رواية انت مرادي الفصل الثالث والثلاثون 33 بقلم يارا ابراهيم

رواية انت مرادي الفصل الثالث والثلاثون 33 بقلم يارا ابراهيم

رواية انت مرادي البارت الثالث والثلاثون

رواية انت مرادي الجزء الثالث والثلاثون

رواية انت مرادي الحلقة الثالثة والثلاثون

كانت يارا بتتوجع من الألم ايجت الدكتورة والممرضين وخرجوا العيلة برا، كان واقف مراد وهو قلبه بيتنفض من الخوف خايف معشوقته يحصلها حاجه، كان الجو مشحون بالتوتر عدي الوقت والساعات وبرده لسه ماخرجتش فقام مراد من مكانه وقال……….
مراد:/هما اتأخروا ليه بقالهم ست ساعات معقول يارا حصلها حاجه.
عمر:/اهدي يابني دي ولادة مش لِوز بتتشال يعني بيتأخروا ده طبيعي.
ياسمين:/اطمن يا حبيبي خير بإذن الله.
فجأة سمعوا صوت عياط طفل فقالت نجلاء بفرح…..
نجلاء:/يا منتا كريم يارب.
وبعدين اتلموا علي مراد يهنوه خرجت الدكتوره فسألها مراد عن حالة يارا فقالت…..
الدكتوره:/ماتقلقش هي الحمد لله كويسه محتاجه ترتاح بس.
مراد بفرحه:/تمام متشكر.
دخل مراد علي يارا اللي كانت نايمة بتعب وقرب منها وقال……..
مراد بهمس:/كنت متأكد أنها هتطلع حورية زيك وبالفعل صدق حدثي.
فتحت يارا عينيها وفي ابتسامة بتترسم علي وشها وقالت……..
يارا:/غريبة أمال أنا ليه شوفتها شبهك…. نفس ملامحك الحلوة وعينيك اللي مغلباني وابتسامتك اللي كانت سبب حبي ليك، كل ده وبتقول شبهي.
مراد بحب:/ايوا شبهك أنا ماعنديش قلب كبير وحنين اوي زيك ولا شعر حرير بعشقه زيك برده والأهم من كدة رقتها وحنيتها اللي أكيد منك مش مني.
قاطع كلامهم مخربة اللحظات السعيدة هنا وهي بتقول…….
هنا:/هاتوا البت عليا…. هي لا شبهك ولا شبهه هي شبه خالتو حبيبتها.
مراد بقرف وهو بياخد الطفلة:/أولا ماشمهاش بت! وثانيا شبهك اي جتك داهية في وشك اللي عامل شبه الحيطة هتشبهي بنتي المزة بيكي ولا اي.
هنا بعصبية:/بقي انا حيطة يا حنفية المجاري.
الكل سكت فجأة وهنا لفت ليهم وهما بيبصوا بخوف فقالت……
هنا:/اي بتبصوا ليه ومالكم سكتوا فجأة.
قال عمر بخوف:/ لا لا ماعرفهاش.
لفت هنا لقت مراد عينيه حمرا وبيشمر ايدة جريت ورا عمر………..
هنا:/عمر اخر مره والله اخر مره.
عمر:/لا ماهو ماتخافيش مش هيكون فيه مرة جايه هيخلص علينا دلوقتي.
هنا:/اتصرف يا عمر أنا مراتك.
عمر:/طب اتشاهدي وسيبي الباقي علي الله.
قرب مراد منهم فقال عمر……..
عمر:/بتهزر يا صاحبي وبعدين هي هبلة هتاخد برده علي كلام الهبل.
مراد:/تصدق اقنعتني.
عمر:/تسلم يا كوتش.
هنا:/لا انا مش هبلة أنتم هتزيطوا ولا اي.
مراد لف ورجع فقال عمر…….
عمر:/لا خدها هي تستاهل والله أنا مش هدافع عنها.
مراد بضحك:/وربنا يابني انا بشفق عليك دي تجلط.
هنا:/هي مين؟
مراد:/انتي عندك مانع.
هنا:/لا لا براحتك خالص.
يارا:/طب كفاية كده ويلا علشان عايزة امشي واروح البيت.
مراد:/استني يومين علشان نطمن عليكي.
يارا:/لا مش قادرة عايزة اروح وبعدين انا ماشوفتش غيث هو انتم مش عرفتوه اني بولد.
فهد:/لا انشغلنا معاكي ونسينا.
يارا:/طيب يلا عشان نروح.
مراد بغيظ:/لا مافيش مرواح هنمشي بكرا.
يارا:/بس.
مراد:/مافيش بس انا قولت هنمشي بكرا…. يلا هروح اجيب لبس لينا وللبيبي وفكري في اسم لحد ماجي علشان نروح انا وفهد نسجلها.
يارا:/حاضر بس ماتتأخرش.
مراد بإبتسامة:/من عيوني يا عيوني.
لف مراد ومشي فقالت هنا……
هنا:/ها بقي يا مرات ابني هتسمي البيبي اي.
يارا بضحك:/انتي مابتنسيش.
هنا بضحك:/لوءة 😂.
يارا:/ماشي نشوف الموضوع بعد 20 سنه كده تكون كبرت.
هنا:/اه ما… ايييه 20 اي يا عنيا ده أنا هكون في التربة لا لا قربي شوية.
يارا حضنت هنا وقالت بجدية:/ ماتقوليش كده أحنا مش هنموت غير سوا أنا ماقدرش اعيش من غيرك.
بادلت هنا الحضن ليارا وقالت:/أنا مش عارفه من غيرك كنت هعمل اي ربنا يخليكي ليا يارب.
قاطعتهم ياسمين وهي بتقول:/نتأسف علي قطع الحديث بس انا جعانه.
هنا:/تصدقي صحيح أنا كمان.
هنا:/طيب يا فهودي يا حبيبي خد عمور حبيب مراته ورحوا هاتوا حاجه ناكلها.
بص الاتنين لبعض وخبطوا كف علي كف وراحوا يجيبوا الغدا……..
بعد شوية رجع فهد وعمر ومعاهم الأكل، وكانوا كلهم قاعدين حوالين يارا، اللي كانت بتحاول تأكل وفي نفس الوقت تهدي بنتها الصغيرة. مراد قرب منها وقعد جنبها وقال بابتسامة وهو يبص للبنت:
مراد:/ شوفتي بقا، دي نعمة من ربنا لينا.. ربنا يحفظها ويحفظك يا روحي.
يارا بابتسامة حب:/ ويحفظك لينا يا حبيبي، أنا عمري ما كنت هبقى سعيدة كده من غيرك مرينا بحاجات كتيرة بس حتي في وسط المشاكل ماكنتش عارفه افكر من غير وجودك ولا عارفه اتعامل.
هنا بابتسامة واسعة:/ أيوة يا جماعة كده، الحب يخش البيت من أوسع أبوابه، خلينا نشوف عيلة مراد ويارا بقى هتكون عاملة إزاي.
عمر بضحك:/ مش عيلة مراد ويارا بس، لا كمان عيلة “هنا وعمر” اللي للأسف اكتشفت إن نصها جنان وعبط.
هنا بعصبية مصطنعة:/ بقولك ايه يا ابن الناس، بدل ما ترجع معايا البيت، انزل نام في العربية!
الكل ضحك، وياسمين قالت وهي بتحط الأكل:/ يلا يا جماعة، خلينا نأكل قبل ما الأكل يبرد، وبعدين نقعد نفكر هنسمي الصغيرة ايه.
مراد وهو بيبص ليارا بحنان:/ أي اسم تختاريه أنا موافق عليه، طالما أنتِ اللي هتسميها.
يارا ابتسمت وقالت:/ طب إيه رأيكم في “حفصه”؟
الكل بص لبعض وفرحوا بالاسم، هنا قالت بحماس:/ حلو أوي، حفصه مراد… أميرة صغيرة على قد الاسم.
مراد ببسمة رضا:/ يبقى اتفقنا…حفصه مراد الألفي.
يارا بصت لبنتها وهمست:/ ربنا يحفظك يا حبيبتي ويخليكِ ليا ولأبوكي.
مرت الأيام، ويارا بدأت تتعافى بسرعة وسط رعاية مراد والعيلة كلها، وكل لحظة كانت بتقضيها مع بنتها الصغيرة حفصة كانت بتحسها نعمة كبيرة من ربنا. مراد كان مش سايبهم لحظة، كل شوية يبص لحفصة بحب ويطمن على يارا، وعمر وهنا طبعًا كانوا مكملين دوشة العيلة المعتادة.
يوم خروج يارا من المستشفى كان يوم مميز، الكل كان مستنيها برا، ومجرد ما خرجت على كرسي المستشفى، مراد قرب منها ومد إيده ليها وقال:
مراد:/ يلا يا روحي، بيتنا مستنيكي.
يارا بابتسامة دافية:/ وأنا كمان مستنياكم، وحشتوني رغم إني معاكم.
هنا بمزاح:/ حلو الحب ده، بس معلش يا جماعة إحنا جايين نبارك مش نحضر فيلم رومانسي.
ضحك الكل، وتحركوا على البيت، وهناك كان الاستقبال أسطوري… زينة في كل مكان، وبالونات مكتوب عليها “حفصة نورت الدنيا”، وياسمين كانت مجهزة حلويات وضيافة على أعلى مستوى.
مراد وهو ماسك حفصة بين إيديه:/ سبحان الله من ساعه ما نورت الدنيا وهي جايبه البركة معاها.
يارا بإبتسامة:/ ربنا يباركلنا فيها ويخليك لينا يا مراد بجد ربنا ما يعود الايام دي تاني كنت حاسه اني هموت.
مراد وهو بيسكت يارا:/ششششش بعد الشر عليكي متقوليش كده احنا غلطنا وعرفنا غلطنا خلاص.
مراد وهو بيحضن يارا وحفصة:/ بصراحة، أنا مش عاوز أكتر من كده، عندي أجمل بنت وأجمل زوجة، وعيلة مجنونة بس مفيش أحسن من كدا.
يارا وهي تحط راسها على كتفه:/ وأنا عندي أحسن راجل في الدنيا… ربنا يخليك لينا يا مراد.
مراد وهو يبصلها بحب:/ طول ما أنا عايش، مش هسمح لحد يضايقك أو يزعلك حتي لو الحد ده انا.
هنا:/يلا يا عصافير الحب مش وقت نحنحه خالص والله.
مراد بتريقه:/الله يرحم أيام ماكنتي بتقولي يا بيبي.
فقال عمر من وراهم:/هههههه ولسه بتقولها والله 😂.
هنا قالت وهي بتخبط عمر:/بقي كده بتسيحلي قدام صاحبك يا عمر.
عمر بحب:/هو انا اقدر يا قلب وروح عمر.
مراد بتريقه:/شكل في جوز عصافير بيتنحنحوا هنا مش احنا بس ولا اي يا يارا.
يارا بضحك:/حصل الحب ولع في الدرة هههههه 😂.
هنا بضيق لعمر:/تعال نمشي أحسن لو استنينا شويه ممكن نو.لع في بعض اسمع مني.
عمر بضحك:/أنا فعلا بقول نمشي لنتحسد.
جه حمزة من وراهم وقرب علي حفصه وهو بيقول….
حمزة:/هاتوا اشوف مراتي.
مراد بإستغراب وهو بيمسك حمزة زي الحرامي….
مراد:/مرات مين يالاا.
حمزة:/حفثه مراتي يا انكل هو احنا مش قولنالك .
مراد:/لا مش قولتلي.
حمزة:/منا خلاص خطبت حفثه ولما اكبر هتجوزها.
مراد بشك:/ده تفكير أمك الحربايه صح.
حمزة:/اه بس انا عجبتي المزة.
مراد بتبريق:/هي مين دي يالا اللي مزة.
حمزة ببراءة:/بنتك اللي مزة.
مراد بزعيق:/عمررررر خد مراتك وابنك وعلي بيتكم علشان انا حاسس بالسكر بيعلي.
عمر بضحك:/ههههههع معلش يا ابو مرات ابني.
مراد بزعيق:/برااااا.
مرت الأيام، وحفصة كبرت وسط حب العيلة، وكانت ضحكتها تنور البيت كله. مراد ويارا كانوا عايشين أجمل أيام حياتهم، ومع كل لحظة كانت العلاقة بينهم بتقوى أكتر وأكتر. العيلة كانت مستمرة في دوشتها المعتادة، وهنا وعمر بقوا جزء لا يتجزأ من اليوميات المجنونة.
بعد سنتين…
كان البيت كله في حالة فوضى، حفصة بتجري في كل مكان، وهنا بتحاول تلبس ابنها الصغير اللي عمره سنتين، ومراد قاعد على الكنبة بيحاول يربط كرافتته لكنه مستسلم تمامًا. يارا خرجت من أوضة النوم وهي بتضحك على المنظر، وقالت:
يارا:/ مراد، أنت بقالك ربع ساعة بتحاول تلبس كرافتة!
مراد بإحباط:/ والله العظيم حاجة غريبة! أنا ممكن أدير شركة كاملة، لكن الكرافتة دي مش راضية تتربط!
حفصة قفزت على الكنبة وقالت وهي تضحك:/ باباااا فاشل في الكرافتة!
مراد بص لحفصة بدهشة:/ إيه ده! مين علمك الكلمة دي يا بنت الألفي؟
حفصة ببراءة:/ ماما.
يارا بضحك وهي رافعة إيديها باستسلام:/ والله ما قولت حاجة!
هنا من بعيد وهي بتحاول تلبس ابنها:/ أنا بقول ناخد صورة للعيلة النهاردة، بمناسبة فرح الواد غيث.
عمر وهو بيعدل هدوم حمزة اللي رافض يقف:/ والله فكرة، بس متأكدة إن مراد هيعرف يلبس الكرافتة الأول؟
مراد وهو بيرمي الكرافتة:/ لااا خلاص مش لابسها!
حفصة وهي بتقرب من مراد وتبوسه على خده:/ متضايقش يا بابي، أنا بحبك بالكرافتة ومن غيرها.
مراد بضحك:/هههههه بكاشة زي هنا.
يارا وهي بتحضنهم:/ ربنا يخليك لينا يا مراد، أنت النعمة اللي بجد ربنا رزقني بيها.
هنا:/مش وقته يا عصافير الحب الواد غيث علي نار علشان يتجوز.
عمر ومراد في سرهم:/مستعجل علي الهم بدري بدري.
يارا وهنا في نفس الوقت:/ها بتقول ايه يا حبيبي علي صوتك اصلي ماسمعتش.
مراد بص لعمر وقال:/يلا يا عمر دلوقتي الواد غيث مستني يلا قبل ما نتعمل كفته.
عمر:/أنا بقول كده.
طلعوا هما الاتنين، ويارا وهنا ضحكوا وبعد مدة طلعوا……..
كان الفرح فخم لدرجه مش طبيعية كانت القاعه كبيرة جدا وحضر رجال اعمال وكبار البلد، ماهو عيلة الالفي مش اي عيلة ولا اي، كان غيث قاعد جنب المأذون وقدامه، ذاكرته لجعلت لورا سنتين، افتكر لما كان بيحب يارا أو مش بيحبها كان متعلق بيها بس وده اللي اكتشف، ووقع الاختيار علي الدكتورة اللي كانت في المستشفى لو فاكرين، نرجع تاني جه ابو العروسة وقعد وكتبوا الكتاب، الجملة الوحيدة اللي سمعها غيث:
“بارك الله لكما وبارك عليكما وجمعا بينكما في خير”
سمع الكلمة دي قبل كده بس اول مره يحس بطعمها، قد اي الحلال حلو وانه بعد كل التعب ده ربنا رضاهم…
عدي الفرحه وفضل أهل العروسين بس فقالت يارا بدموع لغيث……
يارا:/يعني خلاص كده مش هلاقي حد يدلعني ولا يقف معايا في تفاهتي.
غيث حضن يارا وقال:/أمال انا هروح فين بس…. أنتي مش اختي بس انتي بنتي كمان وبعدين كلها شهرين عسل وبعدين هرجع اقرفك.
يارا بإستغراب:/هو مش كان اسمه شهر عسل بقي شهرين امتي.
غيث بضحك:/نحن نختلف عن الآخرين.
قرب مراد وشد يارا لحضنه بتملك وقال بإبتسامة ساذجه………
مراد:/تروح بالسلامه طول انت بس ومالكش دعوة بينا.
غيث بضحك:/لسه زي مانت يابني دي اختي.
مراد:/ولو برده أنا ماعنديش الكلام كده.
هنا:/خلاص يا جماعه ده فرح…. وتعالوا يلا علشان نتصور كلنا.
“وقف كل واحد بمراته وعياله وقف الاول خالد ونجلاء وجنبهم مها،وبعدين مراد ويارا وحفصه، وبعدين جنبهم عمر وهنا وقدامهم حمزة وبيبي في بطن هنا، وبعدين فهد وياسمين وقدامهم ليان و مالك، وبعدين غيث وجنبه مراته”
هنا:/يلا قولوا تشيس.
الكل بضحك:/تشيسس.
ماكنش حد فيه يتوقع في يوم انه هيحب التاني ويتجوزة، قصه حب كل واحد فيهم مختلفه عن التانية ولكن مشتركة في حاجه، وهي إحترام وتقدير كل طرف للطرف التاني وانه يتشاركوا كل حاجه سوا، والأهم أنهم ماينسوش ربنا، كل ماتنسوا افتكروا انه وجودنا في الدنيا مش علشان ناكل ونشرب لكن علشان نعبد ربنا أولا ثم نعمر الأرض ولازم وضروري تكون التربية صالحة علشان ينشأ مجتمع صالح وواعي.
وبس يا حلوين لحد هنا تكون خلصت روايتنا، الرواية اللي كنا بنزل علي زعلهم ونفرح لفرحهم عيشنا فيها مشاعر ممكن مش نعيشها في الواقع والأهم اني استمتعت جدا معاكم.

لقراءة باقي حلقات الرواية اضغط على : (رواية انت مرادي)