رواية مغامرات ابناء العاصي الفصل التاسع والعشرون 29 بقلم كنزي حمزة

رواية مغامرات ابناء العاصي الفصل التاسع والعشرون 29 بقلم كنزي حمزة

رواية مغامرات ابناء العاصي البارت التاسع والعشرون

رواية مغامرات ابناء العاصي الجزء التاسع والعشرون

رواية مغامرات ابناء العاصي الحلقة التاسعة والعشرون

انتهي الحفل وبدأوا جميعا في تسليم الهدايا لهم ووقف عدي امامهم وهو يهتف
عدي: كل سنه وانتوا طيبين يا نسانيسي🐒🐒
تيا: اخص عليك ياعدي ماتقولش علينا كده وبعدين فين الهديه بتاعتنا
عدي: اصبري علي رزقك شويه، بصوا انا جبتلكم هديه واحده وانتوا بقي تقسموها مع بعض
وقفت تيا امامه وهي جاحظة العينان والتفتت الي توؤمها الصامته طول الحفل: انتي هتفضلي ساكته كده، بيقولك جايب لنا احنا الاتنين هديه واحده
ليا بحزن: خلاص بقي يا تيا، ميرسي يا عدي
تيا: هو ايه اللي ميرسي ده، والله ياعدي لو الهديه مش هتنفع تتقسم لأقتلك
التفت عدي الي زين الواقف بجانبه
عدي: شرسه اوي البت دي
زين: اه اوي ربنا يستر عليا
تيا بصراخ: اخلص بقي وهاتها
عدي: يخرب بيتك خرمتي طبلة ودني اتفضلي
فتحت تيا الهديه امام الجميع وجدتها زجاجة برفيوم باهظة الثمن صحيح لكنها واحده فكيف بها ان تقسمها مع اختها
تيا: ام حلو جدا بس تقدر حضرتك تقولي اقسمها ازاي دي مع اختي قبل ما اكسرها علي دماغك
عدي ببرود: انتي بخه وهي بخه
قررت ان تهشم تلك الزجاجه فوق رأسه واقتربت منه وامسكته من ياقة قميصه ورفعتها بيدها لفوق واذا به ياتي بالزجاجه الثانيه من خلف ظهره وهو يصيح: الهديه التانيه اهيه يا متوحشه، امسكي
تيا: اه كده تمام، ناس مابتجيش الا بالعين الحمرا، وبهدوء، ميرسي يا عمو عدي حلوه خالص
عدي: كيوت اوي ياختي، استني خدي هدية عاصي هو سبهالكم معايا
تيا دون ان تعي ما تقوله: لاء ابقي رجعهاله تاني احنا مش عايزين منه حاجه
انتبه والدها وعمها لما تقوله و وقف زين امامها بغضب وهمس: ايه اللي بتقوليه ده، يخرب بيتك هاتخليهم ياخدوا بالهم كده
عاصي: ومش عايزه تاخدي هدية ابن عمك ليه يا تيا
لدقيقه كامله وقفت كمن القي علي رأسها دلو ماء مثلج
تيا: اصله اكيد حاطت لينا فيها حاجه وعامل مقلب زي عوايده
عاصي بمكر: اه طب خدي هدية ابن عمك. يلا عشان مايزعلش وانتي كمان يا ليا خدي هدية عاصي
وقف عدي امامها حين رأي الدموع تلمع في عينها واحنت رأسها وهي تهزها بالنفي
عدي: خدي ياليا هدية عاصي وامسحي عينيكي، ابوكي واخد باله
ليا: لاء يا عدي مش عايزه حاجه منه
عدي: طب عشان خاطري انا خديها دلوقتي وابقي اكسريها بعد كده او حتي رجعيهاله تاني
ليجده يجذبها من امامه وامسك وجهها بين يديه ونظر الي الجميع بريبه
عاصي: من ساعة ما شوفتك الصبح وانا شاكك ان في حاجه انتوا كلكم مخبينها عليا، عايز اعرف دلوقتي حالا كل حاجه😈
بماذا تصارحه الان، هل تقول له ان من بدأ اليوم في كسب ثقته والاعتماد عليه هو هو من كان يريد ان يعتدي علي شرفه، يخونه ويكسر عينه
ليصيح عاصي: بطلي عياط وقوليلي عاصي ضربك تاني ليه
تفاجيء الجميع بما تفوه به، ها هو الان يعلم نصف الحقيقه فكيف يخفون عليه الباقي ولكن والدتها قررت ان تنقذ الموقف
غمزه: اصله شافها وهي خارجه من اوضتها بمايوه وكانت عايزه تنزل بيه البسين فزعق لها بس هي عندت معاه وقالت له انت ملاكش انك تفرض سيطرتك عليا وبابي بس هو اللي من حقه يقولي البس ايه ومالبسش ايه، فضربها بالقلم، انت عارفه دايما ايده سابقه تفكيره
ترك عاصي وجهها وابتعد عنها ونظر اليها هي واختها
وهتف: انتوا ايه، فاكرين نفسكم لسه بنات صغيرين، انتوا مش شايفين نفسكم، بلاش مش شايفين جسمكم بقي عامل ازاي ؟ مايوه ايه اللي انتي عايزه تلبسيه يا هانم يا محترمه، الظاهر اني دلعتكم زياده عن اللزوم، من هنا ورايح مفيش لبس ضيق ولا قصير والحجاب هيتلبس مفهوم ولا لاء
تيا وليا: مفهوم يا بابي
عاصي: انتو الاثنين اي كلمه يقولهالكم عاصي او زين تتنفذ بدون نقاش، عاصي و زين بالنسبه ليكم هما انا، فاهمني ولا لاء، ودي تاني مره بلفت نظرك للكلام ده يا ليا، كلام ابن عمك يتسمع، سمعاني يا ليا
اجهشت بالبكاء وما كان منها الا انها جرت علي غرفتها، فها هي الان انقلبت عليها الايه واصبحت الجانيه بدلا من ان تكون المجني عليها، صعدت والدتها خلفها وجذبتها من علي الفراش واحتضنتها
غمزه: غصب عني يا روحي كان لازم اجي عليكي انتي عشان ماهدش العيله كلها وهو بردو حس بغلطه وعمال يأنب في نفسه، عشان كده قرر انه يهرب من نظراتك له
ليا بصراخ: انا بكرهه يا مامي بكرهه
غمزه وهي مبتسمه: اه عارفه انا، الكره ده جربته قبل كده بس المهم دلوقتي ان احنا ماعرفناش بابي حاجه، براحتك بقي مش عايزه تكلميه خالص ماتكلميهوش، عايزه تسامحيه سامحيه
ليا: عمري ما هسامحه، عمري ما هكلمه تاني
تنهدت غمزه واحتضنت ابنتها جيدا وهي تقول: الواد ده فعلا نسخه من عمه، يلا بكره نشوف الايام مخبيه ليكم ايه
//////////////////ا
جالس علي مكتب عمه الان يتفقد ذلك الملف ويمسك بيده الاخري هذا الشيك الذي انقذه من المأزق كله واذا بهاتفه يعلن عن اتصال من زين فأمسكه وفتحه ليحدثه
عاصي: يا بني ارحموني بقي اكلتوا دماغي
زين: اتنيل واسمعني كويس، عمك عرف انك ضربت ليا
هب واقفا مفزوعا مما القاه علي مسامعه الاخر
عاصي: ايه وبعدين كمل قولي عرف ايه بالظبط
زين: اهدي كده وركز معايا عشان هو بيحاول يتصل بيك دلوقتي، هو عرف انك ضربتها اه، بس غمزه طلعتك من الموقف زي كل مره يا حيوان
عاصي بسخريه: غمزه، اذا كانت مش طيقاني، دي اختفت وانا ماشي من عندكم عشان ماتسلمش عليا
زين: اكيد مش هتعمل كده عشان خاطرك يعني، هي عملت كده عشان العيله كلها
عاصي: طب اخلص وقولي قالتله ايه بالظبط
زين: قالتله انك ضربتها عشان شوفتها لابسه مايوه وكانت عايزه تنزل بيه البسين وانها قالتلك انت ملاكش انك تقولها تلبس ايه وماتلبسش ايه، فأجبرهم علي لبس الحجاب وقالها كمان ان اي كلمه حضرتك تقوله لها تنفذها كأن هو اللي قايلها بالظبط، شوفت عمك بيثق فيك اد ايه يا حيوان انت
عاصي بحزن: كفايه يا زين، كفايه ابوس ايدك، والله لوكنت قدامها لكنت ركعت علي رجليها وفضلت ابوسها عشان تسامحني، انا عارف انها مش هتقدر تنسي بسهوله، بس والله هاتغير عشانها، هاعمل المستحيل عشان ارجع ثقتها فيا تاني
زين: اما نشوف، انا هاقفل عشان هو هيتجنن عشان مش بترد عليه يلا سلام
عاصي: سلام
اغلق معه الهاتف وقرر ان يغلقه نهائي الان حتي لا يجيبه وهو علي وضعه هذا وانتبه الي الاوراق التي امامه وفعل مثلما طلب منه عمه وضع الشيك في الملف ووضع الملف بالكامل في هذا الظرف الابيض واغلقه ولكنه ابي ان يسلمه الي السكرتيره وفضل وضعه في الخزنه مره اخري لحين عودته في الصباح واخذه الي البنك واذا به يستمع دق علي باب المكتب
عاصي وهو يجفف وجهه: ادخل
دلفت اليه تلك الفتاه الجميله الهادئه الانيقه في ملابسها المحتشمه
و هتفت: استاذ عاصي حضرتك مش هتديني الملف عشان اشيله معايا عشان بكره اوديه البنك
عاصي:لاء يا انسه داليا الملف انا شيلته خلاص، انا بنفسي هاوديه بكره البنك وانتي طبعا هاتكوني معايا
اومئت له برأسها وهتفت: طب حضرتك عايز مني اي حاجه تاني، مواعيد العمل انتهت والموظفين كلهم مشيوا
عاصي: ليه هي الساعه كام، يا خبر دي الساعه سبعه، انا اسف اني اخرتك بالشكل ده، اتفضلي انتي
السكرتيره: مفيش اسف ولا حاجه، عن اذن حضرتك، وذهبت من امامه، بدأ هو يجمع اشيائه وتمم علي مكتب عمه وخزنته واتجه للخروج بعد ان اغلق باب المكتب جيدا
////////////////////////////////////ا
كانوا الرجال يجلسون علي الشاطيء وهو يقف ويمسك الهاتف بيده ومنفعل جدا
عاصي: الحيوان تيلفونه اتقفل، اعمل فيه إيه دلوقتي
حمزه: اهدي شويه بقي، تلاقيه فصل شحن منه
عاصي: فصل شحن ماشي بس وربي وما اعبد ماهسيبه الحيوان اللي ايده ديما سابقه تفكيره ده
فضالي: هو يعني هيجيبه من بره ما هو طالعلك
عاصي بعد ان جلس ركز في كلام والده بهدوء: اه والله عندك حق يا حج، الله يكون في عونك يابنتي
واخيرا حضر إليهم هذا الصديق المحبب لهم، اوقف سيارته بجانب صف السيارات وقبل ان يتجه الي الشاليه خاصته رأه زين وهو جالس معهم، فقرر ان يغرد له بصفارته المعروفه للجميع، فانتبهوا له وانتبه هو أيضا واتجهه اليهم
زين: ابويا جاي لابس ابيض في ابيض، هو ناقص بياض، ده شويه وهاينور لوحده هههههههه
عاصي وهو يحتضنه: ملاگ يا خواتي وداخل علينا، حمدلله علي السلامه
احمد: طبعا ملاك، اومال شيطان زيك ههههههه الله يسلمك يا حبيبي
حمزه: حمدلله علي السلامه يا سيادة العميد مش كنت جيت معانا امبارح عشان تحضر الحفله
احمد: والله غصب عني كان عندي شغل جامد، انا حتي ماكنتش هاعرف اجي النهارده كمان بس مانسيتش الهدايا بتاعتهم طبعا، ازيك يا عمي عامل ايه
فضالي: الحمد لله يا حبيبي، حمدلله علي سلامتك، المهم انك جيت تقعد معانا يومين ترتاح فيهم من الشغل شويه
احمد وهو ينظر لعدي: اه والله صدقت يا عمي، ايه يا عدي مش هاتسلم عليا ولا ايه
نظر عدي لزين وعلم انه مازال لم يصفح عنه فاحني رأسه امامه وهتف
عدي: ازاي حضرتك يا عمي، حمدلله علي سلامتك
احمد بجديه: الله يسلمك يا عدي الله يسلمك
وجلسوا مره ثانيه وهمس عدي لزين: الحقني يا زين ابوك شكله مش ناسي وناوي يقلب الترابيزه عليا
زين: تصدق ياض، انا زهقت منكم، اذا كنت انت ولا الحمار التاني، اسكت وماتخافش كده وانا هكلمه لما نبقي لوحدنا
انتبه احمد لعدم وجود هذا المشاكس فسأل عنه
احمد: غريبه يعني انا مش شايف المشاغب بتاعكم وسطكم، اومال هو فين
حمزه: المشاغب رجع مصر تاني
احمد: عاصي رجع لوحده، غريبه دي اوي، رجع ليه
عاصي: اصل انهارده حصلت شوية كوارث كده ورا بعضها وبدأ يقص عليه كل ما حدث في يومهم هذا
/////////////////////////////////////ا
كان نائما علي الفراش ومستندا بجزعه العلوي علي الوساده من خلفه وهي تضع رأسها علي صدره العاري، يلف خصلات شعرها البنيه علي اصابعه ويطعمها بيده الاخري حبات العنب
الاحمر
احمد: اه يا روحي ماتتصوريش انتي كنتي وحشاني اد ايه
دارين: وانت كمان يا حبيبي كنت واحشني اوي، كنت مفتقداك اوي اوي
احمد: حبيبتي انتي، ربنا مايحرمنيش منك ابدا يا قلبي
دارين: طب كفايه بقي وسيبني انام
احمد: تنامي ايه بس احنا لسه قعدنا مع بعض، خليكي صاحيه معايا شويه
دارين: ولو حمزه ولا عاصي اتصلوا بيك دلوقتي، هاتسيبني وتجري عليهم على طول
احمد: ههههههه دلوقتي دلوقتي، لاء ده ولا وزير الداخليه نفسه يقدر يحركني من هنا
////////////************ه
اقبل عليهم الصباح واستيقظوا جميعا وبعد ان اتموا فطورهم ذهبوا الي الشاطيء، قرر حمزه الاتصال بأبنه الذي حاول طول الليل ان يهاتفه ولكنه فشل في الوصول اليه
عاصي: ها يا حمزه فتح تليفونه
حمزه: استني ياعاصي بيرن اهو، الو انت فين ياحيوان، انت قافل تليفونك من امبارح باليل ليه
عاصي الصغير: اكيد يعني كان هايفصل شحن بعد كل المكالمات دي
امسك عاصي الهاتف من اخيه وصرخ في الاخر: ورحمة امي يا عاصي لو انت قدامي دلوقتي لا كنت كسرت رقبتك في ايدي
ابتلع الاخر لعابه بصعوبه والتفت الي تلك الجالسه بجواره في سيارته وخرج صوته بصعوبه: يا عمي والله انا
صرخ عاصي مره ثانيه: اخلص قولي نيلت إيه من امبارح
عاصي الصغير: خلاص انا روحت البنك وقدمت الملف للمدير
وكل حاجه تمام وراجع دلوقتي انا وداليا السكرتيره علي الشركه
واخيرا ماتنفس الصعداء واطمئن قلبه ليهدأ وهو يحدثه: ماشي يا عاصي وحسابي معاك على إللي انت عملته هيبقي لما اشوفك، دلوقتي هتروح علي الشركه ومعاك كل الصلاحيات بس ماتمضيش عل اي ورقه انت مش فاهمها من غير ماترجع لي وانا بنفسي هبلغ كل رؤساء الاقسام بكده
عاصي الصغير واخيرا قد كسب ثقة عمه: حاضر ياحبيبي، عمي انا بجد اسف، عشان خاطري اقبل اسفي
عاصي: لاء يا عاصي الكلام مش هيبقي في التليفون، اقفل يلا من غير سلام
وضع يده علي عجلة القياده بغضب وبدأ يدق عليها بقوه ويخرج من صدره كل غضبه
وهو يصيح بقوه: يعني مفيش فايده، بردو كل ما احلها من ناحيه تتعقد من ناحيه تانيه
خير يا استاذ عاصي هو في حاجه: كان هذا صوت تلك الجالسه بهدوء بجواره منكمشه علي نفسها
التفت اليها وقد نسي لوهله انها معه ولكن هل ينقصه ان يخيفها هي ايضا
عاصي: هههههه انتي ايه، انتي تصدقي انا نسيت انك معايا في العربيه، انا اسف يا انسه مش قصدي اخوفك كده
داليا: لاء عادي انا واخده علي كده
عاصي: نعم لاء مش فاهمك قصدك ايه
داليا: اصل حضرتك شخصيتك زي شخصية عمك بالظبط
عاصي بهدوء وصوت لم تسمعه جيدا: يارتني زي عمي، و انا ايه وصلني ليه بس
داليا: نعم حضرتك بتقول حاجه؟
عاصي: هاه لاء مفيش، هو انتي عندك كام سنه يا انسه داليا
داليا: عندي٢٧ سنه، حضرتك بتسأل ليه
عاصي وهو يضحك: نعم ازاي دانتي اللي يشوفك يقول عليكي يدوب ١٧ سنه هههههههه اصلك بصراحه اوزعه اوي
داليا: اه ماهو كل الناس بتفتكر زي حضرتك كده
عاصي: طب وهو ينفع بردو تبقي حضرتك اكبر مني ب٧ سنين. وتقوليلي حضرتك
داليا بمرح: ياه دانت صغير اوي، مع ان اللي يشوفك يقول عندك ٣٠ سنه
عاصي: هههههههه كدابه علي فكره، اتي بترديهالي بشياكه، صح؟
داليا : هههه اه تقريبا كده، علي فكره حضرتك اد اخويا الصغير في السن
عاصي: طب وهو انتي بتقولي لأخوكي الصغير حضرتك بردو، اظن ما ينفعش مش كده ولا ايه
داليا: ايوا بس يعني ماينفعش حضرتك
عاصي: لاء ينفع بيني وبينك، انتي قولتي اني زي اخوكي الصغير وانا هاعتبرك اختي الكبيره، بصراحه انتي جيتيلي في وقتك وهحتاجك اوي اليومين الجايين دول
داليا: انا مش فاهمه حاجه
عاصي: بعدين يا انسه داليا هافهمك كل حاجه
/////////////////////////////ا
كان يقف امام الشاطئ يتحدث مع رئيسه في الكتيبه
زين: والله يافندم الواحد كان راسم علي اجازه سعيده بس طالما رايح مع العيلة كلها هتبقي سعيده ازاي بس
ليجد من تخطف من يده الهاتف وهي تصيح بمرح
تيا: هو كل شويه تليفون، يا إما تقعد مع عدي ترغوا سوي وانا ايه ولا علي بالك كده
زين وقد غضب من فعلتها وصرخ في وجهها: هاتي الزفت اللي في ايدك ده واياكي تعملي كده تاني.
اندهشت من غضبه الغير مبرر واعطته الهاتف واتجهت لتجلس بجانبهم واكمل هو حديثه مع رئيسه الذي مزال علي الخط
دانا: مالك وشك قلب كده ليه
تيا: مفيش يادانا سيبني بقي واسكتي شويه، اقولك ركزي مع ليا احسن
دانا: والله انا زهقت منكم انتوا الاتنين، وانتي يا ست ليا هاتفضلي قاعده ساكته كده
ليا: عايزاني اعمل ايه بس يا دانا
دانا : قوليلي فتحتي الهدايا امبارح، عرفتي عاصي جابلك ايه
ليا: لاء ومش هافتحها واول مانرجع هارميهاله في وشه

يتبع….

لقراءة الفصل التالي : اضغط هنا

لقراءة باقي حلقات الرواية اضغط على : (رواية مغامرات ابناء العاصي)