رواية مجرد كارثه الفصل التاسع عشر 19 بقلم أروى طاهر المسلاتي
رواية مجرد كارثه الفصل التاسع عشر 19 بقلم أروى طاهر المسلاتي
رواية مجرد كارثه البارت التاسع عشر
رواية مجرد كارثه الجزء التاسع عشر
رواية مجرد كارثه الحلقة التاسعة عشر
أحيانا الشخص لما يفقد الأمل في الحصول على شي
يخربه 💔
يخربه بغضب لأن مهما حاول مقدرش يوصل لي الشي يلي يبيه!
هكي عقول بعض الناس
_______________________
عزام:درس سيارته ….الساعه كم تكملي
مياسين:شافت لي تالفونها ….مع ساعتين براحه
عزام:راسه على الكرسي ويشوفلها بحب …..عادي نراجيك؟
مياسين:ضحكت…..بتراجي ساعتين عزام بعقلك انت😅
اول مانكمل نكلمك باهي!
عزام:مسك يدها….ديري بالك ع روحك
مياسين:من عيوني❤️
عزام:قعد مستمر يشوفلها بحب واهتمام زايد لين خشت للكليه
تنهد بعمق ولف بسيارته وطلع
مياسين:كانت تشوفله من الشباك الارضي
واول ما ضمنت ان هوا خلاص طلع خدت شنطتها وطلعت خدت تاكسي على طول
_________________________________
بدريه:شني؟؟
شافت لي سلفاتها …الاسم يلي انا سمعته صح ولا انا يتهيألي؟!
زكيه:ابتسمت بتوتر….عزام ولدي متأكد انت من الشي يلي تقول فيه؟
عزام:عقد حواجبه….مفهمتش علاش نصدمتو هكي ؟!
بدريه:ميااااسين لا ياعزام
لاااااا انت ناسي امها وين …تت تي انت كيف تفكر فيها اصلا!
رفيده:حطت يدها على فمها عشان تخبي ابتسامتها
عزام ؛مش جاي ناخد رايكم انا ….جيت تعطي فيكم في علم
وبعد امتحاناتها على طول رح نلبسها 💍 وتم الموضوع
طلع عزام وهوا تارك وراه امه يلي كانت رح تنهاااااار من كلامه
وايات يلي تسكرت في وجها جميع البيبان
وكل الحلول خلاص انتهت وفقدت الامل
بدريه:وهاذا كل شي صار
جهاد:يشرب في الشاهي بشويه عليه …..والله ماعندك ما اديري
كان سلطان ولا صدام راك حكمتي فيهم لكن هاذا عزام
وانتي عارفه كويس شن يعني عزام
بدريه:شن قصدك ؟؟؟
نسكت ونشوف ولدي تاخده قدام عيوني هكي؟؟
جهاد:سرح شويه……مدام ولدك يحبها لو اديري ما اديري صعب يطلعها من راسه
هوا هكي الحب صعب
بدريه:والله؟؟
وخيرك تقول فيها هكي وعيونك يلمعو يا حنه؟
حبيت قبل وانا منعلمش ولا شنو؟
جهاد:لا للاسف ….وقعد في خاطري نعيشه الشعور هاذا
علاش تحرمي في الولد منه مدام يقدر
بدريه:سكتت وهيا واجعها خاطرها!
كيف بعد كل هاذي السنين وبعد ماجابتله3شباب الله يبارك ومحسش معاها بي الحب
كيف!
_________________________________
سلطان:غطا بتول يلي كانت في سااابع نومه
ولم كل الدواء يلي كان جنبها مشرتع في كيسه وحده وطلع وسكر الباب
مد جسمه على الصالون وسكر عيونه دقايق بتعب وهوا يذكر في كلام الدكتور
الدكتور:لازم الشهرين الاولات متتحركش هلبااا
جيب اي حد يساعدها او يخدمها لان المدام تمر بمرحله حساسه وحملها مش ثابت
اول ما تعدي ال3الشهور الاولى تقدر تتصرف طبيعي
سلطان:ابتسم وهوا راضي على نفسه لان خدمها بنفسه وبكل حب❤️
حس بشعور قنين وشاف حاجات حلوه مكانتش في عيلته قبل !
حس بي ان الانثى لما يعطيها كل اهتمامه وحبه تعطيه هلبا احاسيس مستحيل يلقاها عند حد!
والشي هاذا عمره ماشافه في امه وبوه
وقف خدي مفاتيح سيارته وفلوسه وورقة الطلبات يلي كتبتها بتول
واطلع
لبس سبيدروه بس اول شي جي في عينه باب شقة خوه صدام💔
كان قدامها هلبا تراب والفرشه مقلوبه كأنه حوش مهجور
وجعه قلبه على خوه وطق الباب مرتين
والثالثه فتح !
صدام:بدون نفس….خش
سلطان:خش وسكر الباب وهوا يتأمل في الشقه كيف حالتها مقلوبه فوقي لوطي
وريحتها كلها دخان
قعمز مقابل صدام وبدي في كلامه بدون مقدمات
سلطان:صار يلي تبيه وطلقتها بي فضيحه
علاش مش قادر تعيش حياتك؟
صدام:ساكت بدون اي ردة فعل
سلطان:علاش متمشيش تتزوجها يلي درت هاذا كله على خاطرها!
صدام:بلع ريقه وعيونه مدمعات….انا كنت ءء ان
سلطان:متقوليش نراجي فيك اطلق باش تاخد اختها لان انا مرتي نحبها ونراجي فيها تولد بسلامه وانا جنبها
صدام:علامات الصدمه ان بتول حامل على وجها
سلطان:تنهد بعمق….قريب ضيعتني معاك
البنت يلي كنت تبيها ماعمرك حبيتها ياسلطان لان يلي يحب مستحيل يفرط في الشهص يلي يحبه ويتزوج
انت كنت طامع في ورث بوها بس
وطمعتني معاك في اختها
صدام :نزل راسه وحط يديه على وجها وبدي يبكي بهستيريا
يبكي يبكي بشهقه
سلطان:سكت مصدوم في خوه كيف يبكي هكي!
خوه يلي متعود عليه ديمه واعر وصعب ومهما صار يبين ان هوا المسيطر
بس المره هاذي خاناته قوته ومعش قدر يتحمل
صدام:وسط شهقات بكاه كان يقول في ملام متقطع
صدام:نادم على هلبا حاجاااات
نادم
نادددم للارض ….ويبكي بحرقه
هدى ومريم كيف درت فيهم هكي وكيف عاملتهم
معش قادر ياصدام نرجع طبيعي
مش فاهم كيف رميت عليها الطلاق بي ال3وخدت نصر 💔
كيف ليها قلب ادير فيا هكي
سلطان:زي القلب يلي عندك لما ضربتها وجرجرتها قدام العماره بلبس شبه عريان ولا نسيت؟
نسيت ان حساب الدنيا فيها؟
شوف حالتك كيف عايش وسط خمر ومش قادر ادير شي ولا حتى تطلع من شقتك نوض ارجع لي ربي وادعي ممكن هدى تسامحك وتسامح العيله كلها على الشي يلي داروه فيها
صدام:كمل بكي بشهقة تقطع القلب
ولحضات ضعف فيها سلطان ووجعه خوه💔
مهما كان مداير في النهايه اخ ….وحضنه وقعد يهدي فيه
______________________________
مياسين:وقفت والتوتر ماليها….اهلا
امين:يشوفلها بس
مياسين:مدت يدها بتوتر…..انا مياسين هدى تكون بنت خالي الله يرحمه
امين:سلم عليها بدون ما يحكي
قعمز على الكرسي …..شنو تبي مني بزبط!
وعلاش هدى باعتاتك ؟
شن مزال تبي ادير اكتر من يلي داراته
مياسين:بصدمه…هه شنو بدير؟
انت متعرفش؟
امين:بي شنو بنعرف؟
مياسين:هدى …بلعت ريقها
هدى انتحرت يوم بيانها
امين:كيييييييف؟!!!!!!!!
مياسين:تنهدت …..الباين انت وانا بنحكو هلبا كلام منعرفوشي
____________________________
ايات:سكرررررري فمك سكري فمك وبطلي كدب مفيش ولا حاجه من يلي عطيتيهولي صح
درت كل شي صبيت الميه على عتبت دارها شربته سحر مأكول
دفنت ناقص غير القتل مقتلتش بس
وربي لما نتاعبك في حياتك ياكلبه يانصابه ياريتك حتى مشعوده حق
المرا:قامت حاجبها…..كملتي؟
ايات:اي كملت وانا توا طالعه وهاذا وجهي لو مخليتكش اتختخي في الحبوس
المرا:تكلمت بثقه….كوني واثقه كويس ان رح نخليك تندمي على كل كلمه قلتيها
هاذا لو قعدتي في وعيك عشان تندمي
ايات:هه اعلى ما فيخيلك اركبيه ياواطيه …وطلعت
______________________
الدكتور:بس هاذا خطر عليك ياقاطمه
يلي قاعده اديري فيه غلط وانا رح نضطر نخبر اهلك بنفسي لان مرضك قاعد يطور بسرعه كبيره وفي مراحله الاخيره
وزي ماقتلك العلاج ابدا مش رح ينفع معاه
اصلا انا مش مستوعب كيف قاعد يطور بي السرعه هاذي
فاطمه:ابتسمت بتعب….بس انا نعرف
ولا يهمك بي اذن الله رح نخبرهم بنفسي اليوم
رن التالفون
فاطمه:ناضت …شكرا دكتور وربي يحفضكً
الدكتور:سلم عليها …..نتمنالك معجزه بشفائك العاجل يارب ويلي عند ربي مش بعيد
فاطمه:ابتسمت….شكرا
وطلعت من الغرفه
ايات:متقوليليش وين انتي؟؟؟
فاطمه:في المصحه وكيف طالعه بنروح
ايات:تمام روحي نبيك في موضوع ضروري
فاطمه:تمام
_________________________________
نصر:سكر التالفون وعلامات وجها متغيره
مريم:حطت صحن الفواكه على الطاوله وجت لي حضن نصر ….شن حبيبي خيرك؟
نصر:بدون اهتمام….ولا شي
الشغل ومشاكله لاحقيني للحوش
مريم:ابتسمت ومدتله عنب ….يالله انسى تو مدامك جنبي
نصر:ابتسم….اكيد امالا شنو ❤️
مريم:نصر خاطري نسافر….نمشب بلاد اروبي مثلا وهكي
نصر:نمشو علاش لا
مريم:عطاته بوسه على خده ….سلمه ياربي يلي ميرفضليش طلب❤️
نصر:بس قبلها عندي انا طلب
مريم:عيوني ليك
نصر:بكرا عندنا غدي وبنمشو
مريم:بفرح….الله !
من عازمنا؟
نصر:جدي وعمامي
مريم:اففف نصر انت عارف الوضع ياسر المره يلي فاتت
نصر:معليشي ع خاطري ها المره
مريم:خلاص ياعمري تم مدامك تبي هكي❤️
_______________________________
الساعه12:30🌖
عزام:يلعب بشعر مياسين وهيا مقعمزه جنبه وراسها على كتفه
مياسين:تعرف لما كنت مع ماما شنو كنت نحلم !
عزام:شنو ياقلبي
مياسين:كان خاطري نطلع نشري الحوش هاذا
ونجيب ماما فيه ونعيشو كلنا عائله مع بعض ❤️
لان طول عمري محرومه من شعور هاذا
تنهدت بحزن….مكنتش نعرف ان طلوعي من السجن رح يخسرني فلوس ماما كلهم💔
عزام:على شنو تحكي!؟
مياسين:قامت راسها….جدي خدي نص ثروتها مقابل يدير باله عليا
قعدلها شوية اراضي باعتهم وعطت كل فلوسها للمحامي
ومع هاذا مقدرش يخفف حكمها المؤبد ابدا💔
مياسين:تعبت حاسه معش في شي يفرحني عزام 💔
طول عمري خايفه نعيش حياتي كلها تعيسه
عزام:صدقيني رح تشوفي الفرح كله وانا معاك وبكرا تفهمي ❤️
مياسين:ناضت
يالله حبيبي تصبح ع خير بنرقد
عزام:حضنها….خليك معاي شوي✨
مياسين:بكرًا عندي امتحان لازم نرقد
عزام:وقف وهوا يتلمس في خدودها….به امالا ديري في حسابك
بعد امتحاناتك رح تكون خطبتنا
مياسين:بفرح…..قول والله؟
عزام:ابتسم وهز راسه بمعنى اي
مياسين:حضناته بقوووه ❤️
_____________________________
فات نص الليل وجت الساعه3:-
سارة:مغمضتلهاش عين💔
تبكي والخوف راكبها من الشي يلي رح يديره ايوب💔
كان قلبها مكسووور كيف ايوب مسامحهاش
كيف الحب يلي في قلبه مشفعلهاش 💔
كيف هانت عليه وبيمشي يشكي فيها!!
وهوا عارف كويس ان حياتها رح تدمر
حطت راسها ع المخده وهيا تقول….الحمد الله على كل حال
على الاقل رح نرتاح من السر هاذا💔
اما مياسين حطت راسها ع المخده وهيا مصدومه من كل كلمه قالها امين!
مصدومه ان في ناس قادره تقتل ناس تانيه بطريقه هاذي ومتفكرش ابدا في العواقب!
غمضت عيونها وهيا تقول خلاص!
ياسر من السكوت..
ايات كانت مضايقه من اختها فاطمه
فاطمه يلي كانو يوتو لي فضانيتها وهيا دايخه في عالم تاني
وكل شويه راقده ومش قادره تركز في شي وعلامات الضعف واضحه جداً عليها
لسبب هاذا ايات استنت لعند يجي الصبح وتحكي معاها
وكانت طول الليل وهيا تبكي وتغللللي بسبب خطوبة عزام لي مياسين
بتول الوحيده يلي كانت عايشه احلى عيشه بينهم❤️
سلطان انقطع تماماً عليهم وبدي معش يحب يطلع برا الباب
بدي طول الوقت مع بتول
يطيبو مع بعض❤️
يهتمو ببعض
اغلب الاوقات مهتم بتفاصيله يطلعو مع بعض يديرو في اجواء لي نفسهم حلوه وهما في انتضار البيبي✨
كل حد فيهم عنده قصه وهم في قلبه !
ومفيش حد مرتاح
ومفيش حد جايه النوم ورقد
من بدرية لعند جدهم
كل واحد حايس في روحه وخايف من شي!
🔥أروىى الطـــــــــــاهرالمــــــــســـــــــلاتـــــي🔥
🔥روايــــــات بنوتــــــــة الشيــــــــخ400الف عضو🔥
ثاني يوم🌏✨
الساعه3الضهر :-
مياسين:بدلت ملابسها وهيا تعبانه
من ملابس الكليه لي بيجامه مريحه
طق الباب عليها
مياسين:ابتسمت وحطت يدها في النص….خش ياعزام
عزام:خش وهوا يضحك….شمت رحتي ياربي من بعيد
مياسين:ضحكت….تفضل ياخطيبي؟
مش كيف كنت معاك في السياره شنو الزياره المفاجئه هاذي لي غرفتي الجديده😌
عزام:قرب منها ….جيت بنعطيك شي تخليه عندك لبكرا
نطلعو مع بعض ونكملوه
مياسين:اي ؟
شنو الشي هاذا يا احلى شي في حياتي انت !
عزام:طلع ورقه من جيبه …هاك
مياسين:شني هاذي
عزام:اقريها
مياسين:خدت الورقه وهيا تضحك ونصدمت بي الشي يلي قراته
مياسين:شافتله بصدمه …..عع ع عزام!
عزام:ابتسم….اي اي
مياسين:ككيف مش فاهمه
عزام:تنهد براحه…..جدي كل شي كاتبه بي اسمي
مأمن عليا الوحيد بين ولاده واحفاده وعارفني حتى لو صارله شي مستحيل ناخد شي بروحي ورح نقسم بي شرع ربي
وانا درتلك توكيل عام
باش بكرا نمشي انا وياك نردلك فلوس امك
مياسين:بصدمه،،..عزام تحكي بجديات ؟؟
عزام:مسح على شعراتها….انتي متنشريش بي الفلوس ❤️
يكفي انك شي غالي ونحطك في عيوني ومنبيش مقابل هاذا كله ولا قرش
يالله خبي الورقه عندك لغضوا نمشو
مياسين:ابتسم وعيونها مدمعات وحضناته💕
_______________________________
وسط مركز الشرطه:-
الضابط:ياحاج انت مش فاهم
راهو هاذي محاولة قتل وحفيدك متهم بيها وزياده حرض اخته على الشي هاذا
انا مضطر ناخد اجرائاتي بعد ما حققت مع احفادك الاثنين
ساره:تبكي وتشهق بحرقه
وضرار جنبها مصدوم وساكت!
اما ايوب وعمه واقفين قدامهم وساكتين
رجب:شاف لي عم ايوب …..انا نقول ان تتنازلو ونحلوها وديه
ولو تبو مبلغ تعويض انا جاهز لقداش ما تطلبو
جعفر:يشوف لي ولده وخلااااص بيتفجر
ايوب :حني نبو حقنا بي القانون
احفادك هادم مكلفوش نفسهم حتى يسعفوه لا وزياده حاولو يخلصو عليه
ساره:تبكي وتشوفله كأن متعرفاش💔
كأنه انسان تاني مش نفس يلي حباته وكلماته ورسمت حياتها معاه
محمد(عم ايوب):تمام
مدامهم صغار زي ما شايف وانا صحتي كويسه
نطلب تعويض مادي وعفى الله عما سلف
رجب:وهاذا يلي صار
كتبتلهم شيك بي 15الالف ووقع
مفتاح:لا حول ولا قوة الا بالله ربي يهدي وخلاص
رجب:فرخ ضرار امنعه من السفر نهاااائيا اهو قتلك من توا خليه يخدم في المزرعه لين يتربى
ناقص والله يقعد يجرجرلي في اخته ع المصايب
جعفر:حاضر يابوي
رجب:شنو ياعزام وين صوتك مسمعناشي
عزام:ابتسم قاعد ياجدي قاعد
نزلت فاطمه لي الصاله وايات وراها
ايات:ندوي معاك اقسم بالله نوريك ره؟
فاطمه:علت صوتها قدام عمامهاونساوين عمها وجدها ومياسين والعيله كلللها
فاطمه:خلااااااااص خلااااص قرفت وتعبت خلاص معش رح نديرلك شي
افهمي كويس ان عزام عمره ما رح يكون ليك
عمره مارح يشوفلك من قرفك وسواد قلبك يلي انتي فيك
خبطت بيديها….بحححح
خلاص جربتي معاه السحر وسحرتيه الخبث المكر العهر مخليتي مادريتي وفي النهايه اختارها هيا
واشرت على مياسين وكل العيله مصدومه
وتوا جايه تبي تكملي عليها هياااااا
منجحتش الخطه مع هدى وماتت لي سبب تاني تبي اديريها مع مياسين ؟؟؟
ايات:نست يلي حواليها…..ع اساس انتي الكويسه؟
نسيتي ان هدى انتي يلي جبتيلي كل شي باش نرفعوه لي الشيخه وتسحرها؟
ونسيتي محاولتك لي سحر سلطان؟؟؟؟
فاطمه:نزلو دموعها وهيا ترعش من الاعصاب
آيات:ضحكت بهستيريا….ع الاقل انا بصحتي
شوفي انتي بغبائك
فيك الورم ورح تموتي بعد ايام ياتاعبه
معندكش مفر وانا مدام فيا نفس رح نكممممل لين ناخد يلي نبيه
فاطمه:ابتسمت ودموعها ينزلو….مبروك عليك جهنم يا ايات
ايات:فطنت لي روحها.!
واستوعبت ان يلي قدامها العيله كلها وسمعو كل شي
وقفت وهيا مصدومه في تعابير وجهم يلي كانت متتفسرش
خش نصر ووراه مريم
نصر:السلام عليكم
مريم:حست ان في مشكله صايره
مياسين:ااااه وصلو اخر زوز ناقصين من العيله ❤️ ….مدام كلكم مصدومين
خلي نحكيلكم سبب موت هدى
مريم:بلعت ريقها
وكلهم توجهت عيونهم لي مياسين
مياسين:اشرت بيدها….مريم
مرت نصر خوي
كانت صاحبة هدى هلبا وتحكيلها في كل شي
وكانت مريم متعرفه على ولد اسمه جمال
وجمال هاذا كانت تحكي وتتمعشق معاه وهيا فاتحتها مقريه على شخص تاني
مريم:اسكتي
مياسين:كانت تحكي معاه وعاطياته اسم هدى وعيلتها وحوشها ع اساس انها هيا
باش يوم مريم يكشفها حد مفيش حد يقدر يوصل فيها
ويلي رح يوصلو فيه هيا المسكينه هدى
مريم:اسكتتتتتتتتي
مياسين:تابعت بدون اهتمام
وجمال قرر يخطب بنت ثانيه ومريم لما عرفت جن جنونها
اطلقت من الولد يلي قري عليها الفاتحه
وبدت تلاحق في جمال وتحاول تخربله حياته !
سلطان:شني الكلام هاذا ياعيله شن قاعد يصير
مياسين:عيونها في عيون مريم …..وجمال طبعا متحملش تجي وحده رخيصه زي مريم تخربله حياته
وقرر يعطي الموضوع لي صاحبه امين
امين يلي جاب معلومات تامه على هدى وعيشها في عداب وطلب منها حاجات +18باش يستر عليها يحسابها نفسها مريم 💔
هددها بي ان رح يبعت صورها ومكالماتها لي عزام عشان يفسخ منها ويقتلها
ومريم كانت مرتاحه وامورها10/10 وزياده تزوجت عشان تختفي بكل من حيات جمال لما عرفت انه قرر يحاسبها
مريم:تبكي….سكرررري فمممك
وقربت تبي تضرب مياسين وتسكتها لكن نصر مسكها
مياسين :ولما هدى رفضت تعطيه شي وتوسخ شرفها هددها وصادف يكون يوم بيانها وهوا ميعامش بي شي وطبعا لان كانت هدى مصدومه من صورها يلي عند الولد
ومن معلوماته عليها
ولان كل واحد في العيله الحقيره هاذي عاملها بأبشع معامله خافت
وعرفت كويس ان مستحيل يصدقها حد
شافت لي عزام ….ولانها كانت تحب عزام ومتبيش ينصدم فيها
فضلت انها تموت
على انها تواجه مشكله زي هاذي وتعيش في عداب باقي حياتها
مريم:نهااارت بي البكي ونصر يشوفلها بتقزز
مياسين:سبب تافه صح!
بس كانت تخاف منكم موت
من المعامله يلي شافتها والذل والضرب
فضلت انها تموت ولا يوصلكم عليها كلام زي هكي
وكلكم كنتو سبب في موتها صدقوني ورح تتحتسبو عليه عند ربي!
من ضرار يلي كان يبتز فيها وياخد في فلوس
لعند الجد الكبير يلي كان راضي بي كل شي وساكت
زكيه:نهارت ع الارض تبكي وتخبط على العقاب يلي ربي رده في بناتها الضعف
مفتاح مسك ايات وحاول يقتلها وكل العيله خشت بعضها
يلي يضرب في صغاره بدون وعي ويلي يبكي ويعيط
سلطان:خدي بتول بهدوء وطلع من حوش العيله وقرر يبتعد تماماً على الاجواء هاذي
اما نصر شافلهم بنضرة اخيره وطلع
لحقاته مريم وهيا تبكي
نزلت لعند رجليه تتوسله يسامحها وان مكانش قصدها
بس كان رده واحد!
نصر:انتي طالق طالق طالق واحمدي ربي اني مش رح نحاسبك ع شي ….
_______________________________
مفتاح متحملش يلي صار
خدي مرته زكيه وبناته الاثنين وطلع من الحوش
أجر استوديو صغير وبدي يعاني في 3نفار
ايات يلي هبلت وركبها الف جن من تهديد السحاره ليها
معش فيها عقل نهائي
وفاطمه يلي كانت على فراش الموت وفي لحضاتها الاخيره
ومرته يلي يعد كل شي صار اعترفت بي قتل حناهم ربيعه
وشنقت روحها في نفس اليوم💔
_____________________________
رفيده:تبكي بحرقه….علاش بس💔
علاش ياولدي في شنو قصرنا معاك علاش💔
ضرار:يبكي زي البنت ومنزل راسه
جعفر:نوووض تحرك نوووض
رفيده:تبكي ….بالله عليك يا ولد الناس صلي على النبي بالله عليك تربح
جعفر:بعدي من طريقي والله نلزك معاه
رفيده:حضنت ساره وكملت بكي
اما ضرار خدي شنطة حوايجه وطلع بدون فلوس ولا سياره ولا حتى تالفون
_____________________________
عزام:مش رح نسالك من وين جبتي هاذا كله
مياسين:تشوفله بحب ….بتسيبني لاني حكيت؟
عزام:تنهد وخدي نفس عميق….هاذا يلي كان لازم يصير من قبل وانتي مغلطيش في شي ❤️
وحضنها
مياسين:ابتسمت وهيا تزيد تغرق في حضنه اكتر واكتر ❤️
عزام:اعود بالله من بنات الحرام اعود بالله
🔥أروىى الطـــــــــــاهرالمــــــــســـــــــلاتـــــي🔥
🔥روايــــــات بنوتــــــــة الشيــــــــخ400الف عضو🔥
هدم عائله كامله احيانا يتم حتى في يوم واحد !
والشي هاذا ينطبق كويس على مفتاح وعيلته
الحوش مقعدش فيه غير جعفر وبنته ومرته
وبدريه وراجلها وعزام ومياسين ورجب بس!
صدام اختار طريقه
وهاجر بدون اي رسائل وداع ولا حتى اعذار
سافر لان ضميره صحى فجآه ومعش قدر يسامح نفسه على شي
ولان قلبه المكسور معش في شي يصلحه
فات اليوم هاذا ومفيش حد قادر يستوعب يلي صار!
مفيش حد تسكرتله عين
بدريه خايفه يزيد عقابها من ربي اكتر من صدام يلي هاجر
وسلطان يلي قرر يقاطعهم وبعد عليهم
مياسين:يلي تراجي في اتصال بفارغ الصبر عشان تنهي كل شي ❤️
كل حد عقله في شي لكن كلهم يجتمعو في الصدمه!
_____________________________
بعد مرور 3ايام
الالوضاع هدت في الحوش
صح مفيش حاجه رجعت زي قبل بس الصدمه خفت عليهم شوي !
الساعه4العشيه:-
مياسين:السلام عليكم
رجب:قام عيونه فيها ومردش
عزام:شافلها وعيونه يلمعو ….وعليكم السلام❤️
جعفر:خشتك هاذي ان شاء الله خير
جهاد:هه اي والله
مياسين:ابتسمت….جدي
ماما رجعت فتحت قضيتها وبكرا موعدها
ولازم تمشي بكرا تحضر انت وعمامي
عزام:عقد حواجبه بي استغرب ….شنو بيحضرو؟
مياسين:تنهدت…جدي رح يشهد
ان ماما قبل 19السنه قتلت سلفها وهيا ادافع على شرفها
وعمامي رح يشهدو بنفس الشي بدل ما كانو واقفين ضدها في المحكمه
والباقي خلوه على المحامي
جهاد:خدي رشفة امية….بري سلم بنتي دارك بري
رجب:امشي يابنت من هنايا
مياسين:حطت نسخه من الاوراق يلي كانو عندها
عندكم ساعات على ما تقررو
ياتمشو تشهدو بي الحق وتبرو ذمتكم حتى مع ربي
ياتطلعو من حوشي ودورولكم شارع ترقدو فيه الليله
جعفر:يقرا في ملكية الحوش وهوا مصدوم
جهاد:قام عيونه….اااه يابنت المحبوسه ياشطانه ياخبييييثه
جن انتي مستحيل تكوني بشرررر
رجب:يشوفلها وساكت
جعفر:مستحيل تكون حقيقيه لااااا
مياسين:ابتسمت ….خلي نتقابلو في المحكمه ونشوفو اذاكانت حقيقيه ولا مضروبه
القرار فيدكم وعد لو شهدتو مع ماما يرجعلكم الحوش …
عزام:يشوفلها بكسرة قلب وخيبه💔
خيبة شخص امنها ولعبت بيه وصغراته قدامهم كلهم
رجب:قلبه متحملش وطلع برا وهوا يحاول يجبد نفسه
اما مياسين طلعت ووراها عزام
عزام:شن تحاولي اديري؟
مياسين:نطلع ماما من حبسها ضلم بسبب عيلتك
عزام:امنتك على ورقه مياسين!!
مياسين:ابتسمت ع جنب….دورك تم عزام
مقصرتش ان شاء الله يكون خير مع ربي
عزام:ششش شني؟
شن تقصدي انتي؟
مياسين:يعني خلاص خديت يلي نبيه دورك تم
عزام:الحب؟؟وينه
يلي درته ع خاطرك
خطوبتنا؟؟؟
كل لحضه حلوه بينا وين؟
مياسين:في عقلك تقعدلك ذكرى حلوه😅✨
وسيباته وخشت
اول درجه حطت رجلها فيها نزلت دمعتها وهيا تذكر
ميسون:وهادي الخطه يلي بديريها بنتي
مفيش شي رح يلوي ضهرهم غير رزقهم واهم شي الحوش
هاذا الشي بس يلي يخليهم يعترفو
اهم شي ركزي على عزام وانا واثقه فيك وفي جمالك وذكائك ياروح قلبي تقدري تخليه يكتب الحوش بي اسمك
مياسين:بكت وهيا في الطريق لي دارها ….وخلاني نحبه يا امي بدون ما نحس💔
__________________________________
رجب:مضايق ومش قادر ياخد نفسه كويس …..الو
محمد:اهلين يارجب
رجب:اهلين بيك
محمد:اسمع كويس
المره الاولى حفيدك صدام طلق بنتي وعديتهالك
اما توا يكملها نصر ويطلق بنتي للمره الثانيه وربي ما ساكت
الباين ان نسيت السر يلي ساعدتك فيك ومفروض انا موثقتش فيك
كيف نوثق في شخص زيف حادث وقتل ولده ومرته
انا السر هاذا مضايقني وبنقدم اوراق
ولو اضطر الامر ان نعترف تشريحي لجثث ولدك ومرته كان كذب رح نعترف ولدك يلي قتلته وخلالك بنته ياريت حتى عرفت تحافض عليها توا جاي تحطو اللوم ع بنتي في موتها
رجب:تنهد بحزن وقلة حياه….مفيش داعي تقدم شي
اصلا غضوا عندي مشيه للمحكمة ورح نعترف بكل شي
العمر تم خلاص
ومعش قادر نشيل اكتر من هكي خلاص
محمد:كويس يطلع فيك احساس …وسكر الخط
🔥أروىى الطـــــــــــاهرالمــــــــســـــــــلاتـــــي🔥
🔥روايــــــات بنوتــــــــة الشيــــــــخ400الف عضو🔥
احيانا الانسان تاخده الدنيا وينسى كل شي
ينسى ربي وينسى الحلال والحرام وينسى ان الدنيا فانية 💔
توفت فاطمة 💔
توفت وهيا نادمه بس الندم مينفعهاش
توفت وحاولت اتوب لكن السحر يعتبر شرك والشرك مستحيل ربي يغفره💔
ايات عاقبها ربي في الدنيا قبل الاخره💔
وبدت مجنونه رسميا وتطلع وتريح بين الشوارع 💔
رجب :سنه الكبير مغفرلاش العقاب
وحكمو عليه اعدام شنقاً💔
وسيب وراه كل الرزق يلي كان يجمع فيه عمره كله💔
____________________________
طق الباب ومياسين قلبها دق معاه❤️
عزام:اهلين
مياسين:بلعت ريقها وتحكي برسميه…اهلين بيك
عزام:على وين؟
مياسين:بفرح….عند ماما
اليوم افراجها بي اذن الله
عزام:حلو
تأكدي تاخدي كل اغراضك معاك لان معش ليك رجعه هنايا
مياسين:كيف؟
عزام:ابتسم ع جنب….كنتي غبيه للاسف
ومش عارفه ان المدينه هاذي كلها تحت تصرفي
مياسين:ع شن تحكي؟
عزام:محرر العقود يلي مشيتيله
جاني اتصال منه قبل ما يديرلك اي شي ووافقت على ورق مزور نبي نشوفلك اوين توصلي بس
مياسين:مم م مزور؟
عزام:بهدوء….يتهيألي خلاص
كل حد خدي عقابه
معش نبي نشوفك حياتي كلها خودي فلوسك واطلعي من هنايا لاقي لي نفسك اي مكان
مياسين:قلبها تقطع بي الطريقه يلي يحكي بيها💔
عيونها تعبو دموع
يعني كنت عارف وخليتني نكمل؟
عزام:لاني راجل ومنطعنش في الضهر ولا نرخي بشخص حبيته من قلبي….وطلع
______________________________
مر على قصتنا 6شهور ❤️
شبه حوش العيله تحسنت اوضاعه
حكم رجب مزال متنفذش✨
واعترف على كل شي حتى اب مريم يلي ساعده
بتول بطنها كبرت ورجعت تواصل في العيله من جديد ❤️
ساره :استغلت العطله وخدمت في روضه اطفال عشان تنسى كل شي صار معاها❤️
اما مياسين عاشت مع امها في شقة ارضيه قنينه
ونصر كان يزورهم كل فتره وفتره ✨
انتهت القصه
كل حد خدي عقابه 💔
به وين الناس يلي مفروض تاخد نصيبها من الفرح بعد الحزن!
_________________________
نصر:كان واقف وحاير بين زحمة الاطفال يلي جنبه
شاف ابله من بعيد اخيرا….يا استاذه لو سمحتي
ساره:تفض…..نصر!
نصر:ابتسم بصدمه…ساره!
ساره:ههه اي اهلين
نصر:اهلين بيك
تغيريتي في 6شهور بس
ساره:كيف تغيرت😂
نصر:ضحك….متواخدينيش مش عارف ربي يحفضك شنو اديري هنايا !
ساره:نخدم هنايا اشراف …وانت؟
تزوجت؟
نصر:لا انا عندي ولد صاحبي واقفه بيه السياره وجيت بنروح بي ولاده الاثنين
ساره:كويس❤️
طال النضر بينهم بي اعجاب ❤️
نصر:شن رايك لو يعني
ساره:بلهفة…شنو!
نصر:فاضيه نشربو قهوة بعدين قريبه من هنايا؟
ساره:ابتسمت…اي ليش لا❤️
__________________________
ميسون:تشوف لي بنتها مياسين وهيا مقعمزه نفس كل ليله
دموعها على خدها وتتفرج من الروشن والمطر تصب
حست مياسين بي الذنب وندمت ان دخلت بنتها في قصة زي هاذي وهيا في سن صغير
طق الباب
ميسون:ابتسمت….مياسين نوضي بنتي هاذا اكيد العشي وصل
مياسين:ناضت حطت شال على كتفها والتعب واضح على وجها
فتحت الباب ومكانش في حد
طلعت من الحوش وهيا تشوف يمين يسار
واول ما لفت ضهرها عشان ترجع الحوش سمعت صوته
عزام:جيتك في نفس الوقت يلي كنتي تجي فيه لي غرفني زمان!
مياسين:تلفتت ودموعها سبقوها…عزام!
عزام:تقبلو ضيوف الوقت هاذا
مياسين:ضحكت وهيا تبكي وحضناته
عزام:اهدي اهدي
مياسين:اءء انا ان …
عزام:اششش كله كان مجرد كارثه وخلاص فاتوجيتك❤️
______________________________
بتول:حاضنه بنتها وتبكي وتشوف لي سلطان
سلطان:شن نسموها؟
بتول:اسمها جاي معاها❤️
وقالو مع بعض (هدى)
مياسين:وانتهت قصتنا على خير❤️
وزي ماقال عزام مجرد كارثه❤️
تزوجت طول بدون خطوبه بعد شهرين بس
ونصر وساره نخطبو بعد عرسنا بي اسبوع وربي عوضها بيه لان بجد نصر مفيش زيه
كلهم خذو عقابهم وجزاتهم الا بدريه ❤️
يكفي اني جيتها كنه🤌🏻😂…النهايه❤️
*لازم تعرفو عمره الحب والرزق والقبول ما يجي بي السحر
لان تخسري اخرتك ودنيتك بيه 💔
*ياداير يالاقي هادي خليها قاموس في حياتكم واعرفو ان الخير رح تلقوه
والشر بردو رح تلقوه
*كونو لطفاء مع اي حد يتيم 🫶🏻
يكفي ان خسر اغلى حاجتين في دنيته متزيدوشي بمعاملتكم القاسيه
دعوته قادره تهدم حياتكم بدون ما تحسو!
الحب في كل مكان 💕
بس انتي دوري كويس واختاري صح 💕
لقراءة باقي حلقات الرواية اضغط على : (رواية مجرد كارثه)