رواية طفلة أرهقت قلبي الفصل الثامن عشر 18 بقلم عائشة البشير

رواية طفلة أرهقت قلبي الفصل الثامن عشر 18 بقلم عائشة البشير

رواية طفلة أرهقت قلبي البارت الثامن عشر

رواية طفلة أرهقت قلبي الجزء الثامن عشر

رواية طفلة أرهقت قلبي الحلقة الثامنة عشر

” ‏أوقات الخصام هي أختبار للحُب والصداقة بين البشر، هُناك من يُخاصمك ويهدم كُلّ ما كان، ومن يَزعل منك ويَزداد بينكُم الوِد بعد الزعل دون أن تشعُر بالخذلان.. حقيقة الحُب ومعدنهُ لا تكشفها إلا المواقف الكُبرى التي تعصف بالعلاقة، هي ما تُثبت مدى قوّتها ومُقاموتها لصدمات الحياة.. 🖤 ”
دنيا كل شي صار بسرعه عقلي رافض يستوعب اللي صار توقعت منه يدير أي شي لما يعرف يعيط يعصب يكسر، خيالي صورلي أنه ممكن يدير أشياء حتى أكبر من هكي بس صدمني بأنه أختار شي بعيد كل البعد عن توقعاتي، يبعدني عليه!! هوا اللي كان رافض فكرة الزياره حتى يقولي بري توا بإرادته!!، معقوله قرر يتخلي عليا!! هزيت رأسي نحاول ننفي هالفكره من عقلي مستحيل حسام يخليني هوا بس معصب توا، حاولت نقنع روحي بأنه قرر التخلي هذا يكون أخر شي ممكن يفكر فيه حسام، مانعرفش قداش خذيت وقت وأني واقفه على نفس الوضع اللي خلاني عليه لما طلع نحاول نلملم نفسي ونرتب التشتت اللي قاعد يصير في عقلي، تنهدت بقوه وطلعت من المطبخ
^^^^^^^^^^^^^^^^^^^^^^^^^^^^^^^^^^^^^^^^^^^^
فكرة أنها مش متمسكه بيا بأي شكل من الأشكال، وأني مجرد شخص عادي في حياتها ممكن تخليه وتنساه في أي وقت، تخليني نفقد الأمل تدريجيا في أنها ممكن تكون ليا، لو شخص ثاني غيري كان ممكن سيبها من زمان ماحدش يتحمل تقلباتها المزاجيه ماحدش يرضي يكون هامش في حياة إنسانه بالنسبه ليه هوا هيا كل الدنيا ومافيها، بس لأني أني غير ومش من النوعيه اللي نستسلم بسهوله ومستحيل نسلم في شي أني حبيته ونبيه، ولأنها سلبت عقلي وروحي وكياني من أول لحظه شفتها فيها، والشي اللي بين ضلوعي ينبض بإسمها وملكها هيا وبس، فأكيد راح نسكت ونتحمل ونصبر على حركاتها اللي مستحيل تتصدق أنها طالعه من طفله عمرها 16 سنه😞
عارف أنه الكلام اللي قلته راح يجرحها بس خلاص جي وقت أنها تحس بيا شويه، إضحي بشوية من كبريائها وغرورها على خاطري، تتنازل على عنادها وتسكير رأسها لو مازال تبيني نكون في حياتها،
طلعت وأني في قمة غضبي ركبت السياره ومشيت لمحمد قدام حوشهم وأتصلت بيه، بضيق: أطلعلي بسرعه أني قدام حوشكم، في هالوقت وصلتني رسالة بعنوان شخص كنت نستني فيها من أيام، جت في وقتها بصراحه😈
لحظات وطلع محمد، وقف على روشن السياره، وبهزوه😏: مش توا لزيتني من حوشكم شني جاي تبي!!
حسام بغضب😠: أركب من غير جو مفرخ
محمد أبتسم وركب، وحسام عفس وطلع بسرعه، ومن ملامح الغضب اللي مسيطره على وجهه وسرعته الجنونيه عرف محمد أنه صاير معاه شي وأكيد مش خير
^^^^^^^^^^^^^^^^^^^^^^^^^^^^^^^^^^^^^^^^^^^^^^

 

 

 

 

دنيا خشيت للدار ولقيت عمتى والبنات قاعدين مقعمزين، نزلت رأسي بأسف😞: عمتي نبي مفتاح حوشنا
سعاد بخوف😟: ليش يادنيا، أسمعيني يابنيتي أني والله ماهكي كان قصدي، أني مربياتك على أيديا ونعرفك كويس بس كنت خايفه عليك، ومانبيش حد يوصل فيك أو يبعدك عني
دنيا قعمزت قدامها، وبحزن😔: أني عمري مانزعل منك مهما إديري، أنتي كنتي أقرب ليا من أمي وحتى أنك أغلى منها عندي ومكانتك عندي مستحيل تتغير لو شني ماصار
سعاد قدمت وحضنت دنيا وهيا تبكي😢: سامحيني يابنتي سامحيني
دنيا بعدت من حضنها وأني نحاول نتماسك مانبيش نبكي: عمتي أني نبي نمشي لخالتي أعطيني المفتاح نبي نأخذ شوية حاجات
سعاد، بخوف😟: ليش بتمشي لخالتك مش قلتي مازعلتيش مني، علاش بتسيبيني إمالا!!
دنيا بحزن😔: نبي نقعد أيامات مش ديمه، خليني إنبعد شويه هالفتره، على الأقل لين يهدأ الوضع ونغير جوي شويه
سعاد كانت خايفه من ردة فعل حسام لأنه ديمه يعارض فكرة أنها دنيا تزور خالتها أو تقعد عندها، بتوتر: بس أنتي عارفه حس….. وقبل ماتكمل قصت عليها دنيا
دنيا أبتسمت: ماتخافيش ياعمتي عنده علم ومش معارض، وقفت وخذيت الشنطه وقعدت إنلم في حاجاتي، رنيت على خالتي وفرحت بطلبي وقالت أنها ربع ساعه وتجيني هيا ومؤيد، جابتلي عمتي المفتاح ومشت معاي سميره لحوشنا
ماكنتش نبي إنخشله وأني في حالة ضعف زي هذي، اللي داراته أمي خلاني نكره كل ذكري ليا معاها وأي موقف جمعني بيها في هالحوش، حاولت نسرع على قد مانقدر خديت شوية حاجات، وخذيت تليفون ماما اللي قابلني على الزيانه لما خشيت للدار باش نأخذ شوية فلوس من خزنة بابا، وطلعت بسرعه
^^^^^^^^^^^^^^^^^^^^^^^^^^^^^^^^^^^^^^^^^^^^
في السيارة الصمت كان سيد الموقف وحسام كانت ملامح الغضب اللي على وجهه ماتبشرش بالخير، ويجري بسرعه جنونيه لوجهه محدده ناوي يفرغ فيها شحنة الغضب اللي عنده، ومحمد فضل السكوت لأنه شايف أن حسام في وضعه هذا مش راح يتحمل كلام من حد، قطع هالصمت صوت رساله وصلت لتليفون حسام، وأول ماقام التليفون وشاف المرسل درس السياره بسرعه على اليمين وفتح الرسالة وأيده ترعش نتيجه لأعصابه المشدوده من غضبه المكبوت
” المفروض أني مانلومش عليك صح!! بس أنت سألتني كلامك وين راح!! وحتى أني بنسأل نفس السؤال؟ وين كلامك بأنك مهما صار راح تقعد جنبي ومستحيل ترخيني، وعودك بأنك راح تكون طول عمرك سندي وحمايتي وأماني، وأنك راح تكون معاي في جميع حالاتي حزني وفرحي وضيقي، وأنك أنت بوي وأمي وخوي وكل شي في حياتي، وين راح كلامك هذا كله!! للأسف تخليت عليا في أكثر وقت أني محتاجاتك فيه وماأستنيتش حتى تسمع مني طول حكمت عليا وظلمتني، ياخساره 😔”
حسام زفر بغضب😤: صبرني يارب صبرني، وحذف التليفون لمحمد: باللهي شوفها شني كاتبه لفت وردت اللوم عليا، نزل رأسه وقعد يخبط فيه على الدومان وهوا يتنهد بقوه
محمد قري الرساله وواضح أنه اللوم موجه لحسام ولأنه عارف أنه عصبي ومتهور توقع أنه دار شي كبير، بس مش راح يحكم لين يسمع اللي صار بالتفصيل
حسام رفع رأسه وقعد يشوفله على جنب: شني رأيك أني الغالط!!
محمد لأنه مش عارف اللي صار بينهم بالضبط، ماقدرش يتكلم أو يقول شي ممكن يزيد على حسام أكثر من اللي هوا فيه، قعد ساكت ويشوفله بضيق
حسام قام رأسه وخبط الدومان بإيده بقوة، وبغضب😠: واضح أنها راح تقعد غبيه هكي وعمرها ماراح تفهم أني شني نحس أو شني نبي، هيا حتى مش فاهمه أني قداش نحبها ومتمسك بيها كيف ندير معاها هذي كيف!!، وولع السياره وتحرك
محمد تنهد بحزن واجعه وضع حسام بس مش عارف كيف يخفف عليه، وبالأخص أنه مجرب أحساس أنك تكون تحب شخص وتبي تكون قريب منه وهوا يصدك في كل مره بشكل يكسر قلبك أكثر💔
^^^^^^^^^^^^^^^^^^^^^^^^^^^^^^^^^^^^^^^^^^^^

 

 

 

 

دنيا قعدت مقعمزه في المنور متاع حوشنا نستني في خالتي وكانت جنبي سميره تهدرز ومنسجمه بس أني مش معاها نهائي ولا سمعت حرف من اللي تقول فيه نهز في رأسي وخلاص، كنت حاطه التليفون قدامي ونستني على أمل أنه يتصل أو يرد على رسالتي، أو يدير أي شي يبرد شويه النار اللي حاسه بيها، فكرة أنه هوا يقولي بري خلت الخوف والرعب يتسلل لقلبي خايفه كلامه هذا يكون على طول خايفه يكون مل مني ومن تصرفاتي المتهوره، بس لمني راح يخليني هوا وعدني الخوف خلا دموعي تنزل وبقوه😭
سميره بخوف😟: دنيا خيرك!!
دنيا حطيت أيديا على وجهي وأستمريت في البكي
سميره قعدت إطبطب على كتف دنيا بحنيه وسخفها منظرها ونزلو دموعها حتى هيا، تلفتت لولد أختها اللي جاي جيهتهم
أدم: خالتي تليفونك قعد يرن قداش مره جبتهولك
سميره مدت أيدها وخذت تليفونها اللي رجع يرن من جديد: خلاص صحيت أدومه برا خش الداخل، مسحت دموعها وفتحت الخط وهيا تشوف بحزن لدنيا اللي قاعده على نفس الوضع
حسام، بغضب😠: ينعن🤬، لازم إطلعوني من عقلي خيرك ماترديش من بكري وأني نتصل وين كنتي!!
سميره تنهدت بملل: أستغفر الله العظيم، نعم ياحسام، التليفون ماكنش جنبي
دنيا أول ماسمعت سميره قالت أسمه طول رفعت رأسي ودموعي وقفو
حسام، بغضب😠: وين أنتي؟
سميره: برا في المنور متاع حوش خالي
حسام بإستغراب🙄: شني إديري غادي دنيا وين!!
سميره تلفتت لدنيا لقتها مركزه معاها وبطلت بكي، أبتسمت بحزن: كنت مع دنيا خذت شوية حاجات من حوشهم بتمشي لخالتها، أهي جنبي تبيها!!
حسام، بحده: لا لا بس ذكريها أنها ماداوتش أيدها اليوم، كلمي أمي تكلم خالتها تخطمها على العياده، وسكرت الخط
سميره تلفتت لدنيا، وأبتسمت😊: قالك حسام ماتنسيش إداوي أيدك
دنيا شفتلها بحده وغضب مكبوت😠: على أساس نهمه وخايف عليا، خوك شاطر في تقمص الأدوار العاطفيه ماشاء الله، ووقفت لما رن تليفوني خالتي، خديت شنطتي وطلعت بسرعه
سميره وقفت: غير أستني يادنيا
دنيا طلعت بسرعه ولاقيت خالتي من برا، ولأنه الدنيا كانت ليل وظلام ماحدش ركز على ملامح وجهي أني باكيه، وخطمت داويت أيدي لأنه عمتي كلمت خالتي وأحني في الطريق وقالتلها
^^^^^^^^^^^^^^^^^^^^^^^^^^^^^^^^^^^^^^^^^^^

 

 

 

 

في حوش مصطفي روح بعد صلاة العشي وهوا ماعنده علم بشي ولما سأل على دنيا!!
سعاد، بضيق: جت خالتها إمشت معاها، قالت بتغير جوها يومين
مصطفي: ووين حسام إمالا؟؟
سميره: طلع من بعد المغرب قاعد ماجاش
مصطفي هز رأسه وسكت، وهو يشوف لسلوى جايه بسفرة الشاهي
سلوى حطت السفره قدام بوها، وبتوتر: قتلك يابوي علي هذاكا اليوم قالي ولد عمي الهادي قالو إتصاوب في الجبهه وليه فتره في المستشفى
مصطفي، بأسف😞: لا حول ولاقوة الابالله، هذا خليفه أكيد!!
سميره، بضيق: أيه هوا أصلا من بعد الثوره سمعنا بأنه إمداير كتيبه ومامخلى حد في حاله في الجبل، واللهي لين نتحشم لما حد يقولي ولد عمك
مصطفي شافلها بنص عين: ماعندك ليش تتحشمي الكل يعرفو أنه علاقتنا بيهم مقطوعه من سنين، وبعدين كل إيد تمسح على وجهها ماعندنا شي إلا نقولو ربي يهديه وخلاص
سلوى: ربي يهديه هوا وغيره ويريحو أرواحهم ويفكونا من هالحرب إن شاءالله
سميره، بحزن😔:إن شاءالله، خسارها بلادنا راحت ربي يجازي اللي كان السبب في خراب البلاد
مصطفي: ربي يهدي البلاد والعباد إن شاءالله
سلوى، بتوتر: شني صار يابوي في أرضك اللي غادي؟ معاش تكلمت عليها!!
مصطفي نزل رأسه بأسف: إعييت وأني نتكلم من غير فايده، وعمامك مش من النوعيه اللي يفهمو بالكلام، يأست وأني نحاول معاهم ونبعتلهم في وسيط بينا، مالقيتش إلا أني نلجأ للقانون بالك يأخذلي حقي
سميره بصدمه😯: قصدك شكيت فيهم!!
مصطفي، بضيق: رفعت قضيه نطالب بحقي أني أصلا مانبيش الأرض ومستحيل نرجع ونولي غاذي، بس نبي نبيعها وهما واقفيلي في النص، المحكمه نهاية الشهر راح يديرولهم إستدعاء ويشوفو الحق معا مني، ووكيل النيابه عندي بيه معرفه قديمه قالي القضيه ساهله وماتستحقش إلا جلسه واحده وإحتمال أنه الأرض تنباع خلال الجلسه لو توفر شاري في نفس الوقت
سلوى: وأنت عندك حد يبيها!!
مصطفي: أي واحد نعرفه ليه فتره يبيها بس لما عرف أنه عليها مشاكل وخر، لكن توا لما قتله قالي خلاص مادامه فيها محمكه وكل شي بالقانون أني الأرض قاعد نبيها
سميره، بخوف😟: وماتخافش أنهم يديرو شي يابوي بالأخص هذا اللي إمدايرلي كتيبه وحاسب روحه وين نحسه مش راح يسكت

 

 

 

مصطفي: لما يبان الحق وتنباع الأرض راح يوقعو تعاهد أنهم مش راح يتعرضو للشاري وإلا راح يحاسبهم القانون لو خالفو تعاهدهم وتعدو على ملكية غيرهم
سلوى: إن شاءالله ربي يكمل على خير وتنحز هالمشكله وتتفكو منهم ومن بلاهم
مصطفي: إن شاءالله خير، وتلفت لسعاد اللي ساكته وسارحه ومش معاهم بكل، وبإستغراب🙄: خيرك ياسعاد ماتهدرزيش، ماقلتيش رأيك في الموضوع بكل
سعاد، بتعب: رأسي يوجع فيا شكله ضغطي راقي
مصطفي: خذيتي حبتك ولا لا!!
سعاد، بتعب: أي خذيتها، وخذيت حتى أسبرين وحبة فوار، وشربت حتى قهوه مافيش فايده
مصطفي: خلاص إمالا نوضي خشي لدارك إرتاحي شويه توا يهفت عليك
سعاد، بضيق: لا لا مانبيش إنخش توا نتكا حتى إهنايا، وجبدت مخده من وراها وإتكت عليها
مصطفي تنهد بضيق وقام طاسة الشاهي اللي صقعت قدامه وشربها مره واحد، وسلوى وسميره شافو لبعض بتوتر وعارفين أنه أمهم مرضت وأثر فيها الموضوع اللي صار قبل شويه
^^^^^^^^^^^^^^^^^^^^^^^^^^^^^^^^^^^^^^^^^^
واقفين بالسياره في شارع مش مألوف عليهم، ويستنو
محمد، بملل: ممكن تفهمني ليش واقفين إهنايا لينا فوق الساعه في مني تستني!!
حسام، بضيق: باللهي يامحمد خليك ساكت راهو أني مش ناقص
محمد، بغضب😠: وليش جايبني معاك الزفت باش تحرقلي دمي، تي تكلم وريحني
حسام، زفر بغضب😤: توا تشوف كل شي بعينك غير أصبر شويه
محمد، بضيق: تي شني بنشوف راهو خلاص صبري نفذ، في مني تستني وعلى شني ناوي!!
حسام ضيق عيونه وهوا يشوف للسياره اللي خشت من رأس الشارع ووقفت قدام واحد من الحياش، وأبتسم: خلاص معاش عندك ليش تصبر أهو وصل المقصود، فتح القجر اللي قدام محمد وطلع منه طاقية صوف ونظرات شمسيه لبسهم بسرعه قدام أنظار محمد اللي يشوفله بإستغراب وعدم فهم، وبأمر: خليك إهنايا رد بالك تتحرك فاهم!! خذي تبه من الكرسي الخلفي لبسه ونزل بسرعه، ماعطاش فرصه لمحمد ينطق بحرف
قرب الراجل من باب حوشه وقبل مايدخل المفتاح في الباب تلفت لما سمع حد ينادي فيه * ياباش مهندس ممكن دقيقه*، وبإستغراب🤔: تفضل مني حضرتك

 

 

 

حسام، بإبتسامه😊: بالنسبه لتفضل هذي فخليها مره ثانيه لأني مستعجل، بس مني حضرتك هذي ف مش لازم تعرفها، قرب ومدله بوكس في بطنه خلا الراجل نزل على ركابه وهوا شاد بطنه ويتوجع، وقبل مايقيم رأسه ويستكشف الشخص اللي قدامه كويس إنهال عليه حسام بالضرب فش غيظه كله فيه، وبغضب😠: هذا راح يكون جزاك لما تقهر حد يخصني وتأكل حقه، ومازال لما نعرف اللي درته مش راح يخلصك حد من بين إيديا، ومشي بسرعه وخلا ناصر طايح قدام حوشه وهوا شبه مكسر مع بعضه
ركب حسام وهوا يلهث وداهش من المجهود اللي داره، وتلفت لمحمد اللي صدمته باللي داره حسام خلاته مش قادر ينطق، أبتسم براحه وولع السياره وطلع
^^^^^^^^^^^^^^^^^^^^^^^^^^^^^^^^^^^^^^^^^^^^
في حوش ناجيه في دار إنتصار اللي كانت مقعمزه وتشوف لدنيا بنظرات حزن وعطف وهيا تحكي في اللي صار معاها ومره مره تتسلل منها دمعه تمسحها بسرعه وكأنها رافضه تبين ضعفها بدموعها
دنيا، بحزن😔: هذا اللي صار
إنتصار كانت عندها هلبا كلام تبي تقوله بس حست أنه مش وقته توا وخاصة وهيا تشوف في حالة دنيا كيف، فقررت أنها تأجل هالكلام ليوم ثاني، أبتسمت😊: خلاص ياحبيبتي ماتفكريش في شي ولا تأكلي روحك، توا أرقدي وأرتاحي، وبإذن الله مش راح يصير إلا الخير
دنيا تنهدت بضيق وإتكت في مكانها وهيا حاسه بشعور أنه وحيده وغريبه حتى وهيا بين الناس اللي تحبهم ويحبوها، والخوف قاعد مسيطر على قلبها وكأنها فقدت الأمان أول ماطلعت من المكان اللي كان يجمعها بيه، فكرة أنها هيا وياه تحت سقف واحد كانت إطمنها وتحسسها بالإمان، بس توا كل واحد منهم في مكان وهالشي زاد تعب نفسيتها أكثر، وخلا هالليله تكون من أصعب الليالي اللي ممكن تمر عليها😔
وحاله هوا ماكنش أحسن منها اللي فضل أنه يروح متأخر للحوش باش يطمن أن الكل يكونو راقدين ومايطرش يشوف حد، من أول ماخش عيونه طول توجهو لدارها، ورجليه من غير إراده منه رفعوه لقدام الباب، كان متمني يكون كل اللي صار حلم ويفيق منه ويشوفها راقده على سريرها وملامحها الحلوه اللي يعشقها هاديه وغارقه في النوم، بس غمض عيونه بقوه وفتحهم وهوا يشوف للدار خاليه وفاضيه ونافيه لكل أمنياته، ماقدرش يمنع روحه أنه يخش ويستنشق ريحتها اللي إستوطنت زوايا الدار غصبآ عنها، وكأنه الهواء اللي في الدار منها وفيها، إتكا في مكانها ومن المجهود الجسدي والذهني اللي بدله اليوم إستسلم للنوم بسرعه
^^^^^^^^^^^^^^^^^^^^^^^^^^^^^^^

 

 

 

دنيا أني مش بارده لدرجة أنه كلامه مايأترش فيا بالعكس كل كلمه قالها هزت كل خلايا جسمي، الحزن اللي كان في نبرة صوته وجع قلبي، بس هوا ماعطانيش مجال نفهمه شني حسيت أني كيف أثر فيا كلامهم وكسر خاطري قداش حسيت باليتم وقتها لحظتها حسيت بأني محتاجه لأم بالفعل تأخذني في حضنها وإطبطب عليا وبلمسة حنيه من إيديها تنسيني كل وجع حسيته، واللي داره هوا أنه زاد هالوجع عليا لامني من غير مايسمع تبريري، خلاني في الوقت اللي محتاجه فيه للدعم، مش عارفه نلوم روحي أو نلومه هوا أو نحط اللوم على الوقت اللي حطنا في هالمواقف وصعب فكرة التنازل على كلا منا، وخلا الفراق بينا يطول أكثر وأكثر
فاتو 16 اليوم بالتحديد، واليوم الأحد تبو تعرفو أني وين!! متخيلين أني قاعده في حوش خالتي كل هالوقت، الكل زاروني وسألو عليا إلا هوا😔
من حوالي 6 أيام نحيت الفاشه من على حرق أيدي، وقاعده كل يوم في تحسن الحمد لله
ومن يومين خوله جابت وليد وخالتي هاليومين شبه مقيمه عندها
عمتي كانت تجيني يوم بعد يوم وكل مره نطلع نوصلها لفم الباب وأني كلي أمل أنه يطلع هوا اللي بيروح بيها بس يخيب أملي لما نشوف عمي مصطفي يأشرلي بإيده من السياره
كل جيه لعمتي وهيا تترجا فيا أني نروح معاها، بس أني كنت نرفض مانبيش إنروح وأني عارفه أنه هوا مايبينيش مانقدرش نستوعب فكرة أني نكون معاه في نفس المكان وهوا تخلى عليا ، نقعد بعيده هالشي مريح أكثر
من يومين زاروني عيلة عمي المبروك قبل مايمشو للشرق باش يحضرو عرس أيه، وسنيه كانت زعلانه لأنه مامشيتش وحضرت زردة نجاحها هيا وعلا اللي داروها مع بعض، بس مشيتي غاذي كانت صعبه عليا
تخيلو معاي من زارني ثاني🤔، فاطمه مرت عمي بشير ومش مره لا ثلاثه مرات😥، في كل مره ننصدم فيها أكثر المرأه عكس ماكانت قبل، تهدرز وتضحك معاي وتطمن عليا لا وتسأل حتى لو ناقصني شي، كنت متفاجئه من المحبه اللي نزلت عليها فجأه، بس اليوم بزيارة عمي تأكدت من نيتها في الأيام اللي فاتو، تعالو إنقوللكم شني صار
***********************************

 

 

 

بشير، أبتسم😊: شني عجباتك القعده عند خالتك إمالا!!
دنيا: يعني حاجه زي هكي أهم شي أني مرتاحه الحمدلله
بشير، بإستغراب🤔: وعلاش عند عمتك ماكنتيش مرتاحه يعني
دنيا، بإبتسامه😊: لا مش هكي، بالعكس راحتي في حوش عمتي ماتختلفش عن راحتي إهنايا، بس قعدتي تغييرة جو
بشير: أها كويس بس متأكد أنه راحتك في حوش عمك راح تكون أكثر وأكثر
دنيا، بإستغراب🤔: كيف شني قصدك!!
بشير، بتوتر: الحق أني وعمتك فاطمه متمنينك تكوني منا وفينا، وأنتي عارفه أننا أحني ربي مارزقناش ببنات، بس أنتي بنت خوي وزي بنتي وأغلي
دنيا قعدت نشوفله بنظرات عدم فهم، أو ممكن كلامه واضح بس أني مانبيش نفهمه
بشير حك إيديه في بعض بتوتر، وأبتسم😊: بصراحه أني كنت ناوي نخطبك من عمتك لسعد ولدي، بس بما أنك قاعده معطله عند خالتك قلت إنجي نخطبك إهنايا وخلاص، وصدقيني يابنتي اللي صار قبل كله كان لمصلحتك، كنت خايف عليك وعلى رزقك، ومانبيش حد غريب يستخف بيك ويضحك عليا، أنتي أمانه في رقابنا بعد وفاة بوك الله يرحمه، وأكيد مش راح نرضي بأنه بنت خوي الغالي ينضحك عليها ويتكل حقها، قلت ولد عمها أولى بيها وهكي تقعدي بين أهلك وعيلتك وتكوني تحت جناح عمك اللي مستحيل يضرك
دنيا أنتابني شعور بالضحك غير طبيعي، لولا معرفتي أنه عمي هذا عصبي وممكن يدير شي وخصوصا أنه مؤيد وعمتي مش موجودين وأني وإنتصار بروحنا، كنت مش عارفه شني درت أو قلت، بس مسكت نفسي غصبآ عني، وقررت نضيف عرضه لعرض عمي مفتاح المهمش من عقلي من هذاكا اليوم، أبتسمت😊: الحق ياعمي ماعندي مانقول، وأكيد سعد مافيش واحده ممكن ترفضه، يكفي أنه ولدك وولد عمتي فاطمه وأنتم مربينه أحسن تربيه، بس أنت زي ماتشوف أني صغيره وقاعده مش مفكره في الموضوع هذا توا
بشير تهلل وجهه وفرح بكلام دنيا، وبإبتسامة😊: وأني عارف هالكلام يابنتي بس أني قلت نأخذ موافقتك، ونخطبك رسمي، والوقت قدامكم بعدين أنتي وسعد تتفاهمو على كل شي وإديرو اللي يناسبكم
دنيا، بإبتسامه: بس أني ياعمي محتاجه وقت نفكر وياريت لحد مانرد عليك مانبيش حد يعرف بعرضك هذا
بشير: لا من الناحيه هذي أطمني مش راح يعرف حد، بس ماطوليش علينا بالرد عاد، والله تصدقي مخلي سعد على نار في الحوش فرحان ومش مصدق
دنيا، أبتسمت: أها، بإذن الله يصير خير
***********************************
إنتصار، بضحكه😅: والله وكبرتي يابنت والخطاب يتهايلو عليك من كل جهه
دنيا نزلت رأسي بأسف😞
إنتصار، بحزن😔: لأمتي راح تقعدي هكي يادنيا، شوفي روحك كيف وليتي، وجهك ذبل والإرهاق طغي على عيونك
دنيا، بحزن😔: قلبي يوجع فيا ياإنتصار، ماتوقعتش أنه يتخلي عليا هكي، معقوله كلامه ووعوده ليا كله كان كذب
إنتصار تنهدت بضيق: أني كنت بنتكلم بس كل يوم نقول نسكت أفضل مانبيش نجرحك يادنيا، بس حالتك ماطمنش وكل يوم وأنتي في النازل، تبي الحق يادنيا حسام ماينلامش على اللي داره فيك أنتي تستاهلي بصراحه
دنيا شفتلها بحده وغضب😠
إنتصار، بحده: ماتشوفيليش هكي أي ماينلامش هذا الحق، يعني تصرفاتك معاه مش معقوله بصراحه، لأمتي تبيه يتحمل تجاهلك وبرودك، أنتي يادنيا شني تبي منه بالضبط قوليلي!!
دنيا، بحزن😔: مانبيشي يبعد عليا ياإنتصار مانقدرش نتحمل فراقه نبيه يكون معاي على طول، أستاحشته ياإنتصار، حاسه روحي وحيده من غيره
” أشتقت إليك أكثر مما تستطيع أن تتخيل.. يكاد قلبي يتمزق من فرط إشتياقي لك.. كل الأماكن من غيرك موحشه.. لا شي يؤنس وحدتي ويجعلني أطمئن غير وجودك😔 ”
إنتصار، بإبتسامه😊: معناها أعترفي أنتي تحبيه!!
دنيا، بتوتر: مش عارفه ياإنتصار مش عارفه
إنتصار: أسمعيني كويس يادنيا أنك تلقي حد فاهمك وخايف على زعلك ويهمه أمرك، ويدير أي شي باش يرضيك هذا رزقك الحقيقي وتكوني أغبي مخلوقه على وجه الأرض لو فرطتي فيه
دنيا شافتلها بتوتر

 

 

 

 

إنتصار: أنتي عارفه أنه كل اللي قلته حسام أتبثه وبجداره، يعني شني مازال تبيه يديرلك ثاني باش ترضي
دنيا نزلت رأسي: بس شوفيه كيف دار في النهايه، هذا اللي كان مخوفني من أني نقدم أي خطوه في إتجاهه
إنتصار، بنص عين😒: بطلي إستعباط يادنيا أنتي عارفه أنك لو قدمتي الخطوه هذي ماكنش هوا بعدك عليا هكي، يعني هوا مش راح يتحمل إستعباطك هذا لأخر عمره، أنتي هكي راح أضيعيه من أيدك
دنيا، بخوف😟: باهي كيف إندير قوليلي!!
إنتصار: تنازلي شويه يادنيا أكسريه غرورك هذا لو فعلا في شوية مشاعر عندك إتجاهه، مش غلط أن تحطي كبريائك على جنب وتعطي لقلبك ولروحك فرصه بأنك تستمتعي بهالمشاعر
دنيا، برفعة حاجب🤨: بس هوا الغالط وماكلفش نفسه أنه حتي يعتذر أو يسأل عليا، مادمني أني مانهماش للدرجه هذي معناها أني مش راح نتنازله أبدا
إنتصار، تنهدت بملل: حتى لو كان هوا غالط رغم أني مش شايفه هالشي أبدا بس يلا نسايرك ياستي ونقول غلط، بس غلطتك أنتي أكبر، أنتي اللي كنتي بتسلمي فيه بالساهل حسستيه أنه ولا شي عندك، كيف تبيه يتصرف معاك باللهي، ديري أنتي خطوه وأبعتيله رساله بس وخلينا نشوفوه هوا شني راح يدير
دنيا: ممكن نكون غلطت شويه بس المفروض هوا اللي يتنازل لو كان يحبني حق مش أني!!
إنتصار شدت رأسها بين إيديها، وبعياط: ااااااه ياربي صبرني، والله حسام وجعني في وسط كبدي كيف كان متحملك كيف!!
دنيا، برفعة حاجب: ياناري تسخفي أنتي وياه، كلمتي مؤيد على المشوار اللي قلتلك عليه
إنتصار هزت رأسها: قال ساعه ونكون عندكم، بس ماقلتليش من المرأه اللي بتمشيلها، أني قلت لمؤيد أنها صاحبتك
دنيا، بإبتسامه😊: كويس أحسن مادرتي، توا نمشو وتعرفي كل شي
^^^^^^^^^^^^^^^^^^^^^^^^^^^^^^^
حسام كل يوم وساعه ودقيقه وأني نقول خلاص معاش نقدر نصبر أكثر، نبي نشوفها نسمع صوتها إستاحشتها موت عايش في بعدها زي الجثه بس كل مايخطر عليا كلام محمد نتراجع وأني كلي أمل أنها تتنازل هيا نبيها ترجعلي وأني نعرف أنها معاش راح تسلم فيا لأي سبب كان، نبيها تكون حاسه بيا، شعوري الحلو اللي نتخيل أني نحسه معاها وهيا تبيني ومتمسكه بيا خلاني نصبر ونصبر ونصبر،
” يقودني إليكِ شوقا لاينتهي… ويردني عنكِ جرحا أنتي من سببتهِ 💔”
وكل مانضعف يخطر عليا محمد وكلامه معاي هذيكا الليله وكأني نستمد في قوتي بالبعد عنها من كلامه
***********************************
محمد، بعصبيه😡: أنت كيف إدير هكي في الراجل تخيل لو حد شافك شني ممكن يصير، ومني هذا أصلا اللي ناقم عليه للدرجه هذي!!
حسام، ببرود: هذا ناصر ال……، وماتخافش ماحد شافني، كان لازم نفرغ غضبي في شي ومافيش إلا هوا، مفكر أني نسيت اللي صار!! لا نظرة الحزن اللي في عيونها هذاكا اليوم ماقدرتش ننساها ومافارقتش خيالي، مش ممكن نسامح حد خلاها تحزن حتى دقيقه
محمد، بغضب😠: أنت مهبول مستحيل تكون طبيعي، انت ماتعرفش حتى هوا شني دارلها، مجرد كلمه منها بس تخليك هكي إدير فيه!!

 

 

 

حسام، بعصبيه😡: وليش تحساب كلمتها ساهله، انت ماشفتش نظرتها قداش فيها من رجاء وهيا تقولي ” هالشخص قهرني قهرة عمري ويبي يأكل حقي ترضالي هالشيء ” تبيني نستني نعرف شني دارلها، اللي كان مخليني نسكت لتوا أني ماكنتش نعرف مكانه إلا اليوم بس، وقبل ساعات وصلني عنوانه وجي في وقت أني نبي نفش غلي في أي حد والنصيب كان فيه هوا، صدقني ربي يحبه لأني مانعرفش شني دارلها بالضبط لو كنت نعرف كنت قتلته رسمي
محمد هز رأسه بأسف😞: لا حول ولاقوة الابالله العلي العظيم، ماعندي مانقول إلا أنه ربي يهديك ويعطيك شوية عقل باش تكمل عمرك اللي واضح أنه راح يكون ناقص هلبا بعقلك هذا، باهي توا بما أنك فشيت غلك ممكن تقولي شني اللي صار بينك وبين دنيا بالضبط!!
حسام تنهد بحزن😔 وقعد يحكيله كل شي لحد لما سيبها في المطبخ وطلع، تنهد بضيق: وهذا اللي صار، مش عارف كيف درت هكي الزفت!! كيف نقوللها بري!! مانقدرش نتحمل نخليها تقعد مع ولد خالتها، نروح توا ونرفع أمي ونمشي نروح بيها
محمد، بغضب😠: ديرها وراح تكون أحقر وأغبي شخص في العالم
حسام شافله بحده: كيف أنت شني تقول!!
محمد، بغضب😠: دير عقل ياراجل، وقف قلبك اللي بيضيعك هذا و تصرف بعقلك مره واحده بس، لو تنازلت أنت المره هذي راح تقعد طول عمرك تتنازل، وهيا راح تقعد طول عمرها هكي ومستحيل تتغير وبتعبك أكثر من قبل، لو تبي تقعد هكي برا روح بيها
حسام، بضيق: باهي كيف إندير قولي!!
محمد، ببرود: خليها لين تحس بغلطها وتتنازل هيا، من حقك عليها أنها إدير أي خطوه إتجاهك لو تبيك رسمي وماتبيش إضيعك من إيديها
حسام، بأسف😞: بس هيا عيل يامحمد، متأكد أنها ماتفهمش في الحاجات هذي، خايف نخسرها ونضيعها من أيدي
محمد، بهزوه😏: واللهي انت اللي طلعت عيل في أخر الحلقه، في عيل برأيك تتصرف هكي، باهي خلينا نقولو أنها صغيره وماتعرفش، أنت مهمتك تخليها تعرف قيمتك، وتحس أنها لما تكون بعيده عليك تكون فاقده شي مهم في حياتها، علمها تشعف أنها تسلم فيك مره ثانيه، وماتخافش مش راح تخسرها، دنيا مش من النوعيه اللي تستسلم وتوثق في حد بسهوله، ومادامها تتصرف معاك بإختلاف علينا، معناها أنت غير الكل عندها وأكيده مش راح تقدر تسيبك بالساهل
حسام، بحزن😔: هوا كلامك فيه نوع من المنطق، بس خايف، فكرة أني ممكن نخسرها تقتلني قتل مانقدرش نسلم فيها تحت أي ظرف
محمد، بثقه: صدقني لو قويت روحك المره هذي بس وخليتها لين تلين وتتنازل هيا مستحيل راح تخسرها مهما صار بينكم مش مشاكل، أسمع مني وأنت تشوف
حسام، بضيق: ولو طولت قعدتها غاذي!! مش راح تتنازل بسهوله أني نعرفها دماغها صخر مستحيل تلين بالساهل
محمد: إن شاء الله تقعد سنه لازم تتحمل، تبيها تكون معاك جثه برا روح بيها توا، بس لو تبيها روح معناها لازم تصبر حتي لو قعدت سنه خليك متأكد أنها راح تجيك وتكون كيف ماتبي أنت
حسام كلامه فيه شوية أمل رغم أني عارف أنه بعدها عذاب ليا وإستنزاف لطاقتي بس نحاول على قد مانقدر نتحمل، أني بروحي محتاج نعرف أنها تبيني نكون معاها وجنبها لأنه قلبها يبيني مش لمصلحه وبس
ولو طال غيابها؟
لأنتظرتها و دقت طبول القلب لوصولها سالمة غانمة!

 

 

 

 

 

ف ما هي براحلة عن القلب حتى عادتْ، إنما هي من إشترت خاطري و أبت أن يستمر حزني ف من انا حتى أردها خائبة؟
إلى متى تستطيع الإنتظار؟
-حتى تعود و ألقى نفسي في أحضانها ك طفلٍ وحيدٍ ظن نفسه يتيماً و اعادوا أمه بعدها!
-وإن لم تعتذر؟
-و من قال أنني إنتظر إعتذارها!! تكفيني نظراتها للإعتذار عن قباحة الدنيا و ما فيها!
-أتفتح قلبك و تغلقه متى شاءت؟
-فإن غابت صام القلب عن سواها وإن عادت هلَّ العيد بهلالها💖
***********************************
حسام كنت مقعمزه في المحل اللي بديت نخدم فيه، وكان ملهيني بعض الشي، نشوف لتليفوني بضيق لأمتي راح نستني لأمتي راح نصبر، أمتي بتحني عليا، كلمه واحده منك بس والله وقتها معاذ يشدني عليك ولا واحد
” إذا كنتي تريديني فعلا فأي عذرا ذلك الذي يمنعك أن تحادثيني… لماذا لا ترسلين كلمة واحده فقط ‘ أشتقت ‘ أو ‘ أحبك ‘ ولنري من يردني عنكِ حينها… أرجوكِ أخلقي أي سبباً تافه وعودي إلي 😔💔”
محمد، بإبتسامه😊: شن الجو لاباين عليك مرتاح ماشاء الله، لولا شيانة العرسان اللي إمدايرها هذي
حسام، بنص عين😒: باللهي شني جابك!! ناقصني هم أني ماصدقت تفكيت من عادل البارد ماكنتش نعرف أنك أبرد منه الزفت، وبعدين الشيانه هذي ماهو كله منك أهو نسمعو في كلامك ياسي نشوفوه لوين بيوصل
محمد، بغرور😌: أولا المحل محل صاحبي ونجيه أمتي مانبي ولانسيت أنه أني اللي دبرتلك العمل هذا
حسام، بغضب😠: ذل أمي أنت توا، تقول حطني مدير في شركه، كله شقفة محل مواد كهربائيه، والله لولا الهم اللي أني فيه ونبي نهرب من الحوش باش ننسي شويه ماكنت خدمت فيه لو بيخلصني بالدولار
محمد، ببرود: ولاكأني سمعتك بكل، خليني نكمل كلامي اللي هوا ثانيا: أني مش زي عادل وبعدين الحوش فاضي زي ماتعرف وكساد ماعنديش غيرك، وثالثا والأهم توا تشوف الشيانه هذي كيف أطلعك إمنور وتقول محمد قال
حسام أبتسم بهزوه😏: توا نشوفو!! وصلو العيله للشرق
محمد: أيه وصلو من إمبارح
حسام: وخوك المحروس هذاكا وين؟؟
محمد رفع كتافه ونزلهم: الله أعلم، بس من يوم اللي بديت أنت فيه الشيانه هوا ماروحش، وضحك😂
حسام أبتسم: بارد😁
^^^^^^^^^^^^^^^^^^^^^^^^^^^^^^^
وفي نفس الوقت كانت دنيا وإنتصار واقفين قدام حوش غريب، رنو الجرس ويستنو الباب ينفتح، ومؤيد مقعمز في السياره وعيونه عليهم، لحظات وإنفتح الباب اللي كانت وراه مرأه في بداية العقد الرابع من عمرها، وأقل مايقال عنها أنها فائقة الجمال، بإبتسامه😊: تفضلو، بس مني تبو أنتم؟
دنيا قدمت، وبتوتر: المدام نجاة صح!!

 

 

 

 

المرأه، بإستغراب🤔: أي صح، بس مني أنتي ماعرفتكش!!
دنيا أبتسمت ومدت أيدها بتسلم عليها: أني دنيا بنت الدكتوره ناديه، كلمتك من يومين لو تذكري
نجاة سلمت عليها وهيا مبتسمه: أهلين تفضلي مانعرفكش سامحيني، تفضلو خشو
دنيا، بإبتسامه😊: زاد فضلك، وتلفتت لإنتصار: خلاص أستنوني شويه مش معطله
إنتصار، بإصرار: خليني نخش معاك أحسن
دنيا، بحده: لا ياإنتصار أستنيني مع مؤيد، وخشيت ورديت الباب
إنتصار رجعت للسياره وهيا تتنهد بضيق
مؤيد، بإستغراب🤔: ليش ماخشيتيش معاها!! كيف تخليها بروحها!!
إنتصار، بإنزعاج: صاحبتها مش راح تأكلها ماتخافش، وبعدين أني مانعرفهاش وهيا قالت مش معطله فضلت أني نستناها معاك خير
مؤيد شافلها بنظرات شك🤔 وتلفت ولهي في تليفونه
دنيا حديثنا كان تعارف عادي وضيفتني وشفت حتى صغارها، المرأه ماشاء الله عليها جميله ونظيفه ونازكه وأنيقه حتى في لبس الحوش وحوشها مريح ومبهج ومرتب، وصغارها نظيفين ومحترمين ومتأدبين بسم الله ماشاء الله، شني اللي يخليه يشوف لغيرها مافهمتش، فعلا الرجاله مايملاش عينهم إلا التراب، بصراحه ماكنتش ناويه نحكيلها أي شي، مستحيل نحرم صغار من بوهم ونشتت عيله ونفرقهم على بعض، بس كنت نبي نتعرف عليها مبدئيا، كان عندي فضول نشوفها كيف شكلها اللي فضل ماما عليها، وبصراحه كنت متفاجئه مافيش أي نقص واضح عليها أبدا مرأه كامله مكمله، بس ممكن موضوع مرضها هوا اللي خلاه يدير هكي من وراها، مش عارفه حسيت هالزياره زادت شتت تفكيري أكثر، بعد حوالي ساعه إلا ربع إستاذنت وأني نشوف لتليفوني يرن إنتصار
مؤيد شاف السياره اللي درست قدام الحوش والراجل اللي نزل قعد يشوفله بإستغراب، وأشرله من بعيد بمعني تفضل، مؤيد كلمه من الروشن: سامحنا باللهي بس العويله جاينكم زياره وأني نستني فيهم، وتلفت لإنتصار: كلميها تطلع ياسر حتي الراجل روح
إنتصار طلعت تليفونها ورنت على دنيا، وهيا تشوف للراجل، بإستغراب🤔: خيره هكي رايح هوا تقول طالع من عجانه، كان مجبس أيده اليسار ورجله اليمين وواضح أنه في أثار وجروح قديمه على وجهه
دنيا فصلت على إنتصار من غير مانرد، وأني طالعه من الباب الداخلي ونجاة معاي بتسقدني، قابلنا راجلها خاش من الباب الخارجي
نجاة، بإبتسامه😊: هذا ناصر زوجي، على فكره حتى هوا كان صاحب بوك الله يرحمه، تعالا ياناصر خلي نعرفك على بنت الدكتوره ناديه الله يرحمها
ناصر قرب وهوا على وجهه علامات التوتر والخوف، أبتسم غصب: أهلا وسهلا
دنيا، بثقه: أهلا بيك باش مهندس ناصر، وقعدت نشوف لشكله بإستغراب: سلامتك ألف سلامه شكله كاثرين حوادتك هالفتره
نجاة، بضيق: الله لاتوريك هذا واحد ولد حرم تهجم عليه قدام الحوش كسره تكسير، الحمدلله لولا أني صدفه طالعه بندخل الصغار من الجنان سمعته وهوا يقوله هذا جزاك لما تقهر حد يخصني وتأكل حقه، شكيت وفتحت الباب وشفته ملوح زي الجثه، الله أعلم شني كان صار فيه وقتها راهو قعد ملوح لين مات من غير ماحد يندري عليه
ناصر كان يشوف لمرته بنظرات غضب وحده ماكانش يبيها تقول كل شي، بس هيا كانت منسجمه ونفضت الشكاره كلها، أبتسم بضيق: ولاد الحرام كاثرين هالأيام
دنيا، شافتله بنظرة هزوه😏: كاثرين هلبا ربي يفكنا سوهم ويطيحهم في شر أعمالهم، يلا أني أسمحولي عن أذنكم، شكرا مدام نجاة على الإستقبال كلك ذوقك وسامحيني أني جيتك من غير موعد
نجاة، بإبتسامه: بالعكس والله فرحتيني بجيتك، ياريت تعاوديها باللهي وماتقطعيناش
دنيا، أبتسمت😊: بإذن الله نزورك مره ثانيه، وتلفتت وشفت لناصر بإبتسامه مستفزه
ناصر، بحده: خلاص خشي أنتي يانجاة ألبسي حاجه على رأسك توا أني نوصلها

 

 

 

 

نجاة أبتسمت وخشت وسكرت الباب
دنيا مشيت وأني مبتسمه، وقبل مانوصل للباب الخارجي تلفتت لما قال
ناصر، بتوتر: أنتي شني تبي مني بالضبط!! ليش جايه لحوشي!!
دنيا، بإبتسامه😊: تعارف بس، انت ليش متوتر!! على أساس مش إمداير شي غلط ولاخايف أني نقول لمرتك ونخرب عشك اللي مافكرتش تحافظ عليه، وتخلي أعراض الناس في حالها، بس ماتخافش أني مش نذله زيك، وتلفتت للباب
ناصر، بحده: أكيد عارفه أنه اللي دار فيا هكي مش بعيد عليك، أني ماتكلمتش وسكتت عليه لأنه ماعنديش دليل، بس لو تعاودت مره ثانيه راح يشوف حسابه كويس
دنيا أبتسمت وأني نشوف للكاميرا اللي فوق الباب، تلفتت وبإستفزاز: لو مفكر أنه الكاميرا راح تحميك وتبين الفاعل فاأنت أكيد غالط، زي ماقدرت نخش لوسط حوشك ونشوف مرتك وصغارك بسهوله، وزي ماقدر هوا يوصلك ويكسرك قدام حوشك، فأكيد مش راح يصعب علينا شي ثاني، والخيار ليك أنت مازال عندك فرصه
ناصر، بخوف😟: أنتم شني تبو مني!!
دنيا، بغضب😠: مش راح ننسي أنك أنت السبب الرئيسي في موت بابا وماما أبدا، بالنسبه للقهر اللي قهرتهولي ربي راح يأخذ حقي منك وبالزايد لأني مش مقصره في دعائي عليك أبدا، بس حقي رد بالك تحلم أنك تأكله فاهم، وطلعت وقربعت الباب بقوه
إنتصار، بصدمه😲: أما أنتي أقوى منك ماشفتش منين لقيتيها الجرأه هذي مش عارفه!! تمشي للراجل وتهداديه في حوشه!!
دنيا طبعا حكيت لإنتصار أنه ناصر صاحب بابا وضحك عليا في فلوس المشروع وبس، من غير مانذكر موضوع ماما نهائي، تنهدت بحزن😔: ياريت قوتي وجرأتي هذي تقدر تريحلي هذا، وأني نأشر على قلبي
إنتصار، بإبتسامه😊: هذا راحته موجوده بين إيديك بس أنتي اللي مسكره رأسك، لكن أما حسام هذا طلع راجل قدها وقدود بصراحه، بس أنتي متأكده أنه هوا اللي دار فيه هكي
دنيا، بأسف😞: متأكده قتلك مرته العبيطه نكتت الشكاره واللي قالاته أكدلي أنه حسام
إنتصار: شفتي قداش الراجل يحبك ماتبيش تحني على روحك وعليه، ياسرك من الغرور الزفت راهو زودتيها
دنيا تنهدت بضيق: باللهي ماتبديش من جديد معاش متحمله شي راهو، وقعدت نبكي😭
إنتصار قربت وحضنت دنيا، وبحزن😔: والله حرام عليك هكي إديري في روحك، ليش هالعناد بس!!
دنيا، بدموع😭: ااااه ماكنتش عارفه أنه يجي يوم وممكن نحس بوجع قاعد ينهش في قلبي بالشكل هذا، ماكنتش نتخيل أني متعلقه بيه للدرجه هذي، ليش هكي يدير فيا بس
” وستعلم أنّهُ حُبًا حقيقيًا عندما يَستعصي على النِسيان، عندما لايُمحى ذاك الشُعور ولايَزول، عندما تعجز عن نسيانه مهما أخفق ومهما قصّر ومهما أخطأ.. ستعرف أنّهُ الحُب الحقيقي عندما لايتكرّر ولايتَشابه مع أيّ شُعور.. ❤️”
إنتصار بعدت دنيا، وبإبتسامة😊: خلاص عاد ياسرك دموعك نشفو، شني خليتي لغذوه، وبعدين أمي قريب تروح من خولة نوضي أغسلي وجهك، كان تشوفك هكي شني يفكك منها بعدين
دنيا وقفت من غير ماتقول ولا كلمه ومشت للحمام( أكرمكم الله)
إنتصار قعدت تشوفلها لين طلعت من الدار وتأكدت أنها سكرت الباب، رجعت خذت تليفونها، وأبتسمت😊: مادامك ماتبيش تتنازلي، مافيش مانع من تقديم المساعده، كتبت رساله بسرعه وبعتتها وفي أقل من ثواني وصلها تقرير التسليم والقراءه مسحتهم بسرعه وحطت التليفون وطلعت وهيا مبتسمه وتغني
أيوا يادنيا إحلوي كمان😍

 

 

 

خلينا نشوفك زي زمان☺
كل الحبايب متجمعين❤❤
والحزن مالوش دلوقتي مكان🥰

“الخلافات لا تقتل الحب بل تجدده ، فـ من يتخذه كـ حجة للفراق لم يعرف معنى الحب ابدآ .!💔‏”
حسام سكر المحل، وتلفت لمحمد بنص عين😒: مش ملزوم بيك راهو ليش ماجيتش في سيارتك
محمد: حسستني بترفعني للشرق نفس الحوازه الزفت
حسام، برفعة حاجب🤨: أركب وفمك مسكر وفكنا من فلسفتك باللهي راهو واصل حدي منك، وفتح باب السواق وركب
محمد ركب وسكر الباب، وبضحكه😅: تعباتك ياناري مسكين
حسام، بغضب😠: أنزل أنزل أنت ماينفعش فيك الخير
محمد حط أيده على فمها وسكت وعيونه يضحكو على حسام اللي راقيله وحواجبه مقرونات
حسام، بعصبيه😡: ناس ماتجيش إلا بالعين الحمراء، ولع السياره وحط التليفون في مكانه، وقعد يفتش في جيوبه، خبط الدومان بإيده، وبغضب: دهبتلي شيرتي الزفت نسيت جهاز النت في المحل
محمد، بغمزه😉: مش أني اللي داهبلك شيرتك بطل كذب
حسام فنص فيه بحده ونزل وقربع الباب
محمد تنهدت بضيق بكل حالته مطوره هذا كل يوم في الزايد، تلفتت وقعدت نشوف لحسام يفتح في قفل الباب، بس صوت المسج خلاني ننتبه ونرجع بنظري لتليفون حسام قريت المرسل 🤍 دنيتي 🤍
خذيت التليفون بسرعه وفضولي خلاني نفتح الرساله، أبتسمت وأني نقرأ في الرساله ” رغم أنك بعيد عني لكنك تسرق يومي كله بالتفكير بك ” وأخيرا أنكسر هالدماغ اللي عندك ياست دنيا، حي توا شني بنقول لحسام توترت وأني نشوف فيه طلع ويسكر في الباب، تليفونه أيفون معقد شويه ماعرفتش حتى كيف نطلع من الرسايل وبالغلط أنبعتت رساله فاضيه: ااااااف أستغفر الله شني درت أني، وبدل مانمسح الرساله اللي بعتها مسحت رسالة دنيا 🤦‍♂️ زفرت بغضب 😤وخبطت على باب السياره، ومسحت اللي بعتها بسرعه وحطيت التليفون في مكانه وأبتسمت بضيق لحسام اللي فتح باب السياره وركب
دنيا صليت ركعتين قبل العشي وقعدت مقعمزه على الصلايه، شويه ونسمع في الأذان يأذن، قمت الصلاه وسمعت مسج وصل لتليفوني، حاولت نركز في صلاتي وبس كملت وسلمت، وطول مشيت للتليفون وأني نقنع في روحي أنه زي كل مره أكيده من الشركه باش مايخيبش ظني هلبا، قبل مانوصل في التليفون إنفتح الباب وكانت خالتي
دنيا، أبتسمت: أهلين أمتى روحتي!!
ناجيه أبتسمت وهيا تشوف لتوب الصلاه اللي لابساته دنيا بإعجاب😊: يتقبل الله، كيف خشيت هيا تعالي تعشي إنتصار تحط في العشي
دنيا نحيت توب الصلاه وطلعت مع خالتي للصاله اللي كان فيها مؤيد وإنتصار مقعمزين على السفره
دنيا: كيف حالها هنادي ياخالتي؟
ناجيه، بإبتسامه😊: لا الحمدلله اليوم أحسن بهلبا
مؤيد شني بيسموه الولد ياأمي؟
ناجيه قاعد كل واحد يجبد من تركينه ماأتفقوش على أسم قاعدين
مؤيد برفعة حاجب🤨: المفروض أني نسميه فلستو بيا على خاطره العيل هذا
ناجيه: يسمو أماليه مالك ومالهم أنت
مؤيد: باهي إمشبط إملبط عليهم، توا نجيب دسته ونسمي كيف مانبي
إنتصار بنص عين😒: غير أحلم بعدين الحكومه هيا اللي بتسمي مش أنت

 

 

 

 

مؤيد، بتهديد: تعرفي أنتي ماتسكتيش نكلم فايز توا نقوله تعالا أرفعها بشلاتيتها خلي يأدبك مايقدرك كان هوا
إنتصار توسعو عيونها من الصدمه😲
ناجيه، بضيق: والنبي فكوني من برادتكم، وأنت خلاص مش سكرناه هالموضوع ليش تفتح فيه من جديد
مؤيد شاف لإنتصار ورقصلها حواجبه بإستفزاز: قتلك ياأمي جاني اليوم للمحل على أساس يعتذر
ناجيه، بتركيز: وشني قالك!!
مؤيد، بهزوه😏: قالي أحني ولاد عم وعيب اللي درتوه خليتو الناس تتكلم علينا بدل مانقولولهم العرس قريب قلنالهم فسخنا، قالي بيجي هوا وعمي ومرت عمي غذوه، قالي خليك محضر خير وفكنا من لعب الصغار، وزفر بغضب😤: تي قسمآ بالله لو مش أني في المحل وكان معبي زبائن راهو وريته لعب الصغار كيف يكون خزي عليك شكل الزفت مش عارفه غير البهيمه هذي شني كان عاجبها فيه، وهوا يأشر على إنتصار
إنتصار نزلت رأسها بأسف من غير ماتتكلم😞
ناجيه، بضيق: ربي يهديه قلناله نصيب مافيش غير ليش يجيب في أهله، والله ماعندي خلوق لدوتها مرت عمك ولا نقدر نجاريها، نخافهم يضغطو علينا
مؤيد،: ماتخافيش أني قتله ماتجيش ولا تجيب معاك حد ولا إتعبو إرواحكم أختي عطيناها
إنتصار بشهقه: كيف لمني عطيتني!! أنت كيف إدير هكي!!
مؤيد، بهزوه😏: للسوداني اللي في رأس الشارع، تي مني بيرضي بخليقتك هذي، قتله هكي باش يفكني منه ومن دوته، وبشك🤔: ولا بالك خاطرك توليله حتي أنتي مش بعيد تكوني متفاهمه أنتي وياه
ناجيه، بغضب😠: تي شني هالكلام اللي تقول فيه، مافيش منها الدوه هذي أسكت وسكر فمك
إنتصار، بحده: أصلا لو نبيه ماكنتش سيبته برضاي، ونزلو دموعها وقفت وخشت لدارها بسرعه
ناجيه شافت لمؤيد بلوم: باهي هكي ماخليتهاش تتهني حتى بعشاها، لازم تفتحه هالموضوع توا
مؤيد تنهد بضيق: وليش هالدراما الزايده مادامها معاش تبيه
دنيا وقفت: الحمد لله
ناجيه بإستغراب🤔: خيرك يابنتي قعمزي تعشي شكلك راهو مش عاجبني هالأيامات
مؤيد قعد يشوفلها، بخوف😟: خيرك مريضه تحسي في شي!!
دنيا، بإبتسامه😊: لا كويسه الحمدلله، بس خلي نخش نشوف إنتصار شويه، ومشيت بسرعه نبي نهرب من نظراتهم المتفحصه
^^^^^^^^^^^^^^^^^^^^^^^^^^^^^^^
طول الطريق محمد كان ساكت ومتوتر ويسب في روحه في خاطره مش عارف كيف بيقول لحسام على الرساله، تنهد بضيق لما وصلو

 

 

 

حسام، بضحكه😁: أما ماشاء الله المره هذي عجبتني منين جاك العقل وخليت فمك مسكر طول الطريق، هيا أنزل
محمد أبتسم بضيق، وفتح الباب ونزل
حسام قعد يشوفله بإستغراب🤔: تي تعالا وين ماشي نتعشو مع بعض
محمد، بضيق: لا لا صحيت توا نأكل أي حاجه، هيا تصبح على خير، وتلفت بيمشي لحوشهم
حسام قدم بسرعه وشده من أيده: والله ماصايره لما تتعشي معاي، ونكسدو مع بعض وتقولي شني الحل مع الشيانه هذي اللي طولت
محمد زفر بضيق وهوا حاس بالندم بيأكله ومش عارف كيف يدير
حسام، بإستغراب🤔: تي خيرك تنفخ علينا الزفت، شني جاك توا ماكان فيك شي لبسك جن ولا شني
محمد ضحك غصب، ومشي مع حسام وخشو للمربوعه
^^^^^^^^^^^^^^^^^^^^^^^^^^^^^^^
في حوش مفتاح في الصاله اللي فيها مفتاح وعادل وسالمه
عادل، بضيق: شني صار في موضوعي يابوي مش كأنها طولت في الرد
سالمه، بإستغراب🤔: موضوع شني ومني هيا اللي طولت
مفتاح، بضيق: مازال الوقت ماليهاش أسبوعين وبعدين خلي تروح من حوش خالتها وتوا إنزيد نكلمها ونشوفها
سالمه، بنفاذ صبر:تي قولولي على مني تتكلمو وأني مقعمزه بيناتكم زي الأطرش في الزفه
عادل، بإنزعاج: بوي خطبلي دنيا بنت عمي، وقاعده لتوا ماردتش
سالمه، بصدمه😯: كيف!! وأني وين وعلاش ماعنديش علم!! ولا كنتو بتعزموني على العرس وخلاص
مفتاح، بغضب😠: تي عرس شني هيا كلمه قلتها للبنت نشوف رأيها قبل مش لازم نبشعو بيها في الدنيا كلها، كأنها قالت باهي بعدين نقولولك ونمشو نخطبوها رسمي
سالمه: وليش ماخذيتو رأيي في هالموضوع؟ ولا أني رجل كرسي في الحوش ولاكيف
عادل، بضيق: مش هكي ياأمي بس بوي قال نشوفو رأي دنيا قبل ومافيش داعي نكبرو الموضوع وتطلع الدوه لين نأخذو منها الموافقه
سالمه، بإنزعاج: حتي أني أمك راهو ياعادل وعندي عليك حق المفروض نعرف أول وحده
عادل نزل رأسه بأسف😞
مفتاح، بغضب😠: خلاص عاد قلنالك ماصار شي، وين يصير توا أنتي أول واحده تعرفي
سالمه تنهدت بضيق وهيا واجعها خاطرها ديمه رأيها هيا الأخير حتى على صغارها ماعندهاش حكم ولاكلمه، وكلهم يفضلو في بوهم رغم عصبيته عليها هيا، وقالت بحزن😔: لا مش لازم تقولولي لين تجيبوها عروس توا نستقبلها وخلاص، عيونها دمعو ناضت من بحداهم وخشت للمطبخ
عادل شاف لأمه كيف ناضت وتنهد بضيق وطلع حتى هوا، أما مفتاح ف كمل متابعة الأخبار عادي
ومن الصاله للدار اللي فيها عبير ومعاها علا اللي تقول أختها طلقت عليها، بس علا كانت أشر من عبير وحقوده هلبا
علا: قتلك صاحبك متاع الصور مازال عندنا خدمه معاه راهو
عبير، بملل: مش بعتلك الصور وله خلاص شني مازال تبي ثاني
علا بحقد: الصور هذاكم مازال وقتهم، بس توا عندي موضوع في بالي كان ماصارش منه نبيه يركبلي زوز صور بمعرفته
عبير بإستغراب🤔: ولمني هالمره إن شاءالله، ومنين بتجيبيله الفلوس حق الكروت
علا: لمحمد ولد عمي مبروك، والفلوس مادخلكش فيهم توا أني إندبرهم
عبير، بصدمه😯: محمد!! وعلاش شني بينك وبينه باش تركبيله صور، ومع مني بديريهوله!!

 

 

 

علا شافت لتليفونها اللي يرن، وأبتسمت: توا بعدين نقولك خلي إنرد قبل فتحت الخط وناضت من بحداها، وبدلع: أهلين حبي وينك طول اليوم وإني نتصل بيك وأنت ماتردش
أسامه: معليشي سامحيني والله من الصبح مشغول أنتي عارفه حوسة الفرح ماغابيك عاد، الكل مش فاضي مابالك العريس
علا، تصنعت الحزن وعلى أساس بتبكي: لازم إذكرني وتنكد عليا، حرام عليك اللي إدير فيه فيا والله حرام
أسامه: غير ليش الجو هذا ربي يهديك بس، شن درت أني باش تقوليلي هكي
علا ببكي: أني والله حبيتك مش عارفه كيف بندير من غيرك باللهي عليك ماتسيبني، سيبها هيا والله ماتمشي معاك ولا تصلح بيك
أسامه،بحده: أنتي بعقلك ولا بلاه باش تقوليلي نسيب خطيبتي اللي نعرفها من سنين ولينا أكثر من سنه مخطوبين وفرحنا بعد يومين باش نقعد معاك أنتي اللي مالياش حتى شهر نعرفك
علا، بغضب😠: وليش تعشم فيا بيك، إمالا ناسي اللي بينا انت كيف إدير فيا هكي، الأيام اللي فاتو كلها كنت تتسلي بيا وتأخذ اللي تبيه كل ليله وتوا تقولي مانعرفكش
أسامه: كل شي صار برضاك وأني ماضربتكش على أيدك، وبعدين أنتي اللي كنتي شاديتها وراي وتتصلي وتبعتي في رسايل لين رديت عليك، ومن الأول تعرفي أني خاطب وعرسي قريب وماكذبتش عليك في شي
علا، ببكي مصطنع😢: بس أني حبيتك وتعلقت بيك وأنت بتصرفاتك زدت عطيتني أمل فيك، والله أني أحلا منها بهلبا أنت بس سيبها وأني ندير أي شي على خاطر باللهي سيبها والله ندير في روحي شي ويقعد ذنبي في رقبتك لو تأخذها، ودارت روحها تبكي بصوت ومتأثره
أسامه، بضيق: لا حول ولاقوة الابالله، باللهي فكينا من هالطروح الزايده ياريتني ماأتصلت بكل واحد عابي بيغير جوه ويتمتع هاليومين، وأنتي قالبتيهالي نكد، هيا سلامتك نسمعو على بعضنا الخير إن شاءالله، وسكر عليها
علا نحت التليفون من على وذنها، وبكره: خزيه واطي حقير، لكن توا نوريك الخير شني هوا، ناضت مشت لعبير وهيا في بالها الخطه البديله لتخريب العرس
^^^^^^^^^^^^^^^^^^^^^^^^^^^^^^^

 

 

 

في حوش بشير
فاطمه لوت شواربها:تفكير شني اللي بتفكره، دلع البنوت، خيره ولدي شني ناقصه تحلم تحصل حتي ربعه هيا
بشير، بهزوه😏: ولد الملكه ديانا وأني مانندريش، هوا هالشكل وهوا يأشر على سعد اللي مقعمز قدامه: شني اللي فيه باهي مافيه حاجه تنحب، جايبتيه نسخ منك على ماعاجباتك رويحتك
فاطمه، بغضب😠: وخيرني أني مش عاجباتك ولا مش عاجباتك، توا بعد هالعمر طلعتلك عوجه
بشير بصوت واطي: عوجه من الأول غير الله غالب الدنيا حظوظ
فاطمه، برفعة حاجب🤨: شني حسك قلت!!
بشير: قتلك أنتي الخير والبركه ياحنه، ربي يطول في عمرك
فاطمه أبتسمت: وأمتي بترد عليك السنيورة إن شاء الله
سعد، بإبتسامه😊: خليها على راحتها ياأمي أمتي ماترد ترد أني مش مستعجل على شي المهم توافق بس
فاطمه، بثقه: ماتخافش توافق توافق هيا وين تحصل زيك، تلقاها بطير من الفرحه ومش مصدقه غير ماقدرتش تتكلم زعميتها إثقل في روحها، هناك واحده يخطبها ولد فاطمه وتقول لا هيا
بشير ضحك🤣، والولاد شادين ضحكتهم بالسيف خوف من أمهم
سامر، بتوتر: يابوي مادامك خطبت لسعد اللي أصغر مني أخطبلي حتي أني
بشير، بهزوه😏: حاضر وشني تبو ثاني!! بالك تبي تخطب حتى أنت ياسامح نخطبلكم كلكم ونعرسلكم حتى العرس، وخودو الديار كل واحد دار، ونسقدو حتي أمكم بالمره شني رأيكم!!
ضحكو الولاد وفاطمه لوت شواربها بغيض
بشير زفر بغضب😤 وناض طلع من بحداهم
^^^^^^^^^^^^^^^^^^^^^^^^^^^^^^^
في حوش مصطفي سعاد تكلم في سلوى بالتليفون

 

 

 

سلوى: غريبه كيف ماتكلمش وساكت هذا كله
سعاد، بضيق: الله أعلم عليه، والله قريب حتي الشوفان معاذ نشوف فيه يطلع الصبح بكري وأغلب شي ديمه يروح مؤخر ويخش لداره طول، حتي الكلام من غير السلام عليكم ماتجي بيني وبينه كلمه
سلوى: على أساس إمداير روحه حرجان حتى أني إتصلت بيه مرتين ماردش عليا، حتى دنيا مادارت ديره نتصل بيه قداش مره وتكلم فيا عادي ولا كأنه صار شي
سعاد، تنهدت بحزن😔: ربي يهديه وخلاص، والله كان تشوفيه كيف رايح تقولي عليه كبر عشرين سنه القدام، ياريتنا ماتكلمنا
سلوى، بضيق: لاحول ولاقوة الابالله، وهيا ماتبيش تروح
سعاد: كل مانقوللها هيا روحي معاي تقول مازال أشبح أمتي اللي مازال، امس خالك مفتاح قال ياسر كلميها تروح وين قاعده هذا كله
سلوى، بإستغراب: وهوا شني دخله بيها خالي
سعاد: كيف مش عمها، زعميته خايف عليها، وتلفتت للباب اللي إنفتح: أهو بوك روح هيا بالسلامة توا
سلوى: سلميلي عليه، بالسلامة تصبحو على خير
سعاد: يوصل، وأنتي من أهله، سكرت التليفون وتلفتت لمصطفي اللي قعمز قدام التلفزيون: نحطلك عشي
مصطفي: اي وحطي حتى لحسام ومحمد أهم في المربوعه
سعاد، بإستغراب🤔: وليش ماخش وقال حطيلنا عشي!!
مصطفي، بضيق: أهو قتلك أني، وبعدين ولدك مش عاجبني راهو كلميه وأفهمي منه شني اللي يبيه بالضبط!!
سعاد تنهدت بحزن😔 وناضت للمطبخ
^^^^^^^^^^^^^^^^^^^^^^^^^^^^^^^
دنيا خشيت على إنتصار وتفاجأت لما لقيتها مقعمزه على سريرها وتلعب بتليفونها وواضح أنها مستمتعه، وبإستغراب🙄: أسم الله العظيم مش كنتي تبكي توا
إنتصار، بإبتسامه😊: كنت نبكي وتوا نضحك عادي، بصراحه مايستاهلش نبكي عليه ليش نخسر في دميعاتي
دنيا أبتسمت😊 وهزيت رأسي، خذيت تليفوني وقاعد بالي مشغول بالرساله، لما شفت المرسل إنفتحو عيوني بصدمه، فتحتها بلهفه وزادت صدمتي لما لقيتها فاضيه🙁

 

 

 

إنتصار شفت بإبتسامه😊 لدنيا المصدومه أوبااا شكله رد على الرساله، وبتساؤل: خيرك فاتحه فمك ردي بالك الذبان😁
دنيا، بضيق: بعتلي رساله ياإنتصار
إنتصار نضت بسرعه وقعمزت جنبها، وبفرحه: حقا!! شني كاتب ترا!! خذيت التليفون من أيدها واستغربت وأني نشوف فيها فاضيه، شكله حتي رسالتي ماجبتش نتيجه كيف هكي!!، مش راح نستسلم ضغطت على الإتصال والتليفون في أيدي
دنيا، بإستغراب🤔: زعما شني قصده!!
إنتصار، بتوتر: مش عارفه رني عليه وشوفيه
دنيا، بنفي: لا مستحيل
إنتصار خيره هذا مايردش، سكرت بسرعه وشهقت: هييييي يادنيا شكلي نشت الإتصال بالغلط مشتله رنه، حييي عليا سامحيني
دنيا شهقت: حقا!! ترا نشوف، وشافت أنه مشتله رنه فعلا، وبغضب😠: خيرك ياإنتصار كيف إديري هكي كيف!!، مادخليش فيك يتصل نعطيهولك أنتي ردي عليه فاهمه
إنتصار، بأسف😞: مش بقصدي سامحيني
دنيا تنهدت بضيق وقعدت أطربق في صوابعها بتوتر: توا بيفهم أنه أني اللي رنيت عليه، لو أتصل شني بنقو… وهيا ماكملتش كلمتها رن التليفون بين إيديها، لوحاته لإنتصار، وبغضب😠: ردي انتي أني مادخليش فيك
إنتصار:خلاص يادنيا ردي بلا هبال، وردتلها التليفون
وقعدو كل واحده تمده للثانيه لين فصل الخط بس لحظات وعاود رن ثاني وهالمره كان في أيد إنتصار اللي أبتسمت بمكر وهيا تقول: هيييي يادنيا هذي صاحبة أمك فتحت الخط وحطتلها التليفون على وذنها وهيا تقوللها: تكلمي فيسع، وتوجهت للباب وطلعت
دنيا من التوتر ماركزتش وماجاش على بالها أنه إنتصار ممكن تكذب عليها، شديت التليفون، وبتوتر: ألو
^^^^^^^^^^^^^^^^^^^^^^^^^^^^^^^

 

 

 

في المربوعه
حسام، بإستغراب🤔: تي خيرك ياراجل شني فيه!!
محمد فكر أنه يقوله بعدين تراجع، وبتوتر: مافي شي نحس في روحي تاعب شويه ياريتك خليتني روحت
حسام، بشك: باهي أتعشى وروح مش حارثين عليك راهو
محمد هز رأسه وزعميته لهي في تليفونه وهوا يفكر في طريقه يقول بيها لحسام على الرساله اللي حذفها، وحاس بالندم كيف طاوع فضوله ومس شي مش ليه بكل
حسام اللي فتح النت وقعد يتصفح بعدم تركيز وخطرت على باله حط على رقمها وقعد يتفرج عليه وحاسس أنه تليفونه راح يرن بأسمها في أي لحظه أو ممكن هكي كان يتمني، وكأنه هالمره أحساسه صدق معاه، قعد يفتح في عيونه ويسكر فيهم بسرعه وهوا مش مصدق أنه وأخيرا رقمها نور شاشة تليفونه، وقف بسرعه بس رجع قعمز
محمد، بإستغراب🤔: خيرك ياحسام رد على التليفون، وضيق عيونه وهوا يشوف لتصرفات حسام الغير طبيعيه اللي يشوف لتليفونه بنظرات عدم تصديق لين فصلت الرنه، وبقلق: خيرك ياحسام
حسام اللي كان تحت تأثير الصدمه والفرحه مع بعض ماقدرش ينطق وأشر لمحمد بإيده يبيه يقرب، ومدله التليفون، وبفرحه: شوف باللهي صح المكالمه منها ولا أني نتخيل
محمد شد التليفون ولما شاف المكالمه، أبتسم😊: أي منها أبسط ياعم، بس خيرك مارديتش وخليتها لين سكرت
حسام، بإبتسامه😊: نحساب روحي نحلم، خلاص توا نعاودلها، وأشر لمحمد اللي كيف بيتكلم🤫: اااس ولا كلمه باللهي ماتتكلم خلاص معاش نقدر والله أهي رنت شني مازال بنستني ثاني
محمد، بإبتسامه😊: مش إمقايلك شي ياأهبل خلاص رن عليها، ووقف: هيا نشوفك غذوه وإن شاءالله تكون منحيلنا هالشيانه، وطلع وسكر الباب وراه
حسام مش مصدق روحي وأخيرا تنازلت وحنت عليا، رنيت بسرعه وقعد لين فصل وماردتش عاودت ثاني وأني متلهف نسمع صوتها والمره هذي فيسع ماأنفتح الخط، وأول ماجاني صوتها زفرت براحه كانت غايبه عليا من يوم غيابها،
حسام، بحب❤: دنيتي
دنيا أول ماسمعت صوته كانو دموعي على وشك أنهم ينزلو مش عارفه شوق ولا حنين ولا من التوتر أو خوف لأني ماتوقعتش نسمع صوته توا، بس منعت نفسي وأني إنردد في داخلي تماسكي تماسكي باش مانفقدش التحكم في روحي وننهار، وبتوتر: كيف حالك؟

 

 

 

حسام، تنهدت من قلبي: كيف راح يكون حالي في غيابك
دنيا تنهدت وقعدت ساكته لو تكلمت راح ينزلو دموعي اللي معاش قادره نسيطر عليهم الفتره الأخيره بكل
حسام، بحب❤: روحي!!
دنيا نزلو دموعي وصوت شهقاتي بدي واضح😭
حسام، بخوف😟: دنيتي ليش تبكي!!
دنيا بدموع😢: علاش درت فيا هكي علاش!!
حسام، بضيق: ورحمة بوك أمسحي دموعك ومعاش تبكي قولي اللي في خاطرك كله بس ماتبكيش باللهي، قلبي تعذب بما فيه الكفايه معاش قادر يتحمل أكثر
دنيا، بلوم: كيف هنت عليك وخليتني الفتره هذي كله، ماكلفتش روحك حتي تسأل عليا؟؟
حسام، بحزن😔: عمرك ماتهوني عليا ولانقدر نخليك، بعدين تصدقي أني نقدر نقعد مانشوفكش الفتره هذي كلها، اليوم بس ماشفتكش والباقي كل يوم نشوف فيك وأنتي طالعه أو خاشه لحوش خالتك
دنيا، بحزن😔: لأمتي كنت ناوي تقعد ناسيني هكي، لولا الرنه اللي مش…….
حسام، بحب❤: يادنيتي أنتي ممكن نحطو الزعل واللوم على جنب شويه، خليني معاك أنتي وبس مستاحشك موت ياروحي
دنيا مسحت دموعي بإيديا، وأبتسمت😊: حسام أني أس……
حسام: اااااس ياروحي أني اللي أسف وأسف وأسف ومليون أسف، عمره اللي صار ماراح يتكرر
دنيا: معاش راح تقولي بري لحوشك خالتك!!
حسام: كنت غبي والله، من الليله أنسي أنه عندك حوش خاله أصلا
دنيا، بضحكه😅: لا مش لهالدرجه، زياره بس لاغير، لأني حتى أني مانبيش نقعد في مكان أنت مش فيه

 

 

 

حسام، بحب❤: أنتي شني قاعده إديري فيا بس، عارفه كل دقيقه تفوت عليا وأنتي بعيده مش محسوبه من عمري والله، ولما تكوني مش موجوده معاي نحس وكأني ضايع حتي من نفسي وفاقد حاجه كبيره مستحيل أي شي غيرك يعوضها
دنيا، بإبتسامه: حسام نبي نقولك شي
حسام: قولي ياروح حسام أنتي
دنيا، بتوتر: هوا طلب
حسام، بحب: عيوني وعمري كله يرخصلك وفداك أطلبي ياروحي
دنيا، بتوتر: من الأول كنت نقولك أعطيني شوية وقت
حسام، بإبتسامه: وأني نقولك وقتي كله على حسابك
دنيا، بحزن: أني مش متحمله فكرة أني نخسرك أو أنه حياتي تكون خاليه من وجودك، بس أني مش عارفه كيف نتعامل معاك مش قادره نفهم بسهوله أنت شني تبي ومش عارفه كيف بنخليك تفهمني، غيرني بإيديك أنت، راضيه نكون كيف ماتبي بس اصبر عليا وأعطيني شوية وقت نقدر نتغير فيه
حسام: ومن قالك أني نبيك تتغيري أصلا، أني حبيتك هكي ونبيك زي ماأنتي مش مطره تغيري شي فيك، ويكون في علمك أني فاهمك ويمكن أكثر حتى من روحك، كل اللي نبيه منك أنك توثقي فيا بس، لو تعرفي قداش كنت خايف نفقدك ونضيعك من إيديا
دنيا، بحزن😔: أني عارفه روحي غالطه في هلبا حاجات، بس أكثر المواقف نكون مش عارفه كيف نتصرف، نحير كيف نعبر على اللي نحس بيه، تعرف نحس في روحي مرات مش فاهمه شي من هالحياة، خاطري إندير ديليت كامل لعقلي ونبدأ من جديد
حسام: صدقيني أنتي حلوه زي ماأنتي بس ياريت تخفي عليا شويه، معاش تهمليني أرجوك، خليك متمسكه بيا، لو زعلك حد أو في شي مضايقك تعالي وقوليلي معاش تهربي مني وتتجاهليني
دنيا، بإبتسامه: لأني غبيه كنت نزعل ونضايق من النجوم وأني عندي القمر بحاله
حسام، بحب: أنتي قمري ونجومي ودنيتي كلها، ربع ساعه ونكون عندك وتي روحك
**********************************
_ اتحبها ؟!
_ كثيراً
_ لكنهاَ مزاجية ؟!
_ وهذاَ ما جعلني أعشقهاَ
_ سوف تتعب معها كثيراً
_ لا بل هي راحتي
_ كيف هذاَ ؟!

 

 

 

_ أعشق تقلباتها المفاجئة ، أفرح عندما تأتي و تخبرني بمشاكلها و همومها ، أشعر بأنني قد إمتلكت قلبها ، ٱحبها لأنها عنيدة تفعل ما تريده ولا تهاب أحد ، ولكنها تلك الفتاة البريئة التي لا تعلم كيف تتعامل مع الناس و تخاف أن تخسرهم هي نفسها تلك التي تصطنع القوة ولكن خلف هذه القوة فتاة تحتاج لحضن يحتويها ، فتاة طموحة لا تيأس ، تلك الفتاة العفيفة الطاهرة ، فتاة حساسة لدرجة كبيرة ، بكلمة واحده تستطيع كسرها او تقويتها ، تلك التي تتغير قراراتها ، لا يمكنك فهمها ، ٱحبها لأنها مميزة و مختلفة عن الباقي 🥺💭
**********************************
دنيا: تمام، سكرت الخط وضحكت بصوت عالى مش عارفه شني قصدي بالضحك وقتها بس فرحانه وماعرفتش كيف نعبر، طلعت نجري لإنتصار اللي كانت في المطبخ وحضنتها بقوه
إنتصار، بضحكه😅: ياهبله خنقتيني غير علاش هذا كله
دنيا، بفرحه: جايني توا، قالي وتي روحك
إنتصار، بضحكه: وأخيرا والله كان مش من أمي ومؤيد كنت زغرطت طيب فيكم ياحنه، تعالي بسرعه نلمولك شلاتيتك
دنيا، بحزن😔: شكلك ماصدقتي أني بنروح تبي تفتكي مني
إنتصار جبدت دنيا معاه للدار، وبضحكه: وأخيرا بنرقد مرتاحه تي مليت من بكاك طول الليل وحالة الكأبه اللي عيشتيني فيها حتي أني، أسمعيني سلم بنتي راهو حرج ثاني معاش فيه فاهمه
دنيا هزيت رأسي وضحكت
إنتصار: يلا خفي روحك يجي يلقاك مش واتيه نخافه يمشي ويخليك بعدين شني يردكم ثاني
حسام طلعت من المربوعه قابلتني أمي كيف طالعه من الحوش بسفرة العشي، قدمت بسرعه وخذيتها منها وحطيتها لوطه، وحظنتها بقوه
سعاد، بخوف😟: خيرك ياوليدي فيك شي
حسام بعدت وأني نمسح في عيوني اللي تعبو دموع، وبإبتسامة😊: فرحان ياأمي والفرحه مش سايعتني، لو تحبيني وعندي غلاوه عندك توقفي جنبي لو شني ماصار

سعاد، أبتسمت😊: يامهبول أنت ولدي قطعه من روحي كيف مانحبكش ومش غالي عليا
حسام، برجاء: معناها تطلعي معاي توا ونمشو نروحو بيها
سعاد، بضحكه😁: نمشي وعلاش مانمشيش، والله على خاطر الفرحه اللي في عيونك هذي، حتى عبايتي ماني لابستها لما نمشي بقفطاني هذا

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية طفلة أرهقت قلبي)