رواية كانسر الفصل السابع 7 بقلم آية السيد

في الكافيه

أسر /حور عندها كانسر يا فايزة 

فايزة بصدمه /أسر انت بتهزر صح  قول انك بتهزر وانا والله مش زعلانه منك خلاص…. وأكملت بدموع /أسر كلامك مش صح…. أسر انت ساكت ليه رد عليا 

أسر بصلها وساكت

أسر غظبا عنه دموعه نزلت بس حاول يمسك نفسه

أسر /لا يا فايزة انا مش بهزر حور عندها كانسر بجد وانا قبل ما اجيلك كنا في المستشفى والدكتوره أكدت دا وطلبت تحاليل تانيه عشان تعرف مكانه بالظبط ونسبته

فايزة بتعيط ومش بتتكلم

أسر /فايزة انا عارف ان اللي قلته مش سهل بس انا قولتلك عشان تحاولي تعذريني وتقدري موقفي محدش فينا عارف الايام الجايه هترسي علي ايه ولا ايه اللي هيحصل

فايزة مسحت دموعها وحاولت تهدأ /لا ان شاء الله حور هتبقى كويسه اكيد

وبصت لأسر برجاء /صح يا أسر قول انه صح اكيد مش هيحصلها حاجه صح

أسر بايماءه /ربنا كبير واكيد هو الوحيد اللي قادر يشفيها

فايرة /يا رب  ان شاء الله خير حور طيبه واكيد هتبقى كويسه 

أسر /يا رب يا فايزة يا رب 

*فايزة النجار /بنت عندها 21 سنه في آخر سنه في كليه حقوق بشرتها بيضه وعيونها خضرا وشعرها اشقر بس هي محجبه والدها اتوفي وهي صغيره وبعدها بسنه والدتها اتجوزت صاحبه وسابتها وهي عاشت مع جدتها وهي اللي ربتها لغايه ما كبرت وبعدين اتخطبت لأسر وهي صاحبه حور رغم أنها أصغر منها

______________________

في منزل عائله الصواف 

أحمد /ايمان هي حور لسه نايمه 

ايمان /ايوة من وقت ما جت من بره وهي في الاوضه ومخرجتش ودخلتلها لقيتها نايمه 

ودخلت ليها تاني لما صحت بالأكل مارضيتش تاكل بردوا

أحمد /يعني هنفضل سايبينها كده دي من الصبح من بعد الفطار مكالتش حاجه 

ايمان دموعها نزلت /مش قادره يا احمد مش قادره اشوف بنتي قدامي بالضعف دا ولا بالكسره اللي هي فيها دي حاسه لو دخلت ليها دموعي هتخوني وابقا ضعفتها اكتر بدل ما اقويها 

أحمد حضنها /هششش اهدي كله هيعدي وهي هتبقى كويسه بس احنا لازم نكون جنبها و

قطع كلامه دخول أسر 

أسر /السلام عليكم ورحمة الله وبركاته 

أحمد بعد عن ايمان /وعليكم السلام. 

أسر دخل ولقي والدته بتعيط 

أسر بحنيه /يا ماما احنا قولنا ايه 

ايمان بدموع /غظبا عني يا بني والله لسه لغايه دلوقتي مش قادره استودعب حاجه من اللي حصلت 

أسر /بالله عليكي يا ماما حاولي عشان حور 

ايمان /حاضر يا بني والله هحاول 

أسر بأس ايدها وراسها /ربنا يديمك لينا يا ست الكل 

ايمان /ويديمك ليا يا بني

أسر بتساؤل/طيب هي حور جت من بره؟؟ 

أحمد /ايوة يا بني وفي الاوضه من ساعه ما جت وامك بتقول انها كل اما تدخل ليها تلاقيها نايمه بس هي صحت من شويه 

أسر /طيب هي اكلت حاجه 

ايمان هزت راسها بالنفي 

أسر /طيب ممكن بقا يا ست الكل تعملي لينا اكل حلو كده ليا انا والأستاذه حور 

ايمان بصتله وهو فهم ان حور رافضه تاكل

أسر وهو يطمئنها /متقلقيش هتاكل بس يلا بقا علي ما اغير هدومي وبعدين ادخلها

ايمان هزت راسها بالايجاب وقامت تجهز الاكل 

أحمد حط ايده علي كتف ابنه /عملت ايه مع فايزة يا أسر 

أسر /متقلقش يا بابا كل حاجه تمام 

أحمد /حافظ عليها يا بني وخلي بالك منها دي غلبانه وملهاش غيرك بعد ربنا 

أسر /متقلقش يا بابا انت عارف ابنك كويس وكمان عارف انا بحب فايزة اد ايه

أحمد بدعاء /ربنا يبارك فيك يا بني… يلا بقا قوم غير عشان تدخل الاكل لحور 

أسر بايماءه /حاضر يا بابا عن اذنك 

أحمد بتنهيده /يا رب انت القادر علي كل شئ يا رب اشفيها يا رب وخليك معاها 

بعد مده ايمان خلصت الاكل وأسر اخد الصنيه وخبط علي الباب وبعدين فتح ودخل الاوضه  لقاها قاعده علي السرير وضامه رجليها وباصه في اللاشئ

أسر حط الاكل علي الترابيزه اللي جنب السرير وقعد جنبها علي طرف السرير وحور انتبهت وبصتله

اسر مسك ايدها وباسها /بنوتي الحلوة عامله ايه 

حور بشبح ابتسامه /تمام

أسر /تؤتؤتؤ مش قلنا قبل كده اسمها الحمد لله عشان لازم دايما نحمد ربنا علي كل حال لان اكيد اللي ربنا اختاره لينا هو الاحسن 

حور هزت راسها بايوة

أسر بابتسامه /ها بقا بنوتي عامله ايه 

حور /الحمد لله 

أسر /الحلو اللي بيسمع الكلام يلا بقا ناكل سوا لاني واقع من الجوع وهما كلوا وبصراحه بقا مش عاوز اكل لوحدي فهكسب فيكي ثواب واكلك معايا 

حور بنفي/عشان خاطري يا أسر والله بجد مش قادره اكل حاجه 

أسر بحزن مصطنع /يعني يهون عليكي أسر حبيبك يفضل من غير اكل يعني خلاص يا ستي براحتك بس انا كمان مش واكل 

حور برجاء ودموع /يا أسر عشان خاطري افهمني والله ما قادره 

أسر حضنها /هشششش اهدي اهدي والله كله هيعدي بس خلي عندك ثقه في ربنا 

حور هزت راسها وبعدت عنه 

أسر بضحك /بس بردوا هتاكلي معايا ولو مش عوزاني اكل وأفضل من غير اكل متاكلشي… ها هتاكلي معايا ولا اموت من الجوع

حور هزت راسها بايوة 

أسر وحور أكلوا وأسر اتبسط من جواه انه قدر يخليها تاكل وبعد ما خلصوا اكل 

أسر بحماس /تعالي يلا نسمع كرتون جديد

حور هزت راسها بالنفي

أسر سحبها من ايدها /يلا انا بعرفك مش باخد رائيك وبعدين فيها كراتين كتير جديده تعالي نختار واحد نسمعه 

وبعدين اخدها وطلع بره وكان والده ووالدته قاعدين 

ايمان اول لما شافت حور راحت ناحيتها وقعدتها وقعدت جنبها 

أحمد /عامله ايه دلوقتي يا بنتي 

حور /بخ… وبصت لأسر وبعدين كملت الحمد لله يا بابا 

أسر /طب يلا بقا وانتي يا ماما اعملي لينا بقا طبقين فشار من ايدك الحلوة دي عشان نتفرج بمزاج 

ايمان بحب /من عنيا

وفضلوا يتفرجوا وأسر اختار كرتون كوميدي عشان يحاول يخفف عن حور شويه 

“حلو ان يكون اهلك هما سندك بعد ربنا سبحانه وتعالى…. الاهل لو مكانوش السند لأولادهم بتبقا اكبر ضربه للاولاد  

لازم تكونوا سند لاودكم وضهرهم وتدعموهم في حياتهم وتقفوا جنبهم 

الأطفال محتاجين فلوس اه بس محتاجين لاهلم اكتر محتاجين صاحب عمره ما يضرهم والبنت محتاجه ام حنينه تبقا صاحبتها قبل مامتها…. صاحبي بنتك وخلي سرها معاك  

خلوا ولادكم يخافوا يعملوا الغلط لأنهم دايما حاطين ربنا قدام عينهم مش عشان خايفين من ضرب واهانه 

اهتموا بولادكم وخليكم سندهم وحافظوا عليهم “

________________________

في المستشفى 

وصل يس ومحمود وقابلوا نورهان في طريقهم 

نورهان بابتسامه /ازيك يا دكتور يس ازيك يا دكتور محمود 

محمود /الحمد لله  

يس /الحمد لله تمام 

محمود /طيب انا هشوف الحالات اللي ورايا عن اذنكم 

يس /وانا كمان عن اذنك

نورهان بسرعه /دكتور يس

يس /نعم

نورهان بابتسامه /حمد لله علي السلامه سمعت ان المؤتمر كان ناجح جدا 

يس /ايوة الحمد لله بفضل جهود الدكاتره 

نورهان /وانت ليك فضل بردوا يا دكتور ولولاك بردوا مكنش نجح كده 

يس /شكرا عن اذنك عشان فيه ورايا حالات كتير 

نورهان باحراج /اه طبعا اتفضل 

يس مشي ونورهان فضلت باصه في اثره 

نورهان لنفسها /أمته بقا تحس بيا يا يس وتحس بحبي ليك 

“نورهان المرشدي /دكتوره أورام محجبه وعندها 24 سنه عيونها بني وبشرتها بيضاء وعندها غمازات قمر عايشه مع والدها وملهاش غيره بتحب يس من ايام الكليه واختارت انها تدرس نفس التخصص بتاعه عشان تكون معاه” 

______________

تاني يوم 

في المستشفى 

 حور عملت التحاليل وراحت المستشفى وكان معاها والدها ووالدتها

ودخلوا عند نورهان

نورهان شافت التحاليل اللي اكدتلها اكتر ان حور عندها كانسر

نورهان بعمليه /حضرتك يا انسه حور لازم تبدائي تاخدي الكيماوي ومينفعش اننا نتأخر اكتر من كده لان كل لما بتتاخر اكتر الورم بينتشر اكتر ودي حاجه مش في صالحنا خالص

أحمد /طيب هنبدأ أمته بالظبط يا دكتوره

نورهان / من بكره ان شاء والجرعات هتبقي علي حسب استجابه الجسم

أحمد /تمام شكرا جدا لحضرتك

أحمد وإيمان وحور خرجوا وراحوا علي البيت وحور طول الطريق ساكته ومش بتتكلم وصلوا عند البيت ولقوا…….

أحمد بصدمه /انت!!!؟؟؟؟؟؟؟

يتبع…..