رواية موضوع عائلي 3 (بيت الهنا) الفصل الحادي عشر 11 بقلم رحاب القاضي
رواية موضوع عائلي 3 (بيت الهنا) الفصل الحادي عشر 11 بقلم رحاب القاضي
رواية موضوع عائلي 3 (بيت الهنا) البارت الحادي عشر
رواية موضوع عائلي 3 (بيت الهنا) الجزء الحادي عشر
رواية موضوع عائلي 3 (بيت الهنا) الحلقة الحادية عشر
ـــــــــــــــــــــــــــــــ
“كل شئ قابل للتغير… حتي يوسف الصاوي” 🙈
ــــــــــــــــــــــــــــ
_في مكان شغل رضوي يوسف كانو قاعدين مع بعض ومعاهم محمود واسلام ونورا وميلاد في وقت البريك ومحمود قال..
محمود
يعني انت كده ناوي ما تتجوزش يا ميلاد ولا حكايتك ايه؟..
ميلاد
لا طبعا مش معني اني مش بعرف اتعامل مع بنات ولا الجو ده اني مش هتجوز بالعكس انا اختارت الطريق الصح..
رضوي بفضول
اللي هو ايه بقي؟..
ميلاد
انا روحت لابونا الكنيسه وقولتله يدلني بقي علي بنت محترمه وبنت ناس وهو فعلا جابلي بنت زي القمر يا جماعه ومن عيله كويسه جدا..
يوسف
طيب حلو اهوو يعني انت خاطب كده؟..
ميلاد بتوتر واحراج
لا ما هو للأسف انا لما قابلتها وقعدنا نتكلم ما كملتش خمس دقايق وقامت وقالت عليا قفل..
_ضحكو كلهم معادا رضوي اللي كتمت ضحكتها عشان ما تحرجوش وهو قال بحزن..
ميلاد
بس اهو يعني مستني الاقي غيرها..
اسلام
ما انا بقولك ادردح شويه بدل ما انت فعلا قفل كده..
رضوي
علي فكره هو كده زي الفل مش لازم يعني يبقي فلاتي وبتاع بنات عشان يعجب، بالعكس ده ابن ناس واهله عرفو يربوه..
يوسف بغيظ
امم ده انا بيتلقح عليا بقي..
ضحكو كلهم ورضوي قالت بضحكه هاديه
طيب والله ما كنت اقصدك بس اللي علي راسه بطحه بقي..
نورا
عارفين يا جماعه احلي حاجه اننا بقينا تيم حلو مع بعض انا بقيت حابه الشغل اكتر..
محمود
حصل والله كفايه التفاهم اللي بينا.هيخلينا مميزين.
رضوي
هنبقي تيم حلو ومميز لما ننجح في المشروع ونعمله بطريقه مختلفه..
وقامت وقالت
البريك خلص يلا بينا علي شغلنا ميلاد انت ومحمود تخلصو التصميم اللي معاكم عايزااه مظبوط، نورا ويوسف واسلام هنتابع مع بعض المشروع من فوق احنا في اسبوع خلصنا تصميم الدور الاول وده انجاز حلو اوووي…
ميلاد بسخريه
انجاز هيجيب اجلنا لحد ما المشروع يخلص ده احنا بنيجي هنا الساعه 10 الصبح وبنمشي 9 بالليل يعني 11 ساعه واقف علي رجلي وارجع البيت اشتغل تاني..
رضوي
علي قد ما هتتعب وتجتهد هتلاقي النتيجه، واحنا اهو بنتعب وبنلاقي نتيجه مبهره، بلاش بقي نتبع سكة الفشل ونقف..
اسلام
طيب انا هراجع التصميم بتاعي انا ونورا وجايين..
يوسف
تمام اجتهدو بقي عشان هو تصميم واحد اللي هنشتغل عليه وهنشوف مين فيكم الافضل ميلاد ومحمود ولا اسلام ونورا…
ميلام بحماس
احنا قدها وهنطلع بتصميم للدور التاني جبار..
_ابتسمت رضوي ومشيت ناحية المبني اللي شغالين فيه العمال، وراح وراها يوسف وقال..
يوسف
انا همشي بدري النهارده…
رضوي
مش هينفع وكمان انا عايزااك تشارك معاهم في رسم التصميم بس لوحدك لانك يعتبر دراسياً اقل منهم وانا عايزااك توصلهم وتعديهم كمان..
يوسف ابتسم وقال
علي فكره انا كنت بتدرب مع يزن واعرف اعمل التصميم واقدر اتخرج كمان السنه دي لو عايز بس انا مش عايز، المهم انتي ليه بقي مهتمه اووي كده؟..
رضوي بحده
عشان انت متنيل معايا في المشروع ويعتبر هنتزفت نعمله سوا…
يوسف
طيب وطي صوتك انا قدامك وسامعك ونيلت وزفت وايه الالفااظ دي، وانا همشي بدري النهارده برضو عندي موضوع شخصي مهم..
رضوي
وانا قولت لا الشغل اهم، وبعدين ايه الموضوع الشخصي ده تلاقيك شاقط واحده وطالع تتسلي..
يوسف
طيب والله ظلماااني ده انا رايح البيت عشان شكلها كده خطوبتي هتتفسخ النهارده..
رضوي بجديه
انت بتهزر ولا بتتكلم جد؟..
يوسف
والله بتكلم جد انا خطيبتي دي بنت عمي، وبينا مشاكل انا وهي وعمي جاي النهارده بقي عشان نشوف هنرسي علي ايه…
رضوي
علي فكره هي اصلا مش شبهك بنت شكلها غلباانه اووي، ده ربنا بيحبها انها هتسيبك شوفت صورتها معاك علي الانستجرام قبل كده..
يوسف بضيق
المشكله اني انا اللي هسيبها وانا عارف انها بتحبني ومتعلقه بيا اووي…
رضوي بفضول
انت هتسيبها ليه طيب مدام هي بتحبك اووي كده؟..
يوسف بتنهيده طويله
عشان ما اظلمهاش مش عايزها تتوجع اكتر من كده بسببي وانا مش هقدر اسعدها…
رضوي بحده
ده عشان انت مش راجل، الراجل اللي بجد يوفي بوعده وخصوصا قبل لما يخلي حد يحبه ويتعلق بيه..
يوسف بغيظ
انا هسيبها يا رضوي لاني اكتشفت اني بحب بجد، لا ده انا عشقت كمان مش هينفع بقي اتجوزها وانا بعشق واحده غيرها..
مسكت رضوي طوبه من الارض وقالت
غور مني وشي ما هو ده انقح يا خاااين..
ضحك يوسف وقالها
يا حجه اهدي هي كانت بنت اختك عشان تزعلي عليها كده، وبالمناسبه انا بكره كمان همشي بدري لان عيد ميلاد مرات اخويا وفي حفله عائليه ولازم اكون معاهم..
رضوي بجمود
روح اعمل اللي قولتلك عليه يا بشمهندس وما تدخلنيش في مشاكلك ولا حياتك الشخصيه تاني..
مشيت رضوي وهو قال بخبث
ده انتي هتبقي اهم حاجه في حياتي الشخصيه يا رضوي بس الصبر…
ــــــــــ #بقلم_الكاتبه_رحاب_القاضي ــــــــ
_وفي كافي راقي جدا في النادي اللي بتقعد فيه شهد ديما، بس المره دي كانت قاعده هي وفيروز وقدامهم جميله وهاجر..
جميله
بجد يعني انتي ممكن تخليني اكلم جوزك عدي ويعملي تصميمات خاصه وكده..
هاجر
اقل حاجه يا بنتي..
شهد
علي فكره بقي حامد الصاوي ابنها تصميماته احلي بكتير من عدي ده انا هتشل واخليه يجي يشتغل معايا ومش راضي…
هاجر
لانه بيحب يشتغل لوحده..
جميله
قوليلي يا فيروز هو عز ما فتحش معاكي موضوع انه يرجعلك؟..
فيروز بحده
طيب اقسم بالله لو فتح الموضوع ده لافتح دماغه، انا ارجعله بعد اللي عملو فيا بتحلمي يا جميله..
جميله بسخريه
انتي مكبره الموضوع ما عندنا شهد اهي بقالها 20 سنه متحمله راجل انيل من عزالدين..
اتملت عيون شهد دموع وفيروز قالت لجميله
هو انتي عمرك ما هتبطلي الدبش بتاعك ده..
جميله
ما هي بصراحه اوفر الواحده تتحمل سنه اتنين تلاته مش عشرين سنه، ومتحمله ايه خياانه ده انا لو عمار عينه جات علي واحده بالغلط بيبقي يومه اسود..
هاجر بحزن
عشان بتحبه ولسه بتحبه اصلا ما اعرفش هي حبته في الاول علي ايه، ده كان بيحب غيرها وعمل معاها اكتر من موقف ندل في بداية جوازهم، وهي سامحته وكملت معاه انتي عودتيه علي كده يا شهد انه يغلط وانتي تسامحيه فاستسهل وجعك..
_كانت شهد بتسمع كلامهم ودموعها نزلت علي وشها بحزن كبير، وفي الوقت ده جات يارا وقالت..
يارا
مامي كنت عايزه اا.. ايه ده انتي بتعيطي ليه؟..
_مسحت شهد دموعها بسرعه وقالت بابتسامه واسعه وقلق..
شهد
لا يا حبيبتي انا ما بعيطش انا كويسه، بس بنفتكر ذكرياتنا وكده..
جميله
ايه البنوته الحلوه دي يا شهد ما قولتليش ان بنتك اموره اووي كده..
يارا بهدوء
ميرسي يا طنط..
جميله بغيظ
مين اللي طنط يا روح امك..
ضحكو كلهم وشهد قالت
جميله في ايه الا بنتي يا حبيبتي، وااه طنط تقولك ايه يعني..
جميله بثقه
تقولي يا جميله ده الفرق بينا مش كبير يعني..
شهد بخبث
دي في سن بنتك علي فكره..
فيروز
ولادها مش بيقولولها غير يا جميله محرماهم يقولو كلمة ماما عشان ما تباانش كبيره..
جميله
ما هما اللي كبرو بسرعه وكبروني معاهم..
شهد
سببك منها يا يارا، قوليلي يا حبيبتي مروحه ولا هتقعدي معايا؟..
يارا
لا مش مروحه بس كنت عايزه اروح عند طنط فيروز اجيب شوية حاجات انا وصحابي..
ابتسمت فيروز وقالتلها
تمام يا حبيبتي تنوري، زين ابني هناك حالياً هكلمه اخليه يستناكي..
شهد بضيق
لا يا فيروز هي هتروح عشان عندها مذاكره..
فيروز
المذاكره مش هتطير يا شهد خليها تروح ده في حاجات حلوه هناك هتعجبها اووي..
يارا
بليييز يا مامي عشان خاطري..
شهد بجمود
طيب ما تتأخريش قبل ما ارجع البيت تكوني روحتي..
يارا
اوكي حاضر باااي….
مشيت يارا وقالت جميله بسخريه
منحنحه اووي بنتك دي يا شهد..
هاجر
لا عندك الا خطيبة ابني دي البنت زي القمر واحلي بنات العيله كلها..
فيروز بعدم فهم
خطيبة ابنك ازاي يعني؟..
اتنهدت شهد بضيق وهاجر قالت بحمااس
اقولك يا ستي لما اتولدت يارا كان حامد ابني عنده 14 سنه ويونس ومحمد قرو فاتحتهم حركه قديمه شويه بس حامد خلاص قال هي يارا اللي هيتجوزها ولحد النهارده موقف حياته كلها لحد بنت شهد ما تكبر وتبقي في السن القانوني وهيتجوزها علي طول..
بصت فيروز لشهد اللي قالت بضيق
لسه بدري يعني علي الكلام ده، البنت صغيره يا هاجر بعدين بقي نشوف الموضوع ده..
جميله
المهم انتي عايزه تنتقمي من يونس تحرقي دمه كده وتعصبيه؟..
شهد
ايوه ياااريت..
جميله
بصي انا لما عمار بيعصبني بعمل ايه بنزل اشتري حاجات كتير واهتم بنفسي بزياده واصرف كتير عليا وعلي ولادي وطبعا هو هيكلمك يعرف انتي فين وبتصرفي الفلوس دي كلها فين اوعي بقي تردي عليه وارجعي البيت متأخر وانتي متشيكه علي الاخر وخليكي بنفس التجاهل معاه هتلاقيه ولع كده وبقي ياكل في نفسه..
سقفت فيروز وقالت
برافو بجد برافو جميله بقيت نسخه مصغره من عمار المنشاوي نفس التفكير الخبيث..
هاجر بخبث
لا وكمان شهد هتدفع الحساب في كل حاجه هنعملها النهارده..
شهد بهدوء
موافقه يلاا بينا…
ــــــــــ #بقلم_الكاتبه_رحاب_القاضي ــــــــ
_وفي بيت الاستاذ حسن رجع طارق من شغله وكانت ليلي قاعده بتتفرج علي التلفزيون، راح قعد. جتبيها وهي قالتله..
ليلي
حمدلله علي سلامتك يا حبيبي، يومك كان حلو النهارده..
طارق
الحمد لله يا ماما، بس انا جعان هدخل اخد. شاور لحد. ما تجهزيلي اي حاجه اكلها…
ليلي بتوتر
اا حاضر يا حبيبي حاضر..
طارق
هو ايه الصوت اللي جاي من المطبخ ده، اوعي تقوليلي ان روان عقلت وبقيت تطبخ؟..
ليلي
لا مش روان اللي بتطبخ..
طارق
اومال مين احنا جيبنا شغاله جديده ولا ايه؟..
طلع حسن من المطبخ وهو ماسك المعلقه في ايده وقال
شغاله في عينك يا ولد ده انا بساعد ليلي عشان ما تتعبش وهي في بداية الحمل..
طارق بغيظ
اااه بداية الحمل، هو انت بتعرف تطبخ يا بابا؟..
حسن
لا بس بتعلم اهووو..
ليلي بأحراج
يا حسن قولتلك خلاص مش حكايه يعني هقوم انا اعمل الاكل عادي..
حسن
لا يا حبيبتي انتي هتقعدي مرتاحه الكام شهر دول لحد ما تولدي، وبقولك ايه يا طارق ابقي افضي علي بكره كده عشان تاخد مامتك توديها لدكتور النسا اللي هتتابع عنده حالة اخوك او اختك او الاتنين ما احنا متعودين علي التوأم بقي..
ليلي بكسوف
يا حسن ما يصحش كده…
طارق بغيظ
اقسم بالله انا ما اسهل عليا اني اروح اخد. شنطتي وامشي تاني عادي واخلص من المحن ده..
حسن بحده
انت بتهددنا يالااا ما تغور تمشي هو حد. ماسكك..
طارق بخبث
طيب مااشي بس لما امشي بقي ما تجيش ورايا المطار وتقولي ارجع ماليش غيرك..
اتوتر حسن وليلي قالت بعدم تصديق
انت بتتكلم بجد يا طارق حسن راحلك المطار وخلاك ترجع..
حسن بتوتر
لا بيهزر يعني هو انا كنت هتحايل عليه، اا انا هدخل اشهق للملوخيه ما تتخضوش من الصوت اللي هتسمعوه..
ضحكو هما الاتنين وحسن دخل المطبخ وليلي قالت بفضول
هو حسن راح وراك المطار وقالك ما تسافرش..
قعد طارق جنبيها وقال
اه والله وقال كلام كتير حلو انا اول مره اسمعه منه، او بمعني اصح انا عمري ما كنت اتخيل ان بابا بيحبني اووي كده وشايفني بالصوره اللي وضحهالي دي..
ليلي
والله يا طارق انت كنت ظالمه ابوك ما فيش اطيب من قلبه ولا في حد في الدنيا بيحبك انت واخواتك قده..
طارق
معاكي حق يا ماما، المهم انا قررت ابيع الكافي وارجع الفلوس اللي كنت مستلفها منكم كنت ناوي اخلي عمي عز هو اللي يعمل كده لما اسافر، بس مدام ما فيهاش سفر هبقي اظبط انا الموضوع ده..
ليلي
طيب ليه تبيعه ما تخليه وتشتغل فيه زي ما كان نفسك..
طارق بجمود
كان حلم كنت بحلمه مع اللي كنت فاكرهم صحابي كل التفاصيل اللي هناك عملناها سوا كان حلم بحلمه معاهم هو، نفسياً مش هعرف اكمل فيه لوحدي…
ليلي
طيب انا عندي حل مش انت بتحب الرسم وكنت واخد دورات كتير قبل كده وشاركت في كذا مسابقه ما تخلي الكافي مرسم؟..
طارق بسخريه
ادخلي كده قولي الكلام ده قدام بابا هيولع فيكي وفيا، انتي ناسيه لما عرف اني كنت برسم من ورااه كسرلي كل حاجه وحتي خلاني ادخل كليه مش بحبها رغم اني كنت عايز ادخل فنون جميله، وخلاني كمان احضر الدكتورااه وابقي دكتور جامعي وانا مش بحب التدريس اصلا، ناقص كمان يجوزني علي مزاجه..
ليلي بحزن
هو كان شايف انك تشتغل شغلانه محترمه تنفعك في المستقبل مش قصده يحرمك من حاجه بتحبها، هو ايوه طريقته كانت غلط معاك بس كان ومازال عايزك احسن واحد في الدنيا، والدليل انك لما قولتله علي فكرة الكافي اول واحد طلعلك فلوس وساعدك هو..
قبل ما يرد عليها طلعت روفان من اوضتها وقالت
ماما خدي موبيلك انا خلصت كلام مع صحبتي..
ليلي
ومالك مدايقه كده ليه؟..
روفان بحزن
عشان لما قولتلها انك هتجيبي نونو جديد مامتها فضلت تضحك وقالت هي مامتك فاكره نفسها نوغه قال بعد ما شااب ودوه الكتاب..
ليلي بحزن
عيب يا روفان ما تقوليش كده تاني مش اي حاجه نسمعها نقولها..
طارق بغيظ
بس دي ست مش محترمه ما تكلميش بنتها تاني يا روفان..
ليلي بضيق
معاها حق هي في واحده تحمل في سني اصلا..
طارق بجمود
لا عيب ولا حرام يا ماما عادي، وربنا يقومك بالسلامه وايه رئيك بقي ان طول فترة الحمل ما حدش هيروح معاكي للدكتور غيري انا..
ابتسمت ليلي وقالت
ربنا يخليك ليا يا حبيب ماما..
الباب خبط في الوقت ده وحسن قال من جوه
طارق قوم افتح اوعي تخلي ليلي تتحرك ولا تقوم..
طارق بغيظ
والنبي يا ماما خليه يسكت ويبطل الطريقه بتاعته دي…
ليلي وهي بتضحك
حاضر روح افتح بس الباب…
_قام طارق وفتح الباب وكانت هنا اللي واقفه بتخبط، ابتسم بهدوء وقال بصوت واطي..
طارق
ايه جايه تتأكدي اني ما سافرتش ده انا بقالي اسبوع اهو من اليوم اللي كنت مسافر فيه مستنيكي تيجي تقوليلي الحمد لله انك ما سافرتش..
هنا
انت بتقول ايه يا عم انت، انا بابا قالي ان ابوك وامك عايزني فطلعت..
طارق
ابوك وامك؟! في الرقه وتقولي باباك ومامتك يا هنون..
هنا بجمود
اسمي هنا وابقي رقيقه معاك ليه يعني، وهتخليني ادخل ولا انزل..
جات روفان وقالت
هنا تعالي انا كنت هنزل انا وروز نقعد معاكي اصلا..
وقالت لطارق
بص يا طارق عينيها حلوه ازاي انا عايزه اخلي لون عينيا زيها..
طارق
ادخلي جوه يا بت وانتي اتفضلي ماما وبابا جوه اهم..
دخلت هنا وهو قفل الباب وقال بصوت واطي
علي فكره البت روفان دي عينها وحشه بتحسد اي حاجه حلوه وخصوصا لو حاجه حلوه اووي زي عيونك كده فخافي عليهم..
هنا بعدم فهم لمقصده
لا عادي هي ما تقصدش وو..
بصتله بحده وقالت
انت بتعاكسني يالااااا..
طارق بسرعه
يخربيتك اسكتي حد يقول كده..
_وسابها ودخل جوه وقعد مع مامته وكله فضول يعرف اهله عايزين هنا في ايه، ودخلت هي كمان دخلت ورااه وقالت ليلي لما شافتها..
ليلي
اهلا اهلا تعالي يا حبيبتي عامله ايه؟..
سلمت عليها هنا وقالت بهدوء
الحمد لله كويسه، والف سلامه علي حضرتك يارب تكوني احسن دلوقتي..
ليلي
كويسه الحمد لله يا حبيبتي، يا حسن تعالي هنا بنت عم سيد جات اهي..
طلع حسن من المطبخ وقال
كويس انك. جيتي يا هنا، بقولك ايه يا طارق ادخل اقف قدام الرز لحد ما يستوي..
طارق بغيظ
ما بعرفش انا بيستوي ازاي الرز يا بابا..
حسن بسخريه
هو انت عارف حاجه اصلا انت بتاكل وبس..
طارق
طار البرستيج يا بابا خلاص اقعد بقي يا حبيبي…
قعد حسن جنب ليلي وقدامهم هنا وقال بهدوء
قوليلي مزعله ابوكي منك ليه؟..
هنا بعدم فهم
انا مزعله بابا ما حصلش والله..
ليلي
ما تقلقيش يا حبيبتي بس عمك حسن امبارح كان قااعد مع باباكي وهو قاله انه مدايق بسبب انك مش راضيه تدخلي الامتحانات السنه دي خالص..
هنا بضيق
عادي يعني حاسه اني السنه دي مش مذاكره كويس فالسنه الجايه هحول هنا واذاكر وامتحن..
حسن
بصي اتكلمي بصراحه وانا اوعدك ان لو اقتنعت هخلي ابوكي يوافق، انتي مش عايزه تروحي لخالتك ليه؟..
تلقائياً بصت هي وطارق لبعض وهنا اتوترت وقالت
لا هو انا مش فكرة اني مش عايزه اروح هناك بس يعني..
ليلي
بس ايه هي خالتك مش بتعاملك كويس حد هناك بيدايقك في حاجه؟..
هنا بدموع
لا خلاص انا هروح عندهم واقضي فترة الامتحانات هناك..
طارق بحده
تروحي فين مش هينفع طبعا؟..
بصولو حسن وليلي بعدم فهم وهو قال بسرعه
قصدي يعني هي بتقول مش مذاكره ازاي يعني هتروح وتمتحن..
حسن
انتي جاهزه يا هنا تمتحني؟..
هنا بحزن
ايوه وان شاء الله قبل الامتحانات باسبوع هروح البلد..
ليلي
علي خير ان شاء الله وابوكي اول ما تخلصي امتحانات هياخدك ويجيبك تقعدي معاه هنا علي طول وتدخلي الجامعه هنا ومش هيسيبك خالص..
هنا بدموع
حاضر انا هنزل بقي بعد اذنكم..
ليلي
ما تخليكي طيب نتغدا سوا كلنا..
هنا
معلش بس عشان بابا مستنيني، بعد اذنكم..
_طلعت هنا من عندهم وطارق راح وراها من غير ما ليلي وحسن اللي بيتكلمو مع بعض ياخدو بالهم، واول ما طلع لقي هند بنت خالته في وشه..
هند
طارق كويس اني شوفتك مبروك علي حمل طنط..
طارق
الله يبارك فيكي وعقبالك، عديني كده عشان مش فاضيلك..
_وسابها ونزل بسرعه ورا هنا اللي كانت لسه هتدخل الشقه بتاعت باباها، فمسك ايدها بسرعه وقال بغضب..
طارق
انتي ازاي هتروحي هناك بعد اللي حكيتهولي؟…
هنا بقلق
سيب ايدي يا طارق..
ساب ايدها وقال بضيق
ما ينفعش تروحي هناك يا هنا..
هنا بدموع
طيب يعني اعمل ايه، مش هينفع اقول لبابا علي اللي كان بيعمله جوز خالتي فيا، ومش هقدر ارفض عشان هيزعل متي فهروح وخلاص وهحاول اتجنب الزفت اللي هناك ده خالص..
طارق بحده
لا مش هتروحي عندهم، انا هشوف حل انتي هتدخلي الامتحانات ومش هتقعدي عند خالتك انا هبقي اوديكي واجيبك..
هنا
هي بلدنا دي في الشارع اللي ورانا دي في الشرقيه، يعني تلات سعات موصلات وكمان ساعه عشان نروح من الشرقيه نفسها لبلدنا…
طارق
مش مهم انا هبقي اخد اجازه من شغلي وانتي وشطارتك بقي تحاولي تظبطي وقتك في المذاكره بحيث ما نتأثرش بالوقت اللي هيضيع في الموصلات..
هنا
وانت عليك ايه في كل ده ما اروح هناك وخلاص..
طارق بجمود
مستحيل يعني ازاي تبقي هناك بعد اللي عرفته منك ده، مش هكون مرتاح خالص وانتي هناك وقبل ما تفهمي اي حاجه غلط انا لو واحده من اخواتي البنات مكانك كنت هعمل كده وابوكي انا بحبه اووي وبحترمه جدا وبعتبره صاحبي وابويا التاني اللي من طفولتي بحكيله كل حاجه فبنته هتبقي اختي هي كمان او مش اختي اووي يعني بس انا مش هسيبك في المشكله لوحدك وهساعدك في كل حاجه برضاكي او غصب عنك..
ابتسمت هنا وقالت
حاضر وشكراً يا طارق، هدخل انا بقي..
طارق
ماشي وما تقوليش لعم سيد حاجه انا هبقي اكلمه..
هنا
حاضر..
_دخلت هنا جوه وهو ابتسم بهدوء وجه يطلع شقتهم لقي روان نازله من فوق…
طارق
رايحه فين انتي كمان؟..
روان بخبث
مالها هنا هااا؟..
طارق
مالكيش دعوه، رايحه فين؟..
روان
عبدالله جابلي مهندسة ديكور هتظبط الشقه بتاعتنا وكده فرايحه اقابلها ونظبط الحاجات المهمه بسرعه فاضل اسبوع واحد علي الفرح، وبعدين عبدالله جاي كمان شويه هنشوف الاوتيل اللي هنعمل فيه الفرح وكمان دعوات الفرح والحاجات دي..
طارق بهدوء
انتي مبسوطه بعبدالله يا روان ولا لا؟..
روان
طبعا مبسوطه ده انا خلاص بقيت مرات سيادة النائب عبدالله القاضي وكمان بيجيبلي كل حاجه نفسي فيها ده حتي جاب الشبكه بتاعتي الماظ وقريب اووي هخليه يسيب بلده وكل حاجه ويبقي معايا هنا وعلي مزاجي..
ضحك طارق وقال بسخريه
ههههههههه بتحلمي يا روان لو فاكره انك ممكن تمشي كلامك علي عبدالله، وبعدين عبدالله فيه مميزات كتيره غير انه سيادة النائب او انه غني بلاش تحبيه علي المظاهر..
روان
بطل كلام الافلام ده ويلا بااي…
_قالت كلامها ومشيت وطلع طارق هو كمان فوق..
ــــــــــ #بقلم_الكاتبه_رحاب_القاضي ــــــــ
_وفي الاتيليه بتاع فيروز كان قااعد هناك زين علي المكتب لتاع مامته وهو بيذاكر في كتبه الدراسيه، وقعدت قدامه يارا وقالت بتوتر..
يارا
عامل ايه يا زين؟..
رفع عيونه بهدوء عن كتبه وبصلها بجمود وقال
تمام الحمد لله، ماما قالتلي انك جايه، اتفضلي اختاري اللي انتي عايزااه البنات هيهتمو بيكي..
يارا بحزن
انا مش جايه اشتري حاجه، دي حجه قولتها لماما عشان اجيلك واعرف اتكلم معاك بعد ما انت عملتلي بلوك من كل حاجه ومش راضي تكلمني..
زين بسخريه
امم حجه قولتيها لمامتك.. زي برضو الحجه اللي قولتيها قدام ابن عمك وانك ما تعرفنيش….
يارا
لا والله انا قولت كده يا زين عشان اا..
زين بجمود
لو سمحتي يا يارا انا مش عايز اتكلم معاكي ممكن..
بصتله بدموع وقالت
طيب I’m sorry مش هكررها تاني، زين انا مش عارفه بجد اعمل اي حاجه في حياتي من لما بطلت تكلمني، انا خلاص همتحن قريب والله حتي مش عارفه اذاكر..
_ما ردش عليها وبص للكتب اللي قدامه وتجاهل وجودها، مسحت دموعها وقامت من غير ما تقوله ولا كلمه تانيه، وقبل ما تخرج بره الاتيليه مسك زين ايدها وقال بهدوء…
زين
ما قولتيش بقي انتي عايزه حاجه معينه ولا اجيبلك حاجه علي ذوقي..
سحبت ايدها منه وقالت بحزن طفولي
مش عايزه حاجه انا ماشيه اصلا..
زين بهدوء
لا مش هتمشي وانتي زعلانه مني، عشان مش بيهون عليا زعلك..
يارا بدموع
والله ما هان عليا زعلك بس حامد زي يزن ويوسف ونفس طريقة تفكيرهم كنت هقول ايه يعني، وبعدين عايزني اقول ايه يعني؟..
زين بهدوء وثبات
خطيبك مثلا..
يارا بتوتر وعدم تصديق
انت بتقول ايه؟..
حاول يداري دموعه وقال
بهزر انا كنت اوفر فعلا هو انتي يعني كنتي هتقوليلو ايه…
تابع كلامه بأبتسامه واسعه
بقولك في حاجات جات جديده امبارح هختارلك منهم كام حاجه كده علي ذوقي..
يارا بقلق
زين انت مش زعلان مني بجد؟..
زين
اطلاقاً يلا بقي تعالي معايا…
_وراحت معاه وبدأ هو يختارلها هدوم علي ذوقه بتصميمات حلوه جدا وكانت هي مبسوطه جدا علي عكسه هو اللي كان بيحاول يداري حزنه ووجعه من الحقيقه انه ولا اي حاجه في حياتها مجرد صديق وخايف يعلقها بيه اكتر من كده بسبب مرضه وانه ممكن في اي لحظه يختفي وما يبقاش موجود
«بلَىٰ أنَا مُشتاقٌ وعندِي لوعةٌ
ولكنَّ مـثـلِـي لا يُـذاعُ لهُ سِرُّ!»
ــــــــــ #بقلم_الكاتبه_رحاب_القاضي ــــــــ
_وفي شركة يونس الصاوي كان قااعد في اجتماع مع الموظفين بتوعه هو ويوسف، وجات رساله علي موبيله واول ما شافها ملامحه اتحولت للصدمه..
قرب منه يوسف وقال
في ايه يا يونس مالك؟..
يونس
الفيزا بتاعتي الباسورد بتاعها مع شهد بس وفجأه لقيت اتسحب منها 40الف جنيه..
يوسف
طيب ما يمكن جابت حاجه كده ولا كده..
يونس
كانت هتقولي وهي عمرها ما ضيعت مبلغ زي ده الا لو في حاجه مهمه..
يوسف
طيب خلينا في الاجتماع دلوقتي وبعدين ابقي كلمها..
_ساب يونس الموبيل وفضل مركز مع الموظفين لحد. ما جات رساله تانيه علي موبيله واول ما فتحها اتصدم بصدمه اكبر، فقرب منه يوسف وقال..
يوسف
مالك في ايه تاني؟..
يونس بعدم تصديق
اتسحب 100الف جنيه تاني..
يوسف
طيب استني الاجتماع يخلص وبعدين كلمها وشوف في ايه..
يونس بضيق
طيب..
_ساب الفون وركز في الاجتماع لحد ما جات رساله تانيه وفي المره دي بص يوسف معاه للموييل وبصو الاتنين لبعض بصدمه ويوسف قال.
يوسف
اتنين مليون اتسحبو مره واحده..
يونس بنفاذ صبر
انا هروح اكلمها ليكون الحساب بتاعي اتسرق، شهد مش بتاعت مصاريف والجو ده..
_وطلع بره وفضل يرن عليها اكتر من مره وهي مش بترد، وبعدين ردت عليه وقالت ببرود..
شهد
عايز ايه؟..
يونس بقلق
شهد انتي فين وسحبتي فلوس ولا حاجه اصل اا..
قاطعته شهد وقالت ببرود
ايوه انا بجيب شوية حاجات ويلا مش فاضيه..
_قالت كلامها وقفلت في وشه وهو بص للفون بصدمه ودخل جوه وقعد جنب يوسف اللي قاله بقلق..
يوسف
خير في ايه شهد كويسه والولاد كويسين؟..
_قبل ما يرد عليه يونس جاتله رساله ان اتسحب مبلغ كبير تاني فرمي الموبيل علي الترابيزه وقال بعصبيه..
يونس
لا بقي ده انا كده بيتي بيتخرب..
يوسف بأحراج
بقولكم ايه يا جماعه نأجل الاجتماع لوقت تاني عشان يونس بيه بس اعصابه تعبانه شويه..
قامو الموظفين طلعو بره ويوسف قاله
في ايه يا يونس مالك؟..
يونس بغضب
بت ال… قال ايه بتشتري شوية حاجات سحبت فوق ال3 مليون وتقولي مش فاضيه وتقفل في وشي.
يوسف بسخريه
معلش يا يونس اعتبر انك جيبتلها بيهم هديه تصالحها بيها او اخدتها وسافرتو بره مصر مثلا..
يونس
الموضوع مش في الفلوس، شهد طول عمرها ما بتعملش حاجه غير لما تقولي عليها واعرف بتروح فين وبتيجي منين انما اللي عملته النهارده ده اول مره يحصل من لما اتجوزنا، يا اخي ده لما اطلقنا كانت بتحترمني عن كده..
كتم يوسف ضحكته وقال
طيب الحق في رساله جاتلك علي الفون…
يونس بغيظ
وربنا ما هشوف انا ناقص حرقة دم، بس مااشي يا شهد وحياة امك مااشي..
يوسف
بقولك ايه طيب انا عايز اتكلم مع بطه ونحل المشكله اللي بينا..
يونس بحده
انسي يا حبيبي عشان انا اختي ما تضربش، وهي مش طايقه وش اهلك،يوسف بطه طلعت بتاخد منوم من فتره وانت ما تعرفش،البت بقي يجي الليل بتاخد المنوم ولو ايه حصل مش بتحس بحاجه،انت ازاي ما تعرفش حاجه زي دي وجاي عايز ترجعلها انت بتحلم..
يوسف
يونس انا ما اقدرش اعيش من غير بطه وبحاول اكلمها مش بترد عليا روحت الجامعه قالولي واخده اجازه،وترجع بس وانا هصلح كل حاجه باظت بينا….
يونس
طيب بص بكره عيد ميلاد بتك، هتيجي تتكلم معاها بس لو هي رفضت تتكلم ما اسمعش صوتك تاني في الموضوع ده واللي تطلبه تنفذه حتي لو كان الطلاق.
يوسف بضيق
طيب اسكت بفالك ده، قال طلاق قال، انا بعد العمر ده كله اطلق بطه ليه هو انا خرفت زيك..
يونس
بزياده تهزيق والنبي شهد مش متوصيه عليا..
يوسف ضحك وقال
الحق طيب في رساله جديده جاتلك..
مسك يونس الموبيل وقفله وقال
مش عايز اشوف حاجه، ماشي يا شهد بس لما اروحلك…
ــــــــــ #بقلم_الكاتبه_رحاب_القاضي ــــــــ
_وفي كوافير نسائي راقي جدا كانت قاعده شهد وجميله وفيروز وهاجر وهما بيضحكو وصوتهم جايب اخر المكان..
شهد
انا بجد. مبسوطه من كل قلبي لا وهو بيكلمني وبيقولي في فلوس اتسحبت وشكله كده كان فاكر انه اتسرق..
هاجر
بس احنا افورنا شويه يعني جيبنا مجوهرات وهدوم من اغلي الماركات وروحنا اخلي وارقي الاماكن وطلبنا حاجات سيبناها زي ما هي وحاسبنا عليها..
شهد بجمود
يستاهل واكتر من كده كمان، ممكن ما نجيبش سيرته باقي اليوم خلينا ننبسط وبس كفايه اني هروح الاقيه في البيت..
فيروز
ما تطلقي منه يا بنتي بدل الغلب ده كله..
شهد
لو علي يزن ويوسف ممكن يعرفو يتأقلمو بس يارا لا مش هترتاح لو انا ويونس اطلقنا انا عارفه بنتي..
جميله
وانتي هتفضلي لحد امتي جايه علي نفسك عشانهم، يا بنتي لما هتطبي ساكته بحسرتك من اللي بيعملو فيكي لا ولد ولا بنت هينفعوكي..
هاجر
ايوه انا اتفق جدا، احنا لازم نرتاح الاول عشان نعرف نريح ولادنا كتر التضحيه اوقات بيجي بالعكس علي ولادنا..
فيروز
كلامهم صح وتبقي ست غبيه اللي تقرر تكمل مع راجل بيدمر فيها وفي ولادها نفسيا وعقليا وفي كل حاجه وتيجي تقول في الاخر انا متحمله عشان الولاد، ولاد ايه يا ماما انتي دمرتي ولادك..
شهد
لا استنو بس في حاجه انتو فاهمينها غلط، انا ويونس طول عمرنا قدام الولاد رميو وجوليت بنتخانق من وراهم ده اللي كنت بسعي فيه ويونس كمان ما كانش بيتخانق معايا قدامهم غير لما تهب منه يعني، انا فعلا كنت بدوس علي كرامتي وعلي نفسي عشان ما يتخانقش معايا قدامهم ولاخر نفس فيا هعمل كده ولو اطلقت من يونس هطلق بعد ما الولاد يبقي لكل واحد فيهم حياته ويقدرو ينشغلو عننا وقتها هيبقي انفصالي عنه ساهل..
هاجر
تفكير غبي ما انا حامد اهو كبر لقاني انا وابوه مطلقين ومش بنتكلم غير عشان نشرشح لبعض، بس هو مكبر دماغه مننا..
شهد
ابنك غير ولادي، انا ولادي طالعين ليا حساسين وابنك كبر لقاكم كده انما ولادي انا كانو كبار وفاهمين كل حاجه وتعبو في الطلاق الاولاني اووي..
جميله بسخريه
هو مش ابنك يوسف الصاوي اللي كل يوم ليه صوره مع بنت مختلفه، وتقولي في الآخر ضحيت عشان العياال والعيال هما اللي في الاخر اللي هيضحو بيكي..
ادايقت شهد من كلامهم وقالت فيروز
خلاص بقي يا وليه منك ليها سيبوها براحتها، وبعدين احنا متجمعين نهون عليها مش نزود عليها النكد…
جميله.
اصبري كده انا ههون عليها في التمام..
ورفعت نبرة صوتها وقالت
يا جماعه انا لسه سامعه خبر حلو اووي وبالمناسبه دي حساب كل اللي موجودين هنا علي حسابي النهارده واعملو كل اللي نفسكم فيه..
بدأت الستات تشكرها وجميله قالت لشهد اللي كانت بتضحك
هتروحي تلاقيه هو اللي رافع عليكي قضية خلع..
شهد بتنهيده طويله
ده. جزء صغير من حقي عليه ولسه يا يونس..
ــــــــــ #بقلم_الكاتبه_رحاب_القاضي ــــــــ
_وفي شقة عبدالله وروان الجديده مشيت مهندسة الديكور وقفل عبدالله وراها الباب وقرب من روان اللي كانت بتلم حاجتها في شنطتها وحضنها بهدوء وقال..
عبدالله
حرفيا دي اسعد لحظات حياتي..
بعدت عنه روان بسرعه وقالت بتوتر
ااه بس وانت بعيد واحنا ايوه كتبنا الكتاب وبس ها وبسسس..
عبدالله
هو انا عملت حاجه ايه الافتري ده..
روان
امم طيب يلا بقي عشان نروح ماما كلمتني واستعجلتني..
عبدالله
حاضر بس قوليلي الاول كل اللي عايزااه تم ولا في حاجه ناقصه؟..
روان بهدوء
ايوه اختارت الفستان اللي انا عايزااه، والاوتيل بس الشقه فعادي كده كده احنا بنعملها منظر مش هنقعد هنا..
عبدالله
لا هنقعد لما هاجي اخلص شغلي هنا هجيبك معايا وهنقعد هنا اليومين دول..
روان
ايوه اليومين دول انا اكيد هقعدهم في بيت اهلي، مش هسيبهم اكيد واجي اقعد لوحدي..
عبدالله
لا مش هينفع بعد كده انا هاجي ابات هنا مش هبات عند. خالي عز وانتي هتبقي معايا نروح نقضي معاهم اليوم انما نبات هنا..
روان
برضو مش حاسه انها هتبقي بيتي اووي لاننا مش هنقعد كتير فيها..
عبدالله
طبيعي لان بيتك في البلد مش هنا..
روان بقلق
بس ممكن هو لو انا ما ارتحتش هناك يعني ممكن ارجع اقعد هنا واتعود عليها…
عبدالله بجمود
ترجعي تقعدي هنا ازاي وانا شغلي وكل حياتي في البلد..
روان
ما انا اهو بضحي وهجرب اعيش معاك هناك ولو ما ارتاحتش انت هيبقي دورك بقي تريحني..
عبدالله بجديه
راحتك هتكون معايا انا مكان ما اكون انا موجود ده اللي اقدر اوعدك بيه، انما انا عمري ما هسيب اهلي يا روان ولا البلد ولا انتي هتقعدي يوم واحد بعيد عني بعد ما نتجوز اتفقنا..
روان بضيق
طيب ممكن نروح بقي عشان ما نتأخرش…
عبدالله
انتي عايزه ايه يا روان، او ايه اللي ناويه تعمليه بعد ما نتجوز؟..
روان بضيق
مش عارفه انا داخله معاك في طريق مش عارفه اخرته ايه ولا عامل ازاي….
عبدالله بهدوء
هو طريق طويل هيبقي عمر بحاله و مش هتكوني ماشيه ولا هتتعبي هتبقي متشاله فيه علي كفوف الراحه، وانا عارف قيمتك كويس وعمري ما هخزلك فيا، اطمني يا روان..
ابتسمت بمجامله وقالتله
طيب هنمشي ولا ايه برضو…
عبدالله بضيق
اللي يريحك يلا بينا. .
ــــــــــ #بقلم_الكاتبه_رحاب_القاضي ــــــــ
_وفي بيت الاستاذ حسن دخلت عندهم رضوي من بره ولقيت باباها ومامتها واخواتها قاعدين بيتفرجو علي التلفزيون في جو عائلي حلو جداً..
قعدت جنب روان وقالت
بعيد عن السهره السعيده دي، انا روحت المستشفي لان الدكتور بتاع ماما طلبني اروحله وما رضيتش اقولكم..
بصولها كلهم بقلق وحسن قال
في ايه ويكلموكي انتي ليه، في ايه يا رضوي اتكلمي.
رضوي
اديني فرصه يا بابا اتكلم، هما كلموني لان انا اللي دفعت حساب المستشفي لما ماما كانت هناك ورقمي عندهم..
طارق
طيب في ايه ماما كويسه؟..
رضوي بابتسامه بسيطه
ايوه ماما زي الفل بس الدكتور شخص الحاله غلط وماما كان الضغط عندها واطي مش حامل ولا حاجه..
طارق بسعاده
الف حمد وشكر ليك يارب، انت كنت عالم بحالي والله..
حسن بضيق
لا لا اكيد الدكتور ده بيخرف، ليلي انتي حامل مش كده دي اعراض حمل اللي عندك صح؟..
ليلي
لا يا حسن دي مش اعراض حمل ولا حاجه، وده اللي كان مخليني مستغربه الموضوع وبعدين انت زعلان ليه من قلة العيال يعني اللي عندنا.
روان بحزن
انا كنت عايزه بيبي صغير بصراحه..
ليلي
انتي عايزه تخلصي عليا ، وبعدين انتي اهو هتتجوزي هاتيه انتي البيبي الصغير ده..
طارق بخبث
معلش يا بابا مش هتاخد زمنك ومن غيرك يعني..
حسن بحده
اخرس يا واد انت احسنلك انا علي اخري منك..
وبص لروان وقال بجمود
خطيبك كان قاعد مدايق ليه، وانتي قالبه خلقتك عليه طول ما كان قاعد..
روان بحزن
ما فيش يا بابا بس كنا بنتناقش انا وهو في موضوع اننا هنقعد هنا ولا في البلد يعني..
زعق فيها حسن وقال
هو مش احنا اتكلمنا في الموضوع ده وقفلنااه..
ليلي بقلق
بالراحه يا حسن وفيها ايه لما تتكلم مع خطيبها ويتناقشو في الموضوع..
حسن بحده
فيها ان بنتك عايزه تمشي اللي في دماغها وتعمل اللي هي عايزااه ومش عامله قيمه لكلام ابوها، مش انا اتفقت مع عبدالله وخلصنا الموضوع…
طارق
ما هو المفروض هي اللي تقرر يا بابا مش احنا اللي ناخد القرار بالنيابه عنها، وكلنا عارفين ان روان مش بتحب البلد ولا عايزه تقعد هناك..
روان بدموع
بالظبط كده يا بابا انا مش بحب البلد وبتخنق اووي وانا فيها..
زعق فيها حسن وقال بغضب
اومال حضرتك بتحبي ايه السفاله وقلة الادب وطولة اللسان والصرمحه..
ليلي بحده
في ايه يا حسن ما بالراحه عليها ليه بتكلمها بالطريقه دي..
حسن بجمود
اسكتي يا ليلي واللي انا اقوله يتسمع، الفرح الخميس اللي زي النهارده وتاني يوم الفرح هتروحي مع جوزك البلد واقل غلطه اعرف انك عملتيها يا روان هناك ما تعرفيش انا هعمل فيكي ايه.
_قامت روان دخلت اوضتها وهي بتعيط، وقامت رضوي عشان تروح وراها بس وقفها حسن لما قال..
حسن
استني عندك انتي كمان رايحه فين؟..
رضوي
هشوف روان يا بابا حضرتك زعلتها اووي، هو انت من امتي بتعامل روان بالطريقه الناشفه دي، انت اكتر واحده بتدلعها فينا هي روان ليه بتزعلها وهي اخر اسبوع هتقضيه معانا ده..
حسن بجمود
غيري هدومك وتعالي جهزي العشا مكان امك ونشيل عنها شويه وما نخليهاش تتعب، وما حدش يناديلي انا مش جعان…
وسابهم ودخل اوضته وليلي قالت بحزن
مش عارفه ماله بقاله فتره كبيره وهو مش طايقلها كلمه..
طارق بشك
البت دي عملت حاجه زعلت بابا منها، لان فعلا روان كانت اكتر واحده بتاخد دلع من بابا..
ليلي بقلق
لا عملت حاجه ولا غيره، هو بس تلاقيه عايزها تنشف شويه لانها خلاص هتبقي مسؤله من بيت ومتجوزه ودي مسؤليه مش ساهله..
طارق
طيب يلا يا ماما غيري هدومك وانتي كمان روفان انتي وروز وانا هدخل اصالحها وننزل نتعشي بره..
رضوي
لا روحو انتو انا عندي شغل لازم اخلصه..
طارق
براحتك انتي الخسراانه..
ــــــــــ #بقلم_الكاتبه_رحاب_القاضي ــــــــ
_وفي شقة ريناد وسيف كانت قااعده هي وعمتها علياء ومعاها تيا بنتها اللي مش مبطلع عيااط..
طلع سيف من اوضته وقال بحده
ما تسكتي البت يا ريناد..
ريناد
انت رايح فين؟..
سيف بجمود
شوفي البنت بتعيط. ليه الاول بدل التفاهات دي..
علياء
يا ابني كانت بتاخد الدوا بتاع البرد وعيطت شويه..
ريناد بهدوء
تيا سكتت اهي انت رايح فين؟..
سيف
عبدالله جه هنا وعندنا شغل مهم قبل فرحه وكده عشان مش هيكون فاضي ورايحله..
علياء
ايوه فعلا عبدالله هنا بس هو مش في بيت خالك عز دلوقتي انا لسه مكلمااه؟
سيف بهدوء
ايوه ما انا هخلص الحاجات المهمه مع كام موظف وهو الصبح هيجي يكمل معانا..
ريناد بسخريه
يعني هتباات تاني زي امبارح، الله اكبر عليك بقيت بتقعد في الشغل ليل نهار يا نجيب سويرس..
ضحكت علياء وسيف قال
شايفه يا خالتو بنت اخوكي انا مش هتكلم علي التريقه دي وهاخد بعضي وامشي احسن..
وقرب من ريناد وباس راسها بهدوء وقال
خلي بالك من نفسك ومن البنت لحد ما ارجع ولو احتاجتي حاجه كلميني..
بصتله بغموض وقالت
عينيا يا حبيبي حاضر…
_طلع سيف من الشقه وهي بسرعه قلعت الروب الطويل الفضفاض اللي كانت لبسااه،وكانت لابسه تحت منه فستان طويل لتحت الركبه بشويه وواسع مش مبين بطنها الكبيره اوي….
علياء
بسم الله الرحمن الرحيم انتي لابسه كده ورايحه فين؟..
ريناد
معلش يا عمتو خليكي مع تيا وانا هروح اشوف البيه ده رايح فين وجايه..
علياء
ايه اللي بتقوليه ده، عيب كده هتراقبي جوزك..
ريناد بدموع
ايوه هراقبه عشان اعرف الحقيقه، هراقبه عشان هو كداب ما حدش يعرف جوزي قدي يا عمتو، عشان خاطري اوعي تقوليلو حاجه..
_ وبسرعه نزلت وراااه وركبت عربية الاوبر اللي طلبتها من اول ما شافته بيلبس عشاان ينزل وقالت للسواق يمشي ورا عربية سيف، وكان شكها فعلا في محله وانه راح المعادي وفي نفس العنوان اللي جابهولها عامل المغسله…
_نزلت من عربية الاوبر وخلته يمشي ودخلت العماره اللي طلع فيها زين وقلبها بدأ يدق بسرعه وخوف وهي بتتمني انها تكون فاهمه غلط، وقالت لنفسها بخوف..
ريناد
هو ممكن يكون طالع عند واحد صاحبه او حد تبع شغله، يارب يكون كده يااارب اكون غلطاانه بجد المره دي انا مش عايزه اتوجع ولا اتعب ياارب..
وقربت من البواب بتاع العماره وقالتله
لو سمحت يا حج هه هو الاستاذ اللي طلع من شويه تعرف هو رايح فين؟..
البواب
وانتي تطلعي مين وبتسألي عليه ليه؟..
ريناد بهدوء
اا انا ابقي اا كنت قاعده في كافي وهو نسي المحفظه تقريباً وانا عايزه اتأكد من اسمه وهو طالع فين بقي عشان اروحله..
البواب
ايوه ده الاستاذ سيف جوز الدكتوره شرين حمدي اللي ساكنه في الدور الرابع..
ريناد بصدمه
اا انت بتقول مين شرين حمدي، وجوزها؟!..
البواب
ايوه دول كمان ساكنين هنا من سنتين..
_اتنفضت ريناد بألم وحزن شديد وكانت هتقع من طولها بس البواب سندها بسرعه وقال بقلق..
البواب
علي مهلك يا بتي، تعالي اقعدي هنا شكلك تعباانه من الحمل..
_ريناد مسكت موبيلها وفتحته علي صورة سيف اللي كانت خلفية موبيلها وقالتله ببكاء..
ريناد
هو انت متأكد ان سيف اللي بتتكلم عنه هو ده؟..
البواب
ايوه والله بقولك ساكن هنا بقاله سنتين وانا عارف شكله كويس..
_فتحت الموبيل تاني وايدها بتتنفض من صدمتها وحزنها، ودورت علي الفيس علي صفحة شرين وطلعت صورتها وقالتله تاني..
ريناد
ودي شرين اللي هي مراته؟..
البواب
ايوه هي دي الدكتوره شرين مراته..
_خلص هو كلامه ودخلت ريناد في نوبة بكااء وهي بتحاول تكدب كل اللي سمعته من البواب اللي سألها بقلق..
البواب
هي ايه الحكايه يا بت الناس وانتي مين بالظبط؟..
قامت ريناد وقالت من وسط بكاءها
انا اكتر واحده غبيه ومغفله في الدنيا كلها…
_وسابته وفضلت ماشيه في الشارع لوحدها وهي بتعيط وفجأه كانت هتخبط فيها عربيه معديه بسرعه فوقعت علي الارض وقبل ما تلمسها العربيه وقفت ونزل منها بسرعه يزن الصاوي “ايوه يزن الصاوي بتاعنا ابن يونس”..
قرب منها بسرعه وقال
انتي كويسه يا مدام انا اسف والله فكرت الشارع فاضي فسوقت بسرعه، انتي كويسه..
ردت عليه ببكاء شديد وقالت
لا مش كويسه… مش كويسه خالص…
حط ايده علي كتفها بتلقائيه وقال بقلق
طيب نروح مستشفي لو تعباانه حتي تطمني علي البيبي لتكون حصلتله حاجه..
مسكت ريناد ايده وحطت راسها علي كتفه وقالت بحزن
طلع بيخوني معاها بعد ما هي سابته زمان واختارت غيره وانا اللي وقفت جنبيه وحبيته من كل قلبي ضحيت بمستقبلي وكنت عيشاله هو بس كنت بحاول اسعده بكل اللي اقدر عليه وفي الاخر برضو سابني وراحلها هي..
اتأثر يزن من كلامها بس بعد عنها بهدوء وقال بحزن
ممكن تهدي وقومي معايا انا هوصلك لحد البيت، وحاولي تهدي بجد عشان البيبي كده مش كويس عشانه..
بصتله ريناد من وسط دموعها وقالت
انت بتحضني ليه يا جدع انت ايه قلة الادب دي..
يزن بغيظ
هو انا قربت منك يا ست انتي، انتي اللي حضنتيني علي فكره..
ريناد بحده
وانت استغليت الحاله اللي انا فيها وفضلت تحسس وتقرب، كلكم صنف واحد رجاله خاينين..
يزن بغيظ
هي وصلت لكده، انا امشي بكرامتي احسن ده انتي بنت مجنونه..
ريناد ببكاء
ما انت لابس دبله اهو ومتجوز زيه وواقف تكلمني وعايز توصلني واكيد مراتك مغفله في البيت مستنيااك ومش عارفه حقيقتك زي ما حصل معايا والله كلكم صنف واحد..
يزن بضيق
تمام يا ستي كتر خيرك..
سابته وقامت وقالت بحده
مالكش دعوه بيا وابقي خد بالك وانت مااشي بعد كده..
_وسابته ومشيت ووقفت تاكسي وركبت فيه ومشيت من قدامه خالص، وهو ركب عربيته وابتسم بهدوء وقال..
يزن
غريبه بس انا شوفتها فين البنت دي قبل كده؟…
وتابع بسخريه
لا والحيوان اللي بتتكلم عنه خانها بعد ما عملت معاه كل ده، يجي يشوف اللي انا فيه وهيعرف قيمة اللي معاه..
_واخد عربيته ومشي علي بيتهم، واول ما وصلت ريناد البيت راحتلها علياء بسرعه وقالت.
علياء
تيا اتعشت ونامت، في ايه بقي مالك جوزك راح شغله مش كده؟..
ردت عليها ريناد بدموع وقالت
لا يا عمتو البيه راح لمراته التانيه..
علياء بصدمه
انتي بتقولي ايه، بلاش جنان يا بنتي مراته التانيه ايه بس؟..
ريناد بدموع
بالظبط هو ده اللي هو خلاكم تصدقوه عليا اني مجنونه وكل شكي فيه كلام فارغ وجنان وخلاص، عرف يخليني اسكت وما اتكلمش عليه قدامكم بس هو واطي وكداب وخاين وخدعني وكسرني..
حضنتها علياء وقالت
طيب اهدي وقوليلي بس ايه اللي حصل؟..
_قعدت معاها ريناد وقالتلها كل اللي عرفته عن سيف وجوازه عليها، وردت عليها علياء بحزن وقالت..
علياء
يعني هو اتجوز البنت اللي كان خاطبها زمان وفسخت خطوبتها منه عشان تتجوز ابن خالتها وتسافر معاه بره مصر..
ريناد مسحت دموعها وقالت
ايوه وبقاله سنتين وتلاقيه كمان مخلف منها وانا نايمه علي ودااني..
علياء بقلق
طيب وانتي ناويه علي ايه دلوقتي؟..
ريناد
هطلق طبعا مستحيل اكمل معاه بعد كل الكدب ده..
علياء
طيب تسمعي كلامي وما تعمليش حاجه عشان خاطر اهلك واختك..
ريناد
وايه دخل اختي واهلي في الموضوع؟..
علياء
عشان فرح اختك، الموضوع ده هيقلب الدنيا في العيله كلها..
ريناد بدموع
انا مش طيقااه يا عمتو، ده بيخوني وبيكذب عليا وخان ثقتي فيه وراح اتجوز عليا من غير والله ما اقصر معاه في اي حاجه، ده انا كنت اغلب الوقت باجي علي نفسي وبكون تعباانه ومش بخليه يحس بحاجه، بعمل كل شغل البيت بهتم ببنته اللي هو والله ما يعرف حتي عيد ميلادها امتي وفي الاخر يخوني طيب ليه، وانتي كمان عايزاني افضل معاه بالوضع ده تاني..
علياء بدموع
لا مش قصدي كده، انتي خدي بنتك ومن بكره نروح لبيت اهلك وبعد فرح عبدالله وروان هنقول للعيله كلها عليه وانا اول واحده هكون جنبك واجيبلك حقك منه..
_سكتت ريناد وعلياء خدتها في حضنها وحاولت تهون عليها، ولكن بماذا سيلتئم جرح تلك المسكينه وقد جاء لها من اقرب الاشخاص لقلبها 💔
ــــــــــ #بقلم_الكاتبه_رحاب_القاضي ــــــــ
_وفي بيت يونس الصاوي، وقفت شهد بعربيتها في نفس الوقت اللي وصل فيه يزن واول ما نزلت من العربيه ابتسم يزن وقال..
يزن
ايه ده ايه الحلاوه دي كلها يا ماما..
شهد بهدوء
ايه رئيك تغير حلو مش كده؟..
يزن
جدا ده انتي صغرتي ولا عشرين سنه، قوليلي بابا شافك ولا لسه؟..
شهد مسكت ايده وقالت
لا لسه انا كنت مع صحابي، المهم قولي قررت هتجيب ايه لسدره بكره في عيد ميلااادها؟..
يزن
معلش يا ماما دي حاجه خاصه..
شهد
اخص عليك طيب انا كمان مش هقولك انا جيبالها ايه..
يزن ابتسم وقال
ربنا يخليكي ليا يا ماما، علي فكره عمي محمد وحامد جوه قاعدين مع بابا ويوسف..
شهد بقلق
ااه صح انا نسيت الموضوع ده خالص، ربنا يستر واخوك يعقل بقي وما يخسرش عائشه.
_ودخلو جوه وسلمو علي محمد وحامد وقعدت شهد جنب يونس اللي مال عليها وقال بغيظ..
يونس
ايه اللي انتي مهبباه في نفسك ده؟..
شهد ببرود
مالكش دعوه وخليك في حالك..
يونس بغضب
ماااشي يا شهد مسيرنا هيتقفل علينا باب ونعرف ازاي نتكلم..
حامد
ايه الحلاوه دي كلها يا طنط؟..
شهد
شكرا يا حامد دي عيونك يا حبيبي، مش ناوي بقي تعقل وتيجي معايا الشركه بتاعتي ونصمم سوا ونعمل العرض الجديد مع بعض..
حامد
ما انا لو جيت معاكي يا طنط اونكل عدي هيزعل عشان سيبته وجيتلك، فانا مريح دماغي وشغال مع نفسي..
يونس
اسمع كلامها هي كده كده هتسيب الشركه دي ليارا يعني في المستقبل ما حدش هياخد باله منها غيرك..
حامد. بابتسامه واسعه
لا مدام الموضوع يخص يارا يبقي افكر…
محمد بجديه
المهم يا جماعه احنا زي ما احنا اهل وحبايب، ومهما يحصل ما فيش حاجه هتأثر علي علاقتنا سوا..
يونس بص ليوسف بضيق وقال
اكيد طبعا يا محمد ولو عيشه زعلانه من يوسف هو هيروح يصالحها وو..
قاطعه محمد وقال
لا يا يونس انا بنتي عقلت وقالت انها مش عايزااه، وقالت ان ده اصلا قرار يوسف من البدايه ولا ايه يا ابن اخويا؟..
يوسف بضيق
ايوه احنا مش هينفع فعلا نكمل مع بعض..
حامد بسخريه
علي فكره دي حاجه متوقعه من عيل زيك، بس هي اللي اختارتك والنتيجه اهي فشل من قبل البدايه..
بصله يوسف بغضب وقال
والعيل ده كنت بتدافع عنه ليه قدام اختك لما كان يغلط، وافقت ليه عليه من الاول، البيه اللي بيقول عليا عيل ده اكتر واحد كان عارف اني كل يوم كنت بسهر مع واحده غير اخته وكان بيدافع عني قدامها ويكدب عليها فانا لو عيل انت اعيل مني..
محمد بحده
اخرس انت وهو، وانا كلامي مع يونس..
_مسك حامد علبه صغيره فيها الشبكه بتاعت عائشه ورماها في وش يوسف وقال بغضب.
حامد
الشبكه اللي ابوك كان دافع تمنها اهي بالناقص اي حاجه منك، واختي هتتجوز سيد سيدك يا يوسف..بعد اذنكم..
_قال كلامه وقام مشي ويوسف بصله بغيظ وما اتكلمش وفضل قاعد بيسمع كلام محمد ويونس اللي بيلموه الي اخطأه..
ـــــــــــــــــــــــــــــ
_وفي الوقت ده وقف زين بعربية مامته اللي كانت معاه علي مسافه قريبه من بيت يونس الصاوي وقال ليارا..
زين
تمام كده يا ستي وصلتك اهو وما حدش خد. باله مننا..
يارا بقلق
تمام شكرا يا زين اليوم كان حلو اووي بجد..
زين
مش ملاحظه انك اخدتي عليا شويه بطلنا الدبش والتوتر..
يارا
يعني مش اووي بس كده تمام شويه..
زين
لا ده كده. زي الفل، المهم تخلي بالك من المذاكره ولو حاجه وقفت معاكي قوليلي وانا هساعدك فيها..
يارا بهدوء
حاضر.. يلاا بااي..
_ونزلت من العربيه ووقفتله لحد ما مشي واتصدمت لما لقيت ان حامد وقف قدامها بعربيته بعد زين ما مشي، ونزل من العربيه وقال بجمود..
حامد
هو مش ده نفس الولد اللي شوفته معاكي قبل كده قريب صاحبتك؟..
يارا بخوف
هو وصلني عشان ما كانش معايا السواق وو..
حامد بحده
ما تكدبيش يا يارا، ايه اللي بينك وبين الواد ده؟..
يارا بخوف ودموع
ما فيش حاجه..
حامد بغيظ
مااشي جو المراهقه اللي انتي عايشه فيه ده لازم تبقاله واقفه ومدام مش صريحه معايا يبقي انا هعرف بطريقتي، ادخلي يلا جوه..
يارا بخوف
انت فاهم غلط اصلا وو..
زعق فيها وقال بحده
ادخلي جوه يلااااا…
_سمعت يارا كلامه ودخلت بيتهم ولقيت محمد طالع وهو متعصب ويونس بيزعق في يوسف جوه..
يارا بقلق
هو في ايه وعمو محمد ليه طالع وهو متعصب كده؟..
يونس بحده
من خيبة اخوكي اللي مالهاش اخر، هو كان يحلم يتجوز بنت زي عيشه وكمان هو اللي يرفضها ويخلي شكلي قدام اخويا زي الزفت وكل ده ليه عشان لقي لعبه جديده يتسلي بيها شويه…
يوسف بسخريه
تفتكر انا طالع لمين كده..
يزن بحده
انت بتهزر كمان يا برودك يا اخي..
سابهم يوسف وطلع فوق ويونس قال بعصبيه
خد هنا يا زفت انت..
شهد بضيق
سيبه يا يونس اللي حصل حصل خلاص..
يونس بحده
اللي حصل ما هي دي اخرة تربيتك، انتي فالحه في حاجه اصلا بس انا غلطان انا لو كنت زمان خليتك قعدتي في البيت زي الكلب تربي عيالك ما كانتش هتبقي دي النتيجه….
شهد بدموع
معلش انا كنت ام مهمله انت كنت فين بقي ولا هما ولادي لوحدي..
نزل يوسف في الوقت ده ووقف قدام يونس وقال بغضب
انت ازاي تكلم امي كده،ازاي تغلط فيها كده قدامنا هو انت فاكرنا صغيرين وهنسكتلك..
يونس بصدمه من تصرفات يوسف
وهتعمل ايه يا روح امك..
وضربه بالقلم جامد وقال
بتعلي صوتك عليا يا حيوان..
_مسكت يارا في شهد بخوف ويزن وقف بين يونس ويوسف وقال بقلق وخوف علي شقيقه.
يزن
خلاص يا بابا عشان خاطري وانت يا يوسف اطلع فوق يلااا..
يونس بحده
ما يتحركش من قدامي غير لما انا اقوله، ما يعملش اي حاجه بعد كده غير بأمري انا واقسم بالله لربيك يا يوسف علي وقفتك قدامي دي..
يوسف بجمود
ما تغلطش في امي تاني ومش هقف قدامك، انما مش هسمحلك تهينها تاني واسكت…
زق يونس يزم من قدامه ومسك يوسف من هدومه وقال بغضب
انت ماااالك من امتي انت او اخواتك بتدخل في حاجه بيني وبين امك، بس هي ما عرفتش تربيك وتربيتها واضحه قدامي اهي.
_قبل ما يرد يوسف عليك قرب منه شهد ومسكت ايد يونس وقالت بثبات وهدوء..
شهد
سيب ابني يا يونس..
يونس بغضب
ده اللي قدرك عليه ربنا، تلاقيكي فرحانه ان ابني وقف في وشي وبيتخانق معايا..
شهد بحده
كفاااايه بقي فضحتنا اسكت يا اخي بص لبنتك اللي مرعوبه منك دي، بتضرب اخوها الكبير قدامها، بتضربه ليه اصلا؟..
يزن بضيق
بابا عشان خاطري كفايه كده…
_سابهم يونس ومشي بره البيت وشهد حضنة يوسف اللي فضل يعيط زي العيل الصغير في حضنها ويارا كمان حضنتها وكمان يزن اللي قال بهدوء….
يزن
يا جماعه خلاص بقي ده حتي بكره عيد ميلاد سيدرا هنحضره واحنا متنكدين كده..
يوسف بسخريه
ما البشاير اهي يا اخويا..
_ضحكو كلهم بهدوء وفضلت شهد قااعده معاهم بتحاول تهون عليهم اللي حصل من شويه، وبعد كده كل واحد واحد فيهم راح اوضته وفي اوضة يوسف كان قااعد مداايق جدا وهو ماسك الدبله بتاعته في ايده وبيبصلها بدموع…
دخلت عنده شهد وقالت
معلش كنت هاجي اقعد معاك من بدري بس يارا اختك ما رضيتش تخليني اقوم من جنبيها غير لما نامت..
يوسف بدموع
هو انا وحش صح، عائشه دلوقتي زمانها بتدعي عليا اكيد بتعمل كده..
شهد
طيب ليه سيبتها كنت اديت نفسك فرصه انت وهي..
نزلت دموعه ورد عليها وقال
عشان انا مش يونس الصاوي، عشان مش عايز ابقي زيه انا عارف انه بيخونك من زماان وعارف انك عارفه وساكته عشاني انا واخواتي، وفي الاخر يجي يعمل عليا دور الاب المثالي وهو اصلا واحد ز…
شهد بحده
اخرس اوعي تغلط في ابوك او تقول عليه حاجه وحشه…
وقف يوسف وقال بعدم تصديق
انتي لسه بتدافعي عنه، انا ما حدش عقدني في حياتي غيره ما حدش خلاني اقلد تصرفاته غيره هو، بقيت بحب اكدب وبحب اتسلي واضحك علي البنات بس ولا عمري في مره حبيت نفسي وانا كده، انا كنت عايز اقوله شوفت انا وحش ازاي اهو انت اوحش مني بس ما كنتش بقدر اقوله كده عشانك انتي لحد ما سمعتك من كام يوم وانتي بتتخانقي معاه وبتقولي انك عارفه كل حاجه كان صوتكم عالي وسمعت كل حاجه..
ضحك بسخريه وقال
كنتي عايزاني اتجوز عائشه واكرر نفس اللي حصل فيكي تاني، لا انا سيبتها دلوقتي وتتعب شويه احسن ما تعيش طول عمرها في عذااب معايا..
شهد بدموع
انت ما قولتليش ليه انك عارف اللي بيعملو ابووك..
يوسف
لنفس السبب اللي انتي مش راضيه تقولي عشانه، كنت خايف علي زعلك لاني عارف انك بتحبيه….
شهد بجمود
وكأنك لا سمعت ولا عرفت حاجه، وما تقبااش زي حد بلاش يبقي جوزي وابني يا يوسف..
يوسف بحده
مش هعرف اسكتله تاني لو غلط فيكي، كفاايه بجد هو بيعمل فينا كده ليه..
شهد بهدوء
هو ما عملش فيك انت واخواتك حاجه بالعكس بيحبكم جدا واكتر من نفسه كمان، ومشكلتي معاه انتو مالكمش دعوه بيها..
يوسف بسخريه
عارفه يا ماما المشكله فين، المشكله انك انتي وهو اتحرمتو من اهلكم بدري اتربيتو من غير ما يبقي عندكم اب وام عشان كده مش حاسين بينا، احنا عايزينكم تبقو مع بعض ولما بتتخانقوو انا ويزن ويارا اكتر تلاته بنكون تعبانين وخايفين، مش انا كبرت اهو وبقيت اطول منك كمان بس لسه بخاف لما بابا بيتخانق معاكي وبتدايق، احنا تعبنا بجد منكم انتو بتضحو بينا مش بتضحو عشان خاطرنا.
شهد بدموع
الوقت اتأخر خليك انت دلوقتي في نفسك اتغير وما تبقااش زيه وما تبقاش وحش وتغلط فيه او تزعله منك لانه مهما عمل ده ابوك..
يوسف بدموع
حاضر يا ماما انا عايز انام تصبحي علي خير…
_سابته شهد وراحت اوضتها ولقيت يونس لسه ما رجعش من بره، راحت غيرت هدومها اول ما طلعت من الحمام لقيته قاعد علي السرير وفي قمة غضبه..
شهد بهدوء
حمدلله علي السلامه..
يونس بغضب
كنتي فين النهارده وايه الفلوس اللي صرفتيها دي كلها…
شهد بهدوء
كان نفسي في كام حاجه اشتريتهم..
يونس بحده
بكل ده ومن امتي بتروحي مكان من غير ما اعرفه ولا تقوليلي قبلها اصلا، وايه المبلغ ده كله اللي صرفتيه؟..
_راحت شهد فتحت شنطتها وطلعت فواتير قديمه ورمتها في وشه وقالت بحده..
شهد
اعتبرهم زي دول يا يونس..
يونس بصدمه وهو بيبص للفواتير
ايه ده؟..
شهد بدموع
دي فواتير الحاجات اللي كنت بتجيبها للستات اللي كنت بتخوني معاهم، ولا هو حلال ليهم وحرام لمراتك..
يونس بتوتر
انتي جيبتي الحاجات دي منين؟..
شهد بسخريه
فكر مع نفسك وشوف انا جيبتهم منين..
وقربت منه وقالت بغضب
واول واخر مره تغلط فيا قدام ولادي او تمد ايدك علي حد منهم، انت ملكش اي حاجه هنا غير انك تقعد وتسكت بعد كده، ده بيتي انا ودول ولادي ما حدش تعب عليهم قدي البيت ده لو ما كنتش انا هنا عمره ما كان هيبقي بالشكل ده..
يونس بحده
كفاايه بقي فوقي يا شهد احنا كبرنا علي الحركات دي، انسي كل اللي حصل زمان وخلينا نبدأ من الاول..
شهد بسخريه
ما قولتش كده ليه لنفسك لما روحت وعرفت نادين اللي اكبر من ولادك بسنتين تلاته..
تابعت كلامها بدموع وقالت
ندم عمري اني رجعتلك بعد ما اطلقنا، عشان لما عرفت بخيانتك التانيه ليا وشوفتك بعيني في مكتبك ما قدرتش اتكلم ولما لقيتك زايد فيها وجيت اتكلم صبري اخويا مات وما بقاش ليا حد يقف في وشك ويدافع عني واللي زاد الطينه بله اني طلعت حامل في يارا ولو كنت سيبتك ما كنتش هترحمني عشان انت عمرك ما حبيتني وكنت هتأذيني عادي..
يونس بحزن
والله ما كنتي هتهوني عليا اذيكي..
شهد بسخريه
بس هونت عليك تخوني، وبعدين احنا فيها اهو لو بتحبني بجد زي ما بتقول سيبني في حالي وخلي كل واحد في حاله لحد ما نطلق..
_ما ردش عليها وراح وقف في البلكونه وهو مدايق جدا وبدأ يلوم نفسه علي كل اللي عمله فيها..
“ولكن بماذا تفيد لحظة الندم وهي لحظه عابره”
ــــــــــ #بقلم_الكاتبه_رحاب_القاضي ــــــــ
“أعودُ مُتعبُ العينين مِن رُؤيةِ الدُّنيا التي لا تتغير”
_كانت دي الاستوري بتاعت يوسف الصاوي علي الوتساب، اللي شافتها رضوي وهي قااعده في اوضتها لوحدها مستنيه رجوع اهلها من بره..
ابتسمت بهدوء وردت علي الاستوري وكتبتله
“كل شئ قابل للتغير حتي يوسف الصاوي”..
اول ما شافها يوسف ابتسم غصب عنه ورد عليها وقال
التغير للافضل ولا الاسوء؟..
رضوي
لو فضلت ماشي علي تعليماتي هتبقي للاحسن اكيد..
يوسف
لا انا هفضل كده علي فكره وحش وفاشل في اي حاجه..
ادايقت رضوي من رده وقالتله
بالعكس انت مش فاشل ده انت حتي عملت المشروع احسن من نورا واسلام ومحمود وميلاد..
قعد يوسف علي سريره وقال بأهتمام
بجد يعني تصميم الدور التاني هيكون بتاعي انا؟؟؟..
رضوي
ايوه وكنت هكلمك اقولك الخبر ده لقيتك منزل الاستوري بنت الكئيبه دي..
ضحك يوسف وقالها
ما انا لسه فاسخ خطوبتي فتلاقيني مكتئب شويه..
رضوي
معلش ربنا يعوضك عنها خير..
يوسف
تمام يا خير..
بصت رضوي للرساله بعدم فهم وهو بعت تاني بسرعه
قصدي تصبحي علي خير…
ابتسمت بهدوء وكتبت
وانت من اهل الخير..
يوسف بخبث رد عليها
يارب ابقي من اهله بجد..
_ابتسمت بقلة حيله وقفلت الفون وكانت لسه هتنام بس الباب خبط، فقعدت تاني وقالت..
رضوي
ايوه مين؟..
حسن
هو في غيري في البيت معاكي، عايز اتكلم معاكي في حاجه مهمه..
قامت رضوي وفتحت الباب وقالت
نعم يا بابا عايز شاي اعملك..
حسن
تعالي هنعمل سوا وعايز اقولك حاجه مهمه ما ينفعش حد. غيرك يعرفها دلوقتي..
رضوي
حاضر يلا بينا..
_ودخلو المطبخ وبدأ حسن يعمل الشاي وكان متزتر جدا وقالت رضوي بقلق..
رضوي
خير يا بابا في ايه؟..
حسن
علياء قالتلي ان كمال بيصفي في شغله بره ونازل مصر قريب..
رضوي بتوتر
ااا ايوه ما هو بصراحه يا بابا كلمني وقالي..
حسن بضيق
اوعي يا رضوي تكوني ناويه تقللي من نفسك وترجعيله..
رضوي
انا مش بقلل من نفسي يا بابا، ولو سمحت بلاش نتكلم في الموضوع ده لحد ما يجي ده اذا جه اصلا انا فقدت الامل انه يرجع اصلا، وبعدين هو ده الموضوع اللي انت عايزني فيه؟..
حط حسن الشاي قدامها وقال بهدوء
لا خدي الشاي بتاعك واللمون في التلاجه لو هتحطي لمون..
رضوي
لا مش عايزااه بلمون المره دي، المهم ايه الموضوع انا بدأت اقلق يا ابو علي.
حسن بنبره حزينه
تعرفي انهم بيقولو البنت الكبيره بتبقي هي ام ابوها، وانتي اكبر واحده في اخواتك وفعلا انتي تباني اقسي واحده فيهم، بس انتي احن واحده فيهم بجد..
ضحكت رضوي بهدوء وقالت
طبعا مش بنتك لازم ابقي حنينه، في ايه بقي بلاش التشويق ده؟..
حسن بدموع
انا عندي اشتبااه بفيرس في الكبد..
اختفت ضحكتها واتملت عيونها دموع وقالت
انت بتهزر معايا يا بابا صح؟..
حسن بابتسامه حزينه
لا مش بهزر بقالي فتره تعبان روحت عملت التحاليل ولسه النتيجه ما طلعتش بس الدكتور قالي انه مرض في الكبد عندي واحتمال كبير يكون الفيرس اللي بيدمر الكبد..
رضوي ببكاء
لا لا مستحيل بابا انت كويس الدكتور ده مش فاهم حاجه اكيد..
حسن مسحلها دموعها وقال بهدوء
اهدي وما تخافيش انا بقولك عشان تهوني عليا عشان اشارك معاكي همي امك او عماتك كانو مش هيسكتو لو عرفو وانا عايز فرح اختك يعدي علي خير والكل يبقي مبسوط، بس عايز حد جنبي ، عايز اشارك قلقي مع حد بس انا غلطان ياريتني ما قولتلك..
رضوي ببكاء
يا بابا انت بتقول ايه، ازاي يعني ده يحصل ليه..
خدها حسن في حصنه وقال بدموع
الحمد لله علي كل حال، رب الخير لا يأتي الا بالخير هتروحي معايا وانا بجيب نتيجة التحاليل مش هتسبيني صح؟..
رضوي ببكاء
اكيد مش هتكون في حاجه وحشه يا بابا اكيد، ما تخافش يا حبيبي..
حسن بمشاكسه
ما تخافيش انتي الاول ده انتي خوفتيني اكتر بشكلك ده…
_ابتسمت من وسط دموعها وفي الوقت ده دخلت عندهم روفان وقالت بغيظ….
روفان
يا سي حسن لو هي بس اللي بنتك واحنا عيال ناس تانيه قول ما تتكسفش، ما فيش غير رضوي اللي بتتحصن واحنا يتنكد عليها..
_ضحك حسن وبعد عن رضوي وقرب من روفان وباسها من خدها وقال بهدوء…
حسن
رضوي مين بس انا بحبش غيرك انتي يا وليه يا صغيره..
روفان وهي بتشاور لخدها التاني
هات بوسه هنا كمان وشيلني دخلني اوضتي..
ضحكت رضوي وحسن ساب كوباية الشاي وقال
بس كده انتي تؤمري يا قلب ابوكي..
وباسها من خدها وشالها وقال
يلا بينا ادخلك اوضتك قبل امك ما تشوفنا وتغير منك..
روفان بحماس
طيب اجري بسرعه يا بابا
ــــــــــ #بقلم_الكاتبه_رحاب_القاضي ــــــــ
_وفي بيت يونس الصاوي في شقة يزن وسدره كانت قااعده بتضحك ومبسوطه جدا قدام يزن اللي كان مدايق بسبب خناقات اهله….
يزن بضيق
انتي مبسوطه اوووي كده ليه؟..
سدره بخبث
لا والله يا حبيبي انا مش قصدي حاجه، طيب ده حتي يارا كانت بتكلمني شات من شويه وهي كمان ضحكت علي القلم..
يزن بشك
امم يارا اللي كانت مرعوبه وبتعيط من اللي حصل، علي العموم مالكيش دعوه بأهلي يا سدره وما تجبيش سيرتهم خالص قدامي..
سدره
يا حبيبي انا مش قصدي حاجه، بس خلينا نبص للحاجات الحلوه اللي حصلت النهارده، مثلا يوسف ساب عائشه يعني البنت خلصت منه واخيراً..
قام يزن وقال بحده
انا داااخل اناام يا سدره بقولك ايه سيبك من يوسف واهلي خالص وركزي في عيد ميلادك اللي بكره…
سدره
بالمناسبة صح انا هعتذر من طنط بطه وهصالحها هي وبابا علي بعض، مش حابه المشكله تكبر اكتر من كده..
ابتسم يزن وقال
طيب ما انتي حلوه اهووو، وبقولك ايه انتي مش هتنامي انتي كمان ولا ايه؟..
سدره
هكلم هدير هأكد عليها تيجي بكره انا مش حابه حد من صحابي يكون موجود غيرها، وهاجي ورااك علي طول..
دخل يزن اوضته وكلمت سدره هدير وقالت
ايوه يا هدير هستناكي بكره اوعي تتأخري، الخطه بتاعتنا جايه في معادها بالظبط وبكره البيت كله مش هيبقي طايق يوسف..
هدير بقلق
بس اللي انتي عايزه تعمليه ده صعب اووي يعني حتي مش مشكله ومع الوقت هتخلص دي حاجه هتفرق يوسف من اخوه لاخر العمر..
سدره بحقد
وده المطلوب اما نشوف يونس الصاوي هيعمل ايه لما يشوف ولاده بيتخانقو قدامه وهيموتو بعض..
_تفتكرو بقي ايه اللي بتخطط ليه سدره؟..
يتبع….
لقراءة الفصل التالي : اضغط هنا
لقراءة باقي حلقات الرواية اضغط على : (رواية موضوع عائلي 3 (بيت الهنا))