رواية النصيب الفصل الحادي والثلاثون 31 بقلم رحاب القاضي
رواية النصيب الفصل الحادي والثلاثون 31 بقلم رحاب القاضي
رواية النصيب البارت الحادي والثلاثون
رواية النصيب الجزء الحادي والثلاثون
رواية النصيب الحلقة الحادية والثلاثون
قُل للّيالي أن تُطيلَ ظلامَها، لربَّما تأتي المسرةُ بغتةً
وتُراك تنسى كلَّ أيام الألم!
_صحي أسر من نومه وما لقاش شهد جنبيه ولا في الاوضه كلها نزل بسرعه يدور عليها لقاها قاعده. بتفطر وجنبيها صباح بتتكلم معاها وبيضحكو..
أسر
لا والله قال وانا اللي خايف عليكي..
قامت صباح وقفت وبصتله شهد بعدم فهم وقالت
هتخاف عليا ليه هكون روحت فين يعني..
أسر
ما انتي كل يوم بتصحي متأخر وخصوصا لو مش وراكي محاضرات فصحيت مالقتكيش جنبي خوفت تكوني اتهبلتي في دماغك وسبتيني..
شهد بخبث
ولو كنت عملتها يعني كنت هتعمل ايه؟..
قرب منها وقال بابتسامه هادئه
كنت هولع فيكي بس يا حبيبتي..
صباح بأحراج
تحب اجهز لحضرتك. الفطار يا أسر بيه؟
أسر
اوكي يا صباح. وهاتيه فووق انا اجازه النهارده اصلا..
شهد
اجازه ليه وعايز ليه تفطر فوق..
أسر غمزلها وقال
وحشااني وعايز اقضي وقت كبير معاكي، وقومي كده احنا مش هننزل من فوق النهارده
شهد
لا اوعي بس انا مستنيه هاله اصلا
أسر
مستنياها ليه وايه اللي هيجيب هاله عندنا دلوقتي؟
شهد
هتاخدني عند دكتور عشان اتابع الحمل وهروح معاها الجمعيه اغير جو..
قعد. أسر جنبيها وقال
دكتوره يا شهد انتي هتابعي الحمل مع دكتوره، وتروحي الجمعيه ليه ده انا ما صدقت ان علاقتنا تتحسن شويه
شهد
لا ما انت مدام. صرفت نظر عن. موضوع جوازك. عليا فأطمن انا من ايدك دي لايدك. دي..
أسر
طيب كلمي هاله قوليلها تلغي معاد الدكتور وما تخليهاش تيجي انا هبقي اخدك ونروح لدكتوره، وهاخدك افسحك في اي مكان نفسك. فيه قال جمعيه قال،انتي من غير حاجه وبتنكدي عليا تقوم الغبيه تاخدك كمان لحقوق المرأه..
شهد ابتسمت وقالت
خلاص طيب نفطر بره النهارده؟
أسر
لا معلش انا افتكرت ان عندي معاد دلوقتي مع حد مهم..
شهد
يا سلام ما انت كنت فاضي من شويه، ومعاد ايه ده؟
أسر بخبث
بنت كده زي القمر نفسها تركب العربيه بتاعتي وتتفسح شويه..
شهد بحده
ايوه بقي انا كنت عارفه ان عمرك ما هتتغير اصلا وو.
اسر
اهدي وافهمي الاول انا بتكلم عن مين؟
شهد
هي هتفرق انت بتتكلم عن مين وبكل برود بتقولي كمان، طلقني يا أسر..
اسر
بس كده انا بقيت اتفائل بالجمله دي طلقني يا اسر، لو ما سمعتهااش بحس يومي ناااقص حاجه، وبعدين يا هانم انا بتكلم. علي ملك اختك..
شهد
ملك اختي انت بتتكلم بجد؟
أسر
ايوه والله هاخدها شويه بالعربيه معايا تكوني انتي اخدتي العلاج وارتحتي واروحها واجي اكمل اليوم معاكي
شهد ابتسمت وقالت
انت بجد هتعمل كده مع ملك؟
أسر
ما هما من النهارده اخواتي انا كمان مع اني لسه بتلخبط فيهم بس هحفظهم وهخليهم يحبوني زي ما بيحبوكي كده
شهد ضحكت وقالت
ياريت بجد وعارف كمان انا نفسي ابقي حامل في ولد لان من زمان وانا نفسي يبقي عندي اخ ولد بس ما حصلش نصيب، واكيد لو جيبت ولد هيبقي ابني واخويا وصاحبي وكل حاجه
أسر بغيظ.
يارب تجيبي بنت يا شهد؟
شهد
اشمعنا؟
اسر ابتسم وقال
بصراحه عشان خايف اجيب ولد يعمل فيا زي ما عملت في ابويا..
ضحكت شهد وقالت
ههههههه يارب توأم ولاد واشووفهم مطلعين عينك..
ابتسم بهدوء لضحكتها ومسك ايدها وباسها وقال
عارفه الضحكه دي عندي بالدنيا، انا مستعد اعمل اي حاجه بس تفضلي كده معايا علي طول..
شهد
ابعد عن كل ما هو مؤنث وانا هفضل كده معاك علي طول، وبالمناسبه حبيبة القلب فين دلوقتي؟
أسر اخد السندوتش اللي في ايدها وبدأ ياكل فيه وقال ببرود
ماانتي قاعده جنبي اهو، ولا انتي قصدك علي حد تاني؟
شهد ضربته علي كتفه وقالت
ماتستظرفش انا بسأل علي نتالي؟
أسر
خليتها تروح الشقه بتاعتي وبعت معاها الشغاله الجديده، وهشوف بقي هي هتقرر تقعد هنا ولا تمشي
شهد
وطبعا لحد ما هي تقرر انت كل يوم هتروح تطمن عليها، هو انت كده فاكر الموضوع خلص.
اتنهد أسر بضيق وقال
وبعدين يا شهد ما انت بعدتها عنك. خالص والمفروض تثقي فيا لما كنت ناوي اتجوزها كلمتك بصراحه وقولتلك، بس خلاص الموضوع اتقفل ليه مصممه تنكدي عليا علي الصبح
شهد بدموع
معلش..
جات تقوم بس هو مسك ايدها بسرعه وقال
مش قصدي ازعلك بس كتير والله عليا بقالي كام بتحايل عليكي يا شهد؟
شهد بعِند
عشان انت غلطان وبعدين عايز تروحلها براحتك اصلا
أسر
خليكي واثقه فيا وحياة امك، وانا لو روحتلها مش هطول عندها هيكون للضروره وياستي لو عايزاني اخدك معايا هاخدك
شاورت علي الجرح اللي في رقبتها وقالت
عايزني اروح عند واحده كانت عايزه تموتني
أسر
يبقي اسكتي واقسم بالله اللي يشووف النكد ده ويفكر يتجوز تاني يبقي ما اترباااش..
ابتسمت بخبث وقالت
طيب كويس ان النكد. جاب نتيجة معاك..
أسر قرب منها وقال
مع ان كان ممكن تقنعيني بطريقه تانيه فيها دلع مش نكد..
شهد
ما بعرفش وابعد كده عشان اغير هدومي واجيلك بسرعه
أسر
ليه عايزه تروحي فين؟
شهد
هروح اطمن علي ماما واخواتي معاك لحد ما ترجع انت وملك..
أسر
ماااشي وبالمره نقولهم انك حامل اكيد هيفرحو جدا
شهد
رحمه حاليا راحت عند ماما عشان تطمني عليهم وزمانها قالتلهم
أسر
اممم رحمه.. هي متدخله في حياتنا كده ليه؟
شهد
أسر حبيبي رحمه دي في كوم والدنيا كلها عندي في كوم تاني..
أسر
ربع حبك ليها بس وهعيش من غير نكد. باقي حياتي..
شهد ابتسمت وقالت
رحمه كانت ومازالت اكتر حد في الدنيا بثق فيه وبحبه ده احنا كده من لما كنا اطفال، فمتقارنش نفسك بيها…
أسر بغيظ
قووومي يا شهد بدل ما اروح اقتلك رحمه
شهد قامت وهي بتضحك وقالت
بعد الشر عليها…
_قالت كلامها وطلعت فووق وهو ابتسم بهدوء وبدأ يفطر، وموبيله رن برقم نتالي فعمل تلفون صامت وقال لنفسه بضيق..
أسر
مش وقتك خالص يا نتالي…
ــــــــــــــــــ
_وبعد شويه في الناادي كانت قااعده رحمه هي وشيري اللي قامت فجأه وقالت..
شيري
اسعد اخويا هناااك اهو ثواني هخليه يجي عشان يتعرف عليكي
رحمه
شوفته وعرفااه قبل كده، وبعدين انتي جيباني هنا ليه ما كنا روحنا اي كافي النادي ده. غالي وبتاع ناس نضيفه اوي اوي وتقيل علي قلبي كده..
شيري ابتسمت وقالت
ما فيش حاجه تغلي عليكي يا مرات اخويا، واستني شريف جااي وهيفهمك كل حاجه
رحمه بضيق
شريف مين اللي جاي انا مش عايزه اقابل اخوكي ما كان عندي بالليل عايز ايه تاني
شيري
بلييييز اهدي وهو هيفهمك. كل حاجه، هروح انا لاسعد قبل ما يمشي دقيقه واحده..
ـ مشيت شيري ورحمه فضلت قاعده مدايقه، وبعد كام. دقيقه جه شريف وقعد قدامها وقال..
شريف
بعتذر جدا عشاان اتأخرت عليكي، ومعلش جبناكي هنا من غير ما تفهمي حاجه
رحمه بقلق
افهم ايه هي ايه الحكايه بالظبط؟
شريف
فريده هانم المظ بك جايه دلوقتي؟
رحمه
اهلا وسهلا تنور بس مين دي خالتك؟
شريف
ماما يا رحمه معقول مش عارفه اسم حماتك
رحمه
هو انا كنت اعرف انها هتبقي حماتي وما عرفتش اسمها، وايه اللي جايبها قصدي جايه ليه وانا مالي؟
شريف
هي عايزه تتعرف عليكي وانتو قاعدين مع بعض لوحدكم، علي فكره هي طيبه اووي بس تفكيرها غربي شويه عننا
رحمه
والمطلوب مني ايه؟
شريف
زي ما بتعاملي مامتك عامليها وانا علي الاساس ده هشووف بقي مراتي المستقبليه اد ايه محترمه
رحمه
انا لسه فاتحه دماغ امي بأيد الهون وانا جايه، انا مش محترمه مع اهلي ومش محترمه مع حد اصرف نظر عن الموضوع بقي وريحني
شريف ابتسم وقال
حتي لو مش هسيبك بس انا لو بقولك حاجه دلوقتي زي كده فعشاان عايز الوضع بينك وبين ماما يبقي لطيف، وكمان لو لقيت حاجه مش عجبااني مع الوقت هظبطها بطريقتي بس اسيبك. مستحيل بعد كل اللي بقي جوايا ليكي
رحمه
بقولك ايه انا ما بحبش جو الاختبارات ده وامك. تجيبلي فوله تقولي اكسريها وتشوف شعري وحاجاتي عشان تطمن علي ابنها..
شريف
لا لا ماما مش هتعمل كده ماما اصلا businesswoman واسلوبها راقي جدا مع كل النااس وبتحب التعامل بحدود حتي معايا انا واخواتي لازم تبقي في حدود وقواعد نلتزم بيها..
رحمه
من. الاخر يعني انت عايز ايه دلوقتي؟
شريف
اول ما ماما تيجي قوليلها ازاي حضرتك يا فريده هانم، اسمعي كلامها قوليلها حاضر وبس وانا والله بعد كده هعملك اللي انتي عايزااه..
رحمه. بسخريه
ابن امك وكده انت اول اختبار فشلت فيه اهو..
شريف
اوكي بس انا هنجح في التاني علي فكره مدام. بعيد. عن. ماما..
رحمه. بخبث
متأكد انك هتنجح فيه؟
شريف
جربي بنفسك وهتشوووفي..
رحمه
امم هبقي اشووف يا شريف، الله ايه البنت المزه اللي هناااك دي..
بص شريف بتلقائيه وراااه فرحمه ضربته بشنطتها وقالت بغيظ
بتبص علي ايه ياللي تنشك واهو تاني اختبار فشلت فيه..
شريف
ايه الرخامه دي انا ببص بفضول مش قصدي
رحمه.
مش عايزه اسمع تبريرات منك تاني، وامك دي هتيجي امتي مش هفضل قااعده معاك كتير انا..
شريف بقلق
اهي جات هناك اهي زي ما قولتلك يا رحمه مدام فريده او فريده هانم..
رحمه بصت لام. شريف بانبهار وقالت
شريف هي الوتكه دي امك؟.
شريف
الـ ايه؟!
رحمه
وتكه يا شريف يعني المزه ده حتي كلمه قديمه ازاي مش عارفها..
شريف
ما علينا ايوه هي دي ماما..
رحمه
اتوكس ده انا اللي ماما، الوليه من لما دخلت والكل بيبصلها، دي كأنها لسه في العشرين..
شريف
طيب بس اسكتي يا رحمه..
_وقربت منهم فريده وسلمت علي شريف وحضنته بهدوء وبصت لرحمه من فووق لتحت وقالت بضيق..
فريده
هي دي اللي انت عايز تتجوزها؟!..
بص شريف لرحمه وقال بقلق
ااا دي رحمه. يا ماما اللي حكيتلك عنها..
مدت فريده ايدها لرحمه وقالت
ازيك يا رحمه..
سلمت عليها رحمه وقالت بهدوء
الحمد لله يا خالتي ام اسعد
بصلها شريف بصدمه وفريده قالتله بسخريه
معقوله يا شريف انا مرات ابني تقولي يا خالتي؟…
رحمه ببرود
هي خالتي دي كلمه عيب ولا ايه، ما احنا طول عمرنا بنقولها عادي يا خالتي..
شريف بقلق
طيب نقعد مش هنتكلم واحنا واقفين كده..
_وقرب شريف من مامته وسحبلها الكرسي عشاان تقعد، وراح قعد جنب رحمه وقالها بصوت واطي..
شريف
هو ده اللي اتفقنا عليه برضو؟
رحمه
انت ما شوفتش يعني الست امك بصتلي ازاي اول ما شافتني، ده ايه الجوازه المنيله بنيله دي..
فريده
انتي من عيلة ايه يا رحمه؟
رحمه
من عيلة ابو سفره..
فريده
نعم عيلة ايه؟!..
ضحك شريف وقال
هههههههه بتهزر يا ماما هو في عيله اصلا اسمها ابو سفره.
بصتله رحمه بعيظ وقالت
خلصت تريقه يا ظريف..
شريف بتوتر
هو ده اسم عيلتكم بجد؟!..
رحمه
ايوه ده اسم عيلتنا؟
فريده
انا اول مره اسمع الاسم ده، طيب باباكي بيشتغل ايه؟
رحمه
انا بابا كان ملاكم وواخد بطولة الجمهوريه سنة 2001،وحاليا مدرب ملاكمه في جيم..
فريده
وليكي اخوات؟!..
رحمه
ايوه ليا اخ واحد بس مهاجر في كندا وهيرجع بعد كام سنه..
فريده
ومامتك بتشتغل ايه؟
رحمه
ربة منزل بتهتم ببيتها وكده يعني..
فريده
امممم وانتي منين ساكنه فين هنا في مصر؟!….
رحمه
شبرا مصر يا خالتي اكيد تسمعي عنها…
فريده
اااه بسمع… احنا من التجمع شايفه الفرق بينا ازاي؟
شريف
ايه يا ماما اللي بتقوليه ده، ما فيش بيني وبين رحمه اي فرق، بالعكس ده هي بنت الف واحد يتمناااها..
فريده
تروح تختار منهم وتسيبك انت، بصي يا اموره انا مش مصريه بس بقالي كتيره عايشه هنا واتعلمت كل حاجه في مصر واعرف العدات والاصول كويس اوووي، حتي لهجتكم انا بقيت بتكلم زيكم برضو، يعني هعرف اكلمك بطريقه انتي لو فعلا بنت اصول ومحترمه هتفهميها من غير ما تحطيني انا اوانتي في موقف محرج..
جه شريف يتكلم بس رحمه قالت
بعد اذنك يا شريف انا عايزه اسمع فريده هانم المظ هتقول ايه؟
ـ حطت فريده رجل علي رجل وطلعت سجاره من شنطتها وولعتها وقالت بجمود…
فريده
اولا انتي شكلا مش عجبااني مظهرك برضو مش عاجبني طريقة كلامك وحشه جدا جدا جدا، احنا واهلك مش هينفع نتقابل في مكان مع بعض كعيلتين شبه بعض، شريف هيدمر مستقبله لمجرد انه اعجب ببنت غريبه عن البيئه اللي هو عايش فيها،انتي بالنسباله بنت شافها مختلفه عن البنات اللي عرفهم قبل كده، لكن هو هيجي عليه وقت ويندم وانا ما احبش ابني بندم او يختار غلط، انا كنت فاكره هاجي الاقي بنت شيك من عيله كبيره او معروفه شويه حد من اهلها ليه اسم وهيبه، انما انتي كل حاجه بالنسبالي صفر من عشره..
كتمت رحمه حزنها وابتسمت بهدوء وقالت
شكرا جدا علي صراحة حضرتك وكويس وخلتيني انا كمان اشوووف الصوره صح واشوف ايه اللي يناسبني وايه اللي لا، انا فهمت كلامك كويس واوعدك. انا من النهارده ماليش علاقه بولادك خالص مش بس شريف لا كمان شريف وشيري.
_قالت رحمه كلامها وقامت عشان تمشي بس شريف قاام ومسك ايدها وقال بجديه..
شريف
لما هنتجوز انتي هتعيشي معايا انا ولا مع ماما؟
رحمه بدموع
سيب ايدي لو سمحت الموضوع اصلا خلص من قبل ما يبدأ.
شريف
لا مش هيخلص انا بحبك يا رحمه وحبيتك وانتي علي كده من غير ما افكر اغير اي حاجه فيكي، ومستعد اعمل اي حاجه عشاانك..
فريده بحده
شريف الناااس كده هتتفرج علينا اقعد وسيبها تمشي خلاص الموضوع مش مستاهل اللي انت بتعمله ده..
شريف بعصبيه
لا مستاهل يا ماما وانا ما جبتكيش عشان تقرري بالنيابه عني ايه اللي يناسبني وايه لا، انا جاي اعرفك علي البنت اللي بحبها وانا مش عيل صغير عشان امشي ورا رئيك..
فريده بغضب
لا عيل صغير ولولا دعمي ليك انا وباباك انت مش هتقدر تعيش اصلا، واقولك علي حاجه لو اختارت تتجوز البنت دي انسي انك تاخد مننا قرش واحد روح عيش معاها في المستوي اللي هي منه..
_بصلها شريف بعدم. تصديق وجه في الوقت ده اسعد ومعاه شيري اللي سألتهم بقلق وقالت..
شيري
في ايه يا. جماعه وايه الكلام اللي ماما بتقوله ده يا شريف؟
رحمه بضيق
سيبني يا شريف امشي وكفايه مشاكل كده بينك وبين اهلك، خلاص ما حصلش نصيب عادي..
شريف بصلها بجديه وقال
لا مش عادي هو انتي لو بالنسبالي عادي انا كنت جيت اتقدمتلك دلوقتي، وبعدين انا عشاانك اعمل اي حاجه انتي مستعده تتحملي ظروفي وانا لوحدي من غير اهلي ولو علي اهلك انا مستعد اقنعهم، انا قدام الكل اهو بقولك اني بحبك وعشانك مستعد اعمل اي حاجه..
_بصت رحمه لمامته اللي كانت متعصبه جدا علي عكس اخواته اللي كانو مبسوطين من كلامه ومتابعة النااس ليهم، وردت عليه وقالت وهي بتسحب ايدها منه..
رحمه
ما عنديش مشكله طبعا بس لو هتخسر اهلك عشاني فانا مش موافقه، وجايز مامتك معاها حق يا شريف وانا فعلا مش مناسبه ليك، معلش بس انا مش هقدر ارتبط بيك بعد الحوار اللي حصل ده كله، ربنا يرزقك بالاحسن مني مليووون مره وتكون من مستوي فريده هانم. عشان ما تعملهاش مشكله، بعد. اذنكم..
_قالت كلامها وسابتهم ومشيت ووقفت تاكسي بره النادي ورجعت بيتهم وهي في الطريق افتكرت تمسك شريف بيها واعترافه قدام الكل اكتر من مره انه بيحبها وابتسمت وقالت بسخريه..
رحمه
اهو لو اكرم كان عمل ربع اللي انت عملته ده يا شريف كان زماني انا وهو مخطوبين..
ــــــــــــــــــ
_وفي بيت اهل شهد كانت واقفه وشايله نور اختها اللي عندها تلات سنين وهي بتدور علي الموبيل بتاعها ودخل ابوها في الوقت ده وقال بعصبيه..
صابر
يخربيتك انتي بتعملي ايه نزلي اختك..
نزلتها شهد بسرعه وقالت بخوف
انا كنت شيلاها عشان بتعيط والله ما عملتش حاجه..
طلعت فاطمه من المطبخ وقالت
في ايه يا صابر بتزعق ليه؟
صابر
بتك اللي لسه حامل جديد شايله نور وعماله تتنطط بيها..
فاطمه
طيب بالراحه طيب ما تعرفش انه غلط..
شهد
هو ايه اللي غلط والله كنت قاعده اصلا بس قومت ادور علي الموبيل..
صابر
قولي لاخواتك ما تقوميش انتي لحد ما الحمل يثبت..
فاطمه
ومن امتي يا اخويا الحنيه دي كلها…
صابر
من لما عرفت انها حامل، قال وكانت عايزه تطلق الغبيه…
فاطمه
كلمي جوزك يا بنتي خليه يجيب اختك ويجي عشان نتغدو سوا كلنا..
شهد وهي بتدور علي الموبيل بتاعها
حاضر بس الاقي الموبيل الاول…
صابر
اقعدي انتي انا هدورلك عليه..
_قعدت شهد وقعدت جنبيها فاطمه اللي قالت بعدم تصديق..
فاطمه
هو ابوكي ماله ايه الحنيه دي كلها بجد من امتي؟
شهد
كل ده عشان حامل ده أسر ما عملش كده..
قعد صابر جنبيها وقال
امسكي موبيلك اهوو، واستني ما تكلميش جوزك دلوقتي، هقولك كلمتين قدام امك تخفظيهم يا شهد بلاش حركات العيال اللي بتعمليها دي وما تبقيش نكديه زي امك…
فاطمه بغيظ
انا قايمه اشوف الغدا، كلامك تقيل علي قلبي زيك يا صابر..
دخلت فاطمه المطبخ وصابر قال
شايفه اهو ده النكد. بعينه، المهم القصد من كلامي تكسبي جوزك الف واحده تتمني راجل زيه ومن حظك انك اتجوزتي واحد زيه كفايه انه كويس مع اهلك وبيحبنا وبيعاملنا كويس..
شهد
حاضر يا بابا..
صابر
وتخلي بالك من اللي في بطنك وان شاء الله ما تبقيش زي امك وتجيبي ولد يبقي اخ لاخواتك البنات ، وقتها انا اللي هاخده اربيه ده انا كنت هموت وامك تخلف ولد..
شهد
ان شاء الله يا بابا اللي يجيبه ربنا كله كويسه..
_وسمعت في الوقت ده صوت عربية أسر وجات شهد تقوم بسرعه، فوعق فيها صابر وقال بحده..
صابر
يا بت الجزمه انا لسه بقول ايه، في واحده شايله تقوم كده ما تتحركيش خالص..
شهد
هبص عليهم بس من فوق..
صابر
ما هما طالعين هيباتو تحت يعني، خفي حركه بدل ما اديكي في وشك..
_اتنهدت شهد بضيق وفضلت قاعده وخبط الباب وقام صابر فتح ودخلت ملك وهي مبسوطه ومعاها أسر اللي كان بيتكلم مع صابر عند الباب وكان كالعاده بيدي ابوها فلوس، وبعدين دخل وقعد جنبيها وقال..
أسر
اختك طلعت عيني الشمس كلت دماغي وفي الاخر تقولي دي ما تتحسبش انا ما شوفتش مصر كلها..
شهد بضيق
معلش هي هتتلهي في المذاكره وهتنسي..
أسر
ايه قلبة الوش دي والله ما عملت حاجه..
شهد بصوت واطي
ممكن ما تديش ابويا فلوس تاني، حتي لو هو طلب منك..
أسر بجديه
مالكيش دعوه بالموضوع ده يا شهد، وبعدين اهلك هما اهلي انا كمان..
شهد
انا بدايق من الموضوع ده ومش عايزاه ياخد منك فلوس..
أسر
ما ينفعش ابوكي يبقي بيعاملني زي ابنه ويطلب مني حاجه واقولو لا، يا ستي كبري دماغك…
قعد صاابر قدامهم وقال
بالله عليك يا أسر ما تخليها تتحرك كتير وما تجيبهاش عندنا احنا نيجي نشوووفها، او خليها هنا لحد ما تولد..
أسر
لا انا مش بحب مراتي تبات بعيد عني، وانتو تنورونا في اي وقت عادي..
صابر
تسلم يا ابن الاصول هو الدكتور ما قالش لسه هي حامل في ولد ولا في بنت؟..
أسر
تقريباً لسه بدري عشان نعرف، بس ان شاء الله تبقي بنوته وتطلع لمامتها..
صابر بغضب
نعمم بت ايه ما فيش خلفة بنات..
أسر بقلق
هو في ايه مال ابوكي؟
شهد
لازم تقول بنت يعني هو عنده فوبيا من خلفة البنات..
أسر بسرعه قال
توأم ولدين توأم ان شاء الله ويبقو شبهك يا حمايا..
صابر
يااااه لو عملتوها بجد ده انا هبقي اسعد واحد في الدنيا، انا كان نفسي يبقي عندي ابن ولد بس النصيب ربنا اداني خمس مصايب..
ملك
يا ابو المصايب كلم ماما..
ضحك أسر هو وشهد وصابر قال بغيظ
اهي خلفة البنات اهي ما باخدش منهم غير اللسان الطويل..
شهد
انا هدخل اشووف ماما واساعدها..
صابر
لااا خليكي قاعده انتي انا هدخل اساعدها..
دخل صابر المطبخ وأسر قالها بسخريه
ابوكي فرحان انك. حامل اكتر مني ومنك..
شهد
تبقي مصيبه لو جيبت بنت هيولع فيا وفيك..
أسر
سيبك من ابوكي انا نفسي في بنت وتكون شبهك كده، تقريبا لو جيبنا بنت هتبقي شبهك اختك. الصغيره دي لانها نسخه منك…
شهد ابتسمت وقالت
تخيل نور دي هتبقي خالتو هتبقي اكبر من النونو بتاعي بتلات سنين بس..
أسر
اخواتك طيبين اوي هيبقي حنين اووي علي البيبي و…
شهد
ورحمه دي هتبقي اطيب خالتو في الدنيا..
أسر
اهي دي بالذات مالهاش دعوه بعيالي عموماً انا ناقص هبل..
شهد بغيظ
قول اللي انت عايزه ما حدش هيربي عيالي معايا غيرها اصلا..
أسر بغيظ
افضلي انتي كده سخنيني عليها لحد ما اولعلك فيها خالص وارتاح..
شهد
بعد الشر عليها، وانا عايزه منك طلب صغير..
أسر
ما فيش بياات هنا يا شهد هنتغدي وهنمشي هوصلك عند. هاله وهروح الشغل وارجع بالليل نتعشي عندهم ونرجع بيتنا وما فيش طلوع تاني لحد. ما الحمل يثبت…
شهد
الدكتوره قالتلي اتحرك عادي علي فكره
أسر
هي الدكتوره هتعرف مصلحتك اكتر مني، واستني احنا ناخد رأي ابوكي يا عم صابر..
شهد
خلاص اسكت وايه عم صابر دي علي فكره الفرق بينك وبينه خمس ست سنين..
أسر بغيظ
قصدك اني قد. ابوكي يعني..
ابتسمت شهد وقالت بخبث
لا انا مش قصدي انت قد ماما علي فكره..
أسر
طيب اخرسي يا شهد وبعدين ما فيش فرق كبير بينا، امك. وابوكي هما اللي اتجوزو وخلفو بسرعه، كانو مستعجلين علي ايه بس..
شهد.
قصدك ايه ان الجواز والخلفه دي حاجه وحشه…
أسر
بومه والله متجوز بومه، فين ملك البت فرفوشه وروحها حلوه مش كتلة نكد..
شهد وقته جامد وقالت
روحلها يا حبيبي خليها تنفعك واقسم بالله لانا بايته هنا النهارده وخليها نكد. بنكد. بقي..
أسر
لا لا والله انا بهزر ده انا اللي بومه وانا اللي نكد. الدنيا فيا..
شهد
انا حلفت خلاص واسكت عشان صوتي ما يعلاش اكتر من كده..
أسر بغيظ.
مااشي يا شهد ماااااشي..
_وسابته وقاامت قعدت جنب نور علي الارض وهو راح وقف في البلكونه وابتسم بهدوء علي كلامها وعندها معاه اللي ديما بيغيرو مزاجه للاحسن حتي لو مدايق..
ـــــــــــــــــ
_وفي نفس اليوم بالليل كانت رحمه قااعده في البلكونه بتاعت اوضتها وهي بتكلم رحمه ولابسه بجامه طويله وحجابها وقالتلها..
رحمه
يا قادره ومشيتي كلامك عليه وهتباتي مع اخواتك
شهد
ايوه عشان يبطل يرخم عليا، بس الغريب بجد. بابا يا رحمه ده مخليني انام في اوضته هو وماما وراااح نام في الصاله هو وخلي ماما تنااام مع اخواتي..
رحمه.
سبحااااانه ربنا يهديه عليكي وعلي اخواتك ويارب تجيبي ولد ويتلهي فيه عنكم…
شهد.
هو انتي فاكره اني لما اجيب ولد هسيبه هنا لابويا، مستحيل هو انا اللي شوفته هنا قليل يا رحمه ده انا بدعي ربنا ما يحصلش لاخواتي زي ما حصلي ويكملو تعليمهم من غير مشاكل ويتجوزو بشكل طبيعي وتبقي حياتهم حلوه..
رحمه
ان شاء الله ما اظنش ابوكي هيكرر اللي حصل معاكي ده تاني وخصوصا لما شااف اللي حصل في بيت اهل سعيد ده حياتهم خربت والوليه امه اتحبست..
شهد
هو انا مش شمتانه فيها بس مبسوطه ان حصلها كده علي اللي عملته فيا والله، وفي نفس الوقت صعبان عليا سعيد بيقولو طلق مراته وطفش ما حدش يعرفله طريق..
رحمه
ما يصعبش عليكي غالي ما هو لو كان راجل معاكي من الاول كان… لا كده كتير..
شهد
في ايه؟
رحمه
شريف تحت بيتنا يا شهد..
شهد
بتهزري بيعمل ايه؟
رحمه
مش عارفه ده طالع عندنا اقفلي اشوفه جاي ليه ده وهبقي اكلمك اقولك..
شهد
مااشي بس ما تتأخريش عليا..
رحمه
حاضر والله، سلام..
_قفلت رحمه معاها وطلعت لقيت ابوها واقف في الصاله كالعاده بيتمرن فقربت منه وقالت بقلق..
رحمه
يا ابو الكباتين
سامي
عايزه ايه؟
رحمه
شريف جاي شوفته من فوق..
سامي
جااي عايز ايه مش امه رفضتك زي ما قولتي
رحمه
مش عارفه بص مهما قال انا مش هتجوز واحد امه مش عايزاني، اوعي يغرك انه غني وكده وتقل مني وتوافق يا بابا..
سامي قرب منها وقال
انتي عبيطه يا بت انتي اقل من مين؟ من بنتي ده انا لو اللي اتجوزك ده ما كانش واحد هو واهله شايفينك جوهره وغاليه واحسن منهم مش هديكي ليه..
رحمه ابتسمت وقالت
ربنا يخليك ليا يا ابو الكباتن، اهو بيخبط انا هقف في المطبخ هشووف جاي يقول ايه وانت افتحله وانفخه بقي كمل تدريبك فيه..
_قالت كلامها وجريت علي المطبخ وسامي ابتسم عليها بهدوء وراااح فتح الباب ولقي فعلا شريف واقف وقال..
شريف
ازاي حضرتك يا عمي..
سامي
اسمي كابتن سامي يا حبيبي، خير عايز ايه؟
شريف بتوتر
انا كلمت حضرتك قبل ما اجي بس ما رديتش عليا..
سامي
عشان انا مش عايز اتكلم معاك، هو مش الست والدتك خلصت الموضوع في ايه تاني بقي يا ابن النااس..
شريف
طيب انا مش طالب غير ان حضرتك تسمعني حتي لو لاخر مره وانا والله حليت كل حاجه..
سامي بصله بهدوء وقال
ادخل اما نشووف اخرتها..
_دخل شريف وهو وداخل لمح رحمه وهي واقفه عند. باب المطبخ فأبتسم بهدوء وراح قعد في الصاله وسامي قعد قدامه وقال..
سامي
سامعك يا شريف اتكلم..
شريف
اولا انا بعتذر جدا علي الكلام اللي قالتله مام.. امي لرحمه النهارده..
سامي
وثانيا ايه بقي؟
شريف اتنهد بهدوء وقال
انا بحب رحمه وحتي لو اللي بقوله ده غلط بس دي الحقيقه واهم حاجه في الموضوع وعايز حضرتك تعرفها من غير اي رسميات وكلام متزوق، انا من اول مره شوفت فيها رحمه وبدأت اميل ليها بشكل كبير، كل حاجه فيها عجبتني شكلها وطريقة لبسها وتحفظها في التعامل معايا وطريقتها اللي نااس كتير بتنتقدها انا حبيتها بسببها، وما شوفتش فيها حاجه ناقصه او تقلل من كونها هتبقي زوجه ليا، وقولتها ليها النهارده وهقولها تاني لحضرتك انا مستعد اعمل اي حاجه بس رحمه تبقي من نصيبي..
حاول سامي يداري ابتسامته وقال
انا فهمتك وانك. تيجي تاني وتتكلم في الموضوع ده اثبتلي انك فعلا بتحبها، بس الحب لوحده مش كفايه بنتي مش هتعيش معاك لوحدك، اهلك هيفضلو في حياتكم ومدام الست امك رافضه الموضوع يبقي انا ما اقدرش ادخل بنتي وسط عيله فيها طرف من الاطرااف الاساسيه مش عايزها…
شريف
مام.. اقصد امي..
سامي
قول ماما عاادي عارفكم انا يا بتوع التجمع ومدينتي ما فيش داعي تغير من طريقة كلامك..
ابتسم. شريف بهدوء وقال
والدتي تفكيرها مختلف شويه، وما كانتش تعرف ولا متأكده من حبي لرحمه بس انا اقنعتها وهي لو حضرتك موافق هتيجي معايا هنا هي وبابا وهتعتذر لرحمه وهنتفق ونقرا الفاتحه..
اتصدمت رحمه من كلامه وسامي قاله بهدوء
انت قد. كلامك ده…
شريف
لو مش قده ما كنتش جيت واتكلمت معاك. يا عمي، ولو مش قد. حبي لرحمه ما كنتش قولتلك ولا قولتلها اني بحبها، بس مدام اعترفت بحاجه زي دي مش هتبقي مجرد كلمه انا لازم اخليها تتأكد. اني بحبها لازم اخليها تبقي من نصيبي ولو ما عملتش كده هبقي كداب وما حبيتهاش..
_اتملت عيونها دموع وافتكرت كلام. اكرم ليها وازاي استسلم واتخلي عنها، وفي نفس الوقت شريف بيحاول وينقع في اهله واهلها عشاان يثبتلها انه فعلا بيحبها، وقطع تفكيرها صوت سامي اللي قال..
سامي
رحمه. اظهر وباان تعالي هنا..
ظبطت رحمه. شكل حجابها وقالت بغيظ
مش مكتوبله يشوفني وانا مظبطه نفسي خالص لازم يشوفني في اسوأ حلاتي..
_وطلعت رحمه. ببجامتها الطويله وحجابها اللي كان من. لون مختلف غير البجامه وشكلها مش منظم. خالص وقالت وهي باصه للارض بتوتر..
رحمه
نعم يا بابا..
سامي
سمعتي اكيد. اللي قاله شريف، هاا رأيك ايه؟
رحمه
اللي تشوفه حضرتك يا بابا..
سامي بخبث
انتي هتعملي مكسوفه طيب انا مش موافق..
رحمه. بصتله بغيظ وقالت
ليه يعني يعملك ايه تاني الراااجل، بتوقف حالي ليه انت وو..
رجعت بصت تاني للارض وقالت بأحراج
قق قصدي اللي تشوفه حضرتك. يا بابا..
_ضحك سامي وشريف اللي بصلها بنظره عاشقه، وساامي قاله بهدوء وابتساامه واسعه..
سامي
اديك سمعت الرد بنفسك كلمني وبلغني باليوم اللي هتشرفنا فيه انت واهلك. واللي فيه الخير يقدمه ربنا..
شريف
تمام يا عمي وشكرا جدا لتفهمك، بعد اذنكم..
_وصله سااامي للباب ورجع لقي عفاف مراته كمان طلعت من اوضتها وهي مبسوطه وقالت..
عفاف
اسلام كان معايا بيكلمني وقولتله علي العريس وموافق..
سامي
طيب كويس وانا هبقي اكلمه ولما يحصل نصيب هبقي اخليه يتعرف علي خطيب اخته..
ومسك. ايد رحمه وقال
انا مش ببص علي المظاهر يا رحمه، والواد الاولاني ده لو كنت لقيته متمسك بيكي ومصمم انه يتجوزك كنت هعيد. تفكيري فيه من تاني، لكن هو من لما جه يتقدم وانا حاسس انه ضعيف ومتردد وخايف وده ما ينفعش، انا عايز اجوزك لواحد يحارب الدنيا كلها عشاانك يحسسني ان بنتي مهمه. عنده وشاريها، زي الواد شريف كده ده ثبتني بالكلام
رحمه ابتسمت وقالت
وثبتني انا كمان والله، وهتخطب والبس دبله يا سامي زغرتي يا مامي لحد ما اروح اقول للبت شهد..
ـــــــــــــــــ
_وتاني يوم الصبح كان أسر قاااعد في مكتبه وبيحاول يكلم شهد ومش بترد عليه..
أسر بغيظ
رديي ردييييييي..
_وفي الوقت ده موبياه رن كالعاده برقم نتالي فأتنهد بضيق ورد عليها وقال..
أسر
نعم يا نتالي؟..
نتالي
هو انت مش بترد. عليا ليه يا أسر، افرض جرالي حاجه مش هلاقيك جنبي
أسر
لا طبعا بس مشغول يا نتالي والله، انتي في حاجه ناقصه معاكي او محتاجه حاجه؟
نتالي
كنت عايزه فلوس ومعلش لو هتقل عليك انا قريب هسافر امريكا وهعتمد علي نفسي مش هحتاج منك حاجه..
أسر
ارجوكي يا نتالي ما تقوليش كده، احنا قبل اي حاجه كانت بينا احنا كنا صحاااب ومقربين كمان وانا قولتلك مش هسيبك ابدا وهفضل ديما جنبك في اي وقت، والفلوس اللي عايزاها هتوصلك حالا.
نتالي
والاهم من كل ده تيجي وتخليني اشووفك انا ما اعرفش غيرك يا أسر في الدنيا دي كلها..
أسر بهدوء
حاضر اول ما افضي هجيلك، ابعتيلي المبلغ اللي عايزااه وانا هبعتلك اكتر من منه مع السوااق وهعملك حساب في البنك في اقرب وقت ومش هخلي جاجه تنقصك خالص وو..
كلمته شهد في الوقت ده فقال بسرعه
نتالي انا لازم اقفل حالا شوفي عايزه كاام وقوليلي..
_قال كلامه وقفل في وشها ورد بسرعه علي شهد وقال بحده مصطنعه..
أسر
بكلمك من امتي يا هانم انا وانتي مطنشاااني..
شهد
انت كنت بتكلم مين؟
أسر
شغل يا شهد وبعدين ردي عليا مش بكلمك. انا..
شهد بحده
أسر الرقم ده الشخصي بتاعك مش بتكلم حد. من بتوع الشغل عليه، فقول كنت بتكلم مين احسنلك..
ابتسم بهدوء وقال
احسنلي كمان.. مااشي يا ستي كنت بكلم نتالي..
شهد بغيره واضحه
اممم طيب سلام..
أسر
استني يا بت انتي ما انا بقولك اهو هي كانت عايزه حاجه مني فعشان. كده كلمتني وبعدين هي ما تعرفش حد غيري ومش كل شويه هفضل اوضحلك يعني المفروض يبقي في ثقه بينا اكتر من كده
شهد بسخريه
شوووف مين. بيتكلم علي الثقه، المهم انا عايزه اروح لرحمه
أسر
لا كلميها هي تجيلك ايه اللي يخليكي تروحي هنااك وبعدين نبطل حركه كتير..
شهد
عشان خاطري انا عايزه اروح اقعد. معاها شويه وهرجع البيت ومش هعمل اي حركه تاني والله..
أسر
طيب هبعتلك السواق، وعلي فكره هكلم حد يأجلك السنه دي في المعهد بتاعك لحد ما تولدي وتبقي كويسه..
شهد
لا لا كله الا دراستي يا أسر..
أسر
متمسكه بيها علي ايه دراستك دي ما انتي اخرك هتقعدي في البيت وتربيلي عيالنا..
شهد بغيظ
ومتعلم في اوربا وكنت عايش نص عمرك هنااك وتفكيرك زي جدي الله يرحمه فعلا المظاااهر خداااعه…
أسر بخبث
طيب ما انتي كمان شكلك كيوت وبريئه وطفله في نفسك وقولت لنفسي هتجوزها بقي واعرف اخليها تسمع كلامي وتعمل اللي انا عايزه، وفي الاخر انتي يا اللي ما كملتيش ٢٠سنه مخليااني الف حوالين نفسي زي المجنون عشان ارضيكي..
ضحكت شهد بهدوء وقالت
اذا كان عاجبك يا سي أسر، وانجز يلا وابعتلي السواااق..
أسر
اوامرك يا اسطا وترجعي من عند رحمه علي البيت ما فيش بيات بعيد عني تاني..
شهد ابتسمت بهدوء
حاضر يلا سلام..
أسر
سلام مؤقت…
_قفلت معاه وراحت فعلا لرحمه، وهو كمل شفله اللي بقي بيحبه جدا ومهتم. بيه بشكل كبير…
ـــــــــــــــــ
_وعدت الايااام وجه يوم خطوبة رحمه اللي كانت في قااعه حلوه جداً، وكانت برضو قااعده هي وشريف في الكوشه بفستانها الازرق الرقيق وحجابها اللي كالهاده خلاها مميزه في نظر شريف، اللي مال عليها وقال بهدوء..
شريف
هي مين الست اللي قاعده هناك دي وعماله تبصلنا كأننا كلنا ورثها؟
رحمه
دي خالتي عزه..
شريف
شكلها بتحبك اووي..
رحمه
بتموت فيا لدرجة انها كانت ديما تقول لماما بنتك بلسانها الطويل ده هتبور يا عفاف مش هتلاقي اللي يتجوزها ويرضي بيها،فحقها تبصلنا كده وانا اتخطبت قبل بناتها وكمان لعريس متريش وابن ناااس زيك..
ابتسم شريف وقال
طيب وام اصفر بيلمع اللي قاعده جنب مامتك دي؟
رحمه
دي عمتي الهام..
شريف
شكلها مدايق هي كمان، هما للدرجه دي مش طايقينك..
رحمه بثقه
البركه في لساااني مخليني منبوذه من العيله كلها..
شريف
والله ما بيفهموش طيب ده انا اكتر حاجه عجباني فيكي صراحتك..
رحمه
مش عارفه اصدقك في الموضوع ده، يعني الناااس كلها شايفه ان دي حاجه غلط..
شريف بخبث
يمكن عشاان بحبك فحابب كل حاجه فيكي حتي لو كانت غلط في عيون النااس انا متقبلها وشايفها جميله، وانتي مش غلط علي فكره دي شخصيتك ومش لازم تغيريها عشان حد اللي عاجبه عاجبه واللي مش عاجبه ما يتعاملش معاكي..
ابتسمت رحمه وقالت
انت بقالك كام يوم مخليني حبيت نفسي اووي..
_ضحك شريف بهدوء وفي اللحظه دي بصت هي قدامها وشاافت أكرم قااعد جنب أسر وفؤاااد وبيبصلها بحزن، فأختفت ابتسامتها وبان علي ملامحها الحزن..
شريف
في حاجه ولا ايه؟..
رحمه بضيق
لا بس ااا… ما فيش انا كويسه..
_قاام اسعد ورااح وقف جنب شريف وقاله بصوت واطي..
اسعد
هو ايه الجو ده وايه الموسيقي دي النااس زهقت..
شريف
ماما اللي صممت تعمل الخطوبه علي ذوقها والحمد لله ان رحمه وافقت والا كانت هتبقي مشكله كبيره، فخلينا قاعدين حلوين كده..
اسعد
بقولك ايه هي صاحبة رحمه اللي قااعده مع شيري دي مش كنتو بتقولو انها هتطلق، هي اطلقت ولا لا؟
شريف
اسعد البت لسه متجوزه وتقريبا حامل وجوزها قااعد هنااك مع ابوووك اهوو فأتلم وبلاش مشااكل..
اسعد
ما هو انا قولت حاجه بتستفسر، وبعدين انا ما فيش واحده لفتت نظري ولا عجبتني طول حياتي غير البنت دي، بص رقيقه وكيوت ازاي لا وحلوه اوووي..
_في الوقت ده أسر اخد باله ان أسعد بيتكلم مع شريف وهو بيبص لشهد اللي واقفه هي وشيري مع بعض، فقااام وهو متعصب ومسك ايد شهد وقال..
أسر
تعالي معايا..
شهد بقلق
في ايييه يا أسر..
قعدها أسر جنب هاله وقال
ما تتحركيش تاني لحد ما نغور من هنا..
شهد
طيب انا عملت ايه ما انا واقفه جنب شيري وسااكته..
هاله
في ايه يا أسر مالك ومالها ما هي واقفه مع صاحبتها..
قعد أسر جنب شهد وقال بحده
مزاجي كده بقي انا حر، وبعدين ايه القرف اللي انتي لابسااه ده، ما قولتليش ليه انك هتلبسي فستان زي ده..
شهد بدموع
معلش هبقي بعد كده اخد اذنك فلبسي عشان ما يبقاش قرف…
بصتله هاله بلوووم وفي الوقت ده جه فؤااد وقال
مالكم قالبين وشكم ليه وانت يا بني ادم مش قاعدين مع الراجل وبيتكلم معاك بتسيبه وتقوم ليه فجأه كده..
أسر
خلاص يا فؤاد اسكت وخلي ام اليوم ده يعدي علي خير..
قعد فؤاد جنب هاله وقالها
اخوكي غيران علي مرااته وانا هخليه يولع اكتر..
هاله
بس يا فؤاد هيزعلها هي في الاخر..
فؤاد
مالكيش دعوه انتي اتفرجي بس..
وقال فؤاد لشهد بخبث
ايه الحلاوه دي يا شهد تصدقي ان النااس افتكرتك بنتي لما كنت واقف معاكي من شويه ومش بس كده ده كمان تلاته كلموني لحد دلوقتي عايزين يخطبوكي لولادهم..
اتوترت شهد وأسر قال بغيظ
يا خفة دم اهلك مش وقتك يا فؤااد انا علي أخري اقسم بالله..
كتمت هاله ضحكتها وفؤاد قال
هو انت فاكرني بهزر طيب وحيااة ابني اللي ما بحلف بيها ابدا، ابو العريس افتكرها بنتي وطلب ايدها لابنه الدكتور سعد ولا سعيد ده مش فاكر اسمه..
أسر بغضب
هي كده جابت اخرها قوومي يا هانم هنمشي يلا..
شهد بقلق
هنمشي فين يا أسر انا قولتلك هقعد. مع رحمه لاخر اليوم..
أسر بحده
وانا قولت نمشي ولا انتي مستنيه عريس تاني يجي يخطبك مني انا المره دي..
فؤاد
عيب يا أسر انا قولتلهم. انها مرات أسر الفيومي واتصدمو قال شكلها صغير عليك..
أسر
اخرس يا فؤاد والله مش ناقص انا، وانتي قوومي اخلصي…
هاله
خلاص يا شهد روحي معاه وانا هقول لرحمه. انك. تعبتي شويه ومشيتي..
_قامت شهد مشيت معاااه وهي مدايقه، وهاله قالت لفؤاد. بلوم..
هاله
ينفع كده. اللي حصل اهو نكد عليها.
فؤاد
تبقي. عبيطه لو زعلت ان. جوزها بيغير عليها، وبعدين هو ابو العريس طلب ايدها فعلا بس الباقي ده من. عندي انا، فرصتي ان احرق. دم اخوكي وجات لحد. عندي..
هاله
والله انت وهو رخمين وفي الاخر اتنكد علي شهد. الغلبانه..
_وبعد شويه في عربية أسر كان متعصب جدا وهو سايق العربيه وقالتله بقلق..
شهد
ممكن تسووق بالراحه شويه..
أسر
حاضر..
شهد
وبعدين انت زعلان مني ليه، وانا ذنبي ايه في اللي حصل..
أسر بضيق
نقفل الموضوع وكأنه ما حصلش واول واخر مره يا شهد. تلبسي فستان يبقي دايق كده او تحطي الزفت اللي حطاااه في وشك ده..
شهد بحزن
علي فكره انت مزودها اووي معايا، ما الست نتالي اللي كنت هتتجوزها كانت بتخرج من البيت بشورت وفوق ما فيش خالص وانت عادي وانا عشان الفستان دايق حبتين وحطيت ميكآب خفيف القيااامه قامت..
أسر بجديه
انا لو كنت بحب نتالي ربع ما بحبك انتي ما كنتش سيبتها عشاانك، انتي غير اي حد. يا شهد وفكرة ان حد يبصلك بنظرة اعجااب اياً كان مين بتجنني هتسميها غيره تملك اي حاجه براحتك بس اللي انا اقوله يتنفذ..
ابتسمت بهدوء وقالت
حاضر اللي انت عايزه هنفذه..
بصلها بهدوء وقال
قمر وانتي بتسمعي الكلام، وصلنا اهو…
_نزلت شهد من العربيه ودخلو البيت وقالتله بفضول…
شهد
هي فين الكلبه بتاعتك؟!
أسر
مشيتها اديتها لواحد بيهتم. بالحيوانات..
شهد
انت كنت بتحبها اوووي..
أسر
بس انتي بتخااافي منها، مع انها مرتبطه بذكري اول مره شوفتك. فيها..
شهد
ايوه لما خليتها تجري عليا وتعضني..
أسر ضحك وقال
انتي خدتي بالك يعني بس والله ما كان قصدي انها تعضك يعني، كنت هرخم عليكي بس..
شهد
اااه اصل انا كنت ناااقصه ده انا كنت واخده علقه معتبره وطفشاانه من اهلي وطليقي ومتخزوقه من ادهم واكرم اللي طردني من عنده وتكمل عليا انت..
أسر
اهو كل ده عدي خلاص وما بقاااش فاضل غيري انا وانتي وحياتنا السعيده، وانك تبقي مبسوطه معايا وبس..
قربت منه شهد وقالت بهدوء
اكيد طبعا هبقي مبسوطه مش جنب اكتر راجل بحبه في حياتي كلها..
أسر بأبتسامه واسعه
ايوه بقي هو ده الكلام اللي انا عايزه، ونكمله فووق بقي لوحدنا وبراحتنا.
_وعلي هذا الاساس كانت حياتهم مع بعض لمدة شهور وكانت شهد خلاص وصلت لاواخر الحمل بتاعها….
ــــــــــــــــــ
_وفي شقة ام محمد كانت طلعت من السجن وقااعده في شقتها ووشكلها بقي حزين جدا وخست اووي وكأنها بقيت واحده تانيه، وسمعت حركه قدام باب الشقه فقامت بسرعه وفتحت الباب لقيت نعمه وولادها نازلين..
ام محمد
علي فين كده هو انتو ماشيين ولا ايه؟
نعمه بضيق
نفسي والله نمشي بس اعمل ايه في ابنك. اللي مش عايز يسيبك لوحدك.، اصل انا يا حماتي ما داخلش عليا الفيلم اللي انتي بتعمليه ده وانك قلبتي فيها ملاك بجناحين وبصراحه كده من وقت اللي عملتيه في اختي انا مش طيقاكي ولا طايقه القعده معاكي في بيت واحد يا رد. السجون..
ام محمد بدموع
يعني انتو مش ماشين؟
نعمه
لا يا اختي مش ماشيين بس رايحه احضر كتب كتاب نسمه اختي، اما هتتجوز حتت عربس يا حماتي ما فيش منه ربنا عوضها عن ابنك واللي شاافته معاه، حتت معاون شرطه اد. الدنيا..
ام محمد بحزن
ليه هتتجوز سعيد بيحبها ولما يرجع هيزعل اووي لما يعرف انها اتجوزت..
نعمه بحده
ما يزعل ولا يتفلق هو مالوش دعوه بيها اصلا، واقولك علي حاجه ابنك مش هيرجع تاني..
ام. محمد بحده
لا ابني هيرجع مش هيهون عليه يسيبني كده لوحدي..
نزل محمد من فووق في الوقت ده وقال
في ايه يا نعمه مالك يا اما انتي كمان في ايه؟
ام محمد ببكاء
مراتك بتقول سعيد. مش هيرجع يا محمد، مش انت قولتلي انه كلمك وقالك انه جااي
بص محمد لنعمه بغضب وهي قالت ببرود
انا ما بحبش اكدب يا اخويا معلش وبعدين امك بتقول قال ايه بلاش نسمه تتجوز عشان اخوك لما يرجع ما يزعلش..
محمد
خلصتي كلامك يا نعمه روحي يلا مكان ما انتي رايحه..
نعمه
هو انت مش هتيجي معايا ولا هتقعد جنب امك
محمد بحده
ايوه قااعد جنب امي وما اسمعش صوت اهلك تاني بدل ما اقول ما فيش طلوع من البيت ليكي ولا للعيال النهارده..
_ما ردتش عليه نعمه واخدت عيالها ومشيت، ومحمد مسك ايد امه وقال بحنان..
محمد
ماتزعليش منها يا اما حقك عليا انا..
ام محمد ببكاء
اخوك. جاااي يا محمد صح، سعيد هيرجع يعيش معانا تاني هو قالك انه جاي مش كده؟
محمد بهدوء
ايوه تعالي بس نقعد. جوه لحد ما يجي..
ام محمد
طيب انا عايزه افطر ومستنيااه وهو ما جااش..
محمد
لسه هتفطري يا اما ده احنا داخلين علي العشا، تعالي انا هجهزلك الاكل وناكل ونستنااه..
ام محمد
هو هياكل في الطريق مش كده؟
محمد بحزن
ايوه يلا ادخلي يا ست الكل وهو هيجي علي طول..
_وفي بيت اهل نسمه. كانت قااعده في اوضتها وهي لابسه فستان اوف وايت شكله حلو جدا، وباصه لنفسها في المرايا وسلمي صاحبتها بتظبطلها الميكآب..
سلمي
شكلك زي القمر مش ناقص بس غير انك. تضحكي..
نسمه
حاضر هضحك يا سلمي..
سلمي
هروح اشووف امك بره عايزه ايه اعمله معاها تكون نعمه اختك جات واجي اقعد معاكي..
_طلعت سلمي من عندها وهي قاامت مسكت موبيلها وفتحت الشاات بينها وبين سعيد اللي من لما كانت متجوزااه ما اتكلمتش معاه فيه خالص، واتملت عيونها دموع وبعتتله رساله صوتيه وقالتله فيها..
نسمه
“لاخر مره هكلمك انا وافقت علي مُهاب عشان اخليك تكلمني وترجعلي بس خلاص الموضوع قلب بجد. وهتجوز بجد يا سعيد، بقالي ست شهور كل يوم بقول انك. هترجع وانا والله هرجعلك وهنسي كل حاجه، حتي دلوقتي وانا خلاص هيتكتب كتب كتابي كمان ساعه انت لو جيت انا مستعده اوقف كل حاجه عشانك، رد. عليا يا سعيد عشااان خاطري ”
_بعتتله الرساله ووصلتله فعلا وفضلت قاااعده مستنياااه يسمعها ويرد عليها، وفعلا سمعها ورد. عليها برساله صغيره وقالها فيها…
سعيد
“ما تستنيش سعيد يا نسمه عشان انا مش هرجع، والف مبروك بجد والله فرحتلك انتي تستاهلي كل خير، وياريت ما تبعتليش تاني ومن ناحيتي انا هغير الرقم ده. خالص”..
_واول ما سمعت رسالته اتصدمت من كلامه ليها ودموعها نزلت بحزن، ورجعت بعتتله رساله تانيه وقالتله بنبره غاضبه..
نسمه
” انا غلطانه اني بعتلك او في يوم فكرتك. بتحبني، بس انت ما تستاهلش فعلا غير انك تبقي لوحدك ”
_ في شقه بسيطه. جدا في حاره شعبيه كان قاعد. سعيد في اوضته وسمع رسالتها ومسح دموعه بحزن، وقفل موبيله خالص ودخل عنده في الوقت ده عزت صاحبه اللي قاله..
عزت
ايه. يا عم سعيد بننده عليك. من بدري عشان تتعشي قبل ما ننزل الشغل..
سعيد
جااي اهو..
عزت
في حاجه يا اسطا ولا ايه، انت كنت بتعيط عيزنك. حمرا كده ليه؟.
سعيد
لا لا بس غشان لسه صااحي، يلا قبل السفاحين اللي بره دول ما يخلصو الاكل..
_طلع سعيد وقعد مع صحاابه اللي بيشتغل معاهم وبدأ حياته معاهم من الصفر من غير ما يكون للماضي اي صله بيه..
القانون ليس صحيح فالجميع اجمل من بعيد، والقرب مؤذي، والنصيب في بعض الأحيان اقوي من الحب 💔
ـــــــــــــــــ
_وفي بيت الفيومي رجع أسر من شغله واول ما دخل البيت لقي صبااح نازله من فووق فقالها بهدوء..
أسر
شهد صاحيه يا صبااح.؟
صباح
ايوه بس..
أسر بقلق
بس ايه.. هي كويسه؟
صباح
ايوه كويسه بس مش عارفه مالها هو حضرتك. لامؤخذه يعني مزعلها في حاجه دي اليوم كله بتعيط النهارده..
أسر بضيق
اوووف لا مش مزعلها دي هرمونات النكد..
_ضحكت صباااح بهدوء وهو طلع فوق لقاها قاعده علي الكنبه قدام التلفزيون وفي ايدها طبق فاكهه كبير وشكلها مدايقه جدا..
أسر
مساء الخير..
_بصتله بطرف عينها بضيق وما ردتش عليها، كتم هو ضحكته بصعوبه وقعد جنبيها وقال بهدوء..
أسر
طيب انا عملت ايه دلوقتي ما انا طول اليوم في الشغل وقبل ما امشي الصبح كنا زي الفل..
شهد بدموع
معلش بقي انا نكديه يا عم ما تتكلمش معايا..
اتنهد أسر بضيق وهي قالت بسرعه
سكت ليه. قصدك اني نكديه بجد….
أسر
اديني فرصه ارد هو انا لحقت، وبعدين انا اللي نكدي يا ستي ما تزعليش..
شهد
انت بتاخدني علي قد عقلي اتجننت انا يعني..
أسر
طيب اعمل لامك ايه، اسكت مش نافع اتكلم مش نافع اعمل اييه.؟
شهد ببكاء
انت بتزعقلي..
أسر
لا ما زعقتش
شهد
لا انت بتزعقلي اهو، مش كفايه اللي عملته كمان بتزعقلي..
أسر
ايوه انا عايز اعرف انا عملت ايه؟
شهد
ياااه كل ده وما عملتش حاجه، ده انا من يوم ما عرفتك وانت بتزعلني تحب افكرك عملت فيا ايه زمان..
أسر
زمان وخلص خلاص ايه اللي فكرك بيه دلوقتي يا شهد؟
شهد ببكاء
مش عارفه انا فجأه كده بفتكر الحاجات دي وابقي عايزه اعيط وبعيط فعلا اهوو….
ابتسم أسر بهدوء واخدها في حضنه وقال بهدوء
خلاص ما تزعليش حقك عليا خلاص..
شهد
يعني انت معترف اهو انك. غلطان..
أسر
ايوه انا ابن كلب وما اتربتش والله، اهدي بقي..
شهد بهدوء
ايوه انت فعلا كده…
ضحك أسر وقال
انا كده فعلا يا جزمه، تيجي نخرج بدل قعدت البيت اهو نفسيتك تتحسن بدل النكد ده..
بصتله شهد بحده وقبل ما تتكلم هو قال بسرعه
النكد اللي انا سببه يا فرفوشه يا حلوه ياللي ما فيش منك انتي..
شهد بهدوء
لا مش عايزه اخرج ببطني دي، بحس الناااس كلها بتتنمر عليا، واولهم انت بتتريق علي مشيتي.
رد. عليها وهو بيضحك وقال
ما انتي من الشهر الخامس وبقيتي تمشي بطريقه غرييه..
شهد بغيظ
ما هو بسبب ابنك، وبعدين احنا لحد دلوقتي ما لقيناش ليه اسم..
أسر
اختاري انتي وانا معاكي..
شهد
طبعا ما انت لو كان يهمك كنت اختارت، بس انا عارفه هو لو كان ابن ااا..
حط أسر ايده. علي بوقها وقال
مروان كنان واياد ونديم اكتر اربع اسماء بحبهم مع ان نفسي اسميه احمد علي اسم احمد صاحبي الله يرحمه بس الاختيار ليكي عشان لو انا صممت علي اسم هيتنكد. عليا وبرضو مدام قولتلك تختاري هتنكدي عليا عشان مش مهتم من وجهة نظرك، فشوفي انتي عايزه تعملي ايه واعمليه وانا موافق بس بلاش نكد. وغلاوتي عندك يا شيخه..
بعدت شهد عنه وابتسمت وقالت
هو انت ليه خايف مني كده انا كنت هقولك اني عايزه برضو نسميه احمد علي اسم صاحبك الله يرحمه..
أسر اتنهد بهدوء وقال
الحمد لله عدينا الموضوع من غير نكد..
شهد
اطلبلي اكل من بره بقي وخلي صباح تعملي موز باللبن وتعالي اتفرج معايا علي التلفزيون..
أسر
بس كده من عينيا هغير هدومي وجاااي..
_ودخل جوه ومسك موبيله اللي كان بيرن برقم نتالي وحمد ربنا ان شهد ما اخدتش بالها ورد عليها وقال بصوت واطي..
أسر
نعم..
نتالي
بكلمك من بدري مش بترد يا أسر ليه؟
أسر
مشغول معلش يا نتالي في حاجه ولا ايه؟
نتالي
عايزه اشووفك بسرعه
أسر
مش فاضي والله خالص..
نتالي
عشااان خاطري يا أسر انا بكره راجعه امريكا، ويمكن دي اخر مره اشووفك فيها ارجوك..
أسر بضيق
طيب ساعه كده وهجيلك..
قغل معاها وطلع قال لشهد بهدوء
جالي شغل ضروري يا شهد لازم ارجع الشركه حالا..
شهد بهدوء
مااشي انا هستناك..
أسر قرب منها وباسها من خدها وقال
وانا مش هتأخر عليكي وجاااي بسرعه، وابوس ايدك قبل ما هرمونات النكد تسيطر عليكي افتكري اني بحبك وبعشقك وبلاش عيااط..
ابتسمت بهدوء وقالت
حاضر هحاول بس والله هي بتبقي غصب عني..
أسر
علي قلبي زي العسل بس انا مش عايزك تزعلي اتفقنا..
شهد
حاضر اتفقنا وابقي هاتلي حاجه حلوه وانت جااي..
أسر غمزلها وقال
ما فيش حاجه. حلوه غيرك يا اسطا..
شهد بحده
يعني مش هتجيب..
أسر بنفاااذ صبر
هجيب يا شهد كلي تفاتح واتفرجي علي التلفزيون يلاا..
_ قال كلامه وسابها ومشي ، ورااح لنتالي وخبط علي الباب فقالتله بصوت عالي من جوه..
نتالي
الباب مفتوح يا أسر ادخل..
_دخل أسر واول ما شافها كانت لابسه قميص نوم قصير جدا وشكله ملفت بدرجه كبيره وقربت منه وقفلت الباب وقالت..
نتالي
حتي لو هتبقي اخر ليله بينا انا عايزه اكون معاك..
ولسه هتقرب منه بس بعد أسر عنها وقال
وانتي جيباني هنا عشاان كده؟
نتالي بهدوء
ليله واحده بس هتبقي كتير عليا يا أسر..
أسر بجمود
الليله دي هتخليني ابقي رااجل خاين في نظر مراتي وفي نظر نفسي، وانا ما اقدرش اعمل كده..
نتالي بغيظ
هي عملالك ايه للدرجه دي خلتك تنسااني وما تتأثرش بيا خالص..
أسر بهدوء
ما اعرفش هي عملتلي ايه بصراحه خلاني مش طايق اي واحده. غيرها، يمكن عشان ديما معايا حتي وهي مراتي غاليه اووي، ما بتتصرفش معايا بالطريقه دي هي بنت محترمه وبريئه، خلتني احبها بجد مش عايزها لمجرد علاقه هتبقي ليله واحده وخلاص كده..
ـ بصت. للارض باحرااج. من قسوة كلامه ليها، وهو قرب منها وقال بهدوء..
اسر
انتي فعلا كل اللي عملاااه ده ما اثرش فيا عشان مراتي ماليه عيني اوووي وخوفي علي زعلها عندي اهم من اي حاجه في الدنيا، وانتي برضو يا نتالي اغلي من انك. تعملي الحركات دي عشان تلفتي نظري وتأثري فيا لـ ليله واحده..
نزلت دموعها بحزن وهو قال بجمود
توصلي بالسلامه بكره وبعد كده. لو محتاجه حاجه هخلي السكرتيره بتاعتي تتواصل معاكي، عشام مراتي بتدايق من كلامنا وانا قولتلك بخااف علي زعلها، بعد. اذنك..
نتالي بحزن
عرفت ان فايز اخد اعد_ام؟!..
أسر
ايوه عرفت وعشان كده هسيبك تسافري وما تخافيش من حاجه، وبكده انا بساعدك وبقوم بالواجب بزياده معاكي، سلام يا نتالي…
_قال كلامه وسابها ومشي وهي قعدت علي الكنبه وفضلت تعيط وقررت انها هتمشي فعلا وتختفي من حياته لانها اتاكدت خلاص ان مهما عملت هي مالهاش مكان معاه
ـــــــــــــــــ
_وبعد كام يوم كانت واقفه شهد هي وأسر في محل لملابس الاطفال وبيختارو هدوم. البيبي بتاعهم..
أسر
اللون ده هيبقي جميل عليه اووي..
شهد
لو كان اسمر مش هيبقي لايق عليه..
أسر
طيب خلاص نستني نشووف البيه هيبقي شكله ايه ونجيبله يا شهد..
شهد
علي فكره لو ما كنتش عايز تيجي ما كنتش جيت ويا تختار حاجه كويسه يا تسكت..
أسر
انتي بتزعقي ليه. دلوقتي طيب، وبعدين انتي نفسك مش عارفه هتجيبي ايه
شهد
عشان انت موترني يا أسر اللي هو عايز تجيب اي حاجه وخلاص المهم نمشي..
جات رحمه وقفت جنبيها وقالت
شوشو ايه رئيك في اللون ده؟
شهد
الله حلو جدا يا رحمه…
أسر بغيظ
مش حلو مش عاجبني..
رحمه
ما حدش خد رئيك..
أسر
ده ابني علي فكره ويلبس علي مزاجي
شهد
اللون حلو يا اسر وهيليق عليه سواء كان اسمر او ابيض..
أسر
انا مش عاجبني انا حر ابني مش هيلبس اللون ده..
رحمه بعصبيه
سبيه يا شهد هو مش هيااخد اللون ده عشان انا اللي اختارته، مش عارفه هو مش طايقني ليه با ابن النااس هو انا كنت كلت ورث اللي خلفوك عشان تعاملني كده..
أسر
شاايفه لساانها يا شهد
شهد
لا حوش جنحاتك اللي طرفت عيني،ما انت اللي بتعصبها…
العامله بهدوء
لو سمحتو يا افندم ممكن الصوت شويه عشان الناس بس انزعجت منكم..
أسر
شايفه اخرة انك تجبيها معانا..
رحمه
اللهم صبرني ياارب قبل ما ابعهتولك متكيس في شنط. زباله..
شهد
يا أسر اللون حلو..
أسر
طيب ناخد رأي الانسه اهو ده شغلها وهي تفهم فيه اكتر..
وبص للبنت وابتسم بهدوء وقال
بزمتك يا شيخه انهي لون احلي ده ولا ده؟
بصتله البنت باعجاب وقالت
لو البيبي هيبقي شبهك كده هيبقي الاتنين لايقين عليه، لكن من رأي اللون حضرتك. اختارته حلو جدا..
أسر بص لشهد بتوتر وقال
ااا اهو يعني اهو الحجه قالت اللون اللي اختارته انا احلي..
رحمه بصوت واطي
ما كفايه كهن بقي يالا، بقي عملت الحوار ده. كله عشان تشقط البت اخصص ديل الكلب فعلا عمره ما يتعدل..
رد. عليها اسر بنفس نبرتها وقال
كلب اما ينهش لحمك يا اخت ابليس انتي، اوعي تمشي ورا كلامها يا شهد دي عبيطه..
شهد بحده
ليه هو انا مش شايفه اللي بيحصل قداامي يا أسر؟
أسر بضيق
طيب انتي هتاخدي انهي لون دلوقتي..
شهد بغضب
مش هاخد حاجه خالص هنبقي نيجي انا ورحمه لوحدنا نجيب اللي عايزينه تعالي روحني..
اسر
طيب اهدي طيب وبعدين. مش احنا متفقين نتعشي مع بعض..
رحمه
لا لا انا شريف علي وصول اهو عشاان خارجين انا وهو..
أسر
انا بكلم مرااتي حد. كلمك انتي..
شهد بحده
كلمها كويس..
أسر
اعملها ايه يعني، وبعدين واحد ومراته خارجين ينقو حاجات ابنهم مع بعض ايش حشرك بينهم انتي
رحمه
شايفه جوزك يا شهد قولتلك ما اجيش بيحرق دمي وهيجبرني امد ايدي عليه..
أسر بحده
لو خلف فيكي ابوكي اعمليها، انا نفسي تبدأ وما حدش يلومني علي اللي هعمله فيها..
رحمه بعصبيه
هو انت تقدر تعمل فيا حاجه يالا يا طري انت..
شهد مسكت بطنها بألم وقالت
بس بقي انتو الاتنين..
أسر بقلق
في ايه يا حبيبتي مالك؟
شهد بألم
مش عارفه جالي الم مره واحده..
رحمه بقلق
طيب تعالي نروح للدكتور بسرعه، انت هتتفرج علينا روح هات العربيه بسرعه ما تنحش كده..
_بصلها أسر بغيظ وما ردش عليها ورااح بسرعه جااب العربيه بتاعته قدااام المحل واخدها بسرعه المستشفي، وبعد شويه قدااام اوضة العملياات كانت قااعده رحمه هي وأسر وجات هاله هي وفؤااد وقالت بقلق..
هاله
في ايه مالها شهد ما لسه فاضل شويه علي الولاده بتاعتها..
أسر بغيظ
البركه في الهانم اللي فضلت تعصب فيها لحد ما خلتها تتعب.
رحمه بسخريه
ليه ان شاء الله هو انا اللي كنت بشقط البنت..
فؤاد
يا جماعه انتو الاتنين مش بتتفاهمو مع بعض ما تتقابلوش خالص..
رحمه
يا نعم. انت كمان ايييه ما اشوفش صاحبتي يعني
هاله
يا حبيبتي هو مش قصده كده بس فعلا انتو الاتنين بتتقابلو بتفرجو عليكم النااس..
اسر
هي اللي مستفزه..
رحمه
وانت بني ادم مُهزأ واتلم بقي في يومك ده عشان اقسم بالله جيبت اخري منك..
جه في الوقت ده أسعد وقال
خير يا جماعه لسه شهد في العمليات..
بصله أسر بحده فقال بسرعه
قصدي مدام شهد..
رد عليه فؤاد وقال
تقريبا ايوه هي بقالها اد ايه يا أسر..
أسر
ساعه بالظبط، وانت عرفت منين يا دكتور؟..
اسعد
شيري قالتلي اجي اقف جنبكم انا شريك هنا في المستشفي وموصيهم علي مدام شهد من اول ما بدأت متابعه مع الدكتوره نورا هنا..
أسر
كتر خير اهلك..
ـ طلعت الممرضه بعد شويه وهي شايله الطفل علي ايدها فكلهم قربو منها واولهم أسر اللي سألها وقال بلهفه..
أسر
شهد كويسه؟
الممرضه
ايوه نص ساعه بالكتير وهتخرج من العملياات اتفضل يتربي في عزك يا اسر بيه…
_اخد أسر ابنه منها وبصله بابتسااامه واسعه وكلهم وقفو جنبيه بيشوفو البيبي..
رحمه
خلوه يفتح عيونه كده نشووفه اخد. لون عيون شهد ولا لا؟
هاله بدموع
نفس شكلك وانت مولود يا أسر والله انا فاكره كويس..
فؤاد
حصل والله بس أسر كان وشه ادخن من كده شويه..
أسعد
هو انتو هتسموه ايه؟
رحمه
هيسموه احمد..
أسر
هي لحقت تقولك؟
رحمه
بص ما تبوظش اللحظه وخلاص ما تزعلش مني هسامحك علي رخامتك عشاان خاطر ابنك..
هاله
رحمه فتح عيونه اهو نفس عيون شهد والله..
_ضحكو كلهم وفي الوقت ده جه صابر وفاطمه اللي قالت بحده..
فاطمه
عاجبك كده ادينا اتأخرنا والبت ولدت…
صابر بابتسامه واسعه
ده حفيدي ولد صح؟
قرب منه أسر وقال
ايوه يا عم صابر ولد خده بقي وسمي عليه وكبرله..
_اخده منه صاابر ورااح قعد علي جنب وبدأ يكبرله في ودنه وعيونه كلها دموع وكلهم كانو مصدومين من رد فعله..
رحمه
مين ده؟
فاطمه
والنبي ما اعرف ده اللي ما عملها وعيط في بنت بناته..
فؤاد
ما هو زي ما بيقولو اعز الولد..
اسعد
يا جماعه انتو جببتوني في الجواز والخلفه والله..
أسر
طيب كفايه بقي يا عم صاابر هات الواد بقي..
صابر
لا لا سيبوه معايا ده انا مستنيه من زماان، خلاص ده مش حفيدي ده ابني…
ضحكو كلهم وفؤاد قال لاسر بسخريه
مكتوبالك تتجوز تلاقي صاحبتها مشاركاك فيها، وتخلف تلاقي حماك مشاركك في ابنك..
أسر
انا حد باصصلي في حياااتي والله..
_وطلعت الدكتوره بعد شويه وطمنهم علي شهد، واخد أسر ابنه ودخل عندها لوحده بعد. ما فااقت من البينج وقالها..
أسر
بالعافيه خليت امك ورحمه يمشو ويجو بكره، عشاان نعرف نفرح بالواد لوحدنا..
شهد جات تقوم وقالت بلهفه
هات احمد كده انا عايزه اشووفه..
أسر
طيب خليكي نايمه زي ما انتي وانا هنيمه جنبك اهو..
_ونيمه فعلا أسر جنبيها وهي بصتله بدموع وقالت بسعاده كبيره..
شهد
انا اول مره في حياتي ابقي مبسووطه كده، انا مش عايزه حاجه تاني خلاص من الدنيا..
أسر قعد جنبيهم وبقي احمد بينهم وقال بهدوء
انا كده هغير منه بقي، انا عايز اسمع كلام حلو زي كده علي طول..
شهد ضحكت بهدوء وقالت
طيب اقوم من اللي انا فيه ده طيب وانا هسمعك كل اللي انت عايزه، المهم هنعمل السبوع فين وامتي..
أسر
في بيتنا طبعا وهيبقي حفله خاصه كده بالحبايب بس قومي انتي الاول بألف سلامه يا حبيبتي..
_وفعلا بعد كام. يوووم كانو متجمعين كلهم في بيت أسر وشهد وبيحتفلو بالسبوع بتاع ابنهم، وكانت شهد قااعده جنب اخواتها بابنها وقرب منهم صابر وقال.
صابر
قومو العبو بعيد وانتي يا ام احمد ما تخليش حد يبوس الواد هينقلو الامرااض ليه..
ملك
هو انت شايفنا حشرات..
صابر
اسمعي الكلام يا ام لساااان ونص..
قامت ملك واخواتها وهو قعد جنب شهد وقال
ما تزعليش من ابوكي..
شهد بتوتر
لا مش زعلانه والله هزعل ليه يعني..
صابر بحزن
زعلتك وظلمتك كتير انتي وامك واخواتك، بس والله ندمان علي كل اللي عملته زمان ولو رجع بيا الزمن اا..
قطعت شهد كلامه وقالت بهدوء
ده نصيب يا بابا الحمد لله علي كل حال، وكفايه ربنا عوضني بأسر وابني وناس كتير بتحبني ومبسوطه معاهم اهو..
صابر
معاكي حق وانا والله يا بنتي مش قاسي الفقر والظروف اللي كنا فيها خلت الواحد يلبس توب مش توبه، بس والله اللي جاي كله هيبقي حلو..
شهد
اهم حاجه يا بابا تعلم اخواتي تخليهم يكملو تعليمهم ويتجوزو ناس مناسبه ليهم وبرضااهم واغلي حاجه عندك..
صابر
حاضر يا ام الغالي، هاتي بقي حبيب جده ده وروحي شوفي ضيوفك..
_واخده منها وهي قاامت وقغت جنب أسر اللي قالها بهدوء..
اسر
هو عادي اني اغير عليكي من ابوكي كمان..
شهد ضحكت بهدوء وقالت
لا مش عادي كده اوفر اوووي بصراااحه..
أسر
لا مش اوفر انتي بتاعتي انا وبس وحقي اغير عليكي من اي حد…
ابتسمت شهد وقالت
اكرم…
أسر
لو ما كانش جه كنت هزعل منه..
قرب منهم اكرم وقال
الف مبروك ربنا يباركلكم فيه..
أسر
الهديه دي فيها ايه يالا؟
شهد
حد. بيقول كده يا أسر شكرا يا اكرم وربنا يبارك فيك، وعقبال ما نفرحلك احنا كمان..
اسر
او نفرح فيك فركز وانت بتختار..
اكرم
والله انا ما في حاجه مخوفااني اتجوز غير جوزك يا شهد..
_ ضحكو بهدوء وبعدين راااح اكرم وقف مع فؤاد وابو شيري واسعد وشريف وكابتن سامي اللي كانو قاعدين مع بعض، وبعدين قاام يتكلم في الفون وهو ماشي فجأه خبط في شيري اللي كانت داخله بسرعه وكعب جزمتها اتكسر..
شيري
يا نهار اسود..
اكرم
انا اسف والله مش قصدي..
شيري
لا لا ولا يهمك انا اللي كنت داخله بسرعه، بعد اذنك..
_وسابته ودخلت وراااح اتكلم هو في الفون وبعدين رجع لقي رحمه قاعده جنب شريف وهي بتضحك وباين عليها مبسووطه جداً ومش متأثره بوجوده وكأنها لقيت فعلا اللي يناسبها ومرتاحه معاه، فأبتسم بهدوء ورجع قعد مكاانه وجات شيري وقالتله بهدوء..
شيري
معلش بس ممكن الفون بتاعي جنبك..
ابتسم اكرم بهدوء وقال
ما اخدش بالي والله اتفضلي..
شيري ابتسمت بهدوء وقالت
لا ولا يهمك مره تانيه يا….
اكرم
اكرم اسمي اكرم..
ردت عليه هي بهدوء وقالت
وانا شيري صاحبة شهد..
اكرم
اهلا بيكي يا شيري..
_ابتسمت بهدوء وراحت قعدت جنب شيري ورحمه وعيونها علي اكرم وهو كمان بس من غير ما حد. ياااخد باله منهم.. وفي الوقت ده سمعو صوت ضرب نااااار فكلهم خافو بلا استثناااااء ، واتجمعو حراااس البيت كلهم وفجأه ظهر كااارم وقال بابتسامه واسعه..
أكرم
اخص عليكم يا وحشين كده ما حدش يعزمني..
فؤاد بحده
تاني يا أسر الراجل ده تااااني..
أسر
والله لا تاني ولا تالت انا ما عزمتوش ايه اللي جابك يا كارم..
كارم
شايفه يا شهد بيعاملوني ازاي وانا جاااي اباركلك..
شهد.
ايوه انتو ليه بتعاملوه كده اتفضل يا كارم نورتنا..
كارم
وسعو كده فين بقي الصغنغن..
قربت منه شهد وهي شتيله ابنها وقالت
اهو ايه رئيك فيه؟
كارم
يا خراااشي يا خراشي حلو اوووي، يارب يطلع زيي..
كلهم. قالو في صوت واحد
بعد الشر..
ضحك كارم وقال
ههههههه طيب يلا اخد معاكم بقي صوره تذكاريه قبل ما امشي، يلا اجمعو كلكم..
_واتجمعو كلهم في صوره تذكاريه برعاية كارم اللي بعد ما اتصور معاهم سابهم ومشي وهما فضلو يضحكو علي تصرفاته وكملو الحفله بتاعتهم بكل هدوء…
_كنت اخاف من النصيب وقواعدة القاسيه..حتي وجدتُ نفسي آمناً،ووصلت لأسمي درجات الحب فأدركتُ حينها أن النصيب كان عادلاً وجميلاً ❤
لقراءة باقي حلقات الرواية اضغط على : (رواية النصيب)