اسكريبت جواهر الفصل الثاني 2 بقلم سولييه نصار

قالي بصوت مرعب وفجأة حسيت بحاجة اترشت علي وشي وبعدين فقدت الوعي!!

فتحت عيني بصعوبة لقيت نفسي في اوضه غريبة … بصيت حوليا وأنا بحاول افتكر ايه اللي حصل وفجأة افتكرت كل حاجة… هروبي من فرحي والراجل الغريب اللي كان ماشي ورايا وازاي خدعني وطلع أنه مجرم… حاولت أقوم بس اكتشفت إني مربوطة  في كرسي

جواهر : حد هنا؟ أنا فين؟

لقيت حد دخل الاوضه… جسمي ارتعش وهو بيقرب عشان اكتشف أن هو اللي خطفني….

جواهر ببكاء :أنت مين بالضبط وجايبني ليه حرام عليك ده أنا وليه غلبانة وبجري علي يتامي

عمر :حتي الكدب فاشلة فيه..

جواهر :طب قولي أنا اذيتك في ايه؟ ليه جايبني هنا

عمر :هو اللي هنعيده هنزيده يا جواهر قلتلك أنا قاتل.. وعايز اعضائك جواهر :اعضاء ايه اتقي الله هو أنا حيلتي ألا كلية وقلب حتي دوول مستكترينها عليا…. ابوس ايديك يا استاذ رجعني لجدي فرحي كان امبارح زمانه اتشل بسببي..

قرب مني وحط ايديه علي الكرسي وقال

-تقريبا كده انتي هبلة أو بتستهبلي… بقولك أنا خطفتك يعني مستحيل ارجعك.

قعدت أبكي  وأنا بقول برعب:

يعني هتقتلني صح؟!

-ممم بصراحة فكرت ولقيت أنها مش فكرة حلوة …

قرب مني جامد وكمل

-بصراحة أنا دلوقتي في مخي فكرة أحسن

-مش هسمحلك تلمسني.

ضحك بسخرية وقال :

-انتي فاكرة إني لو في بالي المسك مثلا هتقدري تمنعيني وانتي متربطة كده!! عموما متقلقيش أنا مش في نيتي حاجة ابدا أنا صحيح حرامي وبخطف وبقتل لكن إنسان شريف وعمري ما اعتدي علي واحدة

-قد ايه انت مجرم حنين اومال هتعمل فيا ايه.

-هشغلك معايا.

-اتقي الله أنا مش من النوع ده مستحيل أبيع نفسي عشان الفلوس اقتلني أحسن… مستحيل اخلي حد يلمسني أنا بنت ناس محترمة انت ايه يا اخي شيطان…. معندكش  أخوات… أمهات أي حاجة

-اخرسي.

-عايز تشغلني هشك بشك

-بقولك اخرسي وبطلي رغي يخربيتك وبيت اليوم اللي خطفتك فيه… مش هشغلك كده طبعا شغلانة تاني

-بس هتشغلني رقاصة… حرام عليك أنا حتي مبعرفش أرقص… ازاي عايز تعمل فيا كده انت ايه معندكش أخوات أمهات أي حاجة….

طلع سكينة من جيبه فصرخت

-اخرسي بقولك اخرسي…. وديني كلمة تانية وهقطع لسانك… اسمعي الاول وبعدين ارغي براحتك.

-اتفضل يا اخويا هكتم خالص.

بصلي بغيظ وقال :

-عايزك تساعديني اسرق بيت جدك

-ايه؟!

-أنت أكيد مجنون صح؟! عايزني أرجع بلدنا واسرق جدي كمان! بس لحظة أنت تعرف جدي من فين!!

ضحك وقال ببرود :

-هو فيه حد ميعرفش عبد الرحيم اللبان ده أشهر من النار علي العلم…

-مش فاهمة!

قلتها وأنا خايفة

أبتسم بشر وقال :

– بيني وبين جدك معزة خاصة هو اذاني وأنا لازم اردله الضربة في حفيدته .. فهمتي دلوقتي يا حلوة أنا اختارتك ليه

جواهر : يا لهووي يعني أنت عشان تنتقم من جدي خطفتني وعايز تغتصبني… حرام عليك اتقي الله… أنت معندكش ولايا..

-ياربي علي القرف اللي أنا فيه… مالك يا بت ايه حكاية الاغتصاب معاكي!!!

-اومال أنت عايزة ايه؟!

-احييه يا بت متشلنيش بقولك هتساعديني

-ولو رفضت!

مد السكينة وقال بصوت مخيف

-يبقي قولي علي نفسك يا رحمان يا رحيم… ها قولتي ايه يا شاطرة هتساعديني ولا اقتلك واخلص من زنك…

ساعدتها مكانش قدامي حل إلا إني أوافق.

-هساعدك يا أخويا هو أنا أقدر ارفض!

-تمام هنتحرك الصبح بس قبل كده عايز طلب صغنن منك

-اؤمر يا أخويا

-أنا اتصلت بالمأذون دلوقتي

-خير أنت ناوي تتجوز وانا هكون الشاهدة صح!

ضحك وقالي :لا يا عينيا انتي هتكوني العروسة.

-يا نهارك اسود انت أكيد اتجننت… أنا مستحيل اعمل كده!

وجه السكينة علي رقبتي فاتوترت وقلت -اتقي الله حرام عليك أنا عملتلك ايه.. اذيتك في ايه… أنا واحدة يتيمة كبرت علي ايد واحد بيكره البنات… أنا عمري ما عشت زي باقي البنات مكانش ليا أصحاب بسبب جدي حتي الحاجة الوحيدة اللي اتمنتها إني اكمل تعليمي جدي حرمني منها… دلوقتي انت جاي تكمل عليا!

-التسول وجو الصعبنيات ده مش هيأثر عليا… هيأجي الماذون ونتجوز وديني يا جواهر لو حاولتي تتكلمي هقتلك فهمتي!

هزيت رأسي بيأس وأنا حاسة أن الدنيا اسودت في وشي.

…..

تاني يوم جهزت نفسي وركبنا عربية عمر ومشينا للبلد…

بعد كام ساعة وصلنا بلدنا…

وقفت قدام بيت جدي وأنا بترعش من الخوف… مسك عمر أيدي وقال :

-يالا يا عروسة.

-أنا مبقتش فاهمة حاجة…

-ادخلي وهتفهمي كل حاجة.

جرني وراه وانا بحاول افهم فيه ايه… خطفني وبعدين هددني إني اشتغل معاه واجبرني إني اتجوزه… طب ليه… معقول هيساوم جدي عشان يطلقني… طيب هو يعرف جدي فين…. أسئلة كتير بتدور في رأسي مش لاقيالها حل… بس كل ده بسببي… بسبب غبائي واستهتاري… ازاي عملت كده حتي لو جدي غلطان كنت حاولت أتكلم معاه أو أوصل لحل بس أنا اختارت الهروب ووثقت في واحد معرفهوش وده جزائي… جزاء تسرعي وطيشي… عيوني دمعت وعمر بيسحبني لبيت جدي الكبير… حسيت أن  خلاص نهايتي قربت…. جدي عمره ما هيسامحني علي طيشي ده ابدا…

دخلت بيت جدي وأنا بترعش… حطيت عيني في الأرض وغمضتها… مش عايزة أشوف حاجة ولا عايزة اسمع حاجة…

الجد:عملتها يا ابن العلايلي… قدرت تضحك علي حفيدتي وتستغلها… قدرت تقنعها تهرب معاك ..

رفعت رأسي وأنا ببص لجدي بدهشة وقلت:

-والله ما حصل أنا مهربتش معاه

-طيب بالنسبة لجوازك منه ده يبقي ايه.

بصيت لعمر بذهول لقيته بيبتسم بسخرية… فهمت أن دي خطة أقنع جدي إني هربت معاه واتجوزته! طب ليه… وازاي جدي يعرفه…

-أنا مش فاهمة حاجة

بصلي جدي بخيبة أمل وقالي أنا هفهمك :

-الأستاذ المحترم استغلك وضحك عليكي عشان تهربي معاه واتصل بيا وقالي أنكم اتجوزتوا وكل ده عشان يضغط عليا اديله الأرض بتاعتي اللي عينه عليها.. -لا يا عبد الرحيم بيه ياريت تقولها الحقيقة قولها أنت عملت ايه في أبويا… خلي حفيدتك تعرف وشك الحقيقي!

بصيت لجدي وأنا مش فاهمة… ضحك عمر وقال

-ايه مش ناوي تقولها يا باشا… مش ناوي تخليها تشوف حقيقتك… من حق حفيدتك تعرف أن جدها المحترم كان نصاب… نصب علي أبويا واخد أرضه وشرده وخلاه يطفش من البلد كلها ويموت بحسرته

بصيت لجدي بصدمة وأنا بقوله :

-صحيح الكلام ده… أنت فعلا عملت كده…

مردش جدي… قرب عمر منه وهو بيقوله بغيظ:

رد يا باشا…حفيدتك بتسألك.. يالا

الجد :أنا منصبتش علي حد… أبوك كان محتاج فلوس وباعلي الأرض والبيت -كداب…. انت استغليت حاجته للفلوس وضحكت عليه.. أخدت منه البيت والأرض بملاليم…  أبويا مات بسببك

-لا لحد هنا كفاية… أنا مليش دعوة بموت أبوك… يعلم  ربنا إني مأجبرتهوش علي حاجة هو أحتاج فلوس وباعلي املاكه لو كنت اعرف أنه هيتشرد بسبب كده ويسيب البلد مكنتش عملت كده

-قدامك فرصة تصلح غلطك…. هات الأرض والبيت وخد حفيدتك

-موافق.

…..

بعد ساعة كانت كل حاجة خلصت عمر اخد حقه وأنا اتطلقت منه….

رحت علي اوضتي من غير ولا كلمة…. اللي عيشته في الأربعة والعشرين ساعة اللي فاتوا كان صعب اووي كان مفروض اقول لجدي الحقيقة بس كأن لساني اتربط لمدة طويلة مقدرتش اتكلم… طلعت من اوضتي وأنا مقررة اقوله كل حاجة…