رواية طفلة أرهقت قلبي الفصل الثالث عشر 13 بقلم عائشة البشير

رواية طفلة أرهقت قلبي الفصل الثالث عشر 13 بقلم عائشة البشير

رواية طفلة أرهقت قلبي البارت الثالث عشر

رواية طفلة أرهقت قلبي الجزء الثالث عشر

رواية طفلة أرهقت قلبي الحلقة الثالثة عشر

” شكرا يالله 🤍💜
لأنك معي تعلم عني مالا يعلمه أحد
تخطف حزني الذي لاأحدثُ بهِ أحد
وتسمع شكواي التي لاأبوح بها لأحد
وترحمني أكثر مما يفعل أي أحد 🤍💜 ”
ثاني يوم الصبح حسام ماقدرتش نرقد كويس نومي كله متقلق ونفكر مني قصدها بالثانيه!! اللي شادتهالي في كل مره، رن المنبه 8 ونص، نضت بدلت حوايجي ونزلت متوجه للمخبز، قبل مانوصل في باب الحوش تلفتت وأني نسمع في صوت في المطبخ، إستغربت مني نايض في هالوقت!! توجهت للمطبخ توقعت أنها أمي بنصبح عليها، بس تفاجأت بيها واقفه تنظف في الثلاجه نزلت عيوني طول وتلفتت للجهه الثانيه قعدت نستغفر وكنت بنطلع بس لساني تكلم غصبا عني: صباح الخير، شني إديري في هالوقت في المطبخ؟؟
دنيا تلفتت بفزع: صباح النور، وبتوتر: أسفه شكلي نوضتك بالدوشه اللي دايرتها
حسام بنفي: لا أصلا طالع للعمل، بس أنتي خيرك نايضه من توا؟
دنيا كنت نشوفله بإستغراب يتكلم وهو متلفت للجهه الثانيه: ماجانيش نوم قلت إنوض إندير حاجه نلهي فيها
حسام مش عارف شني جاني نبي نطلع ومانبيش، قعدت واقف ونحك في جبهتي وعيوني بتوتر
دنيا لاحظت أنه مش طبيعي خفت أنه يكون مريض قربت بخوف: حسام أنت كويس!!
حسام حسيت بيها تقرب من ريحتها، من غير مانتلفت مديت أيدي، وبغضب: أوقفي مكانك معاش تقربي أكثر، ماتعرفيش أنه الريحه مكروهه في رمضان ليش تحطيها
دنيا قعدت إنشوفله بإستغراب خيره هذا!! شني جاه!!، و عارفه بس أني مش حاطه ريحه بكل
حسام، بغضب😠: وهذي ريحة شني إمالا اللي تفحفح في المطبخ
دنيا قعدت إنزل في رأسي ونحاول إنشم في حوايجي، ريحة شني هذي اللي يحكي عليها، : مش عارفه!! شكلها ريحة الشامبو

 

 

حسام زفرت بقوه أستغفر الله العظيم أني شني إندير!! باهي علاش قاعد واقف!!، بغضب😠: باللهي مازالو هاليومين ماتفسديش صيامي معاش تطلعي من دارك قبل س9، وطلعت بسرعه وأني نستغفر
دنيا قعدت نشوف للمكان اللي كان واقف فيه وعلامات الدهشه على وجهي شني قصده باللي قاله، كيف نفسد صيامه!!، واضح أنه قعادي أهنايا مش صح😔
هربت من التفكير اللي شاغلني طول الليل نبي نلهي روحي في أي شي باش ننسي، بس زاد هوا بكلامه شغل مساحه أكبر من عقلي
^^^^^^^^^^^^^^^^^^^^^^^^^^^^^^^
حسام صليت العصر ورجعت قعمزت وراء الطاوله في المخبز، بالصدفه سمعت واحد واقف يعبي في خبزه ويتكلم في التليفون
الشخص: باهي يابابا حاضر اليوم توصلك الكيكه بإذن الله، باهي عارف ليها إسبوعين بس الله غالب هذا وين ربك رزق، باهي خلاص إن شاءالله، سكر التليفون وتنهد بضيق وتوجه بيخلص الخبره، أبتسم😊 أول ماشاف حسام يشوفله وشكله كان مركز معاه، بإبتسامه😊: البنت شادتها في جرتي تبي كيكه ناجحه وأني اليوم بس كيف خلصت قلت نأخذهالها وخلاص أهو الواحد يفرحها
حسام أستغربت منه كيف قعد يحكيلي في قصة حياته،🙄 شكله شافني مركز عليه، أبتسمت مجامله: ماشاءالله ربي يبارك، وعقبال ماتشوفها كيف تبي إن شاءالله
الشخص، بإبتسامه😚: بارك الله فيك، مدله الفلوس وطلع
حسام النجاح ذكره بيه خبط رأسه بإيده تي كيف نسيت أني، تلفت لواحد يشتغل معاه: قتلك نتيجة الشهاده العداديه طلعت؟
الشاب: مش عارف، لكن خش أسأل جمال اللي على العجانه عنده ولده شهاده على ماأعتقد
طلع حسام وأشر للشاب يوقف مكانه لبين مايرجع
^^^^^^^^^^^^^^^^^^^^^^^^^^^^^^^

 

 

دنيا، بحزن😔: قتلك ياعمتي والله مانبي ماعنديش خلوق حتى نطلع للسوق، باللهي شايفه وضعي وضع واحده فرحانه وتبي حتى حوايج عيد!!
سعاد دمعو عيونها😢: الله غالب يابنيتي الحي يبي والميت يبي، وأنتي ياسرك اللي شفتيه ياروحي قاعده صغيره على اللي صار فيك
دنيا تنهدت بحزن😔 وعيوني تعبو دموع: الحمدلله ياعمتي، ووقفت: نمشي نصلي وإنجي وطلعت بسرعه قبل ماينزلو دموعي، تعودت مانوريش ضعفي لحد، نعيش حربي الداخليه بروحي، نبكي بروحي، كل طقوس حزني إنديرها بروحي، نحب نطلع قدام الكل في صورة توحي بالصمود،
توضيت وصليت وقريت شويه وسكرت الكتاب، سبحان الله الفتره الأخيرة فيا هلبه حاجات تغيرت حسيت روحي بديت نتعلق بربي أكثر يمكن لأني عرفت أنه الوحيد اللي مستحيل يتخلي عليا الكل يمشو ويتغيرو إلا هوا، الصله اللي تربط العبد بربه من أقرب الصلات للقلب،
بس ماننكرش فضله هوا اللي قربني لربي بهالطريقة، فتح عيوني على أهم شي كنت غافله عنه، كان ديمه يقولي خلي ثقتك بالله قويه وراح يهون كل شي، الضيقه اللي في صدرك مافيش حاجه تخففها إلا الصلاه وكتاب الله، كان دايم ينصحني بالإستمرار بالأذكار والرقيه، فزيت بسرعه وكأني إذكرت شي، ليا أيام هامله الرقيه ومعاش قريت على الميه اللي نشرب فيها، طلعت بسرعه وتوجهت للمطبخ
دنيا: عمتي نبي شيشة إميه صغيره
سعاد، بشك🙄: ليش فاطره!! مش فطرتي من أسبوعين
دنيا إنصدمت😥 كيف عرفت أني فطرت من أسبوعين، نزلت رأسي بحشمه: لا عمتي مش فاطره كنت نصلي، بس نبي شيشة إميه نقرأ فيها رقيه
سعاد أبتسمت: أطمني إمية شرابنا كلها مرقيه، هذا باش نقولك إمية الشراب ماتبزعيها في الحوض
دنيا بإستغراب🤔: كيف مرقيه مش كل يوم تجيبو في بانقات جدد
سعاد حركت الطنجره اللي واقفه عليها، وتلفتت لدنيا: أيه بس حسام راقي بانقه وحاطها في الدولاب اللي وراك، تلفتت دنيا للدولاب، وكملت سعاد: وكل مايجيب إميه يصب فيها من هذيكا البانقه المرقيه، ووين تكمل ياأما يرفع بانقه يرقيهاله شيخ الجامع ياأما يرقيها بروحه، يعني أطمني الميه كلها مرقيه😊
دنيا بصراحه إستغربت منظره مايوحيش أنه متمسك بالأشياء هذه🤔، قاعد نكتشف كل مره شي جديد فيه، وكل مالها الزاويه اللي في داخلي ليه تكبر وتكبر، هزيت رأسي وطلعت من غير ولا كلمه
_فعلا هذا النقاء الحقيقي للمؤمن أنه يكون متمسك بإسلامه وإيمانه بالله بقلبه مش بشكله الخارجي، في وقتنا هذا أصبحنا نشوفو في هالفئه بكثره، تربية اللحيه وتقصير اللبس، وقلبه مليان بالذنوب والمعاصي، يحاول يغطي مافي داخله بشكله المصطنع

 

 

“” يارب ثبت قلوبنا على طاعتك “”💜🤍
دنيا رجعت للدار طلعت رسالة بابا من تحت المخذه بس رديتها بسرعه خايفه 😟من محتواها، كنت حاسه أنه فيها شي راح يكسرني أكثر، هزيت رأسي محاوله مني لإستبعاد الأفكار السيئه اللي خطرت على بالي، وخذيت تليفوني وكلمت خالتي دقايق وسكرت، خطرت على بالي هند صاحبتي اللي قبل وفاة أهلي حطيتها في الحظر لأنها قلقتني بإتصالاتها وأسئلتها المتكرره على حسام، تنهدت بأسف وحطيت على رقمها نحيت الحظر وطلعت رجعت للمطبخ نساعد عمتي شويه
^^^^^^^^^^^^^^^^^^^^^^^^^^^^^^
حسام، بإبتسامه☺: يعني طلعت!!
جمال: ليها فوق الإسبوعين، عندك حد شهاده ولا كيف؟
حسام: أي عندي
جمال بإستغراب🙄: وكيف ماسمعتوش بالنتيجة طلعت معقوله!!
حسام تنهدت بأسف😞: صارت معانا ظروف وكانت عندنا حالة وفاه إنسيناها بكل النتيجه
جمال: يمكن الرابط قاعد عندي، كأنك تعرف رقم الجلوس نشوفوه
حسام إذكر أنه حافظ الرقم من لما كان يراجع معاها كل يوم في الأسئله وكيف حلتها، أبتسم😊: أي حافظه ترا نشوف
مدله جمال التليفون بعد مافتحله الرابط ومشي لواحد من العمال اللي ينادي عليه
حسام كتبت الرقم وأني متوتر وأيديا يرجفو تقول عليها نتيجتي، والله حتى في نتيجتي ماصار فيا هكي ماكنتش نعدل ضاربها إيزي صابت صابت خابت خابت، ضيقت عيوني أول ماطلعت الصفحه😣 خايف من اللي بنشوفه وقعدت نقرأ بالشويه بصوت مسموع: دنيا سعيد ال……، ناجح، ممتاز، 95.87، ضحكت من قلبي☺ والله وطلعت نابغه هالبنت كنت متخيلها تجيب ثلاثه أربعه كعكات على الأقل، ماكنتش مهتمه هلبا بقرايتها، ديمه تحكي على الكتب وقصص الخيال والرعب اللي مهووسه بيهم، صورت النتيجه ورديت التليفون لجمال وخذيت أذن وطلعت كلمت أمي وتأكدت أنها ماعندهاش علم بالنتيجه وواضح دنيا بروحها ماتعلمش الشي اللي صار أكيد نساها، سكرت من أمي وأني نفكر في شي
^^^^^^^^^^^^^^^^^^^^^^^^^^^^^^^

 

 

في حوش مفتاح
سالمه كانت طالعه من المطبخ لما أنتبهت لمفتاح اللي مقعمز في الصاله وسارح، قدمت جيهته، وبإستغراب🙄: وين سارح، إن شاءالله خير
مفتاح فز على صوت سالمه: هااا خير خير، كملتو الفطور، راكم تنسو العمال اللي في حوش عادل( عادل كان بادي يبني فوق حوش أهله، بوه مايبيشي يطلع من بحداهم ويسكن بعيد، وبالأخص أنه عصام وعامر ساكنين بعيد عليهم شويه، كان يبي عادل يقعد جنبه)
سالمه: لا لا مش ناسيين إرتاح، قتلك شني صار إمبارح في حوش سعاد شني قاللكم المحامي؟؟
مفتاح، بغضب😠: قتلك ماصار شي من إمبارح هالموضوع مايهمكش ليش تسألي ثاني
سالمه ناضت بسرعه وهيا تتحاشي غضبه، أما مفتاح ف سرح وهو يذكر النقاش اللي صار بينه وبين خوته إمبارح بعد ماطلعو من حوش مصطفي
Flashback
بشير، بغضب😠: والله مانبدأ ولد ال….. كان سكتلهم وخليتهم يضحكو علينا
المبروك😞: عمري ماتوقعت أنه مصطفي يطلع هكي معقوله الطمع عمى عيونه بالشكل هذا
مفتاح وقف وأشرلهم يوقفو وتلفت لمحمد اللي كان يمشي وراهم، ووقف حتى هوا بعد ماشافهم وقفو، مفتاح شاف للمبروك بمعني يبيه يصرف محمد
المبروك: روح للحوش يامحمد وماتخليش أمك وخواتك بروحهم، أني بنطلع ومرات نتأخر شويه، ولو سمعت أي شي قبل شويه الأحسن أنه مايطلعش فاهم🤨
محمد إستغربت أول مره بوي يقولي هكي، بس واضح أنه يوزع فيا، ماتكلمتش هزيت رأسي وتخطيتهم وتوجهت للحوش، بس زعما شني اللي صار وخلا عمي مصطفي يلز بوي وعمامي، ويطلعو معصبين هكي!! وليش بوي مايبيش حد يعرف باللي صار!!
مفتاح وهوا يشوف لمحمد اللي أدرق وأختفي من قدامهم، وشاف لخوته بضيق: أحني غلطنا وماعرفناش كيف نتصرفو، عياطنا وعصبيتنا كان أكبر غلط
بشير، بغضب😠: كيف!! وأنت عاجبك اللي صار قصدك!!
مفتاح أشرله بإيده ينقص صوته، وبضيق: أكيد مش عاجبني ولا راضي عليه، بس أحني هكي خسرنا كل شي وخلينا البنت تكرهنا بالزايد، مافيش واحد فينا طلع حكيم وفكر يكسبها، أحني بغبائنا فتحنا لمصطفي المجال بأنه يستفيد من رزق خونا اللي أحني الأولى بيه
المبروك، بعدم فهم🙄: كيف شني قصدك؟
مفتاح تلفت لبشير: عيالك قاعدين؟
بشير، بإستغراب🤔: لا في حوش أهلها، بس علاش تسأل؟؟
مفتاح: معناها نخشو لمربوعتك أفضل من وقفتنا أهني ونفهمكم شني قصدي بالضبط؟؟
خشو لمربوعة بشير، ومفتاح أشرله أنه يسكر الباب
بشير، بإنزعاج: تي قتلك مافيه حد الزفت، أستغفر الله
مفتاح: معليش مهما كان سكره على الإحتياط مرات يجي واحد من ولادك على غفله
بشير ناض وسكر الباب وهو يزفر بغضب😤، ورجع قعمز وهو يشوف لمفتاح وبنفاذ صبر: هيا أنطق اللي عندك!!
مفتاح مرر نظره لخوته وتنهد بأسف😞: أحني أكثر واحدين نعرفو أنه مصطفي مستحيل يلعب بالأوراق ويزورهم، هو مش هكي ومستحيل يكون هكي
بشير، بغضب😠: والنبي تكلم بسرعه وريحنا لشني تبي توصل
المبروك، برفعة حاجب🤨: معناها أوراق الوصايه والتنازل أكيده سليمه!! والكلام اللي قاله المحامي مزبوط؟؟
مفتاح هز رأسه بمعني صح، وزفر بضيق: أنتم عارفين علاقتنا بسعيد كيف كانت أكيد هو مش غبي باش يخليلنا رزقه بالساهل!!

 

 

بشير،بهزوه😏: معناها مادامكم متأكدين هكي المفروض نحطو أيدينا تحت خدودنا ونندبو حظنا
مفتاح أبتسم أبتسامه جانبيه😏: صح أحني مانقدرو إنديرو شي بس ولادنا يقدرو، يعني البنت أكيد في يوم راح تتجوز وواحد من ولاد عمامها أولى بيها😉
مبروك إضايق بأنه خوه يفكر في نفس تفكيره يعني جي من ينافس ولاده على دنيا، تنهد بضيق: برأيك بعد اللي صار مازال نقدرو نحطو عيونا في عيونهم ونقولو نبو حتى البنت
مفتاح أبتسم بمكر: وهذا رأس الخيط اللي نبي نوصله، لازم اللي صار الليله يتصلح وأحني ملزومين نعتذرو من سعاد ومصطفي ودنيا بالأخص
بشير، برفعة حاجب🤨:أني مانعتذر من حد
المبروك، بهزوه😏: معناها نقص واحد من المنافسين
مفتاح،بغضب😠: بتعتذر بالسيف عليك، وبتحذير: والكلام اللي صار حسكم عينكم يعرفه حد من إمساوينكم ولا صغاركم فاهمين، اللي صار مات غاذي وغذوه تنفتح صفحه جديده
بشير، بغضب😠: تي بعد لزونا تبينا نولو ونعتذرو منهم والله مايصير هالكلام
مفتاح، بحده: ماتنساش أنك حتي أنت عجنت في الكلام وكنت بتمد أيدك على مصطفي، وبعدين سعاد أختنا الوحيده وغلط نخسروها وإنعادوها حتى قدام الناس
المبروك، بتأييد: كلام مفتاح صح، بعداوتنا ليهم مش راح نكسبو شي، وبنخششو أرواحنا في مشاكل ومتاهات ماعندناش ليها جهد، فالأحسن كل شي ينتهي قبل مايبدأ
مفتاح وقف وهو يهز في رأسه: وهذا الصح، وغذوه نفس هالوقت نمشو مع بعض ونعتذرو منهم، ونزيد نعاود ماحد يسمع باللي صار وبالأخص مرتك أنت يابشير كان هذا تلقاه الخبر في البي بي سي الليله
بشير ضحك😅: كنا طامعين في قرشين بنجيبو بيهم العربيه لكن ماصارش
مبروك بحده: ريح روحك أنت ماسلمت بواحده باش تجيب الثانيه، النسون كلهم زي بعضهم مافيش من وراهم غير الهم وطياح الجهد

 

 

مفتاح أبتسم وطلع متوجه لحوشه، وطول الليل وهو يفكر كيف راح يخلي ولده يتغلب على ولاد عمه وينتصر بدنيا، والأهم أنه يبعد حسام اللي شايف أنه خصم ليهم حتى هو، بعد اللي داره وقاله
Now
أستاقظ مفتاح على تسكيرة باب الحوش، وشاف عادل خاش
عادل أبتسم😊: السلام عليكم، ومشي قعمز جنب بوه: كيف حالك يابوي؟
مفتاح: وعليكم السلام، باهي الحمدلله
عادل، بتوتر: قتلك يابوي شني صار إمبارح ؟
مفتاح خاف أنه حسام يكون حاكيله، بخوف😟: شني صار!! ماصار شي أنت سمعت حاجه؟؟
عادل بنفي: لا ماسمعت شي، بس من شويه حسام بعتلي رساله” الليله إمدايرين حفله مفاجأه لدنيا بمناسبة نجاحها، ياريت تحضرو أنتم الشباب والبنات على الأقل، بغض النظر على اللي صار إمبارح، حتى على خاطر دنيا البنت شافت هلبا أهو نديرو لقطه بسيطه نغيرولها جوها شويه ”
حسام بعتت الرساله لعادل ومحمد وسامر، وخطمت على خالتها وقلتلها، تلفتت للكرسي الخلفي نتفقد في الأشياء اللي خذيتها: الكيكه والألعاب الناريه والشموع والزينه، شكلاطه وعصير فرش وحلويات، تلفتت وفتحت الدرج القدامي، نتأكد من عنصر الحفله الأساسي الهديه، أبتسمت😊 وولعت السياره وطلعت، متمني هالليله تكون بدايه جديده لينا❤
“تفاصيل السعاده بسيطه، تحتاج فقط لمن يقدمها”
^^^^^^^^^^^^^^^^^^^^^^^^^^^^^^^
في حوش المبروك البنات يحوسو على الفطور، وفوزية قعمزت بتولع على الشاهي بعد ماحطت العاله، ومبروك يسبح، ومحمد كيف خاش من برا وأيديه معبيات أكياس
محمد: السلام عليكم، كيف حالكم توا؟
فوزيه، بإبتسامه: وعليكم السلام سلمه جياب وعليه حجاب ليش تكركر ياوليدي كل شي موجود وبالزايد غير تخسر في فلوسك
المبروك أبتسم على جنب وكمل تسبيح😏
محمد، بإبتسامه😊: اليوم هذا مش ليكم ياأمي
سنيه وهيا طالعه من المطبخ وبإستغراب🤔: إمالا لمني؟؟
محمد: دنيا نجحت وإمدايرين حفله الليله في حوش عمتي، جبتلكم حاجات ترفعوهم معاكم
سرور جابت سفرة الحليب والتمر، وبتذمر: بس الليله كنا نبو السوق ماكملناش لبسة العيد ومعاش مازال وقت
محمد: خلاص بعدين مؤخر شويه نرفعكم للصالات القراب هاذم تأخذو شني تبو
سرور بإبتسامه😊: والله اللي بطيح فيك أمها جابتها زي هالليله( ليلة القدر )، وخشت للمطبخ
فوزيه أبتسمت😊 وهيا إتمتم بكلمات دعاء
محمد جبد واحده من الكيسات وقعد يطلع اللي فيها كان طاقم حقيبه وحذاء هديه لدنيا،
أما المبروك عاجبه اللي يدير فيه محمد لدنيا، وشايف أنه تخطيطه ماشي كيف مايبي
سنيه، بضيق: حلوات بس لازم الهديه يعني!!
محمد، حك جبهته: مش عارف فكرت هكي في حفلة نجاح من غير هديه!!
^^^^^^^^^^^^^^^^^^^^^^^^^^^^^^^

 

 

في حوش بشير
فاطمه بكره: وليش الحفله إن شاءالله، والخسارة والتبرزيق ع الفاضي
سامر🙄: وشني دخلنا بيهم أحني ياأمي يبرزقو ولايرقدو
فاطمه، بحقد😒: أكيده هالمصاريف كلها من فلوس عمك، وكانهم قعدو يصرفو فيهم هكي معناها ماتعباش على السياره اللي تحلم بيها
سامح بضحكه😁: وأحني ولاد البطه السوده، سامر يبي سيارة وأنتي بتغيري أثاث الحوش، راهو حتى أني نبي أيباد أيواه أهو من توا نقوللكم
فاطمه، بإبتسامه😊: كلكم تأخذو اللي تبوه إن شاءالله، وأني خاطري في هذيكا التعليقه اللي قتلك عليها يابشير راهو دير في حسابك هيا الأولى تأخذهالي
بشير، ضحك بهزوه، ويتكلم في خاطره، أحلمي😏
سعد، بإنزعاج: تي هيا ياأمي وقت راهو وين الفطور
سامح، بهزوه😏: تي نوض تحشم على وجهك وعاون أمك بدل ماتعيط
سعد، بغضب😠: نوض أنت ورينا فلاحتك ولا غير دوه ع الفاضي
سامر😤: خلاص أسكتو وفكونا من قطافكم الزايد
فاطمه ناضت وهيا معصبه😡: مافيكمش تمره فالحين كان في المأكله كان ربي يحبني راهو بعتلي بنيه
بشير في خاطره تي غير يحبوك الناس تبي ربي يحبك هلبا هكي، وضحك بصوت😂 لين ولاده تلفتوله بإستغراب🙄
^^^^^^^^^^^^^^^^^^^^^^^^^^^^^^^

 

 

في مكان ثاني أرتفع صوت الأذان وأختلط مع أصوات العياط والرصاص والمدفعيه، وحتى نداء الله ماخلاهمش يؤخرو على الذنب اللي كان يقترفو فيه وفي أيام الله المباركه وفي يوم طاهر زي هذا، قلوب مظلله وعقول مغيبه وأجساد تنتظر حتفها وترسم مصيرها بإيديها إلي جبهات الموت
في نفس هالمكان اللي راحو فيه خيرة شباب بلادنا وراحت أرواحهم هباء
في أحدي الجبهات كان واقف خليفه ويشوف بأسف لعدد الجثث والمصابين اللي كل مالهم يزيدو بإستمرار، من إمبارح وهيا المعارك مستمره بينهم وبين الطرف الثاني، وضاعو هلبا من شبابهم وخسرو هلبا من عتادهم ومخزونهم للذخيره، وهما بروحهم مش فاهمين هالغرض من كل اللي قاعد يصير، ومش عارفين مني اللي قاعد يجر فيهم لهالطريق اللي خسائرها غطت على أرباحها هذا وإن وجدت
تلفت خليفه بفزع لواحد من المصابين لما سمعه ينادي بأسمه، تقدم بسرعه وهوا يكذب في اللي سمعه ويقول يارب مايطلع هو يارب مايطلع هو، بس تأتي الحقيقه لتنفي كل الشكوك، قعمز بأسف وهو يشوف في صاحبه ورفيقه عماد الكينج ينازع بين الحياه والموت، قدم بسرعه وقامله رأسه وحطه على ركبته وهو يعيط بأعلى صوته على المسعفين اللي ماحدش فيهم سامعه من أصوات الضرب اللي كل ماله يقوي
عماد يتكلم بصعوبه وياذوبك قادر ينطق: مانبيش إنموت ياخليفه كنت نبي نتزوج وإندير عويله، مانبيش نموت هالموته، حتى أهلى مش راضيين عليا من لما خشيت هالطريق، ضيعنا أرواحنا والشباب اللي معانا ياخليفه
خليفه يطمن فيه وهو بروحه يبي من يطمنه ويخفف عليه: ماتخافش بإذن الله تعيش وتتزوج وتجيب فريق صغار، وترجع لأهلك وتكسب رضاهم
عماد يحرك في رأسه بنفي: خلاص ياخليفه هذي ساعتي، دير أنت اللي ماقدرتش إنديره أني، أخطي هالطريق ماأضيعش روحك، ياسر الأروح اللي ضاعو، أخطي هالطريق أخط…… وماقدرش يكمل كلماته، وصعدت روحه للي خلقها
خليفه نزل رأسه بحزن😔 وسكرله عيونه وقعد يرددله في الشهاده، وهو حاس بالذنب والندم بيأكله
هالمشاهد اللي تكررت بكثره في بلادنا، من أقوي المشاهد اللي تكسر الظهر وتعل القلب، أرواح زهقت بدون أي حق، دماء دفعت من غير أي مقابل😔
ربي يرحم الجميع ويغفرلهم ويجعل مثواهم الجنه🤲
^^^^^^^^^^^^^^^^^^^^^^^^^^^^^^^

 

 

في حوش مصطفي على سفرة الفطور
مصطفي، بإبتسامه😊: خير مادرت ياحسام على الأقل تغير البنيه جوها حتى شويه
سعاد، بحزن😔: ياناري حتى نتيجتها مش متفكرتها
حسام، بأسف😞: علاش ياأمي اللي صار فيها شويه هوا!! تي باهي اللي متفكره إسمها هيا
سعاد عيونها دمعو ونزلت رأسها😢
مصطفي،بضيق: خلاص ياسعاد شدي روحك شويه على خاطر دنيا، صح هيا ماتبينش أنها متأثره بس هيا مش حجر وتحس راهو، فكينا من النكد وأفرحي وخلي البنت تفرح، الدنيا ماشيه غصبآ عنا
سعاد مسحت دموعها وأبتسمت بحزن😔
حسام مسح أيديه ووقف: الحمدلله، قتلك ياأمي ماتخليهاش تطلع برا باهي
سعاد هزت رأسها: باهي بس وين بتفرش أنت؟؟
حسام: في جنب المربوعه ولا شني رأيك أنتي؟؟
سعاد، بتأييد: لا لا باهي كويس مدرق شويه حتى كان طلعت ماتشوف شي
مصطفي: أنتي لهيها ماتخليهاش تطلع لين تطلعو مع بعض
دنيا كنت نفطر لما رن هاتفي أستغربت🙄 مني اللي متصل في هالوقت،ضحكت بخفه هند البارده ماصدقت شوره😅
دنيا: أهلين ياهند صحه فطورك
هند بعتب: لا أهلين ولاصحه، هكي يادنيا تحطيني في الحظر!!
دنيا، بأسف😞: ماهو أنتي درهتيلي كبدي بنفس الموضوع، وشادتيها زنين فوق رأسي
هند، بحزن😔: خلاص سامحتك، عظم الله اجرك معليشي جت متأخره بس ماحصلتكش كل مانتصل نلقاك قاعده حاطيني في الحظر
دنيا، بضيق: شكر الله سعيك، عادي حصل خير
هند: قتلك شني صار فيك نجحتي!!
دنيا أتفكرت النتيجه اللي ماخطرتش على بالها بكل الأيام اللي فاتو، بضيق: والله ماني عارفه، نسيتها بكل تعرفي
هند، بشهقه😱: هيييي وهيا هذي حاجه تنتسي،
دنيا، بحزن😔: الله غالب لهيت ونسيتها، بس أنتي شني نجحتي؟
هند، بفرحه☺: أي نجحت جيد جدا، ودرت حفله كبيره، بابا جابلي التليفون اللي خاطري فيه، وماما خذتلي التعليقه اللي ورتيهالك هذيكا المره تفكرتيها، وخوي جابلي لابتوب واختي….
دنيا حزت في خاطري تمنيت نكون زيها😔، من قبل فرحتي ناقصه حتى لما كانو جنبي، يابالك توا لما بعاد، تنهدت بضيق وقطعت على هند اللي فتحت موشح: هند نكلمك بعدين مش فاضيه توا
هند: باهي خلاص شوفيها على الرابط وخبريني
دنيا: إن شاءالله
هند: شني صار في رقم ولد عمتك، ماتقوليليش قاعده ماحصلتيشي لتوا؟؟
دنيا، بإنزعاج: قتلك مش فاضيه توا ياهند بعدين نحكو، سلام توا
لوحت التليفون وتنهدت بضيق وغصبآ عني نزلو دموعي😢 ليش مانقدرش نفرح زي البنات، علاش أني الوحيده اللي مافيش حد معاي، قمت رأسي لربي ودموعي ينزلو ” يارب أنت سندي ووجهتي وملاذي وفي يديك وضعت مفاتيح أمري 🤲”، ” يارب وكلتك أمري فأنت خير وكيل” مش طالبه شي إلا أني نفرح “ياألهي أنت فرحي وأنت أُنسي”
” سيبعث الله لك سحابة رحمه🌧.. وينبت في قلبك زهرة من فرح🌹”
^^^^^^^^^^^^^^^^^^^^^^^^^^^^^^^

 

 

 

حسام كنت فرحان فرحه مش عاديه، يعني عندي أمل كبير أنها تلين الليله، وأني أصلا معاش بنرضي بأنها تقعد متجاهلتني بالشكل هذا، هدت حيلي😓، وأني سكتلها بما فيه الكفايه 🤨، تلفتت لعادل اللي يتمتم من لما جي برفعة حاجب: خيرك الزفت هنينا
عادل، بغضب: تي ماخليتش الواحد حتى يكمل فطوره الزفت، هما ريحة إمبايل ودناديش درتهم بروحك وريحتنا
محمد، بضحكه: تي هدي ياعادل مش مستحقه هذا كله على خاطر بطنك، توا نعطيك حصتي من الكيكه😅
حسام بهزوه: تي الهامع هذا الكيكه كلها وإن شاءالله تسده😏
عادل، بحده: هذا فاش فالحين في التسهويك خفو إيديكم بنمشي نتسمسم
محمد تلفت لحسام، بضحكه: تصدق أول مره نشوف صاحبنا معصب وراقيتله، قبل ديمه الفم مفتوح من الودن للودن😂
حسام😉: الجوع كافر، وبعدين بيني وبينك يقعد هكي خير كان بدي في البراده شني يسكته بعدين😅
عادل لوح الزينه اللي في أيده، وبعصبيه😡: واللهي ماقاعدلكم فيها، كمشه مفرخ، ومشي معصب
حسام😁: تي تعالا ياعيل خزيي، يدور في سبله باش يهرب
محمد بصوت عالى: غير رد بالك تلهف الصونيه ياليد، وتلفت لحسام وهو يضحك😅: من يوم يومه همه بطنه تذكر كيف كان يخنب في غدانا ويأكل لين يشبع ويخليلنا فمين في قعر الصونيه🤣
حسام، ضحك😂: عليك أيام محلاهم الزفت ياريتنا ماكبرنا
محمد، بأسف: كبرنا وتغير كل شي، كم معدلها دنيا؟
حسام، أبتس😊: 95.87
محمد، بإبتسام😊: ماشاءالله، الله إيبارك، مش باين عليها بكل
حسام ضحك😅: تعرف بروحي مش مصدق طلعت نابغه وأحني مانندروش
محمد: معدل كويس بكل تعرف كان تكمل بالمستوى هذا ليها مستقبل زاهر إن شاءالله
حسام، أبتسم😊: إن شاءالله، الحق اللي صار معاها مش شويه ربي يعوضها خير
محمد، بأسف: إن شاءالله، بس أنت منين خطرت عليك فكرة الحفله؟
حسام سيب اللي في أيده وجي قعمز جنب محمد اللي ينفخ في البالونات، وبتوتر: إنأمنك على سر!!
محمد، بإستغراب: سر!! إن شاءالله خير
حسام خير خير بس بصراحه لازم نحكي لحد معاش قادر نبي مساعده
محمد هز رأسه وهو مركز مع حسام اللي أبتسم ولمعو عيونه بفرحه، أبتسم: عارفينك طايح على خشمك بس مني سعيدة الحظ😁
حسام، بحب: دنيا
محمد بانت على وجهه ملامح الصدمه وماقالش ولا كلمه
حسام، بضيق: خيرك شني جاك، ماكنتش تتوقع هالشي صح!!، أبتسم: أني بروحي ماكنتش متوقع هالشي بس هذا اللي صار
محمد بإستغراب: أنت ودنيا!! بصراحه الموضوع غريب شويه
حسام بضيق: عارف بس هالشي مش بإيدي،
محمد تنهد وهو عارف ومتأكد من هالشي الحب مش بإيد حد، بضيق: بس حاس دنيا صعبه ومش من النوعيه اللي ترضي بالساهل بتعبك معاها
حسام، تنهد بأسف: صح عارف بس الله غالب وقع الفأس بالرأس
محمد، أبتسم: بس حتى أنت مش ساهل وتقدر تجيبها،
حسام، بأسف😞: مش باين والله قاعدين في البدايه وتعبتني معاها، تعرف أني حاولت حتى نستشير أخصائية إجتماعيه تنصحني كيف نتعامل معاها

 

 

 

محمد، بصدمه😯: تكذب!! معقوله!!
حسام تنهد بأسف😞: مش مستعد نخسرها حاولت نكسبها بأي طريقه ولما عجزت إطريت نحكي لأمها وهيا اللي دلتني على أخصائيه تعرفها
محمد، بتعجب: قصدك أم دنيا تعرف بأنك تحب بنتها!!
حسام، بنفي: تي لا مش هكي، بس مش هيا كانت دكتوره نفسيه حكيتلها أني نحب واحده وهيا هكي وهكي وهكي، طبعا من غير مانقوللها مني اللي نحبها وطلبت مساعدتها، وهيا بعتتني لأخصائيه تعرفها، ومشيتلها جلستين
محمد، بتركيز: وفيه نتيجه قصدك!!
حسام: حسيت بأنها بدت تتجاوب معاي بصراحه، بس بعد وفاة أمها وبوها مش عارف شني اللي صارلها، رجعت أحرف من قبل، معاش فهمتها شني تبي بكل
محمد: أنت بروحك قلت أنه اللي صار معاها مش ساهل والبنت صغيره صعب تتقبل التغيرات المفاجئه بسرعه، وبالأخص النوعيه اللي زي دنيا صعب تفهمها شني تبي بالضبط!! لأنها فاقده كل شي تقريبا
حسام، بإعجاب: والله شكلي بنقلب عليك منين هالتحليل العميق هذا؟؟
محمد،أبتسم😊: تقدر تقول من هواياتي الأهتمام بعلم النفس يعني قاري هلبا كتب في هالإختصاص ووضع دنيا أغرب شي ممكن يقابلك
حسام تنهد بحزن: وأني طحت في أغرب شي قصدك، وأبتسم: بس عادي على قلبي زي العسل، كان غير تلين شويه وتحكيلي شني قصة الثانيه اللي شادتهالي
محمد، بإستغراب: كيف الثانيه!!
حسام وقف ورجع للي كان يدير فيه، بضيق: والله بروحي مش عارف، وتلفت لمحمد وبرجاء: باللهي هالشي يقعد بينا
محمد أبتسم إبتسامه مطمنه: ولايهمك مافيش حد غيري يعرف يكتم السر، ولو تبي مساعده عادي ماتترددش، خير ماتصرف فلوسك على الدكاتره النفسيين والأخصائيات😉
حسام أكتفي بهز رأسه وهو يضحك😅
وقفو الإثنين بعد ماكملو وهما يسمعو في صوت أذان العشي، طلعو وتوجهو للجامع
^^^^^^^^^^^^^^^^^^^^^^^^^^^^^^^

 

 

في حوش مفتاح
روح عادل من الجامع وخش وهو ينادي بصوت عالي: أمي، ياعلا تي وينكم الزفت
طلعت علا من الدار، بإنزعاج: خيرك تعيط، شني فيه!!
عادل: هيا وينكم مش قلتلكم نروح نلقاكم واتيين!!
علا، بضيق: أمي مشت من بكري هيا وسناء وسميه
عادل: وأنتي خيرك مامشيتي؟ وعبير وينها؟
علا: نحس في روحي مريضه ماعنديش نيه، وعبير ماتبيش تمشي قاعده في العده ولانسيت
عادل: وكأنها في العده ماتطلعش يعني فاهمين الدين بالغلط، باللهي أحسن فكه منها ومن نكدها، هيا أطلعي أنتي
علا، بملل: قتلك مريضه مانبيش نمشي
عادل، بهزوه: أقعدي أندفسي جنب النفسيه اللي مندفسه الداخل، وطلع وقربع الباب
علا، بغضب😠: هذا ماناقص غير نمشي نبارك للفاجره، لا والسيد حسام فرحان وإمدايرلها حفله، ياحسرتي على حظي، تلفتت ورجعت للدار وشافت لعبير اللي تهدرز في التليفون، هذا حالها في النهار راقده وفي الليل تشدها على التليفون للفجر، شافتلها بضيق وتكلمت في خاطرها مابعده حتى تحملك 4سنين مكافح بصراحه يستاهل جائزه، لفت وطلعت ثاني وقعمزت قدام التلفزيون
^^^^^^^^^^^^^^^^^^^^^^^^^^^^^^^

 

 

في حوش مصطفي
سعاد مقعمزه هيا وسالمه وسناء وسميه وفوزية وسرور وسنيه، بعد ماقلتلهم ماحدش يجيب سيره قدام دنيا لين يكملو الشباب كل شي ويطلعو مع بعض، وملامح الصدمه والإستغراب 😯🙄مستغلات كامل تفاصيل وجهها ماتوقعتش أنهم ممكن يجو بعد اللي صار إمبارح
ودنيا ماكنتش أقل منها صدمه هيا الثانيه، وتفكر كيف هكي!! لا ويهدرزو عادي جدا شكلهم ماعندهمش علم باللي صار، وقفت ومشت للمطبخ بدير القهوه
في هاللحظات إنفتح الباب وخش حسام وهو يتلفت يمين ويسار ويتأكد لو دنيا جنبهم أو لا، وبصوت واطي: كل شي واتي وحتى خالتها جت، هيا ياأمي ناديها
سعاد، أبتسمت😊: باهي غير أطلعو أنتم، طلع حسام وطلعو معاه اللي كانو في الحوش، وقفت سعاد جنب الباب وهيا تنادي:دنيا يادنيا
دنيا من المطبخ نعم ياعمتي شويه وإطيب القهوه
سعاد خلاص مش لازم طفي عليها وتعالي
طلعت دنيا وهيا مستغربه لما مالقت حد: خيرهم وين مشو؟
سعاد، بإبتسامه😊: روحو تعالي نقعمزو برا حاسه خاطري ضايق
دنيا قربت من عمتي وأني مستغربه🙄: خيرهم روحو بسرعه شني صار؟
طلعت سعاد وهيا تقيم في كتافها دليل على عدم معرفتها، وبعدين سرعت خطواتها وخلت دنيا وراها وأختفت من قدامها
دنيا: عمتي خيرك تجري أصبري شويه ولحقتها بخطوات سريعه وأول مالفت جنب المربوعه تفاجأت وإنفتحو عيونها بصدمه من اللي شافاته😯
خلي نوصفلكم المكان، كانو حاطيين زوز طاولات جنب بعض عليهم الكيكه والشكلاطه والعصير والمشروب والحلويات والطواسي والصواني، وطرمس قهوه وواحد ثاني شاهي، ونوعين نواشف جابتهم ناجيه، وفيه طاوله ثانيه في جنبهم عليها الهدايا وكل واحده مكتوب عليها من مني، والزينه معلقه على الحيط والأرض كلها بالونات باللون الأبيض والبنفسجي، ومفرشين سجاده كبيره ومقسمين الفراشات بين جلستين واحده للمساوين والثانيه للشباب، إن شاءالله غير فهمتو مانعرفش نوصف كويس😅
تفاجأت دنيا باللي تشوف فيه قدامها وقعدت تمرر في نظرها لكل الموجودين بصدمه ونظرات عدم فهم
ناجيه قدمت وحظنتها: مبروك النجاح يادنيا ألف مبروك عقبال الشهاده الكبيره يابنيتي
بدو الكل يقدمو ويهنو فيها ودنيا ملامح الصدمه❤ مافارقتش وجهها، لحد ماقرب مؤيد وتكلم وهو يضحك😅: معطله ياأنسه دينا باش تستوعبي، تي نبو نقعمزو إعيينا من الوقوف
دنيا أبتسمت بفرحه لمؤيد😊، بجد واقع الصدمه كان كبير عليا ماقدرتش نستوعبه بسرعه، أول مره نحس أنه في حد فرحانلي أول مره نحتفل بنجاحي أصلا، أول مره حد يتفكرني، قمت رأسي بقوه نحاول نمنع دموعي من النزول، لا أكيد مش راح نضعف توا مش حا نبين حزني في الوقت اللي المفروض نكون فيه أسعد واحده، قمت عيوني لربي بشكر ماتوقعتش تلبي دعوتي بهالسرعه شكرا ياربي شكرا🤍❤

 

 

حسام الفرحه اللي شفتها في عيونها كنت مستعد ندفع عمري فداها من غير تردد، ماكنتش متخيل أنها تفرح بالشكل هذا طول الوقت وعيوني عليها أول مره نشوفها فرحانه بالشكل هذا وتضحك وتهدرز ومنسجمه مع الكل، الحمدلله
” أبتسمي يادنيتي فأنتي جميله… والأشياء الجميله لاتستحق الحزن ”
دنيا كانت هالليله تصنف من أسعد أيام حياتي، أنك تحس أنه في ناس تحبك وفرحانه لفرحك شي من صغير بكل وبالأخص بالنسبه ليا بعد الجفاء اللي شفته، جرعة حنان واحده كانت كافيه تخلى قلبي يورد من جديد، أبتسمت😊: شكرا بجد مش عارفه كيف نشكركم
فوزيه: والله حتى أحني فرحنا زيك قداش ليا تلاقينا وأجتمعنا هالجمعه الحلوه هذي
ناجيه، بإمتنان: والله بارك الله فيه حسام هاللي فرحك وفرحنا
دنيا تلفتت بفرحه وتلقو عيوني بعيونه وكأنه كان معاي طول الوقت بعيونه، أبتسمتله بفرحه وهو ردلي الإبتسامة😊
” يوم بعد يوم أزدادو يقيناً.. بأنك هديه من هدايا الله لجبر الخواطر ❤”
مؤيد صفق إيديه في بعضهم👏: هيا ياعويله كلينا وتبحبحنا جي وقت الهدايا توا
دنيا بضحكه😅: خيرك مستعجل
حسام س2 تمت هالحفله على خير، والحمدلله حققت المرغوب وبالزايد، ضميت الحوسه اللي برا أني ومحمد
حسام، بضحكه😁: عادل الهامع هرب حتى توا، أكيده مشي يتسحر
محمد😅: ماأنظنيش جاع بعد الحلو اللي كلاه
وكملنا ضمان في صمت لين قطع هالصمت محمد
محمد، بتوتر: حسام!! وكمل لما تلفتلها حسام بتسأل، أبتسم: ممكن عرفت سبب التغيير المفاجئ لدنيا معاك، وشني قصدها بالثانيه؟

 

 

حسام، بإستغراب: أنت ياولد بتخليني إنشك في حاجات ثانيه، مني معاك!! متأكد مافيش جن هكي ولا هكي!!
محمد أبتسم: تي بطل براده والله نحكيلك جديات تذكر هذيكا الليله لما شفتك أنت وعلا، وكمل لما حسام هز رأسه، وبتوتر: مش أني بس اللي شفتكم!!
حسام فتح عيونه بصدمه: قصدك حتى هيا شافتنا!!
محمد، بأسف: أيه، بس هيا ماسمعتش كل شي، والباين أنها فهمت غلط من الجزء اللي فهماته، وحكاله محمد الموقف بالضبط والكلام اللي سمعاته دنيا، مما خلا حسام يحذف اللي في أيده ويخش بسرعه من غير مايعطي بال لمحمد اللي ينادي عليه ويجري وراه بس مالحقش عليه
حسام خشيت الداخل وأني معصب وناوي نحكي معاها بأي شكل، لو نخش عليها في الدار وهيا راقده، وتفاجأت بباب الدار مفتوح وهيا مش فيها، تلفتت وأنتبهت للصوت اللي في المطبخ
حسام وقفت في باب المطبخ، وبغضب😠: أمي وين؟
دنيا، بإستغراب🤔: عمتي وعمي مصطفي تسحرو وخشو رقدو، خيرك حسام أنت كويس؟؟
حسام قعدت نشوف لعيونها معقوله نخليهم يحزنو بعد مافرحتهم، قعدت نعد في خاطري من 1إلي10 نحاول نهدأ صبرك يارب
دنيا قدمت وأني نشوف في حالته مش طبيعيه، وبخوف😟: حسام أنت كويس!! فيك شي!! تكلم ماأطيحش قلبي
حسام ااااااه ياقلبي أني، قدمت وسحبتها في حضني، وبدموع😢: ماعندكش حق تحرميني منك طول هالوقت على شي تافه زي هذا، كيف يصورلك عقلك بأني ممكن نشوف لغيرك كيف!!
دنيا، بأسف😞: عارفه أني زودتها شويه بس حط روحك مكاني شني كنت راح تفهم، حاولت نوخر عليه شويه
حسام حضنتها أكثر: مافيش ماتحاوليش بكل فاهمه!!، ياريتك حسيتي بيا الأيام اللي فاتو كنتي عرفتي قداش عذبتيني
دنيا، بحزن😔: أسفه، بس مش أنت الوحيد اللي تعذبت، قلت هالكلمه وتبكشت حسيت أني تهورت بكلمتي
حسام بعدتها شويه وأني نشوف لعيونها بتركيز، وخذوني لبعيد لمكان أبعد من ماكنت نتخيل
دقايق بس في حظرتك… وصرت أسير لنظرتك
مسكت قلبي… دعيت ربي

 

 

وقلت الله الله الله يستر
الله يستر من عيونك… لما ترميني في كونك
وتغرقني بجنونك… وتلوني بلونك
الله يستر على قلبي… لما يرجف وأنت جنبي
يحلم بلمسة إيدينك… ومايكفيه إلا زينك
من جمالك نسيت أنا وين!! وين روحي ووين هالعين!!
حتي عقلي طار مني… ومنطقي راح وتركني
وشفت الشمس ف ليلي… وعرفت الهوى مصيري
حسام زفرت بقوه وحطيت أيدي على قلبي محاوله لتهدئة نبضاته اللي صارت ترن في كل المكان، وبرجفه: أطلعي بسرعه من قدامي
دنيا بخوف😟: حسام أنت كويس ليش ترعش!!
حسام أطلعي يادنيا ورحمة بوك، ولما عجزت نخليها تطلع، طلعت أني بسرعه ورقيت لداري
دنيا كنت مقعمزه وحايره في اللي صار، وخايفه عليه شديت تليفوني وحطيت على رقمه ونحيت الحظر، وكنت راح نتصل لما وصلتني رسالة، محتواها نعنش قلبي❤
” أنتِ النعمه المقيمه بين أضلعي… اللهم أنتي للنهايه❤”

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية طفلة أرهقت قلبي)