رواية شمعة الحب لا تنطفئ الفصل الثاني 2 بقلم جنات
رواية شمعة الحب لا تنطفئ الفصل الثاني 2 بقلم جنات
رواية شمعة الحب لا تنطفئ البارت الثاني
رواية شمعة الحب لا تنطفئ الجزء الثاني
رواية شمعة الحب لا تنطفئ الحلقة الثانية
»»الفصل التانى««
الساعه ٣ بليل فى شقه مراد اللى سهران هو وزين وقدامهم تربيزة عليها ازايز خمرة وتسالى
مراد:مالك ياعم ساكت من ساعه ماجيت
زين:النهارده سياده اللوا كلمنى
مراد بصله اوى:ليه فى حاجه
زين:عايزنى ارجع شغلى
مراد:ده حاجه كويسه
زين:انا لو رجعت شغلى جدى وعمى هياخدو راحتهم فى الشركه وانا مش عايز كدا
مراد:مانت ليك عيون جوا وبرا الشركه يعنى بسهوله هتعرف كل اللى انت عايزه
زين:سيبك الوقت انا مصدع ومش عايز اتكلم فى شغل وبصراحه مش حابب ارجع الشغل ده تانى
مراد:بص بقي احنا ننزل نسهر سواا سهرة انما ايه
زين:ماليش فيه
مراد:بقولك سهرة جامده وصحابنا كلهم موجودين
زين:لا انا همشي
مراد:ماشي ياعم الملل
زين ضحك:ماشي
==================
زين رجع على القصر وطلع على اوضته بس سمع صوت البنات بتضحك على السطح
طلعلهم كانو بيذاكرو ولابسين اسدالات
زين:انتو ايه اللى مسهركو لحد الوقت
حياه:زى مانت شايف بنذاكر يازيزو الامتحانات قربت
زين:بتذاكرو …. وصوت الضحك اللى مالى القصر دى مذاكرة بردو
ريم:ماحنا لازم نفصل شويا يازين عشان منزهقش
زين بحده:لا والله….يلا ابت انتى وهى كل واحده على اوضتها
البنات لمو حاجاتهم ونزلو الا حياه اللى قربت منه:وحضرتك كنت فين بقي
زين:مع مراد
حياه حطت ايدها على مناخيرها:اوووف يازين
زين شم هدومه:فى ايه يابت انتى شامه ايه
حياه:ريحه القرف اللى بتشربه ده ….. والله حرام عليك نفسك يازين
زين:حـيـــاه
حياه عنينها لمعت بدموع:بلا حياه بلا زفت … يعنى ياحبيبى انت لو مش خايف على نفسك خاف عليا يعنى لو بعد الشر حصلك حاجه انا هيبقالى مين يازين
زين حضنها:سيبها على ربنا …. وبعدين انا معاكى اهو ومش هسيبك ابداا وحتى لو سبتك فى حبيب القلب اللى بتحسي بيه
حياه ضحكت:انت غير يازيزو
زين باسها من خدها:روح قلب زيزو انتى … يلا روحى عشان تنامى
حياه:تصبح على خير ياحبيبي
زين:وانتى من اهل الخير
حياه نزلت وزين كمان نزل وراح على جناحه ودخل اخد شاور ونام
===================
صباح تانى يوم
الكل صحو وفطرو سواا وتوفيق وعزام وزين ويحيي راحو الشركه
والبنات ماكنش عندهم محاضرات فقضو اليوم فى البيت بيذاكروو على السطح
وبعد اكتر من ٤ ساعات البنات بيذاكرو
حياه قفلت الكتاب:انا زهقت كفايه بقي
ريم:لسه جزء صغير بس
حياه:احنا اصلا مش فهمينه …. دكتور غبي
كارما ابتسمت
ريم:ايه رايكو نخلى يحيي يشرحو لينا زى ماكان بيعمل
حياه:فكرة قمر الصراحه
ريم:الفكرة اللى قمر ولا يحيي
البنات ضحكو
حياه:يحيي مش هيجى غير بليل احنا هنعمل ايه لحد مايجى بقي
ريم:تيجو نخرج
حياه:نخرج نتغدا ونشترى شويا حاجات ونيجى ايه رايك ياكوكى
كارما افتكرت اخر مرة لما خرجت عمتها بهدلتها وقالتلها ممنوع تخرج مرة تانيه
كارما هزت راسها بلا
ريم:انتى خايفه من عمتو صح طب هنعمل ايه
حياه:عندى فكرة
ريم:قولى
حياه طلعت فونها:استنو
حياه رنت على زين وفتحت الاسبيكر
زين:عايزه ايه ياقمر
حياه:زيزو حبيب قلب اختك
زين:اااه عرفها انا الدخله دى عايزة ايه من الاخر مش فاضي
حياه:عايزين نخرج انا والبنات
زين:تخرجو تروحو فين يعنى
حياه:هنتغدى سوا فى المطعم اللى جم المول وبعد كدا هنروح نشترى شويا حاجات من المول
زين:طيب روحو وانا هكلم السواق يبقي معاكو
حياه:لا ماهو فى مشكله
زين:انجزى ياحياه مش فاضي
حياه:عمتو مش هترضي تخلى كارما تخرج معانا واحنا مش هنخرج من غيرها
زين:وهى مش هترضي ليه بقي
حياه:لا دى حكايه طويله اوى
زين:وانا مطلوب منى ايه
حياه:انا هقولها ان احنا خارجين معاك قشطااا
زين:ماهى اكيد هتعرف انى فى الشركه ياذكيه
حياه:طب اعمل ايه بقي الوقت عايزين نخرج
زين:بصى البسو وانزلو ولو قالت حاجه قوليلها ان انا عازمكو على الغدا هتروح انتو المطعم وانا هاجى وراكوو اخرجو وخلصو كل اللى وراكوو وكلمينى اجى اخدكم حلو كدا
ريم بصوت عالى:تسلم يازين بجد
زين:عدو الجمايل بقي
حياه:هنعدها حاضر
كارما كانت بتبصلهم ونفسها تتكلم زيهم معاه هى مش بتتكلم معاه خالص حتى بالاشارة لانه مش بيفهمها وهى بتتحرج
حياه:سلام يازيزو
ريم:يلا نلبس بقي
البنات كل واحده راحت على اوضتها عشان تجهز
(بقلم الكاتبة:جنات)
=================
فى الشركه
مراد وصل الشركه متاخر
البنت اللى فى الاستقبال:مستر مراد
مراد قرب وسند على مكتبها:صباح الجمال ياسلمى
سلمى:مستر عزام سال عليك اكتر من مرة وقالى اقولك انه عايزك ضرورى
مراد لنفسه:وده عايزنى ليه ده
مراد:تمام هو فى مكتبه
سلمى:ايوا
مراد راح على مكتب عزام وهو مستغرب هو عايزه ليه دى اول مرة تقريبا يطلب يشوفه من وقت ماشارك بفلوسه فى الشركه
مراد خبط على الباب وسمع صوت عزام:ادخل
مراد فتح الباب ودخل:صباح الخير
عزام وهو باصص فى الورق اللى قدامه:اتفضل
مراد اضايق منه بس ماتكلمش وقعد على كرسي قدام المكتب:خير ياعزام بيه قالولى انك سالت عليا كتير
عزام بصله:اه سالت عليك وعرفت ان الباشا بيجى كل يوم متاخر وبيمشي بمزاجه كمان وكل اللى بيعمله عمال يعاكس فى الموظفات وبس وطلبتك علشان اعرفك ان الشركه مش للعب يامراد بيه وانا اساسا كنت رافض الشراكه دى من الاول
مراد:اولا انا داخل شريك بفلوسى ياعزام باشا ولولا انى دخلت شريك كانت الشركه هتقع وانا طبعاا معملتش كدا غير عشان زين وبس مش عشان خاطركو ولا حاجه…..اما بقي بالنسبه اجى متاخر وامشي بدرى ده بمزاحى وكيفى ….. لو كنت ناسي افكرك انى المقدم مراد يعنى شغلى الاساسى مش هنا ….ممكن تقول انى باجى هنا اتسلى واعاكس الموظفات زى مانت بتقول كدا…. عن اذنك ياعزام بيه
مراد قام خرج وعزام اضايق منه جداا
=================
زين قاعد فى مكتبه والباب اتفتح ودخل مراد وقعد قدام زين ومتكلمش
زين بصله اوى:هما اخترعو ام الباب ده ليه
مراد:بقولك ايه انا على اخرى
زين:مالك
مراد:انا كان فضلى تكه بس وهقتلك عمك
زين:ليه ايه اللى حصل
مراد حكاله اللى حصل
زين:سيبك منه هو عايزك تعمل مشكله عشان يمشيك من الشركه لانك تبعى….وبعدين انت مضايق ليه مانت رديت عليه كويس زمانه هيتشل الوقت وهيكلم ابوه واخته
مراد:انا بجد مش مصدق ان يحيي ابن الراجل الاستغلالى ده
زين:يحيي غيره تماما اومال انا وافقت انه يخطب حياه ليه….هتعمل ايه الوقت
مراد:ولا اى حاجه هروح اعاكس فى الموظفات المزز
زين ضحك:امشي ياض من قدامى
مراد قام وقف:ماشي ياعم متزقش سلام
مراد خرج وزين كمل شغله
==================
البنات لبسو ونزلو وقابلتهم فريده:على فين
ريم:خارجين هنتغدى برا
حياه:وبعدها هنروح نجيب حاجات من المول
فريده:تمام روحو انتو كارما مش هتخرج
كارما بصتلها بحزن
حياه:سورى ياعمتو بس زين اللى عازمنا كلنا
فريده باستغراب:زين
ريم:ايوا
فريده:وهو من امته زين بيخرجكو
حياه:لحظه لو مش مصدقانا
حياه طلعت فونها ورنت على زين وفتحت الاسبيكر
زين:خلصتو ياحياه
حياه:ايوا يازيزو احنا هنروح على المطعم
زين:قشطا انا حجزت التربيزه وهخلص واجيلكو ياحبيبتى خدو بالكو على نفسكو
حياه:حاضر ياحبيبي
حياه قفلت وبصت لفريده:صدقتى ياعمتو
فريده:بماانكو خارجين خدو تارا معاكو هى كمان
البنات بصو لبعض لانهم مش بيحبوهااا
فريده نادت على تارا اللى نزلت بفستانها القصير وفرحت انها هتخرج مع زين
البنات خرجو وركبو العربيه وحياه بعتت مسدج لزين تعرفه ان تارا معاهم
بعد شويا البنات وصلو المطعم ودخلو وقعدو على تربيزة اللى زين حجزها
حياه:هناكل ايه
ريم:استنو نشوف المنيو
تارا:انتو مش هتستنو زين مش المفروض هو اللى عازمكو
البنات بصو لبعض هما نسو زين اصلا
حياه:اكيد هنستناه هنطلب على مايجى
الجرسون جابلهم المنيو والبنات لسه هيطلبو اتفاجأو بزين اللى قعد جمب حياه
زين:اتاخرت عليكو
حياه:لا خالص يازيزو… يلا شوف هتاكل ايه
زين:اطلبيلى زيك ياقمرى
حياه:من عيونى
تارا بدلع:اعتقد زين مش هياكل اللى انتو طلبينه ده
حياه:ليه يعنى
تارا:لان زين بيلعب رياضه وبيهتم بجسمه ومش هياكل كل الاكل ده
ريم:ده على اساس اننا طالبين المنيو كله
تارا:زين انا هطلبلك زيي ممكن
حياه بعصبيه:لا انا اللى هطلب لاخويا انتى فاهمه
زين:اهدى ياحياه ويلا اطلبى لانى جعان
حياه بصت لتارا بانتصار وطلبو الاكل
زين:هتروحو المول بعد ماتاكلو
حياه:اه يازيزو
بعد شويا الاكل جه والكل بدأ ياكل وتارا كانت مضايقه منهم وكانت حابه تضايقهم وهى عارفه انهم بيحبو كارما جدا فحبت تضايقها فبتالى هما هيضايقو
تارا:ماكنتش اعرف انك بتعرفى تاكلى بشوكه والسكينه ياكارما
كارما بصلتها اوى
حياه:اشمعنا يعنى
تارا:لا اصل مامى دايما بترفض تاخدها اى حفله او اجتماع خاص بالعيله بتخاف تكسفنا
كارما اتصدمت من كلامها وعينيها جت تلقائيه على زين اللى مركز معاهم
ريم:تارا احنا خارجين نغير جو لو ناويه تضايقنا اتفضلى امشي مش مرحب بيكى اصلا
تارا بسخريه:مش مرحب بيا …. اومال مين اللى مرحب بيها كارما بنت سمر
كارما دموعها نزلت وقامت بسرعه وريم قامت وراهاا
حياه:انتى بنيأدمه مستفزة عارفه لو مكناش فى مكان عام كنت جبتك من شعرك غبيه
حياه قامت ورا البنات
تارا بصت لزين:كويس انهم مشو وسابونا لوحدنا
زين قام وقف وطلب الحساب:اخرجى برا واركبي اى تاكسي وارجعى على القصر
زين دفع الحساب وراح ورا البنات وتارا كانت مضايقه جدااا وخرجت من المطعم ورجعت على القصر
(بقلم الكاتبة:جنات)
===============
ريم جرت ورا كارما اللى دخلت شارع جمب المطعم ومسكتها:اقفى بقي ياكارما
كارما كانت بتعيط وريم اخدتها فى حضنها:اهدى عشان خاطرى حقك عليا
حياه خرجت من المطعم وشافتهم وراحتلهم وحضنت البنات وعيطووو كلهم على عياط كارما
حياه:متزعليش نفسك هى بت غبيه والله
ريم:امسحى دموعك بقي ويلا عشان نكمل يومنا
كارما هزت راسها بلا
حياه:لا هنكمله وهنتبسط ياكارما ومش هنفكر فى الغبيه دى يلا
البنات هيخرجو من الشارع شافو زين واقف وساند على الحيطه وبيبص عليهم والبنات قربو منه
حياه:ممكن افهم حضرتك كنت قاعد بتعمل ايه … ماكنتش عارف تديها قلمين على وشها يازين
ريم:صح او كنت اديها بوكس طبقلها وشها ده
زين ضحك اوى:نفسي اعرف بتجيبى الشجاعه دى منين ياريم فجاه كدا بتتحولى من بنت رقيقه لقطه شرسه بتخربش
ريم:اللى زى تارا عايزة تاخد على قفاها عشان تتظبط
زين بص لكارما اللى وشها فى الارض:كارما
كارما رفعت راسها وبصلته
زين:متزعليش نفسك وبلاش تفكرى فى كلامها وبعدين يلا عشان تكلمو يومكو انا مشيتها
حياه:بجد
زين:اه اخدت تاكسي ومشت
ريم:احسن بردو بنت فقر يلا بقي
البنات دخلو المول وزين معاهم واشترو حاجات كتير على عكس كارما اللى كانت زعلانه وماشيه ساكته
زين:بقولكو ايه
حياه:ايه
زين:بما انى انا اللى مخرجكو يعنى انا عايز اجبلكو حاجه هديه عشان تفتكرو اليوم ده بيها لانه مش هيكرر تانى
حياه:موافقين جداا بس هتجبلنا ايه
زين:انتو اختارو يلا ندخل محل ايه
ريم:اكسسوار
حياه:صح مش كدا ياكوكى
كارما هزت راسها بمعنى معرفش
زين:يلا تعالو معايا
البنات دخلو محل مع زين وريم وحياه بداو يختارو وكارما بتتفرج فى صمت
البنات فضلو كتير يختارو ومش عارفين يختارو ايه
زين بملل:هو الموضوع صعب اوى كدا
حياه:اصبر بس يازيزو
زين:بت انتى وهى يلا على برا
ريم:انت غيرت رايك ولا ايه
زين بحده:يلا على العربيه اخلصو
البنات خرجو من المول كله ووقفو جمب عربيه زين على مايجى
بعد شويا زين نزل وماسك شنطه كبيرة وفتح العربيه وحياه ركبت جمبه وريم وكارما ورا
زين طلع ٣ علب قطيفه بلون الاحمر وبدا يفتح واحده واحده ويديها للبنات
كانو سلسله بحرف كل بنت والبنات حبوهم اوى وطلع ٣ دباديب بلون البينك وعطى لكل بنت دبدوب
ريم:واحنا اللى قولنا انك بخيل ومش هتجبلنا حاجه
حياه:الصراحه ظلمانك جامد
زين:يلا بلكى يطمر فيكم … نمشي بقي
حياه:يلا
======================
فى القصر
تارا:هو ده اللى حصل يامامى والله بهدلونى وزين خلانى امشي كل ده عشان خاطر الخرسه
فريده:متزعليش ياقلب مامى انا هجبلك حقك من الخرسه اللى اسمها كارما
تارا:حبيبه قلبي يامامى
فريده:اطلعى ارتاحى يلا
تارا:حاضر
البنات وصلو مع زين وحياه وريم داخلين بيضحكو ويهزرو سوا وكارما مش بتشاركهم
فريده:اهلا وسهلاا
حياه وريم:مساء الخير ياعمتو
فريده بتبص لكارما بغضب وكارما خافت من نظرتها:كل ده كنتو فين ….. اظن مافيش بنات محترمه ترجع بيتها فى وقت متاخر كدا …. بس اقول ايه من وقت دخول كارما هانم البيت وانتو بقيتو قمه فى قله الاحترام طبعااا ماهى تربيه واحده من الشارع
كارما اتصدمت من كلامها
حياه:وايه دخل كارما ياعمتو اننا راجعين متاخر
ريم:وبعدين كارما محترمه جداا ومش زى ماحضرتك بتقولى حتى احنا كمان عارفين حدودنا كويس
فريده:لا ماهو واضح واقفين بتردو عليا بقله ذوق …. انا بكرة هعرف جدكو انكو راجعين متاخر ولوحدك
زين دخل وكان سامع كل كلامهم:ومين قال انهم كانو لوحدهم يافريده هانم البنات كانو معايا وانتى عارفه كدا كويسه
فريده:وبردو مش مسموح ليهم يرجعو متاخر انت عارف الساعه كام الوقت
زين:والله على الاقل راجعين مع راجل … الدور والباقى بقي على اللى بنتها بترجع نص الليل ولوحدها … ياترى توفيق باشا وعزام باشا يعرفو بكلام ده
فريده اتوترت:تارا كانت بتذاكر عند صاحبتها
زين:والله اول مرة اعرف ان بنتك وصحابها بيذاكرو فى نايت كلوب
فريده اضايقت منه ومعرفتش ترد عليه
زين:يلا يابنات اطلعو ارتاحو
البنات طلعو وزين كمان طلع اوضته
==================
فى اوضه كارما اخدت شاور وغيرت وقعدت على السرير بتفتكر كلام تارا وفريده عن والدتها وفضلت تعيط واتفزعت لما باب الاوضه اتفتح بقوة ودخلت فريده وقفلت الباب
كارما قامت وقفت بخوف
فريده:بقي بسببك انتى ياخرسه تهينو بنتى واللى اسمه زين يرجعها على البيت لوحدهاا وكمان البنات يقفو يردو عليا وتكمل بزين باشا كله بسببك
كارما بتهز راسها بلا
فريده قربت منها ومسكتها من شعرها بقوة:انا اصلا مش بطيقك لا انتى ولا ابوكى ولا امك تربيه الشوارع وبتمنى اخلص منك النهارده قبل بكرة وهعملها عشان ارتاح منك اصل اللى زيك متلقيش تعيش فى قصر الحديدى
فريده زقت كارما بقوة وقعت على الارض وخرجت من الاوضه
كارما فضلت تعيط كتير لحد مااغمى عليها مكانها على الارض
===============
فى جناح زين اخد شاور ونام على السرير وفتح لما فونه رن وكان مراد
زين:عايز ايه
مراد:مش هتيجى ولا ايه الكل متجمعين هنا وقاعده جامده
زين:لا انا عايز انام مش هاجى
مراد:غريبه اول مرة متسهرش انت كويس
زين:اه كويس بس دماغى مصدعه وعايز انام
مراد:ماشي يامعلم سلام
زين:سلام
زين قفل ونام….
يتبع….
لقراءة الفصل التالي : اضغط هنا
لقراءة باقي حلقات الرواية اضغط على : (رواية شمعة الحب لا تنطفئ)