رواية موضوع عائلي 3 (بيت الهنا) الفصل الرابع والعشرون 24 بقلم رحاب القاضي

رواية موضوع عائلي 3 (بيت الهنا) الفصل الرابع والعشرون 24 بقلم رحاب القاضي

رواية موضوع عائلي 3 (بيت الهنا) البارت الرابع والعشرون

رواية موضوع عائلي 3 (بيت الهنا) الجزء الرابع والعشرون

رواية موضوع عائلي 3 (بيت الهنا) الحلقة الرابعة والعشرون

«إِن غِبت لَم أَلقَ إِنسانًا يُؤَنِّسُني
وَإِن حَضَرت فَكُلُّ الناسِ قَد حَضَروا»
_علي النيل في المكان اللي بتبقي قااعده فيه ديما اول ما وقفت بعربيتها هنااك اتصدمت اول ما شافت يوسف قااعد هناااك وشكله سرحان جدا، اتردت تنزل من العربيه وتروحله بس في الاخر فعلا راحتله هناك وهو اول ما شافها قبل ما تقول ولا كلمه سااب المكان كله وركب عربيته ومشي وهي بصتله بحزن وندم وقعدت مكانه وبصت للنيل قدامها بدموع، وما اخدتش بالها انه وقف بعربيته بعيد شويه عنها وفضل متابعها وهي قااعده من المرايا بتاعت عربيته وهو كمان عيونه اتملت دموع وفجأه اتحولت ملامحه للقلق والخوف اول ما شااف عربيه فيها تلات شباب. واقفه قريب منها وعمالين يتكلمو ويشاورو عليها من غير ما هي تاخد بالها، والمشكله ان المكان هادي جدا وما فيش ناس فيه..
_رجع بعربيته بسرعه عندها ونزل من العربيه وقرب منها وقال بجديه..
يوسف
قومي امشي يلا..
رضوي اتفجئت من تصرفاته وقالت
وانت مالك انا قااعده هنا..
يوسف بغيظ
مش وقت عِند وخلاص حضرتك يلا امشي وما ينفعش تقعدي في مكان زي ده لوحدك بالليل كده..
رضوي
مالكش دعوه امشي يا يوسف وسيبني في حالي..
_نزلو في الوقت ده الولاد من العربيه وقال واحد منهم بخبث..
الولد
ما تسيبها في حالها يا رخمم هي مش عايزه تمشي معاك..
_قامت رضوي بسرعه ومسكت في دراع يوسف بتلقائيه وقالتله بخوف..
رضوي
مين دول؟.
يوسف بغيظ.
مش عارف مين دول، وانتو يا شباب دي قريبتي ومش رجوله التصرفاات دي..
الولد
وانت بقي يا روح امك هتعرفنا الرجوله ازاي..
يوسف بعصبيه
لا انا هعرفك ازاي تجيب سيرة امي علي لسانك يا خفيف..
_قال يوسف كلامه وضربه بالبوكس في وشه ورضوي صوتت بخوف اوول ما اتلمو كلهم علي يوسف ومسكوه وضربوه بقوه، وهي دموعها نزلت بخوف وفضلت تترجاهم يسيبوه، فبعد عنه الولد اللي كان بيضربه وبص لرضوي بخبث وقال..
=خلاص بقي يا شباب شكلهم حبيبه واحنا مش هنرخم عليهم اكتر من كده..
_وسابو يوسف فعلا اللي وقع علي الارض وهو ماسك وشه اللي بينزف بألم، وهي قربت منه بسرعه وقالت..
رضوي بخوف
انت كويس يا يوسف؟
بصلها بحده وقال
مبسوطه انتي دلوقتي صح، انا تعبت والله ده انتي طلعتي ميتين اهلي معاكي..
رضوي بحزن
وانا مالي انا هو انا اللي قولتلك تضرب الولد في الاول وتخليهم يتخانقو معاك، ما تلومنيش علي غباءك لو سمحت
يوسف بسخريه
معاكي حق انا فعلا غبي عشان حبيت واحده انانيه زيك، عشان لحد النهارده انا متعشم فيكي تعتذري وتقولي لا ده بيحبني بجد وهديه فرصه انا فعلا غبي يا رضوي..
رضوي بحزن
طيب خلينا نروح مستشفي انت مناخيرك بتنزف ومش موقفه، وبعدين نبقي نتكلم..
يوسف بحده
انا مش عايز اتكلم معاكي، انتي خدتي اللي عايزااه وخلصنا خلاص سبيني بقي في حالي
رضوي بحده
هو ايه اللي انا اخدته معلش، انا رفضتك بسبب تصرفااتك يا يوسف ولا نسيت انت قولتلي ايه وعملت معايا ايه لما كنا في الجيم، تصرفاتي كانت رد فعل لتصرفاتك..
يوسف بغضب
انا عملت كده عشان غيرت عليكي وما عرفتش اتحكم في نفسي وانتي عارفه كده كويس، انتي بقي ردتيها بأنك اهانتيني قداام اهلك كسرتيلي قلبي بجد يا رضوي خلتيتي اتوجع بسبب اني حبيتك..
واتملت عيونه دموع وقال بحزن
وعلي فكره حتي لو ما كنتش غيرت عليكي في الجيم ودايقتك انتي كنتي هترفضيني عشاان الموضوع بتاعنا باين من الاول ده حب من طرف واحد انا اللي حبيت وبس، وانتي استغليتي حبي ده انك تنسي بيه حبيبك القديم كمال اللي سابك ووجعك عرفتي تنتقمي لكرامتك بس من الشخص الغلط من واحد حبك بجد وكان مستعد يعمل اي حاجه عشاانك..
نزلت دموعها بحزن وردت عليه وقالت
والله العظيم انا ما كنتش بستغلك..
يوسف
انتي كداابه..
رضوي
لا مش كدابه والله والله تاني انا كنت عايزه اديك فرصه بس انا كنت خايفه منك وخايفه من الارتبااط اصلا، وبعدين انت عملت ايه بعد ما رفضتك ما تاني يوم لقيت صورك ماليه النت مع الاشكال الزبااله اللي انت متعود تسهر معاهم..
يوسف
مالكيش دعوه انا اعمل اللي انا عايزه..
رضوي
ما تعمل هو انا مسكاك بس ما ترجعش وتقولي انتي السبب يا رضوي لان ده طبع فيك وحتي لو كنت وافقت بيك انت عمرك ما كنت هتتغير..
يوسف بغيظ
يبقي المشكله فيكي انتي اللي لازم تتخاني ما بتعرفيش تكفي اللي معاكي..
بصتله بحزن وقالت
معاك حق عشان كده انا لا عايزاك ولا عايزه غيرك، اتفضل امشي يلا وسيبني في حالي.
اتنهد بضيق وقال
امشي انتي الاول انا هوصلك وبعدين همشي..
رضوي بحزن
نروح المستشفي الاول..
يوسف بسخريه
خايفه عليا يعني؟
رضوي بغيظ
لا ده واجب انساني مش اكتر..
يوسف
طيب خديني بعربيتك انا مش هعرف اسوق.. اسنديني يلا..
رضوي
ما تقوم لوحدك..
يوسف بخبث
لا هتسنديني عشان انا اتضربت للمره اللي مش فاكر كام بسببك..
_ابتسمت بهدوء ومسكت ايده وخلته يقوم وركبته عربيتها، وركبت هي جنبيه وقبل ما تتحرك بالعربيه اداها موبيله اللي بيرن وقال.
يوسف
خدي ردي عليها وقوليها تيجي علي المستشفي وتجيب معاها يزن..
بصت رضوي علي الرقم اللي بيرن وقالت بغيظ
وانا ارد ليه علي حبيبتك انا واتتيل انزل اصلا انا مش هوصل حد..
بصلها بخبث وقال
امي علي فكره اهدي علي نفسك شويه..
رضوي
وانا اعرف منين انها امك وانت مسجلها العشق وحاطط جنب اسمها قلب احمر
يوسف
طيب ما هي العشق فعلا الوحيده اللي بتحبني من غير مصلحه، اخلصي ردي عليها وشوفي هتاخديني فين وقوليلها تيجي ورانا..
اخدت منه رضوي الفون وردت علي شهد وقالت
الو..
شهد
مين معايا وفين يوسف؟
رضوي
هو يوسف اتعرض لحادثه بسيطه وانا هاخده وو..
شهد
نعمم ازاي اتعرض لحادثه وانتي مين اصلا وابني فين؟
رضوي
اهدي حضرتك دي حاجه بسيطه ابنك اللي فرفور اصلا..
شهد بحده
فرفور في عينك انتي مين يا بت انتي؟..
_بصت رضوي بغيظ ليوسف اللي كان عامل نفسه تعبان وكاتم ضحكته، وردت عليها وقالت بنفاذ صبر..
رضوي
انا البشمهندسه رضوي وهاخده علي المستشفي هبعت لحضرتك اللوكيشن..
شهد بغيظ
امممم طيب انا جايه حالا ياريت تخلي بالك منه لحد ما اجي يا اسمك ايه انتي.
_قالت شهد كلامها وقفلت في وش رضوي اللي اتنهدت بغضب وقالت ليوسف بحده
رضوي
علي فكره هي لولا انها ست كبيره وفي مقام مامتي انا ما كنتش هسكتلها..
يوسف
تعبان يا رضوي بسرعه وصليني المستشفي..
ـ بصتله بغيظ واتحركت بالعربيه وراحت المستشفي اللي هيتعالج فيها يوسف من الكدمات اللي في وشه..
ــــــــــ #بقلم_الكاتبه_رحاب_القاضي ــــــــ
_في بيت الاستاذ حسن الباب خبط وهما كلهم قاعدين بيتفرجو علي التلفزيون وليلي قالت..
ليلي
قومي يا روفان افتحي الباب..
روفاان
ما كلهم قاعدين اهو اشمعنا روفان يعني..
حسن
وبعدين احنا اتفقنا علي ايه؟
روفان بخوف
قصدي حاضر يا ماما يا ست الكل هو انا اقدر اقولك لا..
وقامت تفتح الباب وليلي قالت لحسن بصدمه
انت ازاي بتخليها تسمع الكلام كده؟
حسن بخبث
مالكيش دعوه خليكي في خيبتك..
ضربته علي كتفه وقالت
طيب افتكرها يا حسن..
رجعت روفان وهي بتضحك وقالت
كلم يا بابا في جماعه ضيوف عايزنك..
حسن
انتي بتضحكي كده ليه وضيوف مين؟
روفان
ههههه روح شوف بنفسك هتتصدم زيي والله..
_قام حسن عشان يشوف مين اللي علي الباب واتصدم فعلا هو كمان لما شااف عزالدين لابس بدله وواقف وجنبيه طارق هو كمان لابس بدله وماسك ورد وشوكلاته..
حسن
ايه ده انتو عايزين ايه؟..
عز برسميه
ايه يا استاذ حسن هتسيبنا واقفين علي الباب كده كتير ولا ايه مش هتقولنا اتفضلو..
حسن
انت بتتكلم كده ليه ومن امتي بقولك اتفضل ما انت بتدخل زي الطور من غير اذن..
طارق
احنا جايين لحضرتك في موضوع شخصي يا عمي مش هينفع علي الباب كده..
حسن بغيظ
عم مين يا ابن الهبله، يا ليلي تعالي شوفي الغلب والتفاهه اللي انا فيها..
جات ليلي وقالت بأبتسامه واسعه
يا اهلا. سهلا كده يا حسن سايب النااس واقفين علي الباب اتفضلو يا جماعه نورتونا..
_دخل عز وعمل نفسه بيتفرج علي الشقه وهو دااخل وطارق قال لحسن وهو عامل نفسه مكسوف..
طارق
احط الحاجات دول فين يا عمي..
ذقه حسن بقوه وقال
يا عم خش مش ناقص عبط انا…
_قعد عز وحط رجل علي رجل وجنبيه طارق وراحت ريناد وهنا قعدو بعيد عنهم شويه ومعاهم روفان وروز وهما بيضحكو، وحسن قعد قدامهم وقال..
حسن
ممكن افهم ايه اللي انتو عاملينه ده؟
طارق
هو مش انت اللي قولت اجي اخطب هنا وانا معايا ولي امري اديني اهو جيبتلك ولي امري
حسن
وحياة امك.. التافهه ده ولي امرك، وانت فاكر اني كده ممكن اوافق بيك لما تجيبلي عمك اللي ما حدش تاعبني في حياتي قده يتوسطلك في جوازه، ده انا من اولها اهو بقولكم ما عنديش بنات للجواز…
ليلي
جرا ايه يا حسن الكلام اخد وعطا، قولي الاول يا استاذ عز تشربو ايه؟
عز نزل رجله وقال وهو بنيم شعره علي جنب
مين الانسه حضرتك تبقي اخت العروسه الصغيره مش كده..
ضربه حسن برجله في رجله وقال بحده
اتلمم بقي بدل ما اقوم اديك علي وشك، وانتي كمان اتنيلي اقعدي مش ناقص هطل انا..
عز
يا استاذ حسن الموضوع مش مستاهل عصبيه ده جواز يا اااه يا لا مش حكايه يعني.
حسن
انا بقول لا اهو اتفضلو بقي بره وسيبوني قاعد مع عيالي..
طارق
بص سيبك من عمي خالص يا بابا انا اهو جايلك في خطوبه رسميه وبطلب منك ايد هنا ولو انت وافقت هاخدك واخدها ونروح مشوار صد رد لبلدهم اخطبها من خالتها ولا عمتها دي..
عز قلع الجرافته وجاكيت البدله وقال
حلو اووي الكلام ده حل الموضوع ده انت وابوك وانا خلاص دوري خلص، ريناد اعمليلي شاي واي حاجه تتاكل بسرعه.
ريناد
عينيا يا زيزو حاضر..
طارق
يا بابا رد عليا وسيبك من اخوك ده
حسن
مش كان ولي امرك من شويه، المهم خلينا نتكلم في الجد بقي انت معاك ايه هتتجوز عليه الوظيفه بتاعتك في الجامعه
طارق
ايوه وكمان الكافي انا اهو بشطب فيه عشان افتحه
حسن
وهتتجوز فين هنا معانا في الشقه
طاؤق
لا طبعا انا عندي شقتي اللي فوق دي مش انت كاتبها بأسمي
حسن
وانت هتتجوز فيها علي المحاره ده انت عايز اد كده فلوس عشاان توضبها وتبقي لايقه علي عريس وعروسه..
طارق
كل دي حاجات بسيطه نمشي الدنيا وايدي في ايدها ونعمل كل حاجه انا وهي بعدين يا بابا..
حسن
يا سلام.. طيب والشبكه معاك تجيبلها شبكه زي باقي بنات العيله والجيران ما بيجيلهم..
طارق بغيظ
هو انت ليه بتعمل معايا كده، ليه مصمم تعجزني هي نفسها موافقه بالكلام ده وبتحبني زي ما انا بحبها
حسن بحده
انا مش بعزجك انا بتكلم في الاصول في العدات والتقاليد اللي ماشين بيها، انت المفروض قبل ما تيجي تتقدم كنت تقيس حملك قد ايه هتقدر تتجوز تجهز شقه وتكون قد انك تتحمل المسؤليه وتبقي راجل بجد في كل اللي يطلب منك ولا لا
عز بجديه
هو مين قالك انه مش هيقدر يتحمل مسؤليه يا حسن، هو مدام هيتجوز يبقي هيتحمل المسؤليه
حسن
يا سلام ما بلاش انت تتكلم يا عز عن الموضوع ده، ما انت اتجوزت مرتين هل اتحملت مسؤليه ولا عقلت، وبعدين انا عارف ابني كويس
عز
الله جرا ايه يا حسن هو انت جايبني هنا تهزأني والله هقوم امشي
حسن
امشي انا نفسي تقوم تمشي وتاخده معاك
ليلي بحده
وبعدين معاك يا حسن انت ليه مكبر الموضوع كظه
حسن
الموضوع كبير يا ليلي ده جواز، ابنك فااكر انه بالشويتين اللي بيعملهم دول وحتت دبله هيتجوزها، فاكرها جوازه ساهله
طارق بعصبيه
والله الموضوع ما يخصكش اصلا يا بابا، هنا مسؤله عن نفسها والقرار ليها
ليلي
عيب كده يا طارق ما ينفعش الكلام ده.
حسن بحده
لا سبيه يقول اللي عايزه مش هي هنا اللي صاحبة الموضوع تعالي هنا يا هنا وقوليلنا رئيك ايه في الموضوع ده..
بصتلهم هنا بتوتر وحسن قالها بصوت عالي
ما يلا يا هنا وما تخافيش مني انا في الحالتين هحترم قرارك..
ليلي ابتسمت وقالت
وايه بس اللي هيخوفها دي مكسوفه تعالي يا هنا يا حبيبتي..
_الكل ابتسم بسعاده واولهم طارق وكأنهم ضامنين موافقتها، بس هي وقفت جنب حسن وقالت بهدوء..
هنا
انا مش موافقه..
ضحك عز وقال
ههههههههههه يا ديني علي الكسفه..
طارق
استني انت بس هو ايه اللي مش موافقه يا روح امك انتي كمان.
حسن بحده
احترم نفسك يا طارق..
طارق بعصبيه
لا ما انا عايز افهم، انا لمحتلها قبل كده كتير وهي كانت مرحبه بالموضوع وعلي الاساس ده جيت اتقدم ايه بقي مش موافقه دي؟..
ردت عليه هنا بضيق وقالت
انت ولا مره جيت واخدت رأيي ولا اتكلمت معابا في الموضوع ده بجد واتناقشنا، لو كنت قبل ما تيجي وتتقدم قدامهم كلهم سألتني كنت هقولك انا لسه ببدأ حياتي وعندي مستقبل طويل لازم انجح فيه الاول واتعلم اعتمد علي نفسي وبعدين هبقي افكر في الجواز..
طارق بغيظ
ده اي كلام وخلاص، وانتو هتمشو ورا كلام عيله مش فاهمه حاجه، هي ليها عين ترفض اصلا..
وقف حسن قدامه وقاله بحده
ولا كلمه كمان والموضوع اتقفل هي مش موافقه يبقي من النهارده هنا زيها زي باقي اخواتك والكلام اللي طلع منك ده لو اتكرر تاني هتزعل مني يا طارق وهنا معاها حق هي لازم تركز في مستقبلها..
_بصلها طارق بغضب وسابهم ومشي وليلي بصت لهنا بحزن وقالت..
ليلي
كده يا هنا تكسري بخاطره
حسن بحده
ليلي قولنا الموضوع اتقفل خلاص، ويلا كل واحد علي اوضه وانتي يا ريناد كلمي اختك شوفيها متنيله فين لحد دلوقتي ونص ساعه وتبقي في البيت..
ريناد
حاضر يا بابا..
_وكلهم فعلا دخلو اوضتهم معادا ليلي وعز اللي كان بيقلب في التلفزيون ومندمج فيه…
حسن.
هتباات عندنا ولا ايه؟
عز
انا مش هتكلم معاك عشان انت بجد بقي. دمك تقيل، وانا متأكد انك انت اللي لعبت في دماغ البت عشان ترفض طارق
ليلي بحزن
وكأن وجع ابنه ساهل عليه
حسن.
متشكر يا ليلي بس انا ما حدش حاسس بطارق قدي، وبعمل كده لمصلحته
عز
فهمني اللي هو ازاي؟
حسن
اولا انت يا كبير يا عاقل لما كان جه وقالك يا عمي تعالي اخطبلي كنت الاول نصحته وقولتله ان دي لسه صغيره ساعدها تحقق كرير لنفسها..
ليلي
كريرها في بيت جوزها يا حسن، مش ده كان كلامك لما جيت تتجوزني وما خلتنيش ادخل الجامعه
حسن.
الوضع يختلف والزمن يختلف يا ليلي، وبعيد عن الموضوع ده ابنك حاطط في دماغه انها هتوافق كرد. جميل لقعدتها معانا ولو اتجوزها دلوقتي هيفضل ديما شايف نفسه متفضل عليها والدليل دلوقتي لما قالها انتي ليكي عين ترفضي تقدرو تقوليلي هو كان يقصد ايه؟
سكت عز هو وليلي وحسن قال
طارق قبل ما يتجوز هنا لازم يعرف قيمتها، لازم يحس انها غاليه اووي ومش جوازه ساهله لا ده هتكلفه كتير عشاان يوصلها، انا زي ما بغلي بناتي هغلي هنا حتي لو اللي هيتجوزها ابني، فهمتو يا بهيم منك ليها..
ليلي
طيب كنت فهمه بالراحه يا حسن اقعد واتكلم معااه بس انت كده فهمته انه مش كويس او مش مناسب انه يتجوز وزعلته منك ومن هنا كمان
حسن
ما انا اتكلمت معاه كل ما كنا نفتح الموضوع كنت اتكلم وانصح فيه وبرضو هو اللي في دماغه عايز ينفذه ومش مهم اي حاجه تانيه..
عز
حسن معاه حق يا ليلي طارق لو شاري بجد هيتصرف ويقنعها ويقنع ابوه وهينفذ اللي هما عايزينه منه
ليلي بضيق
اللي فيه الخير يقدمه ربنا يا عز، استني هجهزلك العشا قبل ما تروح تنام..
عز
طيب بسرعه عشان فعلا جعان..
ــــــــــ #بقلم_الكاتبه_رحاب_القاضي ــــــــ
_وفي بيت لميااء كانت قااعده مدايقه وسيف قدامها اللي قالها بعصبيه..
سيف
بقي عبدالله عايز يعمل كبير عليا يا ماما
لمياء
هو كبير فعلا ومدلك ايده بالخير، انت بقي عملت ايه روحت ومديت ايدك علي فلوسه من ورااه
سيف بحده
ده حقي هو بيجي كل شهر مره او مرتين يشوف الشغل ماشي ازاي انما انا اللي شاايل كل حاجه يا ماما والفلوس دي اللي اخدتها من حقي..
لمياء بعصبيه
لا مش من حقك لو من حقك كنت اخدتها قدامه مش تلف وتدور وتاخدها من ورااه، وانت تحمد ربنا انه كان ممسك الشركه وعاملك مدير من غير ما تدفع ولا قرش وخلاك قدام الكل شريكه بالكلام والبجح صدق الكدبه وبيقول حقي..
سيف بضيق
ما علينا انا هتصرف مع عبدالله بس كلمي خالتو عليااء هي تخلي عبدالله ما يقفش عليا…
لمياء بغيظ
ما هو ده اللي ناقص تخسرني اختي كمان يا سيف، مش كفايه خلتني ابان قليلة اصل قدام حسن بعد كل اللي عملو معايا كمان عايزني اخربها مع علياء
سيف
يعني يرضيكي يا ماما ابنك يبقي قااعد عاطل من غير شغل، ولا بعد ما كنت مدير قد. الدنيا اروح اشتغل موظف في شركه عند. حد
لمياء بضيق
طيب يا سيف هكلم عليااء وعلي الله تبقي دي اخر مشكله تحصل من تحت راسك، قوم بقي امشي احسن ست الدكتوره بتاعتك تزعل انك قاعد عندي..
سيف
لا ما انا وهي متخانقين فهباات هنا النهارده؟
لمياء بقلق
متخاتقين ليه؟
سيف بضيق
هي شااافت اللي حصل بيني وبين عبدالله، انا كنت مفهمها ان الشركه بتاعتي برضو وليا فيها النص
ضحكت لمياااء بسخريه وقالت
قولتلي كده اللي كانت رسماله معاك طلع كدب، وبعدين هي يفرق معاها ايه عندك شركه ولا ما عندكش هي متجوزاااك عشان الشركه الله يمسيكي بالخير يا ريناد…
بص سيف لامه بحزن وقال
في دي معاكي حق كانت اكتر واحده بتقف جنبي وانا مداايق
لمياء
ده ولسه انت هتندم ندم عمرك علي اللي عملته معاها، الاول وانت بتسيبها كانت حزينه ومكسوره بس لو تشوفها دلوقتي اخر مره شوفتها بقيت زي الورده المفتحه دي احلوت عن ما كانت متجوزاااك….
سيف بتوتر
هو انا عادي اردها يا ماما عشان خاطر تياا..
لمياء بسخريه
تفتكر هي ممكن تساامحك اصلا، حتي لو سامحتك انت نسيت انك طلقتها بالتلاته..
سيف بضيق
اوووف انا كنت غبي في الحته دي بصراااحه
لمياء بغيظ
انت طول غمرك غبي يا ابني زي ابووك بالظبط متسرع وما بتفكرش في الصح ايه علي طول ماشي في الغلط…
قام سيف وقال
انا داااخل انام وما تصحنيش بدري يا ماما سبيني نايم براحتي
ــــــــــ #بقلم_الكاتبه_رحاب_القاضي ــــــــ
_وفي المستشفي كانت رضوي واقفه جنى يوسف اللي الممرضه بتعقمله جروح وشه وقالها يوسف بأبتسامه واسعه..
يوسف
ياااه لو الدنيا تبقي خفيفه كده علي الواحد زي ايدك يا انسه..
بصتله رضوي بغيظ والممرضه ضحكت وقالت
هههههه ده من ذوق حضرتك يا افندم، كده النذيف وقف بس ياريت تاكل حاجه تقيله تعوض الدم اللي نذفته ده..
رضوي بجمود
متشكرين جدا اتفضلي..
طلعت الممرضه ورضوي قالتله بضيق
تحب استني معاك لحد ما تيجي مامتك ولا امشي..
يوسف
ياريت تمشي وتبعتيلي الممرضه القمر اللي كانت هنا دي..
رضوي بحده
ما تحترم نفسك بقي ايه قلة الادب دي؟
يوسف
وانتي مالك انتي طيب البت حلوه وزي القمر..
رضوي بغضب
تصدق انا غلطانه اني جيت معاك اصلا ان شاء الله كانو طحنوك اكتر من كده انا مااالي…
_قالت كلامها وجات تمشي بس اول ما فتحت باب الاوضه لقيت شهد ويزن في وشها..
شهد بخوف
ابني فين؟
رد عليها يوسف من جوه وقال
انا هنا يا ماما تعالي يا حبيبتي شوفي اللي حصلي..
ـ زقت شهد رضوي ودخلت بسرعه ويزن قال لرضوي اللي ادايقت من تصرف رضوي..
يزن
معلش يا رضوي بس هي خايفه عليه..
رضوي بضيق
لا ما فيش مشكله، بعد اذنكم..
شهد بحده
استني عندك اوعي تمشي، قولي يا يوسف يا حبيبي ايه اللي حصل البنت دي عملت فيك ايه
يوسف بخبث
جابت نااس تضربني يا ماما..
برقت رضوي بصدمه وقالت شهد بحده
نعمم؟! انتي ازاي تعملي كده في ابني عملك ايه هوو..
رضوي بقلق
لا والله العظيم انا ما اعرفش مين اصلا اللي ضربوه..
يزن
يا ماما انتي هتصدقي الغبي ده، واتلم انت كمان..
شهد
ما انا برضو عايزه افهم ايه اللي حصل لابني اللي كل ما يشوف الهانم تحصله مصيبه..
_يوسف من وراا شهد طلع لساانه لرضوي بطريقه طفوليه ورضوي ردت علي شهد بثبات وقالت..
رضوي
والله ابن حضرتك هو اللي عمل فيها شهم وجه يدافع عني لما كانو في شباب بيعاكسوني، مش انا اللي قولتله والنبي تعالي دافع عني، وانا رديتهاله برضو وجيبته لحد المستشفي..
شهد بحده
والله انتي او غيرك كان هيدافع عنها، اصل ابني متربي..
ابتسمت رضوي بسخريه وقالت
اممم ما انا عارفه تربيته كويس يا طنط..
شهد مسكت ايد يوسف وقالت
تعالي يا روح مامي الجو هنا بقي تقيل علي قلبيي علي مهلك يا حياتي…
يوسف قام معاها وقال
ااه يا ماما بموت..
شهد
بعد الشر عليك يا حبيبي ان شاء الله يكرهك او يزعلك..
واخدته شهد وطلعو ورضوي قالت ليزن بصدمه
هو ده بجد، مامتك بتعاملكم كده؟
يزن
لا لا بتعامل يوسف كده، يعني هو بقي الدلوع بتاع ماما اللي فينا، عموما انا بعتذر عن اللي حصل ده هو سوء تفاهم مش اكتر..
رضوي
لا عادي حصل خير..
يزن
طيب تعالي انا هوصلك
رضوي
ميرسي انا معايا عربيتي تحت..
يزن
رضوي استني انا كنت عايز اسألك عن حاجه..
رضوي
خير ان شاء الله؟
يزن
هو انتي بتحبي يوسف او في من ناحيتك حاجه ليه؟..
رضوي
وانت مالك..
يزن
لا مالي ده اخويا وانا من حقي اعرف البنت اللي هو مجنون بيها مش بيحبها وبس هي كمان بتحبه ولا لا..
رضوي
برضو انت مالك هيفرق معاك في ايه؟
يزن
عشان هساعده ينساكي لو مش بتحبيه، بدل ما انا بحاول اصلح ما بينكم..
رضوي بنبره حزينه
ما بقاش ينفع تصلح حاجه، تقدر تقول اني مش بحبه..
يزن
مش باين بصراحه انا شايف العكس..
رضوي بتوتر
بعد اذنك انا اللي عندي قولته..
_قالت كلامها وسابته ومشيت وهو اتنهد بضيق ونزل تحت لقي شهد قاعده جنب يوسف وبتأكله شوكلاته وبتشربه عصير، ولما شافت يزن قالتله..
شهد
انت اتأخرت ليه كده اخوك تعبان يلا بسرعه عشان توصله البيت..
يزن
مين اللي ضربوك دول يا يوسف؟
يوسف
هبقي اخدك اوريهم ليك وتجيبلي حقي..
يزن
طيب هنروح ماما ونروحلهم..
شهد بحده
تروح فين يا زفت منك ليه، مش هخلص انا من ابوكم البلطجي تطلعولي انتو..
يوسف
ما هو بابا لو عرف اني اتضربت وما اخدتش حقي هينفخني..
شهد
ما حدش هيقولو حاجه والموضوع يتقفل خالص..
يزن غمز ليوسف وقال
خلاص اتفقنا يا ماما الموضوع اتقفل
ــــــــــ #بقلم_الكاتبه_رحاب_القاضي ــــــــ
_وفي الصعيد كانت قاعده اسرار في اوضتها وهي ماسكه صورتها هي وعمر اخوها وامها مع بعض وعيونها كلها دموع وموبيلها رن في الوقت ده برغم غريب، فتحت الفون من غير ما ترد بس اتنفضت بخوف اول ما سمعت صوت شعبان ابن خالها اللي قالها..
شعبان
عامله ايه يا بت عمتي، ولا اقول يا عروسه قوليلي صوح ولد عمك. ناوي يتجوزك ميته؟
اسرار
عايز مني ايه يا شعباان، ما تسيبوني في حالي عايزين مني ايه تاني..
شعبان
عايزك انتي الاول رفضتيني كتير وقولنا عشان عينك علي عبدالله، انما دلوقتي رفضاني انا وموافقه بكمال العيل الطري اللي ما يسوااش ده؟
اسرار بحده
اخرس قطع لساانك قبل ما تغلط في ولاد عمي ولا حتي تجيب سيرتهم علي لسااانك، كمال ده انضف واشرف منك علي الاقل شايلني جوا عينيه وبيخاف عليا وكان بيعامل عمر اخوي كيف اخوه انما انت قتلت عمر يا شعبان انت وابوك قتلتو اخويا وموتو امي بحسرتها وانا عمري ما هسامحكم ولا هعتبركم اهل انتو شياطين..
شعبان بغضب
زين قوي الحديت ده قابلي عاد جحيم الشياطين وان ما خليتك تترحمي علي ولاد عمك للاتنين وتبقي اقل من اقل شغاله حدانا وهتشوفي..
_قفلت اسرار معاه وفشلت تعيط وراحت لاوضة عليااء اللي كانت نايمه ودخلت علي طول وقالت ببكاء وهي بتتنفض..
اسرار
يا مرت عمي قومي بسرعه..
قامت. علياء وقالت
في ايه يا اسرار مالك يا حبيبتي..
اسرار ببكاء
شعبان.. ك.. كلمني وو.. وقالي انه هيقتل عبدالله وكمال زي ما عمل في عمر..
علياء بغضب
ان شاء الله هو واهله كلهم، وانتي يا عبيطه صدقتيه ليه ان شاء الله هما كمال وعبدالله هيسيبو الحشره ده يعمل كده ويقفو ساكتين، ده بيخاف يرفع عينه فيهم وانتي عارفه كده كويس..
ـ بصتلها أسرار بخوف، فمسكت علياء ايدها بحنان وقالت بهدوء..
علياء
انا فاهمه خوفك بس ما تخافيش علي ولاد عمك ده انتي تخافي علي اللي يعاديهم، وما تخافيش طول ما انتي في بيت القاضي، وتكلمي عبدالله وتقوليلو علي اللي قالو الزفت ده عشان يوقفو عند حده..
أسرار بقلق
ربنا يستر يا مرت عمي، وحقك عليا قلقتك بس انا اول ما قال كلامه اللي زي السم ده خلاني اخااف غصب عني..
علياء
لا قلقتيني ولا حاجه، المهم قوليلي كمال قالك ايه تحت من شويه لما كنتو قاعدين سوا..
اسرار
عادي اتكلم معايا في موضوع كتب كتابنا اللي بعد تلات شهور ده واتقفت معاه مش هعمل فرح طبعا عشان امي وعمر اخويا، وكمان هو اتفق معايا اني هقعد انا ورضوي بنته هنا لحد ما هو يظبط ااموره هناك وابقي اسافر معاه.
علياء بضيق
وانتي يا عبيطه ووافقتي مش كده؟
اسرار
لا انا مش عبيطه يا مراات عمي انا فاهمه كل حاجه كويس، وفاهمه ليه كمال هيتجوزني اصلا وعشان بنته تلاقي حد يااخد باله منها، وفاهمه انه مش عايزني اساافر معاه عشان بيعمل حاجه من ورايا غلط، بس انا مش فارقلي انا قبلت اتجوز كمال عشان خايفه من شعبان وخلف ولما هتجوز كمال هما مش هيقدرو يعملولي حاجه..
علياء
بس كده انتي بتظلمي نفسك، وبعدين سواء اتجوزتي كمال او لا ولاد عمك هيفضلو في ضهرك ويحموكي من خلف وابنه وغيرهم..
حضنتها اسرار وقالت بابتسامه بسيطه
ربنا يخليكي ليا يا مراات عمي انتي فعلا مكان امي الله يرحمها ومش مقصره معايا في حاجه، هسيبك تنامي وحقك عليا قلقتك..
علياء
انتي بنتي يا اسرار وغلاوتك من غلاوة ولادي، واي حاجه تحصل معاكي تيجي علي طول وتقوليها ليا..
اسرار
من عينيا يا مراات عمي، يلا بقي تصبحي علي خير…
_قالت كلامها وسابتها ورااااحت اوضتها، وعليااء كمان رجعت نامت هي كمان..
ــــــــــ #بقلم_الكاتبه_رحاب_القاضي ــــــــ
_وفي بيت الاستاذ حسن كان واقف حسن في البلكونه واول ما شااف رضوي جات بعربيتها دخل جوه اوضته وقال لـ ليلي اللي بتستف الغسيل..
حسن.
الهانم جاات لسه جايه دلوقتي قالت ساعه وجايه بقالها خمس سعات بره البيت وجايه قُرب نص الليل..
ليلي
الحمد لله وطارق مش موجود ده كان هيخلي يومها اسود..
حسن بحده
ما هو هيبقي يومها اسود يا ليلي، هي فاكره نفسها ايه عشان ترجعلي في نص الليل..
ليلي قامت بسرعه وقالتله
عندك يا حسن علي فين؟
حسن
هروح اشووف الهانم كانت فين لدلوقتي
ليلي
لا بالله عليك سيبها وانا هروح اتكلم معاها، وبعدين احنا عايزين ناخدها علي الهادي عشان توافق تقابل العريس اللي جيبااه ليها..
حسن بسخريه
كالعاده هتطفشو منها..
ليلي
ليه ان شاء الله الاول كانت بتتحجج عشان مستنيه كمال يرجع واهو رجعلها بخازوق اطول منها، ايه بقي اللي يخليها ترفض الجواز..
حسن ابتسم بهدوء وقال
كلام ليكي وما يطلعش ما بينا، بنتك بتحب وبتحب يوسف الصاوي اللي جه اتقدملها ورفضته وانا عارف وساكت ومستنيها تيجي وتعترف..
ليلي
لا انا عايزه افهم منين بتحبه ومنين رفضت تتجوزو وهزأته قدامنا علي الجزمه لما جالها لحد البيت؟
حسن
شوفتي عبدالحليم لما غني وقال “بس قلبي لسه خايف من الليالي وانت عارف يعني ايه ظلم الليالي”
ليلي بحزن
قلبي عليكي يا رضوي الواد ابن اختك عملها تروما في دماغها يا حسن..
حسن
هي خايفه قلبها وعقلها مش قادرين يتقبلو فكرة انها محبوبه من حد وبقي الشك والخوف والقلق مالين دماغها وقلبها ناحية اي حد عايز يدخل حياتها..
ليلي
بقولك ايه رضوي هتقابل العريس اللي متقدملها ده وغصب عنها وهتوافق بيه الواد ما فيهوش غلطه وانت ما تجيبش سيرة الكلام ده قدامها عشان ما تلاقيهااش حجه المره دي، انت عارف العريس اللي متقدملها ده دكتور في وزارة البيئه يعني ممكن ييقي هو وزير في يوم من الايااام..
حسن
والله لو اقنعتيها ياريت انا مني عيني افرح بيها هي وريناد تحسي حظهم قليل اووي في الدنيا..
ليلي
لا ما تقولش كده ده ان شاء الله هيبقي حظهم زي الفل بس هما يسمعو كلامي، انا هروح اتكلم معاها في الموضوع ده عشان احدد مع ام العريس المعاده اللي هتقابل فيه رضوي عريسها..
_وطلعت ليلي من اوضتها عشااان تروح تكلم رضوي، وقبل شويه اول ما وصلت رضوي ودخلت اوضتها لقيت هنا قااعده بتعيط ومتدايقه اووي….
رضوي بقلق
في ايه يا هنا صاحيه ليه لحد دلوقتي، وبتعيطي كده ليه؟
هنا بحزن
طارق جه عشان يخطبني وبابا حسن قالي ارفضيه..
رضوي
نعمم؟ طيب ليه يقولك كده بابا؟..
هنا
عشان اركز في مستقبلي اكتر وعشان هو عايز يتأكد من طارق بيحبني ولا لا.
رضوي
مدام بابا قالك كده. يبقي معاه حق، وطارق مش هيستسلم اكيد وهيرجع يتقدم تاني وتالت..
هنا بدموع
ومين قالك اني عايزاااه يتقدم تاني اصلا، انتي ما شوفتيش هو قال ايه لما انا قولز مش عايزه اتجوز..
رضوي
هو قال ايه يعني؟
قبل ما ترد عليها دخلت ليلي وقالت
ايه يا بنات صاحيين ليه؟
هنا مسحت دموعها بسرعه وقالت
انا رايحه انام اهو..
رضوي
وانا لسه جايه يا ماما بس والله اتأخرت غصب عني واحده زميلتي كانت معايا وتعبت وراحت المستشفي وكنت معاها وهروح حالا واقول لبابا عشان اكيد زعلان مني..
ليلي
لا لا انا اتكلمت معاه وحليت الموضوع المهم انتي نامي بدري يلا عشان تصحي وشك مورد وتبقي فايقه..
رضوي
اشمعنا يعني بتقوليلي كده يا ماما، ما انا طول عمري بسهر..
ليلي
لا انا عايزاكي بكره تبقي حلوه عشان في عريس متقدملك ورضوي حبيبة ماما هتسمع الكلام وتروح تشوفه وطارق هيروح معاكي..
رضوي بضيق
انتي عارفه يا ماما اني قافله المضوع ده دلوقتي..
ليلي بغيظ
هو ايه اللي قفلاااه، وايه الكلام اللي مالوش لازمه ده..
رضوي
انا هعمل اللي يريحني يا ماما..
ليلي
ايه اللي يريحك يا رضوي انك. تفضلي كده موقفه حالك، ما تبصي حواليكي يا بت انتي هنا دي اللي اخوكي كان جاي يتقدملها اصغر منك بكام سنه، بلاش هنا اختك روان الفرق بينك وبينها كام سنه واهي اتجوزت قبلك وكمان شويه هنشل عيالها ونفرح بيهم وانتي قااعده في وشي زي البيت الواقف، وكل ده عشان مين.. عشان كمال اللي رمااكي ورا ضهره وسابك سنين اتجوز وخلف واشتغل ونجح وانتي قاعده مستنياااه وحتي دلوقتي الا ما شوفناااه حاول عشااانك حتي بأي حاجه ده ما صدق قولناله لا ورااح خطب اسرار بنت عمه، اسرار اللي لسه في سن اختك روان يعني اصغر منك هي كمان..
بصتلها رضوي بدموع وقالت
هو انتي ليه بتعملي فيا كده، كلامك ده بيوجعني اكتر من اي حاجه، ما فيش ام بتهين بنتها وتقلل منها ومن ثقتها في نفسها زيك، وما تعمليش نفسك خايفه عليا انتي مش عايزه الناس تقولك ان بنتك بايره وما اتجوزتش كل همك نفسك وبس..
_اتصدمت ليلي من كلامها وهنا قامت بسرعه وقالت لرضوي بقلق…
هنا
ايه اللي انتي بتقوليه ده ما يتفعش كده عيب..
ليلي قربت منها وقالت بغضب
لا يا هنا سبيها تقول ما انا لو كنت عرفت اربيها كانت تبجح في امها كده وما كانتش لحد دلوقتي قااعده في وشي، وبأخلاقها دي لسه هتقعد لحد ما تعجز وما حدش يرضي يبص في وشها..
رضوي بحده
مالكيش دعوه بيا وانا مش هتجوز خالص طلعي نفسك بقي من حيااااتي..
ليلي بعصبيه
انا تقوليلي كده يا قليلة الربايه…
_قالت ليلي كلامها وضربتها بقلم ورا التاني وحاولت هنا تبعدها عنها بس ما كانتش قااادره لحد ما جات ريناد هي وحسن وبعدوها عنها وحسن زعق في ليلي وقالها بغضب..
حسن
انتي اتجننتي يا ليلي بتضربيها كده ليه؟
ليلي بحده
بربي بنتي يا حسن بعلمها ازاي تتكلم معايا بأحترام، ايه في ايه انت..
حسظ بنفاذ صبر
طيب سبيها في حالها يا ليلي وروحي اوضتك دلوقتي
ليلي بحده
لا مش هسيبها وغصب عنها بكره هتروح تقابل العريس اللي متقدم وهتوافق عليه وهتتجوز، مش هعرف امشي كلامي علي بنتي ولا ايه..
ريناد
خلاص يا ماما والله هتعملك كل اللي انتي عايزاااه بس سبيها دلوقتي..
ليلي بنبره غاضبه
جاتكم. ستين نيله يا خلفة الهم كلكم..
_قالت كلامها وطلعت وحسن بص لرضوي اللي بتعيط وقالها بحزن..
حسن
اهدي ما حصلش حاجه امك وضربتك بتحصل ياما اخدنا ضرب زمان من اهلنا، خليكي مع اختك يا ريناد انتي وهنا..
ريناد
حاضر يا بابا قاعدين معاها اهوو..
طلع حسن وريناد قالت لرضوي اللي بتعيط
هو حصل ايه يخلي ماما تعمل كده دي من لما كنا عيال ما مدتش ايدها علي واحده فينا
هنا
هو بصراحه رضوي غلطانه ما كنش ينفع تكلميها كده دي مامتك..
رضوي ببكاء
وانا بنتها ومليون مره اقولها ان كلامها علي موضوع الجواز ده بيدايقني وبيوجعني هي ليه مش بتبطل تقولو.
ريناد
طيب اهدي خلاص انا هتكلم معاها، بس انتي اسمعي كلامها
رضوي
اوعي يا ريناد انا عايزه انااام..
هنا
طيب بطلي عيااط الاول هتنامي وانتي بالشكل ده ازاي
ريناد
هنا معاها حق اهدي الاول وو..
رضوي بحده
مالكوش دعوه بيا انا هنام ومش عايزه اسمع صوت حد تاني..
_وسابتهم وفعلا نامت حتى من غير ما تغير هدومها، وريناد رااحت اوضتها وهنا كمان نامت، وفي اوضة حسن وليلي كانت قااعده بتعيط وحسن قعد. جنبيها وقالها..
حسن
مهما حصل برضو في مليون طريقه تعاقبيها بيها غير الضرب يا ليلي..
ليلي
والنبي اتوكس ما فيش حاجه اصلا خربتهم غير السلبيه بتاعتك دي..
حسن
وانتي اللي شبح بقي وما حدش قادر عليكي كده؟
ليلي بسخريه
قال شبح قال ده انا ما حصلتش قطه معاكم، وانا اللي بقول كبرو وعقلو ومش هيتعبوني اتاريها لا لسه بتعامل مع عيال صغيرين..
حسن
لو هيكبرو مع النااس كلها هيجو معانا احنا وهيفضلو عيال ربنا يخليهم لينا ويدلعو ويتعبونا براحتهم، بس تراضي بنتك يا ليلي وتتكلمي معاها بالراحه وبلاااش معايره فاهمه..
ليلي ببكاء
انا خايفه عليها عايزه اشوفها متجوزه وليها بيتها وعيله ومرتاحه معاهم، الله واعلم وجع قلبي عليها وهي قااعده كده والبنات اللي اصغر منها متجوزين ومخلفين، وهي نفسها الموضوع ده مدايقها ومزعلها.
حسن.
ده نصيب ولسه نصيبها ما جاااش يا ليلي، ادعيلها بس ترتاح للعريس اللي هتقابله بكره ده والباقي سااهل..
ليلي
يااارب هو عريس لقطه والله..
ــــــــــ #بقلم_الكاتبه_رحاب_القاضي ــــــــ
_واليوم عدي وتاني يوم الصبح في بيت يونس الصاوي كان قااعد يونس هو ومحمد اخوه في مكتبه ومعاهم شهد، ومحمد قالهم بهدوء..
محمد
انا جاي وبتكلم في عشم في اخويا ومرات اخويا وولادهم انهم هيجو ويكترو بيا في فرح بنتي واتشرف بيهم..
شهد
اكيد طبعا يا محمد هنيجي عائشه دي بنتنا برضو..
يونس
تبقي لسه غبي زي زمان لو فااكر اننا زعلانين بسبب اللي حصل في موضوع يوسف، مع ان ابني اللي غلطان وانا اللي وشي منك في الارض
محمد
اللي حصل يا يونس وخلاص بقي احنا اهل وانا ماليش حد غيركم انتو اهلي وانت فاهم كويس يا يونس كلامي ده..
يونس ابتسم بهدوء وقال
فاهم يا اخويا ومن غير ما تقول هنبقي اول ناااس حاضرين وولادي هيبقي هما التلاته واقفين مع بنت عمهم واختهم في فرحها..
محمد
ربنا يخليك ليا يا يونس، المهم برضو حامد كان عايز يتجوز وقالي انك انت هتساعده في الموضوع ده..
يونس
عينيا عايزني اجيبله عروسه يعني من معارفنا..
شهد
محمد بلاااش ده اوعي تاخد رأيه في جواز، انا هدور لحامد علي عروسه بنت ناس ومناسبه ليه..
محمد
لا انتي ولا جوزك هو اختار..
يونس
طيب ومدام هو اختار عايزين مني ايه؟
محمد
ما هي اللي اختارها تبقي بنت اخو عز الدين صاحبك..
بص يونس وشهد لبعض بتفاجئ وسأله يونس بقلق وقال..
يونس
قصدك مين بالظبط؟
محمد
البشمهندسه رضوي حسن اللي كانت شغاله مع يوسف ويزن في شركتهم الجديده، ها ايه رئيك فيها؟
شهد بضيق
هي البنت كويسه بس يوسف كان اا..
قاطعها يونس وقال بجمود
خلي حامد يجيلي وانا هجمعه بعزالدين ونتكلم بجد.، بس خلي حامد يجي الاول عندي..
قام محمد وقال
تمام اتفقنا يا يونس وانا وانت واحد انت برضو تهمك مصلحة حامد..
دخل عندهم يوسف في الوقت ده وقال
عمووو وانا اقول البيت منور ليه اتاري البركه كلها عندنا، لو زعلان مني قول عشاان اصالحك..
محمد
انا لو باخد عليك اصلا كان زماني في العباسيه يا يوسف..
يونس
هو مين ده بياخد عليه اصلا، عمك جااي يعزمنا علي فرح عيشه يا يوسف.
يوسف
اسمها عائشه يا بابا بلاش فولح بقي..
ضحكت شهد وقالت
المهم يا محمد هو الفرح امتي بقي؟
محمد
بعد شهرين من دلوقتي..
يوسف
وجاي تعزمنا من دلوقتي ليه يا عمي ده احنا من دلوقتي للفرح هننسي ان بنتك اتخبطت اصلا…
يونس بغيظ
تعرف تسكت خالص، وانت كمان يا محمد النااس بتعزم قبل الفرم باسبوع عشر اياام ده بالكتير، انت جاي ليه قبلها بشهرين..
.
محمد
ما انا ممكن ما ابقاش فاضي وخايف ما كنتوش تيجو، بس واضح كده اننا هنتجمع قبلها في خطوبة حامد ده لو الموضوع بتاعه تم ان شاء الله..
يوسف
هو حامد خطب كمان عااش يا عمو علم اخوك بقي اللي مقعدني انا واخواتي جنبيه يتأمل فينا، هو حامد خطب مين صح؟
محمد
لا هو لسه هيخطب والعروسه انت تعرفها تبقي ر…
يونس قاطعه بسرعه وقال
مش وقته لما يبقي الموضوع يتم اصل ده ما بتتبلش في بوقه فووله وهيسيح قبل ما حاجه تتم..
قام محمد وقال
لا وعلي ايه خلينا كده احسن لحد ما الموضوع يبقي رسمي، همشي انا بقي وقريب اووي نتجمع زي زمان ونقعد مع بعض اكتر يا يونس.
يونس
اكيد طبعا يا اخويا في اي وقت احنا جاهزين…
محمد
علي خيرة الله ان شاء الله..
_قال محمد كلامه ومشي ويونس قال ليوسف بقلق وهو بيشاور الي الجروح اللي في وشه..
يونس
انت مين ضربك ياااه..
يوسف بتوتر
هاا لا دي حساسيه..
يونس
وحيات امك قول يااد مين علم عليك..
شهد
ما قالك حساسيه يا يونس خلاص..المهم هو هينزل معاك شغل من النهارده
يونس يضيق
استغفر الله العظيم ياارب، انتي بتعملي كده ليه مصممه تحرقي دمي ليه؟
شهد
كل ده عشاان بقولك تاخد ابنك يتعلم معاك الشغل، هو مين في الاخر هيمسك شغلك ده مش ولادك..
يوسف
مثلا يعني الا لو هو خايف من حاجه بقي..
يونس بغيظ
اخرس يالا بدل ما اكمل عليك، وبعدين يزن يجي اعلمه وهو يعلم يوسف،انما انا والحلوف ده في مكان واحد مش هنعمر..
شهد
يزن عايز يشتغل في مجال دراسته بعيد عنك، يوسف هيبقي معاك وتعلمه كل حاجه وتخليه كمان يبقي اشطر منك..
دخلت عندهم في الوقت ده يارا وقالت بدموع
بابا الحقني ياسمين عرفت بموضوع العمليه بتاعت باباها وعايزه تسافر دلوقتي
شهد
ازاي ده حصل هو لسه هيعمل العمليه الاسبوع الجاي، مين قالها..
يوسف بتوتر
انا هسبقك يا بابا علي الشركه تمام..
يونس
خد هنا يا ابن ال.. خد هنا وقولي انت قولت حاجه للبت عن ابوها
يوسف استخبي في شهد وقال
والله يا ماما هي اللي وقعتني في الكلام..
يونس بنفاااذ صبر
اااه يا ابن المدااايقه ده انا هفرمك..
شهد
خلاص يا يونس ما كانش يقصد..
يونس
هو ايه اللي ما كانش يقصد، بزمتك يا شيخه لو حد غيره اللي كان قالها كنتي هتسكتيله ولا عشان الحيله ننوس عين امه اللي قال فما كانش يقصد..
شهد
لا ما كنتش هتكلم وبعدين ااه حبيب امه ده وروح قلبي مالكش دعوه بيه.
يارا
طيب ممكن تشوفو حل وتخلو ياسمين ما تسافرش.
شهد
انا هروح اتكلم معاها..
يونس
استني انتي يا شهد، روح يا يارا قوليلها اني عايزها..
يارا
حاضر..
_ورااحت يارا تنده ياسمين وشهد مسكت كيكه من قدامها وفضلت تأكل يوسف وقالتله..
شهد
كل دي يا حبيبي لحد ما الفطار يجهز بالبرتقاان زي ما بتحبها..
يوسف
تسلم ايدك يا قلبي..
يونس بغيظ
يااارب صبرني من عندك علي الاتنين الساقعين دول..
جات ياسمين وهي مدايقه وقالت
نعم..
يونس
اقعدي يا بنتي عايزين نتكلم معاكي..
ياسمين
سوري يا اونكل انا مش عايزه اتكلم مع حد لاني هتأخر علي معاد الطياره..
يونس
لا ما انتي هتلغي الحجز ده، ولما يبقي ابوكي يخف انا هاخدك واوديكي لحد عنده..
ياسمين بدموع
انا عايزه ابقي جنب بابي مش هينفع يبقي تعباان واسيبه لوحده، وانتو ازاي تخبو عني حاجه زي دي انا لولا يوسف جه وقالي كنت هبقي طول حياتي مغفله..
يوسف
يا بت الكدااابه هو انا اللي قولتلك ولا انتي اللي شكيتي في الموضوع وجيتي وقعتيني في الكلام..
يونس
ما عشااان انت اهطل اتنيل اخرس خالص، وانتي قولت هتترزعي هنا لحد مة ابوكي يخف وبعد كده غوري عنده براحتك..
يارا
يا بابا بالراحه عليها مش كده..
يونس بحده
انتي تسكتي وما اسمعش صوتك ولسه هحاسبك علي مرواحك المستسفي لابن عزالدين من ورايا..
يوسف بجديه
نعمم؟ وايه اللي يوديها دي عند ابن عزالدين؟
يارا بصت بخوف لشهد اللي قالت بسرعه
جات معايا فأبوك ادايق..
يونس
بطلي كدب يا شهد اخواتها لازم يعرفو الحقيقه ويبقي عندهم علم بكل حاجه..
شهد
انا هبقي افهمهم يا يونس بس مش بطريقتك دي.
يوسف بحده
هو في ايه بالظبط وايه اللي يوديكي يا ست يارا للواد ده؟
يونس بجمود
متقدم لاختك وعايز يتجوزها وهما متفقين علي كل حاجه مع بعض من قبل ما انا اعرف..
يوسف بعصبيه
هما مين انتي بتكلمي الواد ده من ورانا يا بت انتي، وجواز ايه يا بابا دي عيله صغيره وانا اختي مش هتتجوز اصلا..
شهد
لا هتتجوز والولد جه واتقدملها وهتبقي في فترة خطوبه كبيره وبعدين يتجوزو..
يونس
مين قال هتبقي في خطوبه دلوقتي..
شهد
خلاص بقي يا يونس..
يوسف
لا مش خلاص انا اختي بتكلم واحد ومتفقه معاه علي الجواز دي عايزه كسر رقبتها..
_في الوقت ده كان نزل يزن من فووق وسمع كلام يوسف وقرب من يارا ومسكها من دراعها جامد وقال بعصبيه..
يزن
ايه الكلام اللي بيقولو يوسف ده، انتي عملتي كده بجد..
يونس بحده
سيب اختك يا يزن..
يزن بغضب
هو ايه اللي اسيبها، البت دي هتركبلنا قرون علي اخر الزمن..
يوسف
دي لازمها تربيه من اول وجديد والله يارا لتشوفي اياام سودا..
_نزلت دموع يارا وهي بتبصلهم بخوف، فقاام يونس ومسك. ايدها ووقفها جنبيه وقال بجمود..
يونس
سودا علي دماغك انت واخوك واللي جابكم، بقي انا عايز اكبركم واعرفكم الموضوع عشااان نتكلم بالعقل ولو حد منكم زعل من اخته يتكلم معاها بالراحه ويفهمها ان ده غلط ولو انا قسيت عليها يبقو اخواتها احن مني عليها..
يزن
احن عليها في الغلط دي عايزه كسر رقبتها زي ما يوسف قال..
يونس
ده انا اكسرك انت والبأف اللي جنبك ده لو فكرتو بس تزعلو يارا بنص كلمه، ومن الاخر كده ما حدش ليه دعوه ببنتي..
يوسف
يعني هي الرجوله اننا نسكت لما نعرف ان اختنا علي علاقه بواحد..
يزن
يوسف معاه حق ودي بنت يا بابا يعني لازم يتشد عليها..
يونس بحده
لما ابقي اموت ابقو اتحكمو فيها براحتكم، والموضوع يتقفل معاكم..
وبص ليارا وقال
لو حد فيهم كلمك بنص كلمه تقوليلي وانا هديه بالجزمه طول ما ابوكي عايش ما حدش ليه كلمه عليكي غيري انا فاهمه..
يارا بدموع
حاضر يا بابا..
يونس
وانتي يا ياسمين دي كانت رغبة ابوكي احنا مالنااش مصلحه اننا نخبي عليكي، وانا هخليكي تطمني عليه اول بأول..
شهد
انا كلمته الصبح وهو كويس يا ياسمين وكل يوم هخليكي تكلميه معايا..
بصلها يونس بغضب وقال ليارا بحده
خدي صاحبتك واطلعو فووق افطرو مع بعض ما حدش فينا هيفطر النهارده..
يزن بغيظ
فعلا ما حدش هيفطر مين اصلا بقاله نفس يفطر..
_قال كلامه ومشي ويارا وياسمين طلعو اوضتهم وفضل يوسف قااعد مع باباه ومامته ويونس قاله بحده.
يونس
مرزوع عندك تعمل ايه يلا حصلني علي الشغل..
يوسف
لا انا هفطر الاول ما بعرفش انا اشتغل من غير ما افطر هتلاقيني هبطت منك..
يونس
اخلص يا زفت ما تخلنيش اتعصب عليك..
يوسف بغيظ
قااايم اهو بقولك ايه يا ماما ما تفطريش وانا هجيلك الشغل. اخدك ونفطر سوا هي بس ساعة زمن اجيب جلطه للراجل ده وهتلاقيني عندك..
يونس بحده
ورحمة ابويا يا يوسف اللي مش بحلف بيها ابدا لو ما قومتش من قداامي لهكون قالع الجزمه ومديك بيها، غور اتنيل حصلني علي الشركه..
قام يوسف طلع بسرعه وشهد قالت ليونس بقلق
شوفت محمد اخوك قال ايه حامد عايز يتجوز رضوي اللي ابنك لسه بيحبها وعامل زي المجنون بيها انت ما شوفتش حاجه..
يونس بجمود
بتكلمي زيد كل يوم تطمني عليه، وبطلتي تكلميني انا كل يوم تطمني عليا وانا في الشغل لقيتي الاهم دلوقتي..
شهد بعدم فهم
هو انا بكلمك في ايه وانت بتكلمني في ايه، وبعدين الوضع بيني وبينك اختلف عن الاول وزيد اول ما يخف ويااخد بنته مش هكلمه،وكمان غشان شغله تحت اشرافي دلوقتي ولازم ابلغه بكل جديد..
يونس بحده
انا اتدخلت في الموضوع ده لسببين الاول عشان البت الصغيره دي وحطيت نفسي مكان ابوها، والتاني عشان ابقي في الصوره عشان كل حاجه تبقي قدامي وما تروحيش تتكلمي معاه من ورايا..
شهد بضيق
مش هتكلم معاه تاني غير قدامك ممكن بقي تقولي هنعمل ايه في موضوع حامد ده اللي عايز يتجوز رضوي..
يونس بنبره شبه غاضبه
انا هتصرف ما تشغليش بالك، ومش هكررها تاني يا شهد لو حصل اي تواصل مع زيد ده من ورايا لاي سبب رد فعلي هيزعلك اووي.
شهد
ما قولنا خلاص يا يونس الله، كبرنا احنا علي الحاجات دي المفروض يبقي في بينا تفاهم وثقه اكتر من كده..
تجاهل كلامها وقال
هتروحي لوحدك شغلك ولا اوصلك في طريقي؟
شهد
لا عادي اروح لوحدي وبعدين ما انت مخلي السواق معايا خطوه بخطوه عشان يبلغك انا بروح فين وبعمل ايه..
_ما ردش عليها يونس وسابها ومشي، وهي كمان راحت شغلها وهي مدايقه جدا من تصرفااته..
ــــــــــ #بقلم_الكاتبه_رحاب_القاضي ــــــــ
_وفي بيت الاستاذ حسن كان راجع طارق البيت، واول ما طلع فوق لقي في ولد تقريبا عنده 20 سنه او اقل واقف قدااام بيتهم..
طارق
خير يا كابتن انت عايز مين؟
رد عليه الولد وقال
لا شكرا هما ردو عليا خلاص…
طارق
انت مين وجاي عندنا عايز ايه طيب؟
رد عليه وقال
انا علاء زميل هنا في السنتر اللي كانت بتاخد فيه دروس الثانويه.
طارق
اهلا وسهلا عايز ايه برضو؟
علاء
ولا حاجه انا بس بكلمها مش بترد فجيت اقولها ان التنسيق بدأ وعايز اشوفها هتختار كلية ايه..
طارق
وانت مالك هي هتدخل ايه ولا مش هتتنيل اصلا..
علاء بتوتر
اا اصل انا وهي ظروفنا زي بعض انا كنت عايش في الاسماعيليه ونقلت هنا من كام شهر فكنت انا وهي بنساعد بعض في المذاااكره سعات مش ديماً..
_جات في الوقت ده هنا من جوه ووقفت عند الباب وقالت بتوتر وهي بتبص لطارق اللي شكله متعصب جدا..
هنا
ازيك يا علاء عامل ايه؟
علاء
انا كويس الحمدلله لله، كلمتك كتير مش بتردي عليا..
هنا بصت لطارق بقلق وقالت
ما كنتش فاضيه وما اخدتش بالي من الفون..
علاء
ما علينا المهم يعني انا كنت عايز اعرف انتي هتدخلي كلية ايه عشان انا مش عارف وقولت نسااعد بعض وخصوصا ان انا وانتي جايبين نفس المجموع ومستوانا قريب من بعض..
هنا
مش عارفه بس هو انا حابه ادخل صيدله وبرضو خايفه لان دي كليه مش ساهله..
ابتسم علاء وقال
والله انا كمان نفس التفكير فكرت في صيدله برضو وخايف شويه..
هنا
طيب اتفضل نكمل كلام جوه بدل وقفت الباب دي..
علاء
لا لا وقت تاني واضح كده اصلا ان اخوكي اتدايق من وجودي من غير معاد..
طارق بنبره غاضبه
ايوه ادايقت جدا وياريت ما تكررهاش..
هنا بسرعه قالت
قصده انك تيجي من غير معاد، اا انا هبقي اكلمك يا علاء واقولك انا قررت ايه في الاخر.
علاء
تمام اتفقنا بعد اذنكم..
_وسابهم علاء ونزل ووقف طارق قدامها وقال بجمود ونبره غاضبه..
طارق
ده جاي يعمل ايه هنا وازاي اصلا تخلي حد يجيلك لحد البيت ده ايه البجاحه دي..
اتملت عيون هنا دموع وردت عليه
ما كنتش اعرف انه جااي وعلي فكره بابا حسن عارف اني كنت بتواصل معاه فترة الامتحانات عشان ما حدش كان راضي يساعدني والكل كان مضغوط، وبرضو دي حاجه ما تخصكش انت مالكش كلام عليا..
مسك طارق الموبيل اللي في ايدها وقال بحده
تمام الموبيل ده علي فكره انا اللي جيبته مش ابوكي هو ابوكي كان هيجيبلك موبيل زي ده منين اصلا..
هنا
لا والله وكلفت نفسك ليه وجيبته؟
طارق
كنت فاكرك تستاهليه انما انا اجيبلك موبيل وتكلمي عليه شباب فمش هيحصل..
هنا
ما تتكلمش معايا كده وموبيلك معاك اهو انا مش عايزه حاجه منك..
رمي طارق الموبيل علي الارض بكل قوته وقال بحده
في ستين داهيه اصلا، ابقي شوفي هتكلمي العيل اللي مصحبااه ده علي ايه..
_قال كلامه وسابها ودخل شقة عزالدين، وهي دموعها نزلت بحزن وجات ليلي في الوقت ده وقالت بقلق..
ليلي
في ايه يا هنا، ايه ده مالك بتعيطي ليه تو طارف كان بيزعق كده فيكي انتي..
هنا ببكاء
ايوه وكسرلي الموبيل بس انا مش عايزه منه حاجه اصلا..
_ومسكت الفون من علي الارض وطلعت الخط بتاعها منه وقالت لـ ليلي ببكاء..
هنا
انا كنت فاكره ان ابويا الله يرحمه هو اللي جابه ليا، بس طلع طارق هو اللي جابه ولو كنت اعرف من الاول ان هو اللي جابه انا عمري ما كنت هقبل اخده منه..
ليلي
طيب اهدي وانا هروح اهزأه دلوقتي عشان زعقلك كده يلا بينا بس ندخل جوه..
_في شقة عز الدين طلع عز من اوضته ولقي طارق قااعد في الصاله وهو متعصب وقاله..
عز
انت اللي كنت بتزعق من شويه
ما ردش عليه طارق فقعد عز جنبيه وقال
هو انت كنت بايت فين امبارح؟
طارق
في الكافي بتاعي ظبطت شوية حاجات هناااك ومن النهارده بدأت شغل فيه هستغل الاجازه اني اخلصه قبل الدرااسه ما تبدأ..
عز
برافو عليك ولو احتاجت اي حاجه قولي وانا في ضهرك، ولو علي موضوع هنا انت اا..
قاطع طارق كلامه وقال
الموضوع انتهي يا زيزو خلاص..
عز
طيب نتكلم هو فيها ايه لما تترفض ما كلنا اترفضنا في اول مره..
بصله طارق بضيق وقال
انا قفلت الموضوع ده وهنا زيها زي باقي اخواتي زي ما اخوك قال وخلصنا علي كده..
عز
يبقي انت فعلا كنت بتقول جوازه ساهله وخلاص انما لما لقيت ان ابوك بيغلي البنت لا ازاي ما ينفعش..
طارق بحده
يوووه اتكلم مع نفسك انا داخل اناام…
سابه طارق ودخل اوضته وعز قاله بصوت عالي
براحتك بس انت كده بالنسبالي فاااشل يا طارق، وهتندم علي فكره لما تلاقيها بقيت من نصيب واحد. غيرك والسبب ان البيه كرامته ناقحه عليه ومش مخلياااه حتي يحاول يعالج الاسباب اللي اترفض عشانها..
طلع طارق من اوضته وقاله
انت اخر واحد انا ممكن اخد منه نصايح، فوفر كلامك ده لنفسك..
عز بحزن
والله ابوك معاه حق لان انت من صغرك واسهل حاجه عندك المعايره، وبعدين ده انت المفروض تبص عليا وتتعلم عشان ما تتعبش زي ما انا تعبت طول حياتي بس اني بمشي باللي في دماغي ومش بسمع كلام ولا نصايح حد..
طارق بندم
انا اسف يا زيزو مش قصدي..
عز بحزن
غور نااام انا رايح لزين مش قاعد هنا اصلا..
ــــــــــ #بقلم_الكاتبه_رحاب_القاضي ــــــــ
_وفي شركة يونس الصاوي كان قااعد يوسف مع يونس في مكتبه ويونس قاله بجديه..
يونس
هاا فهمت هتهبب ايه؟
يوسف بقلق
لو قولتلك ما فهمتش هتمد ايدك..
يونس بحده
ما فهمتش ايه دي عاشر مره اشرحلك بنراجع ملفات البضاعه المستورده ازاي، دي اتفه حاجه عندنا هنا..
يوسف
بص بالراحه اخر مره وانا هفهم والله..
يونس مسك راسه وقال بألم
انا تعبت مش قادر عمك يوسف جاي كمان يومين وهو يعلمك..
يوسف
لا يا بابا انا عايزك انت اللي تعلمني..
يونس
وانا صحتي ما تسمحش اني اعلم واحد غبي زيك..
يوسف
يعني مش هتعلمني يا يونس يا صاوي؟
يونس
لا مش هعلمك..
يوسف
قول بقي انك بتتلكك وانا والله لهكلم ست الحبايب ماما واقولها جوزك بيتلكك وبيطفشني من الشغل..
يونس بعصبيه
اتنيل ركز معايا من الاول جاتك ستين نيله انت وامك..
يوسف كتم ضحكته وقال
هركز اهو بس بالراااحه..
_وقبل ما يبدأ يشرحله من الاول الشغل دخلت السكرتيره وقالت بنبره هادئه..
السكرتيره
بعد اذن حضرتك يا يونس بيه بس ده معاد الميتمج مع رؤسااء العمال ولازم حضرتك تروح المصنع دلوقتي..
يونس
ده انا نااسي الموضوع ده خالص، خلاص يا بنتي روحي قولي للسواق يجهز ومدير الحسابات هيجي معايا..
السكرتيره
تحت امرك يا افندم..
واول ما طلعت يوسف قاله بخبث
يا بنتي بتقولها يا بنتي علي اساس اني كده هصدق انك راجل القيم والمبادئ..
يونس بحده
لا لا ده انا لا عندي قيم ولا مبادئ وراجل ما فيش اوحش منه وهطلعهم علي اللي جابك دلوقتي..
قام يوسف من قداامه بسرعه وقال
بهزر معاك يا حجوج ايه اروح اجيب اب من الشارع اهزر معاه..
يونس
بص انا هغيب ساعه وارجع تمسك الملف ده تفصصه وتقعد هنا مكااني، خلي الموظفين يتعودو علي شكلك هنا عشان لما تتنيل تمسكها..
يوسف
اتكل انت علي الله يا حج واطمن انا هنا..
يونس
ما هو ده اللي قالقني انك انت هنا، انت ما تعملش حاجه غير تدرس الملف ده كويس ما عرفتش تقعد. هنا زي ما انت لحد ما ارجع..
يوسف
اوامر حضرتك يا بابا بيه..
يونس بغيظ
يارب صبرني..
_ومشي يونس عشان يروح الاجتمااع بتاعه وبعد. شويه رجع لقي الموظفين الرجاله كلهم موجودين معادا البنات، وجاتله السكرتيره بسرعه وقالت بقلق..
السكرتيره
اللي بيحصل ده يا يونس بيه هيدمر سمعة الشركه..
يونس
حصل ايه وفين الموظفاات؟
السكرتيره
فووق..
يونس
فوق فين مش نصهم مكاتبهم هنا؟
السكرتيره بتوتر
فووق يوسف بيه عامل معاهم كلهم اجتماااع خاص..
حط يونس ايده علي قلبه وقال
الله يخربيته علي بيت اليوم اللي خلفته فيه..
_وطلع فوووق بسرعه واول ما دخل المكتب لقي يوسف قااعد الي مكانه وحوالين كل الموظفاات وهما بيضحكو وبيهزرو معاه..
.
يونس
ايه المهزله دي؟
قامو الموظفات بسرعه ويوسف اولهم وقال
يا نهار اسود بابا انت جيت ليه بسرعه..
يونس
علي مكتبك يا استاذه منك ليها واللي هتدخل هنا بعد كده من غير ازني تعتبر نفسها مرفوده..
_طلعو كلهم علي مكاتبهم وفضل هو ويوسف والسكرتيره اللي يونس قالها بحده..
يونس
بعد كده يا لبني لو اي حد دخل المكتب وانا مش موجود. من غير اذني مش هحااسب غيرك..
لبني
انا اسفه يا يونس بيه مش هتتكرر تاني والله.
يونس
روحي علي مكتبك…
طلعت السكرتيره ويوسف قال بتوتر
ناس مش محترمه يعني مفيش نظاام خالص.
يونس
عارف يالا انت لو جدك حامد الله يرحمه كان عايش كان زماانه مديني بالجزمه علي الخلفه العار اللي تكسف دي، لامم الموظفات عندك بتهبب بيهم ايه فااشل يا صايع يا خلفتي السودا..
يوسف
اعصاابك يا بابا مش كده هتحرق في دمك عشان حاجه مش مقصوده
يونس
انت مالكش شغل عندي بره بدل ما اخلي الامن يجو يرموك بره..
يوسف
لا انا مش هسيبك يا بابا..
يونس بعصبيه
لا سيبني انا مش قدك ولا قد دماغك التعبااانه دي..
يوسف
هسمع كلامك والله اخر غلطه..
يونس
راجعت الملف
يوسف.
مش حلو الملف ده حتي لونه اصفر وانا مش بحب اللون الاصفر..
يونس
يووووسف استرجل والملف ده لو ما فهمتوش ودرسته كويس مش هشغلك هنا..
مسك يوسف الملف وقال
انا عايز مكتب بقي اشتغل فيه وعايز سكرتيره حلوه زي اللي عندك…
ميل يونس علي الارض وقال بعصبيه
بالجزمه يا ابن الكلب..
_جري يوسف من قداامه ويونس رااح قعد علي مكتبه وفضل متابع يوسف من خلال الكاميرات وهو قاعد وسط الموظفين وبيحاول فعلا يفهم الشغل، واللي عجبه اكتر فيه انه بيتعامل مع الموظفين بكل تواضع وكأنه واحد زيهم بالظبط في الشركه…
ــــــــــ #بقلم_الكاتبه_رحاب_القاضي ــــــــ
_وفي بيت لمياء مامت سيف كانت قااعده هي والشغاله اللي كانت في بيت سيف وشافت شرين وهي بتضرب تيا، ولمياء قالتلها بهدوء..
لمياء
خير يا فايزه ايه الحاجه المهمه اللي انتي عايزاني فيها؟
فايزه
انا متأكده يا ست لمياء اني لو اتكلمت عن اللي حصل وشوفته ما حدش كون هيصدقني انا ما صدقتش عينيا برضك لما شوفت اللي عملته الدكتوره مرات الاستاذ سيف الجديده في حفيدة حضرتك
لمياء بقلق
عملت ايه ازاي يعني وبعدين تيا ما راحتش عندها غير مره واحده
فايزه
ايوه هي المره دي قعدت عندنا كام. يوم البنت الصغيره، وكانت ال… والله انا مش بكدب يا ست هانم..
لمياء
يا ستي اتكلمي علي طول عملت ايه شرين في حفيدتي؟
فايزه
ضربتها علي وشها وكانت بتقرصها في جسمها لدرجة انه كان بيعلم وكانت بتعمل كده وبعدهو تقول للاستاذ سيف ان البنت لازم تقعد. معاهم فتره اكبر عشان تتعود. عليهم وما تعيطش بالطريقه دي وتستغربهم..
لمياء بصدمه
مستحيل ازاي تعمل كده في كفاه يدوب عمرها تلات سنين..
فايزه
انا صورتها في مره وهي بتضربها وبتشدها من شعرها والفيديو معايا اهو..
لمياء
وريني ده انا هوديها في ستين داهيه، ولازم ريناد تعرف باللي حصل في بنتها هي وسيف.

يتبع….

لقراءة الفصل التالي : اضغط هنا

لقراءة باقي حلقات الرواية اضغط على : (رواية موضوع عائلي 3 (بيت الهنا))