رواية لعبة الغدر الفصل الخامس 5 بقلم محمد منصور

رواية لعبة الغدر الفصل الخامس 5 بقلم محمد منصور

رواية لعبة الغدر البارت الخامس

رواية لعبة الغدر الجزء الخامس

رواية لعبة الغدر الحلقة الخامسة

** الحلقة الخامسة**
من تاليفي، ،
محمد منصور. ** منص **
وقبل ما نبدأ نوحد الله ونصلي علي خير خلق الله سيدنا محمد. وعلي بركة الله نبدأ
بسم الله توكلت علي الله. وهو رب العرش العظيم
‏من الاوضة السرية الخاصة بدكتور نصر ينام سالم علي طاولة التشريح وهو مخدر ونصر يقف امام منه ويمسك بمشرط التشريح ويتجة به ناحية جسم سالم ويستعد لاخراج الكلية منه ولكنة يسمع صوت خبط علي باب الاوضة فيصدم ويخاف ويترك المشرط ويذهب ناحية باب الاوطة مسرعا ويضع ودنة وراء الباب ويفتح الباب بحذر شديد ليجد الممرضة اللي شغالة معه وتدعي هالة فبص لها وقال بحدة
‏
‏هو انتي. انا مش قولت لك اني داخل اشتغل ومش عايز اي ازعاج

-***-

‏
هالة
اسفة والله يا دكتور بس جت حالة برة وصاحبتها مستعدة تدفع الافات بس تخلصها من اللي في بطنها
نصر باهتمام
للدرجة دي
هالة
واكتر علشان كدة قولت اجي ابلغك
نصر
طيب تعالي معايا نشوف الحالة دي
ويخرج نصر من الاوضة،،،،،،،،،
من داخل مستوصف دكتور نصر يقف نصر قدام امراة في اواخر الثلاثينات من عمرها. وتدعي فايزة وكانت حامل فيبص لها من فوق لتحت ويقول
سمعت انك عايزاني
فايزة
انت دكتور نصر. صح
نصر
ايوة

-***-

فايزة
كنت عايزا انزل اللي في بطني دة وهاديك كل اللي انت عايزة
نصر بعصبية
استغفر الله العظيم. انتي اية فاكرني حيوان ازاي اعمل حاجة زي كدة وانتي ازاي تقتلي ابنك
فايزة
غريبة مع ان الممرضة بتاعتك كانت موافقة
نصر
الممرضة كانت فاكرة انك عايزا تكشفي عادي انما ننزل عيل. لية هو انا كافر
فايزة
انا، ،،،
فيقاطعها نصر بعصبية مفتعلا ويقول
انتي تطلعي برة بدل ما اطلب لك البوليس واللي انتي عايزا تعملي دة تشوفي لك دكتور شمال يعمله
فتبص له هاله باستغراب شديد وتخرج فايزة من المستوصف بسرعة فتبص هالة لنصر وتقول له
لية عملت كدة
نصر
علشان دي مش حامل
هالة باستغراب
عرفت ازاي
نصر
باين جدا علي شكل بطنها. انها بطن واحدة مش حامل
ويضحك بسخرية
غبية جاية لي ببطن عيرة علشان توقعني مع انها كانت ممكن تيجي عادي وتقول انها لسة في اول الحمل. جاية تلعب علي نصر
هالة
وتفتكر مين دي ولية عملت كدة
نصر
ممكن تكون صحفية وعايزا تتسيط علي حسي
هالة
ولية ماتكنش تبع الحكومة
نصر
لا. لا. لو تبع الحكومة ماكنتش كشفتها بسهولة كدة. دي عملت الحركة العبيطة دي علشان تسجل كل اللي هايدور بيني وبينها وتذيعة
هالة
طيب والعمل

-***-

نصر
طالما ريحتي بدات تفوح كدة يبقي لازم اوقف شغل دلوقتي
هالة
ما تيجي نسيب المستوصف دة ونروح اي حتة تانية
نصر
غلط لو المستوصف دة اتقفل يبقي انا بثبتها علي نفسي لازم افضل هنا بس هانوقف الشغل الشمال شوية مش كتير
ويتنهد نصر ثم يقول
نزلي اكل للمتسول اللي تحت دة. لسة لي عمر.
من داخل العربية الفيات يجلس عزت ومعه جابر وفي الكرسي الخلفي تجلس فايزة وهي بتشيل الهدوم اللي كانت حطها تحت هدومها وعزت بيبص لها ويقول
عملتي اية
فايزة
طلع صايع ولئيم
عزت
لية اية اللي حصل
فتخرج فايزة مسجل صوت كان في جيب بنطلونها وتشغل المسجل ليعرض كل الحوار اللي دار بينها وبين نصر فيضحك عزت باستهزاء ويقول
فعلا دكتور صايع
فيبص عزت لفايزة ويخرج مبلغ من المال ويدي لفايزة وهو يقول
خدي دول وبالسلامة انتي
فتاخذ فايزة منه الفلوس وتحطها في جيب بنطلونها وتنزل من العربية وبمجرد نزولها من العربية ينطلق جابر
ويقول لعزت
قولت لك بلاش نصر دة مش سهل وانت ماسمعتش كلامي

-***-

عزت
كنت عايز اعلم علية علشان يكون في ايدي زي الخاتم وابيع له اللي بيقعوا تحت ايدينا بالسعر اللي انا عايزة
جابر
واهو طلع منها وفلت وزمانه عرف اننا وراء الحوار دة
عزت
انت عبيط يا جابر وهايعرف ازاي بس اننا وراء الحوار دة.
جابر
ماعرفش بقي. بس انت ما بتسمعش كلامي وهتخلينا نخسر واحد زي نصر
عزت
نصر دة زبالة وخد مننا المتسول برخص التراب وهو هايجي من وراء الافات
جابر
اي حاجة تيجي تمشينا وخلاص. يعني عجبك اللي احنا في. دة احنا بنكح تراب ولولا اي سبوبة بنعملها مش عارف كنا هانعيش ازاي بمرتب الحكومة
عزت
انا زهقت وقرفت من الشغل القطاعي دة ونفسي بقي اعمل خبطة وتبقي خبطة العمر،،،،،،
مكتب عجمي. وعجمي يجلس علي مكتبة وامامه يجلس رشدي وامام منهم يقف اوكا وعجمي يقول له بعصبية
احنا هانفضل طول الليل بنحكي في الحكاية الحمضانة دي ما تقول يا ابن الكلب مين اللي اشتري منك العربية
اوكا خائفا
وربنا يا باشا ما عرفه. دة راجل قابلتة صدفة علي القهوة وسمعني وانا بتكلم مع القهوجي وقولت له اني عايز ابيع العربية دي فهو نط في الحوار وخلص معايا كل حاجة وساعتها خد منه 5000 ج.
عجمي
يعني اشتري منك كدة ببساطة وهو ما يعرفكش وانت بعيت له وانت ماتعرفهوش. مش شايف ان دة كلام ما يخشش علي عيل بشخة
اوكا
والله ياب،،،،،،

-***-

فيضرب عجمي ايدة علي المكتب ويقول بصوت يرعب الحجر
ولا. لف ودوران انا ما بحبش العربية دي اتعملت بيها جناية خطف والخطف دة يخص واحد قريبي يعني مش هارحم امك لو ماقولتش كل اللي تعرفة والا قسما عظما لو قومت من علي مكتبي لعمل معاك الغلط وماحدش هايحلك من ايدي قول يا روح امك اسمة اية اللي اشتري منك العربية
اوكا
يا باشا انا ماعرفهوش انا كنت عايز ابيع العربية وخلاص وهو كان قاعد وسمع كل حاجة وعرف انها عربية مسروقة ورضي ياخدها علي كدة
فيقف عجمي ويلف من وراء مكتبة ويتجة ناحية اوكا اللي كان بيبص خائفا ويرجع للخلف الي ان اصطدم اوكا بحائط الحجرة فاقترب منه عجمي بمنتهي الغضب لدرجة ان اوكا شعر بانفاس عجمي الغاضبة ومد عجمي ايدة وامسك شعر اوكا وبص في عيونة وقال
اسمة اية اللي اشتري منك العربية
اوكا وهو بيتالم
والله يا باشا ما عرف اسمة
فيضربة عجمي بالرجل في قصبة رجلة فيتالم اوكا بشدة ويقول
اسمة جابر يا باشا
عجمي
تعرف له طريق
اوكا
لا وعهد الله انا كل اللي اعرفة انه كان بيجي يقعد علي القهوة اللي انا بقعد علية ومعه اتنين كمان واحد منهم اسمه عزت والثالث بتاعهم اسمة شناوي.
ونرجع بالاحداث لكام يوم فات. ومن علي احدي القهواي يجلس جابر مع عزت وشناوي وعلي التربيزة اللي بجانبهم يجلس اوكا وأمام منه تقف العربية المسروقة وكان شناوي يقول لهم
أنا طلبت اقابلكم علشان عايز اتكلم معاكم في حوار الكابلات اللي اتاخدت من المخزن دي. وانا عارف انكم انتو اللي خدوها

-***-

عزت
شناوي دي كابلات مرمية بقالها سنين ورجعا من موقع مسطرد وماحدش هايستخدمها تاني يعني مشي حالك
جابر
وبعدين يا عم شناوي اعتبرنا زي الكبار في الشركة اللي بيسرقو عمال علي بطال جت علينا احنا
شناوي
وتقبلة تدخلو بيتوكم فلوس حرام
عزت
شناوي تاخد كام وتعمل نفسك ماتعرفش حاجة
فيتعصب شناوي ويبدا يتهتهة ويقول
ان انت فا فاكرني أ. أية
في هذة اللحظة يبص اوكا لشناوي اللي كان بيتكلم بصعوبة ويقول لنفسه
ربنا يشفي
ويقف امام منه القهوجي ويقول له
اغير لك الحجر

-***-

اوكا
سيبك من الحجر وقولي مين اللي قاعد مع جابر وعزت دة اول مرة اشوفة في القهوة
فيبص القهوجي ناحية شناوي ويقول
سمعتهم بيقول له يا شناوي
اوكا
باين علية عبيط عمال يتهتهة وبص ايدة عاملة ازاي
القهوجي
طبعا هاتحن لي علشان بيفكرك باخوك اللي مات
اوكا
الله يرحمه. شوفت الراجل دة افتكرت اخويا فعلا. المهم عايز ابيع العربية دي
ويبص اوكا للعربية فيبص لها القهوجي ويقول
مبلوله ولا مسروقة
اوكا
الصراحة مسروقة
القهوجي
3000 ج. وزبونها عندي
اوكا
لا. يا روح امك مش بايع
القهوجي
ماتبقاش طماع يا اوكا
اوكا
انت اللي ابن كلب طماع
في هذة اللحظة ينضم لهم جابر اللي كان سامع الحوار كله وقال
طيب 5000 ج. كويس
فاستغرب اوكا وبص للقهوجي فقال جابر
هه قولت اية
اوكا

-***-

بس،،،،
جابر مقاطعة له
سمعتك وانت بتقول مسروقة مش مهم انا هاطلع لها ورق وهاخلص حكايتها مع المرور. بس اخدها لاخويا المعاق
شناوي علشان هو مريض زي ما انت شايف ومحتاج عربية يشتغل عليها يعني يوصل طلبة للمدرسة الصبح ينقل بيها ركاب اي حاجة تجيب له دخل يعيش منه هو ومراتة وبنتة دة حالتة تصعب علي الكافر
فيبص اوكا لشناوي مرة اخري ويصعب علية. ويوافق علي عرض جابر فيضحك جابر بخبث ويبص لشناوي ويقول لنفسه
اول مرة اطلع من وراك بحاجة مفيدة،،،،،،،
ونرجع تاني ومن داخل مكتب عجمي كان اوكا بيقول
بيعت له العربية يا باشا وخد منه الفلوس في ساعتها علشان خاطر بس شناوي دة صعب علية
عجمي
لا. فيك الخير. ماتعرفش حاجة تاني عنهم
اوكا متوجعا
والله ماعرف عنهم اكتر من كدة.
عجمي
هابعد اجيب رسام تبعنا وعايزك توصف له الثلاثة دول بمنتهي الدقة علشان يرسم لهم رسم تقريبا ،،،،،،،،
مكتب جابر وعزت وشناوي في مصلحة الكهرباء وكان عزت يجلس قدام جابر وعزت يقول
انت متاكد من اللي انت بتقوله ده

-***-

جابر
ده من بوق شناوي وانت عارف شناوي ما بيكدبش أبدا
عزت
يعني شناوي الاهطل ده بقي مليونير
جابر
شوفت بقي. اتصل بيا امبارح في البيت وعرفني كل حاجة وحكاية عمه اللي كان بيحبه اوي وطلع غني وكتب له كل ثروته وطلب مني اعمل له شهر اجازة تاني لغاية مايجي ويسوي معاشة ويسيب الشغل ويكمل في كار العقارات مكان عمه.
عزت بحقد
الاهطل دة خد كل حاجه حلوه في الدنيا معه المال والبنون والوجه الحسن. واحنا لازم نخطف ونسرق عشان يادوبك نجيب لقمتنا
جابر
امه دعيه له
عزت
طيب واحنا ما فيش حد يدعي لنا
جابر
هو فين بس اللي يدعي لنا ده
عزت
مش لازم حد يدعي لنا. ندعي احنا لنفسينا
جابر
قالو للشمال ادعي
عزت وهو يفكر
بقول لك اية انت تعرف عنوان بيت عم شناوي
‏
جابر
ماعرفش البيت بالظبط بس اعرف هو ساكن في اني بلد وهناك كل الناس عارفة بعضيها انما انت بتسال لية
عزت بخبث
علشان لازم نقوم بالواجب ونعزي شناوي في عمه وبعد كدة نجهز شناوي لدفنته
‏
فبص له جابر باستغراب ،،،،،،
من مكتب عجمي وبعد ان انتهي الرسام من رسم تقريبا لجابر وشناوي وعزت كما وصفهم اوكا يبص عجمي للصور ومعه رشدي ويبص عجمي لعسكري كان في اوضة المكتب ويقول له
خد اوكا علي حجز
فياخذ العسكري اوكا ويخرج بة من المكتب ورشدي يبص لعجمي ويقول
هاتعمل اية بعد كدة
عجمي
دة شغلي انا بقي يا رشدي. بس ما تقلقش مش هايعدي 48 ساعة والا هاكون وصلت للثلاثة دول
رشدي
انا خايف اوي علي سالم ليكون حصل له حاجة
عجمي
طالما مافيش اخبار عنه يبقي هو بخير

-***-

رشدي
يارب. سالم لو حصل له حاجة يا عجمي انا مش هسامح نفسي
عجمي
رشدي انت قدمت لسالم كل خير وسالم هو اللي فرض في فرصة انه يطلع من حادثة ابنه وهو سليم وسلم نفسه للمرض ونسي ان دة قضاء ربنا ولازم يرضي بي. المهم بقي انت تقوم تروح دلوقتي وترتاح واستني مني تيلفون وفي اخبار كويسة عن اخوك
رشدي
ارتاح ازاي بس وانا ماعرفش حاجة عن سالم
عجمي
لازم ترتاح انت من امبارح مانمتش،،،،،،
من داخل بيت مطاوع يجلس شناوي علي سجادة الصلاة ويقرا في المصحف وينتهي ثم يدعي قائلا
ربنا يرحمك يا عمي مطاوع ويسترك يوم العرض علية زي ما سترتني انا ومراتي وبنتي
فتجلس جيهان بجانبة وتبص له
عوض اتصل بيك وبيقول لك انه حصل ايجار ارض الترعة وهايجي متاخر شوية
شناوي ودموعه تنزل من عيونة لانه افتكر عمه. يقول
يجي بالسلامة
جيهان وهي تمسح له دموعه
انت كل صلاة بعد ما تدعي لعمك تقعد تعيط كدة
شناوي
غصب عني انتي عارفة انا كنت بحبة قد اية
جيهان
طيب يالا قوم علشان نتغدي
شناوي
عملتي حساب عوض وامة في ألاكل
جيهان
عملت حسابهم وكمان بكرة هاروح مع ام عوض للدكتور بنفسي علشان اخلص لها ورق العملية وادفع لها الفلوس
شناوي وهو بيبوس ايدها
تعيشي ديما وربنا يبارك في عمرك بفعل الخير
جيهان
الخير دة انا اتعلمتة منك ودي اكتر حاجة بحبها فيك
وتبوس جيهان ايد شناوي وفي هذة اللحظة تقفز جميلة علي كتفة وهي تضحك وتقول
بابا.

-***-

شناوي ضاحكا
جميلة بابا
ويلف جسمة لها ويضمها لحضنة وهي تقول
بابا احنا مش هانروح بقي
شناوي
زهقتي يا جميلة بابا ولا اية
جميلة
اة اناعايزة ارجع بقي للعب بتاعتي وافتح التيلفزيون واتفرج علي القط والفار
شناوي مبتسما
ما البلد هنا مليانة قطط وفئران اتفرجي عليهم زي ما تحبي
جميلة
لا يا بابا انا عايزة اللي بيجيو في التيلفزيون
شناوي
أن شاء الله هانرجع قريب بس لما اخلص شوية شغل هنا
وفي هذة اللحظة يسمعوا صوت خبط علي باب البيت فيبص شناوي لجيهان
ومين بس اللي جاي دلوقتي
شناوي
ممكن حد جاي يعزي. خدي جميلة وخشي جوة
وتدخل جيهان الي الاوضة،،،،،،،
ومن داخل الاوضة تقف جيهان وراء باب الاوضة لكي تسمع مين اللي جه وعندما فتح شناوي الباب وسمعت صوت شناوي وهو يقول
اهلا يا جابر. ازيك يا عزت
اتصدمت جيهان وفتحت الباب بعض الشئ وبصت ولقيت جابر وعزت وشناوي يرحب بهم فاتخنقت بشدة وقالت لنفسها
اية اللي جاب الاثنين دول هنا،،،،،،
من داخل بيت مطاوع يجلس شناوي وامام منه يجلس عزت وجابر ويقول عزت
وغلاوتك عندي انا لسة عارف من جابر النهاردة الصبح ان عمك مات

-***-

شناوي
كلك واجب يا عزت.
جابر
ربنا يجعلها اخر الاحزان يا شناوي
شناوي
مانجيش لك يا جابر في حاجة وحشة. طبعا انتو جائين من المصلحة علي هنا يبقي نتغدي سوي
جابر
غدأ اية بس احنا جائين نطمئن عليك ونمشي
شناوي باصرار
والله ابدا لازم تاكلو معايا لقمة
ويقوم شناوي لكي يبلغ جيهان بتجيهز الغدأ لهم وفي هذة اللحظة كان عزت يبص للبيت باستحقار شديد فالبيت كان متواضع جدا ويقول عزت لجابر
انت متاكد ان دة بيت عمه المليونير
جابر
ايوة
عزت
ازاي المزبلة دي كان عايش فيها مليونير
جابر
انا عارف بقي.
عزت
باين كدة شناوي كان بيشتغلك
جابر
شناوي يشتغلني انا. انت عارف زي ما انا عارف ان شناوي مش كذاب

-***-

عزت
عارف انه مش كذاب بس،،،،
فيسكت عزت عندما يري شناوي جاي ناحيتهم وبيقول
دقايق والاكل هايبقي جاهز والله شرفتونا،،،،،
ومن علي السفرة في بيت مطاوع يجلس شناوي مع جابر وعزت وامام منهم اصناف كتيرة من الاكل من الفراخ والارز والسلطات والطبيخ فيمسك شناوي بفرخة ويضعها امام عزت وفرخة اخري يضعها امام جابر ويقول لهم
عايز كل واحد يخلص فرختة الحمد لله خير ربنا كتير
فيمسك عزت بفرختة ويقطم منها حتة وهو يقول
باين كدة انا عمك كان علي قلبة فلوس ياما
فيخبط جابر عزت في رجله فيقول شناوي
الحمد لله كان عايش مستور وسترني بعد موتة
جابر وهو ياكل حتة من الفرخة
ربنا يسترنا كلنا

-***-

عزت بخبث
هو عمك صحيح كان مليونير
فيكح جابر فيبص شناوي لجابر ويبتسم قائلا
اجيب لك مية
جابر وهو بيكح
لا. انا هابقي كويس
ويبص جابر لعزت فيقول عزت بعد ما حس انه قد اية لبخ
زي ما اهل البلد بيقولو يعني
شناوي
اهل البلد هما اللي قالو انه مليونير ولا حد تاني
ويبص شناوي لجابر فيقول جابر
انا والله كنت بحكي له عادي زي ما انت حكيت لي ماكنش قصدي حاجة يعني
شناوي
وهي فيها اية يعني لما عزت او اي حد غيرة يعرف ان كان ليا عم ومات وانا ورثتة. انا شايف انه مش عيب ولا حرام واما بنعمة ربك فحدث
في هذة اللحظة يلمح عزت جيهان وهي تدخل المطبخ من وراء ستارة والمطبخ كان جنب الحمام فبص لشناوي وقال
ممكن اخش الحمام

-***-

شناوي
طبعا يا عزت دة بيتك ومطرحك
ويقوم شناوي من علي السفرة وياخذ عزت ناحية الحمام ولم يلاحظ شناوي وجود جيهان في المطبخ فدخل عزت الي الحمام واغلق الباب،،،،،،،
وبعدها بلحظات ومن داخل المطبخ واثناء ما كانت جيهان تحضر طعام لبنتها يفتح عزت باب الحمام بحذر شديد ويخرج من الحمام متجها الي المطبخ ويقف خلف جيهان ويقول بصوت خافت
ازيك يا جيهان
فتفزع جيهان وتبص وراها بخضة لتجد عزت فتقول له بحدة
عزت انت داخل علية المطبخ وانت بتتسحب لية زي الحرامية
فيقترب منها عزت بشكل مبالغ في ويقول لها
بتسحب علشان ماحدش يحس بيا وانا معاكي
فتبتعد عنه جيهان وهي تقول باستغراب
في ايه يا عزت مالك
عزت وهو يقترب
بحبك ومستخسرك في الاهطل اللي قاعد بره دة

‏-***-

ويلف ايد حوالين وسطها وايد علي بوقها ويتهجم عليها فتحاول ان تدفعة بعيد عنها وتصرخ صرخات مكتومة فيقول عزت
بس بس. خلاص انا هاسيبك وبلاش فضايح وحياة بنتك انا اصلا مش عارف انا ازاي عملت كدة. انا اسف والله اسف انا مش في وعيي وشارب سيجارة حشيش ودي اللي خلتني اتجرأ علي مرات اخويا كدة
فتبص له جيهان بغضب شديد وتهدأ بعض الشئ خوفا من الفضيحة اللي هاتحصل ورد فعل شناوي الغير متوقع فيحس عزت بانها بدات تهدأ فقال بخبث
انا اسف كمان مرة. انا هاشيل ايدي بس اوعديني انا امشي من هنا من غير فضايح
فتظل جيهان بصه له بغضب مكتوم ويرفع عزت ايدة ببطي شديد وجيهان بمجرد ما تتحرر من يدة تزقة بعيد عنها وهي تقول بنظرة حادة
انت سافل وحيوان وحقير ومش عارف ازاي شناوي بيتعبرك زي اخوه
عزت بدموع كذب
انا مش عارف ازاي انا امد ايدي علي مرات اخويا مش صاحبي انا بجد اسف
وينزل عند رجلها ويحاول ان يبوسهم
أبوس رجليك بلاش شناوي يعرف اللي حصل
فتبعد جيهان رجليها عنه وهي تقول
خلاص قوم واقف علي رجليك بلاش ترخص نفسك اكتر ما انت رخيص
عزت يبص لها وهو عند رجليها
يعني خلاص وعد منك شناوي مش هايعرف اللي حصل

-***-

جيهان
مش ها يعرف بس ياريت ما شوفش خلقتك تاني في البيت بتاعي
عزت
عمرك ما هاتشوفيني تاني
ويقف ويخرج من المطبخ مسرعا،،،،،،،
ومن داخل بيت مطاوع يرجع عزت ويقف امام السفرة ويبص لجابر اللي كان لسة بياكل ويقول له بارتباك
مش يالا بقي ولا اية
جابر باستغراب
طيب اخلص الاكل
عزت
لا. يالا علشان مافيش وقت

-***-

شناوي
مافيش وقت علي اية
عزت
مشوار هاعملة انا وجابر وكنت ناسي بس افتكرته
ويبص عزت لجابر اللي لسة بياكل وقال بعصبية شديدة
يالا
فيبص له جابر باستغراب شديد ويسيب الاكل ويقوم وشناوي يقول
في اية يا عزت انت دخلت الحمام وانت طبيعي وراجع مش طبيعي لية
عزت وهو يتجة مع جابر ناحية باب البيت
مشوار مهم ولازم نروحه
ويخرج عزت وجابر من باب البيت وشناوي يبص لهم باستغراب شديد وتقف جبهان خلف منه وتبص له وهي دموعها محبوسة،،،،،،،،
ومن امام عربية جابر يقف جابر قدام عزت ويقول له باستغراب
ممكن افهم بقي اية اللي حصل جوة دة

-***-

عزت
انا اتهجمت علي جيهان
جابر مصدوما
انت بتقول اية
عزت
بقول اللي انت سمعتة
جابر بعصبية
انت اية يا أخي اتجننت. هي اية ساحرة لك
عزت
انا ماعرفش ازاي عملت كدة. قولت لك بلاش اشرب حشيش وانا جاي
جابر
ما هو انا كمان شارب زيك بس في وعيي وعارف انا بعمل اية وبقول اية. دة انت من ساعة ما دخلت البيت وانا بتلبخ
عزت
خلاص بقي. اهو اللي حصل. انا كل اللي شغالني دلوقتي انها ما تقولش لشناوي علي اللي حصل لغاية ما نخطفة ونودي لنصر
جابر
انت برضو مصمم علي اللي في دماغك
عزت
شناوي لازم يموت وجيهان تبقي ملكي
جابر
طيب وانا هاكسب اية من الحوار دة

-***-

عزت
هاديك كل الفلوس اللي هاخدها من نصر
فيضحك جابر بشر وخبث ويقول
وانت تاخد جيهان بالفلوس بتاعت شناوي لا يا حلو
عزت
اومال انت عايز اية
جابر
نص فلوس شناوي
عزت باستغراب
اية
جابر
دة صاحبي الغالي وزي اخويا وياما كلت معه عيش وملح يوم ما اغدر بي لازم الثمن يكون مستاهل
عزت
انت طماع
جابر
وانت واطي
عزت
يبقي اتفقنا. هي كانت يعني فلوس ابونا
ومن داخل اوضة مطاوع تجلس جيهان علي السرير وهي بتعيط فيبص لها شناوي ويقول لها
مالك يا جيهان
فلاترد علية جيهان فيمد شناوي ايدة ويمسح دموعها وهو يقول بحنان شديد
جيهان انا بكلمك ردي علية اية اللي حصل خلاكي تعيطي كدة
جيهان
مافيش انا بس مضايقة علشان عزت
وتسكت جيهان فيقول لها شناوي
ماله عزت
فلاترد جيهان فيشك شناوي في الامر ويقول بعصبية وهو بدا يتهتهه
ف في أ اية ع عزت عمل اية انطقي

-***-

جيهان
ماعملش حاجة بس اهدئة
شناوي
مالكيش دعوي بيا. ق قولي أية ال اللي ح حصل
فتفكر جيهان للحظات ثم تقرر الكذب رحمة بشناوي اللي بدأ ينهار عصبيا
عزت دة طمعان فيك جاي يعزي في عمك بعد ماعرف انك ورثت من وراء فلوس. بلاش تعرفة تاني
شناوي
بس هو دة اللي مزعلك. خضتيني
وراح ناحية ازازة مية وشرب قليلا من المية وقال
عزت صاحبي من زمان وزي اخويا انا معاكي انه في عيوب كتير بس بيحب لي الخير ومستحيل يأذيني
جيهان
انت طيب اوي يا شناوي وبتتعامل مع الناس علي انهم زيك ودة غلط عزت ما بيحبكش
شناوي مبتسما
وهايكرهني لية بس دة اصحاب من 13 سنة انتي بس اللي مش بتحبي
جيهان
مين بس يحب التعبان
شناوي
مش للدرجة دي يا جيهان ما حصلتش تعبان ،،،،،،
ومن امام عربية جابر يقف جابر ومعه عزت اللي كان بيحط طين وجله علي عربية جابر فيبص له جابر باستغراب
ممكن اعرف انت بتعمل اية
عزت
هاتعيش غبي وتموت غبي. بغير ملامح العربية اللي هانخطف فيها شناوي
جابر
ومالقتش الا الجلة والطين
عزت
عندك حاجة تاني في البلد دي نغير بيها ملامح عربيتك

-***-

جابر
لا.
عزت
تبقي تسكت وطلع موبيلك واتصل بفايزة
جابر باستغراب
فايزة
عزت
اة فايزة وتخليها ترن علي تيلفون بيت عم شناوي وتسال علي جيهان
جابر
لية
عزت
علشان تلهي جيهان شوية عقبال احنا ما نخطف الاهطل وماتخلهاش تقفل معها الا لما احنا نتصل بيها تاني
جابر
انا حاسس اني حمار
عزت
انت فعلا حمار.
جابر
طيب فهمني ناوي علي اية
عزت
هافهمك في شباك ازاز كبير لمحتة وانا داخل البيت ودة طلع شباك اوضة النوم بتاعت الاهطل انا بقي هاخبط علي الشباك دة بالراحة كدة ونستغل فايزة وهي بتتكلم مع جيهان في التيلفون ان شناوي هايسمع النقر علي الشباك وهايروح يشوف مين بيخبط اول ما يفتح الشباك نسحبة ويتبنج وعلي العربية عدل ويبقي ولا من شاف ولا من دري،،،،،
من داخل بيت مطاوع يرن تيلفون البيت فيرد شناوي قائلا
السلام عليكم
صوت فايزة
وعليكم السلام ممكن اكلم مدام جيهان

-***-

شناوي
اقول لها مين
صوت فايزة
انا ست غلبانة بجري علي يتامة وكنت عايزا منها مساعدة ضروري،،،،،،
ومن خلف بيت مطاوع وبالتحديد عند شباك اوضة مطاوع يتسحب عزت ومعه جابر وهم ملثمين ويرتدو جلالايب لكي يبانو انهم من اهل البلد ويقف عزت وينقر علي الشباك بيدة وينتظر ويكرر هذا النقر اكتر من مرة الي ان يفتح شناوي الشباك علشان يشوف اية اللي بيحصل وبمجرد ما يطل شناوي براسة ويقول
مين
يمد جابر يدة بمنتهي السرعة ويكتم نفس شناوي بمنديل به بنج ويسحبة هو وعزت من الشباك وشناوي يقاوم الي ان اغمي علية ويسحبو الاثنين متجهين الي عربيتهم
و يفتح جابر باب العربية الخلفية ويستعد هو وعزت لوضع شناوي في العربية ولكن في هذة اللحظة يهجم عليهم عوض وهو يقول بعلو صوتة
الحقونا يا اهل البلد الحقونا يا خلق حرامية بيخطفو عم شناوي
فيبص عزت لجابر وهو خائف ويتركو شناوي ليسقط علي الارض ويزق جابر عوض بعيد عنه ويركبا الاثنين العربية مسرعين وينطلق بها عزت وعوض يحاول الالحاق ويمسك بباب العربية ناحية جابر فيزقة جابر بعيد عنه ولكن عوض يجري مسرعا ويقف قدام العربية وبدأ اهل البلد يتجمعوا وهنا بص جابر لعزت اللي عيونه كان فيها شر وهو بيبص ناحية عوض وقال جابر
لا يا عزت بلاش اللي بتفكر في بلاش الدم يا عزت
ولكن عزت يدوس بنزين علي الاخر واتجة ناحية عوض بمنتهي السرعة

-***-

يتبع …

لقراءة الفصل التالي : اضغط هنا

لقراءة جميع فصول الرواية اضغط على ( رواية لعبة الغدر )