روايات

رواية مروضة الرجال الفصل الأربعون 40 بقلم سلطان زماني

رواية مروضة الرجال الفصل الأربعون 40 بقلم سلطان زماني

رواية مروضة الرجال البارت الأربعون

رواية مروضة الرجال الجزء الأربعون

مروضة الرجال
مروضة الرجال

رواية مروضة الرجال الحلقة الأربعون

أجرت كل الشقق الي في العمارة وقعدت أنا ومرات ابويا في
الدور التاني كله وقفلت شقتي التانيه من قعدتي هناك فهمت
تاريخ عيلة عبدالله كله واتعرفت علي كل الجيران وبقا يسالو
عليا ب استمرار وعملت خير وساعدت في جوازات كتير
وعملت ل عبدالله كولدير تحت العماره وواحد عند مسجد
كان بيتبني في البلد. ساهمت فيه كل ده لعبدالله
وكنت بدعي وببكي واتوسل لربنا أنه يتقبله ويرحمه برحمته
وبقوله يارب بحق ما كرمني وسترني ورحمني من البهدلة الي
كنت فيها ارحمه وسامحه واغفرله ..كنت أنا الوحيدة الي
بزور القبر بتاعه كنت بحس أنه مستنيني وأنه حاسس بيا
دخلت مع مراته الي خلعته دي في مشاكل ما بعدها مشاكل
وكل شوية تجبلي اخواتها وام عبده معاهم وفضايح وقلة
ادب لحد ما أخوها اخد رقمها مني وكلمني ب احترام وأدب.
طلب يقابلني ونحل الموضوع جيه هو وابن خاله اتكلمنا
وقالو اني ده حق العيال. هما ملهمش دعوه بخلافتهم مع
بعض
قولتلهم أنا من نفسي كنت هكتب لكل عيل شقة ب اسمه
بس بعد ما وصلني من الناس انها هتبعهم وتخدهم هي وتتجوز وتشوف نفسها صرفت نظر عن الموضوع
قالي مين الي وصلك الكلام ده
قولتله مش هقولك مين وجبت المصحف وحلفت عليه
اني الكلام ده حصل قالو مصدقينك
طب انتي ام زيها لو حد كل حق عيالك هتعملي فيه ايه

 

 

 

قولتله هاكله بسناني
قالي طيب اهو هي كل الي بتعمله ده حق عيالها
قولتله تمام ابو عيالها بقا الله يرحمه مكتبلهاش حاجه ومسبش حاجه ليها ولا لعيالها
وانا قولت علشان ميتعذبش في قبره العيال يخدو حقهم
قالي الي قالك كده قاصد يوقع بينك وبينها معقول تصدقي عليها الكلام ده
قولتله هتقول الحق ولا هتصهين علشان اختك
قالي هقول الحق وآلله
قولتله الست الي تسيب جوزها في شدته وبدال ما تخفف
عنه لا تزود في همه هم وتحطمه يتخاف منها وأصدق عنها
أي حاجه ده انا رحتلها واتكلمت معها بالذوق طردتني
وشتمتني في بيتها ..قالي احنا بنتكلم في حق العيال دلوقتي
قولتلهم عبدالله مات من الزعل والقهرة والخزلان أنا كنت
اكتر وحده حسه بيه وجنبه وشيفاه
كام مره انت تتمسك أو حد من أهلك وهو يطلعك ..كان
بيتاخر عنكم في حاجه عمره مد ايه ع اختك او ظلمها
لو انت الي كنت مكانه كنت هتعمل ايه
قالي هي غلطت واديها بتضرب نفسها بالشبشب ع الي عملته
ده بس العيال ملهمش زنب
ابن خاله قاله بصراحة ام منصور عدها العيب بصله جامد
علشان يسكت فضل يتكلم ويغلطها وجاب الحق عليها
كلموها علشان تيجي. نقعد ونحل ونتفق رفضت وقالت إنها
حالفه انها متدخليش بيت سبت عيالي مع مرات ابويا ورحت معاهم

 

 

 

اول ما دخلت فضلت تصوت وتقول البتاعة دي متدخلش
بيتي وانا هعرف اخد حقي منها كويس وتشتم وتقل ادبها
بصيت ل ابن خالها وقولتله أنا قدرتك وجيت معاكم بس
متوصلش اني اتهان واتهزق في بيتكم عيب
أنا قولت الكلمتين دول وهما الاتنين بقو يزقو فيها وأخوه
ضربها قدامي وبقا تشتم فيهم وتقولهم بتضربوني علشان دي
عرفت تملأ دماغكم بكلمها ما هي أستاذة كلام زاي ما عرفت
تملأ دماغ عبدالله وتخده ليها لوحدها وتاخد فلوسه فضلت
ابصلها بس مردش بقول لنفسي ايه الغل والغيره والنفسنه
الي في الوليه
دي اخر ما زهقت منها وأنهم كل ما يهدوها تتعصب وتزعق
قولتلها حق عيالك عندي واي حاجه يحتجوها في أي وقت انا
تحت أمرهم بس اكتب حاجه ب اسمهم وتخديها انتي لا
انسي ده مش هيحصل ابدا واوعي تفتكري اني كل الهري
والحركات الي بتعمليها دي هتاثر فيا
واخدت ابن خالها ع جنب وقولتله اني هروح للمحامي اكتب للولد شقة ومحل والبنت هكتبلها شقة بس والورق هيفضل
عند المحامي. مش هسجله في الشهر العقاري غير لما يكبرو
أو اطمن ليها ….
قالي عداكي العيب والله وكتر خير وانتي بنت اصول اقعدي
طيب ملحقناش نعمل معاكي الواجب قولتله المره الجايه أن
شاء الله وسلمت ع اخوها والعيال وحضنتهم وفضلت ابوس
فيهم واهزر معاهم ومعبرتهاش هي خالص وبقيت ببعت
ايجار شقتين وايجار محل ليها كل شهر يا أما تيجي هي
تاخده والحوار خلص علي كده

 

 

 

اخو عبده كان عايز ياخد مني محليين تحت يفتح فيهم
معرض أدوات كهربائية وانا رفضت قالي ايجار زاي زاي الناس
قولتله لا برضو وقعطتها معه حتي ابن أخوه مبقاش يسأل
عنه ولا بقا يعدي من الشارع اصلا
وسبت امه في الشقة إكراما لعبدالله علشان كنت عارفه أنه بيحبها وبصراحة صعبت عليا

كل الرجالة الي اتقدمولي أو حاولوا يتقربو مني كان علشان
السرير وبس وفي الي طمان فيا وفي فلوسي
وكنت برفض وابعد وارجع افكر تاني في الموضوع
وانوثتي تغلبني محتاجه جواز واستقرار ويبقا معايا راجل
واعيش واتمتع وانبسط وعيالي صغيرين ومش فاهمين
ووجود مرات ابويا معايا مشجعني علي ده وقالتلي فرصة
قبلت بواحد كان فاتح محل كهرباء كنت فاكره أنه ابن حلال
وبيحبني بصدق ومش طمعان فيا وعلمني السواقه وبعت
عربية عبدالله وهو كمل عليها بفلوسه وجبلي عربية
لحد ما قالي لازمتها ايه المباني وايجارتها
ده انتي لو دخلتي معايا شريكة في محل هكسبك دهب وكل
الايجار الي بتلميه في شهر أنا هكسبهولك في يوم واحد
قولتله ازاي ده ليه هتبيع مخدرات
قالي شغل الكهرباء ده بيكسب دهب وخدني المحل عنده
وشوفت الفواتير الي جايب بيها البضاعة والسعر الي بيبع بيه
فرق رهيب النص بالنص بالظبط ..شايفه طمعه في عينه
وبسيبه يتكلم كتير علشان بس ياكدلي الفكره مش اكتر

 

 

 

خدني وشوفت محل عايز يشتريه وقالي اي رأيك تدخلي
انتي بالمحل و أنا بالضاعة قولتله بكام المحل ده
قالي المتر ب ١٠٠٠٠ هو ٤٠ متر يعني 400000 الف قولتله
يعني انت هتجبب بضاعة فيه ب400 الف قالي لا قولي مثلا
100 أو 150 الف قولتله خلاص ادفع معايا في المحل وانا
هدفع معاك في البضاعة قالي أنه مش معه سيولة واخدني
فرجني علي المخازن والبضاعة الي فيها قولتله لا
لقيته زعل وقالي أنه مش هيتكلم معايا في الشغل تاني
ونفضل زاي ما احنا كده قولتله تمام ..بدأ يهملني وميسالش
وانا فاهمه وعارفه هو بيعمل كده ليه لما شاف رد فعلي اني
كبرت دماغي منه ومبقتش اسال وايه بقا يجر ناعم
ويخرجني ويقولي كلام حلو وبقا يفتح معايا الموضوع ده
تاني لحد ما قولت يابت جربي مش هيحصل حاجه وكنت
مش حبه انفصل تاني واضحك الناس عليا عايزة استقرار
بعت شقتي وكملت عليها من معايا واشتريت المحل وكتبته
ب اسمي وهو وضب وفرش وقولت يابت عادي كبري دماغك
كده كده المحل ب اسمك بقيت بروح اقعد معه في المحل
وبشوف الناس الي بتجبله البضاعة واوقات كان يخدني معه
القاهرة وعرفت كل الاماكن الي بيشتري منها
ورغم اني كنت بشوف المحل شغال وناس كتير بتشتري
ووسع عليه وعلي شغله كان ديما يدعي الفقر وبقي يمنعني
من النزول علشان مشفشي الي بيعمله تحت اول ما حسيت
منه أنه بيتعوج عليا وعايز يخزوقني واكتبله المحل ب اسمه
بحجة أنه يطلع بطاقة ضريبية وسجل تجاري ب اسمه سألت
المحامي من وراه قالي لا اعمليله عقد ايجار بس أو توكيل
في الشهر العقاري بالإدارة فقد لا غير
لما قولتله كده قلب وعينه احمرت وغصب وقالي انتي
مخوناني انتي مش واثقة فيا قولتله أنا بعمل كده علشان دي
مش فلوسي قالي امال فلوس مين قولتله فلوس عيالي
اتخانقنا وصبرت عليه شهرين بحالهم لا بيسال عليا ولا حتي

 

 

 

بيكلمني في التليفون كلمته أنا قولتله أنا ببيع المحل
قالي ايه الي بتقوليه ده قولتله زاي ما سمعت وانت مستغرب
كده ليه ..هو انا بقولك طلقني ..حسيت من كلامه أنه عايز
يقولي ما تطلقي ولا تغوري في ستين داهية قالي طب انا
هجيلك قولتله لا خليك انا الي جيالك
رحت المحل فضلت قاعدة لحد ما خلص كلام مع واحد كان
بيشتري منه بصلي وقالي مالك بقا
قولتله من ساعة ما اشتريت المحل بتاعي وانا مش بشوف منه ابيض ولا اسود
قالي ما انتي اديكي شايفه الحال نايم والدنيا مريحه اعمل ايه طيب
قولتله خلاص بناقص منه الي مش جايب همه ده
قالي أنا معايا 100 الف تخديهم وتصبري عليا في الباقي
قولتله ما تحسب البضاعة الي فيه واديك فلوسها دلوقتي وسبهولي
قالي ايه الي بتقوليه ده انتي كده عايزة توقعيني وتخلي شكلي وحش في السوق
قولتله خلاص اخد نص المكسب الي بيدخله قعدت تقولي
الايجار الي بتلميه ف شهر هتكسبيه في يوم ومشفتيش منه جنيه لحد دلوقتي
قالي والعجلة الي ب٢٠٠٠ جنيه الي جيبها ل معاذ ابنك
والحاجات الي بجبها في البيت اي ده كله مش فلوس
قولت يابت استفزيه تاني خليه يجيب كل الي عنده
قولتله نسيت الفلوس الي دفعتهالي في العربية قالي لا انتي
الي نسيتي وكرخالي الخير ومخوناني ومش واثقه فيا
وتقوليلي انها فلوس عيالك وكل ده فلوسك الي ورثتيها من
جوزك قولتله انا مراتك وواجب عليك انك تصرفي عليا
وتجبلي الحلو كله قالي اجبلك انتي بس مش اجبلك واجيب
لعيالك قولتله بص يابن الناس انا لما وفقت عليك وفقت
علشان كنت فكراك ابن حلال وبتحبني ومن بعد الجواز وانا
حساك متغير وكنت بشوف الطمع في عنيك وبسكت وبقول
يمكن ربنا يهديه أو يتعدل من معاملتي الكويسة معاه
وانا محلي هعرف اخده ولو مخلتكش تطلقني غصب عنك
اقسم بالله هكتبلك المحل ب اسمك قالي انتي ايه الي
بتقوليه ده قولتله زاي ما سمعت كده سبته وطلعت فضل
ينده عليا وركب معايا العربية وقالي طب اصبري المحل

 

 

 

مفتوح والناس حوالينا متخليش صوتي يعلي نزلت من
العربية وفضلت اخبط ع كبوت العربية وقولتله بعلو صوتي
أنا عايزاك تعلي صوتك وشوف أنا هعمل فيك ايه
جري لفلي وقالي اي الي بتعمليه ده يامجنونه هتفضحينا
وطيت صوتي وقولتله هو انت لسه شفت فضايح بتعايرني
ياواطي ع عجلة جبتها ل ابني وشوية حلويات واكل كنت
بتجبهملي ده انت اتحيلت عليا انك تجبلي شقة ايجار ونقعد
فيها وقعدتك معايا ومع عيالي لا خليتك تجبلي شبكة وولا
كلفتك جنيه في جوازتك ووقفت جنبك وبقا عندك محليين
مش محل واحد وربنا كرمك ووسعها عليك بس انت طماع
ومكشوف اوي ع فكرة

اترك رد