رواية قلاع الضر الفصل السابع والعشرون 27 بقلم زينب ماجد

رواية قلاع الضر الفصل السابع والعشرون 27 بقلم زينب ماجد

رواية قلاع الضر البارت السابع والعشرون

رواية قلاع الضر الجزء السابع والعشرون

رواية قلاع الضر الحلقة السابعة والعشرون

<< يردح حيل الما شايفها >>
غافلونه وباگو العشره غفل من بين ادينه
وشگگو مكتوبنه وبلا خجل ذبو علينه
(كاظم إسماعيل الگاطع)
داس ابريك اهتزت السيارة هز
حجيت: ان جنت نسيت انا ما نسيت يقاسم
– و وووو وسام .. انت منهي وسام
-سنين عمري ضاحت وبزري تاه وانت حاليتلك السوبر وتهفي بدشداشتك ولا على بالك هم .. عكب ما زتيت هموم الدنيا فوكي
تحرك راد يفتح الباب يشرد
وجر السجين وانبتها بظهروا .. صرخ بعلو حسه وكام يفتح بالباب بلهفة .. فريت السجين بلحمه وجريتها .. نزل من السيارة يركض وانا فكيت الباب ورحت اركض وراه
بكل حيلا يركض واحط السجين الاخرى بنص ظهري
هوى للكاع وسكط وانا كعدت فوكه .. ثلث طعنات اربعة
ليما تاكدت كلبه مات .. كمت من فوكه
ادحج اديا كلها دم
حسيتها بهدومي وتكربتلا خذيت المحفظة مالتو
فكيتها متروسة فلوس خليتها بعبي هي وفلوسه ومستمسكاته ومشيت ..
ليغاد وتذكرت السجين خاف ياخذون السجين الزتيتها وبصماتي عليها ركضت ليها تناوشتها من الكاع كضبتها بعباتي وكمت امسح دون ما امسها .. ذبيتها ع الكاع وكمت احفر بالتربان ليما عملت لي نكرة .. شلت السجين من الكاع بثوبي وزتيتو بالنكرة وهليت التراب عليها وطميتها
هديتها ورحت اركض من المجان ابعد خاطر لا احد يمر ويدحجني .. بالثلث ساعة وانا اركض ..
كمت الهث وكفت وانا متجية اعلى ركبي وادحج الدرب بلكت سيارة تمر اصعد وياها
نطرت اريد سيارة اطر ماكو
كل التمر تعكبني وتمشي ما تكف ..
كمت امشي عكس السير خاطر ابعد من جثة قويسم وكلما شفت سيارة جدامي اكوم اواميلها وما تكف فوك الساعتين
وكفت حمل شايلة ناس ركبت وياهم وانا اغطي بروحي بالعباة
ضلت المرة البصفي تدحج اعلى ادية وصخة ومدماية
غطيت ادي بالعباية
وانا اميل عنه لهالكتر واطيها ظهري
وصلنا لمرك سيارات ياخذنا للسوك
نزلت وركبت ويا السيارات الرايحة للسوك
من السوك رديت للديرة ودشيت لكلعة جدي .. مشيت للحنفية اغسل .. اجتني جدتي : يولي وين رحتي
– هيج شغيلة
– وشنهي هاي الشغيلة .. يا يولي اشنو هذا الدم ؟
– انصابيت بالدرب شخطتني العربانة
– يولي احجي الصدك شعاملة
اندرت لها : جتلت قويسم
صفكت وجهها : عزا العزاج يوسام يولي توج طالعة من السجن والشرطة تلاحكج ما اتوبين
– هي ملاحكتني ملاحكتني وانا محكومة مؤبد عليش اخاف وشنهو الاخسره ؟ حريمة اخلي يعيش وانا وبزري ضعت من تحت راسه واهو مرتاح
– وهيه هو وينا ؟ اهلو دروم بالعملتي
– محد دحجتي جتلته اعلى درب تايه هيمة ما بيها احد
– ولو عرفوا بيج يولي ما انت جاية وماخذة ولدج ورايحة اتشوفين حياتج وتستقرين شلج بهالجرم يجدة عليش لوثتي اديج بيه
– حكي ما اسكت عنه جده .. وثاير عكبه لو ما ردلي بيتي
– هش تف من ثمج يولي فالج لا كبلنا شطالبة الولد
– اعرف تودي وما تنطين بي
– ما بغلاتج بس ما ارضى بهالحجي .. يضل ابن شذرة كلبي
– شذرة العزيزة عليج جدة انا لا شفتها ولا حسيت بحنانها خاطر احطلها كدر باخوي اليشابه العدو بفعايله .
– وهسه شني شراح تعملين
– ارد لبغداد شعمل بعد
– والمصيبة العملتيها
– لا من شاف ولا من درة ونا يهمني لو كضبوني دام خذت بثاري وجتلته .. ازيد شي جان متعبني غاد قويسم انا بالسجن وهو حر اعلى ممشاه يمشي ما اعلى عينه حاجب ولا جنه غلط وياي انا شلت الاثم كله
– يولي ما تنجرعين اللهي ستر منج
– بت بتج انه جدة وما اكصر شي منج .. مثل ما جتلتي جدي بلا رفت جفن جتلت ثاير تشابه
– لا هين واكفي عدج والله وبعالي سماه يوسام لو كربتي ثاير لا اغضب عليج وما يطخ الساني السانج دوووم
– انا اخذ ولي كبل لا ينزل الغروب تاخرت
– ضلي اليوم وباجر امشي
– خير البر عاجله خليني امشي كبل لا تجي الشرطة
لميت ولدي وبت رجلي خليتم بسيارة اجره خالي مجبل اطاه فلوس وليمت شكو النا وردنا نطلع ، جدتي كامت تبجي على ولدي. حضنتم شبكتهم ووصتني عليم
حبيتها وسلمت عليها كالتلي : لا تذبين حيلج اعلى هاذة السجان جدة ينخاف منه ما تعرفين شنهو الوراه
– مالي غيره بالدنيا اتحمله
– شجابرك ع المر غير الامر منا حطي عينج بعين الله وراعي ولدج واحذري بروحج غاد خوالج كلم اذا اعتازيتي شي امشيلهم لا تضلين بكيده
اطتني عناوين خوالي .. وتسالمنا وطلعنا لبغداد .. خذانا ويا الغروب .. ل١٢ بالليل نحن ابيت خالي ناصر .
تفاجو بطبتنا ما جان اعلى بالم
كتلم بس الليل والصبح نغبش لبيتنا
ناموا ولدي .. ضلت بس الزغيرة قدس كاعدة ومستغربتني
دحجت بيها وخزيتها : عليش ما تنامين يولي
غطت راسها بالفراش ودفنت روحها ما كمت اسمع بس الشهيك مالها وهي تبجي بخنيس .. تمددت بصف ولدي
لثاني يوم من السبعة .. خذيت ولدي وخذيت البنت ورحنا للجول .
جان شعوري وياها ما عرف شنهو
ساعة اشوف نفسي بيها يتيمة ومالها لا اب لا ام وما اريد تصير مثلي يوم الضليت تحت رحمة عمي جدوع يعلمني على كل السوالف الشين
وساعة ما بودي ادحجها اشوف بيها ابوها والعمله بيه
وامها الغدرتني وخذت رجلي واجت هي نتيجة غدرهم الي
ساعة اكسي عليها وساعة اكله امشي من وجهي واحبسها بحجرتها خاطر تضل بس نايمة وما تشتغل
شوي شوي انا وولدي كمنا نشتغل بالكاع اليم الحول
وريسان يمش ياخذ الولد يشتغلون وياه بالحزب
صار البيت مرتع له ولفعايله
وانا كلشي يعمله شريكته واغطي اعليه
يجيب ناس يعذبم هين
يجيب جثث يدفنم
ما كمت اهاب ميت ولا كلبي يرف لحي
لو ينكسر خاطر اعلى احد
كلبي جن حجر ..
جمعت اليشتغلونه ولدي وضميت
واروح لبيت خالي ناصر اشوف جديتي غاد ..
اشتريت منم هايشة وجم دجاجة ..
وجبتهن للجول بنيتلم مراح وخليت الحواوين بيهن
قدس حيل ارتاحت للحلال صارت متعتها من الجول هالحواوين تصبح الصبح تركض تجابلم تنظف وتغسل وتوكل بيهن وتراعيهن كمت كل ما يصيرلي فلوس اجمل عليهن واروح اجيبلي صخلة ديج هراتي وهي فرحانة بيم
عاشت عدي وكل بالها انا امها
ما غيرت فكرها ولا كتلها انا ما امج
خليها تحس عدها ام بس لا اكربلها ولا اواطيها كلش اتبعد عنها
ولو ردت احجي انتر وازمخ .. عاشت عيشة الحيوان تاكل تشرب تنام وهذا الردتو ما تتلوث مثلي خليها طينة بهالحياة ما تعرف عنها شي تاكل وتشرب واعلى همومها هايشتها ما تاكل لو صخلتها معسرة .
ولدي ويا ابو وهب يشتغل
وانا زرعت الكاع وقدس تعاوني ..
كدرت احصد منها وولدي ياخذونم وبيعونه وهم كمت اجني فلوس.
مروان جبير وازلمة عمره ما ادري شكثر كمت احسه يطلب زواج ويتعتر من يريدله حاجه ويصيح
لو عدي مرة ما غسلتلي هدومي
لو عدي مرة ما عملتي اكل
لو عدي مرة اجابلكم
وانا يا مرة اخطبها اله ؟
وياهو اليرضى يطيني مرة لابني
صار كوان بيني وبين مروان هو يريدله مرة
وانا ما ارضى بياهي الجان تجيلي جنة عبن انا عد الحكومة شاردة الاجيبها ابيتي شعرف عنها يمكن تضطاك مني وتضوج وتروح تبلغ ويصفى البيت الها وانا ارد للسجن اعيش عمري بيه .. كمت اسعل وادور بلكت الله الاكي بنية تناسب حالي
الا ما فرد يوم علمت بجدتي يازي مريضة عد بيت خالي ناصر باللطيفية
حطيت عباتي على راسي ووصيت قدس ما تطلع
حدها للمراح لو شفتها كاربة الجول اكطع جدمها
وخليت يوسف يمها بالبيت خاطر لا تضل وحدها بالجول وهي بنية ومشيت لبيت خالي .
دكيت الباب .. طلعتلي بت خالي ( نهلة )
سلمت عليها وكتلها : عجل جديتي وين هي ؟
– داخل تفضلي
دخلت لكيت جديتي متمددة بالفراش : ها جدة سلامات شخيرج ؟
– العمر له حوبة يجده وحيل ما ضلي بعد
– لا لا شباب شباب ان شاءالله ما بيج الا العافية يحبيبة
– الله يسلمج جدة ، انت شلونج ولدج شلون حالم
– بخير يسلمون عليج
– ريسان شنهي اخباره
– ماله خبر يجي اعلى شغله ويرد نوبات من يعتاز ينام بالجول
يضل بالدوانية والولد ينامون وياه .. يكضي شغله ويمش
– يجده خلصي روحج منه ريسان امر من حبل المشانق
– مسايرته يجده واشوف وين تصل وياه الدنيا
ما بيدي شي ، لو تخلفت عنه يكضبوني الشرطة وارد انحبس موبد اذا ما ردو فتحو ملفي وخكموا بيه جديد وعدموني
خليني جاعدة اعلى ولدي اخيرلي
– شنهي اخبركم بجول
– مامكو بس مريوان هاذ دولبني
– شجالو يولي عاد مروان اعكلهم
– يجده مفلفل الولد يريدله مرة
– اي عرسيلا
– تعرفين حالي يجده لا اكدر اجيب ياهي الجان ولا احد يرضى بوضعنا ويرضى بته تعيش بجول بنص مكبرة
غمزت عينها واشرتلي اكرب منها
: عدي الج وحدة
– منهي ؟
– جريبة منج وتعرفيها معدلة ونادرة وازوينة تشيلج يولي شيول
– منهي جدة ؟
– نهلة بت ناصر
– يا جدة عاب حالها اكبر من ابني بقاطين شنهي شناقصة ابني واخذله وحدة كشمة خشمه بالطول ومفچچة وكصتها دلزة ما تتعاين انا مرة لو دحكتها اكش منها مو تنوب ابني
– يولي بت عرب وتشيلج تنفعج .. ومعدلة
تشتغل وياج تعاونج والشين التعرفينو اجود من الزين الما تعرفينو
– ما ادري شكلج والله جدة
– دانشي هالامر ابالج ورديلي خبر ما طولني هين
– مطولة انت هين لو تردين
– لا والله يجدة مطولة وهين ناصر والولد ياخذوني للدكتور
– عجل ليش عد خالي ناصر ما رحتي لبيت جابر حميد
– روحي تطيب لبيوت العرب ما ارتاح بيبوت الحضر ومرت ناصر حبابة مثل بتي تشيلني تتحملني ما تكش مني ولا ولا تمل من حملي .. ذنيج جدة ما مثلها .. من اروحلها احس بروحي صهرة فوك ظهورهن .
ضليت كاعدة عد راسها اسولف وياها لساعتين سلمت عليها وشلت روحي ورديت للجول
بس جبت الدرب كلو افكر بالكالتو جديتي اعلى نهلة
المرة حيل ما حلوة وابني عزيز علي تاليته اخذلو وحدة ما يتدحج برجهه
بس هو خلالي درب
يريد يعرس وماكو غير نهلة امن بيها بت خالي ومثلي جنها زلمة شاغرلة وبت عرب ما بنت مدينة مخداية .. تعرف ذبتنا
بس يربي بايرة وطايحة بجبد اهلها اجي اذبها بجبد ابني اعلى يا مال ؟ .. والله ما ادري شعمل وما جدامي غيرها اتخطبها .
هيييي انا هم بطرانة جن بنات الناس كلها تتمنى تصيرلي جنة وكاعد اعيب واتخير الكشمة من الحلوة
عد ما جا مروان يناتر ويزامخ
كتلو اكرب يالثور طحتلك اعلى مرة، عد ما سمع السالفة بيها مرة فز من حيلا واجالي : صدك يمة عليج الله
– اي وحك ربك لكيتلك مرة
بس شلون مرة تكل للكمر غيب وانا بمجانك
– عليج الله صدك ياهي منهي اعرفها انا لو لا
– لا ما تعرفها وحدة من بنات خالي ناصر
– ما عرفهن ما شايف بناتو انا
– يولي مستورات ونادرات ومعدلات بس
– بس شنهي
– حلوات جثير حلاتهن زايدة يعني من اتدحج بيهن عينك تعمى تكول شدعوة هلكثر حلوات والحلوة ييمة ينخاف منها تجيب الغين وانت ابني اخاف عليك
– يمه عليش تخافين هو يا عين تدخجها بهالجول بس عيني انا راضي يمه بس اخطبيها الي
– ما تمانع
– لا والله يمه ما امانع
-ولا بعد يومين تكول ورطتيني ولبستيها براسي
– لا لا بس اخطبيها حرام بالحرم لو فكيت ثمي
– اي خوش خاطر ما احنل اثمك هاذ زواج ما لعب عشرة عمر وبيت وعايلة اذا ما تريد وما مستعد كلي خاطر ابطل
– يمه شنهي سالفتج مو كلتلج انا تحمل كلشي بس خطبيلي
– انطر اشوف هوالي يرضون لا ياهو الكال يطون بنتم
-باجر باجر غبشة اطلعي
– يولي شكثر مفلفل انت يول انجعم عيب جبير انت ما زغير
– يمه يا زغير يا جبير طكيت تعرفين شنهي طكييييت اريدلي مرة
– اي بس اصبر من دعر الدهرك انطر باجر امش واخطبها الك
– زين يمه
اندار المسيجين وكلبه طاير من الفرح
عداله امه جابتلا اخت الكمر .. خلي بفرحته عود يوم عرسه غصبا ما عليه بعد يرضى ويوافك حتى لو كشمة وبايرة واكبر منه
ثاني يوم غبشت لبيت خالي كعدت ويا جديتي وحاجيتها وكتلها : جدة وصاية الله ورضاج انا من غيرج اضيع اريدج انت تكنعين هالي وتتخطبين لابني
كالت : ميخالف انا احجي
للظهر ضليت اعلى الغدا كضينا وجابو جاي
وكعد خالي يسعلني على احوالي بس ما يدري عن الجول شي كل اليعرفه انا جاعدة اطراف خاطر لا تكضبني ااشرطة
صبرلنا جاي ونهلة وزعت بيلات الجاي علينا واطتني
ادحج بيها يربي الرجه تاير مطعوج يشين حظك يمروان يمه بهالمرة بس شبيدي عليك هاي كرادة حظي بعد .
حجت جدتي وكالتلو : ناصر وسام جايتك وعدها يم سالفة
– خير امري
– ما يامر عليك ظالم خالي بس انا كبل يومين فاتحت جديتي بسالفة مروان الني يريدلا مرة وانا وضعي صعب ما امن لياعي الجان اتخطبها وجديتي حجتلي اعلى نهلة
شو انا كلت نهلة وامها فزت من يمها : يساعة المباركة وين تلكى احسن من ابنج يوسام انت الطيبة ام كلب الحنين ما نلاكي احسن منكم
كلت بكلبي : احسن منا عشتو
طوابير الخطاطيب ازدحام وما تلاكي احسن منه
ولو انا وياهم غراب يكل لغراب وجهك اسود .. كتلها ؛ ورالنعم منج يم حامد دومج طيبة وكريمة
حجه خالي : مروان شيشتغل
– خالي ويا الحزبية يطكطك ويطلع هالكاسمة الله ونحن خير زارعة كاغي وحلالي جثير واريدلي وحدة تعاوني اعلى الكاع وتباريني ببني وانا هم كبرت ورايدة اشوف اولاد ابني كبل لا تحين ساعتي ما عرف اعلى يا ساعة تكضبني الشرطة ويعدموني هالرايدة ازوجه وحدة معدلة مثل نهلة تلمه وتسنده من الدنيا لو مالت وياه وانا اعرفك يخالي واعرف تربيتك والنعم منكم
– لا لا ادللي سهلة ان شاءالله اتخيري واخذي ما تعز عليج مرة يوسام
– الله يعزك خالي
والله رديت بخبر الموافكة لمروان جاب البيت طول بعرض يتمركص وفرحان حسبالك المكرود راح تجي ليلى علوي ما يدري بيها اسماعيل ياسين ولابسه شيلة
يركص ويهوس ولم اخوته يتراكصون وياه
وانا اكول ( اييييي اييييه يردح حيل الما شايفها )
رحت انا وياه اتسوكنا من البالة
وجبت جم كطعة بازة خيطتهن
ونعال وعباية مستعملة خذيتها ولميتلي بقجة نيشان للبت
واتفكت ويا خالي الجمعة الملچة وناخذها
خالي هم جهز بيته وعزم كرايبه
وانا عزمت ريسان كالي اجيب اختي ام احمد واجي
ومشينا بسيارة ريسان انا واخته وابن اخته احمد ومروان
وصلنا غاد نهلة مغشاية من فوك لي تحت
ملجوا وكضوا وهلهلنا وهلينا الواهلية
وخذينا البت ورحنا للجول وصلنا وزفيناهم لغرفتهم
عد ما زفينا ريسان كال : انا لهين ونترخص لاون نرد للبيت
– ضلو هين الليلة
– لا وراي شغل .. ياله مع السلامة
– الله يسلمك
دحجت اخته لا سلمت لا باركت ما عرلت ريسان طلع راحت ركض وياه .. جنها ما تودني
عسنها لا ودتني توني اريد اروح لغرفتي اتمدد
وما احس الا صوت مروان يصرخ ومفجوع : ييييييييييمه
صحتلو : وغمة هاذ الموجود يحسين فهمي شناطرني اجيبلك ليلى علوي
طلع من الغرفة واجالي : يممممممه ابروح ابوج يمه ابخت الله يمه رديني عزابي اخيرلي يممممه انا راضي اضل اعزب ردينيييييييي ….

يتبع..

لقراءة الفصل التالي : اضغط هنا

لقراءة باقي حلقات الرواية اضغط على : (رواية قلاع الضر)