رواية طفلة أرهقت قلبي الفصل التاسع عشر 19 بقلم عائشة البشير

رواية طفلة أرهقت قلبي الفصل التاسع عشر 19 بقلم عائشة البشير

رواية طفلة أرهقت قلبي البارت التاسع عشر

رواية طفلة أرهقت قلبي الجزء التاسع عشر

رواية طفلة أرهقت قلبي الحلقة التاسعة عشر

” ‏من الطبيعي أن نضعف ونلين ونقسى ونتغيَّر ونتناقض، لا مُشكلة في عدم التزامنا بحال أو فكر او شعور أو مبدأ واحد طوال حيَاتنا، لا تُصدِّق من يقول أن تغيُّرنا خطأ، لو أرادنا الله ثابتًين طوال حياتنا لخلقنا من حجر، ولكننا بشر خلقنا من طين سهل التشكيل فكيف لقلوبنا ألا تتغير بتغير الظروف، والمرور بكل هذه المشاكل ”
دنيا روحت مع عمتي وحسام هذيكا الليله وبالرغم من إعتراضات خالتي ومؤيد على مرواحتي إلا أني أصريت بقولت عمتي جايه في هالليل مانقدرش نردها فاضيه، وعدتهم أني راح نزورهم مره ثانيه عن قريب، بس في خاطري نقول الله أعلم أمتي، مهما نقول من كلام مستحيل نقدر نوصفلكم فرحة حسام اللي من اللحظه اللي شافني فيها وهوا وجهه كله يضحك، كان فرحان لدرجه مش معقوله قعد يغني ويضحك ويصفق هوا وعمتي طول الطريق، وحتى أني كنت فرحانه بس مش زيه الحق، أو يمكن زيه بس أني مانعرفش نعبر عن فرحتي بالطريقه الصح اللي تبين للكل أني فرحانه، من لما وصلنا خشيت لداري ااااه قداش إستاحشتها وماقدرتش تغيب عن خشمي ريحته اللي في الدار وزدت تأكدت أنها ليه لما قالت عمتي ” حسام كان يبات إهنايا الأيامات اللي فاتو، خلي إنجيب إنغيرلك الشرشاف والمخده” إلا أني رقدت عليهم زي ماهما ودرت روحي غارقه في سابع نومه لما رجعت عمتي بالشرشاف والمخده الثانيات اللي لما لقتني راقده حطتهم لوطه وخلتهم، فاتت هذيكا الليله وحسام يزربز في وسط الحوش ماقدرش يشوفني أو يكلمني لأنه عمتي رقدت معاي وحتى على رسايله أني مارديتش لأني رقدت على طول، أرهاقي وقلت نومي الأيام اللي فاتو ولا عليا شكله، فاتت هذيكا الليله واللي بعدها واللي بعدها عمتي ولت حريصه أكثر كل ليله ترقد معاي ولما يكون حسام موجود في الحوش ماتخلينيش بروحي مش عارفه كيف تفكر بس مش إمضايقني الموضوع عادي يكفي أنه معاي في نفس المكان ونشوف فيه على طول مايهمنيش الباقي تقدرو

 

 

 

تقولو الوضع مريح نوعا ما بالنسبه ليا
حسام أما أني فالوضع هذا مش مريحني أبدا، مش وجود دنيتي معاي وتحت ضلي لا أبدا هالشي من أسعد الأشياء اللي صارت وممكن تصير في حياتي كلها، بس فكرة أنه أمي تكون عارفه كل شي، وشاكه فيا وخايفه على بنت خوها مني لدرجة حتى المطبخ ماتخليها تخشله بروحها لما أني نكون موجود مش مطمنتي بكل، قررت أني الليله نحكي مع بوي وأمي في هالموضوع خلاص معاش يتأجل أكثر، هما عارفين بس حسيت لما نقول أني ويسمعوها مني أفضل ويعرفو أني واخذ الموضوع بجديه ومانلعبش أبدا
اليوم الأربعاء صليت الفجر وبعتلها رساله ” صباح الخير لعيونك الحلوه، لوجهك السمح، لصوتك المليان حنيه واللي مستاحشه موت، نستني فيك في المطبخ، قهوة بداية يومي نبيها من إيديك اليوم ”
دنيا كنت نصلي سلمت وأنتبهت لتليفوني اللي ضوا برساله طبعا كان صامت طول اليومين اللي فاتو لأنه حسام مش إمبطل رسايل طول الوقت، وأنه تليفوني يقعد يزنزن بنغمة رساله كل شويه حتى الفجر هالوضع محرج قدام عمتي وفي نفس الوقت يخليني نتحشم منها وبالأخص أنها بدت تعرف كل شي ومعاش زي قبل، أبتسمت وأني نقرأ في الرساله تلفتت لعمتي لقيتها متكيه في مكانها وتسبح، قررت نستني شويه لين يأخذها النوم من جديد، بعتله ” صباح الورد، حاضر بس أستناني شويه ترقد عمتي ونجيك”
حسام أبتسمت بحب وأني نشوف فيها خاشه من باب المطبخ وتتلفت وراها بخوف لدرجة أنها مالاحظتش وجودي، وبغضب مصطنع: مش مسموح حد يأخذ عقلك غيري راهو
دنيا تلفتت بفزع وهيا حاطه إيدها على قلبها: بسم الله خلعتني، شني إدير إهنايا؟
حسام جبدت الكرسي وقعمزت وتكيت رأسي على إيدي وأني نشوفلها بحب وهيام من غير مانتكلم
دنيا أبتسمت بخجل☺ ونزلت رأسي بتوتر من نظراته، وتلفتت وقعدت إندير في القهوه وأني متوتره على الأخر من تركيزه عليا وكيف يتبع فيا بعيونه وين مانتحرك، وأخيرا حطيت البكرج في السفره اللي فيها الفناجين على الطاوله وقعمزت، وبرفعة حاجب🤨: ليش تشوفلي هكي!!
حسام، بحب❤: مستاحشك ونبي نتأمل ممنوع ولا كيف، وبعدين ليا نص ساعه نستني فيك إهنايا، شني كنت إديري؟؟
دنيا صبيت القهوه وأبتسمت😊: مش ممنوع بس معاش تشوفلي هكي، وبعدين ماهو قعدت نستني في عمتي لين رجعت رقدت، طلعت على رؤوس صوابعي تقول خانبه، وضحكت بخفه😁
حسام، بإبتسامه😊: الليله نكلمها في هالموضوع بإذن الله
دنيا قمت فنجان القهوه شربت منه وحطيته، وبإستغراب🤔: موضوع شني؟؟
حسام خذيت فنجانها اللي شربت منه، وبغمزه😉: توا في الليل تعرفي
دنيا، بشهقه: هيي فنجاني هذا شربت منه خيرك!!😳
حسام، بإبتسامه😊: وهذا اللي نبيه أني، ونبي كيكه من إيديك اليوم قداش ليك مادرتيها
دنيا، أبتسمت:باهي حاضر، وشني تبي ثاني؟
حسام، بهيام🤤: نبي هلبا حاجات وكلهم أنتي❤
دنيا نزلت رأسي بخجل: باهي بتبطل ولا إنوض

 

 

حسام، برفعة حاجب🤨: شديت إيدها لا وين تنوضي أني ماصدقت نشدك بروحك، هاتي تليفونك نفتحلك الفايبر
دنيا، وبإستغراب🤔: وشني الفايده مش راح نقدر نكلمك مادامه عمتي جنبي
حسام، بحده: هاتي جاي، وجبد التليفون، وبإبتسامة😊: أني بنتصل فيديو نبي نشوفك ونملئ عيوني منك وأنتي حطي السماعات أني اللي نتكلم ماتتكلميش أنتي
دنيا، بتوتر: حسام ممكن نقول شي
حسام يشوف للتليفون بتركيز: قولي نسمع فيك
دنيا، بتوتر: بس ماتفهمنيش غلط
حسام حطيت التليفون وشفتلها بإستغراب🤔: شني فيه قولي!!
دنيا، بتوتر: مش حاسس أنك متسرع شويه في مشاعرك ناحيتي!!
حسام ضيقت عيوني وقعدت نشوفلها وأني ساكت
دنيا كملت وأني خايفه من ردة فعله، وبتوتر: مش عارفه بس حاسه الموضوع غريب شويه أنت ماليكش 6 شهور مروح يعني مش فتره طويله كافيه أنها تخليك تحب حد، وقبل ماتسافر كنت تكرهني وأنت بروحك عارف معاملتك ليا كيف كانت، بصراحه أني نبي توضيح كيف هكي!!
حسام تنهدت بضيق ونزلت رأسي بأسف😞
دنيا من سكوته وتنزيلة رأسه عرفت أنه كلامي ضايقه، بخوف😟: حسام أني مش قصدي إنضايقك بس أني…….
حسام تنهدت بقوه ومسكت إيديها اللي كانت تحرك فيهم بتوتر لدرجة حسيت برعشتها أول مامسكتهم، وبإبتسامة😊: شفتي الرعشه اللي حسيتيها توا، هذا اللي يصير لقلبي لما نشوفك
دنيا حاولت نجبد إيديا وأنتي متوتره ومرتبكه
حسام ضغطت على إيديها أكثر وأني نشوف لعيونها بهيام😍: شفتي الإرتباك والتوتر اللي أنتي فيه توا هذا اللي يصيرلي لما نشوفك، في لحظات نعجز حتى عن الكلام قدام عيونك
دنيا قمت عيوني ولما تلاقو بعيونه عجزت نقدر إنزلهم

 

 

 

حسام، بحب❤: اللي قاعده تشوفي فيه في عيوني يأكدلك صدق مشاعري وأني مش مستعجل ولا شي، بس أنتي اللي مش راضيه تفهمي ورافضه أنك تصدقي
دنيا، بتوتر: أني مش قصدي هكي قتلك ماتفهمنيش غلط
حسام، بإبتسامه: مادامك تأخذي وتعطي معاي في الكلام وتشاركي فيا في اللي تحسي بيه وشاغلك أكيد مش راح نفهمك غلط، بس نبيك تعرفي أنه الحب عمره ماكان شي ينقاس بالوقت ولا بطول سنوات التعارف بين شخصين، وبعدين أنتي مصدقه أني كنت نكرهك من قبل، وهزيت رأسي بأسف: لا أبدا يادنيا عمري ماكرهتك والدليل أني ماكنتش نخلي فيك تلعبي مع حد أو تقعمزي مع حد ماكنتش نبي نشوفك مع غيري، من أول مره شفتك حسيت أنك ملك ليا أني وبس وأنه قلبي أرتبط بيك للأبد، وهالشي اللي كنت رافضه حتى بيني وبين نفسي، قصة كرهي ليك أني اللي إخترعتها وخليت الكل يصدقها وأولهم أنتي، طول سنوات سفري كنت نعبي في رأسي بفكرة الكره هذي خايف نضعف ونخسر روحي وماكنتش قادر نعترف حتى لنفسي، بس لما روحت وأول ماشفتك، عرفت أنه الأفكار اللي كنت نعبي في رأسي بيها تبخرت بنظره واحده من عيونك، من يوم عرفتك لحد هاليوم مافيش ليله فاتت عليا وماحبيتكش فيها
” وأنا المعروف بالتأني …
حين رأيتكِ
عشقتكِ بعجلة مستغيث
ظنّ أن الكون سينتهي بعد قليل ..!”
حسام رخيت إيديها، وبإبتسامه: بس حاضر أني صابر ووقتي كله ليك ومش راح نستعجل في شي ثاني خوذي وقتك اللي تبيه، أهم شي أنك جنبي ومعاي معاش يهمني شي ثاني، بس أنتي ردي بالك تغلطي يادنيا ردي بالك ترخيها يدي فاهمه!!
دنيا تنهدت براحه وهالمره أني اللي مسكت إيده، وبإبتسامة: على ماأظن بعد اللي سمعته نكون أغبي واحده لو رخيت إيدك، وأني مش غبيه راهو😌

 

 

 

حسام، بحب❤: عارفه أنك أحلى دعوه دعيتها في ساعة إستجابه وربي تكرم عليا وحققها، وقاعد ندعي في كل وقت بأنه يجعلك نعمه دايمه ليا، لعلا تصدف ساعة إستجابة ثانيه وتقعدي معايا طول العمر
^^^^^^^^^^^^^^^^^^^^^^^^^^^^^^^
الظهر في حوش مفتاح
علا تكلم في سنيه بالتليفون، وبإنزعاج: أها اليوم الفاتحه معناها، أي ربي يهنيها إن شاءالله، خلاص سلميلي عليها هلبه وباركيلها باللهي، سكرت وتلفتت لعبير بغضب😠: مش قالك بعتهوله الصور كيف هكي وفاتحتهم بعد شويه
عبير، بعصبيه😡: وين نندري عليه أني قالي بعتهم للرقم اللي بعتهوله، مرات الراجل شافهم وماصدقش
علا، بضيق: معقوله في حد يشوف صور خطيبته مع واحد ثاني ويقعد ساكت هكي
عبير، برفعة حاجب🤨: شكله واثق فيها هلبا، وبعدين مش أي واحد توصله حاجه من رقم غريب ويصدقها، والنبي قعمزي وريحي روحك ليش تفسدي على البنت عرسها شني دارتلك، وبعدين تورطي حتى في ولد عمك علاش!!
علا، بغضب😠: وأنتي شني خصك!!، هكي ماحبيتهاش هالأيه شايفه روحها بخطيبها وهوا حرام فيها، وبعدين محمد قداش مره يهين فيا وأني نسكت نبي نشوفه ينهان قدامي، وزفرت بغضب😤: بس هالحمار أسامه خرب كل شي درته وشكله ماصدقش فيها، غير شني عاجبه فيها هالسوده بس
عبير شافتلها بكره وطلعت لأمها اللي تنادي، وبضيق: نعم ياأمي
سالمه، بأمر: وحده منكم إتجي تسقي الغذي بوك جي سمعت صوت سيارته
عبير زفرت بضيق وفتحت روشن الحوش بتشوف السياره، وبشك🙄: وينها السياره ماهناش والباب قاعد مسكر شكلك تتخيلي
سالمه، بإستغراب🤔: كيف والله سمعت صوت سيارته توا

 

 

 

عبير، بملل: قتلك ماهناك حد زودي شوفي كان مش مصدقتيني، ومشت خشت للمطبخ
سالمه هزت رأسها بأسف وهيا تفكر هيا سمعت صوت السياره حق، بس وين مشي، ولا زعما هيا تتخايل
-صح كلام سالمه مفتاح وصل قدام الحوش بس قبل ماينزل من السياره جاه تليفون خلاه يطلع بسرعه
^^^^^^^^^^^^^^^^^^^^^^^^^^^^^^^
في مكان ثاني أول مره نزوروه في بنغازي بالتحديد، أجواء الفرح مخيمه على الأجواء، والصاله معبيه بالمعازيم، والشباب يفرقو في سفر الغذي والكل الإبتسامة ماليه وجوههم، في هالوقت كان العريس مقعمز مع صحابه في زاويه من الصاله، جاه واحد من خوته ومدله تليفونه، شافه ولقي مكالمات ورسائل على الماسنجر والفايبر ناض بسرعه وصحابه قعدو يتسهوكو عليه يحسابوها من العروس، وحتى هوا يحسابهم منها، بعد شويه على الصاله وفتح رسائل الفايبر أول شي وإنفتحو عيونه معاهم بصدمه😲، قعد يتنقل من صوره لصورة وكل مره صدمته تزيد أكثر ويطغي على ملامحه الغضب😠، أخر رساله ” شفت خطيبتك بنت الحسب والنسب كيف كانت هيا وولد خالتها تلعب من وراك، ويكون في علمك راهو من قبل يحبو بعض، وحتى بعد ماخطبتها علاقتهم قعدت مستمره، والدليل أنها في نزلتها الأخيره لطرابلس قعدت أسبوع كامل معاه، يعني شبع منها هوا قبل وأنت خلالك فضلته😉” الكلام خلا أسامه يغلي في كومه من الغضب طلع بسرعه وتوجه لأهل أيه اللي ماكانوش بعاد عليهم هلبا في نفس الشارع هما وياهم
أما في حوش أهل أيه فالرجاله كانو واقفين قدام الحوش وكيف بيطلعو ماشيين باش يتغذو عند أهل أسامه وبيقرو الفاتحه بعد الغذي، الكل توجهت أنظارهم بإستغراب لأسامة اللي قرب منهم وواضح من ملامح وجهه أنه فيه شي مش طبيعي
أسامه، بضيق: عمي الهادي، نبيك شويه لو سمحت!!
الهادي، بإبتسامه😊: أهو أحني كيف ماشيلكم ياولدي
أسامه شده من إيده وجبده، وبضيق: تعالا معاي شويه ياعمي
مشي الهادي مع أسامه اللي يجبد فيه وهوا ملامح القلق والإستغراب على وجهه، وزاد شكل أسامه الأسود وعيونه الحمر من الغضب خلا الخوف يبت في قلبه، تكلم بخوف وهوا يشوف أنهم بعدو على الكل: شني فيه ياأسامه خوفتني ياولدي إن شاءالله خير
أسامه فتح التليفون وفتحله واحده من الصور اللي وصلاته، درق صورة أيه بإيده ووراله صورة الشاب، وبغضب😠: تعرفه هذا مني؟
الهادي ضيق عيونه وهوا يشوف للصوره بتركيز: واللهي كان ربي صدقني هذا ولد المبروك عديلي ليا سنين مش شايفه لكن جبدته بالدم، بس خيره!! وين لقيتها الصوره أنت؟

 

 

 

أسامه كان قاعد مش مصدق اللي شافه ومايبيش يغلط ويحكم قبل مايتأكد، وبالأخص أنه فاتحته بعد ساعات والغلطه في الأوقات هذي عواقبها وخيمه، وبضيق: يعني أنت مش متأكد أنه هوا
الهادي، بإستغراب🤔: والله ياولدي ليا سنين مش شايفه، بس أهو بوه توا إناديه ونسأله، وتلفت وقعد ينادي في المبروك
المبروك جي وقرب منهم، وبإبتسامة😊: نعم يالهادي، خيره النسيب مستعجل إمالا!!
أسامه نزل رأسه بأسف، وقام تليفونه ووراله الصوره، وبضيق: هذا ولدك ياعمي مبروك!!
مبروك، بإستغراب🤫: أي هذا محمد ولدي، وبخوف😟: خيره شني صاير، وشاف للهادي بقلق اللي هزله كتافه بعدم معرفه
أسامه نزل التليفون بخيبة: صح أيه جتكم لما نزلت لطرابلس أخر مره
المبروك، بحسن نيه: أي رفعها محمد للسوق مره ولا إثنين كانو ناقصينها حاجات
أسامه فتح التليفون ورالهم الصور اللي كانو لمحمد وأيه مقعمزين مع بعض وفي أوضاع حميميه، وبغضب😠: هذا ولدك ياعمي المبروك، وهذي بنتك ياعمي الهادي اللي هيا خطيبتي اللي ماشيه لطرابلس على أساس بتبثث لعرسها، بس لا هيا ماشيه باش تشوف حبيبها وتودعه قبل ماتتزوج، هال……..🤬 بنت ال….🤬
المبروك والهادي قعدو يشوفو للصور بصدمه😲
الهادي بغضب😠: أحترم نفسك أنت شني تقول، بنتي أشرف من الشرف، أنت منين جبتهم هالصور، وبعدين هذا مش حوش المبروك، وشاف للمبروك يبيه يأكد على كلامه
المبروك نزل رأسه بأسف😞: هذا مش حوشي لكن حوش خوي المرحوم سعيد
الهادي زادو توسعو عيونه بصدمه😲
وأسامه ضحك بهزوه😏: ها شفت أصلا أني كنت مستغرب تسكيرة رأسها على نزلتها لطرابلس شني اللبس مافيش إلا غاذي، أني ليا خاطبها قريب سنه ونص وحتي الكلام مارضت تكلمني زي الناس وأني نقول معليشي البنت متربيه ومتأدبه وتتحشم، بس تاريتها غارقه مع حبيب القلب هالفاجره قليلة التربيه بنت ال🤬
الهادي ماتحملش الكلام وهجم عل أسامه دفه وطيحه على الأرض، وبغضب😠: أني عارف روحي شني إمربي، وبنتي أشرف منك ياواطي
ألتمو الكل لما شافو اللي صار وملامح الإستغراب على وجوههم
أسامه وقف وهوا ينفض في حوايجه، وبإزدراء: أنتم اللي مافيش من أوطي منكم، ربي يحبني اللي كشفكم ليا قبل مانتورط في بنتك ال…🤬
واحد من عمام أيه هجم على أسامه وقعد يضرب فيه، وبعد وين باش فكوه منه
أسامه، بغضب😠: بدل ماتسترجل عليا أمش ربي بناويت خوك اللي ماشيات على حل شعرهم، بنتكم عندكم دورو واحد غيري تلصقوهاله، مشي أسامه وخلا الكل في حالة صدمه، والهادي طاح عليهم ورقاله الضغط والكل حصلو فيه
أسامه روح وقال لبوه وخوته اللي صار، ومن غير مايعطي فرصه لحد يسأله أو يناقشه خذي حوايجه وركب في سيارته وسكر تليفونه وأختفي
^^^^^^^^^^^^^^^^^^^^^^^^^^^^^^^

 

 

 

في حوش مصطفي سعاد ودنيا مقعمزين يتغذو
سعاد، بقلق: غريبه حتى عمك مصطفي عطل اليوم مش من عوايده
دنيا وقفت وقامت السفره: باهي أتصلتي بيه شفتيه
سعاد: أي حقا راحت على بالي بكل، خذت تليفونها وإتصلت
دنيا أبتسمت ومشت للمطبخ
سعاد: أيوا السلام عليكم
مصطفي، بتوتر: وعليكم السلام، نعم ياسعاد تبي حاجه؟
سعاد، بإبتسامه😊: لا غير عطلت قلت نشوفك بس
مصطفي، بضيق: كيف كنت بنكلمك، قتلك عادل ولد مفتاح دار حادث
سعاد، بشهقه😱: هييي وووك عليا وليد وخيي، كيف داره وشني صارله؟؟
مصطفي، بضيق: والله ماني عارف، توا أني كيف وصلت تلاقيت أني ومفتاح طالع بسرعه سألته وهوا قالي، وأهو ماشيين بنشوفوه وإن شاءالله خير
سعاد، بدموع😢: ووووك عليا ربي يلطف إن شاءالله، كلمني بالله ماتخليني مشغوله
مصطفي، بضيق: باهي باهي أسمعي راهو أهله قاعدين ماعندهمش علم مش تمشيلهم قعمزي في حوشك لين نكلمك
سعاد، بأسف😞: باهي باهي، سكرت التليفون وقعدت تعيط: ووووك عليك ياسالمه، ربي مايشوطلك كبيده، سترك يارب ألطف بينا
دنيا طلعت من المطبخ، وبخوف😟: خيرك ياعمتي، شني فيه؟
سعاد، بدموع😢: عادل ولد عمك مفتاح دار حادث
دنيا، بخوف😟: لطفك يارب، وشني صارله؟
سعاد، تبكي: الله أعلم يابنيتي قاعدين مايندروش، وإنهارت بالبكي😭
دنيا رجعت للمطبخ بسرعه وجبت طاسة إميه: خوذي ياعمتي أشربي شويه ماترعشيش روحك بإذن الله مافيه شي
سعاد خذت الميه وهيا تبكي شربت شويه ورجعت خذت تليفونها وإتصلت
^^^^^^^^^^^^^^^^^^^^^^^^^^^^^^^
عند حسام كان في المحل وقاعد يعبي في فاتوره لواحد من الزباين لما رن تليفونه محمد، أستأذن من الزبون ورد عليه، بملل: نعم يامحمد فكني منك والله مافاضيلك راهو
محمد، بضيق: عارفك مش فاضي، غير بنعطيك علم أني في المطار ماشي لبنغازي
حسام، بإستغراب: كيف!! وعلاش ماشي إن شاء الله غير مش العويله صايرتلهم حاجه
محمد، بضيق: والله ماني عارف ياحسام كلمني بوي وهوا معصب وقالي توا تأخذ طياره وتجي لبنغازي بأسرع وقت، وماخلاليش فرصه حتى نسأله على شي
حسام لاحول ولاقوة الابالله العلي العظيم، باهي كلمت واحده من خواتك سألتهم بالك يعرفو حاجه
محمد، بحزن: كلمتهم وقالت مافي شي بس عمي الهادي قالو رقاله الضغط ورفعوه للعياده
حسام، بإستغراب: مش معقوله خالي بيقولك تعالا بسرعه على هالسبب، بس إن شاءالله خير وخلاص
محمد، بضيق: إن شاءالله، يستر الله هيا سلام
حسام توصل بالسلامه إن شاء الله ولما توصل كلمني
محمد: سلمك، بإذن الله

 

 

 

حسام سكر التليفون ورجع يكمل في الفاتوره وهوا القلق والخوف مسيطر عليه من كلام محمد وطلب خاله إنه يجيه لبنغازي بسرعه، زفر بملل وهوا يسمع في تليفونه يرن من جديد، تلفت لقاها أمه سيب اللي في أيده وطلع برا من المحل ورد: نعم ياأمي، خيرك تبكي!! شني فيه!! كيف! أمتي صار هذا!! باهي خلاص توا إنشوف بإذن الله خير، سكر وخش خذي أذن من صاحب المحل وطلع بسرعه وتوجه للعياده اللي موجود فيها عادل واللي قاله عليها بوه لما كلمه
^^^^^^^^^^^^^^^^^^^^^^^^^^^^^^^
قبل المغرب في حوش مفتاح، سالمه خاشه طالعه وهيا بالها مشغول على مفتاح اللي ماروحش لحد توا ويتصلو بيه مايردش، ويتصلو بعادل تليفونه مقفل
عبير، بضيق: ياعلا كلمي عامر ولا عصام وخلاص
سالمه: لا ماتكلمهمش غير تخلعوهم، زيدي عاودي لبوك ياعلا
علا زفرت بملل وأتصلت ونفس كل مره ينادي ومايردش
سالمه، بخوف: خلي إنزيدو شويه وكأن ماردش كلمو عصام وخلاص
لحظات وسمعو صوت سيارة مفتاح درست قدام الحوش، طلعو يجرو وقابلهم مفتاح خاش وقبل مايتكلمو خشو عامر وعصام ساندين عادل اللي رجله مجبسه وأيده ملفوفه ومربوطه في رقبته ووجهه كدمات وجروح
سالمه شهقت وحطت إيديها على قلبها، وبعياط: وووووك عليا وليدي، ومشتله تجري
وعلا وعبير مشو وراها
سالمه بدموع: وووك عليا خيرك ياوليدي شني صارلك!!
عصام، بضيق: حادث بسيط ياأمي جاته في الريش
سالمه، تبكي: ياحليلي ياولدي، وووك عليا خيرهم لافينك كلك مع بعضك
عادل أبتسم بتعب: كويس ياأمي ماتخافيش مافيا شي
عامر، بضحكه😁: داروله قطع غيار جديده، عنده هلبا حاجات خاربه
سالمه تتلمس في عادل وهيا تبكي😢: متأكدين أنه كويس مافيه شي كبير
مفتاح، بغضب😠: خلاص حولي خلي الولد يخش يرتاح قالولك مافيه شي جروح بسيطه وفك في رجله وإيده
^^^^^^^^^^^^^^^^^^^^^^^^^^^^^^^

 

 

 

في حوش مصطفي
فزت سعاد من مكانها لما إنفتح الباب وشافت مصطفي وحسام خاشين مع بعض، وبخوف😟: ها شني صار كيف حاله عادل توا
مصطفي قعمز بتعب: ماهو كلمتك وقتلك كويس الحمدلله جاته بسيطه
حسام، بإبتسامه😊: نفذ منها هالبارد، لكن حبسوه أسبوعين في الجبس عنده فك في رجله، والسياره إدقدقت
سعاد، بأسف😞: معليشي الله غالب عليه الحمدلله اللي هكي مش أكثر، سمعو أهله!! والله من بكري بنمشي خفت يكونو قاعدين ماسمعو مابيتش نخلعهم
حسام: أكيده توا سمعو لأنه خالي والولاد روحو معانا
دنيا طلعت من المطبخ، وأبتسمت: الحمدلله على سلامتكم، كيف حاله عادل توا؟
مصطفي: الله إيسلمك يابنتي، لا الحمدلله بسيطه
دنيا، بإبتسامه: باهي الحمد لله، نسخنلكم غذاكم!!
مصطفي، برجاء: أي على رحمة والديك والله رأسي يوجع فيا من الشر
دنيا: حاضر دقايق بس، ومشت رجعت للمطبخ
حسام قعد يبتسم زي الأبله😍 من لما طلعت وماأنتبهش لأمه اللي تكلم فيه لين هزه بوه، بخلعه: ها شني فيه!!
مصطفي، بحده: أمك ليها ساعه تكلم فيك وأنت أبصر وين سارح
حسام شاف وين كانت دنيا واقفه ومالقاهاش أبتسم وتلفت لأمه، وبإبتسامة😊: نعم ياأمي شني كنتي تقولي!!
سعاد، بنص عين😒: لا خلاص سلامتك ياحنه اللي واخذه عقلك تتهني بيه إن شاءالله
دنيا مشيت أني وعمتي لحوش عمي مفتاح حمدنلهم على السلامه وعمي شد عمتي للعشي وأني أطريت نقعد لأني مانقدرش نروح بروحي ونقعد في الحوش وعمتي مش موجوده، ماكنتش مرتاحه بكل من نظرات علا الحاده، ونظرات سالمه مرت عمي المتفحصه، ونظرات فاطمه مرت عمي اللي كل شويه تغمزلي وتضحك، للحظه حسيت روحي في مصحة للأمراض النفسيه مايتعاملوش إلا بالنظرات وأني مش عارفه نتكيف مع أيا منهم وأخيرا قررت نهرب من نظرات الكل ونقرأ شوية قرأن من تليفوني، بس الوقت كان كل شوي يزيد يتمدد، وجو خوال عادل وخالاته وزحمت عليهم وإتعب الحوش وكترث النظرات ليا، وكثر الهمس بين: ياناري تسخف، لا حول الله قاعده صغيره، غير على شني رافعه هالخشم، خيرها مش متحجبه تحساب روحها صغيره، العفو شني هاللبس والله بناويتي حتى في الحوش مانخليهم يلبسوه، وعمتها مش عندها ولاد كيف قاعده معاهم في نفس الحوش، عشنا وشفنا، وقاحه وقلة أدب، المفروض واحد من ولاد عمها يقرأ فاتحتها ويروح بيها على الأقل تكون على ذمة راجل
دنيا حسيت روحي ممكن في أي لحظه نعيط خلاص مش متحمله كلامهم، بعتت رساله لحسام ” باللهي تعالا طلعني من إهنايا معاش قادره نقعد دقيقه😢 “

 

 

 

لحظات ووصلتني رساله ” خيرك يادنيتي شني صار، في حد ضايقك!! ” رديت ” نبي نروح ياحسام، مضايقه هلبا وقلبي يوجع فيا “، وكثر الهمس وهما بيأكلوني بنظراتهم لما شافوني شاده التليفون ومركزه عليه، وكل واحده تفتفت في كلام شكل، ثواني ورن تليفون عمتي ردت وشويه ووقفت طلعت وهيا مضايقه
حسام كنت مقعمز مع الولاد في مربوعة خالي مفتاح لما وصلتني رسالتها، خفت عليها وطلعت بسرعه، وزادتني لما قالت قلبي يوجع فيا ماقدرتش نتحمل وإتصلت بأمي على طول وقتلها تطلعلي برا
سعاد، بضيق: تي كيف إنروح والحوش مليان عيب حتي قدام الناس
حسام، بغضب😠: باهي أقعدي أنتي ودنيا تروح
سعاد، بضيق: كيف نخليها تروح بروحها مني بيقعد معاها!!
حسام: أني نقعد معاها خشي ناديها
سعاد، بصدمه😯: كيف!! هذا اللي ناقص، لا أنت هبلت رسمي، كيف تقعد أنت وياها بروحكم، تبي الناس تأكل وجوهنا، برا خش سلم ولدي وهني روحك، نزيد شويه وتوا نروح أني وياها
حسام، بغضب😠: شني تقولي ياأمي معقوله شاكه فيا أني ولدك هكي مربيتيني أنتي!!
سعاد، بضيق: عمري ماشكيت فيك بس بتصرفاتك هذي خششتلي الوسواس، عيب وحتى حرام تقعد أنت وياها في نفس المكان بروحكم، هنيني ورأس وليدي وفكني من المشاكل
حسام، بعصبيه😡: باهي ياأمي نتفاهمو فيه موضوع الوسواس هذا لكن مش توا، هيا ناديها وأطلعي حتي أنتي
سعاد، بضيق: وأني قتلك مش مروحه توا برا خش بحدا ولاد خالك وريح روحك، ومشت خشت بسرعه وخلت حسام يغلي من الغضب
دنيا زادت حالة التوتر اللي أني فيها لما خشت عمتي وشافتلي بنظره حاده وكأنه كان ناقصني نظرات أني باش تزيدني هيا، تلفتت لتليفوني لما وصل مسج وعيون عمتي معاي ” ياروحي أنتي أمي سكرت رأسها مابتش تروح، وأني مانقدرش نروح بيك بروحنا، قوليلي شني فيه خيرك شني صاير معاك ” عرفت أني غلطت لما قتله هكي ضايقته وخليته يخاف وهوا مافي إيده شي يقدر يديره، بعتتله ” أني كويسه خلاص أنسي الموضوع ” وسكرت التليفون، تنهدت بقوه وأني نردد في داخلي، أنتي قويه يادنيا أنتي قويه عمره كلام الناس ماكان يأثر فيك، حاولت ننسي أنه جنبي ناس وشغلت نفسي بالإستغفار، دقايق وشفت عمتي طلعت لما نادتها علا شويه ورجعت أشرتلي بإيدها ونضت وطلعت معاها
طلعنا من حوش عمي وشفنا حسام واقف قدام الباب
سعاد، بخوف😟: خيره بوك!! خليناه مافيه شي شني جاه!!
حسام لاحظت أنها فعلا مش طبيعيه واضح هالشي من وجهها ونظرات الحزن ولمعة الدموع في عيونها، تنهدت بضيق وأني خايف عليها، وتلفتت لأمي اللي كانت تشوفلي وتشوف لدنيا اللي منزله رأسها بنظرات معبيه شك، تكلمت بتوتر: قال بطنه توجع فيه مش عارف خيره، وهوا اللي قالي برا نادي أمك راهو

 

 

 

دنيا روحنا وخشيت لداري على طول صليت العشي وقعدت نقرأ في قرأن وحاسه بروحي إرتاحت شويه، والضيق اللي كنت نحس بيه في قلبي بدي يخف تدريجيا، تلفتت للباب لما طق: مني!!
حسام، بضيق: ممكن تفتحي تليفونك، ليش تتصرفي هكي مش قلنا بطليهم الحركات هاذم!!
دنيا وقفت وفتحت الباب، وبأسف😞: أسفه مش قصدي
حسام، بخوف😟: أنتي كويسه!! شني فيه يادنيا!! نبي نفهم شني اللي يقلب فيك فجأه هكي!!
دنيا نزلت رأسي بأسف😞: مافي شي كنت مضايقه شويه، وقمت رأسي بخوف😟: وين عمتي!! كيف حاله عمي مصطفي توا!!
حسام، أبتسم: أمي شكلها رقدت في دارها، وبوي حاله كويس ماتخافيش أني اللي خليته يمرض بالكذب باش تروح أمي
دنيا، بصدمه: هيييي شن درتله يامجنون
حسام ماتخافيش تفهمت أني وياه أنه يرقد وأني نكذب على أمي ونقوللها مريض، هوا أصلا هكي ولا هكي كان راح يرقد بكري لأنه غذوه عنده محكمه الصبح
دنيا، بحزن: معقوله تخلي بوك يكذب على خاطرك بعد هالعمر
حسام، بأسف: ماهو أنتي ماخليتيش فيا عقل كنت خايف عليك وأمي مابتش تروح ولاتخليك تروحي معاي بروحك، ماكانش عندي إلا هالحل
دنيا، بشك: هذا كله على خاطر قتلك نبي إنروح
حسام، تنهد بضيق: عارفه أنك تقتلي فيا بنظرات الشك هذي، خيرك يادنيا معاي الزفت على قد ماندير مش عاجبك، بري خشي أرقدي تصبحي على خير، تلفتت بنمشي
دنيا أبتسمت: والكيكه اللي طلبتها الصبح ماتبيش إذوقها
حسام من غير مانتلفت كوليها أنتي
دنيا برجاء🥺: بس أني درتها على خاطري ونبي نأكلها معاك، نهون عليك تكسر بخاطري
حسام تلفتت وبنص عين😒: مني نكون حضرتي باش نكسر بخاطرك، قداش مره قتلك معاش تشوفيلي هكي بروحي نضعف قدامك من غير هالنظره، وأبتسمت😊: بري بسرعه جيبيها هيا، ومشيت قعمزت قدام التلفزيون
دنيا أبتسمت ومشيت للمطبخ بسرعه😊
حسام قعدت معاها بعيوني كانت مختلفه وهيا لابسه توب الصلاه، منظرها هكي خلاني نحس بالراحه من قلبي حاس أنه منظرها بالحجاب زادها جمال على جمالها، كان شكلها زي الورده اللي مغلفه بشكل يبهج الناظر، قعدت نفكر كيف نقنعها بهالشي على طول
” هل أخبرتُكٍ يومًا أنُّه كان للوقت طعمٌ ورائحة ولون مُنذُ أن عرفتك، هل أخبرتُكِ يومًا أنّني كُنتُ أرى الكون رماديًا وأنّكِ سكبتٍ عليهِ ألوانًا ما كُنتُ أعرفها، هل أخبرتُكِ يومًا أنّكِ عبرتِ بحيَاتي كشمسٍ أشرقت على مدينة لا تعرفُ الشمس؛ وكطائرٍ حطَّ على شجرةٍ عاريَةٍ ذاتَ شِتاء.. ‏‎هل أخبرتُك يومًا أنّك الحنين الذي كان يَزورني دون أن أعرف لمَن؛ وأنّني عندما أنظر إليكِ ينتَابو قلبي الأمان دون أن أدري لماذا، هل أخبرتُك يومًا أنّك بتّ الهواء بالنسبة لي والماء وأنّني أحيَا بوجودك، واتنفس بأنفاسك

 

 

 

 

” تمر الأيام ونحن لاندري مالذي تخبئه لنا ولكننا نحسن الظن بالله “🤍🤍
فاتو اليوم وبعده يوم وبعده يومين واليوم الأحد، قررت نأجل الموضوع اللي بنكلم أمي وبوي فيه على خاطر دنيا لأنكم زي ماشفتو قالت أني متسرع في مشاعري إتجاهها يعني لو خطبتها توا كيف حاتفكر، قلت أفضل شي نعطيها ونعطي لنفسي وقت زياده رغم أنه بالنسبه ليا مش راح يتغير شي من إتجاهي، بس مافيش باس نستني شويه مانبيش نضغط عليها نبيها هيا تكون مقتنعه بهالخطوه إقتناع تام، وماعنديش إلا الصبر ويقولو من صبر نال وإن شاءالله ربي ينولني مرادي
بالنسبه لجلسة بوي متاع يوم الخميس بخصوص الأرض، تأجلت لبعد العيد الأضحي لعدم حضور الطرف الثاني، إمبارح كلمني محمد وقال مروح اليوم العشيه حسيت من صوته أنه مضايق وفي شي مش طبيعي ولما سألته ماباش يتكلم، ماحبيتش نضغط عليه وخليته على راحته
بصراحه قاعد نسعي وندور على عمل كويس، الحق شي يقهر واحد متخرج بشهادة ماجستير إدارة أعمال ومن لندن، وقاعد يتنقل من محل مواد زينه لمخبز لمحل مواد كهربائيه، وعندي مقابله اليوم إن شاءالله خير
^^^^^^^^^^^^^^^^^^^^^^^^^^^^^^^
دنيا الأيام قعدت تمر بهدوء حلو نسبياً لولا تركيز عمتي على تصرفاتي وحركاتي أني وحسام اللي كل ماله يزيد، بس يعتبر هالشي عادي نوعا ما مادامني مقتنعه أني ماغلطتش وماتخطيتش حدودي وقاعده محترمه الحوش اللي قاعده فيه
كنت في داري نكلم في هند اللي ليا فتره طويله عليها، وبضيق: مش عارفه ياهند الصراحه قاعده مافكرتش
هند، بإستغراب🤔: كيف إمالا في شهور العطله الثلاثه اللي فاتو شني كنتي إديري!!
دنيا تحسابني فاضيه ورايقه زيها، وبأسف😞: مالقيتش وقت للتفكير في هالموضوع بس عادي مش قضيه مازال وقت التسجيل لبعد العيد صح!! عندي وقت معناها

 

 

 

هند، بإبتسامه😊: أني بصراحه نبي نخش علوم حياه، خاطري نطلع دكتورة أسنان، خشي حتى أنتي علوم حياه شني رأيك!!
دنيا طموحه هلبا البنت جايبه جيد جدا وتبي علوم حياه ولا ودكتورة أسنان حتى، بأسف: لا أني مانميلش للطب نهائي بصراحه هالشي ولا شي تقليدي عند معظم البنات، نسمع في عمتي تنادي: عالعموم نفكر وبينا إتصال أكيد عمتي تنادي بنمشي نشوفها
هند، خلاص تمام مرات حتى أني نجيك الأيام الجايه أنتي قاعده عند عمتك اللي ولدها الطرف هذاكا؟
دنيا، بإنزعاج: أي، تمام تفضلي، عن أذنك توا، سلام، سكرت وأني مستغربه مافيش مره قتلي بنزورك من قبل، وقاعده تسأل على حسام بعد هالوقت شني هالبنت اللي ماتملش بارده بكل غير شني لايمني عليها، شفت لعمتي اللي واقفه في الباب
سعاد، بضيق: كنت إنادي فيك وينك ماتسمعيش فيا!!
دنيا وقفت بسرعه: أهو جايه غير كانت صاحبتي تكلم فيا قتلي بعد العيد بيبدأ التسجيل في الثانويه
سعاد باهي تعالي عمك مصطفي روح وقال يبيك في موضوع
دنيا طلعت مع عمتي وأبتسمت لعمي مصطفي اللي قابلني بإبتسامه طمنتني شكله الموضوع كويس: نعم ياعمي
مصطفي: تعالي قعمزي يادنيا
دنيا قعمزت وقعدت نشوفله بتركيز نستني فيه يبدأ يتكلم
مصطفي: اليوم جاني صاحب المرحوم بوك ناصر اللي جانا هذاكا اليوم إذكرتيه
دنيا بقلق: أي إذكرته، خيره!!
مصطفي قعد يحكي اللي قالهوله ناصر
Flashback

 

 

 

ناصر خش لمحل مصطفي وهوا منزل رأسه والحزن واخذ من ملامحه حصه كبيره، وبضيق: السلام عليكم
مصطفي قام رأسه من الأوراق اللي قدامه وأنتبه للناصر، وأبتسم😊: وعليكم السلام أهلا وسهلا تفضل، وهوا يأشرله على الكرسي
ناصر، قعمز بصعوبه من رجله اللي يعكز منها، وأبتسم بحزن: أهلين بيك ياشيخ مصطفي زاد فضلك
مصطفي سأل وهوا يشوف لحالة ناصر بإستغراب🤔: إن شاءالله خير ياناصر شني اللي صاير معاك حادث ولا شني!!
ناصر تنهد وهوا يشوف لرجله اللي من يومين فك منها الجبس بينما إيده قاعده مجبسه، بضيق: لا واللهي لا حادث ولا شي واحد تهجم عليا وقدام حوشي
مصطفي،: لاحول ولاقوة الابالله، كاثره هالمواقف اليومين هاذم، إن شاءالله غير مش بينكم خلافات بس
ناصر، بتوتر: والله الحق أني مانعرفه بس الحمدلله اللي جت هكي
مصطفي، بإبتسامه: الحمدلله على كل حال وأنت رد بالك في الجاي راهو ولاد الحرام كاثرين هالأيام وعلى خاطر الفلوس يديرو أي شي
ناصر، بتوتر: ربي يستر إن شاءالله، ونزل رأسه بأسف😞: الحق أني جايك ومتحشم ياشيخ مصطفي
مصطفي، بإستغراب🤦‍♀️: إن شاءالله ربي مايحشمك شني فيه ياناصر!!
ناصر، بأسف😞: والله ماني عارف شني نقولك الحق، أني من فتره جيتكم وجبت لبنت المرحوم شيك بنصيب بوها في المشروع اللي كنا نخدمو فيه قبل مايتوفي، هز مصطفي رأسه، وكمل ناصر كلامه وهوا منزل رأسه: بس اللي صار أني بدلت نصيبي بنصيب بوها يعني غيرت الشيكات، الله يلعن الشيطان خلاني نطمع في الفلوس ونأكل حق غيري
مصطفي، بإستغراب🤔: كيف!!
ناصر طلع شيك من جيبه ومده لمصطفي، وبضيق: هذا باقي حقها، وباللهي قوللها تسامحني ومعاش تدعي عليا ياسر اللي صارلي ربي خذي حقها مني وبالزايد
مصطفي شاف للشيك بصدمه😲 مبلغ 300ألف مش شويه، معقوله حد يفكر يأكل حق حد ومبلغ كبير زي هذا، وبضيق: الحق أني ماكنتش نعرف باللي صار بينكم، بس ماتوقعتش أنه يكون الموضوع بالشكل هذا، كيف تأكل حق بنت يتيمه كيف طاوعك قلبك، معقوله ضميرك ميت للدرجه هذي لا وياريته مبلغ بسيط 300ألف، بصراحه الواحد ماعنده إلا يسكت باش مايقولش كلام غلط أنت مهما كان ضيف ومانبيش إنهينك في محلي
ناصر، بحزن😔: الشيطان غرني الله يبعده ويخزيه، والفلوس عمو عيوني وخلوني نأكل حق غيري من غير مانفكر في العواقب، لكن ربي كبير وماقصرش معاي وخذي حقها مني بأسرع وقت، ومسح دمعه نزلت من عينه، وبحزن😔: أمس ولادي الزوز كانو طالعين مع خالهم وصارلهم حادث، ونزلو دموعه من غير توقف😭
مصطفي ناض من مكانه وقعمز جنب ناصر وقعد يطبطب على كتفه، وبحزن😔: كان الله في عونك ياناصر، إن شاءالله غير مانضروش هلبا
ناصر، بدموع😢: ولدي الكبير الضربه جاته على رأسه وخش في غيبوبه والدكتور ماطمنيش عليه بكل، والثاني صارله كسر في العمود الفقري خليته في العمليات وأني جايك، ربي قهرني زي ماقهرتها، وطلع حقها من عيوني، كسرني كسر مايتجبر، وردلي اللي درته في أغلي شي عندي ولادي اللي نشوفلهم ونشوف لربي، باللهي قوللها خليها تسامحني
Now
دنيا، بحزن😔: لاحول ولاقوة الابالله، ربي يشفيهم ياناري صغيرين هلبا
سعاد، بحزن😔: ربي يكون في عون إميمتهم وينوضهم سالمين
مصطفي، بضيق: هوا المواقف اللي زي هذي كلها إبتلاء، بس سبحان الله ليه حكمه في كل شي، ولا إعتراض على حكمه بس والله سخفوني الصغار وهوا بوهم يقطع القلب، قهرة الفلوس مش زي قهرة الأرواح يابنتي ماكانش المفروض تخلي قلبك قاسي وتدعي عليه على خاطر وسخ دنيا سيوره كامل
دنيا هما مفكرين أنه الموضوع مختصر على الفلوس مايعرفوش الشي الثاني اللي كنت قاصده بيه قهرتي، وبحزن😔: لا ياعمي أني صح قتله مش مسامحاتك وندعي عليك بأنه ربي يأخذ حقي منك، بس يشهد عليا ربي أني قلت هالكلمه من قهرتي، مافيش مره فكرت ندعي على حد أصلا مهما دار فيا، مش معقوله يكون قلبي قاسي للدرجه هذي وندعي عليه بشي زي هذا، ونزلت رأسي بأسف
***********************************

 

 

 

 

 

عائشه: مهما كان الإنسان عاقل ومؤمن وصابر وحليم إلا أنه في مواقف أقوي من صبره ومرات يتعرض لظلم يخلي كل خليه من خلايا جسمه تنبض بدعاء ماقالاش فمه، هالشي رباني ماحدش ينكره
وهالموقف شبه كل إنسان تعرضله لما تحس أنه جسمك كله يتنمل وكل جزء فيه ينبض بوجع جراء تعرضك للظلم هذاكا الوقت مهما كنت قوي وثابت وتحاول أنه مايطلعش من فمك شي يضر غيرك إلا أنه جسمك قاعد يدعي فعلا، بوي الله يرحمه كان يقوللنا المظلوم لما يسكت ومايطلع من فمه شي معناها عروقه قاعدين يدعو بأضعاف أضعاف اللي ممكن يدعيه بفمه
” أتقو دعوة المظلوم فليس بينها وبين الله حجاب ”
***********************************
سعاد، بحزن: اللوم مش عليك يابنتي ربي كبير وماينسي حد وأهو ردلك حقك، واللي صار لصغاره هذا إبتلاء ليه من الله سبحانه وتعالى وجزاءه على أفعاله، كل شي إلا قهرة وأكل مال اليتيم ربي مايسامحش فيه
” إياكم وأكل مال اليتيم فهو نارا موقده ”
مصطفي وقف ومد الشيك لدنيا، وبإبتسامة😊: هذا حقك يابنتي، وربي يشفي هالوليدات ويشبح فيهم إن شاءالله
دنيا خذيت الشيك وخشيت لداري، نزلو دموع كنت شادتهم بقوه وجعوني الصغار يسخفو ياناري، تنهدت بقوه وخذيت تليفوني وإتصلت بنجاة طبعا كلمتها عادي بس كانت تبكي وسألتها وقالتلي نفس الكلام زدت إضايقت أكثر ووجعني قلبي عليهم صغار ماليهمش ذنب
” وماذنب الأطفال لينالوا عقاب على أخطاء قام أهلهم بإرتكابها، أتقو الله في أطفالكم😔 ”
^^^^^^^^^^^^^^^^^^^^^^^^^^^^^^^
حسام درت مقابله في شركه صغيره نوعا ما مقارنه بالشركات الأولى اللي مشيتلهم، طبعا زي كل مره نلقي الإقبال الحسن والموافقه المبدئيه بس الله أعلم على النهايه إن شاءالله خير، طلعت من الشركه وتفاجأت بإتصال محمد زعما وصلو لكن مسرع قال اليوم بيطلعو، رديت، بإبتسامه😊: أهلين يامحمد، لا ماعندي شي مهم إن شاءالله خير، كيف نروح بيك من وين!! قصدك ماروحتش مع العيله!! والله وصرت شخصيه مهمه ماشي في طياره ومروح في طياره، وقعدت نضحك بس اللي سمعته صدمني😲 وجمد الضحكه على وجهي ” أني تزوجت ياحسام ومروح أني ومرتي في الطياره” وواضح من صوته أنه مش بصاره ويحكي جد ومن غير مايعطيني فرصه لطرح أي سؤال من الكم الهائل للأسئله اللي إدور في رأسي نهي المكالمه وهوا يقول” طيارتنا توصل بعد العصر باللهي تعالا روح بينا ”
سكر محمد وخلاني في حيره وإستغراب🤔 تي كيف صار هكي زعما يبصر معقوله تي مستحيله كيف تزوج في يومين، كنت بنعاودله بس رن تليفوني من جديد وهالمره 🤍دنيتي🤍 أبتسمت وركبت في السياره وفتحت الخط، بإبتسامه😊: أهلين ياقل… وبترت الكلمه من النص قبل مانكملها وقلت: أهلين يادنيا
دنيا، بضيق: أهلا، خيرك غيرت كلمتك في النص
حسام فرحت أنها لاحظت وماسكتتش، وبضيق: غيرتها مانبيش نتسرع في مشاعري ناحيتك زي ماقلتي
دنيا، بأسف😞: باهي على راحتك
حسام، بضيق: على راحتي صار!!
دنيا، بضيق: أنت شني صار في مقابلتك؟
حسام: زي كل مره مبدئيا مافيش مشكله وإن شاءالله خير أدعيلي أنتي بس
دنيا: أن شاءالله ربي يعطيك ماتتمني
حسام، بإبتسامه: أمين يارب لأنه أغلي أمنياتي أنتي، دنيا خيره صوتك في شي صح!!
دنيا، تنهدت بضيق: توا من شويه جي عمي مصطفي وقعدت تحكيله في اللي صار
حسام بصدمه😯: معقوله كان واكل 300ألف، ياعليك واحد حقير
دنيا، بحزن😔: بس سخفوني الصغار ياحسام حاسه بالذنب إتجاههم معقوله نكون أني السبب في اللي صار معاهم
حسام: لا يادنيا شني هالكلام اللي تقولي فيه أنتي شني دخلك باش تحسي بالذنب، ماتفكريش هكي هذا كله قضاء وقدر وربي هكي كاتبهلم بغض النظر إذا كنتي أنتي موجوده في حياة بوهم أو لا، أدعي ربي يشفيهم إن شاءالله
دنيا، بضيق: إن شاءالله، بس أنت علاش ضربته ياحسام!!
حسام كيف عرفت هذي، وبإستغراب🤔: شني ضربته!! أنتي شن قصدك!!
دنيا، بضيق: ماكنتش تبي تقولي بس أني عرفت اللي درته، الحق شي متهور وتصرف غير أخلاقي من واحد في عمرك
حسام، بضيق: منين عرفتي محمد قالك!!
دنيا، بإستغراب🙄: قصدك حتى محمد كان معاك!!
حسام: مني قالك يادنيا!!
دنيا، بضيق: مش مهم من قالي ياحسام، حاسه روحي مضايقه هلبا، أمتي مروح أنت!!
حسام، بإبتسامه: خلاص أني مسافة الطريق ونكون في الحوش، واخذ إذن من المحل اليوم
دنيا: تمام توصل بالسلامه
^^^^^^^^^^^^^^^^^^^^^^^^^^^^^^^
في حوش مفتاح
علا زفرت بملل وهيا تشوف للتليفون: حتي سنيه الحيوانه ماتردش كيف بنعرف شني صار توا
عبير فتحت الباب، وبغضب😠: قاعده مقعمزه أنتي نوضي معاش وقت ع الغذي خالاتك جايات في الطريق
علا، بضيق: أستغفر الله هالنفخ مش جو مره ياسر يشدو حياشهم ويقعمزو الزفت والله إعييت، السيد عادل راقد ومرتاح وأحني نكرفو ونخدمو
عبير، بغضب😠: حتى الللات هذاكم ماجوش اليوم هاربين من العواله خزي والله مايتحشمو
سالمه تنادي: ياعبير ياعلا وينكم هيا خفو أرواحكم معاش وقت الظهر قريب يأذن
عبير زفرت بغضب وقعدت تأفف😤

 

 

 

 

علا، بهزوه😏: عاد أنتي قبل مرتاحه مايمشيش معاك جو ست الحوش، أطلعي ياروحي أطلعي من توا والله الغذي ماحاطه فيه إيد، وطلعت وسيبتها
عبير، بغضب😠: خزي مبردك وجهك، وأنت ياعادل الهم كله منك، إن شاءالله تقعد شهر ماتتحرك باش تشوف ويطلع تعبي من عيونك، وطلعت وقربعت باب الدار
سالمه وعلا يتناقشو في الحوش لما طلعت عبير
علا، بغضب😠: أني مادخليش الغذي مانيش إمدايراته عيله راهو هلبا عليا مانقدراش، أهو الكبيره اللي مفروض قايمه بالوجبه وشافت لعبير برفعة حاجب🤨
عبير شافت لأمها ورفعت كتافها: حتي أني مانعرفش كان تبيني نحشمك قدام خواتك عادي نخش إنطيب، وضحكت بهزوه😏
سالمه، بغضب😠: قالو اللي جابت البنات إرتاحت وينهم بس يجو يشوفو قهرتي وعزتي، ومشت خشت للمطبخ وهيا إتمتم، وفي هاللحظه إنفتح الباب وخش عصام ومعاه سناء وولده، وقبل مايقولو حتي السلام عليكم تلقتهم عبير بالعياط: لا ياحنه ليش جايين توا مازال شوي قيستو على الغذي وجيتو تمدو في وجوهكم، وشافت لسناء بحده: ماتقوليش عيلة عمي عندهم المشي والجي نجي نعاونهم ولا نوقف معاهم كان مالقيناكم في هالوقت ليش واخذينكم إمالا، لكن العيب مش فيك، وشافت لعصام، بنص عين: ناس ماتتحشمش خزي، ومشت خشت للدار وقربعت الباب وقعدت تضحك لأنها نفذت من الغذي والعواله بما أنه سناء جت🤭
عصام شاف بأسف لسناء اللي فنصت فيه بحده وحطت ساكو ولدها وخشت للمطبخ وين فيه عمتها، أما هوا قام ولده من غير ولا كلمه وطلع للمربوعه وين ماقاعد عادل وهو يزفر بغضب
علا اللي كانت واقفه تراقب في الموقف تضحكت بشماته🤭 وخشت لحقت سناء باش تقصقصها بالك تحكيلها شن صار في عرس أيه، بس سناء سكرت عليها الضي وماقالتش إلا أنه كل شي فات على خير وربي يهنيها إن شاءالله، ولهت في الغذي اللي طيباته هيا بدل مرت عمها
أما علا فكانت بتموت من غيظها لما عرفت أنه أيه تزوجت وماصار شي من اللي خططتله وكل اللي داراته راح على الفاضي، بس غيظك هذا ياعلا مايجي شي قدام اللي راح تشوفيه القدام
^^^^^^^^^^^^^^^^^^^^^^^^^^^^^^^
في حوش مصطفي خش حسام وتوجه للمطبخ لما سمع صوت أمه جاي من غاذي، خش وأبتسم وهوا يشوف فيها واقف هيا ودنيا على الرخمه وتقوللها كيف تبخ الكسكسي التونسي، بإبتسامه: السلام عليكم، ربي يعاون إن شاءالله
دنيا ردت من غير ماتتلفت: وعليكم السلام
سعاد تلفتت وبإستغراب🤔: وعليكم السلام الله إيسلمك، شني صار معاك!! وخيرك مروح توا مش من عوايدك!!
حسام، بإبتسامه😊: إن شاءالله خير أهو نستنو لين يتصلو، واخذ إذن من المحل اليوم ماعنديش نيه نمشي
سعاد جت بتتكلم بس تلفتت لما قالت دنيا
دنيا: شوفي ياعمتي هكي كويس!!
سعاد تحرك في الكسكسي، وأبتسمت بإعجاب😊: ماشاء الله عليك جبتيه مزبوط من أول مره
حسام، بنص عين😒: علاش ماتعرفش إديره هيا من قبل ولاكيف!! مش على أساس فالحه وإطيب ومافيش حاجه ماتعرفهاش وين راح هذا كله
دنيا تلفتت وشافتله بحده
سعاد: لا التفتف فالحه فيه غير المسقي بس ماتعرفه لكن ماشاءالله عليها تتعلم بسرعه
حسام، برفعة حاجب🤨: أها علميها حتى البازين والعصيده ياأمي عارفتيهم غاليات عليا، وغمز لدنيا اللي نزلت رأسها ومشت بتغسل يديها

 

 

 

 

 

سعاد صبت الكسكسي في الكسكاس، وإبتسمت على جنب: ماتخافش توا نعلمهالك حتى العصبان والفتات الجبالي
دنيا ضيقت عيوني بإنزعاج، وتلفتت لحسام بغضب لما قال
حسام، بغمزه😉: أيواه ياأمي نبيك أطلعيها مرأه مقومه عارفتيني نحب المأكله الثقيله التفتف مايمشيش معاي
ضحكت سعاد😅 أما دنيا نفضت إيديها من المياه بغضب😠، وشافت لحسام بحده وطلعت من المطبخ
حسام ضحك وتلفت بيطلع😂
سعاد، برفعة حاجب🤨: لدارك طول مش نلقاك تزربز هني وإهني
حسام، بغضب😠: وراسك لاداري ولا همي، مامشيلها إلا هيا طول، باللهي ياأمي خفي علينا الزفت معقوله مش واثقه فيا لهالدرجه، وطلع معصب
^^^^^^^^^^^^^^^^^^^^^^^^^^^^^^^
في حوش ناجيه
مؤيد، بعصبيه😡: وخيرني أني مش قد المقام ولاكيف!!
ناجيه، بحده: الموضوع هذا إطلعه من دماغك فاهم، أنت ماليكش وقت ومش عاجباتك وحاله صايره فيك، توا تقولي نبيها
مؤيد، بضيق: أني ياأمي ماقلتش مش عاجبتني أعترضت على لبسها بس، وبعدين حتى توا نبي نخطبها باش نخليها تغير شكلها هذا اللي يحشم
ناجيه، بغضب😠: ها شفت بروحك شني قلت تبيها باش تتحكم فيها وتفرض رأيك، أنت ولدي ونعرفك ماتناسبش دنيا ولا هيا تناسبك
مؤيد، بعياط: أنتي علاش ديمه ضدي في كل شي الزفت تقولي مش أمي واللهي نطلع ومعاش تشوفي وجهي بكل
إنتصار كانت في الحمام ( أكرمكم الله) تتوضأ للظهر، طلعت بسرعه وهيا مستغربه في صوت خوها العالي، وبقلق: خيركم شني فيه
ناجيه، بغضب: خوك يهدد فيا على أخر الوقت، يحساب روحه كان عيط وعلا صوته على أمه بيولي راجل
إنتصار شافت لمؤيد اللي يزفر بغضب، بحده: خيرك شني إمداير هالمره!!
مؤيد، بعصبيه😡: تعرفي تقلبي وجهك من قدامي أحسنلك خير مانطلع عصبيتي كلها عليك وإندقدقلك عظامك
ناجيه، بهزوه😏: خوك واعر ياحنه، معاش لقي على مني يسترجل إلا على أمه وأخته
مؤيد، بضيق: علاش هالكلام ياأمي توا، أني جيتك بالهداوه أنتي اللي عصبيتي وسكرتي رأسك
ناجيه، بعصبيه😡: ورأسي بيقعد مسكر على هالموضوع فاهم، بنت أختي هذا اللي فاضلي من أهلي ونشم عليها في ريحة أختي الله يرحمها، مستحيل نرضي نظلمها ونخليك تأخذها فاهم
مؤيد، بغضب😠: عمري ماشفت أم زيك تفضل بنت أختها على ولدها
ناجيه، بضيق: واللهي لو عارفاتك تبيه من قلبك وغاويها ورايد الخير وهيا تبيك راهو ماوقفتش في وجهك، لكني أني أمك وعارفاتك ماتصلحش لبنت أختي وماتركبوش على بعض بكل، هذا غير متربي معاها نحسابك عادها كيف واحده من خواتك تجي تقولي نبي نتزوجها وتوا
مؤيد، برفعة حاجب🤨: وأنتي كيف عرفتي أني مش غاويها من قلبي، ومن قالك أنها ماتبينيش، ولا أنتي مسكره رأسك هكي وخلاص
ناجيه بهزوه😏: قلبي قالك، والدسته اللي تكلم فيهم هذاكم وين في الرئه ولا في الكبده، تي إمبارح بس نسمع فيك تحلف وتتقطع لبنت الناس وتقوللها والله ماواخذ غيرك تعشم في بناويت الناس في الليل وتجيني الصبح تقولي نبي نتزوج دنيا
إنتصار، برفعة حاجب🤨: أصلا دنيا مش راح تشوفلك حتى الشوفان، ومستحيل توافق عليك ريح روحك وإرتاح
مؤيد، فنص فيها: وأنتي شني عرفك أنها مش راح توافق، ولا مقايلتلك أنها تبي حد ثاني وأنتي ماتبيش تقولي
إنتصار، بتوتر: لا شني واحد ثاني، بس البنت صغيره ومش مفكره في الدوه هذي
مؤيد قرب وشد إنتصار من إيدها بقوه، وبغضب😠: تكلمي قولي مني هوا اللي تبيه أكيد حاكيتلك
إنتصار، بخوف😟: حول من عليا كلميه ياأمي
ناجيه قربت وفكت منه إنتصار، وبغضب😠: وأنت شني دخلك دنيا ماتخصكش خلي البنت في حالها يامؤيد وهني روحك وهنيني
مؤيد زفر بغضب وطلع من الحوش😤
ناجيه، بشك🤔: شني قصدك باللي قلتيه دنيا تكلم في حد!!
إنتصار بتوتر: لا ياأمي قلت هكي باش مايفكرش فيها بس
ناجيه شافت لإنتصار بشك ومشت للمطبخ 🙄
إنتصار أستغفر الله العظيم غير شني خلاني نفتح هالفم😰
^^^^^^^^^^^^^^^^^^^^^^^^^^^^^^^
حسام، بحب❤: ياروحي أنتي، وحط إيده على فمه🤭 وقال: نسحب كلمتي أسف مانبيش نستعجل في مشاعري على قولتك
دنيا تنهدت بضيق: هيا كلمه قلتها ومشت لازم إذلني بيها يعني، مش ناقصني ياحسام راهو
حسام، بأسف😞: خلاص مش قصدي، بس والله بجد مش مستحق أنك إديري في روحك هكي، أنتي اللي ضريتيهم ولا أنتي اللي درتيلهم الحادث كل شي قضاء وقدر وأنتي ماليكش علاقه باللي صار
دنيا، بحزن😔: حتى عمي مصطفي قالي مش مستاهله أنك تدعي عليه على خاطر رزق دنيا، ونزلو دموعي😢: أني والله مادعيت عليه ياحسام حتى بعد اللي داره فيا واللهي مادعيت عليه، أنتم ماتعرفوش هالشخص شني دارلي، شني نوع القهر اللي قهرهولي، وحطيت إيدي على وجهي وأنهرت بالبكي😭
حسام قربت منها وأني خايف من كلامها، سكوتها على الموضوع هذا يحير بصراحه، هيا صح من النوع الكتوم واللي ماتحكيش في كل شي، بس كلامها يدل على أنه داريلها شي كبير وماينغفرش وهالشي كفيل بأنه يخلي الخوف يأخذ حصه كبيره من قلبي عليها، وبضيق: ليش الدموع يادنيا والله عارفك قلبك مافيش أبيض منه ومستحيل تدعي أو تتمني لأي حد شي مش كويس، ماتخوفينيش عليك باللهي قيمي رأسك وشوفيلي، جبدت إيديها من على وجهها وشديتهم بإيدي وقمتلها رأسها بإيدها الثانيه، وبخوف😟: كل ماله تزيدي تخوفي فيا عليك راهو، ريحيني وقوليلي هالراجل شني إمدايرلك
دنيا هزيت رأسي بأسف وجبدت إيديا بالقوه ومسحت دموعي، وتنهدت بضيق ووقفت: نمشي نتوضأ ماصليتش الظهر
حسام وقفت وجيت قدامها، وبقلق: ليش تتهربي من هالموضوع حاس أنه في هلبا حاجات داستيهم عليا، أحني مش هكي تفاهمنا يادنيا، قاعده مش واثقه فيا!!

 

 

 

 

 

دنيا نزلت رأسي بأسف😞: مش هكي ياحسام، بس في حاجات نفضل نحتفظ بيهم بيني وبين لنفسي، لو سمحت ماتضغطش عليا، لو في شي يخصني راح نقولك على طول ماتخافش
حسام مانبيش نضغط عليها وأني نشوف في وضعها قاعد حساس ومش متحمله، أبتسمت😊: أكيد مش راح أدسي عليا شي!!
دنيا مش عارفه شني اللي خطر عليا خطبة عمامي اللي كنت ماحيتها من عقلي نهائي، بتوتر: أكيد، حول من قدامي بنمشي نصلي
حسام، بحب❤: وريني إبتسامتك الحلوه قبل
دنيا🙁: لا ماعنديش خلوق نبتسم حول مرات تجي عمتي
حسام قربت منها أكثر وشبه حاصرتها، وبغمزه😉: ماتخافيش واخذ إذن من الأبله نازلي
دنيا أبتسمت وتلفتت على الجنب
حسام، بضحكه😁: عارفه أنك في النكد أثبتي إنك ليبيه وبإمتياز
دنيا شفتله بحده
حسام😒: أيواه لما تبتسمي تلفتي للجهه الثانيه باش مانشوفكش، لكن نظراتك الحاده هاذم أبعتيهم لعيوني طول، وبرجاء🥺: خفي عليا يابنت حرام عليك راهو
دنيا بإبتسامه مستفزه: هكي أفضل باش ماتتسرعش، وبعدين الصبر كويس يشكرو فيه راهو، وهربت بسرعه وأني نضحك😅
حسام، بصوت عالي: باهي يادنيا كان مانطلعاش هذا كله من عيونك أني مانبدأش، وقعدت نتأمل في الدار كيف منوره وأني مبتسم، أول مره نخشلها بعد ماروحت، كانت مظلمه في غيابها، فعلا وجودها يفرق في كل شي
” أحتاجكِ معي دائماً، حلواً كنتِ أو مراً، أحتاجكِ بالقرب مني لأن الدقائق التي تمر بقربك تعادل سنواتٌ من عمري، ولأنكِ رغم كثرة المارين في حياتي إلا أنكِ وحدكِ من ملكتني عقلاً وقلباً، وحدكِ أمني وأماني ومأمني، مسكني وسكني وسكينتي، روحي وراحتي وروحانيتي، وحدكِ أنتي من أتمني أن أمضي عمري معها وبجانبها ”
^^^^^^^^^^^^^^^^^^^^^^^^^^^^^^^
بعد العصر في المطار
حسام واقف في صالة المطار وعيونه على الباب اللي يطلعو منه المسافرين، أبتسم وهوا يشوف في محمد طالع أشرله بإيده، وبسرعه ماتلاشت إبتسامته لما شافها طالعه وراه ورأسها في الأرض كان متخيل أنه ممكن تكون بصاره أو تسهويك من محمد، بس شكله الموضوع رسمي حك جبهته بتوتر وأبتسم لما شاف محمد قرب منه وهوا يحاول يرسم على وجهه إبتسامه غصبآ عنه
حسام، سلم على محمد، وبإبتسامة😊: الحمدلله على السلامه، والله مخلي مكانك ياراجل مانحسابش روحي بنفقدك بسرعه هكي
محمد، أبتسم😊: الله إيسلمك، باش تعرف قيمتي بس، وتلفتلها وهوا يأشرلها على واحد من الكرسي، وبضيق: قعمزي إهنايا نجيبو الشناطي ونجيك، ومشي هوا وحسام
حسام، بضيق: كيف صار ياراجل تمشي عزابي يومين تروحلنا متزوج
محمد نزل رأسه بأسف😞: اااااااه شني بنقولك بس، قسما بأيات الله تقول عليا في حلم بروحي مش مصدق تقول كابوس الزفت، ياريتني تكسرت ومامشيت الهم
حسام تنهد بضيق واضح الموضوع كبير، من كلام محمد، وشكله اللي متغير 360 درجه، يوحي أنه اللي صار ماكنش ساهل عليه أبدا، سكت حسام وهوا يشوف في محمد مضايق ومش قادر يحكي، فضل أنه يأجل الكلام في هالموضوع لوقت ثاني، خذو الشناطي ورجعو لقوها واقفه في نفس المكان وسارحه ولما كلمها محمد ماأنتبهتش لين هزها من إيدها باش إستاقضت، وبحده: وين عقلك هيا تحركي، مشي هوا وحسام وهيا وراهم ومنزله رأسها بأسف
في السياره
حسام: أمتي مروح خالي والعويله؟
محمد: واللهي مش معروف راجل خالتي تاعب شويه وبوي قال بيقعد لين يطمن عليه، وتنهد بضيق وهوا يسمع في صوت شهقاتها من لما تكلم
وعم السكوت في السياره اللي مش مسموع فيها إلا صوت شهقاتها ورشفت أنفها، ومحمد اللي كل شوي يتنهد بضيق وعيونه على الطريق وسارح بعيد وبالتحديد لليوم اللي وصل فيه لبنغازي
Flashback

 

 

 

 

الساعه 4 وربع طلع من المطار وأنتبه لبوه اللي واقف على سيارته ويستني فيه، مشي بسرعه وهوا شاد ساكو صغير في إيده فيه لبسه ومستلزمات شخصيه بسيطه، أبتسم وقدم بيسلم عليه إلا أنه أستغرب من نفور بوه وكيف مشي لجهة السواق وأشرله يركب وركب
محمد ركب وهوا علامات الإستغراب🤔 على وجهه من حركة بوه وبدي القلق والخوف يتسلل لقلبه تدريجيا من ملامح بوه الغاضبه، وأخيرا وبعد فتره من الوقت أستجمع قوته، وبتساؤل: شني فيه يابوي!! شني اللي صاير باش خليتني نجي بالسرعه هذي، أمي والبناويت كويسين!!
المبروك، بحده: توا تسأل على أمك وخواتك، ليش مافكرتش فيهم لما درت اللي درته، هذا أنت اللي نقولو عليك عاقل ومافيش منك تنزلي رأسي هكي
محمد، بإستغراب🤔: شني اللي تقول فيه يابوي فهمني شني قصدك!!
المبروك لف السياره بسرعه ودرس على اليمين، وشاف لمحمد بغضب😠: هكي ربيتك أني، كنت نشوفلك ومفتخر بيك، نقول محمد ولدي وأني رأسي مرفوع، على أخر الوقت توطيلي رأسي بين الناس
محمد، بضيق: يابوي والله ماني عارف على شني تحكي بالضبط، فهمني ورحمة والديك، شني اللي درته أني باش تقولي هكي
المبروك زفر بغضب😤 وقعد يحكيله اللي صار قبل ساعتين من لما جي أسامه وورالهم الصور لين رفعو الهادي للعياده وأتصل بيه
محمد، بصدمه😯: كيف!! أنت شني تقول يابوي!! كذب واللهي العظيم كذب، ورأس أمي هالكلام مافيه منه، كيف هكي!!
المبروك، بغضب😠: تي أني شفت الصور بعيني كيف تبيني نكذب
محمد: والله يابوي مافي حاجه بيني وبينها والله حتى التقعميز أني وياها بروحنا ماقعمزنا، معقوله تشك فيا أني هكي إندير، تي البنات اكثر من الهم على القلب خلاص معاش لقيت إلا هذي المخطوبه واللي عرسها قريب باش إندير معاها علاقه ونقعمز ونهدرز أني وياها لين يصورنا حد وأني حال فمي، تي كيف هكي الكلام مايخشش العقل بكل
المبروك، بغضب😠: تكذب عليا وفي عيني زياده، قتلك الصور واضحات وضوح الشمس واللي باعتهم كاتب أنك كنت أنت وياها على علاقه قديمه
محمد شديت رأسي بإيديا وقعدت نهز فيه يمين ويسار
المبروك، بعصبيه😡: وين بطاقتك هاتها جاي
محمد، بإستغراب: ليش البطاقه يابوي، شني بدير بيها!! قصدك أنت مصدق هالكلام!!
المبروك، بغضب😠: بندير اللي لازم يندار عمام البنت خليتهم يتحززو عليها وكل واحد يهدد شكل، وبوها طايح في المستشفي وماعندها من يدافع عليها، من هاللحظه البنت ولت مسؤوليتي أني وياك، اليوم تنقرأ فاتحتك أنت وياها فاهم
محمد الصدمه خلت لسانه يرتبط وعجز عن النطق وصوته رفض يطلع، وكلام بوه الأخير خلاه يخش في حالة اللاوعي وهوا يشوف للفراغ وعيونه تابتين على مكان واحد
تحرك المبروك اللي فسر سكوت محمد على أنه الكلام اللي صار صح وولده هوا الغالط، توجه بولده لحوش خالته وساعه بس وكانت الفاتحه مقريه هالشي اللي خلا عمام البنت يهدو بعض الشي، فكو الخيمه وتحولت كل الأضواء والزينه اللي على الحوش في أقل من ربع ساعه، وسط إستغراب الكل من المعازيم والجيران اللي الوضع بدي تدريجيا يوضح بالنسبه ليهم لما طلع الكلام اللي إنقال من أهل أسامه لما إنفض العرس، ولأنهم في نفس الشارع مما سهل أنه الموضوع ينتقل بسهوله وكتر الكلام وكترث القصص وكل واحد يزيد كلمتين لين كبروه ووصل لقضية شرف بالنسبه للعيله
الفاتحه اللي أصر أنه المبروك يقرأها بأسرع وقت ظننا منه بأنه راح تحل الأمور وتهدى الوضع شويه، إلا أنه الموضوع تأزم أكثر لما كثر الماشي والجاي والكل قصدها الشماته والإستهزاء وتلقيح الكلام، هالشي اللي خلا عمام أيه يخشو ويجبدوها من شعرها وهما ناويين على غسل شرفهم قدام الناس بطريقة الجاهليه، وبعد جهد جهيد قدر المبروك يجبدها منهم وخاوتهم وطلعها بسرعه من الحوش لسيارته، اللي كان محمد طول هالوقت مقعمز فيها والصدمه شالاته شل، في لمح البصر إنتهت قصه وبدت قصه جديده، بدل مايكون فيه فرح وزغاريط وتهاني، أحتل مكانه الحزن والعياط والمتشمت أكثر من اللي واجعه الحال
Now
محمد إستاقظ على صوت حسام وهوا يقوله
حسام: تبو الحوازه ولا لا!!
محمد، بنفي: لا لا حطنا في فندق
حسام هز رأسه بأسف وغير إتجاهه لأحدي الفنادق
وصلو ونزل محمد وأشرلها تنزل واره خذي الشناطي وهوا يقول لحسام: خليك شويه وجايك
هز حسام رأسه وهوا شاغله التفكير شني اللي ممكن يكون صار مع محمد في بنغازي وخلاه يتزوج بالشكل هذا
محمد حجز غرفه وركب هوا وياها ووراهم واحد من العمال قايم الشناطي، فتح الباب خش وخذي الشناطي من العامل وأشرلها تخش، وبضيق: أرتاحي شويه ونجيك، وردي بالك تفتحي الباب لأي كان أني رفعت معاي الكرت، وتلفت وطلع لما شافها هزت رأسها بباهي
في السياره
محمد، بضيق: وهذا اللي صار حطنا بوي في الفندق وقعدنا لثاني يوم جي هوا وأمي وجابولها حوايجها وحاجاتها، ومنها معاش شفت حد، إمبارح كلمني بوي وقالي خوذ مرتك وروح لطرابلس لأنه عمامها يدورو عليها ومش ناويين خير والصبح جابلي أوراقها وجوازها
حسام، بصدمه😲: ولا في الخيال الزفت، صورتين ثلاثه يستاهلو يقتلو عليهم حتى القتل!! شني هالناس هاذم!!
محمد، بضيق: اللي فهمته القصه مش في الصور اللي مافيش حد شافهم إلا بوي وعمي الهادي، بس الموضوع أنتشر في المنطقه وكل واحد زاد عليه وفبركه كيف مايبي ولأنه خطيبها أختفي والصور معاه ف مافيش دليل يثبتو بيه عكس كلام الناس اللي وصلو الموضوع لمسألة شرف
حسام، بضيق: لاحول ولاقوة الابالله، وهيا بنت خالتك شني ردها!! واضح أنها مصدومه حتى هيا
محمد، بضيق: على حسب اللي فهمته منها من الأول أنها ماتعلم بشي لين صارت الدوشه برا وخشو عمامها وقعدو يشحشحو فيها، يعني حصلتها خلعه على صدمه على رعشه وتخلطت عليها، حتى صوتها معاش سمعته ومابطلتش بكي
حسام، هز رأسه اللي رافض يستوعب الموقف: والله الواحد ماعارف شني يقول إنظلمت أنت وياها، بس مني الحقير اللي باعث الصور، معقوله يكون عندها علاقات من قبل وهوا اللي دار هكي
محمد، بنفي: ماأعتقدش هيا مش من هالنوع، صح ماعندهاش خوت بس بوها وعمامها متشددين وتخاف منهم، وبعدين حتى لو كلامك صح أني من وين يعرفني ومنين جاب صورتي أصلا
حسام، بشك🤔: لما جتكم ماقعمزتش أنت وياها بروحكم مرات حد شافكم صوركم

 

 

 

 

محمد، بنفي: والله ماصار هالكلام نهائي، كيف نقعمز مع واحده مخطوبه وعرسها قريب بروحنا
حسام، بأسف😞: إمالا كيف مافيش إلا أنه الصور يكونو ملعوبات يعني، بس مني اللي عنده مصلحه يدير هالشي، أنت قلت أنه مافيش حد يعرفك في بنغازي، معناها الشخص هذا من طرابلس
محمد شد رأسه بإيديه: بنهبل ياحسام بنهبل خلاص رأسي معاش متحمل، كنت عايش ومرتاح ساعه قلبت حالي قلب، اااااه ياربي ااااااه
حسام طبطب على كتف محمد، وبأسف😞: وسع بالك يامحمد ربك يفرجها إن شاء الله وعسى أن تكرهوا شيئا وهو خير لكم
محمد، بغضب😠: باللهي أي خير ياحسام، وينه الخير في اللي صار معاي وينه
حسام، بحزن: والله ماتعلم يامحمد مرات ربك مسخركم لبعض ماتعرفش الحكمه من وراء هالموضوع، بس أنت هدى ووسع بالك وكل شي راح يبان ماتخافش مابعد الضيق إلا الفرج، رد بالك منها البنت راهي إدير في روحها حاجه، نفسيتها أكيده تاعبه من الموضوع وعلى قولتك أنها قاعده مصدومه ومش مستوعبه شي، مش ساهله عليها بكل راهو، كانت مخططه ومجهزه روحها وعلى أساس بتتزوج واحد لقت روحها مع واحد ثاني، والله كابوس رسمي، وقعد يهز في رأسه بأسف😞
^^^^^^^^^^^^^^^^^^^^^^^^^^^^^^^
حسام، بأسف😞: وهذا اللي صار
دنيا، بصدمه😯: فيلم هندي، معقوله أيه ومحمد تزوجو وبهالطريقه البشعه، بس مني اللي ليه مصلحه يفربك الصور ويخرب عرس البنيه ياناري، لا ويخرب لمحمد حياته
حسام، بضيق: والله ماني عارف، يستر الله وخلاص إن شاءالله غير عمامها مايلحقوهاش إهنايا بس
دنيا، بخوف😟: قصدك يبو يقتلوها معقوله مازال فيه ناس تفكر بالعقليه هذي
حسام، بأسف😞: فيه هلبا قاعدين يفكرو في أشياء أسوء من هكي، بس زي ماقتلك هما غايبه عليهم الحقيقه ماشافوش الموضوع من زاويه صح، كلام الناس خلاهم يأخذو ردات فعل تلقائيه مبنيه على الغضب، وبو البنت راقد في العياده وتاعب والله أعلم شني صاير فيه
دنيا، بحزن😔: لاحول ولاقوة الابالله ربي يشفيه إن شاءالله، والله حرام محمد مايستاهل، حتى أيه رغم أني شفتها مره واحده بس ماشاء الله عليها ماتستاهلش اللي صار فيها ربي يكون في عونهم
حسام، بحزن😲: إن شاءالله، وأبتسم😊: إلا الأنسه نازلي وين الليله مخلياتك بروحك!!
دنيا، بإبتسامه😊: عيب ياحسام أمك راهو، وبعدين مش عارفه أكيده خذاها النوم من غير ماتعلم هيا وين
حسام، بغمزه😉: معناها أني نازل نبي نشوفك توا
دنيا، بتوتر: تنزل عينك وبعدين أهو قاعد تشوف فيا، وحطت التليفون وناضت سكرت الباب
حسام، بضحكه😅: شني درتي ياهبله سكرتي الباب بالمفتاح!!
دنيا رجعت قعمزت وحطت التليفون قدامها، وبضحكه😁: مافيكش ثقه بصراحه
حسام، بزعل🙁: باهي يادنيا ديري وكثري مافياش ثقه صار
دنيا، بإبتسامه😊: شني جو الصغار اللي إدير فيه هذا، حسام أسمع بنقولك شي
حسام ببرود: نعم!!
دنيا😕: بتقعد بارد هكي نسكر راهو
حسام رسم إبتسامه صفراء على وجه: ها خلاص قولي شني كنتي بتقولي!!
دنيا، أبتسمت😊: من إمبكري وأني نفكر في الموضوع، المبلغ اللي حصلته كويس يعني، وفيه غيره ليش مانفتحش مشروع بيهم أنت شني رأيك!!
حسام، بتفكير🤔: مش عارف بس مشروع شني برأيك، هالمواضيع تبي تفكير يادنيا مش ساهله
دنيا: وأهو أحني نفكرو مع بعض بصراحه نبي نستفيد منهم أكثر يعني مانبيهمش يقعدو مخزنات هكي، وأنت بروحك مش محصل عمل ومنها نستفيدو من شهادتك اللي مركونه في الزاويه😁
حسام، بنص عين😒: تتسهوكي باهي باهي كبري الحساب كبري
دنيا: خلاص الموضوع عندك فكر في شي وقولي
حسام، بإبتسامه😊: حاضر يصير خير
دنيا، ذبلت عيونها بطريقه طفوليه☺: حسام

 

 

 

حسام، بعياط: مش عارفه أمي نضعف معها شبحتك هذي ليش إديري فيها مية مره نقولك، ضعيف قدامك من غير النظره هذي معاش تعاوداها مره ثانيه الزفت
دنيا تي والله وين ينوض عليك الهبال معاش ينفع فيك لانظره ولاغيرها، وبحده: بنت خالتي زاد عليها وليد، وغذوه إمدايره لمه بتجي خالتي ومؤيد بيرفعوني
حسام، بنص عين😒: واللهي!! لا مافيش مشي
دنيا، بغضب😠: وليش إن شاءالله، بس أني نبي نمشي
حسام، بحده: وأني قلت لا يادنيا فوتي الموضوع
” نتشاجر ونخطي ونختلف ولكن لن أترك لكِ مجال بأن تتركي يدي مهما حصل بيننا ”
خلينا منهم ومن مناقرتهم اللي ماتكملش ونمشو لثنائي جديد
محمد بعد مامشي حسام مارجعش للفندق قعد يتمشي لعلا وعسى يقدر يغير جوه شويه، شاف ساعته لقي الوقت تأخر شويه وقف خذي سندوتشات ولف ورجع للفندق، فتح الباب بالشويه وأول ماخش قابلاته راقده على الصالون، تنهد بضيق وهوا يشوف لأثار الدموع مبينات على خدودها من يوم الإربعاء وهيا دموعها ماجفوش من على خدها اللي صار معاها مش ساهل، وكأنها رقدت على حلم حلو وناضت على كابوس بشع قلب حياتها مليون درجه، في الوقت اللي كانت مستنيه رساله من خطيبها يبلغها فيها أنهم قرو الفاتحه وإنكتبت على أسمه، خبروها أنه فاتحتها إنقرت وإنكتبت على أسم واحد ثاني ماكانش يخطر على بالها، العروس اللي كانت لابسه البودري وتستني في أهل العريس يخشو عليها بالقفه، خشو عمامها وجبدوها وهما يهددو ويتحلفو فيها بالقتل، العروس اللي ماقدرتش تحني كيف ماكانت تبي ولا تمشي للمزين اللي بعد طلوع الروح ماحصلت حجز فيه، وماقدرتش تلبس الفيلو اللي تحلم بيه كل بنت، بإختصار بدل ماتنزف ورده وتطلع من حوش بوها ورأسها مرفوع، طلعت مذلوله وخايفه وإنزفت جثه نتيجه لحقد وكره مالي قلوب سوداء
قرب محمد وقعد يهز فيها بخفه: أيه أيه
أيه فزت بخوف وتكورت على نفسها بسرعه ونزلو دموعها
محمد، بضيق: خلاص ماتخافيش أني محمد، ليش راقده هكي رقبتك مش مستريحه، نوضي تعالي كولي حاجه مش معقوله تقعدي هكي من غير مأكله
أيه نزلت رأسها بأسف وهيا تبكي😭
محمد زفر بضيق وقعمز قدامها، وبهدوء: أيه ممكن تسمعيني لو سمحتي!! أنتي عارفه أنه اللي صار لا في إيدي ولا في إيدك، كل شي مقدر ومكتوب، باللهي هدي روحك شويه وبطلي بكي وخلينا نعرفو نقولو كلمتين، ونتفاهمو مع بعض باش نلقو مخرج لهالمصيبه اللي طحنا فيها
أيه ماتكلمتش بس قامت رأسها وهيا تمسح في دموعها
محمد، أبتسم غصب: توا كلمني بوي وقالي أنه عمي الهادي كويس وحالته مستقره والدكتور طمنهم الحمدلله
أيه نقزت في مكانها بفرحه: حقا قول واللهي بوي كويس ماتكذبش عليا صح!!
محمد أبتسمت على حركتها: والله مانكذب وزياده قالي مؤخر شويه يخشله ويخليه يكلمك باش تصدقي أنه كويس
أيه، بإبتسامه😊: الحمدلله ياربي الحمدلله
محمد: هيا نوضي كولي حاجه قبل
أيه هزت رأسها وناضت خذت سندويتش من اللي جابهم محمد وقعمزت تأكل فيه بهدوء
محمد تنهد بضيق وهوا يشوف بأسف عليها وعلى روحه
“أحيانًا تمرّ عليك ظروف تشعر أنها لن تنتهي من شدتها وقسوتها، ومع مرور الأيام تتلاشى بلُطف الله وطريقته وتدبيره لا بطريقتك وتدبيرك،
فقط ثق بأن ربّك لا ينساك أبدًا.”

 

 

 

 

^^^^^^^^^^^^^^^^^^^^^^^^^^^^^^^
في هالليل كانت الموسيقي عاليه وأصوات الهدرزه وعياط الشباب وتمايلهم مع أنغام الموسيقي كانت طاغيه على أرجاء المكان، إلا أنه دخول واحد من الشباب يجري ويلهث بخوف😟: ياحسن الشرطه خاشه لطريق المزارع
خلا الهلع والخوف يصيب كل الموجودين والكل فر وقرر ينجي بنفسه، وحتى خليل وهشام اللي أصحاب الروح بالروح هما وحسن كانوا أول الفارين
حسن، بخوف😟: كيف يصير ياأحمد والبضاعة اللي الداخل كيف يصير فيها
أحمد، بتوتر: مايهمكش فيها تعالا معاي
مشو الإثنين يجرو لمكان البضاعه وطلعوها في أكياس قمامه وحطوها في سيارة حسن وهربو حتى هما
حسن، بخوف😟: يستر الله مانكونو إنسينا شي ولا طاحت حاجه والله نمشو فيها بعدين
أحمد، بتوتر: ماتخافش بإذن مانسينا شي
حسن، بخوف: توا وين بنمشو بيها هالبلي هذي
أحمد، يفكر🤔: مش عارف خليها في السياره ولاحطها في حوشكم
حسن، بنفي: لا مانقدرش والله بوي يلاحظ شي يهججني بعدين، أنت اللي جبتها أنت اللي تتكفل بمسؤوليتها من الأول هالموضوع مش خاش لدماغي بس أنت ورطتنا فيه، حلها بسنونك وتصرف فيها
أحمد شاف للطريق وهوا يزفر بضيق: خلاص توا أني نتصرف، غير وصلني لحوشنا بس
^^^^^^^^^^^^^^^^^^^^^^^^^^^^^^^
فاتو أسبوعين والحال على ماهوا عليه، ماحدش كان متوقع أنه هالهدوء النسبي اللي مر على البعض ممكن ينتهي بشكل أسوء مما يتخيله عقل أي حد فينا
اليوم الجمعه عيلة عمي المبروك مروحين اليوم، لأنه مازال على العيد الأضحي 3 أيام،
لحد الأن مافيش حد في الحوازه يعلم بزواج محمد وأيه إلا أني وحسام، وحتى عمي كان متكتم على الموضوع خوفا وحرصا على سلامة أيه، وفضل أنه مافيش حد يعرف لين يوصل هوا
من حوالي 10 أيام كلمت حسام يخلي محمد يأخذ واحده من شقق بابا ويقعد فيها بما أنه المستأجر طلع من ثلاثه أسابيع وهيا قاعده فاضيه وأريحله من الفنادق وأقل مصاريف
وعلى حسب كلام حسام أنه الوضع بينهم قاعد على ماهوا عليه مافيش تغيير
بالنسبه لناصر ونجاة وصغارهم أنقطعت أخبارهم فجأة وتليفون نجاة كان طول الوقت مقفل، ولما سأل حسام عرف أنهم طلعو بولادهم للخارج على خاطر العلاج وماحدش يعلم عليهم أكثر من هكي، كل مانذكر اللي صار للصغار وممكن نكون أني السبب فيه يراودني أحساس بالذنب من إتجاههم
أما بالنسبة ليا أني وحسام الوضع ماشي نوعا ما، بعد محاولات شتي مشيت للمة هنادي هذاكا اليوم بس عمتي معاي طبعا وحسام هوا اللي رفعنا، وقاعدين نفكرو في مشروع كويس نقدرو نحطو فيه الفلوس وأحني مرتاحين
يوم الجمعه الظهر
وصلو عيلة عمي المبروك ولأنهم أول مره يغيبو هالفتره فالكل كان في إنتظارهم قدام الحوش، وبعد السلام والتحميد بالسلامه والسؤال عن الحال والأحوال
المبروك، بإبتسامه😊: هيا تفضلو خشو
مفتاح: لا خشو إرتاحو وتعالو غذاكم عندنا اليوم
وقبل مايتفرق هالحشد الغفير اللي كان يضم العيله من صغيرها لكبيرها، ألتفتو الكل لسيارة محمد اللي خشت

أغلق على شعورك السيّء وابتسم… كلما تأخر عليك شيء وطال انتظاره فاستبشر خيرًا وسيأتيك أجمل مما كنت تتخيل، ‘ إن الله على كل شي قدير’
وقبل مايتفرق هالحشد الغفير اللي كان يضم العيله من صغيرها لكبيرها، ألتفتو الكل لسيارة محمد اللي خشت ودرست بعيد شويه ونزل ونزلت وراه، في الأول كانت الرؤيه مضببه عند الكل وخصوصا أنه أيه تمشي وراء محمد وهيا منزله رأسها، بس شويه شويه بدو يقربو لحد ماوصلو ووقف محمد وأبتسم: السلام عليكم، كيف حالكم ياعويله؟
بس مافيش حد أنتبهله لأنه الأنظار كلها كانت على اللي جنبه والإستغراب واخذ حصه كبيره من وجوههم، وعلامات الإستفهام مليون فوق رأس كل واحد فيهم، والمهم أنه علا اللي كانت واقفه جنب سنيه كانت تشوف وهيا مسبوهه وحاله فمها ماقدرتش تفكر شني السبب اللي يخلي أيه واقفه جنب محمد، لا وجايه معاه بالسياره
محمد تلفت لأيه وأبتسم ومسك إيدها وحس الرعشه اللي صدرت منها سرت في كامل جسمه، ضغط عليها بقوه ورجع تلفت للي واقفين قدامه، وبإبتسامة😊: نعرفكم أيه بنت خالتي ومرتي
الصدمه أحتلت وجوه الكل وشلت ألسنتهم، وخلت الإستغراب كلمه قليله في وصف تقاسيم وجوههم، إلا دنيا وحسام اللي كانت ملامحهم عاديه يغلبها القلق والتوتر من اللي راح يصير
دنيا إنسحبت من جنب عمتي ومشيت وقفت في جنب أيه اللي لما شافتني تنهدت براحه، وأني بادلتها بإبتسامه مطمنه بعض الشي

 

 

 

 

علا شافت لسنيه، بصدمه😲: كيف!! مش أيه تزوجت من إسبوعين!!
سنيه، بضيق: أي وتزوجت محمد خويا
علا، بغضب😠: كيف هكي كيف!!، وتلفتت لبوها لما سمعاته تكلم
مفتاح، بإستغراب🤔: كيف مرتك!! شني اللي صار ياالمبروك تمشو على أساس بتحضرو عرس تقعدو ثلاثه أسابيع وتروحو بالعروس معاك
الكل قعدو ساكتين ويستنو في رد المبروك إلا أنه عطل بيه وهوا متوتر ومش عارف كيف راح يبدأ وقعد يهز في رأسه بأسف😞
مصطفي لما شاف الجو بدي يتوتر والكل يستنو
في المبروك يفسرلهم اللي قاعد يصير وهوا مش قارد ينطق، حب يختصر عليه الموقف مبدئيا، وبإبتسامة: ربي يهنيهم ويسعدهم، وإن شاء الله زواجة الدهر يامحمد، وتلفت لمفتاح، بضيق: توا العيله تاعبين خلوهم يرتاحو قبل وبعدين نعرفو كل شي
بشير أشر لمرته وولاده ومشي من غير ولا كلمه، أما مفتاح شاف للمبروك بحده وتلفت ومشي لحوشه
سالمه رغم الإستغراب اللي مسيطر على ملامحها إلا أنها إبتسمت: ربي يهنيكم إن شاءالله، ماتعطلوش نستنو فيكم على الغذي، ومشت ولحقتها عبير اللي كانت تشوف بشماته لأختها الواقفه زي الصنم في مكانها
أما سعاد اللي همسلها حسام بأنه راح يفسرلها الموضوع في الحوش، ف هيا الوحيده اللي قربت وسلمت على محمد وأيه وباركتلهم، وأستاذنت ومشت هيا ومصطفي لحوشهم
خش المبروك وفوزية وسرور ولحقتهم سناء بولدها
عصام، بإبتسامه: مبروك يامحمد ربي يهنيك، لكن ماتحسابش روحك كان تزوجت خت فت بتهرب منا راهو😉
محمد، بإبتسامه: الله يبارك فيك، ولايهمك تفضل وتأخذ قدرك، إمالا وين عامر وعادل؟
عصام: عامر عند نساباته، وعادل يبي من يطلعه ويخششه ليه إسبوعين مجبس وقاعد مش واخذ عليه ومش قادر يتحرك بيه
محمد: خلاص إمالا الحق عليا أني نمشيله
عصام: تم إمالا نستنو فيك، هيا أنستو بعضكم توا، ولف ومشي لحوش بوه
حسام، بغمزه😉: نحيت أني الشاينه وتزوجت أنت نصيبك قوي ياودي
محمد، ضحك: باش تعرف بس خليك أنت إدير في الشيانه وتحول😅
حسام، بإبتسامه😊: راضي مايهمكش فيا، هيا إمالا إنشوفوك ياعريس 😉
محمد أبتسم بضيق وهز رأسه

 

 

 

 

حسام أشر لدنيا اللي واقفه قريب من أيه وقبل مايمشو أنفجر البركان اللي قاعد يغلي من أول ماطلو محمد وأيه، وخلاهم يوقفو في مكانهم
علا تشوف لسنيه بحقد: هذا خوك اللي يبيني ويموت فيا، مشي وتزوج واحده الله أعلم شني إمدايره باش سيبها خطيبها، كلكم عيله كذابه من أولكم لأخركم
محمد تلفت لأيه لما حس أنه تجبد في إيدها منه، ودموعها معبيات عيونها
سنيه بغضب😠: أحترمي نفسك ياعلا أنتي عارفه هالموضوع اللي تحكي عليه أنتهي قبل مايبدأ، وأنتي اللي رخيتي محمد بإيديك ماعندكش الحق تقولي حتى حرف توا
علا ماعدلتش على سنيه وقربت من أيه وبحقد: عمري ماشفت أحقر منك الله أعلم شني إمدايره وكيف خططتي باش خليتي محمد يتزوجك أصلا كنت شاكه فيك تخططي لشي من لما جيتي
أيه وأخيرا نطقت وبدموع😢: أنتي شني تقولي أي تخطيط اللي تحكي عليه، وشافت لمحمد بنظرة رجاء🥺 خايفاته يصدق اللي قاعده تقول فيه علا
علا فوق من اللي دارته وظلمت إثنين بحقدها وسواد قلبها، إلا أنها مش إموليا على تالياتها بكل وقاعده تحاول إظلل الصوره قدام محمد وإدير في أيه أنها هيا اللي كانت مخططه لهالشي اللي صار
علا، بكره: نسيتي قبل لما كنتي تقولي أنك تحبي محمد ومش راح تتزوجي غيره، وأني سمعتك بوذني أخر مره لما جيتي تتكلمي بالتليفون وتقولي رزانته مش عليا والله إنطيحه إنطيحه، خزي واحده حقيره باعت خطيبها وشوهت سمعتها وسمعة أهلها على خاطر واحد زي هذا، وهيا تأشر على محمد بصبعها من فوق لتحت
أيه بالنسبه لي لما كنت نقول نحب محمد ومستحيل نتزوج غيره هالشيء كان لما كنا صغار ونلعبو في عروس وعروسه، بس كبرنا وتغيرنا وإختلف كل شي مع الوقت، بس المكالمه اللي تحكي عليها هذي مانعرفش من وين إخترعتها، تنهدت بحزن ونزلت رأسي ماعنديش جهد إناقش أو إنجادل حد بعد اللي صار فيا
سنيه، بغضب😠: روحي ياعلا وفكينا من بلاك اللي فينا سادنا مش ناقصنا تزيدينا حتى أنتي
علا شافت لسنيه بحده: مروحه ماتخافيش بس بنقول كلمتين للمحترم خوك، شافت لمحمد بهزوه😏: برافو قدرت إطيحك في فخها زي الفريسه المذبوحه، واحد كذاب ربي يحبني اللي ماصدقتش كلامك وخليتك تلعب بيا، شافت لأيه: عارفه هذا اللي تزوجتيه من أيام كان يبيني ويموت باش نرضي عليه ونكلمه بس أني ماكنتش شايفاته حتى حشره قدامي، والله أعلم قداش ضاحك على واحده قبل، وأهو طحتي فيه أنتي يامضحكه، وأبتسمت وعيونها يقدحو شرار يبينو قداش أنها مغتاضه ونار قايده في داخلها
محمد اللي كان يتابع ببرود من البدايه، أبتسم بإستفزاز: كويس تميتي ياأنسه علا!! خليني نقولك كلمتين، الحب عمره ماكان غلط ولا عيب وأني نكون حبيت ف هالشي مش جريمه، بس عارفه الجريمه في حد ذاتها وين !! أني حبيت واحده تافهه وحقيره زيك، تأكدي لو ربي يحب حد فهو أكيد يحبني أني لأنه خلصني منك وكشفك ليا وخلاني نسمع الكلام اللي قلتيه لحسام ونشوفك على حقيقتك قبل مانتورط معاك أكثر، بالنسبه لزوجي من أيه، فهو ما إلا تجسيد لقوله تعالى(( الطيبون للطيبات )) ((والخيره فيما أختاره الله)) وأني مش نادم ولا راح نندم عليه لو شني ماصار
هالكلام اللي قاله محمد كان القصد منه يغيظ بيه علا ويحسسها بأنه زواجه كان من إختياره وهوا مقتنع ومرتاح بهالإختيار، وقدر ينجح في أنه يخلي علا توصل لأقصى مراحل الغضب
علا، بغضب😠: كلكم حقراء ومافيش من أوقح منكم، لكن مش أني اللي ننهان ونسكت، خليه هالكلام في رأسك أنت وياها، وهيا تأشر بسبابتها على محمد وأيه، ومشت وهيا تنفض وتتأفف بغضب

 

 

 

 

وكلام محمد وزواجه من أيه بدل مايخليها تندم على غلطها وتتراجع للأسف زاد أشعل الغل ونار الحقد في داخلها أكثر وأكثر، وربي يستر منها😓
حسام، بهزوه😏: ربي يشفي إن شاءالله
سنيه تنهدت بضيق وهيا تشوف لعلا لين إختفت من قدامهم إستاذنت وخشت لحوشهم
دنيا واقفه ونتفرج ببرود كالعاده لأني متوقعه أي شي من أي حد عادي، بس أيه كانت مسخفتني هيا أكثر واحده مظلومه في هالموضوع، صح حتى محمد إنظلم بس مهما كان هوا راجل وطبيعة التركيبه القويه اللي عند الراجل تخليه قادر على مواجهة المواقف الصعبه، بعكس المرأه اللي بطبيعتها حساسه من أتفه الأشياء حتى النظره، وأيه فقدت كل شي في لحظه، عرسها وخطيبها وحياتها اللي كانت مخططه لكل تفصيل فيها، وأهلها اللي معاش تواصلت معاهم نهائي بعد اللي صار، وثقة الناس فيها بعد اللي سمعوها، ونظرة الإحترام اللي كانت كاسبتها من الكل واللي مخليه بيها سمعة بوها في العالي راح كل شي في ثواني وإنهد كل شي في لمح البصر، قدمت من أيه وطبطبت على كتفها بحنيه وأبتسمتلها😊: أهلا بيك في عيلتنا، بصراحه أستقبالك كان خاص ومميز المفروض تفرحي، ماتخذيش عليها علا هذي اللي واضح من كلامها أنها قداش غايره منك وحاسداتك، وقربت من وذنها وبصوت مسموع ليها هيا وبس: ماتوقعتكش إنهزاميه لهالدرجه صدقيني بنظرة قوه وتحدي من عيونك قادره تغلبي الكل وتتبتيلهم عكس اللي هما فاهمينه، أقهريهم ببرودك بدل ماتخليهم يتشمتو فيك بدموعك
أيه أبتسمت لدنيا بفرحه😊 من أول مره شفتها كانت عندي ليها نظره مختلفه عكس اللي شايفينه الكل، وواضح أنه في الأيام الجايه راح نكونو متفاهمين كويس
محمد، أبتسم بإعجاب: شني قلتيلها يادنيا باش ضحكت ليها أسبوعين وهيا شادتها على البكي
دنيا، بإبتسامه: صرحت على أعجابي بأدائها وأثنيت على ذكائها العالى اللي خلا عيونك يلمعو، يعني واضح قداش غرقان في فخها ياولد عمي وغمزتله😉
محمد، ضيق عيونه بصدمه😯، وتلفت لحسام: الله يكون في عونك ياولد عمتي كنت عارف أنه طيحتك مش ساهله بس ماكنتش متوقعه بالصعوبه هذي بكل
حسام ذبل عيونه: باش تعرف وتعذرني لما نقولك مسكين راهو عارف روحي
محمد: ربي يكون في عونك بس سيطر على الوضع وشدها علينا شويه، وضحك😅
حسام ضحك😁 وقرب وجبد دنيا من إيدها وهوا يقول: أطلعي قدامي فضحتي بالراجل وخربتي عليه
دنيا تلفتت بضحكه: يامحمد خوذلها تليفون وأعطيها رقمي، في هلبا حاجات بنعلمهولها😉
محمد دف أيه اللي قعدت تضحك على كلام دنيا وخش هوا وياها لحوش بوه
” ويحدث صدفة أن تجد شخص يجعلك تري الحياة من جانب أخر “♥️
^^^^^^^^^^^^^^^^^^^^^^^^^^^^^^^
خشت علا لحوشهم وهيا في كامل غيضها وتخبط في كل باب وشي يقابلها لين وصلت في درها وقربعت الباب بقوه خلت الحيط ينهز معاه
سالمه، بخلعه: أخلع فرايسها هالمنجوهه والله لو يخشلها بوك يدقدقلها عظامها، بري شوفيها خيرها
عبير اللي كانت تقرض في السلاطه نفضت إيديها بالقوه ومسحتهم وطلعت ومشت لعلا في دارهم، فتحت الباب وهيا تشوف فيها قالبه الدنيا الفوقي لوطي وكأنها تفرغ في غضبها في المخدات والأسره اللي قدامها
علا، بغضب😠: شفتيه الوطي الحقير مشي تزوجها هيا، وأني اللي درت هذا كله وخططت ودفعت فلوسي وحرقت دمي كله راح ع الفاضي
عبير، بهزوه😏: من حفر حفره وقع فيها، وبعدين مادامك تبي محمد وحاطه عليه العين ليش إديري فيه هكي
علا، بحقد: كنت نبي نهينه ونفضحه قدام الكل مانحسابش هكي راح يصير ويتزوجها
عبير: طلعتي فشوش في الأخير، توا معاش يفيدك لا تكسريك ولاعياطك، أنتي اللي قدمتيهولها على طبق من فضه وتوا قعمزي إندبي حظك ياحنه😏
علا، بعصبيه😡: أطلعي من قدام وجهي وأتقي شري في هالساعه، وبعدين مش أني اللي نندب حظي ونستسلم بالسهوله هذي وتوا يشفو شني نقدر إندير
عبير زفرت بملل وطلعت وقربعت الباب

 

 

 

 

أما علا فكملت باقي غيضها في الدولاب وتصريم الحوايج
^^^^^^^^^^^^^^^^^^^^^^^^^^^^^^^^^^^^^^^^
دنيا جبدت إيدي من حسام اللي قاعد شادها حتي بعد مابعدنا، وأبتسمت😊: تصدق طالعين على بعض أيه ومحمد ياناري لولا هالقصه اللي صارت معاها، بس حاسه أنه علاقتهم راح تكون ناجحه
حسام اللي إضايق من سحب دنيا لإيدها، وتكلم بضيق: وأني وياك شني!! كيف راح تكون علاقتنا برأيك ياأنسه دنيا!!
دنيا بإستغراب🤔: خيرك ياحسام شني قصدك بكلامك هذا!!
حسام وقف قدامها، وبضيق: يعني محمد وأيه وبعد اللي صار معاهم، وأنتي عارفه القصه بكل تفاصيلها، وماليهمش إسبوعين متزوجين وحكمتي على علاقتهم بالنجاح ومن نظره واحده عرفتي أنه محمد بادي يميل لأيه، وأني اللي ليا سته شهور وأني نتقرب ونتحنن ونتعذب وأنتي مش ملاحظه شي ولا وين نقولك نحبك تقوليلي متسرع في مشاعرك، باللهي كيف إندير معاك كيف نفسر كلامك وتصرفاتك قوليلي!!
دنيا زفرت بضيق: حسام مش وقته هالكلام بكل، وبعدين لو ملاحظ أنه مافيش وجه مقارنه بينا وبينهم، نظرتهم لبعض تختلف عن نظرتنا ديمه الحلال ليه طرق أسهل للفت الإنتباه وعنده لذه مميزه عن باقي العلاقات
حسام تقدرو تتصورو حجم الصدمه اللي كنت فيها، ماعرفتش نفسر كلامها اللي ليه أكثر من تفسير ولا عرفت نفرح بيه أو نأخذ موقف منه، قعدت واقف مستك، لحد مارن تليفونها وكسر الحاجز اللي بناته بكلامها
دنيا كنت عارفه أنه كلامي راح يضايق حسام بس فعلا علاقتي أني وياها تختلف عن العلاقه اللي بين أيه ومحمد، كلامي مش القصد أني نشكك في صدق مشاعره ونيته الحسنه إتجاهي بس كان كلام عفوي طالع بطريقه منطقيه بعض الشي، طلعت تليفوني من جيبي وتنهدت بضيق لما شفت مؤيد، وكأنه ماكان ناقصني إلا هوا، فتحت الخط وأني نتحاشي النظر لحسام اللي قدر يشوف أسم المتصل لأنه قريب مني نوعا ما: أهلين يامؤيد، تمام الحمدلله، كيف حالك أنت وخالتي وإنتصار؟ أها لا واللهي خليها مره ثانيه اليوم عمي مروح من بنغازي وهكي مانقدرش نمشي، تمام خلاص أني نكلم خالتي لو نبي، بإذن الله، سلام
سكرت وأني من قبل ماننهي كلامي كنت نفكر كيف نهرب من العيون البركانيه اللي قدامي، إلا أنه إيده اللي شدت إيدي وسحبت التليفون كانت أسرع مني
حسام، بغضب😠: أنتي كيف تخزني رقمه في تليفونك، وأصلا بأي وجه حق يتصل بيك وأنتي كيف تردي عليه، ولا وتحكي عادي تقول خوك وأني مانعرفش
دنيا، بعصبيه😡: أنت شني تقول مخزنه رقمه زي مامخزنه رقمك، ويتصل ونرد عليه لأنه ولدي خالتي زي ماأنت ولد عمتي مافيها شي يعني
حسام، بصدمه😯: نفهم من كلامك أني وياها واحد يعني، متساويه كفتي معاه عندك!! وتكلمت بغضب وأني نشوف فيها ساكته وتحك في إيديها ببعض بتوتر،: زيدي لبزي وخربي اللي قاعد نبني فيه يادنيا زيدي، وقعدت نفتش في التليفون على رقمه، وزاد غضبي لما شفت هلبا مكالمات منه وأخر واحده إمبارح مسحت أسمه وحطيت رقمه في الحظر، وقمت رأسي وبحده: قسمآ بأيات الله مازال نشوف رقمه في تليفونك هوا أو واحد غيره مش راح يصير طيب يادنيا، الحلال تعرفيه معاي أني بس
دنيا عارفه أنه كلامي مش غلط بس الطريقه والتوقيت اللي إنقال فيه كان هوا الغلط، قررت نسكت باش مانزيدش نعقد الأمور أكثر، خذيت تليفوني من إيده ومشيت خشيت للحوش بسرعه
حسام خبطت رجلي في الأرض بغضب، مش عارف شني اللي حسيته بكلامها يمكن هوا عادي وإنقال بعفويه بس أني من يومين جوي مش صافي ومش متحمل شي وهيا قاعده تعاكس فيا في كل شي وزايده مصعبه عليا الحياه أكثر، زفرت بغضب وأني نشوف لتليفوني اللي رن بنغمة مسج، فتحتها ” قرب اللقاء” من يومين وهالكلمتين يوصلو فيا بإستمرار وكل مره من رقم شكل رنيت على الرقم وطلع مقفل حطيت تليفوني في جيبي وخشيت وأني نستغفر
^^^^^^^^^^^^^^^^^^^^^^^^^^^^^^^
ناجيه، بهزوه😏: قالتلك لا وله!!
مؤيد قعد ساكت ويشوف للتلفزيون
إنتصار وهيا تصب في الشاهي: أصلا دنيا قالت أنها راح تتكلم بروحها لو تبي إتجي
ناجيه، بأسف😞: ربي يهديك وتحول هالموال من رأسك وتهنينا وتهني روحك
مؤيد، بغضب😠: مانيش محوله باهي وتوا تشوفو مني اللي كلامه يمشي في النهايه، وخذي تليفونه ومفتاحه وطلع من الحوش
ناجيه شافت لإنتصار اللي تنهدت بضيق، وهزت رأسها بأسف😞، وهيا خايفه من تسكير رأس ولدها
^^^^^^^^^^^^^^^^^^^^^^^^^^^^^^^

 

 

 

 

حسام، بضيق: وهذا اللي صار ياأمي قصه ولا في الأفلام الهنديه
سعاد، بحزن😔: ربي يهديهم ومايلحقو عليها حتى إهنايا
مصطفي: لاحول ولاقوة الابالله العلي العظيم، من يوم يومنا نعرفوهم خوت الهادي واعرين وعقليتهم متشدده
دنيا، بأسف😞: بس مهما كان تشددهم ياعمي، مش لدرجة القتل على شي تافه وهما مش متأكدين منه
سعاد، بحزن😔: والله ماواجعني كان محمد ياناري الولد إنطمس لا فرح ولا شي، ربي يهديه حتى خوي كيف يظلم وليده ويصدق حاجه مش متأكد منها، والحق حتى البنيه مش ليه بكل إنظلم ياروحي( كانت قصدها من ناحية الشكل لأنه أيه سمرا شويه وملامحها عاديه مقارنةٌ بمحمد اللي أقل مايقال عنه أنه جميل وجذاب)
بس عمره ماكان شكل الإنسان أو مظهره الخارجي مقياس لجماله أبدا، البشاشه، والخلق الحسن، والكلمه الطيبه، والقلب الطيب، والروح الحلوه واللي كلهم مجتمعات في شخصية أيه هما الجمال الحقيقي لأي إنسان
حسام وقف، وبضيق: يلا اللي صار صار وإن شاءالله ربي يهنيهم، وتكون علاقتهم ناجحه زي ماتوقعو بعض الناس، وشاف لدنيا بنص عين😒 وطلع
دنيا تنهدت بملل توا شني مازال بيسكته وهوا كان شد على حاجه سلامتك
راهو مش أحني البنات بس النكديات اللي نشدو الحاجه معاش نطلقوها، راهو حتي أنتم الشباب أحرف وأحرف كانت علقتو على كلمه تبيلها شني ينسيكم فيها
^^^^^^^^^^^^^^^^^^^^^^^^^^^^^^^
أحمد اللي كان راقد إستغرب لما خشو عليه أهله، وناض وهوا متوتر ماكانش عارف ولا حاسب حساب أنهم راح يروحو اليوم، طلع دار دوره في المخزن وتأكد أنه كل شي مدرق كويس وخش لم حوايجه وهوا مقرر أنه راح يطلع الليله هوا وبضاعته لمكان ثاني، بس قعد يفكر وين راح يمشي إستراحة حسن ولت مشبوهه والأنظار عليها وهوا مايعرفش حد ثاني ممكن يوثق فيه ويأمن على روحه وبضاعته عنده، وبعد تفكير خطر على باله شخص وقرر أنه يتصل بيه مرات يستقبله
أما محمد ف خلا أيه مع أمه تطمن منها على بوها وأمها وخواتها شني صاير فيهم بعد اللي صار، وهوا مشي لعادل يحمدله بالسلامه، وماقدرش يعطل في حوش أهله لأنهم راح يمشو لحوش عمه يتغذو غاذي وأكيد مش راح يمشي لا هوا ولا أيه بعد اللي قالاته علا، ف خذي أيه وروحو وطول الطريق الصمت هوا سيد الموقف بينهم ومافيش حد منهم علق على اللي صار أو ذكر أي موقف من مواقف العيله، وصلو للشقه ونزلو ولأنه كان اليوم جمعه ومافيش مطعم مفتوح فكان الغذي سندوتشات
أيه: ياريت كان فيه إماعين وحاجات في المطبخ راهو درت شي ثاني
محمد: عادي مش مهم، ومرات مانقعدوش إهنايا هلبا خلي إنشوفو الوضع قبل
أيه، بإستغراب🤔: علاش وين بنمشو إمالا نعرف أنه شقتك اللي فوق أهلك مش كامله
محمد أبتسم😊 أول مره تتكلم معاه بصفة الجمع: أي صح مش كامله، بس أنتي عارفه أنه هالشقه لدنيا وهيا عطتهالنا مؤقت يعني، بس راح نشوف لو راح نقعدو فيها توا إندير عليها دوره، ونجيبلك إماعين إن شاءالله غير تعرفي إطيبي بس😏
أيه، بثقه😌: أنت غير جيب بس وتوا تشوف، نعرف كل شي الحمدلله
محمد، بشك🙄: ياودي عندي شك أمتي تعلمتي وأنتي من لما صغيره نعرفك شاديتها على الكوره والبلاستيشن، مش من طموحاتك تولى ست بيت
أيه أبتسمت لمحمد اللي واضح أنه قاعد مذكر شويه تفاصيل بينهم من أيام الطفوله، هيا فعلا لما كانت صغيره تقول في هالكلمه بإستمرار، نزلت رأسها للسندويتش اللي في إيدها: ماتخافش من سنوات تغيرت فكرتي للحياه ومن ظمن التغييرات كانت طموحاتي هيا الأولى
محمد، بضيق: وليش تتغير مادامك قادره، أنصدمت لما عرفت أنك تخصصتي لغه عربيه، وين كلامك أنك راح تكوني كابتن طياره وتلفي العالم كله
أيه، بأسف😞: بوي وعمامي ليهم سبب كبير في هالتغيير، بس يمكن عندهم حق طموحاتي ماتناسبش مجتمعنا أو البيئه اللي عايشين فيها غالب
محمد: هوا توا معاش فيه شي مش مناسب العلم والنجاح مش مختصر على بيئه أو مجتمع، بس الله غالب عقلياتنا هيا المتخلفه شويه، عندنا المرأه ليها مكانات محدده، ممنوع تتخطاها، وأبتسم: بس كويس حتى تخصصك حلو، ممكن نشوفلك مدرسه كويسه، وعملك في التدريس راح يناسبك أكثر في المستقبل وراح تشوفي
أيه، بصدمه😯: قصدك راح تخليني نشتغل!!

 

 

 

 

محمد، بإستغراب🤔: أي عادي وين المشكله يعني في أنك تشتغلي!!
أيه نزلت رأسها، بأسف😞: مش مشكله بس بوي ماكانش راضي أني نشتغل وقالي راجلك هوا اللي يقرر، وبغصه مكتومه: وهوا قالي المرأه مكانها الحوش ومسؤولياته المنزليه تكفيها
محمد، تنهد بضيق ماكانش يبيها تذكره بأي شكل كان هوا ماصدق أنها تنسي وتهدأ شويه، أبتسم😊 وهوا يرقص في حواجبه: هذاكا قبل بس توا هلبا حاجات بيتغيرو معاي وبإذن الله التغيير راح يكون أفضل
أيه أبتسمت على حركته وهيا تمسح في الدموع اللي عالقات بطرف عيونها
كانت هالقعده الأطول بينهم من لما إنربط مصيرهم ببعض نتيجه للحكم الظالم لغيرهم،
رغم أنه الأيام اللي فاتو كانت بينهم أحاديث قصيره، بس كان حزن وبكاء أيه هوا الغالب الأساسي على كل الحديث واللي ينتهي في الأخير بإنسحاب أيه نتيجه لإنهيارها لما تذكر اللي صار معاها
بس هالمره كملو كلامهم بهدوء وأبتسامه حلوه مزينه وجه كل واحد منهم
” بدايات هادئه جميله لأرواح نقيه، ربما تكون منعطف لمستقبل أجمل وأسعد ”
^^^^^^^^^^^^^^^^^^^^^^^^^^^^^^^
بعد الغذي في مربوعة مفتاح
المبروك قعد يحكي في اللي صار معاهم، ورغم أنه كان مصدق الصور إلا أنه حاول يبين قدام خوته أنه واثق في ولده اللي متربي ومستحيل يدير شي زي هذا وأنه أكيد فيه حد حاقد عليه ومفربك الصور
بشير، بإستغراب🤔: مش عارفه موضوع مايخش الرأس بكل
المبروك، بغضب😠: شني اللي مايخشش الرأس تكذب فيا عيني عينك
مفتاح، بضيق: مش هكي يالمبروك بس القصه كلها مش راكبه، نعرفوه محمد من قبل هادئ وعلى حاله ماعنداش عداوه مع حد مني اللي بيدير فيه هكي، إلا إذا كان هالشي صاير فعلا
المبروك كان شبه متأكد من الكلام اللي قاله مفتاح، إلا أنه ماقدرش يتحمل شك خوته في ولده، ونظرتهم المكذبه للكلام اللي قاله، وبعصبيه😡: أني قعمزت وحكيتلكم اللي صار من باب الإخوه والإحترام اللي بينا، وإلا مافيش حد ليه الحق يقول أي كلمه أو حتى يحاسبني ولدي تزوج على سنة الله ورسوله وأني يشهد الله عليا أني كنت خايف على البنت تريح فيها وإلا أني ولدي راجل ومايعبه شي في النهايه بكل، وقف وطلع وهو معصب
بشير بهزوه😏: قالك راجل والصور ملعوبات، شفت محمد العاقل مايطلع منه شكلها القصه أكبر من هكي باش قراله فاتحته ولم الموضوع
مفتاح اللي كان متمني وعنده أمل أنه محمد يأخذ علا بنته كتم غيضه وهوا متحسر هلبا من اللي صار، وشاف لبشير بضيق
^^^^^^^^^^^^^^^^^^^^^^^^^^^^^^^

 

 

 

بعد ثلاثه أيام اليوم موسم العيد الأضحي
دنيا من هذاكا اليوم وعلاقتي أني وحسام متوتره شويه هوا مولي حساس من أبسط شي، أمس مامشاش للمحل بس جاته رساله ولما شافها تغيرو ملامح وجهه وطلع بسرعه، ولما كلمته تحجج أنه قاعد جنب الولاد ومايقدرش يتكلم، شكله كان عارف أني حاسه بشي لهذا كان يتعمد يروح مؤخر باش يضمن أني نكون راقده ومانكلماش وحتى اليوم تتكرر نفس الموقف لما نزل من فوق وهوا طالع للمحل وقف يكلم في عمتي وصله مسج شافه وطلع بسرعه من غير ماينتبه لعمتي اللي قاعده تتكلم، ممكن أي حد يعتبره موقف عادي بس حاسه بأنه غريب شويه وخصوصا ملامحه اللي يتغيرو فجأه وكأنه اللي قرأه قلقه وخوفه، وأني في وسط شرودي رن تليفوني أيه اللي شرالها محمد تليفون من يومين لأنه تليفونها الأول قعد في حوشهم بعد اللي صار، وأول واحده كلمتني أني، أبتسمت😊 وفتحت الخط: أهلين ياصباح الورد
أيه: أهلا صباح النور والسرور، سامحيني شادتها في جرتك هاليومين بس مكسده وماعندي على مني نهدرز، واخذه على خواتي قبل
دنيا بالعكس واللهي حتى أني مكسده زيني زيك، خيره ماتجيش تهدرزي علينا في الحوش
أيه: محمد قال مايبيش يحتك بالعيله هلبا الفتره هذي، بس غذوه عيد أكيد حانجو
وقعدنا نهدرزو قرابة النص ساعه فعلا أيه وجودها مميز وحلو في حياة أي حد يعرفها
^^^^^^^^^^^^^^^^^^^^^^^^^^^^^^^

 

 

 

 

في السياره مقعمزين محمد وحسام تحت عمارة المرحوم سعيد واللي محمد ساكن في واحده من شققها
محمد، بحيره: شي يحير الزفت شفت حد يطلعلك بمني أسماء الشفرات
حسام، بضيق: كلمت حاتم وعطاني رقم واحد صاحبه كان يخدم معاه قبل في الشركه، كلمته وقالي كل رقم طلع بإسم وكلهم أفارقه ومصريين
محمد، بقلق: باهي إذكر بالك عندك حد متعارك أنت وياه ولا في بينكم شي
حسام بتفكير🤔: مافيه حد الزفت أمتي روحت أني باش إندير عداوه مع حد، تي حتى صحاب ماعندي تشوف فيا، وبعدين أني مانعرف حد في طرابلس
محمد، بضيق: مش ضروري في طرابلس ياحسام مرات في مكان ثاني، إذكر مش معادي حد من قبل حتى وين كنتو تسكنو في الجبل
حسام شد رأسه بإيديه: دماغي بيتفجر من التفكير يامحمد الزفت مش عارف ولافاهم شي، مني هذا وشني يبي مني!! تعرف مرات نقول ياريتني ماروحت ماأستريحتش يوم واحد، والله العظيم لولا دنيا اللي مربطه إيديا ورجليا راهو من لما مالقيتش عمل هجيت على طول، بس هيا كاسره ظهري يامحمد كاسره ظهري نمشي ونخليها لمني وأني عارف أنه الكل طامعين فيها وماحد يبي مصلحتها، وقعد يخبط في رأسه بالدومان
محمد تنهد بضيق: لوح عليك ياحسام شني هاللي إدير فيه، وقدم وشده من كتافه وتبثه باش يبطل خبط لرأسه، وبأسف😞: هونها وتهون ياراجل مانعرفكش ضعيف هكي، مرات واحد فرخ يلعب معاك راهو يبي يخوفك وخلاص ماتحطش شي في بالك، خوذ حذرك وبإذن الله مش راح يصير إلا كل خير
حسام، بحزن😔: عندي أحساس بعكس اللي تقول فيه، بس نتمني كلامك يطلع صح ومايكونش الموضوع إلا لعب
محمد، بإبتسامه😊: صدقني مافيش حاجه كبيره تخليك تخاف هكي، مانحسابكش جبان لهالدرجه كلمتين يديرو فيك هذا كله
حسام، بضيق: أنت عارف أني مش خايف على روحي يامحمد اللي خالق الرأس قاطعه بس خايف عليها هيا وعدتها مانسيبهاش لو شني ماصار وعدتها نحميها من الكل، وعدتها نكون جنبها في حزنها قبل فرحها نشيل الحمل عنها نقعد ماسك يدها طول العمر كيف ممكن نرضي بأني نمشي ونسيبها، وبرجاء🥺: باللهي يامحمد لو صارلي شي هيا أمانه عندك، رد بالك منها باللهي راهو أمنتها عندك
محمد، بحزن😔: تي تعوذ من الشيطان ياراجل شني اللي تقول فيه هذا، باللهي فكنا من هالسلبيات دموعي بينزلو الزفت، وتلفت للروشن يحاول يخبي لمعة الدموع اللي بانت في عيونه
حسام، بضيق: إنزل خليني إنروح بالك نحصل نرقدلي ساعه قبل المغرب رأسي بيتفجر من الصداع
محمد، بأسف😞: توصل رن عليا، ورد بالك باللهي خليك مخنس كويس، نزل محمد لما حسام هز رأسه وأشرله بإيده وقال: في أمان الله
حسام بعد مابعد شويه درس على اليمين وأنهار بالبكي من الضغط اللي قاعد يكتم فيه في قلبه، أكثر شي يفكر فيه لو صار فيه شي لمني راح يخليها مني راح يأمنه عليها وهوا عارفه أنه مستحيل يضرها، حتى محمد مهما دار فهو مش راح يقدر يدير شي لأنه متزوج وفي النهايه تكون بنت عمه وهوا ماليشي سلطه عليها، ومايقدرش يوقف قدام على حد على خاطرها ولاعنده القوه الكافيه اللي تخليك يواجه بوه وعمامه لو واحد منهم دار شي، بعد مافرغ الشحنه السلبيه اللي في داخله تنهد بضيق وولع سيارته ومشي
^^^^^^^^^^^^^^^^^^^^^^^^^^^^^^^
سعاد من المطبخ: يادنيا شوفي الباب كأنك فاضيه
دنيا كانت طالعه بسلة الحوايج من الحمام (أكرمكم الله) حطتها على جنب ومشت للباب اللي يطق: باهي ياعمتي أهو بنشوف مني، فتحت الباب وتفاجأت بعادل اللي واقف قدامها
عادل بإبتسامه😊: السلام عليكم كيف حالك يادنيا؟
دنيا: كويسه الحمدلله كيف حالك أنت؟ وقعدت نشوف لرجليه بإستغراب🤔 مش قالو رجله مجبسه وينه الجبس!!
عادل، بإبتسامه😊: الحمدلله وليت أحسن، كنت في العياده نحيت الجبس وأول حد خطر عليا نشوفه هوا أنتي جيتك طول، وبلوم: معقوله إندير حادث ونتجبس ونرقد إسبوعين ومانشوفكش بكل، ولا قلتي نحمدله على السلامه حتى بالتليفون، هذا غير أحني في حسبة المخطوبين
دنيا طلعت وجبدت الباب مانبيش عمتي تسمع، بصدمه😯: أنت شني تقول!! أي مخطوبين هذي منين جبتها، وبعدين من قبل مافيش بيني وبينك كلام إلا لو تقابلنا صدفه أو مع العيله، وبأي صفه تبيني نخش ونحمدلك بالسلامه قدام بوك وخوتك، مافيش صفه تربطنا إلا أننا ولاد عم وبس، وبالنسبة للموضوع اللي فتحه عمي أعتبره أنتهي أساسا وأني راح نعطيه علم عن قريب
عادل، بغضب😠: لا واللهي ليش هوا الموضوع لعبه في الأول شبه وافقتي وليك فوق الشهر تفكري وبعدين تجي وتقوليلي أنتهي، أنتي كيف تفكري بالضبط، ومنين مخلوقه من الأساس
دنيا، بحده: عادل لو سمحت ماتخلينيش نغلط فيك وخلي يكون فيه بينا شوية إحترام زي قبل، أني ماوافقتش ولا حتى لمحت بالموافقه، اللي خلاني نسكت ونطلب وقت للتفكير في الموضوع اللي مافكرتش فيه ولا لحظه أصلا، هوا أصرار عمي على الموضوع تحشمت من أني نرد راجل كبير في عمره برفض قاطع من أول مره، بس أهو نقولك فيها أنت، طلبك مرفوض من الأساس والموضوع مش قابل للنقاش نهائي
عادل، بغضب😠: معقوله تضحكي عليا وتعشميني وتخليني نحلم ونخطط لكل شي وبعدين تقوليلي لا بكل سهوله أي قلب عندك، ولا في حد ثاني عندك قولي مانعرفكش تخافي أو تتحشمي من قبل
دنيا بحده: أني لاضحكت عليك ولاعشمتك، مش ذنبي إذا كنت أنت مغفل وأنجريت وراء أحلام ورديه بنيتها أنت بروحك وماليهاش أي أساس من الصحه، وبعدين عندي واحد ولا ميه هالشي مايخصكش نهائي مني تكون باش نخاف منك أصلا، لو سمحت ماتخليش الحاجز بينا يكبر أكثر وخليك كيف مانعرفك، وتلفتت بتخش إلا أنه عادل شده من إيدها بقوه

 

 

 

 

دنيا نفضت إيدي منه بقوه، وبحده: هياااااا أنت وين تحساب روحك رد بالك تفكر تمدها إيدك مره ثانيه فاهم!!
عادل بهزوه😏: صدق حسام من قبل لما قال أنك واحده ماتنفعيش وفاجره زي أمك ومستحيل تكوني خير منها، ولاتحسابي أننا ماكناش عارفين أمك شني كانت إدير لا أحني رجاله ومايدرقش علينا شي، وطريقة موتها كانت كفيله أنها تبين كل شي بس ربك يحبها والسياره والراجل اللي كانت معاه أختفو بلمح البصر وإلا كنتي شفتي كيف قعدت سيرتكم على كل لسان وجبتولنا العار
دنيا إنفتحو عيوني بصدمه😲 من كلامه قال حسام صح!! معقوله حسام هكي ظنه فيا هكي يقول عليا لا مستحيل أكيد يكذب، بس شني مصلحته باش يكذب عليا، وموضوع أمي اللي كانت نحساب روحي أني بس اللي نعرفه وتكتمت عليه طلعو عارفينه وساكتين، معقوله حتى حسام كان يعرف!!، حاسه بعيوني ضببو والرؤيه بدت أظلم عندي مديت إيدي للباب نحاول نسند عليه
عادل اللي لاحظ هالشي مد إيده وسندها بسرعه، وبخوف😟: دنيا أنتي كويسه!! نجيبلك إميه!!
دنيا جبدت روحي وقعمزت بهدة حيل على الدرجه اللي قدام الباب، وقعدت نشوف للفراغ وأني نحاول مانصدقش اللي سمعته
عادل تنهد بضيق وقربز قدامها وبهالشكل ماكانوش قادرين يشوفو حسام اللي خش وأول ماشافهم بهالشكل، عصب وتوجه بسرعه جيهتهم، وبعصبيه: أنتم شني إديرو مع بعض!!شني إدير إهنايا ياعادل!!
عادل وقف وأبتسم: اليوم فكيت الجبس وجيت نسلم على دنيا، وأنتبه لتليفونه لقاها أمه، إستاذن ومشي وهوا يقول بإبتسامه😊: ردي بالك على روحك يادنيا، نكملو كلامنا في موضوعنا مره ثانيه، ومشي لحوشهم
حسام ماعرفتش كيف قعدت ساكت ومادرتش أي ردة فعل كل نظري كان عليها هيا نستني في تبرير للي شفته منها، قربزت قدامها وبغضب😠: شني كنتو إديرو يادنيا!! شني اللي بينكم!! شني هوا الموضوع اللي بتحكو فيه!! أصلا شني اللي يربطك بعادل من الأساس!! تكلمي يادنيا تكلمي ماتزيدينيش أكثر على اللي فيا
دنيا شفتله بحده: كلكم حقراء وأولهم أنت، ونضت وقفت وخشيت بسرعه
“ربي علمني!! كيف لاتبكيني خيبته… كيف لايكسرني خذلانه… وكيف لايقتلني ظنه بي… وكيف لايموت قلبي من جرحه”

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية طفلة أرهقت قلبي)