رواية 30 يوم حياة 3 الفصل السادس 6 بقلم أميرة أسامة

رواية 30 يوم حياة 3 الفصل السادس 6 بقلم أميرة أسامة

رواية 30 يوم حياة 3 البارت السادس

رواية 30 يوم حياة 3 الجزء السادس

رواية 30 يوم حياة 3 الحلقة السادسة

ادهم….بتعمل ايه ياصاحبي
زين…العربيه دي فيها حاجه معقربه كل حاجه فيها سليمه ومركب كل حاجه جديده بايدي بس بمجرد ما بدورها تدخن
ادهم…اول مره الاقي حاجه معصلجه معاك
زين…والله ما عارف فيها ايه
ادهم…سمي الله كده و هتظبط
زين…انت رايح فين صحيح
ادهم….ابدا هيما جوه في الصاله وانا قولت اخرج اجيب قهوه من صالح وابص عليكم بصه
زين…طيب اعد وهخلي صالح يجبلنا قهوه نشربها سوا
ادهم…ماشي
وقبل ما يأعد ادهم
فجأه سمعوا صريخ وصوات سمع الحاره كلها
زين…ايه ده في ايه
ادهم…ياساتر يارب
صلاح…الصوات ده جاي منين
صالح…تعالوا بسرعه نشوف في ايه
خرج الجميع من الشبابيك والبلكونات ومن المحلات
علي صوت الصوات.
جري زين علي مكان الصوات وكل الناس وشباب الحته وراه أتفاجئ زين بالست ناديه نازله من باب البيت هي وجوزها وولادها و بتصوت صوات يوجع القلب
وكان ده بالنسباله عكس شخصيتها تماما ست ناديه شخصيه هاديه جدا وراقيه وبتشع حنان وطيبه جدا.
زين…في ايه

 

 

 

ناديه….اللي كنت بتسألني عليه امبارح راح يا زين حسام راح يازين ملحقتش أسلملك عليه ولا لحقت انا كمان اسلم عليه بقالي اسبوع مسمعتش صوته ولا اعرف عنه اي حاجه كل مره كان بيكلمني فيها كان بيوجع قلبي وهو بيقفل معايا وبحس انه بيودعني المرادي مكلمنيش ولا ودعني يا زين
المرادي كلمونا عشان يبلغونا نستعد لاستقبال حسام يا زين بيقولولنا ابنكم شهيد يا يا ابني..فرحتلك والله يا حسام انك نولت الشهاده بس قلبي واجعني يا ابني قلبي وجعني يا حبيبي عمري ما تخيلت ان ابقي ام الشهيد سمعت الكلمه دي كتير بس عمري ما تخيلتها وعمري ماجربت احساسها
ناديه احساسها صعب اوي يا ابني فرحنالك والله ياحسام بس قلبي بيتعصر علي فراقك يا ابني هتسيب حمزه وسيف لمين سيف ملحقش يفرح بيك ولا يحفظ ملامحك يا حبيبي
زين…وحدي الله ادعيله ابنك عاش بطل ولما مات مات شهيد حسام ربنا اختاره وكرمه افرحيله
ادهم…شدي حيلك ياست ناديه شهد حيلك يا استاذ محي ربنا يصبر قلوبكم يارب
ناديه…يارب انت اختارته وانا راضيه مش معترضه بس اديني الصبر يارب اديني الصبر علي اد غلاوته عندك وعندي
…..خيم الحزن علي المكان كله واصبح الشارع كئيب من تاني دموع وتأثر ووجع فقدت الحاره شاب من زينه شبابها شاب لا يتعدي عمره ال34 من أكفأ ضباط الجيش راح ضحيه عمليه إرهابيه أستهدفته هو ومجموعه من الضباط والعساكر وسقط الجميع قتيلا
ليس هناك كلمه توصف الشهيد ولكن قد تتجرأ بعض الكلمات لتحاول وصفه فهو شمعه تحترق ليحيا الاخرون إنسان يجعل من عظامه جسرا ليعبر الاخرون للحريه
عدت سعات كتير علي الحاره لكن كانت ساعات ثقيله علي الجميع الخبر كان صدمه كبيره اصاب الجميع منظر الام والزوجه والاهل كان يبكي الحجر بسرعه اتقفلت جميع المحلات وساب اصحابها القرأن بداخلها شغال وكل بيت شغل القران وكأن الحاره اصبحت معزي كبير بيشاركو فيه الجيران الحزن والوجع مع بعض عدي اليوم طويل جدا علي الجميع لحد ما حل صباح جديد الكل قام من بدري لمشاركه الجنازه
وصلت جثه حسام للحاره زي ما طلبت والدته ووالده في جنازه عسكريه كبيره
وراح وراه الحاره كلها توصله لمأواه الاخير..
وقبل ما ينزل قبره راحت والدته علي الخشبه اللي شيلاه..
ناديه..حسام ياحبيبي خلاص يابابا ماشي و سايبني ماشي وواخد قلبي معاك ياقلب امك انا فرحانه ليك ياحبيبي
مش زعلانه بس قلبي واجعني عشان مش هشوفك تاني كان نفسي اخد في حضني واسمع صوتك قبل ما تروح لربنا…بس مش مهم هشوفك فالجنه يا ابني ريحتك حلوه اوي يا حسام الملايكه مستنياك في الحنه عشان تزفك ياحبيبي اوعي تخاف يا ابني اطمن انا مش همشي الوقت هفضل جمبك لحد ما تطمن متقلقش يا ابن عمري ربنا هيبقي احن عليك مني انت كنت امانه عندي وربنا خد امانته امبارح كان قلبي واجعني لما سمعت الخبر بس انهارده لما حسيت بيك وشوفتك وشميت ريحتك الحلوه اطمنت وقلبي ارتاح وربنا وراني المكان اللي هتبقي فيه يا حبيبي والله شوفته وانا صاحيه يا حسام كأن ربنا بيقولي اطمني ابنك هيبقي في احسن مكان وهيبقي امانه معايا لحد ما اروحلك..
متخافش علي ولادك حمزه وسيف في عيني مراتك كمان في عيني يا حبيبي
نام با ابني وارتاح وحقك انت واللي راحوا معاك هيجي..
راح عليها زين وادهم وقفوها

 

 

 

قامت ناديه وقفت وهي سانده علبهم وبتمسح دموعها وعلي وشها ابتسامه
رضا خرجوا حسام من التابوت عشان ينقلوه لقبره وبمجرد ما شافته طالع بالكفن وظاهر دمه عليه
فضلت تزغرط وهي دموعها نازله..
ناديه…زغرطوا لابني فرحوه ده عريس
فضلت ستات الحاره تزغرط ودموعهم نازله بحزن
وادفن حسام وراح لعالم جديد عالم بعيد عن الكدب والنفاق والارهاب عالم نضيف مفيهوش اي خيانه
عالم ميعرفش مكان للدموع
……….
ابتدا الجميع ينسحب واحد ورا التاني وفضلت ناديه ودعاء زوجت حسام وولادها ووالده محي واخوه محمد الاصغر منه واخته هيام
وفضل معاهم زين واصحابه ورجاله الحته
الكل واقف يدعي ويقرا قرأن عدي حوالي ساعه
سعيد…يلا يا استاذ محي خد ست ناديه وولادك وروح خلاص اطمنوا عليه
ناديه…بتوهان مش قادره اسيبه
سعيد…هو خلاص اطمن وخوفه راح متقلقيش عليه ده بين ايد ربنا يعني حبك وخوفك عليه ميجيش ذره عند اللي خلقه دي امانته وهيكون امين عليها اكتر مننا
سبيه يرتاح متوجعيهوش هو حاسس بيكي اكيد فرحيه وسبيه يفرح بالمكانه اللي هو فيها
محي….قومي يلا ياناديه سيبي ابنك يرتاح في تربته
زين…يلا يا ست الكل بقي قومي ارتاحي انتي مرتاحتيش من امبارح
ناديه…ارتاح واسيب ابني لوحده
زين…ابنك مرتاح في مكانه بلاش انتي تقلقيه عليكي انا بقول عليكي قويه يلا قومي ووحدي الله
ناديه..لا اله الا الله
خرج الجميع من المدفن ورجعوا عالحاره
يستعدوا للعزاء
حل المساء عليهم
والشباب جهزوا صوان كبير للعزاء
كان الصوان مفيهوش مكان سواء من اهل الحته او من الضباط اصحابه ورتب كبيره جات تعزي فيه
وبعد وقت طويل خلص العزاء
احمد العربي…شد حيلك يا استاذ محي
محي…الشده علي الله
سعيد…اطمن علي ابنك يا استاذ محي امبارح انا شوفتله رؤيه حلوه الجنه كانت بتجهز لابنك افرحله يارتنا كلنا مكانه
محي….يارب صبرنا علي فراقه
راح زين مكان عزاء الستات
كان فضي إلا من اهل حتته
راح علي ناديه اللي كانت اعده ساكته وعلي ملامحها هدوء كبير ابتسمت اول ما شافت زين والشباب
ناديه…تعبتكم معايا يا حبابيي
زين…تعبك راحه يا ست الكل
ادهم…عايزك تشدي حيلك كده
ايهاب….ربنا عوضك بولاده ادعيله كتير وافرحيله
ناديه….انا مش زعلانه والله انا بس قلبي واجعني شويه ياولاد بس عارفه ان ربنا كريم وهيضيع الوجع ده شويه بشويه بس الفراق صعب اوي
زين…اكيد صعب بس محدش فينا ليه في نفسه اي حاجه
ناديه…اكيد يا زين مادايم إلا وجه الله
زين…لقي حمزه واقف علي جنب وحزين
راح عليه ونزل لمستواه
زين…ايه يابطل مالك كده
حمزه…هو بجد يا عمو زين انا مش هشوف بابا تاني
زين…بابا راح مكان جميل عند ربنا يا حمزه راح الجنه سبقك انت وسيف وماما عشان يجهزلكم مكان حلو اوي لما تروحوله يكون جاهز
حمزه…بس بابا هيوحشني اوي بقالي كتير مش شوفته

 

 

 

زين…بتأثر عارف انه هيوحشك يا حمزه واكيد انت كمان هتوحشه اوي بس المفروض بقي تشد حيلك كده انت بقيت بدل بابا انت راجل يا حمزه المفروض تبطل الزعل ده وتدعي لبابا علي اد ما تقدر وتخلي بالك من سيف عشان هو لسه صغير وتخلي بالك من ماما كمان انت بقيت الراجل بتاعهم الوقت صح
حمزه…صح…بس هما لبه موتو بابا ده كان طيب اوي
زين….عشان هما ناس وحشه يا حمزه مش بيحبو الخير ابدا وبيعملوا كل حاجه غلط وحرام ولما بابا حاول يمنعهم هما بقي عشان وحشين موتوه بس انت عارف ربنا هيدخل بابا الجنه وهيدخلهم هما النار ويحاسبهم يعني المفروض تفرح عشان حق بابا هيرجع
حمزه…طيب هو البوليس مش هيقبض عليهم
زين…لا طبعا اكيد هيقبض عليهم ويعاقبهم كمان وهيتحاسبوا الاول في الدنيا وبعدين هيروحوا بقي لربنا يحاسبهم الحساب الكبير وساعتها بابا هيكون واقف يتفرج عليهم وهما في النار وربنا بيرجعله حقه وبيفرحه ان اللي موتوه في الدنيا خد حقه منهم في الاخره
حمزه….حاضر
زين…بابا كان قوي يا حمزه وراجل عايز اشوفك انت كمان زيه قوي وراجل تخلي بالك من اخوك ومامتك تذاكر كويس وتطلع الاول علي مدرستك ديما متتعبش ماما
وفرحها ديما بتفوقك
حمزه…ببرائه طيب هتجوزني بنتك ولا عشان بابا مات مش هتوافق
ابتسم زين بحزن علي براءه حمزه وخده في حضنه
زين…هجوزهالك طبعا انا اكول حمزه باشا يتجوز بنتي
اطول ان حمزه ابن حسام البطل يكون جوز بنتي بس بشرط
خرج حمزه من حضنه
شرط ايه
زين…تذاكر كويس وديما تطلع الاول وتبقي راجل موافق.
حمزه…موافق طبعا
زين…مدله ايده كلام رجاله
مدله حمزه ايده كلام رجاله
حضنه حمزه وطبطب عليه
وخلص اليوم والحزن كبير في قلب الجميع
وكأن وفاة حسام جددت الحزن تاني في قلب الجميع وفكرتهم بيوم موت كريم.
………
في منزل الحاج سعيد
منار…كفايه عياط يا ماما بالله عليكي هتتعبي
فاطمه…قلبي واجعني يا بنتي ده لسه صغير وشاب وولاده ملحقوش يفرحوا بيه
فكرني بكريم انا عمري ما نسيته لحظه بس موته صحي فيا وجعي من تاني امه فكرتني بوجعي انا حاسه بيها اوي وحاسه بقلبها اللي قايد نار علي ابنها
منار….بدموع حاسه بيكي يا ماما وعارفه الوجع اللي جواكي بس عالاقل كريم ما سابش حد وراه ولا خلف يعني المفروض تفرحي
وتدعيله
فاطمه…بدعيله من قلبي بس غصب عني لسه قلبي نار يا بنتي ما يحسش بالوجع غير اللي داقه
وكريم دوقهولي يا منار
حاج سعيد وهو خارج بعد ما اتوضا..وحدي الله يا فاطمه وادعي لابنك وادعي لحسام معاه هما في مكان احسن وانضف من الدنيا بكتير متعترضيش ابدا علب قضاء الله وقدره كلنا اموات بس لسه دورنا مجاش ومحدش خالد فيها غير ربنا سبحانه وتعالي

 

 

 

فاطمه….ونعم بالله..ربنا يرحمهم ويغفرلهم ويجعل قبرهم جنه
منار….يارب
فاطمه…اخر مره شوفت فيها حسام لما كان نازل اجازه كنت خارجه اجيب فطار شوفته هو ومراته وولاده خارجين وقف سلم عليا وفضل يواسيني بكلامه ويفولب متزعليش ابنك كان بينقذ طفل ومات غرقان ربنا اختاره بكون شهيد..يارتني انا مكانه
كأن ربنا قبلها منه وحققله امنيته
سعيد…ربنا يرحمه هو واموات المسلمين جميعا يلا قومي اتوضي انتي ومنار وتعالوا نصلي ركعتين لله
فاطمه…حاضر
منار…قومي يلا يا ماما
…………
مديحه…ياابني يلا قوم كل حاجه الساعه واحده انت من امبارح مكلتش اي حاجه
زين…مليش نفس والله يا امي
مديحه…الاكل ملهوش دعوه بالزعل يا زين
زين..عارف يا امي والله بس غصب عني مفيش نفس والله كلي انتي ووعد
مديحه…وعد مش هتاكل غير لو قمت كلت انت كمان
البت مكالتش حاجه من ساعت ما جت من الشغل حرام تنام من غير اكل يا حبيبي
زين…بقله حيله ماشي يا امي حضري الامل وانا هخرج اكل
مديحه….ماشي يا حبيبي
خرجت مديحه تحضر العشا بسرعه وبعد وقت بسيط نادت عليه
مديحه…يلا يا زين يا حبيبي الاكل جهز
قام زين وخرج وراها
زين…فين وعد
مديحه…في اوضتها روح نادلها
زين….ماشي يا امي راح زين علب اوضتها خبط ملقاش رد فتح لقاها نايمه عالسرير
راح اعد جمبها علي خرف السرير
زين…وعد. وعد
رجع زين شعرها بعيد عن وشها وابتسم وعد قومي ياحبيبي يلا
فتحت وعد عينها وقامت براحه بصتله
زين…يلا حبيبي قومي عشان تتعشي
وعد…انت كويس
زين…الحمد لله
وعد….شكلك وحش وانت زعلان
ابتسم زين وبان عليه الحزن
زين…ايه بتفكري تغيري رايك
وعد…لا طبعا بس مش بحب اشوفك زعلان عشان كده دخلت الاوضه وسبتك عشان عارفه انك عايز تأعد لوحدك
زين….غصب عني حقك عليا بس موت حسام اثر فيا وولاده وامه صعبانين عليا اوي
وعد…ربنا يرحمه يارب
زين…الحاره كئيبه والبيوت كئيبه موت حسام فكرني بموت كريم
وعد….هو فكرنا كلنا بكريم ربنا يرحمهم يارب ويجمعهم ببعض في الجنه

 

 

 

زين…يارب يلا قومي عشان تاكلي
وعد…مش هاكل غير لو كلت
زين….وانا هاكل عشان انتي تاكلي ومتناميش من غير اكل يلا يا حبيبي عشان تاكلي وتنامي عندك شغل بدري
وعد…حاضر يلا
………….
عدي كذا يوم علي الحاره في حزن كبير ورجعت من تاني الحياه الي طبيعتها الكل كمل شغله وحياته من تاني ولكن الحزن لسه موجود
………..
صلاح….شهد والنبي اعمليلي كوبايه شاي
شهد…عيني بس الاول عايزه اوريك جزء من العرايس اللي عملتها
صلاح…ايه خلصتي
شهد…لا خلصت ابه دول يا دوب اول 3 عرايس يخلصوا
صلاح….لا معلش الشهر قرب يخلص وانا قايلك هستلم منك جزء حلو
شهد….العروسه بتاخد وقت متنساش اني بعملهم علي ايدي ولوحدي
صلاح…..طيب يا ستي وريني يلا
راحت شهد جابت العرايس وحطتهم ادام صلاح
شهد…قولي رايك من غير مجامله
صلاح…ايه ده يخربيتك ده انتي فنانه
شهد…بجد والنبي حلوين
صلاح…اه والله العظيم حلوين اوي والاحلي انك بتعملي حاجه مش موجوده اصلا في السوق دول هيكسروا الدنيا
شهد….فرحتني يا لاحه انا كنت قلقانه يكون الفنش بتاعهم مش حلو خصوصا اني بقالي كتير مشتغلتش
صلاح….الفنش بتاعهم يجنن كبعا اصلا اللي يشوفهم يقول ان ده شغل مصانع مش شغل بدوي ابدا
شهد…يعني اكمل علي كده
صلاح…طبعا كملي وانا عشان اخليكي تنجزي شويه ومتتعبيش بكره بامر الله هجبلك مكنه تساعدك علي الخياطه بتاعتهم عشان تنجزي الوقت ومتتعبيش
شهد…بحب ربنا يخليك ليا يا لاحه
صلاح…باسها من راسها ويخليكي ليا يا شهد يلا قومي بقي اعمليلي شاي وسبسني اتفرج عليهم براحتي
شهد…بابتسامه هواااا😍
……….
بوسي….تسلم ايدك يا توته
توته…يابت ما تاكلي ايه الاكل بتاع العيال الصغيره ده
بوسي…مش قادره والله كلت كتير اوي
توته….معلش بقي العزومه اتأجلت شويه بسبب موت حسام
بوسي…الله يرحمه زعلت عليه اوي والله
توته…اه والله ربنا يرحمه يارب
ادهم….ولاده صعبانين عليا اوي هيعملوا ايه دول من غيره
توته….ربنا كريم يا ادهم ومش هيسبهم ربنا يخليلهم امهم واهلهم يارب
ادهم…يارب. هقوك اغسل ايدي

 

 

 

توته…وانا هقوم اشيل واغسل المواعين واعملكم الشاي خلي بالك من العيال يا بوسي
بوسي…ماشي
راح ادهم غسل ايده رجع لقي بوسي اعده مع ولاده عالارض
ادهم….عامله ايه يا بوسي
بوسي…بخير يا ادهم
ادهم…اخبار الشغل ايه
بوسي….ماشي كويس اوي انا حتي كنت بفكر في حاجه بس مش عارفه اعملها ولا لا
ادهم….حاجه ايه
بوسي….امبارح كنت عندي اوردر بره في فندق في مصر الجديده لقيت في محل عامل اعلان عالباب ببيع او ايجار المحل وانا معايا قرشين كويسين اوي فا كنت بفكر اني أجر المحل ده واستقل لوحدي
ادهم….طيب والمبلغ اللي معاكي هتقدري تجيبي بيه محل في مصر الجديده
بوسي…اكيد لا طبعا انا بفكر فالايجار
ادهم….طب ليه حاسك مش مرتاحه
بوسي…لا مش حكايه مش مرتاحه الفكره اني قلقانه شويه خايفه تبقي خطوه لسه بدري عليها
ادهم…والله اللي اعرفه انك متمكنه من شغلك مش لسه حد بيجرب يعني المفروض انها مش خطوه بدري عليها ولا حاجه ادرسي انتي الموضوع كويس ولو انتي شايفه ان المحل مناسب لشغلك اتوكلي علي الله
بوسي…هو من ناحيه مناسب فا هو مناسب جدا
ادهم…طيب وايجاره اد ايه بقي
بوسي….هو ايجاره عالي شويه يمكن عشان كده قلقانه متبقاش الفكره كويسه 15 الف في الشهر
ادهم…بصي هو مبلغ كبير بس اكيد ده عشان مكانه لكن الفكره انك كمان متنسيش انك لسه هتظبطي المحل وتجهزيه من جوه
بوسي…هو المحل انا شوفته كبير اوي ليه سلم داخلي ومكان تاني اد مساحه المحل من فوق تقريبا هو متفصل علي انه يكون مركز تجميل وعارفه انه هيحتاج حجات كتير عشان كده انا بفكر ابيع العربيه واكمل عالفلوس اللي معايا
ادهم…تبيعي ايه يابنتي انتي عبيطه هتخسري في تمنها كتير وبعدين انتي مش لسه عليكي اقساط ليها
بوسي…اربع اقساط
ادهم…طيب اربع اقساط وتمن العربيه نفسه هينزل اه هي جديده بس بمجرد ما لمست الارض خلاص سعرها عالاقل بينزل منه 10الاف جنيه حرام يا بوسي
بوسي…مفيش ادامي حل يا ادهم يمكن ربنا يكرمني واقدر امشي الشغل بالطريقه اللي انا عيزاها وارجع العربيه تاني
ادهم….مفيش الكلام ده والمبلغ اللي انتي عيزاه انا هجهزهولك
بوسي…لا طبعا تجهزلي ايه انت بتهرج
ادهم…لا يا اختي مبهرجش وبعدين تبقي صاحبه بيوتي سنتر في مصر الجديده وبتتنطتي في المواصلات
بوسي…اسمعني بس يا ادهم ده هيبقي بشكل مؤقت
ادهم…انا قولتلك خلاص وبعدين هو انا هديهملك ليكي خالص دي سلفه اقفي علي رجلك ورجعيهم اي وقت ولو الموضوع باظ هتبيعي عربيتك يا اختي وتسددي السلفه
ضحكت…بوسي
ادهم…..بضحكه اه انال فاكره ايه الشرط نور
بوسي….ربنا يخليك يا ادهم
ادهم…انتي اختي يابت زيك زي رحاب وبعدين لو مكنتش اقف معاكي هقف مع مين يعني
بوسي…طيب وصالح
ادهم…ماله صالح
بوسي…مش ممكن يضايق منك لو عرفت انك مديني فلوس
خرجت توته في الوقت ده.
توته…وهيضايق ليه ان شاء الله اخ وبيسلف اخته
ادعم…اهي قالتلك اهي وبعدين بقولك ايه اللي بينك وبين صالح انا براه خالص
بوسي…احنا مفيش بينا حاجه يا ادهم انا بس عامله عليك
ادهم….لا ملكيش دعوه بيا ما انا مش هسيب اخت مراتي تتنطت في المواصلات ومبقفش معاها وبالنسبه بقي لحوارك انتي وصالح مش ناويه تفكري يابوسي
بوسي…..لا يا ادهم خلصت خلاص هو اللي اختار ويتحمل نتيجه اختياره
توته…يابت صالح بيحبك
بوسي…طب مانا كمان بحبه عمل ايه هو عشان الحب ده والنبي يا توته اسكتي وخليني ساكته انا مصدقت عديت المرحله دي

 

 

 

ادهم…انتي وصالح لتحبوا بعض وحبكم من بعض نا سبتوا بعض بقي اقوي صالح ندمان يا بوسي وعارف انه غلط ودماغه متركبه شمال بس هو بيحبك
بوسي…عارفه انه بيحبني بس هو اناني واختار انه يجي عليا وانا لازم اندمه يا ادهم
ادهم….معاكي ندميه وربيه بس بلاش البعد خدي حقك وعرفيه قيمتك وعرفيه ان شغلك مهم بس ارجعيله تاني يا بوسي صالح غلبان اوي والله العظيم مش عشان صاحبي بس هو لسان عالفاضي الواد بيغير عليكي
وكان قلقان تشوفي الدنيا وتبعدي عنه
بوسي….ومن امته وانا قليله الاصل يا ادهم
ادهم….عمرك ما كنتي قليله الاصل يابوسي وهو عارف كده بس احنا بني ادمين وبنغلط وساعات دماغنا بتسوحنا لتفكير غلط فا مينفعش نقف لبعض انتي بعدتي كتير وخدتي حقك وهو متعذب زيك واكتر فكري يابوسي عشان خاطري يابت حرام حبكم ده يضيع كده عشان مشكله بسيطه
بوسي…هي كانت بسيطه بس هو اللي كبرها يا ادهم
توته….يا اختي وبعدتي وخدتي حقك وعملتي الانتي عيزاه وماشاء الله بتحققي حلمك عايزه ايه تاني يابت
بوسي…عايزه اثبتله اني مش شمال ياتوته عيزااه يعرف ان الكلمه اللي خرجت من لسانه دي في يوم حتي لو كانت لحظه شيطان مكنش ينفع تتقال ليا انا عيزاه يندم عليها ياتوته عيزاه يعرف ان بوسي لما جريت ورا حلمها جريت عشان فعلا تحقق حلمها وتاكل لقمتها من عرق جبينها بالحلال مش عشان تشوف نفسها و تبقي شمال
ادهم…لا عاش ولا كان اللي يقول عليكي كده
بوسي…صاحبك قالها يا ادهم
ادهم…صاحبي يتقطع لسانه ويتربي ويعرف غلطه بس الاول عايزك تفهمي ان صالح دبش مبيعرقش معني كلامه غير لما بيبوظ الدنيا لو انتي شمال يابوسي كان اتجوزك ليه افهمي ياهبله هو بيحبك بس بطريقه عايزه تظبيط شويه وانا هظبطه بس فكري
بوسي….هفكر يا ادهم بس لما اندم صالح اكتر من كده
توته…طب اشربي يا اختي الشاي هيبرد😒

يتبع…

• لقراءة الفصل التالي : اضغط هنا
• لقراءة باقي حلقات الرواية اضغط على (رواية 30 يوم حياة 3)