رواية جوزوني عبيط الفصل الأول 1 بقلم رحاب القاضي

رواية جوزوني عبيط الفصل الأول 1 بقلم رحاب القاضي

رواية جوزوني عبيط البارت الأول

رواية جوزوني عبيط الجزءالأول

رواية جوزوني عبيط الحلقة الأولى

وقبل ما بدا حكايتي اعرفكم بنفسي انا اسمي ريم عندي 25 سنة امي وابويا راحو وانا مليش حد غير خالتي عشان كده انا عايشة معاها هي وجوزها وبناتها الاتنين
وفي يوم رجعت من الكليه ونمت ولقيت خالتي راجعة من برة بتزعق وتقول
هي فييين هي فين يابنات هاتولي البت دي قدامي دنا هطلع عنيها دلوقتي حالا
ردت عليها علا بنتها وقالت لها
هي مين ياماما في ايه فهمينا طيب انتي عايزة مين فينا
فايزة
هو في غيرها مقصوفه الرقبه ريم والنبي مانا سايبها النهاردة
علا
طيب اهدي بس وقولي لنا هي عملت ايه عشان كل اللي انتي عملاه ده ياماما
فايزة
عملها اسود ومنيل دي البت ياختي لسانها أطول منها ومفيش حد خلاص عجبها دي ماشية تجر شكل خلق الله انا زهقت منها خلاص خلاص وخالتي بصت في السقف وقالت الله يسامحك ياامال يا ختي مش هاقول ربنا يرحمك لا ربنا يسامحك عشان البلوة اللي جتيها لنا دي ورحتي وسبتيها تحرق في دمي انا
علا
لا حول ولا قوة الا بالله هي البت ريم طيرت الشوية اللي فاضلين عندك ياماما لا اهدي كده احنا عايزينك ياست الكل
فايزة
ااه ياروح امك اتجننت انا
وراحت قالعه الشبشب وحدفت بيه علا في دماغها
علا
اعاااااااا ايه ياماما وانا عملت ايه بس
فايزة
ده عشان تقولي عليا ان عقلي خف اوي يابت اااخ ياني من مقصوفه الرقبه دي وبعدين انتي عايزاني في ايه يابت ده عايزة ربنا ياخدني عشان ارتاح من البت اللمضة دي وطولت لسانها
ندى
على فكرة بقا انتي عماله من ساعت مادخلتي وانتي عماله تشتمي وتزعقي ومقولتيش هي عملت ايه بالظبط واحنا مش عارفين حاجة
فايزة
انا هقولكم ياولاد واحكمو بنفسكم دلوقتي البت اللمضة راحت عند السور ماركت اللي على أول الشارع وعم محمد صاحب السوبر ماركت بيهزر معاها وكده عادي تمام والراجل اد ابوها يعنى المفروض تحترم نفسها معاه صح ولا لأ
علا
صح ياماما وبعدين كملي
فايزة
المهم الراجل بيقولي انا قاعد في امان الله لقيت اللي جايه تقولي عم محمد انت عندك سكر قالها ايوه يابنتي عندي قالت له ربنا يشفيك وطلعت تجري وراحت عند سمعة الجزار تقوله ياعم سمعه عندك كبده قالها ايوه يابنتي قالت له يابختك احنا معندناش
علا وندى فضلو يضحكو ووقعو على بعض من الضحك وفايزة قالت
البت هتنقطني ياولاد وانتو بتضحكو ياكلاب ااخ ياناري قومي من قدامي ياحيوان انتي وهي
ولسه خالتي بتقلع الشبشب التاني عشان تحدفهم بيه جريو من قدمها وراح الشبشب جه في عم سلامة جوزها وهو داخل من باب الشقه وسرخ وقال
اااه في ايه يافايزة ايه انتي بتحدفيني بالشبشب ياوليه انتي
فايزة
يقطعني يا سلامة معلش ياخويا اصل عيالك والبت المخفيه بنت اختي هيجبولي الضغط انا مش عارفه اعمل ايه في العيال دي
سلامة
هو انا كل مرجع من برة الاقيكي بتتخانقي ياما مع بناتك ياما مع ريم بنت اختك انتي عايزة ايه بالظبط يافايزة
فايزة
مش عايزة حاجة انا عايزة ارتاح من البيت ده ياسلامة انا عايشه في مرستان البت علا مشاغبه وبتعمل مشاكل بسبب اللماضه وطولت لسانها دي
سلامة
ومالو لما تتدلع عليكي يافايزة البت يتيمة وملهاش حد غيرنا مفيهاش حاجه عدي لها اللي بتعمله وخلاص
فايزة
ليه ياسلامة هي متخلفه يعني البت حلو وزي القمر بس مستهبلة فيها يلا ربنا يرزقها بابن الحلال اللي يسعدها ويعقلها
سلامة
امين يارب قومي بقا حضري لي لقمة أكلها
وفي الاوضة بتاعتي انا وبنات خالتي كانو وافقين قدام سريري وانا نايمة عمالين يقولو
علا
شوفتي البراءة اللي جايه عليها وهي نايمة ولا كأنها عملت حاجة خالص
ندى
هي دي عندها دم ولا بتحس كل يوم تعمل المصيبه ااد كده واحنا اللي ناخد بالشبشب بدالها
كانو وافقين يتكلمو وانا مغمضة عنيه وسمعاهم وقولت لهم
عايزة ايه ياكلبة البحر انتي وهي على فكرة انا سمعاكم
علا
يلهوووي على السوسة ياولاد حتى وهي نايمة بتسمع وبتتكلم دي الفتاة الخارقة يابنتي
ندى
ايوه فعلا ههههه
رحت قايمة قاعده على السرير وقولت
ريم
خليكم كده غنو وردو على بعض بقا
ندى
وخليكي انتي كل يوم تعملي مشاكل بالكوم وتيجي تستخبي واحنا ناخد بالشبشب بدالك
ريم
ههههه هو الشبشب المرة جه فين بالظبط
علا
ااخ ياناري منك يابت يخربيت برودك ياشيخة انتي ايه
ريم
هاها عادي ياحبيبتي ولا بيهمني حاجة اصلا المهم انكم اخدتو بالشبشب وخلاص
راحت ندى جات تجري ورايا وقالت لي
بقا كده طيب تعالي بقا والله ماهحلك ياريم وفضلت تجري ورايا لحد ماطلعت برة الاوضه واستخبيت ورا الكرسي لقيت اللي مسكاني من ودني وقالت لي
تعالي هنا بقا تعالي بقا انتي يامفعوصة انتي كل يوم تعملي لي مشاكل مع الناس انتي يابت مش عايزة تعقلي
ريم
اي اي سيبي ودني ياخالتي سيبي والنبي اااه
فايزة
ده انا هقطعك يابت على اللي بتعمليه في الناس وفيا ده انت يابت عايزة تجلطيني
بوستها وقولت
معاش اللي يجلطك ياقمر انت ان شاالله اللي بيكرهوكي ياخالتي ياحبيبتي وبعدين هو انا عملت ايه يعني انا كنت بهزر معاهم وبس
فايزة
يابت هو انتي صغير ده انتي عروسة وزي القمر والكل بيحلف بجمالك وحلاوتك يعنى دلوقتي الناس بتقول عليكي هبله ده شريف خطيب علا بيقولها كان عريس قمر وابن ناس لبنت خالتك راحت امه اللي اشوف فيها يوم تقوله دي هبلة ينفع كده يعني
ريم
نعم يعني ام سي شريف ابو مناخير كبيرة ده وامة اللي عاملة زي برميل الطرشي طيرو مني العريس ااه اكيد عايزاه لبنتها البايرة العانس اومال ايه
فايزة
يلهوووي عليكي انتي ايه يابت حنفيه مجاري واتفتحت اخرسي اوعي بوقك ده يتفتح وبعدين انتي زعلانة انهم طفشو منك العريس ده على اساس يابت انه لو كان جه مكنتيش انتي هتطفشية زي اللي قبله واللي قبله
ريم
اكيد طبعا كنت هطفشة بس اطفشه انا بنفسي احسن ماحد من برة يطفشه صح ولا لا
فايزة بنفاذ صبر بصت للسقف وقالت
صبرني يارب على المجنونة دي يارب ريحني منها بقا يارب اجوزها وارتاح
ريم
يلهوي بتدعي عليا في مولد النبي يارمضااان
خالتي مسكت كوباية بلاستك وحدفتني بيها وقالت لي امشي يابت امشي
وفي بيت تاني في فيلا كبيرة كان ادم قاعد في اوضتة ومش بيكلم حد خالص دخلت عليه امة وقالت له
عامل ايه النهاردة ياحبيبي انت بقيت كويس ولا لسه تعبان طمني عليك
ادم
انا كويس بس حاسس اني لسه تعبان سبيني ياماما انا مش عايز اشوف حد يلا اخرجي وسبيني في حالي
الام
ليه بس يا ادم انت ياحبيبي مش حاسس بنفسك خالص مش حاسس باللي انت عامله فينا انت يابني قاعد في اوضتك 24 ساعه وقافل على نفسك هو ايه اللي حصل لده كله
ادم
مفيش حاجة وسبيني بقا في حالي يلا امشي
ومشيت مامتة من قدامة ونزلت عند ابوه وقالت له
شوفت عمايل ابنك ياكمال ده مش عايز حتى يتكلم معايا في اي حاجة ولا عايز يسمعني
كمال
قولت لك كذا مره ياسوسن سبيه في حاله ابنك لسه مخرجش من صدمة الحادثه اللي حصلت له يعنى هياخد وقت علي مايفوق منها
سوسن
انا عايزة اطمن عليه نفسي اجوزة وارتاح نفسي اشوفه مبسوط وسعيد ياكمال ده ابني الوحيد ياناس
كمال
طيب بزمتك هو في حد يوافق يجوز بنته لواحد حصله توهان في عقله حصله عبط في مخه مين هيوافق بيه ده
سوسن
بس متقولش عبيط ياخويا ابني زي الفل وشاب زي القمر دي اي بنت في الدنيا تتمناه وتتمنى تعيش معاه اوعي اسمعك بتقول عليه كده تاني
كمال
وهو انا اللي بقول وجايب الكلام من عندي يعنى ياسوسن ماهما الدكاتره اللي قالو انا مالي بقا
سوسن
خلاص قفل على الموضوع ده وانا بقا هتصرف اشوف له عروسة زي القمر ان شاء الله
وعندنا في البيت قاعدين انا وعلا وندى بنات خالتي والساعه كانت 2 بعد نص الليل وندي قالت انا جعانة اوي ياعيال عايزة اكل انتو مش جعانين
ريم
انا عصافير بطني بتجعر من كتر الجوع مش بتصوصو
علا
وانا كمان طيب ماتيجو ندخل المطبخ ونعمل اي اكل ناكله
ندى
يلهوي انتي عايزة امك تصحي وتعمل مننا بطاطس محامير انتي ناسية انها اتحايلت علينا عشان نتعشى واحنا اللي مرضناش
ريم
اممممم طيب انا جات لي فكرة يابنات ايه رايكم نطلب بيتزا دلوقتي
علا
ياختاااي عشان خالتك تعمل معانا الجلاشة وتخلي ليلتنا مش معدية دي قالت على الله واحده تطلب اكل
ريم
الله يخربيتكم انتو عقدتوني كل ماقول حاجة تقولو امنا امنا دي اللي يسمعكم كده يقول دي امنا الغولة بقولك ايه يابت انتي وهي انا هطلب بيتزا وزي ماتيجي بقا ايه يعنى هاخد شبشبين على نافوخي منا ياما اخدت بس المهم اكل بيتزاااا
علا
عندك حق يالمضه اطلبي لي معاكي انا كمان بس واحده كبيرة
ريم
وانتي ياست ندى ها اطلب لك معانا ولا شاعايزة
ندى فكرت كده وقالت لي
اطلبي ياختي اطلبي وربنا يستر بقا لما الدليفري يجي لحد هنا شكلنا هنبات في المستشفى في قسم الكسور والجروح
ريم
خلاص خلاص اسكتوا انتو وانا هتصرف ومش هخلي امكم تحس بحاجة خالص
علا
وهتعملي ايه بقا يافالحة
ريم
هوووش اسكتي بقا واقفلي بوقك ده عشان بتصل بالمطعم
واتصلت بصاحب المطعم وقولت له
لو سمحت كنت عايزة اعمل أوردر
المطعم
اؤمري يافندم
ريم
كنت عايزة تلاتة بيتزا حجم كبير والعنوان اهو …. واديته العنوان وقولت له
بس من فضلك انا ليا طلب عند حضرتك الله يخليك
المطعم
خير يافندم
ريم
انا بس عايزة الدليفري لما يجي هنا تحت البيت ويطلع يخبط على الشقه يخبط بالراحة خالص لحسن خالتي لو حست بيه قفشته مش عايزة اقولك هتعمل ايه
الراجل سمع كده واتصدم وقالي
يعنى هي ممكن تعمل فيه ايه يافندم
ريم
ياختاااي مش عايزة اقولك هتعمل ايه دي مش بعيد تمسكني انا وهو وتنفخنا ااا
لقيت ندى وعلا اغمى عليهم من كتر الضحك قولت لهم
ماتبس يازفته انتي وهي خليني اكلم الراجل بقا
الراجل صاحب المطعم
هما مين دول اللي يسكتو يافندم انا مش فاهم حاجة
ريم
لا لا حضرتك متركزش معايا دول اللي هياكلو معايا وان شاء الله هتنفخ انا وهما وحضرتك وبتاع الدليفري كمان لو خالتي حست بينا
الراجل
نعمممم انتي بتقولي ايه يافندم
ريم
لا لا مش بقول حاجة خالص بس بالله عليه متتاخرش علينا في الاوردر اصل احنا جعانين اوي عشان مكالناش من الصبح كنا غضبانين على الاكل اصل خالتي كانت طابخة مسقعه واحنا مش بنحبها اه والله
الراجل
هو في ايه يافندم انا مش فاهم حاجة
ريم
لا مفيش المهم متتاخرش بقا يلا استنى صحيح انت اسمك ايه مقولتش يعنى
الراجل
انا اسمي إيهاب يافندم
ريم
الله انت اسمك حلو اوي وياتري بقا شكلك حلو كده زي اسمك
الراجل
هو ايه اللي حضرتك بتقوليه ده بس
ريم
لا لا خلاص بس متتاخرش بقا ياهوبه ها يلا سلام
وقفلت معاه والراجل قال
ايه البنت المرووشة دي بس والله دمها زي العسل انت يامصطفى تعالي عشان في أوردر توصيل بس اللي طلبت الاوردر بتقولك متخبطش اوي على باب الشقه لحسن خالتك لو حست بيت هتعلقك ههههه
مصطفى
يادي طلبات نص الليل دي ربنا يستر يا استاذ انا بقيت بقلق من طلبات نص الليل دي
إيهاب
ههههه ان شاء الله هيستر
وعندي بعد مع قفلت مع الراجل صاحب المطعم لقيت علا وندى نازلين ضحك قولت لهم
ايوه اضحكو اوي كمان عشان امكم تسمعكم وتصحي تنفخنا كلنا وحتى مش هنلحق ناكل البيتزا
ندى
هههههههههه نعملك ايه ما انتي اللي مصيبة ولسانك ده عايز قصه
علا
ههههه اه والله فعلا المهم قالك هيجي امتى عايزة اكل ياناااس
ريم
ماتهدي يابت يام كرش انتي الله يكون في عونك ياشريف ده انت هتعلف جاموسة عندك
علا
ياسلام ليه بقا ياختي ده حتى على قلبة زي العسل ماهو كمان بيحب الاكل زي ريحي نفسك
ريم
ياختي اتنيلي وانا مالي انا يكش حتى تأكله بعض انتي وهو بس بقا ياريت يخلي امه اللي عامله زي الرطل دي تبطل تقول عليا هبلة بدل بصي ماروح افعصها في بعضها ماشي
ندى
ايه ده انتي عرفتي ان طنط ام شريف قالت لشريف انك هبلة هي ماما لحقت تقولك يلهوي منك يافايزة
ريم
اه ياختي قالت لي قال يعني انا عايزة اتجوز اوي ياختي يغورو بلا جواز بلا بتاع كتهم الهم كلهم رجاله
علا
مالك ياريم هو انتي عندك عقده من الرجاله ليه كده هو انتي عندك عقده عاطفية من ورانا يابت انتي واحنا منعرفش ولا ايه
ريم
ولا عاطفية ولا مهلبيه انا بس بقيت بشوف اللي متجوزين وعمايلهم في بعض ياختي اقعدي
ندى
انا بقا ليا مواصفات خاصة في فارس احلامي عايزاه كده حاجة محصلتش ولا هتحصل يابنتي
ريم
لما نشوف بكرة ياختي فارس أحلامك هايجي امتى هو الواد بتاع الدليفري اتأخر كده ليه استني لما اتصل بايهاب اساله اصل صوتة وحشني اوي
ندى
ههههه إيهاب مين ده يابنتي الله يخربيت عقلك
ريم يابت صاحب المطعم بقولك ايه انتي وهي يلا كده كل واحده تطلع بفلوسها الحلوه عشان لما يرن اطلع احاسبة
وبعد شوية لقيت التليفون بيرن وكان بتاع الدليفري وكلمته بصوت واطي خالص وقولت له
اطلع وانا هفتح الباب واستناك بس مش تعمل صوت
وطلع واخدت منه البيتزا وببص لقيت خالتي واقفه ورايا اتخضيت وقولت…….

يتبع…
لقراءة الفصل التالي : اضغط هنا
لقراءة باقي حلقات الرواية اضغط على : (رواية جوزوني عبيط)