رواية غيبوبة القدر الفصل الخامس 5 بقلم رويدا القاضي

رواية غيبوبة القدر الفصل الخامس 5 بقلم رويدا القاضي

رواية غيبوبة القدر البارت الخامس

رواية غيبوبة القدر الجزء الخامس

رواية غيبوبة القدر الحلقة الخامسة

صدام: واك وانت كان علقتي زي السارينة هات شن يسكتك .
منى: مش قتلك انس يستنى فيك النوم كان يشبع راهو شبع القطاطيس🐈 بناكلوا نوم.
صدام: همك كله غير في الماكلة الثلاجة معبية خلي نزيد شوية بس ونفيق.
سارة: هيا حبيبي فيق مش تبي تمشي للعمل وعندك موعد مع صدام.
أنس:😴 شن من قلك عليه الموعد 🤨 ولا تسمعي فيا لما نتكلم .
سارة: هذا للي طلع منك 😤 منى اتصلت بيا وقتلي ع الموعد .
أنس: اها قصدك ضماتك معاها للعصابة قوليلي هكي من الأول نفهمك اهو فقت وانت حالة.
سارة: اسمع فيق باش حتى تمشي تسجلني في الجامعة
باش نبدأ نقرأ مش تفوتني.
أنس: 🤤 مش كان تفوتي العام هذا وتخلينا نديرو مشروع حلو مع بعض خير.
سارة: مشروع شن ترا قولي مرات يعجبني .
أنس:😁 تفوتي السنة كلها راقدة جنبي لين تحملي .
سارة:😳 تحشم عاد شن تفاهمنا نكمل سنة اولى جامعة ونفكرو في الموضوع.
انس: توا يعجبك صدام ايجيه بيبي قبلي 🥺 يرضيك هكي.
سارة: انا سايرتك هلبا الحق 😏 عندك مهلة بنمشي نجيبلك الفطور وتعرف نلقاك في مكانك لما نصب عليك
اميه امسقعة تفيق الميت من قبره.

أنس: عليك شر كان مشيت مع خالد للجيش خيرلي من العذاب هذا كله ….تقول مسجون معقولة هكي جفاف ياعفاف لابوسة لاحضن.
مها: شن بيقولي عليا الناس كانت ترافع في قضية طليقته تزوجاته .
مهيب: انت عارفة الموضوع ومافيه انا مش غالط وشفتي بالأدلة اعطيني فرصة تعرفي عليا خليني
نقرب منك أكثر.
مها: شن منظري قدام الناس مستحيل يصدقني حد بكل كلا بيقول كذابة خطفت الراجل من مرته.
مهيب : هيا معاش مرتي ومعاش يربطني بيها شئ لا من قريب ولا من بعيد .
مها: انت علاش مستعجل اعطيني وقت خلي نعرفك
أكثر من هكي .
مهيب: خايف يخش حد بيني وبينك وتخليني والله من أول يوم شفتك فيه وانا نفكر فيك ماقدرت نشيلك
من بالي صح رغم انك واقفة ضدي في حقي ومافيش
كلام بيني وبينك لكن عقلي وقلبي يقولولي هاذي البنت
للي تلزمك .
مها: مانعرفش علاش مصدقاتك لكن كيف ماقتلك من حقي نتعرف عليك أكثر من هكي .
سكرت منه الخط ” معقولة بعد الصبر هذا كله هو يكون نصيبي باهي ومحمد شن بنقوله كم مرةبنلاقاله عذر
من كثر إهماله وبعده بذون سبب حبي ليه بدأ ينقص
مع الأيام”.
حاتم: الصبر ياربي شهرين راقدين في الحوش تقول
وحدة جايبة بالعملية 🤣 والله حتى للي جايبة بالعملية تتحرك شن درتوا العار تقول ماتزوجتوا غير انتم.
صدام: شن فهمك ياباكو انت هذا استرخاء وراحة نفسية صعب يفهمها معتوه زيك .
حاتم: والله توقعتكم بتطلعوا بصغاركم 🤣🤣 اسكت قبل ايجئ انس راك تتكلم قدامه هكي.
صدام: شن تحساب وجهي كيف وجهك لانتحشم ولا نستحي .

انس: اهلين شنحكم .
حاتم: صحبة عجول صحبتك اهيا معقولة لا هاتف تقيمه وتسأل وينك لا رسالة مسيب الورشة في رقبتي
لين ندزلك في فلوس دز تقول هارب مني 😒 عارف
روحك بتاكل السخط هذا علاش مندكس رأسك وساكت
ماعندك ماتقول كله دايره عاد .
أنس: عيب يارفيق ياقدر يامعزة انت .
حاتم: ايه اضحك عليا بكلمتين لا معزة ولا جدي لكن اه ياغيبت خالد وخلاص .
أنس: غير افهمني بس انا وضعي يفرق ع غيري راهو البنت ماتعرفنيش قعدت معاها باش تتعود عليا مش
لشئ ولا هارب منك .
حاتم:😏 شكلها تعودت عليك هلبا من الروج للي خدك
امسح يارومنسي انت بنمشوا لراجل اديرلنا العار.
صدام: هههه 🤣🤣🤣 ريت مايطلع منه ريت .
أنس: ايه شن قتلي وضعه الرأس نظيف يمشي حاله في طريق طويلة .
حاتم: ايه غير الموضوع غير اطمن يمشي حاله حاجة نظيفة 🚛 حاجة توب .
صدام: باهي شن حقاتها من وين لوين بالزبط باش نخشوا في اروحنا .
حاتم: والله مساعدة يعتبر منه ليكم الرأس بروحه بلا
الحاوية بي 75 حاجة نظيفه سرفز كامل شد الطريق
الكويلة وانت مطمن .
صدام: شن ياأنس يساعد السوم نخشوا عليه ياأبو نسيب .
أنس: والله انا من رأي نقولوا ان شاء الله مبارك .
حاتم: خلاص خلي نمشو نتفاهمو مع الراجل ويارب يكون عتبة خير عليكم.
منى: هلا سارة شنجك فاضية اليوم ولا عندك ماديري .
سارة: ماعندي ماندير مكسدة في الحوش وخلاص بين اربعة احيوط زي البومة .
منى: باهي شن رأيك غدوا نمشوا لحوش بابا نغيرو جو منه تشوفي عمتك .

سارة: ياريت والله استاحشت حتى نشوف مها ونحكي معاها.
منى: خلاص معناها يروح اقعدي زني ع أوذانه لين يمل ويقولك باهي .
مها: ثاني مشيت للعمل وانا في المكتب معاي صاحبتي أمل مكسدة لين سمعت صوت الباب نفتح بي غل .
أمل:🤨 زعمك من هذا عديم الذوق للي هدم الباب زي الثور خلي نمشي نشوفه.
مها: ابصر من متأخر ع دفع النفقة وجاي توا يعرض في عضلاته عليا باش ماناخدش فيه إجراء .
محمد:😤 خيرك انتى شن اديري بالزبط من الراجل للي يومها شفتك واقفة عليه .
مها: شن تقول تكلم بعقل باش نفهمك مش جايني تقول خاش لزريبة اما راجل بالزبط تقصد باش نقدر نجاوبك .
محمد: هذا للي رافعة عليه قضية طلب حضانة 😡 علاش جاي يكلم فيك ونشوف فيك تكلمي فيه وهو شاد الهاتف ابصر شن يكتب أكيد رقمك طبعا.
مها: ماشاء الله طلعت مقصقص حتى ع موضوع القضية شن 😒من امتا تهتم بتفاصيل القضايا للي نرافع عليها ومدامك شفته واقف عليا جيت سألته بروحك شن يبي راهو جاوبك .
محمد: اسمعي القضية هاذي كلها تفوتيها ومعاش عندك اي علاقة بيها كان تبي علاقتنا تستمر 😤.
مها: أي علاقة تحكي عليها للي نسيت انها موجودة في حياتي اصلا 😏.
محمد: شن قصدك بي امه الكلام اهو 😡.
مها: فهمك كفاية تكلمني بجوك تنشغل عليا بجوك بالأسبوع مانسمعش صوتك عندك عادي قريت معاك اربعة اسنين جامعة وانا صابرة عليك لكن تزيد اضيع
مني باقي عمري بحجة نحبك هاذي لا .
محمد: لا بالله علمتك الكلام وبديتي تردي عليا.
مها: عادي هلبا مرات يتفوق التلميذ ع أستاذه وافهم
كلامي كيف ماتحب .
محمد: توا ايجيك يوم وتندمي يامها لانك خسرتيني

وقتها ترجعيلي نادمة ومعاش يهمني بعدها ندمك .
أمل: مستحيل تندم ع شئ زي السنين للي ضاعت من عمرها ع خاطرك .
مها: هوا طلع وانا قعمزت نفكر شن عرفه في القضية ومن قله وانا مش من النوع للي نتكلم ع تفاصيل أي قضية نرافع عليها والجلسات سرية مافي معانا حد شن الموضوع 🤔 حاجة تحط العقل في الكف .
أمل :شن تفكري فلي نفكر فيه 😱 ولا غير انا وليت شكاكة زايدة ع اللزوم .
مها: نفس الشئ كيف عرف اصلا هوا هاذي امور مانحكيلاش فيها وفترة للي كنت نتابع في الجلسات كان هوا اجازة .
أمل: الموضوع في انّ صدقيني علاش هوا والع نكي ع خاطر شن قضية ومن امتا هو يغار ولا يعرفها الغيرة 😏ماهو ديما كل شئ عنده عادي .
مها: تعرفي عندي حل لكن صح بيكلفني شوية فلوس ع شوية معارف لكن مش مهم .
أمل: فهميني شن في رأسك بالزبط باش نبدأ عارفة شن فيه .
مها: بنمشي لشركة عندي وحدة تقدر تخدمني في لبيانا
اطلعلي أرشيف مكالماته كلهم وبعدها نعرف شن فيه .
أمل: لكن الموضوع هذا صاعب وشبه مستحيل .
مها: للي عنده فلوس يقدر ايدير في البحر طريق يافالحة .
أمل : في هاذي جبتي فيها كل شئ توا ولا ماشي بالفلوس وبس .
أمينة: اسمع ياجاح جيبلي الخيرات للي في السوق كلها جميع انواع غلال الفواكه جيبها ونبي عصير طبيعي وشكلاطة الكاكاوية هذايكا الغالية ونبي تورتا صغيرة
ونبي الحشو متعها شكلاطة وكراميل ومكسرات مش تجيبها كلها 😏 كريمة زي الباسطى الزمني .
علي: وخير ان شاء الله بالك جايين يخطبو في مها وانا
ماعنديش علم بضاعة خطوبة خير يافالحة .
أمينة: جيب واسكت مافيه غير الخير غدوا جايين سارة وأنس ومنى وصدام وبسلامتهم ربي يحفظهم من العين واخدين رأس 🚛 بينهم شركه .
علي: اسمعي يافالحة راك فاهمة الموضوع غلط مفروض هما يشرولنا الزردة مش احنا .
أمينة: سبحان الله عليك معقولة تحسبلهم باللقمة ايح
ريت كان جيت زي الأبهات للي تذبح وتسيل في الدم شن بيصر فيك 😒.

علي: نموت مجلوط وبدين بنتك وعندها سيارة اطلعي من رأسي وقولها ترفعك تاخدي للي ناقصك كله وعلاش
وجع الرأس هذا .
أمينة: شن لا بنتي ولا ولدي انت المجبور تجيبليطلباتي كلها شن تبيني نمشي نشد سيارة من الشارع تقضيلي حاجتي .
علي: واك منك مافيش يما ارحميني وافقتلي ع التكه حاضر ياهانم نجيبلك للي تبيه كله أي أوامر ثانية .
أمينة: اسمع اعزم محمود وحواء مسكينة طول اليوم قعدا بروحها بعد ماتزوجت سارة .
علي: توا يامرأة هكي تبي غير اتعبيني تحكي معاه اليوم كامل في الهاتف تجبدو في خلق ربي من الألف للياء جت في العزومة طلعتي ماتعرفيش تكلميها 😏.
أمينة: شن فهمك في جو للي يقولوله والإيتك نظام الأصول اهو .
علي:🤣 غير مدامك تعلمتي الإيتك كله باهي.
صدام: تعالي جنبي اليوم طلعت ساعتين حاس روحي كأني ماشفتكش اليوم كله 🙈.
منى:وهو انا نقدر نبعد عليك ياعمري انت ع طول رح نكون جنبك اليوم وغدوا والعمر كله ❤❤.
صدام: انت نعمة بعثهالي الله سبحانه وتعالى مهما ايصير ياحبي مستحيل نخليك تزعلي مني ولا تشيلي
في قلبك حتى ذرة زعل انا سبب فيها .
منى:لدرجة هاذي تحبني ياصدام .
صدام: والله فوق مايتخيل عقل بشر كيف مانحنش عليك ومانحبكش وانتي مخلوقة من ضلعة مني.
منى:😏 كملها قول ضلعة عوجاء وخلاص ماتحشمش .
صدام: واحلى ضلعة عوجى في الدنيا انت .
منى ” مازال كلامه محفور في ذاكرتي شن بننسى كل يوم نفيق ونلقاه جنبي الضحك للي يضحكه لما نبصر عليه كل صبح نفيق ضروري مايقولي كلام خليه محفور في قلبي مش انت للي قتلي مستحيل نخليك لين ايشيلوني على الكتوف “.

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية غيبوبة القدر)