رواية قلاع الضر الفصل الرابع والعشرون 24 بقلم زينب ماجد

رواية قلاع الضر الفصل الرابع والعشرون 24 بقلم زينب ماجد

رواية قلاع الضر البارت الرابع والعشرون

رواية قلاع الضر الجزء الرابع والعشرون

رواية قلاع الضر الحلقة الرابعة والعشرون

( ذنب وسام )
ولا جن الفجر مثل الفجر محبوب
لون الفجر صاير يقبض ارواح
(كاظم أسماعيل كاطع )
دحجت بعيون البنية يتلامعن ويدحجن بيه
اجت اطتني الماي ، ناوشتها البنية وكتلها : الله يحفظها
ياهو الخذيتي يولي
– ما تعرفينو واحد من كرابة امي
– بالخير ، ما تشترين غراض مني ؟
– وي داده والله ما عدي وله جان بودي
-عليش عجل رجلج ما يخلي تحت ايدج جم فلس
– لا والله العندو والما عندو زتو على هذا البيت واشتراه
– هاه اشتره اي اذا اشتراه خير ان شاءالله شيشتغل هو ؟
– عندو عربانة يشتغل بيها على باب الله
– باب الله .. اي باب الله اسلم عليج داده ومشكوره اعلى الماي
اطيتها الكلاص وطلعت بس النار مشتعلة بين اضلوعي
انا اشتغل ومكسور ظهري بين بزرته وعيشته وهو ما فرد يوم اطاني لا فرد يوم اشترالي وكضاه عمره يركض وراي على الفلس ومنطينه العربانة والحصان يشتغل بيهن تالي من جدي يجمع فلوس يشتري بيت ويعرس ؟
وتعبي ؟
وحيلي اللي انهد ؟
وظهري الانكسر من حمله ؟
وعيوني وادي ورجليه ، كل صوب مني يون اذيه وما شجيت لاحد تالي هشكل اتجازه ؟
كله تلوم
كلها تذم
كلها تطعن كلها تظن ظن السوء بيه يوم الما رضيت احد يشاركني عيشتي ما خلو جلمة ما زتوها علي عبن مرة بلا محرم ويوم الرضيت بالمر .. صفى هذا حالي ؟
من چدي يبني بيت وياخذ علي وهو العمره ما اطاني
حتى بعرسي انا الكل عمري كضيته احط بثمه خاطر يسكت ويرضى علي ويضل على راس جهالي
عيوني كامت تشتط نار
وكلبي وجر غيض رايده شي اطفي بيه ناري واخذ ثاري منه
ما لكيت بيدي الاكسره بيه .. ما عندي شي اغيضه بيه واحرك كلبه
شلون احرك كلبه مثل ما حرك كلبي
شلون اهده وانعل ساعة الشفتها بيه …
يا عطا والسماك عطا والجابك علي لا ما طلعت فيض كلبي بيك وجزاتك الي ما اتسمى بسمي
عفيت جثير وسكتت جثير لجن منا وجاي والله لا احمل ولا اراعي .. اليطعن يطعن والينغاص ينغاض واليزكح يزكح فلا اهتم لاحد ولا احط احد ابالي
رجعت وانا كل خطوة ادوس بيها ع الكاع اجدح نار اعلى كثر غيضي وفورة دمي .. عزلت المحل ذاك اليوم وحطيت ولدي جدامي اعلى كثر الكهر البكلبي كارهتهم عبنهم ولده
انهد حيلي عليهم وكسرة ظهري
وهم بتالي يتسمون ولد عطا ما ولد وسام
يعني انا ما الي حصة بيهم غير التعب
وان جان ابوهم جازاني هشكل شنطر منهم مجازاة
وشيجي من ولد عطا
دار الشيطان براسي ورحت انداريت ورا البيت جبت جليكان النفط ورشيته داير ما داير الغرفة الكاعدين بيها همه
كضبت الشخاطة ..
وكعدت ادحج ع الغرفة .. احركهم واندار لابوهم وافتك من حملهم .. شبيه ما اكدر عليش ايدي ما تاخذ على الشخاطة
ما يعتازلها جثير شخطة وافتك من هالحمل الحملت روحي بيه ..
كابل الغرفة وهم يلعبون وانا ابجي
طلع ابني الجبير مروان .. شافني ابجي
جا لا سعلني شبيج تبجين يمه لا لا انتبهلي فد كالي ( يمه انا جوعان شنهو غدانا )
دحجت بوجهه .. والله من دنعل ابوكم لابو الجابكم علي
شلت النعال وطكيته راح يركض مني .. زتيت الشخاطة من ايدي وكمت سويتلهم اكل وجبته للغرفة : جبت قز القرط ان شاءالله بكلبكم وبكلب الخلفوكم اكعدرا اتزقنبوا
حجه يوسف : يمه فد ماي
– سم وزهر مر كون الله يخلصني منكم ويفكني وارتاح
الله ياخذكم انتم وابوكم مني وم شفتكم ما شفت الراحة
جنت بطرك روحي كل همي شاكل وششرب وششتغل
جيتوا تعلاوة هم بدل ما افكر بروحي افكر بيكم شوكلكم وششربكم وشلبسكم والخلفكم راهي مرتهي ما اعلى كلبو هم كل همكم اعلى افادي .. خذاكم الله وفكني منكم
مشيت اجيبلا الماي انطيتو وانا اكله : ما الله يخلصني منكم
ما محصلة منكم غير يمه جيبي يمه ودي يمي اطيني .. كل زين ما شفت من احد .
كاعد احجي اندكت الباب
طلعت لكيته قاسم : ها الله بالخير
– يا خير الاغشعه من عطيوه وبزرته
– شجالج يولي شصاير وعليش معزلة المحل
– مالي حيله اليوم
– صاير شي
– رحت
– اي ؟
– ماخذ بنت خالي زبيدة
تصدك من بين بنات الديرة كلهم ما لكى غير بنت خالي الانطكيت وتهجرت من تحت راسها واهي زغيرة .. ماخذها ومشتريلا بيت ومكعدها ومخلف منها بنت ها سمنها وانا وبزري جنهم سلابيح واحدهم بطرك العصاجيل يمشي .. والخير كلو لزبيدة وبنت .. من جدي وتعبي وكسران ركبتي .
– عاد الزلمة يحكلا اثنين وثلاث واربع
– قاسم واليرحم والديك امش عني لا احط حركة عطا بيك
– هههههه اتكشمر وياج والله
– شراح تعملين ؟
– وشنهو البيدي اعمله ؟ اتكاون وياه ؟ اطكه اذبحا ما ادري
– ولو تكاونتي شراح تجنين ؟
– وشعمل وياه
– شربي من كاسه الضوكج منو
– شلون
– الشاون خليها للزمن يحلها التعملي هسه ما تكولين
ولو اكلج .. الحجي هيج ونحن واكفين بالباب وانت معزلة يجيبلنا الشبهة
– عجل شلون ؟
– امشي نروح بالسيارة نجيب غراض للمحل وبالدرب نحجي
– تمام عجل .. اجيب عباتي واجي
دخلت جبت عباتي وطلعت صعدت وياه بسيارته الحمل وسديت الباب وكتله : ودي احرك روحي اعلى كثر ما كارهتو وكاره بزرا وحتى روحي معداعرف ايش اعمل لو شنهو الاسوي
– لا تخلي يعرف انت عرفتي
– واسكت ؟!! مجنون انت ؟
– ما تسكتين بس لو حجيتي محد راح يصف وياج يا وسام كلها راح تكلج زلمة ومن حكه وجثير نسوان ماخذين عليها رجولتهن وساكتات
– من هن عايشات بجالم ما انا العايش بجالي وبخيري ويحط عليه ضرة بفلوسي
-عجل اخذي حكج منو بدون ما تبردين كلبه وتكليله عرف
– وشعمل
– اللي عمله
– شلون
دحك علي واطمش بعيوني .. استغربت حالو
اندار عني وضل يلف بالستيرن : اسحبي العربانة والحصان
– اي
– ولو كالج عليش
كليله شفت واحد يشتغل بيهن ويطيني فلوسهن واني اشوفلج هذا الواحد
– وبعدين
– امنعي منج
– هه امنعه مني يكول يزين حظي
– عليش ؟
– انا وياه اخوة من وكت طويل
ما تدحج كطعت خلفتي وما بزرت بعد عمار
– يعني هاجرج بالفراش ؟
سكتت
حجه : ما يستاهلج المرا بلا فراش تذبل وتصير عصبية وما تحمل الرجال انا اقسم هو لو ما هاجرج ومنطيج حكج جان حتى فعلته هاي هانت عليج بس هاجرج وياخذ غيرج .. حكج تغتاضين .
تعجبت من حجيه هاذ
تجرا ومد ايدا وطبطب على رجلي وكالي : سهلة لا تهتمين خلا يولي
ضليت ادحج عليه
مشى وجان المفروض نروح للسوك بس كال
لازم امر للبيت مال المخزن نسيت البطاقة غاد انجيبها ونطلع
ما حجيت .. غير دربه وراح ع البيت
نزل من السيارة كال : ما تنزلين ؟
– عليش نازله اذا بس اتجيب البطاقة وترد
– ميخالف انزلي شوفي البضاعة الجايبها انا .. انزلي
نزلت من السايرة ودخلت البيت شفته محمل بضاعة جثيرة
– هاي راح تنزلهن بالمحل مالت السوك
– نزلت ما راح انزل
– هاااه بالخير
– تخيري اليعجبج وحطي بمحلج كلو جدامج
– لا خيرك زايد ان شاءالله
– انت عزيزة علي يا وسام
– يعز احبابك ان شاءالله لكيت بطاقتك
– احجي صدك .. انت ما تستاهلين واحد يبدلج لو يجيب عليج ضرة مرة مدبرة ومكونة حالج وعايلة بزرج وما ذابة حملج اعلى احد وانا تعجبني الكوية
سكتت بس الجو جان ما ادري شوصفه
حجيه واسلوبه هاذ جا بوكت انا متمنية شي اطفي نار كلبي
شلون لو جان من قاسم اللي اتمنيته طول عمري ؟
ارضي نفسي وانتقم من عطا على السواه بيه وبعد ما افكر لا بعيب ولا حرام ولا اجيب احد اعلى بالي مثل ما الكل ما حطني اعلى بالي
وانجرفت وياه بغير عادة ورحت زتيت روحي بنار اصعب من نار الخيانة والضرة .. ردت انتقم لروحي من كل الاذوني .. بس العملته .. وبدل ما اعين روحي ذبيتها بوحي نجس ونجست نفسي .
واكعته وعملت عملتي بغير احساب وعد ما كام مني
صفنت بروحي ( شنهو العملته ؟ ما ادري صح لو غلط بس طفى ناري وعيشني شعور عمري ما عايشته .. نقلني من عالم جنت محتركة بيه لعالم ثاني وشعور ثاني )
جنت اظن هذا الشعور ابدي وحياة ثانية
ما عرفته بداية النهاية ..
طلعت من البيت بغير حالي الدخلت بيه
دخلت وسام وطلعت وحدة ثانية تماما جني انولدت من جديد وصرت وسام ثانية .. اي اي هشكل اريد اصير اريد ما اهم بغير روحي .. اريد اصير غير الانه بيه وابطل اشيل هم هذا وذاك واجدي اعلى غير روحي اريد اعيش روحي منا وجاي .
ركبت السيارة وهو رد ركب ..
حجالي : متضايكة
اندرت عليه .. تحسرت : مدري بس لا ما متضايكة
هو هاذ الصح اعيش روحي كافي اعيش لغيري
– عيشي الي ادللج واخليج بعيوني
ضحكت بس جلمته هاي طيرتني فوك .. جن مو حجي جناحات يحطن بظهري واهيم بغير عالم .
كالي : نروح للسوك لو نخليها على باجر ؟
– لا اذا هاي خليها على باجر الجهال غاد لوحيدهم
– زين عجل راح اردج بس لا تضايكين روحج .. عيشلي معليج منه ولا تتكربيله ، خلج هشكل بعيدة ووياي وهو واجهة جدام الناس خاطر لا احد ينتبه علينا
– اي لا مالي غرض بيه يرلي انا اكهر وروحي عليه نعلت اهله لو حركت بروحي عليه مرت الاخرى .. وانا الكهرني ما هو الكهرتني روحي من حاطلها بيت وانا ذابتي اعيل روحي بروحي وهي مسعدة كاعدة ابيتها لا شغلة لا عمله يجد عليها
– تريدين بيت احطلج بيت تريدين فلوس اغركج فلوس شنهو التتمنينه بس اطلبي وانا خادم
ضحكت وياه ورديت وانا ادندن ويا روحي
اليوم انا وحدة ثاني ماهي روحي العتيكة الكاتلها الكهر
انا غير انا ..
دخلت البيت .. لكيت عطا بالبيت وناطرني
شافني كاملي بسرعة متخوصر : وين جنتي كل عالوكت بالله
– رحت للسوك
– وهادة العجايه وحيدهم ؟
– جابلهم انت شعدك بدل كعدات الكهاوي وجاي وجذب والتسرسر مادري وين جابل بزرك واكعد كله علي انا الاشتفل وانا الاربي وانا الاجابل وانا كلشي
– جديد هالحجي يوسام
– جديد عتيج تعود علي هشكل منا وجاي يعجبك يعجبك ما يعجبك يا باب تفوت جماااال مو فد جمل واحد
– وين جنتي وسام
– ايييه اكوم اجابل محلي اخير ما اجابل وجهك الما منو كل خير
– هدي المحل وكومي اعملي الاكل
– ما بيه حيل مثل ما انا صايرة مرة ورجال بالبيت اربي وأجد جرب تصير مثلي .. واطبخ
– انا اطبخ دحجي هين يولي حجيج هاذ وياي اندمج والله
– فوت بفالك وشوفني شلون تندمني يولو
عفته وكمت كام يصارخ ويصيح
ارتحت لهالاسلوب .. بدل ما جنت انا استجدي منه الحجي ويهدني ويروح لا كمت انا الاهده .. كله بفضل قاسم ولفي وعشيجي .. هيج وصارت احلامي حكيكه وقاسم الاتمناه يتمناني ويريدني والله وكعد بختج يوسام .
ثاني يوم ..
رحت للسوك ويا قاسم ومن السوك هم رحنا للبيت الينزل بيه البضاعة .. واليوم صار ايام وكمت اهتم بروحي احف البس الوان احط اعلى راسي شيلة مزخرفة ونسيت عطا وشلته من بالي ما يهمني لا هو ولا الضرة النزلها فوكي لكيت عالم ثاني اشوف نفسي بيه .
وعكب ما جنت انا اراكبه وادور وراه واتفلى
عطا استغرب وضعي .. عد ما كمت ازوك روحي وما اهتم جا لو راح لا اسعله يمتى تجي ولا اهتم من يجي ولا اكعد وياه ولا اطلب رضاه
كام يدور وراي ويريد يعرف شنهو حالي …
من كام يدورني كمت اخاف .. خففت طلعاتي للسوك كمنا نتواعد بالاسبوع يومين اروح اجيب القراض .. وما عاد قاسم يجيني ونروح بالسيارة خاطر لا يشك اروح ويا الناس بسيارة حمل توصلنا للسوك ومناك اروح للمحل ومن المحل اروح وياه للبيت وعد ما نكضي يردني للمحل وارد ارجع ويا الناس بالسيارة الحمل .
.. الا ما فرد يوم رديت عكب الظهر جان شتا بوكتها
عد ما دخلت البيت لكيت عطا جدامي مغتاض حيل : وين جنتي
– بالسوك
– بس انا رحت للسوك وما لكيتج
– وين رحت
– لمحل قاسم
– وياهو الكالك انا رحت لمحل قاسم
– عجل المن رايحة ؟
– اجيب غراض
– اي ووينها الغراض الرحتي تجيبيها يا وسام
– جان ابالي اجيب فرش موصياتني عليها النسوان بس ما لكيت حلوات كالي على الاسبوع اللاخ ينزل بضاعة جديدة واروحله
– ومنهو هاذ الكالج
– واحد غير محل قاسم
– وانت شغلج ويا قاسم شلون ااخذين من احد غيره
– تحقيق هو خوما تحقيق شرايد مني
– الرايد اعرفه وين جنتي
– جنت بالسوووووك
– بس انا جنت بالسوووووووك وما لكيتج
– عجل عينك صابها العمى
عفته وخذيت هدوم من البوفيه وكمت وهو يدحج : وين رايحة
– رايحة اتغوسل شنهي هم اعلى الغسل محاسب ؟
– وعليش تغوسلين ؟
– وي داده مستحرة انت ياهو مالتك ؟
– اكو احد يستحر بعز الشتا ؟
– اي انا عدك شي وياي بعد ؟
عفته ومشيت وهو النار مشتعلة بيه غسلت وركض للغرفة اشعل بالصوبة خاطر ادفى
هو كاعد تحس النار تلهب منه اليكربا يحترك ان جان كربته لو حجيت وياه عساه بهالحال واردى جزات العمله وياي .. هو هاذ اليستاهله والجان لازمي يصير من زمان .. كضيت عمي انطر رضاه واتحمله وانا الما شايفة منه بيوم معروف .
واندار الدور .. عكب ما جنت انا ادور وراه وهو يتختل صار هو اليدور وراي وانا الاتختل خاطر لا يكشفني .
ضل وراي وراي يريد يعرف شنهو سري وعليش اتغيرت وما عدت اهتملا وكما اداري روحي والبس الالوان الزاهية واهتم عكب ما جنت جاتلني الضيم وحالي يلعب النفس .
انكطعت من قاسم اسبوع خاطر لا يشك بيه عطا
بس اشتاكيتلا احس البيت صار كبر ومسدود علي .. لا المحل يلهيني لا الشغل اريد قاسم رايدة ارجع للذة وكتي وياه رايد اشرد من عيشتي هاي لو ساعة واعيش بغير روحي واتحرر من كل كيودي وحملي واصير مرة واحس بسعور المرة من تصير ويا رجال
عكب الاسبوع عطا غاب من البيت يومين كلت فرصة اشوف قاسم ما دامه ملتهي بالعجل ماله الحاطها صرة على راسي ما اتحملت ازود مشتاكة لقسم جثير وطكت روحي من شوفة عطا
وديت خبر لقاسم باجر انا اطلع للسوك .. وانا مطمنه كلت اروح وارد عطا ما يدري ولا يدور وراي بس جان هو اذكى مني
عد ما كعدت اسبوع ما اطلع هو زادت شكوكه عندي شي عد ما حسيني بشكه .. فراد يخليلي الساحة ويبتعد خاطر يغشع شعمل ؟ وشنهو سري وشنهو الوراي وانا ما كصرت اعلى مايه اجيت .. عد ما شفته غاب وخلالي الجو ريكت جهالي وامنتهم رحت اركض اعلى عمى عيني صعدت بالسيارة الحمل مثل التريله والناس تكعد ليورا … وونحشك واحد ويا الاخر توصل بينا لسوك المدينة
عطا جان صاعد بهالسيارة وشاد الثامه وانا لا انتبهتله ولا دحكت بيه الناس جثيرة وهو شاد اليشمغ على وجهه وشتا جثير زلم مثله شادة اليشامغ من البرد ما غريب فعله خاطر انتبه
وصلت السوك .. جان قاسم موجود سلمت عليه وصعدت بسع وياه بسيارته ورحنا للبيت وصكينا الباب ورانا .. تونا التفنا لنفسنا وما نحس الا الباب ينهجم
فزينا بساع وكمنا نتراكض هو جك الدشداشة وانا اجر بهدومي اريد البس وما احس الا حس عطا وهو يتصايح ويا قاسم ويكلو : وينها اليوم اغسل عاري منها وينهاااا
جريت عباتي ولفيت نفسي بسع وكمت الطم
دخيلك ربي يمه راح يجتلي ..
ييمه شبليت نفسي شجابه شلون اندل المجان عزا بعيني يمه راح يجتلني خلاص
فجأة سمعت هبدة قوية وخفت صوت عطا
عيوني مجحظة وادموعي من الخوف يجرن اعلى خدي من سمعت حسه خفت .. اتصنمت بمجاني ورجلية ما عادت تشيلني
دخل قاسم وكالي : امشي
– وينه
– امشي بسررررعة
ركضت كدامه وانا اجر هدومي
طلعت من المجان والكى عطا متمدد بالكاع .. مدري بيض طاكه .. ما دورت بيه كثر ما همت بروحي شلون اخلصها .
ركبت السيارة بسرعة وكمت جوا العباية البس بهدومي وقاسم داس بالسيارة وطلع بعيد : شراح نعمل هسه شلون ..
– هو شافنا اثنين شلون كليلي ؟
– ييمه شعملت بحالي انا وين ذبيت روحي شجاني يربي دخيلك
– لا تكومين تگرين احجيلي شسوي هسه
– رد اكتلا
– اجتلا من صدكج انت
– عجل احسن ما يجتلنا ويفضحنا ويخلي سالفتنا اعلى كل السان
– يولي ننسجن
– اجتلا وذبه بمجان بعيد ياهو اليدري وياهو اليكشفنا
– لا لا انا سالفة دم ما اتورط بيها .. اخاف
– تخاف ؟ عجل من خذيتني وانا مرة بذمة رجال ما خفت
– خذيتج شنهو غصبتج انا جريتج لو قنعتج .. انت الرضيتي واستراحيتي للصار .. لو ما انت الراضية ومطيتني مجال اتكربلج انا اغصبج
– هسه ذاب اللوم بيه وطلع الذنب ذنبي
– يولي هسه بحال ندور المذنب ياهو دحجي تا نشوف شلون نحل هالمصيبة هاي .. اذا وصل الحجي لاهلي لو لمرتي لو … يولي ننفضح انا واهلي … اجتلا ولا يعملها
-درد كبل لا يصحى ويفضحنا
– اي اي .. وله يمكن اكص السانه ما اجتلا
– من ورا خوفك هاذ نحنا اللي راح ننجتل اكول اسرررع
لف الستيرن واندار يرجع للبيت اردود ..
وصل للبيت الباب مفتوح .. حجه : نحن صكينا الباب لو لا عد ما طلعنا ؟
– ما انتبهت له .. لهيت بروحي البس اهدومي ..
انزل شوف
– يولي خايف انا انزلي انت
– من صدكك يولي انا الزلمة لو انت
– هي مال زلم هالسوالف وسام هاي فضيحة ما ينلبس عليها ثوب تطير اركابنا عكبها
– هسه وكت حجي دنزل دحجه يمكنه بعده
– انزلي وياي
– انزل بس انزل انت
فتح باب السيارة ونزل
انا نزلت وراه دش للبيت وانا ملتفه بعباتي وكوة تخط اجدامي وراه .. اول ما دخلنا البيت ندحج مجانه فارغ ييمه يا يابه شصار بينا .
اندار علي .. يولي هاذ ما هو وين راح
الحك نطلع من هين كبل لا يرد امشيييي
اتراكضنا اثنينا ع السيارة وصعدنا بيها .. وداسلها
– شلون هسه كلي ؟
– انا الاكلج لو انت ابوي جبير ومعروف بالديرة شلون لو راح على بيتنا عطا وحجه لا اصير على كل السان ويهدرون دمي ع العملناه .. يا ربي شلون انا ذبيت روحي بهالورطة ما ادري كحط نسوان ورحت اعلى وحدة براس رجلها
– كحط نسوان انا زلمتي كاشفني ويدور ذبحي خاطر يغسل عاره وانت تفكر بروحك بدل ما تفكر بيا عجل وين حجي العشك الجنت ترنهن باذاني انا اعوضج وانا رجلج وانا كلشي من صار الصدك تبريت مني
– انا كتلج خوني رجلج وياي انا غصبتج
– عجل ياهو الكالي اعملي مثله
– وانا جان كصدي مثل ما هو ما ينفك عليج ما تنفكين عليه وكتلج اسحبي العربانة والحصان منه ما جنت كاصد تعملين وتخونين وبعدين هو ما خان هو عرس واخذ على سنة الله ورسوله يعني ما تكدرين تعملين مثله خاطر اكلج اعملي
– انت شيطان اكبر زنيت براسي اعلى خراب بيتي وبعدين بريت روحك .. انا لو متكاونه وياه وجاتلته وجاتلني وعكب يومين تهدى الامور مو اخيلي من البلية الزتيت روحي بيها ويا واحد شيطان كال اكفر واتبرى ..
وكف السيارة : ان جنت انا شيطان عجل انزلي وشوفي شلون ادبرين امرج انا مالي غرض بيج
– لا والله ما صدكت غصبا ما عنك تتحملني وتتحمل اثمي ما انا الوحدي خنت انت مثلي ما تفرك عني شي .. وتتجازة مثلي والينجار عليه ينجار عليك ولو هديتني بنص الدرب انا اسعى بفضيحتك والله .
سكت وجر ايده من الستيرن : ادحجين حالنا شلونه ؟
كبل ساعتين جنا سمنة اعلى عسل وهايمين بارواحنا .. بلحظة الله كلب حالنا وخلانا واحد يتبرى من الاخر وواحد يهدد الاخر .
– دربنا درب ابليس وابليس ياخذك عطشان ويوصلك للسراب ويردك عطشان وتعبان ليما تهلك.. وهذا العملناه بادينا لا نتهم الله گلب حالنا واحنا اللي كلبنا حالنا يوم الرضينا لارواحنا نخون بيوتنا واهلنا وعاداتنا .. الجرى من ادينا مو من الله .. يكفي الله ساترنا صارله شهور وما حسينا الا اعلى ارواحنا ليما ابتلينا .
– والتالي شلون
– ما عرف .. كل فكري تاه ومعد اعرف شصرف وشعمل راسي كن راح يطك من التفكير والهوسة الاعرفه لاون نبتعد عن الانظار جم يوم
– اي وعكبها
– تشوف عطا شيعمل .. يفضحنا يسكت يسر من يحجي المن
خاطر عكبها نتصرف .. بس كول وين نروح بهالايام ؟
– نكعد ابيت واحد رفيجي ليما الله يحلها
رحنا على بيت واحد صاحبه يطلع للاردن يجيب بضاعة وبيته فارغ .. بس محد بحال احد
ثلث تيام واحدنا مكابل الاخر بس ولا واحد فكر يدنا للاخر
كل فكرنا شلون نطلع بهالبلية .. الجتلني جهالي شلون حالهم وانا ما موجودة شلون راح يكضون امورهم ياهو اليهتم بيهم ..
كلاني الخوف عليهم لا تهنين ولا ركد بالي لحظة عليهم ولدي اعزاز على كلبي ما اكدر بلاهم .. كتله : بعد ما اتحمل
– شتعملين
– اروح بالليل اتطمن على جهالي واجي
– الكين جهالج ماخذم عطا
– وين ماخذم
– لبيته ومرتا الثانية
– وانا جهالي يعيشون عد مرا ثانية .. شدري بيها شلونها اطكهم تعذبهم انا شلون امن جهالي غاد
– وشنهو التعملينا
– اروح بالليل اتطمن عليهم وارد
– وسام لا تورطينا
– اكبر من الورطة النحن بيها ؟
– وشنهو الراح تعملينو ؟
– اشوفهم ولو لكيتهم بالبيت اكعدم واجيبم واهج لمجان بعيد
– ولو ما لكيتيهم
– و يمكن الكاهم
– ويمكن
– قاسم انا اشتاكيت لجهالي ما اكدر من دونم بعد اليصير يصير لاون اطمن عليهم .
لبست عباتي وعو لحكني خذينا السيارة وطلعنا للديرة وصلنا غاد نتخفى .. وصلت بيتي فتحت الباب على كيييف وامشي اعلى اطراف اصابيعي … البيت خالي محد بيه .
ماخذ جهالي عد ذيج الثانية
كل الصار بيه منه لو مهتم لو معتبرني مرة وشايل حملي لو ما مستغلني وماخذ علي من وراي خاطر لا اخذ العربانة والحصان منه كله منه الصار وتالي هو الزين وانا الخاينة وجهالي ماخذم .. عليش الدنيا ما تنصف عليش ظالمة عليش تسامح ناس وتحد سنونها اعلى ناس .. عملت نفس العمله عليش هو مبري وانا مذنبة ؟ عليش كل الحك علي انا عليش كل العمله الكل وياه وانا اتخفى وماخذ جهالي واخاف ادخل بيتي .. ليمتى اضل اتلبد ومنين اخاف وشخسر اذا كل الاملكه جهالي وماخذم مني شنهو الخايفة اخسره خاطر اخاف ؟
ادموعي تجري وانا اخذت الطبر من ورا الباب وحطيتو تحت عباتي … طلعت من البيت سيارة قاسم ما هي مشيت ولا حطيته ابالي .. كل اليدور ابالي
عليش هو الصح وانا لا
عليش هو الما يخاف ولا يتلبد رغم السواه وانا اضم وجهي من الناس .. عمل عملته وما خسر شي وانا بعملتي خسرت كلشي حتى جهالي .. شخاف اخسر بعد
اموت ؟ وموتتهم اكلها ما اعيش وانا بعيدة عن بزري
الموت ارحملي من عيشتي
اروح لو اخذم .. لو اموت
وانهي سالفتي ولا اظل متلبدة وخايفة
رحت لبيتهم .. الباب ناصي مديت ايدي وجريت السركي على كيف وفتحت الباب ودخلت امشي بهداوة .. بعز الشتا والدنيا باردة .. ولدي نايمين اعلى الحصير بلا افراش وبغطوة وحدة بطرك الوسادات .. واهو ومرته وبنتا .. مدفين بفراشين ودثرة غطا فوكم .
رفعت الطبر وكلت حرام هاذ يعيش وانا اموت وولدي يعشون بذلته هو ومرتا .. يموت … اي يموت وما اخلي يعيش اعلى العملو بيا
رفعت الطبر وطبرت راسه .. طبرة وحدة براسه فز وانتثر جسمو وكام يهتز ليما هود ومات وانا بلا شعور .. فزت زبيدة مامش ضرا غير ضرا البطل مالت النفط كعدت تتحسسه وتكلا : عطا شبيك .. عطا
اندارت شافتني فوك راسها بطرلي وعباتي والطبر بيدي توها صرخت واجيب الطبر بنص راسها …

يتبع..

لقراءة الفصل التالي : اضغط هنا

لقراءة باقي حلقات الرواية اضغط على : (رواية قلاع الضر)