رواية عشقت مطلقة وأولادها 2 الفصل الثامن 8 بقلم مارلي إيهاب

رواية عشقت مطلقة وأولادها 2 الفصل الثامن 8 بقلم مارلي إيهاب

رواية عشقت مطلقة وأولادها 2 البارت الثامن

رواية عشقت مطلقة وأولادها 2 الجزء الثامن

رواية عشقت مطلقة وأولادها 2 الحلقة الثامنة

امير بغل
طبعا لسه مصر هي دي عايزه كلام ده انا هوريهم النجوم في عز الظهر بقى انا يحصل فيا ده كله ومن تحت راس حته بنت ملهاش اي 30 لازمه لا و التلاته اللي حبوا يعملوا نفسهم رجاله قدامها يضربوني واترفد من تحت راسهم وربنا ما هسيب حد فيهم
ادهم بهدوء
بلاش مشاكل يا امير ابوك حذرك وقالك تبعد عنهم لان ابوهم واحد طايل بلاش تجيب لاهلك ولنفسك المشاكل يا اخي ابعد عن الشر وغنيله زي ما بيقولوا
امير ضحك
انا بقى مش هبعد يا حبيبي لا انا هعرفهم ان الله حق مش انا اللي يحصل فيا كل ده بكره تشوف انا هعمل فيهم ايه
ادهم بقلق
ربنا يستر ويهديك يا امير
بالليل في اوضه اريام وساجده كانت اريام بتحكي لها على اللي حصل
ساجده بصدمه
يعني رماح هيعرفك على البرامج اللي انتي محتاجاها للشغل و هيقعد معاكي كمان في الكلية
اريام بابتسامه
ايوه وكمان قالي انه هيعلمني على اللاب توب بتاعه لما عرف ان انا معنديش واحد
ساجده بضيق حاولت تداريه
ايوه بس يعني هتقعدي معاه ازاي في الجامعه كده واللي رايح واللي جاي يشوفكم انتي عايزه الطلاب تتكلم علينا ولا ايه
اريام بتوتر
هي كلها كام يوم علشان خاطر اتعلم واتقبل في الشغل وبعدها مش هيبقى في بيني وبينه اي كلام انتي عارفه كويس يا ساجده ان الشغل ده احنا محتاجينه جدا وهياثر معانا جامد يا ساجدة
ساجده
معاكي حق ربنا يوفقك يا حبيبتي
اريام
ويوفقك بس انا حاساك انك اضيقتي لما قلتلك على رماح
ساجده ابتسمت بخبث
يا هبله هتضايق ليه يعني انا افرحلك حتي لو في حاجه غير اللي هيعلموهلك حد يطول يبقى مع واحد ابن راجل مليونير
اريام بصدمه
ايه اللي بتقولي ده يا مجنونه انتي تعرفي عني كده وان انا يهمني الفلوس
ساجده ببرود
وفيها ايه اهو على الاقل يخرجنا من الفقر اللي احنا فيه ونعيش عيشه تانيه بقى مش هكدب عليكي انا كنت حاطه عيني عليه ونفسي اوقعه كمان علشان خاطر فلوسه بس لو انتي هتقومي بالدور ده مفيش مشكله انا احبلك الخير برده
اريام بصدمه
بلاش جنان انا عمري ما فكرت كده وانتي كمان المفروض ما تفكريش في حاجه زي دي
ساجده
هو عيب ان اطلع من الفقر وافكر ازاي اخرج منه
اريام
تفكري تخرجي منه بمجهودك مش عشان تضحكي على واحد يصرف عليكي انا مصدومه فيكي بصراحه يا ساجده مش مصدقه ان انتي يخرج منك الكلام ده
ساجده بتوتر
خلاص يا اريام انا بهزر معاكي وبفضفض معاكي بكلمتين ما تحبكيهاش قوي كده تصبحي على خير
وراحت ساجده تنام
في شقه ثائر كان واقف في البلكونه وبيشرب القهوه بتاعته دخله رماح وقاله
مالك عاد بقالك ساعه واقف في البلكونه وسرحان ايه اللي واخد عقلك
ثائر بحزن
هيكون ايه يعني يا رماح سرحان في حالي والماضي اللي لغايه دلوقتي محوطني ومش قادر انساها كانها قفلت على قلبي بالضبه والمفتاح وحلفت ما يبقى لغيرها وان افضل موجوع طول عمري بسببها
رماح بحزن
بطل تفكر فيها يا اخوي وصدقني هتنساها وانت اعمل صداقات جديده وعلاقات جديده علشان خاطر قلبك ينساها بقى وتعيش حياتك طول ما انت قافل على نفسك اكده ومانع حد يقرب يمتك عمرك ما هتنسى
ثائر بقهر
نفسي اطخها عيارين واخلص عليها وعلى الكلب اللي هربت معه وبعدين اخلص على حالي لاني خابر زين اني ما هقدرش اعيش من بعدها
رماح بصدمه
جنيت عاد ولا ايه عايز تعمل كده في نفسك عشان خاطر واحده ولا تسوى من اول مره شوفتها فيها وقلتلك بلاش كان باين عليها الطمع بس انت مرايه الحب كانت عامياك يا اخوي علشان كده ما شوفتش سواد قلبها بس انا متاكد ان قريب ربنا هيرزقك ببنت الحلال اللي تصونك وقلبك يتفتحلها من اول وجديد
ثائر بدموع
ما اعتقدش يا اخويا انا قفلت منهم كلهم
رماح بغضب
ما تقولش الكلام الماسخ ده طول ما انت بتقول كده عمرك ما هتنساها لان انت مرايدش اصلا انك تنساها ربنا يهديك يا ثائر
ثائر مردش عليه
تاني يوم في الجامعه بعد المحاضرات قعد رماح وفضل مستني اريام لغايه ما جت
اريام بخجل
اسفه تاخرت عليك بس يا دوب المحاضره لسه خلصانه دلوقتي
رماح
ولا يهمك خلينا نبدا
رماح طلع على اللاب توب بتاعه وبدا يعلمها على البرنامج واحده واحده وبعد ساعه ونص كانت خلصت ساجده وقربت منهم وقالت
مساء الخير ازيك يا رماح خلصت ولا لسه
رماح بهدوء
لا لسه شويه اقعدي
سجده قعدت جنبه ورماح كمل شرح وكانت ساجده كل شويه تقاطعهم وتسال اي حاجه ملهاش لازمة
رماح بحده
بقولك ايه عاد ما توترينيش انا ما بحبش وانا بتكلم في حاجه حد يقاطعني اما اخلص اسالي اللي انتي رايداه لكن طول ما انا بتكلم متفتحيش خشمك
ساجده بضيق
انت ازاي تتكلم معايا بالطريقه دي انا قلت ايه يعني لده كله انا بسالك هتخلص امتى عشان انا زهقت وعايزه امشي على العموم انا قايمه وسايبهلكم خالص ومروحه
اريام بتوتر
استني بس يا ساجده انتي رايحه فين هو ميقصدش يزعلك اكيد
ساجده بضيق
يقصد او ما يقصدش ما يخصنيش انا ماشيه عايزه تخليكي خليكي
وفعلا سابتها ومشيت واريام قالت بحزن لرماح
مكنش ينفع تقولها كده وتحرجها بالطريقه دي
رماح بهدوء
انا مغلطتش فيها يا انسه ده طبعي وبعدين انا نبهت مره واتنين ان انا متضايق من مقاطعتها ليا وهي مفيش فايده فيها على العموم خلينا نكمل بكره احسن وخلي اللاب توب معاكي اتدربي على اللي قلتهلك النهارده علشان متنسيهوش
اريام بصدمه
لا لا انا ما اقدرش احتفظ بحاجه زي دي احسن يحصله حاجه عندي و بعدين انا مبعرفش اتعامل معاه
رماح بهدوء
امال كيف رايده تشتغلي وانتي ما خابراش حاجه في اللاب توب ولا كيف تتعاملي معاه كده اضمنلك انك مش هتتقبلي في الوظيفه دي على الاقل لازم يبقى عندك حاجات بسيطه تعرفيها على اللاب لان اكيد شغلك كله هيبقى عليه متقلقيش زي ما فتحته قدامك هتفتحيه وتدخلي على البرنامج وانا هسيبلك رقمي لو في اي حاجه عطلت معاكي ابعتيلي على الوتس وانا هرد عليكي لكن لو مشيتي واتقابلنا بكره هتكوني نسيتي اللي شرحتهلك النهارده لازم تطبقي عليه علشان تفضلي فاكرا
اريام حاولت ترفض لكن هو اثر وفعلا اخدت اللاب توب وراحت على الموقف وكانت اختها لسه واقفه
اريام بضيق
ايه الجنان اللي عملتيه ده يا ساجده
ساجده بعصبيه
انا برده اللي عملت الجنان مشوفتيش اسلوبه وطريقته معايا عامله ازاي ولا انتي بقى عجبك اللي قالوا علشان كده واقفه في صفه يا ست اريام
اريام بضيق
انا لا واقفه في صفه ولا حاجه انا مستغربه طريقتك ولا عملتيه كان ليه ده كله يا بت الناس انتي عارفه كويس انه هيدربني على حاجه مهمه ليه كل شويه تقاطعينا وكانك قاصده ويا ريت اللي بتقطعيه علشانه حاجه مهمه لكن اسألتك كلها فاصل قد ايه طب انت شرحتلها قد ايه طب عملت قد ايه ايه الاسئله دي كل شويه تفصليه علشان خاطر الاسئله البايخة
ساجده بعصبيه
بقولك ايه خلاص اسكتي ومتتكلميش انا مش ناقصه كلام فارغ ويا ستي انتي عايزه تقعدي معاه براحتك لكن انا هخلص محاضراتي وهرجع على البيت
اريام بصدمه
ماما هتسالك رجعت من غيري ليه وساعتها بقى هتقوليلها ايه انتي عارفه كويس انها ما تعرفش حاجه بخصوص موضوع رماح ولا انه بيعلمني حاجه علشان الشغل
سجده بخبث
ولا حاجه هقولها انك بتدربي مع زميلك على حاجه في الكليه عادي يعني
اريام بعصبيه
قصدك بقى ان هي تمنعني اروح الكليه خالص صح انتي ليه بتعملي كده ما تبطلي انانيه شويه انا بعمل كل ده علشان خاطرنا وعلشان نعيش عيشه كويسه في الاخر تردي الجميل كده هو انا يهمني اتقبل في الشغل علشان خاطر مين مش علشانك انتي وامك وبالاخص علشانك انتي اللي كل شويه تقولي معنديش هدوم ومنظري قدام صحابي وكلام فارغ انا بحاول اظبط الدنيا على قد ما اقدر هقصر في دراستي علشان خاطر نعيش عيشه كويسه ومن غير ما امك تمد ايديها لحد ونستلف منه وانتي عايزه تروحي تقوليلها وتضيعي كل اللي انا بعمله
ساجده بضيق
بطلي تعملي دور المضحيه انتي محدش طلب منك تعملي كده انتي اللي بتعملي ده بمزاجك محدش ضربك على ايدك وقالك روحي اشتغلي وقصري في دراستك لكن كل شويه هتقولي انا بعمل كده علشان خاطرك انتي بتعملي علشان نفسك الاول مش علشاني لأم البنات ده مبحبوش
اريام بدموع
بقى كده انتي شايفه كده يا ساجده
ساجده ببرود
مش شايفه غير كده يا حبيبتي يلا الميكروباص جاه خلينا نروح علشان انا زهقت
وركبوا الميكروباص وما تكلموش مع بعض وروحوا البيت وسعاد كانت عند هنيه في الوقت ده
هنيه بدموع
منه لله المدير اللي ابني كان عنده كلم صحاب الشركات كلهم هو قالهم محدش يوظفه والواد يا حبه عيني كل ما يروح اي شغلانه ملهاش علاقه بشهادته كافيه ولا مطعم يكلم صاحبه وصاحب المكان يطردوا
سعاد بتوتر
انا خايفه اقولك على حاجه تزعلي
هنيه بحده
اوعي تجيبي سيره الموضوع ده يا سعاد انا حكيتلك علشان بثق فيكي لكن اياكي تجيبي سيره لاي حد ولا تتكلمي حتى مع نفسك في الموضوع ده مش اللي داريته سنين هيتكشف دلوقتي
سعاد
طب اهدي بس انا ما اقصدش والله ازعلك انا عامله على بهدله ابنك
هنيه
لينا رب كبير هيدبر لينا حالنا
سعاد
ربنا معاه ويوقفله ولاد الحلال يا رب ويبعد عنه شر المخفي ده وينتقم منه قادر يا كريم
هنيه
يا رب يا سعاد
في الصعيد في بيت ريان كان قاعد مع مهره في اوضته
مهره
من ساعه ما جيت من بره وانت متضايق وقالب وشك في حاجه ولا ايه يا ريان
ريان بضيق
متشغليش دماغك انت يا مهره مشاكل في الشغل
مهرة قربت منه
ومن متى يعني ما بتحكينيش مشاكلك في الشغل ده انت كل حاجه بتيجي تقولها ليا هنا مالك يا ريان شكلك مش طبيعي النهارده
ريان
لو قلتلك هتزعلي
مهره بقلق
في ايه طمني حصل حاجه
ريان حكلها على اللي قالوا حسن
مهره بصدمه
وانت مصدقه معقول
ريان بضيق
المشكله ان انا مش مصدقه وخابر زين انه رايد يوقع ما بيني وما بينك وده طبعا من تخطيط زهره
مهره
ولما انت خابر اكده ما قلتلوش ليه انك كداب بدل ما تقلب وشك قدامي
ريان
مينفعش يا مهره ده مهما كان ولدي انا هتكلم مع زهره نفسها تبطل اللي بتعمله ده
مهره
هي من متى بقى ان شاء الله بتسمع كلامك وبتنفذ اللي انت بتقوله يا ريان
ريان بعصبيه
قصدك ايه اني ما بقدرش امشي عليها كلمه
مهره بضيق
ايوه امسك في كلمتي وسيب اللي عملت المشكله وبعتالك ابنها علشان يوقع بيني وبينك ويوقعك في ابنك كمان
ريان
خلاص يا مهره اقفلي على الموضوع ده مرايدش كلام فيه
مهرة بضيق
وماله يا ابو عمو براحتك انا رايحه اجهز الوكل
وسابته وخرجت وهي متضايقه
اما في بيت سلطان كان قاعد مع خلود مراته
خلود
اتجنيت ولا ايه يا سلطان رايد تروح تقول لشمس ان هي تبقى بنت عمك يعني اللي ابوك دراه سنين وانت رايد ايه تفضحه دلوقتي
سلطان
وفيها ايه يا خلود احنا قرايب ولازم تعرف ان احنا اهلها ومتقطعش العلاقه ما بين العيلتين لمجرد ان ابوي خلاص راح ما هو كان بالنسبه لها صاحب ابوها الله يرحمه
خلود
بالنسبه لها كان ابوها اللي واقف جنبها في اصعب حالاتها بلاش تفتح على نفسك فتوحه وبعدين الموضوع ده ممكن ياثر على نفسيتها فكرة انها جت من الحرام وعيالها رجاله كبار وعندها بنات كبار كمان ميصحش الكلام ده حد يعرف الكلام ده واصل يا سلطان
سلطان فكر في كلامها
معاكي حق يا خلود انا ما حسبتهاش اكده انا بس مكنتش رايد تقطع العلاقه ما بين العيلتين بمجرد ما ابوي راح بس انتي صح مينفعش حد يعرف الكلام ده واصل
خلود
صح كده وانا كل شويه كده هتواصل معاها واعزمها عندنا هي وجوزها بحيث ان العلاقه متتقطعش
سلطان ابتسم
ماشي يا خلود انا هعاود على الشركه اخلص اللي ورايا وبعدين هرجع لما ياسين يجي ابعتهلي على الشركه
خلود ضيق
الواد هيبقى لسه جاي من السفر ارحموا شويه يا سلطان سيبه يرتاح هبابه
سلطان
ورانا شغل كتير مش هينفع يجي استريح لما نخلص الشغل يستريح براحته متنسيش اول ما يوصل تبعتهلي سلام
في شقه كان قاعد بدر وبيقول بغضب
انتي جنيتي عاد يا بت المركوب هو انا مش منبه عليكي ان انا مرايدش حمل
ندى بدموع
غصب عني يا بدر والله انا كنت باخد الحبايه كل يوم والله ما خابراش كيف حملت
بدر مسكها من شعرها وقال بحده
قولي انك طلعتي رايده تخلف مني علشان خاطر اتجوزك رسمي وابنك يورث فيا مش ده اللي فكرتي فيه
ندى بعياط
اقسم بالله ما حصل يا بدر والله انا باخد الحبايه في ميعادها كل يوم ما خابراش ازاي حصل حمل
صدقني يا بدر
بدر بعصبيه
انا بقى مش مصدقك هصدق واحده قبلت تتجوزني عرفي تقابلني من ورا اهلها وتحمل كمان ويا عالم ده مني بقى ولا من حد غيري
ندى بصدمه
انت اتجننت ولا ايه انت بتشك في اخلاقي انت خابر زين اخلاقي يا بدر
بدر بغضب
اشك ما اشكش ليه اللي تقبل تتجوز من ورا اهلها تعمل اي حاجه

يتبع….

لقراءة الفصل التالي : اضغط هنا

لقراءة باقي حلقات الرواية اضغط على : (رواية عشقت مطلقة وأولادها 2)