رواية لورين الفصل الرابع 4 بقلم فاطمة حسن

رواية لورين الفصل الرابع 4 بقلم فاطمة حسن

رواية لورين البارت الرابع

رواية لورين الجزء الرابع

رواية لورين الحلقة الرابعة

كانت خطوبتها يوم الخميس بعد ما قالت ان هي موافقه
فقومت روحت ليها و أنا واخده ليها خاتم على شكل بومه علشان أحنا الاتنين بحبه و كنت مشتريه ليها دريس بيبي بلو
و صلت عندها رنيت الجرس فتحت مامتها
– ازيك يا طنط مبارك عليكم
= الله يبارك فيكِ يا حبيبتي.. ادخلي رقيه جوا
دخلت لقيتها بتهزر مع بنت خالها حسيت نار طالعه من وشي بس مرضتش اتكلم علشان مش حابه تحزن بسببي
سلمت على بنت خالها اللي كنت حاسه ان هي مش متقبله وجودي اصلا و بعدين سلمت على رقيه
– مبارك يا حبيب عيوني ربنا يتمملك على خير
= الله يبارك فيكِ يا حبيبي عقبال ما افرح بيكِ
استغليت فرصة ان بنت خالها طلعت و قعدت حطتلها ميكب علشان طول عمري كان نفسي يبقى ليا صاحبة و لما تيجي تتخطب اعملها انا ميكب
خلصت و حسيت ان هي عامله زي القمر لا القمر يشبهلها و الله بجد
حضنتها بحب كبير اوي و أنا حاسه ان عايزه افضل في حضنها من كتر ما هو دافي، عيني دمعت لوهله
مسحت دموعي و حضنتني و هي بتقول
– أنا و قلبي معاكي متقلقيش و اوعي في يوم إن ممكن اسيبك دا لو أنتِ مش موجودة مش هكون
ابتسمت و بعدين سيبتها تلبس
و دخلت أنا كمان لبست دريس كافيه و طرحه اوف وايت و هيلز
و طلعت عطتها الهديه علشان كنت هنساها

عيونها لمعت بحب و هي بتقول الله يديمك ليا
خدتها و طلعنا بعد ما أحمد خطيبها كان جه، ببص لقيت جنبه يونس
خدت نفس عميق و روحت سلمت عليه
– ازيك يا يونس
= ازيك يا ايامي انا الحمدلله تمام
انبسطت من كلمة ايامي دي و كنت حاسه ان طايره انا بحب اي حد يقولي يا أيامي
طلعنا كلنا وسط الزغاريط اللي ماليه البيت و روحنا القاعة
البنات كانوا في مكان و الشباب في مكان تاني و كلنا بنرقص و مبسوطين
جه أحمد بعد كدا لبسها الدبله و أنا روحت قعدت على كرسي بعيد شوية
قعدت أتاملها و أتأمل ملامحها اللطيفه بحس كل ما بشوفها كأن اول مرة اشوفها هي أميرة جت من عالم ديزني على ارضنا بالغلط و لا هي ملاك ،لا هي كل حاجه حلوة تتحب بكل تفاصيلها…. كنت شارده حد ما جه يونس قعد قدامي
– غيابك طال على فكرة
ابتسمت و قولت
= ان كان للحبيب حبيب تاني ….
ملحقتش اكمل و لقيته بيقول
– بس أنتِ الحبيب الأولى و التاني و الأخير فكرك يعني أنا أعرف احب حد غيرك ،في حد يسيب القمر دا كله
ضحكت جامد على طريقة كلامه اللي متغيره ،يونس في العادة هادي و عاقل و عمره ما اتكلم كدا
– ها كنتِ زعلانه مني ليه

= هو هنا مش مجال إن احكيلك.. بس أنت تعرف احمد منين
– أحمد دا يا ست صاحب عمري و بعدين أنتِ عرفتي رقية ازاي
= تعالى بس نبارك ليهم و لما نخرج هقولك
مشيت روحت ناحية رقيه و هو راح ناحية أحمد
باركت ليها و استأذنت منها و مشيت لكنها زعلت، بس كنت محتاجه ان اتمشى شوية
يونس خلص و جه خدني و مشينا شوية لحد ما وصلنا للكورنيش
قعدنا فقالي احكي
خدت نفس طويل و بدأت احكيله كل حاجه من أول ما بدأت اغير لحد ما اتعالجت و قابلت رقيه،أما يونس كان بيسمع كل دا و في حالة صدمة على وشه
– كل دا من ورايا يا أيام دا انتِ مكنتيش بتعرفي تمشي خطوتين من غيري
= ما هو دلوقتي رقيه بتمشيني
بصلي بقرف و قام راح جاب اتنين ايس كريم و جه
خدت منه و قعدت أكل كنت حاسه بإنبساط و هوى لطيف داخل لجوا قلبي
في اللحظه دي كان صوت عمرو دياب جاي في الخلفيه و بيقول
باين حبيت ايوه أنا حبيت الدنيا اللي بتضحكلي معاك على طول
قطع الصمت صوته و هو بيقول

– يعني أنتِ بتغيري عليا
اومأت بمعنى ايوه
= و علشان كدا بعدتي عني
اومأت بمعنى ايوه
ضحك بصوت عالي فظهرت غمزاته.. رجع شعره لورا و قال
– تبقي غبيه لو فاكرة ان ممكن في يوم اتخلى عنك او اسيبك يا ايامي ،و اه أنا حابب اكون حكر ليكِ عادي
ابتسامة ظهرت على وشي..
هو عارف يحتويني كويس و عارف ان دايما محتاجه اتطمن ،محتاجه احس بالأمان
محاولش يبينلي قد اي هو جامد علشان أنا غيرت عليه بسبب تلا، لكنه طمني انه هيفضل علشاني
الفكرة ان الانسان مننا دايما محتاج للي يطمنه دايما و يحسسه بيقمته، أنت محتاج تتقدر و محتاج تحس بالحب ،محتاج تحس بالأمان،محتاج تحس دايما انك استثناء و انك غير الباقي،محتاج تحس انك في مأمن و ان لو اخطأت في حق اللي بتحبه فهو علشان بيحبك هيطبطب عليك و هيحتوي الموقف و كأنه محصلش! .
روحني البيت و بعدين نزل فندهت عليه
– يونس
= ايوه يا أيامي

ابتسمت ليه و حدفت ليه شكولاته…
خدها و بادلني الابتسامه
– تصبح على خير
= و انتِ بخير
دخلت أنام معرفتش فبعت حكيت لرقيه اللي حصل
– اممم و عجبك الايس كريم
= اه عجبني جدا
ردت بغيرة حسيتها
– طيب ياختي علشان تبقي تنسي الايس كريم اللي كنت بطفحهولك
ضحكت جامد و حبيت اخليها تغير اكتر فقولت
– و لا ريحة البرفيوم بتاعته بتدوخني
ردت بعصبية
= طيب حاسبي ليغمى عليكِ
و علشان اصالحها بعتلها فيديو ليا و ليها فيه صورنا و فيديوهات لينا و تغفيلات ليها
حبيت اعبر ليها عن مدي حبي ليها
فكرة انك تعبر للي بتحبهم عن حبك ليهم دا بيحسسك بالسعادة فعلشان كدا يا عزيزي قرب دايما من اللي بتحبهم و متتكسفش تعبر عن حبك ليهم
بعتتلي لاف و شويه لقيت منها مسدج محتواها
– أنا عمري ما هعمل صاحب زيك تاني أنا بحبك اوي،فكرة انك موجودة بتطمني و بتديني أمل دايما بحبك
دمعت و بعت ليها
= شكرا من هنا لبكرا لأنك هنا
قفلت الفون و غمضت عينيا و أنا مبتسمة

يتبع..

لقراءة الصفل التالي : اضغط هنا

لقراءة باقي حلقات الرواية اضغط على : (رواية لورين)