رواية غرام الفصل السابع عشر 17 بقلم زهرة الربيع

رواية غرام الفصل السابع عشر 17 بقلم زهرة الربيع

رواية غرام البارت السابع عشر

رواية غرام الجزء السابع عشر

رواية غرام الحلقة السابعة عشر

وفجأه السخان الي جمبها عمل صوت شديد وطلع دخان وسحر صرخت بقوه
بدر كان دخل واول ما شاف الكهربه في كل مكان طلع بره الاوضه بسرعه واخد حد من العمال وراحو يقفلو لوحه الكهربه الرئيسيه للمكان كلو
بس عصام مفكرش بالعقل خالص اول ماشافها بتبكي برعب وشاف سلك الكهربه في البانيو والميه بتتسرب منو وقربت توصل لها دخل من غير تفكير وشد السلك من الميه بس للأسف داس على الميه الي على الارض وخد صدمة كهربه قويه جدامن السلك ووقع في الحال مغمي عليه
في الوقت ده كان بدر قفل الكهربه عن الاوتيل كلو ولسه هيطلع سمع سحر وغرام بيصرخو لما عصام اتكهرب
بدر طلع جري وقف عند باب الحمام واتفاجأ بعصام مغمى عليه وقف مكانو بخوف شديد وجري عليه بسرعه حاول يفوقو بس صدمة الكهربه كانت قويه عليه
بدر بص لقا سحر لافه الفوطه بس زعق في كل الموجودين يخرجو وفعلا الكل طلع وهو قلع الجاكت لبسهولها واخد عصام وطلع بيه بسرعه وهو بيقول…..انتو استنو هنا
سحر قالت ببكا…لا…لا…انا عايزه اطمن عليه
غرام قالت وسط دموعها….خلاص روح انت يا بدر واحناهنيجي مع السواق
بدر مستناش حتى يسمع وطلع بيه على اققرب مستشفى
بعد فتره كان بدر مستني خروج الدكتور من عند عصام بقلق شديد وسحر وغرام وصلو المستشفى
سحر كانت حالتها سيئه جدا من كتر الخوف والي حصل لعصام بسببها ساكته ومش بتتكلم بس دموعها بتنزل بغزاره
وهيه بتفتكر كل الوقت الي كانو يقضو سوا وقد ايه كان بيفهمها ويسمعها واحن عليها من اهلها حتى انو انقذها ومخافش على نفسو حست قلبها بيتقطع عليه
غرام كانت حزينه جدا على عصام بس شافت حالة سحر حاولت تهديها شويه قعدت جمبها وقالت…اهدي يا سحر عصام انسان طيب وربنا مش هيسيبو وان شاء الله هيقوم بالسلامه انت بس ادعيلو
اول ما قالت كده سحر حضنتها وبقت تبكي بشده وغرام صعبت عليها جدا بقت تهديها لحد ما الدكتور طلع من عند عصام
بدر جري عليه بلهفه وقال…ها يا دكتور فاق ولا لسه..هو كويس مش كده
الدكتور بعمليه…اهدى يا استاذ حضرتك من اهل المريض
بدر بسرعه…ايووه انا اخوه
الدكتور …احم… هو كويس وتمام بس..بس
بدر ابتدى الخوف يتملكو وقال …بس ايه يا دكتور عصام مالو
الدكتور…مخبيش على حضرتك صدمة الكهربه الي دخلتلو كانت سريعه ومأثرتش على الجسم ودا طبعا لانكم ذي ما قولتلي قفلت التيار بسرعه بس للأسف دراعو الي مسك السلك بيه اتأثر جدا وحاليا مش حاسس بيه ودا طبعا لان صدمة الكهربه الاكبر كانت على الدراع
بدر وقف مش قادر ينطق وسحر وغرام بقو يبكو بحزن شديد عليه بدر حاول يتكلم قال بتهته…هو…يعني..احم..دارعو..ات..اتشل مش كده
الدكتور…. هو حاليا منقدرش نجزم اذا اتشل شلل كامل او مجرد تقل من صدمة الكهربه الكلام ده يتحدد بعد اول جلستين علاج طبيعي اذا استجاب للعلاج يبقى الموضوع ان شاء الله فتره مؤقته واذا لا يبقى للاسف عجز في الدراع الايمن
سحر حطت ايدها على بقها بصدمه وقعدت على الكرسي بانهيار وغرام كانت دموعها على خدها قعدت جمبها تحاول تخفف عنها
بدر حاول يكون قوى لما شاف حالتهم قال ….لو سمحت يا دكتور ممكن نشوفه
الدكتور… اه طبعا بس لسه محدش قلو حاجه شوفو انتو الطريقه المناسبه الي متأثرش عليه نفسيا وربنا يطمنكم عليه
بدر دخل ودخلو سحر وغرام وراه
واول ما دخل حاول عصام يقعد باندفاع من غير ما يفكر في حاجه وقال بلهفه…سحر انتي كويسه …الحمد لله ..انك بخير قلقت عليكي وكن……
بس قطع كلامو لما خد بالو من اندفاعو وخاف ياخدو بالهم سحر كانت مستغربه كل الي عمله وكل الخوف ده بس حزنها الشديد عليه خلاها مش بتفكر في حاجه
بدر قعد جمبو بحزن شديد وقال بصوت مخنوق…انت كويس…حاسس بأيه
عصام بصلو وقال بابتسامه…انا بخير الحمد لله…بس دراعي يا اخي مش عارف مالو مش قادر احركو تقريبا من البنج مش عارف
هنا سحر مقدرتش تتماسك وبقت تبكي بانهيار وبدر كمان خانتو دموعو ونزلت بصمت وغرام كانت بتحاول تهدي سحر بس هيه كمان بتبكي
عصام استغرب منظرهم قوي وقلق جدا وقال…فيه ايه يا جماعه …فيه ايه يا بدر
بقلمي…زهرة الربيع
بدر بلع ريقه وحاول يتماسك وقال…لا ابدا مفيش…انت عارف البنات بتبقى حساسه ذياده ..هو يعني بص دراعك…متشنج شويه من السلك الي مسكتو بس…هتاخد كام جلسه كده ويتحرك ان شاء الله
عصام بص لدراعو بحزن وقال …وانت بقى زعلك ده كلو علشان دراعي متشنج شويه
بدر نزل راسو بحزن وسكت مردش
عصام ابتسم بألم وقال…اتشل ….مش كده ..
بدر بصلو وقال بدموع…ان شاء الله لا..الدكتور قال في الجلسات هيبان وبعدين انا مش هسيبك هسفرك لو اخر الدنيا وان شاء الله هترجع احسن من الاول
عصام ابتسم وحاول يتماسك رغم حزنو وقال….يا جماعه اهدو كل ده علشان دراعي دا انا افتكرت اني هموت ..وبعدين انا عندي واحد تاني اهو ولا منفعش معاكم بواحد بس
غرام قربت منو وقالت بمرح عكس الي جواها…انت تنفع معانا ولو مش بتتحرك خالص احنا بس قلقنا عليك يا عصوم ربنا يبعد اي شر عن قلبك يا عسل انت
عصام ضحك بخفه وسحر ابتسمت وسط دموعها بس بدر بقى بص لغرام بحده وغيره وقال بضيق…انا هنزل ادفع الحساب علشان نخرج
غرام خافت من نظرتو بس حبت تسيب سحر مع عصام لوحدهم قالت…خدني معاك يا بدر ونزلت معاه
واول ما طلعو بدر مسكها من دراعها بقوه وقال بغضب…عصوم …وعسل كمان بتعاكسيه قدامي حضرتك
غرام قالت بقوه عكس خوفها…وانا قولت ايه يعني مش بخفف عنو
بدر بعصبيه وهو مينفعش تخففي عنو من غير المياعه دي
غرام كاتمه ضحكتها بالعافيه من منظرو وقالت…مياعه…انت بتغير ولا ايه
بدر بعصبيه…. اعتبريها كده ومش عايز اشوفك بتكلمي اي راجل بالطريقه دي تاني ولا حتى ست مفهوم ومشي قدامها بغضب شديد
غرام قالت بهمس واستغراب …ولا ست….وعلت صوتها قاصده تسمعه وقالت…ولا طنط صفاء حتى
بدر ابتسم عليها وفضل مكمل وهيه مشيت وراه لحد ما مسكت ايده وهو ضغض على ايدها وابتسم وغرام كانت فرحانه بوجوده معاها جدا
سحر بقى قعدت جمب عصام وحطت ايدها على ايده وقالت بحزن ودموع انا …انا اسفه
عصام ابتسم وقال بحب واضح في عنيه…بتتأسفي على ايه يا هبله انتي لو حصلك حاجه انا كنت حصلتك
سحر بصتلو باستغراب من كلمتو وبقت تبص في عنيه الي اول مره تبص فيهم اصلا وحست انها مشدوده ليهم قوي ومش حابه تبعد عنيها عنه قالت بتوهان…انا كنت هموت عليك مكنتش اعرف انك غالي عندي اوي كده
عصام حس بسعاده شديده وقال وهو مركذ معاها…بجد…بجد يا سحر انا غالي عندك
سحر بصتلو باعجاب وتركيذ في ملامحو الجذابه وكأنها اول مره تشوفو وقالت بصوت اشبهه بالهمس….جدا
عصام كمان كان مركذ في عنيها جدا وقرب منها لا اراديا وحط ايده على خدها بيمسح دموعها برقه وسحر اتخدرت من لمستو غمضت عنيها وقربت منو والتنين قلبهم بيدق بعنف وعصام قرب بشفا.يفو من شفا.يفها
بس انقطعت لحظتهم الجميله لما سمعو صوت بدر بيتكلم مع غرام جمب الاوضه سحر اول ما سمعتو قامت بسرعه وتوتر شديد وبدر دخل وفضل يبصلهم باستغراب لما شافهم
مرتبكين جدا
بدر باستغراب….فيه حاجه ولا ايه
سحر بسرعه وارتباك…لا ابدا هيكون فيه ايه يعني ..انا انا…هستناكم بره وطلعت بسرعه وهيه مصدومه من الي حصل وازاي قربت منو كده وازاي كانت راضيه بالي بيحصل فضلت متوتره ومكسوفه جدا ومش عارفه هتبصلو تاني ازاي
عصام بقى رغم انو كان مبسوط جدا لانو اول مره يحس الحظه دي مع سحر حببتو الي بيتمناها من زمان لاكن كان في نفس الوقت زعلان من نفسو وحاسس انو بيخون صاحب عمره
طلعو كلهم من المستشفى وراحو على الاوتيل وسحر وعصام بيتحاشو يبصو لبعض وكل واحد فيهم بيفكر ازاي ده حصل
في الاوتيل اول ما وصلو جالهم مدير الاوتيل وكان متوتر جدا وكان بيعتذر عن الي حصل وهو خايف من اي اجراء او شكوى تبوظ سمعة المكان
بس الغريب ان بدر مهتمش وقال… تمام مفيش مشكله خليهم يظبطو اوضة الانسه سحر وخدو بالكم من كميرات المراقبه اكتر وسابو وطلع من غير ما يرد عليه وهو عارف ومتأكد مين المسؤول
بدر طلع على طول على اوضة عماد واول ما فتحلو قال بحزم…ممكن اعرف سحر دخلها ايه بالي بنا
عماد ببرود …لا ملهاش دخل بس اي حاجه تلهيك وتدايقك والسلام
بدر اتضايق جدا وحاول يسيطر على نفسو وقال…طلباتك يا عماد… انا موافق من قبل ما تقول عليهاخلينا نفض الوضع ده كلو …لو قولتلي على الي عايز اعرفه هديلك كل الي تطلبو مهما كان ها قولت ايه
عماد باستفزاز وبرود…انا موافق ومستعد اقولك الي انت عايزه حالا بس بقى انت هتديني الي هطلبو ولا هتطلع عيل وترجع في كلامك
بدر بضيق شديد…قولتلك موافق الي عايزه هديهولك شركه..مصنع…ان شاله حتى كل املاكي لو عايز القصر الي ساكن فيه هدهولك خلصني وقول
عماد قعد على الكرسي باستفزاز وابتسم بانتصار وقال….عايز حاجه واحده بس….غرام القاضي…مراتك ووووووو

يتبع….

لقراءة الفصل التالي : اضغط هنا

لقراءة باقي حلقات الرواية اضغط على : (رواية غرام)