رواية الوردة الدبلانة الفصل السابع 7 بقلم حسام محمد

رواية الوردة الدبلانة الفصل السابع 7 بقلم حسام محمد

رواية الوردة الدبلانة البارت السابع

رواية الوردة الدبلانة الجزء السابع

رواية الوردة الدبلانة الحلقة السابعة

المشهد الاول
عاصم : مبروووك يا حسن
حسن : الله يبارك فيك يا عمي
عاصم : مبروك يا وردة
وردة : الله يبارك فيك يا بابا
عبد الله : مبروووك يا حسن
حسن : الله يبارك فيك يا بابا
عبد الله : مبروووك يا وردة
وردة : الله يبارك فيك يا عمي
احمد ( اخو حسن ) : مبروووك يا حسن
حسن : الله يبارك فيك يا احمد عقبالك
ميرفت تشد وردة من ايديها : تعالي هنا بقي
وردة : براحة يا ميرفت هتوقعيني فيه ايه
ميرفت : انتي مش قولتيلي أن حسن كلم عمر و أنه هيجيب سارة و يجي
وردة : أيوة يا ميرفت حصل و هو اللي قالي كدة
ميرفت : طب هما اتاخروا ليه
وردة : ميرفت … فيه ايه انا نفسي اعرف ايه في دماغك بالظبط احنا عزمناهم و عملنا اللي علينا …. ايه هنروح نجيبهم من بيوتهم بالعافية

ميرفت : يا وردة متنسيش ان سارة تعتبر هي صاحبتي الوحيدة
وردة بعصبية : و ماجتش يا ميرفت هاعمل ايه يعني اروح اجيبها بالعافية
ميرفت : طيب …. طيب متعصبيش نفسك خلاص هاروح اقف مع رانيا هناك
وردة : اتفضلي روحي بالسلامة
حسن يروح ناحية وردة متسائلا : ايه فيه ايه يا وردة …. مالك
وردة : مفيش يا حسن
حسن : امال ميرفت مالها كانت عايزة ايه
وردة : مفيش كانت بتسالني سارة و عمر اتاخروا ليه
حسن : و الله يا وردة انا أكدت علي عمر أنه يجي … و قالي أنه جاي و مكلمه كمان الصبح انتي عارفة إن عمر كان بالنسبالي ايه
وردة : خلاص خلاص يا حسن … الغايب حجته معاه
————————–
المشهد الثاني
سارة : ينفع كدة يا عمر نتأخر كل دة
عمر : انتي بتقوليلي انا يا سارة …. قولي لروحك وقفالي قدام المرايا ساعتين تتزوقي ولا كأنك انتي العروسة
سارة : يا عمر متنساش اننا بقالنا كتير مشفناش بعض ولازم دايما يشوفوني زي زمان لما كانوا بيتهبلوا و يغيروا مني لما يشوفوني
عمر : لاء و الله نفسي اعرف ليه كل دة …. ليه بتعملوا مع بعض كدة
سارة : لاء دة كلام كبير عليك … لما تكبر هتفهمه لوحدك و بعدين انت كنت عايزهم يشوفوني بعد ما بقيت ام متبهدلة و يشوفوني و انا شعري واقف كأني متكهربة و عمالة ليل و نهار اصرخ في العيال و في ابوهم زي المجنونة …. لدرجة اني مابقتش عارفة الاقيها منهم ولا من باباهم
عمر : طب يالا يالا يا مجنونة
——————————–
المشهد الثالث
ميرفت : انتي يا رانيا مش قولتي أن سارة جاية النهاردة
رانيا : أيوة يا ميرفت و هيا اللي قالتلي كدة الصبح لما كلمتني
ميرفت : ايه دة هيا كلمتك الصبح
رانيا : أيوة عشان تعرفني أنها جاية النهاردة
ميرفت : طب و اشمعنا كلمتك انتي و مكلمتنيش انا
رانيا : عادي انا و هيا كنا علي اتصال دايما ببعض يا ميرفت
ميرفت متوعدة لسارة : طب لما تجيلي هوريها
رانيا : طب بعد اذنك يا ميرفت … هاروح ابص علي حسين جوزي
ميرفت : اتفضلي يا رانيا … مش عارفة جوزي انا كمان راح فين دة …. مبقتش عارفة الاقيها من مين ولا مين
—————————

المشهد الرابع
حسين قاعد علي طرابيزة و عمال ياكل و فاجأة يلاقي رانيا مراته قدامه
رانيا : ممكن يا استاذ حسين تبطل اكل شوية
حسين : و ابطل اكل ليه …. دة حتي الاكل جميل احلي من الاكل اللي مباكلهوش في البيت
رانيا : يا حسين حرام عليك فرجت عليا أمة لا اله الا الله. .. الكل عمال يبص علينا
حسين : ما يبصوا هما اغراب …. دول كلهم اهلك يعني يا رانيا يا حبيبتي في بيتها
رانيا : يا حسين ارحمني نفسي تحس بيا و تعمل معايا زي الكل ما بيعمل مع مراتاتهم تقولي كلمتين كويسين يفرحوني مش دايما همك علي بطنك و بس
حسين : يا رانيا يا حبيبتي انتي موجودة يعني هتروحي فين … أما الاكل دة انا لاقيه دلوقتي و يا عالم هلاقيه بكرة ولا لاء …. فبعد اذنك بقي سيبيني مع الأكل عشان انا فيه كلمتين بيني و بينه عايز اقولهم علي انفراد
رانيا : حسين
حسين : نعم يا رانيا يا حبيبتي
رانيا : علي راي الزعيم سعد زغلول . .. تعرفه
حسين : لاء بس بسمع عنه طشاش كدة
رانيا : مفيش فايدة فيك يا حسين مفيش فايدة
————————-
المشهد الخامس
احمد ( اخو رانيا و حسن ) : مالك يا رانيا …. فيه ايه قالبة فردة الشراب بتاعتك ليه
رانيا : عايز ايه يا احمد انت كمان مش نقصاك …. و بعدين ايه فردة الشراب دي ما تحسن الفاظك يا بغل انت كمان
احمد : خلاص خلاص يا رانيا انا قصدي قالبة بوزك ليه …. لاء ارجوكي دي ليلة حسن اخوكي عايزينها تعدي علي خير
رانيا : يعني ينفع الفضايح اللي بيفضحلنا حسين جوزي
احمد : فضايح …. فضايح ايه
رانيا : انت مش شايف …. قاعد بياكل ازاي و الناس كلها عمالة تبص عليه كأنه محروم أو مشافش اكل قبل كدة
احمد : يا ستي حسين جوزك غلبان …. طولي بالك عليه شوية
رانيا : اكتر من كدة …. تطويل بال لاء انا خلاص فاض بيا و مش هطول بالي تاني عليه خلاص
احمد : طب بقولك ايه …. علي راي المرحوم حسن الاسمر عدي يا ليلة خلي الليلة تعدي ابوس ايدك
رانيا : لاء متخافش انا مش هاتهور هنا …. فيه بيت هيجمعنا هناك هنتحاسب براحتنا اهم حاجة عايزك تبقي تجهز ليه دفنة و عزا يليقوا بيه في عمر مكرم
احمد : ليه هتعملي ايه يا مجنونة
رانيا : هقتله … هاعمل ايه يعني ما هو يا اقتله يا موتني ناقصة عمر و مشلولة
—————————

المشهد السادس
ميرفت تقابل عمر و سارة : يا اهلا …. يا اهلا اخيرا يا سارة جيتي لاء و الله و هل هلالك
سارة : ازيك يا ميرفت
ميرفت : ايه يا بنتي اللي اخرك كدة …. اوعي يكون عمر اللي اخرك
عمر : لاء و الله ابدا ربنا اللي يعلم اني ماليش علاقة بالتأخير … سارة هي اللي اخرتنا علي بال بقي ما لبست الاولاد و لبست فتأخرنا
ميرفت : يا سيدي مش مهم …. المهم انكم شرفتوا …. اتفضلوا اتفضلوا انتوا هتفضلوا واقفين كدة علي الباب
سارة : امال فين رانيا يا ميرفت
ميرفت : يعني جاية علي طول تسألي علي رانيا و انا لاء يعني … علي العموم رانيا هتلاقيها جوة ادخلي انتي مش غريبة
——————————
المشهد السابع
سارة : ايه يا أبلة …. انا عمالة ادور عليكي …. انتي فين
رانيا : اهلا ازيك يا سارة …. مفيش انا موجودة اهو
سارة : مالك يا بنتي فيه واحدة تبوز كدة يوم خطوبة اخوها
رانيا : اعمل ايه بس ربنا رزقني بواحد يفقع المرارة
سارة : ليه عمل ايه تاني
رانيا : مفيش زي ما انتي شايفة كدة
سارة : اه …. عشان سايبك و قاعد ياكل يعني و ماله يا ستي عادي روحي اقعدي معاه و اتكلمي معاه
رانيا : روحت و حاولت اتكلم معاه و نقول كلمتين رومانسية …. قالي بعد اذنك سيبيني مع الأكل علي انفراد عشان فيه كلمتين محتاج اقولهم للاكل …. راجل مفجوع
سارة : يا ستي اهدي ماحنا كلنا كدة
رانيا : لاء مش كلنا … انتي لو جوزك كدة قيراط فأنا و الحمد لله جوزي قيراطين
سارة : المهم انتي مش هتروحي تباركي للعريس و العروسة ولا ايه
رانيا : لاء هاروح طبعا
سارة : طب يالا بينا
رانيا : يالا بينا
—————————-
المشهد الثامن
عمر : الف مبروووك يا عريس
حسن : الله يبارك فيك يا عمر …. و عقبالك بقي
عمر : الف مبروووك يا عروسة
وردة : الله يبارك فيك يا عمر …. ايه مش ناوي
عمر : ايه عندك ليا عروسة ولا ايه
وردة : يا سيدي أنوي انت بس و سيب العروسة علينا
عمر : لا لا … انا لسة قدامي شوية
حسن : قدامك شوية … ليه بتجهز نفسك يا عمر ولا ايه

عمر : اه بأجهز نفسي و لسة هاطلعلي سنتين إعارة للخليج اكون فيهم نفسي
حسن : يا شيخ مش مكسوف من نفسك …. مهندس مدني قد الدنيا زيك يقول الكلمتين دوول
عمر : و اتكسف من نفسي ليه يا حسن …. انا الحمد لله عارف نفسي كويس و عارف اني مش مستعد ارمي نفسي في التهلكة …. دلوقتي خالص
وردة : تهلكة …. بقي مسمي الجواز و الاستقرار تهلكة يا عمر
عمر : بصي كدة يا وردة لأختك و اختي و اخت حسن و انتي تعرفي تهلكة ولا لاء
وردة : يا استاذ عمر مش كل اللي اتجوزوا متبهدلين
عمر : ولا كل اللي اتجوزوا عايشين مرتاحين
حسن : احنا بنتكلم معاك ليه …. لازم ابقي عارف من الاول يا عمر مفيش فايدة فيك
عمر : الله ينور عليك فريحوا دماغكم مني بقي و بس بقي عشان سارة و رانيا جايين علينا
سارة : ايه يا عريس ….. الف مبروك و عقبال يا رب الليلة الكبيرة
حسن : يا رب يا سارة عن قريب إن شاء الله
سارة : ايه يا وردة …. الف مبروووك و ربنا يتمملك بخير يا رب يا وردة
وردة : الله يخليكي يا سارة و عقبالك كدة يا رب ما تفرحي باحمد و نهلة يا رب
سارة : مش لما نفرح بخالهم الاول
وردة : علي رأيك و الله يا سارة احسن خالهم دماغه متجبسة خالص
عمر : لاء ريحوا دماغكم من خالهم …. خالهم مش ناوي يتجوز دلوقتي و يميل علي اخته سارة طب يالا بينا يا سارة نقعد ولا انتي مش ناوية تقعدي
سارة : رووح انت وخد احمد و نهلة معاك و انا جاية وراك
عمر : كدة …. طب يالا بينا يا ولاد
احمد و نهلة : يالا يا خالو
سارة موجها كلامها لحسن : جرا ايه يا دكتور …. مش عارف تتكلم معاه دة داخل في الثلاثين و مفيش فايده فيه
حسن : و الله يا سارة انا كنت لسة بكلمه في الموضوع … بس مشكلته دماغه نشفة شوية
سارة : متياسش من الكلام معاه يا حسن … يا ريت تزن عليه انت و وردة لازم يفهم ان سنه عمال بيكبر و إنه عايش لوحده …. و مينفعش كدة
—————————

المشهد التاسع
عمر : ايه يا استاذة سارة كنتي بتقولوا ايه كل دة
سارة : مفيش كنت بوصيهم علي بعض
عمر : المشكلة انك مبتعرفيش تكدبي ….. هو دخلة دة الموضوع لسة خطوبة
سارة : طب و انت عايز تعرف كنت بقولهم ايه ليه
عمر : لانك اختي و حافظك صم … و ممكن اسمعلك دلوقتي الكلام اللي كنتي بتقوليه
سارة : يا عمر انت اخويا الصغير و عايزة اتطمن عليك مش عاجبني عيشتك لوحدك دي
عمر : يا سارة … يا سارة حرام عليكي نفسي تفهمي إن الجواز دة قسمة و نصيب و مش بايد الواحد انا لسة ملقتش بنت الحلال اللي اطمن علي نفسي معاها
سارة : يا عمر ولاد الحلال لسة فيه كتير و البنات مخلصتش يعني من البلد بس انت اهم حاجة انوي انت بس
عمر : مفيش فايدة فيكي يا سارة مهما اتكلم معاكي مبيأثرش فيكي اي كلام
سارة : انت اللي مفيش فايدة فيك و يا خسارة تربيتي ليك
عمر : طب بس بس عشان عمي عبد الله جاي علينا … بدل ما يشوفنا بنتخانق و يتفرج علينا
عبد الله : ازيكم يا ولاد
سارة : الحمد لله يا عمي عبد الله … مبروووك لحسن و عقبال احمد و رحاب
عبد الله : الله يبارك فيكي يا بنتي …. جرا ايه يا بشمهندس مش ناوي بقي تفرحنا بيك زي حسن ابني كدة
عمر : ربنا يسهل يا عم عبد الله …لما تبقي تيجي بنت الحلال
سارة بضحك : شوفت مجبتش حاجة من عندي ازاي
عمر : مبسوطه انتي كدة و يبصلها اووي
عبد الله : طب انا هسيبكم بقي يا ولاد براحتكم …. بعد اذنكم
عمر : اتفضل يا عمي …. اتفضل
و يبص لأخته سارة بغيظ و يقولها مبسوطة انتي كدة ماشي لما نروح البيت
سارة : هتعمل ايه يعني
عمر : ولا حاجة انت حد بيقدر عليكي خالص

يتبع…

• لقراءة الفصل التالي : اضغط هنا
• لقراءة باقي حلقات الرواية اضغط على (رواية الوردة الدبلانة)