رواية طفلة أرهقت قلبي الفصل الثاني 2 بقلم عائشة البشير

رواية طفلة أرهقت قلبي الفصل الثاني 2 بقلم عائشة البشير

رواية طفلة أرهقت قلبي البارت الثاني

رواية طفلة أرهقت قلبي الجزء الثاني

رواية طفلة أرهقت قلبي الحلقة التانية

كان اللقاء لحظات… لماذا شعرت وكأن قلبي أزهر مائة عام
حسام فاتو أسبوعين ومن هذاكا اليوم معاش شفت دنيا، أو بالأصح معاش تلاقيت معاها فعليا، لأني كل يوم الصبح نراقب فيها من البلكونه لما تطلع للباص، كنت مفكر أني لو تجاهلتها ممكن نقدر نسيطر على روحي شويه، بس ماكنتش عارف أنه في بعدي عليها قاعد نتعلق بيها أكثر😔💔
سعاد، بصوت عالى: تي وينك ياحسام مرت خالك من بكري تتصل وتعاود يستنو فينا
حسام من فوق، بملل😪: أهو نازل ياأمي
سعاد،بضحكه😁: قبل نعرفو البنات اللي يأخذو ساعه باش يوتو روحهم، أما الولد يأخذ ساعتين جديده هاذي !!
حسام 🤨: لاساعه ولاساعتين لمني بنوتي روحي لخالى ولا لمرته😒، من بكري نحاول نرقد مش جايني نوم، وبعدين مش عشي هوا علاش ماشيين من توا حتي المغرب قاعد ما أذن
سعاد: والله سالمه مرت خالك من بكري وهيا تتصل وتقولي القهوه واتيه نستنو فيكم، تحشمت منها
حسام: واللهي موضوع !! هالعزايم اللي درتوهولي هاذم، خلاص راهو معاش طالع لحد، الليله أخر ليله
سعاد، تعد على صوابعها وبتفكير🤔: خواتك ومشيتلهم وحاتم وعزمك وعصام وعامر ولاد خالك وعزموك وخوالك الثلاثه عزموك، مازال كانش خالك سعيد هذاكم ماأعتقدش يعزموك أصلا هما حتى قعاد في الحوش مايقعدو باش يعزمو حتى الناس، ياناري والله ماواجعتني إلا دنيا قاعده مكبوبه في هالحوش بروحها، قريب تجيها حاله نفسيه تسخف☹

 

 

حسام لازم تذكريها في كل موضوع ياأمي، بتساؤل😕: خيرها معاش تجيك هيا !! مش كانت ديمه عندك؟
سعاد، بتوتر😧: هذاكا اليوم كلمتها قالت تتحشم معاش تقدر تجي زي قبل مادامك أنت قاعد
حسام معقوله حشمه🙄، ولا كارهتني لهالدرجه وماتبيش تشوف وجهي😓، ااااف ياحسام حول هالأفكار من رأسك خلاص بتنجن، تنهدت بحزن😔: من بداية الإسبوع بنبدأ نخدم في محل واحد صاحب عادل، لين نحصل عمل بشهادتي في هالبلاد متاع الواسطات، خلاص تقدر تجيك براحتها
سعاد، شهقت لما رن التليفون: هيييييي هذي سالمه، خدتنا الهدرزه ونسيتها، هيا نطلعو مش لازم إنرد عليها
حسام ياعليك سريب عندهم هالنسون، اللي يتبعهم يتعب😓، طلعنا وطول عيوني أتجهو لحوش خالي للمنور بالضبط تمنيت إنشوفها مقعمزه، اليوم جمعه ماشفتهاش الصبح وحاس روحي مستاحشها😔💔
سعاد، بتساؤل: زعما خالك سعيد قاعد، خلي إنشوفوهم بالك يمشو معانا؟
حسام، بشك: مرات ماعزموهمش ياأمي !!
سعاد توجهت لحوش سعيد،: تي غير خلي نشوفوهم أحني ووقفت قدام الباب الخلفي للمطبخ وقعدت أطق
حسام آآآآه ياأمي حتي أنتي ضدي، وقفت جنبها وعيوني تابتات على الباب كنت متوقعها هيا اللي تفتح، بس خاب ظني لما فتح خالي😞
سعيد، بإبتسامه😊: أهلا وسهلا، تفضلو تفضلو
سعاد، بإبتسامه😊: أهلين بيك، كيف حالكم؟؟
سعيد: الحمدلله بخير، تي هيا خشو بتقعدو واقفين ع الباب
سعاد: لا مره ثانيه، غير مفتاح عازمنا على العشي على خاطر حسام، قلت نشوفكم بالك تمشو معانا !!
سعيد، بتفكير🤔: أي واللهي كلمني الصبح، لكن مازال وقت العشي
حسام😏: هات من يفهم ياخالي من إمبكري وأني نقول مازال لكن شي مستعجلين ع القرمه ماكش غابي فيهم النسون أنت😉😆

 

 

سعيد، بضحكه😅: هذا إختصاصهم في الحياه، يورو في إبدعاتهم ماشاء الله
سعاد، بغضب😠: تسهوكو أنت وياه توا، الحق مش فيكم الحق فيا اللي واقفه نسمع فيكم، وبعدين المفروض تفرحو نخاففو عليكم في شوية ذنوب😌
حسام وسعيد أنفلقو بالضحك على كلام سعاد🤣😂
سعيد، بضحكه🤣: والله أنتي ياأختي ماك عاديه، معترفه ومفتخره باللي إديري فيه
حسام، بضحكه😅: الإعتراف بالذنب فضيله تي خيرك ياخال😁
دنيا كنت في المطبخ إندير في كيكه بس لفت إنتباهي صوتهم يضحكو وفضولي خلاني نقدم جيهتهم
دنيا، بإبتسامه😊: عميمه كيف حالك تفضلو خيركم واقفين برا
حسام تنحت وحاس بدقات قلبي بدت مسموعه لما شفتها 😍 شني دارت فيك هالطفله ياقلبي بس
سعاد اللي كانت معصبه من تسهويك سعيد وحسام، شافت لدنيا وإنفلقت بالضحك😂: بإسم الله يابنيتي خيره وجهك
سعيد تلفتت لدنيا، وإنفلق بالضحك😂: الشوكولاته يابنتي تحطيها فوق الكيكه مش فوق وجهك، شني هذا؟
حسام تي هيا في حد ذاتها كيكه ياخالي منظرها يشهي🤤، ووجهها اللي ملبز بالشكولاته مخلي منظرها عذاب🙈💗
دنيا تحشمت وحسيت منظري بايخ وبالأخص قدام حسام اللي واقف ويوزع في إبتسامات زي الأهبل، خشيت بسرعه ومسحت وجهي، وقعدت في المطبخ
سعاد من برا، بصوت عالى: يادنيا تعالي بعدين مع بوك لحوش عمك، حتي تغيري جوك ماتقعديش بروحك يابنيتي، وتلفتت لسعيد🤨: جيبها معاك بعدين ماتخليهاش بروحها
دنيا، من المطبخ: حاضر ياعميمه على خاطرك بس راهو
سعاد، بإبتسامه😊: يسلم خاطرك يارب، وتلفتت لحسام اللي فعلا واقف زي الأهبل وقاعد مبتسم حتى بعد ماخشت دنيا، وبإستغراب🤔: شني عجباتك الوقفه هيا أهي مرت خالك تتصل من جديد😬
حسام لازم ينكدو على الواحد تي كنت سارح وفرحان خلوني شويه الزفت😒، على شني فرحان باللهي على عقلك اللي طار 🤯!! طار ولا فر شني دخلك أنت🙄 المهم فرحان بشوفتها وخلاص😍، وبنرفزه: باهي ياأمي سالمه والقرمه مش هاربه، وتلفتت لخالي، وبصوت عالى شويه نبيها تسمعني: ذوقونا منها الكيكه ياخالي، أختك لاهيه في تخفيف الذنوب مش فاضيه للكيكات😉
سعيد، بضحكه😅: حاضر ولايهمك
سعاد، مديت أيدي وضربت حسام على كتفه، وبغضب😠: باهي ياللي ماتتحشم، زيد تسهوك زيد🤨، ومشيت وخليته واقف زعميتني متكنطيه😆

 

 

سعيد ، بخوف😧: حيييي حرجت شكلها !!
حسام😉: مايهمكش فيها الحويجه دواها عندي، وبصوت عالى: غير ألهونا بالكيكه بس😅، ومشيت نجري بنلحق على أمي اللي شكلها ركبت طياره، ومعاش لحقت عليها إلا قدام حوش خالي مفتاح اللي كان أخر حوش في الحوازه، تي كيف وصلت بهالسرعه😰 هذا غير ركابي وركابي😅
دنيا إبتسمت على كلام حسام وحسيته عادي ماحطيتش في بالي شي، بس مستغربه شويه من معاملته ليا هالمغرور عكس ماكنت متوقعه بكل، خيرك عليه يادنيا قبل الولد كان صغير وطايش توا إكبر وإعقل
سعيد، بإبتسامه: سمعتي ولد عمتك ولا لا، خليله من الكيكه راك تنسي !!
دنيا: حاضر يابابا، بس مش المفروض حتي أحني أعزمناهم يوم !! العيله كلهم عزموهم
سعيد: واللهي حتى أني فكرت في الموضوع، بس تشوفي في أمك حتى يوم الجمعه مش فاضيه ولا قاعده في الحوش، كيف بتعزمي ضيوف وصاحبة الحوش مش موجوده
دنيا: نعزموهم على العشي ومعليشي هذاكا اليوم ماما تروح بكري شويه مش راح تخرب الدنيا، غير أنت كلمها في الموضوع وشوفها؟؟
سعيد،بتفكير🤔: إن شاءالله خير، أني في المكتب بعد المغرب نمشو لحوش عمك باش توتي روحك
دنيا هزيت رأسي بالإيجاب لبابا وكملت تزيين الكيكه🙂
عادل، بفرحه☺: وأني نقول خيره الحوش منور تاريته حسام عندنا، تي هكي تخلينا نستاحشوك ياحبها😉
حسام، بضحكه😂: بطل براده الزفت، الظهر كنت معاك أمتي لحقت تستاحشني يامريض
عادل، بحزن😔: تي غير سايرني وقولي أستاحشتك حتى بالكذب، وقربت ولصقت في حسام وشديت أيده، وبإبتسامة😚: ولد خالك عنده جفاف عاطفي حاد، حد يحن عليا الزفت
حسام نفضت أيدي من عادل وبعدت عليه، بضحكه😅: تي برا يامريض ان شاءالله تبرأ وخلاص، ربي يحن عليك مش أني
حسام قعدت نهدرز أني وعادل وبعد المغرب جي محمد، وعصام وعامر خوت عادل، وسامر وسامح
عادل، بإستغراب🤔: أمالا وين أحمد يامحمد
محمد: والله ماني عارف عليه مايبطلش لودان، وين سعد ياسامر؟ أكيده مع بعض !!😕
سامر، بإستنكار🙁: حتي أني والله ماعارف عليهم من الغذي معاش شفتهم
عامر🤨: أحمد قداش مره نشوف فيه في القهوه وشكله مش عاجبني راهو رد بالك من خوك يامحمد ولا قول لعمي يشحط الخيط شويه من جيهته

 

 

محمد، بملل😪: تي فديت وأني نجري في جرته معاش لهيت في عمري بكل، بوي كلمته كم مره يقولي خليه معاش صغير باش بنجري في جرته، والله ماعارف شني بندير معاه هالفرخ
عادل، بهزوه😏: راهو خوك حالته ماطمنش وحتي أني شابحه كم من مره مش طبيعي، أهم شي يبعد على دنيا……. وسكتت لما نسمع في علا تنادي
علا تنادي من الباب اللي يطلع للجنان الخلفي: عادل قتلكم أمي تعالو قعمزو معانا الداخل حاطه العاله كان بتشربو الشاهي
حسام أنتباني الفضول من وضع أحمد شن قصدهم بالكلام🤔، وركبني الخوف لما عادل ذكر دنيا في الموضوع، زعما دارلها حاجه قبل هكي وليش حاس عادل مهتم بيها معقوله فيه حاجه بيهم، هلبا أسئلة تبيلها إجابات مقنعه بس سكتت وأجلتها شويه مش وقتها، وطول رجعت الإبتسامة لوجهي😊 أول مادخلنا وشفت دنيا مقعمزه جنب أمي وتضحك، والله حالتك تصعب على الكافر ياحسام، تحقه وما طقه😅
عادل، بفرحه☺: أهلا وسهلا انستينا يادنيا، أمالا وين عمي؟
دنيا، بإبتسامه😊: أهلين ياعادل واللهي على أساس جايين مع بعض بس جاه إتصال ضروري، وصلني أهنايا وطلع
سامح، بهزوه😏: تعرفي لمني إتجي يادنيا، وخيرنا أحني حوشنا مايشرفش ولا كيف
عادل، بغضب😠: والنبي ضم فمك انت أمتي طلعلك لسان ياعيل، وتلفتت لدنيا وغمزتلها بنظره متاع ماتعدليش عليه
حسام كنت نراقب في كل شي، شني اللي قاعد يصير !! صح أش معنى الليله دنيا جت خيره لما مشينا لخوالي التانيين مابتش تجي🤔، إن شاءالله غير اللي في بالي مش صح بس😔
شربنا الشاهي وتعشينا وأني جوي مش تمام، طول الوقت عيوني عليها وبس وكأنه مافيش حد موجود غيرها، بصراحه مش عيوني أني بس العيون كلها عليها هيا ملفته للنظر بكل تفاصيلها، مضايقني هالموضوع ومعصبني بس مش قادر نتكلم، ماعنديش حق😓
دنيا، بإبتسامه: عادل ممكن توصلني للحوش، بابا شكله معطل
محمد: خليك يادنيا لين يجي عمي خير ماتقعدي في الحوش بروحك
دنيا: لا خلاص وقت وبعدين ماما أكيد روحت توا
عادل وقف بسرعه، وبفرحه☺: باهي هيا
حسام تي نوض فز شني قاعد إدير !! بتخليها تروح معاه بروحهم وانت أقعد وزع في إبتسامات زي الأهبل !!، وقفت بسرعه🤨: حتى أني بنروح خلي نسايركم أمالا
عادل، بإستغراب🙄: تي خيرك خليك بنهدرزو نوصلها ونجي بسرعه

 

 

محمد، بهزوه😏: عصام وعامر هذاكم عاذرينهم هربو بكري بكري، مش منهم خايفيين يبيتوهم في المربوعه ياناري😂، وأنت شني عندك تي قعمز كسد مازال الوقت
حسام ياأما عندي غير أنتم ماتندرو على شي،😁 وبإبتسامة😊: لا واللهي حاس رأسي مصدع ونبي نرقد غذوه عندي موعد ضروري الصبح
سامر، بإستغراب🙄: موعد شني غدوه سبت راهو حتي المدارس مسكرات
سامح، بضحكه: أكيد واحده في الجامعه، بيمشي يتصبح فيها بكري قبل ماتخش للمحاضره😂
حسام ياعليك موضوع حطيت فيه روحي😓 والله ماعندي لاموعد ولاشي غير سبله باش مانخليش عادل ودنيا بروحهم، كنت بنتكلم بس سكتت لما جت دنيا جيهتنا، أن شاء الله غير ماسمعت شي🤦‍♂️
عادل بعد ماطلعنا، بتوتر: وعمتي مني بيروح بيها !! ياريتك شفتها ياحسام أرجع أسألها
حسام توزع فيا تي في حلمك نخليك بروحك معاها غير أعبي😏: مايهمكش فيها بوي قاعد توا تروح هيا وياه😒
عادل، بإبتسامه😊: شني جو القرايه يادنيا مازالو الإمتحانات
دنيا: كويسه الحمدلله، قبل رمضان بإذن الله
حسام مش عاجبني اللي قاعد يصير لا كلامها مع عادل وإبتساماتهم 😒ولا حتي منظرها بلبسها الملفت وشعرها اللي من غير حجاب، وأني شايف عيون الكل عليها🤨 بس مش عارف كيف بنتصرف لازم تحاول تقرب منها أكثر ياحسام مايمشيش الوضع هذا، وقعدت سارح ونفكر ماأنتبهتش إلا وأحني قدام حوش خالي
دنيا بإبتسامه😊: شكرا ياعادل تعبتك معاي
عادل، بإبتسامه😊: ولايهمك تعبك راحه، تبي أي حاجه ردي بالك تتحشمي كلميني طول
حسام وبالنسبه ليا أني شني واقف معاكم زيادة عدد ولا كيف😒، ناقص غير يتضبطو بعضهم قدامي، اااااف ياحسام هبلت رسمي شني اللي تقول فيه، 🤨: خلاص ياعادل الشباب يستنو فيك، وتلفتت لدنيا: وأنتي هيا خشي تصبحي على خير
دنيا خيره هالمغرور هذا، شكلها رجعت حليمه لعادتها القديمه😒، لكن في حلمه معاش يقدر يدير فيا زي قبل، تجاهلت كلامه وشفت لعادل، بإبتسامه😊: خليك شويه ياعادل إمدايره كيكه نجيبلك منها إذوقها
عادل، بفرحه☺: ياريت مادامها من إيديك….. وإنخرست😐 لما أنتبهت لنظرات حسام الحاده😠، خيره النفسيه هذا
حسام عصبت من حركتها كيف تجاهلتني، هذي شني قاعده إدير !! شني قصدها !! تستفز فيا ولاكيف !! وزدت ولعتلي من حركات عادل العبيط هذا، لازم تتحكم في أعصابك ياحسام مش معقوله طفله إدير فيك هذا كله😪😓
دنيا شكله هالمغرور بيرجع للملعب🤭 خلى إنشوفو مني الأقوى المره هذي😏خشيت وجبت 3طروف كيكه في حافظه وطلعت، مديت الحافظه لعادل، وبإبتسامة😊: تفضل إن شاءالله تعجبك، وتلفتت لحسام بنظره مستفزه😏: حييي نسيت بابا إمبكري قالي أنك طلبت كيكه، تقدر تأخذ طرف من عادل لو تبي🙂
حسام تي والله مانسكتلك يابكايه مش أني اللي تستفزني عيله زيك، وبهزوه😏: لا واللهي أشي هالكيكه اللي حتى بنطلبها شكلها إدره الكبد إمالا بنتها كيف😒 رد بالك ياعادل يصيرلك تسمم والله تقعد لين تموت في حالة البلاد هذي، لوح عليك العفن😌

 

 

دنيا لا ماتسكتيش وتخليه ينتصر عليك هالمغرور فكري في رد بسرعه😣، وبغرور😌: أصلا ماحد طلب رأيك أحتفظ بيه لنفسك وبعدين عادل كيكتي ضايقها مية مره من قبل وعاجباته وراضي حتى يتسمم من إيديا عادي😏، وتلفتت لعادل اللي واقف زي الأهبل، بإبتسامه😊: تصبح على خير ياعادل وخشيت نجري وأني نشوف في حسام كيف معصب وعيونه حمر🤭 معاش نقدر نواجهه أكثر
عادل فرحت من الحركه اللي دارتها دنيا أنها حسبتني في الكيكه ومعاملته الكويسه ليا أني من غير كل شباب العيله، زعما شني قصدها باللي قالاته أمتي ضقت كيكتها أني🤔 معقوله قاعد تلمحلي على شي وأني مش فاهم،🙄
دنيا في الوقت اللي نبي ننتصر على حسام ونكسرله غروره، ماكنتش عارفه أني قاعده نوهم في عادل بشيء أني بروحي مش فاهماته😞
حسام قدرت تعصبك وتنرفزك وتهرب صحه ليها، وتلفتت لعادل اللي واقف زي المسبوه صدق روحه ياناري عليك عبيط😒 وخطفت منه الحافظه وبعصبيه😡: نطلبها أني ونتهزب عليها وتأكلها أنت والله ماتعبي😒 ومشيت لحوشنا بسرعه
عادل بصوت عالى: تي غير تعالا هات طرف الزفت بلا جو مفرخ، واللهي تشوف عليها غير رد بالك تتسمم أنت بس🤨
في مكان ثاني
……..: تي أني سمعت أنه روح
……..بشك: زعما !! بس لازم نتأكد قبل، ونشوفه بعيوني
……..: الإسبوع هذا مشغول شويه أعطيني شوية وقت ونجيبلك كل أخباره
………بحقد: خلاص تمام، ماتعطلش بس كبدي عليه دم راهو
………بضحكه: ماتخافش توا تفش غلك، ورأسك حقك تأخذه ثالث ومثلث غير أصبر بس
……..بحقد: والله هالمره ماحد يقدر ينقذه مني إلا الموت، توا إنشوفو مني اللي يضحك في الأخير ياولد ال……..
…..بتوتر: غير توا فكنا منه الموضوع هذا محلول، شني صار في البضاعه
……: خلال هالأسبوع تكون جاهزه، بس لازم تشوفلنا شباب ثقه في المنطقه هذيكا باش يوزعوها
……..: من الناحيه هذي ماتخافش عندي زوز كانو يأخذو مني الفتره اللي فاتت لرواحهم نقدرو نستغلوهم بالشيء هذا، باش نوفرله هوا لازم يوزع على كم نفر وفمه مسكر
……..بضحكه: تاريتك مش هوين، خلاص نظم أمورك، وماتنساش الموضوع اللي حكينا فيه
مصطفي بنبرة جديه🤨: أحتمال الأحد نطلعو لمصر كان سخر ربي وحصلت حجز، باش تجهزي روحك ياسعاد
سعاد، بصدمه😯: وشني خطرلك هكي فجأه، إن شاءالله غير مش سندس فيها حاجه بس😨
مصطفي😏: مافيها شي أرتاحي، بس العصر كلمني خالد
Flashback

 

 

خالد، بخجل😓: سامحني ياعمي والله ماكنت نبي نزعجك ولا إنضايقك بمشاكلنا بس بصراحه سندس زودتها وأني ماعنديش حل، أنت عارف وضعي وهيا مش مقدره بكل
مصطفي، بخوف😟: إن شاءالله خير !! شني دارتلك؟؟
خالد😔: كل ليله شادتها بكي ونواح ونبي أهلي وروح بيا تقول عليها عيل ولا هذا وين سيبتكم، أني عارف أنها مستاحشه ومن حقها تمشيلكم وتشوفكم أمتى ماتبي، بس الله غالب هالشيء مش بيدي
مصطفي🙂: واللهي حتى أحني مستاحشينها ياولدي، ولينا فتره ناويين إنديرولكم زياره بس الوقت والفضوه مافيش، مايهمكش فيها توا إنكلمها ونعقلها
خالد، بحزن😞: لا ياعمي لاتكلمها ولا شي، أني كنت نبي حد من الولاد يجي ويرفعها غادي معاكم، أني بعت بروحها في الطياره مانقدرش نبعتها، وأني مانقدرش إنسافر معاها، خليها عندكم فتره بالك يتغير جوها وترتاح نفسيتها شويه،
مصطفي😮: لا شني يجيبوها مايجيبوها ومنو بيك غادي !! وانت قاعد في غربه حتى لو مع أهلك نقولو، خليني أني نكلمها وبإذن الله مايصير الا كل خير
خالد😒: بصراحه ياعمي ليا فتره ساكت ومتحمل بس معاش قادر كترث على ماوصوها، وأني ماسد قاعد في غربه ومتبهدل ولا نهاري نهار ولا ليلي ليل نخدم ونشقي، نبي نروح للحوش نرتاح نلقاها قالبه وجهها وتزيد تنكد عليا، باللهي أبعتلها حد يرفعها حتى أني نبي نرتاح تعبتني معاها، ومايهمكمش في حق التذاكر أني ندفعهم
مصطفي، بغضب😠: عيب عليك ياخالد القصه مش قصة فلوس هيا، ع العموم أني مقدر وضعك وعاذرك في أي شي تقوله، بإذن الله في أقرب وقت نكونو عندكم أني وعمتك
Now
سعاد، بشك🤔: وبالك إمدايرلها حاجه ولا مطول يده عليها
مصطفي، بغضب😠: والنبي أسكتي، خالد عاقل ومستحيل يديرلها شي، بس بنتك هيا اللي هبلت شكلها وتبيلها تأديب
سعاد، بغضب😠: وليش واثق منه وحاط العيب في بنتك قبل ماتحكم عليها لازم تسمع منها زي ماسمعت منه
مصطفي، بعصبيه😡: أني ماحكمتش على حد، وأهو قتلك بعد غذوه ماشيين ونفهمو اللي صاير، بس والله العظيم لو تطلع بنتك الغالطه ماتلوم إلا نفسها
سعاد، بغضب😠: بس البنت مستاحشه عيب عليه يحرمها مننا ويحرمنا منها
مصطفي، بعصبيه😡: تي أي حرمان أهو النت عندك وعندها باللهي قداش تقعد ماتكلمش فيك، تفوت حتى الإسبوع مرات، هذي مستاحشه هيا !!
تي هما أهم اللي في نفس البلاد معانا بالشهرين و3 شهور مانشوفوهم، تبي تهدم بيتها وتسيب راجلها باش تشوفنا، تي غير تهفت وتهني روحها مانبولها شوفان
سعاد سكتت خوف 😟من مصطفي وهيا تشوف فيه معصب وواصل حده، وفعلا عنده حق في كل اللي قاله، بس هيا أم وطبيعي راح تنحاز لبناتها لو شني مادارو🥺😔
حسام ماقدرتش نرقد ولا غمضه إمبارح، شاغله كل تفكيري مسيطره عليا بالكامل، حاس روحي تايه وغريب أكثر من لما كنت بعيد عن أهلي، أحساسي بالعجز قاتلني لاقادر إنطلعها من تفكيري ونرتاح ولا عارف كيف نقرب منها ونكسبها😔
طلعت للبلكونه اللى ولت الوقفه فيها من روتيني اليومي الأكثر متعه نقدر نملى عيوني منها من غير ماتحس، بس تفاجأت باللي نشوف فيه، تجمد الدم في عروقي😵 وأني نشوف فيهم مقعمزين مع بعض وصوت ضحكاتهم ترن في كل مكان، قعدت واقف وجامد في مكاني ونحاول نهدأ شويه مانبيش نتهور، بس لما شفته قرب منها معاش سيطرت على روحي نزلت جري من غير تفكير😤

 

 

حسام بعصبيه😡: أنتم شني قاعدين إديرو يانعن……..
عادل وقف بتوتر😦: حسام صباح الخير خيرك خاش فينا زي الحادث
حسام،بعصبيه😡: لا واللهي شكلي خلعتكم وفسدت عليكم لحظاتكم الرومانسية يانعن……، كل شي نتوقعه منها هذي😏 لكن انت ياعادل معقوله تضحك عليك وتجرك وراها
عادل، بغضب😠: أنت شني قاعد تقول أحترم نفسك ياحسام، أنت فهمت غلط دنيا عينها مش عارف شني طاح فيه كنت نشوفلها فيها، وين مشي دماغك
حسام، بعصبيه 😡: بطل كذب تي شايفكم بعيوني الزفت، وتلفتت لدنيا ياحرام بوك اللي عاطي فيك الثقه وتاعب وشاقي على خاطرك، وأنتي مستغله غيابه وإمدايره ماتبي يابنت ال……🤬
دنيا ماعدلتش عليه من لما تكلم مايهمنيش أصلا لا شني شاف ولا كيف فسر وفهم، كنت لاهيا في عيني اللي تحرق فيا، بس لا هذا شني يحساب روحه، وقفت بغضب😠: أنت هييي شني تحساب روحك وبأي حق تقول اللي قلته !! لا يابابا لو فاهم أنك راح ترجع وتحكم وتتحكم لا ولا ولا ولافي أحلامك، غرورك وقوتك هذي حدها باب حوشكم فاهم، حياتي خط أحمر لا أنت ولا غيرك يقدر يتحكم فيا أو يقول عليا ربع كلمه، ياريت تلهي في روحك وفي نفسيتك المتأزمه وتبطل حركاتك العبيطه هذي، وخشيت وقربعت الباب 😡
عادل، بغضب😠: أنت شني تحساب روحك داير، راهي بنت عمي وعمري مافكرت إنضرها، ياريت تخلي البنت في حالها وياسرك اللي كنت إديرلها فيه من قبل، لأنه أني توا راح نوقف في وجهك ومش راح نرضي أنك إضرها، وبنبرة تهديد: خليك بعيد على دنيا ياحسام أفضلك، ومشيت وخليته واقف
حسام طلعت بسرعه وأني معصب وإنسب🤬 ومش شايف قدامي، وطولت لين هديت وإستوعبت الغلط اللي درته، شني اللي قاعد يصير معاك ياحسام ! معقوله حسيت بالغيره عليها، أيه إنغار فكرة أنه ممكن يكون بينها وبين عادل شي تقتلني، كيف بنفهمها أنها من يوم جت ع الدنيا وهيا مش حره ماتقدرش إدير اللي تبيه، هيا حياتها مش ملكها ضحكتها، صوتها، عيونها، وحتي عنادها وقوتها، وكل تفاصيلها ملكي أني وبس
ثاني يوم الصبح
دنيا واقفه ونستني في الباص لما طلع حسام شاد شناطي سفر وفات من جنبي، وين ماشي زعما نسأله !! لا لا فوتيه توا غير بتكلميه بتكبريله رأسه😏 شن دخلك أنتي؟؟ خلي إنشوف الباص بالك جي أحسنلي
حسام طلعت بنوصل أمي وبوي للمطار نشوف فيها واقفه، من إمبارح وأني ندعي لربي يصبرني ويهديني ونقدر نتجاهلها، بس فشلت وأني نشوف فيها مكبها من الباب، بغضب😠: هيييي أنتي خشي الداخل شني مطلعك برا
دنيا، صبح يافتاح، بهدوء🙂: كنت بنشوف الباص
حسام قدمت جيهتها، وبأمر😠: خشي توا أني نشوفه ونقولك لو جي
دنيا بغضب😠: أنت ليش تدخل فيا ؟؟ لشني تبي توصل بالضبط !! قولى شني اللي في عقلك؟؟
حسام، بنص عين😏: أسمعيني كويس صبح وماخاطريش في النشاف، رد بالك تفهمي أني خايف عليك أو نبي مصلحتك لا ياحلوه أني خايف على خالي بس ينجلط من العار اللي ممكن يلحقه ويلحقنا كلنا من عمايلك، ولا أنتي عمرك ماتهميني ولا حتى التفكير في وحده زيك من مستواي فاهمه

 

 

دنيا، بحزن🥺: علاش تعامل فيا هكي ليش تكرهني شني درتلك أني؟؟
حسام لا ياربي أني شني درت مش قادره نشوفها ضعيفه هكي،بأسف😞: أسمعي أني…..وسكتت لما شفت بوي وأمي طالعين وجايين جيهتنا
دنيا تماسكت نفسي وحاولت ونشد دمعتي شويه: صباح الخير، كيف حالكم اليوم؟
سعاد، مصطفي😊: صباح النور الحمدلله
سعاد، بإبتسامه😊: وينك أمس يادنيا على قد ماطقطقت ماحد فتحلي
دنيا: أي أمس مشيت قعدت عند خالتي، روحنا مؤخر شويه
حسام أيواه تنتقل من واحد لواحد ماشاء الله من عادل لمؤيد🤨، تفكيرك بكل ياحسام مابعدها😓
سعاد، بإبتسامه😊: أحني طالعين لمصر ماشيين لسندس إستاحشناها وقلنا إنديرو عليها دوره، ورأس بنيتي هذا مفتاح الحوش مره مره ديري عليه دوره، ماتخافيش حسام من غذوه يبدأ يخدم من الصبح لعند المغرب، وقربت وهمستلها في وذنها: باللهي يادنيا هنيني على حسام وديريله حاجه يأكلها نعرفه مايحبش يأكل من برا
دنيا حاضر ياعميمه ولايهمك، ماتفكريش فيه، وإنتبهت لصوت الباص، بإبتسامه😊: توصلو بالسلامة ان شاءالله سلمولي على سندس هلبا
سعاد، مصطفي😊: الله إيسلمك، يوصل إن شاءالله
حسام فاتت من جنبي وراسها لوطه حسيت بتأنيب الضمير كيف تقدر تجرحها هكي الزفت، طلعت وراها بسرعه ومسكتها من إيدها، بأسف😞: دنيا أسمعيني أني مش، وتفاجأت أنها تبكي لما قامت رأسها😮
دنيا، بدموع😢: أنت هذا اللي تبيه صح خلاص أرتاح قاعد قادر تكسرني وتنزل دموعي زي قبل أطمن، وشحيت أيدي ومشيت ركبت في الباص
هند بنت تقرأ مع دنيا وتركب معاها في الباص، بشهقه: هييييي يادنيا مني الطرف هذا، أول مره نشوفه عندكم يهبل😍
دنيا هند تفكيرها تافه ومحدود زي هلبا بنت يهمها الشكل بس، ماعدلتش عليها بكل وتلفتت للروشن، وطول الوقت ماسلمتش من أسئلتها البارده على حسام😒
دنيا فاتو ثلاثة أيام وأني كل يوم الصبح نرفع لحسام في صفرة الفطور نحطها في المطبخ ونطلع، ونفس الشي في العشي
حسام كنت عارف أنها راح تجي تجيب العشي، طفيت ضي المطبخ وقعدت نستني فيها، حسيت أني لازم نعتذرلها جرحها هلبا بس ربي يعلم أنه مش بيدي مانقدرش نتحكم في تصرفاتي معاها، بس هيا ماليهاش ذنب في تفكيري الوسخ وعقليتي المتشدده
دنيا فتحت الباب بالمفتاح وخشيت متوجهه للمطبخ حطيت السفره على الطاوله وفتحت الضي بس تفاجأت😮 بحسام اللي مقعمز على الكرسي وعيونه عليا وكأنه كان يستني فيا، بتوتر😦:أنت خيرك مقعمز أهنايا وفي الظلام
حسام، بإبتسامه😊: كنت نستني فيك، ممكن إديريلي قهوه
دنيا حسيت بالخوف من إبتسامته شنن قصده هذا قداش يوم إنجي نحط في العشي ونطلع وهوا موجود بس مافيش مره شفته أو إنزلي، علاش الليله نازل ولا يستني فيها معاها، بخوف😟: أنت شني قصدك علاش تستني فيا
حسام لاحظت الخوف في عيونها، تكلمت بهدوء نحاول نخليها تطمن وترتاح😊: دنيا ماتخافيش أني الوحيد اللي مستحيل نفكر حتي التفكير أني نضرك، بس نبي نحكي معاك شويه ديريلنا قهوه وقعمزي
دنيا مش عارف ليش حسيت بالصدق في كلامه وإرتحت شويه، بس فكرة أني معاه بروحنا تخوف وغلط أصلا، بس عندي فضول نعرف شني بيقول، حطيت بكرج القهوه ع النار وحاسه بالتوتر😦 من نظرات عيونه اللي قاعده تتحرك مع تحركاتي، صبيتله القهوه وقعمزت على الكرسي اللي مقابله، بتوتر😦: قول اللي بتقوله بسرعه، مرات يجي حد
حسام، بإبتسامه😊: ماتخافيش حتى لو جي حد أحني مقعمزين نهدرزو مادرناش شي غلط
دنيا،بهزوه😏: ماهو الحاجات هذي تفهمها الناس العاقله مش اللي زيك ولانسيت شني درت هذاكا اليوم
حسام فهمتها تلمح للي صار هذاكا اليوم مع عادل وكيف أني فهمت غلط، قعدت ساكت وعيوني في عيونها😊
دنيا توترت من نظراته شني قصده هذا اللي بيحكيه بيتأمل في عيوني، تكلمت بسرعه وبتوتر😦: اللي صار هذاكا اليوم والله من غير قصد أنت مش عارفه كيف فهمت غلط وهوا أصلا مش عارفه شني يبي وعلاش جاي من الأساس أول مره يديرها
حسام كمية البرائه اللي فى عيونها وهيا تتكلم مش طبيعيه😍، ياربي كون في عوني، كيف نقدر نقاومها ماتخلينيش نغلط ياربي😔: أصلا عارف أنه مافي شي بينكم، بس الموقف اللي شفته ينرفز خلاني نفقد السيطره على روحي سامحيني
دنيا أنتِ ليش قاعده تبراريله هوا شن دخله فيك أصلا😒،وبثقه😌: باهي مش قلت بتحكي معاي شني فيه؟ كانك بتقعد تشوفلي هكي وخلاص إنوض أحسن وجيت بنوقف
حسام مديت إيدي وشديت إيدها، وبرجاء🙁: قعمزي شويه بس
دنيا رجعت قعمزت😳: تكلم باهي شني تبي
حسام، بإبتسامه😊: عارفه أنه عيونك عذاب🤤 نظره منهم بس قادره تمسح كل شي في عقلي، كل الكلام اللي كنت مجهزه ونرتب فيه تبخر في لحظه😍

 

 

دنيا، خيره هذا شني يقول، بخوف😧: حسام أنت كويس مريض بالك عندك حراره
حسام ضحكت 😅على تفكيرها طفله قاعده مش مستوعبه الكلام اللي قلته، بضحكه😁: أني كويس ماتخافيش، أني أسف لو أزعجتك في يوم، أسف على كل شيء درتهولك يادنيا، ممكن تسامحيني ونفتحو صفحه جديده😊
دنيا أني صح نحاول نكون قويه بس قلبي مش أسود، مانحبش المشاكل ولا الخلافات أصلا، وبعدين مليت من الوحده والإنطواء، حابه فعلا نكون إنسانه عاديه زي الكل بس خوفي من اللي حولي مانعني، تكلمت بسرعه وبفرحه☺: مسامحاتك، بس بشرط تبطل غرور ونقعدو أصدقاء
حسام مهما حاولت تبين أنها قويه ومتماسكه وأكبر من عمرها بس تصرفاتها الطفوليه تمنعها من هالشيء، بإبتسامه😊: حاضر أنتي تأمري أمر
دنيا أبتسمت ووقفت😊: خلاص نخليك تتعشي توا، لو تبي شي قولي، مش بعدين تشكي لعمتي وتقوللها بنت خوك بايره وماعدلتش عليا
حسام، بإبتسامه😊: مانقدرش نشكي منك، أنتي مش عارفه أنتي شني بالنسبه ليا ياصديقتي😊
دنيا: تمام تصبح على خير
حسام قعدت نراقب فيها لين طلعت، مستغرب من اللي قدرت إنديره أني ماكنتش هكي ولا عمري توقعت أنه توصل بيا الدرجه نتنازل ونتأسف من حد، بس هيا مش أي حد ياحسام هيا هذا ❤ اللي قادر يخليك تتنازل غصبا عنك
“” حين تلتفتين إليّ ، حين تتحدثين معي ، حين يهبني الله هذه اللحظة ، أشعر أنني لست أنا ، أشعر أنني لا أستطيع التحكم بأي شيء ، أشعر أن هناك شخصًا هائمًا ساذجًا يقوم بكل أدواري ، في النظر ، في الصمت ، في الحديث ، في كل شيء ♥️ “”
مصطفي، بغضب: تهني روحك سلم بنتي وتقعمزي مع راجلك، أهو شفتينا وأطمنتي علينا وماعندك ليش مروحه لليبيا
سندس، بزعل: بس يابوي أني نبي…..
مصطفي: شني تبي أنتي توا درتي عيله ولازم تعرفي تحكمي عقلك ماتخليش قلبك وعواطفك تتحكم فيك يابنتي، سايري راجلك راهو عمرك ماتلقي راجل زيه
سندس: أني فديت نبي نشوف خوتي وخواتي نواصلهم ويواصلوني والله ننقهر لما نقعد بروحي وماعندي حد يزورني أو نشكيله ويحس بيا
مصطفي الله غالب يابنتي هكي ربي حكم عليكم وبعدين خالد ماليشي ذنب في اللي صار، هوا بروحه مش عاجبه وضعكم وغربتكم عن أهلكم أكيد بس بالسيف الواقع أقوي منه، حسبي الله ونعم الوكيل في اللي كان السبب
سندس: بس أني نبي نرجع معاكم لليبيا يابوي، علاش أنتم معاش تبوني ولا كيف؟
مصطفي بغضب: أحني شني كنا نقولو ياسندس، مشي معانا وتسيبي راجلك هنايا لا مايصيرش منه يابنتي، أنتي بنتنا وقطعه مننا مستحيل تهوني عليا ولا نتخلو عليك، اللي إندير فيه كله لمصلحتك يابنتي وتوا مع الوقت تفهمي كلامي، نوضي توا ديريلنا طاسة قهوة
ناضت سندس وهيا مش عاجبها كلام بوها ومش راضيه😔

 

سعاد،بغضب😠: توا قداش ليا ساكته وماتكلمتش، بس حرام البنت تبي تروح معانا وتغير جوها حتي شويه ليش تكسر بخاطرها
مصطفي😡: أنتي الموضوع هذا أطلعي منه، أني مانبيهاش تستقوى على راجلها وتنكد على روحها الراجل يتحمل يتحمل ويتفجر بعدين، وشايفه بعينك كيف عايشه ومش ناقصها شي وخالد مافيش منه، خليها أهني مع راجلها وولدها هما اللي دايميلها، أني وأنتي مش راح نعيشولها العمر كله،
سعاد، بحزن😔: واللهي كاسره خاطري ياناري، خايفه تكرهنا وتقول أننا أحني تخلينا عليها وماوقفناش معاها
مصطفي: ماتخافيش علاها، توا شهر ثاني وأني نبعتلها واحد من خوتها يجيبها، بس توا خليها باش تحترم رأي راجلها وتتمسك بيه بكل قوتها لما تحس أنها ماعندهاش غيره، هوا عزوتها من بعدنا مش راح ينفعها لا أخ ولا أخت
حسام فاتو عشره أيام أمي وبوي قاعدين ماروحوش، بصراحه مفرحني هالموضوع ومتمنيهم يعطلو أكثر من هكي، صداقتي أني ودنيا هاديه ومريحتني الخطوه اللي قدرت إنديرها بيني وبينها، نحاول على قد مانقدر نستفيد في هالأيام ونكسبها لصالحي ونخليها توثق فيا، هذا الحل الوحيد باش نخليها قريبه مني
“” أريدكِ أن تعرفي جيداً..
أن وجودك في حياتي يشكل فارقا عظيما في قلبي وفي توازني وفي عقلي وفي خطواتي وفي إستقامتي وإستقراري وليس يومي فقط…
وأني معكِ أستطيع أن أملك الدنيا بضحكه واحده من شفتيكِ أو بنظره من عينيك “”

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية طفلة أرهقت قلبي)