رواية شمعة الحب لا تنطفئ الفصل الثلاثون 30 بقلم جنات
رواية شمعة الحب لا تنطفئ الفصل الثلاثون 30 بقلم جنات
رواية شمعة الحب لا تنطفئ البارت الثلاثون
رواية شمعة الحب لا تنطفئ الجزء الثلاثون
رواية شمعة الحب لا تنطفئ الحلقة الثلاثون
مرت الشهور
ريم ومراد رجعو القصر وزين جهزلهم جناح كبير ليهم بانه فتح اوضه فريده و اوضه تارا على بعض
والكل كانو عايشين سوا فى جو عائلى جميل بعيد عن اى حقد وغل
عزام ومروان اللى اتحكم عليهم بالمؤبد
وفريده اللى دخلت مستشفى المجانين نظرا لحالتها
اما بقي اوض البنات القديمه جهزوها للبيبهات
حياه جهزت اوضتها لبنوتها بلون البينك
اما كارما فجهزت اوضتها لابنها بلون الازرق
===================
صباح يوم جديد الكل متجمعين على السفره
بيفطرو والشباب بيتكلمو فى الشغل
حياه:اوف بقي
يحيي:مالك ياحبيبتى
حياه:انتو هتفضلو كدا مش هتتغيرو ابدااا
زين:هنفضل كدا ازاى مش فاهم
حياه:تصحو تتكلمو فى الشغل وبعد كدا تسبونا وتروحو الشركه ولما ترجعو تبقو تعبانين وتنامو وتصحو فى نفس الموال ايه الملل ده
يحيي:اومال عايزانا نقعد جمبكو ياحياه
ريم:ماهى بصراحه معاها حق احنا زهقنا من القاعده وعايزين نخرج
مراد:وعايزة تروحى فين ياريم هانم
ريم:اى مكان نقضي اليوم سوا نغير جوا بدل قاعده البيت دى
يحيي:وانتى ياكارما مش حابه تخرجى انتى كمان
كارما بصت لزين ورجعت بصت ليحيي:عادى
زين عارف انها من اخر مرة خرجت وهو خلاها تفضل فى الڤيلا لوحدها وهى مش بتخرج خالص
زين:هما معاهم حق احنا وقتنا كله لشغل المفروض يبقي فى وقت للعيله
ريم:ربنا يخليك للغلابه يازيزو ياقمر انت
مراد:ده مين ده اللى قمر يابت انتى
ريم:انت يامارو ياحبيبي
يحيي ضحك:جبانه
زين:عايزين تروحو فين
حياه:الملاهى
مراد:ملاهى مين ياحياه … ماتشوف مراتك يايحيي بيه بتقولك ملاهى
يحيي ضحك:لا يامراد متاخدش فى بالك دى احلام احلام
حياه:يوووه بقى …. زيزو
زين:مينفعش ياحياه ملاهى ازاى …. انتى ناسيه ان انتى وكارما حوامل
كارما:صح ياحياه مش هينفع
ريم بصت لصفاء:انتى مش معانا خالص ياصفصف
صفاء:لا معاكو ياحبايبى بس لو ناوين تخرجو انا مش هابقي معاكو
زين:لو خرجنا هنخرج كلنا سوا ياصفصف
يحيي:طب تروحو فين
حياه:طب نروح البحر
مراد:يادى النيله … حياه هو انتى مش ملاحظه البطيخه اللى قدامك دى ولا ايه
حياه:بطيخه … انت سامع هو بيقول ايه عليا يا يحيي
يحيي:مراد اهدى عشان اليوم يعدى على خير
حياه:لا والله
يحيي:اه والله
ريم:طب نروح البحر ومننزلش ايه رايكوو
زين:خلاص جهزو نفسكو هنسافر بكرة
البنات فرحو جداا
حياه:ايوا بقي يازيزو ياحبيب الملايين
كارما:ملايين مين ياماما
ريم ضحكت:هو حبيب كوكى وبس
زين بص لكارما وغمزها وهى اتكسفت
مراد:وهنسافر فين ياعم الحبيب انت
زين:هنروح الشاليه اللى فى الساحل
البنات:ايوااا بقي
زين:احنا هنروح الشركه نظبط كل حاجه تكونو انتو جهزتو كل حاجه هنا وشوفو لو فى حاجه نقصاكو عرفونا … يلا ياشباب
الشباب خرجو والبنات بداءو يجهزو شنطهم بحماس
عدى اليوم بسرعه وجه تانى يوم الكل جهزو ونزلو وكل واحد ركب فى عربيته مع مراته وصفاء ركبت فى عربيه يحيي
وبعد فترة طويله وصلو قدام شاليه وكان يجنن والبنات كانو متحمسين جدااا
يحيي:ارتاحو شويا اكيد تعبانين من الطريق
البنات:لا مش تعبانين
مراد:ده في حماس جامد هنا وشكلنا مش هنشوف النوم يامعلم
ريم:ليه هو حضرتك جاى هنا تنام يامراد
يحيي:رد يامراد
مراد:ارد اقول ايه ونبي كله من صاحبك
زين ضحك:طب يلا نطلع الشنط وغيرو وبعدها شوفو عايزين تعملو ايه
حياه:اول حاجه هناكل لانى ميته من الجوع
مراد بهمس ليحيي:هى مراتك ال٢٤ ساعه بتاكل ياواد يايحيي
يحيي بهمس:الحمل بعيد عنك ياحبيبي
مراد بهمس:حمل ايه انت هتستعبط ماهى مرات زين حامل ومش بتاكل
زين سمع همسهم:طب قصر لاخليهم يهجمو عليك الوقت
مراد مسك شنطته وشنطه ريم:يلا ياحبيبتى نشوف هناخد انهو اوضه
زين:هما ٤ اوض ٢ فوق و٢ تحت … صفصف ويحيي تحت عشان حياه متطلعش السلم كتير وانا ومراد فوق
مراد:طب ماهى مراتك حامل ولا نسيت
زين:اطلع منها انت يلا اطلع
كل واحد راح على اوضته وكارما بصت لزين اللى وافق:يلا نطلع يازين
زين فجأه شالها وكارما اتخضت:فى ايه يازين نزلنى … افرض حد شافنا
زين:هو انا شاقطك ياكارما انتى مراتى وبعدين انتى حامل ومش لازم تطلعى السلم كتير
كارما:لا والله
زين:اه والله … وبعدين الواد ده مش ناوى يجى بقي ولا ناوى يخلل جواكى
كارما ضحكت:انا فى اخر الشهر السابع ياحبيبي يعنى هانت
زين دخل الاوضه ونزل كارما:يأنس ويشرف حبيب ابوه … هنزل اجيب الشنط
كارما:حاضر
( بقلم الكاتبه جنات)
================
البنات غيرو لبسو دريسات بالوان الصيف حياه بلون السما وكارما بلون البينك وريم بلون الموف والشباب لبسو نفس الاستايل اللى كان عبارة عن شورت وتيشيرت ابيض وفوقه قميص مفتوح ونضارة شمس وكانو كلهم قمرات من الاخر وقررو انهم يطلبو اكل وراحو اكلو على البحر وقضو وقت جميل سوااا لحد الليل وكل واحد اخد مراته وراحو يناموو
===========
تانى يوم الكل نزلو وكانت صفاء حضرت ليهم الفطار وفطرو جمب حمام السباحه
صفاء:تحبو تتغدو ايه يا ولاد عشان اجهز
زين:بلاش تتعبي نفسك ياصفصف هنطلب اكل احسن
صفاء:تعبكو راحه ياحبايبى وبعدين كارما وحياه حوامل وبلاش ياكلو اكل من برا احسن …. هااا تحبو تاكلو ايه
ريم:بشاميل من ايدكى ياصفصف ياقمر
صفاء بصت لبنات والشباب:اعمل بشاميل
كلهم:اه ياصفصف
صفاء راحت المطبخ
مراد بص لشباب:بقولكو ايه ماتيجو ننزل البحر
يحيي:هتعملو سبق ولا ايه
ريم:سبق ايه
مراد:لما كنا بنروح اى رحله او مصيف سوا كنا بنعمل سبق عوم واللى يكسب بقي
حياه:حلو اوى اعملو واحنا هنشجع
زين:وانتى هتشجعى مين ياحياه
حياه:ابو اليحي حبيبي طبعااا
يحيي:قلب حبيبك
زين:ابو اليحي مش كدا
حياه:الله مانت عندك مراتك هتشجعك وريم اكيد هتشجع مراد اسيبه لوحده وحيد حزين كدا
مراد ضحك اوى:يعنى انتى بتشجعيه عشان مايبقاش وحيد حزين
يحيي:الله يكسفك ياشيخه
مراد:يلا قومو نغير وننزل يلا
الشباب قامو غيرو وراحو كلهم قعدو على البحر اللى كان قريب جدا من الشاليه والشباب بداو يتسابقو والبنات بتشجعهم وضحكو وهزرو كتير
وبعد وقت كبير صفاء نادت عليهم عشان يتغدو والشباب طلعو اخدو شاور وغيرو ونزلو اكلو سوااا وقررو يسهر يتفرجو على فيلم سوا والبنات نامو وهما بيتفرجو والشباب كل واحد شال مراته وراحو على اوضهم
==================
صباح يوم جديد
الشباب قاعدين جمب حمام السباحه اتفاجأو بالبنات نازلين ولابسين بوركينى
زين:انتو رايحين فين بالصلاه على النبي كدا
حياه:انتو مش موافقين اننا ننزل البحر …فاهننزل البيسين
يحيي:مش احنا اتفقنا من الاول مافيش نزول ميا
كارما:طب انزلو معانا ومش هنتحرك كتير والله ونبي ونبي
زين بص لشباب ورجع بص للبنات تانى:تمام بس مش هطولو
البنات:اوكى
الشباب طلعو غيرو ونزلوو وكل واحد اخد مراته ونزلو البيسين وكل واحد كان فى ركن بعيد عن التانى
===============
حياه كانت واقفه فى ركن البيسين وسانده ضهرها على حيطه حمام السباحه ويحيي قدامها ومحاوطها بحب
حياه:الميا حلوة اوى
يحيي:مش احلى منك ياقمرى
حياه:كان نفسي انزل الميا اوى يايحيي وكنت هزعل جدا لو منزلتش
يحيي:انتى عارفه انى مش بحب ازعلك ياحياتى بس انتى فى اخر شهر وخايف عليكى
حياه حاوطت رقبته بحب:تعرف انى بحبك اوى
يحيي ابتسم:وانا بموت فيكى ياحياتى
يحيي حط ايده على بطنها:ونفسي قمرى تنور حياتى بقي عشان فرحتى وحلمى يكون اتحقق بجد
حياه:هانت كلها اسبوعين وتنور حياتنا احنا الاتنين
يحيي:يارب بقي
( بقلم الكاتبه جنات)
==============
كارما كانت واقفه زى حياه فى ركن البيسين وزين محاوطها وبيبصلها بحب
كارما بصتله وابتسمت:ياترى بعد ١٠ سنين كدا هتفضل تبصيلى نفس النظرة دى
زين:ولو بعد ٥٠ سنه هتفضل دى نظرتى ليكى
كارما حضنته بحب وباسته من خده
زين:لا اهمدى كدا مش عايز اتهور
كارما ضربته بخفه فى كتفه:عيب يازين كدا
زين ابتسم:انا بعشقك يا كرملتى
كارما:تعرف انى فضلت احبك سنتين فى السر ماكنتش اتخيل انى ممكن اسمع الجمله دى منك
زين:وهتفضلى تسمعيها العمر كله منى
كارما ابتسمت بحب وحضنت زين
=============
عند ريم اللى كانت فى حضن مراد
مراد:لسه حاسه انك فى حلم بردو
ريم:انا بحمد ربنا انك رجعتلى بخير يامراد انا كنت بموت من غيرك
مراد حاوطها بحب:بعد الشر عليكى ياقلب مراد
ريم:اوقات بفكر لو ماكنش حصل كل اللى حصل كان زمانى الوقت حامل وعرفت نوع البيبي وبحضرله اوضه زى البنات وبشتريله كل حاجه
مراد:لسه الحياه قدامنا طويله ياريم وهنعيش سوا احلى حياه وهتجبيلى احلى بيبهات شبهك كدا
ريم:ياااه يامراد بجد هيكون احلى حاجه حصلت فى حياتى انى يكون عندى بيبي منك
مراد:دى امنيتى ياريم من اول ماحبيتك انى يكون عندى اسرة وبيت دافى
ريم:ربنا يسامحه عزام بقي لو كان وافق اننا نتجوز من غير مشاكل ماكنش حصل كل ده
مراد:المغامرة حلوة بردو مافيش كلام ولا ايه ….. وبعدين دانا بشكر ابوكى من قلبي
ريم:بتشكره على ايه بقي
مراد:يمكن الحاجه المفيده الوحيده اللى عملها فى حياته انه جابك عشان تنورى حياتى ياقمرى
ريم ضحكت وحضنته بحب
عدى وقت كبير والشباب والبنات فى حمام السباحه وصفاء خرجت وشافتهم وبصتلهم بحب:بقي هما دول الشويا الصغيرين يازين
زين بصلها:حكم القوى بقي ياصفصف
صفاء ضحكت:طب يلا اطلعو عشان تتغدو بقي
البنات والشباب طلعو غيرو ونزلو عشان يتغدو على البحر وبعد مااكلو كلهم سواا قررو يكملو السهرة على البحر
حياه حست بوجع فى بطنها وحطت ايدها على بطنها بتعب
يحيي لاحظ انها بتتوجع:مالك ياحياه
حياه:بطنى بتوجعنى
صفاء:طب اهدى ياحبيبتى
حياه فجأه صرخت باعلى صوت والكل اتخضو عليها
زين:يحيي يلا بسرعه هنروح المستشفى
يحيي شال حياه وركب عربيه مع زين وكارما وصفاء ركبو مع ريم ومراد
( بقلم الكاتبه جنات)
==============
فى المستشفى
الكل واقفين قدام اوضه العمليات بيستنو حياه اللى الدكتورة قالتلهم انها هتولد وحالا ويحيي رفض يسيبها ودخل معاها
بعد شويا سمعو صوت البيبي بيعيط ويحيي خرج وهو شايل البنوته فى حضنه وبيبصلها بحب ومش مصدق نفسه
الكل جرو عليه عشان يشوفو البنوته وكانت حلوة جدااا
يحيي بص لزين:يلا اذن لبنت اختك
زين ابتسم واخدها من يحيي وباسها من راسها واذن ليها فى ودنها
بعد شويا الكل كانو متجمعين فى الاوضه اللى اتنقلت فيها حياه اللى نايمه على السرير وفى حضنها بنوتها ويحيي قاعد جمبهم فرحان بعيلته الصغيرة والكل باركو لحياه
مراد:بس خد بالك يايحيي البت دى كلها كدا هتبقي مدلعه اوى
يحيي:وليه بقي
مراد:ياعم دى مصبرتش لما تتولد فى معادها عشان يبقي اسمها اتولدت فى الساحل ماادراك ببنات الساحل يامعلم
ريم:مالهم بنات الساحل يااستاذ مراد
يحيي:رد بقي
مراد:ولا اى حاجه ياحبيبتى هو فى حد فى جمالك وحلاوتك ياقمرى انتى
زين:بياكل بعقلك حلاوة على فكرة
ريم:المصيبه انى عارفه
كلهم ضحكو عليهم
كارما:هتسمو القمرايه دى ايه
يحيي:حياه اللى هتسميها
حياه:هسميها ديما
ريم:حلو اوى
==============
الكل رجعو تانى الشاليه ويحيي قرر يعمل سبوع ديما فى الساحل والكل كانو بيجهزو كل حاجه بفرحه
وعدى اسبوع وجه يوم سبوع ديما يحيي الحديدى
الشباب زينو المنطقه اللى جمب حمام السباحه ببلالين بلون البينك والابيض واسم ديما اللى كان كبير بلون الدهبي وحضر السبوع المقربين منهم بس وحياه ويحيي كانو مبسوطين جداا والكل بارك ليهم
وريم كانت بتعمل كل حاجه مع صفاء لان كارما حامل
ريم كانت بتوزع التوزيعات على الضيوف ووقفت فجأه لما حست بدوخه ومراد كانت عينه عليها وراحلها بسرعه:مالك ياريم
ريم:دوخت شويا بس انا كويسه متخافش
مراد:طب هاتى وانا هوزع على الضيوف ارتاحى انتى شويا من الصبح وانتى واقفه على رجليكى
ريم:حاضر
بعد وقت طويل الضيوف مشو وفضلو الشباب والبنات وصفاء اللى شايله ديما فى حضنها
مراد ملاحظ تعب ريم:ريم انتى كويسه
ريم:اه كويسه بس هروح ارتاح شويا
صفاء:روحى ياحبيبتى
ريم قامت ومشت خطوتين وفجاه وقعت مغمى عليها والكل اتخضو عليها ومراد شالها وطلعها الاوضه وطلب من زين يطلب دكتورة بسرعه
بعد شويا جت الدكتورة وكشفت عليها وطمنتهم انها ضغطها كان واطى وانها مأكلتش حاجه ولازم ترتاح والكل راحو اطمنو على ريم وبعدها راحو عشان ينامو
( بقلم الكاتبه جنات)
==============
ريم نايمه فى حضن مراد:انا فرحت وقولت انى حامل
مراد:ريم مش احنا قولنا مش هنتكلم فى الموضوع ده وهنسيبه على ربنا
ريم:ونعمه بالله
مراد:يلا نامى ياريم انتى تعبانه وعشان هنرجع بكرة اسكندريه
ريم:حاضر
=================
تانى يوم الكل رجعو على القصر
ريم طلعت اوضتها واتفاجات بتربيزة فى نص الاوضه وكانت متزينه بالورد وعليها بوكس حجمه وسط
ريم قربت وفتحت البوكس وطلعت علبه قطيفه صغيرة ولما فتحتها كان فيها سلسله على شكل بنت شايله بيبي صغير
وطلعت سلوبت بلون الابيض صغيرة وماكنتش مصدقه نفسها وفاقت على مراد اللى حضنها من ضهرها
ريم:مراد انا بجد
مراد:اه ياقلب مراد انتى حامل … الدكتورة اللى كشفت عليكى هى اللى عرفتنى وانا طلبت منها متقولش عشان اعملك مفاجأه
ريم لفت وحضنته اوى:احلى مفاجأه يامراد والله انا مبسوطه اوى اوى
مراد بعد عنها ومسك السلسله ولبسها ليها ونزلو وقالو لكل العيله اللى فرحو جدا بالخبر والكل باركو لريم ومراد
( بقلم الكاتبه جنات)
==================
مرت الايام والشهور والكل عايشين مبسوطين
حياه ويحيي اللى ديما نورت وغيرت حياتهم وفرحانين بيها جداا
زين اللى مخلى باله من كارما اللى بقت فى الشهر الاخير وتعبها كل يوم بيزيد
مراد اللى فرحان جدا بحمل ريم وخصوصا لما عرفو انها حامل فى تؤام
وريم مطلعه عينه ومجنناه بحملها وهرموناتها اللى بتتغير كل دقيقه
==================
صباح يوم جديد
فى جناح يحيي وحياه
يحيي صحى وكانت حياه نايمه فى حضنه وبص على سرير ديما اللى محطوط قريب من السرير وكانت صاحيه وبتحرك ايدها ورجليها
يحيي قام وقرب منها:صباح الطعامه يادمدومتى …. الجميل صاحي من بدرى ليه كدا
يحيي شالها وفضل يلاعبها كتير وحياه صحت وابتسمت لما شافتهم ويحيي قرب منها وباسها من خدها:صباح الخير ياحياتى
حياه:صباح النور
حياه باست ديما من ايدها:صباح الحلاوة ياقلب مامى
يحيي باس ديما من خدها:يلا روحى لمامى عشان اروح اجهز عشان اروح الشركه ياقلب بابا
حياه اخدتها وقامت عشان تغير وتغير لديما ويحيي كمان لبس ونزلو سواا
==================
فى جناح ريم ومراد
ريم صحت كان مراد واقف قدام المرايا بيسرح شعره:رايح فين بدرى كدا يامراد
مراد ابتسم وقرب منها وباسها من راسها:صباح الجمال ياروحى … انا نازل الشركه ياقلبي
ريم:هى الشياكه دى كلها عشان الشركه يامراد
مراد:اممم هنبدأ بدرى النهارده ولا ايه
ريم:انت بتتريق يامراد
مراد:مانتى غريبه ياريم انا لابس بنطلون وقميص فين الشياكه دى بقي … يلا قومى غيرى عشان ننزل سوا …. والنهارده عندنا عشا عمل هحضره انا وزين ويحيي
ريم:واكيد هيكون فى بنات يامراد
مراد مسح على وشه بضيق:يخربيت الحمل على هرموناته اللى بتطلعيها عليا دى …. ريم حبيبتى انتى ناويه تجيبى عيال تانى
ريم:بتسال ليه
مراد:لا اصل انا مش عايز كفايه دول ياحبيبتى
ريم عيطت:وكمان مش عايز عيال منى … اه ماهو اكيد زهقت منى وعايز تتجوز عليا يامراد
مراد بصلها:اتجوز عليكى ….. انا ماشى ياريم احسن قربت افجرك والله
مراد خرج وريم ضحكت عليه وقامت تلبس عشان تنزل
( بقلم الكاتبه جنات)
==============
فى جناح زين وكارما اللى صاحيه تعبانه جدا وعندها مغص
زين خرج من الحمام وشافها حاطه ايدها على بطنها قرب منها:مالك ياكارما
كارما:بطنى وجعانى شويا
زين:طب خلينا نروح لدكتورة ياكارما
كارما:هى قالت ان المغص ده عادى يازين
زين:انا هفضل معاكى مش هنزل الشركه
كارما:متقلقش عليا وبعدين الدكتورة حددتلى معاد الولاده كمان اسبوع … روح الشركه وانا هنزل اقعد معاهم تحت
زين:لو حسيتى باى تعب تكلمينى على طول تمام
كارما:حاضر ياحبيبي
زين:طب قومى البسي ننزل سوا
كارما قامت لبست ونزلت مع زين
وكانو الكل متجمعين على السفره فطرو سوا والشباب راحو على الشركه
====================
بالليل
البنات قاعدين مع صفاء والشباب لسه مرجعوش لان عندهم عشا عمل
وكارما تعبها بيزيد بس بتحاول تستحمل بس الوجع زاد
كارما بتعب:حياه
حياه:مالك ياكارما
كارما:المغص بيزيد مش قادرة استحمل كلمى زين
ريم:انتى هتولدى ولا ايه ياكارما
صفاء:شكلها كدا تعالى معايا ياحبيبتى تلبسي على مايوصلو
حياه كلمت زين وقالتله وهما جم بسرعه واخد كارما وراحو لدكتورة اللى قالتلهم انها لازم تولد عشان الميا قلت على البيبي
زين دخل مع كارما اللى كانت خايفه جداا بس زين كان بيطمنها
وبعد وقت كبير كارما خرجت واتنقلت على اوضه عاديه والكل كانو معاها
حياه اللى شايله ابن كارما:حبيب عمتو ياناس شبهك اوى يازين
زين قاعد جمب كارما وماسك ايدها وكارما ابتسمت وهمست ليه:كان نفسي يكون شبهك اوى
زين باسها من راسهاا وقام اخد البيبي من حياه ونيمه فى حضن كارما اللى باسته من خده
صفاء:هتسمو ايه ياحبايبي
زين:كارما عايزة تسميه ريان
مراد:ريان زين الحديدى جامد بردو
الكل باركو لزين وكارماا
================
بعد اسبوعين كان سبوع ريان وكانت حفله كبيرة فى جنينه القصر اللى كانت متزينه بشكل ولا اروع وحضرها ناس كتير جداا
والكل كانو فرحانين جدااا
وزين اللى شايل ريان وحاضن كارما بحب والكل بيبارك ليهم
زين:بقي زين اللى كان كل يوم سهر يتجوز ويعمل عيله بذمتك انتى مصدقه
كارما:كانت امنيه حياتى ان عيلتى تكون معاك يازين والحمدلله ربنا حققلى امنيتى
زين:ربنا يخليكو ليا ياقلبي
( بقلم الكاتبه جنات)
=============
مرت الشهور والشباب والبنات عايشين حياه مليانه حب ودفى ونجاح فى شغلهم
وافتتحو فرع جديد لشركتهم وكانو فخورين جدا بنجاحهم وكانو بيحضرو لحفله كبيرة لافتتاح الفرع الجديد
ريم اللى متحمسه وجهزت اوضتها القديمه لتؤامها اللى فرحانه جدا انهم هيكونو ولد وبنت
وجهزت الاوضه بلونين البينك والازرق
( بقلم الكاتبه جنات)
=================
وجه اخيرا يوم الحفله
كارما اللى لبست دريس بلون الفضى وزين وريان لبسو بدل بلون الرمادى وكانو اسرة جميله
اما حياه اللى لبست دريس بلون البينك هى وديما ويحيي لبس بدله بلون البيج وكانو حلوين جدااا
اما مراد اللى لبس بدله بلون الاسود بنفس لون دريس ريم
والحفله كان حضرها ناس كتير جدا والكل بارك لشباب على نحاجهم
واشتغلت موسيقى هاديه والكابلز كلهم طلعو يرقصو سوا ويحيي وزين اخدو البنات وراحو يرقصو هما كمان
على التربيزة اللى قاعده عليها ريم وصفاء ومعاهم سوسن اللى شايله ديما وفاطمه اللى شايله ريان
ريم همست لمراد:ما تيجى نرقص
مراد بصلها:نعم
ريم:تعالى نرقص بجد نفسي اوى ونبي….. متبقاش قفيل بقي
مراد:قفيل إيه ….. اقعدى ياما .. دا انا لو هزتيك بس هتولدى استهدى بالله ونبي انتى فى الشهر التاسع
ريم:يامراد عشان خاطرى ونبي ونبي ونبي
مراد اتنهد:ماشي ياريم قومى
ريم قامت معاها وكانت فرحانه اوى
صفاء:رايحين فين ياولاد
ريم:هنرقص معاهم ياماما
صفاء:انتى تعبانه ياحبيبتى رقص ايه يامراد
مراد:قولتلها هى مش مقنعه
ريم:ياماما ونبي
صفاء:طب براحه عشان متتعبيش
ريم:حاضر
مراد وريم رقصو سوا وفجأه مسكت بطنها:ااااه
مراد:مالك ياريم
ريم:شكلى هولد يامراد
مراد:انا قولتلك بلاش تتحركى من مكانك
يحيي وزين والبنات قربو منهم
زين:فى ايه
ريم:شكلى هولد
مراد:انا قولتلها لو هزيتك هتولدى مصدقتنيش
ريم:انت هترغى ااااه يامراد هموت
مراد شالها وراح بسرعه على العربيه وصفاء ركبت معاه والشباب اعتذرو من الضيوف ونهو الحفله وراحو المستشفى ورا مراد
( بقلم الكاتبه جنات)
================
فى المستشفى الكل مستنين قدام باب اوضه العمليات
وبعد شويا مراد خرج وهو شايل البيبهات كل واحد فى ناحيه وفرحان بيهم والبنات جرو عليه وشافوهم وكانو حلوين اوى
مراد اذن ليهم فى ودنهم وصفاء اخدت البنوته وفضل الولد مع مراد
صفاء:ماشاء الله يتربو فى عزك ياحبيبي
مراد:تسلمى ياصفصف
بعد شويا ريم خرجت واتنقلت اوضه عاديه وكانت نايمه على السرير وفى حضنها البنوته ومراد شايل الولد والكل باركو لريم اللى كانت فرحانه جدا بيهم
يحيي:هتسمو ايه
مراد:احنا اتفقنا انا اسمى البنت وريم الولد
حياه:يلا انجزو قولو هتسمو ايه
ريم:هسمى فارس
كارما:حلو اوى
يحيي:وانت يااستاذ مراد هتسميها ايه
مراد:حور
ريم بصتله:حلو اوى يامراد … فارس وحور
الكل اتمنى ليهم حياه سعيده
===============
ومرت الايام وجه يوم سبوع الحلوين الصغيرين فارس وحور
ومراد اللى صمم يجهز كل حاجه بنفسه وهو اللى حضر للحفله اللى كانت فى جنينه القصر وزينيها بشكل تحفه ببلالين بلونين البينك والبيبي بلو وكان فى تربيزة طويله مليانه انواع كتير من الحلويات وتربيزة تانيه عليها توزيعات كتير لضيوف كانت شيك جداا
الكل اتجمعو فى الجنينه ومراد كان مصمم ان ريم متنزلش غير لما الكل يتجمعو
يحيي:اطلع هات ريم بقي
حياه:دى فاضلها شويا هتنزل تقتلك يامراد
كارما:بصراحه معاها حق نفسها تنزل تشوف هو حضر ايه
مراد:انا طالع اهو واول ماتنزل تعملو زى ماقولتلكو
البنات والشباب:حاضر
========
ريم قاعده فى الجناح وكانت لابسه دريس بلون الابيض اللى مراد اشتراه ليها وكان رافض انها تنزل او حتى تفتح شباك
بصت لفارس وحور اللى نايمين على السرير ولابسين بردو لون ابيض:ابوك ده انا هتقتله لمااشوفه
مراد:واهون عليكى بردو
ريم:كل ده يامراد
مراد:كنت بحضرلك احلى حفله ليكى وللحلوين بتوعى يلا ننزل
ريم شالت فارس ومراد شال حور ونزلو سوا واول ماخرجو من باب القصر البنات والشباب ضربو صاوريخ ورق وكان المنظر تحفه وريم انبهرت بجمال الجنينه وبصت لمراد بحب:ربنا يخليك لينا يامراد
مراد:ويخليكو ليا وتنورو حياتى دايمااا يارب
الضيوف كلهم باركو لمراد وريم اللى كانت طايره من الفرحه وكان فى واحد بيصور كل حاجه فى الحفله
مراد نادى على العيله كلها:يلا هنتصور سواا
وقف زين وهو شايل ريان وجمبه كارما وجمبها حياه ويحيي شايل ديما ومراد اللى شايل حور وريم شايله فارس وحطو كرسي قدامهم وقعدت عليه صفاء والشاب صورهم صوره عائليه جميله
صفاء:ربنا يبارك فيكو ياحبايبى ويديم عليكم الفرحه والسعاده يارب
الكل:يااااااارب…….
( بقلم الكاتبه جنات)
============
ودى كانت نهايه روايتنا ياقمراتى ويارب تكون استمتعو معايا ومع ابطالنا الحلوين
وهستنى رايكو اكيد ياقمرات♥️♥️♥️
هودعكو ونتقابل ان شاء الله فى روايه جديده مع ابطال جداد بااااى😍
مين اكتر كابلز حبيتوه🤔♥️
لقراءة باقي حلقات الرواية اضغط على : (رواية شمعة الحب لا تنطفئ)