رواية كيد النساء وقهر الرجال الفصل الحادي عشر 11 بقلم منى محمود

رواية كيد النساء وقهر الرجال الفصل الحادي عشر 11 بقلم منى محمود

رواية كيد النساء وقهر الرجال البارت الحادي عشر

رواية كيد النساء وقهر الرجال الجزء الحادي عشر

رواية كيد النساء وقهر الرجال الحلقة الحادية عشر

(( وجه آخر ))
الحلال والحرام … الغلط والصح … المبرر والحجة …
كلمات جميعها متناقض تماما بس احيانا بيتجمعو في حاله واحدة وقتها مبتقاش عارف تسامح ولا تعاقب ف بتبقي انت كمان متناقض ف احساسك
❈-❈-❈
احلام صحيت علي كابوس بشع مهما شريف كان بيحاول يهديها إلا أنها بتصوت جامد وجسمها كله بيترعش وزي ما قامت وصوتت فجأة وقفت صوات ونامت فجأة
الشريف في اللحظة دي اتاكد أن في حاجة مش طبيعيه بتحصل قام من جنبها وطلع البلكونة يشم هوا ويفكر هو حاسس اني في حاجة حصلت هو ميعرفهاش
قاطع سرحانة صوت احلام وهي بتتكلم بضعف من وراه
احلام :
_ ش شريف
شريف جري عليها بخوف :
_ احلام مالك … فهميني فيكي ايه ؟
احلام بإصرار :
_ عايزة اتكلم معاك ممكن ؟
شريف :
_ طيب تعالي بس اقعدي انتي شكلك تعبانة … تعالي يا حبيبتي
احلام قعدت علي السرير ودموعها نازله
شريف :
_ حبيبتي انا عايز اسمعك وكل حاجة بس انتي تعبانه اوي ممكن ترتاحي بس دلوقتي كلها ساعتين والنهار يطلع تكوني ارتحتي شويه ونتكلم زي ما انتي عاوزة ممكن ؟
احلام برجاء :
_ ماشي بس تنام جمبي ومتقومش خالص عشان خاطري
شريف عدلها علي السرير ونام جمبها وخدها في حضنه
_ مش هقوم يا حبيبتي يلا نامي انا جمبك اهو
احلام خدت نفس طويل وغمضت عينيها وهي بتدعي ربنا أنها بس تنام ساعتين من غير الكوابيس اللي بتشوفها … نفسها في ساعتين بس نوم عشان تقوم وتكون قادرة علي المواجهه اللي هتخوضها مع شريف … دا قرارها النهائي واستحاله ترجع فيه …
❈-❈-❈
بعد تلت ساعات ونوم صحي شريف علي صوت جرس الباب … بص في ساعته كانت تسعه الصبح قام من جمب احلام بهدوء ونزل فتح وهو مستغرب مين ممكن يجيله في وقت زي دا فتح واتفاجا ب نوال قدامة ومعاها امير وشايل شنط كتير
شريف بدهشه :
_ ماما … امير
امير كشر :
_ لا بقولك ايه مش وقت اندهاش امك مصحياني من سبعه الصبح بسببك امسك الشنط دي كدة وامك اهي وانا راجع انام حرام عليكم( بص ل نوال اللي مكشرة بسبب كلامة ) لما اصحي هاجي اخدك يلا سلام
نوال بحدة :
_ استني هنا مش تقول ل اخوك الف سلامة علي مراتة الاول ايه قله الزوق دي انا ربيتك ع كدة
امير كشر :
_ حاضر يا ماما حاضر ( بص ل شريف اللي مش فاهم حاجة ) شريف يا حبيبي الف الف الف سلامة علي احلام مراتك وصباح الخير والسلام عليكم ورحمه الله وبركاته
وقبل ما حد فيهم يتكلم كان لف وجري ع عربيته ومشي
نوال برفعه حاجب:
_ والله لما اروح لك يا امير ل هربيك من اول وجديد ( بصت ل شريف ال مذهول ) انت هتفضل مبحلق كدة كتير مش هتدخلني بيتك ولا ايه ؟ الف وارجع يعني ؟
شريف وسع من قدام الباب :
_ اسف يا ماما معلش مش مفوق لسه ومستغرب شويه
نوال وهي بتقعد علي اقرب كرسي :
_ مش مفوق وفهمتها … لكن مستغرب ليه ؟
شريف :
_ يعني اصل حضرتك اول مرة تيجي هنا و مكنتش يعني
قاطعته نوال ببتسامة حب :
_ واديني جيت يا سيدي يلا وريني المطبخ فين خليني احضر اكله مغذيه كدة ل احلام قبل ما تصحي
شريف بدهشه :
_ لا اكل ايه يا ماما ارتاحي انتي بس وانا هتصرف اكيد
نوال كشرت :
_ هو في ايه معرفتش اربي حد فيكم ولا ايه واحد متزربن عشان صحيته من النوم والتاني بيعاملني اني غريبه عنه بدل ما يقولي اتفضلي يا ماما البيت بيتك
شريف :
_ والله ما اقصد كدة ابدا حبيبتي انا بس مش عايز اتعبك والله
نوال :
_ لا انا مش تعبانة ولا حاجة (كشرت تاني) ولا تكنش احلام مش هترضي تاكل من ايدي ؟ أو هتزعل عشان دخلت مطبخها ؟
شريف لسه هيرد قاطعه صوت احلام اللي كان واضح اوي فيه التعب
_ وهو في اكل في الدنيا كلها احلي من أكل حضرتك يا طنط … صباح الخير
نوال وهي بتحضنها :
_ صباح الخير يا حبيبتي قومتي ليه من سريرك كنتي فضلتي مرتاحة وانا اطلعلك
احلام ابتسمت ابتسامة خفيفه :
_ انا كويسه الحمد لله وشكرا يا طنط علي سؤالك وتعبك معايا انا مستهلش منك كدة انا
قاطعتها نوال:
_ بس بس مش عايزة اسمع الكلام الخايب دا يلا اقعدي ارتاحي هنا ع ما انا والواد دا نحضرلك احلي فطار
احلام ابتسمت وقبل ما شريف ونوال يتحركو ناحيه المطبخ جرس الباب رن للمرة الثانيه … راح شريف فتح واتفاجاو كلهم ب اسماء ومعاها ولادها وكان شكلهم مبهدل جدا من النوم في الشارع
احلام جريت علي اختها
احلام بلهفه :
_ ايه دا في ايه .. مالكم ؟
شريف وهو بيشيل ايلين ويمسك ايد اياد :
_ تعالو بس ادخلوا الاول وبعدين نتكلم اتفضلو
نوال بحب :
_ اتفضلي يا حبيبتي اتفضلي
اسماء بحرج وبكاء :
_ انا اسفه اني جيت بدري كدة ومن غير معاد بس انا حاولت اكلمك كتير مكنتيش بتردي وفي الاخر التلفون اتقفل و
قاطعها شريف :
_ اسماء اهدي مفيش حاجة لكل دا دا بيتك تيجي في اي وقت .. بالنسبه للتلفون ف هو هنا من امبارح مشفنهوش لأن احلام تعبت بالليل وروحنا المستشفي ورجعنا قرب الفجر
اسماء ببكاء اكتر :
_ انتي تعبانه فيكي ايه ؟ حصلك ايه ؟
احلام :
_ انا كويسه متقلقيش انتي اللي فيكي ايه ؟ مالك ؟ حسن زعلك ؟
اسماء انهارت :
_ حسن طلقني بالتلاته ورماني انا والعيال في الشارع وأمة ادتني ٢٠٠ جنيه قبل ما تزقني ع السلم
احلام بصدمة :
_ ايه !! ليه ؟ عمل كدة ليه ؟ وعياله مصعبوش عليه ؟
نوال بحزن :
_ اخس عليهم .. حسبي الله ونعم الوكيل فيهم
شريف :
_ طيب فهميني يا اسماء حصل اي خلاف بينكم وصله ل كدة ؟ ولا ايه بالظبط
اسماء هزت راسها بنفي :
_ لا لا هو هو قالي لازم امشي عشان هيجهز الشقه ويوضبها عشان قرر يتجوز بنت خالته وانه مش عايزني انا والعيال تاني وطردنا برة
نوال كشرت :
_ الواطي هو امه يرمو عيالهم كدة في الشارع دا كلام دا معقول
شريف بتعاطف :
_ طيب تحبي اروح اتكلم معاه يا اسماء ؟
اسماء :
_ لا لا ارجوك يا شريف انا بس لو سمحت هقعد هنا يوم واحد بس لحد ما اظبط اموري انا قدرت اطلع ب غوشتي و دبله هبيعهم واخد حتة اوضه ايجار واشوف شغل معلش استحملني انا والولاد يوم واحد بس الله يخليك
شريف :
_ ايه الكلام العبيط دا يا اسماء دا بيتك انتي زي جودي بالظبط عندي لو سمحتي بطلي تتكلمي كدة تاني
نوال :
_ لا حول ولا قوه الا بالله العلي العظيم مش عارفه مالكم يا حبايبي حصلكم ايه بس
❈-❈-❈
احلام بتوهان :
_ رصيدنا خلص يا طنط ( بصت ل اسماء ودموعها نازله ) رصيدنا خلص يا اسماء خلاص
نوال بعدم فهم :
_ رصيد ايه يا حبيبتي
احلام ابتسمت بوجع :
_ رصيد سترنا يا طنط … خلاص خلص ربنا سترنا كتير واحنا كنا مكملين .. بس والله العظيم غصب عننا احنا اللي شوفناه في حياتنا مش شويه ابدا محدش يقدر يستحمل اللي انا واختي استحملاناه
شريف :
_ احلام انتي بتتكلمي عن ايه ؟ كلامك كله الغاز من امبارح وانا مش فاهم حاجه
اسماء بتعيط وهي ضمة ولادها الاتنين في حضنها جامد
احلام مسحت دموعها :
_ انا هقولك بس قبل ما اقول النهايه لازم تسمع البدايه الاول … لازم تعرف حكايه اتنين اخوات من يوم ما جم علي وش الدنيا وهما متمرمطين بسبب أهل ابوهم … اتنين كل ذنبهم أنهم جم بنات وأمهم شالت الرحم في الولادة التانيه بسبب نزيف حاد ولأن ابويا وأهله كانو من الصاعيدة اللي بيفرق معاهم خلفه الواد من البت امي كانت عايشه في مرار وإهانة وخدمة وزل وبعد ولادتي بشهر واحد ابويا اتجوز جارتنا وجابها في الشقه اللي فوق امي علي طول ومبقاش بينزل تحت نهائي … وجارتنا جبتله ولدين تؤام واتعملهم احلي سبوع لدرجة أنهم فرقو فلوس في السبوع من فرحتهم … ومن جبروتهم خلو امي خدامة عند ضرتها ولما كبرت انا واختي شويه كنا بنضرب من ستي وعمتي لأتفه الأسباب … عملنا حاجة معملناش حاجة بنضرب ولما بنرد عليهم أو نحاول ندافع عن نفسنا … تسلط ابويا علينا يجي هو ويكمل علينا ضرب وشتيمة وبهدله … امي من الكتر القهر والتعب والذل اللي شافته تعبت اوي ومبقتش تقدر تقوم من علي السرير … ابويا قالنا ننزل نشتغل ونصرف علي علاجها وعلامنا لو مصرين نكمل هو مش ملزم لا بينا ولا بيها … وفضل في الشقه اللي فوق مبينزلش الا عشان يضربنا مع عمتي وستي … البيت كان قديم جدا وكزا مرة يجيله قرار ازاله بس هما كانو مطنشين … وفي يوم كنت راجعه انا واسماء من الجامعه عشان يادوب نتغدي وننزل بسرعه الشغل لاقينا ناس كتير ملمومه قدام بيتنا والبيت اصلا كوم تراب وكل ال كان فيه مات … امي وابويا ومراتة وولاده الاتنين وستي وعمتي كمان كنا في حاله صدمة وذهول مش مصدقين أن في ثانيه كل حاجة راحت … كل حاجة حلوة و وحشه راحو سوا … وفضلت انا واسماء لوحدنا … ومن يومها واحنا بطولنا في الدنيا دي بنلطش فيها وتلطش فينا … واتربت جوانا عقدة من أهل الاب كلهم واتفقنا أن لما نتجوز لازم اجوازتنا تبقي تحت طوعنا … لازم منكنش ضعاف ولا مذلولين ابدا ابدا مهما حصل … اسماء اتجوزت الاول … وحسن كان ابن أمه وكل اللي كان بيحصل في امي حصل مع اسماء الفرق الوحيد أن امي كان بيحصل معاها كدة عشان خلفتنا بنات واسماء عشان اياد وايلين تعبانين وللاسف جالها نفس النزيف ال جه ل ماما وشالت الرحم … ومن هنا قررنا أننا مش هنعيش نفس التجربه تاني … اياد وايلين مش هيكونو احلام واسماء تانيين … و ( سكتت وخدت نفس ) ورحنا ل دجال عمل ل اسماء عملين ل جوزها ول حماتها عشان يكونو تحت طوعها وحسن ميتجوزش عليها ولا يرميها ويفضل مع عياله بيصرف عليهم ….
نوال وشريف طول ما احلام كانت بتحكي كانت صعبانه عليهم جدا لدرجة أن شريف الدموع لمعت في عينيه ونوال دموعها نزلت …
بس لما بدات تحكي علي الدجال ملامح الحزن اللي كانت مرسومة علي وشهم اتحولت ل صدمة … صدمة كبيرة اوي
_ والاعمال جابت نتيجة وحسن وماماتة كانو كل ما يفكرو في حوار الجواز التاني دي الدنيا تقف ويرجع يعيط ل اسماء ويقولها انا اسف انا بحبك وهكمل معاكي مهما حصل … ساعات يقلب وساعات يتعدل وكانت ماشيه … لحد ل لحد ما قابلتك يا شريف … حبيتك بجد حبيتك بجنون وكان اسعد يوم في حياتي يوم ما بقيت مراتك وفي بيتك حسيت ان الدنيا بتضحكلي خلاص .. بس بس خفت .. خفت كل حاجة تتكرر للمرة التالته … اقنعتك أن ناجل الخلفة شويه لحد ما نشبع من بعض وانت وافقت … وفضل جوايا هاجس أن اهلك هياخدوك مني … هيخلوك تسيبني … و و
شريف بنبرة كلها ضياع :
_ و روحتي للدجال انتي كمان زي اختك مش كدة ؟؟؟؟؟
احلام هزت راسها بموافقه :
_ اه اه روحت كنت خايفه وشوفت ان اللي عملته اسماء جاب نتيجة عملت زيها خوفت اعيش كل حاجة تاني اسماء اتبهدلت واتوجعت وهي مش بتحب حسن كان جوازة والسلام لكن أنا بحبك بحبك واموت لو بعدت عني خوفت والله ولاقتني بروح وبعمل زيها
نوال بصدمة وحزن :
_ استغفر الله العظيم …. استغفر الله العظيم … لا حول ولا قوه الا بالله العلي العظيم رحمتك يا ربي رحمتك بينا
شريف بوجع :
_ و بتقوليلي ليه دلوقتي ؟ ايه معقول ضميرك صحي فجأة ولا ايه ؟
احلام بصدق :
_ انا مهما قلتلك اني ندمت انت مش هتصدقني بس قلتلك دلوقتي لاني خلاص هموت يا شريف … اخر مرة كنت هناك كانت امبارح وشوفت حاجة مش هقدر اوصفها حتي … ومندوه قالي انها مش هتسيبني الا بموتي يا شريف مش هرتاح من أنفاسه اللي محوطاني الا بموتي مش هرتاح من شكلة اللي بيظهرلي كل ما عيني تغمض الا بموتي يا شريف … ودا خلاص قريب اوي انا حسه يكدة نهايتي قربت خلاص مش هينفع اموت من غير ما اقولك واحاول اخليك تسامحني عشان خاطر ربنا متخلينيش اموت وانت مش مسامحني كفايه ربنا وغضبه عليا عشان خاطري يا شرررريف
نوال :
_ ازاي قدرتو تعملوا كدة !!! ازاي مخفتوش من ربنا اللي اكبر من الكل !!!
دا الرسول عليه الصلاه والسلام قال من اتي كاهنا أو عرافا فقد كفر بما أنزل علي محمد صدق رسول عليه افضل الصلاه والسلام … كفرتو عشان شويه ظروف وحشه اتحطيتو فيها ؟ مجاش في بالكو انكم تحلو مشاكلكم باي طريقه تانيه غير الكفر …. انتي يا ست اسماء مفكرتيش أن دا اختبار من ربنا عشان يشوف قوة صبرك وتحملك ؟ مفكرتيش أن بدل ما تخلي ابوهم يفضل معاهم بالسحر والأعمال غصب عنه انك تطلقي بكرامتك وتشتغلي وتربيهم وتكوني اب وام وتبقي واثقه أن وقتها ربنا هيجازيكي كل خير وهيعوضك عن تعبك معاهم دينا واخرة ؟ وانتي يا احلام فكرتيش بدل ما تقطعي جوزك اللي بتقولي انك بتحبيه من أهله انك تقربي منهم انتي طالما مشفتيش منهم اي حاجة وحشه ؟ مش يمكن كنا نكون أهل وسند ليكي بدل ما انتي لوحدك في الدنيا ؟ استسهلتو طريق الشيطان و بتبرروه لنفسكم عشان ظروفكم ؟ لا حول ولا قوه الا بالله العلي العظيم ايه اللي انتم وصلتلوله دا اي دا
شريف طول الوقت ساكت وعلامات الضياع والدهشه مرسومة علي وشه طول عمره بيسمع مقوله طلعت ل سابع سما ونزلت فجأة ل سابع ارض وكان بيستغربها جدا … دلوقتي بس حس بالجمله دي … دلوقتي بس فهم احساس اي حد في يوم قالها قدامة وهو اتريق عليه … كان عايز يتكلم بس مش قادر
نوال بحزن :
_ حبيبي اتكلم ساكت كدة ليه متخوفنيش عليك عشان خاطري
شريف اخيرا صوته طلع :
_ احلام انتي طالق … مفتاح شقه السيدة زينب فوق اطلعي لمي هدومك وخدي اختك وامشو من هنا … هخرج الف بالعربيه ساعه ارجع ملاقكوش هنا سامعه وورقتك ومؤخرك هيوصلوكي علي هناك .. ( بص ل أمة بوجع ) انا مش قادر اتنفس معلش خليكي هنا لحد ما يمشو كلميني هرجع ماشي
نوال بدموع :
_ ماشي يا حبيبي زي ما تحب
شريف خرج من غير ما يبص مرة واحدة علي احلام وهي واختها وافقين دموعهم نازله ومش قادرين يتكلمو
نوال بقوة :
_ اتفضلي اطلعي نفذي ال عليه … حرام عليكي كفايه اللي عملتيه فينا … اطلعي من حياتنا بقا اطلعي …
احلام جريت علي فوق واسماء قعدت علي اقرب كرسي وقعدت ولادها علي رجلها ودموعها نازله من غير كلام
نوال كمان قعدت بارهاق وتعب ولسانها بيردد ايات من القران الكريم ودموعها نازله بقهر و وجع علي الحال اللي ولادها فيه
بعد ساعه ونص تقريبا كانت احلام واسماء مشيو وشريف نايم علي رجل نوال بيعيط زي العيل الصغير وهي بتقراله قراءن وتطبطب عليه
❈-❈-❈
في الكافيه فارس كان قاعد ومستني هند علي قد ما كان زعلان بسبب كلام اختة علي قد ما كان فرحان أنه هيشوف هند وهيتكلم معاها وجها ل وجه
بعد حوالي عشر دقايق وصلت هند وهي باين عليها التوتر ابتسم فارس وشاورلها
فارس وهو بيسلم عليها :
_ صباح الخير ع الناس المتأخرة
هند بخجل :
_ صباح النور عامل ايه دلوقتي ؟
فارس بحب :
_ بقيت تمام لما شوفتك خلاص
هند بتهرب :
_ طلبت فطار ولا لسه ؟
فارس :
_ لا مستنيكي اكيد وبعدين انتي اللي جيتي هنا قبل كدة يعني انتي اللي عارفه ايه هنا حلو وايه لا
هند :
_ تمام خلاص هطلبلك انا ع زوقي اوك ؟
فارس :
_ اوك
فطرو سوا في جو هادئ ونظرات بتقول كلام كتير متقلش بينهم وبعد الفطار طلبوا حاجات يشربوها وبدأت هند الكلام في موضوع اختة
هند :
_ قولي بقا حصل جديد من بعد ما قفلنا امبارح ولا ايه ؟
فارس ابتسم بالم :
_ لا لا انا كلمتها تاني ولا هي كلمتني
هند :
_ طيب يا فارس انت لازم تفكر بهدوء وبعقل اكيد في حل يرضي جميع الأطراف
فارس :
_ حل اي يا هند … يا هند اللي انتي متعرفهوش أن بابا أداها نصيبها في الشقه فلوس بوديعه في البنك وطلب مني يكتب الشقه بيع وشراء ليا وانا رفضت
هند بتعجب :
_ رفضت ليه يا فارس دا حقك
فارس بوجع :
_ رفضت عشان حبيبه تفضل حسه أن دا بيت ابوها مش بيت اخوها …. رفضت عشان راعيت مشاعرها وبدتها علي نفسي عشان كدة امبارح اتصدمت لما كلمتني ومبقتش عارف اقول ايه
هند بصتله بتأثر ودماغها كانت شغاله تفكير في حل للمشكلة دي قاطع كلامهم تلفون فارس ال رن برقم حبيبه بص ل هند بتوتر
هند :
_ في ايه مالك ؟
فارس :
_ حبيبه بترن عليا
هند :
_ طيب رد بسرعه يمكن تكون صرفت نظر عن كل الكلام اللي قالته امبارح
فارس هز دماغه وفتح علي حبيبه
فارس :
_ الو
………
فارس :
_ بتعملي ايه يعني ف الشقه مش فاهم ؟
…….
فارس :
_ نعم ! مشتري ايه ومحامي ايه ؟ حبيبه انتي اتجننتي ولا ايه ؟
……
فارس :
_ لا انا لحد دلوقتي بتعامل بهدوء يا حبيبه بس انتي زودتيها اوي وسيبان للشقه مش هسيبها وبيني وبينك المحاكم وحلني بقا خصوصا انا كمان شهر هكون متجوز فيها وابقي وريني هتخرجيني منها ازاي
……
فارس :
_ اقسم بالله ما اي كلام ورحمة ابويا وابوكي انا قاعد مع البنت اللي هتجوزها اهو دلوقتي وبنتفق علي كل حاجة وانتي وجوزك اعلي ما خيلكم اركبوه
……
فارس :
_ لا واخاف من ايه اقفلي واحنا نص ساعه نكون عندك بس وقتها انتي اللي تكوني قد الكلمة اللي قولتيها دلوقتي سلام
فارس قفل وكان باين عليه الغضب جدا
هند :
_ هو ايه اللي اتقال دا ! انا مش فاهمه حاجة
فارس :
_ هند ارجوكي وجودك معايا هو الحاجة الوحيدة اللي هتخلي حبيبه تتراجع عن اللي بتفكر فيه
هند :
_ وجودي معاك ازاي؟
فارس برجاء :
_ حبيبه حلفلتلي أن لو فعلا في واحدة في حياتي وهتجوز هي هتصرف نظر عن حوار الشقه دا وكمان هتتنازلي رسمي عن نصيبها بس تتأكد من كلامي الاول
هند :
_ تتأكد ازاي يعني ؟ عايزني اكلمها في التلفون طيب ؟ معنديش مشكله يا فارس لو دا هيحللك المشكله دي
فارس بنفي :
_ لا … عايزة تشوفك دلوقتي … هي في الشقه حاليا ومعاها جوزها ومحامي ومشتري كمان كانو جاين يحطوني قدام الأمر الواقع و وعدتني لو فعلا في واحدة في حياتي كل دا هينتهي فورا بس تيجي معايا دلوقتي
هند برفض :
_ لا طبعا مستحيل مينفعش
فارس :
_ يا هند اسمعيني بس انا
قاطعته هند بإصرار :
_ مش هينفع يا فارس عايزاني اكلمها اوك حتي لو فيديو كول لكن مرواح شقتك لا استحاله مش هيحصل
❈-❈-❈
احلام واسماء وصلو الشقه وهما في حاله انهيار تام وندم شديد علي اللي عملوه واللي وصلوله دلوقتي
❈-❈-❈
هند روحت بعد مدة متوتره وخايفه والكل لاحظ انها مش علي طبيعتها
❈-❈-❈
وانتهي اليوم وجه يوم جديد كله مفاجات غير ساره علي ابطالنا
محمود صحي من النوم هو والبيت كله علي صوت خبط جامد ع باب البيت نزل جري فتح واتفاجا بظابط واقف قدامة
محمود بصدمة :
_ أيوة خير
الظابط :
_ دا بيت هند محمود
محمود بقلق :
_ ا أيوة يا فندم انا والدها في حاجة ولا ايه ؟
الظابط :
_ طب ياريت تندهلها معانا أمر ضبط وإحضار ليها
محمود برعب :
_ ضبط وإحضار ل بنتي انا ليه ؟ عملت ايه ؟
الظابط :
_ متهمة في قضيه قتل واي تفاصيل تانيه تقدر تعرفها من القسم بعد ازنك اندهلها بدل ما ندخل نجبها احنا بالقوة

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية كيد النساء وقهر الرجال)