سكريبت مش هتجوز الفصل الرابع 4 والأخير بقلم يوسف طه

بعد ما دخلت أمل وشافت وائل قدامها، إتصدمت وبكل تلقائية قالتله 

-خلاص عرفت إني مرفوضة من قبل ما أقعد

خبط إيده في بعض وهو بيهز دماغه وقالها 

= يا بنتي هو إنتي ليه مقتنعة إني بكرهك.. وليه المعاملة الناشفة دي. 

سكتت أمل وحست بكسوف، وائل بص للي قاعد جمبه وقاله

=سيبلي الإنتر فيو ده يا محمد.. ده أنا ليه تار.. وعمومًا خلاص لقينا الموظفة فتقدر تختار واحدة تانية لشيفت بالليل

بص لأمل وقالها 

= والا تحبي تنزلي إنتي شيفت بالليل؟ .. لا خلاص خليكي في شيفت بالنهار .. وسيبنا لوحدينا بقى يا أبو حميد.. تعالي إقعدي.

خرج زميله وأمل بدأت تتحرك للكرسي عشان تقعد عليه وهي لسه مش بتتكلم، وائل كمان فضل ساكت شوية وبعد كدة بدأ يتكلم ويقولها 

= إيه رأيك في الطموح يا حاجة أمل.. حلو والا وحش.. ده أنا هنزلك هنا عشان أعقدك من حياتك 

-علي فكرة أنا ولا يفرق معايا الشغل .. مش شايفني نايمة في الشارع وبتوسل ليك عشان أشتغل يعني

= أهو أنا اللي عجبني فيكي أوي إنك جريئة ومش بتخافي.. بس مش عارف ليه حاسك دبشة كبيرة.. وتقريبًا متعرفيش يعني إيه هزار.. بس علي قلبي زي العسل برضه. 

-إنت عاوز مني إيه

= أصل أنا الصراحة كنت بدور علي سكرتيرة.. ويا سلام لو نفس السكرتيرة دي برضه تكون شريكة حياتي.. تكون دبشة كبيرة ومش بتخاف.. النوع ده من الناس أكون مطمن وأنا معاها 

-يعني إنت عاوز تفهمني بقى إنك كنت مستني إني أجيلك الإنتر فيو بتاعك .. وعاوز تقنعني إنك مخرجتش من عندي دورت علي كام بيت تاني تخطب منه.

=بصي يا دبشة .. جواز الصالونات مش عيب ولا حرام.. ده شرع ربنا.. غير إن وارد يجيلك الحلو والوحش وإنتي بتختاري.. وبرضه بيكون في فترة خطوبة تتعرفوا أفضل 

-مبدأيًا متقوليش كلمة دبشة دي تاني عشان بتدايقني 

=هو أنا بقول حاجة غلط.. وعمومًا أنا أسف يا ستي .. بس هحكيلك.. لما خرجت من عندكم كنت مخنوق أوي.. وزي ما قولتلك إني مش ورايا غير الشغل.. وأصلًا يعني أنا كنت بخطط للمكتب ده أنا وزميلي من فترة.. بس قولت أستنى شوية وأتجوز أحسن.. ولما حضرتك زحلقتيني فبدأنا شغل بقى علي طول . 

-وليه مقولتش كدة وإحنا قاعدين

=عشان حضرتك مكونتيش عاوزة تسمعي ده 

-وعرفت منين إني هاجي هنا

= أصل أنا كنت براقبك من بعيد .. متابع الأكونت بتاعك وبدخل عليه كل يوم وكل ساعة.. وشوفت إنك بتدوري علي شغل.. فخليت الناس اصحابي ينشروا الإعلان مخصوص في الجروبات اللي بتدخليها .. بس الحقيقة المشكلة دلوقتي إن كتير من فلوس الجواز إتصرفت في المكتب.. بس أوعدك أشتغل بإيدي وسناني عشان نكون مع بعض.. وبتمنى إنك تديني الفرصة عشان تعرفيني أكتر من خلال الشغل . 

– إنت غلطان في حاجة يا وائل.. لما قولت من شوية هتشتغل بإيدك وسنانك .. إسمها هنشتغل مع بعض.. أصل إستحالة ألاقى إنسان زيك وأسيبه.. بس يا بيه لما أنا وحضرتك نشتغل مع بعض.. مين هيعمل الأكل والشرب والترويق 

= هو إنتي متعرفيش.. أنا بعرف أطبخ وأكنس وأمسح وأعمل كل حاجة.. وزي ما هنشتغل مع بعض هنا.. هنشتغل مع بعض في بيتنا.. بس هل ده معناه إنك موافقة خلاص؟ 

-لو إتأخرت بكرة عن الساعة 7 هخلي أبويا يروح القهوة ويسيبك 

=6 ونص بالدقيقة هتلاقيني عندك 

-وأنا أقل من عشرين ألف جنيه في الشهر مش هاخد 

=وماله ما يغلوش عليكي.. ده إنتي هتاخديني أنا شخصيًا .

انتهى…