده حتى اساعده ينتقل للجرباية
وكف وذب حمله عليه .. كتله ثبت كام يحاول يثبت كال : رجلي اليمنى جاي اكدر اثبتها حتى لو تنمل بس الرجل اليسرى كاعد تأذيني
– نراجع عليها دكتور
– يا دكتور ضل شو هي صارت تخوف خاف لا صدك هذا الفايروس منتشر ونبتلي
– الله كريم يمعود قابل الناس تموت غير نراجع على رجلك
حاول ويايا وحرك رجلك اليمنى
كام ينتجي عليه ويحرك رجله اليمنى كعدته ع الجرباية .. هستوا تمدد علوش ما قصر كمز وجفص ابطنه وخلا يصرخ للسما وجراه وتولاه راشديات وذاك ابو راس المصلبخ تكول راس من حديد هم يحس براشدي يحس بكتل ايوب يكتل وعلوي يكتل ومجاعص باقين واحد ويا اللاخ
لحد ما تعب علوش واتمدد على صدر ابوه يحجي وياه ويعلمه ..
الله ربي
محمد نبيي
علي وليي
فاطمة مولاتي
الحسن امامي
الحسين قائدي وامامي
وعلوش يردد وياه ويحفظه باصحاب الكساء ..
لحد ما غفى علوش وايوب طفى وغفى ونامو سوا .. حطيت مخديتي يمهم وغطيتهم واتغطيت وياهم .. تنهدت .. الأيام الصعبة عدت والأيام الكلت ما تمر مرت .. وكلشي جان صعب بفضل الله انحل وسهل .. بس مو بسهولة بقهر ومرار وصبر … جنت اسأل روحي واكول المن اصبر وايوب يستاهل اصبر وليش اتحمل .. باوعت بمعدنه وشفته رغم عيوبه بس خوش زلمة طيب حنون كريم .. لهذا قررت وياه ما اوكف على موقف .. راح اوكف وياه واعدي الموقف .. اليريد من الدنيا لازم ينطيها ولازم نصبر ونتنازل ونضحي وننطي من نفسنا ونجرع الغلط وحتى الضرب والأذية اذا جان المقابيلنا بيه امل ينصلح ويتغير .
ثان يوم خابرتني ماما كالتلي : وينج لا تجين لا توصلين بعد محد شافج ييمة
– والله يا يمة ميتة على شوفتج بس شبيدي ايوب وتعرفينه من مريض يصير مثل الطفل والله اذا التهي عنه بطبخ يطنكر ويكوم يصيح كون كدامه اذا كتله اريد اطلع عيونه تصير بكصته .. خصوصا بعد ما طلك ناديه ما اكدر اعوفه وامشي تعرفين الحجي اليصير ها عافته مريض ها اهم شي ونستها وخالتي ما طايقتني جيف كملت بيتي الفوك
– ها كملتي بالعافية
– لا والله بعدني بس غرفة نومي كملتها المطبخ والصالة بعدهن
– شمحتاجة اجيبلج
– محتاجة تجين تشوفين بيتي
– لا والله يمه اعذريني لا رايده اشوف عمتج ولا اطب بيتها .. عيالج كبحية يمه خليني من سكتنا على ضيمهم من مرضى ايوب ليجاي
– بس هذا بيتي !؟ اني اريدج تصعدين تشوفي
– تتهنين بيه يمه بس عزة النفس مريودة يبتي .
-وشلون مشتاقتلج والله لا اكدر اعوف ايوب مريض واجيج ولا انت تجيني
-جيبي ايوب وتعاي اعزمكم اثنينكم يمي
ضحكت : اكله ان شاءالله
بقيت اسولف وياها ..
العصر اني وعلي ودينا ايوب لدكتور مفاصل وعظام فحص ايوب كال : رجله محتاجلها عملية متعرض لحادث سابق
كاله : لا بس ايام حرب داعش تصوبت وما طابت وكالولي عملية وما سويت وصارلي حادث ودخلت غيبوبة رجلي اليمنى كاعد احس بيها واكدر شوية اثبت عليها بس اليسرى تأذيني
كاله يحتاجلك عملية .. واترك الكرسي واعتمد ع العكازة رجلك اليمنى تحتاج تحرك الدورة الدموية البجسمك حتى تتقوى وتكدر تعتمد عليها .. بس الثانية لازمها عملية
ايوب كاله : ان شاءالله دكتور نرجعلك
اخذنا وطلعنا ميقبل يسوي عملية
كتله : ترى بعدين تزكط وتلوم بنفسك
كال: لا تحجيها ارجع افتح رجلي وعملية وروح وتعال والم واذية وبهالوضع شبية مخبل .. دمشي
ما رضى بالعملية ..
من بعدها بيوم انكشفت اول حالة لفايروس كورونا بالعراق .. والعراق كله دخل انذار وانطوا حظر تجوال شامل بعموم العراق .. واتعطلت كل دوائر الدولة والمدارس بس القطاع الصحي والأمني دوام شامل ..
احنا من ضمن القطاع الأمني فصار دوامنا ٥٠ بـ٪؜ حتى لا نصير هواي ونختلط ونسبب عدوى .. بكل قسم وعلى كل مكتب باكيت مال كمامات وعلبة معقم ..
كاونتري بألف يا الله كمله ابو الكاونترات .. وماكو سيارة حمل حظر تجوال فاطرينا نجيبه بالحوثية وونقله ووندز على ابو الكاونترات كمامة ومعقم .. اشتغله وثبته وطلع .
من راح رشيت الكاونتر ديتول ونظفته الطباخ من ضمن الكاونتر وطلبت المواعين والجدورة وطاولة كلها توصيل وكعدتها ورتبت مطبخي ..
هذه الفترة جانت من احمل الفترات اللي استقريت بيها وصارلي مطبخ خاص وهدوء والناس كلها متباعدة وكاعدة لا زيارات لا طلعات كلمن ابيته وكاعد .. افتح يوتيوب واطلعلي اكلة واكعد اتمعمر بيها ومن تنجح انزل بيها للبنات فرحانة احطها وناكل
رغم استقريت فوك بس ايدي جوا لان سرى ونبأ ما ينتبهن وحتى لو توصيهن على شغلة يتهاونن فخالتي وان جانت ما تستحق بس لوجه الله تعالى شطبخ انزللها غداها وعشاها ومرات ريوك ننزل نتريك وياها .. هي هدت مو مثل كبل شادة حيلها علينا .. مالها علاقة بينا تاكل اكلها تشرب وتبقى على تليفونها والتلفزيون لو تكعد تصلي وتقرا قران .. وهيج مخلصة يومها .
فترة كورونا جانت صعبة على هواي ناس وبسبب الحظر الشامل .. الناس اللي عيشتها على باب الله ورزقها يومي ماتوا جوع .. وقتها السيد السيستاني انطى فتوى التكافل الأجتماعي .. ودعى الناس للمساعدة فيما بينهم للي عنده ما يزيد عن رزقه ورزق عائلته يتوجب عليه دينيا ان يتفقد اهله واقاربه وجيرانه ومعارفه ويساعد بلقمة عيشهم
تصدى الحشد لتلبية نداء المرجعية وانقسم قسمين ..
قسم امني يحفظ امن البلد .. وقسم خدمي لخدمة اهل البلد ..
واصدروا مبادرة التبرع بنص رواتبنا لصندوق حتى نعيل ونساعد الناس التعبانة خصوصا اصحاب الامراض المزمنة توفرت كل سيارات الحشد بتوصيل مطلبات الناس والارقام ننشرها بكل مكان حتى اليحتاج يخابر ونساعده
اصحاب الامراض المزمنة نوفرلهم علاجهم
الناس اللي رزقها يومي وماتوا حوع سوينالهم سلة غذائية اسبوعية نداور عليهم ونوصللهم مسواكهم .. والاطفال المحتاجين حليب وحفاظات علاجات
المستشفيات دخلت حالة انذار والمتوفين صارت تشمرهم بلا دفن وكفن
والناس تخاف توصللهم وتكفنهم وتدفنهم وحتى بعض الاهالي تخاف تجي تغسل امواتها ومحد يرضى ينقل جثة لو يغسلها ويدفنها والوضع صار كلش صعب .. اتطوع الحشد بجهد خدمي لنقل جثث المتوفين بسيارات الحشد .. واسسنا منظومة نساء ورجال لتغسيل الأموات المتوفين حسب الشريعة الأسلامية ودفنهم بما يليق بالميت دفنه .
جان جهاد بس من نوع اخر واصعب
جانوا بس الزلم تجاهد ع الساتر .. بجائحة كورونا .. صاروا زلم ونسوان الحشد تجاهد بانفسها وتغامر بنفسها لخدمة الناس .. واحدهم ما كاعد يجاهد بروحه بس كاعد يجاهد بصحة عائلته لهذا اكثرهم صار ما ينزل للبيت وما يوصل .. حتى يحفظ عائلته من هذا الدمار .. مقراتنا صارت مبيت لولد الحشد
احنا البنات نجي نجهز سلات غذائية نستقبل اتصالات المحتاج علاج اللي محتاج كفن لو سيارة لو اوكسجين .. نرفع طلبات الناس للشباب وشباب الحشد ياخذون سياراتهم ويرحون يصلون للناس .. بس ما يكفي لو كل حشد يتكفل عائلة هم ما تكفي اعداد الناس هواي بالخصوص المناطق الشعبية لا يلتزمون بحظر ولا بالتباعد الاجتماعي .. والحالات بالالاف .. والمحتاجين بالملايين
استنفرت كل جهودنا للخدمة ..
صار عدنا لود شغل بالتجهيز واحنا البنات عددنا قليل
فطلبت من ايوب انو اخذ سرى كمتطوعة تشتغل وياي السلات الغذائية .. كال : ميخالف
تركت علاوي يم ايوب وخالتي .. واخذت سرى وياي
كاعد تجهز وياي طب ابو نور شافها كال : اها سراوي اليوم هنا عمو
كالتله : اي عمو اجيت اساعد غفران بالتجهيز كالت عدنا نقص بالعدد
– عفية عفية عاشت اديجن بنياتي شدن الهمة اهلنا يستاهلون
كاله رحمن : ليش شتعودلك هالبنية حجي
كاله : اها جا ما تعرفها !؟
– لا مو صديقة غفران
– يا صديقة غفران هاي بت الحجي ابو ايوب الله يرحمه
صرخ : ااااه اخت ابو عرب جا غير تكوليلنا يا غفران نضيفها نرحب بيها
من ابو نور عرف سرى .. ركزوا بيها
كامت تشتغل ويايا ونكتب اسامي على السلات ونحط اللي تحتاجه العائلة .. اجا باقر كالي : غفران سلة العائلة مال هذا البيه سكر ترا خابرني خطية لازم نوصله السلة والدوا اليوم
– الدوا هذا والسلة .. انطيني سرى من يمج هاي
جرتها وكتله : زيت وتمن وطحين وشكر وجاي ومعجون وعدس ونص طبقة بيض تمام
شالتها سرى وباقر كاللها : لا العفو اتركيها اني اشيلها عنج
نزلتها وهو دنك شالها واخذ الدوا .. حجت : شسمه هذا الولد
– منو باقر
– اسمه باقر .. خوش ولد
– ويايا بالجامعة وانقل هنا يمنا برمضان مصور
– يا واكول حبيت ستايله وشعره طلع مصور
– خوش ولد باقر درة مال الله
-متزوج
ضحكت : شتريدين سرى
ضحكت : ما اريد شي والله بس دا اسأل
– كملي شغلج
دنكت تكمل وتحط .. كتلها : ممتزوج
– ها اوكي تمام
ضحكنا راح ساعة ونص ورجع جايب النا دجاج مشوي كال : اتغدينا وهذا غداجن ما لزمنا بس كصينا منه نص دجاجة
جرينا كارتونة وكعدنا حتى ناكل ..
هو وكف يسولف ويضحك وويانا بنية ورحمن .. بس حسيت باقر ركز بيها وهي هم توترت بوجوده وخجلت حيل حتى استحت تاكل لو تسولف .
رجعنا العصر …
بالليل دزلي باقر : هاي اخت الحجي اللي اجت وياج اليوم
– اي اخت الحجي شرايد !؟
– عليج الله اذا اخطبها الحجي يرضى بيه
– اممم افكر
– تفكرين شنو دكولي عليج الله
– شتخطب باقر الناس كاعد تموت وانت تفكر بزواج
– نحيي الجيل القادم خو ما يموت العالم وننقرض
– عابتلك
– عليج الله بروح ابوج بروح الحسين شوفيلي الحجي اذا يرضى
هو يحجي نزلت ركض دخلت لغرفة البنات ندست سرى كتلها : باعي منو كاعد ديحجي يريد يخطبج
باوعته كامت تكمز وتصيح توترت لا عفية مو هيج هسه شسوي
– توترتي لو فرحتي
– ما ادري شو عجبني حيل شكله محبوب
– يعني اكل لايوب باقر رايدج
– حتى يذبحنا وبعد ميخليني اروح وياج
– مالج علاقة .. خليها عليه
بالليل من ردنا ننام .. كتله: ايوب تعرف باقر مو
– اي طبعاً شبيه ؟
– شاف سرى اليوم واشتغلت ويانا وقبل شوية كالي انت اختي بس اريد اسأل اذا اتقدم لخطبة اخت الحجي الحجي يرضى بيه
– وشلون حط عينه عليها اني ليش ما اخليها تروح وتداوم بالله ما يستحي
– ايوب الولد ما قلل ادب ولا بكلمة الرجال رايد يخطب ويريد يسأل لا عيب ولا حرام منو ميتمنى يناسبك طبيعي من يسمعون عندك اخت صغيرة وما ما متزوجة يتقدمون
– شمدريني اني هالامور تضايقني وتلعب روحي .. سدي الموضوع
– ادري انت ما تريد اختك تتوفق وتتزوج الى متى تبقى هيج خطية اتخرجت وكعدت بالبيت لا تطلع لا تطب من يشوفها ويدري بيها ويخطبها ومنو يعرف عندك اخت ويخطب
– واروح اعرضها
– هسه ما عارضها شافها ويرد يتقدم على سنة الله ورسوله والصراحة سرى سألتني عليه من قبل لا هو يكلي يخطب
– يعني شنو
– سرى صغيرة ويعجبها ستايل مصور وشعر طويل وشاب هيج منظره وشكله وسألت عن اسمه وحتى من كالي باقر رحت سألتها البنية صارت طماطة من الخجل وكالتلي شوفي ايوب اذا قبل بكيفه
– تنهد الله كريم هسه ما ادري خل اشوف امي
ثاني يوم خابره عمه كاله : حجي فلان خطب سرى من عرف عندي بنت اخو صغيرة وما متزوجة
اجا ايوب حجه لأمه ..
كالتله وين نلكى احسن من الحجي ننطي بتنا
لما سألنا سرى كالت : لا مموافقة اني ما اريد حجي يكلي مكياج ممنوع ولبس حرام اني رايدة شاب بعمري افهمه يفهمني اهديله غنية ينطيني وردة نطلع نتونس نفتر ما اتزوج واحد يخلصها ويايا حلال وحرام وبالاخير درب المثنى والثلاث والرباع
كمت اضحك وخالتي ترزل بيها وتكللها : مو وجه نعمة حجي هذا وهيبة واصل وفصل
كالتلها : الله يستر عليه بس ما اريد
ايوب بالهول من احنا نحجي وياها
من طلعت كال : من تداومين باجر انطي كلمة لباقر وخلي عمامه يخطبون
رديت كلمة لباقر شو هذا طار من الفرح من سمع حجي ابو عرب رضى يناسبه .. انذكرت فرحة علي اخوية من ابو نور خطبني لايوب .. ركص بمكاني
بنفس اليوم خابر ابوه واتفق وياه على يوم يجون يشربون يمه جاي
كعد ايوب سرى وكاللها : باقر الاعلامي ولد بالمقر يشتغل شافج ورايدج على سنة الله ورسوله موافقة
خجلت وكالتله : بكيفك
– اني لو بكيفي انطيج للحجي بس انت رغبتج شنو
سكتت حجيت اني : السكوت علامة الرضا يحبيبي
غمتني وضحكت وكامت خجلت
ابتسم هو وكال : هاهية الله يوفقها ما طول قبلت هاهية
لهناك واحنا بعدنا كاعدين
كالتله : ايوب يصير احجي
باوعلها مستغرب : شتحجين بابا محتاجك شي
– لا بس اريد اشرط
عقد حاجبه : شتشرطين
– يعني هم الناس مو يريدون يجون
ضل يباوع .. باوعلي ابتسم كاللها : اكعدي باباتي وكليلي شروطج
كالتله : شرطي ما البس عباية وما يمنعني من المكياج
– سرى شهالشروط هذا زواج
– خلي اكمل
ضحك : كملي
– واريد بيت وحدي اني مرتاحة هنا ما اريد اتزوج واعيش ببيت العيال واخدم واتعب ما اتحمل لو بيت وحدي لو ما اريد اتزوج ابقى ابيت بابا مرتاحة .. وشغلة همينه اني اريد اتعين وانوظف اذا اتوظفت ما يمنعني اشتغل
حجت خالتي : حقها شني جا شني تعبت وربيت حتى اطي بتي خدامة عد الناس بيت وحدها وتخدم نفسها ورجلها ومن تتوظف على كد بيتها يرضى يرضى ما يرضى .. ارفضه
سكت ايوب ما حجه
من اجو ابو باقر وعمامه واتقدموا .. ايوب حجه شروطها بدون شرط العباية والمكياج غلس عليهن .. ابوه كاله : موافقين حجي انتم خيطوا واحنا نلبس وشتريد وشتأمرنا احنا بالخدمة
كاله : لا خادم الحسين ان شاءالله الله يحفظكم
اتفقنا ع الاسبوع الجاي خطبة وعقد بس ما يعزم بيها اي احد لحد ما تنتهي جائحة كورونا يسوون مهر وعود يحتفلون هسه بس خطبة وعقد قران .
صدك يوم الجمعة ..
جان ابو نور وايوب فقط .. وباقر وسيد معمم وابوه وعمامه اثنين وامه وخواته ٣ .. استقبلناهم وكلهم ملتزمين بالكمامة وبدون سلام .. يحطون اديهم على صدرهم ويسلمون التزام باوامر المرجعية اللي دعت للتباعد الاجتماعي .
سرى جانت لابسة فستان نازك لونه اوف وايت ومكياج خفيف هي مكيجت وسرحنا شعرها وحطينا عليها العباية والكرسي ورا الباب وعقدلهم السيد.. هلهلن امه وخواته وكامن يصفكن ..
بنص هالهلاهل والفرحة تنهدت وحطيت ايدي على صدري اتحسرت
لو بلال موجود ويشوف هاليوم جان مات من القهر .. الله يعوضه خير بالجنة يارب
باركنالها وفرحنالها وايوب باسها وكاللها : الحمدلله اللي اتطمنت بيه عليج واني بالحياة اقلها اذا اغمض عيني مرتاح انت بخير باقر خوش ولد واهله مبينين طبيبين وعلى نياتهم الله يوفقج باباتي .. وبحيل الله بس تحصلي فرصة وتجينا وجبة احط اسمج ع التعيين حتى تعينين زوجج وتعيشون مرتاحين بس ها ما تتقوين عليه براتبج وبالج عينج اسمعج فد يوم تكليله عمي مديرك اخوي هيج وتقللين منه هيبة المرة من هيبة زوجها خوية مو هيبة اهلها كل بنية خطار عد اهلها وهيبتها وبيتها عد زوجها اتفاهمي وياه واتفقي واعرفي اطباعه وعلمي على اطباعج والله يكتب اللي بيه اليهر وشتحتاجين هالركبة سدادة وابن ابوج بظهرج ما يهدج لحد ما يصير بلحده .
باست راسه وبجت من كلامه بدون ما تحجي
ضحك واخذها بحضنه وكاللها : الله يوفقج حبيبتي الحمدلله من وفيت امانة ابوي وزوجتج لواحد طيب وترضي لا غصبتج ولا كسرتج ان شاءلله ابوي مرتاح بكبره .
واني بعز هالفرحة وواكفة اباوعلهم
دك تليفوني .. جان علي اخوية رديت عليه ..
علي اخوي ويبجي .. كتله : هاي علي شبيك !؟
– غفران مصيبة وما لكيت كدامي غيرج اخابره واكله
– شكو علي
– صارلي يومين اكح وحللت اليوم وطلع عندي كورونا
– لا حول ولا قوة الا بالله .. ميخالف حبيبي سهلة ان شاءلله لتخاف والله كومة ناس دا تطيب خصوصا الشباب المثلك .. تصير وياهم مثل الانفلاونزا القوية بس كون ما تختلط بالاهل مرتك اولادك امي .. احجر نفسك
– اني ما اخذ حذري والله جاي اسبح روحي بالتعقيم كل ما احي من شغلي خاف انقل مرض بس طلعت اني المنعدي خايف حيل ومشوش وما ادري شسوي اذا اموت مرتي وجهالي وين راح يرحون
– يا اسم الله علاوي ليش تحجي هيج كول يا الله تكوم منها بحيل الله انت بالبيت امرلك انطيك علاج
– اني ما احجي ويا احمد وما يطبلنا اذا احتاجيت شي راح اخابرج
– من عيوني اشلع روحي وانطيكياها والله تريد اجيبلك علاج هسه
– لا كتبلي الدكتور وجبت علاج بس شلون راح اكل لامي ونسرين راح ينرعبن
– ميخالف المهم يبتعدن وانت احجر نفسك بالاستقبال
سديته من عنده حجه ايوب : شكو ؟
– علي طلع عنده كورونا
– لااااا لا حول ولا قوة الا بالله وهسه
– راح ينحجر
– هو وغيره شاركوا بدفن اللي ماتوا بكورونا واخذوا العدوى خطية والله
– شلون بامي بنسرين لا انوب هم ينعدون ..
– كولي يا الله
خابرت نسيرين بلغتها تخبلت كتلها : اهدي ولتخافين وانطي الفيتامينات والتزمي ويا بالاكل الصحي وابعدي امي والجهال من عنده واحجري بالاستقبال ولتخلين احد يوصله
سديت من عنده .. لليل اختنك خابرتني امي مفرفحة كالتلي : ولج يمه اخيج مختنك غفران يمه شوفيلنا واحد من جماعتج بلكت يجيبلا الاوكسجين
فزيت كتلا : ايوب علي مختنك ومحتاج اوكسجين لازم اروحله
كال : بدلي نروح سوا
كمت بدلت ولبست عباتي وصحت سرى تصعد يم علي ..
وخابرت طبابة الحشد يجهزولي اسطوانة الاوكسجين
كالوا : موجود بس عدنا نقص سيارات ونقل اذا تريدون تعالوا انتم اخذوا
كمنا اني وايوب ركب ويايا رحت استلمت القنينة منهم. عقمتها وصعدوها بسيارتي .. ورحت لبيت اهلي صحت نسرين ساعدتني ننزل القنينة وسحبناها وحطيتها لعلي .. وهو يكح باستمرار ما يوكف ايوب بعكازاته واكف بعيد انقهرنا عليه حيل كمت ابجي .. كلش خفت عليه
اجاني امي رادت تسلم عليه كتلها : لا تسلمين ادخلي جوا لا اكون حاملة فايروس لإن جنت بالمستشفى .
سلمت عليها واطمنت عليها … ورحت رجعت لبيتي تعقمنا اني وايوب يلا دخلنا .. وتلث تيام اني اروح ارجع على علي واغيرله قنينة الاوكسجين
لحد ما انصكعت فوك راسي وخابرتني نسرين كالتلي غفران : خالتي كاعد تكح ومريضة
اني من كالتلي هيج ماتن رجلية ..
خابرت خواتي سويتلهن اتصال جماعي نطيت من البجي كتلهن ادعن الله امي ما تكون معدية من علي .
مريت عليها اخذتها ورحت سويتلها الفحص ..
وطلع عدها كورونا .. لطمت على وجهي من دريت
غير الهوى يطب لريتي اختنكت حيل .. شكد اتعامل ويا الناس واسمع حالات صعبة ونروح ونساعد ونجهز بس من وصل الفايروس لعائلتي وامي .. اهنا صار الفايروس مو مجرد فايروس شبح يحوم حواليا
امي كامت تبجي من درت
كمت اواسي بيها ولتخافين وسهلة ان شاءالله وراح تطيبين ..
صعدتها بالسيارة وخواتي حركن التليفون عليه حرك .. وصلتها للبيت وحجرتها ويا علي وانطيتها علاجها
ورديت على خواتي .. بلغتهن لو نصبن عزا من درن امي بيها كورونا ..
كالت هديل : اني ما اكدر اكعد انعل بيتي لابو رجلي اني راح اجي لامي اداريها واكابلها وخر* حتى لو يصير بيه كورونا المهم اخدم امي
حجرناها ويا علي واجت هديل كابلت امي تخدمها تسهر تراقب حالتها ..
اني سيارتي سويتها ناقلة اوكسجين لامي وعلي
علي كام منها وطاب بس امي كلش انتكست ..
بس اعتزلت ايوب من ارجع احجر روحي بالغرفة الصغيرة وياهذني الصبح ويرجعني المغرب وهديل تلزم ويا امي من المغرب لليل
امي احتاجت دخول مستشفى ما قبلت ادخلها
رحت انوسطت الها وجبتلها دكتور للبيت يعالجها ويشرف على حالتها
لان اغلب اللي يدخلون المستشفى كاموا يموتون اكثر من اللي يبقون ابيتهم
الا ما بيوم امي ما تتنفس والدنيا مغرب تكح وكوة تحجي
حيلي مهدوم عليها وعيوني مورمة من البجي ومرعوبة لا يصيرلها شي .. لزمت بيدي على غير العادة وكالتلي : ابقي يمي
كتلها : اجيج باجر علاوي مناك وايوب .. شمحتاجة اجيبلج
كالتلي : محتاجة اتضلين يمي رايدة شرفتج يايمة لا تعوفيني
كتلها : ما اعوفج ولا اعوفج يا ايوب يا ابني اي الدنيا كلها يم رجليج .. اخدمج بيحيلي وصحتي وعافيتي من اروح فدوة لعيونج
بقيت لابسة الكمامة .. وهي لازمة بيدي
كالتلي : غفورة يمه سجلي بتليفونج
– شسجل !؟
– سجلي
فتحتلها تسجيل وكتلها احجي
كالتلي هالبيت يمه ما يورثني بيه احمد وعلي البيت بس البناتي الولد انطيتهم حصصهم
كتلها : كافي يمه لا تحجين عليج الله لا تكسريني لا توصين راح تكومين بخير وسلامة
– الموت حك ييمه وما ادري باجر شيصير خليني احجي البكلبي
كامت تحجي ودموعي تجري
كالت الفلوس الحطيتهن على بيتج حلالج بس الاطلبه منج حجه وعمره اذا ما صحلي حيل احج واعمر .. وهالبيت يضل بوصايتج اذا متت خواتج يمه محكومات انت انت اقلها تديرين امرج ورجالج بظهرج وعينه مليانة ما يطمع بفلوس ولا احد يكدرلج وهو موجود امانة ييمة اديرين بالج على عليوي وايوب اتحملي يمه ايوب طيب ويحبج بس كل الزم اعصاب واعصابهم ما تنحمل وهنيال المرة التطيحيلها بزلمة كلبه طيب وايوب اخو خيته اتحملي واتحملي الدنيا وياه لا تصيرين انت والدنيا عليه واني ادري اذا غمضت عيني انت بيد امينه ما اشغل بالي عليج بس لا تنسين اخياتج ييمه اسيل حالتها مو زينة .. ونوره رجلها بخيل واني حاسبتلهن مصيرف كل شهر اذا الله مكنج لا تكطعين من اخياتج ييمه
– يمه كافي عليج الله كلبي راح يطك لا تحجين هيج
– لا تبجين يمن كون دموعج غسلني .. لبة كلبي انت يييمه هذا الهوى اليمر انت ووليدج تلوعت بمرضت ايوب جيف حرمني منج بس معذور ومبري الذمة مريض ..
– يمج ما اعوفج والله .. كلها تروحلج فدوة
كامت توصيني بالتطلبها واتوصيني باحمد ابتعد منه وعلي اسنده واوكف وياه واحنن رجلي عليه يريحه بالشغل ما يخلي يتعب .. وبقت توصي وتحجي .. وكلشي منها سجلته
خابرت ايوب وكتله: راح ابات
كالي : وابنج
– ايوب امي محتاجتني وحيل مريضة ما اكدر اعوفها
– الله كريم الله يكومها بالسلامة يلا راح اخلي سرى تساعدني بيه شسوي
سديته منه وخابرت هديل ما تجي ورجعت لامي وكعدت اداريها للصبح .. لحد الستة الصبح كالتلي : روحي يمه نامي اذا تعبتي ادري يروحي عمت عيني تعبتج
– اسم الله على عينج يمه تعبج راحة ينور يعيوني
بقيت لازمة ايدها واني لابسة جفوف .. وهي تباوعلي .. بقت صافنة بوجهي واني اغفي .. نزل النوم على عيوني وحطيت راسي ع الكرسي وايدي بيدها وهي تباوعلي .. نمت
عساني لا نمت ولا شفت النوم بعيني
شلون اجا لروحي النوم شلون كدرت انام وشنومني !؟
فتحت عيني امي فاتحة حلكها .. وعيونها شوية ولازمة باطراف ادية كاعد اسحب ايدي من اديها .. اديها صلبه كوة جريت ايدي منها
فزيت كمت انده بيها : يمممه احجي وياي يمه ..
صرخت علييييييييييييي .. يمه افتحي عيونج اني غفران يمج انت مو مشتاقتلي ليش غمضتي عني يييييمه افتحي عيونج
حطيت راسي على كلبها الجان يوسعنا كلنا ما بيه حياة وحضنها الجان حيل دافي صبح بارد … صرخت من كل حيلي : ولج يمممممه ….

يتبع….

لقراءة الفصل التالي : اضغط هنا

لقراءة باقي حلقات الرواية اضغط على : (رواية صوت من المجهول)