رواية عبط ميكس الفصل الثاني 2 بقلم نرمينا راضي

رواية عبط ميكس الفصل الثاني 2 بقلم نرمينا راضي

رواية عبط ميكس البارت الثاني

رواية عبط ميكس الجزء الثاني

رواية عبط ميكس الحلقة الثانية

— زعلوك.. في حد في العالم اسمه زعلوك !!
–لأ زريبه مسمحلكيش.. كُله إلا اسمي إلا يمس اسمي أكنه مس ماي نيم بالظبط
–أي ده.. ده أنت جامد اهو وبتهزر !
— لأ ده أنا أعجبك أوي.. عاوزاني فرفوش نزود الفلوس.. ها قولتي إيه ؟
— على بركة الله.. هات رقمك عشان أبعتلك اللوكيشن.. وتعالى من غير عربية أنا عندي عربيتي
–تمام.. حلو أوي.
___________
“الساعة ٨ بالليل في وسط الشارع”
–اي ده !!.. هي اللي هناك دي!! لا يارب متكون هي.. ينهار اسوخ ينهار اسوخ.. عربية كارو.. جايه بعربيه كارو !!!
–هششش.. هششش بــاس هنا يا أليكس لو سمحت
….. ازيك يا زعلوك.. حلوه البدلة عليك

— أنتِ أيه اللي بتعمليه ده !! هتروحي فرح بعربية كارو.. عربية بحمار يا زريبه !!
–زريبه اللي هي أنا ولا زريبه شتيمه.. عشان اجهز الرد بس
–هو في زريبه غيرك هنا !!؟
–ريكلاس يا مان.. أنت محسسني إني رايحه فرح حد عليه القيمة أوي.. ده الإيكس.. وده أليكس.. سلم عليه
–مين أليكس !! الحُمـار ؟
–اسمه حمار باشا أليكس
–الحمار اسمه أليكس وأنتِ اسمك زريبه !! أنا اللي جبته لنفسي.. ليه كده يارب بس
–اركب اخلص عشان ألحق انقطه
–تنقطيه !! معاكِ فلوس كام
–لأ أنا مش هنقطه بفلوس
–اومال هتنقطيه بإيه ؟
–بقلم فلو مستر.. مستر أحمد بتاع الإنجليزي ههه
–اقفي هنا.. أنا ماشي سلام
–والألفين جنيه ؟
–والله ولا كنوز الدنيا.. أنا دماغي هتنفجر منك لله
–هتعمل عملية أمك ازاي..؟
–عرفتِ منين !
–تعالى أركب أنا اعرف عنك كل حاجة وعارفه أنك محتاج الفلوس عشان تعملها العملية
–بصي أنا هخلص معاكِ التمثيلية الزفت دي وكل واحد يروح لحاله
–أنت حالي.. أنا قضاك المستعجل
–ده أنتِ نصيبي الأسود

–الأسود يليق بي ههه
–طب متهزريش تاني عشان هي مرارة واحدة
–هششش هششش على جنب يا أليكس.. يلا يا زعلوكي انزل
–زعلوكي !! لا اسمي أما اقولك أنا مش زعلوك حد فهمتي
–هي الناس بتتفرج علينا ليه !؟
–جايبانا فرح في قاعة بالفخامة دي بعربية كارو وتقولي بيتفرجوا علينا ليه ؟ منك لله مش بعيد ننزل على اليوم السابع
–أنا صممت أجي بعربيتي البرو ماكس أليكس كارو عشان افضحه في وسط الناس
–ده احنا اللي اتفضحنا.. طلعتيلي منين نصيبه بس ياربي
–خلاص بقى أنت هتعيط
–هنعمل أي دلوقت
–هندخل نتفرج عليهم وهما بيرقصوا سلو ونعيط
–نعيط !! أنتِ جيباني عشان نغيظه ولا نذل نفسنا ؟ فهميني بالظبط أنتِ عايزه إيه؟
–عايزاك
–أنا بقول نذل نفسنا احسن.. هات ايدك
–هتعمل ايه ؟
–انكچيني.. هندخل نرقص معاهم سلو
–حلو اللون الزيتي عليك
–اشمعنا اللون الزيتي اللي صممتي عليه
–عشان يبقى زيتنا في دقيقنا

–أنا غلطان إني سألتك
–بقولك ايه.. أنا عاوزه اعيط
–لا زريبه امسكي نفسك.. كفايا فضيحة العربية الكارو
–عروسته شكلها حلو أوي.. معرفش ايه الفرق بيني وبينها
–٥٠ كيلو جرام
–ده تنمر علفكرة !
–أصلك نحيفة أوي.. بس جيتي في ملعبي أنا بحب اللي في عودك
–ليك حق تحبه.. ده أنا حسن شاكوش عمل اغنية عود البطل مخصوص عشاني
–بس هو غنى لعود البطل مش عود المكرونة الإسباكتي
–ده تنمر علفكرة !
–أنتِ اللي زيك عارضات ازياء.. افتخري
–عندك حق والله.. هو اصلا غبي.. خسر رشاقتي
–انتوا سيبتوا بعض ليه ؟
–مين بعض ده ؟
–ياريتني ما سألت
–هو اللي سابني.. مغرور اوي.. قولتله الله يرحم ابوك كان بيشرب الشوربه بخرطوم الغسالة.. راح عملي بلوك.. بزمتك أنا غلطت في حاجه؟
–لأ أنتِ مغلطتيش.. الشوربه فعلا بتتشرب بخرطوم الغسالة…معرفش الناس اللي بتشربها بالمعلقة دي عايشه معانا عالكوكب ازاي !
–معرفش والله.. دي عجلات امه بتقطع التورته بالفاس.. معرفش مغرور على أي ده
–أمه اسمها عجلات ؟!
–وابوه اسمه صاموله
–استني متقوليش أنا عرفت اسمه هو إيه
–إي ؟
–كلاكس
–لأ.. اسمه مزراب
–مزراب ! زريبه ومزراب صدقي لايقين على بعض.. انتوا من نفس الكوكب اللي احنا عايشين عليه ده ؟!
–لأ.. من كوكب الشرق

–ايه كوكب الشرق ده ؟
–بتاع أم كلثوم
–يارب أنا اللي جبته لنفسي.. حسبي الله
–أنا عايزه
–عايزه أي؟
–من اللي جبته لنفسك
–لحد هنا وكفايا.. أنا عملت زي ما قولتيلي هاتي فلوسي خليني امشي
–مش هترقص معايا سلو عشان نغيظهم ؟
–وبعد ما تغظيه.. استفدتي اي؟
–هضيع حرقان دمي ده
–ماشي.. أنا هعملك اللي عاوزاه وبعد كده هخلع
–قدام الناس ؟
–هو اي؟
–هتخلع قدام الناس !
–بت بت مسمعش نفسك لأخر الفرح يإما همشي ومش هتشوفي وشي
__________
–طلعت مش سهل.. بتعرف ترقص سلو حلو
–شايفه بيبص عليكِ ازاي.. الغيره هتنط من عنيه
–أحسن.. غبي خسر رشاقتي.. حلوه الكرافته عليك
–حلو فستانك.. وشعرك برضو.
–الهي ربنا يسترها معاك دنيا واخره زي ما سترتني
–زريبه احنا اتفضحنا.. متسترناش ولا حاجه.. دي اول مرة تحصل في التاريخ.. حد يروح فرح بعربية كارو
–لما يبقى فرح واحد عليه القيمة نبقى نروح بعربية عليها القيمة
–احسن دلوقتي ؟
–يلا نمشي
____________

–زريبه الساعة بقت عشرة.. هنفضل قاعدين في الشارع كده كتير زي المتسولين ؟
–الهوا هنا حلو
–اممم.. أنتِ منين ؟
–من الشرابيه
–ايه الشرابيه دي ؟
–دي كانت عباره عن مجموعة شربات.. لمناهم وعملناها منطقه بقت اسمها الشرابيه.. وأنت منين؟
–من البوكسراتيه
–هاه !
–جاك هو.. تعالي نشوف مكان تاني نترزع فيه الناس بتتفرج علينا
–بقولك ايه
–اي؟
–ليك في الروايات
–اممم مش أوي
–قريت ايه قبل كده
–عشق التل
–ايه عشق التل دي؟
–هو مش فيه عشق الجبل الرعد والبرق والاسفلت والفهد وجميع الحيوانات المفترسه؟
–اه
–طيب مجتش على عشق التل
–طب مين الكاتب عشان اقرأها
–واحد صاحبي اسمه هبداوي
–هاه !
–جاكِ هوا قومي نمشي
–أنت اسمك ايه؟
— ماقولتلك.. زعلوك
–الحقيقي
–يزن
–أنا قولت الوجه السمح ده استحاله يبقى اسمه زعلوك
–هو انت اسمك زريبه بجد ؟

–لأ دي اسمي النوكيا
–نوكيا ! أنتِ مولودة في سنترال؟
–هو مش فيه لكل واحد نوكيا.. يعني مثلا نوكيا مصطفى “ديشا”
–كُنيـه.. كنيه الله يخربيتك.. ايه نوكيا دي
–خلاص بقى مغلطناش في البخاري
–طب يلا نمشي
–امشي أنت أنا قاعدة شوية.. خد فلوسك اهي
–مش عاوزهم
–ليه ؟
–عشان زي ما أنا عملتلك اللي أنتِ عاوزاه.. هطلب منك طلب مقابل ده
–هحضر معاك فرح الإكس برضو ؟
–معنديش اكس.. بس هتيجي معايا حفلة تنكريه
–بتتكلم بجد ؟
–هو حد قالك إن أنا أخرس
–لا قصدي هنروح حفلة تنكرية بجد
–ايوه
–ليه ؟
–الحفلة دي فيها ناس جامده متريشه.. احنا هنقلبهم
–متريشه ازاي.. طالعلهم ريش ؟
–لا بقولك ايه.. المهمة دي صعبة مش عاوز غباء.. دول ناس عندهم فلوس كتير هيتجمعوا في الحلفة دي للترفيه.. احنا بقى هنقلبهم
–هنقلبهم ليه هما واقعين على بطنهم؟
–اعتبريني مقولتش حاجة

–هو انت نصاب ؟
–لا حرامي
–…..
–ساكته ليه ؟
–اصلك سرقت قلبي
–طب يلا يا مُحنو نمشي
–بقولك ايه
–ايه؟
–في جامع هناك اهو بيتبنى لسه.. تعالى اما احط فيه صدقه عشان تخفف حرقة دمي
–ماشي.. ايه ده أنتِ بتجري ليه !
–عشان تبقى صدقة جارية

يتبع…
لقراءة الفصل التالي : اضغط هنا

لقراءة باقي حلقات الرواية اضغط على : (رواية عبط ميكس)