رواية غيبوبة القدر الفصل الثاني 2 بقلم رويدا القاضي

رواية غيبوبة القدر الفصل الثاني 2 بقلم رويدا القاضي

رواية غيبوبة القدر البارت الثاني

رواية غيبوبة القدر الجزء الثاني

رواية غيبوبة القدر الحلقة الثانية

“الناس الاولى قالت: كل سفرة تعلم حداقة وأنا من للي عشته تعلمت هلبا”.
تعلمت مانحكمش على الشخص إلا بعد نعرفه تعلمت كله فاني ويتغير مع الوقت لو تحبي شخص على فلوسه 🤑 ايجيه يوم وتم ولو بتحبيه على جماله البشر كلها تكبر في العمر وتتغير ملامحها لكن لما تحبيه
على جوهره👌 وطيبة قلبه واخلاقه هذا للي بيدوم ومستحيل يتغير مهما طال الوقت .
هاذي ديروها في بالكم وقولوا قالتها رويدا.
أمينة: قداش بنلحق ع حاجة بروحي تعبت نجري من حاجة لي حاجة .
علي: انت للي مستعجلة شن بديرلك تبيني نقعمز ندير معاك الحلويات 😏 ولا كيف.
أمينة: غير برا اعزم الناس ع الفضانية وجيب معاك النوبة نبيه عرس مش فضانية .
مها: هوا هذا للي لقطاته النملة في عام ياكله الجمل في مرة 🤨 تلاش التكاليف هاذي كلها.
أمينة: ريحي روحك وانا قداش أنس عندي شن تحسابيني بنزوجه عشرين مرة.
منى: الحق عشرين مانعطيكش فيها الكلمة😁 لكن اربعة مرات ايه .
أمينة: امشي انتي وياها نادي مرت عمك خلي اتجئ تساعدني شوية .

مها: عارفين عندنا مناسبة غير ادير في الجو مش برانيه باش نعزموها .
أمينة: نعرف لكن بعدين تتسبل تقول كان قولتوا راني جيت .
منى: حق هيا في البيان بتجيب مفرخها وبتقعمز تاكل
وتلبز خلي تتحل لقمتها.
مها: واك منك انتي مابعده مسكين للي بياخدك .
منى: غير ايجئ اعطيك طار تحسابي روحك بنعامله
زي مانعامل فيكم توا 😌 مسكين هذا اسمه راجلي راجلي سمعتيها ولا نعودها .
أمينة: اقلبي وجهك من قدامي خير مااتجى فيك ضربة تشوه 🤕 وجهك ومعاش ياخدك حد.
منى: هالأسمر اللون 🎶 هالأسمراني تعبان ياقلب خيو
وهواه رامني .
مها:😲 نقص يدي كان بنتك هاذي ماتتطلعش تحب .
منى:😏 ياأبو عيون اوساع حطيت بقلبي أوجاع لأعطيك سبع أرباع خيو رزقي ورأس مالي .
أمينة: شن رأس مالك إنتي غير اللسان للي ملوي برقبتك .
حاتم: اهلين ياسلطان بالله شن شعورك احكيلنا .
أنس: بفرحة المجنون بعقله مش مفرحني شئ غير اني بنتزوج بعد سنتين بس .
خالد: شن تقول ماشي لجنازة حتى لون وجهك متغير تعرف كان انا في مكانك 💃 نفوته شهر وانا نرقص من الفرحة.
أنس: والله تبي الحق ولا خاطيه وربي لو مش ع خاطر أمي مانبي نتزوج ولا نخطب .
حاتم: باهي اسمع توا انساه الموضوع وطلعه من ذماغك سنتين طوال كفيلة تغيير كل شئ.
أنس: شن قررتوا تقرؤ باش بنسجل معاكم في الجامعة
نمشوا مع بعض ونروحوا مع بعض .
خالد: ايح قصدك انت مازال تفكر في القرايا والله لو أنا
في مكانك نفوتها.

أنس:انا راجل 😎 مش مرأة باش نبطل قرايتي علي خاطر بنتزوج .
حاتم: هذا الصح ربي يسهل وخلاص .
حواء: ستين ألف حاجة ناقصة والراجل هذا حتى وجهه معاش نشوف فيه مولي زي هلال 🌙 العيد .
سارة: توا ايجئ ماعنده وين يمشي .
حواء: الكارثة الوقت ولا زي السحر الأيام بسرعة ماتجري وتفوت ومعاش مازال هلبا ع الفضانية .
سارة: مفضاك يما عاطيه الموضوع حجم أكبر من حجمه توا كيف مااتجئ اتجئ .
حواء: بري ديري حل لروحك افقصي دحية🥚 علي وجهك ملعقيه بالزبادي اهتمي بروحك بدل جاية
جنب الكوشة والصهد.
سارة: كان عاونتك واك وكان سيبتك بايرة معاش
عرفت كيف نتصرف بالزبط 🤦🏻‍♀️ لايجعبك العجب ولا الصيام في رجب .
حواء: سلم خواتي توا على جيه وانتي غير صيمي رمضام مافيش حد لايم عليك 🤣.
ساره: كل لحظة تمر عليا نراجع في شريط الماضي للي فاتت تجهيزات الخطوبة والعرس كيف الكل فرحانيين
من يقول هكي بيصير فيا .
يارب 🤲🏻 النار للي في قلبي مايعلم بيها حد غيرك هون
عليا حياتي مش قادرة نحس فيه في كل تفاصيل يوم
معقولة بعد السنين هاذي كلها مش قادرة ننساه من يقول بنحبك ياأنس الحب هذا كله .
خلي نرجع بيكم لسنين فات ونخليكم تعيشوا تفاصيلها
معايا في الزاويا خبايا كيف مايقولو.
مرت الأيام بسرعة درت الفضانية ودرت تلبيسة وكله
كان كامل مكمل كنت لما نفكر في أنس مش حاسة في الرضى نحس بيه بيبي مش هذا الراجل للي نبيه.
بعد شهرين من الخطوبة.
محمود:اسمع ياولدي لأنك محترم ونعرف بوك ومتأكد من تربيتك مش رح نمنعك اتجئ وتشوف خطيبتك وتتعرف عليها هذا حقك .

أنس: لا . ياعمي محمود للي مانرضاش للي خواتي مانرضاشي لمرتي اليوم نمشي ونجئ عليك لو غدوا نموت اول واحد بيفكر يرتبط بيها يقوله خطيبها كان ديما عندها يبطل انا في كل مناسبة توصلها حاجتها
لكن لا انجئ ولا شئ يوم نروح بيها لحوشي توا نعرفها .
محمود: فعلا الراجل عمره ماينقاس بالعمر بالعقل كبرت
في عيني وبعد كلامك هذا عرفت اني اخترت الصح لبنتي .
أنس: توا السلام عليكم ياعمي .
محمود: وعليكم السلام نقول في خاطري الحمدلله للي
ماخديتش كلام حواء لما تقولي لا. مانبيش نعطيه بنتي
شن يعرف من الدنيا مرات صغير العمر يعلمك درس كبير في الحياة .
منى: اسمعي يامها خو صاحبتي يبني وقالي كلمي اهلك
ونحددو يوم بنجئ نخطب .
مها:😱 حي عليككيف بتفتحي الموضوع مع أمك شن بتقوليلها انا مدايرة علاقة .
منى: لا. علاقة لا شلاكه بنقولها صاحبتي فتحت معاي الموضوع وخلاص .
مها: وين تشوفي فيه ياخاينة وأنا أخر من يعلم عليك عقرب انتى للي يقدرك ايجئ يحاسبني انا .
منى: بلا جو زايد ونظام أفلام زي ألوان تحسابي روحك الرقم للي حاطته في قائمة الحضر في هاتفك مش مورقتله باش لما يتصل مايدرش صوت .
ههههه بالله تذكروا فيها أيام الهاتف البيلة والحضر متعه
كيف 🤣.
أمينة: خيركم صوتك واصل لعند برا شن فيكم زي ناقر ونقير .
مها: الحمدلله مش كنتى تبي أمي اهيا جاتك بروحها لعندك احكيلها.
منى: ضمي فمك علاش تكذبي ياحيوانة ماقلتش نبي امي بكل .
أمينة: شن فيك ياشيخة منى وجهك أصفر أكيد مدايرة عملة واظحة .
مها: بنتك جايها واحد ويبي يتقدم ومش عارفة كيف تقولها .
أمينة : وين لقيته ياحنا اعطيني العلم من توا باش مانقعدش زي الأطرش في الزفه .
منى: وين بنلقاه اخ خولة صاحبتي وانا من عندي خاطيها هيا .
أمينة: ايه قوليلي هكي توا نفهم وين ماشية نقرأ مع خولة منين جاية من خولة وانا زي الدرويشة فايت عليا
الخبر هذا كله .
مها: 🤣🤣🤣 المهم توا امتا ايجئ يما خلي تقلب وجها ونفتكوا منها .
أمينة: انتي غير اقعدي احسبي للي يتزوجوا 😏 امتا تتلحلحي وتجيبي واحد .
مها: اسمعي انا فوتيني هاذي اخر سنة وبعدها بندور محامي كويس ندرب عنده .
أمينة: توا تتزوجك المحاماة وتجيبلك صغار حطي عقلك في رأسك سلم بنتي العمر يجري راهو وانا
نبي نطمن عليكم من توا .
منى: المهم وين هاتفك خلي نكلم خولة ونقولها تعالوا
غدوا .
مها: وعلاش .لا مستعجلة عاد 😏 اثقلي شوية العقل زينة راهو.
أمينة: قصدها تكلم صدام غير ماعرفتش تقولها تفوت فيه علينا .
منى: مزلت ماشبعتش منه 💔 علاش هكي صار كيف هنت عليه نبي نفهم قوليله ياخولة مش وعدني مستحيل يبعد مش يقولي انا ضلعك الثابت وينه .
من يقول انا للي كنت حياتي كلها ضحك ولعب هكي تتغير .
الحياة مدرسة كل يوم تتعلم فيها درس جديد وكل ماتقول خلاص تعلمت ايجيك اختبار منها 👌 يفهمك
انك مازال ماتعرف شئ .

علي: شن ناوي ادير ياولدي بتقرأ وبعدها شن .
أنس: حصلت ورشة تصليح سيارات صاحبها قلي تخدم شهرين بلا مرتب نروح من الجامعة يابوي نمشيله.
علي : لكن هذا استغلال فوته ماتخدمش معاه .
أنس: مش مهم يابوي فلوس شهرين مستحيل يغنوني
لكن نكسب صنعة في ايديا ونتعلم منه أصول الخدمة .
علي: في هاذي غلبتني عندك حق ربي يعاونك توكل على الله.
أنس: طلعت ومشيت لحاتم وخالد قلت خلي نقولهم يمشوا يتعلموا معاي بدل مايمد ايديهم لأهلهم .
اسمعو محصل ورشة بنخدم فيها تعالوا تعلموا معاي
تكسبوا صنعة في ايديكم ترصفوا منها .
حاتم: والله رأي انا جاي معاك .
خالد : شن متوقعين بنقعد انا مانمشيش معاكم.
أنس: خلاص معناها توكلنا على الله نقول ثلاثة انفار .
منى: اسمع حبيبي امي قتلك حتى غدوا تفضل عادي .
صدام: تمام خلاص غدوا بعد العصر جاي انا وأمي وصاحبتك .
منى:لالا . راك اتجئ حطهم واطلع مازال انت مش توا.
صدام: حي طلعتي على الوجه الحقيقي من توا كنستيني طول .
منى: بما انك مجنون ومافيش كيف نتفاهم معاك وامببي بعدين نحكو خير مااتجئ امي وتسمعني وتفتحلي قضية لوكربي .
سارة: بديت السنة الجديدة وانا نستنى فيه بالك ايجني
لكن لاحياة لمن تنادي بنات خالاتي كل وحدة فرحانة بي هدية حبيبها إلا انا .
وسن: وين خطيبك كيف ماجاكش معقولة من توا إهمال منا بعدين شن بيصير فيك .
حواء: اسكتي انت يامطيورة خليك محضر خير وانت فالحة غير تولعي في النار .
خالد: وين ماشي يامعلم ولا فرحان بأول معاش ليك .
محمد: تصرفهم فلي ينفعك ياولدي والله ماشاء الله عليك شهرين ثانيات وتولي اسطى تصليح سيارات بروحك معاش تحتاج تخدم عند حد .
أنس: بارك الله فيك ياعمي محمد الفضل كله يرجعلك انت للي علمتني ووسعت بالك معاي .
محمد: ماهو حتى انت شاطر وبسرعة تفهمها وهيا طايرة مش زي صاحبك نعاود ونحرث قريب يطلع الشعر على لساني .
أنس: توا اعطيني الإذن ياعمي محمد بنمشي عندي مشوار.
طلعت وقفت تاكسي 🚕 .
الراجل: وين تبي ياولدي .
أنس: شارع الذهب ياعمي ترفعني .
الراجل: اركب ان شاء الله غير ماتتطلعش خانب بس ونحصل في جرتك .
أنس: ربي يسامحك ياعمي توا أنا شكلي شكل خانب بالله عليك .
الراجل: ماهو لانك صغير هذا للي مخوفني .
أنس: وصلت المكان للي نبيه نزل معاي الراجل خشيت المحل خديت خاتم ذهب ايام بالله كان الذهب بلاش فلوس مش زي توا .

وطلعت ركبت التاكسي وقتله يوصلني للحوش🏡.
الراجل: سامحني ياولدي وماتزعلش من عمك التاكسي هذا يما فاتوا عليه من قصص يشيب منها عقل الرضيع .
أنس: لالا. مش مضايق هذا باب رزقك عندك الحق وهدوما حقاتك ياعمي سلام.
مها: اهلين شن جايب معاك .
أنس: جايب خاتم نبيكم تمشوا ترفعوه لي ساره اليوم خلصت أول معاش .
منى: مفلحك صحة ليها ضربة خاتم ذهب مقوم ريته حظي زيها .
أمينة: سلم ولدي يعرف ايجيب الحاجة للي عليها القيمة مش زي بوك بسلامته يعرف يشريلي غير في
الردوات يحسابني عجوز مكملة عمرها .
علي : عارفه انا والله مايتمر فيك الذهب للي عندك انت ماعند حد .
أمينة : سلم ذراعي نربي في الخرفان كل عيد ونبيع ونشري ماتحساباش عليا .
أنس: خاش ندوش وطالع باش نوصلك لحوش عمي محمود .
أمينة: خلاص خلي نمشي نغير .
سارة: كلهم يشوفولي نضارتهم تقول مسكينة هذا أنس للي حباته هكي نهاية حبهم كيف بندافع على روحي ونقولهم انا مسيرة مش مخيرة مجبورة .

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية غيبوبة القدر)