رواية تشابك أرواح الفصل الثالث 3 بقلم هبة الله أحمد

رواية تشابك أرواح الفصل الثالث 3 بقلم هبة الله أحمد

رواية تشابك أرواح البارت الثالث

رواية تشابك أرواح الجزء الثالث

رواية تشابك أرواح الحلقة الثالثة

باب الاوضه خبط .. طلعت عشان افتح لاقيت بنوته في اواخر العشرينات ابتسمتلي وقالت مستر غيث بعتني لحضرتك عشان الحفله
_ ايوه بس احنا مش هينفع نحضر .. قصدي يعني كنا هنعتذرله عشان ورانا حاجات تانيه .. طيب ممكن تتفضلي جوه ثواني بس وانا هتصل عليه ابلغه
.. دخلت البنت الاوضه وخبطت علي سلمي عشان تخرج من الحمام وقولتلها ان في ناس تبع الشركه بره
مسكت موبايلي ورنيت علي مستر غيث
_ خلصتو ولا لسه
_ لا حضرتك احنا معملناش حاجه اصلا .. احنا بنعتذر مش هنقدر نحضر
_ مش هينفع يارحمه انا عملت حسابي انكو هتكونو موجودين مفيش اعتذارات دا شغل مش لعب .. انتو هتكونو معايا وعايز عينكو تبقي عليا دايما عشان هحتاجكو انكو تستقبلو الناس وكمان تتكلمو معاهم في حاجات تخص شركتنا .. وقبل ماتقوليلي ان دا مش شغلك او انكو في اجازه .. انا بطلب دا بصفه شخصيه لأني شايف ان اسلوبك انتي وسلمي كويس جدا وهينفعني بكره .. البنت اللي جاتلك هتاخد مقاساتكو عشان اللبس واي حاجه هتقوليلها عليها هي هتنفذها وياريت بسرعه لأن الحفله بكره يعني فاضل عليها ساعات بس
قفل في وشي
بصيت للموبايل كام ثانيه وحطيته ع الترابيزه اللي قدامي وقولت للبنت ابدأي خدي مقاسات سلمي علي مااعمل حاجه وجايه
سبتهم ودخلت البلكونه وفضلت الف حوالين نفسي واشتم علي مستر غيث .. دا حتي مدانيش فرصه اعترض او اوافق .. ايه المعامله دي .. طب والله بعد الحفله لهقوله ان المعامله دي متنفعش معانا خالص ..

دخلت الاوضه لقيت سلمي عماله تقول للبنت علي ستايل الفستان اللي هي عايزاه … بعدها بدأت تاخد مقاساتي انا كمان واتفقنا علي فستان بسيط لونه ازرق
مشيت البنت وبعدها حكيت لسلمي اللي حصل وانا دمي محروق وهي كانت طايره من السعاده عشان هتحضر الحفله
اليوم عدي وكان لازم ننام عشان الحفله بكره
غمضت عيني وحلمت بحمزه بيمد ايديه ليا وانا خايفه امسكها وايده دي كان كلها شوك والشوك بيزيد كل ماالوقت بيعدي
صحيت من النوم مفزوعه واتوضيت وصليت الفجر وكانت سلمي لسه نايمه .. نزلت ع البحر
كان مستر غيث واقف هناك هو كمان
وقفت ع الجهه التانيه وعملت نفسي مخدتش بالي منه لحد مالقيت حمزه قدامي
ابتسملي وقعد
_ لو قولتلك اسف عمرها ماهتفيد بحاجه صح
_ اه صح
_ لسه مبتحبيش كلمة اسف
_ مالهاش معني .. مبتصلحش حاجه اتكسرت
_ عندك حق يا رحمه
_ انا مش مرتاح .. من يوم مابعدنا وانا حياتي متلخبطه .. مش عارف اعيش كويس .. مش لاقي معني لحياتي وانتي بعيده .. انا عارف اني غلطان بس صدقيني الموضوع مكانش زي مانتي فاكره ..
_ ممكن منتكلمش في الموضوع دا .. وانساني ياحمزه لأني تقريبا نسيتك ..
_ انا عارف انك بتقولي كده عشان ابعد بس انا لسه …
كان لسه هيكمل بس صوت مراته خلاه يسكت ووشه يحمر اول ماسمعها بتنادي باسمه
دي تاني مره اشوفه خايف منها بالشكل دا
بس المره دي لاقيتها بتوجهلي الكلام وبتقولي
_ دي تاني مره اشوفك واقفه معاه .. انتي مين بالظبط وعايزه منه ايه
_ اولا هو اللي واقف معايا مش انا اللي واقفه معاه وبعدين جوزك دا ميلزمنيش في حاجه.. كان معايا ياحبيبتي وسبتهولك .. اشبعي بيه
قولت الكلام دا وانا نفسي الطشها قلمين الصفرا دي خطافة الرجاله
صوتنا ابتدي يعلي وهي بترد عليا وحمزه واقف مش عارف ياخد موقف ولا يتصرف لحد ما مستر غيث جه علي صوتنا
وقف وسطنا وقال في حاجه يارحمه
ردت مرات حمزه وقالت

_ انت تعرف الاشكال دي منين يااستاذ غيث
_ معلش يامدام هند بس دي رحمه موظفه عندنا في الشركه ومن احسن الناس عندنا وكمان انا اعرفها معرفه شخصيه .. خير بس ايه اللي حصل
_ يامستر غيث الست دي مش محترمه انت تعرفها منين دي جايه لحد عندي تتخانق معايا انا مش فاهمه فين مشكلتها اصلا
حمزه اتكلم وقال
_ انا اسف ياجماعه دا سوء تفاهم انا بعتذر ياغيث عن اللي حصل .. اشوفك بالليل في الحفله
واخدت مراته ومشي
_ هو جاي الحفله بالليل
_ ايوه دا من ضمن الشركات اللي اتعاقدنا معاهم
_ هو في ايه يارحمه فهميني كنتو بتتخانقو ليه
_ حمزه كان خطيبي
_ وبعدين
_ سابني عشان هند اوهمته انها بتحبه بس الحقيقه انها عايزاه عشان فلوسه
_ ومين اللي قالك كده
_ احساسي دي مش منظر واحده بتحب .. وبعدين دا بيخاف منها يامستر انت مش شايف شكله بيبقي عامل ازاي في وجودها
قولت كده وانا بضحك جامد عشان افتكرت شكله
ضحك مستر غيث وقالي عندك حق بس طالما كده متزعليش عليه كده هو ميستاهلكيش
_ مانا عارفه بس انا زعلانه علي حالي مش اكتر
كان لسه هيتكلم بس قطع كلامه رنه موبايلي وكانت من سلمي
_ رحمه البنت بتاعة الفساتين هنا وعايزاكي عشان تشوفي الفستان
_ حاضر جايه
_ معلش يامستر غيث هقوم عشان هعمل بروفه للفستان
_ تمام تعالي هطلع معاكي عشان هروح اوضتي اخد منها حاجات وانزل القاعه عشان الحفله اشوفهم وصلو لفين
وانتي خلصي فستانك وياريت تنزليلي انتي وسلمي
_ حاضر
طلعت الاوضه وعملت بروفه للفستان وكان تحفه عليا وبتاع سلمي كمان كان حلو اوي عليها

خلصنا ونزلنا القاعه وكنا بنشرف علي التجهيزات الاخيره للحفله خلصنا كل حاجه ومستر غيث استعجلنا عشان نطلع نلبس
لبسنا الفساتين وعملنا ميك اب وكان شكلنا حلو اوي
نزلنا الحفله وكنا مع مستر غيث بنستقبل الناس
الحفله كانت حلوه اوي بس كانت زحمه
ماصدقت الدنيا هديت وطلعت بره وسبت سلمي ومستر غيث مع الناس جوه
_ هتفضلي تهربي مني كتير
_ علي فكره خضتني .. وبعدين اهرب منك ليه هو انا عامله عمله .. ولا خايفه من حد يشوفني زيك فمبطلعش غير في الضلمه .. حمزه انا لحد فتره قريبه كنت فاكره انك شخص خاين بس لكن النهارده اكتشفت كمان انك شخص جبان وكداب .. وعايش دور الضحيه .. انا كنت مخدوعه فيك.. انا كل يوم بيعدي وبعرفك علي حقيقتك ياحمزه بكرهك .. انت خدعتني سنتين كاملين مفهمني انك بتحبني .. بس انت مكنتش بتحب غير نفسك ومصلحتك والحمدلله ربنا وقعك في اللي شبهك .. مراتك اللي انت فاكرها بتحبك دي هتبيعك اللي وراك واللي قدامك .. انا سمعتها بنفسي واحنا في حمام المطعم .. لو سمحت متحاولش توقفني تاني مهما حصل
سيبته ومشيت وانا جوايا مرتاح .. يمكن لو مكانش حصل اللي حصل الصبح دا انا مكنتش عرفت حمزه علي حقيقته بس اللي حصل دا خلي صورته قدامي تتهز اكتر ماكانت انا حاسه اني كرهته
ابتسمت وانا بردد الكلام دا جوايا واول مادخلت جوه وشوفت سلمي حضنتها وقولتلها بهمس انا حاسه انو خرج من جوايا ياسلمي انا مبقتش بحبه
حضنتني اكتر وقالتلي كنت عارفه انك هتفوقي من اللي اللي انتي فيه دا يارحمه اخيرا ياحبيبتي ربنا يريح بالك يارب ويسامحه بقي علي اللي عمله
_ انتو مش مركزين معايا خالص علي فكره
_ سوري يامستر غيث بس كان في موضوع كده بنخلصه
طب ممكن نركز شويه مع الناس
_ تمام يامستر غيث
بدأنا نركز اكتر في الحفله ومع الناس ومستر غيث طلع يقول كلمه عشان يرحب بالناس اللي في الحفله ويتمم التعاقدات مع الشركات

خرجنا انا وسلمي بره شويه عشان نتكلم
_ انا مبسوطه اوي يارحمه انك خلاص رجعتي لعقلك
_ انا كمان حاسه اني كنت بستنزف في مشاعري ع الفاضي .. انا حاسه اني كده مرتاحه اكتر
_ طب اسكتي احسن حمزه الزفت دا جاي ورا اهو
_ هو انتي فاكره يعني لما تقوليلي كلمتين وتمشي اني هسيبك يارحمه
_ حمزه لوسمحت متتخطاش حدودك اكتر من كده .. ولاحظ انك راجل متجوز .. ومراتك لو جات وشافتك واقف معايا تاني شكلك هيبقي وحش اوي .. لو سمحت امشي
سلمي اتكلمت
_ جرا ايه يااستاذ حمزه هو انت مش سامع ولا ايه مالك واقف متنح كده
_ خليكي في حالك ياسلمي انا بكلم رحمه .. انا اعتذرتلك يارحمه للدرجادي مش فارقلك
_ هو انت مبتفهمش بقولك مبقتش عايزاك خلي عندك دم انت راجل متجوز.. لو سمحت امشي
_ في حاجه يااستاذ حمزه .. ايه اللي بيحصل هنا يارحمه
قولت في سري شكلها كملت ومستر غيث جه علي صوتنا .. يارب عدي اليوم دا علي خير
ضغطت علي ايد سلمي بخوف فقالت
_ مستر غيث حمزه بيضايق رحمه واعتقد كده عيب يعني يحصل وانت موجود
_ استاذ حمزه اظن عيب اوي اني اشوفك مره واتنين بتحاول تتعرض لرحمه .. انا المره اللي فاتت سكت عشان مدام هند كانت واقفه محبتش اكبر الموضوع بس انا محبش اشوفك مره تانيه واقف معاها وإلا هفسخ العقد مع شركتك
_ متدخلش نفسك في الموضوع ياغيث دا حوار قديم بيني وبين رحمه ولازم اخلصه دلوقتي
_ وايه بقي الموضوع اللي بينك وبين خطيبتي ياحمزه
معرفش ايه اللي حصل بس انا حسيت ان الدنيا بقت سوده قدامي .. وصدي الكلمه فضل يرن في ودني .. وصوت سلمي وهي بتكرر الكلمه وبتقول خطيبته .. انا سكت مقدرتش انطق بحرف لما بصيتله وهو غمض عينيه وهز دماغه بأني اسكت .. صوتهم بدأ يعلي وحمزه بدأ يتعصب ومستر غيث كان كل اللي عمال يردده هي كلمه واحده اياك تتعرض لخطيبتي تاني وإلا هحبسك
الناس بدأت تتلم ع الصوت وانا حقيقي بدأت افقد اعصابي كنت خايفه ومتوتره معرفش ازاي وامتي حسيت ببروده ايديه في ايدي .. يالهوي دي ايد مستر غيث مش سلمي .. كان منفعل جدا وعمال يزعق وانا خايفه ونفسي اشد ايدي واجري حاولت اعمل اي حاجه عشان يسكتو بس معرفتش لحد مالقيت نفسي بقع ع الارض وسلمي بتصوت ….

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية تشابك أرواح)