اسكريبت أحببتك للنهاية الفصل الأول 1 بقلم سولييه نصار

-جبت النتيجة وطلع عندي كانسر في الرحم

قولتها وأنا بمسح دموعي… بصيت لخالد اللي اتصدم فقولت :

-الدكتور أول ما قالي كده اتصدمت حسيت نفسي في كابوس يا خالد

-منة!

-انهارت كنت هبوس ايديه عشان يقولي أن التحاليل كدب بس هو مرضاش… قالي للاسف أنها صح… اترجيته قولتله إني مخطوبة وهتجوز قريب… بس هو قالي لازم نشيل الرحم لأن حالتي صعبة … قولتله إني نفسي في طفل… نفسي كان أم… ده حلمي زي حلم بنات كتير.

قعدت أبكي… حاول خالد يهديني بس مقدرتش… كنت حاسة كأن جبل علي قلبي…. حسيت أن الدنيا بقت زي خرم الابرة وكأن كل الأبواب اتقفلت في وشي….

بصيت لخالد المصدوم… كنت مقدرة وضعه كويس… هو مش ذنبه أنه يتحرم من انه يبقي أب…. مش هتظلمه معاها

-مقدرة طبعا لو حبيت تفسخ الخطوبة… ده حقك أنا خلاص انتهيت

بصلي بتوتر فكملت :(بقلم سولييه نصار )

-لو حابب النهاردة هبعت أخويا يجيب حاجتك… وربنا يكرمك مع بنت الحلال اللي تستاهلك.. وأنا ربنا يقف معايا في مصيبتي.

وكنت لسه هقوم لما مسك أيدي وقال:

-اقعدي يا منة لو سمحتي.

قعدت وانا كلي أمل… رغم إني حاولت أبين إني قوية بس علي العكس تماما… أنا منهارة… قلبي وجعني ومقدرش اخسر خالد… أنا بحبه… وصعب عليا اخسره… صعب اشوفه مع حد غيري…. بس برضه مش عايزة اظلمه

-الفرح هيتعمل في ميعاده

-خالد؟!

-أنا مش واطي عشان اتخلي عنك في أول مشكلة… انتي وقفتي معايا كتير… وجه الوقت أقف معاكي… هنتجاوز ده سوا يا منة متخافيش… هنتجوز وفورا هنبدأ العلاج وأنا هقف معاكي خطوة بخطوة… ده وعد

دموعي نزلت وانا مش مصدقة… خالد مش هيتخلي عني..

-طيب والأطفال… مش نفسك يكون عندك طفل… ازاي هتعيش من غير ما يكون ليك ابن أو بنت تربيهم… تشوفهم وهما بيكبروا قدامك وتفتخر بيهم… ويسندوك لما تكبر…. قولي يا خالد هتتخلي عن كل ده عشاني أنا!!! أكيد هيجي يوم وتندم… هيجي يوم وتتمني يكون عندك اولاد من دمك زي باقي الناس

-ميهمنيش أنا هبقي معاكي للابد

مسكت ايده وقولت:

-يعني أنت عمرك ما  هتسيبني صح… قول آه يا خالد…

-أيوة يا حبيبتي هفضل معاكي علطول.

مسحت دموعي وابتسمت… وشكرت ربنا أن حب حياتي هيبقي جمبي.

……..

-أنت اتجننت يا خالد عايز تحرم نفسك من الأطفال عشانها… يا أخي يقطع الحب اللي يخليك تدمر حياتك بالشكل ده.

زعقت والدة خالد فيه فقال وهو متضايق:

-يا ماما أنا بحبها

قربت وقالت بثقة :

-حبك ليها هيختفي لما تمر السنين وأنت من غير طفل…. لما شعرها الحلو يقع… وبشرتها تصفر…

-ماما لو سمحتي اسكتي

-أنت اسكت وافهم أنا عندي خبرة اكتر منك… قولي تقدر تعيش من غير اطفال… بسألك جاوبني

سكت خالد بعدها قال بحزن :

-أنا بحبها

-خلاص اتجوزها بس بشرط!

-ايه هو

-تتجوز واحدة تاني عليها عشان تجيبلك عيال… اشرط عليها كده الأول وشوف هترضي ولا لا!!