رواية أحببت مشوها الفصل الخامس 5 بقلم أمنية أشرف

رواية أحببت مشوها الفصل الخامس 5 بقلم أمنية أشرف

رواية أحببت مشوها الجزء الخامس

رواية أحببت مشوها البارت الخامس

رواية أحببت مشوها الحلقة الخامسة

خرج عمران من شروده على اقتراب شاب منه يرتدي حلة سوداء أنيقة تدل على ذوقه العالى وسيم ويضع نظارات طبية على عينيه يبدو حديث الثراء فهو كعمران يعرف من تربى على الثراء ومن هو دخيل عليه ابتسم الشاب إبتسامة واسعة ومد يده يعرفه بنفسه قائلا : فادي فؤاد فخر الدين
نظر عمران الى يده الممدودة ببرود حتى ظن فادي انه لن يصافحه ولكن عمران خيب ظنه وهو يصافحة
بتعالي
ابتسم فادي وقال: سعيد جدا يا عمران بيه إني شوفت حضرتك النهارده… صدقني انا مكنتش اعرف أبداً إن الصفقه تخص حضرتك.. لو كنت اعرف كنت انسحبت اكيد
هز عمران رأسه بتفهم وقال: انا مقدر حماس الشباب اللي زيك فعشان كدا سيبتك تفرح بيها… لأن اكيد صفقه زي دي مش هتأثر علينا ولا على شركتنا… اما هضيف ليك كتير
ظل فادي محافظ على إبتسامته حتى لا يتأثر من كلامه وأردف: اكيد طبعا يا عمران بيه… احنا كلنا بنتعلم الشغل من حضرتك
نظر عمران أمامه ولم يعقب حتى اقترب مراد السعدني يقول بتملق: عمران باشا وانا اقول الدنيا منوره ليه
ابتسم عمران إبتسامة بارده وهو يصافحه فهو لا يحبه أبداً وكان والده اكبر منافس لعمران
مد فادي يده لمراد يسلم عليه وهو يعرفه بنفسه: فادي فؤاد فخر الدين
هلل مراد بتفاجأ وقال:اوووه شركة FMS… صدقني كان نفسي اتعرف عليك من زمان… عاجبني جدا طموحك وشغلك
ابتسم فادي إبتسامة واسعه وهتف: شرف ليا يا مراد باشا… اكيد هيبقا لينا تعامل مع بعض
ابتسم مراد وهز رأسه بتأكيد ثم قال موجه كلامه لعمران بتساؤل: اومال فين أسر مش شايفه يعني
رد عمران ببرود وهو يكظم غيظه من ولده المستهتر على حد قوله: عنده شغل مهم معرفش يأجله…. واعتذر عن الحضور
هتف مراد بإستهزاء: اها احنا مقدرين طبعا مشاغل أسر باشا اللي ما بتنتهيش
ثم غمز لفادي بعينه وانفجروا سويا بالضحك
…………………………
بعد عدة ايام
دخلت تالين بوابة فيلا عمران وبدل من ان تدخل الفيلا لترى فريده…. ذهبت الي الحديقة الخلفية
رأته كعادته يجلس على الإرجوحه بإسترخاء جعلها تمعن النظر فيه وفي وسامته….. لا تعرف لما تراه وسيم الى هذا الحد وكأنها لم ترى رجالا من قبل
وكيف ترى تشوهه ميزة وليس عيب تراه مميز به وكأنه تجميل لملامحه وليس تشوه يقضي عن نصف وجهه بشكل غريب…جاءها صوت فارس يقول بسخرية : هتفضلى واقفه عندك كتير
ابتسمت تالين واقتربت تجلس بجانبه وقالت: نفسى اعرف بتحس ازاي ان حد دخل مكانك من غير ما تشوفه
اعتدل فارس وقال : ودني حساسه للأصوات.. دابة النمله بسمعها
ضحكت تالين لا تصدق وجود هذا الكائن احيانا تشعر انه من وحى خيالها وانه غير موجود على الحقيقة فهى لا تراه يخرج من الفيلا أبداً وهى من تأتى إليه
وحتى حين يذهب للركض يغطي وجهه حتى لا يراه احد
هتفت تالين فجاءه: فارس هو انت ليه مش بتخرج
… او بتقابل صحابك… او تروح الساحل مثلا او تتمشي بما انك لسه نازل مصر قريب و بعد سفر طويل
تنحنح فارس وقال بشرود : انا مبحبش الخروج… وكمان معنديش اصحاب فهخرج مع مين
ابتسمت تالين وقالت بحماس: نخرج سوا انا وانت
هوديك مكان حلو جدا
نظر لها فارس بتساؤل وقال بحزن: وانتي عادي تخرجي معايا
هزت تالين رأسها وقالت: مش فاهمه… يعني اي
تنفس فارس بعمق وقال : قصدي انتي شايفه شكلى كويس… مش شايفه إن شكلي غريب… وقال الكلمه التي يكرهها ببطء…. انا وشي مشوه
شعرت تالين بوخز في قلبها بسبب نطقه لهذه الكلمه ولكن لم تظهر شفقتها عليه وهي تقول: انا مش شايفه ان فيه اي مشكله… وحتى لو مشوه زي ما بتقول فأنا شايفه ان شكلك مميز بيه… وصدقني شكلك حلو جدا… ويا فارس انا مش مصدقه ابدا إن دي نظرتك لنفسك
رد فارس بحرج: انا اكيد عارف نفسي كويس… بس انا عارف الناس هنا بيفكروا ازاي… ومحبش اتعرض واعرضك للحرج والتنمر وكلام الناس… هنا الناس دايما عينيها على المختلف… وهيشوفوا شكلي غريب
هزت تالين رأسها بتفهم وقالت: انا عارفه دا كويس.. بس انا مش فارق معايا كلام حد ولا بيشغلني… وصدقني المكان اللي هنروحه مختلف تماما ومش هيعرضك لأي حرج
شعر فارس بثقل الفكره على قلبه فهو لم يخرج من الفيلا منذ فتره بعيده فقال: تالين متزعليش مني
…. بس انا مش حابب الفتره دي ممكن بعد كدا افكر
زمت تالين شفتيها ببؤس وصمتت…. ثم قالت بعد برهة بحرج: ممكن أسألك سؤال
نظر لها فارس بجدية وقال: سؤال اي
قالت تالين بفضول: هو انت ازاي حصلك التشوه دا… وليه انت معملتش تجميل لوشك… اعتقد العمليات دي سهلة جدا دلوقتي وكمان انت كنت عايش برا
ارتسمت ملامح الحزن على وجه فارس وأجاب بشرود: سؤالك الاول مش هعرف اجاوبك عليه دلوقتي… بس ممكن يجي وقت واحكيلك اللي حصل.. بس بالنسبه ل معملتش تجميل ليه… ف دا عشان التشوه دا غالي عليا… كشفلي حقيقة كل النااس اللي حواليا وخلاني محطش ثقتي في اي حد بسهولة… وكمان خلاني اعيد حساباتي من اول وجديد…و…وكشفلي إن مفيش حد بيحبني وإن اللي كنت فاكره نصي التاني طلع بيكرهني وبيحقد عليا
ولمعت عينيه بالدموع فقام وذهب الي جناحه سريعا وتركها تحدق في أثره بحزن وقلب يود الي يذهب اليه ويمحوا عنه كل أحزانه
………………………….
كان يمر على اقسام المستشفى يراقب الاطباء والمرضي… فلفت نظره الطبيبة الجديده هنا.. وهي تركع امام طفله صغيره تبكي بحرقه وهي تضمها إليها تقول بتبرير: انا آسفه… والله مكنش قصدي اوجعك.. بس كان لازم تخدي الحقنه عشان تخفي.. خلاص بطلي عياط… انا آسفه.. طب شوفي.. ثم اخرجت من جيبها عدة انواع من الشوكلاته وقالت: خدي نقي اللي انتي عاوزاه…. ومش تزعلي
مسحت الصغيرة عينيها بيدها وأشارت على احدي الانواع فأعطتها لها هنا وهي تقول بمرح: خلاص مش زعلانه صح
ابتسمت الطفله فقالت هنا: طب اديني بوسة هنا وأشارت على وجنتها وهي تبتسم بدفء.. قبلتها الصغيره فضحكت هنا وحضنت الصغيره بمحبة
ابتسم سيف واكمل طريقه وهو سعيد بما فعلته الطبيبة وحبها الكبير للاطفال… رن هاتفه فأبتسم بإتساع واجاب بمناغشة: حبيبي
ابتسمت فريدة وأحمرت وكأنه امامها وقالت: يا سلام
كل بعلقي حلاوة زي كل مره ونسيني البلاوي اللي انت بتعملها
رد سيف ببراءه مصطعنه: انا.. انا بعمل بلاوي… حرام عليكي… دا انا غلبان
ضحكت فريده وقالت: اها ع يدي… غلبان اوي
ابتسم سيف وقال: انتي ع طول ظلماني يا ديدا
أومأت فريده وقالت: ايوا انا ظالمه
قال سيف بمشاكسه: كويس انك عارفه… وضحك بإستمتاع… ثم هدأ وقال: بتعملي اي
اجابت فريده بحماس: شوفت صنف حلويات ع النت وقولت اجربه
صرخ سيف بهلع مصطنع وقال : تاني.. تاني يا فريده… مش كفايه الكيكة المحروقه اللي عملتيها قبل كدا
ردت فريده بغضب : كدا يا سيف بدل ما تشجعني وتقولي شاطره يا حبيبتي انك بتحاولي
أردف سيف يصر على رأيه قائلا: لا يا حبيبتي متحوليش ولا تتعبي نفسك… انا مش عاوزك تتعلمي حاجه
زمت فريده شفتيها ببؤس وقالت: اومال هنعمل اي لما نتجوز
ابتسم سيف بدفئ: متقلقيش انا اللي هطبخ وهعمل كل حاجه… المهم نتجوز… انا مش عارف اليوم دا هيجي امتى اصلا
ارتسمت معالم الحزن على وجه فريده وصمتت ليس لديها ما تقوله فأردف سيف بحماس: اي رأيك اكلم خالى عمران تاني يمكن المره دي يحن علينا… انا دلوقتي بقيت شريك في المستشفى وبقا معايا فلوس كويسه نقدر نبدأ بيها حياتنا… وصدقيني يا حبيبتي انا هعيشك في نفس المستوي اللي انتي متعوده عليه… وهعمل كل حاجه عشان اسعدك
ابتسمت فريدة بمحبه وقالت: والله يا سيف انا مش عاوزه اي حاجه غيرك… كفايه انت وبس
امتلئ قلب سيف بالحب وقال: انا بحبك اوي يا ديدا
وهحاول تاني وان شاء الله ربنا هيكون معانا
قالت فريده بتضرع: يارب…. يارب
…………………
رن هاتف المكتب فأجابت چومانا وسمعت السكرتيرة تقول لها: چومانا هانم… بشمهندس أسر عاوز يقابل حضرتك
همست چومانا في سرها: أسر غريبه عني يعني جاي من غير معاد
ولكنها اجابت السكرتيرة قائله: تمام دخليه
ثواني ودخل أسر خلف السكرتيرة يقول بحرج: مساء الخير… آسف إني جيت من غير معاد… بس كنت عاوز اتناقش معاكي في موضوع مهم
ابتسمت چومانا بدبلوماسيه وقالت: ولا يهمك يا بشمهندس تنور في اي وقت
وأشارت الي الكرسي امام المكتب لكي يجلس عليه وقالت: تشرب اي
أجاب أسر بهدوء: قهوة مظبوطه
ابتسمت چومانا وقالت للسكرتيرة: اتنين قهوة مظبوطه لو سمحتي يا مني
أومأت مني برأسها وخرجت واغلقت الباب خلفها
وجهت چومانا انظارها لأسر وقالت: خير يا بشمهندس
أجاب أسر بجديه: الصراحه يا چومانا انا عندي مخطط جديد للقرية السياحية اللي عاوزين نعملها
ردت چومانا بتساؤل: مش فاهمه قصدك اي
تنحنح أسر يخفي توتره وقال: بالنسبه للتصميمات
اللي اتناقشنا فيها قبل كدا…. انا عاوز اغيريها
هتفت چومانا بمفاجأه: تغيرها… ازاي… احنا فاضل لينا اسبوعين ونبدأ تنفيذ… احنا متأخرين اصلا… والقريه المفروض تتسلم كمان 7 شهور
قال أسر سريعا: انا فاهم دا كويس بس افهميني … انا عندي فكره جديده….. ومختلفه…. هتحقق نجاح كبير
هزت چومانا رأسها بتفهم وقالت: انا مقدرة فكرتك بس هتقدر تصمم من اول وجديد واحنا متأخرين اصلا
رد أسر بحماس: متقلقيش الرسم مش هياخد وقت التصميم في دماغي… مجرد هحطه ع الورق بس وهعمل المكت في اقصى سرعه… مش هياخد وقت بس انتي بس توافقي
شردت چومانا لثواني وقالت: انت عارف انه مش قراري لوحدي… الشركة فيها اكتر من شريك
قال أسر بتفهم: ايوا انا عارف ومستعد اشرحلهم وجهة نظري
أومأت چومانا إيجابا وقالت: طب انا هكلم مراد واخليه يجي وتشرحله الفكره ولو وافق انا معنديش مانع
ابتسم أسر وقال بحماس : تمام
رفعت چومانا هاتف المكتب وهاتفت مراد قائله: مراد لو سمحت ممكن تجيلي المكتب
دقائق ودخل مراد وخلفه الساعي يحمل اكواب القهوه… وضع الساعي القهوه ورحب مراد بأسر وجلس أمامه وقال لچومانا: اي يا چومانا… طلبتيني ليه
ابتسمت چومانا وقالت: أسر عنده فكره وعاوز يعرضها عليك
رد مراد وقال: تمام كلي أذان صاغيه
ابتسم أسر وبدأ يشرح له فكرته وكيف يريد ان يغير التصميم ويصمم غيره على نطاق عالمي كي تكون القريه السياحية من افضل القري على مستوي العالم وكان يشرح بحماس اندهش له مراد الذي يعلم ان اسر بارد لا يظهر ما بداخله ولكن هذه المره يبدو مختلف تماما… ظل مراد صامتاً حتى انتهى أسر من كلامه فقالت چومانا: اي رأيك يا مراد
شبك مراد كفية وقال: انا شايف إن فكرتك حلوة جدا يا أسر… ومختلفه عن التصميم اللي قدمته قبل كدا… بس انت مدرك إن الوقت ضيق وهنتأخر جامد على التنفيذ واحنا اصلا متأخرين
رد أسر: انا فاهمه دا كويس يا مراد… بس دا تصميم عالمي…وكمان نحاول مع الشركاء ونأخر شهر كمان مش هيحصل حاجه
رد مراد بحجة قوية : بس احنا لازم نكون ملتزمين في مواعيدنا… عشان سمعتنا وسمعة الشركة
هتف أسر سريعا: بس التنفيذ لما يكون متقن ومبهر اكيد محدش هيقدر يقول حاجه
لمس مراد ذقته بتفكير وقال: تمام يا أسر انا الي حد ما مقدر فكرتك بس هستشير عمي واتناقش انا
وچومانا وأرد عليك
ابتسم أسر وقام يعدل بدلته وقال: تمام استأذن انا وهستناك تبلغني بقرارك
قام مراد يصافحه وقال: تمام.. إن شاء الله… مع السلامة
رحل أسر وجلس مراد يفكر في كلامه لتسأله چومانا: مراد اي رأيك في كلام أسر
نظر لها مراد بقوة وقال: كلام كويس جدا… بس انا عندي فكرة تانيه
ضحكت چومانا وقالت: هو النهارده يوم الافكار العالمي ولا ايه
ابتسم مراد وقال: اسمعي بس الأول
ابتسمت چومانا وقالت: اتفضل… اي هي فكرتك
هتف مراد بجدية: بفكر نفض الشراكة مع أسر عمران
صعقت چومانا وقالت بمفاجأه : إيه

يتبع…

لقراءة الفصل التالي : اضغط هنا

لقراءة جميع حلقات الرواية اضغط على : (رواية أحببت مشوها)