رواية طفلة أرهقت قلبي الفصل الرابع عشر 14 بقلم عائشة البشير
رواية طفلة أرهقت قلبي الفصل الرابع عشر 14 بقلم عائشة البشير
رواية طفلة أرهقت قلبي البارت الرابع عشر
رواية طفلة أرهقت قلبي الجزء الرابع عشر
رواية طفلة أرهقت قلبي الحلقة الرابعة عشر
” لا شي قادر على تعديل مزاجي حتى القهوه لا تفعل ماتفعلينه أنتِ به ”
‘صحه فطورك الليله القهوه من أيديا نصيحه ماتفوتيهاش😉، هيا تعالي’
دنيا أبتسمت أول ماشفت الرساله رغم أني شاربه قهوه قبل الفطور بس عادي مافيش باس مانبيش نفوت قهوته ونكسر بخاطره، قمت السفره وطلعت
دنيا، بإبتسامه: السلام عليكم صحه فطوركم
مصطفي وسعاد، بأصوات متفاوته: وعليكم السلام، سلمك
مصطفي، بضحكه: تعالي قعمزي معانا يادنيا حسام مشي بيدير القهوه راح 😅
دنيا، بإبتسامه😊: خلي نحط الصفره في المطبخ قبل
سعاد: حطيها وتعالي ماتغسليهاش توا بعدين نغسلوهم خلي نرتاحو شويه
دنيا هزيت رأسي ومشيت
حسام في المطبخ واقف على الغاز ونحرك في القهوه، أبتسمت أول ماخشت حسيت بيها وريحتها سبقتها، بحده: شني قلنا أحني على الريحه!!
دنيا بفزع: بسم الله العظيم أني ماتكلمتش كيف عرفت أني خشيت، ولا عندك عين ثالثه😒، وقدمت بنحط الصفره على الرخامه
حسام شبحتلها على الجنب، وأبتسمت😊: مش لازم نشوفك أو نسمع صوتك باش نعرف أنك جنبي، برفعة حاجب🤨: وبعدين شني قتلك ع الريحه أني!!
دنيا، بإبتسامه😊: صحه فطورك حسام
حسام ياعليك عيله😓 تجاهلتني بطريقه تنرفز، بس إبتسامتها اللي من القلب تخليك تبتسم حتى وأنت في أقصي درجات غضبك، أبتسمت😊 وهزيت رأسي يمين ويسار: أنتي ماحد يأخذ منك لا حق لا باطل
دنيا قربت وأني نشوف للقهوه، بأسف: والله ماحاطه ريحه، قمت طرف البلوزه من فوق وقربتها من خشمي: هااا والله ماحاطه حاجه شمها كان مش مصدقني
حسام برفعة حاجب🤨: ترا، طبست رأسي لمستواها، ماهي دريه😅، وقربت من رقبتها شميتها بقوة وكأني إندور على أكسجيني فيها، ومني المتيم اللي يلقا فرصه زي هذي ويبعد🤤😉
دنيا كنت نبصر لما قتله شم ماتوقعتش يديرها حق!!😳، تجمدت في مكاني لما قرب غمضت عيوني بقوه لما حسيت بأنفاسه الحاره على رقبتي، فتحت عيوني بخوف لما حسيته طول، وشهقت: هيييييي القهوه
حسام بعدت عليها بسرعه وأني نشوف للقهوه اللي فاجت على الغاز طفيته وحطيت البكرج في السفره اللي فيها الفناجين وأني نتجنب نشوفلها، بس عجزت وعيوني غلبوني وأتجهولها أبتسمت😊 وأني نشوف فيها قاعده واقفه على نفس الوضع ووجها أحمر من الخجل، وعيونها يشوفولي بحده، قمت السفره ووقفت جنبها وهمست في وذنها، بهيام😍: ماتلومينيش ريحتك عذاب🤤 من غير ماتحطي أي ريحه، سندت طولي وبغضب مصطنع😒: حتى الشامبو معاش تستعمليه ذكريني غذوه نجيبلك الصابون الأخضر أحسن شي، طلعت بسرعه وأني ميت بالضحك من منظرها اللي كان عباره عن كتله من الغضب
دنيا، بعصبيه😡: بارد مغرور متكبر متعجرف قالك صابون أخضر قال، طلعت وراه وأني معصبه وكنت متوجهه للدار بس وقفت لما تكلم عمي مصطفي
مصطفي: تعالي يادنيا قعمزي معانا وخوذي قهوه
حسام شفتلها ورقصتلها حواجبي وأشرتلها بعيوني أنها تقعمز مقابلتني
دنيا أستغفر الله ياربي شفتله بحده وهو نزل عيونه وقعد يضحك، قعمزت جنب عمتي وعطيته بالقفا😏
سعاد خذت فنجان القهوه: وخيرها إمزرطه هكي ومن غير وجه
دنيا ضحكت بشماته😄
حسام فنصت في أمي😐 لما شفت دنيا تضحك، وبحده: ماهو كله من بنت خوك خشت حطت السفره بقوه خلعتني نحسابه غير صاروخ😉، نسيت القهوه لين فاجت على الغاز وراح الوجه
دنيا فتحت عيوني بصدمه😯، يكذب ويغمز زياده، كنت بنرد عليه بس تحشمت من عمي مصطفي
مصطفي: معليشي الفايده في البنه مش في الوجه
حسام بإبتسامه😊: أيواه أهي الناس اللي تفهم
سعاد، بتفنيصه😐: صب فنجان لدنيا بسرعه وياسرك من الكلام هذا فاش فالح
حسام وقفت ومديتلها الفنجان، وبهزوه😏: تفضلي ياأنسه دنيا، إن شاءالله غير تعجبك القهوه اللي طار وجهها بسبب صاروخك
دنيا رفعت عيوني وشفتله بإستفزاز: شكرا بس مش راح نقدر نشربها، شربت قبل الفطور خلاص
حسام شفتلها بحده وحطيت الفنجان قدامها، وقعمزت مقابلها
مصطفي قام الفنجان شرب منه وحطه لوطه، وبضيق: قتلكم إمبارح جاني مفتاح والمبروك في المحل
الكل أنظارهم توجهتله بخوف وقلق
سعاد، بضيق: وشني مازال يبو بعد اللي داروه!!
حسام بغضب😠: ليش ماكلمتنيش يابوي!! مشولك في المحل عارفينك بروحك وإلا خيره ماجوش إهنايا للحوش
مصطفي: أسمع ياحسام فكنا من النشاف، وتلفت لسعاد: جايين يعتذرو على اللي صار هذيكا الليله، وقالو حتى بشير قبل بيجي معاهم غير عيلته عندهم مشوار، قالو راح يجو يعتذرو منك ومن دنيا
الكل لاحت على وجوههم علامات الصدمه والإستغراب😯🙄
حسام، بغضب😠: مصح وجوههم وإن شاءالله غير مارضيتش أنت بس هاذم مافيهمش ثقه يضحكو عليك بالإعتذار رد بالك تصدقهم
مصطفي، بغضب😠: ماتنساش أنهم خوالك يا حسام وعايشين معانا في نفس الحوازه مانبيش مشاكل خليك أنت بعيد فاهم!!
حسام شفت لدنيا اللي كانت نظرتها بارده نزلت رأسي بأسف وسكتت
سعاد، بضيق: أني بعد اللي داروه وقالوه معاذ عندي ليهم خلوق لانسامحهم ولايجوني
مصطفي، بضيق: مادامهم أعتذرو وحسو بغلطهم خلاص راهو الواحد في حالة الغضب مايعرف شني يقول، وبعدين هاذم خوتك مايجيش تقطعيهم، ومادامه إمبارح جو إمساوينهم وصغارهم معناها ماقالوش اللي صار ومايبوش المشكله تكبر، وتكثر الدوه قدام الناس، خلاص اللي صار صار وأحني ولاد اليوم، وبعدين العيد بعد يومين كبري قلبك والمسامح كريم
سعاد، بحزن😔: ربي يهديهم والله ماكان فيه داعي لهذا كله
حسام🤨: أشبح على شني يرسمو هاذم مافيهمش ثقه
مصطفي بحده: تحشم على وجهك مهما كان هاذم خوالك مايجيش تقول عليهم هكي، وبعدين مش قتلك أسكت وهني روحك شي مايخصكش
حسام زفرت بغضب😤 وشفت لدنيا لقيتها منزله رأسها
مصطفي، بتساؤل: شني رأيك أنتي يادنيا!! لو جو وأعتذرو تسامحيهم!!، هاذم عمامك وأنتي بنت خوهم مستحيل تهوني عليهم واللي قالوه في لحظة غضب وراح
دنيا قمت عيوني وبرجاء: أهم شي ياعمي مايضرونيش وماحدش منهم يتعرضلي بسوء، أني من قبل مافي بيني وبينهم شي وحتى توا نفس الشي، وبعدين ربي يسامح مني أني باش مانسامحش، بس زي ماقتلك يقعدو بعاد عليا
سعاد، بإبتسامه: ماتخافيش ماحد يقدر يضرك وأحني معاك
مصطفي أبتسم😊: ربي يحفظك يابنتي
حسام أبتسمت وأني نشوف فيها تشوفلي بتوتر، وكأنها تستني في ردة فعلي على كلامها، وتكلمت بصيغة الجمع، باش مايشكوش فيا: خلي واحد منهم يتجرأ بس يقرب منا ويشوفو شني يصير فيهم
سعاد، بضحكه😅: أهو بدي الديك ينفخ في ريشه،مش علينا ورأس وليدي ريحنا
حسام فنصت في أمي بعصبيه😡 لازم تحشمني قدامها، وشفت بحده لدنيا اللي ميته بالضحك
دنيا ضحكت من قلبي😂 بس نزلت رأسي لما شفت نظرته وأني نحاول نكتم ضحكتي🤭
مصطفي وقف وخش بيرتاح شويه قبل أذان العشي
سعاد وقفت ودنيا وقفت وراها
حسام: على وين كلكم بتهربو خفتو من الريش ولا شني!!
سعاد: بنخش إنضم المطبخ، والغاز يقعدلك راهو تمسح قهوتك بروحك
حسام فنصت في دنيا🤨: أهي توا تمسحه هيا السبب، غير تشرب قهوتها قبل وبعدين توا تجيك
دنيا بنفي: لا مانبيش قهوه، توا أني نضمهم أرتاحي أنتي عمتي
سعاد: قعمزي أشربي قهوتك يابنيتي والله ماك ماستيهم أنتي شني خليتي كلهم غسلتيهم قبل الفطور، غير اللي فطرنا فيهم مايجو شي
حسام،بحده: خلاص قعمزي أمي حلفت وبعدين خليها تتحرك خيرلها من التقعميز
دنيا رجعت قعمزت وعمتي مشت للمطبخ، قمت الفنجان وشربت منه وأبتسمت بإعجاب: كويس طلعت تعرف إدير حاجه غير نفش الريش، وضحكت😅
حسام، بغضب😠: أيواه شدي أمها توا ماصدقتني أنتي عاد، معاش تعوديها فاهمه!!
دنيا نزلت رأسي وسكتت
حسام،بإبتسامه😊: نبصر عليك قولي اللي تبيه أي شي منك مقبول، غير ماتزعليش بس أحني ماصدقنا رضيتي
دنيا قمت رأسي، وأبتسمت😊: حسام شكرا على إمبارح،
حسام، بحب😍: تعرفي الفرحه اللي شفتها في عيونك هذي كانت غايتي، والحمدلله تحققت مانبيش شي إلا نشوفك فرحانه هالشي يكفيني، حتى لو صرفت معاشي كله😅
دنيا، بضحكه: مبردك ماتخافش نجمعلك فيهم توا نعطيهولك كلهم مره واحده😂
حسام قعدت هايم في ضحكتها اللي سحرتني، وبحب😍: غير من وين طلعتيلي بس!!، اللي صار الأيام اللي فاتو ياريت معاش يتكرر يادنيتي، ماتعرفيش قداش عذبتيني بحركاتك وتجاهلك ليا
دنيا توترت من نظراته وتركيزه عليا ماعرفتش نتكلم قعدت نهز في رأسي وخلاص، ومش عارفه كيف بنهرب، وقفت بسرعه لما سمعت تليفوني يرن، وتكلمت بعفويه: هذا أكيده مؤيد
حسام خرف أنت ياحسام مليون عام ولاتعدل عليا، أما السيد مؤيد تهلوس بيه، بعصبيه😡: قعمزي مكانك، وليش مؤيد يتصل بيك؟
دنيا تجمدت في مكاني وأرتبكت وقعدت نلكلك في الكلام: ماهو على أساس انه مرات بيخطم عليا، أو ماشفت تفنيصته، بخوف: لا مش قصدي هوا، قصدي خالتي قالت بتخطم عليا باش نطلع معاهم
حسام، بغضب😠: وعلى خير إن شاءالله وين طالعين
دنيا، بخوف😟: مش عارفه مضايقه شويه وخالتي شدت فيا نطلع معاهم نغير جو
حسام، بضيق: مضايقه وتبي تغيري جو ليش ماقلتيش نبي نطلع، ماهي أمي تترجا فيك قداش ليله وأنتي مسكره رأسه، ولا الطلوع مع السيد مؤيد ليه نكهه خاصه
دنيا، بتوتر: مش هكي والله ماتفهمنيش غلط
حسام، بغضب:وشني الصح إمالا فهميني، أني غبي مانفهمش خوذيني على قيس عقلي وأشرحيلي، وتلفتت وراى لما سمعت أمي تنادي عليا
دنيا إستغليت الوضع وهربت وسكرت الباب بالمفتاح
حسام أول ماسمعت لفت المفتاح تلفتت ووقفت بعصبيه: يانعن🤬، ومشيت وقفت قدام الدار وأني ضاغط على سنوني: ماتحسابيش روحي بتقدري تهربي راهو الحركات هذي ماتمشيش معاي، ومشيت بسرعه لما سمعت صوت بوي يتحنحن
^^^^^^^^^^^^^^^^^^^^^^^^^^^^^^^
في حوش المبروك
سنيه مطلعه القهوه لمحمد اللي مقعمز في الجنان، حطت صفرة القهوه قدامه وقعمزت جنبه، وبإبتسامة: كويسه راهو ماتخافش عليها زي الجن مافيها شي
محمد أبتسم😊: أول شي شكرا على القهوه، وثانيا شني قصدك مني هيا اللي زي الجن!!
سنيه، بضيق: لاحظت أنك شارد ومش طبيعي قلت نطمنك مرات مشغول على علا
محمد بنفي: لا أبدا ليش بننشغل عليها، بس أنتي شني اللي خلاك تفكري هكي!!
سنيه بغمزه😉: عليا أني!! شفتك إمبارح كيف قعدت منتبه لما عمتي سألت ليش ماجتش علا، وشفتك كيف إضايقت لما عمتي سالمه قالت أنها مريضه
محمد نزلت رأسي بأسف😞: تعرفي ليش إضايقت مش خوف عليها لا أبدا، أضايقت من روحي كيف سمحت لقلبي يتحكم فيا ويحب وحده زيها، وكيف قاعد يفز لما ينذكر أسمها قدامي
سنيه بحزن😔: والله هيا اللي خاسره وماتستاهلك، وأنت ربي يرزقك باللي خير منها بألف مره
محمد، أبتسم😊: إن شاءالله يارب، بس بجد ليش ماجتش إمبارح مادامها مش مريضه؟؟
سنيه بتوتر: نقولك سر!!
محمد، بإستغراب🙄: كاثره الأسرار هالأيامات، قولي شني فيه؟؟
سنيه قعدت تحكيله اللي شافاته علا هذيكا الليله الموقف اللي شافت فيه حسام ودنيا في الحوش مع بعض
محمد إنصدم من الكلام، وبنفي: لا لا مستحيل ماتصدقيهاش هذي كذابه شفتها بروحي كيف تكذب وتلفق في الكلام، ردي بالك هالكلام يطلع وقوليلها تسكر فمها وتحترم نفسها مش معقوله الحقد اللي عندها يوصلها لدرجة تتبلي على الناس راهو هذا شرف مش ساهل، وبعدين هذي بنت عمها عيب عليها
سنيه: حتى أني ماصدقتش في الأول بس لما شفتها كيف تبكي ومتأثره، صدقتها وبعدين شني مصلحتها تكذب في شي زي هذا!!
محمد معقوله حسام هكي يدير تي لا لا مستحيل، تي كأنه هكي مايعترفليش إمبارح أنه يحبها، أني لازم نتأكد من هالموضوع، بضيق: توا أني نتأكد بطريقتي، مع أني متأكد أنه هالموضوع مافيش منه
سنيه هزت رأسها وسكتت شويه، أبتسمت😊: قتلك خالتي حنان اليوم كلمت أمي وقالت بتنزل لطرابلس هيا وبناتها ثاني يوم العيد، وأمي قلتلها تقعدو عندنا أسبوع راهو والله إستاحشناهم
محمد، بإبتسامه: باهي كويس بس غريبه ليهم سنين مانزلو لطرابلس إن شاء الله خير
سنيه، ضحكت😁: ماهو عرس أيه قريب وقالت سكرت رأسها تبي إدبش من طرابلس
محمد، بهزوه😏: أشي هي أيه هذيكا المفعوصه كبرت وحتى بتتزوج
سنيه، بضحكه😅: أي شفت ولاه، تذكر فيها كيف كانت تلعب معاكم في الكوره تقول ولد
محمد ضحك😂: لكن جو عليها، أشبح كيف شكلها توا!! هيا كم عمرها؟
سنيه: تعرف على قد ماترجيتها تعبتلي صورتها شي سكرت رأسها، تقريبا 20 او 21 سنه
محمد، بإبتسامه😊: مشاء الله دوره السنين، ربي يهنيها إن شاءالله، وبرفعة حاجب🤨: مش راح نقولك عقبالك مازال صغيره راهو ماتفكريش في المواضيع هذي وتلهي على قرايتك شهادتك أهم
سنيه أكتفت بهز رأسها وهيا مبتسمه😊، ناضت وقامت الصفره وخشت
^^^^^^^^^^^^^^^^^^^^^^^^^^^^^^^
في حوش ناجيه
إنتصار بغضب😠: والله لما نطلع هو مني يحساب روحه باش يحكم فيا، وين يسكر عليا باب حوشه بعدين ليه الحق
ناجيه هزت رأسها بأسف😞
مؤيد خاش من برا، وبعياط: خير أمه صوتك عالى نسمع فيك تلعلعي في الشارع
ناجيه، بضيق: هذا السيد فايز قاللها ماتطلعيش وهيا سكرت رأسها
مؤيد، برفعة حاجب🤨: وشني دخله هوا!! مرته ولا قاري فاتحتها عليها باش يتحكم
إنتصار شافت لمؤيد بإمتنان، وتنهدت بضيق: درهلي كبدي أطلعي ماتطلعيش ألبسي هكي ماتلبسيش هكي، حتى الشارع مانطلعله، وحوشي خوله اللي هيا أختي مايبينيش نمشيله، وحرمني من التخصص والكليه اللي نبيها ومحرم عليا كل شي، وياريته حتى إمداير تمره ليه ثلاثه سنين حتى بلكتين على بعضهم ماحطهم
ناجيه، بضيق: أنتي من الأول فتحتيله تسمعي في كلامه وتشاوري فيه على الكبيره والصغيره، خليتيه يتحكم فيك وتوا معاش عاجبك
مؤيد، بحده: وأنتي ليش تقوليله أصلا، أني وأمك المسؤولين عليك توا، هوا ماليشي علاقه
إنتصار، بأسف: ماهو الحق فيا مقدراته وإمدايرتله قيمه، نعطي فيه في علم من باب الإحترام بس هوا زودها صدق روحه الراجل
مؤيد، بغضب😠: مادامك قاعده في حوش بوك ماليشي كلمه عليك، هيا أطلعو فيسع عطلتوني بتخلوني نعلق في الزحمه
^^^^^^^^^^^^^^^^^^^^^^^^^^^^^^^
في حوش مصطفي
حسام ماقدرتش نمشي للجامع وصليت في الحوش هيا صح قالت أنه راح يجيها هوا وأمه وأخته، بس مهما كان أني مش راضي ولا عاجبني أنها تطلع معاه لو تكون معاهم قبيله، لازم نقعد ونشوفه بروحي باش مايفكرش أنه ممكن يستغلها أو يتمادي معاها ويعرف أنه وراها راجل، شديت تليفوني وبعتلها رساله هذي يمكن سابع واحده من لما خشت توتي في روحها ومعاش طلعت
سعاد طالعه من الدار بعد ماكملت صلاه، وبإستغراب🤔: أنت قاعد خيرك مامشيت للجامع، وجت قعمزت بحداه
حسام، بضيق: بطني توجع فيا، ماقدرتش نمشي
سعاد، بخوف😟: خيرها بطنك خلى إنوض نطبخلك شوية نعناع ولا نجيبلك شوية عطر
حسام، بإنزعاج: مانبي شي ياأمي قعمزي، عندك علم وين ماشيه بنت خوك؟
سعاد رجعت قعمزت: أي خالتها إمبارح قالت بتخطم عليها ترفعها تغير جو شويه
حسام، بغضب😠: وقداش مره قتلك كلميها كان بتطلع ولا بتأخذ حوايج نرفعكم وهيا ماتبيش، أش معني توا خالتها تمشي معاها
سعاد، بحده: ريح روحك وهنيني فاهم!! ماتبيش تأخذ حوايج البنيه أماليها كيف ميتيين وبالها في حوايج العيد، أني بروحي ماعندي بال، وبعدين خالتها ترجت فيها لين إعييت باش قالت باهي، خلي البنيه تطلع وتفرح حتى بنجاحها
حسام، بنرفزه: ماهو فرحنا إمبارح مع بعض لازم تفرح معاه بروحها يعني!!
سعاد، تنهدت بملل: شني تقول والنبي أسكت رأسي يوجع فيا راهو، أستغفر الله وخلاص، وتلفتت للتلفزيون
حسام زفرت بغضب،😤 وقعدت مركز على باب الدار ياريت نقدر إندير شي باش ماتطلعش زعما إندير روحي مريض، تي لا بلا هبال الزفت معليشي خلي تطلع وتغير جو، وخيره ماقلتش مضايقه تبي تغير جو راهو أني طلعتها لازم هوا!!، وعيطت بعصبيه: وووووك الزفت
سعاد إنخلعت: خيرك يامهبول!! ربي يثبت عليك العقل
حسام وقفت ليش هيا بنت خوك خلت فيا عقل، طلعت وقربعت الباب، قعمزت قدام الحوش بالك نقدر نهدأ شويه
دنيا تنهدت بملل وأني نسمع في صوت مسج هذي سابع رساله في ربع ساعه،
1″ صلي العشي والتراويح قبل ماتطلعي صلاتك أهم، وبضيعي جزء الليله مش حرام”
2″ ألبسي حاجه طويله، سراويلك المشركات متاع الموضه الحرفه فكينا منهم ”
3″ ماتحطيش شي على وجهك ”
4″ هذا كله توتي في روحك مني بتقابلي!! ”
5″ نشم ريحه عليك ورحمة بوك ماك طالعتها ”
6″ شعرك كله فوق لاخصلة ولابصله فاهمه!! ”
7″ كان تفوتي أمها المشيه أهيا خير مش مرتاح الزفت “
عجزت نفسر تصرفاته هذي غيره ولا تحكم ولا قلة ثقه ولاشني بالضبط!!، قاعد التليفون في أيدي لما رنت خالتي وقتلي أنهم قدام البوابه، طلعت وتنهدت براحه أول ماشفت عمتي مقعمزه بروحها في الصاله، الحمدلله شكله طلع، بإبتسامه: عميمه أني طالعه خالتي وصلت
سعاد، أبتسمت: باهي يابنيتي ربي يجيبهالك زينه، سلمي على خالتك
دنيا: حاضر، وتوجهت فتحت الباب وفتحت عيوني بصدمه😮 لما شفته مقعمز على الكرسي قدام الباب مباشرة وحاط رجليه على كرسي ثاني قدامه زي الحاجز مسكر الباب يعني
حسام برفعة حاجب🤨: وخيرك إنصدمتي ماتوقعتيش تشوفيني ولا كيف! مررت نظري على لبسها، بحده: ماعندكش بلوزه أطول من هاذي
دنيا شني يسكته هذا، زفرت بملل: حسام باللهي عليك خليني فرحانه وجوي رايق لازم تنكد عليا يعني، شوف ها لبست أطول بلوزه عندي، وماحطيت لا ريحه ولا شي على وجهي وشعري كله قمته فوق، وصليت العشي والتراويح، ووعد مانفوتش جزء اليوم والله مانرقد لين نقراه كامل، وخالتي تستني فيا وعيب نعطل ونخليهم واقفين برا، قعدت نشوفله برجاء
حسام وقفت بعصبيه ونطرت الكرسي برجلي: جو تسبيلة العيون أهو فكينا منه، بتأثري عليا!! أتهني مأثره وبالزايد ومن غير لا حركات ولا شي، أطلعي قدامي هي ” احبكِ حباً يضعفني أمامك”
دنيا هزيت رأسي وأني شاده ضحكتي بالسيف، مشيت وأني أيدي على قلبي وندعي إن شاءالله غير مايديرش موقف قدام خالتي ويحشمني
حسام،بغضب: روحي بكري فاهمه!! وتليفونك يقعد مفتوح إن شاءالله نتصل وماترديش، خليك في جنب خالتك مش تمشي هكي ولا هكي، نقولك حاجه باللهي خشي أرقدي وريحيني
دنيا وقفت وشفتله بخوف: واللهي بنبكي راهو شني هذا
حسام، أبتسمت غصبا عني: خلاص سكتت ها، وأشرت بأيدي☝:أخر شي نقوله وخلاص
دنيا هزيت رأسي وبنفاذ صبر: قولي هي
حسام، باللهي خليك عاقله وخليني قدام هاذم باهي، وأني نأشر لعيونها👀
دنيا أبتسمت حاضر، وأخيرا طلعت لقيت مؤيد واقف على السياره ويستني فيا
مؤيد، بإبتسامه: أهلين، صحه فطورك، وأخيرا طلعتي، وتلفت لحسام اللي طلع وراى ووقف في البوابه وأشرله بإيده
دنيا، أبتسمت: الله إيسلمك معليشي أسفه خليتكم تستنو
مؤيد لاعادي ولايهمك وقدمت بنفتحلها الباب
دنيا أول ماشفت مؤيد متوجه للباب اللي وراه مشيت بسرعه فتحت الباب الثاني اللي وراء خالتي وشفت لحسام اللي واقف ومبتسم شكله عجباته الحركه، رديتله الإبتسامة وركبت
حسام أبتسمت على حركتها، وشفت لمؤيد بحده، وقعدت واقف لين طلعو، شافت محمد كيف مروح من الجامع خشيت أني وياه
^^^^^^^^^^^^^^^^^^^^^^^^^^^^^^^
في حوش مفتاح
علا خشت للدار لقت عبير تتكلم بالتليفون، وبعياط: راك تسكريه هالخرا اللي في أيدك، إن شاءالله يخش عليك بوي على غفله ويسمعك خلى يقتلك قتل
عبير، بدلع: شويه بس ياروحي ونكلمك نشوف ماما تنادي
علا عفريت يطلع روحك أنتي وياه
عبير، بغضب: خيرك تعيطي شني تبي
علا إمساويين خوتك يتهامسو عليك، حي عليك لو واحده منهم قالت لراجلها،
عبير خلي واحده منهم تفتح فمها بس كان مانكرهش في اليوم اللي جابتها فيه أمها
علا، بعياط: لوحي عليك هالعفن وديري عقلك في رأسك، ماسمعتكش ولا مره كلمتي ولدك ولا حتى سألتي عليه حرام عليك عيل صغير ماتعلمي عليه شي، أي أم أنتي!!
عبير بعدم إهتمام: لو سمحتي ماتدخليش في شي مايخصكش، أسالي عليه أنتي كأنه واجعك!!
علا، بتحذير: لو أستمريتي بالحال هذي أني بروحي نقول لبوي وخوتي وهما يتصرفوا معاك
عبير، بغضب: أنتي قولي كلمه كأنك مرأه، ولو ماجبدتش معاي أني مانبداش
دنيا، بإشمئزاز: عمري ماتوقعت تافهه ومنحطه للدرجه هذي، راهو نسمع في مكالماتك وكلامك العار اللي تقولي فيه وأنتي قاعده زي البداله يسكر واحد يرن واحد، خزي يضحكو عليك يامضحكه وأنتي زيدي حلي فمك، وطلعت وقربعت الباب بعصبيه
سالمه من الصاله، بعياط: بالشويه على الباب بتقلعيه
علا، بغضب: عيشه تقصف العمر، أني ماشيه لسنيه وطلعت وقربعت باب الحوش
سالمه، بعياط: كسره في هاليدين إن شاءالله
وقفت سناء وقامت ولدها الراقد في حجر سالمه حطاته على الفراش: عمتي خلى إنخش نوتي القهوه عمي على جيه
سالمه: باهي يابنيتي خير ماديري، كلمي أمك قوليلها كأنها فاضيه تجي تشرب معانا القهوه
سناء، بإبتسامه: باهي حاضر توا إنكلمها
حسام وهذي القصه كلها لو مالحقتش عليه راهو أبصر شني دار فيها هذيكا الليله تي منظره زي الغوله مايشوف في شي قدامه
محمد تنهد بأسف: لا حول ولاقوة الابالله العلي العظيم، عمي بشير إنقلب هالسنين ماكانش هكي مش عارف شني اللي جاه
حسام من يوم يومه هكي والمرأه اللي عنده ماشاءالله مش مقصره تعطيله فيهم مخزازات
محمد، بضحكه: يعطيك السلامه😂
حسام، بشك🤔: بس أنتي ماقتليش منين عرفت مني اللي قالك؟، تكلم في علا قصدك!!
محمد، بنفي: لا لا، عرفت من سنيه علا قالتلها مع شوية إضافات من عندها
حسام مش عارف هالبنت الواحد كيف بيتصرف معاها، تعرف ليها فتره شادتها عليا حتى في الفيس من يومين بس ركزت على الأسم شكيت أنها هيا حظرتها، واللهي لو مش خايف على دنيا منها مرات تكذب وتألف على اللي شافاته راهو كلمت واحد من خوتها يوقفها عند حدها
محمد كل ماله إنزيد ننصدم فيها أكثر وتنزل من عيني، تنهدت بضيق: تي ربك يهديها فوتها وخلاص توا تمل وتريح روحها
حسام أكتفي بهز رأسه يمين يسار
محمد وقف: هيا تنوض إنديرو دوره ولانمشو لعادل نكسدو عليه
حسام، بإنزعاج: لا لا عادل البارد هذا فكنا منه مولى دراه كبد حاشاك، فوت أمه
محمد، بضحكه😅: هوا من قبل هكي وأنت ماشي معاه، توا شني اللي خلاك تفوته
حسام، بتوتر: شاك فيه الزفت مافيش مبرر لتغيره المفاجئ معاي إلا هكي
محمد، بصدمه: معقوله لا لا ماأعتقدش
^^^^^^^^^^^^^^^^^^^^^^^^^^^^^^^
دنيا طول الوقت تليفوني ماهفتش رسائل ورنات من حسام، وإنتصار مركزه معاي على الخط وشادتهالي غمزات وخلاص، أطريت إنديره صامت، ولما يتصل إنرد ونقوللها هذي عمتي، وصلنا الحوش س3، بعد ماكنت فرحانه ونضحك إنقلبت ملامح وجهي للخوف والتوتر وأني نشوف فيه واقف قدام البوابه وشكله قاعد يستني فيا، نزلت وأني نبلع من ريقي من الخوف
مؤيد: تصبحي على خير
دنيا أشرتلهم بأيدي ومشيت، مابيتش نشوفلها تجاهلته وخشيت بسرعه
حسام خشيت وراها وجبدت البوابه سكرتها، وبغضب: أستني
دنيا وقفت من غير مانتلفت، خذيت نفس بقوه وقمت رأسي، ماتخافيش مني ولا هوا
حسام قدمت ووقفت قدامها، وبحده: ليش عطلتي!!
دنيا مررت نظري حواليا، وأبتسمت: نخشو نحكو الداخل أفضل، شني رأيك
حسام أبتسمت وأني عاض على شاربي: س3 وغذوه صيام، وأنتي مش ناويه تخليني نكمل هالرمضان إلا وأني مجنون رسمي، طول لدارك ماتطلعيش منها بكل فاهمه!!
دنيا مافهمتش شني قصده بس المهم عندي أني توا سلمت من عصبيته وخلاص، أبتسمت وخشيت بسرعه
حسام قعدت واقف ومبتسم زي الأهبل، يارب صبرني هاليومين
” ”
^^^^^^^^^^^^^^^^^^^^^^^^^^^^^^^
دنيا فاتوا يومين والليله ليلة العيد، بعد ماكملنا حملة التنظيف في حوش عمتي، رغم أني كنت تعبانه بس مشيت لحوشنا قلت إندير فيه دوره ع السريع، كملت داري والصاله والمطبخ والحمامات ماكان فيهم شي غبره بس وهويت الرواشن، وكنت متردده نخش لدار بابا وماما، بس قويت روحي وخشيت، نظفتها ولفتت نظري شنطة ماما اللي كانت معاها يوم الحادث، قعمزت وقعدت نشوف شني فيها، حاجات عاديه برفان وملمع شفايف مرطب مناديل مبلله مفاتيح الحوش مذكره صغيره وقلم حبر، فتحت الجيب الداخلي وتفاجأت بالصوره اللي لقيتها الصوره فيها ماما على اليمين وجنبها هدى صاحبتها وزوز ولاد صغار واقفين قدامهم، وفي جنب هدي واقف راجل ولاف أيده وراء ظهرها ممكن راجلها حسيت وجهه مألوف ومش غريب عليا، شديت رأسي لما إذكرت أنه هوا نفسه الراجل اللي كانت ماما معاه في السياره لما شفتها، مجرد مالفيتالصوره مكتوب ” من ناصر إلي حبيبة قلبي ناديه، أحلى صوره جمعتني بيك ❤” قعدت نهز في رأسي يمين ويسار محاوله مني لإستبعاد الأفكار اللي سيطرت على عقلي، أني كيف ماسألتش وين لقو شنطة ماما!! ومني الراجل اللي دار معاهم الحادث!! وكيف صار الحادث أصلا!!، وكيف ماشكيتش في كلام بابا وتوصيته لعمي مصطفي عليا في نفس اليوم اللي مات فيه، وكلامه اللي في الوصيه وكأنه مخطط لموته تخطيط ومش صدفه، وقفت بسرعه لما إذكرت الرساله أكيد فيها حاجه، لفيت بسرعه سكرت الرواشن وطلعت نجري
حسام خشيت لقيت أمي متكيه بروحها في الصاله: السلام عليكم، خيرك متكيه أهنايا
سعاد وعليكم السلام تعبنا في تنظيف الحوش فشلنا، دنيا مشت لحوشهم نستني فيها خفت يغلبني النوم وماتلقاش مني يفتحلها
حسام خلاص خشي أرقدي وإرتاحي أهو أني قاعد توا نفتحلها
سعاد وقفت وهيا مسيطر عليها النوم: باهي هيا تصبح على خير
حسام وأنتي من أهلو، إستنيت لين خشت أمي ولفيت وطلعت متوجه لحوش خالي سعيد، بس تفاجأت بيها طالعه تجري
حسام قدمت وشديتها باش توقف، بخوف: خيرك يادنيا شني فيه!! شني شفتي!!
دنيا، بتوتر: حسام أني خايفه لو يطلع اللي في بالي صح، أني شني يصير فيا، والله نقتل روحي لو تطلع هكي ونزلو دموعي😢
حسام، إنصدمت من كلامها بس قاعد مش فاهم: أسس ليش تبكي، شديتها من أيدها وجبدتها معاي: تعالي نخشو الداخل
دنيا خشينا للمطبخ قعمزت على الكرسي وحسام مدلي طاسة إميه وأني نرعش ماقدرتش حتى إنشدها
حسام بخوف: دنيا أنتي كويسه!! وقربتلها طاسة الميه وسقيتها منها، ممكن تهدي شويه وتفهميني شني فيه!!
دنيا قعدت نهز في رأسي يمين يسار ورجعو دموعي نزلو
حسام😟: باللهي ماتبكي ماتخوفينيش عليك، طلعت خليتك كويسه ومافيك شي شني اللي صار!!
دنيا قعدت نمسح في دموعي، وبرجاء🥺: حسام مش راح تخليني لو مهما صار صح
حسام أبتسمت😊: مستحيل هالشي يصير ماعمري مانفرط فيك، بس ريحيني وقوليلي خيرك شني فيه
دنيا، بدموع😢: أني خايفه
حسام، بخوف😟: شني اللي يخليك تخافي وأحني كلنا معاك، شني فيه يادنيا تكلمي ورحمة بوك
دنيا نزلت رأسي بأسف😞، كنت على وشك أني نتكلم ونقوله اللي شاكه فيه، بس تراجعت مجرد ماتخيلت أنه نظرته ليا راح تتغير أكيد راح يشوفلي على أني نفس ماما، مجرد الفكره بس قاعده تقتلني قتل كيف راح يصير فيا لو تطلع صح، نزلو دموعي من جديد وهالمره بقوه😭
حسام قدمت الكرسي وقمتلها رأسها ومسحتلها دموعها، وبإبتسامة😊: غذوه عيد يادنيا ليش هكي إدير في روحك وفيا لو فيه شي تكلمي قولي ماتسكتيش
دنيا مش راح نخليه يشك بسكوتي رجعت نزلت رأسي وتنهدت بحزن😔: إستاحشتهم أول عيد يفوت عليا من غيرهم، أول عيد يمر وأني يتيمه 😭
حسام واضح مش هذا اللي مخليها تبكي بالشكل هذا، بس مش راح نضغط عليها، بحزن: وأني وأمي وبوي وين إمشينا يادنيتي، بعدين أني أمك وبوك وكل شي تبيه، معاش تقولي هالكلام، الدموع مش حلوات عليك راهو، خلاص ماتنكديش على روحك ماتبيش تشوفي شني جبتلك للعيد ياطقلتي
دنيا أبتسمت من بين دموعي وهزيت رأسي بأيه
حسام، بإبتسامه: ربي مايحرمني من هالإبتسامه الحلوه، نوضي أغسلي وجهك نطلع للسياره ونجيك
” ماكان حبك إلا أمر ربي.. وماكان قلبي إلا عبدا مطيع ”
^^^^^^^^^^^^^^^^^^^^^^^^^^^^^^^
” كل عام وأنتي عيدي، ووجودك جنبي يحلي أعيادي❤”
أستاقظت على صوت المسج مارقدتش إلا بعد ماصليت الفجر، خليت حسام يوتي في روحه لصلاة العيد، قدر بكلامه وبصارته يغيرلي جوي ورقدت فرحانه نوعا ما، بس مانسيتش الموضوع قررت نأجل فتحت الرساله لبعد العيد وأني متمنيه أنه مايطلعش فيها شي يخيبلي ظني ويكسرلي ثقتي في نفسي
تشجعت ورسمت على وجهي ملامح البرود وقفت بدلت حوايجي ولاكأنه صار معاي شي من ساعات وكنت نبكي ومنهاره أبدا، أكيد مش راح نسمح لأي حد يتشمت فيا مهما كان السبب، وطلعت وأني راسمه على وجهي أبتسامه حلوه، وزادت أبتسامتي أول ماشفته واقف قدامي وهو في كامل أناقته بالبدلة العربيه والزبون وشخصيته اللي تجنن، ماقدرتش إنزل عيوني وأني نشوف بإعجاب واضح
حسام كنت واقف ونستني بفارغ الصبر الباب متاع دارها ينفتح، وكأنه قلبي رجع للحياه من جديد لما شفتها طالعه وتنهدت براحه أول ماشفت إبتسامتها شكلها إرتاحت شويه ومش زي إمبارح، في عز ضعفها قاعده تبهر فيا بقوتها وكأنه القوه إنخلقت منها وفيها، قادره تخفي أحزانها بطريقه مذهله تخلي الكل محتار فيها، عجيبه هالطفله
” قادره على جعل ذلك القلب يذوبُ عشقآ من نظرة عيناها “
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية طفلة أرهقت قلبي)